ໃນວາລະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 27 ມິຖຸນາ 2022, ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຖະແຫລງກ່ຽວກັບຜົນສຳເລັດໃນການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ແລະ ການຕິດຕາມກວດກາ ຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດ ໃນໄລຍະຜ່ານມາ, ພ້ອມນີ້ ໄດ້ເລັ່ງຕິດຕາມຄວາມຄືບໜ້າການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດ ໂດຍສະເພາະ ວິສາຫະກິດ ທີ່ດໍາເນີນທຸລະກິດຂາດທຶນຕໍ່ເນື່ອງເປັນເວລາຫລາຍປີ, ລວມທັງວິສາຫະກິດທີ່ດຳເນີນທຸລະກິດບໍ່ມີປະສິດທິຜົນ ໃຫ້ຄົ້ນຄວ້າປັບປຸງຄືນໂຄງສ້າງການຈັດຕັ້ງ, ປັບປຸງການບໍລິຫານ ແລະ ບຸກຄະລາກອນໃຫ້ມີປະສິດທິພາບ.

ທ່ານ ນາງ ສຸນທອນ ໄຊຍະຈັກ ໄດ້ຢ້ຳວ່າ: ລັດຖະບານ ຄວນເອົາໃຈໃສ່ຊີ້ນຳຂະແໜງການກ່ຽວຂ້ອງຈັດຕັ້ງປະຕິບັດການປະຕິຮູບ ລັດວິສາຫະກິດ ລວມທັງທະນາຄານທຸລະກິດລັດ, ແກ້ໄຂໜີ້ສິນໃຫ້ຫລຸດລົງ ແລະ ປັບປຸງຖານະການເງິນໃຫ້ສາມາດແຂ່ງຂັນທາງດ້ານທຸລະກິດ ເພື່ອເຮັດໃຫ້ວິສາຫະກິດມີປະສິດທິຜົນ, ກ້າວໄປສູ່ການມີກໍາໄລ ແລະ ເປັນຕົວແບບໃນການປະຕິບັດພັນທະເຂົ້າງົບປະມານແຫ່ງລັດ ເປັນຕົ້ນ ບໍລິສັດໄຟຟ້າລາວ, ໄຟຟ້າລາວມະຫາຊົນ, ການບິນລາວ, ນໍ້າມັນເຊື້ອໄຟລາວ ແລະ ຊີມັງລາວ. ຄວນກຳນົດຕາຕະລາງເວລາປັບປຸງລັດວິສາຫະກິດ ທີ່ລະອຽດຈະແຈ້ງ, ລວມທັງກໍານົດວິທີການ ແລະ ທິດທາງການປະຕິຮູບລັດວິສາຫະກິດ ໃຫ້ເປັນ 4 ປະເພດ ໃນປີ 2022; ການປະຕິຮູບ 5 ຫົວໜ່ວຍ ລັດວິສາຫະກິດ ເປັນວຽກຈຸດສຸມຂອງວາລະແຫ່ງຊາດ ເປັນຕົ້ນ ລັດວິສາຫະກິດໄຟຟ້າລາວ, ລັດວິສາຫະກິດນ້ຳມັນເຊື້ອໄຟຟ້າລາວ, ບໍລິສັດຜະລິດໄຟຟ້າລາວ ມະຫາຊົນ, ລັດວິສາຫະກິດການບິນລາວ ແລະ ລັດວິສາຫະກິດພັດທະນາອຸດສາຫະກຳ-ກະສິກຳ, ບໍລິການຂາເຂົ້າ-ຂາອອກ; ຮີບຮ້ອນ, ຄົ້ນຄວ້າອອກຂໍ້ຕົກລົງ ວ່າດ້ວຍກໍານົດໝາຍເງິນເດືອນ, ເງິນອູດໜູນ, ເງິນນະໂຍບາຍ ແລະ ລາຍຈ່າຍບໍລິຫານຂອງລັດວິສາຫະກິດ.

ທ່ານ ນາງ ສຸນທອນ ໄຊຍະຈັກ ຍັງໃຫ້ຮູ້ອີກວ່າ: ຜົນການຕິດຕາມກວດກາ ການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ ນັບກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາວາລະແຫ່ງຊາດ 2 ສະບັບ ໂດຍໄດ້ອອກມະຕິຂອງກອງປະຊຸມສະພາແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ມະຕິວ່າດ້ວຍການແກ້ໄຂບັນຫາຢາເສບຕິດ; ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ໄດ້ຈັດກອງປະຊຸມຮ່ວມ 2 ຄັ້ງ ເພື່ອປຶກສາຫາລືຫົວຂໍ້ສະເພາະ ກ່ຽວກັບຄວາມຄືບໜ້າໃນການຈັດຕັ້ງ ປະຕິບັດວາລະແຫ່ງຊາດ 2 ສະບັບ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເກີດຂຶ້ນໃນແຕ່ລະໄລ ຍະ ເປັນຕົ້ນ ການແກ້ໄຂສະພາບບັນຫານໍ້າມັນເຊື້ອໄຟ ລວມທັງການຕົກລົງຫລຸດອັດຕາອາກອນຊົມ ໃຊ້ນໍ້າມັນເຊື້ອໄຟລົງ, ການແກ້ໄຂບັນຫາຢາເສບຕິດ ແລະ ວຽກງານອື່ນໆ; ລົງເຄື່ອນໄຫວຕິດຕາມກວດ ກາ ແລະ ຊຸກຍູ້ການຈັດຕັ້ງປະຕິບັດວາລະແຫ່ງຊາດ ພ້ອມກັບການຕິດຕາມກວດກາຫົວຂໍ້ຕ່າງໆ ໂດຍສະ ເພາະ ການຕິດຕາມກວດກາ ການດໍາເນີນທຸລະກິດການຂຸດຄົ້ນ ແລະ ປຸງແຕ່ງແຮ່ເຫຼັກໃນໄລຍະເຮັດທົດລອງ; ການຜະລິດກະສິກໍາ ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແລະ ເປັນສິນຄ້າສົ່ງອອກ; ການສົ່ງເສີມວິສາຫະກິດຂະໜາດນ້ອຍ, ຂະໜາດກາງ.

ພ້ອມນີ້, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາແຫ່ງຊາດ ໄດ້ມີຄວາມພະຍາຍາມຈັດຕັ້ງຜັນຂະຫຍາຍ ມະຕິກອງປະຊຸມຄົບຄະນະຂອງສູນກາງພັກສະໄໝວິສາມັນ, ຄໍາສັ່ງຂອງກົມການເມືອງສູນກາງພັກ, ມະຕິກອງປະຊຸມສະພາແຫ່ງຊາດ ທີ່ໄດ້ຮັບຮອງເອົາວາລະແຫ່ງຊາດ 2 ສະບັບ ເຂົ້າໃນການເຄື່ອນໄຫວວຽກງານຂອງຕົນ; ປະສານສົມທົບກັບ ຄະນະພັກ, ສະພາປະຊາຊົນຂັ້ນແຂວງ, ອົງການປົກຄອງແຂວງ ຈັດຕັ້ງປະຕິບັດວາລະແຫ່ງຊາດ ຢູ່ໃນຂອບເຂດແຂວງ, ນະຄອນຫລວງ ຢ່າງເປັນຂະບວນການຟົດຟື້ນໃນທຸກຂະແໜງການ.

ຂ່າວ ສົມຫວັງ

ພາບ ເກດສະໜາ

ຕາມ​ຂ່າວ​ຈາກ dailynews ວັນ​ທີ 27​ ມິຖຸນາ​ນີ້ ກອງ​ປະຊຸມ​ກຸ່ມ​ປະ​ເທດ​ມະຫາ​ອຳນາດດ້ານ​ອຸດສາຫະກຳ​ຂອງ​ໂລກ (ຈີ 7) ປະກາດ​ ຈຳກັດ​ ການ​ສົ່ງ​ອອກ​ຄຳ ຈາກຣັດ​ເຊຍ ​ແລະ ການ​ຮ່ວມ​ ລະດົມ​ທຶນ ​ໃນ​ພາກ​ພື້ນ​ພວມ​ພັດທະນາ ​ຫລັງ​ຈາກປະ​ເທດ​ສະມາຊິກ​ ປະກອບ​ດ້ວຍ ສ.ອາ​ເມ​ລິ​ກາ, ອັງກິດ, ​ເຢຍລະ​ມັນ, ຝຣັ່ງ, ອີ​ຕາ​ລີ, ກາ​ນາ​ດາ ​ແລະ ຍີ່ປຸ່ນ ​ໄດ້​ຕົກລົງ​ເປັນ​ເອກະ​ພາບ​ກັນ​ ໃນ​ກອງ​ປະຊຸມ​ຄັ້ງນີ້.​ ໃນ​ໄລຍະ​ຊຸມ​ປີຜ່ານມາ ຄຳກາຍ​ເປັນ​ສິນຄ້າ​ສົ່ງ​ອອກ​ສຳຄັນ ອັນ​ດັບ 2 ຂອງຣັດ​ເຊຍ ຮອງ​ຈາກ​ນ້ຳມັນ​ເຊື້ອ​ໄຟ ​ໂດຍຣັດ​ເຊຍ ກວມ​ເອົາ ​ອັດຕາ​ສ່ວນ​ ເກືອບ 5% ຂອງ​ຕະຫລາດ ຄຳ​ໂລກ ຄິດ​ເປັນ​ ມູນ​ຄ່າ​ ເກືອບ19​ ຕື້ໂດ​ລາ ​ສະຫະລັດ ​ເມື່ອ​ປີ 2020 ​ແຕ່ຫລຸດ​ລົງ​ມາ​ ຢູ່​ທີ່​ປະມານ 15,5 ຕື້​ໂດ​ລາ ​ສະຫະລັດ ​ເມື່ອ​ທຽບ​ໃສ່ ​ປີ​ກາຍ. ຂະນະ​ທີ່ 90% ຂອງ​ຄຳ ທີ່​ສົ່ງ​ອອກຈາກຣັດ​ເຊຍ ​ມີ​ປະ​ເທດ ​ກຸ່ມ​ຈີ 7 ​ເປັນ​ລູກ​ຄ້າ​ ໃຫຍ່​ທີ່​ສຸດ ​ໂດຍ​ສະ​ເພາະ ​ອັງກິດ, ສ່ວນ​ ສ.ອາ​ເມ​ລິ​ກາ ຊື້​ຄຳ​ຈາກຣັດ​ເຊຍ ຄິດ​ເປັນ​ມູນ​ຄ່າ ​ບໍ່​ເຖິງ 1 ລ້ານ​ໂດ​ລາ ​ສະຫະລັດ ​ເມື່ອ 2ປີຜ່ານມາ./.(ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ມື້ນີ້ ເຮົາມາແນະນຳວິທີທີ່ສາມາດຫຼຸດຄ່າໄຟຟ້າ ຊ່ວຍຫຼຸດຄ່າໃຊ້ຈ່າຍໃນບ້ານ ແລະ ຍັງຫຼຸດພາວະໂລກຮ້ອນໄດ້ນຳອີກ ມາເບີ່ງນຳກັນເລີຍ.

1. ປິດສະວິດໄຟ ແລະ ເຄື່ອງໃຊ້ໄຟຟ້າທຸກຊະນິດ ເມື່ອຢຸດໃຊ້ວຽກ ແລະ ບໍ່ຄວນເປີດໄຟປະໄວ້ເມື່ອບໍ່ມີຄົນຢູ່.
2. ຫຼຸດຈຳນວນດອກໄຟໃນຫ້ອງ ຫັນມາເພີ່ງພະລັງງານແສງອາທິດໃຫ້ຫຼາຍຂື້ນ.
3. ເລືອກໃຊ້ດອກໄຟທີ່ໄດ້ມາດຕະຖານ ຈະຊ່ວຍໃຫ້ເຮົາປະຢັດພະລັງງານໄຟຟ້າໄດ້ຫຼາຍຂື້ນ.
4. ຕັ້ງໂຄມໄຟຢູ່ໂຕະເຮັດວຽກ ຫຼື ຕິດຕັ້ງໄຟສະເພາະຈຸດ ແທນການເປີດໄຟໝົດຫ້ອງເພື່ອເຮັດວຽກ.
5. ຖ້າຈຳເປັນຕ້ອງເປີດໄຟບາງຈຸດໄວ້ໝົດຄືນ ໃຫ້ເລືອກໃຊ້ດອກໄຟທີ່ມີກຳລັງວັດຕໍ່າ ເພື່ອຊ່ວຍປະຢັດຄ່າໄຟຟ້າ.
6. ຄວນໃຊ້ດອກໄຟ LED ເພາະຊ່ວຍປະຢັດໄຟໄດ້ເຖີງ 80-90% ແລະ ອາຍຸການໃຊ້ງານດົນນານ.
7. ບໍ່ຄວນໃຊ້ເຄື່ອງໄຟຟ້າອາຍຸເກີນ 3 ປີ ຖ້າຮອດ 3 ປີ ຄວນປ່ຽນໃໝ່ ຫຼື ຖ້າຈຳເປັນບໍ່ຢາກຖີ້ມຄວນໝັ່ນກວດເຊັກສະພາບ ແລະ ໝັ່ນບຳລຸງຮັກສາຢ່າງຕໍ່ເນື່ອງ.
8. ຄວນເຮັດຄວາມສະອາດຢູ່ເລື້ອຍໆ ເປັນຕົ້ນແມ່ນເຮືອນ, ຟິວເຕີແອແມ່ນເອົາອອກມາລ້າງ, ດອກໄຟກໍ່ຄວນເຊັດ, ລ້າງຕູ້ເຢັນ…

ຄວາມຈີງເປັນວິທີທີ່ເຮົາຮູ້ກັນຢູ່ແລ້ວ ແຕ່ເຮົາມັກປ່ອຍປະລະເລີຍ ບໍ່ສົນໃຈ ທ່ານລອງເຮັດຕາມວິທີຂ້າງເທີງນັ້ນ ຮັບຮອງວ່າຄ່າໄຟຟ້າເດືອນນີ້ຫຼຸດລົງແນ່ນອນ!

ແມ່ຍິງໄວທອງຄວນຮັກສາສຸຂະພາບຕົນເອງໃຫ້ຫຼາຍກວ່າປົກກະຕິ ຄວນຫຼຸດຜ່ອນຄວາມຕຶງຄຽດ ຮັບປະທານອາຫານທີ່ມີແຄວຊ້ຽມສູງເຊັ່ນ: ງາດຳ, ກຸ້ງແຫ້ງ, ຖົ່ວແດງ, ຜັກກາດນາ ແລະ ອື່ນໆ ເຊິ່ງເປັນສານຫຼັກໃນການສ້າງກະດູກ ພ້ອມທັງແມ່ຍິງໝົດປະຈຳເດືອນ ການເສີມແຄວຊ້ຽມບໍ່ໄດ້ຊ່ວຍໃຫ້ກະດູກແຂງແຮງ ມີແຕ່ການຢຸດການທຳລາຍຂອງກະດູກເທົ່ານັ້ນ

ຄວນອອກກຳລັງກາຍເປັນປະຈຳ 2-3 ຄັ້ງຕໍ່ອາທິດ ແລະ 1 ຊົ່ວໂມງໃນແຕ່ລະຄັ້ງຈະຊ່ວຍຫຼຸດການລະລາຍຂອງແຄວຊ້ຽມຈາກກະດູກເຊັ່ນດຽວກັນ ນອກຈາກນີ້ຄວນເຊົາສູບຢາ ຫຼື ດື່ມເຄື່ອງດື່ມແອລກໍຮໍ ແລະ ພະຍາຍາມປ້ອງກັນບໍ່ໃຫ້ເກີດອຸບັດຕິເຫດຈາກການລົ້ມເປັນຕົ້ນ.

ເກືອແມ່ນສານອາຫານເຮັດໃຫ້ແຄວຊ້ຽມມີການປ່ຽນແປງ.

ໂຊດາມີທາດຟົດສະຟໍຣັສ ແລະ ສານອາຫານທີ່ມີແຄວຊ້ຽມຕໍ່າ ຊື່ງສົ່ງຜົນກະທົບໃຫ້ເກີດສານລະລາຍຂອງແຄວສ່ຽມເຮັດໃຫ້ສ່ຽງຂອງກະດູກໄດ້.

ສຳລັບຄົນທີ່ເປັນໂລກກກະດູກພ່ອຍຢູ່ ການບໍລິໂພກຄາເຟອິນປະລິມານ 300 ມິລິກຼາມ ກໍ່ສາມາດເຮັດໃຫ້ເກີດອາການຮຸນແຮງຂື້ນໄດ້.

ຖ້າແຕ່ລະມື້ບໍ່ສາມາດກິນອາຫານທີ່ມີແຄວຊ້ຽມ, ຟົດສະຟໍຣັດ, ແມກນີຊຽມ ແລະ ວິຕາມິນດີ ທີ່ຊ່ວຍດູດຊຶມທາດແຄວຊ້ຽມເຮັດໃຫ້ກະດູກ ແລະ ເນື້ອເຍື່ອແຂງແຮງຄົບຖ້ວນພຽງພໍ.

ປະເທດເຮົາເປັນປະເທດທີ່ຮ້ອນອົບເອົ້າ ຖ້າທ່ານຈອດລົດໄວ້ບ່ອນຮົ່ມເພື່ອບໍ່ໃຫ້ລົດແດດກໍ່ບໍ່ງ່າຍສຳລັບຫຼາຍໆ ຄົນ ບາງເທື່ອເຄື່ອງຂອງທີ່ຢູ່ໃນລົດ ຫຼື ບາງຢ່າງຫາກພົບຄວາມຮ້ອນດົນໆຈະເຮັດປະຕິກິລິຍາ ຫຼື ອາດຈະເຮັດໃຫ້ເກີດຄວາມເສຍຫາຍຕໍ່ລົດໄດ້ ບາງເທື່ອເຮົາບໍ່ໄດ້ຈອດລົດໄວ້ບ່ອນແດດ ຫຼື ຈອດຖີ້ມໄວ້ບໍ່ດົນ ຫຼື ບາງເທື່ອລະດູໜາວທີ່ອາກາດບໍ່ຮ້ອນ ແຕ່ທ່ານກໍ່ບໍ່ຄວນປະໝາດ ປ້ອງກັນໄວ້ກ່ອນດີທີ່ສຸດ ຖ້າເກີດເຫດອັນຕະລາຍ ແລະ ສ້າງຄວາມເສຍຫາຍແລ້ວນຳມາແກ້ຕາມຫຼັງ.

ຕຸກນໍ້າດື່ມ ຖ້າຫາກວາງຕຸກນໍ້າດື່ມໄວ້ຄອນໂຊລໜ້າລົດ ຫຼື ບ່ອນທີ່ຖືກແສງແດດສ່ອງ ຄວາມຮ້ອນຈາກແສງແດດຈະມີຜົນໃຫ້ຕຸກນໍ້າດື່ມລະລາຍໄດ້ ແລະ ຈະມີສານເຄມີຈາກຕຸກນໍ້າດື່ມທີ່ເຮັດໃຫ້ທາງໃນນໍ້າດື່ມຜະລິດຕຸກເປື້ອນອອກມາ ຊື່ງເປັນອັນຕະລາຍຕໍ່ສຸຂະພາບໄດ້ ຍີ່ງໄປກ່ວານັ້ນຍັງມີຄວາມສ່ຽງທີ່ອາດຈະເກີດໄຟລຸກໃໝ້ນຳອີກ.

ວັດຖຸອຸປະກອນທີ່ມີແບັດເຕີລີ້ ເປັນຕົ້ນແມ່ນໂທລະສັບມືຖື ແທັບເລັດ ໂນ໊ດບຸກ ພາວເວີ້ແບັງ ແລະ ອື່ນໆ ສີ່ງທີ່ມີແບັດເຕີລີ້ຢູ່ທາງໃນ ຍ້ອນວ່າສານລິທຽມທີ່ຢູ່ໃນແບັດເຕີລີ້ ເປັນໂລຫະທີ່ມີຄວາມໄວໃນການກໍ່ໃຫ້ເກີດປະຕິກິລິຍາທາງເຄມີ ເມື່ອໄດ້ຮັບຄວາມຮ້ອນຈາກແສງແດດຈະເຮັດໃຫ້ເກີດຄວາມຮ້ອນສູງ ຈົນເຮັດໃຫ້ແບັດເຕີລີ້ເຊື່ອມ ຫຼື ອຸປະກອນເກີດຄວາມເສຍຫາຍ ແລະ ບາງເທື່ອອາດມີການລັດວົງຈອນຊື່ງຈະເຮັດໃຫ້ລະເບີດໄດ້.

ກະປ່ອງສະເປຕ່າງໆ ທາງໃນກະປ່ອງສະເປມັກມີສານເຄມີ ແລະ ແກັສ ເມື່ອຖືກຄວາມຮ້ອນແລ້ວຈະມີການຂະຫຍາຍໂຕ ຊື່ງອາດຈະກໍ່ໃຫ້ເກີດເປັນປະກາຍໄຟ ຫຼື ອາດຈະລະເບີດໄດ້ ຈະເປັນສະເປກະປ່ອງຂະໜາດນ້ອຍ ຫຼື ໃຫຍ່ກໍ່ຕາມ ຄວນຕ້ອງຫຼີກລ່ຽງການເກັບເອົາໄວ້ພາຍໃນລົດ.

ກັບໄຟແຊັກ ເພາະກັບໄຟແຊັກມີສານເຄມີທີ່ເປັນເຊື້ອໄຟຢູ່ທາງໃນ ເມື່ອເວລາເອົາໄວ້ໃນລົດທີ່ມີອຸ່ນຫະພູມສູງດົນໆ ກໍ່ຈະເຮັດໃຫ້ສານເຄມີເກີດການຂະຫຍາຍໂຕຈະເຮັດໃຫ້ລະເບີດ ແລະ ອາດຈະເປັນອັນຕະລາຍໄດ້.

ຢາງລຶບ ເນື່ອງຈາກວ່າຢາງລຶບມີສານໃນກຸ່ມ Plasticizers ຊື່ງເປັນໂຕທຳລາຍພລາສຕິກ ເມື່ອເວລາພົບຄວາມຮ້ອນມັນຈະຄາຍສານອອກມາ ເຮັດໃຫ້ອ້ອມໆ ຄອນໂຊລ ຫຼື ສ່ວນອື່ນໆ ຂອງລົດທີ່ເປັນພລາສຕິກລະລາຍ ແລະ ເສຍຫາຍໄດ້.

ຕາມ​ຂ່າວ​ຈາກ VOVWORLD,ຕາມການສະຖິຕິ ຫລ້າສຸດ ຂອງອົງການ ​ອະນາ​ໄມ​ໂລກ (WHO) ແລ້ວ, ນັບແຕ່ ຕົ້ນປີມານີ້, ບັນດາ ປະເທດ ອາຟຣິກາກາງ ຢັ້ງຢືນ ມີຜູ້ຕິດເຊື້ອ ຕື່ມອີກ 3.200 ຄົນ​ ແລະ ຜູ້ຖືກສົງໄສວ່າ ຕິດເຊືື້ອເກືອບ 1.500 ຄົນ ​ໃນນັ້ນ ມີປະມານ 70 ຄົນ ເສຍຊີວິດ ຍ້ອນພະຍາດ ດັ່ງກ່າວ. ໃນກອງປະຊຸມ ຄະນະກຳມະການ ສຸກເສີນ (IHR) ຂອງອົງການ ອະນາໄມໂລກ (WHO) ​ຈັດ​ຂຶ້ນ​ ເມື່ອ​ບໍ່​ດົນ​ມາ​ນີ້​ ​ແບບ​ທາງ​ໄກ ຈາກ​ນັ້ນ ທ່ານ Tedros Adhanom Ghebreyesus ຜູ້ອຳນວຍການໃຫຍ່ ອົງການ WHO ໄດ້ເນັ້ນໜັກວ່າ: ທຸກປະເທດ ໃນໂລກ ຕ້ອງເພີ່ມທະວີ ກຳລັງ ຄວາມສາມາດ ເພື່ອແນໃສ່ ສະກັດກັ້ນການ ແຜ່ລະບາດ ຂອງພະຍາດ ໝາກສຸກລີງ, ຍູ້ແຮງ ການຕິດຕາມ ກວດກາ, ຄົ້ນຫາ ທາມລາຍ ແລະ ການແຍກປ່ຽວ ສຳລັບ ຜູ້ຕິດເຊື້ອ ພະຍາດ ດັ່ງກ່າວ./. (ພາກ​ຂ່າວ: ຕ່າງປະ​ເທດ)

ແຫຼ່ງຂ່າວ: ສຳນັກຂ່າວສານປະເທດລາວ

ໃນຕອນເຊົ້າຂອງວັນທີ 26 ມິຖຸນາ 2022 ນີ້ ຢູ່ເຂດເສດຖະກິດພິເສດ ສາມຫລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຈັດງານແຂ່ງຂັນກິລາແລ່ນມາຣາທອນ ສາມຫລ່ຽມຄຳ ຄັ້ງທີ 2 ເນື່ອງໃນໂອກາດ “ວັນສາກົນຕ້ານຢາເສບຕິດ” ຄົບຮອບ 35 ປີ (26/06/1987-26/06/2022) ແລະ ການສະ ເຫລີມສະຫລອງວັນສ້າງຕັ້ງສາມຫລ່ຽມຄຳ ຄົບຮອບ 15 ປີ ໂດຍໄດ້ຮັບການອຸປະຖຳຈາກ ກຸ່ມບໍລິສັດ ດອກງິ້ວຄຳ ຈຳກັດ. ໃຫ້ກຽດເຂົ້າຮ່ວມຂອງທ່ານ ເຄື່ອນເພັດ ວົງສາ ຮອງເຈົ້າແຂວງບໍ່ແກ້ວ, ຜູ້ຊີ້ນຳເຂດເສດຖະກິດພິເສດ ສາມຫລ່ຽມຄຳ, ພ້ອມດ້ວຍນັກກິລາຈາກ 7 ປະເທດເຂົ້າຮ່ວມ ຄື: ລາວ, ຈີນ, ໄທ, ມຽນມາ, ຟິລິບປິນ, ໂຮນລັງ ແລະ ອາເມລິກາ ຫລາຍກວ່າ 500 ຄົນ ໂດຍມີການຊີງເງິນລາງວັນຫລາຍກວ່າ 400 ລ້ານກີບ.

ທ່ານ ບຸນທອງ ແສງສີກອງ ໄດ້ກ່າວວ່າ: ງານຄັ້ງນີ້ ເພື່ອເປັນການສະເຫລີມສະຫລອງ ວັນສາ ກົນຕ້ານຢາເສບຕິດ 26 ມິຖຸນາ, ພ້ອມທັງສະເຫລີມສະຫລອງ ການສ້າງຕັ້ງເຂດເສດຖະກິດພິເສດ ສາມ ຫລ່ຽມຄຳ ຄົບຮອບ 15 ປີ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນ ຫາຢາເສບຕິດ, ແນໃສ່ເຮັດໃຫ້ທົ່ວສັງຄົມທຸກຊັ້ນຄົນໄດ້ຮັບຮູ້ເຂົ້າໃຈເຖິງໄພອັນຕະລາຍ, ຜົນຮ້າຍ ແລະ ຜົນກະທົບຂອງຢາເສບຕິດທີ່ມີຕໍ່ມວນມະນຸດ, ທັງເປັນສິ່ງທີ່ຕ້ອງຫ້າມ ແລະ ຜິດຕໍ່ກົດໝາຍຂອງລັດ ແລະ ກົດໝາຍສາກົນ; ມ່ວນຊົນທຸກຄົນມີໜ້າທີ່ຮ່ວມກັນຕ້ານ ກໍຄືລົບລ້າງຢາເສບຕິດໃຫ້ອອກໄປຈາກສັງຄົມ ແລະ ປະເທດຊາດ. ສຳລັບການສ້າງຕັ້ງເຂດເສດຖະກິດພິເສດ ສາມຫລ່ຽມຄຳ ກໍໄດ້ດຳເນີນມາຮອດ 15 ປີ ເຊິ່ງຕະຫລອດໄລຍະທີ່ຜ່ານມາ, ພາຍໃຕ້ນະໂຍບາຍສົ່ງເສີມການດຶງດູດນັກລົງທຶນຂອງພັກ ແລະ ລັດ ຖະບານ ໂດຍສະເພາະແມ່ນອົງການປົກຄອງທ້ອງຖິ່ນ ແລະ ປະຊາຊົນໃນເຂດທ້ອງຖິ່ນບວກກັບຄວາມມຸ່ງຫວັງອັນແຮງກ້າ ຂອງຜູ້ພັດທະນາ ແລະ ຜູ້ລົງທຶນ ຈຶ່ງໄດ້ພ້ອມກັນສ້າງສາພັດທະນາເສດຖະ ກິດພິເສດ ສາມຫລ່ຽມຄຳ ຢ່າງມີຜົນສຳເລັດ. ການຈັດງານແຂ່ງຂັນກິລາໃນຄັ້ງນີ້ ຍັງເປັນການສະແດງເຖິງນະໂຍ ບາຍຊຸກຍູ້ສົ່ງເສີມ ແລະ ໃຫ້ການສະໜັບສະໜູນຕໍ່ວຽກງານກິລາຂອງລາວ ໂດຍສະເພາະແມ່ນຂົງ ເຂດກິ ລາແລ່ນ-ລານ ໃຫ້ໄດ້ມີການພັດທະນາທັງດ້ານຄຸນນະພາບ ແລະ ປະລິມານ, ຊ່ວຍຍົກສູງຊື່ສຽງຂອງນັກກິລາລາວໃຫ້ກ້າວສູ່ພາກພື້ນ ແລະ ສາກົນ, ພ້ອມທັງປຸກລະດົມມ່ວນຊົນທົ່ວໄປ ໃຫ້ເຫັນຄວາມສຳຄັນຂອງກິລາ-ກາຍຍະກຳ ແລະ ການຮັກສາສຸຂະພາບ.

ສຳລັບຜົນການແຂ່ງຂັນ ກິລາແລ່ນມາຣາທອນ ຄັ້ງນີ້ ປະເພດທົ່ວໄປມີໄລຍະທາງ 21 ກິໂລແມັດ, ຍິງອັນດັບທີ 1 ໄດ້ແກ່ນາງ ລົດແກ້ວ ອິນທະກຸມມານ ນັກແລ່ນທີມຊາດລາວ ໄດ້ຮັບເງິນສົດ 106 ລ້ານກີບ, ຂັນ ພ້ອມຫລຽນລາງວັນ, ທີ 2 ໄດ້ແກ່ນາງ ນັດທະຍາ ທະນະລົນນະວັດ ຈາກປະເທດໄທ ໄດ້ຮັບເງິນສົດ 64 ລ້ານກີບ ພ້ອມຫລຽນລາງວັນ, ອັບດັບທີ 3 ໄດ້ແກ່ນາງ ກັນຍາລັກ ເສລີວຸດທິໄຊ ຈາກປະເທດໄທຮັບເງິນລາງວັນ 42 ລ້ານກີບ, ພ້ອມຫລຽນ ແລະ ອັນດັບທີ 4 ນັກກິລາຈາກປະເທດໄທ ໄດ້ຮັບເງິນລາງວັນ 21 ລ້ານກີບພ້ອມຫລຽນ.

ໄລຍະ 21 ກິໂລແມັດ ທີມຊາຍອັນດັບທີ 1 ໄດ້ແກ່ທ້າວ ສັນໄຊ ຈາກປະເທດໄທໄດ້ຮັບເງິນ ສົດ 106 ລ້ານກີບ, ພ້ອມຫລຽນລາງວັນ, ທີ 2 ທ້າວ ຊະນະພົນ ຈາກປະເທດໄທໄດ້ຮັບເງິນສົດ 64 ລ້ານກີບ, ພ້ອມຫລຽນລາງວັນ, ທີ 3 ທ້າວ ເອກະລັກ ຈາກປະເທດໄທໄດ້ຮັບເງິນ 42 ລ້ານກີບ, ພ້ອມຫລຽນລາງວັນ ແລະ ອັນດັບທີ 4 ໄດ້ແກທ້າວ ພານຸກອນ ຈາກປະເທດໄທໄດ້ຮັບເງິນສົດ 21 ລ້ານກີບ, ພ້ອມຫລຽນລາງວັນ. ຂະນະທີ່ ປະເພດເຍົາວະຊົນຍິງ ຮຸ່ນອາຍຸບໍ່ເກີນ 15 ປີ ໄລຍະ 8 ກິໂລແມັດ ອັນດັບທີ 1 ແມ່ນ ນາງ ບຸດສະກອນ ປຣະວັງ ຈາກປະເທດໄທໄດ້ຮັບເງິນສົດ 5 ລ້ານກັບ, ຂັນ ພ້ອມຫລຽນ, ທີ 2 ນາງ ປໍຄົວ ລີ ຈາກແຂວງບໍ່ແກ້ວ ໄດ້ຮັບເງິນສົດ 3 ລ້ານກີບ ພ້ອມຫລຽນ ແລະ ທີ 3 ແມ່ນນາງ ນາລໍ ອີກໜຶ່ງນັກກິລາຈາກແຂວງບໍ່ແກ້ວ ໄດ້ຮັບຫລຽນ ແລະ ເງິນສົດ 2 ລ້ານກີບ. ຊະນະເລີດ ປະເພດເຍົາວະຊົນຊາຍ ຮຸ່ນອາຍຸບໍ່ເກີນ 15 ປີ ໄລຍະ 8 ກິໂລແມັດ ອັນດັບທີ 1 ແມ່ນທ້າວ ອານຸສິດ ຈາກປະເທດໄທ ໄດ້ຮັບຂັນ ພ້ອມຫລຽນ ແລະ ເງິນ 5 ລ້ານກີບ, ຮອງຊະນະເລີດ ທ້າວ ສຸລິຍາ ສຸນັນທະວົງ ຈາກແຂວງຫລວງນໍ້າທາ ໄດ້ຮັບຫລຽນ ແລະ ເງິນສົດ 3 ລ້ານກີບ, ທີ 3 ທ້າວ ເດັ່ນພົງ ປະເທດໄທ ໄດ້ຮັບຫລຽນ ພ້ອມເງິນສົດ 2 ລ້ານກີບ. ສ່ວນປະເພດອາວຸໂສຍິງ ໄລຍະ 8 ກິໂລແມັດ ອັນດັບທີ 1 ແມ່ນນາງ ສົມຄິດ ແກ້ວບຸນມາ ຈາກແຂວງວຽງຈັນ ໄດ້ຮັບຂັນພ້ອມຫລຽນ ແລະ ເງິນສົດ 5 ລ້ານກີບ, ທີ 2 ນາງວັນ ເພັງ ສຸດທິຈັກ ຈາກສະຫະພັນແລ່ນ-ລານແຫ່ງຊາດ ໄດ້ຮັບຫລຽນ ແລະ ເງິນສົດ 3 ລ້ານກີບ ແລະ ທີ 3 ນາງ ວາລິນ ນຳພາ ຈາກປະເທດໄທ ໄດ້ຮັບຫລຽນ ກັບເງິນ 2 ລ້ານກີບ. ຊະນະະເລີດປະເພດອາວຸໂສຊາຍ ໄລຍະ 8 ກິໂລແມັດ ໄດ້ແກ່ທ່ານ ຄອງລາດ ຊົມພູລາດ ຈາກປະເທດໄທ ໄດ້ຮັບຂັນ ພ້ອມຫລຽນ ແລະ ເງິນສົດ 5 ລ້ານກີບ, ທີ 2 ໄດ້ແກ່ທ່ານ ຄຳເພັດ ຈັນທະສົມ ບັດ ຈາກນະຄອນຫລວງວຽງຈັນ ໄດ້ຮັບຫລຽນ ແລະ ເງິນສົດ 3 ລ້ານກີບ ແລະ ທີ 3 ທ່ານ ພູເງິນ ພົມມະຫາ ຈາກກະຊວງໂຍທາທິການ ແລະ ຂົນສົ່ງ ໄດ້ຮັບຫລຽນ ກັບເງິນສົດ 2 ລ້ານກີບ.

ໃຫ້ກຽດຂື້ນມອບລາງວັນໂດຍ ທ່ານ ເຄື່ອນເພັດ ວົງຈັນ ຮອງເຈົ້າແຂວງໆບໍ່ແກ້ວ, ພ້ອມດ້ວຍ ຫົວໜ້າຄະນະຄຸ້ມຄອງເຂດເສດຖະກິດພິເສດ ສາມຫລ່ຽມຄຳ, ຜູ້ໃຫ້ການສະໜັບສະໜູນ ແລະ ຄະນະກຳມະການຈັດການແຂ່ງຂັນ.

ຂ່າວ-ພາາບ: ສຸກສະຫວັດ

ໃນວັນທີ 24 ມິຖຸນາ 2022, ທ່ານ ດຣ. ປຣາຕີໂຕ ຊູຮາຣິໂຢ, ເອກອັກຄະລັດ ຖະທູດວິສາມັນຜູ້ມີອຳນາດເຕັມ ແຫ່ງ ສາ ທາລະນະລັດ ອິນໂດເນເຊຍ ປະຈຳ ສປປ ລາວ, ໄດ້ໃຫ້ກຽດເປັນເຈົ້າພາບຈັດງານລ້ຽງ ເນື່ອງໃນໂອກາດວັນສ້າງຕັ້ງສາຍພົວພັນການທູດ ລະຫວ່າງ ສາທາລະ ນະລັດ ອິນໂດເນເຊຍ ແລະ ສປປ ລາວ ຄົບຮອບ 65 ປີ ທີ່ ໂຮງແຮມ ລາວ ພລາຊາ, ນະຄອນຫຼວງວຽງຈັນ. ໂດຍ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດເປັນແຂກກິດຕິມະສັກ ແລະ ມີບັນດາລັດຖະມົນຕີກະຊວງຕ່າງໆຈຳນວນໜຶ່ງເຂົ້າຮ່ວມ.

ໃນໂອກາດດັ່ງກ່າວ, ທ່ານເອກອັກຄະລັດຖະທູດ ໄດ້ກ່າວປາໄສ ໂດຍສະແດງໃຫ້ເຫັນເຖິງສາຍພົວພັນອັນດີງາມ ລະຫວ່າງສອງປະເທດ ອິນໂດເນເຊຍ ແລະ ສປປ ລາວ ໃນຕະຫຼອດໄລຍະ 65 ປີຜ່ານມາ ພ້ອມທັງໄດ້ສະແດງຄວາມຊົມເຊີຍຕໍ່ ລັດຖະບານ ສປປ ລາວ ທີ່ໄດ້ທະນຸທະໜອມສາຍພົວພັນທີ່ດີງາມຂອງສອງປະເທດພວກເຮົາ. ທ່ານເອກອັກຄະລັດຖະທູດ ໄດ້ຍໍ້າວ່າ ການສະເຫຼີມສະຫຼອງຂອງ ປະຊາຊົນອິນໂດເນເຊຍ ແລະ ລັດຖະບານລາວ ແລະ ປະຊາຊົນລາວ ເຊິ່ງເປັນຄວາມພາກພູມໃຈຕໍ່ຄວາມມານະພະຍາຍາມ, ໝາກຜົນ, ມິດຕະພາບທີ່ເປັນມູນເຊື້ອອັນຍາວນານ ແລະ ນ້ຳໃຈອ້າຍນ້ອງທີ່ມີມາແຕ່ດົນນານໃນຫຼາຍປີຜ່ານມາ ແລະ ໃນຊຸມປີຕໍ່ໜ້າ. ເຖິງແມ່ນວ່າໂລກລະບາດໂຄວິດ – 19 ໄດ້ສົ່ງຜົນກະທົບໃນຫຼາຍດ້ານຕໍ່ ຄວາມພະຍາຍາມໃນການເພີ່ມທະວີການພົວພັນຮ່ວມມື ແຕ່ສອງປະເທດກໍ່ສະໜັບ ສະໜູນເຊິ່ງກັນ ແລະ ກັນໃນເວທີສາກົນ ໂດຍສະເພາະແມ່ນໃນຂອບອາຊຽນ. ນອກນີ້, ສອງປະເທດຍັງຢູ່ໃນຂັ້ນຕອນການຄົ້ນຄວ້າ ແລະ ຊຸກຍູ້ການພົວພັນດ້ານການຄ້າ ແລະ ການລົງທຶນ ລະຫວ່າງສອງປະເທດ ແລະ ການໄປມາຫາສູ່ກັນລະຫວ່າງລັດຖະບານ ແລະ ປະຊາຊົນ ຂອງສອງປະເທດ ນັບມື້ໃຫ້ຫລາຍຂຶ້ນ ເພື່ອເພີ່ມທະວີການຮ່ວມມືໃນຂອບສອງຝ່າຍ ແລະ ຫຼາຍຝ່າຍ ໃນລະດັບພາກພື້ນ.

ການທີ່ ສປປ ລາວ ໄດ້ຮັບຜົນສໍາເລັດໃນການ ຫັນເອົາປະເທດເປັນສູນກາງການເຊື່ອມໂຍງກັບພາກພື້ນ, ທ່ານ ເອກອັກຄະລັດຖະທູດ ເຊື່ອໝັ້ນວ່າ ຈະມີໂອກາດລົງທຶນໃນຂະແໜງການຕ່າງໆໃນ ສປປ ລາວ ແລະ ມີທ່າແຮງການຮ່ວມມືຫຼາຍດ້ານໃນຂົງເຂດການສຶກສາ ແລະ ວັດທະນະທຳ-ສັງຄົມ ເພື່ອໃຫ້ບັນລຸເປົ້າໝາຍຂອງສອງປະເທດ.

ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຍັງໄດ້ເໜັ້ນໜັກເຖິງການພົວພັນຮ່ວມມືສອງຝ່າຍຢ່າງແໜ້ນແຟ້ນ ກໍຄື ການເພີ່ມທະວີການຮ່ວມມືທາງດ້ານເສດຖະກິດ ແລະ ການສຶກສາ, ການສົ່ງເສີມການໄປມາຫາສູ່ກັນຂອງປະຊາຊົນ ເປັນສ່ວນສໍາຄັນ ແລະ ມີບົດບາດໃນການເພີ່ມທະວີສາຍພົວພັນ ລະຫວ່າງ ສປປ ລາວ ແລະ ອິນໂດເນເຊຍ. ໂອກາດນີ້, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຂອບໃຈຢ່າງຈິງໃຈ ມາຍັງ ລັດຖະບານອິນໂດເນເຊຍ ທີ່ໄດ້ມອບຄ້ອງສັນຕິພາບໃຫ້ແກ່ ສປປ ລາວ, ເຊິ່ງເປັນຄ້ອງທຳອິດຂອງລັດຖະບານອິນໂດເນເຊຍ ມອບໃຫ້ບັນດາປະເທດອາຊີຕາເວັນອອກສ່ຽງໃຕ້ ແລະ ໄດ້ຕັ້ງໄວ້ຢູ່ຕໍ່ໜ້າອານຸສາວະລີ ປະຕູໄຊ ພ້ອມທັງ ສະແດງຄວາມຂອບອົກຂອບໃຈຢ່າງຈິງໃຈ ມາຍັງ ລັດຖະບານ ແລະ ປະຊາຊົນອິນໂດເນເຊຍ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອແກ່ ສປປ ລາວ.

ພ້ອມດຽວກັນນີ້, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ທ່ານເອກອັກຄະລັດຖະທູດ ໄດ້ອວຍພອນໄຊແດ່ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ແລະ ພະນະທ່ານ ໂຈໂກ ວິໂດໂດ, ປະທານາທິບໍດີ ແຫ່ງ ສ. ອິນໂດເນເຊຍ ແລະ ປະຊາຊົນລະຫວ່າງສອງປະເທດ ຈົ່ງມີພາລະນາໄມແຂງແຮງ, ປະສົບຜົນສຳເລັດ ກໍຄື ການພັດທະນາສາຍພົວພັນລະຫວ່າງສອງປະເທດໃນຕໍ່ໜ້າ.

ພິທີສະເຫຼີມສະຫຼອງ 65 ປີ ແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ສ. ອິນໂດເນເຊຍ ໄດ້ມີບັນດາແຂກເຂົ້າຮ່ວມ 200 ທ່ານ ລວມມີ ບັນດາລັດຖະມົນຕີກະຊວງຕ່າງໆຂອງລາວ, ເຈົ້າໜ້າທີ່ຂັ້ນສູງຈາກບັນດາອົງການຈັດຕັ້ງສາກົນ ແລະ ບັນດາເອກອັກຄະລັດຖະທູດ ທີ່ປະຈຳຢູ່ ສປປ ລາວ ແລະ ຜູ້ຕາງໜ້າຈາກພາກເອກະຊົນ ແລະ ສື່ມວນຊົນ ກໍ່ໄດ້ເຂົ້າຮ່ວມ.

ຂ່າວ-ພາບ: ກົມການຂ່າວ ກະຊວງການຕ່າງປະເທດ

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 9 ໃນວັນທີ 27 ມິຖຸນາ 2022, ທີ່ຫໍສະພາແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານພົນໂທ ສຸວອນ ເລື່ອງບຸນມີ, ຮອງປະທານສະພາແຫ່ງຊາດ ສະມາຊິກສະພາແຫ່ງຊາດໄດ້ຄົ້ນຄວ້າ, ພິຈາລະນາ ແລະປະກອບຄໍາເຫັນໃສ່ຮ່າງກົດໝາຍວ່າດ້ວຍການຄຸ້ມຄອງອາວຸດ ແລະວັດຖຸລະເບີດ ຊື່ງເປັນກົດໝາຍສ້າງໃໝ່ ສະເໜີໂດຍ ພົນເອກ ວິໄລ ຫລ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ທ່ານໄດ້ຍົກໃຫ້ເຫັນເຫດຜົນ ແລະ ຄວາມຈໍາເປັນໃນການສ້າງຮ່າງກົດໝາຍສະບັບນີ້.

ໂດຍສະເພາະສະພາບການໃນປັດຈຸບັນສະພາບທາງດ້ານເສດຖະກິດ-ສັງຄົມມີການຂະຫຍາຍຕົວ, ເຊື່ອມໂຍງ, ເຊື່ອມຈອດກັບບັນດາປະເທດໃນພາກພື້ນ ແລະສາກົນ ເຮັດໃຫ້ມີບຸກຄົນ ແລະ ກຸ່ມຄົນທີ່ບໍ່ດີເຄື່ອນໄຫວຊື້ຂາຍອາວຸດ ແລະ ວັດຖຸລະເບີດແບບບໍ່ຖືກຕ້ອງຕາມລະບຽບ, ກົດໝາຍມີລັກສະນະເພີ່ມຂື້ນ, ເປີດແປນ ຊື່ງກາຍ ເປັນໜື່ງໃນປະກົດການຫຍໍ້ທໍ້ໃນສັງຄົມ ເຮັດໃຫ້ກຸ່ມຄົນບໍ່ດີຄອບຄອງ, ນໍາໃຊ້ອາວຸດ ແລະ ວັດຖຸລະເບີດເຄື່ອນໄຫວກໍ່ອາຊະຍາກຳດ້ານຕ່າງໆ ເປັນຕົ້ນການປຸ້ນຈີ້, ຊິງຊັບ, ນາບຂູ່ປະຊາຊົນ ເຊິ່ງສົ່ງຜົນກະ ທົບຕໍ່ຄວາມໝັ້ນຄົງຂອງຊາດ, ຕໍ່ການພັດທະນາເສດຖະກິດ-ສັງຄົມ ເຮັດໃຫ້ສັງຄົມບໍ່ມີຄວາມສະຫງົບ, ແຕະຕ້ອງເຖິງຊີວິດ, ສຸຂະພາບ ແລະ ຊັບສິນຂອງລັດ, ຂອງລວມໝູ່, ບຸກຄົນ ແລະ ອື່ນໆ, ຮ່າງກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ ປະກອບມີ 9 ພາກ, 9 ໝວດ ແລະ 67 ມາດຕາ.

ຄາດວ່າເມື່ອກົດໝາຍສະບັບນີ້ຖືກຮັບຮອງ ແລະປະກາດໃຊ້ແລ້ວ ຈະເປັນພື້ນຖານອັນສໍາຄັນທາງດ້ານກົດໝາຍໃນການຮັບປະກັນສະຖຽນລະພາບຄວາມໝັ້ນຄົງ, ຄວາມສະຫງົບດ້ານການເມືອງ, ຄວາມເປັນລະບຽບຮຽບຮ້ອຍໃນສັງຄົມ ທັງເປັນບ່ອນອີງໃຫ້ແກ່ເຈົ້າໜ້າທີ່ຂອງກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ພະນັກງານຂະແໜງການກ່ຽວຂ້ອງ ເຄື່ອນໄຫວປະຕິບັດໜ້າທີ່ວຽກງານການຄຸ້ມຄອງອາວຸດ ແລະວັດຖຸລະເບີດ ທັງຮັບປະກັນໃຫ້ແກ່ການຄຸ້ມຄອງອາວຸດ ແລະ ວັດຖຸລະເບີດໃນສັງຄົມຕາມທິດປົກຄອງດ້ວຍກົດໝາຍ ສາມາດແກ້ໄຂບັນຫາປະກົດການຫຍໍ້ທໍ້ໃນສັງຄົມທີ່ກ່ຽວກັບບັນຫາດັ່ງກ່າວຢ່າງຂາດຕົວ ແນໃສ່ເຮັດໃຫ້ບັນຫາການລັກລອບຊື້-ຂາຍ, ການມີໄວ້ໃນຄອບຄອງ ແລະ ການນໍາໃຊ້ອາວຸດເຖື່ອນໃນສັງຄົມຫລຸດລົງ ຍ້ອນມີມາດຕະການຈັດຕັ້ງປະຕິບັດຢ່າງເຂັ້ມງວດ.

ຂ່າວ : ຈັນທະສອນ ສີຫານາດ

ພາບ : ອະພິນຍາ ສຸລິຍະວົງ

ຊຸດຝຶກອົບຮົມວຽກງານການຂຽນແຜນພັດທະນາການທ່ອງທ່ຽວໃຫ້ແກ່ ພະແນກ ຖວທ ທົ່ວປະເທດ ໄດ້ຈັດຂື້ນໃນລະຫວ່າງວັນທີ 27-30/06/2022 ທີ່ ເມືອງວັງວຽງ, ແຂວງວຽງຈັນ ໂດຍການເຂົ້າຮ່ວມປະທານພິທີເປີດ ໂດຍ ທ່ານ ອຸ່ນທວງ ຂາວພັນ, ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຊຶ່ງມີຜູ້ເຂົ້າຮ່ວມຈາກພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວທົ່ວປະເທດ ຈໍານວນ 46 ທ່ານ.

ຊຸດຝຶກອົບຮົມຄັ້ງນີ້ ໄດ້ໄຂຂຶ້ນໃນທ່າມກາງທີ່ລັດຖະບານພວມສຸມໃສ່ການຈັດຕັ້ງປະຕິບັດ 2​ ວາລະແຫ່ງຊາດ ໂດຍສະເພາະແມ່ນການຟື້ນຟູ​ຂະແໜງການທ່ອງທ່ຽວທີ່ໄດ້ຮັບຜົນກະທົບຈາກການແຜ່​ລະ​ບາດ​ຂອງ​ເຊື້ອ​ພະ​ຍາດໂຄວິດ-19 ຊຶ່ງອຸດສະຫະກໍາການທ່ອງທ່ຽວແມ່ນຂະແໜງການທີ່ໄດ້ຮັບຜົນຫຼາຍທີ່ສຸດ ທັງກະທົບທາງກົງ ແລະ ທາງອ້ອມ. ຈາກການ ຕິດຕາມສະຖານະການ ແລະ ຂໍ້ມູນຂ່າວສານການແຜ່ລະບາດຂອງພະຍາດໂຄວິດ-19 ຢ່າງໃກ້ສິດມາໄລຍະໜຶ່ງນີ້ ແມ່ນເຫັນໄດ້ວ່າສະພາບການຢູ່ພາກພື້ນ ແລະ ສາກົນ ເລີ່ມມີທ່າອ່ຽງທີ່ດີຂື້ນ ພາຍຫລັງທີ່ຫລາຍປະເທດ ໄດ້ມີການ ປຶກສາຫາລື ຫາທາງອອກດ້ວຍຫລາຍວິທີ ແລະ ຫລາຍຮູບການ ເພື່ອຢັບຢັ້ງການແຜ່ລະບາດຂອງພະຍາດດັ່ງກ່າວ ເປັນຕົ້ນແມ່ນ: ຄໍາແນະນໍາຈາກອົງການອານະໄມໂລກໃນການປັບປ່ຽນແບບແຜນການດໍາລົງຊີວິດ ພາຍໃຕ້ເງື່ອນໄຂ ໃຫມ່ ຫຼື New Normal, ຄຽງຄູ່ໄປກັບການຊັກຢາວັກແຊ່ງເພື່ອສ້າງພູມຄຸ້ມກັນໝູ່, ການຜະລິດຢາປິ່ນປົວທີ່ມີປະສິດທິ ພາບ ແລະ ການຮຽນຮູ້ວິທີການໃຫ້ຢູ່ກັບພະຍາດດັ່ງກ່າວຢ່າງລະມັດລະວັງ. ພ້ອມດຽວກັນນີ້, ອົງການທ່ອງທ່ຽວໂລກ ຍັງໄດ້ແນະນໍາ່ໃຫ້ບັນດາປະເທດສະມາຊິກ ທົບທວນຄືນແຜນຍຸດທະສາດພັດທະນາການທ່ອງທ່ຽວ ແລະ ແຜນຍຸດທະສາດການຕະຫຼາດການທ່ອງທ່ຽວຄືນໃຫມ່ ໂດຍກໍານົດຄໍາຂວັນຂອງວັນທ່ອງທ່ຽວໂລກໃນປີ 2022 ນີ້ວ່າ “Rethinking Tourism”. ເນື່ອງຈາກວ່າບັນດາແຜນຍຸດທະສາດພັດທະນາການທ່ອງທ່ຽວ ແລະ ແຜນຍຸດທະສາດການຕະຫຼາດການທ່ອງທ່ຽວ ອາດຈະບໍ່ເໝາະກັບສະພາບການພາຍຫຼັງການແຜ່ລະບາດຂອງພະຍາດໂຄວິດ-19.

ເພື່ອຜັນຂະຫຍາຍແນວທາງການຟື້ນຟູການທ່ອງທ່ຽວຂອງ ສປປລາວ ກໍຄືການປະກອບສ່ວນເຂົ້າໃນການຟື້ນຟູເສດຖະ ກິດຂອງປະເທດເຮົາ, ລັດຖະບານ ໄດ້ປະກາດເປີດການທ່ອງທ່ຽວແບບເຕັມຮູບແບບ ເລີ່ມແຕ່ວັນທີ 9 ພືດສະພາ ເປັນຕົ້ນມາ. ມາຮອດປັດຈຸບັນ ເຫັນວ່າຈໍານວນຕົວເລກນັກທ່ອງທ່ຽວພາຍໃນ ໃນໄລຍະ 4 ເດືອນຕົ້ນປີ 2022 ນີ້ ແມ່ນມີຈໍານວນ 463,907 ເທື່ອຄົນ, ສາມາດສ້າງລາຍຮັບໄດ້ 52 ລ້ານໂດລາສາຫະລັດ ໄລຍະການພັກເຊົາ ແມ່ນປະ ມານ  2,5 ວັນ ຊຶ່ງເປັນໄດ້ວ່າການທ່ອງທ່ຽວພາຍໃນລາວທ່ຽວລາວ ແມ່ນມີຂະບວນການຟົດຟື້ນພໍສົມຄວນ.

ເພື່ອແນ່ໃສ່ການກະກຽມຄວາມພ້ອມໃນການວາງແຜນພັດທະນາການທ່ອງທ່ຽວໃນຕໍ່ໜ້າ, ກະຊວງ ຖວທ ຈຶ່ງເຫັນໄດ້ຄວາມສໍາຄັນຂອງການຍົກລະດັບຂີດຄວາມສາມາດທາງດ້ານວິຊາການໃຫ້ແກ່ພະນັກງານຫຼັກແຫຼ່ງຈາກພະແນກ ຖວທ ບັນດາແຂວງ ໄດ້ນໍາໄປຈັດຕັ້ງປະຕິບັດ ແລະ ຜັນຂະຫຍາຍໃນວຽກງານຕົວຈິງຢູ່ບັນດາແຂວງໃນຂອບເຂດທົ່ວປະເທດໃຫ້ປະກົດຜົນເປັນຈິງ ແລະ ສາມາດບັນລຸໄດ້ຕາມແຜນພັດທະນາການທ່ອງທ່ຽວ ສໍາລັບປີ 2021-2025 ກໍຄືວິໄສທັດຮອດປີ 2030 ຂອງຂະແໜງ ຖວທ. ໃນພາກວິຊາການຂອງຊຸດຝຶກອົບຮົມຄັ້ງນີ້ ຊຶ່ງນຳພາໂດຍ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ ໄດ້ນຳພານັກສໍາມະນາກອນທົ່ວປະເທດໃນການແລກປ່ຽນບົດຮຽນກ່ຽວກັບການວາງແຜນພັດທະນາຮ່ວມກັນກັບບັນດາທ່ານນັກວິທະຍາກອນຈາກສູນກາງ   ແລະ ປຶກສາຫາລືໃນການປັບປຸງແຜນພັດທະນາການທ່ອງທ່ຽວລະດັບພາກ ຄື:   ພາກເໜືອ, ພາກກາງ ແລະ ພາກໃຕ້ ສຳລັບປີ 2023-2030. ພ້ອມກັນນັ້ນ, ນັກສໍາມະນາກອນ ຍັງຈະໄດ້ຮັບຮູ້ທັງພາກທິດສະດີ ແລະ ການລົງເກັບກໍາຂໍ້ມູນຢູ່ພື້ນທີ່ຕົວຈິງ ທີ່ ສະຖານທີ່ທ່ອງທ່ຽວ ເພື່ອມາເປັນຕົວຢ່າງໃນການສ້າງແຜນພັດທະນາການທ່ອງທ່ຽວ.