ທ່ານ ສົມສັກ ແສງສັກດາ ສະມາຊິກສະພາແຫ່ງຊາດ ເຂດເລືອກຕັ້ງ 15 ແຂວງ ຈໍາປາສັກ ແລະ ບັນດາສະມາຊິກສະພາແຫ່ງຊາດ (ສສຊ) ຈາກເຂດເລື່ອກຕັ້ງຕ່າງໆໄດ້ ພ້ອມກັນປະກອບຄໍາເຫັນໃສ່ຮ່າງກົດໝາຍ ວ່າດ້ວຍ ຊັບສິນຂອງລັດ (ສະບັບປັບປຸງ). ຮ່າງກົດໝາຍສະບັບນີ້ ໄດ້ມີການປັບປຸງເນື້ອໃນທັງໝົດ 41 ມາດຕາ, ເພີ່ມເຂົ້າໃໝ່ 3 ມາດຕາ, ຕັດອອກ 12 ມາດຕາ, ສະນັ້ນ ຈຶ່ງເຮັດໃຫ້ໂຄງຮ່າງສະບັບປັບປຸງ ປະກອບດ້ວຍ 9 ພາກ, 7 ໝວດ ແລະ 65 ມາດຕາ ເພື່ອໃຫ້ມີເນື້ອໃນຄົບຖ້ວນ, ຮັດກຸມ ແນໃສ່ເຮັດໃຫ້ສອດຄ່ອງກັບການຈັດຕັ້ງປະຕິບັດຕົວຈິງ ຕໍ່ກອງຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 1 ກໍລະກົດ 2022. ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໂດຍມີບັນດາທ່ານ ສສຊ ເຂົ້າຮ່ວມຢ່າງພ້ອມພຽງ.

ພາຍຫຼັງກົດໝາຍວ່າດ້ວຍຊັບສິນຂອງລັດສະບັບນີ້ ຖືກຮັບຮອງ ແລະ ປະກາດໃຊ້ແລ້ວ ຈະມີຜົນໄດ້ຮັບດັ່ງນີ້: 1. ເປັນບ່ອນອີງທາງດ້ານນິຕິກໍາ ທີ່ໜັກແໜ້ນໃນການເຄື່ອນ ໄຫວຂອງອົງການລັດຂັ້ນສູນກາງ, ຂັ້ນທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ໃນການເຄື່ອນໄຫວວຽກງານຄຸ້ມຄອງຊັບສິນຂອງລັດ; 2. ສ້າງຄວາມເຊື່ອໝັ້ນໃຫ້ແກ່ສັງຄົມ, ນິຕິບຸກຄົນ ແລະ ສາກົົນ ກ່ຽວກັບວຽກງານຄຸ້ມຄອງຊັບສິນຂອງລັດ; 3. ຮັບປະກັນການຄຸ້ມຄອງຊັບສິນຂອງລັດ ໃຫ້ມີຄວາມຖືກຕ້ອງ, ໂປ່ງໃສ, ລວມສູນ ແລະ ເປັນເອກະພາບ ລວມທັງການຈັດຕັ້ງປະຕິບັດກົດໝາຍໃຫ້ມີຄວາມເປັນເອກະພາບ, ສອດຄ່ອງກັບພາລະບົດບາດ, ສິດ ແລະ ໜ້າທີ່ ຂອງຂະແໜງການທີ່ກ່ຽວຂ້ອງ; 4. ຮັບປະກັນການຄຸ້ມຄອງແຫຼ່ງລາຍຮັບຈາກຊັບສິນຂອງລັດ ຢ່າງຖືກຕ້ອງ ແລະ ລວມສູນ ເພື່ອຮັບປະກັນການປະຕິບັດການຄຸ້ມຄອງລາຍຮັບສອດຄ່ອງກັບກົດໝາຍ, ຈໍາກັດການຮົ່ວໄຫຼງົບປະມານແຫ່ງລັດ; 5. ເພີ່ມທະວີບົດບາດ, ສິດ, ໜ້າທີ່ ແລະ ຄວາມຮັບຜິດຊອບວຽກງານຄຸ້ມຄອງຊັບສິນຂອງລັດຂອງບັນດາຂະແໜງການໃຫ້ສູງຂຶ້ນ ແລະ ສອດຄ່ອງກັບຄວາມເປັນຈິງ; 6. ພະນັກງານ-ລັດຖະກອນ ແລະ ພາກສ່ວນກ່ຽວຂ້ອງມີຄວາມເຂົ້າໃຈ ແລະ ເປັນເອກະພາບໃນການຈັດຕັ້ງປະຕິບັດກົດໝາຍສະບັບນີ້ ສູງຂຶ້ນ; 7. ວຽກງານຄຸ້ມຄອງຊັບສິນຂອງລັດ ມີຄວາມຈະແຈ້ງກວ່າເກົ່າ ເຮັດໃຫ້ການປະຕິບັດວຽກງານມີຄວາມເປັນເອກະພາບໃນຂອບເຂດທົ່ວປະເທດ; ແລະ 8. ສາມາດຕິດຕາມ, ກວດກາ ການຈັດຕັ້ງປະຕິບັດວຽກງານຄຸ້ມຄອງຊັບສິນຂອງລັດ ຢ່າງມີປະສິດທິຜົນ, ໂປ່ງໃສ, ຍຸຕິທໍາ ແລະ ກວດສອບໄດ້.

ຂ່າວ: ຍຸພິນທອງ

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 30 ມິຖຸນາ ຜ່ານມາ, ຢູ່ສໍານັກງານສູນກາງພັກ ກອມມູນິດ ຫວຽດນາມ, ກົມການເມືອງ, ຄະນະເລຂາ ໄດ້ຈັດກອງປະຊຸມທົ່ວປະເທດສະຫຼຸບ 10 ປີ ແຫ່ງການປະຕິບັດວຽກງານປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້ ໄລຍະ 2012 – 2022 ພາຍໃຕ້ການເປັນປະທານຂອງທ່ານ ຫງວຽນຝູຈ້ອງ ເລຂາທິການໃຫຍ່, ຫົວໜ້າຄະນະຊີ້ນຳສູນກາງພັກ ກ່ຽວກັບການປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້. ເຂົ້າຮ່ວມກອງປະຊຸມ ມີທ່ານ ຫງວຽນຊວັນຟຸກ ປະທານປະເທດ ຫວຽດນາມ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ. ກອງປະຊຸມດັ່ງກ່າວໄດ້ເຊື່ອມຕໍ່ກັບສະຖານີຫຼາຍກວ່າ 4.100 ແຫ່ງ ທີ່ຖ່າຍທອດສົດໃນທົ່ວປະເທດ ດ້ວຍການເຂົ້າຮ່ວມຂອງຜູ້ແທນຫຼາຍກວ່າ 81.000 ຄົນ.

ຂ່າວລະບຸວ່າ: ກ່າວຄຳເຫັນຊີ້ນຳກອງປະຊຸມ, ທ່ານ ຫງວຽນຝູຈ້ອງ ຢັ້ງຢືນວ່າ: ວຽກງານພົບເຫັນ ແລະ ແກ້ໄຂການສໍ້ລາດບັງຫຼວງໃນໄລຍະຜ່ານມາໄດ້ຮັບການຊີ້ນຳ ແລະ ປະຕິບັດຢ່າງເປັນລະບົບ, ຄົບຊຸດ, ຂ້ຽວຂາດ ແລະ ມີປະສິດທິຜົນ. ຈາກສະພາບການຕົວຈິງຂອງວຽກງານນີ້, ທ່ານ ຫງວຽນຝູຈ້ອງ ໄດ້ຍົກໃຫ້ເຫັນ 6 ບົດຮຽນໃຫຍ່ ມີຄຸນຄ່າທັງດ້ານທິດສະດີ ແລະ ພຶດຕິກຳຕົວຈິງ. ຕ້ອງມີທ່າທີຂ້ຽວຂາດແທ້, ບໍ່ຜ່ອນຜັນ, ຕ້ອງມີການກະທຳທີ່ຂ້ຽວຂາດ, ລະອຽດ ແລະ ມີປະສິດທິຜົນທີ່ສຸດ. ຫົວໜ້າຕ້ອງຮັບ ຜິດຊອບກ່ຽວກັບຈຸດອ່ອນ, ຂໍ້ຜິດພາດກ່ຽວກັບການສໍ້ລາດບັງຫຼວງທີ່ເກີດຂຶ້ນຢູ່ອົງການ, ສຳນັກງານ, ຫົວໜ່ວຍ, ທ້ອງຖິ່ນຂອງຕົນ. ຜູ້ທີ່ມີໜ້າທີ່ຕຳແໜ່ງ, ສິດອຳນາດຕ້ອງຝຶກຝົນຫຼໍ່ຫຼອມຢ່າງບໍ່ຢຸດຢັ້ງ; ພ້ອມທັງເພີ່ມທະວີການຕິດຕາມກວດກາ, ຄວບຄຸມການປະຕິບັດສິດອຳນາດຂອງຜູ້ມີໜ້າທີ່ຕຳແໜ່ງ, ສິດອຳນາດ ຢ່າງມີປະສິດທິຜົນ. ທຸກສິດອຳນາດຕ້ອງໄດ້ຮັບການຄວບຄຸມຢ່າງເຄັ່ງຄັດດ້ວຍກົນໄກ; ສິດອຳນາດຕ້ອງຜູກມັດດ້ວຍຄວາມຮັບຜິດຊອບ; ສິດອຳນາດຮອດໃສຄວາມຮັບຜິດຊອບຮອດຫັ້ນ, ສິດອຳນາດຍິ່ງສູງ ຄວາມຮັບຜິດຊອບຍິ່ງຫຼາຍ.

ຂ່າວຕ່າງປະເທດລາຍງານ ເມື່ອວັນທີ 30 ມິຖຸນາທີ່ຜ່ານມານີ້, ທ່ານ ດຣ ເທຣໂດສ ອາດຮານອມ ເກເບຣເຢຊຸສ ຜູ້ອຳນວຍການອົງການອະນາໄມໂລກ (WHO) ໄດ້ອອກຖະແຫຼງການກ່ຽວກັບສະຖານະການການແຜ່ລະບາດຂອງພະຍາດໝາກສຸກລິງລະບຸວ່າ ການພົບຜູ້ປ່ວຍເພີ່ມຂຶ້ນຢ່າງຕໍ່ເນື່ອງນັບຕັ້ງແຕ່ຕົ້ນເດືອນພຶດສະພາທີ່ຜ່ານມາເປັນສັນຍານວ່າ ການແຜ່ລະບາດຂອງພະຍາດຍັງຄົງຕົວ ແລະ ການກໍ່ຕົວລັກສະນະນີ້ມີທ່າອ່ຽງເພີ່ມຄວາມສ່ຽງສູງໃຫ້ແກ່ກຸ່ມປະເທດທີ່ອ່ອນແອ ລວມເຖິງເດັກນ້ອຍ ຊຶ່ງມີບັນຫາເລື່ອງລະບົບພູມຄຸ້ມກັນ ແລະ ແມ່ຍິງຖືພາ.

ທັງນີ້, WHO ກໍາລັງຮວບຮວມຂໍ້ມູນເພີ່ມເຕີມກ່ຽວກັບບົດລາຍງານການພົບເດັກນ້ອຍທີ່ປ່ວຍເປັນພະຍາດໝາກສຸກລິງໃນແອັສປາຍ, ຝຣັ່ງ ແລະ ອັງກິດ ເຖິງຢ່າງໃດກໍຕາມ, ອາການຂອງຜູ້ປ່ວຍເດັກ ນ້ອຍບໍ່ຮຸນແຮງປານໃດ. ຂະນະດຽວກັນ, WHO ກໍາລັງຈັດເຮັດກົນໄກການບໍລິຫານຈັດການວັກຊິນປ້ອງກັນພະຍາດໝາກສຸກລິງ ເພື່ອໃຫ້ມີການແຈກຈ່າຍຢ່າງທົ່ວເຖິງສຳລັບກຸ່ມທີ່ສ່ຽງຕໍ່ພະຍາດໝາກສຸກລິງ ຫຼັງຈາກຫຼາຍປະເທດລວມເຖິງອາເມຣິກາ ແລະ ອັງກິດສະແດງຄວາມພ້ອມແບ່ງປັນວັກຊິນດັ່ງກ່າວ ຊຶ່ງມີປະສິດທິພາບຕໍ່ພະຍາດໝາກສຸກລິງໃນລະດັບປະມານ 85%.

ງານຕະຫຼາດນັດແຮງງານ ແລະ ງານວາງສະແດງສິນຄ້າປະຈຳປີ 2022 ໄດ້ຈັດຂຶ້ນໃນວັນທີ 1 ກໍລະກົດ ນີ້ ທີ່ສະຖາບັນຂົງຈື ມະຫາວິທະຍາໄລແຫ່ງຊາດ (ມຊ), ໂດຍເປັນກຽດເຂົ້າຮ່ວມຂອງ ທ່ານ ຮຸ່ງເພັດ ຈັນທະວົງ ຮອງອະທິການບໍດີ ມຊ, ທ່ານ ເສີນຊິນຫຼູ ປະທານສະພາການຄ້າກວາງຊີ ປະຈໍາລາວ, ຫົວໜ້າຫ້ອງການ, ຜູ້ອຳນວຍການສະຖາບັນ, ຫົວໜ້າບໍລິສັດ-ລັດວິສາຫະກິດລາວ-ຈີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຮຸ່ງເພັດ ຈັນທະວົງ ກ່າວວ່າ: ງານຕະຫຼາດນັດແຮງງານຂອງສະພາການຄ້າກວາງຊີໄດ້ຈັດທຸກປີ ຊຶ່ງເລີ່ມຈັດຄັ້ງທໍາອິດໃນປີ 2020, ມີນັກຮຽນນັກສຶກສາໄດ້ເຂົ້າເຮັດວຽກນໍາບັນດາບໍລິສັດ ເຖິງຈໍານວນ 400 ກວ່າຕໍາແໜ່ງ ຫຼາຍກວ່າ 24 ບໍລິສັດເຂົ້າຮ່ວມ, ປີ 2021 ຜ່ານມາເນື່ອງຈາກສະພາບການແຜ່ລະບາດຂອງເຊື້ອພະຍາດໂຄວິດ-19 ຈຶ່ງເຮັດໃຫ້ງານໄດ້ຖືກເລື່ອນມາຈັດໃນຄັ້ງນີ້ ຊຶ່ງເປັນຄັ້ງທີ 2 ມີບໍລິສັດເຂົ້າຮ່ວມຈໍານວນ 29 ບໍລິສັດ, ມີຄວາມຕ້ອງການພະນັກງານຈໍານວນບໍ່ຫຼຸດ 1.000 ຕໍາແໜ່ງງານ ໃນທຸກສາຂາວິຊາຊີບ ຖືເປັນໂອກາດອັນດີທີ່ສຸດໃຫ້ແກ່ນັກສຶກສາທີ່ກໍາລັງຈະຈົບການສຶກສາ ແລະ ຜູ້ທີ່ຊອກວຽກເຮັດງານທໍາໄດ້ມີໂອກາດມາບ່ອນດຽວ ເພື່ອມາຊອກວຽກທີ່ຖືກຕ້ອງກັບຄວາມມຸ່ງຫວັງຂອງຕົນເອງ ແລະ ກໍເປັນການເປີດໂອກາດໃຫ້ແກ່ນັກສຶກສາ ມຊ ທົ່ວໄປໄດ້ເປີດໂລກະທັດ ແລະ ຮູ້ຈັກບັນດາບໍລິສັດຕ່າງໆ ເພື່ອເປັນເປົ້າໝາຍໃຫ້ຕົນເອງໃນອະນາຄົດ. ການຈັດງານຕະຫຼາດນັດແຮງງານໃນຮູບແບບນີ້ຫວັງໃຫ້ມີການຈັດເປັນປະຈໍາໃນແຕ່ລະປີຢູ່ຕາມແຕ່ລະຄະນະວິຊາເພື່ອຍາດແຍ່ງການຊ່ວຍເຫຼືອຕ່າງໆມາໃຫ້ແກ່ນັກຮຽນນັກສຶກສາ ມຊ.

ທ່ານ ເສີນຊິນຫຼູ ກ່າວວ່າ: ປັດຈຸບັນສະພາການຄ້າກວາງຊີໄດ້ມີຄວາມພະຍາຍາມສ້າງສາພັດທະນາເສດຖະກິດລາວໃຫ້ມີຄວາມຈະເລີນກ້າວໜ້າຂຶ້ນເລື້ອຍໆ. ການຈັດງານຕະຫຼາດນັດແຮງງານຮ່ວມມືກັບສະຖາບັນຂົງຈື ມຊ ເປັນງານໜຶ່ງທີ່ມີຄວາມໝາຍຄວາມສໍາຄັນຫຼາຍ, ການເປີດຕະຫຼາດນັດແຮງງານເປັນການສ້າງໂອກາດໃຫ້ນັກສຶກສາມີວຽກເຮັດງານທໍາ, ເປັນເວທີໃຫ້ບໍລິສັດເຄືອຂ່າຍຕ່າງໆ ແລະ ນັກສຶກສາໄດ້ມີໂອກາດສ້າງສັນແນວຄິດປະດິດສ້າງຂອງຕົນເອງໃຫ້ກ້າວສູ່ຄວາມຝັນ, ເປັນຂົວຕໍ່ເສດຖະກິດ ແລະ ຮັບໃຊ້ຊາດລາວ. ເພາະການສຶກສາແມ່ນການພັດທະນາຊັບພະຍາກອນໜຶ່ງທີ່ສໍາຄັນທີ່ສຸດ ຊຶ່ງຜູ້ຄົນທີ່ມີຄວາມຮູ້-ຄວາມສາມາດແມ່ນຊັບພະຍາກອນທີ່ສຳຄັນຕໍ່ປະເທດຊາດ ແລະ ປັດຈຸບັນນີ້, ມີນັກສຶກສາຈໍານວນຫຼວງຫຼາຍຕັ້ງໃຈຮໍ່າຮຽນ, ຕັ້ງໃຈພັດທະນາຕົນເອງ, ການຮຽນຂອງເຂົາເຈົ້າແມ່ນຢູ່ໃນລະດັບດີສົມຄວນ, ຮຽນດີ, ຮຽນເກັ່ງ, ແຕ່ເນື່ອງຈາກວ່າຄອບຄົວທຸກຍາກ ຈຶ່ງເຮັດໃຫ້ການຮຽນ, ການດໍາລົງຊີວິດພົບຄວາມຫຍຸ້ງຍາກບໍ່ສາມາດຕອບສະໜອງເຂົ້າໃນການຮຽນ. ສະນັ້ນ, ສະພາການຄ້າກວາງຊີ ຈຶ່ງໄດ້ມອບທຶນໃຫ້ນັກສຶກສາທຸກຍາກທີ່ກໍາລັງຮຽນພາສາຈີນຢູ່ສະຖາບັນຂົງຈືຈໍານວນ 100 ທຶນ.

ຂ່າວ: ບຸນອູ້ມ, ພາບ: ບຸນຕອມ

ເພື່ອເຮັດໃຫ້ບັນດາຫົວໜ່ວຍທຸລະກິດທີ່ຫັນເຂົ້າສູ່ລະບົບອາກອນມູນຄ່າເພີ່ມໄດ້ຮັບຮູ້ເຂົ້າໃຈກ່ຽວກັບບັນດານິຕິກຳຕ່າງໆ ໃນວັນທີ 30 ມິຖຸນາ ຜ່ານມາ ທີ່ຫ້ອງປະຊຸມສ່ວຍສາອາກອນແຂວງບໍລິຄຳໄຊ ໄດ້ຈັດພິທີເຜີຍແຜ່ ສິດ ແລະ ໜ້າທີ່ຂອງຫົວໜ່ວຍວິສາຫະກິດທີ່ຫັນເຂົ້າສູ່ລະບົບອາກອນມູນຄ່າເພີ່ມ (ອມພ) ຊຶ່ງມີທ່ານ ແສງຈັນ ຄຳປະເສີດ ຫົວໜ້າສ່ວຍສາອາກອນແຂວງ, ທ່ານ ສຸລິຈັນ ທ່ຽງຈັນໄຊ ຫົວໜ້າຫ້ອງການ-ການເງິນເມືອງ, ມີບັນດາຫົວໜ່ວຍທຸລະກິດພາຍໃນເມືອງປາກຊັນ ແລະ ຂະແໜງການກ່ຽວຂ້ອງເຂົ້າຮ່ວມ.

ທ່ານ ສະເຫຼີມ ປັນຍານຸວົງ ຫົວໜ້າຂະແໜງຄຸ້ມຄອງລາຍຮັບໄດ້ຜ່ານສິດ ແລະ ໜ້າທີ່ຂອງຜູ້ທີ່ຈະຫັນເຂົ້າສູ່ລະບົບອາກອນມູນຄ່າເພີ່ມເພື່ອປະຕິບັດຕາມວາລະແຫ່ງຊາດ ໂດຍລົງເລິກ 2 ຂົງເຂດວຽກງານຄື: ບັນຫາຢາເສບຕິດ ແລະ ເສດຖະກິດ, ແຈ້ງການປ່ຽນແປງລະບົບການເສຍອາກອນ ຈາກການເສຍອາກອນແບບມອບ ເໝົາເຂົ້າໃນລະບົບອາກອນມູນຄ່າເພີ່ມ ຊຶ່ງເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມແມ່ນຈຸນລະວິສາຫະກິດທີ່ສ້າງຕັ້ງໃນປີ 2021 ຄືນຫຼັງ ແລະ ສ້າງຕັ້ງໃນປີ 2022 ທີ່ສະໝັກເຂົ້າໃນລະບົບ (ອມພ) ພາຍໃຕ້ເງື່ອນໄຂຂະແໜງການຜະລິດມູນຄ່າຊັບສິນ 100 ລ້ານກີບ, ຂະແໜງການຄ້າ 150 ລ້ານກີບ ແລະ ຂະແໜງການບໍລິ ການ 200 ລ້ານກີບ, ວິສາຫະກິດຂະໜາດນ້ອຍທີ່ສ້າງໃໝ່ປີ 2022 ຕ້ອງເຂົ້າໃນລະບົບ (ອມພ) ແບບອັດຕະ ໂນມັດ ໂດຍມີເງື່ອນໄຂຂະແໜງການຜະລິດ ແລະ ຂະແໜງການຄ້າມູນຄ່າຊັບສິນທັງໝົດ 1 ຕື້ກີບ, ຂະ ແໜງການບໍລິການມູນຄ່າຊັບສິນ 1,5 ຕື້ກີບ, ສະເລ່ຍແຮງງານໃນປີ 6-50 ຄົນຂອງແຕ່ລະຂະແໜງ. ວິສາຫະກິດຂະໜາດກາງໃນປີ 2022 ຕ້ອງເຂົ້າໃນລະບົບ (ອມພ) ແບບອັດຕະໂນມັດພາຍໃຕ້ເງື່ອນໄຂຄື: ຂະ ແໜງການຜະລິດ ແລະ ຂະແໜງການຄ້າມູນຄ່າຊັບສິນທັງໝົດ 4 ຕື້ກີບ, ຂະແໜງການບໍລິການມູນຄ່າຊັບສິນ 6 ຕື້ກີບ, ສະເລ່ຍແຮງງານໃນປີແມ່ນ 51-99 ຄົນຂອງແຕ່ລະຂະແໜງ, ອາກອນມູນຄ່າເພີ່ມແມ່ນອາກອນທາງອ້ອມທີ່ຄິດໄລ່, ເກັບຈາກມູນຄ່າສິນຄ້າການນຳເຂົ້າ, ການສະໜອງສິນຄ້າ-ການບໍລິການ ແລະ ການຊົມໃຊ້ສິນຄ້າ-ການບໍລິການ ຈາກຜູ້ບໍ່ມີພູມລຳເນົາ ທີ່ເຂົ້າມາສະໜອງສິນຄ້າ-ການບໍລິການຢູ່ ສປປ ລາວ ຊຶ່ງຜູ້ຊົມໃຊ້ສິນຄ້າ-ການບໍລິການສຸດທ້າຍເປັນຜູ້ເສຍ, ອາກອນປະເພດຕ່າງໆທີ່ຕ້ອງຈ່າຍປະກອບມີ: ຄິດໄລ່ເກັບ ອມພ ທຸກຄັ້ງທີ່ມີການສະໜອງສິນຄ້າ-ການບໍລິການ, ຄິດໄລ່ຫັກອາກອນລາຍໄດ້ຈາກເງິນເດືອນທຸກຄັ້ງ ທີ່ມີການເບີກຈ່າຍເງິນເດືອນ, ຄິດໄລ່ຫັກອາກອນລາຍໄດ້ຕ່າງໆ ແລະ ໄລ່ມອບອາກອນເງິນປັນຜົນກຳໄລທຸກຄັ້ງທີ່ມີການປັນຜົນ.

ຂ່າວ: ວຽງສະຫວັນ

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 30 ມິຖຸນາ ຜ່ານມາ, ທ່ານ ເຟີຣດິນານ ມາຣກອສ (Ferdinand Marcos Jr) ໄດ້ສາບານຕົນເຂົ້າຮັບຕຳແໜ່ງປະທານາທິບໍດີ ຟີລິບປິນ ຢ່າງເປັນທາງການ.

ຂ່າວລະບຸວ່າ: ໃນບົດກ່າວປາໄສເຂົ້າຮັບຕຳແໜ່ງ ທີ່ຫໍພິພິທະພັນແຫ່ງຊາດຢູ່ນະຄອນຫຼວງ ມານີລາ, ທ່ານປະທານາທິບໍດີ ຄົນໃໝ່ ໄດ້ໃຫ້ຄຳໝັ້ນສັນຍາຊຸກຍູ້ການປະຕິຮູບການສຶກສາ, ປັບປຸງຄວາມສາ ມາດ, ສະໜອງທັນຍາຫານ, ຍົກສູງ ແລະ ສ້າງລະບົບພື້ນຖານໂຄງລ່າງໃໝ່, ແກ້ໄຂສິ່ງເສດເຫຼືອ, ຮັບ ປະກັນການສະໜອງພະລັງງານ ແລະ ໜູນຊ່ວຍໃຫ້ແກ່ກຳມະກອນ ຟີລິປິນ ຢູ່ຕ່າງປະເທດນັບຫຼາຍລ້ານຄົນຢ່າງຄົບຖ້ວນ.

ວິທະຍຸກະຈາຍສຽງຫວຽດນາມລາຍງານວ່າ: ຫວ່າງບໍ່ດົນມານີ້, ທ່ານ ໂຈໄບເດັ່ນ ປະທານາທິບໍດີ ອາເມຣິກາ ພ້ອມດ້ວຍຄູ່ຕຳແໜ່ງ ທ່ານ ຢູນ ຊອກ-ຢອນ (Yoon Suk – yeol) ສ.ເກົາຫຼີ ແລະ ທ່ານ ກິຊິດະ ຟູມິໂອະ ນາຍົກລັດຖະມົນຕີ ຍີ່ປຸ່ນ ຈັດການພົບປະເຈລະຈາ 3 ຝ່າຍຢູ່ ເມືອງມາດຣິດ, ແອັດສະປາຍ ຢູ່ນອກກອງປະຊຸມສຸດຍອດ NATO.

ຂ່າວລະບຸວ່າ: ການນຳ 3 ທ່ານໄດ້ເຫັນດີຈັດຕັ້ງວາລະປຶກສາຫາລືຢ່າງແໜ້ນແຟ້ນ ແລະ ຍົກສູງລະດັບການຮ່ວມມືດ້ານຄວາມໝັ້ນຄົງລະຫວ່າງ 3 ປະເທດ. ບັນດາການນຳ ອາເມຣິກາ, ຍີ່ປຸ່ນ ແລະ ສ.ເກົາຫຼີ ໄດ້ເຫັນດີນຳກັນວ່າ: ການຮ່ວມມືຂອງ 3 ຝ່າຍ ສວມບົດບາດສຳຄັນຕໍ່ການຮັບມືກັບບັນຫາຂອງພາກພື້ນ ແລະ ທົ່ວໂລກໃນປັດຈຸບັນ.

ການຝຶກອົບຮົມແມ່ນຈັດຂຶ້ນທີ່ສະຖາບັນແມ່ນໍ້າຂອງ ຈັງຫວັດ ຂອນແກ່ນ ຣາຊະອານາຈັກໄທ, ມີ ທ່ານ ນາງ ມາເຣຍ ເທຣິຊາ ຜູ້ອໍານວຍການ ADC ແລະ ວິທະຍາກອນຈາກສະຖາບັນແມ່ນໍ້າຂອງ, ການຝຶກອົບຮົມການສື່ສານລະດັບພູມມິພາກທາງດ້ານການສື່ສານ ໂດຍມີຜູ້ເຂົ້າຮ່ວມ 23 ຄົນຈາກ 3 ປະເທດ CLV ຄື: ຣາຊະອານາຈັກກຳປູເຈຍ, ສປປລາວ ແລະ ສສ ຫວຽດນາມ ທີ່ເຮັດວຽກດ້ານການສື່ສານ, ວິຊາການໃນຂະແໜງການອຸດສະຫະກຳ ການທ່ອງທ່ຽວ, ກະສິກຳ ແລະ ອົງການຈັດຕັ້ງສາກົນທີ່ກ່ຽວຂ້ອງກັບຄວາມປອດໄພທາງດ້ານອາຫານ ພາຍໃຕ້ຫົວຂໍ້: ການສື່ສານຄວາມປອດໄພທາງດ້ານອາຫານ ສະໜັບສະໜູນໂດຍກະຊວງການຕ່າງປະເທດ ແລະ ການຄ້າປະເທດນີວຊີແລນ.

ການຝຶກອົບຮົມຄັ້ງນີ້ເພື່ອເພີ່ມຂີດຄວາມສາມາດທາງວິຊາການຂອງການສື່ສານໂດຍມີຜູ້ຊ່ຽວຊານດ້ານຄວາມປອດໄພຂອງອາຫານມາໃຫ້ຄວາມຮູ້ ແລກປ່ຽນ ປະສົບການ ແລະ ທັກສະ ໂດຍໄດ້ນຳເອົາຫຼັກສູດທີ່ອອກແບບມາເພື່ອ ໃຫ້ຄວາມຮູ້ດ້ານວິທະຍາສາດຄວາມປອດໄພຂອງອາຫານ ແລະ ຄວາມສຳຄັນຂອງການຈັດຫາຂໍ້ມູນທີ່ກ່ຽວຂ້ອງກັບຫົວຂໍ້ຕ່າງໆຕໍ່ສາທາລະນະ, ການພັດທະນາທັກສະນັກຂ່າວ ແລະ ຜູ້ຊ່ຽວຊານດ້ານການສື່ສານເພື່ອເປີດເຜີຍຂໍ້ມູນຄວາມປວດໄພຂອງອາຫານ ຜ່ານຫົວຂໍ້ເຊັ່ນ: ການສຶກສາ ແລະ ການພັດທະນາທາງວິທະຍາສາດໃຫ້ເປັນສື່ສິ່ງພິມທີ່ໜ້າເຊື່ອຖື ແລະ ການສ້າງເວທີແລກປ່ຽນຄວາມຮູ້ ແນະນຳ ແນວທາງໃນການປະຕິບັດທີ່ດີໃນການ ຄວບຄຸມ ການຂຽນ ແລະ ການນຳສະເໜີຫົວຂໍ້ຕ່າງໆທີ່ກ່ຽວຂ້ອງກັບຜູ້ເຂົ້າຮ່ວມໃນ CLV.

ນັກຝຶກອົບຮົມຈາກ 3 ປະເທດກໍໄດ້ພ້ອມກັນແລກປ່ຽນບົດຮຽນກັບວິທະຍາກອນຈາກສະຖາບັນແມ່ນໍ້າຂອງທີ່ມີປະສົບການຄວາມຊໍານານງານດ້ານຄວາມປອດໄພອາຫານເຮັດໃຫ້ນັກສໍາມະນາກອນໄດ້ມີຄວາມຮູ້ ເພື່ອນຳໄປຈັດຕັ້ງຜັນຂະຫຍາຍໃນຂົງເຂດວຽກງານທີ່ຕົນເອງຮັບຜິດຊອບໃຫ້ມີປະສິດທິຜົນສູງຂຶ້ນ.

ໃນເບື້ອງສະຖາບັນແມ່ນໍ້າຂອງມີຄວາມຄາດຫວັງຢາກໃຫ້ນັກຝຶກອົບຮົມນຳເອົາຄວາມຮູ້ທີ່ໄດ້ຮຽນມາ ບວກກັບປະສົບການຂອງແຕ່ລະພາກສ່ວນໄປຈັດຕັ້ງປະຕິບັດໂດຍສະເພາະແມ່ນວຽກງານ ການສື່ສານຄວາມປອດໄພທາງດ້ານອາຫານ,ໂຄສະນາເຜີຍແຜ່ໃຫ້ຄົນໃນສັງຄົມໄດ້ຮັບຮູ້ວ່າເຖິງຂະບວນການຜະລິດກະສິກຳສະອາດກວ່າຈະມາເປັນອາຫານທີ່ປອດໄພ ເຊິ່ງໄດ້ມີຄຳເວົ້່າທີ່ວ່າ: ຖ້າມັນບໍ່ປອດໄພມັນກໍ່ບໍ່ແມ່ນອາຫານ if it’s not safe it’s not food.

ການຝຶກອົບຮົມຈາກສະຖາບັນແມ່ນໍ້າຂອງແມ່ນເລີ່ມຈັດຕັ້ງມາແຕ່ປີ 2018-2022 ຊຸດນີ້ເປັນ ຊຸດທີ່28. ຜ່ານມາໄດ້ມີນັກຝຶກອົບຮົມ 4 ປະເທດCLMVມີ 700 ກວ່າຄົນ ຍິງ 368 ຄົນກວມ 50,3%, ພາກສ່ວນພະແນກການທີ່ກ່ຽວຂ້ອງຈາກລັດຖະບານ 280 ຄົນ ກວມ 38%, ພາກສ່ວນເອກະຊົນ 337ຄົນ ກວມ 40% ແລະ ຈາກສະຖາບັນຕ່າງໆ 114ຄົນ ກວມ 16% ໂດຍສະຖາບັນແມ່ຂອງໄດ້ປະກອບສ່ວນຊ່ວຍຍົກລະດັບຄວາມຮູ້ໃຫ້ກັບບຸກຄະລາກອນໃນປະເທດ CLMV, ການຝຶກອົບຮົມດັ່ງກ່າວຈັດຂຶ້ນໃນວັນທີ27ມິຖຸນາ-1ກໍລະກົດ2022.

ຂ່າວ: ຈັນສະໜອນ ວົງສົດ – ສຸພັກສອນ ສີລາເພັດ- ພັນງາ ສຸດທິພົງ

ພາບ: ສະຖາບັນແມ່ນໍ້າຂອງ MI ຣາຊອານາຈັກໄທ
#Medialaos MMD (ແຫຼ່ງຂໍ້ມູນຈາກ: ໂທລະພາບແຫ່ງຊາດລາວ)

ປົກກະຕິແລ້ວໂປຣແກຣມທີ່ໃຊ້ແປງໄຟຣ໌ PDF ເປັນ Word ທົ່ວໄປ ຫຼື ແປງໂດຍເວັບໄຊ ຈະເຮັດໃຫ້ໜັງສືຕົກ ຫຼື ຫາຍໄປ ມື້ນີ້ມີວິທີແນະນຳການແປງໄຟຣ໌ PDF ມາເປັນ Word ແບບສົມບູນ ໂຕໜັງສືບໍ່ຕົກ ແລະ ສາມາດແກ້ໄຂໄດ້ນຳອີກ.

ຂັ້ນຕອນການແປງໄຟຣ໌ PDF ເປັນ Word ແບບສົມບູນ 100% ມີດັ່ງລຸ່ມນີ້:

1. ເຂົ້າໄປເວັບໄຊ https://pdfcandy.com/th/pdf-to-jpg.html ເພື່ອເຮັດໃຫ້ PDF ເປັນຮູບພາບ
2. ຫຼັງຈາກທີ່ໄດ້ຮູບພາບຮຽບຮ້ອຍແລ້ວໃຫ້ອັບໂຫຼດໄປທີ່ Google Drive
3. ຄິກຂວາຮູບພາບທີ່ຕ້ອງການຈະແປງເປັນ PDF ເລືອກຄຳສັ່ງ ເປີດດ້ວຍ Google Doc
4. ແລ້ວຈະໄດ້ໄຟຣ໌ເອກະສານທີ່ສາມາດກ໊ອບປີ້ ໄປໃຊ້ໃນ Word ແບບສົມບູນ 100% ໂດຍໂຕໜັງສືບໍ່ຜິດ ແລະ ບໍ່ຫາຍ ແຖມຍັງສາມາດແປງໂຕໜັງສືໄດ້ນຳອີກ.

ກົມອຸຕຸນິຍົມ ແລະ ອຸທົກກະສາດ ໄດ້ລາຍງານສະພາບການເກີດ ແຜ່ນດິນໄຫວ ຈາກສູນຂ່າວສານແຜ່ນດິນໄຫວແຫ່ງຊາດ ຄັ້ງວັນທີ 30 ມິຖຸນາ 2022 ໃນເວລາ 00:37 ໂມງ ໄດ້ພົບສັນຍານການເກີດແຜ່ນດິນໄຫວ ພາຍໃນປະເທດລາວ ຈໍານວນ 01 ຄັ້ງ ໃນບໍລິເວນ ບ້ານນາກາງ ເມືອງວຽງທອງ ແຂວງບໍລິຄໍາໄຊ ຈຸດສູນກາງຢູ່ເສັ້ນຂະໜານທີ 18.403 ອົງສາເໜືອ ແລະ ເສັ້ນແວງທີ 104.450 ອົງສາຕາເວັນອອກ ດ້ວຍຄວາມແຮງສັ່ນສະເທືອນວັດແທກໄດ້ 3.8 ຣີກເຕີ ມີຄວາມເລິກຈາກ ເທິງໜ້າດິນປະມານ 10 ກິໂລແມັດ ເຊິ່ງຈຸດເກີດແຜ່ນດິນໄຫວແມ່ນຫ່າງ ຈາກເທສະບານເມືອງວຽງທອງ ປະມານ 10 ກິໂລແມັດ. ເຫດການແຜ່ນດິນໄຫວດັ່ງກ່າວ ເບື້ອງຕົ້ນຍັງບໍ່ມີລາຍງານຜົນເສຍຫາຍ.

ຂ່າວ-ພາບ: ກົມອຸຕຸນິຍົມ ແລະ ອຸທົກກະສາດ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ສຳນັກຂ່າວສານປະເທດລາວ)