ຕາມຂ່າວຈາກ CRI: ເມື່ອບໍ່ດົນມານີ້, ກະຊວງ ກະສິກຳ,ປ່າໄມ້ ແລະ ສິນໃນນ້ຳ ຍີ່ປຸ່ນ ໄດ້ປະກາດວ່າ: ຜ່ານການ ກວດກາ ວັກແທກ ຈາກອົງການ ຄົ້ນຄວ້າ ສັງລວມ ເຕັກນິກ ກະສິກຳ ແລະອຸດສາຫະກຳ ອາຫານ ແຫ່ງຊາດ ຍີ່ປຸ່ນ, ຟາມລ້ຽງໝູ ແຫ່ງໜຶ່ງ ຢູ່ນະຄອນນະ ຊຸຄະຣະຊຸຢະມະ ແຂວງໂຕະຊິກິ ຂອງຍີ່ປຸ່ນ ໄດ້ຖືກຢືນຢັນ ເກີດມີການລະບາດ ພະຍາດ ອະຫິວາໝູ, ເຮັດໃຫ້ມີໝູ ປະມານ 54.000 ໂຕ ຈະຖືກຂ້າຖິ້ມໝົດ ເພື່ອສະກັດກັ້ນ ການແພ່ລະບາດພະຍາດ ດັ່ງກ່າວ.
ສະຖານີວິທະຍຸໂທລະພາບຍີ່ປຸ່ນ (NHK) ລາຍງານວ່າ: ນີ້ແມ່ນການຂ້າຖິ້ມໝູ ຂະໜາດໃຫຍ່ທີ່ສຸດນັບ ແຕ່ໄດ້ມີການບັນທຶກ ການລະບາດ ພະຍາດອະຫິວາໝູ ຢູ່ຍີ່ປຸ່ນ ເປັນຕົ້ນມາ, ຄາດວ່າ ການຂ້າຖິ້ມໝູໃນຄັ້ງນີ້ ຈະຕ້ອງການເວລາ ປະມານ 2 ເດືອນ.
ພະຍາດ ອະຫິວາໝູ ແມ່ນພະຍາດ ລະບາດ ຊະນິດໜຶ່ງ ທີ່ເກີດຂຶ້ນກັບໝູ ຢ່າງກະທັນຫັນ ແລະແຜ່ເຊື້ອ ດ້ວຍການສຳຜັດ, ສ່ວນຫລາຍ ໝູຕິດເຊື້ອ ຈະມີອາການ ເປັນໄຂ້, ເລືອດອອກ ຫລາຍຕາມອະໄວຍະວະ ພາຍໃນ ແລະ ມີອັດຕາ ການຕາຍສູງ, ບໍ່ມີຜົນຮ້າຍໂດຍກົງ ຕໍ່ມະນຸດ. (ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
