ກອງປະຊຸມປຶກສາຫາລື ກ່ຽວກັບການສືບຕໍ່ການຊ່ວຍເຫລືອໂຄງການ “ສົ່ງ ເສີມການພັດທະນາ ແລະ ການສ້າງຄວາມເຂັ້ມແຂງ ການປົກຄອງດ້ວຍກົດໝາຍໃນຂະ ແໜງການຍຸຕິທໍາ ຂອງ ສປປ ລາວ” ທີ່ຈະສິ້ນສຸດລົງໃນປີ 2023 ຈັດຂຶ້ນໃນວັນທີ 1 ສິງ ຫາ 2022 ຢູ່ອົງການໄອຍະການປະຊາຊົນສູງສຸດ(ອອປສ) ໂດຍມີ ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ, ຄະນະຊີ້ນໍາໂຄງການ, ທ່ານ ນາງ ນິຊິກິ ໂຢໂກະ ຫົວໜ້າຄະນະຊ່ຽວຊານອົງການໄຈກາ ໂດຍມີພາກສ່ວນກ່ຽວຂ້ອງ ຂອງສອງຝ່າຍ ເຂົ້າຮ່ວມ.
ໂຄງການ “ສົ່ງເສີມການພັດທະນາ ແລະ ການສ້າງຄວາມເຂັ້ມແຂງການປົກຄອງດ້ວຍກົດໝາຍ ໃນຂະແໜງຍຸຕິທໍາ ຂອງ ສປປ ລາວ” ແມ່ນໂຄງການລະຫວ່າງ ລັດຖະ ບານ ແຫ່ງ ສປປ ລາວ ແລະ ລັດຖະບານຢີ່ປຸ່ນ ໂດຍໄດ້ລົງນາມໃນເດືອນກໍລະກົດ 2018, ມີກໍານົດເວລາຈັດຕັ້ງປະຕິບັດ 5 ປີ ທີ່ຈະສິ້ນສຸດລົງໃນປີ 2023 ໂດຍມີຈຸດປະສົງຊ່ວຍລັດຖະບານ ລາວ ໃນການສົ່ງເສີມການພັດທະນາ ແລະ ການສ້າງຄວາມເຂັ້ມແຂງການປົກຄອງດ້ວຍກົດໝາຍໃນຂະແໜງການຍຸຕິທໍາ ຂອງ ສປປ ລາວ ໂດຍໄດ້ສຸມໃສ່ການພັດທະນາ ແລະ ການສ້າງຄວາມເຂັ້ມແຂງ ການປົກຄອງດ້ວຍກົດໝາຍໃນຂະແໜງຍຸຕິທໍາ ຂອງ ສປປ ລາວ ຈະໄດ້ຮັບການສົ່ງເສີມຢ່າງມີປະສິດທິຜົນ; ປະມວນກົດໝາຍແພ່ງ ຈະໄດ້ຮັບການເຜີຍແຜ່, ນໍາໃຊ້ເຂົ້າໃນຊີວິດສັງຄົມຂອງພົນລະເມືອງລາວ ຢ່າງມີປະສິດທິຜົນ; ກົດໝາຍ, ນິຕິກໍາຈໍານວນໜຶ່ງທີ່ຈໍາເປັນ ໃຫ້ແກ່ການປະຕິບັດປະມວນກົດໝາຍແພ່ງ ຈະໄດ້ຮັບການພັດທະນາ; ປື້ມຄູ່ມືໃນຂົງເຂດກົດໝາຍ ຈະໄດ້ນໍາໃຊ້ເປັນຕໍາລາສິດສອນ, ເຜີຍແຜ່ໃນສະຖາບັນການສຶກສາ, ອົງການຕ່າງໆໃນຂົງເຂດຍຸຕິທຳ ກໍຄື ສັງຄົມຢ່າງກວ້າງຂວາງ. ອັນທີ່ສຳຄັນທີ່ສຸດນັ້ນ, ບັນດານັກຄົ້ນຄວ້າ ກໍຈະກາຍເປັນຊັບສົມບັດອັນລໍ້າຄ່າຂອງຊາດເຮົາ, ເປັນຜູ້ນຳເອົາຄວາມຮູ້ ແລະ ປະສົບການທີ່ໄດ້ມາຈາກການເຂົ້າຮ່ວມໂຄງການ ໄປໝູນໃຊ້ເຂົ້າໃນການປະຕິບັດໜ້າທີ່ວຽກງານທີ່ຕົນໄດ້ຮັບມອບໝາຍ ມີຜົນສໍາເລັດ ພ້ອມທັງຖ່າຍທອດບົດຮຽນດັ່ງກ່າວໃຫ້ຜູ້ອື່ນ ເປັນຢ່າງດີ.
ກອງປະຊຸມ, ເຫັນດີໃຫ້ສືບຕໍ່ໂຄງການຮ່ວມມື ເພື່ອສ້າງຄວາມເຂັ້ມແຂງໃຫ້ແກ່ຂະ ແໜງການກົດໝາຍຂອງ ສປປ ລາວ ເຊິ່ງລວມມີ: ກະຊວງຍຸຕິທຳ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ມະຫາວິທະຍາໄລແຫ່ງຊາດ ໂດຍຈະສຸມໃສ່ການສ້າງພື້ນຖານທິດສະດີກົດໝາຍ ແລະ ກໍສ້າງພະນັກງານເປັນວຽກງານບູລິມະສິດ.
ຂ່າວ-ພາບ ອອປສ
