ໃນໂອກາດວັນສ້າງຕັ້ງສື່ມວນຊົນແຫ່ງຊາດ ແລະ ວັນການພິມຈຳໜ່າຍ (ວັນທີ 13 ສິງຫາ 1950-13 ສິງຫາ 2022) ຄົບຮອບ 72 ປີ, ທ່ານ ບຸນທົງ ຖິ່ນດອນໂຂງ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ແຂວງເຊກອງ ໃຫ້ສຳພາດຕໍ່ສື່ມວນຊົນ ໃນວັນທີ 9 ສິງຫາ ຜ່ານມາວ່າ: ວຽກງານຖະແຫລງຂ່າວ-ສື່ມວນຊົນຢູ່ແຂວງເຊກອງ ກໍຄື ແຂວງອື່ນໆໃນທົ່ວປະເທດ ແມ່ນມີບົດບາດສຳຄັນໃນວຽກງານການເມືອງ-ແນວຄິດ, ປະກອບສ່ວນໂຄສະນາເຜີຍແຜ່ແນວທາງນະໂຍບາຍ ຂອງພັກ, ກົດໝາຍຂອງລັດ ສ່ອງແສງຄວາມມຸ່ງມາດປາຖາໜາ ແລະ ຂະບວນການເຄື່ອນໄຫວຂອງປະຊາຊົນບັນດາເຜົ່າ. ມີບົດບາດສໍາຄັນ ເພື່ອປຸກລະດົມໃຫ້ທຸກຊັ້ນຄົນເຂົ້າຮ່ວມໃນການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນແຕ່ລະໄລຍະ, ຍົກລະດັບຄວາມຮູ້ດ້ານຕ່າງໆໃຫ້ແກ່ປະຊາຊົນ, ສ່ອງແສງວຽກດີຄົນເດັ່ນ, ປະກອບສ່ວນຕ້ານປະກົດການຫຍໍ້ທໍ້ຕ່າງໆ, ຕອບຕ້ານການໂຄສະນາບິດເບືອນ ແລະ ໃສ່ຮ້າຍປ້າຍສີ ຂອງກຸ່ມຄົນທີ່ບໍ່ຫວັງດີຕໍ່ລະບອບໃໝ່ ແລະ ຕໍ່ແນວທາງແຜນນະໂຍບາຍຂອງພັກ-ລັດຖະບານ.
ນອກຈາກນີ້, ສື່ມວນຊົນຢູ່ແຂວງເຊກອງ ຍັງໄດ້ປະກອບສ່ວນສຳຄັນ ໃນພາລະກິດ ລວມແຫ່ງການປົກປັກຮັກສາ ແລະ ພັດທະນາປະເທດຊາດ ອັນພົ້ນເດັ່ນ ແມ່ນການປຸກລະ ດົມປະຊາຊົນ ປະຕິບັດຕາມແນວທາງນະໂຍບາຍຂອງພັກ, ແຜນພັດທະນາເສດຖະກິດສັງຄົມຂອງລັດໄດ້ເປັນຢ່າງດີ ເປັນຕົ້ນແມ່ນບັນດາຄາດໝາຍ ການແກ້ໄຂຄວາມທຸກຍາກຂອງປະຊາຊົນ, ປຸກລະດົມຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຊຸກ ຍູ້ວຽກງານ 3 ສ້າງ, ຂະບວນການຜະລິດເປັນສິນຄ້າ ແລະ ບັນດາຄາດໝາຍອື່ນໆຢ່າງມີໝາກຜົນ.
ໃນຍຸກປັດຈຸບັນ, ສື່ແບບໃໝ່ໄດ້ມີບົດບາດສູງ ພວກເຮົາກໍໄດ້ພັດທະນາຕາມຍຸກສະ ໄໝ, ເຮັດໃຫ້ການສະໜອງຂໍ້ມູນຂ່າວສານມີຄວາມວ່ອງໄວ ແລະ ທັນສະໄໝ ເປັນຕົ້ນແມ່ນເວັບໄຊ ຂອງພະແນກ ຖວທ (www.sekong-dict.gov.la) ແລະ ເຟສບຸກ (ຂ່າວເຊກອງ), ເຟສບຸກ ໂທລະພາບແຂວງເຊກອງ. ພ້ອມນີ້, ພວກເຮົາຈະໄດ້ພ້ອມກັນອອກ ແຮງເຜີຍແຜ່ກົດໝາຍວ່າດ້ວຍສື່ມວນຊົນ ໃຫ້ມີລັກສະນະກວ້າງຂວາງ ແລະ ທົ່ວເຖິງ ເພື່ອ ໃຫ້ທຸກຄົນໃນສັງຄົມຮັບຮູ້ສິດເສລີພາບຂອງພົນລະເມືອງລາວ ດ້ານສື່ມວນຊົນ ເຊິ່ງສະ ແດງອອກດ້ວຍການປະກອບຄຳເຫັນ ໃຫ້ທັດສະນະ ແລະ ສາມາດເຂົ້າເຖິງຂໍ້ມູນຂ່າວສານ ທັງພາຍໃນ ແລະ ຕ່າງປະເທດ ກ່ຽວກັບສະພາບການ, ສາລະຄວາມຄວາມຮູ້, ສາລະບັນເທີງ ແລະ ບັນຫາອື່ນໆ ທີ່ບໍ່ຂັດກັບກົດໝາຍ ແລະ ລະບຽບການ.
ໂອກາດນີ້, ທ່ານ ບຸນທົງ ຖິ່ນດອນໂຂງ ກໍໄດ້ຮຽກຮ້ອງມາຍັງມວນຊົນ ຢູ່ບັນດາພະແນກການອ້ອມຂ້າງແຂວງໃຫ້ພ້ອມກັນຍຶດຖືຈັນຍາບັນຂອງນັກຂ່າວລາວ, ເປັນເຈົ້າການນຳສະເໜີຂໍ້ມູນຂ່າວສານ ໃຫ້ຮັບປະກັນ 4 ລັກສະນະຕົ້ນຕໍຄື: ລັກສະນະຕົວຈິງ, ລັກສະ ນະສຶກສາອົບຮົມ, ລັກສະນະແນະນຳ ແລະ ລັກສະນະຕໍ່ສູ້. ສິ່ງສຳຄັນນັກຂ່າວ ຕ້ອງດຳລົງຊີວິດທີ່ສົດໃສ, ສີວິໄລ, ໄປຮ່ຳຮຽນ, ຖະໜອມຖ່ອມຕົວ ເພື່ອຄວາມກ້າວໜ້າ, ການຍົກລະດັບຄວາມຮູ້, ຄວາມສາມາດ, ຄວາມຊຳນິຊຳນານງານໃນວິຊາຊີບຂອງຕົນແມ່ນຄວາມມຸ່ງຫວັງ ແລະ ການສູ້ຊົນຕະຫລອດຊີວິດຂອງນັກຂ່າວພວກເຮົາ. ດັ່ງຄໍາສຸພາສິດທີ່ວ່າ: ນັກຂ່າວເປັນເຈົ້າພັນຕາ ພະຍາພັນຫູ ຈົ່ງພູມໃຈໃນໜ້າທີ່ອັນໜັກໜ່ວງ ແຕ່ມີກຽດສະຫງ່າ.
