ການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 9 ໃນຕອນເຊົ້າວັນທີ 24 ມິຖຸນາ 2022 ຢູ່ຫໍປະຊຸມສະພາແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ສະມາຊິກສະພາແຫ່ງຊາດໄດ້ຮັບຟັງບົດລາຍງານການເຄື່ອນໄຫວວຽກງານຂອງຄະນະປະຈຳສະພາແຫ່ງຊາດ ແລະ ແຜນການຕິດຕາມກວດກາຂອງສະພາແຫ່ງຊາດກ່ຽວກັບການປະຕິບັດວາລະແຫ່ງຊາດໃນໄລຍະຜ່ານມາ ແລະ ແຜນການຕິດຕາມກວດກາກ່ຽວກັບວາລະແຫ່ງຊາດໃນຕໍ່ໜ້າ ທີ່ສະເໜີໂດຍ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ໂດຍທ່ານໃຫ້ຮູ້ກ່ຽວກັບການເຄື່ອນໄຫວວຽກງານໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 9 ຜົນການຕິດຕາມກວດກາຂອງສະພາແຫ່ງຊາດກ່ຽວກັບການຈັດຕັ້ງປະຕິບັດວາລະແຫ່ງຊາດໃນຕໍ່ໜ້າ ເຫັນວ່າມີຫຼາຍໜ້າວຽກໄດ້ຈັດຕັ້ງປະຕິບັດຢ່າງມີຜົນສຳເລັດ ໂດຍສະເພາະໃນດ້ານນິຕິບັນຍັດ ແລະ ອື່ນໆ.

ພາຍຫຼັງທີ່ສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ຮັບຟັງບົດລາຍງານການເຄື່ອນໄຫວວຽກງານຂອງຄະນະປະຈຳສະພາແຫ່ງຊາດ ແລະ ແຜນການຕິດຕາມກວດກາຂອງສະພາແຫ່ງຊາດກ່ຽວກັບການປະຕິບັດວາລະແຫ່ງຊາດແລ້ວ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໃນນາມປະທານກອງປະຊຸມໄດ້ມີຄຳເຫັນເຈາະຈີ້ມໃນຫຼາຍບັນຫາ ເພື່ອເປັນທິດທາງໃນການປະກອບຄຳເຫັນຂອງສະມາຊິກສະພາແຫ່ງຊາດ ແນໃສ່ເຮັດໃຫ້ບົດລາຍງານສະບັບນີ້ມີເນື້ອໃນຄົບຖ້ວນ, ຮັດກຸມຂຶ້ນກວ່າເກົ່າ.

ທ່ານ ສີເຮັ່ງ ຫອມສົມບັດ ສະມາຊິກສະພາແຫ່ງຊາດ ເຂດເລືອກຕັ້ງທີ 14 ແຂວງສາລະວັນປະກອບຄຳເຫັນສະແດງຄວາມຊົມເຊີຍຕໍ່ຄະນະປະຈຳສະພາແຫ່ງຊາດທີ່ໄດ້ເອົາໃຈໃສ່ຢ່າງຕັ້ງໜ້າໃນການຈັດຕັ້ງປະຕິບັດວຽກງານວິຊາສະເພາະຂອງຕົນຢ່າງຕັ້ງໜ້າມີຄວາມຮັບຜິດຊອບສູງ ແລະ ແທດເໝາະກັບສະພາບເງື່ອນໄຂຕົວຈິງໃນປັດຈຸບັນ ແລະ ໃນເງື່ອນໄຂທີ່ປະເທດເຮົາກຳລັງພົບກັບສະພາບຄວາມຫຍຸ້ງຍາກທາງດ້ານເສດຖະກິດ ຮຽກຮ້ອງໃຫ້ຄະນະປະຈຳສະພາແຫ່ງຊາດ ລວມເຖິງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງໃນຂອບເຂດທົ່ວປະເທດ ເພີ່ມທະວີຄວາມສາມັກຄີຮັກແພງໃຫ້ຫຼາຍຂຶ້ນກວ່າເກົ່າ ເພື່ອປະກອບສ່ວນສຳຄັນເຮັດໃຫ້ແຜນພັດທະນາເສດຖະກິດ-ສັງຄົມຂອງລັດຖະບານໄດ້ຮັບການຈັດຕັ້ງປະຕິບັດຢ່າງມີຜົນສຳເລັດຕາມຄາດໝາຍທີ່ວາງໄວ້.

ສຳລັບການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 9 ໃນຕອນບ່າຍມື້ນີ້ ຕາມວາລະແລ້ວສະມາຊິກສະພາແຫ່ງຊາດແຕ່ລະເຂດເລືອກຕັ້ງສືບຕໍ່ປະກອບຄຳເຫັນໃສ່ວຽກງານຂອງສະພາແຫ່ງຊາດຕື່ມອີກ.

ກອງປະຊຸມຄົບຄະນະເປີດກວ້າງ ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ຮ່ວມກັບ ຄະນະກຳມາທິການແມ່-ເດັກ (ຄກມດ) ກະຊວງ, ອົງການ, ແຂວງ ແລະ ນະຄອນຫຼວງວຽງຈັນປະຈຳປີ 2022 ແບບເຊິ່ງໜ້າ ແລະ ອອນລາຍ ຂຶ້ນໃນວັນທີ 24 ມິຖຸນານີ້ ທີ່ ໂຮງແຮມຄຣາວພາຊາ ນະຄອນຫຼວງວຽງຈັນ, ໂດຍພາຍໃຕ້ການເປັນປະທານ ຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ປະທານ ຄຊກມດ, ທ່ານ ນາງ ອິນລາວັນ ແກ້ວບຸນທັນ ປະທານສູນກາງສະຫະພັນແມ່ຍິງລາວ ຮອງປະທານ ຜູ້ປະຈຳການ ຄຊກມດ, ມີບັນດາທ່ານລັດຖະມົນ ຕີ, ຮອງລັດຖະມັນຕີ ທີ່ເປັນຮອງປະທານ ແລະ ກໍາມະການໃນຄະນະ, ພ້ອມທັງພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ ໄດ້ເຫັນດີເປັນເອກະພາບ ໃຫ້ມີການປັບປຸງບັນດານິຕິກຳ ກ່ຽວກັບການຈັດຕັ້ງ ແລະ ການເຄື່ອນໄຫວຂອງ ຄຊກມດ, ຄກມດ ແລະ ເສນາທິການຊ່ວຍວຽກແຕ່ລະຂັ້ນ ຊຶ່ງໃນນີ້ ຄຊກມດ ເປັນການຈັດຕັ້ງຂອງລັດຖະບານທີ່ບໍ່ປະຈໍາການ ມີຮອງນາຍົກລັດຖະມົນຕີເປັນປະທານ, ປະກອບມີປະທານສະຫະພັນແມ່ຍິງລາວ, ຮອງລັດຖະມົນຕີ, ຮອງປະທານອົງການ ເຂົ້າໃນຄະນະກຳມະການ ເຮັດໜ້າທີ່ຄຸ້ມຄອງ, ການປະສານງານ, ການຕິດຕາມຊຸກຍູ້ ແລະ ການລາຍງານການຈັດ ຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ ແລະ ການປະຕິບັດພັນທະພາຄີຕໍ່ສົນທິສັນຍາວ່າດ້ວຍການລຶບລ້າງທຸກຮູບແບບການຈໍາແນກຕໍ່ແມ່ຍິງ, ສົນທິສັນຍາວ່າດ້ວຍສິດທິເດັກ ແລະ ບັນດາສົນທິສັນຍາສາກົນອື່ນໆທີ່ຕິດພັນກັບສິດທິຂອງແມ່ຍິງ ແລະ ເດັກ.

ຄຊກມດ ຈະສຸມໃສ່ການຈັດຕັ້ງປະຕິບັດວຽກຄວາມກ້າວໜ້າຂອງແມ່ຍິງ ແລະ ວຽກແມ່ ແລະ ເດັກ 4 ປີ (2022-2025) ແມ່ນສຸມໃສ່: ຈັດຕັ້ງປະຕິບັດ ແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 5 ປີ ຄັ້ງທີ IV (2021-2025), ໂດຍສະເພາະຂົງເຂດສຶກສາທິການ ແລະ ກິລາ, ຂົງ ເຂດສາທາລະນະສຸກ, ຂົງເຂດແຮງງານ ແລະ ການປົກປ້ອງທາງສັງຄົມ, ຂົງເຂດເສດຖະກິດ, ແມ່ຍິງໃນຕໍາແໜ່ງນຳພາຄຸ້ມຄອງ ແລະ ການຫຼຸດຜ່ອນຄວາມສ່ຽງຈາກໄພພິບັດທຳມະຊາດ, ຈັດຕັ້ງປະຕິບັດ ແຜນດໍາເນີນງານເພື່ອແມ່ ແລະ ເດັກ 5 ປີ ຄັ້ງທີ III (2021-2025) ການສົ່ງເສີມ, ປົກປ້ອງ ແລະ ສ້າງໂອກາດທີ່ເທົ່າທຽມກັນແກ່ເດັກ ແລະ ເສີມຂະຫຍາຍຄວາມເປັນຢູ່ທີ່ດີຂອງເດັກ; ຫຼຸດຜ່ອນຈໍານວນເດັກທີ່ທຸກຍາກ ແລະ ດ້ອຍໂອກາດໃນຫຼາຍໆດ້ານ ຫຼື ເດັກທີ່ຢູ່ໃນຄົວເຮືອນທີ່ທຸກຍາກ ຢູ່ ສປປ ລາວ,ຈັດຕັ້ງປະຕິບັດ ແຜນດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 5 ປີ ຄັ້ງທີ II (2021-2025) ໂດຍເນັ້ນໃສ່ການປ້ອງກັນບໍ່ໃຫ້ເກີດຄວາມຮຸນແຮງ ແລະ ຮັບຄໍາສະເໜີ, ປົກປ້ອງ ແລະ ຊ່ວຍເຫຼືອຜູ້ທີ່ຖືກເຄາະຮ້າຍຈາກຄວາມຮຸນແຮງ ໃຫ້ໄດ້ເຂົ້າເຖິງການບໍລິການທາງດ້ານສຸຂະພາບ, ດ້ານຍຸຕິທຳ ແລະ ຕໍາຫຼວດ (ການຊ່ວຍເຫຼືອດ້ານກົດໝາຍ, ການສືບສວນ-ສອບສວນ ແລະ ການພິຈາລະນາຄະດີ) ແລະ ການຊ່ວຍເຫຼືອທາງສັງຄົມ (ການໃຫ້ຄໍາປຶກສາ; ທີ່ພັກເຊົາຊົ່ວຄາວທີ່ປອດໄພ; ການເບິ່ງແຍງລ້ຽງດູເດັກ; ການແພດ; ເສດຖະກິດ; ການສຶກສາ ແລະ ຝຶກອົບຮົມວິຊາຊີບ; ການກັບຄືນສູ່ຄອບຄົວ ແລະ ສັງຄົມ); ຂຽນ ແລະ ສົ່ງບົດລາຍງານແຫ່ງຊາດ ປະຈໍາໄລຍະທີ 10 ການຈັດຕັ້ງປະຕິບັດສົນທິສັນຍາວ່າດ້ວຍການລຶບລ້າງທຸກຮູບແບບການຈໍາແນກຕໍ່ແມ່ຍິງ ແລະ ບົດລາຍງານແຫ່ງຊາດປະຈໍາໄລຍະທີ 7 ການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ຢູ່ ສປປ ລາວ ສົ່ງໃຫ້ ສປຊ ໃນປີ 2022 ແລະ 2023 ຕາມລຳດັບ; ຮຽບຮຽງ, ທົບທວນບັນດາກົດໝາຍທີ່ມີຢູ່ ວ່າສະບັບໃດສອດຄ່ອງກັບ ສົນທິສັນຍາ ຊີດໍ ແລະ ສົນທິສັນຍາສິດທິເດັກ ແລະ ກົດໝາຍສະບັບທີ່ຍັງຈໍາກັດ ທີ່ຕ້ອງເຊື່ອມເຂົ້າໄປໃນບາງມາດຕາ ຕາມພັນທະທີ່ລັດຖະບານມີຕໍ່ສາກົນ; ສ້າງຄູ່ມືຈໍານວນໜຶ່ງ ເປັນບ່ອນອີງໃນການຝຶກອົບຮົມ ໃຫ້ກັບບັນດາ ຄກມດ ໃນການຈັດຕັ້ງປະຕິບັດ ສົນທິສັນຍາຊີດໍ ແລະ ສິດທິເດັກ ລວມທັງວຽກຕ່າງໆທີ່ຕິດພັນກັບ ການສົ່ງເສີມຄວາມສະເໝີພາບຍິງ-ຊາຍ ແລະ ການສົ່ງເສີມ ແລະ ປົກປ້ອງເດັກ; ສ້າງເອກະສານສຳລັບການໂຄສະນາ ເປັນຕົ້ນ ເຊັ່ນ: ໂປສເຕີ, ແຜ່ນພັບ, ສະປອດໂຄສະນາ, ບົດຄວາມຕ່າງໆ, ລະຄອນ ແລະ ບົດເພັງ ຜ່ານວິທະຍຸ, ໂທລະພາບ, ໜັງສືພິມ ແລະ ສື່ອອນລາຍຕ່າງໆ ໃຫ້ກວ້າງຂວາງໃນທົ່ວສັງຄົມ ແລະ ລົງເລິກເຖິງຜູ້ຫ່າງໄກສອກຫຼີກ ໂດຍນຳໃຊ້ໂທລະໂຄ່ງຂອງບ້ານ ແລະ ພາສາທ້ອງຖິ່ນ; ສຶກສາຄົ້ນຄວ້າ ທີ່ຕິດພັນກັບບັນຫາຂອງຄວາມສະເໝີພາບຍິງ-ຊາຍ ແລະ ເດັກ; ພ້ອມທັງປັບປຸງ/ສ້າງຖານຂໍ້ມູນທີ່ເປັນເອກະພາບທົ່ວປະເທດ ແລະ ເຊື່ອມເຂົ້າໃນຖານຂໍ້ມູນຂອງແຕ່ລະຂົງເຂດ ລວມທັງບົດສຳຫຼວດລະດັບຊາດທີ່ຕ້ອງເຊື່ອມເອົາຕົວຊີ້ບອກບົດບາດຍິງ-ຊາຍ ແລະ ການພັດທະນາເດັກເຂົ້າໃນເຄື່ອງການສຳຫຼວດ.

ຂ່າວ-ພາບ: ບຸນອູ້ມ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ໃນວັນທີ 24 ມິຖຸນາ ນີ້ ຄະນະໂຄສະນາອົບຮົມສູກາງພັກ (ຄອສພ) ໄດ້ຈັດງານສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ຄື: ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນ ທາງການທູດ ຄົບຮອບ 60 ປີ ໂດຍມີ ທ່ານ ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູກາງພັກ, ໃຫ້ກຽດເຂົ້າຮ່ວມປາຖະກະກາໂດຍ ທ່ານ ສົມສະຫວາດ ເລັ່ງສະຫວັດ ທີ່ປຶກສາສະພາທິດສະດີສູນກາງພັກ, ມີແຂກ​ຖືກ​ເຊີນ ພ້ອມດ້ວຍພະນັກງານພາຍໃນເຂົ້າຮ່ວມ.

ໃນໂອກາດນີ້, ທ່ານ ສົມສະຫວາດ ເລັ່ງສະຫວັດ ໄດ້ຍົກໃຫ້ເຫັນ ຄວາມໝາຍ-ຄວາມສຳຄັນຂອງ ສາຍພົວພັນຮ່ວມມື ລາວ-ຫວຽດນາມ ນັບ​ແຕ່​ສອງ​ປະ​ເທດລາວ-ຫວຽດນາມ ໄດ້​ສ້າງ​ຕັ້ງ​ສາຍ​ພົວພັນ ​ທາງ​ການ​ທູດ ​ແລະ ລົງ​ນາມ​ໃນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື, ລາວ-ຫວຽດນາມ ໄດ້ກາຍເປັນສອງປະເທດອ້າຍນ້ອງທີ່ມີຄວາມໃກ້ຊິດສະໜິດສະໜົົມ ມີຄວາມສາມັກຄີຮັກແພງ ເປັນຈິດໜຶ່ງໃຈດຽວ ແລະ ມີມູນເຊື້ຶອອັນດີງາມມາຕັ້ງແຕ່ດົນນານແລ້ວ ຜ່ານໄລຍະປະຫວັດສາດອັນລະອິດລະອ້ຽວ ການ​ພົວພັນ​ແບບ​ພິ​ເສດ​ຕະຫຼອດໄລຍະຜ່ານມາ ຈົນເຖິງປັດຈຸບັນ ພັກ,ລັດ ແລະ ປະຊາຊົນທັງສອງປະເທດມີຄວາມໄວ້ເນື້ອເຊື່ອໃຈ, ມີຄວາມຈິງໃຈ ໃນການຮ່ວມມືຊ່ວຍເຫຼືອ​ຊຶ່ງ​ກັນ​ ແລະ ​ກັນ ຢ່າງສະເໝີຕົ້ນສະເໝີປາຍ, ການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອອັນດີງາມ, ບໍລິສຸດຜຸດຜ່ອງ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ວຽດນາມ-ລາວ ຈຶ່ງສືບຕໍ່ໄດ້ຮັບການປົກປັກຮັກສາ, ເສີມຂະຫຍາຍມູນເຊື້ອ ຄວາມສາມັກຄີຮັກແພງ ໃນທາງທີ່ດີ ແລະ ພັດທະນາຢ່າງແຂງແຮງ ແລະ ບໍ່ຢຸດຢັ້ງສົ່ງຕໍ່ຈາກຄົນຮຸ່ນກ່ອນສູ່ຄົນຮຸ່ນຫຼັງ ແລະ ຮຸ່ນຕໍ່ໆໄປ ເພື່ອປະຊາຊົນທັງສອງປະເທດ ມີຄວາມສີວິໄລ ແລະ ຄວາມຜາສຸກ ບົນເສັ້ນທາງກ້າວເຂົ້າສູ່ສັງຄົມນິຍົມເທື່ອລະກ້າວ.

ໃນໂອກາດສະເຫຼີມສະຫຼອງວັນດັ່ງກ່າວ, ທ່ານ ລາວປາວຊົງ ນະວົງໄຊ ຮອງຫົວໜ້າຄະນະໂຄສະນາອົບຮົມສູກາງພັກ ໄດ້ລາຍງານໃຫ້ຮູ້ວ່າ: ຄະນະ​ໂຄສະນາ​ອົບຮົມ​ສູນ​ກາງ​ພັກ ໄດ້​ຜັນ​ຂະຫຍາຍ 8 ກິດ​ຈະ​ກໍາ​ໃຫຍ່​ລະດັບ​ຊາດ ມາ​ເປັນ 10 ກິດ​ຈະ​ກໍາ​ສະເພາະ​ຂອງ​ຄະນະ​ໂຄສະນາ​ອົບຮົມ​ສູນ​ກາງ​ພັກ​ຄື: ສ້າງ​ເອກະສານ ແລະ ແຈ້ງ​ການ​ກ່ຽວ​ກັບ​ການ​ໂຄສະ​ນາ​-​ປາຖະກະຖາ​ກ່ຽວ​ກັບ​ສາຍ​ພົວພັນ ລາວ​-​ຫວຽດນາມ; ເຜີຍແຜ່​ປຶ້ມ​ປະຫວັດສາດ ສາຍ​ພົວພັນ​ລາວ​-​ຫວຽດນາມ: ຈັດ​ພິມ​ປຶ້​ມ​ຕາມ​ຮອຍ​ປະຫວັດສາດ​ສືບ​ສານ​ມູນເຊື້ອ​ບົນ​ເສັ້ນທາງ​ໂຮ່​ຈິ​ມິນ ບົນ​ຜືນ​ແຜ່ນດິນ​ລາວ (ສະບັບ​ພາສາ​ລາວ ແລະ ພາສາ​ຫວຽດນາມ); ​ປຸກ​ລະດົມ​ຂະບວນ​ການ​ສຶກສາ​ອົບຮົມ​ແນວ​ຄິດ ໃຫ້​ປະຊາຊົນ​ລຽບ​ຕາມ​ຊາຍ​ແດນ ລາວ​-​ຫວຽດນາມ; ສົມ ທົບ​ກັບ​ ກະຊວງ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ ແລະ ສະມາຄົມ​ນັກ​ປະພັນ​ລາວ ຈັດ​ກິດ​ຈະ​ກໍາ​ແຂ່ງຂັນ​ກວດ​ສອບ: ບົດ​ເລື່ອງສັ້ນ, ບົດ​ເລື່ອງ​ຍາວ, ບົດ​ບັນທຶກ​ຄວາມ​ຊົງ​ຈໍາ, ບົດ​ກະວີ, ກາບກອນ​ທີ່​ກ່ຽວ​ພັນ​ເຖິງ​ສາຍ​ພົວພັນ ລາວ​-​ຫວຽດນາມ; ສົມທົບ​ກັບ​ກະຊວງ​ສຶກສາ​ທິ​ການ ແລະ ກິລາ, ສູນ​ກາງ​ຊາວ​ໜຸ່ມ ປປ ລາວ ແລະ ພາກສ່ວນ​ກ່ຽວຂ້ອງ​ຈັດ​ກິດ​ຈະ​ກໍາ​ຖາມ​-​ຕອບ​ແບບ​ເຊິ່ງໜ້າ ແລະ ແບບ​ຜ່ານ​ສື່​ມວນ​ຊົນ ທີ່​ກ່ຽວ​ພັນ​ເຖິງ​ສາຍ​ພົວພັນ ລາວ – ຫວຽດນາມ ຢູ່​ສະ​ຖາ​ບັນ​ການ​ສຶກສາ​ຕ່າງໆ ໃນ​ທົ່ວ​ປະ​ເທດ; ຮ່າງ​ບົດ​ສູນ​ທອນ​ພົດ​ໃຫ້​ການ​ນໍາ​ກ່າວ ໃນ​ພິທີ​ໂຮມ​ຊຸມນຸມ​ສະເຫຼີມສະຫຼອງ​ປີ​ສາມັກຄີ​ມິດຕະພາບ ແລະ ບົດ​ກາບກອນ​ໃຫ້​ເຍົາວະ​ຊົນ​ອ່ານ ໃນ​ພິທີ​ດັ່ງ​ກ່າວ; ປຸກລະດົມ​ໃນ​ການ​ຂຽນ​ບົດ​ກອນ, ບົດ​ນໍາ, ຂຽນ​ຂ່າວ ແລະ ການ​ແປ​ບົດ​ຕ່າງໆ ທີ່​ກ່ຽວ​ພັນ​ເຖິງ​ສາຍພົວພັນ​ມິດຕະພາບ​ທີ່​ເປັນ​ມູນເຊື້ອ, ຄວາມ​ສາມັກຄີ​ແບບ​ພິເສດ ແລະ ການ​ຮ່ວມ​ມື​ຮອບດ້ານ​ລະຫວ່າງ ລາວ​-​ຫວຽດນາມ ລົງ​ສື່​ຕ່າງໆເປັນ​ປົກ​ກະ​ຕິ; ຈັດ​ສໍາ​ມະ​ນາ​ວິທະຍາສາດ ກ່ຽວ​ກັບ​ການ​ພົວພັນ ລາວ​-​ຫວຽດນາມ 2 ຄັ້ງ (ສໍາ​ມະ​ນາ​ພາຍ​ໃນ 1 ຄັ້ງ ແລະ ສໍາ​ມະ​ນາ​ລະຫວ່າງ​ສອງ​ພັກ ລາວ​-​ຫວຽດນາມ 1 ຄັ້ງ); ຈັດ​ຕັ້ງ​ການ​ຢ້ຽມຢາມ, ພົບ​ປະ, ແລກປ່ຽນ​ບົດຮຽນ ລະຫວ່າງ ຄະ​ນະ​ນໍາ​ສອງ​ຄະນະ​ໂຄສະນາ​ສູນກາງ​ພັກ ລາວ​-​ຫວຽດນາມ 2 ຄັ້ງ (ຢູ່​ລາວ ແລະ ຢູ່​ຫວຽດນາມ) ແລະ ສົມທົບ​ກັບ​ກະຊວງ​ພາຍ​ໃນ ກ່ຽວ​ກັບ​ການ​ຍ້ອງຍໍ​ບຸກຄົນ ແລະ ຄະນະ​ໂຄສະນາ​ອົບຮົມ​ໃນ​ຂອບ​ເຂດ ທົ່ວ​ປະ​ເທດ.

ຂ່າວ-ພາບ: ແສງຈັນ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ໄດ້ລາຍງານກ່ຽວກັບການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນທື່ອທີ 3 ແລະ ແຜນການຮອດກອງປະຊຸມສະໄໝສາມັນ ເທື່ອທີ 4, ຜົນການຕິດຕາມກວດກາການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາຂອງສະພາແຫ່ງຊາດກ່ຽວກັບການປະຕິບັດວາລະແຫ່ງຊາດໃນຕໍ່ໜ້າ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 24 ມິຖຸນາ ນີ້ ໂດຍການເປັນປະທານ ຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານ ນາງ ສູນທອນ ໄຊຍະຈັກ ກ່າວວ່າ: ນັບແຕ່ກອງປະຊຸມສະໄໝສາມັນເທື່ອທີ 2 ຫາ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ຮັບຜົນສຳເລັດຫຼາຍດ້ານ ໂດຍສະເພາະດ້ານນິຕິບັນຍັດໄດ້ເປັນເຈົ້າການສົມທົບກັບກະຊວງ, ອົງການກ່ຽວຂ້ອງປະຕິບັດພາລະບົດບາດນິຕິບັນຍັດສຳເລັດການຮຽບຮຽງ ປັບປຸງກົດໝາຍທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ຈຳນວນ 11 ສະບັບ, ເອົາໃຈໃສ່ປະສານສົມທົບກັບລັດຖະບານໃນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍປະຈຳປີ 2022, ໄດ້ສົ່ງຮ່າງກົດໝາຍທີ່ກ່ຽວຂ້ອງໃຫ້ສະພາປະຊາຊົນຂັ້ນແຂວງ ທາບທາມຢູ່ຂະແໜງການຕ່າງໆ ກໍຄືທ້ອງຖິ່ນຕ່າງໆໃນຂອບເຂດທົ່ວປະເທດຈັດຕັ້ງລະດົມແນວຄວາມຄິດຈາກເປົ້າໝາຍຕ່າງໆທັງພາກລັດ ແລະ ເອກະຊົນໄດ້ຢ່າງກວ້າງຂວາງ ຊຶ່ງມີກົດໝາຍເອົາໄປທາບທາມ ຈຳນວນ 9 ສະບັບ ໃນນີ້ກົດໝາຍສ້າງໃໝ່ 3 ສະບັບ ແລະ ກົດໝາຍ ປັບປຸງ 6 ສະບັບ, ໄດ້ນຳພາດຳເນີນກອງປະຊຸມວິທະຍາສາດກ່ຽວກັບແນວຄິດ ໄກສອນພົມວິຫານ ກ່ຽວກັບການສ້າງ ແລະ ປະຕິບັດລັດຖະທຳມະນູນ ສປປ ລາວ ເພື່ອເປັນທິດທາງໃນການປັບປຸງວຽກງານດ້ານນິຕິບັນຍັດໃຫ້ມີຄຸນະພາບ ແລະ ປະສິດທິຜົນນັບມື້ສູງຂຶ້ນ, ໄດ້ແຕ່ງຕັ້ງຄະນະຮັບຜິດຊອບປະເມີນການ ຈັດຕັ້ງປະຕິບັດກົດໝາຍ 4 ກົດໝາຍ ທີ່ຕິດພັນກັບວະລະແຫ່ງຊາດ ຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ, ສຳເລັດການລົງເຜີຍແຜ່ຜົນສໍາເລັດກອງປະຊຸມະພາໃນຂອບເຂດທົ່ວປະເທດ ໄດ້ 1.239 ຈຸດ, ມີຜູ້ເຂົ້າຮ່ວມ 114.204 ເທື່ອຄົນ ຍິງ 47.260 ຄົນ, ລະດົມທຶນຊ່ວວຍເຫຼືອປະຊາຊົນລວມມູນຄ່າທັງໝົດ 1.374.240.756 ກີບ.

ສຳລັບການຕິດຕາມກວດກາການຈັດຕັ້ງປະຕິບັດວາລະແຫ່ງຊາດທີ່ພົ້ນເດັ່ນ ໂດຍສະເພາະການແກ້ໄຂບັນຫາຢາເສບຕິິດ ຢູ່ບັນດາກະຊວງ, ອົງການ ແລະ ບັນດາແຂວງ, ນະຄອນຫຼວງວຽງຈັນ ໄດ້ມີການໂຄສະນາເຜີຍແຜ່ນິນິກຳຂອງພັກ-ລັດ ໂດຍຜ່ານສື່ມວນຊົນປະເພດຕ່າງໆ ໃຫ້ພະນັກງານ, ທະຫານ, ຕຳຫຼວດ ກໍຄືປະຊາຊົນບັນດາເຜົ່າໄດ້ເຊື່ອມຊຶມ, ເຂົ້າໃຈຜົນຮ້າຍຂອງຢາເສບຕິດ, ຄົ້ນຄວ້າການປັບປຸງກົດໝາຍວ່າດ້ວຍຢາເສບຕິດ ແລະ ນິຕິກຳໃຕ້ກົດໝາຍທີ່ກ່ຽວຂ້ອງ ຈຳນວນ 11 ສະບັບ, ສາມາດມ້າງຄະດີກ່ຽວກັບຢາເສບຕິດໃນຂອບເຂດທົ່ວປະເທດໄດ້ 4.094 ເລື່ອງ, ຈັບຜູ້ຕ້ອງຫາໄດ້ 5,818 ຄົນ, ຢຶດຂອງກາງໄດ້ຈຳນວນຫຼວງຫຼາຍ, ຂຶ້ນບັນຊີເປົ້າໝາຍຄ້າຂາຍຢາເສບຕິດທົ່ວປະເທດມີຈຳນວນ 1.969 ຄົນ.

ສຳລັບໃນຕໍ່ໜ້າ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແມ່ນຕິດຕາມກວດກາ ໂຄງການເຊົ່າຊັບສິນ, ທີ່ດິນລັດ, ສຳປະທານທີ່ດິນ, ການກໍ່ສ້າງເຂື່ອນໄຟຟ້າ, ໂຄງການທົດລອງຂຸດຄົ້ນ ແລະ ສົ່ງອອກແຮ່ທາດ, ໂຄງການສົ່ງເສີມຜະລິດກະສິກຳທົດແທນການນຳເຂົ້າ ແລະ ເປັນສິນຄ້າສົ່ງອອກ, ການຄຸ້ມຄອງເຂດເສດຖະກິດພິເສດຢູ່ບັນດາແຂວງ, ໂຄງການເຊື່ອມໂຍງ-ເຊື່ອມຈອດເປັນຕົ້ນ ໂລຈິສຕິກ ແລະ ນຳໃຊ້ທ່າແຮງລົດໄຟລາວ-ຈີນ.

ຕໍ່ກັບການແກ້ໄຂບັນຫາຢາເສບຕິດ ແມ່ນຕິດຕາມກວດກາການເຄື່ອນໄຫວແກ້ໄຂຄະດີຢາເສບຕິດຂອງເຈົ້າໜ້າທີ່ທີ່ປະຕິບັດກົດໝາຍ ໂດຍສະເພາະການສັ່ງຈັບຕົວ, ການກັກຂັງພາງ, ການສືບສວນ-ສອບສວນ, ການສັ່ງຟ້ອງຂອງໄອຍະການ ແລະ ການຕັດສິນຂອງສານຕິດຕາມກວດກາບັນດາສູນບຳບັດ ແລະ ສະຖານ ທີ່ປິ່ນປົວຜູ້ຕິດຢາເສບຕິດ ແລະ ຕິດຕາມກວດກາປະເມີນການຈັດຕັ້ງປະຕິບັດກົດໝາຍຈຳນວນໜຶ່ງໃນຂົງເຂດຍຸຕິທຳທີ່ຕິດພັນກັບການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ.

ຂ່າວ-ພາບ: ສຳນານ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ຕອນຄ່ຳວັນ ທີ 22 ມິຖຸນາ 2022 ນີ້, ທ່ານ ສີຈິ້ນຜິງ ປະທານປະເທດຈີນ ໄດ້ເຂົ້າຮ່ວມພິທີ ໄຂເວທີປຶກສາຫາລືອຸດສາຫະກຳການຄ້າ ຂອງບັນດາປະເທດບຣິກສ ຜ່ານ ທາງອອນລາຍ ແລະ ກ່າວຄຳປາໄສທີ່ພາດຫົວເລື່ອງວ່າ ກຳແໜ້ນກະແສ ຂອງຍຸກສະໄໝສ້າງອະນາຄົດທີ່ສະຫວ່າງສະໄຫວ.

ທ່ານ ສີຈິ້ນຜິງ ໄດ້ຊີ້ໃຫ້ເຫັນວ່າ: ປັດຈຸບັນ, ການປ່ຽນແປງຂອງໂລກ ໃນຮອບ 100 ປີມານີ້ກັບການແພ່ລະບາດຂອງພະຍາດໂຄວິດ-19 ສະຫລັບ ສັບຊ້ອນກັນ, ສິ່ງທ້າທາຍຕ່າງໆດ້ານຄວາມໝັ້ນຄົງເກີດຂຶ້ນຢ່າງບໍ່ຢຸດຢັ້ງ, ການຟື້ນຟູເສດຖະກິດໂລກລຳບາກຫລາຍ, ການພັດທະນາຂອງໂລກໄດ້ ປະສົບອຸປະສັກຢ່າງໜັກໜ່ວງ. ໂລກຈະໄປທາງໃດ? ສັນຕິພາບ ຫລື ສົງ ຄາມ? ພັດທະນາ ຫລື ຊຸດໂຊມລົງ? ເປີດປະຕູສູ່ພາຍນອກ ຫລື ປິດປະເທດ? ຮ່ວມມື ຫລື ເປັນປໍລະປັກກັນ? ບັນຫາເຫລົ່ານີ້ແມ່ນບັນຫາທີ່ພວກເຮົາ ຕ້ອງຜະເຊີນໃນຍຸກປັດຈຸບັນ.

ທ່ານ ສີຈິ້ນຜິງ ກ່າວເນັ້ນວ່າ: ໃນປະຫວັດສາດທີ່ຍາວນານມານີ້ ບາງເທື່ອ ມີຄວາມສະຫງົບສຸກ, ບາງເທື່ອມີຄວາມປັ່ນປ່ວນ ແຕ່ຕ້ອງກ້າວໄປໜ້າ. ເຖິງວ່າສະຖານະການຂອງໂລກມີການປ່ຽນແປງເລື້ອຍໆ, ແຕ່ທ່ວງທ່າຂອງ ການເປີດປະຕູ ແລະ ການຂະຫຍາຍຕົວຈະບໍ່ມີການປ່ຽນແປງ, ຄວາມ ປາຖະໜາທີ່ຮ່ວມມືກັນຮັບມືກັບສິ່ງທ້າທາຍກໍ່ຈະບໍ່ມີການປ່ຽນແປງ. ພວກເຮົາຕ້ອງມີຄວາມອົງອາດກ້າຫານ, ຮັບຮູ້ກົດເກນການພັດທະນາຂອງ ປະຫວັດສາດຢ່າງຖືກຕ້ອງ, ບໍ່ລະແວງສົງໄສຍ້ອນເລື່ອງໃດໜຶ່ງທີ່ເກີດຂຶ້ນ ໃນຊົ່ວຄາວ, ບໍ່ຢ້ານຄວາມສ່ຽງ, ຮັບມືກັບສິ່ງທ້າທາຍຢ່າງອົງອາດກ້າຫານ, ກ້າວໄປສູ່ເປົ້າໝາຍການສ້າງປະຊາຄົມຮ່ວມຊາຕາກຳຂອງມວນມະນຸດຢ່າງເດັດດ່ຽວໜຽວແໜ້ນ.

ອັນທີໜຶ່ງ: ພວກເຮົາຕ້ອງສາມັກຄີ ແລະ ປະສານງານກັນ ຮ່ວມກັນ ປົກປັກຮັກສາສັນຕິພາບ ແລະ ສະຖຽນລະພາບຂອງໂລກ. ປະຫວັດສາດ ໄດ້ຢັ້ງຢືນໃຫ້ເຫັນວ່າລັດທິເຈົ້າອຳນາດການເມືອງແບບຮ່ວມກຸ່ມ ການ ເປັນປໍລະປັກກັນລະຫວ່າງກຸ່ມ ບໍ່ສາມາດນຳເອົາສັນຕິພາບ ແລະ ຄວາມ ໝັ້ນຄົງມາໃຫ້ພວກເຮົາໄດ້ ມີແຕ່ຈະພາໃຫ້ເກີດສົງຄາມ ແລະ ການປະທະ ກັນ. ການມົວເມົາແຕ່ກຳລັງຕົວຈິງ ແລະ ຖານະ, ເປີດກວ້າງພັນທະມິດ ດ້ານການທະຫານ, ສະແຫວງຫາຄວາມປອດໄພຂອງປະເທດຕົນດ້ວຍການ ເສຍສະຫລະຄວາມປອດໄພຂອງປະເທດອື່ນນັ້ນຍ່ອມຈະຕົກຢູ່ໃນສະພາບ ຫຍຸ້ງຍາກດ້ານຄວາມໝັ້ນຄົງ. ມີແຕ່ທຸກຄົນຖະໜອມຫວງແຫນສັນຕິ ພາບ ປົກປັກຮັກສາສັນຕິພາບ ມີແຕ່ທຸກຄົນຈື່ໄວ້ຄວາມເຈັບປວດ ທໍລະມານຈາກສົງຄາມ ສັນຕິພາບຈຶ່ງຈະມີຄວາມຫວັງ.

ອັນທີສອງ: ພວກເຮົາຕ້ອງເອົາໃຈໃສ່ ແລະ ຊ່ວຍເຫລືອເຊິ່ງກັນແລະກັນ, ຮ່ວມກັນຊຸກຍູ້ການພັດທະນາແບບຍືນຍົງຂອງໂລກ. ປັດຈຸບັນນີ້, ຂະບວນ ການພັດທະນາຂອງໂລກໄດ້ຖືກຜົນກະທົບຢ່າງໜັກໜ່ວງ. ປະຊາກອນ 1,2 ຕື້ຄົນໃນເກືອບ 70 ປະເທດຂອງໂລກ ກຳລັງຜະເຊີນກັບວິກິດການຕ່າງໆ ເຊັ່ນ: ການແພ່ລະບາດຂອງພະຍາດ ການຂາດເຂີນສະບຽງອາຫານ ແລະ ພະລັງງານ ແລະ ວິກິດການໜີ້ສິນ, ໝາກຜົນຂອງການຫລຸດຜ່ອນຄວາມ ທຸກຍາກຂອງໂລກໃນຫລາຍສິບປີຜ່ານມາອາດຈະເສຍໄປໝົດ.

ອັນທີສາມ: ພວກເຮົາຕ້ອງຮ່ວມແຮງຮ່ວມໃຈກັນ, ຮ່ວມກັນບັນລຸການ ຮ່ວມມືແບບຕ່າງຝ່າຍຕ່າງມີຜົນປະໂຫຍດ. ປັດຈຸບັນ, ຕ່ອງໂສ້ການຜະລິດ ແລະ ຕ່ອງໂສ້ການສະໜອງທີ່ສຳຄັນຈຳນວນໜຶ່ງຖືກລົບກວນ, ໄພເງິນເຟີ້ ໃນທົ່ວໂລກໜັກໜ່ວງທີ່ສຸດ, ຕະຫລາດການທະນາຄານສາກົນມີຄວາມປັ່ນ ປ່ວນຢ່າງຕໍ່ເນື່ອງ, ການຟື້ນຟູຂອງເສດຖະກິດໂລກຊ້າລົງຢ່າງບໍ່ຢຸດຢັ້ງ. ໃນຂະນະນີ້, ມີແຕ່ຍຶດໝັ້ນການຮ່ວມແຮງຮ່ວມໃຈກັນ ແລະ ການຮ່ວມມື ຢ່າງສາມັກຄີກັນຈຶ່ງສາມາດເອົາຊະນະວິກິດການເສດຖະກິດໄດ້.

ອັນທີສີ່: ພວກເຮົາຕ້ອງມີຄວາມໂອບເອື້ອອາລີ ຮ່ວມກັນເປີດປະຕູໃຫ້ ກວ້າງອອກ ແລະ ເຊື່ອມໂຍງເຂົ້າກັນ. ເສດຖະກິດໂລກາພິວັດແມ່ນຄວາມ ຕ້ອງການດ້ານພາວະວິໄສຂອງການພັດທະນາກຳລັງການຜະລິດ ແລະ ເປັນ ກະແສຂອງປະຫວັດສາດທີ່ສະກັດກັ້ນບໍ່ໄດ້.

ທ່ານ ສີຈິ້ນຜິງ ຍັງກ່າວເນັ້ນຕື່ມວ່າ: ແຕ່ຕົ້ນປີນີ້ມາ, ໂດຍຜະເຊີນກັບ ສະພາບແວດລ້ອມການພັດທະນາທັງພາຍໃນ ແລະ ຕ່າງປະເທດທີ່ສັບສົນ, ຈີນໄດ້ຍຶດໝັ້ນຈັດສັນການປ້ອງກັນ ແລະ ຄວບຄຸມການແພ່ລະບາດຂອງ ພະຍາດໂຄວິດ-19 ກັບການພັດທະນາເສດຖະກິດສັງຄົມຢ່າງເປັນ ເອກະພາບກັນ, ຍຶດໝັ້ນຖືປະຊາຊົນ ແລະ ຊີວິດເປັນສິ່ງທີ່ເໜືອທຸກສິ່ງທຸກ ຢ່າງ ໄດ້ສຸດຄວາມສາມາດເພື່ອປົກປ້ອງຊີວິດ ແລະ ສຸຂະພາບຂອງປະຊາ ຊົນ, ຍັງໄດ້ຮັກສາຄວາມໝັ້ນທ່ຽງຂອງພື້ນຖານການພັດທະນາເສດຖະກິດ ສັງຄົມໃນລະດັບສູງສຸດ. ຈີນຈະເພີ່ມຄວາມແຮງດັດສົມດ້ວຍນະໂຍບາຍ ມະຫາພາກ, ໃຊ້ມາດຕະການຢ່າງບັງເກີດຜົນກວ່າເກົ່າ, ພະຍາຍາມບັນລຸ ເປົ້າໝາຍການພັດທະນາເສດຖະກິດສັງຄົມໃນໝົດປີ. ໃນທ້າຍປີນີ້, ພວກເຮົາຈະຈັດກອງປະຊຸມຜູ້ແທນທົ່ວປະເທດ ຄັ້ງທີ 20 ຂອງພັກກອມ ມູນິດຈີນ, ວາງແຜນພັດທະນາຂອງຈີນ ໃນໄລຍະຕໍ່ໄປ. ຈີນຈະຢືນຢູ່ໄລຍະ ໃໝ່ແຫ່ງການພັດທະນາ, ປະຕິບັດຕາມແນວຄິດການພັດທະນາອັນໃໝ່, ຕັ້ງໜ້າສ້າງສະຖານະພາບການພັດທະນາອັນໃໝ່, ພະຍາຍາມບັນລຸການ ພັດທະນາດ້ວຍຄຸນນະພາບສູງ. ຈີນຈະສືບຕໍ່ຍົກລະດັບການເປີດປະຕູສູ່ ພາຍນອກໃຫ້ສູງຂຶ້ນ, ສ້າງສະພາບແວດລ້ອມການດຳເນີນທຸລະກິດ ທີ່ຫັນ ເປັນຕະຫລາດບໍລິຫານຕາມກົດໝາຍ ແລະ ເປັນແບບສາກົນ. ຍິນດີຕ້ອນ ຮັບບັນດາທ່ານມາລົງທຶນ ແລະ ດຳເນີນທຸລະກິດຢູ່ຈີນ, ເພີ່ມທະວີການຮ່ວມ ມືດ້ານເສດຖະກິດການຄ້າ, ຊົມໃຊ້ໂອກາດການພັດທະນາຮ່ວມກັນ.

ທ່ານ ສີຈິ້ນຜິງ ຍັງຊີ້ໃຫ້ເຫັນວ່າ: ກົນໄກຮ່ວມມືບັນດາປະເທດບຣິກສ ແມ່ນເວທີການຮ່ວມມືທີ່ສຳຄັນ ລະຫວ່າງປະເທດທີ່ເປັນຕະຫລາດຈະເລີນ ໃໝ່ກັບປະເທດພວມພັດທະນາ. ປັດຈຸບັນ, ການຮ່ວມມືລະຫວ່າງບັນດາ ປະເທດບຣິກສ ໄດ້ກ້າວເຂົ້າສູ່ໄລຍະໃໝ່ແຫ່ງການພັດທະນາດ້ວຍຄຸນນະ ພາບສູງ. ຫວັງໃຫ້ນັກວິສາຫະກິດບັນດາທ່ານຈົ່ງສົ່ງເສີມຈິດໃຈໝັ້ນໝຽວ ບໍ່ປ່ຽນແປງ ແລະ ກ້ານຳໜ້າໝູ່, ຊຸກຍູ້ການພັດທະນາແບບເປີດປະຕູ, ນຳ ພາການພັດທະນາດ້ວຍຫົວຄິດປະດິດສ້າງ, ປະຕິບັດການພັດທະນາແບບ ຊົມໃຊ້ຮ່ວມກັນ, ເພີ່ມພະລັງແຮງໃຫ້ແກ່ການຮ່ວມມື ລະຫວ່າງບັນດາ ປະເທດບຣິກສ, ເຮັດໃຫ້ໝາກຜົນແຫ່ງການພັດທະນາສາມາດເຂົ້າເຖິງ ປະຊາຊົນທັງໝົດໃຫ້ຫລາຍກວ່າເກົ່າ ແລະ ຍຸຕິທຳກວ່າເກົ່າ.

ເວທີປຶກສາຫາລືອຸດສາຫະກຳການຄ້າ ລະຫວ່າງບັນດາປະເທດບຣິກສ ປີ 2022 ໄດ້ຈັດຂຶ້ນຢູ່ນະຄອນຫລວງປັກກິ່ງ ໃນວັນທີ 22 ມິຖຸນານີ້ ຜ່ານທາງ ອອນລາຍ ແລະອອຟລາຍ. ທ່ານ ລາມາຟຊາ ປະທານາທິບໍດີອາຟຣິກາໃຕ້, ທ່ານ ໂບໂຊນາໂລ ປະທານາທິບໍດີບຣາຊີນ, ທ່ານ ວະລາດິເມຍປູຕິນ ປະທານາທິບໍດີຣັດເຊຍ, ທ່ານ ມໍຕີ ນາຍົກລັດຖະມົນຕີອິນເດຍ ໄດ້ໃຫ້ກຽດ ເຂົ້າຮ່ວມພິທີເປີດເວທີປຶກສາຫາລືດັ່ງກ່າວ ແລະ ກ່າວຄຳປາໄສ. ບັນດາ ລັດຖະມົນຕີເສດຖະກິດການຄ້າທູຕານຸທູດປະຈຳຈີນ ແລະ ຜູ້ຕາງໜ້າ ວົງການອຸດສາຫະກຳການຄ້າ ຈາກບັນດາປະເທດບຣິກສ ທັງໝົດປະມານ 1.000 ທ່ານໄດ້ເຂົ້າຮ່ວມພິທີດັ່ງກ່າວ.

ນັບແຕ່ວັນທີ 1-21 ມິຖຸນາ 2022 ນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລາຍງານຄວາມຄືບໜ້າການແກ້ໄຂບັນຫານໍ້າມັນເຊື້ອໄຟ ແລະ ຄຸ້ມຄອງອັດຕາແລກປ່ຽນເງິນຕາຕ່າງປະເທດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 23 ມິຖຸນາ 2022 ວ່າ: ລັດຖະບານ ໄດ້ສະໜອງເງິນຕາໃຫ້ວິສະຫະກິດນໍ້າມັນເຊື້ອໄຟແລ້ວ 102 ລ້ານໂດລາສະຫະລັດ ເພື່ອນໍາເຂົ້ານໍ້າມັນເຊື້ອໄຟແລ້ວຫລາຍກວ່າ 60 ລ້ານລິດ ເຂິ່ງມີກາຊວນ 40 ກວ່າລ້ານລິດ ກວມເອົາ 75% ແນໃສ່ແກ້ໄຂບັນຫາການຂາດ ແຄນນໍ້າມັນເຊື້ອໄຟ ໃນທົ່ວປະເທດ ແລະ ຕອບສະໝອງ ຄວາມຕ້ອງການຊົມໃຊ້ສັງຄົມໃຫ້ພຽງພໍ ໂດຍພື້ນຖານ. ມາຮອດປັດຈຸບັນ ເຫັນໄດ້ວ່າການບໍລິການນໍ້າມັນໃນເຂດຕົວເມືອງ ມີຄວາມຄ່ອງຕົວຫລາຍຂຶ້ນ ແລະ ຈະສືບຕໍ່ຊຸກຍູ້ ໃຫ້ຜູ້ປະກອບການທຸລະກິດນໍ້າມັນເຊື້ອໄຟ ກະ ຈາຍນໍ້າມັນສູ່ເຂດຊົນນະບົດຫ່າງໄກສອກຫລີກຢ່າງທົ່ວເຖິງ.

ທ່ານ ສອນໄຊ ສີພັນດອນ ກ່າວວ່າ: ລາວເປັນປະເທດນໍາເຂົ້ານໍ້າມັນ 100% ມີການນໍາໃຊ້ນໍ້າມັນເຊື້ອໄຟສະເລ່ຍ 100-120 ລ້ານລິດຕໍ່ເດືອນ ຫລື ປະມານ 1.200 ລ້ານລິດຕໍ່ປີ ເມື່ອກ່ອນຊື້ນໍ້າມັນພຽງແຕ່ 600-700 ລ້ານໂດລາສະຫະລັດ ແມ່ນສາມາດຕອບສະໜອງໄດ້ຢ່າງພຽງພໍ ກັບຄວາມຕ້ອງການນໍາໃຊ້ໃນທົ່ວປະເທດຕໍ່ປີ ແຕ່ໃນປັດຈຸບັນຈາກການປັບຂຶ້ນລາຄານໍ້າມັນຂອງຕະຫລາດໂລກ 1 ໂດລາສະຫະ ລັດ ສາມາດຊື້ນໍ້າມັນໄດ້ພຽງ 1 ລິດ; ສະນັ້ນ ເຮັດໃຫ້ລາວຕ້ອງການເງິນຕາ ເພື່ອຊື້ນໍ້າມັນເຊື້ອໄຟມາບໍລິການຮັບໃຊ້ສັງຄົມສູງເຖິງ 1,2 ຕື້ໂດລາສະຫະລັດຕໍ່ປີ ເຮັດໃຫ້ຄວາມຕ້ອງການດ້ານເງິນຕາຕ່າງປະເທດສູງຂຶ້ນ ເຮັດໃຫ້ລາວພົບຄວາມຫຍຸ້ງຍາກໃນການຊອກຫາເງິນຕາຕ່າງ ປະເທດ ເຊິ່ງສົ່ງຜົນກະທົບຕໍ່ອັດຕາແລກປ່ຽນ ໂດຍສະເພາະອັດຕາແລກປ່ຽນຂອງທະນາຄານແຫ່ງຊາດ ແລະ ອັດຕາແລກປ່ຽນທີ່ກຳນົດນົດໄວ້ໃນທະນາຄານທຸລະກິດ.

ຂ່າວ:ຕັອກ ຮູບ ອ່າຍຄໍາ

ກະຊວງຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ໄດ້ຈັດພິທີປາຖະກະຖາ ປີສາມັກຄີມິດຕະພາບ ລາວ -ຫວຽດ ນາມ, ວັນເຊັນສົນທິສັນຍາມິດຕະພາບ ການຮ່ວມມື ຄົບຮອບ 45 ປີ ( 18/7/1977-18/7/2022 ) ແລະ ວັນສ້າງຕັ້ງສາຍພົວພັນການທູດ ລາວ ຫວຽດນາມ ຄົບຮອບ 60 ປີ ຂຶ້ນໃນວັນທີ 23 ມິຖຸນາ 2022 ທີ່ຫໍວັດທະນະທໍາແຫ່ງຊາດ. ໂດຍການໃຫ້ກຽດປາຖະກະຖາຂອງທ່ານ ໝູນແກ້ວ ອໍລະບູນ ອາດີດ ກຳມະການສູນກາງພັກ, ອາດີດ ລັດຖະມົນຕີກະຊວງ ຖວທ, ເຂົ້າຮ່ວມຮັບຟັງ ມີ ທ່ານ ນາງ ສວນສະຫັວນ ວິຍະເກດ ລັດຖະມົນຕີກະຊວງ ຖວທ ພ້ອມຮອງລັດຖະມົນຕີ ພະນັກງານຫຼັກແຫຼ່ງ ອ້ອມຂ້າງກະຊວງ ຖວທ ເຂົ້າຮ່ວມ.

ໃນພິທີ ທ່ານ ໝູນແກ້ວ ອໍລະບູນ ໄດ້ຍົກໃຫ້ເຫັນ ຄວາມໝາຍຄວາມສຳຄັນຂອງ ປີສາມັກຄີມິດຕະພາບລາວ- ຫວຽດນາມ ວັນເຊັນສັນຍາມິດຕະພາບການຮ່ວມມື ຄົບຮອບ 45 ປີ (ວັນທີ 18 ກໍລະກົດ ປີ 1977 ຫາ 18 ກໍລະກົດ ປີ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ ຄື (ວັນທີ 5 ກັນຍາ 1962 ຫາ 5 ກັນຍາ ປ2022 ), ປະຫັວດສາດ ມູນເຊື້ອ ສາຍພົວພັນມິດຕະພາບອັນຍີ່ງໃຫຍ່ ຊຶ່ງສະແດງອອກຫຼາຍເຫດການທີ່ສຳຄັນ ທີ່ ສອງພັກ ສອງລັດ ກໍຄື ປະຊາຊົນ ສອງຊາດ ລາວ- ຫວຽດນາມ ທີ່ໄດ້ຮ່ວມສາມັກຄີກັນຕໍ່ສູ້ຕ້ານກັບຈັກກະພັດອາເມລິກາ ເພື່ອກູ້ຊາດ , ກູ້ເອກກະລາດ ຂອງສອງປະເທດໃນເມືອກ່ອນ, ສາຍພົວພັນມິດຕະພາບອັນຍີ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ – ຫວຽດນາມ ຊື່ງເປັນປັດໃຈອັນສຳຄັນ ຕັດສິນໄຊຊະນະຂອງການປະຕິວັດລາວ ແລະ ຫວຽດນາມ ໃນພາລະກິດຕໍ່ສູ້ປົດປ່ອຍຊາດ ໃນ ເມືອກ່ອນ ກໍຄືການສ້າງສາພັດທະນາ ຂອງສອງປະເທດໃນປັດຈຸບັນ.

ການປະຖະກະຖາຄັ້ງນີ້ ກໍເພື່ອເປັນການໂຄສະນາ ສືກສາອົບຮົມ ໃຫ້ພະນັກງານ, ລັດຖະກອນ, ທະຫານ,ຕໍາຫຼວດ ແລະປະຊາຊົນບັນດາເຜົ່າ ໂດຍສະເພາະ ຄົນຮຸ່ນໜຸ່ມໃຫ້ມີຄວາມຮັບຮູ້ເຂົ້າໃຈທີ່ຖືກຕ້ອງ, ເລີກເຊິ່ງ, ໜັກແໜ້ນ ພ້ອມທັງເປັນການຈາລືກບຸນຄຸນ, ຕຸນງາມຄວາມດີຂອງພັກ, ລັດ ແລະ ປະຊາຊົນອ້າຍນ້ອງທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງແລະ ລໍ້າຄ່າ ໃນພາລະກິດປະຕິວັດ ແຫ່ງກ່ນປົກປັກຮັກສາ ແລະ ສ້າງສາພັດທະນາປະເທດຊາດ, ກໍຄືການປະກອບສ່ວນຂອງປະຊາຊົນລາວບັນດາເຜົ່າ, ເຂົ້າໃນການທ້ອນໂຮມປະເທດຫວຽດນາມ ໃຫ້ເປັນອັນໜື່ງອັນດຽວໃນເມື່ອກ່ອນ ແລະ ການປົກປັກຮັກສາ, ພັດທະນາສ້າງສາປະເທດຫວຽດນາມໃນປັດຈຸບັນ, ປະຫັວດສາດ ມູນເຊື້ອທີ່ສຳຄັນຍີ່ງໃຫຍ່ ລະຫວ່າງ ລາວ – ຫວຽດນາມ, ສືບຕໍ່ເສີມຂະຫຍາຍ ແລະ ປົກປັກຮັກສາໝາກຜົນຂອງການປະຕິວັດ ໄວ້ໃຫ້ໝັ້ນຄົງຍາວນານ, ທັງເປັນເຈົ້າການຖະນຸຖະໜອມ ເພີ່ມພູນຄູນສ້າງມູນເຊື້ອດັ່ງກ່າວ ໃຫ້ຈະເລີນງອກງາມຍີ່ງໆຂື້ນ.

ຂ່າວ : ຍຸພິນທອງ

ພາບ: ອາພິນຍາ ສຸລິຍະວົງ

ພິທີມອບ-ຮັບໜ້າທີ່ ເລຂາຄະນະບໍລິຫານງານພັກ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ລະຫວ່າງຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນ ໃນວັນ 23 ມິຖຸນາ ນີ້ ທີ່ກະຊວງ ອຄ ໂດຍມີ ສະຫາຍ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ເຂົ້າຮ່ວມເປັນສັກຂີພິຍານ ຊຶ່ງມີພາກສ່ວນກ່ຽວຂ້ອງເຂົ້າຮ່ວມ. ໃນພິທີ, ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານບັນດາເອກະສານທີ່ກ່ຽວຂ້ອງ ກ່ຽວກັບການຍົກຍ້າຍ ແລະ ແຕ່ງຕັ້ງໜ້າທີ່ດັ່ງກ່າວ ຊຶ່ງເນື້ອໃນໂດຍລວມແມ່ນ ຍົກຍ້າຍ ສະຫາຍ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີ ກະຊວງ ອຄ ຜູ້ເກົ່າ ໄປຮັບໜ້າທີ່ໃໝ່ ຢູ່ສໍານັກງານນາຍົກລັດຖະມົນຕີ ແລະ ແຕ່ງຕັ້ງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ ເປັນເລຂາຄະນະບໍລິຫານງານພັກ ລັດຖະມົນຕີກະຊວງ ອຄ ຜູ້ໃໝ່. ຈາກນັ້ນ, ສະຫາຍ ຄຳແພງ ໄຊສົມແພງ ກໍໄດ້ກ່າວສະຫຼຸບວຽກງານໃນໄລຍະຜ່ານມາ ພ້ອມທັງກ່າວອຳລາໜ້າທີ່ ແລະ ກໍໄດ້ລົງລາຍເຊັນມອບ-ຮັບໜ້າທີ່ ກັບ ສະຫາຍ ມະໄລທອງ ກົມມະສິດ.

ໂອກາດດັ່ງກ່າວ, ສະຫາຍ ກິແກ້ວ ໄຂຄຳພິທູນ ໄດ້ມີຄຳເຫັນໂອ້ລົມວ່າ: ກົມການເມືອງສູນກາງພັກ ກໍຄື ລັດຖະບານ ຕີລາຄາສູງ ທີ່ເຫັນວ່າຕະຫຼອດໄລຍະສອງປີກວ່າຜ່ານມາ ເຖິງແມ່ນວ່າສະພາບທັງສາກົນ, ພາກພື້ນ ແລະ ພາຍໃນປະເທດເຮົາ ຈະມີຄວາມຫຍຸ້ງຍາກສັບສົນ ແລະ ມີສິ່ງທ້າທາຍໃຫຍ່ຫຼວງຫຼາຍດ້ານ, ແຕ່ພາຍໃຕ້ການຊີ້ນຳ-ນຳພາຂອງ ສະຫາຍ ຄຳແພງ ໄຊສົມແພງ ເລຂາຄະນະບໍລິຫານງານພັກ ລັດຖະມົນຕີກະຊວງ ອຄ ຜູ້ເກົ່າ ພ້ອມກັບບັນດາສະຫາຍຄະນະພັກ, ຄະນະນຳ ກໍຄື ບັນດາສະຫາຍພະນັກງານຫຼັກແຫຼ່ງທົ່ວກະຊວງ ອຄ ເຫັນວ່າມີຜົນສຳເລັດຫຼາຍດ້ານ ໃນການຈັດຕັ້ງປະຕິບັດວຽກງານທີ່ພັກ ແລະ ລັດຖະບານມອບໝາຍໃຫ້. ບັນດາສະຫາຍໄດ້ຮັບຮູ້ແລ້ວວ່າ ການບູລະນະການຈັດຕັ້ງ, ການສັບຊ້ອນພະນັກງານ ແມ່ນກົດເກນພາວະວິໄສ ແຫ່ງການຄົງຕົວ ແລະ ຂະຫຍາຍຕົວຂອງພັກ-ລັດເຮົາ ທຸກໆການຈັດຕັ້ງກໍລ້ວນແຕ່ມີການເຄື່ອນເໜັງ, ປັບປຸງໄປຕາມແຕ່ລະໄລຍະໜ້າທີ່ການເມືອງຂອງການປະຕິວັດ, ພະນັກງານ ກໍມີການສັບຊ້ອນໄປຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ໃຫ້ແທດເໝາະກັບຄຸນສົມບັດ, ລະດັບຄວາມຮູ້-ຄວາມສາມາດ ແລະ ປະສົບການຕົວຈິງຂອງແຕ່ລະສະຫາຍ. ດັ່ງ ທ່ານ ເລນິນ ໄດ້ເວົ້າວ່າ “ສັບຊ້ອນແລ້ວ, ສັບຊ້ອນອີກ, ສັບຊ້ອນໃຫ້ແທດເໝາະກັບໜ້າທີ່ແຕ່ລະໄລຍະຂອງການປະຕິວັດ” ນີ້ສະແດງໃຫ້ເຫັນວ່າ ທຸກໆການຈັດຕັ້ງຈະບໍ່ຄົງຕົວຢູ່ບ່ອນເກົ່າ ແລະ ພະນັກງານທຸກຄົນຈະບໍ່ໄດ້ຢຸດນິ້ງຢູ່ບ່ອນເກົ່າ.

ສໍາລັບ ສະຫາຍ ມະໄລທອງ ກົມມະສິດ ກໍແມ່ນພະນັກງານຂັ້ນຍຸດທະສາດຂອງພັກ, ລັດ ເຄີຍຊີ້ນໍາບັນຊາຜ່ານຫຼາຍຂົງເຂດ ແລະ ມີຜົນສໍາເລັດຫຼາຍດ້ານ ແລະ ສິ່ງສໍາຄັນແມ່ນເປັນຜູ້ທີ່ຍັງໜຸ່ມແໜ້ນຫ້າວຫັນໃນການເຮັດວຽກງານທີ່ໜັກໜ່ວງທີ່ພັກ ແລະ ລັດຖະບານມອບໝາຍໃຫ້. ການເຂົ້າມາຮັບໜ້າທີ່ຂອງສະຫາຍຈະມີຜົນສໍາເລັດ ຫຼື ບໍ່ ແມ່ນຄວາມຕັດສິນໃຈຂອງສະຫາຍເອງ ຕິດພັນກັບການອູ້ມຊູ, ສະໜັບສະໜູນ, ຊ່ວຍເຫຼືອຈາກໝູ່ຄະນະກໍຄືພະນັກງງານຫຼັກແຫຼ່ງທົ່ວກະຊວງ ອຸດສາຫະ ກຳ ແລະ ການຄ້າ. ໃນນີ້, ສໍາຄັນທີ່ສຸດແມ່ນຄວາມສາມັກຄີ, ຄວາມເປັນເອກະພາບພາຍໃນຕ້ອງສູງ, ແບບແຜນວິທີເຮັດວຽກຕ້ອງລວມສູນ, ຄົບຖ້ວນຕາມຫຼັກການນໍາພາຂອງພັກ, ບໍ່ຫຼີກ ແລະ ບໍ່ໂຍນຄວາມຮັບຜິດຊອບ, ໜ້າວຽກທີ່ສໍາຄັນຕ້ອງເອກະພາບພາຍໃນໝູ່ຄະນະ ທັງຕິດຕາມກວດກາປະເມີນຜົນເປັນແຕ່ລະໄລຍະ ເພື່ອພ້ອມກັນແບກຫາບໜ້າທີ່ອັນໜັກໜ່ວງ ທີ່ພັກ-ລັດມອບໝາຍໃຫ້.

ເພື່ອເຮັດສໍາເລັດໜ້າທີ່ການເມືອງໃນສະເພາະໜ້າ ແລະ ຍາວນານ, ສະຫາຍ ກິແກ້ວ ໄຂຄໍາພິທູນ ກໍໄດ້ຕາງໜ້າກົມການເມືອງ ກໍຄື ລັດຖະບານ ສະເໜີໃຫ້ສະຫາຍລັດຖະມົນຕີຜູ້ໃໝ່ ກໍຄື ພະນັກງານ, ສະມາຊິກພັກ ແລະ ພະນັກງານຫຼັກແຫຼ່ງທົ່ວກະຊວງ ອຄ ໃຫ້ເອົາໃຈໃສ່ບາງບັນຫາ ຊຶ່ງກ່ອນອື່ນໝົດແມ່ນວຽກພັກ ເປັນຕົ້ນແມ່ນ ຄະນະພັກ-ຄະນະນໍາ ຕ້ອງຮັກສາຄວາມສາມັກຄີເປັນເອກະພາບ, ປະຕິບັດແບບ ແຜນວິທີເຮັດວຽກຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະມອບໃຫ້ບຸກຄົນຮັບຜິດ ຊອບຢ່າງຈະແຈ້ງ. ຕ້ອງພ້ອມກັນຮໍ່າຮຽນນໍາວຽກຕົວຈິງ, ຮຽນນໍາໝູ່ຄະນະ, ຮຽນນໍາມະຫາຊົນ, ຈິງໃຈຊ່ວຍເຫຼືອ, ຖອດຖອນບົດຮຽນຊຶ່ງກັນ ແລະ ກັນ, ຕ້ານທັດສະນະແນວຄິດໃນຕົວ ຫຼື ໂຍນຄວາມຮັບຜິດຊອບໃຫ້ກັນ, ໃສ່ຮ້າຍປ້າຍສີສິ່ງທີ່ບໍ່ດີແບບຊະຊາຍ. ພ້ອມນັ້ນ, ບັນ¬ດາສະຫາຍ ຈະຕ້ອງໄດ້ຊ່ວຍ ແລະ ໃຫ້ການຮ່ວມມືສະໜັບສະໜູນ ສະຫາຍລັດຖະມົນຕີຜູ້ໃໝ່ທີ່ຈະເປັນໃຈກາງນຳພາ-ຊີ້ນຳ ຮັບຜິດຊອບຕໍ່ໜ້າທີ່ການເມືອງອັນໜັກໜ່ວງ ໃນນາມເປັນເລຂາຄະນະພັກ, ກໍຄືລັດຖະມົນຕີຜູ້ໃໝ່. ສຳລັບວຽກງານວິິຊາສະເພາະ ແມ່ນມອບໃຫ້ສະຫາຍລັດຖະມົນຕີຜູ້ໃໝ່ ແລະ ພະນັກງານຫຼັກແຫ່ງທົ່ວກະຊວງ ພ້ອມຈິດພ້ອມໃຈກັນຈັດຕັ້ງປະຕິບັດຕາມພາລະບົດບາດສິດ, ໜ້າທີ່ຂອງກະຊວງອຸດສາຫະກຳການຄ້າ ແລະ ຕາມການນຳພາຊີ້ນຳ ຂອງພັກ ແລະ ລັດຖະບານ ເພື່ອພ້ອມກັນແກ້ໄຂບັນຫາຕ່າງໆ ທີ່ເກີດຂຶ້ນ ແລະ ຜ່ານບັນຫາຫຍຸ້ງຍາກໄປພ້ອມກັນ ຊຶ່ງໄລຍະຜ່ານມາ ພັກ, ກໍຄືລັດຖະບານ ທີ່ໄດ້ພະຍາຍາມລະດົມຄວາມຄິດຄວາມເຫັນ, ມີຄວາມຕັດສິນໃຈສູງໃນການປັບປຸງປ່ຽນແປງ, ແກ້ໄຂບັນຫາລວມຂອງຊາດ ເພື່ອຈະເຮັດໃຫ້ພວກເຮົາສາມາດປະຄັບປະຄອງເສດຖະກິດຂອງປະເທດ ບໍ່ໃຫ້ຕົກເຂົ້າສູ່ວິກິດທີ່ໜັກ ໜ່ວງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ

ພາຍຫຼັງການໂອ້ລົມ, ສະຫາຍ ມະໄລທອງ ກົມມະສິດ ກໍໄດ້ກ່າວຮັບ ແລະ ໄດ້ມີຄໍາເຫັນບາງຕອນສຳຄັນວວ່າ: ຂໍຮັບເອົາທຸກຄໍາເຫັນຊີ້ນໍາ ແລະ ໃຫ້ຄໍາໝັ້ນສັນຍາວ່າ ຈະສຸມສະຕິປັນຍາ, ເຫື່ອແຮງ ແລະ ຄວາມຮູ້ຄວາມສາມາດຂອງຕົນ ເພື່ອຜັນຂະຫຍາຍ ແລະ ຈັດຕັ້ງປະຕິບັດໃຫ້ໄດ້ຕາມທິດຊີ້ນໍາ ທີ່ໄດ້ຮັບໃນຄັ້ງນີ້.

(ຂ່າວ-ພາບ: ສຸກສະຫວັນ)

ໃນຕອນເຊົ້າວັນທີ 23 ມິຖຸນາ 2022 ທີ່ທະນາຄານ ແຫ່ງ ສປປ ລາວ, ທ່ານ ພັນຄຳ ວິພາວັນ ນາຍົກລັດຖະ ມົນຕີ ໄດ້ໃຫ້ກຽດເຂົ້າຮ່ວມເປັນປະທານ ແລະ ໂອ້ລົມໃຫ້ທິດຊີ້ນຳ ຕໍ່ພິທີມອບ-ຮັບໜ້າທີ່ ລະ ຫວ່າງ ທ່ານ ສອນໄຊ ສິດພະໄຊ ຜູ້ວ່າການທະນາຄານ ແຫ່ງ ສປປ ລາວ ຜູ້ເກົ່າ ແລະ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ແຫ່ງ ສປປ ລາວ ຜູ້ໃໝ່; ມີທ່ານ ອາລຸນໄຊ ສູນນະລາດ ລັດຖະ ມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ທ່ານ ນາງ ບຸດສະດີ ທະນະເມືອງ ຮອງຫົວໜ້າຄະນະຈັດຕັ້ງສູນກາງພັກ; ຄະນະນຳທະນາຄານ ແຫ່ງ ສປປ ລາວ; ຜູ້ຕາງໜ້າກະຊວງ-ອົງການທຽບເທົ່າ; ສະມາຊິກສະພາບໍລິຫານທະນາຄານ ແຫ່ງ ສປປ ລາວ ພ້ອມດ້ວຍ ພະນັກງານຫຼັກແຫຼ່ງ ຂອງທະນາຄານແຫ່ງ ສປປ ລາວ ເຂົ້າຮ່ວມ.

ໃນໂອກາດນີ້, ທ່ານ ນາງ ບຸດສະດີ ທະນະເມືອງ ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານເອກະສານກ່ຽວກັບການຍົກຍ້າຍ ແລະ ແຕ່ງຕັ້ງພະນັກງານການນຳຂັ້ນສູງ ຮັບໜ້າທີ່ໃໝ່ ເປັນຕົ້ນ ຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍສະຫາຍ ສອນໄຊ ສິດພະໄຊ ກຳມະ ການສູນກາງພັກ ໄປຮັບໜ້າທີ່ໃໝ່ຢູ່ສຳ ນັກງານນາຍົກລັດຖະມົນຕີ; ລັດຖະດຳ ລັດ ຂອງປະທານປະເທດ ວ່າດ້ວຍການຍົກຍ້າຍ ແລະ ແຕ່ງຕັ້ງທ່ານ ສອນໄຊ ສິດພະໄຊ ເປັນລັດຖະມົນຕີປະຈຳສຳນັກ ງານນາຍົກລັດຖະມົນຕີ; ຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການຍົກຍ້າຍ ສະຫາຍ ບຸນເຫຼືອ ສິນໄຊວໍຣະວົງ ຮອງເລຂາຄະນະບໍລິຫານງານພັກກະຊວງການເງິນ ໄປຮັບໜ້າທີ່ໃໝ່ ຢູ່ທະນາຄານແຫ່ງ ສປປ ລາວ; ມະຕິຕົກລົງ ຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ສະຫາຍ ບຸນເຫຼືອ ສິນໄຊວໍຣະວົງ ເປັນເລຂາຄະນະບໍລິຫານງານພັກ ທະນາຄານແຫ່ງ ສປປ ລາວ; ແລະ ລັດຖະດຳລັດ ຂອງປະທານປະເທດ ວ່າດ້ວຍການແຕ່ງຕັ້ງທ່ານ ບຸນເຫຼືອ ສິນໄຊວໍຣະວົງ ເປັນຜູ້ວ່າການທະນາຄານ ແຫ່ງ ສປປ ລາວ.

ໃນໂອກາດດຽວກັນ, ທ່ານ ສອນໄຊ ສິດພະໄຊ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານທະນາຄານແຫ່ງ ສປປ ລາວ ໃນໄລຍະທີ່ທ່ານ ດຳລົງຕຳແໜ່ງ ເປັນຜູ້ວ່າການທະນາຄານ ແຫ່ງ ສປປ ລາວ ນັບແຕ່ເດືອນກັນຍາ 2018 ເປັນຕົ້ນມາ. ຫຼັງຈາກນັ້ນ ກໍ່ໄດ້ມີພິທີເຊັນບົດບັນທຶກມອບ-ຮັບໜ້າທີ່ ລະຫວ່າງ ທ່ານ ສອນໄຊ ສິດພະໄຊ ຜູ້ວ່າການທະນາຄານ ແຫ່ງ ສປປ ລາວ ຜູ້ເກົ່າ ແລະ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ແຫ່ງ ສປປ ລາວຜູ້ໃໝ່.

ໃນໂອກາດທີ່ມີຄວາມໝາຍສຳຄັນນີ້, ທ່ານ ນາຍົກລັດຖະມົນຕີ ໄດ້ໃຫ້ກຽດມີຄຳເຫັນໂອ້ລົມ ຕໍ່ຜູ້ເຂົ້າຮ່ວມພິທີ ເຊິ່ງທ່ານ ໄດ້ຍົກໃຫ້ເຫັນ ເຫດຜົນ ແລະ ຄວາມຈຳເປັນ ໃນການປັບປຸງຊັບຊ້ອນ ສະມາຊິກລັດຖະບານ ໃນຄັ້ງນີ້; ໄດ້ຍົກໃຫ້ເຫັນ ສະພາບພົ້ນເດັ່ນ ທາງດ້ານການເງິນ-ເງິນຕາ, ຜົນກະທົບ ແລະ ສິ່ງທ້າ ທາຍຕ່າງໆ ຕໍ່ການພັດທະນາເສດຖະ ກິດ-ສັງຄົມ ຂອງປະທດເຮົາ. ພ້ອມກັນນັ້ນ ທ່ານ ຍັງໄດ້ຕັ້ງບາງບັນຫາຂຶ້ນ ເພື່ອໃຫ້ພະນັກງານ-ລັດຖະກອນ ຂະແໜງການທະນາຄານ ທີ່ເປັນເສນາທິການ ໃຫ້ແກ່ລັດຖະບານ ນຳໄປຄົ້ນຄວ້າ ແລະ ປັບປຸງແກ້ໄຂ ເປັນຕົ້ນ ຈະພັດທະນານະໂຍບາຍສິນເຊື່ອ ເພື່ອຊຸກຍູ້ການຜະລິດ ແລະ ການບໍລິການ ຄືແນວໃດ ເພື່ອທົດແທນການນຳເຂົ້າ ແລະ ສົ່ງອອກ ໃຫ້ມີປະສິດທິພາບ ແລະ ປະສິດທິຜົນ ສູງຂຶ້ນເລື້ອຍໆ; ຈະປັບປຸງໂຄງສ້າງ ແລະ ການບໍລິຫານ ໃນລະບົບສະຖາບັນການເງິນ ຄືແນວໃດ ເພື່ອໃຫ້ມີຄວາມເຂັ້ມແຂງ ແລະ ໝັ້ນຄົງ, ທັງເຮັດໃຫ້ການບໍລິການ ມີປະສິດທິຜົນ; ຈະເຮັດແນວໃດ ເພື່ອສາມາດຫຼຸດຜ່ອນການຂາດດູນເງິນຕາຕ່າງປະເທດ ເປັນກ້າວໆ, ມີຄັງສຳຮອງໃຫ້ສາມາດຮັບປະກັນການນຳເຂົ້າ ຕາມແຜນທີ່ວາງໄວ້, ຄຸ້ມຄອງອັດຕາເງິນເຟີ້ ແລະ ອັດຕາແລກປ່ຽນ ຢູ່ໃນໃນລະດັບທີ່ສາມາດຄວບຄຸມໄດ້; ຈະປັບປຸງກົນໄກການຄຸ້ມຄອງອັດຕາແລກ ປ່ຽນຄືແນວໃດ ເພື່ອສ້າງສະຖຽນລະພາບຄ່າເງິນກີບ ໃຫ້ໝັ້ນທ່ຽງ; ຈະພັດທະນາລະບົບການຊຳລະ ແລະ ເຕັກໂນໂລຊີທາງດ້ານການເງິນ ເພື່ອໃຫ້ມີຄວາມທັນສະໄໝ, ປອດໄພ ແລະ ສາມາດເຊື່ອມໂຍງກັບສາກົນໄດ້. ນອກຈາກນີ້, ທ່ານນາຍົກລັດຖະ ມົນຕີ ຍັງໄດ້ຊີ້ນຳໃຫ້ທະນາຄານແຫ່ງ ສປປ ລາວ ປັບປຸງແບບແຜນວິທີເຮັດວຽກ ໃຫ້ແທດເໝາະກັບສະພາບຕົວຈິງ, ມີການປັບປຸງປ່ຽນແປງ ສູ່ອັນໃໝ່ທີ່ດີຂຶ້ນ ບົນພື້ນຖານຄວາມເປັນເອກະພາບພາຍໃນ ແລະ ດ້ວຍຄວາມລະມັດລະວັງສູງ; ຮຽກຮ້ອງໃຫ້ພະນັກງານ-ລັດຖະກອນ ທົ່ວທະນາ ຄານແຫ່ງ ສປປ ລາວ ມີຄວາມເສຍສະຫຼະ, ຊື່ສັດບໍລິສຸດ, ເຫັນແກ່ຜົນປະໂຫຍດລວມຂອງຊາດ, ປະຕິ ບັດໜ້າທີ່ ດ້ວຍຄວາມຮັບຜິດຊອບສູງ ແລະ ເຕັມກຳລັງແຮງຂອງຕົນ.

ໃນຕອນທ້າຍ, ທ່ານ ບຸນເຫຼືອ ສິນໄຊວໍຣະວົງ ກໍ່ໄດ້ຂຶ້ນກ່າວຮັບຄຳໂອວາດ ຂອງທ່ານ ນາຍົກລັດຖະມົນຕີ, ພ້ອມທັງ ກ່າວຮັບໜ້າທີ່ ໂດຍຈະສຸມສະຕິປັນຍາ, ເຫື່ອແຮງ, ຄວາມຮູ້ຄວາມສາມາດ ແລະ ປະສົບການຂອງຕົນ ຮ່ວມກັບໝູ່ຄະນະ ກໍ່ຄືພະນັກງານທົ່ວທະນາຄານ ແຫ່ງສປປ ລາວ ແລະ ພາກສ່ວນກ່ຽວຂ້ອງ ປະຕິບັດໜ້າທີ່ ແລະ ຄວາມຮັບຜິດຊອບ ໃຫ້ມີຜົນສຳເລັດ ຕາມຄາດໝາຍທີ່ວາງໄວ້ ໃຫ້ສົມກັບຄວາມເຊື່ອໝັ້ນ ແລະ ໄວ້ວາງໃຈຂອງຂັ້ນເທິງ.

ພາບ ແລະ ຂ່າວ: ກົມປະຊາສຳພັນ ຫສນຍ

ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ໄດ້ຊີ້ແຈງວຽກງານລັດຖະບານ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 23 ມິຖຸນາ 2022 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໃຫ້ຮູ້ວ່າ: ສາເຫດຄວາມຫຍຸ້ງຍາກຂອງສະພາບເສດຖະກິດໃນປະເທດເຮົາໃນ ປັດຈຸບັນນີ້, ແມ່ນເກີດຈາກ 2 ສາເຫດຫຼັກຄື: ສາເຫດນອກຕົວ ແມ່ນຜົນກະທົບຈາກການລະບາດຂອງ ພະຍາດໂຄວິດ-19 ແລະ ສະພາບວິກິດເສດຖະກິດໂລກ ທີ່ເກີດຈາກການຂວໍ້າບາດຂອງປະເທດຕາເວັນ ຕົກທາງເສດຖະກິດຕໍ່ຣັດເຊຍ. ສ່ວນສາເຫດໃນຕົວ ແມ່ນຍ້ອນຢູ່ພາຍໃນພວກເຮົາຍັງບໍ່ມີຄວາມສະດຸ້ງໄວ ໃນການແກ້ໄຂບັນຫາ ຫຼື ບໍ່ຢາກປ່ຽນແປງໄປສູ່ອັນໃໝ່. ແຕ່ແນວໃດກໍຕາມ, ລັດຖະບານ ພວມເອົາໃຈ ໃສ່ຢ່າງໃກ້ຊິດໃນການແກ້ໄຂບັນຫາຄວາມຫຍຸ້ງຍາກດັ່ງກ່າວ, ໂດຍສືບຕໍ່ເອົາໃຈໃສ່ຈັດຕັ້ງປະຕິບັດມາດ ຕະການ, ເປົ້າໝາຍ ແລະ ຄາດໝາຍ,​ ຕ່າງໆ ທີ່ໄດ້ກໍານົດໄວ້ໃນວາລະແຫ່ງຊາດ ກ່ຽວກັບການແກ້ໄຂສະ ພາບເສດຖະກິດ-ການເງິນ ບົນພື້ນຖານຢຶດໝັ້ນຫຼັກການ ເດັດຂາດ, ໂປງໃສ ແລະ ມືອາຊີບ ໃຫ້ມີປະສິດທິຜົນ. ສ່ວນ ບາງມາດຕະການຕົວຈິງໃນສະເພາະໜ້ານັ້ນ ລັດຖະບານ ໄດ້ເພີ່ມທະວີຄວາມເດັດຂາດໃນການຄຸ້ມຄອງເງິນຕາຕ່າງປະເທດ, ຮ້ານແລກປ່ຽນ ແລະ ປະຕິບັດວິໄນເຂັ້ມງວດຕໍ່ຜູ້ລະເມີດລະບຽບກົດໝາຍ.

ປັດຈຸບັນທະນາຄານແຫ່ງ ສປປ ລາວ ກໍາລັງຫັນເອົາຮ້ານແລກປ່ຽນເງິນຕາທັງໝົດ ໃຫ້ເຂົ້າສັງກັດທະນາຄານທຸລະກິດ ເພື່ອໃຫ້ອັດຕາການແລກປ່ຽນ ສອດຄ່ອງຕາມອັດຕາຊີ້ນໍາຂອງທະນາຄານແຫ່ງ ສປປ ລາວ, ນອກນີ້ ລັດຖະບານ ໄດ້ອອກພັນທະບັດຈໍາໜ່າຍແກ່ສັງຄົມ ເພື່ອດຶງດູດແຫຼ່ງທຶນສະກຸນເງິນກີບຈາກສັງຄົມເຂົ້າສູ່ທະນາຄານ, ຈາກການອອກພັນທະບັດດັ່ງກ່າວ ໄດ້ເຮັດໃຫ້ອັດຕາແລກປ່ຽນປັບລົງເລື້ອຍໆ. ສ່ວນການແກ້ໄຂ ວິກິດນໍ້າມັນເຊື້ອໄຟນັ້ນ, ລັດຖະບານໄດ້ປັບໂຄງສ້າງລາຄານໍ້າມັນ ຕາມຂອບເຂດທີ່ຄະນະປະຈໍາສະພາແຫ່ງ ຊາດໄດ້ອະນຸມັດ ໂດຍໄດ້ປັບຈາກອາກອນຊົມໃຊ້ຈາກ 11% ມາເປັນຂອບອັດຕາຈັດຕັ້ງປະຕິບັດຕົວຈິງແຕ່ 0-11%, ສ່ວນແອັດຊັງທຳມະດາຈາກ 16% ມາເປັນຂອບຈັດຕັ້ງປະຕິບັດຕົວຈິງແຕ່ 0-16% ຊຶ່ງຄະນະປະຈຳສະພາແຫ່ງຊາດ ໄດ້ຕົກລົງໃຫ້ລັດຖະບານກຳນົດເອົາເອງໃນຂອບດັ່ງກ່າວ, ພ້ອມທັງໄດ້ໃຫ້ສິນເຊື່ອ ແກ່ບໍລິສັດນໍ້າມັນເຊື້ອໄຟລາວ ເພື່ອເປັນຕົວແທນຂອງບັນດາບໍລິສັດນຳເຂົ້ານ້ຳມັນ ເພື່ອຈັດຊື້ນໍ້າມັນມາສະໜອງໃຫ້ສັງຄົມ ແລະ ມອບໃຫ້ 4 ບໍລິສັດໃຫ້ເປັນຕົວແທນນໍາເຂົ້ານໍ້າມັນ ເປັນຜູ້ຄຸ້ມຄອງການຈັດຊື້ນໍ້າມັນເຊື້ອໄຟ ເພື່ອມາສະໜອງໃຫ້ແກ່ສັງຄົມ ເຖິງວ່າ ຈະບໍ່ປົກະຄືຜ່ານມາ ແຕ່ກໍຈະຜ່ອນຄາຍລົງ. ນອກນີ້, ລັດຖະບານ ມີແຜນຊອກວິທີທາງອື່ນໃນການຈັດຫານໍ້າມັນເຊື້ອໄຟ ເພື່ອສະໜອງໃຫ້ສັງຄົມໃນໄລຍະຍາວ. ສ່ວນລາຄານໍ້າມັນເຊື້ອໄຟແມ່ນຈະໃຫ້ເປັນໄປຕາມລາຄານໍ້າມັນໃນຕະຫຼາດໂລກ.

ທ່ານນາຍົກລັດຖະມົນຕີ ໄດ້ໃຫ້ຮູ້ຕື່ມວ່າ: ລັດຖະບານຈະຖອດຖອນບົດຮຽນ ເພື່ອປັບໂຄງສ້າງການນໍາເຂົ້າສິນຄ້າປະເພດຕ່າງໆ ເພື່ອຫຼຸດຜ່ອນການໄຫຼອອກຂອງເງິນຕາຕ່າງປະເທດ, ໂດຍຈະກໍານົດຕາມຄວາມເປັນຈິງວ່າ ສິນຄ້າປະເພດໃດທີ່ພວກເຮົາມີ ຫຼື ຜະລິດໄດ້ ແມ່ນອາດໂຈະການນໍາເຂົ້າ. ນອກນີ້, ລັດຖະບານ ຈະສືບຕໍ່ແກ້ໄຂບັນດາປະກົດການຫຍໍ້ທໍ້ຕ່າງໆຂອງພະນັກງານ-ລັດຖະກອນ ແລະ ເຈົ້າໜ້າທີ່ ທີ່ມີພຶດຕິກໍາສວຍໃຊ້ໜ້າທີ່ຕຳແໜ່ງ ສວຍໂອກາດໃນສະພາບທີ່ປະເທດຊາດພົບຄວາມຫຍຸ້ງຍາກທາງດ້ານເສດຖະກິດດັ່ງໃນປັດຈຸບັນນີ້ ແລະ ຢຶນຢັນຈະເປີດໃຈຮັບຟັງຄໍາຕໍານິຕິສົ່ງຂ່າວຢ່າງຈິງໃຈ ກົງໄປ ກົງມາ, ສ້າງສັນ ທີ່ເປັນປະໂຫຍດຈາກສັງຄົມ ເພື່ອເປັນພື້ນຖານໃນການປັບປຸງລະບົບການເຮັດວຽກຂອງລັດຖະບານໃຫ້ດີກວ່າເກົ່າໃນຕໍ່ໜ້າ.

ທ່ານນາຍົກຍັງຮຽກຮ້ອງໃຫ້ປະຊາຊົນລາວບັນດາເຜົ່າ ຈົ່ງບໍລິໂພກຂໍ້ມູນ-ຂ່າວສານຈາກສື່ສັງຄົມອອນລາຍຢ່າງມີສະຕິ, ຕ້ອງມີການກັ່ນຕອງ ເບິ່ງເຫດ ແລະ ຜົນກ່ອນຈະແຊຂໍ້ມູນຂ່າວສານດັ່ງກ່າວນັ້ນ ແລະ ຂໍຮຽກຮ້ອງໃຫ້ຢຸດຕິການປ່ອຍຂ່າວບິດເບືອນ, ທັບຖົມໂຈມຕີ, ບິດເບືອນຂໍ້ມູນຄວາມຈິງ ສ້າງຄວາມແຕກຕື່ນໃຫ້ແກ່ສັງຄົມ ຂໍໃຫ້ຢຸດຕິພຶດຕິກຳດັ່ງກ່າວ.​

ຂ່າວ: ຄ.​ຄຳປະເສີດ