ທ່ານ ບົວລຳ ຄຳລ້ອມ ຄະນະສູນໄຂ້ຍຸງແມ່ກາຝາກ ແລະ ແມງໄມ້ ກະຊວງສາທາລະນະສຸກໄດ້ລາຍງານໃຫ້ຮູ້ເມື່ອບໍ່ດົນມານີ້ວ່າ: ອີງຕາມຂໍ້ມູນຜ່ານມາ ພົບວ່າການລະບາດຂອງພະຍາດໄຂ້ຍຸງລາຍມີຫຼາຍແຫ່ງໃນຂອບເຂດທົ່ວປະເທດ ໂດຍສະເພາະແມ່ນນະຄອນຫຼວງວຽງຈັນ ມີການລະບາດຂອງພະຍາດໄຂ້ຍຸງຫຼາຍກວ່າແຂວງອື່ນ ແລະ ອັດຕາການເສຍຊີວິດເພີ່ມຂຶ້ນ, ສະນັ້ນ ຮຽກຮ້ອງໃຫ້ບັນດາທ່ານຈົ່ງມີຄວາມລະມັດລະວັງເອົາໃຈໃສ່ໃຫ້ກຳລັງໃຈຊຶ່ງກັນ ແລະ ກັນ, ພ້ອມກັນຕ້ານ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ໂດຍສະເພາະໃຫ້ເອົາໃຈໃສ່ອະນາໄມອ້ອມແອ້ມເຮືອນຊານຂອງຕົນ ບ່ອນທີ່ມີກະໂປະກະປ໋ອງ, ນ້ຳອັງຂັງ, ມີຕົ້ນໄມ້ໃຫຍ່ຮົກເຮື້ອຫຼາຍຕ້ອງໄດ້ຕັດຮອນຖິ້ມ ເພື່ອບໍ່ໃຫ້ມີນ້ຳຕົກຄ້າງ ແລະ ຮົ່ມອັນເປັນບ່ອນອາໄສ, ວາງໄຂ່ຂອງຍຸງລາຍ, ພ້ອມນີ້ຍັງຕ້ອງໄດ້ເອົາໃຈໃສ່ ລະບາຍຮ່ອງນ້ຳບໍ່ໃຫ້ມີນ້ຳອັງຂັງ, ທຳຄວາມສະອາດເຮືອນຊານໃຫ້ສະອາດງາມຕາຢູ່ສະ ເໝີ, ອີກຢ່າງໜຶ່ງຖ້າມີອ່າງໃຫຍ່ບໍ່ສາມາດລະບາຍນ້ຳໄດ້, ມີຝາປົກປິດແລ້ວແຕ່ຍັງມີໜອນນ້ຳຍຸງລາຍ ຕ້ອງໄດ້ປຶກສາບ້ານ, ພະນັກງານສາທາເມືອງຂອງແຕ່ລະແຂວງ, ບ່ອນໃດມີການລະບາດຫຼາຍໃນເຂດຊຸມຊົນຕ້ອງມີມາດຕະການໃນການຈັດຕັ້ງປະຕິບັດ ໂດຍສະເພາະແມ່ນການສຳຫຼວດໜອນນ້ຳຍຸງລາຍ, ການພົ່ນຢາ ແລະ ອື່ນໆ, ໃນນັ້ນຕ້ອງໄດ້ປະຕິບັດຫຼັກການ 5 ປ ເປັນປະຈຳ ສ່ວນຫຼາຍປະຊາຊົນຍັງຖືເບົາບໍ່ປະຕິບັດມີແຕ່ອາໄສພາກສ່ວນອື່ນລົງໄປປະຕິບັດ ເພື່ອເຮັດໃຫ້ການລະບາດໄຂ້ຍຸງລາຍຫຼຸດໜ້ອຍຖອຍລົງບໍ່ມີການຕາຍ, ການເຈັບເປັນແມ່ນທຸກຄົນໃນຄອບຄົວຕ້ອງເປັນເຈົ້າການຮ່ວມກັນປະຕິ ບັດໃຫ້ໄດ້.
ທ່ານກ່າວຕື່ມວ່າ: ຖ້າທຸກຄົນປະຕິບັດບໍ່ໄດ້ເຊື່ອແນ່ວ່າທ້າຍປີ 2022 ນີ້ ຍັງຈະມີຈຳນວນການເສຍຊີວິດ ແລະ ການເຈັບເປັນ ຍ້ອນໄຂ້ຍຸງລາຍເພີ່ມຂຶ້ນ, ຍຸງລາຍໂຕໜຶ່ງສາມາດເຮັດໃຫ້ປະຊາຊົນເປັນພະຍາດໄຂ້ຍຸງລາຍ ແລະ ລະບາດໄດ້, ເນື່ອງຈາກວ່າຖ້າມີຍຸງລາຍໂຕໜຶ່ງມີເຊື້ອພະຍາດດັ່ງກ່າວໄປກັດອີກຜູ້ໜຶ່ງ ແລະ ໄປກັດຜູ້ອື່ນໆອີກທີ່ແຂງແຮງກໍສາມາດເປັນພະຍາດໄຂ້ຍຸງລາຍໄດ້, ສະນັ້ນຖ້າຮູ້ວ່າເປັນໄຂ້ຍຸງລາຍແລ້ວຕ້ອງນອນໃນມຸ້ງເພື່ອບໍ່ໃຫ້ຍຸງມາກັດ ແລະ ນຳເຊື້ອພະຍາດໄຂ້ຍຸງລາຍໄປກັດຕໍ່ໃສ່ຜູ້ອື່ນຈະພາໃຫ້ຕິດຕໍ່ໆກັນໄປ, ຍຸງລາຍແມ່ນມັກກັດຕອນກາງເວັນ, ຕອນແລງ ຕ່າງຈາກຍຸງໂຕອື່ນໆ, ດັ່ງນັ້ນທຸກຄົນຕ້ອງປ້ອງກັນຕົນເອງ, ໃສ່ເສື້ອແຂນຍາວ, ໃສ່ໂສ້ງຂາຍາວ, ທາຢາກັນຍຸງ, ໃສ່ສະບູຫອມ ແລະ ອື່ນໆ.
ທ່ານໄດ້ກ່າວຍ້ອງຍໍຊົມເຊີຍທຸກພາກສ່ວນທີ່ເຫັນຄວາມສຳຄັນເອົາໃຈໃສ່ ສ້າງຂະບວນການທຳລາຍແຫຼ່ງເພາະພັນໜອນນ້ຳຍຸງລາຍ ແລະ ຮ້ອງຮຽກໃຫ້ທຸກພາກສ່ວນສືບຕໍ່ ທຳລາຍແຫຼ່ງເພາະພັນໜອນນ້ຳຍຸງລາຍ, ເຊື່ອໝັ້ນວ່າຖ້າທຸກຄົນຮ່ວມແຮງຮ່ວມໃຈກັນຕ້ານການລະບາດພະຍາດໄຂ້ຍຸງລາຍໄດ້ກໍຈະບໍ່ເປັນພະຍາດໄຂ້ຍຸງລາຍ ແລະ ບໍ່ມີຜູ້ເສຍຊີວິດຍ້ອນໄຂ້ຍຸງລາຍ ບໍ່ມີໜອນນ້ຳຍຸງລາຍ ບໍ່ມີຍຸງລາຍ ບໍ່ມີໄຂ້ຍຸງລາຍ.
(ຂໍ້ມູນຈາກ: ສູນຂ່າວສານການແພດສຸຂະສຶກສາ)
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
