ຍ້ອນເສດຖະກິດທົ່ວໂລກພວມຖົດຖອຍ ແລະ ກາຍເປັນບັນຫາຊໍ້າເຮື້ອ, ກິດຈະກຳຕ່າງໆ ທາງທຸລະກິດຫຼຸດລົງ, ການຫວ່າງງານເພີ່ມຂື້ນ, ວັດຖຸດິບຂາດແຄນ, ຄວາມຫຍຸ້ງຍາກໃນການຮັບປະກັນຄວາມໝັ້ນຄົງຕ່າງໆ ແມ່ນຮ້າຍແຮງຂື້ນເລື້ອຍໆ. ນອກນີ້ເຢຍລະມັນ ຍັງຕ້ອງຮັບມືກັບວິກິດການພະລັງງານທີ່ຂາດຢ່າງໜັກ ເຊິ່ງເປັນສາເຫດໃຫ້ ນາຍົກລັດຖະມົນຕີຂອງເຢຍລະມັນອອກມາປະກາດຕໍ່ປະຊາຊົນວ່າ: ໃຫ້ພ້ອມກັນປະຢັດໃນການນຳໃຊ້ພະລັງງານທຸກຊະນິດໃຫ້ໄດ້ຫຼາຍທີ່ສຸດ ໂດຍເລີ່ມຕົ້ນດ້ວຍການຫລຸດຜ່ອນການອາບນໍ້າອຸ່ນ ກ່ອນຈະຮອດລະດູໜາວທີ່ຈະມາເຖິງນີ້ເພາະມັນຈະເປັນຊ່ວງໄລຍະເວລາທີ່ຍາກທີ່ສຸດຂອງເຢຍລະມັນ.

ແຕ່ເຖິງຢ່າງໃດກໍ່ຕາມສະຖານະການຮ້າຍແຮງທີ່ສຸດແມ່ນຍັງບໍ່ທັນມາຮອດ ເນື່ອງຈາກບັນດາບໍລິສັດພະລັງງານຕ່າງໆ ກໍາລັງຄ່ອຍໆ ປັບລາຄາຂຶ້ນ ເຮັດໃຫ້ເຢຍລະມັນຕົກຢູ່ໃນສະຖານະການທີ່ບໍ່ເຄີຍມີມາກ່ອນໃນເລື່ອງຂອງວິກິດການອາຍແກັສທໍາມະຊາດ ສ່ວນກໍລະນີທີ່ຮ້າຍແຮງທີ່ສຸດ ບາງບໍລິສັດອາດຈໍາເປັນຕ້ອງຢຸດເຊົາການຜະລິດ, ພະນັກງານຈະຖືກຍົກເລີກການຈ້າງງານ ປະຊາຊົນຈະເປັນໜີ້ ແລະ ທຸກຍາກ.

ມັນສະແດງໃຫ້ເຫັນວ່າວິກິດການຂອງເສດຖະກິດໂລກໃນຄັ້ງນີ້ມັນບໍ່ແມ່ນເກີດແຕ່ໃນ ສປປ ລາວ ເຮົາທີ່ພົບກັບບັນຫາການຂາດແຄນພະລັງງານ ແລະ ໄພເງິນເຟີ້ ມັນເປັນກັບທຸກປະເທດ.

#ຂໍ້ມູນແຫຼ່ງຂ່າວ: ຂ່າວເດັ່ນ Top News

ໃນວັນທີ 6 ກໍລະກົດ 2022, ທີ່ ຫ້ອງຮັບແຂກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີພິທີຕ້ອນຮັບການເຂົ້າຢ້ຽມຢາມ ພົບປະ ທ່ານ ວັນສີ ກົວມົວ, ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ນຳໂດຍທ່ານ Biyay Kumar Padhihari, ເລຂາທິການ ສະມາຄົມມິດຕະພາບ ເພື່ອການຮ່ວມມືວັດທະນະທຳອິນເດຍ ພ້ອມດ້ວຍຄະນະ.

ຄະນະດັ່ງກ່າວແມ່ນໄດ້ເດີນທາງຢ້ຽມຢາມ ສປປ ລາວ ໄລຍະວັນທີ 02-06 ກໍລະກົດ 2022 ນີ້ ໄດ້ຖືໂອກາດດັ່ງກ່າວ ເຂົ້າຢ້ຽມຢາມການນຳກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ຈຸດປະສົງການຢ້ຽມຢາມ ພົບປະຄັ້ງນີ້ ເພື່ອເປັນການເສີມສ້າງສາຍພົວພັນມິດຕະພາບ ແລະ ແລກປ່ຽນດ້ານວັດທະນະທຳອັນດີງາມຂອງ ລາວ-ອິນ ທັງເປັນການຖອດຖອນບົດຮຽນ ແລະ ແລກປ່ຽນການຢ້ຽມສອງຝ່າຍອີກດ້ວຍ.

#Medialaos MMD

ໃນວັນທີ 5 ກໍລະກົດ 2022 ນີ້, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຫວໍ ຈ້ອງ ຫ້າຍ (Vo Trong Hai) ຮອງເລຂາພັກແຂວງ ປະທານຄະນະກຳມະການປະຊາຊົນແຂວງຮ່າຕິ້ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 4-7 ກໍລະກົດ 2022 ນີ້. ໂອກາດນີ້, ທ່ານ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ຫວໍ ຈ້ອງ ຫ້າຍ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງຂຶ້ນໄປເລື້ອຍໆ, ທັງເປັນການເສີມຂະຫຍາຍການພົວພັນຮ່ວມມື ລະຫວ່າງແຂວງ ຫາ ແຂວງ ຂອງສອງປະເທດ ທີ່ມີຊາຍແດນຕິດຈອດກັນ ໃຫ້ໄດ້ຮັບການພັດທະນາ ແລະ ສືບຕໍ່ ໃຫ້ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ຕະຫຼອດໄປ, ທັງເປັນການປະກອບສ່ວນ ເຂົ້າໃນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ທີ່ຈະມາເຖິງນີ້, ໃຫ້ມີບັນຍາກາດອັນຟົດຟື້ນ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ ສະແດງຄວາມຫວັງວ່າ ສອງປະເທດ ລາວ-ຫວຽດນາມ ຈະສືບຕໍ່ໃຫ້ການສະໜັບສະໜູນ ຊ່ວຍເຫຼືອຊຶ່ງກັນ ແລະ ກັນ ໃນທຸກຂົງເຂດວຽກງານ ເພື່ອນຳເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຫວຽດນາມ, ເຮັດໃຫ້ການພົວພັນຮ່ວມມືອັນເປັນມູນເຊື້ອອັນຍາວນານ ລະຫວ່າງສອງປະເທດ ໃຫ້ໄດ້ຮັບການພັດທະນາຂຶ້ນໄປເລື້ອຍໆ ໃນອະນາຄົດ ແລະ ຍາວນານ.

ທ່ານ ຫວໍ ຈ້ອງ ຫ້າຍ ກໍໄດ້ສະແດງຄວາມຂອບໃຈ ມາຍັງ ທ່ານ ພັນຄຳ ວິພາວັນ ທີ່ໄດ້ສະຫຼະເວລາອັນມີຄ່າ ມາຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງໃຫ້ຊາບເຖິງ ຈຸດປະສົງຂອງການເດີນທາງມາຢ້ຽມຢາມ ສປປ ລາວ ໃນຄັ້ງນີ້.

(ຂ່າວ – ພາບ: ຂປລ)

ກອງປະຊຸມພົບປະ ລະຫວ່າງ ກະຊວງສາທາລະນະສຸກ ແລະ ແຂວງຈໍາປາສັກ ​ໄດ້​ຈັດ​ຂຶ້ນເມື່ອບໍ່​ດົນມານີ້ ທີ່ກະຊວງສາທາລະນະສຸກ ເພື່ອຊຸກຍູ້ ຮັດແໜ້ນ ການຮ່ວມມື ໃນຂົງເຂດວຽກງານສາທາລະນະສຸກ, ໂດຍການເປັນປະທານຮ່ວມຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີພາກສ່ວນທີ່ກ່ຽວຂ້ອງ​ຂອງ​ກະ​ຊວງ​ສາ​ທາ​ລະ​ນະ​ສຸກ ແລະ ແຂວງ​ຈຳ​ປາ​ສັກເຂົ້າຮ່ວມ.

ໂອກາດນີ້, ທ່ານ ບຸນແຝງ ພູມມະໄລສິດ ໄດ້ກ່າວວ່າ: ກະ​ຊວງ​ສາ​ລະ​ນະ​ສຸກ ແລະ ແຂວງ​ຈຳ​ປາ​ສັກ ຈະໄດ້ພ້ອມກັນ ຜັນຂະຫຍາຍແນວທາງນະໂຍບາຍ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ກໍຄືແຜນພັດທະນາເສດຖະກິດ-ສັງຄົມ ຂອງກະຊວງສາທາລະນະສຸກ, ຂອງແຂວງຈໍາປາສັກ ແລະ ການຈັດຕັ້ງປະຕິບັດ 2 ວາລະແຫ່ງຊາດ ໃຫ້ກ້າວເຂົ້າສູ່ລວງເລິກ, ຕິດແທດກັບວຽກງານຕົວຈິງ ໃນຂົງເຂດດັ່ງກ່າວ ໃຫ້ແຕກດອກອອກຜົນ ຕາມພາລະບົດບາດ ຂອງທັງສອງພາກສ່ວນ ແລະ ໃຫ້ເກີດປະໂຫຍດສູງສຸດ ແກ່ການພັດທະນາປະເທດຊາດ.

ຈາກນັ້ນ, ທ່ານ ວິໄລວົງ ບຸດດາຄໍາ ໄດ້ກ່າວສະແດງຄວາມຂອບໃຈ ຕໍ່ທ່ານລັດຖະມົນຕີກະຊວງສາທາລະນະສຸກ ກໍຄືຄະນະນຳຂອງກະຊວງ ທີ່ເອົາໃຈໃສ່ ຊຸກຍູ້ ຊີ້ນຳໃນການຈັດຕັ້ງປະຕິບັດວຽກງານສາທາລະນະສຸກ ຢູ່ແຂວງຈຳປາສັກ ໂດຍສະເພາະຊີ້ນຳ ແລະ ການຈັດຕັ້ງປະຕິບັດວຽກງານການປ້ອງກັນ, ຄວບຄຸມການແຜ່ລະບາດພະຍາດໂຄວິດ-19, ຊ່ວຍດ້ານອຸປະກອນການແພດຫ້ອງວິເຄາະໃຫ້ແກ່ໂຮງໝໍແຂວງ, ເຄື່ອງເອໂກ ແລະ ອຸປະກອນການແພດອື່ນໆ. ໄດ້ຊ່ວຍເຫຼືອກໍ່ສ້າງໂຮງໝໍຊຸມຊົນເມືອງໂຂງ ພ້ອມອຸປະກອນການແພດ. ໂຮງໝໍນ້ອຍພະໂພ ເມືອງປະທຸມພອນ ພ້ອມອຸປະກອນການແພດຂັ້ນພື້ນຖານ ແລະ ມອບລົດ Ambulance ນໍາສົ່ງຄົນເຈັບ ຈໍານວນ 7 ຄັນ ແລະ ຈະສືບຕໍ່ມອບລົດ Ambulance ນໍາສົ່ງຄົນເຈັບຕື່ມອີກ ໃນປີ 2022 ໃຫ້ຄົບ 9 ເມືອງ.

ໃນກອງປະຊຸມພົບປະຄັ້ງນີ້, ສອງພາກສ່ວນໄດ້ມີການແລກປ່ຽນຄຳຄິດຄຳເຫັນ ເພື່ອກຳນົດຂອບເຂດຂອງການຮ່ວມມື, ການຈັດຕັ້ງປະຕິບັດ ແລະ ກົນໄກການປະສານງານ ເພື່ອບັນລຸຕາມຈຸດປະສົງ, ສຸມໃສ່ວຽກງານບຸລິມະສິດ ບົນພື້ນຖານພາລະບົດບາດຂອງຂະແໜງສາທາລະນະສຸກ ແລະ ທ່າແຮງຂອງແຂວງ ໃນການຮ່ວມມືແຕ່ລະໄລຍະ.

(ຂ່າວ-ພາບ: ທັດຊະນະ)

ໃນວັນທີ 4 ກໍລະກົດ 2022 ນີ້, ທ່ານ ທອງສະຫວັນ ພົມວິຫານຫົວໜ້າຄະນະພົວພັນຕ່າງປະເທດສູນກາງພັກ(ຄຕພ) ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານພິໄຊ ກຸມາຣ ພາທິຮາຣິ (Bijay Kumar Padhihari), ເລຂາທິການສະມາຄົມອິນເດຍເພື່ອການຮ່ວມມືວັດທະນະທຳ ແລະ ມິດຕະພາບພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ທ່ານ ທອງສະຫວັນ ພົມວິຫານ ໄດ້ສະ ແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການການມາຢ້ຽມຢາມ ສປປ ລາວ ໃນຄັ້ງນີ້ ຖືເປັນການປະກອບສ່ວນສຳຄັນເຂົ້າໃນການຮັດແໜ້ນ, ເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມ ມືອັນດີງາມ ລະຫວ່າງ ສະມາຄົມມິດຕະ ພາບ ລາວ-ອິນເດຍ ແລະ ສະ ມາຄົມ ອິນເດຍ ເພື່ອການຮ່ວມມືວັດທະ ນະທຳ ແລະ ມິດຕະພາບ ກໍຄື ປະຊາຊົນສອງຊາດ ລາວ ແລະ ອິນເດຍ ໃຫ້ນັບມື້ໄດ້ຮັບການພັດທະນາ ແລະ ກ້າວຂຶ້ນສູ່ລະດັບໃໝ່. ພ້ອມນັ້ນ, ທ່ານຍັງໄດ້ສະເໜີໃຫ້ສອງສະມາຄົມ ສືບຕໍ່ເພີ່ມທະວີໃນການເຮັດບົດບາດການທູດປະຊາຊົນ ໃຫ້ເຂົ້າສູ່ລວງເລີກກວ່າເກົ່າ ເພື່ອສະໜັບສະໜູນການຮ່ວມມືດ້ານຕ່າງໆ ຂອງ ສອງປະເທດ ໃຫ້ມີປະສິດທິພາບ ແລະ ປະສິດທິຜົນຂຶ້ນເລື້ອຍໆ.

ພ້ອມກັນນີ້, ທ່ານ ພິໄຊ ກຸມາຣ ພາທິຮາຣິ ໄດ້ຕາງໜ້າໃຫ້ ສະມາຄົມອິນເດຍເພື່ອການຮ່ວມມືວັດທະນະທຳ ແລະ ມິດຕະ ພາບ ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງໃຫ້ຊາບກ່ຽວກັບການຈັດຕັ້ງ ແລະ ການເຄື່ອນ ໄຫວຂອງສະມາຄົມຂອງຕົນ ຕໍ່ທ່ານຫົວໜ້າຄະນະພົວພັນຕ່າງປະເທດສູນກາງພັກ. ພ້ອມທັງໃຫ້ຄຳຢືນຢັນວ່າ ສະມາຄົມອິນເດຍເພື່ອການຮ່ວມມືວັດທະນະທຳ ແລະ ມິດຕະພາບຈະສືບຕໍ່ຮັດແໜ້ນ ແລະ ຮ່ວມມືກັບ ສະມາຄົມມິດຕະພາບ ລາວ-ອິນເດຍ ເສີມຂະ ຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງ ສອງປະເທດ ເພື່ອນຳເອົາຜົນປະໂຫຍດຕົວຈິງມາສູ່ປະຊາ ຊົນສອງຊາດ ອິນເດຍ ແລະ ລາວ.

ໃນວັນດຽວກັນ, ສະມາຄົມມິດຕະພາບ ລາວ-ອິນເດຍ ກັບ ສະມາຄົມອິນເດຍເພື່ອການຮ່ວມມືວັດທະນະທຳ ແລະ ມິດຕະພາບໄດ້ຈັດກອງປະຊຸມພົບປະສອງຝ່າຍ, ເຊິ່ງຝ່າຍ ລາວ ນໍາໂດຍ ທ່ານ ສຸທັມ ສາກົນນິຍົມ ປະທານສະມາຄົມມິດຕະພາບ ລາວ-ອິນດຍ ແລະ ຝ່າຍອິນເດຍນໍາໂດຍ ທ່ານ ພິໄຊ ກຸມາຣ ພາທິຮາຣິ, ເລຂາທິການສະມາຄົມອິນເດຍເພື່ອການຮ່ວມມືວັດທະນະທຳ ແລະ ມິດຕະພາບ, ພ້ອມນັ້ນຍັງມີ ທ່ານ ດີກ້າ ອັດທານາ (Dinkar Asthana), ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສ ອິນເດຍ ປະຈໍາ ສປປ ລາວ ແລະ ຄະນະຜູ້ແທນຂອງສອງຝ່າຍເຂົ້າຮ່ວມ.

ໃນກອງປະຊຸມ, ສອງສະມາຄົມ ໄດ້ປຶກສາຫາລືກ່ຽວກັບກົນໄກຮ່ວມມື, ການແລກປ່ຽນຂໍ້ມູນຂ່າວສານ, ການແລກປ່ຽນການຢ້ຽມຢາມຄະນະຜູ້ແທນເຊິ່ງກັນ ແລະ ກັນ. ພິເສດ, ທັງສອງຝ່າຍສາມາດບັນລຸການຕົກລົງ ເຊັນບົດບັນທຶກຄວາມເຂົ້າໃຈ (MOU) ໄລຍະ 5 ປີ (2022-2027) ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດການພົວພັນຮ່ວມມື ລະຫວ່າງ ສອງສະມາຄົມ ໃຫ້ມີບາດກ້າວອັນໃໝ່ໃນຕໍ່ໜ້າ.

ນອກຈາກການພົບປະເຮັດວຽກແລ້ວ, ຄະນະຜູ້ແທນສະມາຄົມ ອິນເດຍ ເພື່ອການຮ່ວມມືວັດທະນະທຳ ແລະ ມິດຕະ ພາບ ຍັງໄດ້ໄປຢ້ຽມຊົມສະຖານທີ່ທ່ອງ ທ່ຽວທາງປະ ຫວັດສາດ ວັດທະ ນະທຳ ແລະ ທຳມະຊາດ ຢູ່ພາຍໃນນະຄອນ ຫລວງວຽງຈັນ ແລະ ແຂວງຫລວງພະບາງ ຈຳນວນໜຶ່ງ.

ຂ່າວ-ພາບ: ຄຕພ

ສື່ມວນຊົນເກືອບ 30 ຄົນ ຈາກເກືອບ 20 ປະເທດ ທັງຈາກປະເທດໃນອາຊີ ແລະ ອາຟຼິກກາ ໄດ້ຮຽນຮູ້ກ່ຽວກັບການແຕ້ມຮູບແບບດັ້ງເດີມຂອງຈີນຢູ່ຂອບເຂດທີ່ພັກນັກການທູດໃນນະຄອນຫລວງປັກກິ່ງ ແຫ່ງ ສປ ຈີນ ໃນວັນທີ 4 ກໍລະກົດ 2022 ໂດຍມີ ທ່ານ ນາງ Xiao Shufang ນັກແຕ້ມຮູບທີ່ມີຊື່ສຽງຂອງຈີນ ແລະ ຄະນະ ມາບັນຍາຍໃຫ້ຮູ້ກ່ຽວກັບຄວາມເປັນມາ ແລະ ວິທີແຕ້ມຮູບແບບດັ້ງດີມຂອງຈີນທີ່ມີມາແຕ່ບູຮານນະການ ເຊີ່ງການແຕ້ມຮູບດັ່ງກ່າວບໍ່ໄດ້ເປັນພຽງການແຕ້ມຮູບພຽງຢ່າງດຽວເທົ່ານັ້ນ, ແຕ່ພາບທີ່ແຕ້ມອອກມາທັງພາບກ່ຽວກັບທໍາມະຊາດ, ຄົນ, ສັດ, ວັດຖຸສິ່ງຂອງ ແລະ ອື່ນໆ ແມ່ນເຕັມໄປດ້ວຍບົດກະ ວີ, ຄໍາສອນ, ຄໍາກອນ ແລະ ອື່ນໆ ທີ່ມີເນື້ອໃນຢ່າງອຸດົມສົມບູນເພື່ອສັ່ງສອນຄົນໃນການດໍາລົງຊີວິດໃຫ້ຖືກຕ້ອງໃນສັງຄົມ.

ປັດຈຸບັນ ເຖີງວ່າຍຸກສະໄໝໄດ້ປ່ຽນແປງໄປເຮັດໃຫ້ສາມາດນໍາໃຊ້ເຕັກນິກໃໝ່ເຂົ້າໃນການແຕ້ມໄດ້ງ່າຍດາຍຂຶ້ນ ແຕ່ຄວາມໝາຍຂອງຮູບແຕ້ມຍັງເລິກເຊີ່ງ ແລະ ເຕັມໄປດ້ວຍເນື້ອໃນທີ່ອຸດົມສົມບູນຄືເກົ່າ ຈິ່ງເຮັດໃຫ້ຮູບແຕ້ມໃນປະເທດຈີນໄດ້ຮັບຄວາມນິຍົມ, ທັງເປັນຊັບສົມບັດອັນລໍ້າຄ່າດ້ານວັດທະນະທໍາຂອງຈີນຕະຫລອດມາ.

ນອກຈາກໄດ້ຮັບຟັງປະຫວັດຄວາມມາຂອງການແຕ້ມຮູບແບບດັ້ງເດີມຂອງຈີນ ສື່ມວນຊົນທັງໝົດ ຍັງໄດ້ຮຽນແຕ້ມຮູບຕົວຈິງຕາມຮູບແບບດັ້ງເດີມຂອງຈີນ ຕື່ມອີກ.

ສໍາລັບ ສື່ມວນຊົນເກືອບ 30 ຄົນ ຈາກເກືອບ 20 ປະ ເທດທີ່ເດີນທາງມາ ສປ ຈີນ ໃນຄັ້ງນີ້ ແມ່ນເພື່ອເຂົ້າໂຄງ ການສູນສື່ຂ່າວສາກົນ 2022 ( China International Press Communication Center 2022 Program: CIPCC) ທີ່ CIPCC ຈັດຂຶ້ນໃນລະຫວ່າງ ເດືອນ ມິຖຸນາ ຫາ ເດືອນພະຈິກ ປີ 2022. ພາຍໃຕ້ໂຄງການນີ້ ສື່ມວນຊົນຈະໄດ້ເຄື່ອນໄຫວຫລາຍກິດຈະກໍາສໍາຄັນ ເປັນຕົ້ນ: ການສໍາພາດ ແລະ ລາຍງານຂ່າວກ່ຽວກັບສະພາບການພັດທະ ນາປະເທດຂອງຈີນ, ບັນດາເຫດການສໍາຄັນທີ່ເກີດຂຶ້ນຢູ່ຈີນ, ການທັດສະນະສຶກສາບັນດາສະຖານທີ່ສໍາຄັນ ແລະ ອື່ນໆ ເພື່ອໃຫ້ສ່ອງແສງໃຫ້ເຫັນເຖີງບົດຮຽນທີ່ດີຂອງຈີນໃນການພັດທະນາປະເທດທີ່ມີພົນລະເມືອງປຽບເໝືອນຫລັງຄາໂລກ ແຕ່ການພັດທະນາເສດຖະກິດ-ສັງຄົມຂອງປະເທດນັບມື້ຈະເລີນຮຸ່ງເຮືອງຈົນກາຍເປັນປະເທດທີ່ມີເສດຖະກິດຂະຫຍາຍຕົວເປັນອັນດັບສອງຂອງໂລກ ແລະ ຈັດຢູ່ໃນປະເທດມະຫາອໍານາດອັນດັບຕົ້ນຂອງໂລກໃນປັດຈຸບັນນີ້.

ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມທາງໄກຂອງລັດຖະບານຫວຽດນາມ ກັບບັນດາທ້ອງຖິ່ນ ແລະ ກອງປະຊຸມປະຈຳເດືອນ ມິຖຸນາ 2022 ຂອງລັດຖະບານຫວຽດນາມ ກ່ຽວກັບສະ ພາບເສດຖະກິດ – ສັງຄົມ ເດືອນ ມິຖຸນາ ແລະ 6 ເດືອນຕົ້ນປີ 2022 ໄດ້ເປີດຂຶ້ນໃນວັນທີ 4 ກໍລະກົດ ຜ່ານມາ. ພາຍໃຕ້ການເປັນປະທານຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ, ຈາກສະ ຖານທີ່ເຊື່ອມຕໍ່ ຮ່າໂນ້ຍ, ກອງປະຊຸມໄດ້ເຊື່ອມຕໍ່ກັບບັນດາສະຖານທີ່ເຊື່ອມຕໍ່ຢູ່ 63 ແຂວງ, ນະຄອນໃນທົ່ວປະເທດ.

ຂ່າວລະບຸວ່າ: ກ່າວຄຳເຫັນທີ່ກອງປະຊຸມ, ທ່ານ ຟ້າມມິງຈິງ ໃຫ້ຮູ້ວ່າ: ເສດຖະກິດ-ສັງຄົມ ຕົ້ນເດືອນມິຖຸນາ ແລະ 6 ເດືອນຕົ້ນປີ 2022 ມີສັນຍານດີໃນຂົງເຂດເກືອບທັງໝົດ, ມີດ້ານບຸກທະລຸ, ສ້າງຂີດໝາຍທີ່ເຂັ້ມຂົ້ນ. ເສດຖະກິດມະຫາພາກໄດ້ຮັບປະກັນລາຍຮັບ – ລາຍຈ່າຍງົບປະມານ, ການສົ່ງອອກ-ນຳເຂົ້າ, ການສະໜອງ ແລະ ຄວາມຕ້ອງການດ້ານແຮງງານ, ພະລັງງານ ແລະ ທັນຍາຫານ. ຂົງ ເຂດອຸດສາຫະກຳໄດ້ເຕີບໂຕ, ການບໍລິການຟື້ນຟູ ແລະ ຂະແໜງກະສິກຳພັດທະນາຢ່າງມີສະຖຽນລະພາບ. ລະດັບການເຕີບໂຕດ້ານເສດຖະກິດສູງພໍສົມຄວນ, ພິເສດແມ່ນໃນໄຕມາດ II ມີລະດັບການເຕີບໂຕສູງສຸດໃນຮອບເວລາ 11 ປີຜ່ານມາ.

ໃນໄລຍະຈະມາເຖິງ, ຄາດວ່າຈະຍັງມີຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ດັ່ງນັ້ນຄວນມີຄວາມຕັດສິນໃຈສູງກວ່າເກົ່າ, ມີຄວາມພະຍາຍາມຫຼາຍຂຶ້ນກວ່າເກົ່າ, ປະຕິບັດດ້ວຍຄວາມຮັບຜິດຊອບ, ມີປະສິດທິຜົນຈຶ່ງຈະບັນລຸໄດ້ບັນດາຄາດໝາຍ, ໜ້າທີ່ທີ່ໄດ້ວາງອອກໃນປີ 2022 ແລະ ໄລຍະ 2021 – 2025. ທ່ານ ຟ້າມມິງຈິງ ສະເໜີວ່າ: ເນື້ອໃນຈິດໃຈແມ່ນປຶກສາຫາລືຢ່າງກົງໄປກົງມາ, ຊີ້ແຈ້ງບັນດາວຽກງານທີ່ໄດ້ເຮັດແລ້ວ ແລະ ບໍ່ທັນເຮັດໄດ້ໃນ 6 ເດືອນຕົ້ນປີ; ຮັບຮູ້ຢ່າງພາວະວິໄສກ່ຽວກັບບັນຫາ ໝາກຜົນ, ສາເຫດ, ເປັນຕົ້ນແມ່ນສາເຫດອັດຕະວິໄສ, ບົດຮຽນ, ຄວາມຫຍຸ້ງຍາກ, ສິ່ງທ້າທາຍຕົ້ນຕໍໃນປັດຈຸບັນ. ພິເສດ, ບັນດາທ້ອງຖິ່ນຄວນແບ່ງປັນບັນດາບົດຮຽນທີ່ດີ ກໍ່ຄືສະເໜີບັນດາມາດຕະການແກ້ໄຂຄວາມຫຍຸ້ງຍາກ, ສິ່ງຕິດຂັດ ແລະ ບັນດາຈຸດສຸມໃນໄລຍະຈະມາເຖິງ.

ລາຍງານທີ່ກອງປະຊຸມ, ທ່ານ ຫງວຽນຈີ້ຢຸງ ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ເສດຖະກິດມະຫາພາກສືບຕໍ່ເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ໄດ້ຮັບການຕີລາສູງຈາກປະຊາຄົມສາກົນ. ສະເລ່ຍ 6 ເດືອນຕົ້ນປີ, ຄາດວ່າລະດັບເຕີບໂຕ GDP ຈະບັນລຸ 6,42% ເມື່ອທຽບໃສ່ໄລຍະດຽວກັນຂອງປີກ່ອນ, ສູງກວ່າເມື່ອທຽບໃສ່ແຜນການ, ເທົ່າກັບລະດັບສະເລ່ຍຂອງຊຸມປີກ່ອນເກີດພະຍາດລະບາດ ໂຄວິດ-19.

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 5 ກໍລະກົດ 2022 ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ກະຊວງພະລັງງານ ແລະ ບໍ່ແຮ່ (ພບ) ໄດ້ສະເໜີຮ່າງກົດໝາຍວ່າດ້ວຍຄວາມປອດໄພຂອງເຂື່ອນ (ສ້າງໃໝ່) ເພື່ອໃຫ້ສະມາຊິກສະພາແຫ່ງຊາດ (ສສຊ) ພິຈາລະນາ.

ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ສະເໜີຮ່າງກົດໝາຍ ວ່າດ້ວຍຄວາມປອດໄພຂອງເຂື່ອນໃຫ້ຮູ້ວ່າ: ປັດຈຸບັນ ສປປ ລາວ ມີແຫຼ່ງຜະລິດໄຟຟ້າທັງໝົດ 90 ແຫ່ງ, ມີກໍາລັງຕິດຕັ້ງທັງໝົດ 10.956,14 ເມກາວັດ, ສາມາດຜະລິດພະລັງງານໄຟຟ້າໄດ້ເຖິງ 56.027,07 ລ້ານກິໂລວັດໂມງຕໍ່ປີ, ສາມາດສ້າງລາຍຮັບເຂົ້າງົບປະມານແຫ່ງລັດ ແລະ ພັດທະນາພື້ນຖານໂຄງລ່າງ, ສ້າງວຽກເຮັດງານທໍາໃຫ້ແກ່ຊຸມຊົນ, ທ້ອງຖິ່ນ ແລະ ສັງຄົມໄດ້ຫຼາຍພໍສົມຄວນ.

ໄລຍະຜ່ານມາ, ການຄຸ້ມຄອງດ້ານຄວາມປອດໄພຂອງເຂື່ອນ ເລີ່ມແຕ່ຂັ້ນຕອນການສໍາຫຼວດ,ອອກແບບ, ກໍ່ສ້າງ ແລະ ດໍາເນີນການ ຍັງບໍ່ທັນມີກົດໝາຍໃດເພື່ອມາຄຸ້ມຄອງເປັນອັນສະເພາະ, ສ່ວນຫຼາຍຈະເນັ້ນໃສ່ແຕ່ເຕັກນິກຂອງການກໍ່ສ້າງ, ບໍ່ໄດ້ເນັ້ນສະເພາະຄວາມປອດໄພຂອງການພັດທະນາ ແລະ ການນໍາໃຊ້ເຂື່ອນ, ຜ່ານມາແມ່ນອີງໃສ່ກົດໝາຍວ່າດ້ວຍໄຟຟ້າ, ກົດໝາຍດ້ານສິ່ງແວດລ້ອມ ແລະ ນິຕິກຳອື່ນໆທີ່ກ່ຽວຂ້ອງ ເພື່ອເປັນບ່ອນອີງໃນການຈັດຕັ້ງປະຕິບັດ, ແຕ່ສັງເກດວ່າ ມີເນື້ອໃນບໍ່ຄົບຖ້ວນ, ບໍ່ຈະແຈ້ງ, ບໍ່ຮັດກຸມ. ສະນັ້ນ ຈຶ່ງມີຄວາມຫຍຸ້ງຍາກໃນການຄຸ້ມຄອງ ເຮັດໃຫ້ຜູ້ລົງທຶນສວຍໃຊ້ຊ່ອງວ່າງ ມີລັກສະນະລະເມີດ ຫຼື ເມີນເສີຍ, ບໍ່ເອົາໃຈໃສ່ຕໍ່ມາດຕະການຮັກສາຄວາມປອດໄພຂອງເຂື່ອນ ຈຶ່ງເປັນສາເຫດເຮັດໃຫ້ເຂື່ອນຂະໜາດນ້ອຍແຕກພັງຢູ່ແຂວງຊຽງຂວາງໄລຍະຜ່ານມາ ແລະ ທີ່ຮ້າຍແຮງກວ່ານັ້ນ ແມ່ນການແຕກພັງຂອງຄູກັນນໍ້າດີ D ຂອງໂຄງການເຂື່ອນເຊປຽນ-ເຊນໍ້ານ້ອຍ ທີ່ເກີດຂຶ້ນໃນປີ 2018, ຈາກເຫດການດັ່ງກ່າວ ກະຊວງພະລັງງານ ແລະ ບໍ່ແຮ່ ໄດ້ດໍາເນີນການສໍາຫຼວດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1815/ຫສນຍ, 10 ພະຈິກ 2019 ເປັນຕົ້ນ ບັນດາເຂື່ອນໄຟຟ້າຂະໜາດນ້ອຍ-ໃຫຍ່ທີ່ຢູ່ໃນໄລຍະການກໍ່ສ້າງ ແລະ ດໍາເນີນງານ ເພື່ອໃຫ້ປະຕິບັດຕາມມາດຕະຖານເຕັກນິກຂອງການອອກແບບໃຫ້ມີຄວາມປອດໄພ ແລະ ໝັ້ນຄົງ. ສະນັ້ນເຫັນໄດ້ຄວາມສໍາຄັນດັ່ງກ່າວ ພັກ-ລັດ ຈຶ່ງໄດ້້ຊີ້ນໍາໃຫ້ສ້າງກົດໝາຍຂຶ້ນ ເພື່ອຄຸ້ມຄອງວຽກງານຄວາມປອດໄພຂອງເຂື່ອນ ແລະ ອະນຸມັດໃຫ້ກະຊວງພະລັງງານ ແລະ ບໍ່ແຮ່ ສ້າງຕັ້ງກົມຄຸ້ມຄອງຄວາມປອດໄພອຸດສາຫະກໍາພະລັງງານ ເພື່ອຄຸ້ມຄອງ, ຕິດຕາມ, ກວດກາຄວາມປອດໄພຂອງເຂື່ອນ.

ສະມາຄົມເຂື່ອນລາວໄດ້ຮັບການສ້າງຕັ້ງຂຶ້ນ ຊຶ່ງໄດ້ເຂົ້າເປັນສະມາຊິກຂອງອົງການເຂື່ອນໃຫຍ່ສາກົນ ICOLD ເປັນປະເທດ 104 ໃນຄັ້ງວັນທີ 30 ພະຈິກ 2020, ຈຸດປະສົງຂອງການສ້າງຕັ້ງສະມາຄົມ ເພື່ອເປັນການເຕົ້າໂຮມເອົານັກວິຊາການ, ຜູ້ຊ່ຽວຊານທີ່ຊົງຄຸນວຸດທິ, ນິຕິບຸກຄົນ, ການຈັດຕັ້ງ, ຜູ້ປະກອບການ, ນັກຮຽນ, ນັກສຶກສາ, ປັນຍາຊົນ ໃນສາຂາວິຊາຊີບທີ່ຕິດພັນກັບການບໍລິຫານຈັດການເຂື່ອນເຂົ້າມາເປັນສະມາຊິກຂອງສະມາຄົມ ແລະ ຈະເປັນການແລກປ່ຽນປະສົບການ, ຄວາມຮູ້, ຄວາມສາມາດ, ເຕັກໂນໂລຊີ, ຂໍ້ມູນຂ່າວສານຊຶ່ງກັນ ແລະ ກັນ, ເພື່ອເສີມສ້າງຄວາມອາດສາມາດ ໃນການບໍລິຫານ, ຈັດການ ແລະ ຄຸ້ມຄອງເຂື່ອນ ທັງພາກລັດ-ເອກະຊົນ ໃຫ້ມີຄວາມເຂັ້ມແຂງ, ກົມກຽວກັນແຕ່ລະດ້ານ.

ໂຄງປະກອບຂອງຮ່າງກົດໝາຍວ່າດ້ວຍຄວາມປອດໄພຂອງເຂື່ອນສະບັບນີ້ ປະກອບມີ 10 ພາກ, 9 ໝວດ, 72 ມາດຕາ. ພາຍຫຼັງກົດໝາຍດັ່ງກ່າວຖືກຮັບຮອງ ແລະ ປະກາດໃຊ້ແລ້ວ ຄາດວ່າ ຈະມີນິຕິກໍາທີ່ເປັນບ່ອນອີງໃນການຈັດຕັ້ງປະຕິບັດວຽກງານຄວາມປອດໄພຂອງເຂື່ອນ, ສ້າງຄວາມເຊື່ອໝັ້ນໃຫ້ແກ່ພົນລະເມືອງ ແລະ ການຈັດຕັ້ງ, ເຮັດໃຫ້ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ເຂົ້າໃຈເຖິງຄວາມສໍາຄັນ ແລະ ມີສ່ວນຮ່ວມເຂົ້າໃນວຽກງານດັ່ງກ່າວ, ຄາດວ່າ ຈະເຮັດໃຫ້ຜູ້ພັດທະນາເຂື່ອນ ເພີ່ມທະວີຄວາມຮັບຜິດຊອບຂຶ້ນຕື່ມ.

ຫຼັງຈາກນັ້ນ ສສຊ ໄດ້ພ້ອມກັນປະກອບຄຳຄິດເຫັນໃສ່ຮ່າງກົດໝາຍດັ່ງກ່າວ ເພື່ອເຮັດໃຫ້ເນື້ອໃນຮັດກຸມຂຶ້ນ ແລະ ສາມາດຈັດຕັ້ງປະຕິບັດຕົວຈິງໄດ້.

ຂ່າວ: ນາງແສງຈັນ

ວິທະຍຸກະຈາຍສຽງຫວຽດນາມລາຍງານວ່າ: ຫວ່າງບໍ່ດົນມານີ້, ຢູ່ ນິວເດລີ, ອິນເດຍ ແລະ ສະ ຫະພາບເອີຣົບ (EU) ໄດ້ສຳເລັດການເຈລະຈາຮອບທຳອິດ ພາຍຫຼັງຖືກຢຸດສະງັກມາເປັນເວລາ 9 ປີ ກ່ຽວກັບຂໍ້ຕົກລົງການຄ້າ ແລະ ການລົງທຶນສອງຝ່າຍ, ລວມທັງຄຳແນະນຳທາງດ້ານພູມສາດ (GI).

ຂ່າວລະບຸວ່າ: ການເຈລະຈາຮອບຕ່າງໆທີ່ດຳເນີນໃນໜຶ່ງອາທິດຜ່ານມາ ແມ່ນໄດ້ຈັດຂຶ້ນຕາມຮູບ ແບບເຊິ່ງໜ້າສົມທົບກັບແບບທາງໄກ. ໃນການເຈລະຈາຮອບນີ້, ສອງຝ່າຍໄດ້ຈັດກອງປະຊຸມວິຊາການທັງໝົດ 52 ວາລະ ກ່ຽວກັບ 18 ຂົງເຂດນະໂຍບາຍທີ່ກ່ຽວຂ້ອງເຖິງສັນຍາການຄ້າເສລີ (FTA) ແລະ 7 ວາລະປະຊຸມກ່ຽວກັບການອາລັກຂາການລົງທຶນ ແລະ ຄຳແນະນຳທາງດ້ານພູມສາດ.

ວົງເງິນການຄ້າສອງຝ່າຍລະຫວ່າງ ອິນເດຍ ແລະ ອີຢູ ບັນລຸ 116,36 ຕື້ໂດລາ ໃນໄລຍະ 2021 – 2022 ອີຢູ ແມ່ນຄູ່ຮ່ວມມືສຳຄັນອັນດັບສອງຂອງອິນເດຍ ຊຶ່ງຖັດຈາກອາເມຣິກາ ແລະ ແມ່ນຕະຫຼາດທີສອງຂອງບັນດາຜະລິດຕະພັນສົ່ງອອກຂອງ ອິນເດຍ. ຄາດວ່າ, ການເຈລະຈາຮອບທີ 2 ຈະຈັດຂຶ້ນໃນເດືອນ ກັນຍາ 2022 ຢູ່ ບຣຸກແຊນ, ປະເທດ ແບຣນຊິກ.

ຂ່າວສານຊີອາໄອລາຍງານ ເມື່ອປີຫຼັງໆມານີ້ເສດຖະກິດດີຈິຕອນຂອງຈີນພັດທະນາໄປຢ່າງວ່ອງໄວ ຂຶ້ນມາຢູ່ທີ່ອັນດັບທີ 2 ຂອງໂລກຕິດຕໍ່ກັນຫຼາຍປີ. ອີງຕາມສະຖິຕິລະບຸວ່າ ນັບຕັ້ງແຕ່ປີ 2012 ເຖິງປີ 2021 ທີ່ຜ່ານມາ ຂະໜາດເສດຖະກິດດີຈິຕອນຂອງຈີນເພີ່ມຂຶ້ນຈາກ 11 ລ້ານໆຢວນມາເປັນ 45 ລ້ານໆຢວນ ຊຶ່ງອັດຕາສ່ວນເສດຖະກິດດີຈິຕອນໃນໂຕເລກລວມຍອດຜະລິດຕະພັນພາຍໃນປະເທດ (GDP) ເພີ່ມຂຶ້ນຈາກ 21,6% ສູງເຖິງ 39,8%.

ຂະນະທີ່ການກໍ່ສ້າງສາທາລະນະປະໂຫຍດຮູບແບບໃໝ່ ທຸລະກິດດີຈິຕອນກໍພັດທະນາໄປຢ່າງວ່ອງໄວ ນັບເຖິງທ້າຍເດືອນພຶດສະພາໃນປີນີ້ ຈີນໄດ້ສ້າງລະບົບສາທາລະນະປະໂຫຍດເຄືອຂ່າຍທີ່ມີຂະ ໜາດໃຫຍ່ທີ່ສຸດ ແລະ ລະດັບແຖວໜ້າທົ່ວໂລກ ສະຖານີຖານລະບົບ 5G ມີເຖິງ 1.700.000 ແຫ່ງ ຈຳນວນຜູ້ໃຊ້ໂທລະສັບມືຖື 5G ມີເກີນ 420 ລ້ານຄົນ ເມື່ອປີ 2021 ມູນຄ່າເພີ່ມຂອງອຸດສາຫະກຳການຜະລິດອີເລັກໂຕຼນິກເພີ່ມຂຶ້ນ 15,7% ເມື່ອທຽບກັບປີ 2020 ໂດຍອັດຕາການເພີ່ມຖືວ່າເປັນສະຖິຕິສູງທີ່ສຸດໃນໄລຍະ 10 ປີທີ່ຜ່ານມາ ລາຍໄດ້ຈາກທຸລະກິດຊອບແວ ແລະ ການບໍລິການເຕັກໂນໂລຊີຂໍ້ມູນຂ່າວສານເພີ່ມຂຶ້ນ 17,7% ສ່ວນລາຍໄດ້ຈາກວິສາຫະກິດທາງອິນເຕີເນັດ ແລະ ການບໍລິການທີ່ກ່ຽວຂ້ອງເພີ່ມຂຶ້ນ 16,9%.