ກອງປະຊຸມຍົກສູງບົດບາດ ແລະ ການເຄື່ອນໄຫວຂອງສະພາແຫ່ງຊາດ ໃນກຳລັງປ້ອງກັນຄວາມສະຫງົບ ໄດ້ຈັດຂຶ້ນໃນວັນທີ 8 ສິງຫານີ້ ທີ່ສະໂມສອນໃຫຍ່ ກະຊວງປ້ອງກັນຄວາມສະຫງົບ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໃຫ້ກຽດເປັນປະທານ ແລະ ໂອ້ລົມການນຳຫຼັກແຫຼ່ງກະຊວງປ້ອງກັນຄວາມສະຫງົບ, ໂດຍມີ ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ, ມີບັນດາພະນັກງານການນຳກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ຮັບຟັງການເຜີຍແຜ່ບັນດານິຕິກໍາທີ່ສໍາຄັນທີ່ທາງສະພາແຫ່ງຊາດ; ໃນນັ້ນ ປະກອບມີ: ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX; ບາງມາດ ຕາຂອງກົດໝາຍວ່າດ້ວຍສະພາແຫ່ງຊາດ (ສະບັບປັບປຸງ) ເລກທີ 64/ສພຊ, ລົງວັນທີ 9 ທັນວາ 2015 ແລະ ກົດໝາຍ ວ່າດ້ວຍສະພາປະຊາຊົນຂັ້ນແຂວງ ສະບັບເລກທີ 82/ສພຊ, ລົງວັນທີ 30 ມິຖຸນາ 2020 ທີ່ພົວພັນເຖິງພາລະບົດບາດ, ສິດໜ້າທີ່ ແລະ ການເຄື່ອນໄຫວຂອງສະພາແຫ່ງຊາດ; ມະຕິຂອງຄະນະປະຈໍາສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ກໍາມາທິການປ້ອງກັນຊາດ-ປ້ອງກັນຄວາມສະຫງົບ ຂອງສະພາແຫ່ງຊາດ ຊຸດທີ IX ສະບັບເລກທີ 169/ຄປຈ, ລົງວັນທີ 5/7/2001; ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການປະຕິບັດນະໂຍບາຍຕໍ່ພະນັກງານ-ນັກຮົບ ໃນກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ປະຈໍາການຢູ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບເລກທີ 163/ຄປຈ, ລົງວັນທີ 2/6/2022; ຂໍ້ຕົກລົງຮ່ວມ ວ່າດ້ວຍການປະສານງານ ລະຫວ່າງ ກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຊຸດທີ IX ແລະ ຄະນະປະສານງານ ຂອງກະຊວງປ້ອງກັນຄວາມສະຫງົບ ສະບັບເລກ ທີ 01/ປກຊສ-ຄ.ປກທ, ລົງວັນທີ 9 ກຸມພາ 2002; ການສະຫຼຸບຕີລາຄາໂດຍສັງເຂບ ຜ່ານການເຄື່ອນໄຫວຈັດຕັ້ງການປະສານງານໄລຍະ 5 ປີ ຜ່ານມາ (2016-2020) ແລະ ກໍານົດທິດທາງແຜນການ 5 ປີ (2021-2025) ລະຫວ່າງກໍາມາທິການ ປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຊຸດທີ IX ກັບກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າແຫ່ງຊາດ ສະບັບເລກທີ 02/ຄປຈ, ລົງວັນທີ 10 ກຸມພາ 2022 ແລະ ຜູ້ແທນກອງປະຊຸມໄດ້ມີຄໍາເຫັນ, ຊັກຖາມບັນຫາທີ່ມີຄວາມສົນໃຈ ແລະ ບໍ່ທັນຈະແຈ້ງ, ຄະນະປະທານ ຫຼື ວິທະຍາກອນກອງປະຊຸມຈະຕອບຄໍາຊັກຖາມ ແລະ ຄະນະປະທານສັງລວມຄໍາຄິດຄໍາເຫັນ ຕໍ່ກອງປະຊຸມເທື່ອນີ້ ໃຫ້ມີຜົນສໍາເລັດເປັນຢ່າງດີ ແລະ ຈົບງາມ.
ໃນໂອກາດນີ້, ທ່ານ ໄຊສົມພອນ ພົມວິຫານ ໄດ້ໂອລົມຕໍ່ທີ່ປະຊຸມວ່າ: ຕ້ອງເພີ່ມທະວີວຽກງານສຶກສາອົບຮົມແນວຄິດ ດ້ວຍຫຼາຍຮູບຫຼາຍສີ, ເຮັດໃຫ້ນາຍ ແລະ ພົນຕໍາຫຼວດ ໃນກໍາລັງປ້ອງກັນຄວາມສະຫງົບ ຢຶດໝັ້ນອຸດົມການສັງຄົມນິຍົມ, ມີຫຼັກໝັ້ນຊົນຊັ້ນໜັກແໜ້ນ, ມີຄວາມຈົ່ງຮັກພັກດີຕໍ່ພັກ, ຕໍ່ການປະຕິວັດ, ຕໍ່ປະເທດຊາດ ແລະ ຕໍ່ປະຊາຊົນຢ່າງບໍ່ມີເງື່ອນໄຂ ໂດຍໃຫ້ຖືເປັນວຽກງານທີ່ສໍາຄັນທີ່ສຸດ ເພື່ອຕ້ານຢັນຕໍ່ກົນອຸບາຍຫັນໂດຍສັນຕິ ຂອງອິດທິກໍາລັງປໍລະປັກຕໍ່ປະເທດຂອງພວກເຮົາ ເວົ້າລວມ ເວົ້າສະເພາະຕໍ່ຖັນແຖວພະນັກງານ, ສະມາຊິກພັກ, ນາຍ ແລະ ພົນຕໍາຫຼວດ. ສະນັ້ນ ຄະນະພັກ, ຄະນະນໍາ ຂັ້ນຕ່າງໆ ຕ້ອງຫັນເອົາມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິເລກທີ 111/ກມສພ, ມະຕິເລກທີ 112/ກມສພ ແລະ ມະຕິກອງປະຊຸມໃຫຍ່ຄັ້ງ ທີ V ຂອງກະຊວງ ປກສ ຫັນເປັນແຜນງານ, ໂຄງການ, ກົດໝາຍ ແລະ ນິຕິກໍາໃຕ້ກົດໝາຍໃນຂົງເຂດວຽກງານປ້ອງກັນຄວາມສະຫງົບ ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນຮູບປະທໍາຕົວຈິງ ແລະ ມີປະສິດທິພາບ, ປະສິດທິຜົນສູງຂຶ້ນ; ເອົາໃຈໃສ່ຍົກສູງຄຸນນະພາບການຄຸ້ມຄອງລັດ ໃນຂົງເຂດວຽກງານປ້ອງກັນຄວາມສະຫງົບຕາມທິດທາງຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍຢ່າງແຂງແຮງ, ມີປະສິດທິພາບ ແລະ ປະສິດທິຜົນສູງ; ຕ້ອງສຸມໃສ່ແກ້ໄຂຢ່າງຈິງຈັງ ບັນດາສະພາບຫຍໍ້ທໍ້ໃຫ້ມີການຫຼຸດລົງຢ່າງເປັນຮູບປະທໍາ; ສ້າງຄວາມສະຫງົບເປັນລະບຽບ ຮຽບຮ້ອຍໃນສັງຄົມ ເພື່ອສ້າງບັນຍາກາດ ແລະ ເງື່ອນໄຂອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ; ໃນນັ້ນ ກໍາລັງປ້ອງກັນຄວາມສະຫງົບ ເປັນເສນາທິການ ແລະ ປະສານສົມທົບແໜ້ນກັບຂະແໜງການປ້ອງກັນຊາດ, ຂະແໜງການຕ່າງປະເທດ ແລະ ທຸກພາກສ່ວນທີ່ກ່ຽວຂ້ອງ ສ້າງໃຫ້ໄດ້ກໍາລັງແຮງສັງລວມຂອງທົ່ວປວງຊົນປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ ໃຫ້ກາຍເປັນສະຕິຄວາມຮັບຜິດຊອບຂອງໝົດທຸກຄົນ; ຕໍ່ໜ້າສະພາບການທີ່ພວກອິດທິກໍາລັງປໍລະປັກພວມຕັ້ງໜ້າ; ດັ່ງນັ້ນ, ກໍາລັງປ້ອງກັນຄວາມສະຫງົບຕ້ອງສືບຕໍ່ປະຕິບັດຍຸດທະສາດຫັນກໍາລັງລົງກໍ່ສ້າງຮາກຖານ ໃຫ້ແຂງແຮງກວ່າເກົ່າ, ປັບປຸງຮາກຖານການເມືອງໃຫ້ໜັກແໜ້ນ, ສະກັດກັ້ນບັນດາໜໍ່ແໜງປັດໄຈ ທີ່ພາໃຫ້ເກີດຄວາມບໍ່ສະຫງົບທຸກຮູບແບບໃຫ້ມີການຫັນປ່ຽນຢ່າງຕັ້ງໜ້າ ແລະ ຈະແຈ້ງ; ພ້ອມນັ້ນກໍາລັງປ້ອງກັນຄວາມສະຫງົບ ຕ້ອງຕັ້ງໜ້າປະກອບສ່ວນຊ່ວຍທ້ອງຖິ່ນ ໃນການປັບປຸງການຈັດຕັ້ງຮາກຖານໃຫ້ມີຄວາມສະຫງົບ, ປັບປຸງພື້ນຖານການຜະລິດ, ຂະຫຍາຍເສດຖະກິດ, ວັດທະນະທໍາ-ສັງຄົມ ເພື່ອເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງປະຊາຊົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ; ການປັບປຸງກໍ່ສ້າງກໍາລັງປ້ອງກັນຄວາມສະຫງົບ ຖືເປັນບັນຫາປັດໄຈຕັດສິນ ອັນສໍາຄັນ; ສຸມໃສ່ປັບປຸງ ກໍ່ສ້າງກໍາລັງດ້ານວິຊາສະເພາະ ໄປຄຽງຄູ່ກັບດ້ານການເມືອງແນວຄິດ ແລະ ດ້ານການຈັດຕັ້ງ, ເຊີດຊູບົດບາດການນໍາພາຂອງຄະນະພັກ ກັບການເພີ່ມທະວີລະບົບຄຸ້ມຄອງບັນຊາກໍາລັງຕາມທິດສ້າງກໍາລັງເຂັ້ມແຂງ, ທັນສະ ໄໝ; ຢາກເຮັດໄດ້ແນວນັ້ນ ຕ້ອງເຄົາລົບຫຼັກການນໍາພາຂອງພັກຢ່າງເຂັ້ມງວດ ແລະ ມີການກວດກາ ຢ່າງເປັນລະບົບຕໍ່ເນື່ອງ, ກ້າເວົ້າ, ກ້າຕໍານິສົ່ງຂ່າວ, ກ້າປະຕິບັດວິໄນ ເພື່ອໃຫ້ວຽກງານມີການຫັນປ່ຽນຢ່າງຖືກຕ້ອງ ແລະ ພາວະວິໄສ ເພື່ອໃຫ້ກໍາລັງປ້ອງກັນຄວາມສະຫງົບ ມີຄວາມເຂັ້ມງວດດ້ານລະບຽບວິໄນ ແລະ ມີຄວາມເຂັ້ມແຂງດ້ານການຈັດຕັ້ງ, ນັບທັງເປັນແບບຢ່າງນໍາໜ້າ, ມີຄວາມສາມາດນໍາພາເຮັດສໍາເລັດໜ້າທີ່ຂອງຕົນຮັບຜິດຊອບ ເປັນກໍາລັງປ້ອງກັນຄວາມສະຫງົບ ປະຊາຊົນມີຄວາມໜັກແໜ້ນທາງດ້ານການເມືອງ-ແນວຄິດ, ເກັ່ງທາງດ້ານວິຊາສະເພາະ, ເຂັ້ມແຂງທາງດ້ານລະບຽບວິໄນ ແລະ ມີແບບແຜນທັນສະໄໝສູງຂຶ້ນເປັນກ້າວໆ ແລະ ກໍາລັງປະກອບອາວຸດພວກເຮົາເຄີຍມີມູນເຊື້ອເພີ່ມພູນຜະລິດຜົນ ແລະ ປະຢັດມັດທະຍັດ, ເຄີຍມີປະສົບການ ແລະ ບົດຮຽນການສ້າງພະລາທິການກັບທີ່ມາແລ້ວ; ໃນເງື່ອນໄຂໃໝ່ຄືດັ່ງປັດຈຸບັນນີ້ກໍາລັງປ້ອງກັນຄວາມສະຫງົບ ຕ້ອງໝູນໃຊ້ທ່າແຮງທີ່ມີຢູ່ ຍູ້ແຮງການຜະລິດຮັບໃຊ້ວຽກງານ ແລະ ຮັບປະກັນຊີວິດການເປັນຢູ່ຂອງກົມກອງ ກໍຄືການຍົກລະດັບຊີວິດການເປັນຢູ່ຂອງນາຍ ແລະ ພົນຕໍາຫຼວດ ໃຫ້ດີຂຶ້ນ ຕາມທິດສ້າງພະລາທິການກັບທີ່ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ”; ຕ້ອງເຊື່ອມຊຶມ, ກໍາແໜ້ນແນວທາງການຕ່າງປະເທດຂອງພັກ, ປັບປຸງທັດສະນະຫຼັກໝັ້ນມິດ-ສັດຕູໃຫ້ຈະແຈ້ງ, ມີສະຕິລະວັງຕົວຢູ່ຕະຫຼອດເວລາ; ເອົາໃຈໃສ່ສືບຕໍ່ປັບປຸງ, ເພີ່ມທະວີການພົວພັນຮ່ວມມືຮອບດ້ານກັບປະເທດເພື່ອນມິດຍຸດທະສາດ ແລະ ຟື້ນຟູສາຍພົວພັນອັນເປັນມູນເຊື້ອກັບ ສ ຣັດເຊຍ, ຖືສໍາຄັນໃນການພົວພັນກັບອົງການຕໍາຫຼວດ ຂອງບັນດາປະເທດໃກ້ ຄຽງ, ອົງການຕໍາຫຼວດອາຊຽນ ແລະ ອົງການຕໍາຫຼວດສາກົນ, ຍາດແຍ່ງເອົາການສະໜັບສະໜູນ ຈາກສາກົນ ແລະ ຫຼຸດຜ່ອນແນວຄິດປໍລະປັກຂອງພວກເຂົາຕໍ່ປະເທດເຮົາ; ທັງຕໍ່ສູ້ ແລະ ຍາດແຍ່ງເພື່ອສ້າງສະພາບທີ່ເອື້ອອໍານວຍໃນການປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດເຮັດໃຫ້ສາຍພົວພັນມິດຕະພາບ ແລະ ການຮ່ວມມືລະຫວ່າງປະເທດເຮົາກັບສາກົນນັບມື້ເປີດກວ້າງ ແລະ ເຂົ້າສູ່ລວງເລິກ ທີ່ມີປະສິດທິຜົນກວ່າເກົ່າ.
ຂ່າວ – ພາບ: ບຸນອູ້ມ
