ໃນລະຫວ່າງວັນທີ 9-15 ສິງຫາ 2022 ນີ້, ທ່ານ ຫງວຽນ ວັນ ເມື່ອຍ ຮອງຫົວໜ້າສະຖາບັນຄົ້ນຄວ້າ ແລະ ພັດທະນາແນວພັນພືດ ສສ ຫວຽດນາມ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນວາລະການເຄື່ອນໄຫວ ຄະນະໄດ້ເຂົ້າຢ້ຽມຂ່ຳນັບ ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ. ພ້ອມກັນນັ້ນ, ທ່ານ ສຸລິປັນຍາ ຣາຊສົມບັດ ຫົວໜ້າສູນຝຶກອົບຮົມ ສູນກາງແນວລາວສ້າງຊາດ, ທ່ານ ນາງ ແສງດາວ ບຸບພະກອນຄໍາ ຮອງປະທານ ກຸ່ມບໍລິສັດພົງສະຫວັນ ຈຳກັດ ພ້ອມດ້ວຍພະນັກງານວິຊາການທີ່ກ່ຽວຂ້ອງຂອງທັງສອງພາກສ່ວນເຂົ້າຮ່ວມ.
ໃນການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້ ຄະນະສະຖາບັນຄົ້ນຄວ້າ ແລະ ພັດທະນາແນວພັນພືດ ສສ ຫວຽດນາມ ໄດ້ໄປຢ້ຽມຢາມ-ພົບປະແລກປ່ຽນກັບກອງທຶນບ້ານສາມັກຄີແນວລາວສ້າງຊາດ ຢູ່ບ້ານພູໂອຍ ເມືອງປາກຊ່ອງ ແຂວງຈຳປາສັກ, ພົບປະແລກປ່ຽນກັບໂຄງການຊຸກຍູ້-ສົ່ງເສີມການຜະລິດໃຫ້ເປັນສິນຄ້າ ຂອງກອງທຶນບ້ານສາມັກຄີແນວລາວສ້າງຊາດ ຢູ່ບ້ານພັນທະຄາມ ເມືອງຈຳປາສັກ ແຂວງຈຳປາສັກ; ຢ້ຽມຊົມໜອງປາປະຊາຊົນທີ່ເຂົ້າຮ່ວມໂຄງການ; ຢ້ຽມຊົມຄອງຊົນລະປະທານຂອງໂຄງການ ແລະ ໄປແລກປ່ຽນບົດຮຽນກັບສູນກະສິກໍາກອງທຶນບ້ານສາມັກຄີແນວລາວສ້າງຊາດ ບ້ານດົງຄໍາໝື່ນ ເມືອງຈຳພອນ ແຂວງສະຫວັນນະເຂດ; ຢ້ຽມຊົມໂຄງການພັດທະນາກະສິກຳ ຄົບວົງຈອນ ແບບທັນສະໄໝ ບ້ານໂພນເຍຍນ້ອຍ ເມືອງທ່າແຂກ ແຂວງຄຳມ່ວນ; ໄປຢ້ຽມຢາມໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ຢູ່ເຂດຈຸດສຸມ 516 ກຸ່ມບ້ານໂພນສະຫວາດ ເມືອງລ້ອງຊານ ແຂວງໄຊສົມບູນ ເພື່ອແລກປ່ຽນບົດຮຽນທາງດ້ານເຕັກນິກວິຊາການ ເປັນຕົ້ນແມ່ນແນວພັນພືດ, ແນວພັນປາ, ແນວພັນໝູ, ວິທີການປູກ, ວິທີການລ້ຽງ ແລະ ການບຳລຸງຮັກສາ.
ພ້ອມກັນນີ້, ກໍໄດ້ມີຄວາມເປັນເອກະພາບເຊັນບົດບັນທຶກຄວາມເຂົ້າໃຈຮ່ວມມື ລະຫວ່າງ ກຸ່ມບໍລິສັດ ພົງສະຫວັນ ຈໍາກັດ, ບໍລິສັດ ໄພບູນ ການຄ້າ ຂາອອກ-ຂາອອກ ຈໍາກັດ, ບໍລິສັດ ສະຫວັນສົ່ງເສີມການຜະລິດເປັນສິນຄ້າ ຈໍາກັດຜູ້ດຽວ ກັບ ສະຖາບັນຄົ້ນຄວ້າ ແລະ ພັດທະນາພັນພືດ ສສ ຫວຽດນາມ ເພື່ອປະສານງານຮ່ວມກັນຢ່າງສະໝໍ່າສະເໝີ, ຍາວນານ ແລະ ໝັ້ນຄົງ ບົນພື້ນຖານການເສີມຂະຫຍາຍພາລະບົດບາດໜ້າທີ່ຂອງແຕ່ລະຝ່າຍ ແລະ ລະດົມແຫຼ່ງຊັບພະຍາກອນມະນຸດເພື່ອປະຕິບັດໃຫ້ມີປະສິດທິຜົນໃນການໃຫ້ຄຳປຶກສາ, ການຝຶກອົບຮົມ ແລະ ຖ່າຍທອດເຕັກໂນໂລຊີ ໃນຂົງເຂດຊົນລະປະທານ, ການນໍາໃຊ້ພະລັງງານແສງອາທິດ, ການປູກເຂົ້າຂະໜາດໃຫຍ່, ເຕັກນິກການປຸງແຕ່ງໝາກໄມ້ໃຫ້ໝາກ, ການລ້ຽງປາ ແລະ ການລ້ຽງກຸ້ງ ຢູ່ແຂວງສະຫວັນນະເຂດ, ແຂວງຈໍາປາສັກ, ແຂວງຄໍາມ່ວນ, ແຂວງໄຊສົມບູນ ແລະ ນະຄອນຫຼວງວຽງຈັນ.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
