ໃນວັນທີ 22 ມິຖຸນາ ນີ້ ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດ ໄດ້ເປັນປະທານກອງປະຊຸມ ພົບປະປຶກສາຫາລືກັບຜູ້ພັດທະນາເຂດເສດຖະກິດພິເສດ ບໍ່ເຕ່ນແດນງາມ ໂດຍຜ່ານລະບົບກອງປະຊຸມທາງໄກ (Video Conference) ໂດຍມີຜູ້ຕາງໜ້າກະຊວງ, ອົງການປົກຄອງແຂວງ ແລະ ພະແນກການກ່ຽວຂ້ອງຂອງແຂວງຫຼວງນໍ້າທາ ພ້ອມດ້ວຍຄະນະຮັບຜິດຊອບພັດທະນາເຂດເສດຖະກິດພິເສດບໍ່ເຕ່ນແດນງາມ ເຂົ້າຮ່ວມ.

ການປະຊຸມຄັ້ງນີ້ ໄດ້ຮັບຟັງການລາຍງານ ກ່ຽວກັບຄວາມຄືບໜ້າ ໃນການພັດທະນາເຂດເສດຖະກິດພິເສດ ບໍ່ເຕ່ນແດນງາມ ກໍຄືຄວາມຄືບໜ້າ ໃນການຈັດຕັ້ງປະຕິບັດຜົນກອງປະຊຸມ ຄັ້ງວັນທີ 29 ພຶດສະພາ 2022 ທີ່ເຂດເສດຖະກິດພິເສດບໍ່ເຕ່ນແດນງາມ ຈາກຜູ້ພັດທະນາເຂດດັ່ງກ່າວ, ພ້ອມກັນນັ້ນ ຜູ້ເຂົ້າຮ່ວມກອງປະຊຸມ ກໍໄດ້ປະກອບຄຳຄິດເຫັນ ຕໍ່ຂົງເຂດວຽກງານ ທີ່ຕິດພັນກັບຄວາມຮັບຜິດຊອບ ຂອງຂະແໜງການ ແລະ ທ້ອງຖິ່ນຕົນ ໂດຍສະເພາະການປະຕິບັດກົດໝາຍ ແລະ ລະບຽບການ ໃນການພັດທະນາເຂດ ຂອງຜູ້ພັດທະນາ ແລະ ຜູ້ລົງທຶນ, ການຄຸ້ມຄອງເຂດ, ການກຳນົດຂອບເຂດໂຄງການຄືນໃໝ່, ການລ້ອມຮົ້ວອ້ອມເຂດ, ການອະນຸມັດການລົງທຶນ, ການຜັນຂະຫຍາຍການຈັດຕັ້ງປະຕິບັດເຂດຮ່ວມມືເສດຖະກິດ ບໍ່ເຕ່ນ ສປປ ລາວ ແລະ ບໍ່ຫານ ສປ ຈີນ, ການຄຸ້ມຄອງ ແລະ ສົ່ງເສີມແຮງງານລາວ; ການນຳເຂົ້າທຶນ ແລະ ນຳໃຊ້ເງິນຕາຕ່າງປະເທດ, ການເກັບພັນທະອາກອນ ແລະ ການນຳເຂົ້າ-ສົ່ງອອກສິນຄ້າ, ການຄຸ້ມຄອງແຮງງານຕ່າງປະເທດ ແລະ ການສ້າງໂຄງການທີ່ມີສ່ວນຮ່ວມກັບປະຊາຊົນ, ການອະນຸມັດປຸກສ້າງຢູ່ພາຍໃນເຂດ, ການລຶບລ້າງປ້າຍໂຄສະນາ ແລະ ທະບຽນພາຫະນະທີ່ບໍ່ຖືກຕ້ອງ, ກວດກາຄືນ ການນຳໃຊ້ລະບົບໂທລະຄົມມະນາຄົມ, ການຄຸ້ມຄອງທີ່ດິນ ແລະ ສິ່ງແວດລ້ອມ, ການອອກແບບ ແລະ ຈັດສັນຜັງເມືອງ, ການສະເໜີລົງທຶນກິດຈະການໂຮງຮຽນ, ໂຮງໝໍ ແລະ ອື່ນໆ.

ໃນໂອກາດນີ້, ທ່ານປະທານກອງປະຊຸມໄດ້ຊີ້ນຳໃຫ້ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ກະຊວງກ່ຽວຂ້ອງ ແຕ່ງຕັ້ງພະນັກງານ ຂະແໜງການຂອງຕົນ ລົງສົມທົບກັບທ້ອງຖິ່ນ ແລະ ພາກສ່ວນກ່ຽວຂ້ອງ ຈັັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຕົນ ໃຫ້ມີຜົນສຳເລັດເປັນກ້າວໆ; ໃຫ້ຂະແໜງການກ່ຽວຂ້ອງ ຄົ້ນຄວ້າ ແລະ ປະຕິບັດນະໂຍບາຍຕ່າງໆ ຕໍ່ການພັດທະນາເຂດໃຫ້ແທດ ເໝາະກັບສະພາບເງື່ອນໄຂຕົວຈິງຕື່ມ; ໃຫ້ກະຊວງແຜນການ ແລະ ການລົງທຶນ ສືບຕໍ່ເປັນໃຈກາງ ຕິດຕາມ, ກວດກາ ແລະ ຊຸກຍູ້ການພັດທະນາເຂດ ໃຫ້ສາມາດດຳເນີນໄປຕາມແຜນການທີ່ກຳນົດໄວ້; ໃຫ້ຜູ້ພັດທະນາ ສືບຕໍ່ພັດທະນາເຂດເສດຖະກິດພິເສດບໍ່ເຕ່ນແດນງາມ ມີຄວາມຄືບໜ້າໄວກວ່າເກົ່າ ໃຫ້ກາຍເປັນຕົວເມືອງໃໝ່, ເປັນເຂດທີ່ໜ້າຢູ່, ໜ້າທ່ອງທ່ຽວ, ມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເປັນບ່ອນສ້າງວຽກເຮັດງານທຳ, ເປັນຖານເກັບລາຍຮັບທີ່ສຳຄັນ ເຂົ້າງົບປະມານແຫ່ງລັດ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໂດຍລວມຂອງປະເທດ ກໍຄືແຂວງຫຼວງນໍ້າທາ ໃຫ້ມີການພັດທະນາຫຼາຍຂຶ້ນກວ່າເກົ່າ; ໃຫ້ຜູ້ພັດທະນາສືບຕໍ່ສະໜັບສະໜູນ, ອຳນວຍຄວາມສະດວກ ແລະ ໃຫ້ການຮ່ວມມືກັບຂະແໜງການ ແລະ ພາກສ່ວນທີ່ກ່ຽວຂ້ອງ ໃນການແກ້ໄຂບັນຫາຄົງຄ້າງຕ່າງໆ ທີ່ໄດ້ປຶກສາຫາລືກັນ ໃນກອງປະຊຸມຄັ້ງວັນທີ 29 ພຶດສະພາ 2022 ທີ່ເຂດເສດຖະກິດພິເສດບໍ່ເຕ່ນແດນງາມໃຫ້ສຳເລັດເປັນກ້າວໆ.

ຂ່າວ-ພາບ: ກົມປະຊາສຳພັນ ຫສນຍ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ໃນວັນທີ 23 ມິຖຸນາ ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດແຫ່ງ ສປປ ລາວ ໄດ້ພົບປະໂອ້ລົມ ຕໍ່ການນໍາ ແລະ ພະນັກງານຫຼັກແຫຼ່ງຂອງ ສະພາທິດສະດີສູນກາງພັກ, ຄະນະໂຄສະນາອົບຮົມສູນກາງພັກ (ຄອສພ) ແລະ ສະຖາບັນວິທະຍາສາດເສດຖະກິດ-ສັງຄົມແຫ່ງຊາດ (ສວສສຊ), ໂດຍການຕ້ອນ ຮັບຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ປະທານສະພາທິດສະດີສູນກາງພັກ, ຫົວໜ້າ ຄອສພ.

ໃນໂອກາດນີ້, ສະຫາຍ ຄໍາພັນ ເຜີຍຍະວົງ ໄດ້ລາຍງານສະພາບການເຄື່ອນໄຫວວຽກງານ ຂອງສະພາທິດສະດີສູນກາງພັກ ໃນໄລຍະຜ່ານມາ ຊຶ່ງຍົກໃຫ້ເຫັນບັນດາຜົນສໍາເລັດ ໃນການເຄື່ອນ ໄຫວວຽກງານຄົ້ນຄວ້າທິດສະດີ ແລະ ພຶດຕິກໍາ; ການຈັດຕັ້ງດໍາເນີນກອງປະຊຸມສໍາມະນາທິດສະດີ ທັງພາຍໃນ ແລະ ຕ່າງປະເທດ; ສະພາບການປັບປຸງກົງຈັກການຈັດຕັ້ງຂອງສະພາທິດສະດີສູນກາງພັກ ປະກອບມີ ຄະນະປະຈໍາສະພາທິດສະດີສູນກາງພັກ; ຄະນະກໍາມະການດ້ານການເມືອງ-ຄວາມໝັ້ນຄົງ; ຄະນະກໍາມະການດ້ານເສດຖະກິດ-ການເງິນ; ຄະນະກໍາມະການດ້ານວັດທະນະທໍາ-ສັງຄົມ ແລະ ຄະນະເລຂາທິການວິທະຍາສາດ.

ສະພາທິດສະດີສູນກາງພັກ ມີ ຫ້ອງການສະພາທິດສະດີສູນກາງພັກ ເປັນກົງຈັກຊ່ວຍວຽກບໍລິຫານ ໂດຍພາຍໃຕ້ການຊີ້ນໍາໂດຍກົງຂອງຮອງປະທານຜູ້ປະຈໍາການສະພາທິດສະດີສູນກາງພັກ, ການປັບປຸງພາລະບົດບາດຂອງສະພາທິດສະດີສູນກາງພັກ ແນໃສ່ເພື່ອໃຫ້ມີຄຸນນະພາບກວ່າເກົ່າ ຊຶ່ງສະພາທິດສະດີສູນກາງພັກແມ່ນການຈັດຕັ້ງໜຶ່ງທີ່ຂຶ້ນກັບການຊີ້ນໍາໂດຍກົງຂອງກົມການເມືອງສູນກາງພັກ, ມີພາລະບົດບາດໃຫ້ຄໍາປຶກສາແກ່ຄະນະບໍລິຫານງານສູນກາງພັກ, ກົມການເມືອງສູນກາງພັກ, ຄະນະເລຂາທິການສູນກາງພັກ ກ່ຽວກັບບັນຫາທິດສະດີການເມືອງ, ແນວຄິດ-ທິດສະດີຂອງພັກ ແລະ ວິທະຍາສາດສັງຄົມ ເພື່ອເປັນພື້ນຖານໃຫ້ແກ່ການກໍານົດ, ປັບປຸງ ແລະ ບູລະນະແນວທາງ, ນະໂຍບາຍຂອງພັກຕາມທິດກ້າວຂຶ້ນສັງຄົມນິຍົມ.

ສະຫາຍ ທອງລຸນ ສີສຸລິດ ໄດ້ໃຫ້ຄໍາເຫັນຊີ້ນໍາ ຕໍ່ສະພາທິດສະດີສູນກາງພັກ, ຄອສພ, ສວສສຊ ໃນການສືບຕໍ່ຈັດຕັ້ງປະຕິບັດໜ້າທີ່ການເມືອງຂອງຕົນ ໃນນີ້ໄດ້ເນັ້ນໃຫ້ສະພາທິດສະດີສູນກາງພັກ ເປັນເຈົ້າການໃນການສຸມທຸກກໍາລັງແຮງຂອງຕົນ ເຂົ້າໃນການສືບຕໍ່ຈັດຕັ້ງນໍາພາ-ຊີ້ນໍາການ ເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ສໍາເລັດຜົນ ແລະ ມີປະສິດທິພາບ; ເອົາໃຈໃສ່ຕໍ່ການປັບປຸງກົນໄກການຈັດຕັ້ງເຄື່ອນໄຫວວຽກງານຄົ້ນຄວ້າທິດສະດີ ແລະ ສະຫຼຸບພຶດຕິກໍາແຫ່ງການຈັດຕັ້ງນໍາພາຂອງພັກ ໂດຍສະເພາະ ໃນສະເພາະໜ້ານີ້ ແມ່ນສຸມໃສ່ການຄົ້ນຄວ້າທິດສະດີ ແລະ ສະຫຼຸບພຶດຕິກໍາ ກ່ຽວກັບການການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ ໃຫ້ສໍາເລັດຜົນ ຕາມລະດັບຄາດໝາຍ ພ້ອມກັບບັນດາໂຄງການຄົ້ນຄວ້າລະດັບຊາດໃນຫົວຂໍ້ຕ່າງໆ ໃຫ້ສາມາດຮັບຮອງເອົາຜົນການຄົ້ນຄວ້າຢ່າງເປັນທາງການ ເພື່ອປັບປຸງບູລະນະແນວທາງຂອງພັກ ໃຫ້ນັບມື້ນັບອຸດົມສົມບູນ ເທື່ອລະກ້າວ.

(ຂ່າວ: ສະພາທິດສະດີສູນກາງພັກ, ພາບ: ສຸກສະຫວັນ)

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ໄດ້ຊີ້ແຈງກ່ຽວກັບການປະຕິຮູບລັດວິສາຫະກິດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 22 ມິຖຸນາ ຜ່ານມາ, ໂດຍການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.

ທ່ານນາງ ວັດທະນາ ດາລາລອຍ ກ່າວວ່າ: ການປະຕິຮູບລັດວິສາຫະກິດແຕ່ລະປະເພດ “ລັດວິສາຫະກິດໃດເຄື່ອນໄຫວບໍ່ມີປະສິດທິຜົນ ແລະ ລັດບໍ່ຈໍາເປັນເຂົ້າຖືຮຸ້ນໃຫ້ຫັນໄປສູ່ຮູບການອື່ນໂດຍໃຫ້ດຳເນີນການກວດກາປະເມີນມູນຄ່າຊັບສິນ ແລະ ໜີ້ສິນຄືນໃໝ່, ຖ້າຈຳເປັນຫັນ ຫຼືຮ່ວມທຶນ ກໍໃຫ້ດໍາເນີນການປັບປຸງໂຄງສ້າງວິສາຫະກິດທາງດ້ານການເງິນຕາມຂັ້ນຕອນ ທັງກຳນົດຮູບການ ແລະ ດຳເນີນການເຈລະຈາກັບພາກເອກະຊົນທີ່ມີເຈດຈໍານົງຢາກຮ່ວມທຶນ ກັບວິສາຫະກິດດັ່ງກ່າວ.

ສະນັ້ນ, ຈຶ່ງເວົ້າໄດ້ວ່າການປັບປຸງໂຄງສ້າງຂອງທະນາຄານພັດທະນາລາວ ແລະ ທະນາຄານສົ່ງເສີມກະສິກຳ ໃນໄລຍະຜ່ານມາແມ່ນສອດຄ່ອງຕາມເນື້ອໃນຈິດໃຈມະຕິຂອງກົມການ ເມືອງສູນກາງພັກ ແລະ ມະຕິຂອງລັດຖະບານທີ່ກ່ຽວຂ້ອງ, ໂດຍທະນາຄານແຫ່ງ ສປປ ລາວ ໄດ້ມີການປະສານສົມທົບກັບກະຊວງການເງິນ ແລະ ກະຊວງກ່ຽວຂ້ອງ ພ້ອມທັງໄດ້ຮັບການເຫັນດີຈາກລັດຖະບານ ແລະ ໄດ້ດຳ ເນີນການຖືກຕ້ອງຕາມຫຼັກການ ແລະ ລະບຽບການໃນທຸກຂັ້ນຕອນ.

ກ່ອນເຂົ້າສູ່ຂະບວນການປັບປຸງໂຄງສ້າງ, ການດຳເນີນທຸລະກິດຂອງທັງສອງທະນາຄານທຸລະກິດລັດທີ່ມີການຂາດທຶນສະສົມໃນລະດັບສູງຕໍ່ເນື່ອງ, ມີສະພາບຖານະການເງິນອ່ອນແອ ຊຶ່ງທະນາຄານແຫ່ງ ສປປ ລາວ ໃນນາມຜູ້ຄຸ້ມຄອງກໍໄດ້ປະຕິບັດພາລະບົດບາດຂອງຕົນ ດ້ວຍການພະຍາຍາມປະຕິບັດຫຼາຍມາດຕະການແກ້ໄຂມາຢ່າງຕໍ່ເນື່ອງເປັນຕົ້ນ: ໄດ້ເຂົ້າຕິດຕາມຄວບຄຸມສະເພາະຢ່າງໃກ້ຊິດໃນໄລຍະປີ 2015-2018, ດຳເນີນການປັບປຸງຢ່າງຮອບດ້ານ, ໄປຄຽງຄູ່ກັນກັບການຊອກຫາຄູ່ຮ່ວມທຶນຍຸດທະສາດ ເພື່ອມາຮ່ວມທຶນໃນການປັບປຸງສອງທະນາຄານດັ່ງກ່າວ. ແຕ່ກໍບໍ່ໄດ້ຮັບການຕອບຮັບ.

ຄຽງຄູ່ກັນນີ້,ອົງການກວດກາແຫ່ງລັດກໍໄດ້ເລີ່ມກວດກາທະນາຄານສົ່ງເສີມກະສິກຳ ນັບແຕ່ປີ 2015 ເປັນຕົ້ນມາ ແລະ ທະ ນາຄານພັດທະນາລາວ ນັບແຕ່ປີ 2018 ເປັນຕົ້ນມາ. ມາຮອດຕົ້ນປີ 2021, ເພື່ອແກ້ໄຂສະພາບຖານະການເງິນທີ່ອ່ອນແອຊຳເຮື້ອຂອງທັງສອງທະນາຄານ ບໍ່ໃຫ້ສືບຕໍ່ແກ່ຍາວກະທົບຕໍ່ຖານະການເງິນຂອງລັດຖະບານ ແລະ ຮັບ ປະກັນຄວາມຮັບຜິດຊອບຕໍ່ເງິນຝາກຂອງລູກຄ້າທີ່ຢູ່ສອງທະນາຄານທຸລະກິດລັດດັ່ງກ່າວ, ຕາມການຄົ້ນຄວ້ານຳສະເໜີຂອງຄະນະຮັບຜິດຊອບກ່ຽວຂ້ອງ ທີ່ໄດ້ຮັບການແຕ່ງຕັ້ງມອບໝາຍຈາກລັດຖະບານ.

ລັດຖະບານໄດ້ຄັດເລືອກ 2 ບໍລິສັດເອກະຊົນຄື: (ບໍລິສັດຈະເລີນເຊກອງພະລັງງານຈຳກັດ ແລະ ບໍລິສັດພົງຊັບທະວີກໍ່ສ້າງ) ເຂົ້າຮ່ວມທຶນຖືຮຸ້ນໃນ 2 ທະນາຄານດັ່ງກ່າວ 70% ແລະ ລັດຖືຮຸ້ນ 30%. ໃນຂະບວນການປັບປຸງ, ທັງສອງທະນາ ຄານແມ່ນໄດ້ຜ່ານການປະເມີນຊັບສິນຈາກບໍລິສັດກວດສອບພາຍນອກທີ່ມີຊື່ສຽງ ແລະ ເປັນທີ່ຍອມຮັບໃນລະດັບສາກົນ. ເພື່ອປະເມີນມູນຄ່າຮຸ້ນ, ປະເມີນມູນຄ່າຊັບສິນທີ່ເປັນອາຄານ ແລະ ທີ່ດິນ; ພ້ອມກັນນີ້, ສຳລັບຊັບສິນຄົງທີ່ ທີ່ໝົດອາຍຸການນໍາໃຊ້ແລ້ວ ກໍໄດ້ຖືກປະເມີນກວດກາໂດຍຄະນະຮັບຜິດຊອບເບື້ອງລັດຖະບານ.

ຄຽງຄູ່ກັນນີ້, ລັດຖະບານກໍໄດ້ມີການແຕ່ງຕັ້ງຄະນະຮັບຜິດຊອບຕິດຕາມກວດກາການປັບປຸງໂຄງສ້າງດັ່ງກ່າວຢ່າງເປັນລະບົບ.ກ່ອນການປັບປຸງໂຄງສ້າງ, ຊັບສິນສ່ວນໃຫຍ່ຂອງທັງສອງທະນາຄານແມ່ນສິນເຊື່ອຂອງລູກຄ້າສ່ວນໃຫຍ່ລ້ວນແຕ່ແມ່ນສິນເຊື່ອທີ່ພາໃຫ້ເກີດໜີ້ສິນທີ່ບໍ່ເກີດດອກອອກຜົນໃນອັດຕາສ່ວນທີ່ສູງ ກະທົບຢ່າງໜັກໜ່ວງຕໍ່ຖານະການເງິນຂອງທັງສອງທະນາຄານ ແລະ ເຮັດໃຫ້ລະບົບທະນາຄານລັດເຮົາໂດຍລວມບໍ່ສາມາດເຂັ້ມແຂງໄດ້ ຈຶ່ງຈໍາເປັນຕ້ອງໄດ້ມີການປະຕິຮູບ; ນອກຈາກນີ້ກໍມີຊັບສິນຄົງທີ່ຈໍານວນໜຶ່ງ ທີ່ມາຈາກການບໍລິຫານລາຍຈ່າຍທີ່ບໍ່ມີປະສິດທິຜົນເທົ່າທີ່ຄວນ ບໍ່ສົມຄູ່ກັບປະສິດທິຜົນໃນການດໍາເນີນທຸລະກິດ.

ສຳລັບເບື້ອງໜີ້ສິນຂອງທັງສອງທະນາຄານ ເກືອບ 100% ແມ່ນເງິນຝາກຂອງລູກຄ້າ ແລະ ສະຖາບັນການເງິນອື່ນ ທີ່ພົວພັນກັບໜີ້ສິນຈາກການດຳເນີນທຸລະກິດທີ່ບໍ່ມີປະສິດທິຜົນ ທີ່ເຮັດໃຫ້ເກີດມີຍອດຂາດທຶນສະສົມມະຫາສານສະສົມເພີ່ມຂຶ້ນຕໍ່ເນື່ອງ. ໃນໄລຍະໄຕມາດສຸດທ້າຍຂອງປີ 2021, ພາຍຫຼັງສຳເລັດການເຊັນສັນຍາຮ່ວມທຶນກັບບັນດາຜູ້ຮ່ວມທຶນ ຫຼັງຈາກທີ່ໄດ້ມີການປະເມີນຊັບສິນຕາມມາດຕະຖານສາກົນຄືດັ່ງທີ່ໄດ້ກ່າວມານັ້ນ ແລະ ອີງຕາມການເຫັນດີຈາກລັດຖະບານ, ກະຊວງການເງິນໄດ້ປະກອບທຶນຕາມລະບຽບການ ດ້ວຍຮູບແບບການອອກພັນທະບັດ.

ພາຍຫຼັງສຳເລັດການປັບປຸງໂຄງສ້າງ ແລະ ໄດ້ເຄື່ອນໄຫວດຳເນີນທຸລະກິດຕາມໂຄງສ້າງໃໝ່ທີ່ໄດ້ປັບປຸງ ໂດຍລວມທະນາຄານແຫ່ງ ສປປ ລາວ ກໍຄື: ລັດຖະບານເຫັນໄດ້ວ່າ: ການເຄື່ອນໄຫວທຸລະກິດຂອງທັງສອງທະນາຄານ ທັງທະນາຄານພັດທະນາລາວ ແລະ ທະນາຄານສົ່ງເສີມກະສິກຳ ໄດ້ມີທ່າອ່ຽງນັບມື້ນັບເຂັ້ມແຂງຂຶ້ນ ເມື່ອທຽບໃສ່ໄລຍະກ່ອນການປັບປຸງໂຄງສ້າງໃນເດືອນພຶດສະພາ 2022 ໃສ່ເດືອນກັນຍາ 2021 ເຫັນໄດ້ວ່າ: ທະນາຄານພັດທະນາລາວ ສາມາດລະດົມເງິນຝາກໄດ້ເພີ່ມຂຶ້ນ ໄດ້ມີຍອດເຫຼືອເງິນຝາກເພີ່ມຂຶ້ນ 27%; ຍອດຊັບສິນໄດ້ເພີ່ມຂຶ້ນ 110,37%, ໃນນີ້, ສິນເຊື່ອໄດ້ມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະ ແຂງແຮງ, ອັດຕາສ່ວນໜີ້ບໍ່ເກີດດອກອອກຜົນໄດ້ຫຼຸດລົງຈາກ 3,81% ມາຢູ່ໃນລະດັບ 0,12% ຈາກທີ່ເຄີຍຢູ່ໃນລະດັບສູງກາຍ 3% ພ້ອມກັນນີ້, ທະນາຄານດັ່ງກ່າວກໍສາມາດສ້າງກໍາໄລ ຈາກທີ່ໄດ້ມີການຂາດທຶນສະສົມມາຢ່າງຕໍ່ເນື່ອງ ກ່ອນການປັບປຸງໂຄງສ້າງ.

ສະເພາະໃນເດືອນພຶດສະພາ 2022 ໄດ້ມີກຳໄລ 78,51 ຕື້ກີບ. ອັດຕາສ່ວນຄວາມພຽງພໍຂອງທຶນຢູ່ໃນລະດັບເປັນບວກ ແລະ ນັບມື້ນັບເຂັ້ມແຂງຂຶ້ນ ຫຍັບໃກ້ເຂົ້າຫາລະດັບຕາມມາດຕະຖານວ່າດ້ວຍຄວາມໝັ້ນຄົງທີ່ທະນາຄານແຫ່ງ ສປປ ລາວ ໄດ້ກຳນົດໄວ້.

ທະນາຄານສົ່ງເສີມກະສິກຳ ໄດ້ສຳເລັດການປັບປຸງໂຄງສ້າງຊ້າກວ່າທະນາຄານພັດທະນາລາວໄລຍະໃດໜຶ່ງ ແຕ່ກໍສາມາດລະດົມເງິນຝາກໄດ້ເພີ່ມຂຶ້ນ ໄດ້ມີຍອດເຫຼືອເງິນຝາກເພີ່ມຂຶ້ນ 6%; ຍອດຊັບສິນກໍໄດ້ເພີ່ມຂຶ້ນ 86,98%.

ພ້ອມກັນນີ້, ທະນາຄານດັ່ງກ່າວກໍສາມາດເລີ່ມສ້າງກຳໄລໄດ້ ສະເພາະໃນເດືອນພຶດສະພາ 2022 ໄດ້ມີກຳໄລ 7,56 ຕື້ກີບ. ອັດຕາສ່ວນຄວາມພຽງພໍຂອງທຶນຢູ່ໃນລະດັບເປັນບວກ ແລະ ໄດ້ຕາມມາດຕະຖານວ່າດ້ວຍຄວາມໝັ້ນຄົງທີ່ທະນາຄານແຫ່ງ ສປປ ລາວ ໄດ້ກຳນົດໄວ້.

ຂ່າວ-ພາບ: ບຸນຕອມ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ລາຍງານກ່ຽວກັບການປະເມີນການຈັດຕັ້ງປະຕິບັດກົດໝາຍ 4 ສະບັບຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ ຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຂຸດທີ IX ໃນວັນທີ 23 ມິຖຸນາ ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານຮອງນາຍົກລັດຖະມົນຕີ ກ່າວວ່າ: ການຈັດຕັ້ງປະຕິບັດບັນດາກົດໝາຍດັ່ງກ່າວໃນໄລຍະຜ່ານມາ ຂະແໜງການທີ່ກ່ຽວຂ້ອງໄດ້ມີການໂຄສະນາ ເຜີຍແຜ່ 4 ກົດໝາຍ ຢ່າງກວ້າງຂວາງໃຫ້ອົງການປົກຄອງທ້ອງຖິ່ນ, ກຸ່ມເປົ້າໝາຍນັບທັງຂັ້ນສູນກາງ ແລະ ທ້ອງຖິ່ນໄດ້ຮັບຮູ້ ແລະ ເຂົ້າໃຈຜ່ານຫຼາຍຊ່ອງທາງ ເຊັ່ນ: ການໂຄສະນາເຜີຍແຜ່ໃນກອງປະຊຸມຕ່າງໆ ໂຄສະນາຜ່ານໜັງສືພິມ, ວິທະຍຸ ແລະ ສື່ສິ່ງພິມອື່ນໆ, ຜ່ານເວັບໄຊເປັນພາສາລາວ ແລະ ພາສາຕ່າງປະເທດ ໃນນັ້ນກົດໝາຍວ່າດ້ວຍການລົງທຶນ, ກົດໝາຍວ່າດ້ວຍແຮ່ທາດໄດ້ມີການໂຄສະນາເຜີຍແຜ່ຢູ່ຕ່າງປະເທດ, ພ້ອມກັນນັ້ນຂະ ແໜງການທີ່ກ່ຽວຂ້ອງໄດ້ປະສານສົມທົບກັບຂະແໜງການອື່ນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງໃນການຈັດຕັ້ງປະຕິບັດກົດໝາຍ ທັງ 4 ສະບັບ ໄດ້ເປັນເຄື່ອງມືທີ່ສຳຄັນ ແລະ ເປັນບ່ອນອີງໃຫ້ແກ່ຂະ ແໜງການທີ່ກ່ຽວຂ້ອງໃນການຄຸ້ມຄອງ, ຕິດຕາມ, ກວດກາວຽກງານຂອງຂະແໜງການຂອງຕົນ.

ຕໍ່ກັບທິດທາງໃນຕໍ່ໜ້າ ທ່ານຮອງນາຍົກລັດຖະມົນຕີໄດ້ກ່າວວ່າ: ຕ້ອງເພີ່ມທະວີການໂຄສະນາເຜີຍແຜ່ 4 ກົດໝາຍໃຫ້ກວ້າງຂວາງທົ່ວເຖິງ, ຂະແໜງການ ແລະ ອົງການປົກຄອງທ້ອງຖິ່ນເປັນເຈົ້າການຈັດຕັ້ງປະຕິບັດກົດໝາຍ, ລະບຽບການທີ່ກ່ຽວຂ້ອງຢ່າງເຂັ້ມງວດ ແລະ ມີປະສິດທິຜົນ, ຂະ ແໜງການທີ່ເປັນເຈົ້າການໃນການປະຕິບັດກົດໝາຍຕ້ອງປະສານສົມທົບກັບຂະແໜງການອື່ນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງເພື່ອຮັບປະກັນໃຫ້ການເຄື່ອນໄຫວມີຄວາມຄ່ອງຕົວ ແລະ ແກ້ໄຂບັນຫາທີ່ບໍ່ມີຄວາມເປັນເອກກະພາບກັນ.

ໃນນັ້ນກົດໝາຍທີ່ດິນ ຕ້ອງເອົາໃຈໃສ່ຄົ້ນຄວ້າສ້າງແຜນຍຸດທະສາດການນຳໃຊ້ທີ່ດິນຂອງຂະ ແໜງການຄຸ້ມຄອງທີ່ດິນແຕ່ລະປະເພດ ໂດຍສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ, ແຜນຈັດສັນທີ່ດິນຂອງທ້ອງຖິ່ນ ເພື່ອຮັບປະກັນບັນລຸໂຕເລກຄາດໝາຍໃນເຂດສະຫງວນ ແລະ ອະນຸລັກດິນໄວ້ເພື່ອເປັນເນື້ອທີ່ປົກຫຸ້ມປ່າໄມ້ 70% ຂອງເນື້ອທີ່ທົ່ວປະເທດ, ດິນກະສິກຳ 4,5 ລ້ານເຮັກຕາ ຕາມມະຕິຂອງສະພາແຫ່ງຊາດ, ເອົາໃຈໃສ່ຄຸ້ມຄອງບໍລິຫານວຽກງານທີ່ດິນໃຫ້ເຂັ້ມງວດຂຶ້ນຕື່ມ ແລະ ໃຫ້ຖືກຕ້ອງຕາມກົດໝາຍ ໂດຍສະເພາະແມ່ນການຂຶ້ນທະບຽນອອກໃບຕາດິນ, ການເຊົ່າສຳປະທານທີ່ດິນ, ການເຄື່ອນໄຫວປ່ຽນສິດນຳໃຊ້ທີ່ດິນ, ການມອບສິດນຳໃຊ້ທີ່ດິນຂອງລັດ ແລະ ການຫັນປ່ຽນປະເພດທີ່ດິນ ແລະ ອື່ນໆ.

ສຳລັບ ກົດໝາຍວ່າດ້ວຍ ການສົ່ງເສີມການລົງທຶນ ເພີ່ມທະວີເອົາໃຈໃສ່ຕິດຕາມຄຸ້ມຄອງການລົງທຶນທີ່ອະນຸຍາດແລ້ວໃຫ້ເປັນລະບົບຕໍ່ເນື່ອງສອດຄ່ອງກັບນິຕິກຳ, ມີການແບ່ງຄວາມຮັັບຜິດຊອບຈະແຈ້ງລະຫວ່າງສູນກາງກັບທ້ອງຖິ່ນ ແລະ ລະຫວ່າງ ແຂວງກັບເມືອງ ແລະ ລະຫວ່າງເມືອງກັບບ້ານ, ຄົ້ນຄວ້າປັບປຸງກົດໝາຍວ່າດ້ວຍການສົ່ງເສີມການລົງທຶນ.

ສ່ວນກົດໝາຍວ່າດ້ວຍຊັບສິນຂອງລັດ ບັນດາຂະແໜງການອົງການປົກຄອງທ້ອງຖິ່ນແຕ່ລະຂັ້ນຕ້ອງໄດ້ເປັນເຈົ້າການຄຸ້ມຄອງ ແລະ ພັດທະນານຳໃຊ້ຊັບສິນຂອງລັດໃຫ້ຖືກຕ້ອງຕາມເປົ້າໝາຍ ແລະ ຖືກຕ້ອງຕາມລະບຽບກົດໝາຍ, ຂະແໜງຄຸ້ມຄອງສັບສິນແຫ່ງລັດຕ້ອງມີການປະສານສົມທົບຢ່າງເປັນປົກກະຕິກັບຂະແໜງການທີ່ກ່ຽວຂ້ອງເພື່ອເປັນເອກະພາບການຄຸ້ມຄອງແກ້ໄຂບັນຫາກ່ຽວກັບຊັບສິນຂອງລັດ, ຄົ້ນຄວ້າປັບປຸງກົດໝາຍວ່າດ້ວຍຊັບສິນຂອງລັດ ຊຶ່ງເປັນກົດໝາຍໜຶ່ງທີ່ຕິດພັນກັບວາລະແຫ່ງຊາດກ່ຽວກັບການເກັບລາຍຮັບ.

ໃນຂະນະທີ່ກົດໝາຍວ່າດ້ວຍແຮ່ທາດ ຂະແໜງການພະລັງງານ ແລະ ບໍ່ແຮ່ ຕ້ອງໄດ້ປະສານສົມທົບແໜ້ນກັບຂະແໜງການໂຍທາທິການ ແລະ ຂົນສົ່ງ ເພື່ອເປັນເອກະພາບກັນໃນການຄຸ້ມຄອງແຮ່ຫີນ, ຊາຍ ແລະ ແຮ່ອື່ນໆ ແນໃສ່ອັດຊ່ອງວ່າງໃນການສວຍໂອກາດຂຸດຄົ້ນແຮ່ປະເພດອື່ນໆ, ຄົ້ນຄວ້າປັບປຸງກົດໝາຍວ່າດ້ວວຍແຮ່ທາດ ແລະ ອື່ນໆ.

ຂ່າວ-ພາບ: ສຳນານ

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

“ໄຂ້ເລືອດອອກ” ແມ່ນພະຍາດຕິດຕໍ່ ທີ່ເກີດຈາກໄວຣັສເດັງກີ ຊື່ງມີຍຸງເປັນພາຫະນະຂົນສົ່ງພະຍາດ ຫຼັງຈາກຖືກຍຸງທີ່ມີເຊື້ອກັດມັນຈະຢູ່ໃນຮ່າງກາຍຂອງຄົນເປັນເວລາ 5-8 ມື້ ແລະ ຄົນເຈັບຈະເລີ່ມເປັນໄຂ້ສູງເປັນເວລາ 2-7 ມື້ ແລະ ເປັນຕຸ່ມເລືອດໄຫຼອອກຕາມຜິວໜັງ ພະຍາດນີ້ສາມາດເກີດຂື້ນໄດ້ທັງເດັກນ້ອຍ ແລະ ຜູ້ໃຫຍ່ ແລະ ມັກຈະແຜ່ລະບາດໃນລະດູຝົນ ເພາະວ່າມີຍຸງເພີ່ມຂື້ນຫຼາຍ ຍຸງລາຍອາໄສຢູ່ໃນເຮືອນ ແລະ ອ້ອມແອ້ມເຮືອນຄືການກິນເລືອດຄົນໃນເວລາກາງເວັນ ຄົນເຈັບທີ່ຕິດເຊື້ອໄຂ້ເລືອດອອກອາດຈະມີອາການພຽງເລັກນ້ອຍ ຫຼື ອາດຈະເປັນອາການຮຸນແຮງຈົນເຖິງຂັ້ນເສຍຊີວິດ ຄວາມຮຸນແຮງຂອງການຕິດເຊື້ອແມ່ນຂື້ນກັບອາຍຸ ພູມຕ້ານທານ ແລະ ຄວາມຮຸນແຮງຂອງການຕິດເຊື້ອ.

ລັກສະນະຕົ້ນຕໍຂອງພະຍາດໄຂ້ເລືອດອອກແມ່ນ:

1. ໄຂ້ສູງເປັນເວລາ 2-7 ມື້.
2. ເບື່ອອາຫານ, ໜ້າແດງ, ເຈັບຫົວ, ປວດຮາກ ແລະ ຍັງເຈັບທ້ອງນຳອີກ.
3. ບາງຄົນອາດຈະເປັນຕຸ່ມແດງຢູ່ຕາມຕົນຕົວ, ແຂນ, ຂາ, ອາດມີເລືອດກໍ່າອອກມາ ຫຼື ເລືອດອອກຕາມແຂ້ວ, ຖ່າຍໜັກເປັນສີດຳເນື່ອງຈາກເລືອດອອກ ແລະ ອາດຈະເຮັດໃຫ້ເກີດອາ ການຊ໊ອກໄດ້.
4. ໃນກໍລະນີທີ່ມີອາການຊ໊ອກສາມາດສັງເກດໄດ້ຈາກການໄຂ້, ຄົນເຈັບຊືມ, ຕົວເຢັນ, ກຳມະ ຈອນເຕັ້ນໄວ ແລະ ໝົດສະຕິ ຖ້າການປິ່ນປົວຊັກຊ້າອາດຈະເສຍຊີວິດໄດ້ ບໍ່ມີຢາສະເພາະປິ່ນປົວໄຂ້ເລືອດອອກ ອາການຮັກສາໂດຍການໃຊ້ຢາ ເຊັ່ນ: ການໃຫ້ຢາຕ້ານເຊື້ອ, ເຊັດຮ່າງກາຍເພື່ອຫຼຸດອາການໄຂ້ ແລະ ການຊົດເຊີຍດ້ວຍທາດແຫຼວ ເຊັ່ນ: ການໃຫ້ນໍ້າເກືອເພາະວ່າຄົນເຈັບມັກຈະມີອາການຂາດນໍ້າເນື່ອງຈາກເປັນໄຂ້ສູງ, ຖ້າມີອາການເຈັບທ້ອງ, ຍ່ຽວໜ້ອຍລົງ, ງຸດງິດ, ຕີນມືເຢັນ ໂດຍສະເພາະໃນຊ່ວງໄລຍະໄຂ້ຫຼຸດ ຕ້ອງຟ້າວໄປໂຮງໝໍໂດຍດ່ວນ.

ວິທີປ້ອງກັນ ແລະ ຄວບຄຸມໄຂ້ເລືອດອອກ

1. ປ້ອງກັນບໍ່ໃຫ້ຍຸງກັດ ຍຸງລາຍມັກຈະກັດຄົນໃນເວລາກາງເວັນ ຄວນນອນໃນມຸ້ງກັນຍຸງ ຫຼື ໃສ່ມຸ້ງກັນຍຸງເພື່ອປ້ອງກັນບໍ່ໃຫ້ຍຸງເຂົ້າໄປໃນເຮືອນ ຫຼີກລ້ຽງການຢູ່ໃນບ່ອນທີ່ປຽກຊຸ່ມ ໃຊ້ຢາໄລ່ຍຸງທີ່ສະກັດຈາກພືດທຳມະຊາດ.
2. ກຳຈັດແຫຼ່ງເພາະພັນຍຸງລາຍໃຫ້ໝົດໄປ ຍຸງລາຍຈະເພາະພັນໃນບ່ອນທີ່ມີນໍ້າໃສ ໃນເຮືອນທີ່ມີບ່ອນນໍ້າຂັງ ເຊັ່ນ: ຖັງນໍ້າ, ຈອກ, ຂາຕູ້ທີ່ກັນມົດ, ໂຖດອກໄມ້ ແລະ ພາຊະນະທີ່ຢູ່ນອກເຮືອນທີ່ມີນໍ້າ ເຊັ່ນ: ຢາງລົດ, ອ່າງນໍ້າເປັນຕົ້ນ.
3. ພາຊະນະທີ່ໃຊ້ໃນການເກັບນໍ້າຕ້ອງປິດແໜ້ນ.
4. ໃຊ້ຊາຍເພື່ອກຳຈັດຕົວອ່ອນໃນຖັງນໍ້າ ທຳລາຍພາຊະນະທີ່ບໍ່ຈຳເປັນ ເພາະອາດຈະມີນໍ້າຂັງໄດ້.
5. ການປ່ອຍປາ ເຊັ່ນ: ປາຫາງນົກຍຸງໃນພາຊະນະທີ່ມີນໍ້າຂັງເປັນຕົ້ນແມ່ນອ່າງດອກບົວ ແລະ ອື່ນໆ…
6. ປ່ຽນນໍ້າໃນພາຊະນະນ້ອຍໆ ເຊັ່ນ: ປ່ຽນໂຖທຸກໆ 7 ມື້.
7. ປ່ຽນສະພາບແວດລ້ອມໃນເຮືອນ ແລະ ອ້ອມເຮືອນໃຫ້ເປັນລະບຽບຮຽບຮ້ອຍ.

ລ້າງພາຊະນະທຸກຄັ້ງທີ່ປ່ຽນນໍ້າເພື່ອທຳລາຍໄຂ່ຍຸງ.

ຫຼາຍໆ ຄົນມັກຈະມີບັນຫາຂອບຕາດຳ ຫຼື ຂອບຕາເປັນໝີແພນດ້າ ບໍ່ວ່າຈະມີອາຍຸເທົ່າໃດ ກໍ່ມັກຈະພົບບັນຫາເຫຼົ່ານີ້ຢູ່ສະເໝີ ໂດຍສະເພາະໃນປະຈຸບັນຫຼາຍຄົນກຳລັງຫັນໄປໃຊ້ຊີວິດໃນຕອນກາງຄືນເຊັ່ນວ່າ: ການຫຼີ້ນໂທລະສັບມືຖືໃນຕອນກາງຄືນ ເຮັດວຽກຈົນເດີກດື່ນ ອ່ານໜັງສືໝົດຄືນເປັນຕົ້ນແມ່ນເວລາໃກ້ການສອບເສັງ ຍິ່ງບໍ່ມີເວລາຈະນອນຫຼັບ ແຕ່ລະຫວ່າງເລື່ອງທີ່ຕ້ອງເຮັດກັບເລື່ອງສຸຂະພາບບາງຄັ້ງມັນກໍ່ຍາກເກີນໄປທີ່ຈະເລືອກ ເຊີ່ງຈະມີຜົນກະທົບຕໍ່ສຸຂະພາບຂອງພວກເຮົາໄດ້.

ວິທີແກ້ໄຂຂອບຕາດຳຄວນເຮັດແນວໃດ? ຂອບຕາດຳສ່ວນຫຼາຍແມ່ນເລີ່ມມາຈາກການນອນເດິກກ່ອນ ຊື່ງມີຫຼາຍວິທີໃນການຮັກສາຂອບຕາດຳ ຂໍໃຫ້ເລືອກບາງວິທີທີ່ສະດວກໃນການແກ້ໄຂຂອບຕາດຳ ມາເບີ່ງນຳກັນກັນເລີຍວ່າມີວິທີໃດແດ່?

ວິທີແກ້ໄຂຂອບຕາດຳເລີ່ມຕົ້ນດ້ວຍວິທີທີ່ໃຊ້ກັນມາແຕ່ດົນນານເຊັ່ນ: ການໃຊ້ຖົງຊາ.

ເລີ່ມຈາກການນຳເອົາຖົງຊາທີ່ກິນແລ້ວ ມາປະໄວ້ໃຫ້ອຸ່ນໆ ຈາກນັ້ນເອົາມາໃສ່ຕາທັງສອງຂ້າງ ປະໄວ້ປະມານ 10-15 ນາທີ ສານຄາເຟອີນທີ່ຢູ່ໃນຖົງຊາຈະຊ່ວຍເຮັດໃຫ້ຕາຂອງທ່ານ ກັບມາສົດໃສອີກຄັ້ງ.

ວິທີພື້ນຖານອີກຢ່າງໜຶ່ງຄືໃຊ້ບ່ວງສະແຕນເລດ.

ເຊື່ອວ່າຫຼາຍຄົນຈະເຄີຍໃຊ້ ໂດຍການນຳເອົາບ່ວງສະແຕນເລດ ສຳລັບຊົງ ຫຼື ກາເຟໄປແຊ່ໃນຕູ້ແຊ່ແຂງ ແລ້ວນຳມາແປະໃສ່ຕາ ນອກຈາກຈະເຮັດໃຫ້ຂອບຕາດຳຫາຍໄປແລ້ວ ຍັງເຮັດໃຫ້ເຊົາຕາບວມ ຫຼື ໄຄ່ໄດ້ ແລະ ຍັງຊ່ວຍໃຫ້ດວງຕາສົດຊື່ນ ຕາແຈ້ງທັນທີ.

ໃຊ້ຄຣີມບຳລຸງສາຍຕາເປັນຕົວຊ່ວຍ.

ຖ້າໃຜບໍ່ມີເວລາຫຼາຍ ຂໍແນະນຳໃຫ້ຊື້ຄຣີມ ຫຼື ຄຣີມສຳລັບໃຊ້ທາຮອບດວງຕາມາໃຊ້ ການທາຄຣີມມືຕ້ອງນີ້ມນວນ ແລະ ມືເບົາໃຫ້ຫຼາຍທີ່ສຸດ ເພາະວ່າຜິວໜັງຮອບດວງຕາລະອຽດອ່ອນກ່ອນສ່ວນອື່ນໃນຮ່າງກາຍ.

ການເອົາຜັກ ຫຼື ໝາກໄມ້ມາແປະໃສ່ຕາ.

ສິ່ງທີ່ຕ້ອງໃຊ້ກໍ່ຄືໝາກແຕງ ມັນຝະລັ່ງ ທີ່ແຊ່ເຢັນ ເຊິ່ງມີວິຕາມິນຊີ ແລະ ສານຕ້ານອະນຸມູນອິດສະລະ ສິ່ງເຫຼົ່ານີ້ຈະຊ່ວຍໃຫ້ຕາແຈ້ງ ແລະ ຫຼຸດລິ້ວຮອຍໃນຮອບດວງຕາໄດ້ ແຕ່ວິທີການນີ້ຕ້ອງມີຄວາມດຸໝັ່ນຫຼາຍພໍສົມຄວນຢ່າງໜ້ອຍ 2-3 ຄັ້ງຕໍ່ອາທິດ ຈີ່ງຈະເຫັນຜົນ.

ນອນຫຼັບໃຫ້ພຽງພໍ

ວິທີການສຸດທ້າຍ ສຳລັບຜູ້ທີ່ນອນເດິກແມ່ນຄວນຫາເວລາພັກຜ່ອນໃຫ້ພຽງພໍ ເພາະການນອນຫຼັບບໍ່ພຽງພໍ ນອກຈາກການຈະເຮັດໃຫ້ຂອບຕາດຳເປັນໝີແພນດ້າແລ້ວ ຍັງສົ່ງຜົນກະທົບໃຫ້ສຸຂະພາບອ່ອນແອນຳອີກ ສິ່ງທີ່ ສຳຄັນການນອນເດີກບໍ່ແມ່ນມີແຕ່ຂອບຕາດຳຢ່າງດຽວ ແຕ່ຍັງເຮັດໃຫ້ໃບໜ້າຂອງເຮົາຫ່ຽວຍານກ່ອນໄວອັນຄວນ.

ສຳລັບຜູ້ທີ່ເປັນຂອບຕາດຳ ຈາກອາການພູມແພ້ແມ່ນແນະນຳໃຫ້ໄປພົບແພດ ເພື່ອຊອກຫາວິທີປີ່ນປົວໂລກພູມແພ້ພ້ອມກັບການໃຊ້ຄຣີມບຳລຸງສາຍຕາ ອາດຈະໃຊ້ເວລາດົນແດ່ໜ້ອຍໜື່ງ ແຕ່ຮັບປະກັນວ່າທ່ານສາມາດມີດວງຕາສົດໃສຄືກັນກັບຄົນອື່ນໆ ໄດ້ເຊັ່ນກັນ.

ສຸດທ້າຍສຳລັບຄົນທີ່ມີຂອບຕາດຳຈາກກຳມະພັນ ເຊີ່ງເປັນການປີ່ນປົວທີ່ຍາກ ເນື່ອງຈາກວ່າຮ່າງກາຍສາ ມາດສ້າງ melanin ຫຼື ເມັດສີຜິວຄໍ້າຫຼາຍກ່ວາຄົນອື່ນ ວິທີແກ້ໄຂຊົ່ວຄາວແມ່ນການທາຄຣີມບຳລຸງຮອບດວງຕາເປັນປະຈຳ ທີ່ມີສ່ວນປະສົມໄວເທນນີ້ງ ທີ່ເຮັດຂາວກະຈ່າງໃສ ເຮັດໃຫ້ຜິວຮອບດວງຕາສົດໃສ ເຖິງແມ່ນວ່າຫຼັງຈາກເຊົາທາອາດຈະກັບມາດຳອີກຄັ້ງກໍ່ຕາມ. ທັງໝົດນີ້ແມ່ນວິທີການຈັດການກັບບັນຫາຂອບຕາດຳເປັນໝີແພນດ້າທີ່ງ່າຍ ແລະ ບໍ່ຫຍຸ້ງຍາກຫຼາຍ ແຕ່ຈະດີກວ່ານີ້ຖ້າຄົນທີ່ນອນເດິກປັບປ່ຽນເວລານອນໃຫ້ໄວຂຶ້ນ ເພາະວ່ານອກຈາກການມີຂອບຕາບໍ່ດຳແລ້ວ ຍັງຈະໄດ້ຮັບສຸຂະພາບທີ່ດີເຊັ່ນກັນ.

ໃນປັດຈຸບັນຫຼາຍຄົນສົນໃຈກ່ຽວກັບເລື່ອງການບຳລຸງຜິວຫຼາຍຂື້ນ ແລະ ຊອກຫາຜະລິດຕະພັນຢູ່ຕາມທ້ອງຕະຫຼາດ ແຕ່ທ່ານຮູ້ບໍ່ວ່າບາງສິ່ງບາງຢ່າງບໍ່ໄດ້ດີຄືກັບການໂຄສະນາ ນອກຈາກນີ້ຍັງມີຜົນສະທ້ອນໃນໄລຍະຍາວ ແລະ ຜົນຂ້າງຄຽງກັບຜິວຂອງທ່ານເຊັ່ນກັນ ແຕ່ໂຊກດີສໍາລັບມື້ນີ້ພວກເຮົາຈະນໍາສະເໜີວິທີການຮັກສາຜິວດ້ວຍວິທີທຳມະຊາດທີ່ມີປະໂຫຍດ ແລະ ປະສິດທິພາບສູງ ໂດຍບໍ່ມີຜົນຂ້າງຄຽງໃດໆ ເປັນຕົ້ນແມ່ນຫວ້ານຫາງແຂ້ (Aloe Vera) ແມ່ນສ່ວນປະສົມຢ່າງໜຶ່ງທີ່ສຳຄັນໃນການແກ້ໄຂບັນຫາຜິວໄດ້ດີຫຼາຍ ເພາະເປັນພືດຊະນິດກໍ່ໃຫ້ຄວາມຊຸ່ມຊື່ນແກ່ຜິວ ແຖມຍັງສາມາດຈັດການກັບບັນຫາຕ່າງໆ ຂອງຜິວໄດ້ ເຊັ່ນ: ຈຸດດ່າງດຳ, ຮອຍແປ້ວ, ຝ້າ ລວມໄປເຖີງການອຸດົມສົມບູນ ດ້ວຍສານເຮັດໃຫ້ຜິວຂອງທ່ານເສາະໃສ ແລະ ເປັນທຳມະຊາດຫຼາຍທີ່ສຸດ.

ວິທີໃຊ້ປະໂຫຍດຈາກ aloe vera ໃຫ້ກັບຜິວ ມີດັ່ງນີ້:

1 aloe vera ປະສົມກັບນໍ້າຕານ

ຮ້ານເສີມສວຍສ່ວນຫຼາຍນິຍົມເມັດສະຄັບນໍ້າຕານ ເພື່ອກຳຈັດເຊວຜິວເກົ່າໃຫ້ອອກໄປ ເພີ່ມຄວາມລຽບນຽນໃຫ້ຜິວງາມ ໂດຍການເອົານໍ້າຕານ 2 ບ່ວງກາເຟ ປະສົມກັບ aloe vera gel ຈາກນັ້ນທາໃສ່ຜິວທີ່ມີບັນຫາກໍ່ຈະເຮັດໃຫ້ຜິວຂອງທ່ານລຽບນຽນ ແລະ ອ່ອນນຸ້ມ ນອກຈາກນີ້ຖ້າເຮັດເລື້ອຍໆ ຈະເຮັດໃຫ້ຜິວຂອງທ່ານງາມເປັນທຳມະຊາດ.

2 aloe vera ປະສົມກັບໝາກຫຸ່ງສຸກ

ໝາກຫຸ່ງສຸກມີຄຸນປະໂຫຍດທີ່ຊ່ວຍໃຫ້ຜິວພັນຂອງທ່ານອ່ອນກວ່າໄວ ໂດຍການປະສົມໝາກຫຸ່ງສຸກ ປະສົມກັບ aloe vera gel ຈາກນັ້ນທາໃສ່ໜ້າປະມານເຄິ່ງຊົ່ວໂມງ ແລ້ວລ້າງໜ້າໃຫ້ສະອາດດ້ວຍນໍ້າອຸ່ນ ແລະ ໂຟມລ້າງໜ້າຕາມປົກກະຕິ ເມື່ອລ້າງຮຽບຮ້ອຍແລ້ວໃຫ້ລ້າງໜ້າຕາມດ້ວຍນໍ້າເຢັນເພື່ອເຮັດຮູຂຸມຂົນຂອງທ່ານນ້ອຍລົງ ແລະ ໜ້າຈະເບິ່ງສົດໃສຂື້ນ.

3 Aloe Vera ປະສົມກັບນໍ້າເຜິ້ງ ແລະ ນົມສົດ

ເພື່ອເຮັດໃຫ້ຜິວຂອງທ່ານສົດໃສຂື້ນແນະນຳໃຫ້ທ່ານລ້າງໜ້າດ້ວຍນໍ້າອຸ່ນກ່ອນ ຫຼັງຈາກນັ້ນໃຊ້ນໍ້າເຜິ້ງປະສົມກັບນົມສົດ ແລະ aloe vera ປະລິມານເທົ່າກັນ ແລ້ວທາໃສ່ໜ້າຂອງທ່ານ ປະໄວ້ປະມານ 15 ຫາ 20 ນາທີ ຫຼັງຈາກນັ້ນໃຫ້ລ້າງ​​ໜ້າດ້ວຍນໍ້າເຢັນເພື່ອກະຊັບຮູຂຸມຂົນ ສູດນີ້ຈະເຮັດໃຫ້ໜ້າຂອງທ່ານອ່ອນກ່ວາໄວ ແລະ ຊຸ່ມຊື່ນ ແນະນຳໃຫ້ເຮັດເວລາກ່ອນນອນຈະດີທີ່ສຸດ.

4 aloe vera ປະສົມກັບນົມສົດ ແລະ ໜາກນາວ

ວິທີນີ້ຈະເຮັດໃຫ້ໃບໜ້າຂອງທ່ານເບິ່ງງາມຂື້ນ, ລຽບນຽນ, ບໍ່ມີຮອຍຫ່ຽວ ແລະ ຮອຍສິວອຸດຕັນ ແນະນຳໃຫ້ໃຊ້ Aloe Vera ປະສົມກັບນົມສົດ ແລະ ໜາກນາວ ໂດຍອັດຕາສ່ວນ aloe vera 2 ສ່ວນ, ນົມສົດ 1 ສ່ວນ ແລະ ໝາກນາວ 1 ສ່ວນ ປະສົມເຂົ້າກັນ ຫຼັງຈາກນັ້ນທາໃສ່ໜ້າ ແລ້ວນວດຄ່ອຍໆ ຢ່ານວດແຮງ ແລະ ຄ່ອຍໆ ຖູຕາມເຂັມໂມງ ຖູປະມານ 5 ນາທີ ເມື່ອຮອດເວລາຕາມກໍານົດກໍ່ລ້າງໜ້າໃຫ້ສະອາດດ້ວຍນໍ້າເຢັນ ສູດນີ້ເຮັດໃຫ້ຜິວໜ້າຜິວລຽບນຽນດີທີ່ສຸດ.

ນັບແຕ່ລັດຖະບານໄດ້ປະກາດວ່າ ນັບແຕ່ວັນທີ 20 ມິຖຸນາ 2022 ເປັນຕົ້ນໄປຈະມີນ້ຳ ມັນສະໜອງສະໜອງໃຫ້ຜູ້ຊົມໃຊ້ຢ່າງພຽງພໍ ໃນຂອບເຂດທົ່ວປະເທດ, ມາຮອດວັນທີ 21 ມິຖຸນາ 20 22 ນີ້, ສະເພາະ ຢູ່ນະຄອນຫລວງວຽງຈັນ ສັງເກດເຫັນວ່າປ້ຳນ້ຳມັນຫລາຍແຫ່ງ ຢູ່ບັນດາເມືອງຕ່າງ ໆ ໄດ້ເລີ່ມເປີດໃຫ້ບໍລິການ, ແຕ່ຍັງມີປະຊາຊົນຫລັ່ງໄຫລກັນໄປຊື້ນ້ຳມັນ, ລຽນຄິວກັນ ຫລື ລໍຖ້າ ໃສ່ນ້ຳມັນ ຢູ່ບັນດາປ້ຳຕ່າງໆທີ່ເປີດໃຫ້ບໍລິການ (ແຕ່ບໍ່ແອອັດຄືໄລຍະ 2-3 ມື້ທີ່ຜ່ານມາ). ເນື່ອງຈາກວ່າ ຄວາມຕ້ອງການຊົມໃຊ້ນ້ຳມັນມີຫລາຍ ແຕ່ການສະໜອງນ້ຳມັນ ຍັງບໍ່ທ່ວງທັນເທົ່າທີ່ຄວນ, ເຮັດໃຫ້ ບາງປ້ຳນ້ຳມັນໄດ້ກຳນົດເວລາ ໃນການເປີດ-ປິດໃນແຕ່ລະວັນ, ຂຶ້ນກັບປະລິມານນ້ຳມັນທີ່ໄດ້ມາໃນແຕ່ລະວັນ, ໃນຂະນະທີ່ບາງປ້ຳຍັງບໍ່ສາມາດເປີດໃຫ້ບໍລິການ ເນື່ອງຈາກວ່າຍັງບໍ່ທັນໄດ້ຮັບການສະໜອງນ້ຳມັນເຊື້ອໄຟເຂົ້າເທື່ອ.

ປັດຈຸບັນ ສັງເກດເຫັນວ່າ, ລົດຂົນສົ່ງນ້ຳມັນເຊື້ອໄຟ ໄດ້ທະຍອຍກັນເຂົ້າມາສະໜອງນຳມັນ ໃຫ້ບັນດາປ້ຳນ້ຳມັນແລ້ວໃນແຕ່ລະວັນ ເພື່ອຕອບສະໜອງການບໍລິໂພກຂອງປະຊາຊົນໃນແຕ່ລະວັນ, ຄາດວ່າສະພາບດັ່ງກ່າວ ຈະກັບມາເປັນປົກກະຕິພາຍໃນອາທິດນີ້, ປະຊາຊົນຈະໄດ້ໃຊ້ນຳມັນຢ່າງພຽງ ພໍ (ແບບບໍ່ໄດ້ລຽນຄິວກັນໃສ່ນ້ຳມັນ). ອີງຕາມຂໍ້ມູນຈາກ ລັດວິສາຫະກິດນ້ຳມັນເຊື້ອໄຟລາວ(ລນລ) ໃຫ້ຮູ້ວ່າ: ສະເພາະຢູ່ນະຄອນ ຫລວງວຽງຈັນ ຕາມການສັ່ງຈ່າຍນ້ຳມັນຕົວຈິງສູ່ປ້ຳຕົວແທນໃນເມືອງຕ່າງໆ ໃນຕອນເຊົ້າຂອງວັນທີ 20 ມິຖຸນາ 2022 ນີ້ ມີທັງໝົດຈຳນວນ 35 ປ້ຳ ປະກົດວ່າປ້ຳສ່ວນຫລາຍແມ່ນໄດ້ຈຳໜ່າຍໝົດກ່ອນເວລາ ເຊິ່ງທາງ ລນລ ຈະໄດ້ເລັ່ງຂົນສົ່ງໃຫ້ຄົບຕາມຈຳນວນທີ່ແຈ້ງໄປໂດຍດ່ວນ. ຂະນະທີ່ ໃນວັນທີ 19 ມິຖຸນາ 2022 ຜ່ານມາ ສາງນ້ຳມັນດົງຈອງຈຸດນະຄອນຫລວງຂອງ ລນລ ໄດ້ຮັບນ້ຳມັນເຊື້ອໄຟຜ່ານແດນ ເປັນຕົ້ນ ນ້ຳມັນແອັດຊັງ 348.800 ລິດ, ກາຊວນ 255.000 ລິດ ເພື່ອກະກຽມກະຈາຍສູ່ສັງຄົມ ໃນຂອບເຂດທົ່ວປະເທດ.

ຂ່າວ-ພາບ: ທະນູທອງ

ໃນໄລຍະຜ່ານມາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ເປັນເຈົ້າການໃນການໂຄສະນາເຜີຍແຜ່ ກ່ຽວກັບວຽກງານຕ້ານຢາເສບຕິດ ໂດຍສະເພາະແມ່ນໂຄສະນາການຈັດຕັ້ງຜັນຂະຫຍາຍ ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດຜ່ານສື່ຕ່າງໆ ເພື່ອໃຫ້ປະຊາຊົນ ກໍຄື ສັງຄົມ ຮັບຮູ້ຢ່າງແຂງແຮງ ແລະ ເປັນຂະບວນກວ້າງຂວາງ.

ທ່ານນາງ ສວນສະຫວັນ ວິຍາເກດ ລັດຖະມົນຕີ ກະຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 21 ມິຖຸນາ 2022 ກ່ຽວກັບການໂຄສະນາຜົນຮ້າຍ ແລະ ຄວາມອັນຕະລາຍຂອງຢາເສບຕິດຜ່ານສື່ຕ່າງໆ ເພື່ອໃຫ້ປະຊາຊົນ ກໍຄື ສັງຄົມເຂົ້າຮ່ວມໃນຂະ ບວນການຕ້ານຢາເສບຕິດຢ່າງແຂງແຮງ ເຊິ່ງເນື້ອໃນຕົ້ນຕໍໃນການໂຄສະນາຜ່ານສື່ມວນຊົນ ແມ່ນການເອົາໃຈໃສ່ໂຄສະນາ ການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຂອງຂະແໜງການຕ່າງໆທັງສູນກາງ ແລະ ທ້ອງຖິ່ນ ຢ່າງກວ້າງຂວາງ ແລະ ຕໍ່ເນື່ອງ ໂດຍສຸມໃສ່ປະຕິບັດຕາມທິດຊີ້ນໍາຂອງຂັ້ນເທິງຕໍ່ກັບການແກ້ໄຂບັນຫາດັ່ງກ່າວຢ່າງເປັນລະບົບ ເຊັ່ນ: ໄດ້ໂຄສະນາເຕືອນສະຕິ, ສຶກສາອົບຮົມໃຫ້ສັງ ຄົມ ກໍຄື ປະຊາຊົນ, ຊາວໜຸ່ມ ແລະ ເຍົາວະຊົນ ໄດ້ຮັບຮູ້ເຂົ້າໃຈເຖິງຜົນຮ້າຍຂອງຢາເສບຕິດ ໂດຍຜະລິດເປັນຂ່າວ, ບົດແນະນໍາ, ບົດສຶກສາອົບຮົມ, ບົດເລື່ອງ, ຄໍາຂວັນ ຜ່ານວິທະຍຸ-ໂທລະໂຄ່ງ, ໂທລະພາບ, ໜັງສືພິມ ແລະ ສື່ສັງຄົມອອນລາຍ. ພ້ອມທັງ ໄດ້ອອກຂ່າວຕາມເຫດການ ທີ່ເຈົ້າໜ້າທີ່ກ່ຽວຂ້ອງສາມາດຈັບກຸມຜູ້ຄ້າຂາຍ, ຂົ່ນສົ່ງ, ຜົນການສືບສວນ-ສອບສວນ, ການຖະແຫລງຂ່າວຂອງເຈົ້າໜ້າທີ່ ແລະ ການດໍາເນີນຄະດີໃນແຕ່ລະຄັ້ງ. ນອກນີ້, ສື່ມວນຊົນ ໄດ້ເປັນເຈົ້ການຕິດຕາມເກັບກໍາບັນຫາຫາງສຽງສັງຄົມ ຜ່ານສື່ສັງຄົມອອນລາຍ ກ່ຽວກັບບັນຫາທີ່ພົ້ນເດັ່ນ. ໃນນັ້ນ ແມ່ນບັນຫາການແກ້ໄຂຢາເສບຕິດ, ໂດຍເຮັດເປັນບົດລາຍງານປະຈໍາວັນໃຫ້ການນໍາ ແລະ ພາກສ່ວນກ່ຽວຂ້ອງຮັບຊາບເປັນປົກກະຕິ.

ທ່ານລັດຖະມົນຕີກະຊວງ ຖວທ ຍັງໃຫ້ຮູ້ອີກວ່າ: ຄຽງຄູ່ກັບດ້ານຕັ້ງໜ້າດັ່ງກ່າວ, ວຽກງານໂຄສະນາຕ້ານຢາເສບຕິດ ຍັງພົບຂໍ້ຫຍຸ້ງຍາກຈໍານວນໜຶ່ງ ໂດຍສະເພາະແມ່ນສື່ມວນຊົນທີ່ເປັນທາງການ ຍັງພົບຄວາມຫຍຸ້ງຍາກໃນການເຂົ້າເຖິງແຫລ່ງຂໍ້ມູນຂ່າວສານ ເນື່ອງຈາກພາກສ່ວນກ່ຽວຂ້ອງ ບໍ່ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ;ບັນຫາການຄວບຄຸມການໃຊ້ສື່ສັງຄົມອອນລາຍ ເຫັນວ່າຍັງມີຄວາມຫຍຸ້ງຍາກພໍສົມຄວນ, ເຊິ່ງໄລຍະຜ່ານມາ ເຈົ້າໜ້າທີ່ທາງການຍັງບໍ່ທັນໄດ້ຖະແຫລງຂ່າວ, ແຕ່ບຸກຄົນ ຫລື ຜູ້ໃຊ້ສື່ອອນລາຍສ່ວນຕົວ ໄດ້ກະຈາຍພາບ ແລະ ຂໍ້ມູນ ອອກສູ່ສື່ສັງຄົມອອນລາຍ ເປັນວົງກວ້າງ ເຮັດໃຫ້ສັງຄົມເກີດການວິພາກວິຈານໄປຫລາຍແງ່ມູມ; ພາຫະນະ ແລະ ອຸປະກອນຮັບໃຊ້ສື່ມວນຊົນ ຍັງບໍ່ທັນພຽງພໍຕາມຄວາມຕ້ອງການໃນວຽກງານຕົວຈິງ ເຮັດໃຫ້ການອອກໂຄສະນາບາງຄັ້ງບໍ່ທັນຕາມສະພາບການ; ຄວາມຈໍາກັດທາງດ້ານບຸກຄະລາກອນສື່ມວນຊົນທີ່ມີວິຊາສະເພາະດ້ານສື່ ຫລື ຂ່າວກ່ຽວກັບຢາເສບຕິດ ຕ້ອງໄດ້ລໍຖ້າຈາກຂະແໜງ ການກ່ຽວຂ້ອງກ່ອນ ຈຶ່ງເຮັດໃຫ້ການອອກຂ່າວບາງຄັ້ງ ບໍ່ສາມາດຕອບສະໜອງໄດ້ທັນເວລາ.

ຕໍ່ກັບບັນຫາດັ່ງກ່າວ, ຂະແໜງການ ຖວທ ກໍໄດ້ກໍານົດບາງວິທີການ ເພື່ອໃຫ້ການໂຄສະນາໃຫ້ແກ່ການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ໃຫ້ກວ້າງຂວາງຕໍ່ເນື່ອງ ຄື: ແຕ່ລະຂະແໜງການ ແລະ ເຈົ້າໜ້າທີ່ກ່ຽວຂ້ອງທີ່ໄດ້ຮັບຂໍ້ມູນ ຄວນໃຫ້ການຮ່ວມມືກັບສື່ມວນຊົນທາງການພວກເຮົາຫລາຍຂຶ້ນຕື່ມ ກ່ຽວກັບການສະໜອງຂໍ້ມູນ ເພື່ອໃຫ້ສື່ມວນຊົນນໍາໄປໂຄສະນາຜ່ານສື່ມວນຊົນໃຫ້ທັນເວລາ; ການກະຈາຍຂໍ້ມູນສູ່ສື່ສັງຄົມອອນລາຍ ແຕ່ລະພາກສ່ວນຕ້ອງໄດ້ເປັນເຈົ້າການຮ່ວມກັນ ເພື່ອຮັບປະກັນການຮົ່ວໄຫລຂໍ້ມູນທີ່ບໍ່ເປັນທາງການ ຫລື ຂ່າວບິດເບືອນຄວາມຈິງ; ຜະລິດສາລະຄະດີ, ລະຄອນ ແລະ ໂຄສະນາອອກເປັນພາສາບັນດາເຜົ່າ ແລະ ລັດຕ້ອງລົງທຶນໃສ່ວຽກງານໂຄສະນາການແກ້ໄຂບັນຫາດັ່ງກ່າວເພີ່ມຂຶ້ນຕື່ມ.

ຂ່າວ: ສຸພາສະຫວັນ

ພາບ: ອ່າຍຄຳ

ເພື່ອຮັກສາສະຖຽນລະພາບທາງດ້ານເງິນຕາ ທີ່ຕິດພັນກັບວຽກຈຸດສຸມທີ 4 ຂອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໂດຍສະເພາະໃນສະພາບທີ່ຫຍຸ້ງຍາກໃນປັດຈຸບັນ ທະນາຄານແຫ່ງ ສປປ ລາວ (ທຫລ) ໄດ້ວາງບາງມາດຕະການ ໃນການປັບປຸງກົນໄກໃນການຄຸ້ມຄອງ ແລະ ສະໜອງເງິນຕາຕ່າງປະເທດຂອງລະບົບທະນາຄານ ໃຫ້ແກ່ການນຳເຂົ້າສິນຄ້າບຸລິມະສິດໂດຍສະເພາະ ນໍ້າມັນເຊື້ອໄຟ ໃຫ້ພຽງພໍກັບຄວາມຈຳເປັນພື້ນຖານ ສຳລັບການດຳລົງຊີວິດຂອງປະຊາຊົນ ແລະ ລະດັບການພັດທະນາພື້ນຖານເສດຖະກິດຂອງປະເທດເຮົາ.

ທ່ານ ນາງ ວັດທະນາ ດາລາລອຍ ຮອງຜູ້ວ່າການ ທຫລ ໄດ້ຊີ້ແຈງຂໍ້ຊັກຖາມຂອງສະມາຊິກສະພາແຫ່ງຊາດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 20 ມິຖຸນາ ຜ່ານມາ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານຮອງຜູ້ວ່າການ ທຫລ ໄດ້ກ່າວຊີ້ແຈງວ່າ: ໄລຍະ 5 ເດືອນຕົ້ນປີ 2022 ໃນທ່າມກາງສະພາບລາຄານໍ້າມັນເຊື້ອໄຟຢູ່ສາກົນຂຶ້ນສູງຮອດ 65% ທຽບໃສ່ໄລຍະຂອງປີຜ່ານມາ ແລະ ມູນຄ່າການນໍາເຂົ້ານໍ້າມັນເຊື້ອໄຟຂອງປະເທດເຮົາ ກໍໄດ້ເພີ່ມຂຶ້ນ 50% ທຽບໃສ່ໄລຍະດຽວກັນຂອງປີຜ່ານມາ; ໃນນີ້ ມັນໄດ້ສ້າງຜົນກະທົບຕໍ່ຄວາມອາດສາມາດໃນການສະໜອງເງິນຕາຕ່າງປະເທດ ໃຫ້ແກ່ບັນດາບໍລິສັັດນໍາເຂົ້ານໍ້າມັນເຊື້ອໄຟ; ອີກດ້ານໜຶ່ງ, ລະບົບທະນາຄານ ກໍໄດ້ຂາຍເງິນຕາຕ່າງປະເທດໃຫ້ແກ່ມວນຊົນ ຫຼາຍກວ່າການເກັບຊື້ເງິນຕາຕ່າງປະເທດຈາກມວນຊົນມາຢ່າງຕໍ່ເນື່ອງ.

ແຕ່ເຖິງຢ່າງໃດກໍຕາມ, ລະບົບທະນາຄານ ກໍໄດ້ສູ້ຊົນສະໜອງເງິນຕາຕ່າງປະເທດ ໃຫ້ການນໍາເຂົ້ານໍ້າມັນເຊື້ອໄຟເພີ່ມຂຶ້ນ 59% ທຽບໃສ່ໄລຍະດຽວກັນຂອງປີຜ່ານມາ ຈາກ 104,4 ລ້ານໂດລາ ເປັນ 166 ລ້ານໂດລາ, ສະເລ່ຍ 33 ລ້ານໂດລາຕໍ່ເດືອນ ແລະ ກວມເອົາ 63% ຂອງມູນຄ່າການໂອນຊໍາລະນໍ້າມັນເຊື້ອໄຟ ໃຫ້ແກ່ຕ່າງປະເທດຂອງບັນດາບໍລິສັດນຳເຂົ້ານໍ້າມັນເຊື້ອໄຟທັງໝົດ ຫຼື ກວມ 40% ຂອງມູນຄ່າການນຳເຂົ້ານໍ້າມັນເຊື້ອໄຟຂອງບໍລິສັດ ນໍາເຂົ້ານໍ້າມັນເຊື້ອໄຟທັງໝົດ. ສະເພາະນັບແຕ່ວັນທີ 1 ຫາ ວັນທີ 17 ມິຖຸນາ ລະບົບທະນາຄານ ໄດ້ສະໜອງເງິນຕາຕ່າງປະເທດ ໃຫ້ແກ່ການນຳເຂົ້ານໍ້າມັນເຊື້ອໄຟຂອງບໍລິສັດນໍາເຂົ້ານໍ້າມັນເຊື້ອໄຟທັງໝົດ 94,36 ລ້ານໂດລາ ຊຶ່ງໄດ້ເພີ່ມຂຶ້ນ 3 ເທົ່າ ເມື່ອທຽບໃສ່ໄລຍະດຽວກັນຂອງປີຜ່ານມາ ຊຶ່ງໃນນີ້ກໍມີການປະກອບສ່ວນຂອງກະຊວງການເງິນ ຢູ່ປະມານໜຶ່ງສ່ວນສາມ.

ທ່ານຮອງຜູ້ວ່າການ ທຫລ ໄດ້ກ່າວອີກວ່າ: ທຫລ ໄດ້ວາງນະໂຍບາຍ ແລະ ບາງມາດຕະການແກ້ໄຂ ເພື່ອຮັກສາສະຖຽນລະພາບເງິນຕາແຫ່ງຊາດ ໂດຍສົມທົບກັບບັນດານະໂຍບາຍ ແລະ ມາດຕະການທີ່ໄດ້ປະຕິບັດມາແລ້ວນັ້ນ ຊຶ່ງຈະສືບຕໍ່ນຳໃຊ້ເຄື່ອງມືນະໂຍບາຍເງິນຕາທີ່ເໝາະສົມ, ສົມທົບກັບການປະຕິບັດລະບອບກວດກາກັບທີ່, ກວດກາທາງດ້ານເອກະສານ, ຕໍ່ບັນດາທະນາຄານທຸລະກິດ, ສະຖາບັນການເງິນທີ່ບໍ່ແມ່ນທະນາຄານໃຫ້ຢູ່ພາຍໃຕ້ການຄຸ້ມຄອງຂອງຕົນຢ່າງເປັນປົກກະຕິ, ຄຸ້ມຄອງປະລິມານເງິນ ໃຫ້ຢູ່ໃນລະດັບທີ່ແທດເໝາະກັບເງື່ອນໄຂຕົວຈິງ ບໍ່ສ້າງແຮງກົດດັນໃຫ້ແກ່ອັດຕາແລກປ່ຽນອ່ອນຄ່າ, ອັດຕາເງິນເຟີ້ສູງຂຶ້ນໄປຕື່ມອີກ ແລະ ສ້າງເງື່ອນໄຂດຶງດູດເອົາເງິນຕາຕ່າງປະເທດນອກລະບົບທະນາຄານ ເຂົ້າສູ່ລະບົບທະນາຄານໃຫ້ຫຼາຍຂຶ້ນ.

ຂ່າວ-ພາບ: ບຸນອູ້ມ

Medialaos MMD (ແຫຼງຂໍ້ມູນຈາກ: ໜັງສືພິມປະຊາຊົນ)