ໃນວັນທີ 09 ພະຈິກ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດເສດຖະກິດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານ ການພັດທະນາເສດ ຖະກິດ-ສັງຄົມ ແຂວງເຊກອງ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ ພ້ອມດ້ວຍການນຳຫຼັກແຫຼ່ງຂອງແຂວງ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມ.

ໃນໂອກາດນີ້, ທ່ານ ເຈົ້າແຂວງໆເຊກອງ ໄດ້ລາຍງານໃຫ້ຊາບ ກ່ຽວກັບແຜນວຽກຈຸດສຸມປີ 2023 ແລະ ຄາດໝາຍດ້ານເສດຖະກິດມະຫາພາກຂອງແຂວງ ໂດຍຈະສູ້ຊົນເຮັດໃຫ້ລວມຍອດຜະລິດຕະ ພັນພາຍໃນ (GDP) ເພີີ່ມຂື້ນໃນລະດັບ 5% ຂຶ້ນໄປ, ໃນນັ້ນ ຂະແໜງກະສິກຳ ແລະ ປ່າໄມ້ ເພີີ່ມຂຶ້ນ 5,2% ກວມເອົາ 54,4%, ຂະ ແໜງອຸດສະຫະກຳ ເພີີ່ມຂຶ້ນ 3.0% ກວມເອົາ 28,7%, ຂະແໜງບໍລິ ການ ເພີີ່ມຂຶ້ນ 3,5 % ກວມເອົາ 16,7% ຂອງ (GDP); ຄວາມຕ້ອງການທຶນລວມ ເພືີ່ອຮັບປະກັນໃຫ້ແກ່ການເຕີບໂຕທາງດ້ານເສດຖະກິດ ໃນປີ 2023 ມີປະມານ 760 ຕື້ກີບ ກວມເອົາ 33% ຂອງ GDP, ໃນນັ້ນ: ການລົງທຶນຈາກງົບປະມານລັດ 76 ຕື້ກີບ, ກວມເອົາ 10%; ທຶນຊ່ວຍເຫຼືອລ້າ ແລະ ກູ້ຢືມ 114 ຕື້ກີບ ກວມເອົາ 15%; ທຶນຂອງເອກະຊົນພາຍໃນ ແລະ ຕ່າງປະເທດ 570 ຕື້ກີບ ກວມເອົາ 75% ຂອງຄວາມຕ້ອງການທຶນທັງໝົດ.

ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳບາງບັນຫາ ເພື່ອໃຫ້ການນຳຂອງແຂວງ ແລະ ພາກສ່ວນກ່ຽວຂ້ອງ ນຳໄປຈັດຕັ້ງປະຕິບັດເປັນຕົ້ນ ໃຫ້ສືບຕໍ່ເອົາໃຈໃສ່ນຳພາ-ຊີ້ນໍາວຽກງານປ້ອງກັນຊາດ, ປ້ອງກັນຄວາມສະຫງົບ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ, ສືບຕໍ່ສຶກສາອົບຮົມການເມືອງ-ແນວຄິດ ພະນັກງານ-ລັດຖະກອນ ຢູ່ແຕ່ລະຂະແໜງການໃຫ້ມີຄວາມຮັບຜິດຊອບຕໍ່ໜ້າທີ່ການເມືອງ ໂດຍຖືເອົາຜົນປະໂຫຍດຂອງປະເທດຊາດເປັນກົກ; ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ໃຫ້ຂາດໂຕ; ສືບຕໍ່ຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມຂອງແຂວງ ກໍຄືແຜນພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະແມ່ນການຈັດຕັ້ງປະຕິບັດ 02 ວາລະແຫ່ງຊາດ ໃຫ້ມີການຫັນປ່ຽນຢ່າງຕັ້ງໜ້າ ໂດຍຢຶດໝັ້ນຕາມຫຼັກການນໍາພາຂອງພັກ ແລະ ການຄຸ້ມຄອງລັດ ດ້ວຍລະບຽບກົດໝາຍ, ທັງຮັບປະກັນຕາມຫຼັກການຕົ້ນຕໍຄື: ເດັດຂາດ, ໂປ່ງໃສ ແລະ ມືອາຊີບ ໂດຍນໍາໃຊ້ທຸກນະໂຍບາຍ ແລະ ມາດຕະການແກ້ໄຂ ແລະ ຄຸ້ມຄອງເສດຖະກິດມະຫາພາກໃຫ້ມີສະເຖຍລະພາບໂດຍພື້ນຖານ; ສືບຕໍ່ການສ້າງສະພາບແວດລ້ອມໃນການດຳເນີນທຸລະກິດເພື່ອດຶງດູດ ແລະ ສົ່ງເສີມການລົງທຶນ ທັງພາຍໃນ ແລະ ຕ່າງປະເທດ ໃຫ້ມີຄວາມສະດວກ ແລະ ວ່ອງໄວ ໂດຍສະເພາະແມ່ນ ການຄັດເລືອກໃຫ້ໄດ້ນັກລົງທຶນທີ່ມີຄຸນນະພາບທີ່ແທ້ຈິງ; ສືບຕໍ່ຊຸກຍູ້ສົ່ງເສີມການຜະລິດກະສິກຳ, ການປູກຝັງ ແລະ ລ້ຽງສັດ ທີ່ເປັນທ່າແຮງບົ່ມຊ້ອນຂອງແຂວງ ເພື່ອສະໜອງສະບຽງອາຫານຢູ່ພາຍໃນ ແລະ ເປັນສິນຄ້າສົ່ງອອກ ໃຫ້ຫຼາຍຂຶ້ນ; ສືບຕໍ່ພັດທະນາດ້ານການທ່ອງ ທ່ຽວ ແລະ ການບໍລິການໃຫ້ມີຄຸນນະພາບດີຂຶ້ນ ແລະ ຍືນຍົງ, ຮັກສາມູນເຊື້ອວັດທະນະທໍາອັນເປັນເອກະລັກຂອງຊາດ ກໍຄືຂອງແຂວງ ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້້າມາທ່ອງທ່ຽວພາຍໃນແຂວງນັບມື້ນັບຫຼາຍຂຶ້ນ; ສືບຕໍ່ເອົາໃຈໃສ່ຜັນຂະຫຍາຍຜົນສໍາເລັດຂອງກອງປະຊຸມສະຫຼຸບການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ແລະ ວຽກງານກໍ່ສ້າງຮາກຖານການເມືອງພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງທົ່ວປະເທດ ໃຫ້ໄດ້ຮັບຜົນດີ; ໃຫ້ຄະນະພັກ, ຄະນະນໍາ ຂອງແຂວງ ສືບຕໍ່ຍົກສູງຄວາມຮັບຜິດຊອບ ໃນການຊີ້ນໍາ-ນໍາພາ ອົງການປົກຄອງເມືອງ, ບ້ານ ແລະ ໜ່ວຍງານກ່ຽວຂ້ອງ ເປັນເຈົ້າການຍົກສູງສະຕິລະວັງຕົວ, ຕ້ານປະກົດການທີ່ບໍ່ຖືກຕ້ອງ, ມີສະຕິຕໍ່ອິດທິກຳລັງປໍລະປັກທີ່ບໍ່ຫວັງດີຕໍ່ພັກ-ລັດ, ກຳໃຫ້ໄດ້ຫາງສຽງສັງຄົມ, ບໍລິໂພກຂໍ້ມູນຂ່າວສານຢ່າງມີສະຕິ ໂດຍສະເພາະຂໍ້ມູນຂ່າວສານຜ່ານສື່ອອນລາຍຕ່າງໆ. ພ້ອມທັງເສີມຂະຫຍາຍມູນເຊື້ອປະຕິວັດ, ຄວາມຮັກຊາດ, ຄວາມພິລະອາດຫານ, ຄວາມສາມັກຄີ ເປັນປຶກແຜ່ນ ແລະ ເດັດດ່ຽວໃນການປະຕິບັດແນວທາງນະໂຍບາຍຂອງພັກ; ຂຸດຄົ້ນ ແລະ, ນໍາໃຊ້ທ່າແຮງ, ຄວາມສາມາດບົ່ມຊ້ອນດ້ານທີ່ຕັ້ງ ເພື່ອພັດທະ ນາ ແລະ ຍົກລະດັບຄຸນນະພາບຊີວິດ ຂອງປະຊາຊົນແຂວງເຊກອງ ໃຫ້ດີຂຶ້ນຢ່າງບໍ່ຢຸດຢັ້ງ.

ພາບ-ຂ່າວ: ກົມປະຊາສຳພັນ ຫສນຍ

ໃນຕອນເຊົ້າຂອງວັນທີ 10 ພະຈິກ 2022, ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ ທີ່ ໂຮງແຮມ Phnom Penh. ພາຍໃນການພົບປະ, ສອງຝ່າຍ ໄດ້ທົບທວນຄືນ ແລະ ຕີລາຄາສູງຕໍ່ການຈັດຕັ້ງປະຕິບັດບັນດາຂໍ້ຕົກລົງຕ່າງໆຂອງສອງລັດຖະບານໃນໄລ ຍະທີ່ຜ່ານມາ, ເຊິ່ງເຫັນວ່າໄດ້ຮັບການຈັດ ຕັ້ງປະຕິບັດໃຫ້ສໍາເລັດແລ້ວຫຼາຍໂຄງ ການ ໃນທ່າມກາງບັນຍາກາດທີ່ສອງພັກ, ສອງລັດ ແລະ ປະຊາຊົນສອງຊາດ ລາວ- ຫວຽດນາມ ກໍາລັງສະເຫຼີມ ສະຫຼອງປີສາມັກຄີມິດຕະພາບ ລາວ-ຫວຽດນາມ ໃນປີ 2022 ນີ້. ພ້ອມນັ້ນ, ສອງຝ່າຍ ກໍ່ໄດ້ປຶກສາຫາລືຢ່າງກົງໄປກົງມາ ກ່ຽວກັບ ທິດທາງການຮ່ວມມືສອງຝ່າຍໃນຕໍ່ໜ້າ ເພື່ອສືບຕໍ່ຊຸກຍູ້ບາງໂຄງການທີ່ຍັງຄົງຄ້າງໃຫ້ສໍາເລັດໂດຍໄວ ໂດຍສະເພາະແມ່ນການຮ່ວມມືທາງດ້ານພະລັງງານນໍ້າມັນເຊື້ອໄຟ, ໂຄງການທ່າເຮືອຫວຸງອ່າງ, ໂຄງ ການບໍ່ເກືອກາລີ ຢູ່ ແຂວງຄໍາມ່ວນ, ໂຄງ ການສະໜາມບິນໜອງຄ້າງ ແລະ ອື່ນໆ.

ນອກຈາກນັ້ນ, ສອງຝ່າຍ ຍັງໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມສອງກົມການເມືອງ ແລະ ກອງປະຊຸມຄະນະກໍາມະການຮ່ວມມືສອງລັດຖະ ບານ ຄັ້ງທີ 45 ກໍ່ຄື ການຢ້ຽມຢາມທາງ ການ ແລະ ປິດປີສາມັກຄີມິດຕະພາບ 2022 ຢູ່ ສປປ ລາວ ຂອງ ທ່ານ ນາຍົກລັດຖະມົນຕີ ແຫ່ງ ສສ ຫວຽດນາມ ທີ່ຈະມີຂຶ້ນໃນທ້າຍເດືອນທັນວາ 2022 ນີ້. ໃນໂອກາດນີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຂອບ ໃຈຕໍ່ ລັດຖະບານ ຫວຽດນາມ ທີ່ໄດ້ໃຫ້ການຊ່ວຍເຫຼືອລັດຖະບານລາວ ໃນດ້ານຕ່າງໆຕະຫຼອດມາ, ເຊິ່ງເປັນການປະ ກອບສ່ວນເຂົ້າໃນການເພີ່ມພູນຄູນສ້າງສາຍພົວພັນພິເສດຂອງສອງຊາດ ລາວ- ຫວຽດນາມ ໃຫ້ສືບຕໍ່ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.

ຫຼັງຈາກນັ້ນ, ທ່ານນາຍົກລັດຖະມົນຕີ ພັນຄໍາ ວິພາວັນ ພ້ອມດ້ວຍບັນດາປະມຸກລັດ/ຫົວໜ້າລັດຖະບານຂອງບັນດາປະເທດສະມາຊິກອາຊຽນ ໄດ້ເຂົ້າຢ້ຽມຂໍ່ານັບ ພະບາດສົມເດັດ ພະບໍຣົມມະ ນຽດ ໂນໂຣດົມ ສີຫາໂມນີ, ພະມະຫາ ກະສັດ ແຫ່ງ ຣາຊະອານາຈັກ ກຳປູເຈຍ ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດທີ່ກ່ຽວຂ້ອງ ໃນລະຫວ່າງວັນທີ 10-13 ພະຈິກ 2022 ທີ່ ພະນົມ ເປັນ, ຣາຊະອານາຈັກກໍາປູເຈຍ.

ໃນຕອນບ່າຍ, ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມພົບປະລະຫວ່າງຜູ້ນໍາອາຊຽນ ກັບ ຜູ້ຕາງໜ້າສະມັດຊາລັດຖະສະພາ ລະ ຫວ່າງຊາດອາຊຽນ, ກອງປະຊຸມພົບປະລະຫວ່າງຜູ້ນໍາອາຊຽນ ກັບຜູ້ຕາງໜ້າຊາວໜຸ່ມອາຊຽນ ແລະ ກອງປະຊຸມພົບປະລະຫວ່າງຜູ້ນໍາອາຊຽນ ກັບ ຜູ້ຕາງໜ້າສະພາທີ່ປຶກສາທຸລະກິດອາຊຽນ.

ກອງປະຊຸມພົບປະລະຫວ່າງຜູ້ນໍາອາຊຽນ ກັບ ຜູ້ຕາງໜ້າສະມັດຊາລັດຖະສະພາ ລະຫວ່າງຊາດອາຊຽນ, ຜູ້ນໍາອາຊຽນ ໄດ້ສະແດງຄວາມຊົມເຊີຍຕໍ່ສະມັດຊາລັດຖະສະພາ ລະຫວ່າງຊາດອາຊຽນ ທີ່ໄດ້ປະກອບສ່ວນສໍາຄັນເຂົ້າໃນຂະ ບວນການສ້າງປະຊາຄົມອາຊຽນ ພ້ອມທັງສະເໜີໃຫ້ ສະມັດຊາລັດຖະສະພາ ລະ ຫວ່າງຊາດອາຊຽນ ເອົາໃຈໃສ່ຊຸກຍູ້ການມີສ່ວນຮ່ວມຂອງປະຊາຊົນໃຫ້ຫຼາຍຂຶ້ນ ແນໃສ່ເຮັດໃຫ້ປະຊາຊົນໄດ້ຮັບຜົນປະ ໂຫຍດຢ່າງແທ້ຈິງຈາກຂະບວນການສ້າງປະຊາຄົມອາຊຽນ ກໍຄືຄວາມພະຍາຍາມໃນການຟື້ນຟູເສດຖະກິດ-ສັງຄົມ ໃນທ່າມກາງສະພາບເສດຖະກິດໂລກມີຄວາມຫຍຸ້ງຍາກ, ອັດຕາເງິນເຟີ້ສູງ ແລະ ຄ່າຄອງຊີບທີ່ສູງຂຶ້ນໃນປັດຈຸບັນ.

ໃນການພົບປະກັບຕາງໜ້າຊາວໜຸ່ມອາຊຽນ, ຜູ້ນໍາອາຊຽນ ຢໍ້າຄືນບົດບາດສໍາຄັນຂອງຊາວຫນຸ່ມທີ່ຈະເປັນຜູ້ສືບທອດທີ່ເຂັ້ມແຂງໃນອະນາຄົດ ແລະ ເປັນກໍາລັງແຮງທີ່ສໍາຄັນໃນການພັດທະນາເສດຖະ ກິດ-ສັງຄົມ. ສະນັ້ນ, ຊາວໜຸ່ມຈະຕ້ອງໄດ້ເພີ່ມທະວີພັດທະນາຂີດຄວາມສາມາດຂອງຕົນຢ່າງຮອບດ້ານ, ມີລະບົບ, ແບບ ແຜນ ແລະ ມີເປົ້າໝາຍແນ່ນອນ ໂດຍສະເພາະ ໃນການໝູນໃຊ້ເຕັກໂນໂລຊີທີ່ທັນສະໄໝ ເພື່ອໃຫ້ສາມາດເຂົ້າເຖິງແຫຼ່ງຂໍ້ມູນຂ່າວສານ ແລະ ກຽມພ້ອມຮັບມືກັບສິ່ງທ້າທາຍໃນຕໍ່ໜ້າ.

ສໍາລັບການພົບປະກັບສະພາທີ່ປຶກສາທຸລະກິດອາຊຽນ, ກອງປະຊຸມໄດ້ສະແດງຄວາມຊົມເຊີຍຕໍ່ຜົນສໍາເລັດໃນການປະຕິບັດວຽກງານຂອງສະພາທີ່ປຶກສາທຸລະກິດອາຊຽນ ກໍຄື ການປະກອບສ່ວນອັນໃຫຍ່ຫຼວງຂອງພາກທຸລະກິດໃນການແກ້ໄຂ ແລະ ຊ່ວຍຟື້ນຟູເສດຖະກິດ- ສັງຄົມ ຈາກຜົນກະທົບຂອງການແພ່ລະບາດຂອງພະຍາດໂຄວິດ-19 ແລະ ໄດ້ຊຸກຍູ້ໃຫ້ພາກທຸລະກິດ ສືບຕໍ່ຈັດຕັ້ງປະຕິບັດຂໍ້ລິເລີ່ມໃນຂົງເຂດການຫັນເປັນດີຈີຕອນ, ການສ້າງຄວາມເຂັ້ມແຂງໃຫ້ແກ່ການເຊື່ອມຈອດດ້ານຕ່ອງໂສ້ການສະໜອງ ແລະ ການສ້າງວຽກເຮັດງານທໍາໃນຂົງເຂດຈຸນລະວິສາຫະກິດ, ວິສາຫະ ກິດຂະໜາດນ້ອຍ ແລະ ກາງ ແນໃສ່ສ້າງເສດຖະກິດຂອງພາກພື້ນໃຫ້ມີຄວາມເຂັ້ມແຂງຍິ່ງຂຶ້ນ.

ມວນອາກາດເຢັນຍັງສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງປານກາງ ສົມທົບກັບກະແສລົມຕາເວັນອອກ-ຕາເວັນອອກ ສ່ຽງເໜືອພັດປົກຄຸມ ຊຶ່ງຈະເຮັດໃຫ້ອາກາດຍັງຈະເຢັນຢູ່ທົ່ວໄປໃນຕອນ ກາງຄືນ ຫາ ຕອນເຊົ້າຢູ່ໃນແຕ່ລະພາກ ພ້ອມມີໝອກບາງປົກຫຸ້ມຢູ່ທົ່ວ ໄປ ແລະ ອາກາດຍັງຈະໜາວເຢັນຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມໃນຕອນເຊົ້າ.

ພະຍາກອນອາກາດ ເວລາ 7:00 ໂມງວັນທີ 10/11/2022 ເຖິງເວລາ 7:00 ໂມງວັນທີ 11/11/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ວຽງໄຊ, ຊໍາເໜືອ ແລະ ຊຽງຂວາງ): ອາກາດໜາວເຢັນ ພ້ອມມີໝອກໜາປົກຫຸ້ມຢູ່ທົ່ວໄປ ໃນຕອນເຊົ້າ. ອຸນຫະພູມໃນລະຫວ່າງ 09-26 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດເຢັນ ຫາ ໜາວເຢັນ ພ້ອມມີ ໝອກບາງປົກຫຸ້ມຢູ່ທົ່ວໄປ ແລະ ມີໝອກໜາປົກຫຸ້ມໃນຕອນເຊົ້າ ຢູ່ບາງທ້ອງຖິ່ນ. ອຸນຫະພູມໃນລະຫວ່າງ 11-32 ອົງສາ.

-ນະຄອນຫລວງວຽງຈັນ: ອາກາດເຢັນໃນຕອນເຊົ້າ ແລະ ຈະມີລົມ ພັດແຮງເປັນບາງໂອກາດຢູ່ບາງບໍລິເວນ. ອຸນຫະພູມໃນລະຫວ່າງ 21-32 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຍັງຈະເຢັນໃນຕອນເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ ແລະ ມີລົມພັດແຮງຢູ່ບາງທ້ອງຖິ່ນ. ອຸນຫະພູມໃນລະຫວ່າງ 18-33 ອົງສາ.

-ແຂວງໄຊສົມບູນ: ອາກາດໜາວເຢັນ ພ້ອມມີໝອກໜາປົກຫຸ້ມ ໃນຕອນເຊົ້າ. ອຸນຫະພູມໃນລະຫວ່າງ 08-27 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດເຢັນໃນຕອນເຊົ້າ ແລະ ຈະມີລົມພັດແຮງຢູ່ບາງທ້ອງຖິ່ນ. ອຸນຫະພູມໃນລະຫວ່າງ 20-35 ອົງສາ.

-ເຂດພູພຽງບໍລະເວນ: ອາກາດໜາວເຢັນ ພ້ອມມີໝອກໜາປົກຫຸ້ມ ໃນຕອນເຊົ້າ. ອຸນຫະພູມໃນລະຫວ່າງ 11-27 ອົງສາ.

ສະພາທິດສະດີສູນກາງພັກ ຈັດກອງປະຊຸມສໍາມະນາວິທະຍາສາດ ພາຍໃຕ້ຫົວຂໍ້ “ການຫັນເປັນອຸດສາຫະກໍາ ແລະ ທັນສະໄໝ ຢູ່ ສປປ ລາວ” ໃນວັນທີ 10 ພະ ຈິກ 2022 ພາຍໃຕ້ການເປັນປະທານຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິ ການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ໂດຍມີ ສະຫາຍ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ທີ່ປຶກສາສະພາທິດສະດີສູນກາງພັກ, ມີບັນ ດາສະຫາຍຄະນະປະຈຳ ແລະ ສະມາຊິກສະພາທິດສະດີສູນກາງພັກ ແລະ ຄະນະຮັບຜິດ ຊອບໂຄງການ ເຂົ້າຮ່ວມ.

ໂຄງການຄົ້ນຄວ້າ ພາຍໃຕ້ຫົວຂໍ້: “ການຫັນເປັນອຸດສາຫະກຳ ແລະ ທັນສະໄໝ ຢູ່ ສປປ ລາວ” ເປັນໜຶ່ງໃນ 9 ໂຄງການຄົ້ນຄວ້າລະດັບຊາດຂອງພັກເຮົາ ທີ່ສະພາວິທະຍາ ສາດສັງຄົມແຫ່ງຊາດ ເມື່ອກ່ອນວາງອອກ ແລະ ສະພາທິດສະດີສູນກາງພັກ ໃນປັດຈຸບັນ.

ຜ່ານການດຳເນີນງານຢ່າງຕັ້ງໜ້າ ແລະ ດ້ວຍຄວາມຮັບຜິດຊອບຂອງ ຄະນະໂຄງການ “ການຫັນເປັນອຸດສາຫະກຳ ແລະ ທັນສະໄໝ ຢູ່ ສປປ ລາວ” ໄດ້ສຳເລັດຂັ້ນພື້ນຖານ, ສະນັ້ນ, ສະພາທິດສະດີສູນກາງພັກ ຈຶ່ງຈັດສໍາມະນາວິທະຍາສາດນີ້ຂຶ້ນ ແລະ ເຊີນບັນດາທ່ານທີ່ມີຄວາມຊ່ຽວຊານດ້ານເສດຖະກິດ ເພື່ອພ້ອມກັນປະກອບຄໍາຄິດຄໍາເຫັນຕໍ່ກັບເນື້ອໃນຂອງບົດຄົ້ນຄວ້ານີ້, ແນໃສ່ເຮັດໃຫ້ບົດຄົ້ນຄວ້າດັ່ງກ່າວນີ້ ມີເນື້ອໃນຄົບຖ້ວນສົມບູນຂຶ້ນຕື່ມ, ໃຫ້ສົມກັບວ່າເປັນບົດຄົ້ນຄວ້າ“ການຫັນເປັນອຸດສາຫະກຳ ແລະ ທັນສະໄໜຢູ່ ສປປ ລາວ” ສະບັບທໍາອິດຂອງ ສປປ ລາວ.

ບົດຄົ້ນຄວ້າສະບັບນີ້, ແມ່ນທົບທວນຄືນຄວາມຮັບຮູ້ດ້ານທິດສະດີ ແລະ ພຶດຕິກໍາຂອງການຫັນເປັນອຸດສາຫະກຳ ແລະ ທັນສະໄໝ, ທົບທວນຂະບວນວິວັດ ແລະ ຕີລາຄາການຫັນເປັນອຸດສາຫະກໍາ ແລະ ທັນສະໄໝ ໃນໄລຍະຜ່ານມາ(1976-2021)ຂອງ ສປປ ລາວ; ຂໍ້ສະເໜີແນະທາງດ້ານວິໄສທັດ ແລະ ຍຸດທະສາດການຫັນເປັນອຸດສາຫະກຳ ແລະ ທັນສະໄໝ ຮອດປີ 2030 ເພື່ອຫັນປ່ຽນຮອບດ້ານຮູບແບບການຜະລິດ, ການບໍລິການ, ການຄຸ້ມຄອງເສດຖະກິດ-ສັງຄົມ ແລະ ແບບແຜນການດຳລົງຊີວິດ, ບົດຄົ້ນຄວ້ານີ້ໄດ້ອີງ ໃສ່ວິໄສທັດຮອດ 2030 ທີ່ໄດ້ຮັບຮອງໃນກອງປະຊຸມໃຫຍ່ຄັ້ງທີ X ໃນປີ 2016 ໂດຍຕິດພັນກັບມະຕິຂອງກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງລັດ ແລະ ໄດ້ສະເໜີວິໄສທັດຂອງການຫັນເປັນອຸດສາຫະກໍາ ແລະ ທັນສະໄໝ ຄື: ຮອດປີ 2030, ສປປ ລາວ ກາຍເປັນປະເທດທີ່ມີລາຍຮັບໃນລະດັບປານກາງສູງ, ມີພື້ນຖານເສດຖະກິດທີ່ໜັກແໜ້ນບໍ່ຕົກໃນແຮ້ວຂອງປະເທດທີ່ມີລາຍຮັບປານກາງ ແລະ ຫັນເປັນປະເທດເສດຖະກິດພູມປັນຍາຢ່າງຕັ້ງໜ້າ ໂດຍມີການນຳໃຊ້ວິທະຍາສາດ-ເຕັກໂນໂລຊີ ແລະ ແຮງງານມີສີມືເປັນກຳລັງແຮງ ແລະ ພາຫະນະບຸກທະລຸທີ່ມີປະສິດທິຜົນສູງໃນການຊຸກຍູ້ ແລະ ຂັບເຄື່ອນການຜະລິດ ຂອງທຸກຂະແໜງ ການ; ມີພື້ນຖານການຜະລິດ ການບໍລິການທີ່ໜັກແໜ້ນມີປະສິດທິພາບ ແລະ ປະສິດທິຜົນສູງ, ສາມາດເຊື່ອມຈອດກັບເຄືອຂ່າຍການຜະລິດ ແລະ ການບໍລິການຂອງພາກພື້ນ ແລະ ສາກົນໄດ້; ມີຮູບການບໍລິການຂົນສົ່ງຜູ້ໂດຍສານ ແລະ ສິນຄ້າທີ່ທັນສະໄໝເຊື່ອມໂຍງກັບແລວທາງການຂົນສົ່ງຂອງພາກພື້ນ, ການຫັນເປັນອຸດສາຫະກໍາ ແລະ ທັນສະໄໝສາມາດນຳຜົນປະໂຫຍດ ແລະ ເຮັດໃຫ້ຄຸນນະພາບຊີວິດ ແລະ ສະພາບແວດລ້ອມການດໍາລົງຊີ ວິດຂອງປະຊາຊົນດີຂຶ້ນ”.

ຂ່າວ: ສະພາທິດສະດີສູນກາງພັກ

ພາບ: ແສງຈັນ

ໃນຕອນເຊົ້າຂອງວັນທີ 7 ພະຈິກ 2022, ທີ່ ກະຊວງການຕ່າງປະເທດ, ທ່ານ ສະ ເຫຼີມໄຊ ກົມມະສິດ, ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນ ທະນາຄານສິນເຊື່ອ ແລະ ນັກທຸລະກິດ-ຜູ້ປະກອບການ ແຫ່ງ ສະມາພັນທະລັດ ສະວິດ, ນຳໂດຍ ທ່ານ ອັງເດຣອາ ເກເບີ (Andreas Gerber), ຜູ້ຈັດການ ແລະ ຫົວໜ້າທະນາຄານ ວິສາຫະກິດ ແລະ ດຣ. ອົ້ວ ບຸດສ໌ມານ (Dr. Urs Buchmann), ຮອງປະທານ ຂອງ Credit Suisse ປະຈໍາ ເຂດປົກຄອງພິເສດ ຮົງກົງ, ສປ. ຈີນ (Hong Kong) Ltd.

ໃນການພົບປະຄັ້ງນີ້, ສອງຝ່າຍ ໄດ້ແຈ້ງໃຫ້ກັນຊາບໂດຍຫຍໍ້ ກ່ຽວກັບ ສະພາບ ການພາຍໃນປະເທດຂອງຕົນ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດ ລາວ-ສະວິດ ຊຶ່ງເຫັນໄດ້ວ່າ ນັບຕັ້ງແຕ່ ສປປ ລາວ ແລະ ສະມາພັນທະລັດ ສະ ວິດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 4 ກັນຍາ 1963 ເປັນຕົ້ນມາ, ສອງປະເທດ ໄດ້ມີການພົວພັນຮ່ວມ ມືທີ່ດີນໍາກັນ ແລະ ສືບຕໍ່ເຕີບໃຫຍ່ຂະ ຫຍາຍຕົວຂຶ້ນເລື້ອຍໆ, ຊຶ່ງປີ 2023 ນີ້ ແມ່ນຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ ແລະ ສະວິດ. ສະວິດ ແລະ ສປປ ລາວ ແມ່ນມີທີ່ຕັ້ງພູມສັນຖານລັກສະນະຄ້າຍຄືກັນ ຄື ເປັນປະເທດທີ່ ບໍ່ມີຊາຍແດນຕິດຈອດກັບທະເລ. ສອງປະເທດ ລາວ ແລະ ສະວິດ ໄດ້ມີການພົວພັນຮ່ວມມືກັນໃນຫຼາຍຂົງເຂດ ທັງໃນຂອງສອງຝ່າຍ ແລະ ຫຼາຍຝ່າຍ, ເຊິ່ງ ສະວິດ ໄດ້ໃຫ້ການຊ່ວຍເຫຼືອແກ່ ສປປ ລາວ ນັບແຕ່ປີ 2006-2021 ລວມມູນຄ່າທັງໝົດ 224,6 ລ້ານຝຣັ່ງສະວິດ (ປະມານ 242 ລ້ານໂດລາສະຫະລັດ). ປະຈຸບັນ, ສະວິດ ໄດ້ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ສໍາລັບສົກປີ 2022-2025 ມູນຄ່າປະມານ 60 ລ້ານຝຣັ່ງສະວິດ, ໂດຍສຸມໃສ່ 3 ຂົງເຂດ ຄື:

1) ຂົງເຂດພັດທະນາເສດຖະກິດແບບມີສ່ວນຮ່ວມ,

2) ຂົງເຂດການປ່ຽນແປງດິນຟ້າອາກາດ ແລະ ການຄຸ້ມຄອງຊັບພະຍາກອນທໍາມະຊາດ ແລະ

3) ຂົງເຂດການປົກຄອງ ແລະ ການມີສ່ວນຮ່ວມຂອງປະຊາຊົນ, ເຊິ່ງມີເປົ້າໝາຍແນໃສ່ປະກອບສ່ວນເພື່ອຫຼຸດຜ່ອນຄວາມທຸກຍາກ, ສະໜັບສະໜູນການພັດທະນາແບບຍືນຍົງ ແລະ ສົ່ງເສີມການຄຸ້ມຄອງພາກລັດໃນ ສປປ ລາວ.

ພ້ອມກັນນັ້ນ, ຄະນະຜູ້ແທນທະນາຄານສິນເຊື່ອ ແລະ ນັກທຸລະກິດ-ຜູ້ປະກອບການ ແຫ່ງ ສະມາພັນທະລັດ ສະວິດ ໄດ້ມີຄວາມສົນໃຈຂໍຊາບ ກ່ຽວກັບ ການພັດທະນາຂອງ ສປປ ລາວ ເປັນຕົ້ນ ໃນຂະແຫນງການສຶກສາ ກໍ່ຄື ການພັດທະ ນາຊັບພະຍາກອນມະນຸດ, ອຸດສາຫະກຳປຸງແຕ່ງອາຫານໃນຂະແໜງກະສິກຳ ແລະ ອື່ນໆ ເພື່ອສຶກສາຊ່ອງທາງໃນການຂະ ຫຍາຍການຮ່ວມມືທາງດ້ານການຄ້າ ແລະ ການລົງທຶນ ໃນ ສປປ ລາວ ໃຫ້ຫຼາຍຂຶ້ນ. ໃນໂອກາດນີ້, ທ່ານ ຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ກໍ່ໄດ້ແຈ້ງໃຫ້ຄະນະຜູ້ແທນດັ່ງກ່າວ ຊາບໂດຍຫຍໍ້ ກ່ຽວກັບ ຍຸດທະສາດໄລຍະຍາວຂອງ ສປປ ລາວ ກໍ່ຄື ແຜນການພັດທະນາເສດ ຖະກິດ-ສັງຄົມຂອງລາວ 5 ປີ (2022- 2025) ທີ່ສຸມໃສ່ເສດຖະກິດສີຂຽວ ແລະ ສະອາດເພື່ອແນໃສ່ການພັດທະນາແບບຍືນຍົງ, ເສີມຂະຫຍາຍຂະແໜງການຄ້າ ແລະ ການບໍລິການ, ການລົງທຶນດ້ານກະສິກຳ ຢູ່ ສປປ ລາວ ແລະ ໄດ້ຢ້ຳວ່າ ວຽກງານການພັດທະນາຂະແໜງສຶກສາ ກໍ່ຄື ການພັດທະນາຊັບພະນາກອນມະ ນຸດ ແມ່ນເປັນວຽກບູລິມະສິດຂອງລັດຖະບານລາວ. ນອກຈາກນັ້ນ, ຍັງແຈ້ງໃຫ້ຊາບວ່າ ສປປ ລາວ ແມ່ນຫັນເປັນທັນສະໄໝໂດຍມີການປະຕິຮູບຫັນຈາກການເປັນປະເທດທີ່ບໍ່ມີຊາຍແດນຕິດກັບທະເລ ກາຍເປັນສູນກາງທາງຜ່ານໃຫ້ແກ່ການຂົນສົ່ງສິນຄ້າ ແລະ ການບໍລິການຕ່າງໆ ຊຶ່ງເປົ້າໝາຍແນໃສ່ເພື່ອໃຫ້ປະ ເທດຊາດຫຼຸດພົ້ນອອກຈາກສະຖາ ນະພາບດ້ອຍພັດທະນາໃນປີ 2026.

ໃນໂອກາດນີ້, ທ່ານ ຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ໄດ້ສະເໜີໃຫ້ຄະນະຜູ້ແທນ ສະວິດ ຊ່ວຍໂຄສະນາ ແລະ ຊຸກຍູ້ຂົນຂວາຍບັນດານັກທຸລະກິດ ແລະ ນັກທ່ອງທ່ຽວສະວິດ ໃຫ້ເຂົ້າມາລົງທຶນ ແລະ ທ່ອງທ່ຽວຢູ່ ສປປ ລາວ ໃຫ້ນັບມື້ນັບຫຼາຍຂຶ້ນ, ສືບຕໍ່ຊຸກຍູ້ການພົບ ປະແລກປ່ຽນຂອງຄະນະຜູ້ແທນ ແລະ ຜູ້ປະກອບການ ລະຫວ່າງ ສອງປະເທດ ລາວ-ສະວິດ ຕື່ມອີກ. ພ້ອມທັງ ໄດ້ສະ ແດງຄວາມດີໃຈ ແລະ ຂອບໃຈ ຄະນະຜູ້ແທນດັ່ງກ່າວທີ່ມີຄວາມສົນໃຈມາສຶກສາທີ່ຈະລົງທຶນຢູ່ ສປປ ລາວ.

ສຸດທ້າຍນີ້, ດຣ. ອົ້ວ ບຸດສ໌ມານ ໄດ້ຕາງໜ້າໃຫ້ແກ່ ຄະນະຜູ້ແທນ ທະນາ ຄານສິນເຊື່ອ ແລະ ນັກທຸລະກິດ-ຜູ້ປະກອບການ ສະວິດ ສະແດງຄວາມຂອບໃຈຕໍ່ ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍຕໍ່ ຜົນສໍາເລັດຂອງການພັດທະນາເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ ແລະ ຊົມເຊີຍ ທີ່ ສປປ ລາວ ມີແຜນທີ່ຈະນໍາພາປະເທດຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2026.

ຂ່າວ-ພາບ: ກົມການຂ່າວ ກະຊວງການຕ່າງປະເທດ

ໃນວັນທີ 10 ພະຈິກ 2022 ທີ່ ພະນົມ ເປັນ, ຣາຊະອານາຈັກ ກໍາປູເຈຍ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສະພາປະ ຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 25 ໂດຍການເປັນປະທານຂອງກໍາປູເຈຍ. ກອງປະຊຸມ ໄດ້ຮັບຊາບຄວາມຄືບໜ້າວຽກງານຂອງບັນດາຂະແໜງການພາຍ ໃຕ້ເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ ແລະ ຜົນການຈັດ ຕັ້ງປະຕິບັດແຜນແມ່ບົດປະຊາຄົມການເມືອງ-ຄວາມໝັ້ນຄົງອາຊຽນ 2025 ເຊິ່ງມາຮອດປັດຈຸບັນສາມາດຈັດຕັ້ງປະຕິ ບັດໄດ້ 285 ກິດຈະກໍາ ຈາກຈໍານວນທັງໝົດ 290 ກິດຈະກໍາ ຫຼື ປະຕິບັດໄດ້ 98%. ພ້ອມກັນນີ້, ກອງປະຊຸມ ກໍໄດ້ຊຸກຍູ້ໃຫ້ຂະແໜງການຕ່າງໆ ຂອງເສົາຄໍ້າປະຊາ ຄົມການເມືອງ-ຄວາມໝັ້ນຄົງອາຊຽນ ສືບຕໍ່ຈັດຕັ້ງປະຕິບັດບັນດາກິດຈະກຳທີ່ຍັງຄົງຄ້າງໃຫ້ສຳເລັດຕາມຄາດໝາຍ.

ຫລັງຈາກນັ້ນ ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ກໍໄດ້ສືບຕໍ່ນໍາພາຄະນະຜູ້ແທນລາວເຂົ້າຮ່ວມກອງປະຊຸມສະພາປະສານງານອາຊຽນ ຄັ້ງທີ 31 ໂດຍການເປັນປະທານຂອງກໍາປູເຈຍ. ກອງປະຊຸມ ໄດ້ຮັບຊາບຄວາມຄືບໜ້າຂອງການຈັດຕັ້ງປະຕິບັດບູລິມະສິດພາຍ ໃຕ້ການເປັນປະທານອາຊຽນຂອງກໍາປູເຈຍ ໂດຍສະເພາະແມ່ນຖະແຫຼງການຜູ້ນໍາອາຊຽນ ຄົບຮອບ 55 ປີ ແຫ່ງການສ້າງຕັ້ງອາຊຽນ ແລະ ຖະແຫຼງການວິໄສທັດຜູ້ນໍາອາຊຽນ ວ່າດ້ວຍອາຊຽນແກ້ໄຂບັນດາສິ່ງທ້າທາຍຮ່ວມກັນ, ແລະ ການຮ່າງວິໄສທັດປະຊາຄົມອາຊຽນ ຫຼັງປີ 2025 ເຊິ່ງປັດຈຸບັນຄະນະສະເພາະກິດລະດັບສູງ ວ່າດ້ວຍວິໄສທັດປະຊາຄົມອາຊຽນ ຫຼັງປີ 2025 ໄດ້ສໍາເລັດການຮ່າງອົງປະກອບຫຼັກຂອງວິໄສທັດດັ່ງກ່າວ ແລະ ຈະສືບຕໍ່ປຶກສາຫາລື ລວມທັງການສ້າງເອກະສານກ່ຽວຂ້ອງໃຫ້ສໍາເລັດໃນປີ 2025.

ພ້ອມກັນນັ້ນ, ກອງປະຊຸມ ຍັງໄດ້ຮັບຊາບຄວາມຄືບໜ້າໃນການຈັດຕັ້ງປະຕິ ບັດບັນດາຂໍ້ລິເລີ່ມອາຊຽນ ເພື່ອຮັບມືກັບພະຍາດໂຄວິດ-19 ເປັນຕົ້ນແມ່ນການຟື້ນຟູຈາກຜົນກະທົບຂອງພະຍາດໂຄວິດ-19 ໂດຍຜ່ານການຈັດຕັ້ງປະຕິບັດແຜນຟື້ນຟູຮອບດ້ານອາຊຽນ ແລະ ໄດ້ຊຸກຍູ້ໃຫ້ຂະ ແໜງສາທາລະນະສຸກອາຊຽນ ເລັ່ງລັດການປຶກສາຫາລືຂໍ້ຕົກລົງກ່ຽວກັບການສ້າງຕັ້ງສູນອາຊຽນ ເພື່ອແກ້ໄຂເຫດສຸກ ເສີນດ້ານສາທາລະນະສຸກ ແລະ ພະຍາດລະບາດ ໃຫ້ສໍາເລັດໂດຍໄວ ເພື່ອໃຫ້ສູນດັ່ງກ່າວສາມາດປະຕິບັດງານໄດ້. ນອກຈາກນັ້ນ, ກອງປະຊຸມ ຍັງໄດ້ຮັບຊາບບັນດາບົດລາຍງານທີ່ກ່ຽວຂ້ອງ ເພື່ອນໍາສະເໜີໃຫ້ກອງປະຊຸມສຸດຍອດອາຊຽນ ຄັ້ງທີ 40 ແລະ 41 ພິຈາລະນາຮັບຮອງ ແລະ ຮັບຊາບ.

ຂ່າວ-ພາບ: ກົມການຂ່າວ ກະຊວງການຕ່າງປະເທດ

ວັນທີ 10 ພະຈິກນີ້, ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ຈັດໂດຍສະມາຄົມນັກປະພັນລາວ ຮ່ວມກັບສະຖານີວິທະຍຸ-ໂທລະພາບສູນກາງຈີນ (CMG) ປະຈໍາລາວ ນໍາໂດຍທ່ານ ທອງໃບ ໂພທິສານ ຫົວໜ້າສະມາຄົມນັກປະພັນລາວ ແລະ ທ່ານ ນາງ ແສງແກ້ວ ຫົວໜ້າ CMG ປະຈໍາລາວ ປະກອບມີນັກຂຽນ, ນັກແຕ້ມ, ນັກຖ່າຍພາບ ຈໍານວນ 30 ທ່ານ ໄດ້ເລີ່ມລົງເຄື່ອນໄຫວເກັບກໍາຂໍ້ມູນຢູ່ທີ່ສະຖານີບໍາລຸງຮັກສາ ແລະ ສ້ອມແປງຫົວຈັກລົດໄຟຂົນສົ່ງວຽງຈັນໃຕ້ ໂດຍການຕ້ອນຮັບຂອງທ່ານ ຫວາງຊ່າວຕົງ (wang shao dong ) ຫົວໜ້າພະແນກສ້ອມແປງຫົວຈັກ ແລະ ເດີນລົດໄຟ.

ທ່ານ ຫວາງຊ່າວຕົງ ໄດ້ລາຍງານສະພາບລວມໂດຍຫຍໍ້ວ່າ: ສະຖານີດັ່ງກ່າວເປັນບ່ອນບໍາລຸງຮັກສາ ແລະ ສ້ອມແປງຫົວຈັກລົດໄຟ ທັງເປັນບ່ອນຝຶກອົບຮົມໃຫ້ແກ່ພະນັກງານລາວ ໄດ້ຮຽນຮູ້ເຕັກນິກວິຊາການກ່ຽວກັບການສ້ອມແປງ ເຊິ່ງປະກອບມີ: ການຝຶກອົບຮົມກ່ຽວກັບຫົວຈັກລົດໄຟ ໂດຍຈະມີລະບົບຕິດຕາມກວດເຊັກຄວາມປອດໄພຂອງຫົວຈັກລົດໄຟທຸກຄັ້ງກ່ອນຈະເດີນທາງ ເພື່ອຮັບປະກັນຄວາມພ້ອມກ່ອນການເດີນລົດ. ສະເພາະພະແນກສ້ອມແປງຫົວຈັກລົດໄຟ ມີພະນັກງານທັງໝົດ ເກືອບ 300​ ຄົນ, ໃນນັ້ນມີຄົນລາວ 164 ຄົນ.

ຕອນບ່າຍມື້ດຽວກັນ, ທີມງານກໍໄດ້ລົງສໍາພາດພະນັກງານລາວ ທີ່ເຮັດວຽກຢູ່ ພະແນກການສື່ສານທາງລົດໄຟ, ສາຍໄຟສັນຍານສັບລາງ, ເສັ້ນທາງລົດໄຟ, ສາຍໄຟເທິງລາງລົດ ຂອງສະຖານີບໍາລຸງຮັກສາ ແລະ ສ້ອມແປງຫົວຈັກລົດໄຟຂົນສົ່ງວຽງຈັນໃຕ້ ນອກຈາກນີ້, ໃນວັນທີ 11 ພະຈິກ ທີມງານຍັງຈະສືບຕໍ່ລົງເຄື່ອນໄຫວຢູ່ທີ່ບໍລິສັດເສັ້ນທາງລົດໄຟເລກ 2 ແລະບັນດາແຂວງທີ່ມີລົດໄຟລາວ-ຈີນແລ່ນຜ່ານ.

ວິທະຍຸກະຈາຍສຽງຫວຽດນາມລາຍງານວ່າ: ໂດຍໄດ້ຮັບຄຳເຊື້ອເຊີນຂອງ ສົມເດັດ ເຕໂຈ ຮຸນ ແຊນ ນາຍົກລັດຖະມົນຕີ ຣາຊະອານາຈັກກຳປູເຈຍ, ປະທານອາຊຽນ 2022, ໃນວັນທີ 8 ພະຈິກ ຜ່ານມາ, ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ນຳພາຄະນະຜູ້ແທນຂັ້ນສູງຫວຽດນາມ ເດີນທາງຢ້ຽມຢາມຣາຊະອານາຈັກກຳປູເຈຍ ໃນລະຫວ່າງວັນທີ 8 – 9 ພະຈິກ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 40, 41 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ໃນລະຫວ່າງວັນທີ 10 – 13 ພະຈິກ.

ຂ່າວລະບຸວ່າ: ການຢ້ຽມຢາມຄັ້ງນີ້ ຂອງທ່ານ ຟ້າມມິງຈິງ ໃນປີສາມັກຄີມິດຕະພາບ ຫວຽດນາມ – ກຳປູເຈຍ 2022 ໄດ້ປະກອບສ່ວນພັດທະນາການພົວພັນຖານບ້ານໃກ້ເຮືອນຄຽງອັນດີງາມ, ມິດຕະ ພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານລະຫວ່າງສອງປະເທດ, ພ້ອມທັງສະແດງໃຫ້ເຫັນການສະໜັບສະໜູນຂອງຫວຽດນາມ ຕໍ່ບັນດາການເຄື່ອນໄຫວ ໃນປີກຳປູເຈຍຮັບດຳລົງຕຳແໜ່ງເປັນປະທານອາຊຽນ 2022.

ພ້ອມກັນນັ້ນ, ໃນການເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 40, 41 ແລະ ບັນດາກອງປະຊຸມທີ່ກ່ຽວຂ້ອງ ຂອງທ່ານ ຟ້າມມິງຈິງ ໄດ້ສະແດງໃຫ້ເຫັນວ່າ ຫວຽດນາມມີຄວາມເປັນເຈົ້າການ, ຕັ້ງໜ້າ, ປະກອບສ່ວນຢ່າງມີຄວາມຮັບຜິດຊອບ, ພ້ອມກັບບັນດາສະມາຊິກ ຮັກສາ ແລະ ປັບປຸງບົດບາດເປັນໃຈກາງ ແລະ ເສີມຂະຫຍາຍຄວາມຮັບຜິດຊອບຕໍ່ສັນຕິພາບ, ສະຖຽນລະພາບ ແລະ ການພັດທະນາ.

ວິທະຍຸກະຈາຍສຽງຫວຽດນາມລາຍງານວ່າ: ໃນຂອບເຂດການເຮັດວຽກມື້ທີ 2 ຂອງກອງປະຊຸມ ຄັ້ງທີ 27 ບັນດາຝ່າຍເຂົ້າຮ່ວມສົນທິສັນຍາແມ່ ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP27) ທີ່ດຳເນີນຢູ່ປະເທດເອຢິບ ໃນວັນທີ 7 ພະຈິກ ຜ່ານມາ, ທ່ານ ອັນໂຕນີໂອ ກູເຕີເຣສ ເລຂາທິການໃຫຍ່ ສປຊ ໄດ້ກ່າວປາໄສເນັ້ນໜັກກ່າວເຕືອນກ່ຽວກັບສະພາບການວິກິດການທາງດ້ານດິນຟ້າອາກາດໃນປັດຈຸບັນ ແລະ ກ່າວເຕືອນ ບັນດາປະເທດພວມຢືນຢູ່ຕໍ່ໜ້າການເລືອກເຟັ້ນທີ່ຮ້າຍແຮງ ລະຫວ່າງ ຝ່າຍໜຶ່ງແມ່ນການຮ່ວມມືເພື່ອຫຼຸດຜ່ອນການປ່ອຍອາຍພິດລົງ ແລະ ຝ່າຍໜຶ່ງແມ່ນພວມເຮັດໃຫ້ອະນາຄົດຕົກເຂົ້າສູ່ໄພພິບັດດ້ານດິນຟ້າອາກາດ.

ຂ່າວລະບຸວ່າ: ທ່ານ ອັນໂຕນີໂອ ກູເຕີເຣສ ຮຽກຮ້ອງໃຫ້ຕ້ອງມີສົນທິສັນຍາລະຫວ່າງບັນດາປະເທດຮັ່ງມີ ແລະ ບັນດາປະເທດທີ່ທຸກຍາກ ເພື່ອຊຸກຍູ້ໄວວິວັດການຫັນປ່ຽນຈາກເຊື້ອໄຟຟອດຊິວ ແລະ ເພີ່ມຄວາມໄວໃນການແຈກຢາຍແຫຼ່ງການເງິນທີ່ຈຳເປັນເພື່ອຮັບປະກັນວ່າ ບັນດາປະເທດທີ່ທຸກຍາກຈະຫຼຸດຜ່ອນການປ່ອຍອາຍພິດ ແລະ ຮັບມືກັບບັນດາຜົນກະທົບທີ່ບໍ່ສາມາດຫຼີກລ່ຽງໄດ້ຂອງສະພາບການໂລກອຸ່ນຂຶ້ນໃນປັດຈຸບັນ. ທ່ານຍັງຮຽກຮ້ອງໃຫ້ບັນດາປະເທດເຫັນດີເປັນເອກະພາບຢຸດຕິການນຳໃຊ້ຖ່ານຫີນໃນຂອບເຂດທົ່ວໂລກ ໃນປີ 2040 ຊຶ່ງແມ່ນໜຶ່ງໃນບັນດາເຊື້ອໄຟທີ່ມີທາດກາກບອນຫຼາຍທີ່ສຸດ. ໃນນັ້ນ, ບັນດາປະເທດສະມາຊິກອົງການຮ່ວມມື ແລະ ພັດທະນາເສດຖະກິດ (OECD) ອາດຈະບັນລຸໄດ້ເປົ້າໝາຍດັ່ງກ່າວໄວກວ່າແມ່ນໃນປີ 2030.

ໃນວັນດຽວກັນ, ທ່ານນາງ ຄຣິສຕາລິນາ ຈໍເຈຍວາ ຜູ້ອຳນວຍການໃຫຍ່ ກອງທຶນການເງິນສາກົນ (IMF) ໃຫ້ຮູ້ວ່າ: ຕ້ອງກຳນົດລາຄາກາກບອນ ສະເລ່ຍຢ່າງໜ້ອຍສຸດແມ່ນ 75 ໂດລາ/ໂຕນ ທົ່ວໂລກ ໃນທ້າຍທົດສະວັດນີ້ ເພື່ອບັນລຸໄດ້ບັນດາເປົ້າໝາຍກ່ຽວກັບການປ່ຽນແປງຂອງດິນຟ້າອາກາດໃນໂລກ.