ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມສະຫຼຸບກວດກາໜ່ວຍພັກປະຈຳປີ 2021 ແລະ ເຊື່ອມຊຶມເອກະສານກ່ຽວກັບວຽກງານໜ່ວຍພັກ ແລະ ສະມາຊິກພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ຂຶ້ນໃນວັນທີ 12 ກໍລະກົດ ນີ້ ທີ່ກະຊວງດັ່ງກ່າວໂດຍການເປັນປະທານຂອງ ສະຫາຍ ນາງ ສວນສະຫວັນ ວິຍະເກດ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ຖວທ, ສະຫາຍ ວັນສີ ກົວມົວ ກຳມະການສຳຮອງສູນກາງພັກ ຮອງເລຂາພັກ ທັງເປັນປະທານກວດກາພັກ ກະຊວງ ຖວທ, ມີບັນດາສະຫາຍເລຂາຄະນະພັກຮາກຖານເລຂາຄະນະໜ່ວຍອ້ອມຂ້າງ ກະຊວງ ຖວທ ເຂົ້າຮ່ວມ.
ສະຫາຍ ນາງ ສວນສະຫວັນ ວິຍະເກດ ໄດ້ໂອ້ລົມ ແລະ ໃຫ້ທິດຊີ້ ນຳແກ່ບັນດາສະຫາຍ ເລຂາຄະນະພັກຮາກຖານ ເລຂາຄະນະໜ່ວຍວ່າ: ພັກປະຊາຊົນ ປະຕິວັດລາວ ກໍ່ສ້າງ ແລະ ປັບປຸງຕົນເອງຕາມສາມທິດນຳຄື: ກໍ່ສ້າງພັກໃຫ້ ປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ, ການຈັດຕັ້ງ ແລະ ແບບແຜນການນຳພາ, ການກໍ່ສ້າງປັບປຸງພັກຕ້ອງຖືເອົາຄຸນນະພາບເປັນກົກ ຮັບເອົາຜູ້ດີເດັ່ນ ເຂົ້າເປັນສະມາຊິກພັກ, ເດັດດ່ຽວເອົາຜູ້ເສື່ອມຄຸນປ່ຽນທາດອອກຈາກພັກ, ສົມທົບແໜ້ນລະຫວ່າງການເພີ່ມທະວີການນຳພາຂອງພັກ, ພາຍໃນພັກຖືເອົາການກໍ່ສ້າງໜ່ວຍພັກ, ສະມາຊິກພັກປອດໃສ, ເຂັ້ມແຂງ ໜັກແໜ້ນໃນແຕ່ລະປີເປັນໄມ້ຫຼາວັດແທກຄຸນທາດການເມືອງ ຂອງສະມາຊິກພັກ ແລະ ການນຳພາຂອງຄະນະພັກຢູ່ໃນບັນດາກົມກອງ ອ້ອມຂ້າງກະຊວງ ຖວທ, ຜ່ານການຈັດຕັ້ງປະຕິບັດຕົວຈິງໃນແຕ່ລະປີເຫັນວ່າ ຍັງມີຫຼາຍບັນຫາທີ່ຕ້ອງໄດ້ປັບປຸງ ໂດຍສະເພາະການຮັບຮູ້ ແລະ ເຊື່ອມຊຶມເອກະສານສຳຄັນຕ່າງໆຂອງພັກ ມັນສະແດງອອກເວລາຕີລາຄາແບ່ງປະເພດໜ່ວຍພັກ ສະມາຊິກພັກ ຍັງແລ່ນນຳປະລິມານເປັນສ່ວນຫຼາຍບໍ່ທັນສະແດງໃຫ້ເຫັນການຊີ້ນຳ-ນຳພາທີ່ເຂັ້ມແຂງຂອງຄະນະພັກ ຍ້ອນແນວນັ້ນເຮັດໃຫ້ສະມາຊິກບາງສະຫາຍຂາດຄວາມເປັນແບບຢ່າງ ເຮັດຜິດຕໍ່ລະບຽບກົດໝາຍ ຖືກລົງວິໄນ ເຮັດໃຫ້ເສື່ອມເສຍການຈັດຕັ້ງພັກ ແລະ ລັດເພື່ອແກ້ໄຂບັນຫາ ແລະ ຮຽກຮ້ອງໃຫ້ຄະນະພັກທຸກຂັ້ນ ຈະຕ້ອງໄດ້ກຳ ແໜ້ນເນື້ອໃນຈິດໃຈ, ມາດຕະຖານການຕີລາຄາແບ່ງປະເພດໜ່ວຍພັກ ແລະ ສະມາຊິກພັກໃຫ້ຖືກຕ້ອງ ຊັດເຈນ ພາວະວິໃສຊອກໃຫ້ເຫັນຜູ້ດີເດັ່ນເປັນແບບຢ່າງເພື່ອເປັນເປົ້າໝາຍໃນການສ້າງເປັນພະນັກງານສືບທອດປ່ຽນແທນໃນໃນຕໍ່ໜ້າ.
ກອງປະຊຸມຄັ້ງນີ້, ໄດ້ສະເໜີບົດສະຫຼຸບ 2021 ແລະ ແຜນ 2022 ຕີລາຄາຄຸນນະພາບ ແລະ ແບ່ງປະເພດໜ່ວຍພັກ ແລະ ສະມາຊິກພັກປອດໃສ, ເຂັ້ມແຂງ, ໜັກແໜ້ນ; ເຜີຍແຜ່ຄຳສັ່ງສະບັບເລກທີ 01/ກມສພ, ລົງວັນທີ 3 ມັງກອນ 2018, ເຜີຍແຜ່ຄຳແນະນຳ ສະບັບເລກທີ 291/ຄຈສພ ລົງວັນທີ 26 ເມສາ 2018 ວ່າດ້ວຍການປະຕິບັດຄໍາສັ່ງເລກທີ 01/ກມສພ ລົງວັນທີ 3 ມັງກອນ 2018 ຂອງຄະນະຈັດຕັ້ງສູນກາງພັກ ວ່າດ້ວຍການເພີ່ມທະວີການກໍ່ສ້າງພັກປອດໃສ, ເຂັ້ງແຂງ, ໜັກແໜ້ນ, ເຜີຍແຜ່ບົດແນະນຳ ສະບັບເລກທີ 104/ຄພກຊ ລົງວັນທີ 6 ສິງຫາ 2018, ແນະນໍາຮ່າງບົດສະຫຼຸບຕີລາຄາໜ່ວຍພັກ, ແນະນຳຮ່າງບົດສຳຫຼວດຕີລາຄາສະມາຊິກພັກ.
ໃນພິທີ, ສະຫາຍ ນາງ ສວນສະຫວັນ ວິຍະເກດ ຍັງໄດ້ໃຫ້ກຽດມອບໃບຢັ້ງຢືນໜ່ວຍພັກປອດ ໃສ, ເຂັ້ມແຂງ, ໜັກແໜ້ນ ປະຈຳປີ 2021 ໃຫ້ບັນດາໜ່ວຍພັກອ້ອມຂ້າງກະຊວງ ຖວທ ຕື່ມອີກ.
#Medialaos MMD
