ກອງປະຊຸມທາບທາມ ເພື່ອສ້າງແຜນກໍານົດພະນັກງານນຳພາ – ຄຸ້ມຄອງ ຂັ້ນສູນກາງຄຸ້ມ ຄອງ ຂອງກະຊວງການຕ່າງປະເທດ ໄດ້ເປີດຂຶ້ນໃນວັນທີ 28 ມິຖຸນາ ນີ້ ທີ່ກະຊວງການຕ່າງປະເທດ ໂດຍການເປັນປະທານຮ່ວມ ຂອງ ທ່ານ ສະເຫຼີມໄຊ ກົມມະສິດ ກໍາມະການກົມການເມືອງສູນກາງ ພັກ ເລຂາຄະນະບໍລິຫານງານພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະ ເທດ ແລະ ທ່ານ ນາງ ບຸດສະດີ ທະນະເມືອງ ກໍາມະການສູນກາງພັກ ຮອງຫົວໜ້າຄະນະຈັດຕັ້ງ ສູນກາງພັກ, ໂດຍມີຄະນະພັກກະຊວງ, ຮອງລັດຖະມົນຕີ, ຄະນະໜ່ວຍພັກ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ກ່າວເປີດກອງປະຊຸມ ແລະ ໄດ້ ເນັ້ນໜັກເຖິງຄວາມໝາຍ, ຄວາມສໍາຄັນ ແລະ ຈຸດປະສົງຂອງວຽກງານສ້າງແຜນກຳນົດພະນັກງານ ນຳພາ-ຄຸ້ມຄອງ ຊຶ່ງເປັນວຽກງານໜຶ່ງທີ່ສໍາຄັນ ເປັນພື້ນຖານຂອງວຽກງານພະນັກງານ ເພື່ອຕອບ ສະໜອງໜ້າທີ່ການເມືອງ ຂອງພັກ-ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະ ສາດກ່ຽວກັບວຽກງານພະນັກງານໃຫ້ເປັນອັນລະອຽດ ເພື່ອສ້າງພື້ນຖານໃຫ້ແກ່ການສ້າງແຜນກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງ ພະນັກງານຢ່າງສົມເຫດສົມຜົນ. ນອກນັ້ນ, ການສ້າງ ແຜນກໍານົດພະນັກງານ ແມ່ນການຄາດຄະເນເປົ້າໝາຍພະນັກງານ ທີ່ຈະຈັດວາງເຂົ້າໃນຕຳແໜ່ງ ນຳພາ-ຄຸ້ມຄອງ ແຕ່ລະຂັ້ນ, ແນໃສ່ຮັບປະກັນລັກສະນະສືບທອດ ປ່ຽນແທນ ຕໍ່ເນື່ອງໃນສະເພາະໜ້າ ແລະ ຍາວນານ.

ພ້ອມດຽວກັນນີ້, ທ່ານຮອງນາຍົກລັດຖະມົນຕີ ໄດ້ແນະນໍາໃຫ້ຜູ້ເຂົ້າຮ່ວມຕ້ອງໄດ້ຄົ້ນຄວ້າຢ່າງ ເລິກເຊິ່ງຕໍ່ກັບເປົ້າໝາຍເລືອກເຟັ້ນທີ່ຈະກຳນົດເຂົ້າໃສ່ແຕ່ລະຕຳແໜ່ງ, ຕ້ອງຄັດເລືອກໃຫ້ໄດ້ບຸກຄົນທີ່ ພົ້ນເດັ່ນ ທີ່ພຽບພ້ອມໄປດ້ວຍຄວາມຮູ້, ຄວາມສາມາດ, ຄຸນສົມບັດ ສິນທຳປະຕິວັດ, ຮູ້ຜັນຂະຫຍາຍ ແນວທາງນະໂຍບາຍ ແລະ ນິຕິກຳຕ່າງໆຂອງພັກ-ລັດ ເຂົ້າໃນການນໍາພາປະຕິບັດໜ້າທີ່ວຽກງານ, ມີພາວະຄວາມເປັນຜູ້ນຳ, ໂດຍສະເພາະແມ່ນການນຳພາພະນັກງານ-ລັດຖະກອນ ແລະ ມະຫາຊົນ ເຄື່ອນໄຫວວຽກງານຕ່າງໆທີ່ການຈັດຕັ້ງມອບໝາຍໃຫ້ ມີຄວາມສະດຸ້ງໄວຕໍ່ບັນຫາຕ່າງໆ, ແກ້ໄຂ ບັນຫາຕ່າງໆຢ່າງມີປະສິດທິຜົນ, ມີຄວາມດຸໝັ່ນ, ພາກພຽນ, ປະຢັດ, ສັດຊື່, ປອດໃສ, ບໍ່ຫຼິ້ນກິນຟຸ່ມ ເຟືອຍ, ບໍ່ສໍ້ລາດບັງຫຼວງ, ມີທັດສະນະມະຫາຊົນ ແລະ ເປັນເຈົ້າການໃນການເຕົ້າໂຮມຄວາມສາມັກ ຄີ, ເຮັດວຽກມີແບບແຜນ, ມີໂຄງການ, ມີການຊຸກຍູ້ຕິດຕາມ, ກວດກາ, ສະຫຼຸບຕີລາຄາ, ຖອດຖອນ ບົດຮຽນ ແລະ ໃກ້ຊິດຕິດແທດກັບມະຫາຊົນຢ່າງແທ້ຈິງ.

ນອກຈາກນັ້ນ, ທ່ານຮອງນາຍົກລັດຖະມົນຕີ ຍັງໄດ້ໃຫ້ທິດຊີ້ນໍາ ເພື່ອໃຫ້ເລືອກໄດ້ບຸກຄົນ ຄືແນວນັ້ນ, ຕ້ອງຫຼີກລ່ຽງແນວຄິດອິດສາບັງບຽດ, ກຸ່ມກ້ອນ, ແນວຄິດພັກພວກ, ເພື່ອນສະໜິດມິດ ສະຫາຍ ເພື່ອສ້າງເຄືອຂ່າຍ ແລະ ຜົນປະໂຫຍດໃດໜຶ່ງແກ່ຕົນເອງ. ຕ້ອງກ້າສົ່ງເສີມບຸກຄົນທີ່ດີເດັ່ນ ແລະ ມີມາດຖານເງື່ອນໄຂຄົບຖ້ວນ ເຂົ້າໃນຕໍາແໜ່ງນໍາພາ – ຄຸ້ມຄອງ. ການສ້າງແຜນກຳນົດພະ ນັກງານ ຕ້ອງຮັບປະກັນລັກສະນະເປີດກວ້າງ, ມີຄວາມໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຕ້ອງຮັບປະກັນໂຄງປະກອບເພດ, ເຜົ່າ, ລັກສະນະສົມສ່ວນ ລະຫວ່າງ ພະນັກງານຮຸ່ນອາວຸໂສ, ຮຸ່ນ ກາງ, ຮຸ່ນໜຸ່ມ. ໃນນັ້ນ, ພະນັກງານຮຸ່ນໜຸ່ມໃຫ້ກວມອັດຕາສ່ວນຫຼາຍກວ່າ ເພື່ອຮັບປະກັນລັກສະນະ ສືບທອດຕໍ່ເນື່ອງ.

ຂ່າວ-ພາບ: ໜັງສືພິມປະຊາຊົນ

#Medialaos MMD (ແຫຼ່ງຂໍ່ມູນຈາກ: ກະຊວງການຕ່າງປະເທດ )

ກົມສິລະປະ-ວັດທະນະທໍາ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດພິທີມອບລາງວັນຊະນະເລີດໃນການປະກວດແຕ້ມຮູບ ຫົວຂໍ້: ຊີວິດວັດທະນະທໍາລາວ ຂຶ້ນໃນວັນທີ 27 ມິຖຸນາ ນີ້ ເພື່ອຄັດເລືອກເອົາລາງວັນທີ 1 ຫາ 4 ເພື່ອສົ່ງເຂົ້າຮ່ວມງານມະຫະກໍາສິລະປະຂອງນັກຮຽນມັດທະຍົມຕອນປາຍ ຄັ້ງທີ 23 ປະຈໍາປີ 2022 ທີ່ປະເທດຍີ່ປຸ່ນ. ໂດຍການເຂົ້າຮ່ວມ ແລະ ມອບລາງວັນ ຂອງທ່ານ ບຸນເພັງ ສຸພາບ ຮອງຫົວໜ້າກົມສິລະປະ-ວັດທະນະທໍາ ກະຊວງ ຖວທ; ມີຜູ້ຕາງໜ້າຈາກພາກສ່ວນສະໜັບສະໜູນ ແລະ ນັກຮຽນມັດທະຍົມປາຍເຂົ້າຮ່ວມ.

ທ່ານ ບຸນເພັງ ສຸພາບ ໄດ້ລາຍງານໃຫ້ຮູ້ວ່າ: ໂຄງການປະກວດຮູບແຕ້ມໃນຫົວຂໍ້: “ງານມະຫະກຳສິລະປະຂອງນັກຮຽນມັດທະຍົມຕອນປາຍ” ທີ່ປະເທດຍີ່ປຸ່ນ ແມ່ນໄດ້ຈັດຂຶ້ນທຸກໆປີ ແລະ ໄດ້ເຊີນບັນດາປະເທດຕ່າງໆເຂົ້າຮ່ວມສົ່ງຮູບ ຊະນະເລີດທີ 1 ຫາ 4 ຂອງຕົນເຂົ້າຮ່ວມວາງສະແດງໃນງານດັ່ງກ່າວໂດຍການຄັດເລືອກເອົາຮູບແຕ້ມ ທີ່ເປັນຜົນງານການແຕ້ມຂອງນັກຮຽນຂັ້ນມັດທະຍົມຕອນປາຍ ອາຍຸບໍ່ກາຍ 18 ປີ ຊຶ່ງຈັດຂຶ້ນໂດຍ ກອງທຶນສາກົນເພື່ອສິລະປະ ແລະ ວັດທະນະທໍາຍີ່ປຸ່ນ (The International Foundation For Art and Culture – IFAC) ດັ່ງນັ້ນ ກົມສິລະປະ-ວັດທະນະທໍາ ຈຶ່ງໄດ້ຈັດການປະກວດແຕ້ມຮູບດັ່ງກ່າວຂຶ້ນ. ໂຄງການນີ້ ໄດ້ເລີ່ມຈັດຕັ້ງປະຕິບັດມາເປັນເວລາ 23 ປີ (1999-2022) ມີບັນດາປະເທດເຂົ້າຮ່ວມປີລະ 19-20 ກວ່າປະເທດ ສົ່ງຜົນງານເຂົ້າຮ່ວມວາງສະແດງໃນງານມະຫະກໍາດັ່ງກ່າວນີ້. ສໍາລັບ ສປປ ລາວ ແມ່ນໄດ້ສົ່ງຜົນງານເຂົ້າຮ່ວມເລີ່ມປີ 2008 ຈົນເຖິງ ປີ 2022 ເປັນ 13 ປີ ແລ້ວ ແລະ ໃນປີ 2022 ແມ່ນເປັນປີທີ 14.

ສໍາລັບຫົວຂໍ້ການປະກວດຮູບແຕ້ມແຕ່ລະປະເທດສາມາດປະກາດການປະກວດຮູບແຕ້ມເອງ ໂດຍກຳນົດໃຫ້ສອດຄ່ອງກັບສະພາບການບ້ານເມືອງ, ວັດທະນະທຳ, ວິຖີຊີວິດທີ່ເປັນເອກະລັກພົ້ນເດັ່ນ, ສະຖານທີ່ທ່ອງທ່ຽວທີ່ສຳຄັນ ແລະ ຫົວຂໍ້ອື່ນໆ ຂອງປະເທດຕົນເອງ.

ໃນການແຂ່ງຂັນຮູບແຕ້ມຄັ້ງນີ້ ແມ່ນມີນັກຮຽນສົ່ງຜົນງານເຂົ້າຮ່ວມທັງໝົດ 30 ຜົນງານ ໃນຂອບເຂດທົ່ວປະເທດ ແລະ ຄັດເລືອກເອົາ 4 ຜົນງານ ຊຶ່ງສາມາດເລືອກໄດ້ລາງວັນຊະນະເລີດ ນາງ ອໍາມະລິນ ວິໄລພັນ ອາຍຸ 18 ຫ້ອງຮຽນ ຊັ້ນ ມ.6 ໂຮງຮຽນມັດທະຍົມສົມບູນດອນໜູນ ຮູບແຕ້ມທີ່ມີຊື່ວ່າ: ການດໍາລົງຊີວິດຕິດພັນກັບທໍາມະຊາດ ໄດ້ຮັບເງິນລາງວັນ 2 ລ້ານກີບ ພ້ອມໃບຢັ້ງຢືນ; ລາງວັນທີ2 ນາງ ມະນີວັນ ອຸດົມ ອາຍຸ 17 ປີ ຫ້ອງຮຽນ ຊັ້ນ ມ.6 ໂຮງຮຽນມັດທະຍົມຊ້າງນ້ອຍ ຮູບແຕ້ມທີ່ມີຊື່ວ່າ: ວິຖີຊີວິດການດໍາລົງຊີວິດຂອງປະຊາຊົນລາວໃນຊົນນະບົດ ໄດ້ຮັບເງິນລາງວັນ 6 ແສນກີບ ພ້ອມໃບຢັ້ງຢືນ; ລາງວັນທີ 3 ນາງ ລິນດາ ອຸດົມພອນ ອາຍຸ 16 ປີ ຫ້ອງຮຽນ ຊັ້ນ ມ.5 ໂຮງຮຽນມັດທະຍົມສົມບູນເພຍວັດ ຮູບແຕ້ມທີ່ມີຊື່ວ່າ: ມ່ວນຊື່ນຮາວກະທົບໄມ້ ໄດ້ຮັບເງິນລາງວັນ 4 ແສນກີບ ພ້ອມໃບຢັ້ງຢືນ ແລະ ລາງວັນທີ 4 ນາງ ທິບອັກສອນ ມິ່ງບຸບຜາ ອາຍຸ 15 ປີ ຫ້ອງຮຽນ ຊັ້ນ ມ.5 ໂຮງຮຽນ ມັດທະຍົມສົມບູນວຽງຈັນ ຮູບແຕ້ມທີ່ມີຊື່ວ່າ: ມ່ວນຊື່ນວັນບຸນກິນຈຽງເຜົ່າອາຄາ (ສະຫຼອງປີໃໝ່ເຜົ່າອາຄາ) ໄດ້ຮັບເງິນລາງວັນ 3 ແສນກີບ ພ້ອມໃບຢັ້ງຢືນ ຊຶ່ງຜົນງານທັງ 4 ແມ່ນຈະໄດ້ສົ່ງເຂົ້າຮ່ວມວາງສະແດງໃນງານມະຫະກໍາສິລະປະຂອງນັກຮຽນມັດທະຍົມຕອນປາຍຄັ້ງທີ 23 ປະຈໍາປີ 2022 ທີ່ປະເທດຍີ່ປຸ່ນ.

ຂ່າວ-ພາບ: ຍຸພິນທອງ

#Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)

ຄະນະພັກຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດກອງປະຊຸມເປີດກວ້າງຄົບຄະນະບໍລິຫານງານພັກ ຄັ້ງທີ 3 ສະໄໝທີ V ຂອງຕົນຂຶ້ນ ໃນວັນທີ 28 ມິຖຸນານີ້ ທີ່ສະໂມສອນຂອງ ຄອສພ, ພາຍໃຕ້ການເປັນປະທານຂອງ ສະຫາຍ ຄໍາພັນ ເຜີຍຍະວົງ ເລຂາຄະນະພັກ ຫົວໜ້າ ຄອສພ, ເຂົ້າຮ່ວມມີບັນດາສະຫາຍຄະນະປະຈໍາພັກ, ບັນດາສະຫາຍຮອງຫົວໜ້າ ຄອສພ, ແຂກຖືກເຊີນ ພ້ອມດ້ວຍສະມາຊິກພັກ, ພະນັກງານຫຼັກແຫຼ່ງພາຍໃນ ຄອສພ ເຂົ້າຮ່ວມ.

ສະຫາຍ ຄໍາພັນ ເຜີຍຍະວົງ ກ່າວວ່າ: ກອງປະຊຸມຄັ້ງນີ້ແມ່ນມີຄວາມໝາຍສໍາຄັນ ຊຶ່ງຈະພ້ອມກັນສະຫຼຸບ, ຕີລາຄາຄືນການນໍາພາ, ຊີ້ນໍາ ໃນການຈັດຕັ້ງປະຕິບັດວຽກງານ 6 ເດືອນຜ່ານມາ ແລະ ພ້ອມກັນກໍານົດທິດທາງຈຸດສຸມຈໍານວນໜຶ່ງ ແຕ່ນີ້ຫາທ້າຍປີ 2022 ແລະ ຈະໄດ້ປຶກສາຫາລື ກົງຈັກການຈັດຕັ້ງຂອງ ຄອສພ ເປັນຕົ້ນ ພາລະບົດບາດຂອງ ຄອສພ ແລະ ພາລະບົດບາດຂອງໂຄສະນາອົບຮົມແຂວງ, ເມືອງໃນທົ່ວປະເທດ ຊຶ່ງເປັນການຈັດຕັ້ງປະຕິບັດມະຕິຂອງກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຄອສພ ທີ່ໄດ້ກໍານົດນັ້ນກໍຄື ແຜນພັດທະນາວຽກງານໂຄສະນາອົບຮົມກ້າວໄປສູ່ໄລຍະໃໝ່ ພ້ອມນັ້ນຈະໄດ້ພ້ອມກັນເບິ່ງຄືນການຈັດຕັ້ງປະຕິບັດວຽກງານວິຊາສະເພາະການຊີ້ນໍາ-ນໍາພາຂອງອົງການຈັດຕັ້ງມະຫາຊົນໄລຍະຜ່ານມາ ແລະ ພ້ອມກັນກວດກາຄືນ ການຈັດຕັ້ງປະຕິບັດແຜນງົບປະມານຂອງ ຄອສພ ໄລຍະຜ່ານມາ ກໍຄື ວຽກງານຈຸດສຸມໃນຕໍ່ໜ້າ. ນອກຈາກນັ້ນ ກອງປະຊຸມ ຍັງຈະໄດ້ພ້ອມກັນເຊື່ອມຊຶມເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ເພື່ອຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ.

ສະຫາຍ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າ ຄອສພ ໄດ້ຂຶ້ນຜ່ານຮ່າງບົດສະຫຼຸບວຽກງານໄລຍະ 6 ເດືອນຕົ້ນປີ ແລະ ທິດທາງແຜນການ ໄລຍະ 6 ເດືອນທ້າຍປີ 2022 ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ໃນຕໍ່ໜ້າ ເປັນຕົ້ນ ຄອສພ ໄດ້ເອົາໃຈໃສ່ສຶກສາອົບຮົມສະມາຊິກພັກ-ພະນັກງານ, ລັດຖະກອນພາຍໃນ ຄອສພ ໃຫ້ມີຄວາມຮັບຮູ້, ເຂົ້າໃຈ, ເຊື່ອມຊຶມ ແລະ ກໍາແໜ້ນທິດສະດີມາກ-ເລນິນ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ໄດ້ເອົາໃຈໃສ່ໃນການນໍາພາ-ຊີ້ນໍາວຽກງານພັກ-ພະນັກງານ, ກໍ່ສ້າງພັກທາງດ້ານການເມືອງ-ແນວຄິດ, ກໍ່ສ້າງພັກທາງດ້ານການຈັດຕັ້ງ, ກໍ່ສ້າງພັກທາງດ້ານແບບແຜນນໍາພາ,ເອົາໃຈໃສ່ວຽກງານການບໍາລຸງ-ກໍ່ສ້າງພະນັກງານ, ວຽກງານປັບປຸງກົງຈັກການຈັດຕັ້ງ, ການນໍາພາ-ຊີ້ນໍາວຽກງານກວດກາ, ວຽກງານຫ້ອງການ, ວຽກງານວິຊາສະເພາະ, ການນໍາພາ-ຊີ້ນໍາວຽກງານອົງການຈັດຕັ້ງມະຫາຊົນ ແລະ ວຽກງານອຶ່ນໆ.

ເພື່ອເປັນທິດນໍາໃນຕໍ່ໜ້າ ສະຫາຍ ຄໍາພັນ ເຜີຍຍະວົງ ໄດ້ເນັ້ນໃຫ້ແຕ່ລະພາກສ່ວນເອົາໃຈໃສ່ໜ້າວຽກ ຄື: ການປັບປຸງພັກດ້ານການຈັດຕັ້ງໃຫ້ເຂັ້ມແຂງ, ໜັກແໜ້ນ ແລະ ປອດໃສ ແມ່ນຄວາມຮຽກຮ້ອງຕ້ອງການຂອງວຽກງານທີ່ຈະຕ້ອງປະຕິບັດໃຫ້ໄດ້ຮັບໝາກຜົນທີ່ເປັນຮູບປະທໍາ, ປະຕິບັດໃຫ້ຖືກຕ້ອງ, ທັນການ ແລະ ມີປະສິດທິຜົນ; ຄະນະນໍາທຸກສະຫາຍ ຕ້ອງກວດກາຄືນບັນດາຈຸດອ່ອນ, ຂໍ້ບົກຜ່ອງຂອງວຽກງານຢ່າງມີຄວາມຮັບຜິດຊອບ; ເອົາໃຈໃສ່ເສີມສ້າງໂອກາດໃຫ້ຄົນດີ, ຄົນເກັ່ງ ມີຄວາມຮູ້, ຄວາມສາມາດ ແລະ ມີຄຸນສົມບັດສິນທໍາ ໄດ້ຮັບໜ້າທີ່ວຽກງານສົມກັບຄຸນສົມບັດ, ຄຸນທາດການເມືອງ ແລະ ຄວາມຮູ້, ຄວາມສາມາດຂອງເຂົາເຈົ້າ; ຄະນະພັກຜູ້ຊີ້ນໍາວຽກງານພັກ-ພະນັກງານ ຕ້ອງໄດ້ໃກ້ຊິດຕິດ ແທດໃຫ້ການຊີ້ນໍາຜູ້ເຮັດວຽກງານຈັດຕັ້ງ-ພະນັກງານ ແລະ ບັນດາໜ່ວຍພັກ, ອົງການຈັດຕັ້ງມະຫາຊົນພາຍໃນ ຄອສພ ໃຫ້ເດີນຕາມແນວທາງ, ນະໂຍບາຍລວມຂອງພັກ, ປັບປຸງກົງຈັກການຈັດຕັ້ງ, ສັບຊ້ອນຈັດວາງພະນັກງານຕາມລະບອບແບບແຜນວິທີເຮັດວຽກ ແລະ ມີປະຊາທິປະໄຕລວມສູນຢ່າງເຄັ່ງຄັດ; ຍົກສູງຄວາມເປັນເຈົ້າການ ແລະ ເປັນໃຈກາງປະສານງານກັບບັນດາກົມ ແລະ ພາກສ່ວນທີ່ກ່ຽວຂອງ ໃນການປະຕິບັດໜ້າທີ່ເປັນເສນາທິການ ໃຫ້ ຄອສພ ດ້ານວຽກງານແຜນການ-ການເງິນ, ວຽກບໍລິຫານ,ວຽກງານຄຸ້ມຄອງ ແລະ ການບໍລິການຮັບໃຊ້ ຕາມທິດການບໍລິການວ່ອງໄວ, ປະທັບໃຈ ແລະ ເອົາໃຈໃສ່ວຽກງານອື່ນໆ.

ຂ່າວ-ພາບ: ແສງຈັນ

#Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)

ພາຍຫຼັງ ທ່ານ ບຸນເຫຼືຶອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຂຶ້ນສະເໜີກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ ຕໍ່ກອງປະຊຸມສະໄໝສາມັນເທື່ອທີ 3 ຂອງ ສະພາແຫ່ງຊາດ ຊຸດທີ IX ໃນວັນທີ 28 ມິຖຸນາ ນີ້ ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຈາກນັ້ນ ບັນດາສະມາຊິກສະພາແຫ່ງຊາດ ໄດ້ພ້ອມກັນປະກອບຄຳຄິດຄຳເຫັນຢ່າງກົງໄປກົງມາ ເພື່ອໃຫ້ມີເນື້ອໃນຮັດກຸມ, ຖືກຕ້ອງ ແລະ ສອດຄ່ອງໃນການຈັດຈັດຕັ້ງປະບັດໃຫ້ສະພາບປັດຈຸບັນ.

ທ່ານ ພົນຈັດຕະວາ ມາລາ ວໍລະຈິດ ສະມາຊິກສະມາແຫ່ງຊາດ ປະຈຳເຂດເລືອກຕັ້ງ ທີ 13 ແຂວງສະຫວັນນະເຂດ ໄດ້ມີຄຳເຫັນວ່າ: ຜ່ານການຄົ້ນຄວ້າ ເນື້ອໃນແຕ່ລະພາກ, ແຕ່ລະໝວດ, ແຕ່ລະມາດຕາ ໂດຍສົມທຽບກັັບສະພາບຄວາມເປັນຈິງ ພຶດຕິກຳຄຸ້ມຄອງເງິນຕາຕ່າງປະເທດຢູ່ປະເທດເຮົາ ຊຶ່ງການຄຸ້ມຄອງນຳໃຊ້ເງິນຕາຕ່າງປະເທດຢູ່ປະເທດເຮົານັ້ນ ບາງມາດຕາຂອງກົດໝາຍ ໂດຍສະເພາະພາກທີ 1 ໄດ້ສ້າງຈິດສຳນຶກຄວາມຮັບຮູ້ໃໝ່ ໃນດ້ານຈຸດປະສົງ, ຄາດໝາຍ, ເນື້ອໃນ, ນະໂຍບາຍ ແລະ ຫຼັກການຂອງກົດໝາຍສະບັບນີ້, ແຕ່ເພື່ອໃຫ້ຈະແຈ້ງ ແລະ ເຫັນບັນຫາ ຄວນແກ້ໄຂໃນການຄຸ້ມຄອງເງິນຕາຕ່າງປະເທດນັ້ນຄືຢູ່ໃນມາດຕາ ທີ 4 ວັກ 2 ທີ່ຂຽນວ່າລັດຊຸກຍູ້ປຸກລະດົມໃຫ້ບຸກຄົນ, ນິິຕິບຸກຄົນ ແລະ ການຈັດຕັ້ງທຸກພາກສ່ວນເຂົ້າຮ່ວມໃນການຄຸ້ມຄອງເງິນຕາຕ່າງປະເທດ ໂດຍການນຳໃຊ້ເງິນຕາຕ່າງປະເທດໃຫ້ສອດຄ່ອງກັບກົດໝາຍສະບັບນີ້ ຕໍ່ກັບເນື້ອໃນວັກ 2 ນີ້ ແມ່ນຢາກສະເໜີປັບປຸງຄືນຖ້າຈະເຈາະຈົງໃສ່ວ່ານຳໃຊ້ເງິນຕາໃຫ້ສອດຄ່ອງຕາມກົດໝາຍສະບັບນີ້ ຄິດວ່າຍັງມີກົດໝາຍອື່ນທີ່ກ່ຽວພັນ ແລະ ກ່ຽວຂ້ອງບັນຫາການຄຸ້ມຄອງ ຄິດວ່າ ໃຫ້ຕັດອອກໂດຍການນຳໃຊ້ເງິນຕາຕ່າງປະເທດໃຫ້ສອດຄ່ອງຕາມກົດໝາຍ, ສ່ວນວັກທີ 3 ລັດເອົາໃຈໃສ່ໂຄສະນາເຜີຍແຜ່ສຶກສາອົບຮົມ ສະໜອງຂໍ້ມູນຂ່າວສານໃຫ້ທົ່ວປວງຊົນຮັບຮູ້, ເຂົ້າໃຈກ່ຽວກັບຫຼັກການ ການນຳໃຊ້ເງິນຕາຕ່າງປະເທດໃຫ້ຖືກຕ້ອງຕາມກົດໝາຍ ຕໍ່ບັນຫານີ້ຄິດວ່າຖ້າຈະໃຊ້ແຕ່ຫຼັກການ ແລະ ຕໍ່ລະບຽບການຢາກໃຫ້ຕື່ມໃສ່ ຫຼັກການ ແລະ ລະບຽບການໃນການນໍາໃຊ້ເງິນຕາຕ່າງປະເທດເພື່ອໃຫ້ໜັກແໜ້ນ ແລະ ຮັດກຸມຂຶ້ນຕື່ມ, ໃນນັ້ນຕໍ່ມາດຕາທີ 8 ແລະ ທີ 9 ຊຶ່ງສອງມາດຕາດັ່ງກ່າວໄດ້ຕອບໂຈດຕໍ່ສັງຄົມທີ່ໄດ້ເປັນຫ່ວງຕໍ່ການຄຸ້ມຄອງເງິນຕ່າງປະເທດຢູ່ປະ ເທດເຮົາ ຊຶ່ງກໍເຫັນວ່າສອງເນື້ອໃນດັ່ງກ່າວເປັນເນື້ອໃນທີ່ສຳຄັນ ແລະ ຈະແຈ້ງ ສະແດງເຖິງຄວາມເຂັ້ມແຂງໃນການຄຸ້ມຄອງຂອງລັດໃນຂົງເຂດເງິນຕາຕ່າງປະເທດ ແຕ່ຍັງເປັນຫ່ວງໃນການຈັດຕັ້ງປະຕິບັດຕົວຈິງ ໂດຍສະເພາະຢູ່ໃນມາດຕາທີ 8 ທີ່ໄດ້ກຳນົດເຖິງການຄຸ້ມຄອງເງິນຕາຕ່າງປະເທດ ທີ່ບົ່ງບອກວ່າການຖືຄອງເງິນສົດ ຫຼື ບັນຊີເງິນຝາກ ແຕ່ຢູ່ໃນດ້ານການຄຸ້ມຄອງເງິນສົດນີ້ຢູ່ໃນນິຕິກຳໃຕ້ກົດໝາຍແລ້ວ ແຕ່ຢາກໃຫ້ລະບຸວ່າ ຄຸ້ມຄອງແບບໃດ ເພາະທີ່ຜ່ານມາເຫັນວ່າ ມີການນຳເງິນຕາຕ່າງປະເທດອອກໄປ ຊຶ່ງຍັງເປັນບັນຫາທ້າທາຍ.

ທ່ານ ຄຳໃຕ ແກ້ວດວງດີ ສະມາຊິກສະພາແຫ່ງຊາດ ເຂດເລືອກຕັ້ງ ທີ 15 ແຂວງຈຳປາສັກ ໄດ້ມີຄຳເຫັນວ່າ: ໃນນິຍາມມາດຕາ 3 ຂໍ້ 9 ຜູ້ໃຫ້ບໍລິການຊຳລະ ໝາຍເຖິງ ທະນາຄານທຸລະກິດ ຫຼື ນິຕິບຸກຄົນອື່ນ ຊຶ່ງຄຳວ່ານິຕິບຸກຄົນອື່ນທີ່ສ້າງບັນຫາໃຫ້ສັງຄົມເຮົາມີສະພາບບໍ່ປົກກະຕິໃນປັດຈຸບັນ ເພາະ ສະນັ້ນ ຈຶ່ງຢາກໃຫ້ນິຕິບຸກຄົນອື່ນໃຫ້ຕັດອອກໃຫ້ໄປຜັນຂະຫຍາຍຢູ່ນິຕິກຳໃຕ້ກົດໝາຍ ເພາະຜ່ານມາ ທະນາຄານ ໄດ້ມາສະເໜີຕໍ່ສະພາວ່າ: ຈະບໍ່ໃຫ້ມີຮ້ານແລກປ່ຽນ ຫຼື ຫາກມີແມ່ນໃຫ້ມີໜ້ອຍທີ່ສຸດ ແຕ່ມາຮອດປັດຈຸບັນມີຈຳນວນເພີ່ມຂຶ້ນຫຼາຍເທົ່າຕົວ ຫຼື ຖ້າຈະຮັກສາໄວ້ຜູ້ໃຫ້ບໍລິການຕ້ອງໃຊ້ມາດຕະຖານດຽວກັບທະນາຄານ ແຫ່ງ ສປປ ລາວ ທີ່ໄດ້ກຳນົດໃຫ້ທະນາຄານທຸລະກິດ ປະກາດໃຊ້ຕາມອັດຕາແລກປ່ຽນ ແລະ ໃນມາດຕາ 16 ຢູ່ວັກ 2 ຜູ້ອອກແຮງງານລາວທີ່ໄປເຮັດວຽກຢູ່ຕ່າງປະເທດຕ້ອງໂອນເງິນລາຍຮັບທີ່ເປັນຄ່າແຮງ ແລະ ອື່ນໆເຂົ້າ ສປປ ລາວ ຜ່ານຜູ້ບໍລິການຊຳລະ ນີ້ກໍເປັນບັນຫາ ແຕ່ເຖິງຢ່າງໃດກໍຕາມ ທະນາຄານພວກເຮົາຕ້ອງໄດ້ເປີດປະຕູເປີດກ້ວາງ ເພື່ຶອເຮັດແນວໃດໃຫ້ລູກຫຼານເຮົາທີ່ໄປເຮັດວຽກຢູ່ຕ່າງປະເທດໄດ້ໂອນເງິນເຂົ້າມາລາວເຮົາໃຫ້ສອດຄ່ອງ ຖືກຕ້ອງຕາມລະບົບ ແລະ ລະບຽບກົດໝາຍ.

ຂ່າວ-ພາບ: ສຳນານ

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ຕາມ​ຂ່າວ​ຈາກ ​ບັງ​ກລາ​ເທດ,ວັນ​ທີ27 ​ມິຖຸນາ​ນີ້,ບັງ​ກລາ​ເທດ ​ເປີດ​ໃຊ້​ຂົວ​ ຂ້າມ​ແມ່​ນ້ຳ ຂະໜາດ​ໃຫຍ່ ​ທີ່​ສຸດ ​ໃນ​ປະ​ເທດ ຢ່າງ​ເປັນ​ທາງ​ການ ຫລັງ​ໃຊ້​ເວລາ ​ກໍ່ສ້າງ​ມາ​ເຖິງ8​ປີ ​ເພື່ອ​ຊ່ວຍ ​ອຳນວຍ​ ຄວາມ​ສະດວກ​ ໃນ​ການ​ເດີນທາງ ຈາກ​ທີ່​ເຄີຍ​ໃຊ້ ​ທ່າເຮືອ​ ຂ້າມ​ຝາກ​ ເປັນ​ຫລັກ ​ໂດຍ​ບໍລິສັດ​ຈີນ ​ເປັນ​ຜູ້​ຮັບ ​ເໝົາ​ກໍ່ສ້າງ ຂົວ ແຫ່ງ​ນີ້ ຢູ່​ຫ່າງ​ຈາກ ນະຄອນຫລວງ ​ດາ​ກາ ​ລົງ​ໄປ​ທາງ​ໃຕ້ ປະມານ 50ກິ​ໂລ​ແມັດ ​ເປັນ​ເສັ້ນທາງ ​ເຊື່ອມ​ຕໍ່ ທາງ​ພາກ​ຕາ​ເວັນ​ອອກ ​ແລະ ຕາ​ເວັນ​ຕົກ ​ຂອງ​ປະ​ເທດ ​ເຂົ້າດ້ວຍ​ກັນ ຊຶ່ງ​ຈະ​ຊ່ວຍ​ອຳນວຍ​ ຄວາມ​ສະດວກ ​ໃນ​ການທາງ​ດີ​ ຂຶ້ນ​ກວ່າ​ເກົ່າ.ສຳລັບ​ ຂົວ​ຂ້າມ​ແມ່ນ້ຳPadma ​ເປັນ​ຂົວ2​ຊັ້ນ ​ໂດຍ​ຊັ້ນ​ເທິງ ​ເປັນ​ຖະໜົນ 4​ເລນ ສ່ວນ​ຊັ້ນ ລຸ່ມ ​ເປັນ​ຂົວ​ລົດ​ໄຟ ມີ​ໄລຍະ​ທາງ​ຍາວ 6,15 ກິ​ໂລ​ແມັດ ​ເພື່ອ​ສ້າງ​ປະ​ໂຫຍ​ດ ​ໃຫ້​ກັບ ​ປະຊາຊົນ ກວ່າ80​ ລ້ານ​ຄົນ ​ແລະ ຈະ​ຊ່ວຍ​ຊຸກຍູ້​ ໃຫ້ ຍອດ​ລວມ ຜະລິດ ​ຕະພັນ ​ພາຍ​ໃນ​ປະ​ເທດ(​ຈີ​ດີ​ພີ) ​ຂອງ​ບັງ​ກລາ​ເທດ ​ເພີ່ມ​ສູງ​ຂຶ້ນ​​ເຖິງ 1,5%ຕໍ່​ປີ./.

(ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 28 ມິ ຖຸນາ 2022 ນີ້ ໂດຍການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ບຸນເຫລືອ ສິນໄຊວໍລະວົງ ຜູ້ວ່າການທະນາຄານແຫ່ງ ສປປ ລາວ ໄດ້ສະເໜີຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສະບັບປັບປຸງ ປະກອບມີ IX ພາກ, 8 ໝວດ, 62 ມາດຕາ ຈາກສະບັບປັດຈຸບັນ ທີ່ມີ IX ພາກ, 8 ໝວດ ແລະ 54 ມາດຕາ, ໃນນີ້, ໄດ້ປັບປຸງເນື້ອໃນ 32 ມາດຕາ,ເພີ່ມເຂົ້າໃໝ່ 24 ມາດຕາ, ຕັດເນື້ອໃນ 12 ມາດຕາ ແລະ ຍ້າຍເນື້ອໃນຂອງບາງມາດຕາ ສັບຊ້ອນເຂົ້າໃນມາດຕາອື່ນ ແລະ ຍັງຮັກສາເນື້ອໃນເກົ່າ 6 ມາດຕາ. ຫລັງຈາກນັ້ນ, ບັນດາສະມາຊິກສະພາແແຫ່ງຊາດ ກໍໄດ້ສຸມໃສ່ປະກອບຄຳຄິດຄຳເຫັນ ໃສ່ຮ່າງກົດໝາຍສະບັບດັ່ງກ່າວ ເພື່ອໃຫ້ມີເນື້ອໃນຄົບຖ້ວນສົມບູນ, ຖືກຕ້ອງ, ສອດຄ່ອງ ກັບແນວທາງ ທີ່ພັກ, ລັດວາງອອກ.

ທ່ານ ບຸນເຫລືອ ສິນໄຊວໍລະວົງ ໄດ້ລາຍງານໃຫ້ຮູ້ ກ່ຽວກັບຄວາມຈໍາເປັນ, ສາເຫດ, ຈຸດປະສົງແລະ ຄາດໝາຍໃນການປັບປຸງກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ ລວມທັງບາງເນື້ອໃນສໍາຄັນທີ່ໄດ້ມີການປັບປຸງໃນຮ່າງກົດໝາຍສະບັບນີ້ ເຊິ່ງຈະເຮັດໃຫ້ການເຄື່ອນໄຫວດ້ານເງິນຕາຕ່າງປະເທດຢູ່ ສປປ ລາວ ໄດ້ຮັບການຄຸ້ມຄອງສອດຄ່ອງກັບເງື່ອນໄຂ ເສດຖະກິດຢ່າງເປັນລະບົບຫລາຍຂຶ້ນ. ກົດໝາຍສະບັບນີ້ ສ້າງຂຶ້ນໃນເງື່ອນໄຂທີ່ ສປປ ລາວ ມີການເປີດກວ້າງການພົວພັນດ້ານການຄ້າ, ການລົງທຶນກັບ ຕ່າງປະເທດຢ່າງຫລວງຫລາຍ ແລະ ມີກະແສເງິນຕາຕ່າງປະເທດຈໍລະຈອນໃນລະບົບເສດຖະກິດຫລາຍ. ຄຽງຄູ່ກັບການສ້າງກົດໝາຍດັ່ງກ່າວ, ທະນາຄານແຫ່ງ ສປປ ລາວ ກໍໄດ້ຜັນຂະຫຍາຍສ້າງເປັນນິຕິກໍາລຸ່ມກົດໝາຍກ່ຽວຂ້ອງຈໍານວນ 10 ສະບັບ.

ຜ່ານການທົບທວນຄືນ ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະ ບັນດານິຕິກໍາລຸ່ມກົດໝາຍກ່ຽວຂ້ອງ ທີ່ໄດ້ນໍາໃຊ້ມາເປັນເວລາເກືອບ 7 ປີນັັ້ນ ເຫັນວ່າໄດ້ສ້າງການຫັນປ່ຽນທີ່ດີຫລາຍຢ່າງໃນສັງຄົມລາວ ຕົ້ນຕໍແມ່ນໄດ້ສົ່ງເສີມໃຫ້ສັງຄົມມີການຫັນປ່ຽນມານໍາໃຊ້ເງິນກີບຫລາຍຂຶ້ນ ສະແດງອອກຄື ອັດຕາສ່ວນເງິນຕາຕ່າງປະເທດ ຕໍ່ເງິນຝາກທັງໝົດໄດ້ຫລຸດລົງຈາກ 68,01% ໃນປີ 2005 ມາເປັນ 59,17% ໃນປີ 2021; ໄດ້ຊ່ວຍໃຫ້ການຄຸ້ມຄອງເງິນຕາຕ່າງປະເທດມີລັກສະນະລວມສູນ ເຂົ້າສູ່ລະ ບົບທະນາຄານຫາຍຂຶ້ນ ເມື່ອທຽບກັບໄລຍະທີ່ຍັງບໍ່ທັນມີກົດໝາຍດັ່ງກ່າວ.

ຈຸດປະສົງຂອງການປັບປຸງກົດໝາຍ ໃນຄັ້ງນີ້ ແມ່ນເພື່ອເປັນເຄື່ອງມືໃນການຄຸ້ມຄອງເງິນຕາຕ່າງປະເທດຢູ່ ສປປ ລາວ ໃຫ້ມີປະສິດທິຜົນຫລາຍຂຶ້ນກວ່າເກົ່າ ໃນເງື່ອນໄຂທີ່ຮູບແບບການເຊື່ອມໂຍງດ້ານເສດຖະກິດ-ການເງິນລະຫວ່າງປະເທດ ນັບມື້ນັບຫລາກຫລາຍ ແລະ ສະຫລັບສັບຊ້ອນ ໃຫ້ສາມາດຄຸ້ມຄອງເງິນຕາຕ່າງປະເທດໄດ້ລວມສູນ ເຂົ້າສູ່ລະບົບຫລາຍຂຶ້ນ, ສ້າງປະໂຫຍດສູງສຸດໃຫ້ແກ່ປະເທດຊາດ ໃຫ້ແກ່ປະຊາຊົນ; ຫລຸດຜ່ອນການນຳໃຊ້ເງິນຕາຕ່າງປະເທດຊະຊາຍ ແລະ ຫລາຍສະກຸນເງິນຕາໃນສັງຄົມ; ປະກອບສ່ວນສ້າງຄວາມເຂັ້ມແຂງ ໃຫ້ລະບົບສະຖາບັນການເງິນຂອງ ສປປ ລາວ ແລະ ຊ່ວຍສ້າງຄວາມເຂັ້ມແຂງດ້ານຖານະການຊໍາລະ ກັບຕ່າງປະເທດ.

ຂ່າວ: ທະນູທອງ, ພາບ: ອ່າຍຄຳ

ກະດູກທັບເສັ້ນປະສາດ ແມ່ນຈະມີອາການເຈັບ ປວດ ຕາມເສັ້ນປະສາດທີ່ຖືກກົດທັບ ຮູ້ສຶກປວດຫຼັງ ຂາ ຫຼື ແຂນ ອາດຈະແຕກຕ່າງກັນໄປໃນແຕ່ລະຄົນ ຂື້ນຢູ່ກັບວ່າກະດູກທັບເສັ້ນປະສາດເສັ້ນໃດ?

ຄົນເຈັບສ່ວນຫຼາຍ ປີ່ນປົວດ້ວຍການນອນພັກ ກິນຢາ ກາຍຍະພາບບຳບັດ ແລະ ຄົນເຈັບສ່ວນໜ້ອຍ ປີ່ນປົວດ້ວຍການຜ່າຕັດໝອນຮອງກະດູກທັບເສັ້ນປະສາດ ຖ້າຫາກໄດ້ຮັບການປີ່ນປົວແຕ່ທຳອິດ ກໍ່ຈະສາມາດຫາຍດີໄດ້ ແລະ ກັບມາມາໃຊ້ຊີວິດປະຈຳວັນໄດ້ຕາມປົກກະຕິ ຖ້າທ່ານບໍ່ແນ່ໃນວ່າເປັນກະດູກທັບເສັ້ນປະສາດ ຫຼື ບໍ່? ຄວນກວດເບີ່ງອາການເບື້ອງຕົ້ນດັ່ງນີ້:

1. ນອນຫງາຍ.
2. ຍົກຂາຂື້ນຂ້າງໜື່ງ ຫົວເຂົ່າຢຽດກົງ ເຮັດເປັນມູມຕັ້ງສາກກັບພື້ນ ຖ້າມີອາການກະດູກທັບເສັ້ນປະສາດຈະຮູ້ສຶກເຈັບ ປວດ ຂາຈະຕືງ.
3. ຖ້າກະດູກປາຍຕີນ ມາທາງໜ້າຈະຮູ້ສຶກເຈັບ ແລະ ປວດຫຼາຍຂື້ນ.

ນອກຈາກນີ້ຍັງມີອາການເຈັບ ປວດ ມືນຊາ ຂາເບື້ອງໃດເບື້ອງໜື່ງ ແລະ ມີອາການຂາອ່ອນ ຖ້າສັງເກດເຫັນຄວາມຜິດປົກກະຕິເຫຼົ່ານີ້ ຕ້ອງຟ້າວໄປພົບແພດດ່ວນເພື່ອປີ່ນປົວໃຫ້ທັນເວລາ.

ຫຼາຍຄົນມັກດື່ມນໍ້າຊາ ເພາະວ່າມັກລົດຊາດ ແຕ່ຍັງບໍ່ທັນຮູ້ວ່າການດື່ມນໍ້າຊາ ເປັນປະຈຳນັ້ນມີປະໂຫຍດແນວໃດ? ມື້ນີ້ເຮົານຳເອົາຄຸນປະໂຫຍດຂອງຊາມາຝາກ ປະຈຸບັນເຄື່ອງດື່ມທີ່ມີຄວາມນິຍົມຫຼາຍເຫັນວ່າແມ່ນ “ກາເຟ” ແລະ “ຊາ” ເພາະວ່າເຄື່ອງດື່ມເຫຼົ່ານີ້ມີລົດຊາດແຊບຖືກປາກ ແລະ ມີກິ່ນຫອມທີ່ເປັນເອກະລັກແຕກຕ່າງກັນໄປຕາມແຕ່ລະຊະນິດ ດັ່ງນັ້ນຈຶ່ງເຮັດໃຫ້ຫຼາຍຄົນເລືອກດື່ມເຄື່ອງດື່ມເຫຼົ່ານີ້ເປັນປະຈຳໃນເວລາກາງເວັນ.

ແຕ່ທ່ານຮູ້ບໍ່ວ່າການດື່ມນໍ້າຊາ ເປັນປະຈໍານັ້ນບໍ່ພຽງແຕ່ທ່ານຈະຮູ້ສຶກສົດຊື່ນຈາກລົດຊາດ ແລະ ກິ່ນຫອມຂອງ “ຊາ” ເທົ່ານັ້ນ ທ່ານຍັງຈະໄດ້ຮັບປະໂຫຍດຫຼາຍຢ່າງອີກດ້ວຍຈາກການດື່ມນໍ້າຊາເປັນປະຈຳ ໂດຍທີ່ທ່ານບໍ່ຮູ້ຕົວ ເຖີງແນວໃດກໍ່ຕາມຄຸນປະໂຫຍດຂອງການດື່ມນໍ້າຊາ ເປັນປະຈຳທີ່ພວກເຮົາມາເຕົ້າໂຮມກັນໃນມື້ນີ້ຈະເປັນຜົນປະໂຫຍດຂອງການດື່ມນໍ້າຊາ ດ້ວຍວິທີການຊົງຊາ ພຽງແຕ່ໃຊ້ໃບຊາແຫ້ງ ແລະ ນໍ້າຮ້ອນເທົ່ານັ້ນ.

ຫຼາຍທ່ານອາດຈະຍັງບໍ່ຮູ້ ການດື່ມນໍ້າຊາ ເປັນປະຈຳສາມາດຊ່ວຍປ້ອງກັນພະຍາດເບົາຫວານ ການດື່ມນໍ້າຊາຫຼາຍກ່ວາສາມຈອກຕໍ່ມື້ ແລະ ຍັງສາມາດຫຼຸດຜ່ອນຄວາມສ່ຽງການເປັນພະຍາດເບົາຫວານ.

ທ່ານອາດເຄີຍໄດ້ຍິນ ກ່ຽວກັບການດື່ມນໍ້າຊາ ນັ້ນສາມາດຊ່ວຍປ້ອງກັນມະເຮັງໄດ້ ຍ້ອນວ່າຊາແມ່ນພືດທີ່ມີສານຕ້ານອະນຸມູນອິດສະຫຼະ ບໍ່ວ່າຈະເປັນຊາຂຽວ ເຊິ່ງຖ້າທ່ານຕ້ອງການຜົນປະໂຫຍດຫຼາຍຈາກການດື່ມຊາຂາວ ທ່ານກໍ່ສາມາດເຮັດເອງໄດ້ງ່າຍ ພຽງແຕ່ເອົາໝາກນາວໃສ່ລົງໄປໃນຊາ ແລະ ໄດ້ຖືກຢືນຢັນໂດຍມີຫຼັກຖານຈາກການຄົ້ນຄວ້າໃນຫ້ອງທົດລອງແລ້ວວ່າຊາສາມາດຢຸດການຈະເລີນເຕີບໂຕຂອງເນື້ອງອກໄດ້ຫຼາຍຊະນິດ ຊື່ງໜື່ງໃນນັ້ນແມ່ນເນື້ອງອກຄ້າຍຄືຈຸລັງມະເຮັງນັ້ນເອງ.

ການກຽມຕົວແລ່ນ ບໍ່ພຽງແຕ່ຕ້ອງກະກຽມຮ່າງກາຍ ແລະ ການຝຶກຊ້ອມເປັນປະຈຳເທົ່ານັ້ນ ອາຫານການກິນກໍ່ເປັນເລື່ອງທີ່ສຳຄັນເທົ່າທຽມກັນ ສຳລັບນັກແລ່ນ ນັກກິລາ ຫຼື ນັກອອກກຳລັງກາຍເປັນປະຈຳ ຕ້ອງເອົາໃຈໃສ່ວາງແຜນ ການກິນອາຫານຂອງທ່ານໃຫ້ຖືກຕ້ອງ ແລະ ເໝາະສົມ ສາມາດຊ່ວຍເຮັດໃຫ້ການແລ່ນ ແລະ ການອອກກຳລັງກາຍໄດ້ຢ່າງເຕັມປະສິດທິພາບ ຊ່ວຍຟື້ນຟູຮ່າງກາຍຫຼຸດຈາກອາການບາດເຈັບ ແລະ ຫຼຸດການເກີດອັນຕະລາຍໃນລະຫວ່າງແຂ່ງຂັນ ນອກຈາກນີ້ຍັງເປັນການຊ່ວຍໃຫ້ສະພາບຮ່າງກາຍໃຫ້ສົມບູນ ແຂງແຮງ ສຳລັບກິດຈະກຳຕ່າງໆ ໄດ້ຕໍ່ໄປ.

ຢາກແລ່ນໄດ້ດີຕ້ອງກິນແນວໃດ?

ວາງແຜນການກິນອາຫານສຳລັບອອກໄປແລ່ນ ຫຼື ເຂົ້າຮ່ວມການແຂ່ງຂັນປະກອບມີ: ການແຂ່ງຂັນກ່ອນການແລ່ນ ແລະ ຫຼັງການແລ່ນ ເຊິ່ງໃນແຕ່ລະໄລຍະມີປະໂຫຍດທັງໝົດ ແລະ ມີຄວາມສຳຄັນແຕກຕ່າງກັນ.

ກ່ອນຈະແລ່ນກິນອາຫານທີ່ດີ ແລະ ກຽມຕົວໃຫ້ພ້ອມ

ຄົນທີ່ອອກກຳລັງກາຍເປັນປະຈຳ ນັກແລ່ນມີຕາຕະລາງການຝຶກ ແລະ ຊ້ອມແລ່ນເປັນປົກກະຕິ ຈຳເປັນຕ້ອງມີການເອົາໃຈໃສ່ດ້ານໂພຊະນາການ ໂດຍການເລືອກອາຫານທີ່ໃຫ້ສານອາຫານຄົບຖ້ວນ ສົມສ່ວນສົມບູນຕາມຫຼັກການອາຫານຄົບ 5 ໝູ່.

1. ກິນເຂົ້າກ້ອງ ແລະ ທັນຍາພືດຕ່າງໆ.
2. ກິນຜັກ ແລະ ໝາກໄມ້ເປັນປະຈຳ.
3. ກິນປາ ແລະ ຊີ້ນສັດທີ່ບໍ່ມີໄຂມັນເປັນຕົ້ນແມ່ນ ໄຂ່ ຖົ່ວແຫ້ງຕ່າງໆ.
4. ດື່ມນົມ ຫຼື ນໍ້າເປັນປະຈຳ.
5. ຫຼຸດອາຫານເຜັດ, ລົດຫວານ, ມັນ ແລະ ເຄັມ.
6. ຫຼີກເວັ້ນຈາກການດື່ມສີ່ງມືນເມົາ.
7. ຫຼີກລ້ຽງອາຫານສຳເລັດຮູບ ແລະ ອາຫານທີ່ມີສານເຄມີປະປົນ.

ນອກຈາກນັ້ນຄວນກຳນົດປະລິມານອາຫານໃຫ້ເໝາະສົມ ພຽງພໍທີ່ຈະຕອບສະໜອງກັບຄວາມຕ້ອງການຂອງຮ່າງ ກາຍເພື່ອໃຊ້ເປັນພະລັງງານໃນການອອກກຳລັງກາຍ ແລະ ແລ່ນ ສຳລັບນັກແລ່ນທີ່ຝຶກຊ້ອມໜັກ ຄວນເພີ່ມປະລິ ມານອາຫານໃນອັດຕາສ່ວນທີ່ເໝາະສົມ.

ດື່ມນໍ້າໃຫ້ພຽງພໍມີຄວາມສຳຄັນເທົ່າທຽມກັນ.

ການຊົດເຊີຍ ສຳລັບການສູນເສຍນໍ້າຈາກການອອກກຳລັງກາຍ ແລະ ການຝຶກຊ້ອມຈາກການແລ່ນ ແມ່ນມີຄວາມ ສຳຄັນຫຼາຍ ເພາະການດື່ມນໍ້າໃຫ້ພຽງພໍໃນການແລ່ນ ຈະຊ່ວຍຄວບຄຸມລະດັບການເຕັ້ນຂອງຫົວໃຈ ການໄຫຼວຽນຂອງເລືອດໃຫ້ດີຂື້ນ ແລະ ຊ່ວຍຫຼຸດອຸນຫະພູມໃນຮ່າງກາຍ ດັ່ງນັ້ນຈຶ່ງເຮັດໃຫ້ການແລ່ນດີຂື້ນ ແນະນຳໃຫ້ດື່ມນໍ້າ ຢ່າງໜ້ອຍ 2 ລິດຕໍ່ມື້ (ສຳລັບຄົນທີ່ມີນໍ້າໜັກ 60 ກິໂລ).

ຄວນກິນຫຍັງຫຼັງຈາກການແລ່ນ?

ຫຼັງຈາກແລ່ນແລ້ວກໍ່ຈະກິນຕາມໃຈປາກ ກິນໄດ້ໝົດທຸກຢ່າງ ແຕ່ຕ້ອງຮັກສາ ແລະ ເລືອກກິນອາຫານຢ່າງລະມັດ ລະວັງ ເພື່ອໃຫ້ຮ່າງກາຍຟື້ນຟູສະມັດຕະພາບ ຊົດເຊີຍພະລັງງານທີ່ເສຍໄປ ແລະ ຍັງຊ່ວຍໃນການສ້ອມແປງສ່ວນທີ່ເສຍຂອງຮ່າງກາຍ.

ເມື່ອຮູ້ສຶກເມື່ອຍ ໃຫ້ກິນອາຫານທີ່ມີພະລັງງານ ແລະ ຂອງຫວານສູງ ເຊັ່ນ: ໝາກໄມ້ແຫ້ງ, ນໍ້າໝາກໄມ້, ເຄື່ອງດື່ມ, ເຂົ້າໜົມປັງ, ມັນ, ເຜືອກ ຫຼື ທັນຍາພືດຕ່າງໆ ເພື່ອຊ່ວຍທົດແທນພະລັງງານທີ່ເສຍໄປຈາກການແລ່ນ ແລະ ຊ່ວຍຫຼຸດອາການເມື່ອຍລ້າຈາກການຫຼຸດລະດັບນໍ້າຕານໃນເລືອດ.

ເພີ່ມໂປຣຕີນຄູ່ກັບຄາໂບໄຮເດຣດ ໃນອັດຕາສ່ວນຂອງຄາໂບໄຮເດຣດ 3-4 ຕໍ່ກັບໂປຣຕີນ 1 ສ່ວນ ໂດຍຈັບຄູ່ອາຫານເຊັ່ນ: ໝາກໄມ້ແຫ້ງ, ນົມສົດ 1 ແກ້ວ, ກ້ວຍ ກັບໂຢເກີດ, ນົມລົດຫວານ ຫຼື ເຂົ້າໜຽວກັບຊີ້ນໝູປີ້ງກໍ່ໄດ້. 

ບໍ່ຄວນອົດອາຫານຫຼັງຈາກການແລ່ນ ແລະ ອອກກຳລັງກາຍ ເພາະນອກຈາກບໍ່ເຮັດໃຫ້ຈ່ອຍແລ້ວ ຍັງເພີ່ມຄວາມສ່ຽງຂອງການບາດເຈັບສະສົມ ແລະ ເຮັດໃຫ້ຮ່າງກາຍຟື້ນຕົວຊ້າກ່ວາປົກກະຕິ.

ຫຼັງຈາກແລ່ນ ແລະ ອອກກຳລັງກາຍ ເວລາທີ່ດີທີ່ສຸດໃນການກິນອາຫານແມ່ນ 30-60 ນາທີ ຖ້າທ່ານຍັງບໍ່ຫິວ ຫຼື ບໍ່ມີເວລາ ຄວນກິນອາຫານຫວ່າງທີ່ມີປະໂຫຍດມື້ລະໜ້ອຍ ເພື່ອໃຫ້ຮ່າງກາຍໄດ້ຮັບພະລັງງານ ແລະ ສານອາຫານທີ່ ເໝາະສົມ.

ຊົດເຊີຍການສູນເສຍນໍ້າ ໂດຍການດື່ມນໍ້າໃຫ້ພຽງພໍ ສຳລັບຜູ້ທີ່ອອກກຳລັງກາຍໜັກ ນັກແລ່ນໄລຍະໄກ ຫຼື ຄົນທີ່ອອກກຳລັງກາຍ ຫຼື ແລ່ນໃນສະພາບອາກາດທີ່ຮ້ອນຫຼາຍ ການດື່ມເຄື່ອງດື່ມທີ່ມີເກືອແຮ່ (Energy drink) ແມ່ນອີກທາງເລືອກໜຶ່ງທີ່ຊ່ວຍທົດແທນການສູນເສຍນໍ້າ ແລະ ແຮ່ທາດໄດ້.

ເລືອກອາຫານທີ່ຖືກຫຼັກໂພຊະນາການຄົບໝູ່ອາຫານ ເນັ້ນໃສ່ອາຫານທີ່ມີແຮ່ທາດ ແລະ ວິຕາມິນຕາມຄວາມຕ້ອງ ການຂອງແຕ່ລະຄົນ.

ການອອກໄປແລ່ນບໍ່ແມ່ນເລື່ອງຍາກ ແຕ່ຕ້ອງແລ່ນດ້ວຍຄວາມເຂົ້າໃຈ ເລືອກກິນອາຫານໃຫ້ເປັນປະໂຫຍດ ດັ່ງນັ້ນການແລ່ນໃຫ້ສຸຂະພາບດີ ແລ່ນໃຫ້ໄດ້ເຕັມປະສິດທິພາບ ແລະ ແລ່ນເຂົ້າສູ່ຊີວິດໃໝ່ທີ່ມີສຸຂະພາບແຂງແຮງ.

ໃນວັນທີ 24 ມິຖຸຸນາ 2022 ທີ່ຄະນະພົວພັນຕ່າງປະເທດສູນກາງພັກກອມ ມູນິດຈີນ ທີ່ປັກກິ່ງ, ສປ ຈີນ, ສະຫາຍ ນາງ ຄຳເພົາ ເອີນທະວັນ, ເອກອັກຄະລັດ ຖະທູດ ແຫ່ງ ສປປ ລາວ ປະຈຳ ສປ ຈີນ ໄດ້ເຂົ້າຢ້ຽມຂໍ່ານັບ ແລະ ອວຍພອນ ສະ ຫາຍ ລິວຈຽນຊາວ, ຫົວໜ້າຄະນະພົວ ພັນຕ່າງປະເທດສູນກາງພັກກອມມູນິດຈີນ ຜູ້ໃໝ່. ສອງຝ່າຍຕີລາຄາສູງຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ຈີນ ໃນໄລຍະຜ່ານມາ ກໍ່ຄືໃນປັດຈຸບັນ, ການຮ່ວມມືທີ່ພົ້ນເດັ່ນ ລະຫວ່າງ ສອງປະເທດລາວ ແລະ ຈີນ ທີ່ໄດ້ນໍາເອົາຜົນປະໂຫຍດມາສູ່ສອງປະເທດ ກໍ່ຄືປະຊາ ຊົນສອງຊາດລາວ ແລະ ຈີນ, ເປັນຕົ້ນ: ໂຄງການລົດ ໄຟລາວ-ຈີນ, ໂຄງການແລວເສດຖະກິດລາວ-ຈີນ ແລະ ອື່ນໆ ໂດຍສະເພາະແມ່ນໂຄງການລົດໄຟລາວ-ຈີນ, ຊຶ່ງໄດ້ເປີດນໍາໃຊ້ຢ່າງເປັນທາງການໃນວັນທີ 3 ທັນວາ 2021 ໂດຍເປັນກຽດກົດປຸ່ມຂະບວນລົດໄຟທໍາອິດຂອງສອງ ສະຫາຍ ເລຂາທິການໃຫຍ່ຂອງພັກລາວ-ຈີນ, ສະຫາຍ ທອງລຸນ ສີສຸລິດ ແລະ ສະຫາຍ ສີຈິ້ນຜິງ. ໂຄງການດັ່ງກ່າວນີ້ ເປັນໂຄງການແຫ່ງສັນຍາລັກມິດຕະພາບລາວ-ຈີນ, ເປັນການເຊື່ອມໂຍງແຜນຍຸດທະສາດການຫັນຈາກປະເທດ ທີ່ບໍ່ມີຊາຍແດນຕິດກັບທະເລ ມາເປັນປະເທດເຊື່ອມຈອດໃນພາກພື້ນ ແລະ ອະນຸພາກພື້ນ ຂອງ ສປປ ລາວ ແລະ ເປັນການສະໜັບສະໜູນຂໍ້ລິເລີ່ມໜຶ່ງແລວ-ໜຶ່ງເສັ້ນທາງ ຂອງ ສປ ຈີນ. ສອງຝ່າຍ ຈະສືບຕໍ່ສົ່ງເສີມສາຍພົວພັນລະຫວ່າງສອງປະເທດລາວ-ຈີນ ໃຫ້ໄດ້ຮັບການພັດທະນາ ແລະ ມີໝາກຜົນອັນໃຫຍ່ຫຼວງໃນທຸກລະດັບ ແລະ ທຸກວຽກງານ, ໂດຍສະເພາະແມ່ນສາຍພັກ, ຊຶ່ງທັງສອງພັກລາວ ແລະ ຈີນ ໄດ້ໃຫ້ ການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນການສ້າງສາພັດທະນາປະເທດຊາດໃນປັດຈຸບັນຢ່າງສະເໝີຕົ້ນສະເໝີປາຍ.