ກອງປະຊຸມໃຫຍ່ໜ່ວຍກຳມະບານຮາກຖານ ໜັງສືພິມປະຊາຊົນ ຊຸດທີ XIV ໄດ້ຈັດຂຶ້ນໃນວັນທີ 29 ກໍລະກົດນີ້ ທີ່ໜັງສືພິມປະຊາຊົນ ເພື່ອສະຫຼຸບຕີລາຄາດ້ານດີ, ດ້ານອອ່ນ ແລະ ຂໍ້ຄົງຄ້າງໃນໄລຍະ 6 ປີ ຜ່ານມາ. ເປັນກຽດເຂົ້າຮ່ວມມີ ທ່ານ ວັນໄຊ ຕະວິນຍານ ກໍາມະການຄະນະພັກກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເລຂາໜ່ວຍພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ, ທ່ານ ຄູນສະຫວັດ ຊຸ່ມມະນີວົງ ຮອງຫົວໜ້າກົມກວດກາ ຮອງປະທານສະຫະພັນກໍາມະບານຮາກຖານ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມີບັນດາສະມາຊິກກຳມະບານຮາກຖານ ໜັງສືພິມປະຊາຊົນ ແລະ ແຂກຖືກເຊີນເຂົ້າຮ່ວມ.
ທ່ານ ສີວັນ ຫອມໄຊຍະເດດ ປະທານໜ່ວຍກຳມະບານ ຮາກຖານ ໜັງສືພິມ ປະຊາຊົນ ໄດ້ຂຶ້ນຜ່ານບົດສະຫຼຸບການເຄື່ອນໄຫວຂອງໜ່ວຍກຳມະບານຮາກຖານ ໜັງສືພິມປະຊາຊົນ ຊຸດທີ XIV ແລະ ທິດທາງແຜນການໃນຕໍ່ໜ້າ ວ່າ: ໃນ 6 ປີຜ່ານມາ, ສະມາຊິກກຳມະບານທຸກສະຫາຍ ໄດ້ເອົາໃຈໃສ່ຕໍ່ໜ້າທີ່ວິຊາສະເພາະ ທີ່ການຈັດຕັ້ງມອບໝາຍ ແລະ ເຮັດຫຼອນໜ້າທີ່ວຽກງານຂອງຕົນຮັບຜິດຊອບໄດ້ເປັນຢ່າງດີເຊັ່ນ: ພະແນກບັນນາທິຂ່າວການເມືອງ-ເສດຖະກິດ ແລະ ແນກບັນນາທິການຂ່າວວັດທະນະທຳ-ສັງຄົມ ໄດ້ເອົາໃຈໃສ່ໂຄສະນາບັນດາເຫດການວັນສຳຄັນຂອງພັກ-ລັດ, ຕິດຕາມບັນດາການນຳເຄື່ອນໄຫວຢູ່ພາຍໃນ ແລະ ໂຄສະນາການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ບັນດາປະເທດເພື່ອນມິດ ແລະ ອື່ນໆໃນຂອບເຂດທີ່ຕົນຮັບຜິດຊອບ. ພະແນກບັນນາທິການຂ່າວຕ່າງປະເທດ ແມ່ນໄດ້ຕິດຕາມເຫດການຕ່າງໆທີ່ເກີດຂຶ້ນແຕ່ລະວັນຢູ່ຕ່າງປະເທດເພື່ອລົງຂ່າວ, ອັບເດດຂ່າວທາງເວັບໄຊ, ເຟສບຸກ. ໄລຍະ 6 ປີ ຜ່ານມາ, ສະມາຊິກກໍາມະບານທີ່ເປັນນັກຂ່າວ ໄດ້ຂຽນຂ່າວ-ບົດຕ່າງໆ ລົງໃນໜ້າໜັງສືພິມທັງໝົດ 40.544 ຂ່າວ, 20.900 ບົດ ແລະ ຮູບພາບປະກອບຂ່າວ-ບົດ 42.197 ແຜ່ນ. ຂ່າວຕ່າງປະເທດ ໄດ້ອອກຂ່າວທັງໝົດ 15.120 ຂ່າວ, 30.000 ບົດ, ຮູບ 2.578 ແຜ່ນ, ໜັງສືພິມເອເລັກໂຕຣນິກ ມີຜູ້ເຂົ້າຕິດຕາມສະເລ່ຍ 10.000 ຄົນ/ມື້, ສະເລ່ຍເປັນປີປະມານ 3 ລ້ານກວ່າຄົນ/ປີ, ເຟສບຸກ ມີຈຳນວນຄົນເຂົ້າອ່ານ 15.190 ເທື່ອຄົນ, ພະແນກເຕັກນິກ-ຈັດໜ້າ ມີໜ້າທີ່ຮັບຜິດຊອບໃນການຂຶ້ນມາແກັດ, ຈັດລຽງບົດນຳ, ບົດຄວາມ, ບົດສະເໜີ ແລະ ຂ່າວ, ຄຳສັ່ງ, ມະຕິຕ່າງໆ, ຈັດໜ້າ ອອກແບບ ແລະ ກວດຂອດສຸດທ້າຍແລ້ວສົ່ງໄປໂຮງພິມ, ພະແນກຄຸ້ມຄອງ, ບໍລິຫານໂຄສະນາ ແລະ ຈໍາໜ່າຍ ມີໜ້າທີ່ຮັບຜິດຊອບ ເປັນເສນາທິການໃຫ້ແກ່ຄະນະບັນນາທິການ, ຄຸ້ມຄອງຊັບສົມບັດ, ພາຫະນະ, ຈໍາໜ່າຍໜັງສືພິມ, ບັນຊີລາຍຮັບ-ລາຍຈ່າຍ, ບັນຊີເງິນເດືອນລັດຖະກອນ, ແຜນງົບປະມານ, ຈັດຕັ້ງຂຶ້ນແຜນກໍ່ສ້າງພະນັກງານ, ຂຶ້ນຊັ້ນ, ຂັ້ນເງິນເດືອນ, ຫ້ອງປະມວນ, ຮັບຜິດຊອບການໂຄສະນາຕ່າງໆ.
ໃນກອງປະຊຸມຄັ້ງນີ້ ຍັງໄດ້ປ່ອນບັດຄັດເລືອກເອົາຄະນະກຳມະບານຊຸດໃໝ່ ຊຶ່ງມີຜູ້ອອກຮັບສະໝັກ 5 ທ່ານ ແລະ ເລືອກເອົາ 3 ທ່ານ ໃນກອງປະຊຸມຄັ້ງປະຖົມມະລືກໄດ້ເປັນເອກະພາບກັນເລືອກເອົາ ທ່ານ ຄຳເຮືອງ ຄຳປະສິດ ເປັນປະທານໜ່ວຍກຳມະບານຮາກຖານ ໜັງສືພິມປະຊາຊົນ ຊຸດໃໝ່, ເລືອກເອົາ ທ່ານ ນາງ ຈັນທະລາ ໄຊຍະເຫຼັກ ເປັນຮອງປະທານ ແລະ ທ່ານ ນາງ ເກດແກ້ວ ພົມມະລີ ເປັນກຳມະການຄະນະກຳມະບານ.
ໃນຕອນທ້ານຍຂອງກອງປະຊຸມ ທ່ານ ວັນໄຊ ຕະວິນຍານ ແລະ ທ່ານ ຄູນສະຫວັດ ຊຸ່ມມະນີວົງ ກໍໄດ້ມີຄຳເຫັນໂອ້ລົມເພື່ອເປັນທິດເຍືອງທາງໃຫ້ແກ່ຄະນະກຳມະບານຊຸດໃໝ່ ຊຶ່ງທັງສອງທ່ານໄດ້ຮຽກຮ້ອງໃຫ້ຄະນະກຳມະບານຊຸດໃໝ່ ແລະ ສະມາຊິກກຳມະບານທຸກສະຫາຍ ໃຫ້ເອົາໃຈໃສ່ຕໍ່ໜ້າທີ່ວິຊາສະເພາະ ທີ່ການຈັດຕັ້ງມອບໝາຍໃຫ້ ເພີ່ມທະວີຄວາມເປັນເອກະພາບພາຍໃນຄະນະໜ່ວຍ ແລະ ສະມາຊິກໃຫ້ໜັກ ແໜ້ນ, ຊ່ວຍເຫຼືອຊຶ່ງກັນ ແລະ ກັນ ຕາມຄວາມສາມາດ ແລະ ເງື່ອນໄຂຕົວຈິງຂອງສະມາຊິກແຕ່ລະສະຫາຍ.
ຂ່າວ-ພາບ: ບຸນຕອມ
