ຄວາມກົດດັນຕໍ່າຂອງອາກາດຮ້ອນ ໄດ້ປົກຄຸມຢູ່ທຸກພາກຂອງ ປະເທດລາວ ສົມທົບກັບຍ່ອມຄວາມກົດດັນອາກາດຕໍ່າທີ່ປົກຄຸມຢູ່ເຂດ ພາກເໜືອຂອງປະເທດຫວຽດນາມ, ໃນເວລາ 07:00 ໂມງຂອງວັນທີ 30 ມີຖຸນາ 2022 ພາຍຸດີເປຊັນ ທີ່ເຄື່ອນທີ່ຢູ່ເຂດທະເລຈີນໃຕ້ ໄດ້ເພີ່ມກໍາລັງ ແຮງຂຶ້ນກາຍເປັນພາຍຸເຂດຮ້ອນ ແລະ ມີຈຸດສູນກາງຢູ່ເສັ້ນຂະໜານທີ 17.6 ອົງສາເໜືອ ແລະ ເສັ້ນແວງທີ 115.3 ອົງສາຕາເວັນອອກ ກໍາລັງ ເຄື່ອນທີ່ໄປທາງທິດເໜືອຕາເວັນອອກສ່ຽງເໜືອ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ຫາ ປານກາງໃນແຕ່ລະພາກ ແລະ ຕົກໜັກ ພ້ອມມີລົມ ພັດແຮງຢູ່ບາງທ້ອງຖິ່ນ ແຂວງພາກເໜືອ ແລະ ພາກກາງ.

ພະຍາກອນອາກາດ ເວລາ 7:00 ໂມງຂອງວັນທີ 30/6/2022 ເຖິງ ເວລາ 7:00 ໂມງ ວັນທີ 1/7/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານ ກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການ ປົກຫຸ້ມຂອງຝົນເທົ່າກັບ 75% ຂອງພາກ. ອຸນຫະພູມໃນລະຫວ່າງ 19-31 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ, ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກກໜັກ ພ້ອມມີລົມ ພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນລະຫວ່າງ 21-35 ອົງສາ.

-ນະຄອນຫລວງວຽງຈັນ: ອາກາດຮ້ອນ, ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງຢູ່ບາງບໍລິເວນ ພ້ອມມີ ລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 25-36 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນລະຫວ່າງ 22-35 ອົງສາ.

-ແຂວງໄຊສົມບູນ: ຈະມີຝົນຕົກໃນລະດັບຄ່ອຍ ຫາ ປານກາງ ພ້ອມມີ ລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 17-28 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 24-35 ອົງສາ.

-ເຂດພູພຽງບໍລະເວນ: ຈະມີຝົນຕົກໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 50%. ອຸນຫະພູມໃນລະຫວ່າງ 17-28 ອົງສາ.

Daily Exchange Rates 30/06/2022

ພາຍຫຼັງປະເທດຊາດພວກເຮົາໄດ້ຮັບການປົດປ່ອຍ ໃນປີ 1975 ໂດຍສະເພາະແມ່ນພາຍຫຼັງທີ່ພັກເຮົາ ໄດ້ລິເລີ່ມນໍາພາການດໍາເນີນການປ່ຽນແແປງໃໝ່ນັບແຕ່ປີ 1986 ເປັນຕົ້ນມາ, ພັກເຮົາໄດ້ວາງແນວທາງ ຫັນເປັນອຸດສາຫະກໍາ ແລະ ທັນສະໄໝ ເພື່ອພັດທະນາປະເທດຊາດ ກ້າວຂຶ້ນຕາມທິດຍືນຍົງ ສູ່ຈຸດໝາຍສັງຄົມນິຍົມ. ໃນນີ້, ແຂວງອັດຕະປື ກໍເລີ່ມນໍາໃຊ້ໄຟຟ້າດ້ວຍຈັກປັ່ນໄຟ ທີ່ຂຶ້ນກັບພະແນກ ອຸດສາຫະກໍາ-ຫັດຖະກໍາ ແລະ ຫ້ອງວ່າການປົກຄອງແຂວງ ເປັນຜູ້ຄຸ້ມຄອງ ເພື່ອຮັບໃຊ້ເຂດສໍານັກງານອົງການທີ່ຈໍາເປັນ ແລະ ແບ່ງການຊົມໃຊ້ເປັນແຕ່ລະຄຸ້ມບ້ານໃຊ້ 4 ຊົ່ວໂມງຕໍ່ຄືນ ໂດຍເລີ່ມແຕ່ 18:00 ໂມງ – 21:00 ໂມງ. ໄລຍະຕໍ່ມາໄດ້ມອບໃຫ້ພະແນກອຸດສາຫະກໍາ-ຫັດຖະກໍາ ກໍຄື: ພະແນກພະລັງ ງານ ແລະ ບໍ່ແຮ່ ປັດຈຸບັນ ເປັນຜູ້ຄຸ້ມຄອງ ຈົນມາຮອດທ້າຍປີ 1999 ລັດວິສາຫະກິດໄຟຟ້າລາວ ຈຶ່ງໄດ້ສ້າງຕັ້ງສູນບໍລິການໄຟຟ້າທີ່ຂຶ້ນກັບສາຂາແຂວງຈໍາປາສັກ ແລະ ມາຮອດປີ 2022 ຫຼັງຈາກໂຄງການກໍ່ສ້າງເຂື່ອນໄຟຟ້າຫ້ວຍເຫາະສໍາເລັດ, ລັດວິສາຫະກິດໄຟຟ້າລາວ ເຫັນໄດ້ຄວາມຈໍາເປັນຂອງແຂວງ ອັດຕະປື ເພື່ອການພັດທະນາເສດຖະກິດ, ວັດທະນະທໍາ-ສັງຄົມ ຂອງແຂວງ ຈຶ່ງໄດ້ຊອກຫາແຫຼ່ງທຶນ ພ້ອມທັງດໍາເນີນການກໍ່ສ້າງຕາຂ່າຍ 22 ກິໂລໂວນ, ຈາກເຂື່ອນໄຟຟ້າຫ້ວຍເຫາະ ເພື່ອລໍາລຽງພະລັງງານມາຮັບໃຊ້ 2 ຕົວເມືອງຄື: ເມືອງສາມັກຄີໄຊ ແລະ ເມືອງໄຊເສດຖາ ຈໍານວນ 60 ກິໂລເມັດ ໃນປີ 1998.

ປີ 2004-2005 ລັດວິສາຫະກິດໄຟຟ້າລາວ ໄດ້ລົງທຶນກໍ່ສ້າງສະຖານີ ແລະ ສາຍສົ່ງ 115 ກິໂລໂວນ, ຈາກສະຖານີ ບ້ານນາ ເມືອງປະທຸມພອນ ແຂວງຈໍາປາສັກ ຫາ ສະຖະນີສະເພົາທອງ ເມືອງ ສາມັກຄີໄຊ ແຂວງອັດຕະປື ເພື່ອສະໜອງໄຟຟ້າໃຫ້ທົ່ວແຂວງ, ມີລວງຍາວ 112,5 ກິໂລແມັດ ແລະ ພ້ອມຂະຫຍາຍຕາຂ່າຍໄຟຟ້າລົງສູ່ເຂດຊົນນະບົດຫ່າງໄກສອກຫຼີກຕື່ມອີກ. ມາຮອດວັນທີ 1 ມິຖຸນາ 2006 ລັດວິສາຫະກິດໄຟຟ້າລາວ ສາຂາແຂວງອັດຕະປື ຈຶ່ງໄດ້ສ້າງຕັ້ງຂຶ້ນຢ່າງເປັນທາງການ ແລະ ໄດ້ມີການມອບໂອນ ລະຫວ່າງໄຟຟ້າລາວ ສາຂາແຂວງອັດຕະປື ກັບ ກະຊວງອຸດສາຫະກໍາ-ຫັດຖະກໍາ ຊຶ່ງເອີ້ນວ່າ: (ກະຊວງພະລັງງານ ແລະ ບໍ່ແຮ່) ປັດຈຸບັນ, ມີສາຍຕັ້ງຂຶ້ນກັບລັດວິສາຫະກິດໄຟຟ້າລາວ (ສໍານັກງານໃຫຍ່) ແລະ ສາຍຂວາງຂຶ້ນກັບ ພະແນກພະລັງງານ ແລະ ບໍ່ແຮ່ ແຂວງ ໂດຍມີພາລະບົດບາດ ແລະ ໜ້າທີ່ໃນການຄຸ້ມຄອງບໍລິການ ເພື່ອສະໜອງໄຟຟ້າໃຫ້ມີຄວາມຮັບປະກັນໃຫ້ແກ່ສັງຄົມ ກໍຄືປະຊາຊົນລາວບັນດາເຜົ່າຊາວແຂວງອັດຕະປື.

ນັບແຕ່ນັ້ນມາ, ລັດຖະບານກໍຄື ອໍານາດການປົກຄອງຂັ້ນແຂວງ ກໍໄດ້ໃຫ້ຄວາມສໍາຄັນ ແລະ ມີນະໂຍບາຍໃນດ້ານການພັດທະນາ ແລະ ຂະຫຍາຍລະບົບຕາຂ່າຍໃຫ້ທົ່ວເຖິງ. ໃນປັດຈຸບັນນີ້, ໄຟຟ້າລາວ ສາຂາແຂວງອັດຕະປືພວກເຮົາ ແມ່ນໄດ້ລໍາລຽງໄຟຟ້າເພື່ອມາຮັບໃຊ້ ແຂວງອັດຕະປື ຊຶ່ງລວມມີ 5 ແຫຼ່ງຄື: ຈາກສະຖານີສະເພົາທອງ, ເຂື່ອນໄຟຟ້າຫ້ວຍເຫາະ, ເຂື່ອນໄຟຟ້າຫ້ວຍສະໝອງ, ລະບົບຕາຂ່າຍ ເມືອງປະທຸມພອນ ແລະ ເມືອງປາກຊ່ອງ ແຂວງຈໍາປາສັກ ແລະ ຈາກ ສສ ຫວຽດນາມ ເພື່ອຮັບໃຊ້ເຂດບໍ່ຄໍາວັງຕັດ 15 ເມກາວັດ, ປະຊາຊົນໄດ້ຊົມໃຊ້ໄຟຟ້າທຸກຂົງເຂດຮອດປີ 2022 ເທົ່າກັບ 96%, ທຽບໃສ່ຫຼັງຄາເຮືອນ 5 ຕົວເມືອງ ແມ່ນໄດ້ 100% ແລະ ໃນ 141 ບ້ານ, ມີ 29.251 ຄົວເຮືອນ. ນອກຈາກນີ້, ຍັງໄດ້ປັບປຸງໂຄງຮ່າງການຈັດຕັ້ງຄືນໃໝ່ໃນປີ 2021 ເພື່ອສະດວກໃນການບໍລິການຄຸ້ມຄອງຢູ່ຂັ້ນແຂວງ ແລະ 5 ສູນບໍລິການໄຟຟ້າປະຈໍາໃນ 5 ຕົວເມືອງສໍາເລັດໂດຍພື້ນຖານ ແລະ ໄດ້ມອບພັນທະອາກອນໃນແຕ່ລະປີ ສະເລ່ຍ 10.890.979.313 ກີບຕໍ່ປີ.

ຕະຫຼອດໄລຍະເວລາ 16 ປີທີ່ຜ່ານມາ, ໄຟຟ້າລາວ ສາຂາແຂວງອັດຕະປື ບໍ່ພຽງແຕ່ເຮັດບົດບາດອັນສໍາຄັນໃນການຄຸ້ມຄອງການບໍລິການທີ່ມີຄວາມໝັ້ນຄົງເທົ່ານັ້ນ. ແຕ່ຫາກຍັງແມ່ນຜູ້ດໍາເນີນທຸລະກິດ, ຜູ້ໃຫ້ການສະໜອງການບໍລິການກະແສໄຟຟ້າເພື່ອການຊົມໃຊ້ຢູ່ພາຍໃນສັງຄົມທີ່ມີຄຸນນະພາບສູງ ຊຶ່ງມາຮອດປັດຈຸບັນນີ້, ໄຟຟ້າລາວສາມາດສະໜອງໄຟຟ້າ ຮັບໃຊ້ໄດ້ 100%, ນອກຈາກນີ້, ການຜະລິດກະແສໄຟຟ້າ ຢູ່ແຂວງອັດຕະປື ຍັງເຮັດບົດບາດເປັນຜູ້ສົ່ງອອກ ແລະ ກາຍເປັນຫົວໜ່ວຍທຸລະກິດພາກລັດທີ່ສໍາຄັນໃນການສ້າງລາຍຮັບງົບປະມານໃນຫຼາຍປີຜ່ານມາຈົນເຖິງປັດຈຸບັນ.

ໂດຍລວມແລ້ວ, ໃນ 16 ປີທີ່ຜ່ານມາ, ໄຟຟ້າລາວ ສາຂາແຂວງອັດຕະປື ໄດ້ມີຜົນງານຫຼວງຫຼາຍທີ່ສຸດ ຊຶ່ງຜົນງານທີ່ມີລັກສະນະເປັນພື້ນຖານກວ່າໝູ່ໃນຊຸມປີທີ່ຜ່ານມານັ້ນ ກໍແມ່ນໄດ້ເປັນເຈົ້າການຈັດຕັ້ງຜັນຂະຫຍາຍແນວທາງຫັນເປັນອຸດສາຫະກໍາ ແລະ ທັນສະໄໝຂອງພັກ, ແຜນຍຸດທະສາດກ່ຽວກັບການພັດທະນາວຽກງານພະລັງງານຂອງລັດຖະບານກໍຄືຂອງແຂວງດ້ວຍຄວາມຕັ້ງໜ້າ ແລະ ມີລະດັບການຂະຫຍາຍຕົວທີ່ແຂງແຮງ, ຕໍ່ເນື່ອງ ແລະ ໜັກແໜ້ນ, ໂດຍສະເພາະແມ່ນໃນຊຸມປີແຫ່ງການດໍາເນີນການພັດທະນາປະເທດຊາດຕາມແນວທາງປ່ຽນແປງໃໝ່, ພາຍໃຕ້ການນໍາພາຂອງພັກ, ຂະ ແໜງອຸດສາຫະກໍາໄຟຟ້າ ແລະ ລັດວິສາຫະກິດໄຟຟ້າລາວ ໄດ້ເປັນຜູ້ເຮັດບົດບາດທີ່ສຳຄັນ ແລະ ມີລັກສະນະເປັນພື້ນຖານ ໃນການພັດທະນາເສດຖະກິດ-ສັງຄົມຂອງຊາດ ແລະ ຂອງແຂວງອັດຕະປື.

ໄດ້ກາຍເປັນຂະແໜງເສດຖະກິດ ທີ່ເຮັດບົດບາດເປັນຜູ້ເປີດຊ່ອງທາງໃນລະບົບເສດຖະກິດແຫ່ງຊາດ, ເສດຖະກິດຂອງແຂວງ ເປັນເຄື່ອງມືທີ່ສໍາຄັນໃນການມ້າງເສດຖະກິດທຳມະຊາດ, ເຄິ່ງທໍາມະຊາດ ໄປສູ່ເປັນເສດຖະກິດຜະລິດເປັນສິນຄ້າ, ການຫັນປ່ຽນແບບວິທີການຜະລິດ, ການພັດທະນາຊົນນະບົດ, ວຽກງານ 3 ສ້າງ, ການປັບປຸງ, ຍົກລະດັບຊີວິດການເປັນຢູ່ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງຕັ້ງໜ້າ.

ຄຽງຄູ່ກັບຜົນສຳເລັດທີ່ຍາດມາໄດ້ ກໍຍັງມີສິ່ງທ້າທາຍຫຼາຍດ້ານຕໍ່ກັບການດຳເນີນວຽກງານວິສາຫະກິດ ໂດຍສະເພາະໃນໄລຍະທີ່ສະພາບເສດຖະກິດ-ການເງິນ-ສັງຄົມ-ເຕັກໂນໂລຊີ ກຳລັງປ່ຽນແປງ ແລະ ເຕີບໂຕໄປຢ່າງໄວວາ, ພະນັກງານ-ກຳມະກອນ ຕ້ອງໄດ້ເອົາໃຈໃສ່ເພີ່ມທະວີຄວາມເສຍສະຫຼະທາງດ້ານເຫື່ອແຮງ ແລະ ສະຕິປັນຍາເພື່ອປະກອບສ່ວນເຂົ້າໃນການສ້າງສາພັດທະນາ ລັດວິສາຫະກິດ ໄຟຟ້າລາວ ໂດຍສະເພາະ ລັດວິສາຫະກິດ ໄຟຟ້າລາວ ສາຂາແຂວງອັດຕະປື ໃຫ້ກາຍເປັນຫົວໜ່ວຍວິສາຫະກິດທີ່ເຂັ້ມແຂງ ແລະ ເປັນກຳລັງຫຼັກຂອງແຂວງ ແລະ ຂອງຊາດ ແລະ ຖືສໍາຄັນວຽກງານກວດກາໃຫ້ມີປະສິດທິພາບ ແລະ ປະສິດທິຜົນສູງ, ສົ່ງເສີມສິ່ງທີ່ດີ, ຕັ້ງໜ້າຊົມເຊີຍຜູ້ດີເດັ່ນ, ເດັດດ່ຽວປະຕິບັດວິໃນຕໍ່ຜູ້ກະທໍາຜິດ ແລະ ເພີີ່ມທະວີຢ່າງຈິງຈັງຕໍ່ວຽກງານວິສະເພາະເຊັ່ນ: ສືບຕໍ່ການບໍາລຸງຮັກສາສ້ອມແປງລະບົບຕາຂ່າຍ 22 kv ຊຶ່ງປັດຈຸບັນ ຟຟລ ສາຂາແຂວງອັດຕະປື ມີລະບົບຕາຂ່າຍໄຟຟ້າຄື: ມີສະຖານີໄຟຟ້າ 115/22 kv ຈໍານວນ 1 ແຫ່ງ, ມີໝໍ້ແປງ 40 MVA ຈໍານວນ 2 ໜ່ວຍ, ລະບົບຕາຂ່າຍ 22 ກວ ລວມມີ 7 Feeder, ມີລວງຍາວຕາຂ່າຍແຮງກາງ 22 ກວ ແມ່ນ 1.076 km/ວົງຈອນ, ປ້ອມໝໍ້ແປງ 22/0,4 kv ມີ 579 ໜ່ວຍ, ໝໍ້ນັບໄຟທັງໝົດມີ 34.005 ໜ່ວຍ, ເອົາໃຈໃສ່ກວດກາ, ສ້ອມແປງໄຟຕົກ-ໄຟມອດ, ການຈົດໄຟ-ເກັບເງິນທວງໜີ້ສິນໃຫ້ໄດ້ດີ, ການຈົດເລກໝໍ້ນັບໄຟຖືກຕ້ອງຊັດເຈນຕາມຮອບວຽນ ຫຼີກລ່ຽງການຈົດເລກຜິດພາດ ແລະ ຄາດເດົາ. ພ້ອມດຽວກັນ ຍັງໃຫ້ສືບຕໍ່ເອົາໃຈໃສ່ວຽກງານວາງແຜນລະບົບ ແລະ ວຽກງານຄຸ້ມຄອງລະບົບ-ບໍລິການແມ່ນໃຫ້ດີທີ່ສຸດໂດຍສະເພາະແມ່ນການຄຸ້ມຄອງພະລັງງານຕົກເຮ່ຍໃຫ້ຢູ່ໃນເກນປົກກະຕິ.

ຂ່າວ-ພາບ: ເກດສະໜາ ແກ້ວສຸວັນນະແສງ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ລົງຢ້ຽມຢາມຊຸກຍູ້ການພັດທະນາ ແລະ ການຜະລິດ ຢູ່ 5 ຈຸດໃນ 2 ເມືອງ ຂອງນະຄອນຫຼວງວຽງຈັນ (ນວ) ຄື: ເມືອງຫາດຊາຍຟອງ ແລະ ເມືອງໄຊທານີ, ໃນວັນທີ 29 ມິຖຸນານີ້ ຊຶ່ງມີທ່ານ ອານຸພາບ ຕຸລາລົມ ເລຂາຄະນະພັກ ນວ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງານເງິນ, ທ່ານ ອາດສະພັງທອງ ສີພັນດອນ ເຈົ້າຄອງ ນວ ແລະ ບັນດາທ່ານ ຮອງລັດຖະມົນຕີກະຊວງກ່ຽວຂ້ອງ ເຂົ້າຮ່ວມຄະນະ.

ທ່ານ ທອງລຸນ ສີສຸລິດ ໄດ້ເດີນທາງໄປຢ້ຽມຢາມ ແລະ ຊຸກຍູ້ການຜະລິດ ທີ່ສວນໝາກພ້າວນໍ້າຫອມ ຂອງທ່ານ ສົມພອນ ຂຸນນະເສນ ປະທານກຸ່ມການຜະລິດກະສິກຳເປັນສິນຄ້າ ກຸ່ມ 6 ທ່າພະ ເມືອງຫາດຊາຍຟອງ.

ໃນໂອກາດນີ້, ທ່ານ ບຸນລອດ ຄຳດີ ຮອງປະທານກຸ່ມການຜະລິດກະສິກໍາເປັນສິນຄ້າ ກຸ່ມ 6 ທ່າພະ ກໍໄດ້ລາຍງານວ່າ: ປັດຈຸບັນ, ກຸ່ມການຜະລິດ ມີສະມາຊິກ 142 ຄອບຄົວ ຊຶ່ງກິດຈະກຳສະເພາະ ແມ່ນໄດ້ລ້ຽງງົວລາດພື້ນບ້ານ 50 ໂຕ, ປຸກໝາກພ້າວນໍ້າຫອມ ໃນດິນ 2 ຕອນ, ມີເນື້ອທີ່ 4,5 ເຮັກຕ້າ, ປູກແລ້ວ ມີຈໍານວນ 1.200 ຕົ້ນ, ປູກເຂົ້ານາປີ ເປັນພັນເຂົ້າໜຽວທ່າດອກຄໍາ 8 ສໍາເລັດແລ້ວ ຈຳນວນ 180 ໄລ່ ແລະ ຍັງຈະໄດ້ປູກຕື່ມອີກໃນເນື້ອທີ 30 ໄລ່.

ນອກນີ້, ທ່ານ ຍັງໄດ້ລາຍງານເຖິງຂໍ້ສະດວກ ແລະ ຂໍ້ຫຍຸ້ງຍາກ ພ້ອມທັງມີຂໍ້ສະເໜີໃຫ້ທາງຂັ້ນເທິງພິຈາລະນາຊ່ວຍເຫຼືອ ເປັນຕົ້ນ ແມ່ນແຫຼ່ງທຶນກູ້ຢືມດອກເບ້ຍຕໍ່າ ເພື່ອເປັນທຶນໃນການດໍາເນີນງານຂອງສະຫະກອນ ເພື່ອພັດທະນາສະຫະກອນໃຫ້ຂະຫຍາຍຕົວຂຶ້ນເລື້ອຍໆ ແລະ ອື່ນໆ.

ໂອກາດດຽວກັນ, ທ່ານ ປະທານປະເທດ ກໍໄດ້ກ່າວຊົມເຊີຍ ແລະ ໃຫ້ກຳລັງໃຈ ສະມາຊິກກຸ່ມ 6 ທ່າພະ, ພ້ອມທັງຊີ້ນໍາໃຫ້ພາກລັດ ກໍຄືພາກສ່ວນກ່ຽວຂ້ອງ ເອົາໃຈໃສ່ຊຸກຍູ້ໃຫ້ການຊ່ວຍເຫຼືອໃນດ້ານຕ່າງໆ ເປັນຕົ້ນ ວິຊາການ ແລະ ອື່ນໆ. ພ້ອມນີ້, ທ່ານ ປະທານປະເທດ ກໍໄດ້ກ່າວຈະມອບຂອງຂວັນ ເປັນຄອມພິມເຕີ ຈຳນວນ 3 ຊຸດ ໃຫ້ແກ່ສະຫະກອນກຸ່ມການຜະລິດກະສິກຳເປັນສິນຄ້າ ອີກດ້ວຍ.

ຈາກນັ້ນ, ທ່ານ ປະທານປະເທດ ກໍໄດ້ໄປຢ້ຽມຢຍາມ ແລະ ຊຸກຍູ້ການຜະລິດ ທີ່ໂຮງງານຜະລິດໝາກຖົ່ວດາວອິນຄາ ຂອງບໍລິສັດ ໄໝສະຫວັນ ທີ່ບ້ານສາລາຄຳ ເມືອງຫາດຊາຍຟອງ. ທ່ານ ນາງ ວິລະວົງ ອິນທິສານ ຕາງໜ້າບໍລິສັດ ລາຍງານວ່າ: ຜົນງານການປະຕິບັດໃນປີຜ່ານມາ ໄດ້ຜະລິດຖົ່ວດາວອິນຄາ ຈຳນວນ 128 ໂຕນ ແລະ ສົ້ມພໍດີ 20,5 ໂຕນ, ເກັບຊື້ຈາກປະຊາຊົນ 105 ໂຕນ, ໄດ້ສົ່ງອອກຜະລິດຕະພັນ 17 ຄັ້ງ ລວມ 91,14 ໂຕນ ແລະ ຍັງສົ່ງອອກນໍ້າມັນຖົ່ວດາວ ອິນຄາ 10.000 ລິດ, ລວມມູນຄ່າ 539.282 ໂດລາ ແລະ ຂາຍພາຍໃນ 715.100.000 ກີບ.

ນອກນີ້, ກໍໄດ້ລາຍງານໃຫ້ຮູ້ເຖິງຂໍ້ສະດວກ ແລະ ຂໍ້ຫຍຸ້ງຍາກ ທັງໄດ້ມີຂໍ້ສະເໜີ ເປັນຕົ້ນ ແມ່ນໃຫ້ຂັ້ນເທິງພິຈາລະນາຊ່ວຍເຫຼືອໃຫ້ບໍລິສັດ ໄດ້ເຂົ້າຮ່ວມໂຄງການສົ່ງເສີມ ຫຼື ຮັບຊື້ຜົນຜະລິດກະສິກຳ ໃນໂຄງການການຄ້າເສລີລາວ-ຈີນ. ພ້ອມທັງສະເໜີໃຫ້ຂັ້ນເທິງຊ່ວຍແກ້ໄຂດ້ານບັນຫາການຂົນສົ່ງ ເພື່ອສົ່ງອອກສິນຄ້າສູ່ຕະຫຼາດສາກົນ.

ໄລຍະຜ່ານມາ, ບໍລິສັດ ໄດ້ສົ່ງຜະລິດຕະພັນສິນຄ້າ ເປັນຕົ້ນຜະລິດຕະພັນຈາກຖົ່ວດາວອິນຄາ, ພິກໄທ, ສົ້ມພໍດີ, ກ້ວຍຕາກ, ຊາໃບມອນ, ຊາຂຽວ, ຊາສິງໄຄ ແລະ ຊາສະໝຸນໄພອື່ນໆ ອອກໄປຫຼາຍປະເທດເຊັ່ນ: ຝຣັ່ງ, ອີຕາລີ, ອາເມຣິກາ, ໄຕ້ຫວັນ (ຈີນ), ມາເລເຊຍ, ໄທ …. ໂອກາດນີ້, ທ່ານ ປະທານປະເທດ ກໍໄດ້ກ່າວໃຫ້ກຳລັງໃຈ ແລະ ສະແດງຄວາມຊົມເຊີຍ ທີ່ບໍລິສັດ ໄດ້ນໍາຜົນຜະລິດກະສິກຳ ເຂົ້າມາຜະລິດເປັນສິນຄ້າທີ່ມີຄຸນນະພາບ ໄດ້ມາດຕະຖານ ແລະ ສາມາດສົ່ງອອກຂາຍຕ່າງປະເທດໄດ້. ພ້ອມນີ້, ທ່ານ ຍັງເນັ້ນໃຫ້ພາກລັດ ກໍຄືຂະແໜງກ່ຽວຂ້ອງພິຈາລະນາ ແກ້ໄຂອຳນວຍຄວາມສະດວກດ້ານຕ່າງໆ ຕາມຄວາມຖືກຕ້ອງ ເໝາະສົມ ເພື່ອເປັນການຊຸກຍູ້ການຜະລິດ ແລະ ສົ່ງເສີມການສົ່ງອອກສິນຄ້າທີ່ເປັນຜະລິດຕະພັນຂອງລາວເຮົາ.

ໃນການຢ້ຽມຢາມ ຊຸກຍູ້ການພັດທະນາ ແລະ ການຜະລິດໃນ, ທ່ານ ທອງລຸນ ສີສຸລິດ ຍັງໄດ້ຢ້ຽມຢາມ ດ່ານສາກົນ ທ່າບົກ-ທ່ານາແລ້ງ ແລະ ເຂດໂລຈິສຕິກ, ທ່ານ ຈັນທອນ ສິດທິໄຊ ປະທານ ບໍລິສັດ ວຽງຈັນໂລຈິສຕິກພາດ ຈຳກັດ ແລະ ຄະນະຕ້ອນຮັບຢູ່ທີ່ນີ້ ກໍໄດ້ພ້ອມກັນລາຍງານເຖິງຄວາມເປັນມາ ແລະ ການຈັດຕັ້ງປະຕິບັດວຽກງານ ລວມທັງຂໍ້ສະດວກ, ຂໍ້ຫຍຸ້ງຍາກ ແລະ ຜົນປະໂຫຍດທາງກົງ ແລະ ທາງອ້ອມ ທີ່ປະເທດຊາດຈະໄດ້ຮັບ ເປັນຕົ້ນ ສະຖິຕິ 5 ເດືອນຕົ້ນປີ 2022 ໃນການບໍລິການ ຜ່ານແດນທາງລົດໄຟ ຊຶ່ງໄດ້ບໍລິການໃຫ້ແກ່ລົດຂົນສົ່ງ 50.857 ຖ້ຽວຄັນ, ບໍລິການຕູ້ສິນຄ້າລົດໄຟ 13.987 ຕູ້, ບໍລິມາດຕູ້ສິນຄ້າທັງໝົດຄິດເປັນຫົວໜ່ວຍ 20 ຟຸດ ແມ່ນ 42.591 TEU (Twenty foot Equivalent Unit), ເກັບພັນທະຕູ້ສິນຄ້າຜ່ານແດນເຂົ້າງົບປະມານໄດ້ 8.076.700.000 ກີບ ແລະ ຜົນການຈັດເກັບລາຍຮັບເຂົ້າງົບປະມານ (ພາສີອາກອນ ແລະ ຕາມລັດຖະບັນຍັດ 002/ປທ ນັບແຕ່ຕົ້ນປີຮອດວັນທີ 19/6/2022 ປະຕິບັດໄດ້ 1.010.209.396.598 ກີບ ເທົ່າກັບ 38,08% ຂອງແຜນການປີ.

ໂອກາດນີ້, ທ່ານ ທອງລຸນ ສີສຸລິດ ກໍໄດ້ເນັ້ນວ່າ: ໃຫ້ພາກລັດຖະບານ ກໍຄືຂະແໜງກ່ຽວຂ້ອງ ສົມທົບກັບບໍລິສັດ ຄົ້ນຄວ້າ, ວິໄຈ ເພື່ອສ້າງນິຕິກໍາກ່ຽວກັບໂລຈິສຕິກ ແນໃສ່ເຮັດໃຫ້ການຄຸ້ມຄອງເຂດໂລຈິສຕິກ ມີປະສິດທິພາບ ແລະ ປະສິດຕິຜົນ; ໃຫ້ສົມທົບກັນຄົ້ນຄວ້າ ສ້າງກົນໄກການຄຸ້ມຄອງ ແລະ ຈັດເກັບງົບປະມານ ທີ່ກ່ຽວຂ້ອງກັບກິດຈະກໍາຕ່າງໆ ດ່ານສາກົນແຫ່ງນີ້ ໃຫ້ເປັນກົນໄກທີ່ລວມສູນ; ໃຫ້ພາກສ່ວນກ່ຽວຂ້ອງຄົ້ນຄວ້າກ່ຽວກັບຫຼັດການ, ວິທີການຄຸ້ມຄອງ, ຂໍ້ສະດວກ ແລະ ຂໍ້ຫຍຸ້ງຍາກ, ສິ່ງທີ່ຄວນເຮັດ ເພື່ອສ້າງນິຕິກໍາຄຸ້ມຄອງກ່ຽວກັບການຄ້າຊາຍແດນ. ນອກນີ້, ຍັງໃຫ້ພ້ອມກັນຄົ້ນຄວ້າ, ປະສານງານ ໃນການຫາລືກ່ຽວກັບການເຊື່ອມຈອດທາງລົດໄຟ ເພື່ອແກ້ໄຂບັນຫາການຂົນສົ່ງສິນຄ້າໃຫ້ໄດ້ດີກວ່າເກົ່າ ເພື່ອຮອງຮັບກັບການເກັບສິນຄ້າ, ຂົນສົ່ງສິນຄ້າ ໃນຕໍ່ໜ້າທີ່ຈະມີການພົວພັນກັບຫຼາຍປະເທດໃຫ້ໄດ້ດີ, ມີຄຸນນະພາບ, ໄດ້ປະສິດທິພາບ ແລະ ປະສິດທິຜົນ, ສ້າງປະໂຫຍດອັນໃຫຍ່ຫຼວງມາສູ່ປະເທດຊາດ.

ໃນຕອນບ່າຍຂອງວັນດຽວກັນ, ທ່ານ ປະທານປະເທດ ກໍໄດ້ເດີນທາງໄປຢ້ຽມຊົມ ໂຄງການກໍ່ສ້າງ ພິພິທະພັນ ສິລະປະລາວສະໄໝໃໝ່ ຂອງທ່ານ ພິສິດ ໄຊຍະທິດ ທີ່ເມືອງໄຊທານີ ແລະ ຍັງໄປຢ້ຽມຢາມຊຸກຍູ້ການຜະລິດ ທີ່ສວນໝາກໄມ້ຂອງ ທ່ານ ມາມົ້ວ ຢູ່ບ້ານດວງບຸດດີ ເມືອງໄຊນານີ ນວ.

ຂ່າວ-ພາບ: ສຸກສະຫວັນ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ວັນທີ 29 ມິຖຸນາ 2022 – ໃນມື້ນີ້, ອົງການພັດທະນາສາກົນຂອງ ສະຫະລັດອາເມລິກາ (USAID) ໄດ້ມອບອຸປະກອນລະບົບຄວາມເຢັນເກັບຮັກສາວັກຊີນ ເເລະ ອຸປະກອນໄອທີ ມູນຄ່າປະມານ 150,000 ໂດລາສະຫະລັດ ໃຫ້ເເກ່ ກະຊວງສາທາລະນະສຸກ ຢ່າງເປັນທາງການ ເພື່ອຊ່ວຍຜັນຂະຫຍາຍວຽກງານສັກວັກຊີນກັນພະຍາດ ໂຄວິດ-19 ໃນ ສປປ ລາວ, ໂດຍສະເພາະໃນຊຸມຊົນຫ່າງໄກສອກຫຼີກ.

ພິທີມອບຮັບອຸປະກອນດັ່ງກ່າວ, ເຊີ່ງ​ສະ​ໜັບ​ສະ​ໜູນໂດຍ ອົງການຢູນິເຊັບ, ເເມ່ນໄດ້ຈັດຂຶ້ນທີ່ ຫ້ອງການໂຄງການສັກຢາກັນພະຍາດແຫ່ງຊາດ ເເລະ ເຂົ້າຮ່ວມໂດຍ ທ່ານ ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ, ທ່ານ ຄາເລີນ ຮີວ, ວ່າການເເທນຜູ້ຕາງໜ້າອົງການ USAID ປະຈໍາ ສປປ ລາວ ເເລະ ທ່ານນາງ ຣິເອະ ທາເຄຊຶ, ວ່າການເເທນຫົວຫນ້າ ພະແນກ ສຸຂະພາບ, ອົງການຢູນິເຊັບ ປະຈໍາ ສປປ ລາວ.

ໃນງານພິທີມອບຮັບດັ່ງກ່າວ, ທ່ານ ດຣ. ພອນປະເສີດ ອຸນາພົມ ໄດ້ສະເເດງຄວາມຂອບໃຈໄປຍັງ ອົງການ USAID ເເລະ ລັດຖະບານ ສະຫະລັດອາເມລິກາ ສຳລັບການຊ່ວຍເຫຼືອ, ພ້ອມດ້ວຍ ອົງການຢູນິເຊັບ ທີ່ໄດ້ໃຫ້ການສະໜັບສະໜູນເເກ່ວຽກງານສັກວັກຊີນໃນໄລຍະການເເຜ່ລະບາດຂອງພະຍາດ. ທ່ານ ດຣ. ພອນປະເສີດ ອຸນາພົມ ໄດ້ກ່າວວ່າ: “ດ້ວຍການຊ່ວຍເຫຼືອຈາກຄູ່ຮ່ວມມືສາກົນຂອງພວກເຮົາ, ສປປ ລາວ ສາມາດບັນລຸອັດຕາປົກຄຸມການສັກວັກຊີນໄດ້ຫຼາຍພໍສົມຄວນ ເເລະ ການສະໜັບສະໜູນຈາກ ອົງການ USAID ເປັນການປະກອບສ່ວນອັນສຳຄັນອີກອັນໜຶ່ງໃຫ້ແກ່ວຽກງານຂອງພວກເຮົາ ເພື່ອຮັບປະກັນວ່າ ເດັກນ້ອຍ, ແມ່ ແລະ ທຸກຄອບຄົວ ສາມາດເຂົ້າເຖີງການບໍໍລິການສັກວັກຊີນໄດ້. ທັ້ງໝົດນີ້ກໍ່ເພື່ອປູເສັນທາງໄປສູ່ການບັນລຸເປົ້າໝາຍການໃຫ້ວັກຊີນກັນພະຍາດໂຄວິດ-19 ໃນທົ່ວປະເທດ.”

ອຸປະກອນລະບົບຄວາມເຢັນເກັບຮັກສາວັກຊີນທີ່ໄດ້ມອບນັ້ນປະກອບມີ: ກ່ອງເຢັນເກັບຮັກສາວັກຊີນ ຈຳນວນ 135 ກ່ອງ ເພື່ອຊ່ວຍໃນການຂົນສົ່ງວັກຊີນຈາກສາງ, ພ້ອມດ້ວຍ ກ່ອງບັນຈຸວັກຊີນເເບບບໍ່ຕ້ອງການແຊ່ແຂງ ຈຳນວນ 2000 ກ່ອງ ເພື່ອຊ່ວຍພະນັກງານສາທາລະນະສຸກໃນການຂົນສົ່ງວັກຊີນໄປຈຸດສັກວັກຊີນຕ່າງໆ. ນອກຈາກນີ້, ກ່ອງເຢັນເກັບຮັກສາວັກຊີນທີ່ມອບໃຫ້ນັ້ນ ຍັງສາມາດນຳໃຊ້ເພື່ອເກັບຮັກສາວັກຊີນໃນກໍລະນີສູກເສີນອີກດ້ວຍ, ເຊັ່ນ ໃນກໍລະນີຕູ້ເຢັນເກັບວັກຊີນບໍ່ເຮັດວຽກ. ພ້ອມດຽວກັນ, ອຸປະກອນໄອທີ ມອບໂດຍ ອົງການ USAID ນັ້ນປະກອບມີ: ເຄື່ອງແທັບເລັດ 245 ໜ່ວຍ ເເລະ ຊຸດຄອມພິວເຕີ  ແລະ ເຄື່ອງພິມ 21 ຊຸດ ເພື່ອຊ່ວຍສ້າງຄວາມເຂັ້ມເເຂງໃນການຄຸ້ມຄອງ ແລະ ເກັບກຳຂໍ້ມູນກ່ຽວກັບການສັກວັກຊີນ, ການກວດກາວຽກງານຢູ່ຈຸດສັກວັກຊີນ ແລະ ສະໜັບສະໜູນພະນັກງານສາທາລະນະສຸກໃນການເຂົ້າເຖິງ​ສື່ການຮຽນ ເເລະ ພັດທະນາທັກສະເເບບດິຈິຕອລຕ່າງໆ.

“ອຸປະກອນທີ່ໄດ້ມອບໃນມື້ນີ້ ຈະຊ່ວຍສະໜັບສະໜູນ ກະຊວງສາທາລະນະສຸກ ໃນການເສີມສ້າງລະບົບຄວາມເຢັນສຳລັບການຂົນສົ່ງວັກຊີນ ແລະ ລະບົບຂໍ້ມູນ ທີ່ເປັນໂຄງສ້າງໃຫ້ເເກ່ວຽກງານສັກວັກຊີນທັງໝົດຂອງ ສປປ ລາວ,” ກ່າວໂດຍ ທ່ານ ຄາເລີນ ຮີວ, ວ່າການເເທນຜູ້ຕາງໜ້າອົງການ USAID ປະຈໍາ ສປປ ລາວ. ທ່ານຍັງໄດ້ສະເເດງຄວາມຊົມເຊີຍກັບ ກະຊວງສາທາລະນະສຸກ ໃນການຮັບມືກັບພະຍາດ ໂຄວິດ-19 ແລະ ເນັ້ນໜັກເຖິງຄວາມສຳຄັນຂອງການຮ່ວມມືກັນໃນການຮັບມືກັບພະຍາດດັ່ງກ່າວ: “ພວກເຮົາໄດ້ເຫັນເເລ້ວເຖີງພະລັງຂອງການຮ່ວມມືກັນໃນໄລຍະການແຜ່ລະບາດຂອງພະຍາດ ໃນການຮັກສາຄວາມປອດໄພຂອງປະຊາຊົນລາວ. ສະຫະລັດອາ​ເມລິກາ ມີຄວາມພາກພູມໃຈທີ່ໄດ້ມີສ່ວນຮ່ວມໃນການສະໜັບສະໜູນການແກ້ໄຂຜົນກະທົບຂອງພະຍາດ ໂຄວິດ-19 ຕໍ່ກັບຊີວິດຂອງປະຊາຊົນລາວ.”

ການມອບອຸປະກອນໃນຄັ້ງນີ້ ເປັນສ່ວນໜຶ່ງຂອງການຊ່ວຍເຫຼືອໂດຍລວມຕໍ່ກັບການຮັບມືກັບພະຍາດ ໂຄວິດ-19 ຂອງ ສປປ ລາວ ຈາກອົງການ USAID ໂດຍຜ່ານ ອົງການຢູນິເຊັບ, ເຊີ່ງໃນນີ້ລວມເຖິງການຊ່ວຍເຫຼືອ 1,4 ລ້ານ ໂດລາສະຫະລັດ ໃຫ້ແກ່ ອົງການຢູນິເຊັບ ທີ່ຜ່ານມາເພື່ອສະໜັບສະໜຸນກະຊວງສາທາລະນະສຸກ ໃນການຕິດຕາມ ເເລະ ກວດກາ ລະບົບຄວາມ​​ເຢັນເກັບຮັກສາວັກຊີນ, ການ​ສື່​ສານ​ກັບ​ຊຸມ​ຊົນ​ເພື່ອສ້າງຄວາມເຂົ້າໃຈຕໍ່ການສັກວັກຊີນ ເເລະ ຕິດຕາມເຫດການປະຕິປັກພາຍຫຼັງການ​ສັກວັກຊີນ. ກ່ອນໜ້ານີ້ ອົງການ USAID ກໍຍັງໄດ້ໃຫ້ການຊ່ວຍເຫຼືອ 2 ລ້ານ ໂດລາສະຫະລັດ ໃຫ້ແກ່ ອົງການຢູນິເຊັບ ແລະ ອົງການອານາໄມໂລ ເພື່ອການຈັດຕັ້ງປະຕິບັດງານຂອງຈຸດເກັບຮັກສາວັກຊີນຕ່າງໆໃນແຂວງຫຼວງພະບາງ, ສາລະວັນ, ສະຫວັນນະເຂດ, ອຸດົມໄຊ, ຈຳປາສັກ ແລະ ວຽງຈັນ, ເຊີ່ງມາ​ຮອດ​ປະຈຸ​ບັນເເມ່ນໄດ້ຈັດ​ສົ່ງ ​ແລະ ຕິດ​ຕັ້ງ ອຸປະກອນລະບົບຄວາມ​​ເຢັນເກັບຮັກສາວັກຊີນ​ ​ຢູ່​ບັນດາ​ແຂວງ​ດັ່ງກ່າວເເລ້ວຈຳນວນ 588 ​ເຄື່ອງ, ​ໂດຍຜ່ານ​ການ​ສະໜັບສະໜູນ​ຂອງ ອົງການ USAID, ເພື່ອຊ່ວຍ​ໃຫ້​ບໍລິການ​ສັກ​​ວັກ​ຊີ​ນ​ໃນຂອບເຂດ​ທົ່ວ​ປະ​ເທດ​.

“ອົງການຢູນິເຊັບ ຂໍສະເເດງຄວາມຂອບໃຈໄປຍັງ ອົງການ USAID ສຳລັບການປະກອບສ່ວນອັນລໍ​້າຄ່ານີ້ຕໍ່ກັບຂະບວນການສັກວັກຊີນກັນພະຍາດໃນ ສປປ ລາວ. ວັກຊີນນັ້ນມີບົດບາດອັນສຳຄັນຕໍ່ການຫຼຸດຜ່ອນຈຳນວນກໍລະນີເຈັບປ່ວຍຮ້າຍເເຮງ ເເລະ ເສຍຊີວິດ ຈາກ ໂຄວິດ-19 ໃນປະຈຸບັນ, ເເລະ ບັນດາອຸປະກອນທີ່ໄດ້ມອບນັ້ນ ຈະຊ່ວຍຮັບປະກັນໃຫ້ທຸກຄົນສາມາດເຂົ້າເຖີງວັກຊີນໄດ້, ໂດຍສະເພາະຜູ້ທີ່ມີຄວາມສ່ຽງທີ່ສຸດ,” ກ່າວໂດຍ ທ່ານນາງ ຣິເອະ ທາເຄຊຶ, ວ່າການເເທນຫົວຫນ້າ ພະແນກ ສຸຂະພາບ, ອົງການຢູນິເຊັບ ປະຈໍາ ສປປ ລາວ.

#ອົງການ USAID ສະໜັບສະໜູນ ກະຊວງສາທາລະນະສຸກ ໃນການຜັນຂະຫຍາຍການສັກວັກຊີນກັນພະຍາດ ໂຄວິດ-19 ໃນ ສປປ ລາວ

ມີອາການຄັນຄາຍ ແລະ ລຳຄານກັບອາການເຫຼົ່ານີ້ບໍ່ວ່າຈະເປັນຍ້ອນຍຸງ, ແມງໄມ້ກັດຕອດ ຫຼື ອາການແພ້ອື່ນໆ ມັນແມ່ນການທໍລະມານທີ່ສຸດໃນຄວາມເປັນຈິງຢ່າປ່ອຍໃຫ້ຄັນເປັນເວລາດົນນານ ພວກເຮົາມາຊອກຫາວິທີຮັກສາຜື່ນຄັນກັນດີກ່ວາ.

• ອາບນໍ້າເຢັນ

ຊ່ວຍໄດ້ແທ້ໆ ເພາະວ່າຄວາມເຢັນຈະສາມາດຫຼຸດອາການຄັນ ຫຼື ແຊ່ໃນອ່າງນໍ້າເຢັນໝົດຕົນຕົວເລີຍຍີ່ງເັນການດີ.

• ເຕັງນໍ້າເຢັນ

ດັ່ງທີ່ຂ້າພະເຈົ້າໄດ້ເວົ້າແລ້ວຄວາມເຢັນສາມາດຫຼຸດຜ່ອນອາການຄັນໄດ້ ສະນັ້ນຜູ້ໃດທີ່ບໍ່ອາບນໍ້າເຢັນ ຫຼື ແຊນໍ້າເຢັນ ການເຕັງນໍ້າເຢັນສາມາດຊ່ວຍໄດ້ ໂດຍການເອົາຜ້າເຊັດໂຕຊຸ່ມຊື້ນກັບນໍ້າເຢັນມາເຕັງໄວ້ປະມານ 30 ນາທີ ອາການຄັນຈະຫຼຸດລົງ ແລະ ຫ້າມເຕັງນໍ້າຮ້ອນເດັດຂາດ ເພາະມັນຈະເຮັດໃຫ້ມີອາການຄັນຫຼາຍຂື້ນກ່ວາເກົ່າ.

• ໃຊ້ສານລະລາຍ bicarbonate

ເຮົາມາທົດລອງໃຊ້ວິທີທຳມະຊາດດ້ວຍການເອົາ baking Soda ສາມາດຮັກສາອາການຄັນໄດ້ ແລະ ໂດຍສະເພາະແມ່ນມີຜົນດີຕໍ່ອາການຄັນທີ່ເກີດຈາກເຜິ້ງ ຫຼື ແມງໄມ້ກັດ ວິທີການແມ່ນເອົາ baking Soda ລົງໃນອ່າງນໍ້າເຢັນ 1 ຖ້ວຍ ແລ້ວລົງໄປແຊໃນອ່າງນໍ້າທີ່ເຢັນ ແລະ ຫຼັງຈາກນັ້ນປະມານ 30 ນາທີ – 1 ຊົ່ວໂມງ ລ້າງຮ່າງກາຍໃຫ້ສະອາດ ອາການຄັນ ແລະ ຕຸ່ມຜື່ນຈະຫາຍໄປ.

• ເຂົ້າໂອດ

ເຂົ້າໂອດມີສ່ວນປະກອບສານຕ້ານອະນຸມູນອິດສະຫຼະ ຊ່ວຍຜ່ອນຄາຍຜິວໜັງ ແລະ ຍັງຊ່ວຍຢັບຢັ້ງການລະຄາຍເຄືອງ ພວກເຮົາສາມາດໃຊ້ແປ້ງເຂົ້າໂອດ ຫຼື ແປ້ງເຂົ້າໂອດທີ່ບໍ່ໄດ້ຮັບການປຸງແຕ່ງໄດ້ທັງນັ້ນ ວິທີການແມ່ນສາມາດລົງແຊ່ ແລະ ຟອກຕົນຕົວໄດ້.

• ການລົງແຊ່ນໍ້າ

ເອົາເຂົ້າໂອດລົງໄປໃນອ່າງອາບນໍ້າ ນໍ້າທີ່ໃຊ້ແລ້ວຄວນເຢັນ ຫຼື ນໍ້າອຸ່ນກໍ່ໄດ້ ຄວນຫຼີກລ່ຽງນໍ້າຮ້ອນເລີຍ ເພາະວ່ານໍ້າຮ້ອນຈະສົ່ງຜົນຮ້າຍຕໍ່ຜິວໜັງ ແລະ ຈະເຮັດໃຫ້ຮູ້ສຶກລະຄາຍເຄືອງຍິ່ງຂຶ້ນ ຫຼັງຈາກເອົາເຂົ້າໂອດ ແຊ່ປະມານ 1 ຊົ່ວໂມງຕໍ່ມື້ທຸກໆ ມື້ຈົນກວ່າອາການຈະຫາຍໄປ. ເອົາເຂົ້າໂອດປະສົມກັບນໍ້າໃນອັດຕາສ່ວນໃຫ້ພໍໜຽວ ແລະ ສາມາດນຳມາຟອກຕາມຕົນຕົວ ຟອກໄວ້ປະມານ 20 – 30 ນາທີ ຟອກທຸກໆ ມື້ຈົນກວ່າມັນຈະຫາຍດີ.

• ໃຊ້ຫ້ວານຫາງແຂ້

ສຳລັບຜູ້ທີ່ປູກໄວ້ຢູ່ບ້ານ ພຽງແຕ່ຕັດເປັນຕ່ອນໆ ປອກເອົາເຈລພາຍໃນອອກມາ ເອົາໃສ່ບໍລິເວນທີ່ເປັນຕຸ່ມຜື່ນຄັນ ແລ້ວປ່ອຍເຂົ້າຊືມໃນຜິວໜັງ ເທົ່ານີ້ສາມາດຫຼຸດຜ່ອນອາການຂອງຜື່ນຄັນໄດ້.

ແຕ່ຖ້າຜະລິດຕະພັນທັງໝົດນີ້ນຳໃຊ້ແຕ່ບໍ່ໄດ້ຜົນ ຍິ່ງໄປກວ່ານັ້ນຕຸ່ມຜື່ນກໍ່ເພີ່ມຂື້ນ ສິ່ງທີ່ຄວນເຮັດແມ່ນຮີບຟ້າວໄປພົບແພດໝໍດ່ວນ.

ໜັງສືພິມຊາວໜຸ່ມລາຍວັນຂອງຈີນ ລາຍງານວ່າ: ໃນວັນທີ 28 ມິຖຸນາ 2022, ເຈົ້າໜ້າທີ່ຂອງຈີນ ປະກາດວ່າ: ຫລັງຈາກນະຄອນຫລວງປັກກິ່ງ ແລະ ນະຄອນຊຽງໄຮ້ ໄດ້ຕໍ່ສູ້ກັບການລະບາດຂອງພະຍາດໂຄວິດ-19 ສາຍພັນ ໂອໄມຄຣອນ ຄັ້ງຫລ້າສຸດ ມາເປັນເວລາໜຶ່ງເດືອນ, ມາຮອດວັນທີ 27 ມິຖຸນາ ແມ່ນບໍ່ມີລາຍງານພົບຜູ້ຕິດເຊື້ອເພີ່ມໃໝ່ ຫລື ຜູ້ຕິດເຊື້ອໃໝ່ກາຍເປັນສູນແລ້ວ.

ນະຄອນຫລວງປັກກິ່ງຂອງຈີນ ໃຊ້ເວລາ 19 ວັນໃນການຄວບຄຸມການລະບາດຂອງພະຍາດໂຄວິິດ-19 ຄັ້ງໃໝ່ ເຊີ່ງສ່ວນໃຫຍ່ມີສູນກາງການລະບາດຢູ່ຕາມຮ້ານກິນດື່ມ, ຮ້ານບັນເທີງ ແລະ ຊຸບເປີມາເກັດ ທີ່ກວດພົບເປັນເທື່ອທໍາອິດໃນວັນທີ 9 ມິຖຸນານີ້. ຈາກນັ້ນໃນເວລາບໍ່ເຖິງ 72 ຊົ່ວ ໂມງໄດ້ກວດພົບຜູ້ຕິດເຊື້ອທີ່ກະຈາຍຢູ່ພາຍໃນ 14 ເມືອງ ແລະ ເຂດພັດທະນາເສດຖະກິດ-ເຕັກໂນໂລຊີຂອງປັກກິ່ງຊຶ່ງເປັນ “ສິ່ງທ້າທາຍ ແລະ ການທົດສອບທີ່ບໍ່ເຄີຍມີມາກ່ອນ” ໃນການຕອບໂຕ້ແລະຕ້ານການລະບາດຢູ່ນະຄອນ ຫລວງປັກກິ່ງ ເນື່ອງຈາກມີປະຊາກອນອາໃສຢູ່ຢ່າງຫນາແຫນ້ນ ແລະ ຄວາມໄວໃນການແຜ່ລະບາດຂອງເຊື້ອພະ ຍາດ. ຫລັງຈາກນັ້ນ 5 ມື້ຕໍ່ມາ,ຈໍານວນຜູ້ຕິດເຊື້ອແມ່ນເກີນ 50 ຄົນຕໍ່ວັນ ຈົນມາຮອດວັນທີ 14 ມິຖຸນາ ມີຜູ້ຕິດເຊື້ອທັງຫມົດ 398 ຄົນ.ການລະບາດຂອງເຊື້ອພະຍາດທີ່ກ່ຽວຂ້ອງກັບຮ້ານກິນດື່ມ, ຮ້ານບັນເທີງ ແມ່ນເກີດຂຶ້ນຄືກັບທີ່ເຄີຍເກີດຂຶ້ນມາແລ້ວຄັ້ງກ່ອນທີ່ເລີ່ມຕົ້ນແຕ່ວັນທີ 22 ເມສາ2022 ແລະ ຕິດຕໍ່ໄປຍັງ 2 ນັກຕົບແຕ່ງພາຍໃນຈາກເມືອງຊຸນຢີ (Shunyi) ເຊີ່ງຕໍ່ມາມີລາຍງານພົບຜູ້ຕິດເຊື້ອທັງຫມົດ 1.831 ຄົນ.

ເນື່ອງຈາກສະຖານະການໄດ້ຮັບການແກ້ໄຂດີຂຶ້ນ, ທາງການຈີນໄດ້ປະກາດໃຫ້ນັກຮຽນກັບມາຮຽນໜັງສືໃນໂຮງຮຽນ, ນັກຮຽນຊັ້ນປະຖົມ ແລະ ມັດທະຍົມຕອນຕົ້ນໃນຕົວເມືອງທີ່ຕ້ອງຮຽນໜັງສືຜ່ານລະບົບອອນລາຍມາ ເປັນເວລາເກືອບ 2 ເດືອນ ຍ້ອນມາດຕະການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ໄດ້ກັບມາຮຽນຢູ່ໂຮງຮຽນເປັນປົກກະຕິນັບແຕ່ວັນທີ 27 ມິຖຸ ນາ ພາຍໃຕ້ມາດຕະການປ້ອງກັນ ແລະ ຄວາມຄຸມການລະບາດຂອງພະຍາດຢ່າງເຂັ້ມງວດ.

ສວນສາທາລະນະ ຢູນີເວີ ປັກກິ່ງ ຣີສອດ ໄດ້ກັບຄືນມາເປີດຮັບນັກທ່ອງທ່ຽວອີກຄັ້ງໜຶ່ງຫລັງຈາກຕ້ອງຢຸດໃຫ້ບໍລິການດົນເກືອບ 2 ເດືອນ ເຊີ່ງເຫັນວ່າມີຍອດການຈອງປີ້ເຂົ້າໄປທ່ຽວຊົມຫລາຍກວ່າສວນສາທາລະນະອື່ນໆ ໃນປະເທດຈີນ ເນື່ອງຈາກຄວາມນິຍົມຂອງນັກທ່ອງທ່ຽວຕໍ່ສະຖານທີ່ດັ່ງກ່າວ, ລວມເຖີງການຟື້ນຕົວຄືນຢ່າງວ່ອງໄວຂອງການທ່ອງທ່ຽວໃນນະຄອນຫລວງປັກກິ່ງຫລັງຈາກການແຜ່ລະບາດຂອງພະຍາດໂຄວິດ-19.

ສ່ວນຢູ່ ຊຽງໄຮ້ ດິສນີ ຣີສອດ ເຊີ່ງເປັນອີກສະຖານທີ່ທ່ອງທ່ຽວໜຶ່ງທີ່ໄດ້ຮັບຄວາມນິຍົມໃນປະເທດຈີນ, ໄດ້ປະ ກາດຈະເປີດບໍລິການຄືນໃໝ່ໃນວັນທີ 30 ມິຖຸນານີ້ ແລະ ເລີ່ມຂາຍປີ້ເຂົ້າໄປທ່ອງທ່ຽວນັບແຕ່ມື້ນີ້ ( 29 ມິຖຸນາ) ໂດຍມີມາດຕະການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ຢ່າງເຂັ້ມງວດ.

ໃນວັນທີ 27 ມິຖຸນານີ້, ທ່ານ Cai Qi ເລຂາຄະນະ ພັກນະຄອນຫລວງປັກກິ່ງ ໄດ້ປະກາດໃນກອງປະຊຸມອົງ ຄະນະພັກນະຄອນຫລວງປັກກິ່ງ ຄັ້ງທີ 13 ວ່າ: ຈະເອົາໃຈໃສ່ປ້ອງກັນ ແລະ ຄວບຄຸມການລະບາດຂອງພະຍາດຢ່າງຕໍ່ເນື່ອງຕາມນະໂຍບາຍໂຄວິດ-19 ເປັນສູນດ້ວຍການນໍາໃຊ້ມາດຕະການ “ການກວດຫາເຊື້ອໃຫ້ໄວ, ການລາຍງານໄວ, ການກັກກັນ ແລະ ການປິ່ນປົວໄວ”.

ນະຄອນຊຽງໄຮ້ ໄດ້ຫລຸດພົ້ນອອກຈາກການລະບາດຂອງພະຍາດໂຄວິດ-19 ສາຍພັນ ໂອໄມຄຣອນ ພາຍຫລັງພະຍາດດັ່ງກ່າວລະບາດມາເປັນເວລາ 3 ເດືອນ ແລະ ໄດ້ປະກາດໃນວັນທີ 19 ມິຖຸນານີ້ ໃຫ້ປະຊາຊົນສາມາດອອກໄປກິນເຂົ້າຢູ່ຮ້ານອາຫານທີ່ບໍ່ນອນຢູ່ໃນເຂດທີ່ມີການລະ ບາດຂອງພະຍາດໂຄວິດ-19 ໃນລະດັບປານກາງ ແລະ ເຂດທີ່ບໍ່ມີລາຍງານພົບຜູ້ຕິດເຊື້ອເປັນເວລາ 1 ອາທິດ, ຈາກນັ້ນ ຕໍ່ມາຄໍາສັ່ງປິດເມືອງເປັນເວລາ 2 ເດືອນ ໄດ້ຖືກຍົກເລີກໃນວັນທີ 1 ມິຖຸນານີ້, ເຮັດໃຫ້ເຈົ້າໜ້າທີ່ນະຄອນຊຽງໄຮ້ປະກາດໄຊຊະນະຈາກການຕໍ່ສູ້ກັບການລະບາດຂອງພະຍາດໂຄວິດ-19 ໄດ້ສໍາເລັດ ຫລັງຈາກຢູ່ພາຍໃນຊຽງໄຮ້ບໍ່ມີລາຍງານພົບຜູ້ຕິດເຊື້ອໃໝ່ ຫລື ໂຄວິດ-19 ເປັນສູນມາເປັນເວລາສອງວັນຕິດຕໍ່ກັນ.

Source: Global Times Published: Jun 28, 2022

• ໄຂ້ເລືອດອອກ

ພາຫະນະ: ຍຸງລາຍມັກອອກຫາກິນໃນເວລາກາງເວັນ (ບາງເທື່ອກໍ່ພົບຍຸງໃນເວລາກາງຄືນ ແລະ ຕອນແລງ).

ອາການ: 5-8 ມື້ຫຼັງຈາກຖືກຍຸງກັດ ຄົນເຈັບຈະມີໄຂ້ສູງ ປວດເມື່ອຕາມຮ່າງກາຍ ເບື່ອອາຫານ ຫຼື ອາດຈະຮາກ, ມີຜືນແດງໆ ທົ່ວຮ່າງກາຍ, ເລືອດອອກ, ຖ່າຍໜັກເປັນສີດຳ ແລະ ມີຄວາມສ່ຽງຕໍ່ອາການແຊກຊ້ອນພະຍາດອື່ນໆ ເຊັ່ນ: ອາການຊ໊ອກ, ຊັກ, ບວມ, ເຈັບແອວ, ເຈັບທ້ອງ, ແໜ້ນໜ້າເອີກ ຫຼື ມີເລືອດອອກຕາມອະໄວຍະວະພາຍໃນ.

• ພະຍາດໄຂ້ຍຸງ

ພາຫະນະ: ຍຸງກົ້ນປ່ອງພົບເຫັນຢູ່ໃນປ່າ, ເຂດທີ່ຮົກໆ, ອາກາດຮ້ອນ ແລະ ຊຸ່ມ ແຫຼ່ງນໍ້າຕ່າງໆ ຫຼື ພື້ນທີ່ທົ່ວໄປອື່ນໆ…

ອາການ: ໄຂ້, ເຈັບຫົວ, ປວດຕາມຮ່າງກາຍ, ອ່ອນເພຍ, ກຳມະຈອນເຕັ້ນໄວ, ໜາວສັ່ນ, ປວດຮາກ ແລະ ຮາກ ໃບໜ້າຈືດ ເປັນຍ້ອນເມັດເລືອດແດງຖືກທຳລາຍ ຫຼື ເລີ່ມເຂົ້າສູ່ພາວະໂລກເລືອດຈາງ ຕົນໂຕສີເຫຼືອງຄ້າຍຄືພະຍາດໝາກເຫຼືອງ ແລະ ອາດຈະມີນໍ້າຍ່ຽວຄ້າຍຄືສີນໍ້າປາ.

• ແມ່ກາຝາກ

ພາຫະນະ: ພະຍາດທີ່ເກີດຈາກແມ່ທ້ອງກົມ ໂດຍມີຍຸງເປັນພາຫະນະ, ໄຂ້ຂື້ນສູງ ຫຼອດນໍ້າເຫຼືອງ (Lymphatic) ແລະ ຕ່ອມນໍ້າເຫຼືອງອັກເສບ (lymph node) ເຊິ່ງອາດຈະພົບເຫັນຢູ່ໃນອະໄວຍະວະຕ່າງໆ ເຊັ່ນ: ຂາ, ທ້ອງທາງຫຼັງ, ທໍ່ນໍ້າເຊື້ອອະສຸຈິ, ເຕົ້ານົມ, ຜິວໜັງອັກເສບບວມ ແລະ ແດງ ແຕ່ໃນບາງກໍລະນີອາດຈະບໍ່ສະແດງອາການບວມໃຫ້ເຫັນແຈ້ງ.

• ໄຂ້ປວດຂໍ້

ຫາຫະນະ: ຍຸງລາຍ ອາການຄ້າຍຄືໄຂ້ເລືອດອອກຫຼາຍ ແຕ່ບໍ່ພົບການຮົ່ວໄຫຼຂອງ plasma ອອກຢູ່ນອກເສັ້ນເລືອດ ເພາະສະນັ້ນຈຶ່ງບໍ່ພົບຄົນເຈັບທີ່ມີອາການຊ໊ອກ.

• ໂລກຂໍ້ອັກເສບ

ພາຫະນະ: ຍຸງທີ່ມັກພົບເຫັນໃນທົ່ງນາ ເພາະມັນເປັນແຫຼ່ງແຜ່ພັນ ແລະ ມີໝູເປັນຮັງຂອງພະຍາດ ແລະ ແຜ່ຂະຫຍາຍການຕິດເຊື້ອໃຫ້ຄົນ ແລະ ສັດອື່ນໆ.

ອາການ: ຫຼັງຈາກຕິດເຊື້ອ 5-15 ວັນ ຈະມີໄຂ້ສູງ, ຮາກ, ເຈັບຫົວ, ອ່ອນເພຍ, ຫຼັງຈາກນັ້ນຈະເລີ່ມມີອາການຜິດປົກກະຕິທາງສະໝອງ ເຊັ່ນ: ຄໍແຂງ, ສະຕິຫຼຸດລົງ, ຊັກ ຫຼື ຫຼົງໆ ລືມໆ, ລະເມີ, ຊັກ, ໝົດສະຕິ, ມືສັ່ນ, ເປັນອຳມະພາດ ຫຼັງຈາກພະຍາດຫາຍດີອາດຈະເກີດມີຄວາມຜິດປົກກະຕິທາງສະໝອງ ເຊັ່ນວ່າ: ການເວົ້າທີ່ບໍ່ແຈ້ງ, ຊັກ ຫຼື ສະຕິບໍ່ຄ່ອຍດີ.

ພິທີເປີດໂຄງການພະສະມະນະທູດລາວກຳມາທິການ ການຕ່າງປະເທດ ໄດ້ຈັດຂຶ້ນໃນວັນທີ 28 ມີຖຸນາ ນີ້ ທີ່ ຫໍປະຊຸມສູນການຮ່ວມມືສາກົນ ແລະ ການຝຶກອົບຮົມ (ICTC) ໂດຍໃຫ້ກຽດເຂົ້າຮ່ວມຂອງພະອາຈານໃຫຍ່ ມະຫາບຸນມາ ສິມມາພົບ ປະທານສູນກາງ ອົງການພຸດທະສາສະໜາສຳພັນແຫ່ງ ສປປ ລາວ (ອພສ), ພະອາຈານໃຫຍ່ບຸນສ່ວນ ພັນທະວົງ ຮອງປະທານ ອພສ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການປະເທດ, ມີພະສົງສຳມະເນນ ແລະ ພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງຂອງໂຄງການພະສະມະນະທູດລາວແມ່ນເພື່ອຝຶກອົບຮົມ ພະສະມະນະທູດລາວໃຫ້ມີຄວາມຮູ້ຄວາມສາມາດໃຫ້ມີຄວາມໝັ້ນໃຈ ໃນການປະຕິບັດສາສະນະກິດຕາມວັດຖຸປະສົງ, ເພື່ອກຽມພ້ອມພະສະມະນະທູດລາວທີ່ມີຄຸນສົມບັດເໜາະສົມໃນການສະໜອງຂອງວັດຕ່າງໆພາຍໃຕ້ກຳມາທິການການຕ່າງປະເທດ ແລະ ໃນປະເທດອື່ນ, ເພື່ອສົງເສີມສະໜັບສະໜູນພະສົງລາວທີ່ເຮັດໜ້າທີ່ເຜີຍແຜ່ພະພຸດທະສາສະໜາຢູ່ຕ່າງປະເທດ,ເພື່ອສະໜອງນະໂຍບາຍຂອງພັກ-ລັດ ແລະ ອົງການພຸດທະສາສະໜາສຳພັນແຫ່ງ ສປປ ລາວ ໂດຍລວມ, ໂດຍສະເພາະຄືກຳມາທິການ ການຕ່າງປະເທດທາງດ້ານການພົວພັນວຽກງານຕ່າງປະເທດຂອງພະພຸດທະສາສະໜາ ແລະ ສາສະໜາອື່ນ ແລະ ເຮັດໃຫ້ພະສົງສຳມະເນນລາວ ພໍ່ຂາວ, ແມ່ຂາວ ມີຄວາມຮູ້ມີຄວາມສາມາດ, ມີຄວາມໝັ້ນໃຈຕົນເອງໃນການທີ່ຈະໄປເຜີຍແຜ່ ພະພຸດທະສາສະໜາທັງພາຍໃນປະເທດ ແລະ ຕ່າງປະເທດ, ໄດ້ນຳເອົາພະພຸດທະສາສະໜາຕະຫຼອດເຖິງຮິດຄອງປະເພນີວັດທະນະທຳຂອງລາວ ແນວທາງນະໂຍບາຍຂອງພັກ-ລັດອອກໄປເຜີຍແຜ່ໃຫ້ຕ່າງປະເທດໃນໂລກຮັບຮູ້ຢ່າງກວ້າງຂວາງ, ເຮັດໃຫ້ເກີດການເຜີຍແຜ່ພະພຸດທະສາສະໜາຢ່າງມີຮູບການທີ່ເປັນເອກະລັກ ແລະ ເອກະພາບທັງພາຍໃນ ແລະ ຕ່າງປະເທດ, ຍົກສູງພາລະບາດບາດຂອງພະສົງລາວໃນພາກພື້ນ ແລະ ສາກົນ.

ພະສະມະນະທູດມີພາລະບົດບາດ ແລະ ໜ້າທີ່ສຳຄັນໃນການເຜີຍແຜ່ຫຼັກທຳເປັນຜູ້ນຳໃນການຟື້ນຟູພະພຸດທະສາສະໜາພ້ອມທັງເປັນຜູ້ສົ່ງເສີມການຮຽນຮູ້ ແລະ ສ້າງຄວາມສາມັກຄີໃຫ້ແກ່ຊຸມຊົນດ້ວຍການນຳເອົາຫຼັກທຳຄຳສັງສອນທາງພະພຸດທະສາສະໜາມາເປັນແກນກາງໃນການພັດທະນາ, ມີພາລະບົດບາດ ແລະ ໜ້າທີ່ໃນຖານະເປັນຕົວແທນຂອງພະສຳມາສຳພຸດທະເຈົ້າໃນດ້ານພຸດທະສາສະໜາເພື່ອສັງຄົມທັງພາຍໃນ ແລະ ຕ່າງປະເທດ.

ດັ່ງນັ້ນໜ້າທີ່ການເຜີຍແຜ່ງານດ້ານພະພຸດທະສາສະໜາຂອງພະສະມະນະທູດຈຶ່ງປະຕິບັດຕາມແນວທາງຂອງພະສະມະນະທູດຕົ້ນແບບຕັ້ງແຕ່ສະໄໝພະພຸດທະການ ແລະ ຫຼັງພະພຸດທະການ.

ຂ່າວ-ພາບ: ບຸນອູ້ມ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ການປັບປຸງຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ເພື່ອເປັນເຄື່ອງມືໃນການຄຸ້ມຄອງເງິນຕາຕ່າງປະເທດຢູ່ລາວຢ່າງເປັນລະບົບ, ມີປະສິດທິພາບ ແລະ ໄດ້ຮັບປະສິດທິຜົນສູງຂຶ້ນ, ເພື່ອເຮັດໃຫ້ການເຄື່ອນໄຫວດ້ານເງິນຕາຕ່າງປະເທດຢູ່ລາວ ໄດ້ຮັບການຄຸ້ມຄອງສອດຄ່ອງກັບເງື່ອນໄຂເສດຖະກິດໃນປັດຈຸບັນຫຼາຍຂຶ້ນ.

ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ສະເໜີຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສະບັບປັບປຸງ ຕໍ່ກອງປະຊຸມສະໄໝສາມັນເທື່ອທີ 3 ຂອງສະມາຊິກສະພາແຫ່ງຊາດຊຸດທີ IX ໃນວັນທີ 28 ມິຖນາ ນີ້ ໂດຍການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.

ທ່ານຜູ້ວ່າການທະນາຄານແຫ່ງ ສປປ ລາວ ກ່າວວ່າ: ໃນໄລຍະຜ່ານມາການຄຸ້ມຄອງເງິນຕາຕ່າງປະເທດ ຢູ່ ສປປ ລາວ ຍັງປະເຊີນກັບຫຼາຍສິ່ງທ້າທາຍ ແລະ ຂໍ້ຫຍຸ້ງຍາກ ໂດຍສະເພາະໃນໄລຍະທີ່ແຫຼ່ງລາຍຮັບເປັນເງິນຕາຕ່າງປະເທດຂອງ ສປປ ລາວ ຫຼຸດລົງຫຼາຍ ບໍ່ສົມດຸນກັບລະດັບຄວາມຕ້ອງການເງິນຕາຕ່າງປະເທດໃນການຊໍາລະໃຫ້ຕ່າງປະເທດ ທີ່ຢູ່ໃນລະດັບສູງຕໍ່ເນື່ອງເປັນຕົ້ນ: ການຄຸ້ມຄອງກະແສເງິນຕາຕ່າງປະເທດເຂົ້າ-ອອກ ສປປ ລາວ, ການຄຸ້ມຄອງເງິນລົງທຶນໂດຍກົງຈາກຕ່າງປະເທດ (FDI) ຍັງບໍ່ເປັນລະບົບ ແລະ ບໍ່ທັນມີລັກສະນະຍືນຍົງ ຍັງມີການນໍາໃຊ້ເງິນຕາຕ່າງປະເທດຊະຊາຍໃນສັງຄົມ ໂດຍສະເພາະໃນບາງເຂດເສດຖະກິດພິເສດ, ເຂດການຄ້າຊາຍແດນ, ຍັງມີການເຄື່ອນໄຫວທຸລະກິດແລກປ່ຽນເງິນຕາທີ່ບໍ່ສອດຄ່ອງກັບລະບຽບກົດໝາຍ, ໜີ້ສິນຕໍ່ຕ່າງປະເທດຂອງພາກລັດ, ສະຖາບັນການເງິນ ແລະ ເອກະຊົນອື່ນໆ ມີທ່າອ່ຽງເພີ່ມສູງຂຶ້ນຕໍ່ເນື່ອງ ສ້າງແຮງກົດດັນຕໍ່ຖານະການຊໍາລະກັບຕ່າງປະເທດຂອງຊາດ ໃນເງື່ອນໄຂທີ່ລາຍຮັບເປັນເງິນຕາຕ່າງປະເທດຂອງປະເທດຍິ່ງຈໍາກັດ ສ້າງຄວາມກົດດັນຕໍ່ຄ່າເງິນກີບ ແລະ ສົ່ງຜົນຕໍ່ຄວາມຍືນຍົງດ້ານເສດຖະກິດມະຫາພາກຂອງປະເທດ.

ຈາກສະພາບດັ່ງກ່າວເຫັນວ່າກົດໝາຍສະບັບປັດຈຸບັນຍັງບໍ່ທັນສາມາດເຮັດໜ້າທີ່ໃນການສ້າງຄວາມເຂັ້ມແຂງໃຫ້ການຊໍາລະກັບຕ່າງປະເທດ, ຖານະຄັງສໍາຮອງເງິນຕາຕ່າງປະເທດ ແລະ ການດໍາເນີນນະໂຍບາຍອັດຕາແລກປ່ຽນກໍຄືການຮັກສາສະຖຽນລະພາບເງິນຕາແຫ່ງຊາດໃຫ້ບັນລຸໄດ້ດັ່ງຄາດໝາຍທີ່ໄດ້ວາງໄວ້ ຊຶ່ງສາເຫດຕົ້ນຕໍຍ້ອນ: ເນື້ອໃນຂອງກົດໝາຍສະບັບປັດຈຸບັນບໍ່ທັນຮັດກຸມ ໂດຍສະເພາະການແບ່ງຄວາມຮັບຜິດຊອບລະຫວ່າງຂະແໜງການ, ສູນກາງທ້ອງຖິ່ນໃນການຄຸ້ມຄອງເງິນຕາຕ່າງປະເທດ, ການກຳນົດມາດຕະການທາງດ້ານບໍລິຫານ ບໍ່ທັນຮັດກຸມຄົບຖ້ວນ, ການຜັນຂະຫຍາຍນິຕິກຳລຸ່ມກົດໝາຍບໍ່ທັນພຽງພໍ, ບໍ່ທັນສະພາບ; ພ້ອມນີ້, ດ້ານໂຄງສ້າງ ແລະ ເນື້ອໃນຂອງບາງນິຕິກໍາລຸ່ມກົດໝາຍ ຍັງບໍ່ກົມກຽວ ແລະ ຍາກໃນການຈັດຕັ້ງປະຕິບັດ ເມື່ອສົມທຽບກັບກົດໝາຍຫຼັກ; ຄວາມອາດສາມາດໃນການຄຸ້ມຄອງຕົວຈິງຂອງທະນາຄານແຫ່ງ ສປປ ລາວ ຍັງບໍ່ທັນສົມຄູ່ກັບຄວາມຮຽກຮ້ອງຕ້ອງການ ແລະ ສະພາບທີ່ເກີດຂຶ້ນຕົວຈິງໃນສັງຄົມ; ເຄື່ອງມື ແລະ ກົນໄກໃນການຄຸ້ມຄອງ, ຕິດຕາມກະແສເງິນໄຫຼເຂົ້າ-ອອກທີ່ເປັນເງິນຕາຕ່າງປະເທດຍັງຈໍາກັດ ບໍ່ທັນສະພາບ, ຄວາມເອົາໃຈໃສ່ຂອງຂະແໜງການກ່ຽວຂ້ອງໃນການຄຸ້ມຄອງເງິນຕາຕ່າງປະເທດ ກໍຄືການຈັດຕັ້ງປະຕິບັດນິຕິກໍາການຄຸ້ມຄອງເງິນຕາຕ່າງປະເທດ ຍັງບໍ່ທັນເຂັ້ມງວດ, ພື້ນຖານການຜະລິດພາຍໃນປະເທດຍັງອ່ອນນ້ອຍ ຍັງເພິ່ງພາອາໄສການນຳເຂົ້າເປັນສ່ວນໃຫຍ່ ແລະ ຄ່ານິຍົມໃນການນໍາໃຊ້ສິນຄ້າພາຍໃນຍັງມີໜ້ອຍ; ຄວາມຕ້ອງການໃນການຊໍາລະກັບຕ່າງປະເທດມີສູງກວ່າແຫຼ່ງລາຍຮັບທີ່ເປັນເງິນຕາຕ່າງປະເທດມາຢ່າງຕໍ່ເນື່ອງ ແລະ ຍາວນານ; ຄ່ານິຍົມ ແລະ ຄວາມຕ້ອງການຖືຄອງເງິນຕາຕ່າງປະເທດຍັງຢູ່ໃນລະດັບສູງ.

ຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສະບັບປັບປຸງ ປະກອບດ້ວຍ IX ພາກ, 8 ໝວດ, 62 ມາດຕາ, ຈາກສະບັບປັດຈຸບັນທີ່ປະກອບມີ IX ພາກ, 8 ໝວດ ແລະ 54 ມາດຕາ ໃນນີ້, ໄດ້ປັບປຸງເນື້ອໃນ 32 ມາດຕາ, ເພີ່ມເຂົ້າໃໝ່ 24 ມາດຕາ, ໄດ້ຕັດເນື້ອໃນ 12 ມາດຕາ ແລະ ຍ້າຍເນື້ອໃນຂອງບາງມາດຕາ ສັບຊ້ອນເຂົ້າໃນເນື້ອໃນຂອງມາດຕາອື່ນ ແລະ ຍັງຮັກສາເນື້ອໃນເກົ່າ 6 ມາດຕາ.

ຈຸດປະສົງຂອງການປັບປຸງກົດໝາຍໃນຄັ້ງນີ້, ເພື່ອເປັນເຄື່ອງມືໃນການຄຸ້ມຄອງເງິນຕາຕ່າງປະເທດຢູ່ ສປປ ລາວ ໃຫ້ມີປະສິດທິຜົນຫຼາຍຂຶ້ນໃນເງື່ອນໄຂທີ່ຮູບແບບການເຊື່ອມໂຍງດ້ານເສດຖະກິດ-ການເງິນລະຫວ່າງປະເທດ ນັບມື້ນັບຫຼາກຫຼາຍ ແລະ ສະຫຼັບສັບຊ້ອນ; ໃຫ້ສາມາດຄຸ້ມຄອງເງິນຕາຕ່າງປະເທດໄດ້ລວມສູນ ເຂົ້າສູ່ລະບົບຫຼາຍຂຶ້ນ, ສ້າງປະໂຫຍດສູງສຸດໃຫ້ແກ່ປະເທດຊາດ ໃຫ້ແກ່ປະຊາຊົນ; ຫຼຸດຜ່ອນການນຳໃຊ້ເງິນຕາຕ່າງປະເທດຊະຊາຍ ແລະ ຫຼາຍສະກຸນເງິນຕາໃນສັງຄົມ; ປະກອບສ່ວນສ້າງຄວາມເຂັ້ມແຂງໃຫ້ລະບົບສະຖາບັນການເງິນຂອງ ສປປ ລາວ ແລະ ປະກອບສ່ວນຊ່ວຍສ້າງຄວາມເຂັ້ມແຂງດ້ານຖານະການຊໍາລະກັບຕ່າງປະເທດໃຫ້ແກ່ປະເທດ.

ຂ່າວ: ພູວັນ, ຮູບ: ສໍານານ

#Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)