ການຈັດງານ ບຸນຊ່ວງເຮືອປະເພນີແຂວງເຊກອງປະຈໍາປີ 2022 ແມ່ນຈະໄດ້ຈັດຂຶ້ນໃນວັນທີ 3 ທັນວານີ້ ປັດຈຸບັນການຫ້າງຫາກະກຽມຄວາມພ້ອມດ້ານຕ່າງໆ ໂດຍສະເພາະແມ່ນການຈັດສັນການວາງສະແດງ-ຂາຍສິນຄ້າກາງເວັນ-ກາງຄືນ, ສະຖານທີ່ຈັດງານລາຕີ ແລະ ອື່ນໆ ແນໃສ່ອໍານວຍຄວາມສະດວກສະບາຍແກ່ປະຊາຊົນ ກໍ່ຄື ນັກທ່ອງທ່ຽວ ແລະ ຜູ້ປະກອບການ ທີ່ມາໃນງານດັ່ງກ່າວໃຫ້ມີຄວາມເປັນລະບຽບ ແລະ ສວຍງາມ.
ທ່ານ ເພັດໄພບູນ ສີສະຫງ່າ ຫົວໜ້າພະແນກບໍລິຫານ ບໍລິສັດສອນກໍ່ສ້າງສ້ອມແປງເຄຫາສະຖານ ແລະ ຂົວທາງ ຈຳກັດຜູ້ດຽວ ໃຫ້ຮູ້ວ່າ: ພາຍຫຼັງທີ່ອົງການປົກຄອງເມືອງລະມາມ ມອບໃຫ້ບໍລິສັດຕົນ ເປັນຜູ້ສໍາປະທານຈັດສັນສະຖານ ທີ່ບໍລິການ ໃນການຄ້າຂາຍສິນຄ້າ ແລະ ບໍລິການດ້ານອື່ນໆໃນໄລຍະງານບຸນຊ່ວງເຮືອປະຈໍາປີ 2022 ທາງບໍລິສັດໄດ້ສົມທົບກັບຂະແໜງການທີ່ກ່ຽວຂ້ອງຈາກເມືອງລະມາມ ລົງສຳຫຼວດ, ປັບປຸງພື້ນທີ່ ແລະ ກໍານົດເຂດການບໍລິການດ້ານຕ່າງໆອອກເປັນ 3 ຈຸດຄື: ຈຸດທີ 1 ໜ້າສະພາປະຊາຊົນແຂວງ ຫາ ທ່າບັກເກົ່າ; ຈຸດທີ 2 ເຂດສະໜາມແດງ (ສວນ 25 ປີ) ແລະ ຈຸດທີ 3 ແມ່ນສູນການຄ້າ ເພື່ອໃຫ້ເປັນລະບຽບ ແນໃສ່ອໍານວຍຄວາມສະດວກສະບາຍແກ່ປະຊາຊົນ ກໍ່ຄື ນັກທ່ອງທ່ຽວທີ່ມາທ່ຽວຊົມໃນງານດັ່ງກ່າວ ຈັບອົກຈັບໃຈມາແລ້ວຢາກມາອີກ.
ທ່ານ ເພັດໄພບູນ ສີສະຫງ່າ ໃຫ້ຮູ້ຕື່ມວ່າ: ປັດຈຸບັນ ໄດ້ມີຜູ້ປະກອບການເຂົ້າມາຈັບຈ່ອງສະຖານທີ່ຕາມການແບ່ງເຂດຂອງບໍລິສັດເຫັນວ່າຫຼາຍສົມຄວນ ໂດຍສະເພາະຢູ່ຈຸດສູນການຄ້າ ແມ່ນຈະເລີ່ມຂຶ້ນແຕ່ວັນທີ 28 ພະຈິກ 2022 ຫາ ວັນທີ 3 ທັນວາ 2022 ເຊິ່ງທ່ານໃດສົນໃຈຢາກຈັບຈ່ອງສະຖານທີ່ ກໍ່ສາມາດຕິດຕໍ່ໄດ້ນໍາພະນັກງານບໍລິສັດຢູ່ທີ່ສູນການຄ້າເຊກອງຊັ້ນລຸ່ມ ຫຼື ຕິດຕໍ່ສອບຖາມໄດ້ທີ່ເບີ: 020 951 88 221.
ຂ່າວ: ສັນຍາ
