ມີຜູ້ເສຍຊີວິດໃໝ່ 1 ຄົນ ທີ່ນະຄອນຫຼວງວຽງຈັນ

ຕອນແລງວັນທີ 1 ກໍລະກົດ 2022, ທີ່ໂຮງແຮມດອນຈັນພາເຣດ ນະຄອນຫລວງວຽງຈັນ ສະຖານທູດ ສປ ຈີນປະຈໍາ ສປປ ລາວໄດ້ຈັດກິດຈະກໍາສະເຫລີມສະຫລອງວັນສ້າງຕັ້ງພັກຄອມມຸນິດຈີນ ຄົບຮອບ 101 ປີ ໂດຍໄດ້ມອບລາງວັນການແຂ່ງຂັນວິດີໂອສັ້ນແກ່ຜູ້ຊະນະເລີດ ແລະວັນຕ່າງໆໃຫ້ແກ່ຜູ້ເຂົ້າແຂ່ງຂັນ.

ຕາງໜ້າຝ່າຍລາວໃຫ້ກຽດເຂົ້າຮ່ວມໂດຍທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີແຫ່ງ ສປປ ລາວ ແລະທ່ານ ຈ່ຽງຈ່າຍຕົ່ງ ເອອັກຄະລັດຖະທູດຈີນ ປະຈໍາລາວ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ. ການແຂ່ງຂັນວິດີໂອສັ້ນຄັ້ງນີ້ແມ່ນພາຍໃຕ້ຫົວຂໍ້ “ປະຊາຊົນຈີນບຸກບືນສູ້ຊົນເພື່ອຄວາມຝັນພາຍໃຕ້ການນໍາພາຂອງພັກກອມມູນິດຈີນ ເຊິ່ງສະຖານທູດ ສປ ຈີນປະຈໍາ ສປປ ລາວເປັນເຈົ້າພາບ ແລະຈັດໂດຍສູນວັດທະນະທໍາຈີນປະຈໍາລາວ ແລະສະໜັບສະໜູນໂດຍພາກວິຊາພາສາຈີນ ມະຫາວິທະຍາໄລແຫ່ງຊາດລາວ, ສະຖາບັນຂົງຈື ມະຫາວິທະຍາໄລແຫ່ງຊາດລາວ, ສະຖາບັນຂົງຈື ມະຫາວິທະຍາໄລສຸພານຸວົງ ແຂວງຫຼວງພະບາງ.

ທ່ານກິແກ້ວ ໄຂຄໍາພິທູນ ຮອງນາຍົກລັດຖະມົນຕີໄດ້ກ່າວສະແດງຄໍາເຫັນວ່າ: ການຈັດການແຂ່ງຂັນຖ່າຍວິດີໂອເລື່ອງສັ້ນໃນຄັ້ງນີ້ໄດ້ປະກອບສ່ວນສໍາຄັນຂອງຕົນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ ກໍຄື ການສ້າງຄູ່ຮ່ວມຊະຕາກໍາ ລາວ-ຈີນ ໃຫ້ນັບມື້ນັບແຕກດອກອອກຜົນ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ.

ພວກຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າ ຕະຫລອດໄລຍະ 101 ປີຜ່ານມາ ພັກຄອມມຸນິດຈີນໄດ້ຍົກສູງຄວາມຮັບຜິດຊອບການເມືອງຕໍ່ພາລະກໍາປະຫວັດສາດຂອງຕົນ, ຍຶດໝັ້ນໃນອຸດົມການສັງຄົມນິຍົມ ແລະຜົນປະໂຫຍດຂອງປະຊາຊົນຢ່າງເດັດດ່ຽວໜຽວແໜ້ນ, ນໍາພາປະຊາຊົນຈີນອ້າຍນ້ອງຜ່ານຜ່າການທົດສອບທີ່ດຸເດືອດຂ້ຽວຂາດໃນແປວໄຟປະຕິວັດ, ສ້າງວິລະກໍາອັນລໍ້າເລີດ ແລະຍາດໄດ້ໄຊຊະນະອັນໃຫ່ຍຫລວງ, ມີຄວາມໝາຍປະຫວັດສາດ, ເຮັດສໍາເລັດການປະຕິວັດປົດປ່ອຍຊາດ, ສະຖາປະນາສາທາລະນະລັດປະຊາຊົນຈີນຢ່າງສະຫງ່າຜ່າເຜີຍໃນວັນທີ 1 ຕຸລາ 1949 ອັນເປັນການເປີດສັງກາດໃໝ່ແຫ່ງການສ້າງສາພັດທະນາປະເທດຊາດຕາມເສັ້ນທາງສັງຄົມນິຍົມ. ເຊື່ອໝັ້ນວ່າພາຍໃຕ້ການນໍາພາອັນຖືກຕ້ອງ ເດັດດ່ຽວໜຽວແໜ້ນຂອງສູນກາງພັກຄອມມຸນິດຈີນ ທີ່ມີສະຫາຍເລຂາທິການໃຫ່ຍ ສີຈິ້ນຝິງ ເປັນແກນກາງ ປະຊາຊົນຈີນອ້າຍນ້ອງ ຈະສືບຕໍ່ຍາດໄດ້ຜົນສໍາເລັດໃໝ່ໃຫ່ຍຫລວງກວ່າເກົ່າ ໃນພາລະກິດແຫ່ງການພັດທະນາປະເທດຊາດ ຕາມເສັ້ນທາງສັງຄົມນິຍົມ ທີ່ທັນສະໄໝທີ່ມີສີສັນພິເສດຂອງຈີນ.

ໃນຕອນເຊົ້າວັນທີ 1 ກໍລະກົດ 2022 ທ່ານ ພັນຄຳ ວິພາວັນ ນາຍົກລັດຖະມົນຕີ ພ້ອມດ້ວຍຄະນະ ຈາກບັນດາກະຊວງ -ອົງການທີ່ກ່ຽວຂ້ອງ ໄດ້ໄປເຄື່ອນໄຫວຢ້ຽມຢາມ ແລະ ພົບປະໂອ້ລົມ ການນຳຫຼັກແຫຼ່ງ ເມືອງລ້ອງແຈ້ງ, ແຂວງໄຊສົມບູນ ໂດຍການຕ້ອນຮັບ ແລະ ເຂົ້າ ຮ່ວມຮັບຟັງການພົບປະໂອ້ລົມ ມີທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍຄະນະນຳຂອງແຂວງ, ການນຳ-ພະນັກງານຫຼັກແຫຼ່ງ ເມືອງລ້ອງແຈ້ງ ແລະ ພາກທຸລະກິດ ທີ່ມີສ່ວນຮ່ວມ ໃນການພັດທະນາແຂວງໄຊສົມບູນ ຈຳນວນໜຶ່ງ.

ກ່ອນອື່ນ ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ຮັບຟັງການລາຍງານ ກ່ຽວກັບສະພາບການພັດທະນາເສດ ຖະກິດ-ສັງຄົມ ຂອງເມືອງ ຈາກທ່ານ ອຸດອນ ສິງດາລາ ເຈົ້າເມືອງໆລ້ອງແຈ້ງ ໂດຍເຫັນໄດ້ສະພາບຈຸດພິເສດ, ທ່າແຮງພື້ນຖານ, ຂໍ້ຈຳກັດ ແລະ ສິ່ງທ້າທາຍຕ່າງໆ ໃນການພັດທະນາເສດຖະກິດ-ສັງຄົມຂອງເມືອງ, ລວມທັງ ທິດທາງແຜນວຽກຈຸດສຸມພັດ ທະນາຂອງເມືອງ ໃນຕໍ່ໜ້າ. ໂດຍອີງໃສ່ເງື່ອນໄຂທີ່ຕັ້ງ ແລະ ທ່າແຮງຕ່າງໆ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ແຂວງໄຊສົມບູນ ໄດ້ສຸມໃສ່ພັດທະ ນາເມືອງລ້ອງແຈ້ງ 3 ດ້ານ ຄື: ສຸມໃສ່ສ້າງເມືອງລ້ອງແຈ້ງ ເປັນເມືອງປູກ-ເມືອງລ້ຽງ ເພື່ອສະໜອງສະບຽງອາຫານ ໃຫ້ບັນດາບໍລິສັດ ທັງພາຍໃນ ແລະ ຕ່າງປະເທດ ຢູ່ພາຍໃນແຂວງໄຊສົມບູນ; ສຸມໃສ່ ສ້າງເມືອງລ້ອງແຈ້ງ ເປັນເມືອງທ່ອງທ່ຽວ ທາງທຳມະຊາດ ແລະ ຮ່ອງຮອຍປະຫວັດ ສາດ ແບບອະນຸລັກ; ແລະ ສຸມໃສ່ສ້າງກຸ່ມບ້ານນ້ຳຜາ ໃຫ້ເປັນບ້ານທີ່ມີການພັດທະນາ ແລະ ກາຍເປັນສີສັນຂອງຕົວເມືອງ ປະກົດຂຶ້ນ. ນອກຈາກນີ້ ຍັງໄດ້ຮັບຟັງການນຳສະເໜີແຜນໂຄງການພັດທະ ນາແຫຼ່ງທ່ອງທ່ຽວ ພູໝອກ-ພູຕະການ ແລະ ບັນດາກິດຈະການທີ່ຕິດພັນ ຈາກທ່ານປະທານກຸ່ມບໍລິສັດ ລ້ອງແຈ້ງພັດທະນາ ຈຳກັດ.

ໃນໂອກາດນີ້, ທ່ານ ນາຍົກລັດຖະມົນຕີ ໄດ້ໃຫ້ກຽດມີຄຳເຫັນ ໂອ້ລົມ ແລະ ໃຫ້ທິດຊີ້ນຳ ຕໍ່ຜູ້ເຂົ້າຮ່ວມ ເອົາໃຈໃສ່ຕື່ມບາງດ້ານ ເປັນຕົ້ນ ອົງການປົກຄອງແຂວງ, ອົງການປົກຄອງເມືອງ ຕ້ອງສືບຕໍ່ເປັນເຈົ້າການ ປົກປັກຮັກສາ ແລະ ສ້າງສາພັດທະນາ ຂອງທ້ອງຖິ່ນຕົນ ຢ່າງຮອບດ້ານ ບົນຈິດໃຈສູ້ຊົນເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ສ້າງແຂວງ ໃຫ້ເປັນຫົວໜ່ວຍຍຸດທະສາດ ແລະ ສ້າງເມືອງ ໃຫ້ເປັນຫົວໜ່ວຍເຂັ້ມແຂງຮອບດ້ານ ແທ້ໆ, ຫຼີກລ່ຽງແນວຄິດເອື່ອຍອີງ; ເພີ່ມສະຕິລະວັງຕົວ ໃນການຈັດຕັ້ງປະຕິບັດວຽກງານປ້ອງກັນຊາດ- ປ້ອງກັນຄວາມສະຫງົບ ຕິດພັນກັບວຽກງານການຕ່າງປະເທດ ໂດຍສະເພາະ ປ້ອງກັນການສວຍໃຊ້ໂອກາດ ແລະ ຊ່ອງຫວ່າງ ເພື່ອສ້າງປະກົດການຫຍໍ້ທໍ້ຕ່າງໆ ແລະ ກົດໜ່ວງຖ່ວງດຶງ ການພັດທະນາປະເທດຊາດ ກໍ່ຄືທ້ອງຖິ່ນພາຍໃນແຂວງໄຊສົມບູນ.

ພ້ອມກັນນີ້ ກໍໃຫ້ກະຊວງ- ອົງການທີ່ກ່ຽວຂ້ອງ ສົມທົບກັບແຂວງ ແລະ ເມືອງ ກວດກາຄືນ ແລະ ຄົ້ນຄວ້າປັບປຸງ ແຜນພັດທະນາດ້ານຕ່າງໆ ໃນວຽກງານສາຍຕັ້ງຂອງຕົນ ໃຫ້ສອດຄ່ອງກັບສະພາບຕົວຈິງ ກວ່າເກົ່າ ໂດຍສະເພາະ ຂະແໜງ ແຜນການ ແລະ ການລົງທຶນ, ໂຍທາທິການ ແລະ ຂົນສົ່ງ, ກະສິກຳ ແລະ ປ່າໄມ້, ພະລັງງານ ແລະ ບໍ່ແຮ່, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອແນໃສ່ເຮັດໃຫ້ເມືອງລ່ອງແຈ້ງ ກໍຄືແຂວງໄຊສົມບູນ ໄດ້ຮັບການພັດທະນາ ດີຂຶ້ນກວ່າເກົ່າ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ ເປັນກ້າວໆ.

ພາບ ແລະ ຂ່າວ: ກົມປະຊາສຳພັນ ຫສນຍ

ກຸ່ມບໍລິສັດ ລົດໄຟ ໜານໜິງ ແຫ່ງ ສປ ຈີນ ເປີດເຜີຍວ່າ: ໃນໄລຍະ 6 ເດືອນຕົ້ນປີ 2022 ນີ້, ການຂົນສົ່ງສິນຄ້າຜ່ານລົດໄຟຈີນ-ຫວຽດນາມ ມີທັງໝົດ 173 ຄັ້ງ, ເພີ່ມຂຶ້ນ 19,3% ເມື່ອທຽບໃສ່ໄລຍະດຽວກັນຂອງປີຜ່ານມາ, ໃນນັ້ນ ໄດ້ຂົນສົ່ງຕູ້ສິນຄ້າທັງໝົດ 5.196 ຕູ້ ເພີ່ມຂຶ້ນ 26.3%. ສະ ຖານທີ່ເກັບມ້ຽນ ແລະ ແຈກຢາຍສິນຄ້າຂອງລົດໄຟບັນ ທຸກສິນຄ້າຈີນ-ຫວຽດນາມ ມີຫລາຍກວ່າ 20 ເມືອງໃນ ແລະ ນອກເຂດປົກຄອງຕົນເອງເຜົ່າຈ້ວງກວາງຊີທີ່ຢູ່ທາງ ທິດໃຕ້ຂອງຈີນ ເຊີ່ງມີການຂົນສົ່ງສິນຄ້າຫຼາຍກວ່າ 240 ຊະນິດ.

ໝາກໄມ້ທີ່ໄປຈາກປະເທດໃນອາຊີຕາເວັນອອກສ່ຽງໃຕ້ ໄດ້ຮັບຄວາມນິຍົມຫລາຍໃນຕະ ຫລາດຢູ່ຈີນ ແລະ ການຂົນສົ່ງດ້ວຍລົດໄຟຈີນ-ຫວຽດນາມ ນັບມື້ເພີ່ມຂຶ້ນ ເຊີ່ງສະຕິຖິໃນໄລຍະ 6 ເດືອນຕົ້ນປີນີ້ ໝາກໄມ້ທີ່ຖືກສົ່ງດ້ວຍລົດ ໄຟໄປໂດຍຜ່ານທ່າເຮືອ Pingxiang ມີຈໍານວນ 38.000 ໂຕນ, ເພີ່ມຂຶ້ນຫລາຍກວ່າ 164.95% ເມື່ອທຽບໃສ່ແຜນ ການປີທີ່ວາງໄວ້.

ທ່ານ Huang Shuwei ຜູ້ຈັດການບໍລິສັດແລກປ່ຽນ: ຫມາກໄມ້ຂ້າມແດນ ທີ່ຕັ້ງຢູ່ກວາງຊີ ກ່າວວ່າ: ບໍລິສັດເລືອກໃຊ້ລົດໄຟຂົນສົ່ງສິນຄ້າຈີນ-ຫວຽດນາມ ຫຼັງຈາກສັນຍາຄູ່ຮ່ວມເສດຖະກິດຮອບດ້ານຂອງພາກພື້ນ (RCEP) ມີຜົນບັງຄັບໃຊ້ນັບແຕ່ວັນທີ 1 ມັງກອນ 2022 ເຊີງ ພະແນກ ທາງລົດໄຟ ໄດ້ສ້າງແຜນການຂົນສົ່ງທີ່ເຫມາະສົມ ແລະ ເວລາໃນການຊໍາລະຄ່າທໍານຽມໄວຂຶ້ນກວ່າເກົ່າ ເຮັດໃຫ້ມີຄວາມສະດວກແກ່ບໍລິສັດຂອງພວກເຮົາທີ່ຈະຂະຫຍາຍຂະຫນາດການນໍາເຂົ້າສິນຄ້າຂອງຕົນ”

Source: Xinhua

ໃນວັນສຸກ ວັນທີ 1 ກໍລະກົດ, ທ່ານ ຈອນ ເພຍຊັນ, ເອກອັກຄະລາຊະທູດ ສະຫະຣາຊະອານາຈັກອັງກິດ ປະຈຳ ສປປ ລາວ ແລະ ທ່ານ ດຣ. ສະ​ໜອງ ທອງ​ຊະ​ນະ, ຮອງລັດຖະມົນຕີ ກະຊວງສາທາລະນະສຸກ ໄດ້ເຂົ້າຮ່ວມພິທີມອບ-ຮັບ ຊຸດປ້ອງກັນພະຍາດພະຍາດໂຄວິດ-19 ຈາກສະຫະຣາຊະອານາຈັກອັງກິດ ໃຫ້ແກ່ ສປປ ລາວ.

ສະຫະລາຊະອານາຈັກອັງກິດ ໄດ້ເປັນຄູ່ຮ່ວມມືໃນວຽກງານການຮັບມືກັບການແຜ່ລະບາດຂອງພະຍາດໂຄວິດ-19 ຂອງ ສປປ ລາວ ຢ່າງສະໝໍ່າສະເໝີ. ປັດຈຸບັນ, ສະຫະຣາຊະອານາຈັກ ໄດ້ມອບຊຸດປ້ອງກັນພະຍາດພະຍາດໂຄວິດ-19 ຈໍານວນ 800,000 ຊຸດ, ໃນ​ໄລ​ຍະ​ຜ່ານ​ມາ ຊ່ວຍ​ເຫຼືອ ວັກຊີນປ້ອງກັນພະຍາດໂຄວິດ-19 ຈຳ​ນວນ 700,000 ໂດສ ແລະ ງົບປະມານເຂົ້າໃນວຽກງານການຮັບມືກັບພະຍາດໂຄວິດ-19 ຜ່ານທະນາຄານພັດທະນາອາຊີ.

ໃນປີ 2021, ສະຖານທູດ ໄດ້ໃຫ້ການສະໜັບສະໜູນການຄົ້ນຄວ້າ ກ່ຽວກັບ ການກ່ຽວພັນກັນລະຫວ່າງໄວຣັສໂຄໂຣນາໃນປະຊາກອນເຈຍທີ່ອາໄສຢູ່ພາກເໜືອຂອງ ສປປ ລາວ ກັບ ພະຍາດໂຄວິດ-19. ສະຫະຣາຊະອານາຈັກ ຍັງໄດ້ປະກອບສ່ວນສະໜັບສະໜູນງົບປະມານ ເປັນຈຳນວນ 240,000 ໂດລາສະຫະລັດ ໃຫ້ແກ່ສະຖາບັນ ປັດສະເຕີ ລາວ ເພື່ອເປັນການສະໜັບສະໜູນສະຖາບັນໃນຖານະເປັນສະຖາບັນຄົ້ນຄວ້າ ທົດລອງ ແຖວໜ້າໃນການສຶກສາຄົ້ນຄວ້າ ແລະ ກວດວິເຄາະຫາເຊື້ອພະຍາດ COVID-19.

ປີນີ້, ເຂດບໍລິຫານພິເສດຮົງກົງໄດ້ກັບຄືນສູ່ປະເທດຊາດຄົບຮອບ 25 ປີແລ້ວ. ຕະຫຼອດໄລຍະ 25 ປີຜ່ານມາ, ໂດຍອາໄສປະເທດຊາດ, ເຂດພິເສດຮົງກົງໄດ້ຮັບມືກັບສິ່ງທ້າທາຍຂອງຄວາມສ່ຽງປະເພດຕ່າງໆຢ່າງສຳເລັດຜົນ, ສາມາດຮັກສາຄວາມຈະເລີນຮຸ່ນເຮືອງ ແລະ ສະຖຽນລະພາບ. ການປະຕິບັດ “ປະເທດດຽວສອງລະບອບ” ຢູ່ຮົງກົງໄດ້ຮັບຜົນສຳເລັດ ເຊິ່ງເປັນທີ່ຍອມຮັບທົ່ວໄປໃນໂລກ.

ການຕໍ່ຕ້ານວິກິດການທາງການເງິນທີ່ກະທົບປະເທດຕ່າງໆຢູ້ອາຊີຢ່າງໜັກໜ່ວງ ກໍຄືວິກິດການການເງິນສາກົນ, ການຕໍ່ຕ້ານພະຍາດຊາ(sars) ແລະ ພະຍາດໂຄວິດ-19 ແລະອື່ນໆ. ພາຍຫຼັງກັບຄືນສູ່ປະເທດຊາດຕະຫຼອດໄລຍະ 25 ປີຜ່ານມາ, ທຸກຄັ້ງທີ່ເຂດພິເສດຮົງກົງຜະເຊີນກັບຄວາມຫຍຸ້ງຍາກແລ້ວ ລັດຖະບານກໍອອກແຮງຢ່າງສຸດຂີດເພື່ອຊ່ວຍເຫຼືອຮົງກົງຕັ້ງແຕ່ເບື້ອງຕົ້ນໂລດ ເຊິ່ງໄດ້ສະແດງໃຫ້ເຫັນວ່າ “ເຂດພິເສດຮົງກົງມີຄວາມຮຽກຮ້ອງແລ້ວ ປະເທດຊາດກໍຈະຕອບສະໜອງຄວາມຕ້ອງການຢ່າງແນ່ນອນ” ແລະຊ່ວຍໄດ້ເປັນຢ່າງດີ. ທ່ານ ຫຼີ້ເຈ່ຍຊາວ ວ່າທີ່ຜູ້ວ່າການເຂດບໍລິຫານພິເສດຮົງກົງໄດ້ກ່າວວ່າ: “ປະເທດຊາດໃນຖານະເປັນກໍາລັງໜູນທີ່ແຂງແຮງທີ່ສຸດ ແມ່ນກຳລັງທີ່ສຳຄັນທີ່ສຸດໃນຂະບວນການແກ້ໄຂບັນຫາຂອງເຂດພິເສດຮົງກົງ.”

ວັນທີ 1 ກໍລະກົດ ປີ 2017, ພາຍໃຕ້ການເປັນພະຍານຂອງທ່ານສີຈິ້ນຜິງ ປະທານປະເທດຈີນ, ອົງການປົກຄອງທ້ອງຖິ່ນແຂວງກວາງຕຸ້ງ, ເຂດພິເສດຮົງກົງ ແລະ ເຂດພິເສດມາກາວໄດ້ລົງນາມໃນ “ສັນຍາຂອບການລົງເລິກການຮ່ວມມືລະຫວ່າງແຂວງກວາງຕຸ່ງ, ເຂດພິເສດຮົງກົງ ແລະ ເຂດພິເສດມາກາວ, ຊຸກຍູ້ການກໍ່ສ້າງເຂດອ່າວໃຫຍ່” ເຊິ່ງເປັນຂີດໝາຍສະແດງໃຫ້ເຫັນວ່າ, ການກໍ່ສ້າງເຂດອ່າວໃຫຍ່ກວາງຕຸ້ງ-ຮົງກົງ-ມາກາວໄດ້ເລີ່ມຕົ້ນຢ່າງເປັນທາງການ. ຫຼັງຈາກນັ້ນ, ລັດຖະບານຈີນໄດ້ວາງຍຸດທະສາດ, ນະໂຍບາຍ ແລະ ມາດຕະການຕ່າງໆ ເຊັ່ນ: ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ການກໍ່ສ້າງເຂດອ່າວໃຫຍ່ກວາງຕຸ້ງ-ຮົງກົງ-ມາກາວ ແລະອື່ນໆ ເຊິ່ງເປັນການສະໜອງພື້ນທີ່ການພັດທະນາຢ່າງກວ້າງຂວາງໃຫ້ແກ່ເຂດພິເສດຮົງກົງ. ນອກນີ້, ໃນ “ແຜນແມ່ບົດແຫ່ງການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14” ໄດ້ສະເໜີວ່າ, ຕ້ອງຍົກສູງຖານະການເປັນສູນກາງທາງດ້ານການເງິນ, ການຂົນສົ່ງທາງທະເລ, ສູນກາງການຄ້າ ແລະ ສູນກາງການຂົນສົ່ງທາງອາກາດສາກົນຂອງເຂດພິເສດຮົງກົງ, ເພີ່ມທະວີບົດບາດການເປັນສູນຄຸ້ມຄອງຊັບສິນສາກົນ ແລະ ສູນຄຸ້ມຄອງຄວາມສ່ຽງສາກົນຂອງຮົງກົງ ເຊິ່ງໄດ້ເພີ່ມພະລັງຊຸກດັນໃຫ້ແກ່ການພັດທະນາໃນອະນາຄົດຂອງເຂດພິເສດຮົງກົງ.

ແຕ່ວ່າ, ນັກການເມືອງປະເທດຕາເວັນຕົກຈຳນວນໜຶ່ງໄດ້ຊູຄັນຕາລະບັດຂອງການປົກປັກຮັກສາ “ສິດທິມະນຸດ” ແລະ “ເສລີພາບ” ຂອງເຂດພິເສດຮົງກົງ, ໄດ້ແຊກແຊງວຽກງານຂອງຮົງກົງເລື້ອຍໆ, ເພື່ອຖືຮົງກົງເປັນເຄື່ອງມື ແລະເບ້ຍຕໍ່ລອງໃນການສະກັດກັ້ນການພັດທະນາຂອງປະເທດຈີນ. ໃນເວລາອັນຄັບຂັນນີ້, ສູນກາງພັກຄອມມູນິດຈີນທີ່ນຳພາໂດຍທ່ານ ສີຈິ້ນຜິງ ໄດ້ສັງເກດແລະວິເຄາະສະຖານະການ ແລະ ທຳການຕັດສິນຢ່າງຂາດຕົວ ທັງໄດ້ໃຊ້ມາດຕະການສຳຄັນຕ່າງໆ ໂດຍສ້າງກົດໝາຍວ່າດ້ວຍການຮັກສາຄວາມໝັ້ນຄົງແຫ່ງຊາດຢູ່ຮົງກົງ ແລະ ປັບປຸງລະບຽບການເລືອກຕັ້ງຂອງເຂດບໍລິຫານພິເສດຮົງກົງໃຫ້ສົມບູນຂຶ້ນ ເພື່ອຕັດຂາດມືມືດທີ່ຫວັງທຳລາຍເຂດພິເສດຮົງກົງ ແລະ ໄດ້ເປີດສະພາບການໃໝ່ດ້ານການບໍລິຫານທີ່ດີຂອງເຂດພິເສດຮົງກົງ.

ໃນຕົ້ນປີ 2022, ເຂດພິເສດຮົງກົງໄດ້ເກີດສະພາບການແຜ່ລະບາດຂອງພະຍາດໂຄວິດ-19 ຮອບທີ 5 ຢ່າງກະທັນຫັນ, ຜູ້ຕິດເຊື້ອໄດ້ເພີ່ມຂຶ້ນຈົນເກີນຄວາມສາມາດໃນການຮັບມືແລະປິ່ນປົວຂອງທ້ອງຖິ່ນ. ໃນຂະນະນີ້, ລັດຖະບານຈີນໄດ້ຊ່ວຍເຫຼືອຮົງກົງຢ່າງທັນເວລາອີກເທື່ອໜຶ່ງ ໂດຍໄດ້ຊ່ວຍສ້າງໂຮງໝໍຊົ່ວຄາວຢ່າງວ່ອງໄວທີ່ສຸດ, ສົ່ງຜູ້ຊ່ຽວຊານ ແລະ ພະນັກງານການແພດຫຼາຍທີມໄປຮົງກົງ, ໄດ້ສະໜອງເຄື່ອງອຸປະກອນປ້ອງກັນ ແລະ ຕ້ານພະຍາດໂຄວິດ-19 ຈຳນວນຫຼວງຫຼາຍ, ແລະໄດ້ຮັບປະກັນການສະໜອງເຄື່ອງໃຊ້ປະຈຳວັນໃຫ້ຢ່າງສຸດຄວາມສາມາດ.

ຫວ່າງມໍ່ໆມານີ້, ສະຖາບັນຄົ້ນຄວ້າການຄຸ້ມຄອງການພັດທະນາສາກົນສະວິດເຊີແລນໄດ້ເຜີຍແຜ່ “ບົດລາຍງານຄວາມສາມາດການແຂ່ງຂັນໂລກ 2022” ໂດຍສະແດງໃຫ້ເຫັນວ່າ ຮົງກົງໄດ້ຫຍັບຂຶ້ນມາເປັນອັນດັບທີ 5 ໃນປີນີ້ຈາກອັນດັບທີ 7 ໃນປີຜ່ານມາ. ເຖິງວ່າຮົງກົງໄດ້ຮັບຜົນກະທົບຈາກສະພາບການແຜ່ລະບາດຂອງພະຍາດໂຄວິດ-19 ແລະ ມີນັກການເມືອງປະເທດຕາເວັນຕົກຈຳນວນໜຶ່ງໃສ່ຮ້າຍປ້າຍສີກໍຕາມ, ແຕ່ວ່າ ສັນຍານຫຼາຍຢ່າງໃນໄລຍະຜ່ານມາໄດ້ສະແດງໃຫ້ເຫັນວ່າ: ຄວາມກ້າວໜາຂອງຮົງກົງ ຈາກການມີຄວາມສະຫງົບກ້າວໄປສູ່ຄວາມຈະເລີນຮຸ່ງເຮືອງຢ່າງບໍ່ສາມາດສະກັດກັ້ນໄດ້.

ໃນໄລຍະ 25 ປີຜ່ານມາ, ພາຍໃຕ້ການສະໜັບສະໜູນຈາກປະເທດຊາດ, ເຂດພິເສດຮົງກົງໄດ້ຮັກສາສະຖຽນລະພາບ ແລະຄວາມຈະເລີນຮຸ່ນເຮືອງ, ມີຖານະເປັນສູນກາງການເງິນ, ການຂົນສົ່ງທາງທະເລ ແລະ ການຄ້າສາກົນທີ່ໝັ້ນທ່ຽງ, ການປະດິດສ້າງໃໝ່ດ້ານວິທະຍາສາດເຕັກນິກ, ວຽກງານວັດທະນະທຳ ແລະສິລະປະ ກໍມີການພັດທະນາຢ່າງຄຶກຄັກ. ພວກເຮົາເຊື່ອໝັ້ນວ່າ, ໂດຍມີປະເທດຊາດເປັນກຳລັງໜູນຢ່າງແຂງແຮງ, ຊາວຮົງກົງ 7,4 ລ້ານຄົນ ຈະສາມາດຮ່ວມກັນສ້າງອະນາຄົດທີ່ດີງາມກວ່າເກົ່າໄດ້ຢ່າງແນ່ນອນ.

ວັນທີ 1 ກໍລະກົດ 2022, ພິທີສະເຫຼີມສະຫຼອງຮົງກົງກັບຄືນສູ່ປະເທດຊາດຄົບຮອບ 25 ປີ ແລະ ພິທີສາບານຕົວຂຶ້ນຮັບຕຳແໜ່ງຂອງຄະນະອົງການປົກຄອງເຂດບໍລິຫານພິເສດຮົງກົງຊຸດທີ 6 ໄດ້ຈັດຂຶ້ນຢູ່ສູນປະຊຸມວາງສະແດງຮົງກົງຢ່າງຍິ່ງໃຫຍ່.

ທ່ານ ສີຈິ້ນຜິງ ປະທານປະເທດຈີນ ໄດ້ເຂົ້າຮ່ວມພິທີ ແລະ ກ່າວຄຳປາໄສທີ່ສຳຄັນວ່າ: “ປະເທດດຽວສອງລະບອບ” ໄດ້ຜ່ານການກວດສອບຈາກພຶດຕິກຳຕົວຈິງ ສອດຄ່ອງກັບຜົນປະໂຫຍດພື້ນຖານຂອງປະເທດ ແລະ ຊົນຊາດ, ສອດຄ່ອງກັບຜົນປະໂຫຍດພື້ນຖານຂອງຮົງກົງ ແລະ ມາກາວ, ໄດ້ຮັບການສະໜັບສະໜູນຢ່າງສຸດຂີດຈາກປະຊາຊົນທົ່ວປະເທດ 1 ຕື້ 400 ລ້ານກວ່າຄົນ, ໄດ້ຮັບການອູ້ມຊູສະໜັບສະໜູນຈາກປະຊາຊົນຮົງກົງ ແລະ ມາກາວ ຢ່າງເປັນເອກະພາບກັນ, ທັງໄດ້ຮັບຄວາມເຫັນດີໂດຍທົ່ວໄປຈາກປະຊາຄົມໂລກ. ນະໂຍບາຍທີ່ດີຄືແນວນີ້, ບໍ່ມີເຫດຜົນໃດໆທີ່ຈະປ່ຽນແປງ, ຕ້ອງຢຶດໝັ້ນເປັນໄລຍະຍາວນານ.

ທ່ານ ສີຈິ້ນຜິງ ກ່າວວ່າ: ຫຼັງຈາກກັບຄືນສູ່ປະເທດຊາດແລ້ວ, ພີ່ນ້ອງຮ່ວມຊາດຮົງກົງ ໄດ້ເປັນເຈົ້າຂອງປະເທດຊາດ, ປະຕິບັດນະໂຍບາຍທີ່ຊາວຮົງກົງປົກຄອງຮົງກົງ, ປົກຄອງຕົນເອງໃນລະດັບສູງ, ຮົງກົງເລີ່ມມີປະຊາທິປະໄຕຢ່າງແທ້ຈິງ. ລະບອບປະຊາທິປະໄຕຂອງເຂດບໍລິຫານພິເສດຮົງກົງ ສອດຄ່ອງກັບທິດທາງ “ປະເທດດຽວສອງລະບອບ”, ມີຜົນດີຕໍ່ການປົກປັກຮັກສາສິດ ແລະ ຜົນປະໂຫຍດດ້ານປະຊາທິປະໄຕຂອງຊາວຮົງກົງ, ມີຜົນດີຕໍ່ການຮັກສາຄວາມຈະເລີນຮຸ່ງເຮືອງ ແລະ ສະຖຽນລະພາບຂອງຮົງກົງ ທີ່ມີອະນາຄົດທີ່ສະຫວ່າງສະໄຫວ.

ທ່ານ ສີຈິ້ນຜິງ ກ່າວເນັ້ນໜັກວ່າ: ຕ້ອງປະຕິບັດນະໂຍບາຍ “ຜູ້ຮັກຊາດປົກຄອງຮົງກົງ” ໃຫ້ເປັນຮູບປະທຳ.`

ທ່ານ ສີຈິ້ນຜິງ ກ່າວຕື່ມວ່າ: ລັດຖະບານກາງສະໜັບສະໜູນໃຫ້ຮົງກົງ ຮັກສາຖານະ ແລະ ທ່າແຮງພິເສດເປັນໄລຍະຍາວນານຢ່າງເຖິງຖອງ, ປັບປຸງຖານະທີ່ເປັນສູນກາງທາງດ້ານການເງິນສາກົນ, ການຂົນສົ່ງທາງທະເລ ແລະ ການຄ້າ, ປົກປັກຮັກສາສະພາບແວດລ້ອມການດຳເນີນທຸລະກິດທີ່ເສລີ, ເປີດກວ້າງແລະ ມີລະບຽບແບບແຜນ, ຮັກສາລະບຽບກົດໝາຍທົ່ວໄປ, ຂະຫຍາຍການພົວພັນກັບສາກົນທີ່ສະດວກ ແລະ ວ່ອງໄວ.

ທ່ານ ສີຈິ້ນຜິງ ກ່າວຕື່ມອີກວ່າ: 5 ປີຕໍ່ໜ້າ ແມ່ນໄລຍະສຳຄັນທີ່ຮົງກົງສ້າງສະພາບການໃໝ່ ເພື່ອບັນລຸການກ້າວກະໂດດໃໝ່. ດັ່ງນັ້ນ, ທ່ານ ສີຈິ້ນຜິງໄດ້ສະເໜີຄວາມຫວັງ 4 ຂໍ້ໃຫ້ກັບອົງການປົກຄອງຊຸດໃໝ່ຂອງເຂດບໍລິຫານພິເສດຮົງກົງ ດັ່ງນີ້: ສຸມໃສ່ຍົກລະດັບການປົກຄອງບໍລິຫານໃຫ້ສູງຂຶ້ນ, ເພີ່ມທະວີພະລັງແຮງຂັບເຄື່ອນການພັດທະນາຢ່າງບໍ່ຢຸດຢັ້ງ, ແກ້ໄຂບັນຫາຄວາມຫຍຸ້ງຍາກດ້ານຊີວິດການເປັນຢູ່ຂອງປະຊາຊົນຢ່າງແທ້ຈິງ, ຮ່ວມກັນປົກປັກຮັກສາຄວາມປອງດອງກົງກຽວ ແລະ ສະຖຽນລະພາບ.

ຂ່າວ: ຊີອາໄອ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ພິທີເຊັນສັນຍາຮັບຮອງເອົາ ບໍລິສັດ ຕິດຕັ້ງລະບົບໂປຣແກຣມພິມໃບເກັບເງິນອາກອນມູນຄ່າເພີ່ມ ແລະ ໂປຣແກຣມບັນຊີ ໃຫ້ຫົວໜ່ວຍທຸລະກິດເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມ ຢູ່ໃນລະບົບອາກອນມູນຄ່າເພີ່ມ ແລະ ຫົວໜ່ວຍຈຸນລະວິສາຫະກິດ ໄດ້ຈັດຂຶ້ນໃນວັນທີ 29 ມິຖຸນາ ຜ່ານມາ ທີ່ກົມສ່ວຍສາອາກອນໂດຍການຮ່ວມລົງນາມຂອງ ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ, ທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ (ໃນນາມຕາງໜ້າກະຊວງການເງິນ), ທ່ານ ຄໍາຫຼ້າ ສຸລິຍະສັກ ຜູ້ອໍານວຍການບໍລິສັດ ເອພີໄອເອັສ ຈໍາກັດ ແລະ ທ່ານ ໂດ້ ແກ້ວສີລາວົງ ຜູ້ອໍານວຍການບໍລິສັດທີເອັດສດີ ຈໍາກັດຜູ້ດຽວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ການລົງນາມໃນຄັ້ງນີ້ ເພື່ອຫັນເອົາຫົວໜ່ວຍທຸລະກິດເຂົ້າໃນລະບົບອາກອນມູນຄ່າເພີ່ມ ຈຳນວນ 14.000 ກວ່າຫົວໜ່ວຍພື້ນຖານ ຊຶ່ງເປັນໜຶ່ງໃນໜ້າວຽກຈຸດສຸມບຸລິມະສິດຂອງກະຊວງການເງິນ ໃນການຜັນຂະຫຍາຍຄຳສັ່ງເລກທີ 18/ນຍ ວ່າດ້ວຍການຕ້ານ ແລະ ສະກັດກັ້ນການຮົ່ວໄຫຼຂອງລາຍຮັບ ແລະ ການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ ຊຶ່ງການນຳໃຊ້ໃບເກັບເງິນ ແລະ ການຖືບັນຊີ ເປັນເງື່ອນໄຂຫຼັກຂອງຜູ້ເຂົ້າໃນລະບົບອາກອນມູນຄ່າເພີ່ມຈະຕ້ອງໄດ້ປະຕິບັດທີ່ເຫັນວ່າມີຄວາມຫຍຸ້ງຍາກ ແລະ ເປັນສິ່ງທ້າທາຍໃຫ້ຫົວໜ່ວຍທຸລະກິດ. ໂປຣມແກຣມທີ່ດຳເນີນການຕິດຕັ້ງ ໃຫ້ຫົວໜ່ວຍເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມເປັນໂປຣແກຣມດຽວທີ່ຈະມີ 2 ເຄື່ອງມື ຢູ່ໃນລະບົບດຽວ ມີການອອກໃບເກັບເງິນ ແລະ ການບັນທຶກບັນຊີ ໝາຍຄວາມວ່າໂປຣແກຣມດັ່ງກ່າວຈະບັນທຶກເບື້ອງຂາຍ ຫຼື ເບື້ອງສົ້ນອອກອາກອນມູນຄ່າເພີ່ມເຂົ້າໃນໂປຣແກຣມບັນຊີແບບອັດຕະໂນມັດ ຊຶ່ງຈະອຳນວຍຄວາມສະດວກໃຫ້ແກ່ຜູ້ປະກອບການ ແລະ ບໍ່ຈຳເປັນຕ້ອງໄດ້ບັນທຶກເບື້ອງສົ້ນອອກປະຈຳວັນເຂົ້າໃນລະບົບບັນຊີ.

ຂ່າວ-ພາບ: ຍຸພິນທອງ

ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ສະເໜີຮ່າງກົດໝາຍວ່າດ້ວຍຊັບສິນຂອງລັດ (ສະບັບປັບປຸງ) ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 1 ກໍລະກົດ ນີ້, ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ໂດຍມີສະມາຊິກສະພາແຫ່ງຊາດເຂົ້າຮ່ວມຢ່າງພ້ອມພຽງ.

ທ່ານ ບຸນໂຈມ ອຸບົນປະເສີດ ກ່າວວ່າ: ໃນສະພາບການຈັດຕັ້ງປະຕິບັດກົດໝາຍວ່າດ້ວຍຊັບສິນຂອງລັດ ສະບັບເລກທີ 09/ສພຊ 12 ຕຸລາ 2002 ເປັນສະບັບທຳອິດທີ່ຖືກຮັບຮອງ ແລະ ປະກາດໃຊ້ໃນປີ 2002, ໃນປີ 2012 ໄດ້ຖືກປັບປຸງເປັນສະບັບເລກທີ 14/ສພຊ, ລົງວັນທີ 5 ກໍລະກົດ 2012 ຊຶ່ງປະກອບດ້ວຍ 10 ພາກ 7 ໝວດ ແລະ 47 ມາດຕາ.

ອີງໃສ່ສະພາບການຂະຫຍາຍຕົວຂອງເສດຖະກິດ – ສັງຄົມ, ນິຕິກຳໃນການຄຸ້ມຄອງຊັບສິນຂອງລັດ ແມ່ນໄດ້ມີການນຳໃຊ້ມາຫຼາຍປີ ຈຶ່ງເຮັດໃຫ້ມີບາງຂໍ້ຈຳກັດໃນການປະຕິບັດໜ້າທີ່ການເມືອງໃນວຽກງານຊັບສິນຂອງລັດ ແລະ ເພື່ອເປັນການຕອບສະໜອງການຈັດຕັ້ງປະຕິບັດວາລະແຫ່ງຊາດໃຫ້ປະກົດຜົນເປັນຈິງ ດັ່ງນັ້ນ, ສະພາແຫ່ງຊາດ ຈຶ່ງໄດ້ອອກມະຕິ ສະບັບເລກທີ 24/ສພຊ, ລົງວັນທີ 19 ພະຈິກ 2019 ວ່າດ້ວຍມາດຕະການເພື່ອບັບປຸງກົດໝາຍ ແລະ ນິຕິກຳໃຕ້ກົດໝາຍທີ່ຕິດພັນກັບການເກັບລາຍຮັບ ຊຶ່ງໃນນັ້ນແມ່ນກົດໝາຍວ່າດ້ວຍຊັບສິນຂອງລັດ ທີ່ມີເນື້ອໃນຍັງບໍ່ຄົບຖ້ວນ, ສົມບູນໃນການຈັດຕັ້ງປະຕິບັດປະກອບດ້ວຍ 5 ມາດຕາຄື: ມາດຕາ 22, 23, 34, 37, 42 ພ້ອມນັ້ນ ກົດໝາຍວ່າດ້ວຍຊັບສິນຂອງລັດສະບັບນີ້ ກໍແມ່ນໜຶ່ງໃນ 4 ກົດໝາຍ ທີ່ຄະນະປະຈຳສະພາແຫ່ງຊາດ ຈັດຕັ້ງການປະເມີນຜົນການຈັດຕັ້ງປະຕິ ບັດ.

ອີງໃສ່ສະພາບເງື່ອນໄຂຂອງປະເທດ ແລະ ຂອງໂລກມີການປ່ຽນແປງ ຈຶ່ງເລັ່ງທວງໃຫ້ມີການປັບປຸງລະບຽບການໃນການຄຸ້ມຄອງຊັບສິນຂອງລັດໃຫ້ຮັດກຸມ, ໂປ່ງໃສ ແນໃສ່ເຮັດໃຫ້ ການພັດທະນາທີ່ມີມູນຄ່າມະຫາສານ ແລະ ມີຄວາມຍືນຍົງ, ປະກອບສ່ວນເຂົ້າໃນການພັດ ທະນາ ແລະ ສ້າງສາພັດທະນາປະເທດຊາດ ທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຄວາມຫຍຸ້ງຍາກດ້ານເສດຖະກິດ-ການເງິນ, ສະນັ້ນ, ຈຶ່ງມີຄວາມຈຳ ເປັນຕ້ອງໄດ້ມີການບັບປຸງກົດໝາຍວ່າດ້ວຍຊັບສິນຂອງລັດ.

ດ້ານໂຄງປະກອບ: ຮ່າງກົດໝາຍສະບັບນີ້ ໄດ້ມີການບັບປຸງເນື້ອໃນທັງໝົດ 41 ມາດ ຕາ, ເພີ່ມເຂົ້າໃໝ່ 3 ມາດຕາ, ຕັດອອກ 12 ມາດຕາ, ສະນັ້ນ, ຈຶ່ງເຮັດໃຫ້ໂຄງຮ່າງກົດໝາຍສະບັບປັບປຸງປະກອບດ້ວຍ 9 ພາກ, 7 ໝວດ, 65 ມາດຕາ ລາຍລະອຽດດັ່ງນີ້:

ພາກທີ I ບົດບັນຍັດທົ່ວໄປ ປະກອບດ້ວຍ 10 ມາດຕາ.

ພາກທີ II ປະເພດຊັບສິນຂອງລັດ ປະກອບດ້ວຍ 5 ມາດຕາ

ພາກທີ III ການຄຸ້ມຄອງ, ການນຳໃຊ້, ການປົກປັກຮັກສາ, ການະພັດທະນາ ແລະ ການສະສາງຊັບສິນຂອງລັດ ປະກອບດ້ວຍ 4 ໝວດ, 28 ມາດຕາ.

ພາກທີ IV ລາຍຮັບຊັບສິນຂອງລັດ ປະກອບດ້ວຍ 2 ມາດຕາ.

ພາກທີ V ຂໍ້ຫ້າມ ປະກອບດ້ວຍ 3 ມາດຕາ.

ພາກທີ VI ການຄຸ້ມຄອງ ປະກອບດ້ວຍ 3 ມາດຕາ.

ພາກ VII ງົບປະມານ, ເຄື່ອງແບບ, ກາໝາຍ ແລະ ຕາປະທັບ ປະກອບດ້ວຍ 2 ມາດຕາ.

ພາກທີ VIII ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ ປະກອບດ້ວຍ 2 ມາດຕາ.

ພາກທີ IX ບົດບັນຍັດສຸດທ້າຍ ປະກອບດ້ວຍ 2 ມາດຕາ.

(ຂ່າວ-ພາບ: ຕຸໄລເພັດ ພິມເມືອງ )

ຂ່າວຕ່າງປະເທດລາຍງານ ເມື່ອວັນທີ 29 ມິຖຸນາທີ່ຜ່ານມານີ້, ສຳນັກງານອຸຕຸນິຍົມວິທະຍາຂອງຍີ່ປຸ່ນ (JMA) ໄດ້ຄາດຄະເນວ່າ ອຸນຫະພູມຂອງນະຄອນຫຼວງໂຕກຽວໃນແຕ່ລະວັນຈະຍັງຄົງສູງເກີນລະດັບ 30 ອົງສາຈົນກວ່າຈະຜ່ານວັນທີ 5 ກໍລະກົດນີ້ໄປ.

ຂະນະທີ່ກະຊວງເສດຖະກິດ ການຄ້າ ແລະ ອຸດສາຫະກຳຂອງຍີ່ປຸ່ນໄດ້ເຜີຍແຜ່ຖະແຫຼງການວ່າ ກຳລັງການຜະລິດກະແສໄຟຟ້າສ່ວນເກີນສຳລັບນະຄອນຫຼວງໂຕກຽວ ແລະ ອີກ 8 ແຂວງໃກ້ຄຽງທີ່ຢູ່ໃນພາກຕາເວັນອອກອາດຈະຫຼຸດລົງເຫຼືອພຽງ 2,6% ໃນຊ່ວງບ່າຍໂມງຈົນເຖິງຕອນຄ່ຳຂອງວັນ. ທັງນີ້, ກຳລັງການຜະລິດທີ່ຕ່ຳກວ່າ 3% ໝາຍເຖິງຄວາມສ່ຽງຂອງການເກີດກະແສໄຟຟ້າດັບ ແລະ ຄວາມຈຳເປັນຕ້ອງຕັດກະແສໄຟຟ້າເປັນບາງເວລາ ລັດຖະບານຈຶ່ງກ່າວເຕືອນເລື່ອງການປະຢັດໄຟຟ້າໃຫ້ໄດ້ຫຼາຍທີ່ສຸດ ໂດຍໃຫ້ໜ່ວຍງານລັດປະຕິບັດເປັນແບບຢ່າງໃຫ້ແກ່ປະຊາຊົນ. ທາງດ້ານທ່ານນາຍົກ ລັດຖະມົນຕີຂອງຍີ່ປຸ່ນກ່າວວ່າ ລັດຖະບານພະຍາຍາມດຳເນີນການຢ່າງສຸດຄວາມສາມາດ ເພື່ອປ້ອງກັນບໍ່ໃຫ້ເກີດພາວະການຂາດແຄນກະແສໄຟຟ້າ ໂດຍກ່າວເຖິງການໃຊ້ພະລັງງານນິວເຄຼຍໃນປະເທດຕາບໃດທີ່ີຍັງຄົງມີຄວາມປອດໄພ.

ທັງນີ້, ກໍາລັງການຜະລິດກະແສໄຟຟ້າຂອງຍີ່ປຸ່ນຍັງຄົງຫຍຸ້ງຍາກຢູ່ ນັບຕັ້ງແຕ່ຜ່ານພົ້ນທໍລະນີໄພທິບັດຄັ້ງໃຫຍ່ເມື່ອເດືອນມີນາ 2011 ຊຶ່ງສົງຜົນໃຫ້ໂຮງໄຟຟ້ານິວເຄຼຍຫຼາຍແຫ່ງຍັງຄົງຕ້ອງປິດ ຊຶ່ງໜຶ່ງໃນນັ້ນຄືໂຮງໄຟຟ້າຟຸກຸຊິມະ ຂະນະທີ່ໂຮງໄຟຟ້າຖ່ານຫີນຫຼາຍແຫ່ງໃນປະເທດທີ່ໃຊ້ງານມາດົນນານຕໍ່ເນື່ອງຫຼາຍທົດສະວັດກໍຕ້ອງເລີ່ມຄ່ອຍໆຫຼຸດກຳລັງການຜະລິດລົງ ແລະ ກຽມປິດຕົວລົງເຊັ່ນດຽວກັນ ຕາມນະໂຍບາຍເປັນກາງທາງຄາບອນ ຂອງລັດຖະບານ.