ແຂວງເຊກອງຈັດພິທີເປີດງານວາງສະແດງ ແລະ ຈໍາໜ່າຍສິນຄ້າ ມິດຕະພາບລາວ-ຫວຽດນາມ ຂຶ້ນໃນວັນທີ 1 ກໍລະກົດ 2022 ທີ່ສູນການຄ້າແຂວງເຊກອງ, ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ວໍ ຊວນ ກາ ຄະນະປະຈໍາພັກແຂວງ ປະທານແນວໂຮມແຫ່ງຊາດຫວຽດນາມ ແຂວງກວາງນາມ, ມີການນຳແຂວງອັດຕະປື, ສາລະວັນ, ຈຳປາສັກ, ຕາງໜ້າການນໍາແຂວງກວາງນາມ, ເທື່ອທຽນເຫວ້, ກອນຕູມ, ນະຄອນດານັງ ສສ ຫວຽດນາມ, ເຂົ້າຮ່ວມ.
ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ຫົວໜ້າຈັດງານວາງສະແດງສິນຄ້າໄດ້ກ່າວວ່າ: ການຈັດງານວາງສະແດງສິນຄ້າມິດຕະພາບ ລາວ-ຫວຽດນາມ ທີ່ແຂວງເຊກອງໃນຄັ້ງນີ້, ເປັນເຫດການທີ່ມີຄວາມໝາຍສໍາຄັນຍິ່ງ ຊຶ່ງໄດ້ເປັນການປະກອບສ່ວນສ້າງ ຂະບວນການໃຫ້ແກ່ການຈັດຕັ້ງປະຕິບັດການສະເຫຼີມສະຫຼອງ “ປີສາມັກຄີມິດຕະພາບ ລາວ-ຫວຽດນາມ 2022″ ຄື: ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນສໍາຄັນຕ່າງໆ ຂອງພັກ-ຂອງຊາດ ໃຫ້ມີບັນຍາກາດຟົດຟື້ນ, ພ້ອມດຽວກັນນີ້ ກໍເປັນການເລັ່ງໃສ່ຍົກສູງກຳລັງແຮງພັດທະນາແຂວງເຊກອງ ໃຫ້ຫຼຸດພົ້ນອອກຈາກຄວາມທຸກຍາກ, ຮັບປະກັນການຜະລິດກະສິກຳສະອາດປອດສານພິດຕາມທິດສີຂຽວ ແລະ ຍືນຍົງ, ສົ່ງເສີມການລົງທຶນ, ພັດທະນາອຸດສາຫະກຳ, ການຄ້າ, ການທ່ອງທ່ຽວ ໃຫ້ໄດ້ຄຸນນະພາບຕິດພັນກັບການພັດທະນາສັງຄົມ ຕາມແລວເສດຖະກິດຕາເວັນອອກ-ຕາເວັນຕົກຕອນໃຕ້.
ການຈັດງານໃນຄັ້ງນີ້ ຈຸດປະສົງຫຼັກ ກໍເພື່ອເປັນການເປີດກວ້າງ, ເປີດໂອກາດ ລວມທັງເປັນ ການຊຸກຍູ້, ສົ່ງເສີມ ແລະ ສະໜັບສະໜູນໃຫ້ຜູ້ຜະລິດ, ຜູ້ປະກອບການ, ນັກທຸລະກິດ, ພໍ່ຄ້າຊາວຂາຍ ໄດ້ມີການພົວພັນແລກປ່ຽນ ຮ່ວມມືດ້ານການຄ້າ, ການລົງທຶນ, ການທ່ອງທ່ຽວ ລະຫວ່າງ 4 ແຂວງພາກໃຕ້ ສປປ ລາວ ກັບ 4 ແຂວງພາກກາງ ສສ ຫວຽດນາມ ເວົ້າສະເພາະ, ເວົ້າລວມ ແມ່ນສອງຊາດ ລາວ-ຫວຽດນາມ ໃຫ້ຖືກຈັດຕັ້ງປະຕິບັດໃຫ້ເກີດຜົນເປັນຈິງ. ທັງນີ້ກໍເພື່ອເປັນການກະຕຸກຊຸກຍູ້, ສົ່ງເສີມສິນຄ້າພູມປັນຍາຂອງທ້ອງຖິ່ນ, ກຸ່ມຜູ້ຜະລິດ-ປຸງແຕ່ງ ຜະລິດຕະພັນ ແລະ ສິນຄ້າອຸປະໂພກ, ບໍລິໂພກທົ່ວໄປ, ພິເສດແມ່ນສິນຄ້າໂອດັອບ ຂອງແຂວງເຊກອງ ແລະ ບັນດາແຂວງໃກ້ຄຽງ ທັງພາຍໃນ ແລະ ຕ່າງປະເທດ ທີ່ໄດ້ນຳສິນຄ້າຂອງຕົນມາວາງສະແດງ ແລະ ຈຳໜ່າຍອອກສູ່ສາຍຕາຂອງທົ່ວສັງຄົມອີກດ້ວຍ.
ງານວາງສະແດງຄັ້ງນີ້ ບັນດາຜູ້ປະກອບການໄດ້ນໍາສິນຄ້າມາວາງສະແດງ ຈຳນວນ 104 ຫົວໜ່ວຍ, ມີຫ້ອງວາງສະແດງ 90 ຫ້ອງ ລວມມູນຄ່າສິນຄ້າທີ່ມາວາງສະແດງທັງໝົດ 4,9 ຕື້ກວ່າກີບ, ໃນນີ້, ມູນຄ່າສິນຄ້າພາຍໃນປະເທດ 900 ລ້ານກວ່າກີບ ແລະ ມູນຄ່າສິນຄ້ານຳເຂົ້າຈາກຕ່າງປະເທດ ເກືອບ 4 ຕື້ກີບ.
ຂ່າວ: ພຸດທະສອນ
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
