ໃນວັນທີ 29 ມິຖຸນາ ນີ້ ທີ່ ຄະນະພົວພັນຕ່າງປະເທດສູນກາງພັກ ໄດ້ມີພິທີ ມອບ-ຮັບ ລົດກວດສຸຂະພາບເຄື່ອນທີ່ ທີ່ສູນກາງພັກກອມມູນິດຈີນ ມອບໃຫ້ ສູນກາງພັກ ປປ ລາວ ເພື່ອໝູນໃຊ້ເຂົ້າໃນວຽກງານສາທາລະນະສຸກ ຢູ່ ສປປ ລາວ.

ໃນພິທີດັ່ງກ່າວ, ສະຫາຍ ຈຽງ ຈ້າຍຕົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ໄດ້ຕາງໜ້າຝ່າຍຈີນ ກ່າວມອບ ແລະ ສະຫາຍ ທອງສະຫວັນ ພົມວິຫານ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕາງໜ້າໃຫ້ ສູນກາງພັກ ປປ ລາວ ເປັນຜູ້ຮັບ ໂດຍມີບັນດາສະຫາຍຕາງໜ້າຄະນະນໍາ ຈາກຫ້ອງວ່າການສູນກາງພັກ, ກົມຮັກສາສຸຂະພາບສູນກາງ ພ້ອມດ້ວຍພະນັກງານທີ່ກ່ຽວຂ້ອງ ຂອງຄະນະພົວພັນຕ່າງປະເທດສູນກາງພັກ ແລະ ສະຖານທູດ ແຫ່ງ ສປ ຈີນ ເຂົ້າຮ່ວມ.

ສະຫາຍ ທອງສະຫວັນ ພົມວິຫານ ໄດ້ຕາງໜ້າໃຫ້ ສູນກາງພັກ ປປ ລາວ ສະແດງຄວາມຂອບໃຈ ຕໍ່ການຊ່ວຍເຫຼືອຂອງ ສູນກາງພັກກອມມູນິດຈີນໃນຄັ້ງນີ້ ກໍຄືການຊ່ວຍເຫຼືອທາງດ້ານອຸປະກອນການແພດ, ຢາວັກຊິນ ແລະ ການສົ່ງທີມແພດຊ່ຽວຊານ ມາຊ່ວຍ ສປປ ລາວ ຢ່າງທັນການ ເພື່ອຮັບມືກັບການແຜ່ລະບາດ ຂອງ ພະຍາດໂຄວິດ-19 ຢູ່ ສປປ ລາວ ໃນໄລຍະຜ່ານມາ ຊຶ່ງເປັນການປະກອບສ່ວນສໍາຄັນ ເຂົ້າໃນຜົນສໍາເລັດໃນການຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວ ຢູ່ ສປປ ລາວ, ທັງເປັນການສະແດງໃຫ້ເຫັນເຖິງມິດຈິດມິດໃຈ ຂອງການເປັນຄູ່ຮ່ວມຊາຕາກໍາດຽວກັນ ຂອງ ປະຊາຊົນສອງຊາດ ລາວ-ຈີນ ຢ່າງແທ້ຈິງ.

ລົດກວດສຸຂະພາບເຄື່ອນທີ່ ທີ່ຝ່າຍຈີນມອບໃຫ້ຄັ້ງນີ້, ຄະນະພົວພັນຕ່າງປະເທດສູນກາງພັກ ຈະໄດ້ມອບຕໍ່ໃຫ້ ສູນກາງພັກ ປປ ລາວ ເພື່ອນໍາໃຊ້ໃຫ້ເກີດຜົນປະໂຫຍດສູງສຸດ ໃນວຽກງານສາທາລະນະສຸກ.

ຂ່າວ-ພາບ: ສຳນານ

#Medialaos MMD (ແຫຼ່ງຂໍ້ຈາກ: ໜັງສືພິມ ປະຊາຊົນ)

ອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ຮ່ວມກັບ ສະຖາບັນຄົ້ນຄວ້າວິໄຈການພັດທະນາ ແລະ ກະຊວງແຜນການ ແລະ ການລົງທຶນ (ຜທ) ໄດ້ຈັດກອງປະຊຸມເຜີຍແຜ່ບົດຄົ້ນຄວ້າກ່ຽວກັບການສົ່ງເງິນກັບຄືນ ສປປ ລາວ ໃນວັນທີ 29 ມິຖຸນາ ນີ້ ທີ່ ນະຄອນຫຼວງວຽງຈັນ. ໂດຍເປັນປະທານ ຮ່ວມ ຂອງ ທ່ານ ສິດທິຣົດ ຣາຊະພົນ ຫົວໜ້າສະຖາບັນຄົ້ນຄວ້າວິໄຈການພັດທະນາ (ກະຊວງ ຜທ) ແລະ ທ່ານ ນາງ ຊາຣີນ ທູລາດາຣ ຫົວໜ້າອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ຂໍ້ສະຫຼຸບ ແລະ ຂໍ້ສະເໜີດ້ານນະໂຍບາຍບົດຄົ້ນຄວ້າ ລວມເຖິງແຜນວຽກບຸລິມະສິດ ກ່ຽວກັບການສົ່ງເງິນຄືນປະເທດ ແລະ ແຜນການໃນຕໍ່ໜ້າ, ການລາຍງານເຖິງຜົນໄດ້ຮັບຈາກການສົ່ງເງິນກັບປະເທດຂອງແຮງງານລາວ, ການສົ່ງເງິນກັບປະເທດຂອງແຮງງານເປັນການປະກອບ ສ່ວນເຂົ້າໃນການຫຼຸດຜ່ອນຄວາມທຸກຍາກຂອງຄອບຄົວ ໂດຍສະເພາະຄອບຄົວທີ່ໄດ້ຮັບເງິນທີ່ຖືກສົ່ງມາໃຫ້ເປັນແຫຼ່ງລາຍໄດ້ຫຼັກ.

ທ່ານ ທະນົງຊາຍ ສຸກຄຳທັດ ຮອງຫົວໜ້າສະຖາບັນຄົ້ນຄວ້າວິໄຈການພັດທະ ນາ ກ່າວວ່າ: ການໂອນເງິນຄືນກັບມາປະເທດ ຂອງບຸກຄົນ ຫຼື ແຮງງານ ທີ່ໄປເຮັດວຽກຢູ່ຕ່າງປະເທດແມ່ນປັດໄຈສໍາຄັນອັນໜຶ່ງທີ່ຊ່ວຍເຮັດໃຫ້ເສດຖະກິດຂອງໂລກ ແລະ ພາກພື້ນ ລວມທັງ ສປປ ລາວ ມີການຂະຫຍາຍຕົວ ຊຶ່ງການໂອນເງິນກັບຄືນປະເທດແມ່ນມີທ່າອ່ຽງທີ່ສູງເພີ່ມຂຶ້ນ ແລະ ເປັນການປະກອບສ່ວນໃຫ້ແກ່ການເຕີບໂຕທາງດ້ານເສດຖະກິດຂອງ ສປປ ລາວ ໃນແຕ່ລະປີ, ແຮງງານລາວໄດ້ສົ່ງເງິນກັບປະເທດເຖິງ 412 ລ້ານໂດລາ ຄິດໄລ່ເປັນ 2,3% ຂອງ GDP ປະເທດລາວ.

ທ່ານກ່າວຕື່ມວ່າ: ອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ມີຄວາມມຸ່ງໝັ້ນໃນການຊ່ວຍເຫຼືອລັດຖະບານລາວໃນການບັນລຸເປົ້າໝາຍ ເພື່ອການພັດທະນາທີ່ຍືນຍົງ ຊຶ່ງວຽກງານການເຄື່ອນຍ້າຍຖິ່ນຖານໃນກຳນົດການ ປີ 2030 ແມ່ນເປົ້າໝາຍທີ 10.7 ທີ່ເປັນວຽກງານຫຼຸດຜ່ອນຄວາມບໍ່ເທົ່າທຽມໃນລະຫວ່າງບັນດາປະເທດ ເປັນວຽກງານທີ່ອຳນວຍຄວາມສະດວກການເຄື່ອນຍ້າຍຜູ້ຄົນຢ່າງຖືກກົດໝາຍ, ປອດໄພ, ປົກກະຕິ ແລະ ມີຄວາມຮັບຜິດຊອບ ລວມທັງຜ່ານການປະຕິບັດງານຂອງນະໂຍບາຍການເຄື່ອນຍ້າຍຢ່າງເປັນລະບຽບ ແລະ ຢ່າງເປັນແບບແຜນ.

ຂ່າວ-ພາບ: ສຳນານ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ຮ່າງກົດໝາຍ ວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ(ສະບັບປັບປຸງ) ໄດ້ຖືກສະເໜີໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດຊຸດທີ IX, ໃນວັນທີ 29 ມິຖຸນານີ້ ທີ່ສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ.

ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ສະເໜີຕໍ່ທີ່ປະຊຸມວ່າ: ຄວາມຈຳເປັນໃນການປັບປຸງກົດໝາຍວິສາຫະກິດຂະໜາດນ້ອຍ ແລະ ກາງ ຂຽນຫຍໍ້: ວນກ ຂຽນຫຍໍ້ເປັນພາສາອັງກິດ SME ແມ່ນມີບົດບາດຢ່າງຕັ້ງໜ້າຕໍ່ກັບການພັດທະນາເສດຖະກິດ-ສັງຄົມ ຂອງ ສປປ ລາວ ເປັນຕົ້ນແມ່ນການຜະລິດສິນຄ້າ, ການດຳເນີນການຄ້າ ແລະ ການບໍລິການ, ຊ່ວຍສ້າງວຽກເຮັດງານທຳ, ສ້າງລາຍຮັບ ແລະ ຍົກສູງຊີວິດການເປັນຢູ່ຂອງປະຊາຊົນ ກໍຄື ການສ້າງປະຖົມປັດໄຈໃຫ້ແກ່ການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ ປະກອບສ່ວນໃຫ້ເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ. ອີງຕາມຜົນການສຳຫຼວດເສດຖະກິດທົ່ວປະເທດ ປີ 2020, ຈຳນວນ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ກວມເອົາ 99,8% ຈາກການລົງສຳຫຼວດຕົວຈິງຫົວໜ່ວຍທຸລະກິດ ຈໍານວນ 133.997 ຫົວໜ່ວຍ. ໃນນີ້, ຈຸນລະວິສາຫະກິດ ແມ່ນກວມເອົາ 94%. ນອກນີ້ ວຽກງານສົ່ງເສີມ SME ຍັງຖືກບັນຈຸເຂົ້າໃນວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2021-2023).

ຜ່ານການຄົ້ນຄວ້າ ແລະ ວິໄຈຂໍ້ມູນຕ່າງໆທີ່ກ່ຽວຂ້ອງ ເຫັນວ່າມີຄວາມຈຳເປັນຕ້ອງປັບປຸງກົດ ໝາຍໃຫ້ສອດຄ່ອງກັບສະພາບການຂະຫຍາຍຕົວຂອງເສດຖະກິດໃນຍຸກປັດຈຸບັນ ເປັນຕົ້ນຈຸນລະວິສາຫະກິດ ແມ່ນເປັນວິສາຫະກິດທີ່ກວມເອົາອັດຕາສ່ວນຫຼາຍໃນຈໍານວນວິສາຫະກິດທັງໝົດ ຢູ່ ສປປ ລາວ; ການເຄື່ອນໄຫວຂອງ ກອງທຶນສົ່ງເສີມ SME ໃນໄລຍະຜ່ານມາ ເຫັນວ່າມີຂໍ້ຈຳກັດຫຼາຍດ້ານ ເຮັດໃຫ້ກອງທຶນບໍ່ສາມາດເຕີບໃຫຍ່ຂຶ້ນໄດ້ເທົ່າທີ່ຄວນ ຊຶ່ງບັນຫາດັ່ງກ່າວຄວນໄດ້ຮັບການປັບປຸງແກ້ໄຂ ເພື່ອໃຫ້ກອງທຶນດັ່ງກ່າວມີທຶນສະສົມຫຼາຍຂຶ້ນ, ສາມາດສະໜອງທຶນໃຫ້ MSME ໄດ້ຫຼາຍ ແລະ ວ່ອງໄວຂຶ້ນກວ່າຜ່ານມາ; ວຽກງານສົ່ງເສີມ MSME ແມ່ນຕິດພັນກັບຫຼາຍກະຊວງ, ຂະແໜງການ ທັງສູນກາງ ແລະ ທ້ອງຖິ່ນ ຊຶ່ງເຫັນວ່າຄວນຍົກບົດບາດຂອງການຈັດຕັ້ງປະຕິບັດວຽກງານດັ່ງກ່າວໃຫ້ສູງຂຶ້ນ ແລະ ໃຫ້ທຸກພາກສ່ວນທີ່ກ່ຽວຂ້ອງທັງພາກລັດ ແລະ ພາກທຸລະກິດ ມີສ່ວນຮ່ວມໃນການຈັດຕັ້ງປະຕິບັດ, ມາຮອດປັດຈຸບັນ, ມີພຽງແຕ່ລາວ ຍັງບໍ່ໄດ້ສ້າງຕັ້ງຄະນະກໍາມະການສົ່ງເສີມ MSME ລະດັບຊາດ ຊຶ່ງໃນໄລຍະຜ່ານມາ ສປປ ລາວ ເຄີຍມີການແຕ່ງຕັ້ງຄະນະກໍາມະການສົ່ງເສີມ SME ແລະ ຜະລິດຕະພາບແຫ່ງຊາດ ຕາມດຳລັດສະບັບເລກທີ 42/ນຍ, ລົງວັນທີ 20 ເມສາ 2004 ແຕ່ໄດ້ຖືກຍົກເລີກໄປໃນເວລາຍົກດຳລັດສະບັບດັ່ງກ່າວ ຂຶ້ນເປັນກົດໝາຍສົ່ງເສີມ SME ສະບັບປັດຈຸບັນ. ດ້ວຍເຫດນີ້ ຈຶ່ງເຫັນວ່າຄວນສ້າງຕັ້ງຄະນະກຳມະການສົ່ງເສີມ MSME ຄືນໃໝ່ ເພື່ອໃຫ້ການຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນ ກວ່າຜ່ານມາ.

ໂຄງປະກອບຂອງ (ຮ່າງ) ກົດໝາຍສະບັບປັດຈຸບັນ, ສະບັບເລກທີ 11/ສພຊ, ລົງວັນທີ 21 ທັນວາ 2011 ມີທັງໝົດ XI ພາກ ແລະ 55 ມາດຕາ, ຮ່າງກົດໝາຍ ທີ່ປັບປຸງໃໝ່ນີ້ ປະກອບດ້ວຍ XI ພາກ, 5 ໝວດ ແລະ 72 ມາດຕາ. ພ້ອມນີ້ ກໍໄດ້ປ່ຽນຊື່ກົດໝາຍ ຈາກ: “ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ” ເປັນ “ກົດໝາຍວ່າດ້ວຍການສົ່ງເສີມ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໂດຍໄດ້ເພີ່ມຈຸນລະວິສາຫະກິດເຂົ້າຕື່ມ. ການປັບປຸງເນື້ອໃນແມ່ນໄດ້ຕັດອອກ ຈຳນວນ 6 ມາດຕາ, ປັບປຸງເນື້ອໃນ 30 ມາດຕາ ແລະ ສ້າງໃໝ່ 23 ມາດຕາ. ມາດຕາທີ່ໄດ້ຕັດອອກ ແມ່ນເພື່ອໃຫ້ສອດຄ່ອງກັບຫຼັກການໂດຍລວມຂອງການສ້າງ ແລະ ປັບປຸງກົດ ໝາຍໃນປັດຈຸບັນ ຄື: ກຳນົດກ່ຽວກັບ ການປະສານສົມທົບ ລະຫວ່າງ ກະຊວງອຸດສາຫະກໍາ ແລະ ການຄ້າ ແລະ ຂະແໜງການທີ່ກ່ຽວຂ້ອງ ແມ່ນໃຫ້ກໍານົດຢູ່ມາດຕາກ່ຽວກັບ ສິດ ແລະ ໜ້າທີ່ ຂອງກະຊວງອຸດສາຫະກຳ ແລະ ການຄ້າ, ສິດ ແລະ ໜ້າທີ່ ຂອງກະຊວງ, ຂະແໜງການທີ່ກ່ຽວຂ້ອງຢູ່ພາກການຄຸ້ມຄອງວຽກງານການສົ່ງເສີມ ຈວນກ (ພາກທີ VIII). ກຳນົດກ່ຽວກັບການກວດກາ ການຈັດຕັ້ງປະຕິບັດ ວຽກງານສົ່ງເສີມ MSME ຊຶ່ງໄດ້ກຳນົດຢູ່ນິຕິກໍາອຶ່ນແລ້ວ. ມາດຕາ ທີ່ໄດ້ປັບປຸງ ຈໍານວນ 30 ມາດຕາ ຊຶ່ງການປັບປຸງເນື້ອໃນມາດຕາດັ່ງກ່າວເຫຼົ່ານີ້ ແມ່ນປັບປຸງໃຫ້ສອດຄ່ອງກັບສະພາບຕົວຈິງໃນປັດຈຸບັນ ໂດຍຖອດຖອນບົດຮຽນຈາກການຈັດຕັ້ງປະຕິບັດ ໃນໄລຍະ 10 ປີຜ່ານມາ ເຊັ່ນ: ໄດ້ປັບປຸງນິຍາມ: ກົດໝາຍ ສະບັບປັດຈຸບັນໄດ້ກຳນົດ “ວິສາຫະກິດຂະໜາດນ້ອຍ ແລະ ກາງ ແມ່ນຫົວໜ່ວຍທຸລະກິດທີ່ໄດ້ຂຶ້ນທະບຽນວິສາຫະກິດ ແລະ ເຄື່ອນໄຫວຖືກຕ້ອງຕາມກົດໝາຍ ຂອງ ສປປ ລາວ” ສະບັບປັບປຸງ ໄດ້ກໍານົດ “ແມ່ນຫົວໜ່ວຍທຸລະກິດ ທີ່ໄດ້ສ້າງຕັ້ງ ແລະ ເຄື່ອນໄຫວຢ່າງຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງ” ຊຶ່ງໝາຍວ່າ ກວມເອົາທັງຫົວໜ່ວຍທຸລະກິດທີ່ນອນໃນເງື່ອນໄຂ ຕ້ອງຂຶ້ນທະບຽນວິສາຫະກິດ ແລະ ຫົວໜ່ວຍທຸລະກິດ ທີ່ບໍ່ຈໍາເປັນຕ້ອງຂຶ້ນທະບຽນວິສຫາະກິດ ຕາມທີ່ກຳນົດໃນກົດໝາຍວ່າດ້ວຍ ວິສາຫະກິດ ແລະ ລະບຽບການທີ່ກ່ຽວຂ້ອງ; ປັບປຸງ ມາດຕາ 13 ເຖິງ 26 ເປັນເນື້ອໃນທີ່ສໍາຄັນຂອງກົດໝາຍສະບັບນີ້ ໂດຍໄດ້ກໍານົດກ່ຽວກັບນະໂຍບາຍສົ່ງເສີມ MSME ຊຶ່ງກົດໝາຍສະບັບປັດຈຸບັນ ໄດ້ກໍານົດເປັນລັກສະນະລວມ ບໍ່ໄດ້ກໍານົດຈະແຈ້ງເຮັດໃຫ້ເວລາຈັດຕັ້ງປະຕິບັດຕົວຈິງ ພົບຂໍ້ຫຍຸ້ງຍາກ, ພ້ອມນີ້ ກໍເຫັນວ່າມີບາງນະໂຍບາຍ ຄວນກໍານົດເຂົ້າເພີ່ມຕື່ມ. ການປັບປຸງຄັ້ງນີ້ ຈຶ່ງໄດ້ປັບປຸງໃຫ້ລະອຽດ ໂດຍໄດ້ກຳນົດຈະແຈ້ງ ໃຫ້ເຫັນໄດ້ໃນແຕ່ລະນະໂຍບາຍຈັດຕັ້ງປະຕິບັດຄືແນວໃດ ຊຶ່ງຈະເຮັດໃຫ້ສາມາດຕິດຕາມ ແລະ ປະເມີນຜົນການຈັດຕັ້ງປະຕິບັດໄດ້ໃນແຕ່ລະໄລຍະ; ປັບປຸງມາດຕາ ທີ່ຕິດພັນກັບກອງທຶນສົ່ງເສີມ SME ໃຫ້ສອດຄ່ອງກັບກົດໝາຍວ່າດ້ວຍງົບປະມານ (ສະບັບປັບປຸງ ບາງມາດຕາ) ທີ່ປັບປຸງໃນປີ 2021 ແລະ ດໍາລັດວ່າດ້ວຍກອງທຶນສົ່ງເສີມ SME ທີ່ປະກາດໃຊ້ ໃນປີ 2019 ໂດຍການນຳເອົາເນື້ອໃນທີ່ສໍາຄັນຂອງດໍາລັດວ່າດ້ວຍກອງທຶນສົ່ງເສີມ SME ເຂົ້າໃນກົດ ໝາຍ ເພື່ອເຮັດໃຫ້ກອງທຶນສາມາດເຄື່ອນໄຫວໄດ້ຢ່າງມີປະສິດທິພາບ, ແນໃສ່ຮັບປະກັນຄວາມຍືນຍົງຂອງກອງທຶນ ເຊັ່ນ: ແຫຼ່ງທຶນຂອງກອງທຶນ, ການຄຸ້ມຄອງລາຍຮັບ-ລາຍຈ່າຍ ຂອງກອງທຶນ ເປັນຕົ້ນ ປັບປຸງມາດຕາ ທີ່ກຳນົດກ່ຽວກັບ ສິດ ແລະ ໜ້າທີ່ ຂອງພາກສ່ວນຮັບຜິດຊອບວຽກງານສົ່ງເສີມ MSME ໂດຍໄດ້ປັບປຸງໃຫ້ມີຄວາມລະອຽດ ແລະ ແທດເໝາະກັບໜ້າທີ່ຄວາມຮັບຜິດຊອບຕົວຈິງຂອງແຕ່ລະພາກສ່ວນ ເພື່ອຮັບປະກັນໃຫ້ແກ່ການຈັດຕັ້ງປະຕິບັດວຽກງານສົ່ງເສີມ MSME ສາມາດຈັດຕັ້ງປະຕິບັດໄດ້ນັບແຕ່ສູນກາງຮອດທ້ອງຖິ່ນ.

ຂ່າວ-ພາບ: ແສງຈັນ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ຕອນບ່າຍ ວັນທີ 28 ມິຖຸນານີ້, ທ່ານ ສີຈິ້ນຜິງ ປະທານປະເທດຈີນ ໄດ້ໄປສຳຫລວດ ກວດກາວຽກງານຢູ່ເຂດຊຸມຊົນຈື້ຢວນ ເຂດໄຮເທັກຕົ່ງຫູ ນະຄອນອູຮັ້ນ ແຂວງຫູເປີຍ. ຫລັງຈາກເກີດການແພ່ລະບາດຂອງພະຍາດໂຄວິດ-19 ແລ້ວ, ເຂດຊຸມຊົນແຫ່ງນີ້ໄດ້ຈັດຕັ້ງປະຕິບັດລະບຽບການຮັບຜິດຊອບ 5 ຂັ້ນຢ່າງເຂັ້ມງວດ, ໄດ້ສ້າງລະບົບຮັບປະກັນຄວາມໝັ້ນທ່ຽງຂອງເຂດ ຊຸມຊົນ ໂດຍປະສານສົມທົບກັນ ລະຫວ່າງການຟື້ນຟູການເຮັດວຽກ ແລະການປ້ອງກັບຄວບຄຸມພະຍາດ, ເຊິ່ງໄດ້ຊຸກຍູ້ການດຳລົງຊີວິດ ແລະ ການເຮັດວຽກຂອງປະຊາຊົນໃຫ້ຟື້ນຟູເປັນປົກກະຕິຢ່າງເປັນລະບຽບຮຽບຮ້ອຍ.

ທ່ານ ສີຈິ້ນຜິງ ໄດ້ເຂົ້າໄປຫ້ອງການບໍລິການອາສາສະໝັກ, ຮັບຟັງ ສະພາບການເຄື່ອນໄຫວຂອງກົນໄກປ້ອງກັນຄວບຄຸມພະຍາດຮ່ວມກັນ ຂອງຮາກຖານຈາກພະນັກງານເຂດຊຸມຊົນ, ພະນັກງານສະມາຊິກພັກ ປະຈຳເຂດຊຸມຊົນ ແລະອາສາສະໝັກ, ພ້ອມທັງໃຫ້ກຳລັງໃຈແກ່ ພວກເຂົາເຈົ້າສ້າງຮົ້ວປ້ອງກັນພະຍາດຢູ່ແນວໜ້າໃຫ້ໜັກແໜ້ນ, ສ້າງສະພາບແວດລ້ອມທີ່ປອດໄພ ແລະສະຫງົບໃຫ້ແກ່ປະຊາຊົນ.

ຢູ່ສະໜາມນ້ອຍຂອງເຂດຊຸມຊົນ, ທ່ານ ສີຈິ້ນຜິງ ໄດ້ເວົ້ານຳຄົນທັງ ຫລາຍຢ່າງສະໜິດສະໜົມວ່າ ຂ້າພະເຈົ້າໄດ້ເອົາໃຈໃສ່ປະຊາຊົນອູຮັ້ນ ມາໂດຍຕະຫລອດ 2 ປີຜ່ານໄປ, ຂ້າພະເຈົ້າໄດ້ມາຢ້ຽມຢາມບັນດາ ສະຫາຍຢູ່ນະຄອນອູຮັ້ນ ທີ່ເປັນຕົວເມືອງວິລະຊົນ. ນັບແຕ່ເກີດການແພ່ ລະບາດຂອງພະຍາດໂຄວິດ-19 ເປັນຕົ້ນມາ, ພະນັກງານເຂດຊຸມຊົນ ຈຳນວນມະຫາສານໄດ້ຍຶດໝັ້ນເຮັດວຽກຢູ່ແນວໜ້າປ້ອງກັນຄວບຄຸມພະຍາດມາເປັນເວລາດົນນານ, ມີຄວາມລຳບາກຫລາຍ, ແຕ່ໄດ້ສ້າງຜົນງານ ທີ່ພົ້ນເດັ່ນ. ນະທີ່ນີ້, ຂ້າພະເຈົ້າຂໍສະແດງຄວາມຢື້ຢາມຖາມຂ່າວຕໍ່ບັນດາ ສະຫາຍກໍຄືພະນັກງານເຂດຊຸມຊົນຈຳນວນມະຫາສານຂອງທົ່ວປະເທດ.

ທ່ານ ສີຈິ້ນຜິງ ກ່າວເນັ້ນໜັກວ່າ: ສະພາບການລະບາດຂອງພະຍາດ ໂຄວິດ-19 ເປັນການທົດສອບທີ່ຫຍຸ້ງຍາກຄັ້ງໜຶ່ງ. ພວກເຮົາຍຶດໝັ້ນ ການຖືປະຊາຊົນ ແລະຊີວິດຢູ່ເໜືອກວ່າທຸກສິ່ງຢ່າງ, ຍຶດໝັ້ນການປ້ອງກັນ ບໍ່ໃຫ້ພະຍາດຢູ່ຕ່າງປະເທດລະບາດເຂົ້າສູ່ພາຍໃນປະເທດ ແລະຢູ່ພາຍໃນ ປະເທດປ້ອງກັນບໍ່ໃຫ້ພະຍາດລະບາດຢ່າງຂະໜາດໃຫຍ່ອີກຄັ້ງໃໝ່, ຍຶດໝັ້ນການຈຳກັດພະຍາດໃຫ້ເປັນສູນຢູ່ທຸກເວລາ, ປັບປຸງມາດຕະການ ປ້ອງກັນ ແລະຄວບຄຸມພະຍາດຢ່າງບໍ່ຢຸດຢັ້ງຕາມສະພາບການປ່ຽນແປງ ເຊິ່ງໄດ້ປົກປ້ອງຄວາມປອດໄພດ້ານຊີວິດ ແລະສຸຂະພາບຂອງປະຊາຊົນ ຢ່າງຂະໜາດໃຫຍ່ທີ່ສຸດ. ປະເທດຈີນມີປະຊາກອນຢ່າງຫລວງຫລາຍ ຖ້າວ່າ ໃຊ້ນະໂຍບາຍປ້ອງກັນ ແລະຄວບຄຸມພະຍາດໂຄວິດ-19 ແບບອາໄສພູມ ຕ້ານທານແບບລວມໝູ່ ແລະບໍ່ຕໍ່ຕ້ານຢ່າງຕັ້ງໜ້າກໍຈະເກີດຜົນຮ້າຍຕາມ ມາພາຍຫລັງແບບບໍ່ກ້າຄາດຄິດ. ພວກເຮົາປະຕິບັດນະໂຍບາຍຈຳກັດ ພະຍາດໃຫ້ເປັນສູນຢູ່ທຸກເວລາ ແມ່ນສູນກາງພັກພິຈາລະນາຈາກ ຈຸດປະສົງ ແລະລັກສະນະຂອງພັກ ແລະກຳນົດຕາມສະພາບການຕົວຈິງ ຂອງປະເທດຈີນ, ເຖິງວ່າຈະມີຜົນກະທົບຊົ່ວຄາວຕໍ່ການພັດທະນາຂອງ ເສດຖະກິດ, ແຕ່ຈະບໍ່ໃຫ້ຄວາມປອດໄພດ້ານຊີວິດ ແລະສຸຂະພາບ ຂອງປະຊາຊົນໄດ້ຮັບຜົນຮ້າຍ ໂດຍສະເພາະຕ້ອງປົກປັກຮັກສາຜູ້ເຖົ້າ ແລະເດັກນ້ອຍໃຫ້ດີ. ອີງຕາມການສະຫລຸບໂດຍລວມແລ້ວ ມາດຕະການ ປ້ອງກັນ ແລະຄວບຄຸມພະຍາດຂອງພວກເຮົາແມ່ນມີຜົນເສຍຫາຍ ໜ້ອຍທີ່ສຸດ ແລະມີປະສິດທິຜົນດີທີ່ສຸດ. ພວກເຮົາມີການນຳພາຂອງ ພັກກອມມູນິດຈີນ, ມີເຂດຊຸມຊົນທີ່ເປັນອົງການພື້ນຖານສຳຄັນທີ່ສຸດ ແລະມີຄວາມສາມາດໃນການປະຕິບັດນະໂຍບາຍຈຳກັນພະຍາດໂຄວິດ-19 ໃຫ້ເປັນສູນຢູ່ທຸກເວລາຈົນຮອດໄລຍະທີ່ໄດ້ຮັບໄຊຊະນະຂັ້ນສຸດທ້າຍ.

ຕາມ​ຂ່າວ​ຈາກ springnews​,ວັນ​ທີ29​ມິຖຸນາ​ນີ້, ອີ​ຕາ​ລີ ຜະ​ເຊີນ​ ໄພ​ແຫ້ງ​ແລ້ງ ຮ້າຍ​ແຮງ​ສຸດ ​ໃນ​ຮອບ70​ປີ ​ເຮັດ​ໃຫ້​ນາ​ເຂົ້າ ຢູ່​ເຂດ​ທົ່ງພຽງ ທາງ​ພາກ​ເໜືອ​ຂອງ​ປະ​ເທດ ຂາດ​ແຄນ​ນ້ຳ ສ່ຽງ​ກະທົບ​ຕໍ່ ​ການ​ປູກ​ເຂົ້າ​ ແນວ​ພັນ​ດີ ຂອງ​ອີ​ຕາ​ລີ ຫລັງ​ຈາກ ແມ່ນ້ຳ​ໂປ (Po)ຊຶ່ງເປັນແມ່ນ້ຳ ທີ່ຍາວທີ່ສຸດ ໃນປະເທດ ອີຕາລີ ໄດ້ແຫ້ງແລ້ງລົງ ຈົນກາຍເປັນ ຫາດຊາຍຍາວ ຍ້ອນຝົນ ບໍ່ຕົກ ເປັນເວລາ ດົນນານ ​ເຮັດ​ໃຫ້ ທົ່ງນາ ຢູ່​ລະຫວ່າງ ແມ່ນ້ໍາ Po ແລະ ພູ Alps ບໍ່ມີນໍ້າຖ້ວມ​ເຖິງ. ທັງ​ທີ່​ປົກກະຕິ ຈະ​ມີ​ນ້ຳ​ຖ້ວມ​ທົ່ງ​ນາ 2-5 ​ຊັງ​ຕີ​ແມັດ ຊາວ​ກະ​ສິ​ກອນ​ ຢູ່​ເມືອງ​ mortar​ ແຄວ້ນ Lombardy ທາງພາກ​ເໜືອ​ ຂອງອິຕາລີ, ປູກ​ເຂົ້າ ສາຍ​ພັນ Arborio ທີ່​ໃຊ້​ເຮັດ risottos ຊຶ່ງ​ເປັນ​ເຂົ້າພັດ ທີ່ມີຊື່ສຽງ ຫລາຍສັດຕະວັດ ໃນອິຕາລີ. ຂະນະ​ນີ້ ​ຕົ້ນ​ເຂົ້າ ​ເກືອບ​ທັງ​ໝົດ ພວມ​ຢືນ​ຕົ້ນຕາຍ ​ເພາະ​ບໍ່​ມີ​ນ້ຳ ມາ 2ອາທິດ​ແລ້ວ ​ເຫລືອ​ຕົ້ນ​ເຂົ້າ ພຽງ10% ທີ່​ຍັງ​ລອດ ​ແລະ ຕ້ອງ​​ໄດ້​ນ້ຳ​ ພາຍ​ໃນ2-3ວັນ ຖ້າ​ບໍ່​ດັ່ງນັ້ນ ຈະ​ຢືນ​ຕາຍ​ ເຊັ່ນ​ກັນ.

ແມ່ນ້ໍາ Po ແລະ ​ແມ່​ນ້ຳ Dora Baltiaທີ່​ເປັນ​ແຫ​ລ່ງ ນ້ຳ​ຫລັກຂອງ​ພື້ນ​ທີ່​ ທາງ​ເໜືອ ມີ​ລະດັບ​ນ້ຳ ຕ່ຳ​ກວ່າ​ ປົກກະຕິ ​ເຖິງ 8​ເທົ່າ. ສ່ວນສະມາຄົມ ຊົນລະປະທານ ອີ​ຕາ​ລີ ​ເປີດ​ເຜີຍ​ວ່າ: ອັດຕາ ​ນ້ຳໄຫລ​ ໃນ​ຂະນະ​ນີ້ ​ເຫລືອ​ພຽງ 30.000-60.000 ລິດ​ຕໍ່ ວິນາທີ ຈາກ​ປົກກະຕິ 160.000 ລິດ​ຕໍ່​ ວິນາທີ ​ເຮັດ​ໃຫ້​ຕ້ອງ ​ຢຸດ​ຈ່າຍ​ນ້ຳ ​ໃຫ້​ແກ່ ສວນ​ພືດ ສຳຮອງ ​ໂດຍ​ສະ​ເພາະ ​ໝາກ​ໄມ້​ ກິນ​ໝາກ ​ເພື່ອ​ໃຫ້​ຄວາມ​ສຳຄັນ​ ກັບ​​ຕົ້ນເຂົ້າ​ ໃນ​ທົ່ງນາ ​ເປັນ​ອັນ​ດັບ​ ທຳ​ອິດ.ນອກ​ນນີ້ ຍັງ​ເກີດ​ ຄວາມ​ຂັດ​ແຍ້​ງກັນ ລະຫວ່າງ ​ໂຮງ​ໄຟຟ້າ​ ພະລັງງານ​ນ້ຳ ​ຢູ່​ຕົ້ນນ້ຳ ກັບ​ຊາວ​ກະສິກອນ ຢູ່​ລຸ່ມ​ນ້ຳ ພວມ​ຂາດ​ແຄນ​ນ້ຳ​ ຢ່າງ​ໜັກ.ນອກ​ນີ້ ຍັງ​ສັ່ງ​ປິດ​ ນ້ຳພຸ ສາທາລະນະ ​ເພື່ອ​ປະຢັດ​ນ້ຳ./. (ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ ສະ​ໄຫວ ລາດ​ປາກ​ດີ

ອີງຕາມໜັງສືພິມ ໂກໂບທາມຂອງຈີນ ລາຍງານ ເມື່ອອາທິດນີ້ວ່າ: ສປ ຈີນ ປະສົບຜົນສຳເລັດຢ່າງໃຫຍ່ຫລວງ ໃນການປັບປຸງລະບົບນິເວດຢູ່ນະຄອນຫລວງປັກກິ່ງ ໃນຫລາຍປີຜ່ານມາ ໂດຍສະເພາະ ປີ 2021 ບັນດາທາດມົນລະພິດ ທາງອາກາດທີ່ສຳຄັນ ໄດ້ຜ່ານມາດຖານຄຸນນະພາບອາກາດ ແຫ່ງຊາດຈີນ.

ທ່ານ ສາຍ ຊື ເລຂາຄະນະພັກ ເທສະບານປັກກິ່ງ ຂອງພັກກອມມູນິດຈີນ ໄດ້ນຳສະເໜີ ບົດລາຍງານ ຕໍ່ກອງປະຊຸມພັກເທສະບານປັກກິ່ງ ຄັ້ງທີ 13 ໂດຍໄດ້ຍົກໃຫ້ ເຫັນວ່າ ໃນໄລຍະ 5 ປີຜ່ານມາ, ເຂດນະຄອນປັກກິ່ງ ໄດ້ມີການປັບປຸງ ລະບົບນິເວດວິທະຍາຢ່າງຫລວງຫລາຍ ແລະ ໄດ້ຮັບປະສິດທິຜົນດີຂຶ້ນ ຢ່າງວ່ອງໄວ ເຫັນໄດ້ຈາກສົ່ງຜົນໃຫ້ ສະພາບອາກາດດີຂຶ້ນ, ລະດັບຄວາມໜາແໜ້ນ ຂອງຝຸ່ນລະອອງຂະໜາດ ບໍ່ເກີນ 2,5 ໄມຄຣອນ (PM2.5) ໃນປີ 2021 ຫລຸດລົງເຫລືອ 33 ມິໂກຣກຣາມ ຕໍ່ແມັດກ້ອນ ໝາຍຄວາມວ່າ ຫລຸດລົງ 43,1% ເມື່ອທຽບໃສ່ປີ 2017 ຜ່ານມາ, ເຮັດໃຫ້ປະຊາຊົນ ສາມາດຫລຽວເຫັນທ້ອງຟ້າ ທີ່ເປັນສີຟ້າ ແລະ ມີກ້ອນເມກຂາວ ຫລາຍກວ່າແຕ່ກ່ອນ.

ໃນຂະນະດຽວກັນ, ຂໍ້ມູນຈາກ ຫ້ອງການສິ່ງແວດລ້ອມ ແລະ ນິເວດວິທະຍານະຄອນຫລວງ ປັກກິ່ງ ໄດ້ຊີ້ໃຫ້ເຫັນວ່າ ມູນຄ່າຂອງສານພິດຕົ້ນຕໍ ແມ່ນ ຊຸນເຟີດິອົກຊິດ, ນິໂຕຣແຊນດິອົກຊິດ, ກາກບອນໂມໂນຊິດ ແລະ ໂອໂຊນ ສາມາດຜ່ານມາດຖານແຫ່ງຊາດຂອງຈີນ. ໂດຍຄິດໄລ່ລວມ ແລ້ວ ໃນປີ 2021, ນະຄອນຫລວງປັກກິ່ງ ມີສະພາບອາກາດດີ ຈຳນວນ 288 ວັນ. ໂຄງການສິ່ງ ແວດລ້ອມຂອງສະຫະປະຊາຊາດ ໄດ້ສະແດງຄວາມເຫັນວ່າ ສິ່ງດັ່ງກ່າວນີ້ ຖືເປັນສັນຍານທີ່ດີທີ່ສຸດ ສຳ ລັບນະຄອນຫລວງປັກກິ່ງ. ນອກຈາກນັ້ນ, ເມື່ອບໍ່ດົນມານີ້ ນະຄອນຫລວງປັກກິ່ງ ໄດ້ສຳເລັດໂຄງ ການ ຟື້ນຟູປ່າຂະໜາດໃຫຍ່, ປັດຈຸບັນ ນະຄອນຫລວງປັກກິ່ງ ມີເນື້ອທີ່ປ່າໄມ້ກວມເອົາ 44,6 % ຂອງເນື້ອທີ່ທັງໝົດ.

ແປ ແລະ ຮຽບຮຽງ ໂດຍ: ແສງທອງ ພະສະຫວັດ

ຄວາມກົດດັນຕໍ່າຂອງອາກາດຮ້ອນ ໄດ້ປົກຄຸມຢູ່ທຸກພາກຂອງ ປະເທດລາວ ສົມທົບກັບຍ່ອມຄວາມກົດດັນອາກາດຕໍ່າທີ່ປົກຄຸມຢູ່ເຂດ ພາກເໜືອຂອງປະເທດຫວຽດນາມ, ໃນເວລາ 07:00 ໂມງຂອງວັນທີ 30 ມີຖຸນາ 2022 ພາຍຸດີເປຊັນ ທີ່ເຄື່ອນທີ່ຢູ່ເຂດທະເລຈີນໃຕ້ ໄດ້ເພີ່ມກໍາລັງ ແຮງຂຶ້ນກາຍເປັນພາຍຸເຂດຮ້ອນ ແລະ ມີຈຸດສູນກາງຢູ່ເສັ້ນຂະໜານທີ 17.6 ອົງສາເໜືອ ແລະ ເສັ້ນແວງທີ 115.3 ອົງສາຕາເວັນອອກ ກໍາລັງ ເຄື່ອນທີ່ໄປທາງທິດເໜືອຕາເວັນອອກສ່ຽງເໜືອ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ຫາ ປານກາງໃນແຕ່ລະພາກ ແລະ ຕົກໜັກ ພ້ອມມີລົມ ພັດແຮງຢູ່ບາງທ້ອງຖິ່ນ ແຂວງພາກເໜືອ ແລະ ພາກກາງ.

ພະຍາກອນອາກາດ ເວລາ 7:00 ໂມງຂອງວັນທີ 30/6/2022 ເຖິງ ເວລາ 7:00 ໂມງ ວັນທີ 1/7/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານ ກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການ ປົກຫຸ້ມຂອງຝົນເທົ່າກັບ 75% ຂອງພາກ. ອຸນຫະພູມໃນລະຫວ່າງ 19-31 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ, ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກກໜັກ ພ້ອມມີລົມ ພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນລະຫວ່າງ 21-35 ອົງສາ.

-ນະຄອນຫລວງວຽງຈັນ: ອາກາດຮ້ອນ, ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງຢູ່ບາງບໍລິເວນ ພ້ອມມີ ລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 25-36 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນລະຫວ່າງ 22-35 ອົງສາ.

-ແຂວງໄຊສົມບູນ: ຈະມີຝົນຕົກໃນລະດັບຄ່ອຍ ຫາ ປານກາງ ພ້ອມມີ ລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 17-28 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 24-35 ອົງສາ.

-ເຂດພູພຽງບໍລະເວນ: ຈະມີຝົນຕົກໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 50%. ອຸນຫະພູມໃນລະຫວ່າງ 17-28 ອົງສາ.

Daily Exchange Rates 30/06/2022

ພາຍຫຼັງປະເທດຊາດພວກເຮົາໄດ້ຮັບການປົດປ່ອຍ ໃນປີ 1975 ໂດຍສະເພາະແມ່ນພາຍຫຼັງທີ່ພັກເຮົາ ໄດ້ລິເລີ່ມນໍາພາການດໍາເນີນການປ່ຽນແແປງໃໝ່ນັບແຕ່ປີ 1986 ເປັນຕົ້ນມາ, ພັກເຮົາໄດ້ວາງແນວທາງ ຫັນເປັນອຸດສາຫະກໍາ ແລະ ທັນສະໄໝ ເພື່ອພັດທະນາປະເທດຊາດ ກ້າວຂຶ້ນຕາມທິດຍືນຍົງ ສູ່ຈຸດໝາຍສັງຄົມນິຍົມ. ໃນນີ້, ແຂວງອັດຕະປື ກໍເລີ່ມນໍາໃຊ້ໄຟຟ້າດ້ວຍຈັກປັ່ນໄຟ ທີ່ຂຶ້ນກັບພະແນກ ອຸດສາຫະກໍາ-ຫັດຖະກໍາ ແລະ ຫ້ອງວ່າການປົກຄອງແຂວງ ເປັນຜູ້ຄຸ້ມຄອງ ເພື່ອຮັບໃຊ້ເຂດສໍານັກງານອົງການທີ່ຈໍາເປັນ ແລະ ແບ່ງການຊົມໃຊ້ເປັນແຕ່ລະຄຸ້ມບ້ານໃຊ້ 4 ຊົ່ວໂມງຕໍ່ຄືນ ໂດຍເລີ່ມແຕ່ 18:00 ໂມງ – 21:00 ໂມງ. ໄລຍະຕໍ່ມາໄດ້ມອບໃຫ້ພະແນກອຸດສາຫະກໍາ-ຫັດຖະກໍາ ກໍຄື: ພະແນກພະລັງ ງານ ແລະ ບໍ່ແຮ່ ປັດຈຸບັນ ເປັນຜູ້ຄຸ້ມຄອງ ຈົນມາຮອດທ້າຍປີ 1999 ລັດວິສາຫະກິດໄຟຟ້າລາວ ຈຶ່ງໄດ້ສ້າງຕັ້ງສູນບໍລິການໄຟຟ້າທີ່ຂຶ້ນກັບສາຂາແຂວງຈໍາປາສັກ ແລະ ມາຮອດປີ 2022 ຫຼັງຈາກໂຄງການກໍ່ສ້າງເຂື່ອນໄຟຟ້າຫ້ວຍເຫາະສໍາເລັດ, ລັດວິສາຫະກິດໄຟຟ້າລາວ ເຫັນໄດ້ຄວາມຈໍາເປັນຂອງແຂວງ ອັດຕະປື ເພື່ອການພັດທະນາເສດຖະກິດ, ວັດທະນະທໍາ-ສັງຄົມ ຂອງແຂວງ ຈຶ່ງໄດ້ຊອກຫາແຫຼ່ງທຶນ ພ້ອມທັງດໍາເນີນການກໍ່ສ້າງຕາຂ່າຍ 22 ກິໂລໂວນ, ຈາກເຂື່ອນໄຟຟ້າຫ້ວຍເຫາະ ເພື່ອລໍາລຽງພະລັງງານມາຮັບໃຊ້ 2 ຕົວເມືອງຄື: ເມືອງສາມັກຄີໄຊ ແລະ ເມືອງໄຊເສດຖາ ຈໍານວນ 60 ກິໂລເມັດ ໃນປີ 1998.

ປີ 2004-2005 ລັດວິສາຫະກິດໄຟຟ້າລາວ ໄດ້ລົງທຶນກໍ່ສ້າງສະຖານີ ແລະ ສາຍສົ່ງ 115 ກິໂລໂວນ, ຈາກສະຖານີ ບ້ານນາ ເມືອງປະທຸມພອນ ແຂວງຈໍາປາສັກ ຫາ ສະຖະນີສະເພົາທອງ ເມືອງ ສາມັກຄີໄຊ ແຂວງອັດຕະປື ເພື່ອສະໜອງໄຟຟ້າໃຫ້ທົ່ວແຂວງ, ມີລວງຍາວ 112,5 ກິໂລແມັດ ແລະ ພ້ອມຂະຫຍາຍຕາຂ່າຍໄຟຟ້າລົງສູ່ເຂດຊົນນະບົດຫ່າງໄກສອກຫຼີກຕື່ມອີກ. ມາຮອດວັນທີ 1 ມິຖຸນາ 2006 ລັດວິສາຫະກິດໄຟຟ້າລາວ ສາຂາແຂວງອັດຕະປື ຈຶ່ງໄດ້ສ້າງຕັ້ງຂຶ້ນຢ່າງເປັນທາງການ ແລະ ໄດ້ມີການມອບໂອນ ລະຫວ່າງໄຟຟ້າລາວ ສາຂາແຂວງອັດຕະປື ກັບ ກະຊວງອຸດສາຫະກໍາ-ຫັດຖະກໍາ ຊຶ່ງເອີ້ນວ່າ: (ກະຊວງພະລັງງານ ແລະ ບໍ່ແຮ່) ປັດຈຸບັນ, ມີສາຍຕັ້ງຂຶ້ນກັບລັດວິສາຫະກິດໄຟຟ້າລາວ (ສໍານັກງານໃຫຍ່) ແລະ ສາຍຂວາງຂຶ້ນກັບ ພະແນກພະລັງງານ ແລະ ບໍ່ແຮ່ ແຂວງ ໂດຍມີພາລະບົດບາດ ແລະ ໜ້າທີ່ໃນການຄຸ້ມຄອງບໍລິການ ເພື່ອສະໜອງໄຟຟ້າໃຫ້ມີຄວາມຮັບປະກັນໃຫ້ແກ່ສັງຄົມ ກໍຄືປະຊາຊົນລາວບັນດາເຜົ່າຊາວແຂວງອັດຕະປື.

ນັບແຕ່ນັ້ນມາ, ລັດຖະບານກໍຄື ອໍານາດການປົກຄອງຂັ້ນແຂວງ ກໍໄດ້ໃຫ້ຄວາມສໍາຄັນ ແລະ ມີນະໂຍບາຍໃນດ້ານການພັດທະນາ ແລະ ຂະຫຍາຍລະບົບຕາຂ່າຍໃຫ້ທົ່ວເຖິງ. ໃນປັດຈຸບັນນີ້, ໄຟຟ້າລາວ ສາຂາແຂວງອັດຕະປືພວກເຮົາ ແມ່ນໄດ້ລໍາລຽງໄຟຟ້າເພື່ອມາຮັບໃຊ້ ແຂວງອັດຕະປື ຊຶ່ງລວມມີ 5 ແຫຼ່ງຄື: ຈາກສະຖານີສະເພົາທອງ, ເຂື່ອນໄຟຟ້າຫ້ວຍເຫາະ, ເຂື່ອນໄຟຟ້າຫ້ວຍສະໝອງ, ລະບົບຕາຂ່າຍ ເມືອງປະທຸມພອນ ແລະ ເມືອງປາກຊ່ອງ ແຂວງຈໍາປາສັກ ແລະ ຈາກ ສສ ຫວຽດນາມ ເພື່ອຮັບໃຊ້ເຂດບໍ່ຄໍາວັງຕັດ 15 ເມກາວັດ, ປະຊາຊົນໄດ້ຊົມໃຊ້ໄຟຟ້າທຸກຂົງເຂດຮອດປີ 2022 ເທົ່າກັບ 96%, ທຽບໃສ່ຫຼັງຄາເຮືອນ 5 ຕົວເມືອງ ແມ່ນໄດ້ 100% ແລະ ໃນ 141 ບ້ານ, ມີ 29.251 ຄົວເຮືອນ. ນອກຈາກນີ້, ຍັງໄດ້ປັບປຸງໂຄງຮ່າງການຈັດຕັ້ງຄືນໃໝ່ໃນປີ 2021 ເພື່ອສະດວກໃນການບໍລິການຄຸ້ມຄອງຢູ່ຂັ້ນແຂວງ ແລະ 5 ສູນບໍລິການໄຟຟ້າປະຈໍາໃນ 5 ຕົວເມືອງສໍາເລັດໂດຍພື້ນຖານ ແລະ ໄດ້ມອບພັນທະອາກອນໃນແຕ່ລະປີ ສະເລ່ຍ 10.890.979.313 ກີບຕໍ່ປີ.

ຕະຫຼອດໄລຍະເວລາ 16 ປີທີ່ຜ່ານມາ, ໄຟຟ້າລາວ ສາຂາແຂວງອັດຕະປື ບໍ່ພຽງແຕ່ເຮັດບົດບາດອັນສໍາຄັນໃນການຄຸ້ມຄອງການບໍລິການທີ່ມີຄວາມໝັ້ນຄົງເທົ່ານັ້ນ. ແຕ່ຫາກຍັງແມ່ນຜູ້ດໍາເນີນທຸລະກິດ, ຜູ້ໃຫ້ການສະໜອງການບໍລິການກະແສໄຟຟ້າເພື່ອການຊົມໃຊ້ຢູ່ພາຍໃນສັງຄົມທີ່ມີຄຸນນະພາບສູງ ຊຶ່ງມາຮອດປັດຈຸບັນນີ້, ໄຟຟ້າລາວສາມາດສະໜອງໄຟຟ້າ ຮັບໃຊ້ໄດ້ 100%, ນອກຈາກນີ້, ການຜະລິດກະແສໄຟຟ້າ ຢູ່ແຂວງອັດຕະປື ຍັງເຮັດບົດບາດເປັນຜູ້ສົ່ງອອກ ແລະ ກາຍເປັນຫົວໜ່ວຍທຸລະກິດພາກລັດທີ່ສໍາຄັນໃນການສ້າງລາຍຮັບງົບປະມານໃນຫຼາຍປີຜ່ານມາຈົນເຖິງປັດຈຸບັນ.

ໂດຍລວມແລ້ວ, ໃນ 16 ປີທີ່ຜ່ານມາ, ໄຟຟ້າລາວ ສາຂາແຂວງອັດຕະປື ໄດ້ມີຜົນງານຫຼວງຫຼາຍທີ່ສຸດ ຊຶ່ງຜົນງານທີ່ມີລັກສະນະເປັນພື້ນຖານກວ່າໝູ່ໃນຊຸມປີທີ່ຜ່ານມານັ້ນ ກໍແມ່ນໄດ້ເປັນເຈົ້າການຈັດຕັ້ງຜັນຂະຫຍາຍແນວທາງຫັນເປັນອຸດສາຫະກໍາ ແລະ ທັນສະໄໝຂອງພັກ, ແຜນຍຸດທະສາດກ່ຽວກັບການພັດທະນາວຽກງານພະລັງງານຂອງລັດຖະບານກໍຄືຂອງແຂວງດ້ວຍຄວາມຕັ້ງໜ້າ ແລະ ມີລະດັບການຂະຫຍາຍຕົວທີ່ແຂງແຮງ, ຕໍ່ເນື່ອງ ແລະ ໜັກແໜ້ນ, ໂດຍສະເພາະແມ່ນໃນຊຸມປີແຫ່ງການດໍາເນີນການພັດທະນາປະເທດຊາດຕາມແນວທາງປ່ຽນແປງໃໝ່, ພາຍໃຕ້ການນໍາພາຂອງພັກ, ຂະ ແໜງອຸດສາຫະກໍາໄຟຟ້າ ແລະ ລັດວິສາຫະກິດໄຟຟ້າລາວ ໄດ້ເປັນຜູ້ເຮັດບົດບາດທີ່ສຳຄັນ ແລະ ມີລັກສະນະເປັນພື້ນຖານ ໃນການພັດທະນາເສດຖະກິດ-ສັງຄົມຂອງຊາດ ແລະ ຂອງແຂວງອັດຕະປື.

ໄດ້ກາຍເປັນຂະແໜງເສດຖະກິດ ທີ່ເຮັດບົດບາດເປັນຜູ້ເປີດຊ່ອງທາງໃນລະບົບເສດຖະກິດແຫ່ງຊາດ, ເສດຖະກິດຂອງແຂວງ ເປັນເຄື່ອງມືທີ່ສໍາຄັນໃນການມ້າງເສດຖະກິດທຳມະຊາດ, ເຄິ່ງທໍາມະຊາດ ໄປສູ່ເປັນເສດຖະກິດຜະລິດເປັນສິນຄ້າ, ການຫັນປ່ຽນແບບວິທີການຜະລິດ, ການພັດທະນາຊົນນະບົດ, ວຽກງານ 3 ສ້າງ, ການປັບປຸງ, ຍົກລະດັບຊີວິດການເປັນຢູ່ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງຕັ້ງໜ້າ.

ຄຽງຄູ່ກັບຜົນສຳເລັດທີ່ຍາດມາໄດ້ ກໍຍັງມີສິ່ງທ້າທາຍຫຼາຍດ້ານຕໍ່ກັບການດຳເນີນວຽກງານວິສາຫະກິດ ໂດຍສະເພາະໃນໄລຍະທີ່ສະພາບເສດຖະກິດ-ການເງິນ-ສັງຄົມ-ເຕັກໂນໂລຊີ ກຳລັງປ່ຽນແປງ ແລະ ເຕີບໂຕໄປຢ່າງໄວວາ, ພະນັກງານ-ກຳມະກອນ ຕ້ອງໄດ້ເອົາໃຈໃສ່ເພີ່ມທະວີຄວາມເສຍສະຫຼະທາງດ້ານເຫື່ອແຮງ ແລະ ສະຕິປັນຍາເພື່ອປະກອບສ່ວນເຂົ້າໃນການສ້າງສາພັດທະນາ ລັດວິສາຫະກິດ ໄຟຟ້າລາວ ໂດຍສະເພາະ ລັດວິສາຫະກິດ ໄຟຟ້າລາວ ສາຂາແຂວງອັດຕະປື ໃຫ້ກາຍເປັນຫົວໜ່ວຍວິສາຫະກິດທີ່ເຂັ້ມແຂງ ແລະ ເປັນກຳລັງຫຼັກຂອງແຂວງ ແລະ ຂອງຊາດ ແລະ ຖືສໍາຄັນວຽກງານກວດກາໃຫ້ມີປະສິດທິພາບ ແລະ ປະສິດທິຜົນສູງ, ສົ່ງເສີມສິ່ງທີ່ດີ, ຕັ້ງໜ້າຊົມເຊີຍຜູ້ດີເດັ່ນ, ເດັດດ່ຽວປະຕິບັດວິໃນຕໍ່ຜູ້ກະທໍາຜິດ ແລະ ເພີີ່ມທະວີຢ່າງຈິງຈັງຕໍ່ວຽກງານວິສະເພາະເຊັ່ນ: ສືບຕໍ່ການບໍາລຸງຮັກສາສ້ອມແປງລະບົບຕາຂ່າຍ 22 kv ຊຶ່ງປັດຈຸບັນ ຟຟລ ສາຂາແຂວງອັດຕະປື ມີລະບົບຕາຂ່າຍໄຟຟ້າຄື: ມີສະຖານີໄຟຟ້າ 115/22 kv ຈໍານວນ 1 ແຫ່ງ, ມີໝໍ້ແປງ 40 MVA ຈໍານວນ 2 ໜ່ວຍ, ລະບົບຕາຂ່າຍ 22 ກວ ລວມມີ 7 Feeder, ມີລວງຍາວຕາຂ່າຍແຮງກາງ 22 ກວ ແມ່ນ 1.076 km/ວົງຈອນ, ປ້ອມໝໍ້ແປງ 22/0,4 kv ມີ 579 ໜ່ວຍ, ໝໍ້ນັບໄຟທັງໝົດມີ 34.005 ໜ່ວຍ, ເອົາໃຈໃສ່ກວດກາ, ສ້ອມແປງໄຟຕົກ-ໄຟມອດ, ການຈົດໄຟ-ເກັບເງິນທວງໜີ້ສິນໃຫ້ໄດ້ດີ, ການຈົດເລກໝໍ້ນັບໄຟຖືກຕ້ອງຊັດເຈນຕາມຮອບວຽນ ຫຼີກລ່ຽງການຈົດເລກຜິດພາດ ແລະ ຄາດເດົາ. ພ້ອມດຽວກັນ ຍັງໃຫ້ສືບຕໍ່ເອົາໃຈໃສ່ວຽກງານວາງແຜນລະບົບ ແລະ ວຽກງານຄຸ້ມຄອງລະບົບ-ບໍລິການແມ່ນໃຫ້ດີທີ່ສຸດໂດຍສະເພາະແມ່ນການຄຸ້ມຄອງພະລັງງານຕົກເຮ່ຍໃຫ້ຢູ່ໃນເກນປົກກະຕິ.

ຂ່າວ-ພາບ: ເກດສະໜາ ແກ້ວສຸວັນນະແສງ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ລົງຢ້ຽມຢາມຊຸກຍູ້ການພັດທະນາ ແລະ ການຜະລິດ ຢູ່ 5 ຈຸດໃນ 2 ເມືອງ ຂອງນະຄອນຫຼວງວຽງຈັນ (ນວ) ຄື: ເມືອງຫາດຊາຍຟອງ ແລະ ເມືອງໄຊທານີ, ໃນວັນທີ 29 ມິຖຸນານີ້ ຊຶ່ງມີທ່ານ ອານຸພາບ ຕຸລາລົມ ເລຂາຄະນະພັກ ນວ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງານເງິນ, ທ່ານ ອາດສະພັງທອງ ສີພັນດອນ ເຈົ້າຄອງ ນວ ແລະ ບັນດາທ່ານ ຮອງລັດຖະມົນຕີກະຊວງກ່ຽວຂ້ອງ ເຂົ້າຮ່ວມຄະນະ.

ທ່ານ ທອງລຸນ ສີສຸລິດ ໄດ້ເດີນທາງໄປຢ້ຽມຢາມ ແລະ ຊຸກຍູ້ການຜະລິດ ທີ່ສວນໝາກພ້າວນໍ້າຫອມ ຂອງທ່ານ ສົມພອນ ຂຸນນະເສນ ປະທານກຸ່ມການຜະລິດກະສິກຳເປັນສິນຄ້າ ກຸ່ມ 6 ທ່າພະ ເມືອງຫາດຊາຍຟອງ.

ໃນໂອກາດນີ້, ທ່ານ ບຸນລອດ ຄຳດີ ຮອງປະທານກຸ່ມການຜະລິດກະສິກໍາເປັນສິນຄ້າ ກຸ່ມ 6 ທ່າພະ ກໍໄດ້ລາຍງານວ່າ: ປັດຈຸບັນ, ກຸ່ມການຜະລິດ ມີສະມາຊິກ 142 ຄອບຄົວ ຊຶ່ງກິດຈະກຳສະເພາະ ແມ່ນໄດ້ລ້ຽງງົວລາດພື້ນບ້ານ 50 ໂຕ, ປຸກໝາກພ້າວນໍ້າຫອມ ໃນດິນ 2 ຕອນ, ມີເນື້ອທີ່ 4,5 ເຮັກຕ້າ, ປູກແລ້ວ ມີຈໍານວນ 1.200 ຕົ້ນ, ປູກເຂົ້ານາປີ ເປັນພັນເຂົ້າໜຽວທ່າດອກຄໍາ 8 ສໍາເລັດແລ້ວ ຈຳນວນ 180 ໄລ່ ແລະ ຍັງຈະໄດ້ປູກຕື່ມອີກໃນເນື້ອທີ 30 ໄລ່.

ນອກນີ້, ທ່ານ ຍັງໄດ້ລາຍງານເຖິງຂໍ້ສະດວກ ແລະ ຂໍ້ຫຍຸ້ງຍາກ ພ້ອມທັງມີຂໍ້ສະເໜີໃຫ້ທາງຂັ້ນເທິງພິຈາລະນາຊ່ວຍເຫຼືອ ເປັນຕົ້ນ ແມ່ນແຫຼ່ງທຶນກູ້ຢືມດອກເບ້ຍຕໍ່າ ເພື່ອເປັນທຶນໃນການດໍາເນີນງານຂອງສະຫະກອນ ເພື່ອພັດທະນາສະຫະກອນໃຫ້ຂະຫຍາຍຕົວຂຶ້ນເລື້ອຍໆ ແລະ ອື່ນໆ.

ໂອກາດດຽວກັນ, ທ່ານ ປະທານປະເທດ ກໍໄດ້ກ່າວຊົມເຊີຍ ແລະ ໃຫ້ກຳລັງໃຈ ສະມາຊິກກຸ່ມ 6 ທ່າພະ, ພ້ອມທັງຊີ້ນໍາໃຫ້ພາກລັດ ກໍຄືພາກສ່ວນກ່ຽວຂ້ອງ ເອົາໃຈໃສ່ຊຸກຍູ້ໃຫ້ການຊ່ວຍເຫຼືອໃນດ້ານຕ່າງໆ ເປັນຕົ້ນ ວິຊາການ ແລະ ອື່ນໆ. ພ້ອມນີ້, ທ່ານ ປະທານປະເທດ ກໍໄດ້ກ່າວຈະມອບຂອງຂວັນ ເປັນຄອມພິມເຕີ ຈຳນວນ 3 ຊຸດ ໃຫ້ແກ່ສະຫະກອນກຸ່ມການຜະລິດກະສິກຳເປັນສິນຄ້າ ອີກດ້ວຍ.

ຈາກນັ້ນ, ທ່ານ ປະທານປະເທດ ກໍໄດ້ໄປຢ້ຽມຢຍາມ ແລະ ຊຸກຍູ້ການຜະລິດ ທີ່ໂຮງງານຜະລິດໝາກຖົ່ວດາວອິນຄາ ຂອງບໍລິສັດ ໄໝສະຫວັນ ທີ່ບ້ານສາລາຄຳ ເມືອງຫາດຊາຍຟອງ. ທ່ານ ນາງ ວິລະວົງ ອິນທິສານ ຕາງໜ້າບໍລິສັດ ລາຍງານວ່າ: ຜົນງານການປະຕິບັດໃນປີຜ່ານມາ ໄດ້ຜະລິດຖົ່ວດາວອິນຄາ ຈຳນວນ 128 ໂຕນ ແລະ ສົ້ມພໍດີ 20,5 ໂຕນ, ເກັບຊື້ຈາກປະຊາຊົນ 105 ໂຕນ, ໄດ້ສົ່ງອອກຜະລິດຕະພັນ 17 ຄັ້ງ ລວມ 91,14 ໂຕນ ແລະ ຍັງສົ່ງອອກນໍ້າມັນຖົ່ວດາວ ອິນຄາ 10.000 ລິດ, ລວມມູນຄ່າ 539.282 ໂດລາ ແລະ ຂາຍພາຍໃນ 715.100.000 ກີບ.

ນອກນີ້, ກໍໄດ້ລາຍງານໃຫ້ຮູ້ເຖິງຂໍ້ສະດວກ ແລະ ຂໍ້ຫຍຸ້ງຍາກ ທັງໄດ້ມີຂໍ້ສະເໜີ ເປັນຕົ້ນ ແມ່ນໃຫ້ຂັ້ນເທິງພິຈາລະນາຊ່ວຍເຫຼືອໃຫ້ບໍລິສັດ ໄດ້ເຂົ້າຮ່ວມໂຄງການສົ່ງເສີມ ຫຼື ຮັບຊື້ຜົນຜະລິດກະສິກຳ ໃນໂຄງການການຄ້າເສລີລາວ-ຈີນ. ພ້ອມທັງສະເໜີໃຫ້ຂັ້ນເທິງຊ່ວຍແກ້ໄຂດ້ານບັນຫາການຂົນສົ່ງ ເພື່ອສົ່ງອອກສິນຄ້າສູ່ຕະຫຼາດສາກົນ.

ໄລຍະຜ່ານມາ, ບໍລິສັດ ໄດ້ສົ່ງຜະລິດຕະພັນສິນຄ້າ ເປັນຕົ້ນຜະລິດຕະພັນຈາກຖົ່ວດາວອິນຄາ, ພິກໄທ, ສົ້ມພໍດີ, ກ້ວຍຕາກ, ຊາໃບມອນ, ຊາຂຽວ, ຊາສິງໄຄ ແລະ ຊາສະໝຸນໄພອື່ນໆ ອອກໄປຫຼາຍປະເທດເຊັ່ນ: ຝຣັ່ງ, ອີຕາລີ, ອາເມຣິກາ, ໄຕ້ຫວັນ (ຈີນ), ມາເລເຊຍ, ໄທ …. ໂອກາດນີ້, ທ່ານ ປະທານປະເທດ ກໍໄດ້ກ່າວໃຫ້ກຳລັງໃຈ ແລະ ສະແດງຄວາມຊົມເຊີຍ ທີ່ບໍລິສັດ ໄດ້ນໍາຜົນຜະລິດກະສິກຳ ເຂົ້າມາຜະລິດເປັນສິນຄ້າທີ່ມີຄຸນນະພາບ ໄດ້ມາດຕະຖານ ແລະ ສາມາດສົ່ງອອກຂາຍຕ່າງປະເທດໄດ້. ພ້ອມນີ້, ທ່ານ ຍັງເນັ້ນໃຫ້ພາກລັດ ກໍຄືຂະແໜງກ່ຽວຂ້ອງພິຈາລະນາ ແກ້ໄຂອຳນວຍຄວາມສະດວກດ້ານຕ່າງໆ ຕາມຄວາມຖືກຕ້ອງ ເໝາະສົມ ເພື່ອເປັນການຊຸກຍູ້ການຜະລິດ ແລະ ສົ່ງເສີມການສົ່ງອອກສິນຄ້າທີ່ເປັນຜະລິດຕະພັນຂອງລາວເຮົາ.

ໃນການຢ້ຽມຢາມ ຊຸກຍູ້ການພັດທະນາ ແລະ ການຜະລິດໃນ, ທ່ານ ທອງລຸນ ສີສຸລິດ ຍັງໄດ້ຢ້ຽມຢາມ ດ່ານສາກົນ ທ່າບົກ-ທ່ານາແລ້ງ ແລະ ເຂດໂລຈິສຕິກ, ທ່ານ ຈັນທອນ ສິດທິໄຊ ປະທານ ບໍລິສັດ ວຽງຈັນໂລຈິສຕິກພາດ ຈຳກັດ ແລະ ຄະນະຕ້ອນຮັບຢູ່ທີ່ນີ້ ກໍໄດ້ພ້ອມກັນລາຍງານເຖິງຄວາມເປັນມາ ແລະ ການຈັດຕັ້ງປະຕິບັດວຽກງານ ລວມທັງຂໍ້ສະດວກ, ຂໍ້ຫຍຸ້ງຍາກ ແລະ ຜົນປະໂຫຍດທາງກົງ ແລະ ທາງອ້ອມ ທີ່ປະເທດຊາດຈະໄດ້ຮັບ ເປັນຕົ້ນ ສະຖິຕິ 5 ເດືອນຕົ້ນປີ 2022 ໃນການບໍລິການ ຜ່ານແດນທາງລົດໄຟ ຊຶ່ງໄດ້ບໍລິການໃຫ້ແກ່ລົດຂົນສົ່ງ 50.857 ຖ້ຽວຄັນ, ບໍລິການຕູ້ສິນຄ້າລົດໄຟ 13.987 ຕູ້, ບໍລິມາດຕູ້ສິນຄ້າທັງໝົດຄິດເປັນຫົວໜ່ວຍ 20 ຟຸດ ແມ່ນ 42.591 TEU (Twenty foot Equivalent Unit), ເກັບພັນທະຕູ້ສິນຄ້າຜ່ານແດນເຂົ້າງົບປະມານໄດ້ 8.076.700.000 ກີບ ແລະ ຜົນການຈັດເກັບລາຍຮັບເຂົ້າງົບປະມານ (ພາສີອາກອນ ແລະ ຕາມລັດຖະບັນຍັດ 002/ປທ ນັບແຕ່ຕົ້ນປີຮອດວັນທີ 19/6/2022 ປະຕິບັດໄດ້ 1.010.209.396.598 ກີບ ເທົ່າກັບ 38,08% ຂອງແຜນການປີ.

ໂອກາດນີ້, ທ່ານ ທອງລຸນ ສີສຸລິດ ກໍໄດ້ເນັ້ນວ່າ: ໃຫ້ພາກລັດຖະບານ ກໍຄືຂະແໜງກ່ຽວຂ້ອງ ສົມທົບກັບບໍລິສັດ ຄົ້ນຄວ້າ, ວິໄຈ ເພື່ອສ້າງນິຕິກໍາກ່ຽວກັບໂລຈິສຕິກ ແນໃສ່ເຮັດໃຫ້ການຄຸ້ມຄອງເຂດໂລຈິສຕິກ ມີປະສິດທິພາບ ແລະ ປະສິດຕິຜົນ; ໃຫ້ສົມທົບກັນຄົ້ນຄວ້າ ສ້າງກົນໄກການຄຸ້ມຄອງ ແລະ ຈັດເກັບງົບປະມານ ທີ່ກ່ຽວຂ້ອງກັບກິດຈະກໍາຕ່າງໆ ດ່ານສາກົນແຫ່ງນີ້ ໃຫ້ເປັນກົນໄກທີ່ລວມສູນ; ໃຫ້ພາກສ່ວນກ່ຽວຂ້ອງຄົ້ນຄວ້າກ່ຽວກັບຫຼັດການ, ວິທີການຄຸ້ມຄອງ, ຂໍ້ສະດວກ ແລະ ຂໍ້ຫຍຸ້ງຍາກ, ສິ່ງທີ່ຄວນເຮັດ ເພື່ອສ້າງນິຕິກໍາຄຸ້ມຄອງກ່ຽວກັບການຄ້າຊາຍແດນ. ນອກນີ້, ຍັງໃຫ້ພ້ອມກັນຄົ້ນຄວ້າ, ປະສານງານ ໃນການຫາລືກ່ຽວກັບການເຊື່ອມຈອດທາງລົດໄຟ ເພື່ອແກ້ໄຂບັນຫາການຂົນສົ່ງສິນຄ້າໃຫ້ໄດ້ດີກວ່າເກົ່າ ເພື່ອຮອງຮັບກັບການເກັບສິນຄ້າ, ຂົນສົ່ງສິນຄ້າ ໃນຕໍ່ໜ້າທີ່ຈະມີການພົວພັນກັບຫຼາຍປະເທດໃຫ້ໄດ້ດີ, ມີຄຸນນະພາບ, ໄດ້ປະສິດທິພາບ ແລະ ປະສິດທິຜົນ, ສ້າງປະໂຫຍດອັນໃຫຍ່ຫຼວງມາສູ່ປະເທດຊາດ.

ໃນຕອນບ່າຍຂອງວັນດຽວກັນ, ທ່ານ ປະທານປະເທດ ກໍໄດ້ເດີນທາງໄປຢ້ຽມຊົມ ໂຄງການກໍ່ສ້າງ ພິພິທະພັນ ສິລະປະລາວສະໄໝໃໝ່ ຂອງທ່ານ ພິສິດ ໄຊຍະທິດ ທີ່ເມືອງໄຊທານີ ແລະ ຍັງໄປຢ້ຽມຢາມຊຸກຍູ້ການຜະລິດ ທີ່ສວນໝາກໄມ້ຂອງ ທ່ານ ມາມົ້ວ ຢູ່ບ້ານດວງບຸດດີ ເມືອງໄຊນານີ ນວ.

ຂ່າວ-ພາບ: ສຸກສະຫວັນ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)