ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມທາງໄກຂອງລັດຖະບານຫວຽດນາມ ກັບບັນດາທ້ອງຖິ່ນ ແລະ ກອງປະຊຸມປະຈຳເດືອນ ມິຖຸນາ 2022 ຂອງລັດຖະບານຫວຽດນາມ ກ່ຽວກັບສະ ພາບເສດຖະກິດ – ສັງຄົມ ເດືອນ ມິຖຸນາ ແລະ 6 ເດືອນຕົ້ນປີ 2022 ໄດ້ເປີດຂຶ້ນໃນວັນທີ 4 ກໍລະກົດ ຜ່ານມາ. ພາຍໃຕ້ການເປັນປະທານຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ, ຈາກສະ ຖານທີ່ເຊື່ອມຕໍ່ ຮ່າໂນ້ຍ, ກອງປະຊຸມໄດ້ເຊື່ອມຕໍ່ກັບບັນດາສະຖານທີ່ເຊື່ອມຕໍ່ຢູ່ 63 ແຂວງ, ນະຄອນໃນທົ່ວປະເທດ.

ຂ່າວລະບຸວ່າ: ກ່າວຄຳເຫັນທີ່ກອງປະຊຸມ, ທ່ານ ຟ້າມມິງຈິງ ໃຫ້ຮູ້ວ່າ: ເສດຖະກິດ-ສັງຄົມ ຕົ້ນເດືອນມິຖຸນາ ແລະ 6 ເດືອນຕົ້ນປີ 2022 ມີສັນຍານດີໃນຂົງເຂດເກືອບທັງໝົດ, ມີດ້ານບຸກທະລຸ, ສ້າງຂີດໝາຍທີ່ເຂັ້ມຂົ້ນ. ເສດຖະກິດມະຫາພາກໄດ້ຮັບປະກັນລາຍຮັບ – ລາຍຈ່າຍງົບປະມານ, ການສົ່ງອອກ-ນຳເຂົ້າ, ການສະໜອງ ແລະ ຄວາມຕ້ອງການດ້ານແຮງງານ, ພະລັງງານ ແລະ ທັນຍາຫານ. ຂົງ ເຂດອຸດສາຫະກຳໄດ້ເຕີບໂຕ, ການບໍລິການຟື້ນຟູ ແລະ ຂະແໜງກະສິກຳພັດທະນາຢ່າງມີສະຖຽນລະພາບ. ລະດັບການເຕີບໂຕດ້ານເສດຖະກິດສູງພໍສົມຄວນ, ພິເສດແມ່ນໃນໄຕມາດ II ມີລະດັບການເຕີບໂຕສູງສຸດໃນຮອບເວລາ 11 ປີຜ່ານມາ.

ໃນໄລຍະຈະມາເຖິງ, ຄາດວ່າຈະຍັງມີຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ດັ່ງນັ້ນຄວນມີຄວາມຕັດສິນໃຈສູງກວ່າເກົ່າ, ມີຄວາມພະຍາຍາມຫຼາຍຂຶ້ນກວ່າເກົ່າ, ປະຕິບັດດ້ວຍຄວາມຮັບຜິດຊອບ, ມີປະສິດທິຜົນຈຶ່ງຈະບັນລຸໄດ້ບັນດາຄາດໝາຍ, ໜ້າທີ່ທີ່ໄດ້ວາງອອກໃນປີ 2022 ແລະ ໄລຍະ 2021 – 2025. ທ່ານ ຟ້າມມິງຈິງ ສະເໜີວ່າ: ເນື້ອໃນຈິດໃຈແມ່ນປຶກສາຫາລືຢ່າງກົງໄປກົງມາ, ຊີ້ແຈ້ງບັນດາວຽກງານທີ່ໄດ້ເຮັດແລ້ວ ແລະ ບໍ່ທັນເຮັດໄດ້ໃນ 6 ເດືອນຕົ້ນປີ; ຮັບຮູ້ຢ່າງພາວະວິໄສກ່ຽວກັບບັນຫາ ໝາກຜົນ, ສາເຫດ, ເປັນຕົ້ນແມ່ນສາເຫດອັດຕະວິໄສ, ບົດຮຽນ, ຄວາມຫຍຸ້ງຍາກ, ສິ່ງທ້າທາຍຕົ້ນຕໍໃນປັດຈຸບັນ. ພິເສດ, ບັນດາທ້ອງຖິ່ນຄວນແບ່ງປັນບັນດາບົດຮຽນທີ່ດີ ກໍ່ຄືສະເໜີບັນດາມາດຕະການແກ້ໄຂຄວາມຫຍຸ້ງຍາກ, ສິ່ງຕິດຂັດ ແລະ ບັນດາຈຸດສຸມໃນໄລຍະຈະມາເຖິງ.

ລາຍງານທີ່ກອງປະຊຸມ, ທ່ານ ຫງວຽນຈີ້ຢຸງ ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ເສດຖະກິດມະຫາພາກສືບຕໍ່ເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ໄດ້ຮັບການຕີລາສູງຈາກປະຊາຄົມສາກົນ. ສະເລ່ຍ 6 ເດືອນຕົ້ນປີ, ຄາດວ່າລະດັບເຕີບໂຕ GDP ຈະບັນລຸ 6,42% ເມື່ອທຽບໃສ່ໄລຍະດຽວກັນຂອງປີກ່ອນ, ສູງກວ່າເມື່ອທຽບໃສ່ແຜນການ, ເທົ່າກັບລະດັບສະເລ່ຍຂອງຊຸມປີກ່ອນເກີດພະຍາດລະບາດ ໂຄວິດ-19.

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 5 ກໍລະກົດ 2022 ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ກະຊວງພະລັງງານ ແລະ ບໍ່ແຮ່ (ພບ) ໄດ້ສະເໜີຮ່າງກົດໝາຍວ່າດ້ວຍຄວາມປອດໄພຂອງເຂື່ອນ (ສ້າງໃໝ່) ເພື່ອໃຫ້ສະມາຊິກສະພາແຫ່ງຊາດ (ສສຊ) ພິຈາລະນາ.

ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ສະເໜີຮ່າງກົດໝາຍ ວ່າດ້ວຍຄວາມປອດໄພຂອງເຂື່ອນໃຫ້ຮູ້ວ່າ: ປັດຈຸບັນ ສປປ ລາວ ມີແຫຼ່ງຜະລິດໄຟຟ້າທັງໝົດ 90 ແຫ່ງ, ມີກໍາລັງຕິດຕັ້ງທັງໝົດ 10.956,14 ເມກາວັດ, ສາມາດຜະລິດພະລັງງານໄຟຟ້າໄດ້ເຖິງ 56.027,07 ລ້ານກິໂລວັດໂມງຕໍ່ປີ, ສາມາດສ້າງລາຍຮັບເຂົ້າງົບປະມານແຫ່ງລັດ ແລະ ພັດທະນາພື້ນຖານໂຄງລ່າງ, ສ້າງວຽກເຮັດງານທໍາໃຫ້ແກ່ຊຸມຊົນ, ທ້ອງຖິ່ນ ແລະ ສັງຄົມໄດ້ຫຼາຍພໍສົມຄວນ.

ໄລຍະຜ່ານມາ, ການຄຸ້ມຄອງດ້ານຄວາມປອດໄພຂອງເຂື່ອນ ເລີ່ມແຕ່ຂັ້ນຕອນການສໍາຫຼວດ,ອອກແບບ, ກໍ່ສ້າງ ແລະ ດໍາເນີນການ ຍັງບໍ່ທັນມີກົດໝາຍໃດເພື່ອມາຄຸ້ມຄອງເປັນອັນສະເພາະ, ສ່ວນຫຼາຍຈະເນັ້ນໃສ່ແຕ່ເຕັກນິກຂອງການກໍ່ສ້າງ, ບໍ່ໄດ້ເນັ້ນສະເພາະຄວາມປອດໄພຂອງການພັດທະນາ ແລະ ການນໍາໃຊ້ເຂື່ອນ, ຜ່ານມາແມ່ນອີງໃສ່ກົດໝາຍວ່າດ້ວຍໄຟຟ້າ, ກົດໝາຍດ້ານສິ່ງແວດລ້ອມ ແລະ ນິຕິກຳອື່ນໆທີ່ກ່ຽວຂ້ອງ ເພື່ອເປັນບ່ອນອີງໃນການຈັດຕັ້ງປະຕິບັດ, ແຕ່ສັງເກດວ່າ ມີເນື້ອໃນບໍ່ຄົບຖ້ວນ, ບໍ່ຈະແຈ້ງ, ບໍ່ຮັດກຸມ. ສະນັ້ນ ຈຶ່ງມີຄວາມຫຍຸ້ງຍາກໃນການຄຸ້ມຄອງ ເຮັດໃຫ້ຜູ້ລົງທຶນສວຍໃຊ້ຊ່ອງວ່າງ ມີລັກສະນະລະເມີດ ຫຼື ເມີນເສີຍ, ບໍ່ເອົາໃຈໃສ່ຕໍ່ມາດຕະການຮັກສາຄວາມປອດໄພຂອງເຂື່ອນ ຈຶ່ງເປັນສາເຫດເຮັດໃຫ້ເຂື່ອນຂະໜາດນ້ອຍແຕກພັງຢູ່ແຂວງຊຽງຂວາງໄລຍະຜ່ານມາ ແລະ ທີ່ຮ້າຍແຮງກວ່ານັ້ນ ແມ່ນການແຕກພັງຂອງຄູກັນນໍ້າດີ D ຂອງໂຄງການເຂື່ອນເຊປຽນ-ເຊນໍ້ານ້ອຍ ທີ່ເກີດຂຶ້ນໃນປີ 2018, ຈາກເຫດການດັ່ງກ່າວ ກະຊວງພະລັງງານ ແລະ ບໍ່ແຮ່ ໄດ້ດໍາເນີນການສໍາຫຼວດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1815/ຫສນຍ, 10 ພະຈິກ 2019 ເປັນຕົ້ນ ບັນດາເຂື່ອນໄຟຟ້າຂະໜາດນ້ອຍ-ໃຫຍ່ທີ່ຢູ່ໃນໄລຍະການກໍ່ສ້າງ ແລະ ດໍາເນີນງານ ເພື່ອໃຫ້ປະຕິບັດຕາມມາດຕະຖານເຕັກນິກຂອງການອອກແບບໃຫ້ມີຄວາມປອດໄພ ແລະ ໝັ້ນຄົງ. ສະນັ້ນເຫັນໄດ້ຄວາມສໍາຄັນດັ່ງກ່າວ ພັກ-ລັດ ຈຶ່ງໄດ້້ຊີ້ນໍາໃຫ້ສ້າງກົດໝາຍຂຶ້ນ ເພື່ອຄຸ້ມຄອງວຽກງານຄວາມປອດໄພຂອງເຂື່ອນ ແລະ ອະນຸມັດໃຫ້ກະຊວງພະລັງງານ ແລະ ບໍ່ແຮ່ ສ້າງຕັ້ງກົມຄຸ້ມຄອງຄວາມປອດໄພອຸດສາຫະກໍາພະລັງງານ ເພື່ອຄຸ້ມຄອງ, ຕິດຕາມ, ກວດກາຄວາມປອດໄພຂອງເຂື່ອນ.

ສະມາຄົມເຂື່ອນລາວໄດ້ຮັບການສ້າງຕັ້ງຂຶ້ນ ຊຶ່ງໄດ້ເຂົ້າເປັນສະມາຊິກຂອງອົງການເຂື່ອນໃຫຍ່ສາກົນ ICOLD ເປັນປະເທດ 104 ໃນຄັ້ງວັນທີ 30 ພະຈິກ 2020, ຈຸດປະສົງຂອງການສ້າງຕັ້ງສະມາຄົມ ເພື່ອເປັນການເຕົ້າໂຮມເອົານັກວິຊາການ, ຜູ້ຊ່ຽວຊານທີ່ຊົງຄຸນວຸດທິ, ນິຕິບຸກຄົນ, ການຈັດຕັ້ງ, ຜູ້ປະກອບການ, ນັກຮຽນ, ນັກສຶກສາ, ປັນຍາຊົນ ໃນສາຂາວິຊາຊີບທີ່ຕິດພັນກັບການບໍລິຫານຈັດການເຂື່ອນເຂົ້າມາເປັນສະມາຊິກຂອງສະມາຄົມ ແລະ ຈະເປັນການແລກປ່ຽນປະສົບການ, ຄວາມຮູ້, ຄວາມສາມາດ, ເຕັກໂນໂລຊີ, ຂໍ້ມູນຂ່າວສານຊຶ່ງກັນ ແລະ ກັນ, ເພື່ອເສີມສ້າງຄວາມອາດສາມາດ ໃນການບໍລິຫານ, ຈັດການ ແລະ ຄຸ້ມຄອງເຂື່ອນ ທັງພາກລັດ-ເອກະຊົນ ໃຫ້ມີຄວາມເຂັ້ມແຂງ, ກົມກຽວກັນແຕ່ລະດ້ານ.

ໂຄງປະກອບຂອງຮ່າງກົດໝາຍວ່າດ້ວຍຄວາມປອດໄພຂອງເຂື່ອນສະບັບນີ້ ປະກອບມີ 10 ພາກ, 9 ໝວດ, 72 ມາດຕາ. ພາຍຫຼັງກົດໝາຍດັ່ງກ່າວຖືກຮັບຮອງ ແລະ ປະກາດໃຊ້ແລ້ວ ຄາດວ່າ ຈະມີນິຕິກໍາທີ່ເປັນບ່ອນອີງໃນການຈັດຕັ້ງປະຕິບັດວຽກງານຄວາມປອດໄພຂອງເຂື່ອນ, ສ້າງຄວາມເຊື່ອໝັ້ນໃຫ້ແກ່ພົນລະເມືອງ ແລະ ການຈັດຕັ້ງ, ເຮັດໃຫ້ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ເຂົ້າໃຈເຖິງຄວາມສໍາຄັນ ແລະ ມີສ່ວນຮ່ວມເຂົ້າໃນວຽກງານດັ່ງກ່າວ, ຄາດວ່າ ຈະເຮັດໃຫ້ຜູ້ພັດທະນາເຂື່ອນ ເພີ່ມທະວີຄວາມຮັບຜິດຊອບຂຶ້ນຕື່ມ.

ຫຼັງຈາກນັ້ນ ສສຊ ໄດ້ພ້ອມກັນປະກອບຄຳຄິດເຫັນໃສ່ຮ່າງກົດໝາຍດັ່ງກ່າວ ເພື່ອເຮັດໃຫ້ເນື້ອໃນຮັດກຸມຂຶ້ນ ແລະ ສາມາດຈັດຕັ້ງປະຕິບັດຕົວຈິງໄດ້.

ຂ່າວ: ນາງແສງຈັນ

ວິທະຍຸກະຈາຍສຽງຫວຽດນາມລາຍງານວ່າ: ຫວ່າງບໍ່ດົນມານີ້, ຢູ່ ນິວເດລີ, ອິນເດຍ ແລະ ສະ ຫະພາບເອີຣົບ (EU) ໄດ້ສຳເລັດການເຈລະຈາຮອບທຳອິດ ພາຍຫຼັງຖືກຢຸດສະງັກມາເປັນເວລາ 9 ປີ ກ່ຽວກັບຂໍ້ຕົກລົງການຄ້າ ແລະ ການລົງທຶນສອງຝ່າຍ, ລວມທັງຄຳແນະນຳທາງດ້ານພູມສາດ (GI).

ຂ່າວລະບຸວ່າ: ການເຈລະຈາຮອບຕ່າງໆທີ່ດຳເນີນໃນໜຶ່ງອາທິດຜ່ານມາ ແມ່ນໄດ້ຈັດຂຶ້ນຕາມຮູບ ແບບເຊິ່ງໜ້າສົມທົບກັບແບບທາງໄກ. ໃນການເຈລະຈາຮອບນີ້, ສອງຝ່າຍໄດ້ຈັດກອງປະຊຸມວິຊາການທັງໝົດ 52 ວາລະ ກ່ຽວກັບ 18 ຂົງເຂດນະໂຍບາຍທີ່ກ່ຽວຂ້ອງເຖິງສັນຍາການຄ້າເສລີ (FTA) ແລະ 7 ວາລະປະຊຸມກ່ຽວກັບການອາລັກຂາການລົງທຶນ ແລະ ຄຳແນະນຳທາງດ້ານພູມສາດ.

ວົງເງິນການຄ້າສອງຝ່າຍລະຫວ່າງ ອິນເດຍ ແລະ ອີຢູ ບັນລຸ 116,36 ຕື້ໂດລາ ໃນໄລຍະ 2021 – 2022 ອີຢູ ແມ່ນຄູ່ຮ່ວມມືສຳຄັນອັນດັບສອງຂອງອິນເດຍ ຊຶ່ງຖັດຈາກອາເມຣິກາ ແລະ ແມ່ນຕະຫຼາດທີສອງຂອງບັນດາຜະລິດຕະພັນສົ່ງອອກຂອງ ອິນເດຍ. ຄາດວ່າ, ການເຈລະຈາຮອບທີ 2 ຈະຈັດຂຶ້ນໃນເດືອນ ກັນຍາ 2022 ຢູ່ ບຣຸກແຊນ, ປະເທດ ແບຣນຊິກ.

ຂ່າວສານຊີອາໄອລາຍງານ ເມື່ອປີຫຼັງໆມານີ້ເສດຖະກິດດີຈິຕອນຂອງຈີນພັດທະນາໄປຢ່າງວ່ອງໄວ ຂຶ້ນມາຢູ່ທີ່ອັນດັບທີ 2 ຂອງໂລກຕິດຕໍ່ກັນຫຼາຍປີ. ອີງຕາມສະຖິຕິລະບຸວ່າ ນັບຕັ້ງແຕ່ປີ 2012 ເຖິງປີ 2021 ທີ່ຜ່ານມາ ຂະໜາດເສດຖະກິດດີຈິຕອນຂອງຈີນເພີ່ມຂຶ້ນຈາກ 11 ລ້ານໆຢວນມາເປັນ 45 ລ້ານໆຢວນ ຊຶ່ງອັດຕາສ່ວນເສດຖະກິດດີຈິຕອນໃນໂຕເລກລວມຍອດຜະລິດຕະພັນພາຍໃນປະເທດ (GDP) ເພີ່ມຂຶ້ນຈາກ 21,6% ສູງເຖິງ 39,8%.

ຂະນະທີ່ການກໍ່ສ້າງສາທາລະນະປະໂຫຍດຮູບແບບໃໝ່ ທຸລະກິດດີຈິຕອນກໍພັດທະນາໄປຢ່າງວ່ອງໄວ ນັບເຖິງທ້າຍເດືອນພຶດສະພາໃນປີນີ້ ຈີນໄດ້ສ້າງລະບົບສາທາລະນະປະໂຫຍດເຄືອຂ່າຍທີ່ມີຂະ ໜາດໃຫຍ່ທີ່ສຸດ ແລະ ລະດັບແຖວໜ້າທົ່ວໂລກ ສະຖານີຖານລະບົບ 5G ມີເຖິງ 1.700.000 ແຫ່ງ ຈຳນວນຜູ້ໃຊ້ໂທລະສັບມືຖື 5G ມີເກີນ 420 ລ້ານຄົນ ເມື່ອປີ 2021 ມູນຄ່າເພີ່ມຂອງອຸດສາຫະກຳການຜະລິດອີເລັກໂຕຼນິກເພີ່ມຂຶ້ນ 15,7% ເມື່ອທຽບກັບປີ 2020 ໂດຍອັດຕາການເພີ່ມຖືວ່າເປັນສະຖິຕິສູງທີ່ສຸດໃນໄລຍະ 10 ປີທີ່ຜ່ານມາ ລາຍໄດ້ຈາກທຸລະກິດຊອບແວ ແລະ ການບໍລິການເຕັກໂນໂລຊີຂໍ້ມູນຂ່າວສານເພີ່ມຂຶ້ນ 17,7% ສ່ວນລາຍໄດ້ຈາກວິສາຫະກິດທາງອິນເຕີເນັດ ແລະ ການບໍລິການທີ່ກ່ຽວຂ້ອງເພີ່ມຂຶ້ນ 16,9%.

ຂ່າວຕ່າງປະເທດລາຍງານ ເມື່ອວັນທີ 4 ກໍລະກົດທີ່ຜ່ານມາ, ທະນາຄານກາງອາເມຣິກາ (ເຟດ) ໄດ້ເປີດເຜີຍວ່າ ແບບຈຳລອງການຄາດຄະເນ GDPNow ຫຼ້າສຸດສະແດງໃຫ້ເຫັນວ່າ ເສດຖະ ກິດອາເມຣິກາຫົດຕົວລົງ 2,1% ໃນໄຕມາດທີ 2 ຂອງປີ 2022 ຈາກເດີມທີ່ຊີ້ໃຫ້ເຫັນວ່າ ມີທ່າອ່ຽງຫົດຕົົວ 1%.

ໂຕເລກການຄາດຄະເນ GDPNow ຊີ້ໃຫ້ເຫັນວ່າ ເສດຖະກິດອາເມຣິກາຫົດຕົວໃນໄຕມາດທີ 2 ຢ່າງຮຸນແຮງກວ່າໄຕມາດທຳອິດ ຊຶ່ງຫົດຕົວລົງ 1,6% ແລະ ສະແດງວ່າ ເສດຖະກິດອາເມຣິກາໄດ້ເຂົ້າສູ່ພາວະຖົດຖອຍແລ້ວ ເນື່ອງຈາກເສດຖະກິດຫົດຕົວ 2 ໄຕມາດຕິດຕໍ່ກັນ. ທ່ານ ເຈໂຣມ ພາວເວວ ປະເທດເຟດກ່າວວ່າ ເຟດມີຄວາມມຸ່ງໝັ້ນໃນການສະກັດກັ້ນເງິນເຟີ້ ເຖິງແມ່ນວ່າການໃຊ້ນະໂຍບາຍຄຸມເຂັ້ມທາງດ້ານການເງິນຈະຖ່ວງດຶງການຂະຫຍາຍຕົວທາງດ້ານເສດຖະກິດ ແຕ່ກໍຈະບໍ່ສ້າງຄວາມສ່ຽງທີ່ຮຸນແຮງ.

ກ່ອນໜ້ານີ້, ທ່ານ ພາວເວວ ກ່າວວ່າ ພວກເຮົາມີຄວາມມຸ່ງໝັ້ນທີ່ຈະໃຊ້ເຄື່ອງມືທັງໝົດທີ່ພວກເຮົາມີເພື່ອເຮັດໃຫ້ເງິນເຟີ້ປັບຕົວຫຼຸດລົງ ຊຶ່ງການກະທຳດັ່ງກ່າວກໍຄືການຖ່ວງດຶງການຂະຫຍາຍຕົວທາງດ້ານເສດຖະກິດ ເຖິງແມ່ນວ່າຈະມີຄວາມສ່ຽງ ແຕ່ທ່ານກໍເຫັນວ່ານີ້ບໍ່ແມ່ນຄວາມສ່ຽງທີ່ໃຫຍ່ທີ່ສຸດຕໍ່ເສດຖະກິດ ໂດຍຄວາມຜິດພາດຫຼາຍກວ່າທີ່ອາດຈະເກີດຂຶ້ນກໍຄືຄວາມຫຼົ້ມເຫຼວໃນການຮັກສາສະຖຽນລະພາບໃນການຕ້ານລາຄາ.

ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 56 ແບບທາງໄກ ໄດ້ຈັດຂຶ້ນໃນວັນທີ 5-6 ກໍລະກົດ 2022 ທີ່ ນະຄອນຫລວງວຽງຈັນ ໂດຍການເປັນປະທານຂອງ ທ່ານນາງ ນີວາຢາກີຣີ ອັດຢານີ ຫົວໜ້າຫ້ອງການ ກະຊວງການທ່ອງທ່ຽວ ແລະ ເສດຖະກິດ ປະເທດອິນໂດເນເຊຍ ແລະ ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວລາວ ເປັນຮອງປະທານ.

ກອງປະຊຸມ ໄດ້ທົບທວນການຈັດຕັ້ງປະຕິບັດແຜນການຮ່ວມມື ດ້ານທ່ອງທ່ຽວອາ ຊຽນ ໃນ 6 ຕົ້ນປີ 2022 ເປັນຕົ້ນ ການແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ກ່ຽວກັບນະໂຍບາຍການປ້ອງກັນ ແລະ ສະກັ້ນການແພ່ລະບາດພະຍາດໂຄວິດ-19 ທີ່ສົ່ງຜົນກະທົບຕໍ່ການທ່ອງທ່ຽວ, ນະໂຍບາຍການເປີດປະເທດຄືນໃໝ່ ເພື່ອຕ້ອນຮັບນັກທ່ອງທ່ຽວ ແນໃສ່ຮັບປະກັນທາງດ້ານສຸຂະພາບ ແລະ ຄວາມປອດໄພຂອງນັກທ່ອງທ່ຽວເປັນບັນຫາສໍາຄັນ. ມາຮອດປັດຈຸບັນ ຫລາຍປະເທດສະມາຊິກອາຊຽນ ໄດ້ມີນະໂຍບາຍ ແລະ ມາດຕະການຜ່ອນຜັນ ອໍານວຍຄວາມສະດວກ ໃຫ້ແກ່ການເດີນທາງທ່ຽວພາຍໃນອາຊຽນ ແລະ ການເດີນທາງທ່ຽວຂອງນັກທ່ອງທ່ຽວສາກົນ ເຂົ້າ-ອອກປະເທດ.

ຂະແໜງການທ່ອງທ່ຽວອາຊຽນ ສືບຕໍ່ຮ່ວມກັນຈັດຕັ້ງແຜນປະຕິບັດງານ ເພື່ອຟື້ນຟູການທ່ອງທ່ຽວທີ່ຖືກຮັບຮອງໃນຕົ້ນປີ 2022 ໃຫ້ເກີດເປັນຮູບປະທໍາ ໂດຍສົມທົບກັບຂະ ແໜງການທີ່ກ່ຽວຂ້ອງ ລວມທັງຜູ້ປະກອບການທຸລະກິດທ່ອງທ່ຽວ ເພື່ອເຮັດໃຫ້ການທ່ອງ ທ່ຽວກັບຄືນມາສູ່ສະພາບປົກກະຕິ ແລະ ເພື່ອດຶງດູດນັກທ່ອງທ່ຽວໃຫ້ມາທ່ຽວນັບມື້ເພີ່ມຂຶ້ນ. ພ້ອມນີ້ ຈະສຸມໃສ່ສ້າງຜະລິດຕະພັນການທ່ອງທ່ຽວ ທີ່ມີຄວາມຫລາກຫລາຍ, ສົ່ງເສີມວຽກງານໂຄສະນາການຕະຫລາດ, ມາດຕະຖານການທ່ອງທ່ຽວ, ການທ່ອງທ່ຽວເຊື່ອມຈອດ, ຫັນການທ່ອງທ່ຽວທາງດ້ານດີຈິຕອນ ເພື່ອໃຫ້ນັກທ່ອງທ່ຽວມີຄວາມສະດວກ ໃນການເຂົ້າເຖິງຂໍ້ມູນຂ່າວສານ. ນອກນີ້, ຂະແໜງການທ່ອງທ່ຽວຈະສືບຕໍ່ຮ່ວມມືກັບບັນປະເທດຄູ່ເຈລະຈາ ແລະ ການຮ່ວມກັບ ບັນດາອົງການຈັດຕັ້ງສາກົນ ແນໃສ່ເຮັດໃຫ້ການທ່ອງທ່ຽວອາຊຽນ ມີຄວາມເຂັ້ມແຂງ ແລະ ສ້າງເງື່ອນໄຂອໍານວຍຄວາມສະດວກ ໃຫ້ແກ່ການເດີນ ທາງທ່ອງທ່ຽວໄປ-ມາຫາສູ່ກັນ ມີຄວາມສະດວກຫລາຍຂຶ້ນ.

ໃນຕົ້ນປີ 2022, ລັດຖະບານລາວ ໄດ້ມີນະໂຍບາຍເປີດການທ່ອງທ່ຽວ ໃນຮູບແບບ ເຂດການທ່ອງທ່ຽວສີຂຽວ ໂດຍໃຫ້ມີການບໍລິການຂອງ ບໍລິສັດທ່ອງທ່ຽວຂອງລາວເຮົາ, ແລະ ໄດ້ປະກາດເປີດປະເທດເຕັມຮູບແບບຢ່າງເປັນທາງການ ໃນເດືອນພຶດສະພາ 2022 ຜ່ານມາ. ໃນໄລຍະໄຕມາດທຳອິດຂອງປີ 2022 ນີ້, ສາມາດຕ້ອນຮັບນັກທ່ອງທ່ຽວພາຍໃນຫລາຍກວ່າ 626.825 ເທື່ອຄົນ ແລະ ນັກທ່ອງທ່ຽວສາກົນ 35.980 ເທື່ອຄົນ ແລະ ຄາດວ່າໃນທ້າຍປີນີ້ ຈະມີນັກທ່ອງທ່ຽວສາກົນ ມາທ່ຽວລາວນັບມື້ເພີ່ມຂຶ້ນ.

ຂ່າວ: ສຸພາສະຫວັນ

ພາບ: ຂັນໄຊ

ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ງານບັນພະຊາ ສາມະເນນ ແລະ ຝຶກອົບຮົມສິນລະທຳ ໃຫ້ແກ່ເຍົາວະຊົນໃນໄລຍະພັກຮຽນປະຈຳປີ 2022 ຈັດຂຶ້ນເມື່ອບໍ່ດົນມານີ້, ເຊິ່ງກຸ່ມເປົ້າໝາຍເຍົາວະຊົນຊາຍ-ຍິງ ມີອາຍຸແຕ່ 12-25 ປີ, ໄດ້ແບ່ງເປັນປະເພດ ເຍົາວະຊົນຊາຍ ທີ່ເຂົ້າຮັບການບັນພະຊາເປັນສາມະເນນ 61 ອົງ, ກຳນົດເອົາສະຖານທີ່ ແລະ ໄລຍະເວລາໃນການປະຕິບັດ ຢູ່ວັດສັນຕິພາບ ບ້ານເຈງ ເມືອງໄຊ ແຂວງອຸດົມໄຊ ລະຫວ່າງວັນທີ 1-8 ລະກົດ 2022 ໂດຍມີຫລັກສູດຝຶກອົບຮົມ 4 ພາກ ຄື: ພາກວິຊາພຸດທະສາດສະໜາ, ພາກວິຊາສາສະໜາພິທີ, ພາກວິຊາສັງຄົມ, ພາກກິດຈະວັດປະຈຳວັນ.

ການຈັດງານດັ່ງກ່າວ, ກໍເພື່ອປູກຈິດສຳນຶກໃຫ້ນັກຮຽນ ມີຄວາມກະຕັນຍູຮູ້ບຸນຄຸນພໍ່ແມ່ ແລະ ຜູ້ທີ່ມີພະຄຸນ ຕະຫລອດການຮັກຫອມບ້ານເກີດເມືອງນອນ, ໃຫ້ນັກຮຽນສາມາດແຍກໄດ້ລະຫວ່າງຄວາມດີ ແລະ ຄວາມຊົ່ວ ມີຄວາມຮັບຜິດຊອບຕໍ່ການກະທຳຂອງຕົນເອງ, ເສີມສ້າງທັກສະຊີວິດ ປ່ຽນແປງພຶດຕິກຳ, ສ້າງທັດສະນະຄະຕິ ທີ່ດີຂຶ້ນດ້ວຍການສຶກສາອົມຮົມທາງດ້ານ ຈະຣິຍະທັມ ແລະ ສ້າງຕົນເອງໃຫ້ເປັນປະໂຫຍດແກ່ສັງຄົມ.

ທ່ານ ວາລີ ຈືນໍເຢັງ ເຈົ້າເມືອງໄຊ ໄດ້ກ່າວໃນໂອກາດເຂົ້າຮ່ວມໃນພິທີວ່າ: ໃນນາມຕາງໜ້າການນໍາຂັ້ນເມືອງ ຂໍຝາກຝັ່ງນໍາຄູບາອາຈານ ຈົ່ງຕັ້ງໃຈສຶກສາອົບຮົມ, ຖ່າຍທອດວິຊາຄວາມຮູ້ ແລະ ປູກຈິດສຳນຶກໃຫ້ລູກຫລານເຍົາວະຊົນ ໃຫ້ກາຍເປັນຄົນດີ ມີສິນທຳ, ມີຄຸນນະທໍາ, ມີຄຸນສົມບັດທີ່ດີ ແລະ ເປັນພົນລະເມືອງທີ່ດີຂອງສັງຄົມ, ສາມາດສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ສ່ວນລູກຫລານເຍົາ ວະຊົນທຸກໆຄົນ ໃນເມື່ອມີໂອກາດເຂົ້າມາບັນພະຊາ ແລະ ອົບຮົມສິນລະທຳ ໃຫ້ແຕ່ລະຄົນເອົາໃຈໃສ່ປະຕິບັດ, ສຶກສາຄົ້ນຄວ້າ, ຮ່ຳຮຽນເອົາຄວາມຮູ້ນຳຄູບາອາຈານ ເພື່ອນໍາໄປໝູນ ໃຊ້ເຂົ້າໃນຊີວິດປະຈຳວັນຂອງຕົນ ໃຫ້ມີຄວາມຈະເລີນງອກງາມ.

ຂ່າວ: ແສງອາທິດ

ພຶດຕິກຳທີ່ສາມາດທຳລາຍກະດູກ

• ນັ່ງຂາໄຂວ່ຫ້າງ
• ນັ່ງຫຼັງກົ່ງ/ຫຼັງງໍ
• ຢືນນໍ້າໜັກໄປຫາຂາຂ້າງດຽວ
• ໃສ່ເກີບສົ້ນສູງເກີນເຄີ່ງນີ້ວ
• ຫິ້ວເຄື່ອງໜັກ
• ນັ່ງກອດເອີກ
• ນັ່ງຕັ່ງບໍ່ເຕັມກົ້ນ
• ຢືນເອ່ນທ້ອງ/ຫຼັງຄົດ
• ນອນຂົດຕົວ/ຕົວອຽງ
• ພາຍກະເປົາໜັກຂ້າງດຽວ

ພຶດຕິກຳກ່ຽວກັບຕົນເອງ

• ການຮ້ອງເພັງແມ່ນສີ່ງທີ່ດີສຳລັບທຸກຄົນເພາະມັນສາມາດຊ່ວຍໃຫ້ມີຄວາມສຸກ ແລະ ອາຍຸຍືນຍາວໄດ້.
• ກິນອາຫານອີ່ມຫຼາຍໆ ປະສິດທິພາບໃນການໄດ້ຍິນສຽງຂອງທ່ານຈະຫຼຸດລົງ.
• ການນອນຫຼັບເຮັດໃຫ້ຄວາມຈຳດີຂື້ນ ແລະ ມີຄວາມຄິດສ້າງສັນເພີ່ມຂື້ນ.
• ຫູຂວາຂອງທ່ານ ຟັງຄຳເວົ້າໄດ້ດີກ່ອນຫູຊ້າຍ ໃນຂະນະທີ່ຫູຊ້າຍຈະຟັງສຽງດົນຕີໄດ້ດີກ່ອນຫູຂວາ.
• ການຟັງເພັງສາມາດຊ່ວຍເພີ່ມປະສິດທິພາບ ຂອງລະບົບພູມຄຸ້ມກັນໃນຮ່າງກາຍໄດ້.
• ເລັບມືຈະຍາວກ່ວາເລັບຕີນ 4 ເທົ່າ.
• ທ່ານບໍ່ສາມາດຂ້າຕົວຕາຍໄດ້ໂດຍການກັ້ນຫາຍໃຈ.
• ເຮົາບໍ່ສາມາດມືນຕາໃນເວລາຈາມ.
• ຄົນທີ່ຕື່ນນອນກ່ອນ 7 ໂມງເຊົ້າ ຈະຈ່ອຍ ແລະ ມີຄວາມສຸກຫຼາຍກ່ອນຄົນທີ່ຕື່ນຫຼັງຈາກນັ້ນ.
• ຄົນເຮົາຈະພະຍາຍາມເທົ່າໃດກໍ່ບໍ່ສາມາດ ຈື່ໄລຍະເລີ່ມຕົ້ນຂອງຄວາມຝັນໄດ້.

ສຸຂະພາບກາຍ ແລະ ຈິດໃຈໃນຊີວິດປະຈຳວັນ

• ຢາກສົດຊື່ນ ຕ້ອງກິນເຂົ້າເຊົ້າ.
• ດື່ມນໍ້າໃຫ້ຖືກຈັງຫວະ ລະຫວ່າງກິນອາຫານບໍ່ຄວນດື່ມນໍ້າຫຼາຍ.
• ການເໜັງຕີງເທົ່າກັບການອອກກຳລັງກາຍ ພະຍາຍາມເໜັງທຸກຄັ້ງທີ່ມີໂອກາດ ເຊັ່ນ: ການເຮັດວຽກເຮືອນ ຍ່າງຫຼີ້ນກັບໝຸ່ເພື່ອນ.
• ຄວນກວດສຸຂະພາບປະຈຳປີຢ່າງຕໍ່ເນື່ອງ.
• ຍີ້ມຮັບເຊົ້າວັນໃໝ່ ເພື່ອສ້າງຄວາມຮູ້ສຶກທີ່ດີກ່ອນເລີ່ມວັນໃໝ່.
• ໃຫ້ລາງວັນຕົນເອງ ເມື່ອເຮັດວຽກທີ່ຍາກໆ.
• ຊອກຫາຂໍ້ດີໆ ໃນເລື່ອງທີ່ບໍ່ດີ ຝຶກຄວາມອົດທົນ ແລະ ຖອດຖອນບົດຮຽນ.
• ຮູ້ຈັກການໃຫ້ອະໄພ ເຮັດໃຫ້ຈິດໃຈໃຫ້ເປັນກາງ ກັບສັດຕູ ແລະ ຄູ່ແຂ່ງ.
• ຕ້ອງເຄ່ຍເລື່ອງວຸ້ນວາຍກ່ອນນອນ ຈະເຮັດໃຫ້ນອນຫຼັບດີ.
• ຕ້ອງມີສະຕິທຸກເທື່ອ ບໍ່ວ່າຈະເຮັດຫັຍງກໍ່ຕາມ.

ສະຫະພັນແມ່ຍິງແຂວງອຸດົມໄຊ ໄດ້ຈັດກິດຈະກຳສ້າງຂະບວນການອອກແຮງງານລວມ ເພື່ອຂໍ່ານັບຮັບຕ້ອນວັນບຸນສຳຄັນຂອງແຂວງ ແລະ ຂອງຊາດ ຂຶ້ນ ໃນວັນທີ 1 ກໍລະກົດ ຜ່ານມາ, ນຳພາໂດຍ ທ່ານ ນາງ ວັນທອງ ນິດສະດີ ປະທານສະຫະພັນແມ່ຍິງແຂວງ, ມີຄະນະຮາກຖານ, ຄະນະໜ່ວຍອ້ອມຂ້າງພ້ອມດ້ວຍສະມາຊິກແມ່ຍິງເຂົ້າຮ່ວມ.

ການອອກແຮງງານຄັ້ງນີ້, ເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງແຂວງອຸດົມໄຊຄົບຮອບ 60 ປີ, ວັນສ້າງຕັ້ງກຳລັງປ້ອງກັນຄວາມສະຫງົບແຂວງອຸດົມໄຊ ຄົບຮອບ 60 ປີ ແລະ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 67 ປີ (ວັນທີ 20 ກໍລະກົດ 1955–20 ກໍລະກົດ 2022) ໃຫ້ມີບັນຍາກາດຟົດຟື້ນມ່ວນຊື່ນ.

ໂດຍມີສະຫະພັນແມ່ຍິງຮາກຖານ ປກສ, ປກຊ, ພະແນກກະສິກຳ ແລະ ປ່າໄມ້, ພະແນກການເງິນ, ໂຮງຮຽນສາທາລະນະສຸກ, ໂຮງຮຽນເຕັກນິກວິຊາຊີບແບບປະສົມ, ພະແນກສາທາລະນະສຸກແຂວງ, ໂຮງໝໍແຂວງ, ຖວທ ແຂວງ ແລະ ໂຮງຮຽນມັດທະຍົມສົມບູນເມືອງໄຊ ຊຶ່ງການອະນາໄມຄັ້ງນີ້ມີເກັບຂີ້ເຫຍື້ອ, ຖາງຫຍ້າ, ອະນາໄມ ໃນບໍລິເວນສະໜາມກິລາໃຫ້ມີຄວາມສະອາດງາມຕາ.

ຂ່າວ-ພາບ: ແສງອາທິດ

#Medialaos MMD

ໃນວັນທີ 4 ກໍລະກົດ ນີ້, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 7 ທີ່ເມືອງບາກັນ ສສ ມຽນມາ ພາຍໃຕ້ຫົວຂໍ້:​ “ຄວາມສາມັກຄີປອງດອງ ເພື່ອສະຖຽນລະພາບ ແລະ ຄວາມຈະເລີນຮຸ່ງເຮືອງ” ໂດຍການເປັນປະທານຮ່ວມຂອງທ່ານ ວຸນາ ມ່ອງວິນ ລັດຖະມົນຕີກະຊວງການຕ່າງປະເທດ ສສ ມຽນມາ ແລະ ທ່ານ ຫວາງອີ້ ທີ່ປຶກສາແຫ່ງລັດ ລັດຖະມົນຕີຕ່າງປະເທດ ສປ ຈີນ, ມີບັນດາຄະນະຜູ້ແທນຈາກປະເທດສະມາຊິກເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຕີລາຄາ ແລະ ທົບທວນຄືນ ຜົນຂອງການຮ່ວມມືໃນໄລຍະ 6 ປີຜ່ານມາເຫັນວ່າ: ເປັນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ມີການຂະຫຍາຍຕົວຢ່າງວ່ອງໄວ ແລະ ນໍາເອົາຜົນປະໂຫຍດອັນເປັນຮູບປະທໍາ ມາສູ່ພາກພື້ນແມ່ນໍ້າຂອງ ໂດຍສະເພາະ ການຈັດຕັ້ງຜັນຂະຫຍາຍຜົນກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 6 ແລະ ແຜນປະຕິບັດງານ 5 ປີ (2018-2022) ພາຍໃຕ້ 3 ເສົາຄໍ້າຄື: ການເມືອງ-ຄວາມໝັ້ນຄົງ, ການພັດທະນາແບບຍືນຍົງ ແລະ ການແລກປ່ຽນວັດທະນະທໍາ-ສັງຄົມ ແລະ 5 ຂົງເຂດບຸລິມະສິດ: ການເຊື່ອມຈອດ, ການຄຸ້ມຄອງຊັບພະຍາກອນນ້ຳ, ການຄ້າຂ້າມຊາຍແດນການສ້າງຂີດຄວາມອາດສາມາດໃນການຜະລິດ-ກະສິກຳ ແລະ ລຶບລ້າງຄວາມທຸກຍາກ ໂດຍຜ່ານການປະຕິບັດບັນດາກິດຈະກຳ ແລະ ໂຄງການກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ ອັນໄດ້ນໍາຜົນປະໂຫຍດຕົວຈິງມາສູ່ປະເທດສະມາຊິກ ກໍຄືພາກພື້ນແມ່ນ້ຳຂອງ. ເຖິງວ່າຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໃນຊຸມປີຜ່ານມາກໍ່ຕາມ.

ກອງປະຊຸມ ໄດ້ສະແດງຄວາມຊົມເຊີຍຕໍ່ ສປ ຈີນ ທີ່ໄດ້ປະກອບສ່ວນທຶນ 300 ລ້ານໂດລາ ເຂົ້າໃນກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ນັບແຕ່ປີ 2017 ເປັນຕົ້ນມາ. ກອງທຶນດັ່ງກ່າວ ໄດ້ປະກອບສ່ວນສໍາຄັນເຂົ້າໃນບັນດາໂຄງການເພື່ອການພັດທະນາເສດຖະກິດ-ສັງຄົມ ຢູ່ພາກພື້ນແມ່ນໍ້າຂອງ. ມາຮອດປັດຈຸບັນ, ມີຫຼາຍກວ່າ 600 ໂຄງການ ລວມມູນຄ່າທັງໝົດ 80 ກວ່າລ້ານໂດລາ ທີ່ໄດ້ຮັບການສະໜັບສະໜູນຈາກກອງທຶນພິເສດດັ່ງກ່າວ. ໃນນັ້ນ, ສປປ ລາວ ໄດ້ຮັບ 68 ໂຄງການ ຄິດເປັນມູນຄ່າລວມ 18 ກ່ວາລ້ານໂດລາ. ພ້ອມດຽວກັນນັ້ນ, ບັນດາປະເທດສະມາຊິກ MLC ຍັງໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງ ສປ ຈີນ ຕໍ່ບັນດາປະເທດສະມາຊິກໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ເປັນຕົ້ນ ແມ່ນການສະໜອງວັກຊິນ, ການຊ່ວຍເຫຼືອເຕັກນິກການແພດ, ການຈັດສົ່ງ, ແລກປ່ຽນຊ່ຽວຊານແພດ ແລະ ອື່ນໆ.

ກອງປະຊຸມ ໄດ້ຮັບຮອງເອົາເອກະສານສຳຄັນ ຈຳນວນ 5 ສະບັບຄື: 1. ຖະແຫຼງຂ່າວຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 7; 2. ຖະແຫຼງການວ່າດ້ວຍ “ການຮ່ວມມືຮັບປະກັນດ້ານສະບຽງອາຫານແມ່ນໍ້າຂອງ-ແມ່ນໍ້າລ້ານຊ້າງ”; 3. ຖະແຫຼງການວ່າດ້ວຍ “ການຄຸ້ມຄອງ ແລະ ບໍລິຫານດ້ານໄພພິບັດ”; 4. ຖະແຫຼງການວ່າດ້ວຍ “ລົງເລິກການແລກປ່ຽນ ແລະ ຄວາມເຂົ້າໃຈຊຶ່ງກັນ ແລະ ກັນ ເພື່ອຄວາມຈະເລີນຮຸ່ງເຮືອງໃນປະເທດແມ່ນໍ້າຂອງ-ແມ່ນໍ້າລ້ານຊ້າງ”; 5. ຖະແຫຼງການວ່າດ້ວຍ “ລົງເລິກການຮ່ວມມືດ້ານພາສີ ເພື່ອຮັບປະກັນສະຖຽນລະພາບດ້ານການຄ້າ ແລະ ອໍານວຍຄວາມສະດວກໃນການຊໍາລະສະສາງ ພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ” ເພື່ອເປັນພື້ນຖານໃຫ້ແກ່ການຮ່ວມມືໃນຕໍ່ໜ້າ, ເພື່ອຮັບປະກັນສະຖຽນລະພາບ ແລະ ການພັດທະນາຮອບດ້ານ ແລະ ຍືນຍົງ.

ທ່ານ ສະເຫຼີມໄຊ ກົມມະສິດ ໄດ້ຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບການຮ່ວມມື MLC ຊຶ່ງຕະຫຼອດ 6 ປີຜ່ານມາ, ສປ ຈີນ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ໃນພາກພື້ນແມ່ນໍ້າຂອງເວົ້າລວມ, ເວົ້າສະເພາະ ກໍຄືການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ເປັນຕົ້ນແມ່ນການກໍ່ສ້າງພື້ນຖານໂຄງລ່າງທາງດ່ວນ ວຽງຈັນ-ບໍ່ເຕ່ນ ທີ່ໄດ້ສຳເລັດໄລຍະທີ 1 ແລະ ກຳລັງດຳເນີນການກໍ່ສ້າງໄລຍະທີ 2. ການເປີດນຳໃຊ້ເສັ້ນທາງລົດໄຟ ລາວ-ຈີນ ໃນປີ 2021 ຊຶ່ງໄດ້ຊ່ວຍຊຸກຍູ້ນະໂຍບາຍການຫັນຈາກປະເທດບໍ່ມີທາງອອກສູ່ທະເລ ໄປສູ່ການເປັນປະເທດເຊື່ອມຈອດພາກພື້ນ ແລະ ອະນຸພາກພື້ນ ໃຫ້ປະກົດຜົນເປັນຈິ່ງຫຼາຍຂຶ້ນ. ພ້ອມທັງໄດ້ສະເໜີບາງທິດທາງການຮ່ວມມືໃນຕໍ່ໜ້າ ໂດຍສະເພາະ ການຟື້ນຟູເສດຖະກິດ-ສັງຄົມ, ການນໍາໃຊ້ເຕັກໂນໂລຊີທີທັນສະໄໝ ເຂົ້າໃນຂະແໜງການຄ້າລະຫວ່າງຊາຍແດນ, ການຜະລິດສິນຄ້າທີ່ມີຄຸນນະພາບສູງ, ການເພີ່ມທະວີການຜະລິດກະສິກໍາ ເພື່ອຮັບປະກັນຄວາມໝັ້ນຄົງດ້ານສະບຽນອາຫານ ແລະ ການຂະຫຍາຍການຊ່ວຍເຫຼືອລົງສູ່ທ້ອງຖິ່ນ. ພ້ອມດຽວກັນນີ້, ທ່ານ ຮອງນາຍົກລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ປະເທດປະທານຮ່ວມ ສສ ມຽນມາ ແລະ ສປ ຈີນ ຕໍ່ຜົນສໍາເລັດຂອງການຈັດກອງປະຊຸມຄັ້ງນີ້.

ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍ ກັບລັດຖະມົນຕີຕ່າງປະເທດ ສສ ຫວຽດນາມ, ຣາຊະອານາຈັກກຳປູເຈຍ, ສປ ຈີນ ແລະ ໄທ. ສອງຝ່າຍ ໄດ້ປຶກສາຫາລື ແລະ ແລກປ່ຽນຄຳຄິດເຫັນ ກ່ຽວກັບການຮ່ວມມືດ້ານເສດຖະກິດ-ການຄ້າ, ການລົງທຶນ ໃນຂະແໜງການຕ່າງໆ, ການໄປມາຫາສູ່ຂອງປະຊາຊົນ, ການເປີດປະເທດ ພາຍຫຼັງການແຜ່ລະບາດໂຄວິດ-19 ໂດຍສະເພາະການປຶກສາຫາລືກ່ຽວກັບການແກ້ໄຂບັນຫາເສດຖະກິດ ໃນປັດຈຸບັນ ທີ່ໄດ້ຮັບຜົນກະທົບຈາກໂຄວິດ-19 ແລະ ສະພາບການຂອງໂລກ ທີ່ພວມພະເຊີນໜ້າກັບສິ່ງທ້າທາຍຫຼາຍຢ່າງ ເປັນຕົ້ນແມ່ນການແກ້ໄຂວິກິດດ້ານພະລັງງານ ແລະ ອື່ນໆ. ໃນໂອກາດນີ້, ລັດຖະມົນຕີຕ່າງປະເທດທັງ 4 ທ່ານ ໄດ້ສະແດງຄວາມຊົມເຊີຍຕໍ່ ທ່ານ ສະເຫຼີມໄຊ ກົມມະສິດ ທີ່ໄດ້ຮັບແຕ່ງຕັ້ງເປັນຮອງນາຍົກລັດຖະມົນຕີ ແຫ່ງ ສປປ ລາວ.

ໃນໂອກາດພົບປະສອງຝ່າຍກັບສະຫາຍຫວຽດນາມ, ສອງຝ່າຍ ໄດ້ແລກປ່ຽນກ່ຽວກັບການກະກຽມສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມ, ການຮ່ວມມືແກ້ໄຂດ້ານເສດຖະກິດ ແລະ ພະລັງງານ.

ໃນໂອກາດພົບປະກັບສະຫາຍ ຫວັງອີ້, ສອງຝ່າຍ ໄດ້ມີການແລກປ່ຽນກ່ຽວກັບຂໍ້ລິເລີ່ມຂອງຝ່າຍຈີນກ່ຽວກັບແລວທາງເສດຖະກິດຈີນ-ລາວ-ໄທ ໂດຍນຳໃຊ້ເສັ້ນທາງລົດໄຟລາວ-ຈີນ, ແລວເສດຖະກິດລາວ-ຈີນເພື່ອເປັນກົນໄກຊຸກຍູ້ການຮ່ວມມືໃນຂໍ້ລິເລີ່ມດັ່ງກ່າວ. ສອງຝ່າຍ ຍັງໄດ້ແລກປ່ຽນຄວາມຄິດເຫັນກ່ຽວກັບສະພາບການຂອງພາກພື້ນ ແລະ ສາກົນ. ໃນວາລະສຸດທ້າຍຂອງການພົບປະ ໄດ້ມີການແລກປ່ຽນເອກະສານການຊ່ວຍເຫຼືອ ສປປ ລາວ ໃນການສ້າງໂຮງຮຽນວິຊາຊີບ ແລະ ໂຮງຮຽນມັດທະຍົມ 5 ແຫ່ງ. ພ້ອມນີ້, ຝ່າຍລາວ ຍັງໄດ້ເຊື້ອເຊີນ ສະຫາຍ ຫວັງອີ້ ມາຢ້ຽມຢາມ ສປປລາວ ໃນໄວໆນີ້.

ຂ່າວ-ພາບ: ກະຊວງການຕ່າງປະເທດ

#Medialaos MMD