ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ວັນທີ 9-10 ສິງຫາ 2022 ນີ້, ກະຊວງເຕັກໂນໂລຊີ ແລະ ການສືສານ ເຜີຍແຜ່ວຽກງານປະເມີນຄວາມພ້ອມ ໃນການຫັນເປັນດີຈິຕອນ ແລະ ສຳຫລວດເກັບກຳຂໍ້ມູນ ເພື່ອຮ່າງແຜນພັດທະນາລັດຖະບານດີຈິຕອນຢູ່ແຂວງຫລວງນໍ້າທາ.
ທ່ານ ສົມໄພວັນ ແສງສຸຣິຍະ ຮອງຫົວໜ້າສູນບໍລິຫານລັດດີຈິຕອນ ກະຊວງເຕັກໂນໂລຊີ ແລະ ການສືສານ ໄດ້ໃຫ້ຮູ້ວ່າ: ໂລກປັດຈຸບັນ ແມ່ນກ້າວເຂົ້າສູ່ຍຸກດີຈິຕອນ ທີ່ມີການພັດ ທະນາດ້ານເຕັກໂນໂລຊີທັນສະໄໝຢ່າງວ່ອງໄວ ແລະ ກ້າວກະໂດດແບບບໍ່ເຄີຍມີມາກ່ອນ, ເຮັດໃຫ້ມີການຫັນປ່ຽນໃນຫລາຍດ້ານ ເປັນຕົ້ນ ປ່ຽນໂຄງສ້າງທາງເສດຖະກິດ, ຂະບວນການຜະລິດຈາກກະສິກຳແບບພື້ນຖານດັ້ງເດີມ ມາເປັນການນຳໃຊ້ເຄື່ອງຈັກທັນສະໄໝ, ການຄ້າຂາຍຢູ່ຕະ ຫລາດມາເປັນການຊື້-ຂາຍອອນລາຍ, ການບໍລິການ ແລະ ຂະບວນການທາງສັງຄົມອື່ນໆ ເຊິ່ງໄດ້ສ້າງຜົນປະໂຫຍດອັນມະຫາສານ ໃນການພັດທະນາເສດຖະກິດ-ສັງຄົມ ກໍຄື ການພັດທະ ນາຊີວິດການເປັນຢູ່ ຂອງປະຊາຊົນໃຫ້ດີຂຶ້ນ; ການແພ່ລະບາດຂອງພະຍາດໂຄວິດ-19 ໃນໄລ ຍະຜ່ານມາ ກໍເປັນຕົວເລັ່ງໜຶ່ງໃນການພັດທະນາ ແລະ ນໍາໃຊ້ ເຕັກໂນໂລຊີດີຈິຕອນຫລາຍຂຶ້ນ, ຍິ່ງເຮັດໃຫ້ທຸກຂະແໜງການຕ້ອງໄດ້ປັບໂຕຢ່າງວ່ອງໄວ, ຫັນປ່ຽນວິຖີການດຳລົງຊີວິດແບບໃໝ່ ເປັນຕົ້ນ ແບບແຜນວິທີການເຮັດວຽກ, ການປະຊຸມທາງໄກ, ການຮຽນການສອນທາງໄກ, ການຄ້າຂາຍອອນລາຍ ແລະ ອື່ນໆ.
ສຳລັບ ສປປ ລາວ ການຫັນເປັນທັນສະໄໝ ທາງດ້ານດດີຈິຕອນນີ້, ກໍເປັນວຽກໜຶ່ງໃນແຜນບຸລິມະສິດຂອງລັດຖະບານ ໂດຍການຫັນນຳໃຊ້ເຕັກໂນໂລຊີດີຈິຕອນ ເພື່ອເປັນເຄື່ອງ ມືສຳຄັນໃນການຊຸກຍູ້ ແລະ ຂັບເຄື່ອນການພັດທະນາເສດຖະກິດ-ສັງຄົມຂອງຊາດ ໃຫ້ກ້າວໄປສູ່ເສດຖະກິດດີຈິຕອນ ແລະ ສັງຄົມດີຈິຕອນຕໍ່ໄປ ເຊິ່ງລັດຖະບານ ກໍຄື ກະຊວງ ເຕັກໂນໂລຊີ ແລະ ການສື່ສານ ກໍໄດ້ສ້າງແຜນຍຸດທະສາດ 10 ປີ ແລະ ແຜນແມ່ບົດການພັດທະນາເສດຖະກິດດີຈິຕອນແຫ່ງຊາດ ທີ່ໄດ້ຜ່ານການຮັບຮອງຈາກສະພາແຫ່ງຊາດ ໃນທ້າຍປີ 2021 ເປັນໃນໄລຍະຈັດຕັ້ງຜັນຂະຫຍາຍແຜນແມ່ບົດດັ່ງກ່າວ ເຂົ້າໃນວຽກງານຕົວຈິງ ແລະລັດຖະ ບານ ໄດ້ມອບໃຫ້ກະຊວງເຕັກໂນໂລຊີ ແລະ ການສື່ສານ ເປັນໃຈກາງສົມທົບກັບທຸກຂະແໜງ ການໃນການພັດທະນາ, ຄຸ້ມຄອງ ແລະ ສົ່ງເສີມການນຳໃຊ້ ເຕັກໂນໂລຊີດີຈິຕອນ ເຂົ້າໃນທຸກຂົງເຂດວຽກງານ ຢ່າງກວ້າງຂວາງ ເພື່ອຫັນວຽກງານການບໍລິຫານ ແລະ ບໍລິການລັດ ເປັນທັນສະໄໝ, ຮັບໃຊ້ສັງຄົມ ກໍຄື ປະຊາຊົນໃຫ້ມີປະສິດທິພາບສູງ, ສະດວກ, ວ່ອງໄວ ແລະ ຮັບປະກັນຄວາມປອດໄພ.
ເພື່ອຕອບສະໜອງຈຸດປະສົງດັ່ງກ່າວ, ກະຊວງເຕັກໂນໂລຊີ ແລະ ການສື່ສານ ກໍໄດ້ພະຍາຍາມພັດທະນາລະບົບບໍລິຫານລັດດີຈິຕອນ ເປັນຕົ້ນ ແມ່ນລະບົບກອງປະຊຸມທາງໄກ,ລະບົບຫ້ອງການລັດທັນສະໄໝ, ລະບົບສື່ສານພາກລັດ ແລະ ອື່ນໆ ເພື່ອສະໜອງ ແລະ ບໍລິ ຫານໃຫ້ແກ່ພາກລັດ ເຊິ່ງມັນໄດ້ກາຍເປັນເຄື່ອງມືທີ່ສໍາຄັນ ໃນການຕິດຕໍ່ສື່ສານ ແລະ ການຈັດກອງປະຊຸມຜ່ານທາງອອນລາຍ ຂອງອົງການຈັດຕັ້ງພັກ-ລັດ ທັງພາຍໃນ ແລະ ສາກົນ, ສາມາດປະຫຍັດລາຍຈ່າຍຂອງພາກລັດ ໄດ້ຢ່າງຫລວງຫລາຍ.
ເມື່ອທຽບກັບບັນດາປະເທດພາກພື້ນ ແລະ ສາກົນ ປີ 2020, ສປປ ລາວ ແມ່ນຢູ່ອັນດັບ 167 ໃນຈຳນວນ 193 ປະເທດທົ່ວໂລກ, ວຽກງານດັ່ງກ່າວ ຍັງເປັນເຄື່ອງມືສ້າງກິດ ຈະກຳລົງສຳຫລວດເກັບກຳຂໍ້ມູນ ແລະ ປະເມີນຄວາມພ້ອມດ້ານດີຈິຕອນຂອງປະເທດເຮົາ ເຮັດໃຫ້ພວກເຮົາຮູ້ໄດ້ເຖິງ ສະພາບການພັດທະນາລັດຖະບານດີຈິຕອນ ຂອງ ສປປ ລາວ ວ່າມີການພັດທະນາແນວໃດ, ແຜນຍຸດທະສາດ, ນະໂຍບາຍ ແລະ ນິຕິກຳມີຫຍັງແດ່, ມີຄວາມພ້ອມດ້ານຕ່າງໆຄືແນວໃດ ເພື່ອເປັນຂໍ້ມູນພື້ນຖານອັນສຳຄັນ ແລະ ເປັນບ່ອນອີງ ໃນການສຶກສາແນວທາງສ້າງແຜນແມ່ບົດພັດທະນາລັດຖະບານດີຈິຕອນ ແລະ ສ້າງເປັນມາດຕະຖານ ລວມໃນການພັດທະນາ ແລະ ສົ່ງເສີມການຫັນເປັນລັດຖະບານດີຈິຕອນ ໃນ ສປປ ລາວ ໃຫ້ສົມບູນຍິ່ງຂຶ້ນ ແລະ ເພື່ອໃຫ້ທຸກພາກສ່ວນ ພັດທະນາໄປໃນທາງດຽວກັນ ທັງສູນກາງ ແລະ ທ້ອງຖິ່ນ.
ຂ່າວ: ກິ່ນນາລົມ
