ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໃນໂອກາດ ວັນຄົບຮອບ 55 ປີ ແຫ່ງການສ້າງຕັ້ງອາຊຽນ ແລະ ຄົບຮອບ 25 ປີ ສປປ ລາວ ເຂົ້າເປັນສະມາຊິກອາຊຽນ (ນະຄອນຫລວງວຽງຈັນ 8 ສິງຫາ 2022)
ຮຽນບັນດາ ທ່ານຜູ້ນຳ ພັກ-ລັດ ທີ່ເຄົາລົບ ແລະ ນັບຖືຢ່າງສູງ, ບັນດາພະນັກງານ, ທະຫານ, ຕໍາຫລວດ ແລະ ພໍ່ແມ່ພີ່ນ້ອງຊາວລາວ ທີ່ນັບຖື ແລະ ຮັກແພງ ທັງຫລາຍ, ສະມາຄົມບັນດາປະຊາຊາດ ອາຊີຕາເວັນອອກສ່ຽງໃຕ້ ຫລື ອາຊຽນ ໄດ້ຮັບການສ້າງຕັ້ງຂຶ້ນ ໃນວັນທີ 8 ສິງຫາ 1967 ແລະ ອາຊຽນ ໄດ້ຖືເອົາວັນທີ 8 ສິງຫາ ເປັນວັນອາຊຽນ. ມື້ນີ້ ວັນທີ 8 ສິງຫາ 2022 ເປັນມື້ຄົບຮອບ 55 ປີ ຂອງການສ້າງຕັ້ງອາຊຽນ. ສປປ ລາວ ໄດ້ເຂົ້າເປັນສະມາຊິກອາຊຽນ ໃນວັນທີ 23 ກໍລະກົດ 1997, ເຊິ່ງປີນີ້ກໍເປັນປີຄົບຮອບ 25 ປີ ທີ່ ສປປ ລາວ ເປັນສະມາຊິກອາຊຽນ. ຂ້າພະເຈົ້າ ຕາງໜ້າໃຫ້ລັດຖະບານແຫ່ງ ສປປ ລາວ ຂໍສະແດງຄວາມຊົມເຊີຍອັນອົບອຸ່ນ ມາຍັງພໍ່ແມ່ພີ່ນ້ອງຊາວລາວ ກໍຄື ບັນດາສະມາຊິກຄອບຄົວອາຊຽນ ເນື່ອງໃນໂອກາດວັນອາຊຽນ ແລະ ຄົບຮອບ 25 ປີ ຂອງການເປັນສະມາຊິກ ອາຊຽນ ຂອງ ສປປ ລາວ.
ອາຊຽນ ເປັນອົງການຈັດຕັ້ງພາກພື້ນ ລະຫວ່າງລັດຖະບານ ທີ່ມີເອກກະລັກສະເພາະ, ເພາະອາຊີຕາເວັນອອກສ່ຽງໃຕ້ ເປັນພາກພື້ນທີ່ມີຄວາມຫລາກຫລາຍ ດ້ານວັດທະນະທຳ, ຮີດຄອງປະເພນີ, ສາດສະໜາ, ປະຫວັດສາດ, ລະບອບການເມືອງ, ລະດັບການພັດທະນາ ແລະ ອື່ນໆ ຊຶ່ງບໍ່ຄືກັບພາກພື້ນອື່ນໆໃນໂລກ. ຕະຫລອດໄລຍະ 55 ປີ ຜ່ານມາ, ອາຊຽນ ໄດ້ດຳເນີນການຮ່ວມມື ດ້ວຍ “ວິຖີທາງອາຊຽນ” ຊຶ່ງອີງໃສ່ຈຸດພິເສດຂອງພາກພື້ນ ກໍຄື ບັນດາຫລັກການພື້ນຖານຂອງອາຊຽນ, ອັນໄດ້ເຮັດໃຫ້ອາຊຽນສາມາດຜ່ານຜ່າອຸປະສັກ ແລະ ການທົດສອບນາໆປະການ ແລະ ໄດ້ປະສົບຜົນສໍາເລັດ ໃນການພັດທະນາເສດຖະກິດ, ສັງຄົມມີການເຕີບໃຫຍ່ຂະຫຍາຍຕົວເທື່ອລະກ້າວ ແລະ ກາຍມາເປັນປະຊາຄົມອາຊຽນ ທີ່ມີເສດຖະກິດໃຫຍ່ອັນດັບ 5 ຂອງໂລກ ແລະ ມີພົນລະເມືອງຫລາຍກວ່າ 600 ລ້ານຄົນ. ພ້ອມດຽວກັນນັ້ນ, ກໍໄດ້ເສີມຂະຫຍາຍການຮ່ວມມືກັບພາຍ ນອກ ບົນຫລັກການເປີດກວ້າງ, ກວມລວມ ແລະ ບໍ່ຈຳແນກ ພາຍໃຕ້ກົນໄກການຮ່ວມມືທີ່ອາຊຽນສ້າງຂຶ້ນ ແລະ ອາຊຽນມີບົດບາດເປັນແກນກາງ ຊຶ່ງໄດ້ຮັບການສະຫນັບສະໜູນຈາກບັນດາຄູ່ຮ່ວມມືພາຍນອກ.
ໃນຊຸມປີຜ່ານມາ ກໍຄື ໃນປີ 2022 ນີ້, ອາຊຽນ ແລະ ພາກພື້ນຕ່າງໆໃນໂລກ ສືບຕໍ່ປະເຊີນໜ້າກັບສິ່ງທ້າທາຍຕ່າງໆທາງດ້ານພູມສາດການເມືອງ, ຄວາມໝັ້ນຄົງ, ວິກິດການດ້ານເສດຖະກິດ-ການເງິນ, ພະຍາດລະບາດ ໂດຍສະເພາະແມ່ນພະຍາດໂຄວິດ-19, ການປ່ຽນແປງຂອງດິນຟ້າອາກາດ, ຂາດແຄນດ້ານພະລັງງານ ແລະ ດ້ານສະບຽງອາຫານ ແລະ ອື່ນໆ. ຕໍ່ໜ້າສະພາບການດັ່ງກ່າວ, ອາຊຽນ ໄດ້ຮັດແໜ້ນການຮ່ວມມືພາຍໃນອາຊຽນ ແລະ ລະຫວ່າງອາຊຽນກັບພາຍນອກ ເພື່ອຟື້ນຟູເສດຖະກິດທີ່ໄດ້ຮັບຜົນກະທົບຈາກການລະບາດຂອງພະບາດໂຄວິດ-19 ແລະ ສິ່ງທ້າທາຍຕ່າງໆເຫລົ່ານັ້ນ ເພື່ອສືບຕໍ່ຈັດຕັ້ງຜັນຂະຫຍາຍວິໄສທັດປະຊາຄົມອາຊຽນ 2025 ຢ່າງມີປະສິດທິຜົນ ແລະ ກະກຽມສ້າງວິໄສທັດປະຊາຄົມອາຊຽນຫລັງປີ 2025 ໃຫ້ແທດເໝາະກັບຈຸດພິເສດຂອງອາຊຽນ ກໍຄື ສະພາບການທີ່ພວມຜັນແປໄປໃນປັດຈຸບັນ ແລະ ຕໍ່ໜ້າ. ບົນຈິດໃຈດັ່ງກ່າວ, ສປປ ລາວ ເຊື່ອໝັ້ນວ່າ ການເປັນປະທານອາຊຽນຂອງ ກຳປູເຈຍ ໃນປີ 2022 ພາຍໃຕ້ຄຳຂວັນ “ອາຊຽນ: ຮ່ວມກັນແກ້ໄຂບັນດາສິ່ງທ້າທາຍ” ຈະໄດ້ຮັບຜົນສຳເລັດ ອັນເປັນການປະກອບສ່ວນເຂົ້າໃນການສ້າງຄວາມເຂັ້ມແຂງຂອງອາຊຽນ ໃນການຮັບມືກັບສິ່ງທ້າທາຍຕ່າງໆ.
ບັນດາທ່ານ, ພໍ່ແມ່ພີ່ນ້ອງ ທີ່ຮັກແພງ ທັງຫຼາຍ, ອາຊຽນ ເປັນບູລິມະສິດຫນຶ່ງ ທີ່ສຳຄັນຂອງນະໂຍບາຍຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຂອງ ສປປ ລາວ. ຕະຫລອດໄລຍະ 25 ປີ ຂອງການເປັນສະມາຊິກອາຊຽນ ທຸກຂະແຫນງການຂອງ ສປປ ລາວ ນັບແຕ່ສູນກາງຮອດ ທ້ອງຖິ່ນປະຊາຊົນລາວບັນດາເຜົ່າ ໄດ້ເຄື່ອນໄຫວວຽກງານອາຊຽນຕາມພາລະບົດບາດຂອງຕົນຢ່າງຕັ້ງໜ້າ ອັນເປັນການປະກອບສ່ວນເຂົ້າໃນພາລະກິດລວມ ແຫ່ງການສ້າງປະຊາຄົມອາຊຽນ ກໍຄື ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາ ໃນພາກພື້ນ ແລະ ໃນໂລກ, ທັງເປັນການສ້າງເງື່ອນໄຂທີ່ເອື້ອອຳນວຍໃຫ້ແກ່ພາລະກິດ ແຫ່ງການປົກປັກຮັກສາ ແລະ ສ້າງສາພັດທະນາ ປະເທດຊາດຂອງພວກເຮົາ ກໍຄື ການຍົກສູງຖານະບົດບາດຂອງ ສປປ ລາວ ໃຫ້ເດັ່ນຂຶ້ນໃນເວທີພາກພື້ນ ແລະ ສາກົນ, ເຮັດໃຫ້ ສປປ ລາວ ໄດ້ຮັບຄວາມໄວ້ເນື້ອເຊື່ອໃຈ ແລະ ການຮ່ວມມືຈາກປະເທດສະມາຊິກອາຊຽນ ແລະ ບັນດາຄູ່ຮ່ວມມືພາຍນອກ.
ບັນດາທ່ານ, ພໍ່ແມ່ພີ່ນ້ອງ ທີ່ຮັກແພງ ທັງຫລາຍ, ນັບແຕ່ ສປປ ລາວ ເຂົ້າເປັນສະມາຊິກອາຊຽນ, ປະເທດຂອງພວກເຮົາ ໄດ້ເປັນປະທານອາຊຽນ ດ້ວຍຜົນສຳເລັດອັນຈົບງາມ ມາແລ້ວ 2 ຄັ້ງ ແລະ ໃນປີ 2024 ນີ້, ພວກເຮົາກໍຈະໄດ້ຮັບກຽດເປັນປະທານຫມູນວຽນອາຊຽນອີກ ເປັນຄັ້ງທີ 3. ຂ້າພະເຈົ້າ ຂໍຖືໂອກາດນີ້ ເຊີນຊວນພະນັກງານ, ທະຫານ, ຕຳຫລວດ ແລະ ພີ່ນ້ອງຊາວລາວທຸກຖ້ວນ ໜ້າຈົ່ງພ້ອມກັນເລີ່ມການກະກຽມຄວາມພ້ອມ ເພື່ອເປັນປະທານອາຊຽນ ແລະ ເປັນເຈົ້າພາບຈັດກອງປະຊຸມອາຊຽນໃນລະດັບຕ່າງໆ ໃນປີ 2024. ຂ້າພະເຈົ້າ ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາຢ່າງໃກ້ຊິດຂອງການນຳພັກ-ລັດ ແລະ ຄວາມປຸ້ມລຸມສາມັກຄີຂອງພີ່ນ້ອງຊາວລາວ, ພວກເຮົາຈະສາມາດເປັນປະທານອາຊຽນ ແລະ ເປັນເຈົ້າພາບທີ່ດີ ໃນປີ 2024 ໄດ້ຢ່າງສຳເລັດຜົນ.
ສຸດທ້າຍນີ້, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງບັນດາທ່ານການນຳພັກ-ລັດ, ພະນັກງານ, ທະຫານ, ຕຳຫລວດ ຕະຫລອດຮອດພີ່ນ້ອງຊາວລາວທຸກຖ້ວນໜ້າ ທັງຢູ່ພາຍໃນ ແລະ ຕ່າງປະເທດ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດສະຫງ່າຂອງທ່ານ ແລະ ຮ່ວມກັນສະເຫລີມສະຫລອງວັນອາຊຽນ ຄົບຮອບ 55 ປີ ກໍຄື ຄົບຮອບ 25 ປີ ຂອງການເປັນສະມາຊິກອາຊຽນຂອງ ສປປ ລາວ ຢ່າງມີເນື້ອໃນ ແລະ ມີຄວາມໝາຍ.
ຂໍຂອບໃຈ.
#Medialaos MMD (ແຫູ່ງຂໍ້ມູນຈາກ: ກະຊວງ ການຕ່າງປະເທດ)
