ຄວາມກົດດັນຕໍ່າຂອງອາກາດຮ້ອນ ຍັງຈະສືບຕໍ່ປົກຄຸມຢູ່ທົ່ວທຸກພາກ ຂອງປະເທດລາວ ດ້ວຍກໍາລັງປານກາງ ຫາ ແຮງ ສົມທົບກັບລົມມໍລະສຸມ ຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ອາກາດຮ້ອນຂຶ້ນຕື່ມອີກ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ຢູ່ໃນແຕ່ລະພາກ ແລະ ຕົກໜັກຢູ່ບາງທ້ອງຖິ່ນ ພ້ອມມີລົມພັດແຮງ ເປັນບາງໂອກາດ.

ພະຍາກອນອາກາດ ເວລາ 7:00 ໂມງຂອງວັນທີ 19/7/2022 ເຖິງ ເວລາ 7:00 ໂມງ ວັນທີ 20/7/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນ ລະຫວ່າງ 21-32 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມ ພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນລະຫວ່າງ 25-35 ອົງສາ.

-ນະຄອນຫລວງວຽງຈັນ: ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງຢູ່ບາງບໍລິເວນ ພ້ອມມີລົມ ພັດແຮງ ຫລື ເນື້ອທີ່ການປົກຫຸ້ມຂອງຝົນເທົ່າກັບ 55%. ອຸນຫະພູມໃນ ລະຫວ່າງ 26-35 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 26-35 ອົງສາ.

-ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 50%. ອຸນຫະພູມໃນລະຫວ່າງ 17-29 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກ ຫຸ້ມຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 25-34 ອົງສາ.

-ເຂດພູພຽງບໍລະເວນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 50%. ອຸນຫະພູມໃນລະຫວ່າງ 18-26 ອົງສາ.

ພິທີໂຮມຊຸມນຸມສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ໄດ້ຈັດຂຶ້ນໃນຕອນເຊົ້າຂອງວັນທີ 18 ກໍລະກົດ 2022, ທີ່ ຫໍປະຊຸມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ, ເລຂາທິ ການໃຫຍ່, ປະທານປະເທດ ແຫ່ງ ສປປ ລາວ, ສະຫາຍ ຫວໍ ວັນ ເຖື້ອງ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກກອມມູນິດຫວຽດ ນາມ, ຫົວໜ້າຄະນະຊີ້ນໍາລະດັບຊາດ ສະເຫລີມສະຫລອງປີສາມັກຄີມິດຕະພາບ ຫວຽດ ນາມ-ລາວ ປີ 2022 ພ້ອມດ້ວຍຄະນະ, ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແລະ ບັນດາສະຫາຍການນໍາພັກ-ລັດຖະບານ, ພະນັກງານ, ທະຫານ, ຕຳຫລວດ, ຊາວໜຸ່ມ, ນ້ອງນັກຮຽນ-ນັກສຶກສາ ແລະ ພາກສ່ວນກ່ຽວຂ້ອງຂອງສອງຝ່າຍ ລາວ-ຫວຽດນາມ, ຫລາຍກວ່າ 1.000 ສະຫາຍ ເຂົ້າຮ່ວມຢ່າງພ້ອມພຽງ.

ເລີ່ມຕົ້ນພິທີໂຮມຊຸມນຸມ, ໄດ້ມີການສະແດງສີລະປະທີ່ສະແດງໃຫ້ເຫັນເຖິງສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ໂດຍໄດ້ຖ່າຍທອດຜ່ານບັນດາບົດເພງ ແລະ ບົດຟ້ອນມິດຕະພາບ ລາວ-ຫວຽດນາມ ຢ່າງເບີກບານມ່ວນຊື່ນ ແລະ ມີເນື້ອໃນຄວາມໝາຍສຳຄັນທາງປະຫວັດສາດ ສ່ອງແສງໃຫ້ເຫັນເຖິງສາຍໄຍແຫ່ງຄວາມຜູກພັນ ຄວາມສາມັກຄີມິດຕະພາບອັນຍິ່ງໃຫຍ່ ທີ່ບໍ່ສາມາດຕັດຂາດຈາກກັນໄດ້.

ພິທີໂຮມຊຸມນຸມສະເຫລີມສະຫລອງ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ໄດ້ເລີ່ມຕົ້ນຂຶ້ນຢ່າງເປັນທາງການ ໂດຍເລີ່ມຈາກພິທີເຄົາລົບທຸງຊາດ ຂອງທັງສອງຊາດ ລາວ-ຫວຽດນາມ. ຈາກນັ້ນ, ໃນໂອກາດອັນສະຫງ່າລາສີນີ້ ສະຫາຍ ເລຂາທິການໃຫຍ່, ປະທານປະເທດ ສປປ ລາວ ທອງລຸນ ສີສຸລິດ ໄດ້ຕາງໜ້າໃຫ້ການນຳພັກ-ລັດ ແລະ ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ຂຶ້ນກ່າວບົດສູນທອນພົດ, ເຊິ່ງມີເນື້ອໃນບາງຕອນສໍາຄັນດັ່ງນີ້: “ມື້ນີ້ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໄດ້ພ້ອມກັນຈັດພິທີໂຮມຊຸມນຸມໃຫຍ່ ເພື່ອສະເຫລີມ ສະຫລອງ “ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ” ຂຶ້ນຢ່າງເປັນທາງການ ພ້ອມກັນຢູ່ປະເທດຂອງຕົນ ເພື່ອລະນຶກເຖິງວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ ກໍຄື ຫວນຄືນເຖິງມູນເຊື້ອແຫ່ງການກໍາເນີດສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ.

ໃນພິທີອັນຄຶກຂຶມ ແລະ ມີຄວາມໝາຍປະຫວັດສາດ ໃນມື້ນີ້, ພວກເຮົາ ຍິ່ງຈົດຈຳລ້ຳລຶກ ແລະ ຮູ້ບຸນຄຸນຢ່າງສຸດຊຶ້ງຕໍ່ ປະທານ ໂຮ່ຈີ່ມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ຜູ້ນຳທີ່ແສນເຄົາລົບຮັກ, ເຊິ່ງເປັນຜູ້ໃຫ້ກຳເນີດ ແລະ ໄດ້ເປັນແບບຢ່າງອັນໃສແຈ້ງ ໃນການຖະນຸຖະໜອມ, ເພີ່ມພູນຄູນສ້າງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ໃຫ້ແໜ້ນແຟ້ນ ແລະ ຂະຫຍາຍຕົວຢ່າງບໍ່ຢຸດຢັ້ງເຖິງເທົ່າທຸກວັນນີ້”; ສອງຊາດ ລາວ-ຫວຽດນາມ ເປັນບ້ານໃກ້ເຮືອນຄຽງຕິດຈອດກັນ ດ້ວຍສາຍພູສາຍນໍ້າ ທີ່ຢືດຍາວທາງທຳມະຊາດ, ປະຊາຊົນສອງຊາດ ບໍ່ສະເພາະ ທີ່ມີຊີວິດຢູ່ຮ່ວມກັນຢ່າງສັນຕິສຸກເທົ່ານັ້ນ ແຕ່ຍັງໄດ້ຮ່ວມກັນຕໍ່ສູ້ຕ້ານການຮຸກຮານ, ການຍຶດຄອງ ແລະ ການປົກຄອງ ຂອງຈັກກະພັດຕ່າງດ້າວ ແລະ ລະບອບເຈົ້າສັກດີນາ ຢ່າງອົງອາດກ້າແກ່ນ, ບໍ່ຍອມຈໍານົນ, ຍາດເອົາສິດເປັນເຈົ້າ ອອກຈາກແອກຄອບຄອງ ຂອງລະບອບລ່າເມືອງຂຶ້ນ ແລະ ສັກດີນາຂຸນເສິກ ເພື່ອປົດປ່ອຍປະເທດຊາດ ຂອງໃຜລາວ ຕະຫລອດມາ.

ການປະຕິວັດຂອງ ປະທານ ໂຮ່ ຈິມິນ, ຜູ້ທີ່ເຕົ້າໂຮມບັນດາຊັ້ນຄົນຜູ້ຮັກຊາດທັງຫລາຍ ສ້າງຕັ້ງພັກກອມມູນິດອິນດູຈີນ ໃນປີ 1930 ເພື່ອນຳພາຂະບວນການຕໍ່ສູ້ຂອງປະຊາຊົນ 3 ຊາດ ອິນດູຈີນ, ພາລະກິດຕໍ່ສູ້ຂອງປະຊາຊົນ ສອງຊາດ ລາວ-ຫວຽດນາມ ໄດ້ກ້າວເຂົ້າສູ່ໄລຍະໃໝ່ ດ້ວຍຍຸດທະສາດ ແລະ ຍຸດໂທບາຍ ທີ່ສອດຄ່ອງກັບສະພາບການ ແລະ ຈຸດພິເສດຂອງສອງປະເທດ ເຮັດໃຫ້ການຕໍ່ສູ້ໄດ້ຮັບໄຊຊະນະເປັນກ້າວໆມາ, ສາມາດສ້າງຕັ້ງ ສາທາລະນະລັດ ປະຊາທິປະໄຕ ຫວຽດນາມ ຂຶ້ນໃນວັນທີ 02 ກັນຍາ 1945. ເຫດການປະຫວັດສາດດັ່ງກ່າວ ໄດ້ເປັນການປຸກລະດົມ ແລະ ສ້າງກາລະໂອກາດ ໃຫ້ມີການປະກາດເອກະລາດຢູ່ລາວ ໃນວັນທີ 12 ຕຸລາ ປີ 1945. ອັນພົ້ນເດັ່ນ ທີ່ເປັນບາດລ້ຽວປະຫວັດສາດນັ້ນ, ແມ່ນໄຊຊະນະບັ້ນຮົບ “ດຽນບຽນຟູ” ທີ່ຂຶ້ນຊື່-ລືຊາ, ເຊິ່ງໄດ້ເຮັດໃຫ້ພວກລ່າເມືອງຂຶ້ນແບບເກົ່າ ຈຳຕ້ອງຍອມເຊັນສັນຍາເຊີແນວ ໃນປີ 1954 ກ່ຽວກັບອິນດູຈີນ, ຮັບຮູ້ຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ 3 ປະເທດອິນດູຈີນ. ການຮ່ວມສຳພັນສູ້ຮົບ, ຊ່ວຍເຫລືອເຊິ່ງກັນ ແລະ ກັນນັ້ນ ໄດ້ເຮັດໃຫ້ຂະບວນການປະຕິວັດຢູ່ປະເທດລາວ ເຕີບໃຫຍ່ຂະຫຍາຍຕົວກວ້າງອອກ, ເຊິ່ງໄດ້ເປັນເງື່ອນໄຂໃຫ້ແກ່ການສ້າງຕັ້ງພັກປະຊາຊົນລາວ ຂຶ້ນໃນວັນທີ 22 ມີນາ 1955 ໂດຍແມ່ນປະທານ ໄກສອນ ພົມວິຫານ ເປັນຜູ້ນໍາໜ້າເພື່ອນໍາພາຂະບວນການປະຕິວັດ ຢູ່ລາວ.

ໃນໄລຍະການຕໍ່ສູ້ອັນລະອິດລະອ້ຽວນີ້, ສັນຍາເຊີແນວ ໃນປີ 1962 ກ່ຽວກັບລາວ ໄດ້ຮັບການລົງນາມ, ການປະຕິວັດຂອງສອງປະເທດ ລາວ-ຫວຽດນາມ ໄດ້ກ້າວເຂົ້າສູ່ບາດກ້າວຂະຫຍາຍຕົວໃໝ່, ຣາຊະອານາຈັກລາວ ໂດຍລັດຖະບານປະສົມ ທີ່ມີກຳລັງປະຕິວັດຮັກຊາດ ກັບ ສາທາລະນະລັດ ປະຊາທິປະໄຕ ຫວຽດນາມ ໄດ້ສ້າງຕັ້ງສາຍພົວພັນການທູດນຳກັນ ຢ່າງເປັນທາງການ ໃນວັນທີ 05 ກັນຍາ 1962, ເຊິ່ງນີ້ແມ່ນເຫດການປະຫວັດສາດ ສໍາຄັນອັນໜຶ່ງໃນການພົວພັນລະຫວ່າງສອງປະເທດ ທີ່ເກີດຈາກການຕໍ່ສູ້ໃນສະໜາມຮົບການເມືອງ, ການທູດ ໄປຄຽງຄູ່ກັບສະໜາມຮົບທາງການທະຫານຂອງກຳລັງປະຕິວັດ ຂອງສອງປະເທດ ລາວ-ຫວຽດນາມ ທີ່ພ້ອມກັນເດີນໜ້າຢ່າງບໍ່ຢຸດຢັ້ງ ນຳເອົາການປະຕິວັດຂອງສອງປະເທດເຮົາ ຈາກໄຊຊະນະນີ້ ສູ່ໄຊຊະນະໃໝ່ ຈົນກ້າວສູ່ໄຊຊະນະຢ່າງສົມບູນ ກ້າວສູ່ຍຸກສະໄໝປົກປັກຮັກສາ ແລະ ພັດທະນາປະເທດຊາດ.

ພາຍຫລັງປະເທດຊາດ ໄດ້ຮັບການປົດປ່ອຍຢ່າງສົມບູນ, ສອງພັກ-ສອງລັດ ລາວ-ຫວຽດນາມ ໄດ້ເປັນເອກະພາບກັນຕົກລົງໃຫ້ມີການເຊັນ “ສົນທິສັນຍາມິດຕະພາບ ແລະ ການຮ່ວມມື ໃນວັນທີ 18 ກໍລະກົດ 1977. ສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ໄດ້ສ້າງພື້ນຖານການພົວພັນຮ່ວມມືໃນໄລຍະໃໝ່ ໃຫ້ສອດຄ່ອງກັບການພົວພັນລະຫວ່າງຊາດ ແລະ ກົດໝາຍສາກົນ. ນັ້ນແມ່ນການຢືນຢັນ ແລະ ສ່ອງແສງອອກຢ່າງຈະແຈ້ງ ເຖິງການຫັນເອົາບັນດາໝາກຜົນຂອງການປະຕິວັດ, ເຈດຈໍານົງ, ຄວາມມຸ່ງມາດປາຖະໜາຂອງປະຊາຊົນ ທັງສອງປະເທດ ໃນການສືບຕໍ່ເສີມຂະຫຍາຍ ແລະ ຍົກລະດັບການພົວພັນ ລາວ-ຫວຽດນາມ ທີ່ບໍ່ຄືໃຜ ແລະ ບໍ່ມີໃຜຄື ຫລື ໜຶ່ງບໍ່ມີສອງ ຫັນສູ່ລວງເລິກຂອງຄວາມສຳພັນຂອງສອງຊາດ ເພື່ອຜົນປະໂຫຍດຂອງປະຊາຊົນສອງປະເທດ ແລະ ຍັງເປັນການປະກອບສ່ວນເຂົ້າໃນການປົກປັກຮັກສາ ແລະ ປັບປຸງສັນຕິພາບ ຢູ່ອາຊີອາຄະເນ ແລະ ໃນໂລກອີກດ້ວຍ.

ການຮ່ວມສໍາພັນສູ້ຮົບ ລະຫວ່າງ ສອງຊາດ ລາວ-ຫວຽດນາມ ເປັນອັນພິເສດທີ່ຫາຍາກ, ບໍ່ພຽງແຕ່ເປັນການຮ່ວມສໍາພັນອັນໜຶ່ງ ທີ່ໄດ້ຮັບການສ້າງຕັ້ງຂຶ້ນບົນພື້ນຖານຂອງສາຍພົວພັນພິເສດເທົ່ານັ້ນ, ແຕ່ຫາກຍັງເປັນການຮ່ວມສໍາພັນອັນໜຶ່ງ ທີ່ຕັດສິນການຄົງຕົວ ແລະ ຂະຫຍາຍຕົວຂອງສອງຊາດ ລາວ-ຫວຽນາມ, ການປົກປັກຮັກສາ ແລະ ເສີມຂະຫຍາຍມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ສອງພັກ-ສອງລັດ ໄດ້ກຳນົດໄວ້ນຳກັນນັ້ນ ຈະນຳຊາດທັງສອງໃຫ້ມີສະຖຽນລະພາບຢ່າງໝັ້ນຄົງ, ມີການພັດທະນາ, ຂະຫຍາຍຕົວໄປສູ່ຄວາມວັດທະນະຖາວອນ ກ້າວສູ່ສັງຄົມນິຍົມໃນອະນາຄົດ”. ປະທານ ໄກສອນ ພົມວິຫານ ໄດ້ກ່າວຕໍ່ກອງປະຊຸມໃຫຍ່ ຄັ້ງທີ IV ຂອງພັກກອມມູນິດຫວຽດນາມ ໃນວັນທີ 15 ທັນວາ 1976 ວ່າ: “ໃນປະຫວັດສາດ ຂອງການປະຕິວັດໂລກ ໄດ້ມີແວ່ນແຍງທີ່ໃສແຈ້ງແຫ່ງນໍ້າໃຈສາກົນກໍາມະຊີບມາຫລາຍແລ້ວ, ແຕ່ບໍ່ທັນມີຢູ່ໃສ ແລະ ເວລາໃດ ທີ່ມີຄວາມສາມັກຄີ, ການສໍາພັນສູ້ຮົບແບບພິເສດ, ຍາວນານ, ຮອບດ້ານ ຄືການພົວພັນ ລະຫວ່າງ ສອງຊາດ ລາວ-ຫວຽດນາມ”.

ປະທານ ໂຮ່ຈີມີນ ຜູ້ຍິ່ງໃຫຍ່ ທີ່ເປັນຜູ້ຮ່ວມສ້າງຕຳລາແຫ່ງນໍ້າໃຈມິດຕະພາບ ແລະ ຄວາມສຳພັນສູ້ລົບ, ຄວາມສາມັກຄີພິເສດ ລາວ-ຫວຽດນາມ ແລະ ຫວຽດນາມ-ລາວ ໄດ້ປະພັນບົດກອນທີ່ເປັນອຳມະຕະໄວ້ວ່າ: “ຮັກຫອມກັນໝາຍໝັ້ນ ຫລາຍສັນພູກໍ່ປີນໄຕ່, ຫລາຍນໍ້າໃຫຍ່ ແລະ ໂຄກຄ້ອຍ ຂວາງກັ້ນກໍ່ເດີນດັ້ນດຸ່ງໄປ, ສອງຊາດລາວ-ຫວຽດ ໄດ້ຝັງຄວາມຮັກຢູ່ໃນໃຈ, ຮົງຮ່າທັງແມ່ຂອງ ບໍ່ເລິກປຸນປານໄດ້”; ປະທານໄກສອນ ພົມວິ ຫານ ຍັງໄດ້ປະພັນເອົາໄວ້ອີກວ່າ: “ພູອາດຈະຖືກເຊາະເຈື່ອນ, ແມ່ນໍ້າລໍາເຊອາດຈະເຫືອດແຫ້ງ, ແຕ່ສາຍພົວພັນມິດຕະພາບ ລາວ-ຫວຽດນາມ ຈະໝັ້ນຄົງຂະໜົງແກ່ນຊົ່ວກາລະນານ”; ປະທານສຸພານຸວົງ ກໍໄດ້ມີຄໍາເວົ້າຕີລາຄາການພົວພັນ ລາວ-ຫວຽດນາມ ໄວ້ຢ່າງເລິກເຊິ່ງ ໃນໂອກາດຢ້ຽມຢາມ ຫວຽດນາມ ເມື່ອປີ 1971 ທີ່ວ່າ: “ການພົວພັນ ລາວ-ຫວຽດນາມ ແມ່ນຍິ່ງໃຫຍ່, ມະຫາສານ, ບໍ່ມີບົດເພງ ແລະ ບົດກາບກອນໃດໆທີ່ສາມາດພັນລະນານັບໄດ້, ມິດຕະພາບດັ່ງກ່າວສູງຍິ່ງກວ່າພູເຂົາ, ຍາວກວ່າແມ່ນໍ້າ, ກວ້າງໃຫຍ່ກວ່າມະຫາສະໝຸດ, ງາມກວ່າເດືອນເພັງ, ຫອມຫວນກວ່າດອກໄມ້ນາໆຊະນິດທີ່ຫອມຫວນທີ່ສຸດ”.

ໃນຕອນທ້າຍ, ສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ທອງລຸນ ສີສຸລິດ ກໍໄດ້ຕາງໜ້າໃຫ້ພັກ-ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈອັນຈິງໃຈ ແລະ ຄວາມຮູ້ບຸນຄຸນອັນລົ້ນເຫລືອຕໍ່ພັກ-ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນລ້ຳຄ່າ, ທັນການ ແລະ ມີຜົນສັກສິດ ໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄື ພາລະກິດປົກປັກຮັກ ສາ ແລະ ສ້າງສາພັດທະນາປະເທດຊາດ ຂອງພວກເຮົາ ໃນປັດຈຸບັນ. ພ້ອມທັງອວຍ ພອນໃຫ້ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ຈົ່ງໝັ້ນຄົງຂະໜົງແກ່ນ ຕະຫລອດກາລະນານ ແລະ ຂໍຖືໂອກາດນີ້ ອວຍພອນໄຊອັນປະເສີດ ໃຫ້ບັນດາສະຫາຍຫວຽດນາມ ຈົ່ງປະສົບຜົນສໍາເລັດໃໝ່, ໃຫຍ່ຫລວງກວ່າເກົ່າ ໃນການປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ຢ່າງມີໄຊ.

ໃນໂອກາດດຽວກັນນີ້, ສະຫາຍ ຫວໍ ວັນ ເຖື້ອງ ກໍໄດ້ຕາງໜ້າໃຫ້ການນຳພັກ-ລັດ ແລະ ປະຊາຊົນຫວຽດນາມອ້າຍນ້ອງ ຂຶ້ນກ່າວບົດສູນທອນພົດ, ເຊິ່ງສະຫາຍ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກ ຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ-ສສ ຫວຽດນາມ ຄື: “ສາຍພົວພັນພິເສດ ຫວຽດນາມ-ລາວ, ຄວາມສາມັກຄີສູ້ຮົບ ແລະ ມິດຕະພາບບໍ່ມີຫຍັງສາມາດເຮັດໃຫ້ສາຍພົວພັນລະຫວ່າງປະຊາຊົນ ຫວຽດນາມ-ລາວ ປ່ຽນແປງໄປໄດ້, ຖານສະຫາຍອັນຍິ່ງໃຫຍ່ລະຫວ່າງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ໄດ້ຝຶກຝົນຫລໍ່ຫລອມເປັນຫລາຍສິບປີ ຮ່ວມສຸກຮ່ວມທຸກນຳກັນ, ພ້ອມກັນສູ້ຮົບ, ພ້ອມກັນໄຊຊະນະສັດຕູຮຸກຮານ, ໃຫ້ການຮ່ວມມື ແລະ ຊ່ວຍເຫລືອເຊິ່ງກັນ ແລະ ກັນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ຈະເລີນຮຸ່ງເຮືອງ; ພັກ, ລັດ ແລະ ປະຊາຊົນຫວຽດນາມ ສະແດງຄວາມປິຕິຊົມຊື່ນ ແລະ ດີອົກດີໃຈຕໍ່ບັນດາຜົນສຳເລັດຢ່າງໃຫຍ່ຫລວງ, ຮອບດ້ານ, ມີຄວາມໝາຍປະຫວັດສາດ ທີ່ພັກ-ລັດ ແລະ ປະຊາຊົນລາວອ້າຍນ້ອງ ສາມາດຍາດໄດ້ ພາຍຫລັງ 35 ປີ ແຫ່ງການປ່ຽນແປງໃໝ່ ແລະ ບັນດາຜົນສຳເລັດອັນສຳຄັນໃນການປະຕິບັດກອງປະຊຸມໃຫຍ່ ຄັ້ງທີ XI. ພວກຂ້າ ພະເຈົ້າເຊື່ອໝັ້ນວ່າ, ພາຍໃຕ້ການນຳພາຂອງພັກປະຊາຊົນປະຕິວັດລາວ, ການບໍລິ ຫານຂອງລັດຖະບານ, ການຕິດຕາມຂອງສະພາແຫ່ງຊາດ, ເສີມຂະຫຍາຍບັນດາຜົນສຳ ເລັດ ແລະ ບົດຮຽນອັນປະເສີດ ພາຍຫລັງ 35 ປີແຫ່ງການປ່ຽນແປງໃໝ່, ປະຊາຊົນລາວ ຈະປະຕິບັດຢ່າງມີໄຊ ກອງປະຊຸມໃຫຍ່ຄັ້ງທີ 11 ຂອງພັກ, ສ້າງສຳເລັດປະເທດລາວ ສັນຕິ ພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ ຕາມຈຸດໝາຍສັງຄົມນິຍົມ, ອິດທິພົນ ແລະ ຈຸດທີ່ຕັ້ງຂອງ ສປປ ລາວ ຈະໄດ້ຍົກສູງຢູ່ພາກພື້ນ ແລະ ໃນເວທີສາກົນຢ່າງບໍ່ຢຸດຢັ້ງ.

ໃນພິທີອັນມີຄວາມໝາຍຄວາມສຳຄັນນີ້, ອະດີດທະຫານພະນັກງານປະຕິວັດ ກໍໄດ້ຂຶ້ນກ່າວສະແດງຄວາມຮູ້ສຶກຕໍ່ພິທີໂຮມຊຸມນຸມໃນມື້ນີ້ ແລະ ໄດ້ມີນັກສຶກສາຫວຽດນາມ ແລະ ນັກສຶກສາລາວ ຮ່ວມກັນອ່ານບົດກອນອວຍພອນ ໃນຫົວຂໍ້ “ມິດຕະພາບໝັ້ນຄົງຂະໜົງແກ່ນ”. ພິທີໂຮມຊຸມນຸມ ໃນຄັ້ງນີ້ ໄດ້ມີຂຶ້ນພາຍໃຕ້ບັນຍາກາດທີ່ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມຮ່ວມກັນຈັດຕັ້ງສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ແລະ ໄດ້ນໍາເນີນໄປດ້ວຍບັນຍາກາດອັນຄຶກຄື້ນມ່ວນຊື່ນ, ມີຄວາມໝາຍສໍາຄັນປະຫວັດສາດ ແລະ ປະສົບຜົນສໍາເລັດຢ່າງຈົບງາມ.

ພິທີປະດັບຫຼຽນໄຊ ແຫ່ງ ສສ ຫວຽດນາມ ໃຫ້ແກ່ ການນໍາຂັ້ນສູງ ພັກ-ລັດ ແຫ່ງ ສປປ ລາວ ໄດ້ຈັດຂຶ້ນ ຢ່າງຍິ່ງໃຫຍ່ ແລະ ສົມກຽດ ໃນຕອນບ່າຍຂອງວັນທີ 18 ກໍລະກົດ 2022, ທີ່ ຫໍປະຊຸມແຫ່ງຊາດ, ໂດຍການເປັນກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ; ສະຫາຍ ຫວໍ ວັນ ເຖື້ອງ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກກອມມູນິດຫວຽດນາມ, ຫົວໜ້າຄະນະຊີ້ນໍາລະດັບຊາດສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ ປີ 2022 ພ້ອມດ້ວຍຄະນະ; ສະຫາຍ ພັນຄໍາ ວິພາວັນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ; ສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ; ມີບັນດາສະຫາຍການນໍາພັກ-ລັດຖະບານ, ພະນັກງານ, ທະຫານ, ຕຳຫຼວດ ແລະ ພາກສ່ວນກ່ຽວຂ້ອງ ຂອງສອງຝ່າຍລາວ-ຫວຽດນາມເຂົ້າຮ່ວມຢ່າງພ້ອມພຽງ.

ໃນພິທີ, ສະຫາຍ ຫວໍ ວັນ ເຖື້ອງໄດ້ຕາງໜ້າໃຫ້ ພັກ ແລະ ລັດຖະບານ ແຫ່ງ ສສ ຫວຽດນາມ ປະດັບຫຼຽນໄຊ ໃຫ້ແກ່ ການນໍາຂັ້ນສູງ ພັກ-ລັດ ແຫ່ງ ສປປ ລາວ ທັງໝົດ 11 ສະຫາຍ ດັ່ງນີ້:

• ຫຼຽນໄຊດາວຄໍາ ມີ 02 ສະຫາຍ ຄື: ສະຫາຍ ພັນຄໍາ ວິພາວັນ ແລະ ສະຫາຍ ໄຊສົມພອນ ພົມວິຫານ.

• ຫຼຽນໄຊໂຮ່ຈິມິນ ມີ 04 ສະຫາຍຄື: ສະຫາຍ ກິແກ້ວ ໄຂຄໍາພິທູນ, ສະຫາຍ ພົອ. ວິໄລ ຫຼ້າຄໍາຟອງ, ສະຫາຍ ນາງ ສີໃສ ລືເດດມູນສອນ ແລະ ສະຫາຍ ສະເຫຼີມໄຊ ກົມມະສິດ.

• ຫຼຽນໄຊເອກະລາດ ຊັ້ນ I ມີ 05 ສະຫາຍ ຄື: ສະຫາຍ ຄໍາພັນ ເຜີຍຍະວົງ, ສະຫາຍ ອານຸພາບ ຕຸນາລົມ, ສະຫາຍ ທອງສະລິດ ມັງໝໍ່ເມກ, ສະຫາຍ ນາງ ສູນທອນ ໄຊຍະຈັກ ແລະ ສະຫາຍ ນາງ ວຽງທອງ ສີພັນດອນ.

ໃນພິທີອັນມີຄວາມໝາຍສໍາຄັນນີ້, ສະຫາຍ ພັນຄໍາ ວິພາວັນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕາງໜ້າໃຫ້ບັນດາສະຫາຍທີ່ໄດ້ຮັບການປະດັບຫຼຽນ ຂຶ້ນກ່າວຂອບໃຈ, ໂດຍໄດ້ສະແດງຄວາມຮູ້ສຶກພາກພູມໃຈແລະຖືເປັນກຽດຢ່າງສູງທີ່ໄດ້ເຂົ້າຮ່ວມພິທີສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ອັນເຕັມໄປດ້ວຍຄວາມໝາຍອັນສູງສົ່ງ, ພິເສດ ແມ່ນການປະດັບຫຼຽນໄຊສູງສຸດຂອງສສ ຫວຽດນາມມອບໃຫ້ແກ່ ການນໍາຂັ້ນສູງ ພັກ-ລັດ ສປປ ລາວ.

ການທີ່ ພັກ-ລັດສສ ຫວຽດນາມໄດ້ຕົກລົງປະດັບຫຼຽນໄຊໃຫ້ແກ່ ການນຳຂັ້ນສູງພັກ-ລັດ ຂອງ ສປປ ລາວ ໃນຄັ້ງນີ້, ຖືເປັນຂອງຂວັນອັນລ້ຳຄ່າ, ເປັນລາງວັນລະດັບສູງສຸດຂອງພັກ ແລະ ລັດຖະບານ ແຫ່ງ ສສຫວຽດນາມມອບໃຫ້ ການນໍາພັກ-ລັດ ສປປ ລາວ,ບໍ່ສະເພາະແຕ່ສ່ວນຕົວຂອງບັນດາສະຫາຍທີ່ໄດ້ຮັບການຍ້ອງຍໍເທົ່ານັ້ນ, ແຕ່ຍັງສະແດງເຖິງການຮັບຮູ້ອັນເລິກເຊິ່ງແລະຖືເປັນກຽດອັນສູງສົ່ງທີ່ມີຕໍ່ພັກ-ລັດ ແຫ່ງ ສປປ ລາວອີກດ້ວຍ. ການໄດ້ຮັບການປະດັບຫຼຽນໄຊສູງສຸດ, ເຊິ່ງເປັນຂອງຂວັນອັນລ້ຳຄ່າຂອງສະຫາຍຫວຽດນາມມອບໃຫ້ໃນຄັ້ງນີ້, ນອກຈາກເປັນກຽດສັກສີແລ້ວຍັງເປັນກຳລັງໃຈອັນໃຫຍ່ຫຼວງ, ທັງຖືເປັນພັນທະຂອງຕົນຕໍ່ການສືບຕໍ່ປະກອບສ່ວນເຂົ້າໃນພາລະກິດປົກປັກຮັກສາແລະເສີມຂະຫຍາຍມິດຕະພາບອັນມີມູນເຊື້ອ, ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ, ຫວຽດນາມ-ລາວໃຫ້ໄດ້ຮັບການຖະນຸຖະໜອມ, ປົກປັກຮັກສາແລະເສີມຂະຫຍາຍ ຈະເລີນງອກງາມຕະຫຼອດໄປ.ປະຈຸບັນ,ໃນຍຸກແຫ່ງການປົກປັກຮັກສາແລະສ້າງສາພັດທະນາປະເທດ,ມິດຕະພາບທີ່ມີມູນເຊື້ອ, ຄວາມສາມັກຄີພິເສດຂອງສອງພັກ,ສອງລັດແລະປະຊາຊົນສອງຊາດ ລາວ-ຫວຽດນາມ ໄດ້ກາຍເປັນກົດເກນພາວະວິໄສ ແຫ່ງການຄົງຕົວແລະຂະຫຍາຍຕົວຂອງສອງຊາດໂດຍປະລິຍາຍໄປແລ້ວ,ພວກເຮົາມີແຕ່ຈະພ້ອມກັນຖະນຸຖະໜອມ, ບໍ່ໃຫ້ຈືດຈາງລົງຕາມການເວລາ, ແຕ່ຍິ່ງໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍຢ່າງບໍ່ຢຸດຢັ້ງທັງລວງກ້ວາງ ແລະ ລວງເລິກ ໄວ້ໃຫ້ເຊັ່ນລູກ,ຫຼານ,ເຫຼັນ,ຫຼ້ອນຂອງພວກເຮົາ ໄດ້ສືບຕໍ່ປົກປັກຮັກສາໄປຈົນເທົ້າກາລະນານແລະຈະບໍ່ໃຫ້ສັດຕູໂຕໃດມາມ້າງເພທໍາລາຍໄດ້.

ພ້ອມນີ້, ສະຫາຍ ນາຍົກລັດຖະມົນຕີ ພັນຄໍາ ວິພາວັນ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອຢ່າງໃຫຍ່ຫຼວງ, ລ້ຳຄ່າ, ມີປະສິດທິຜົນ ແລະ ທັນການໃຫ້ແກ່ພາລະກິດປະຕິວັດຂອງ ປະຊາຊົນລາວຕະຫຼອດມາ, ບໍ່ວ່າໃນໄລຍະຕໍ່ສູ້ກູ້ຊາດໃນເມື່ອກ່ອນ ກໍ່ຄືໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ພ້ອມທັງ, ໄດ້ອວຍພອນໃຫ້ປະຊາຊົນຫວຽດນາມອ້າຍນ້ອງ ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມຜູ້ມີກຽດສະຫງ່າ ຈົ່ງປະສົບຜົນສຳເລັດໃໝ່ ໃຫຍ່ຫຼວງກວ່າເກົ່າ ໃນການປະຕິບັດເປົ້າໝາຍປະຊາຊົນຮັ່ງມີ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ, ຫັນປະເທດເປັນປະເທດອຸດສາຫະກຳຕາມທິດທັນສະໄໝແລະ ໄດ້ອວຍພອນໄຊອັນປະເສີດ ໃຫ້ແກ່ ສະຫາຍ ຫວໍວັນເຖື້ອງ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກກອມມູນິດຫວຽດນາມ, ຫົວໜ້າຄະນະຊີ້ນໍາລະດັບຊາດສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ ປີ 2022ພ້ອມດ້ວຍຄະນະ ແລະ ໄດ້ຝາກຄວາມຢ້ຽມຢາມຖາມຂ່າວ ແລະ ຄໍາອວຍພອນອັນປະເສີດ ໄປຍັງບັນດາສະຫາຍ ການນໍາ ຂອງ ພັກ ແລະ ລັດ ແຫ່ງ ສສ ຫວຽດນາມ. ພ້ອມນີ້, ກໍ່ໄດ້ສະແດງຄວາມຮູ້ບຸນຄຸນເປັນຢ່າງສູງ ຕໍ່ການໃຫ້ກຽດເຂົ້າຮ່ວມພິທີສໍາຄັນນີ້ ຂອງ ສະຫາຍ ເລຂາທິການໃຫຍ່, ປະທານປະເທດ ທອງລຸນ ສີສຸລິດ ແລະ ອວຍພອນໃຫ້ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຈົ່ງໝັ້ນຄົງຄະນົງແກ່ນຕະຫຼອດກາລະນານ.

ພິທີປະດັບຫຼຽນໄຊ ແຫ່ງ ສສ ຫວຽດນາມ ໃຫ້ແກ່ ການນໍາຂັ້ນສູງ ພັກ ແລະ ລັດຖະບານ ແຫ່ງ ສປປ ລາວ ໃນຄັ້ງນີ້ ໄດ້ດໍາເນີນໄປດ້ວຍຜົນສໍາເລັດອັນຈົບງາມ ຢ່າງຍິງໃຫຍ່ສົມກຽດ ແລະ ມີຄວາມໝາຍລໍ້າຄ່າ, ໃນທ່າມກາງບັນຍາກາດທີ່ປະຊາຊົນສອງຊາດລາວ-ຫວຽດນາມກໍາລັງສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຢ່າງເປັນຂະບວນຟົດຟື້ນ ເພື່ອລະນຶກເຖິງສອງວັນສໍາຄັນປະຫວັດສາດ ແຫ່ງການພົວພັນຮ່ວມມື ລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດຄົບຮອບ60ປີແລະວັນເຊັນສົນທິສັນຍາມິດຕະພາບແລະການຮ່ວມມືລາວ-ຫວຽດນາມຄົບຮອບ 45 ປີ.

ໃນຕອນເຊົ້າ ວັນທີ 19 ກໍລະກົດ 2022 ຢູ່ສະໂມສອນເມືອງຄຳ ແຂວງຊຽງຂວາງ ໄດ້ເປີດກອງປະຊຸມ ຄົບຄະນະບໍລິຫານງານພັກ ເມືອງຄຳ ແຂວງຊຽງຂວາງ ຄັ້ງທີ VI ກາງສະໄໝກອງປະຊຸມໃຫຍ່ຄັ້ງທີ X ຂື້້ນຢ່າງເປັນທາງການ, ພາຍໃຕ້ການເປັນປະທານຂອງ ສະຫາຍ ຄຳຟອງ ໄຊຍະແສງ ຮອງເລຂາພັກເມືອງໆຄຳ, ໂດຍການເປັນກຽດເຂົ້າຮ່ວມຂອງສະຫາຍ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງຊຽງຂວາງ ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ, ມີບັນດາພະແນກການທີ່ກ່ຽວຂ້ອງຂອງແຂວງ, ຄະນະປະຈໍໍາພັກເມືອງ, ກຳມະ ການພັກເມືອງ, ຫົວໜ້າ-ຮອງຫົວໜ້າຫ້ອງການຂອງເມືອງ, , ເລາຂາພັກກຸ່ມ, ອາດີດການນຳຂອງເມືອງ ຕະຫຼອດຮອດພະນັກງານວິຊາການເຂົ້າຮວ່ມ.

ກອງປະຊຸມໃນຄັ້ງນີ້ຍັງໄດ້ຮັບຟັງບົດສະຫຼຸບຕີລາຄາການຊີ້ນໍາ-ນຳພາວຽກງານການເມືອງກາງສະໄໝ ແລະ ທິດທາງຄາດໝາຍສູ້ຊົນແຕ່ນີ້ຮອດປີ 2024, ການເຄື່ອນໄຫວຈັດຕັ້ງປະຕິບັດຊີ້ນໍາໆພາວຽກງານຮອບດ້ານ ຂອງຄະນະບໍລິຫານງານພັກເມືອງໆຄຳໄລຍະ 2 ປີເຄິ່ງ 2020-2022 ຜ່ານມາ ແລະ ທິດທາງແຜນການ ປີ 2022-2024, ບົດສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ ປີ 2020-2022 ແລະ ແຜນການປີ 2022-2024, ຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານໂຍທາທິການ ແລະ ຂົນສົ່ງ ປີ2020-2022 ແລະ ແຜນການປີ 2022-2024, ຜ່ານຮ່າງບົດສໍາຫຼວດການນໍາພາລວມຂອງຄະນະພັກກາງສະໄໝໄລຍະ 2 ປີເຄີ່ງ (2020-2022) ຜ່ານມະຕິ ເລກທີ 030, 032/ກມສພ ແລະ ຄຳແນະນຳເລກທີ292/ຄຈສພ, ລົງວັນທີ 26/4/2018 ວ່າດ້ວຍການທາບທາມແຜນກຳນົດພະນັກງານນຳພາ-ຄຸ້ມຄອງ (ຂັ້ນແຂວງຄຸ້ມຄອງ), ຜ່ານຮ່າງບົດສະຫຼຸບການຈັດຕັ້ງປະຕິບັດວຽກປັບປຸງກົງຈັກລັດ-ພັກປີ 2020-2022 ແລະ ແຜນການປີ 2022-2024, ເຊີ່ງທີ່ປະຊຸມໄດ້ຍົກໃຫ້ເຫັນເຖີງຜົນສຳເລັດຂອງການເຄື່ອນໄຫວ, ຊີ້ນຳ-ນຳພາ ການຈັດຕັ້ງປະຕິບັດວຽກງານດ້ານຕ່າງໆ, ຂອງຄະນະພັກເມືອງ, ກຳມະການພັກເມືອງ ແລະ ອົງການທີ່ກ້ຽວຂ້ອງຂອງເມືອງ, ຜົນງານດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດວຽກງານໄລຍະ 2 ປີຜ່ານມາ.

ພ້ອມນັ້ນ, ຜູ້ເຂົ້າຮວ່ມກອງປະຊຸມແມ່ນຈະໄດ້ພອ້ມກັນເປັນເຈົ້າການຄົ້ນຄວ້າປະກອບຄຳຄິດຄຳເຫັນໃສ່ບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານດ້ານຕ່າງໆ ຂອງຄະນະບໍລິຫານງານພັກເມືອງໃນໄລຍະຜ່ານມາ ແລະ ວຽກງານແຜນພັດທະນາເສດຖະກິດ-ສັງຄົມ, ເພື່ອຄວາມເປັນເອກະພາບ, ກຳໄດ້ທິດທາງວຽກງານຈຸດສຸມໃນຕໍ່ໜ້າ, ແນ່ໃສ່ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນສຳເລັດ ໂດຍສະເພາະແມ່ນວຽກງານການຊີ້ນຳ-ນຳພາຄຽງຄູກັບການຈັດຕັ້ງປະຕິບັດ 2 ວາລະແຫ່ງຊາດໂດຍຕິດພັນກັບສະພາບເສດຖະກິດຂອງເມືອງ, ສະພາບການລົງທຶນທາງພາກລັດ ແລະ ເອກະຊົນ, ໃຫ້ແທດເໝາະກັບສະພາບການ ແລະ ສຳເລັດຕາມລະດັບຄາດໝາຍ ແລະ ພັດທະນາຍີ່ງໆຂື້ນໃນຕໍ່ໜ້າ. (ກອງປະຊຸມຄັ້ງນີ້ແມ່ນຈະດຳເນີນໄປເປັນເວລາ 2 ວັນຈີ່ງຈະອັດລົງ).

ພາບ-ຂ່າວ: ເບ່ຕ່າ ໄຊປັນຍາ(ແນວລາວສ້າງຊາດແຂວງ).

#medialaos#xiengkhouang

ຖ້າໄດ້ຊະນະເລີດ ຫຼື 300.000.000ກີບ ຖ້າໄດ້ຮອງຊະນະເລີດໃຫ້ແກ່ນັກກິລາ ທີມຊາດລາວ ທີ່ຜ່ານເຂົ້າຮອບຊິງຊະນະເລີດ ບານເຕະ AFF-U19 2022.

ເພື່ອເປັນກໍາລັງໃຈ ໃຫ້ແກ່ນັກກິລາ ບານເຕະທີມຊາດລາວ ໃນການເຂົ້າຮ່ວມແຂ່ງຂັນກິລາບານເຕະ ຊິງແຊັມອາຊຽນ ລຸ້ນອາຍຸບໍ່ເກີນ 19 ປີ (U19) ທີ່ສາມາດຜ່ານເຂົ້າສູ່ຮອບຊິງຊະນະເລີດ ບານເຕະ AFF-U19 2022 ທີ່ ປະເທດອິນໂດເນເຊຍ ທີ່ຈະເຕະກັນໃນວັນທີ 15/07/2022 ນີ້.

ບລສ ພົງຊັບທະວີ ພ້ອມທີ່ຈະເປັນສ່ວນໜຶ່ງ ໃນການຊຸກຍູ້ ສົ່ງເສີມກິລາບານເຕະ ແລະ ນັກກິລາ ທີມຊາດລາວ ເພື່ອເປັນຕົວແທນຂອງ ສປປ ລາວ ໃນການສ້າງຊື່ສຽງອັນດີ ຢູ່ໃນເວທີສາກົນ, ເປັນນັກກິລາລຸ້ນສືບທອດຂອງປະເທດຊາດໃນຕໍ່ໜ້າ ແລະ ເປັນແບບຢ່າງ ໃນການສ້າງແຮງບັນດານໃຈ ໃຫ້ແກ່ນັກກິລາລຸ້ນໃໝ່ ໃຫ້ມີຄວາມມຸ່ງໝັ້ນ ພັດທະນາຕົນເອງ ເພື່ອໃຫ້ໄດ້ເປັນຕົວແທນ ຂອງກິລາບານເຕະ ທີມຊາດລາວ ໃນລຸ້ນຕໍ່ໆໄປ.

ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຂອງລາວ ຮ່ວມກັບ ກະຊວງວັດທະນະທຳ, ກິລາ ແລະ ທ່ອງທ່ຽວ ຂອງຫວຽດນາມ ຈັດງານສັບປະດາ ວັດທະນະທຳ ຫວຽດນາມ ຢູ່ນະຄອນຫລວງວຽງຈັນໃນຕອນບ່າຍວັນທີ 18 ກໍລະກົດ 2022 ຢູ່ຫໍວັດທະນະທໍາເເຫ່ງຊາດນະຄອນຫລວງວຽງຈັນ ໃນໂອກາດສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ,ຫວຽດນາມ-ລາວ ຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມວັນທີ 9 ກັນຍາ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ວັນທີ 18 ກໍລະກົດ ຄົບຮອບ 45 ປີ, ໃຫ້ກຽດເຂົ້າຮ່ວມ ມີ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກປຊາຊົນປະຕິບວັດລາວ ຮອງນາຍົກລັດຖະມົນຕີ, ສະຫາຍ ຫວໍ ວັນ ເຖື້ອງ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ຫົວໜ້າຄະນະຊີ້ນໍາລະດັບຊາດ ສະເຫລີມສະຫລອງປີສາມັກຄີມິດຕະພາບ ຫວຽດນາມ-ລາວ, ມີ ບັນດາການນຳຂັ້ນສູງ ພັກ, ລັດ ຂອງທັງສອງປະເທດ ລາວ-ຫວຽດນາມ, ພ້ອມດ້ວຍພາກສ່ວນກ່ຽວຂ້ອງ.

ໂອກາດນີ້ ສະຫາຍ ຕະ ກວາງ ດົ່ງ ຮອງລັດຖະມົນຕີກະຊວງ ວັດທະນະທຳ, ກິລາ ແລະ ທ່ອງທ່ຽວ ຂອງຫວຽດນາມ ໄດ້ມີຄຳເຫັນ ໂດຍມີບາງຕອນທ່ານໃຫ້ຮູ້ວ່າ: ຕະຫລອດໄລຍະປະຫວັດສາດ 60 ປີແຫ່ງສາຍພົວພັນທາງການທູດ, ການຮ່ວມມືຮອບດ້ານ ຫວຽດນາມ – ລາວ ໄດ້ຮັບການເພີ່ມພູມຄນສ້າງເເລະ ເສີມຂະຫຍາຍຢຸດຢັ້ງ ແລະ ບັນລຸໄດ້ໝາກຜົນສຳຄັນໃນຂົງເຂດການເມືອງ, ເສດຖະກິດ, ຄວາມໝັ້ນຄົງແຫ່ງຊາດ, ວັດທະນະທໍາ, ການສຶກສາ, ການຮ່ວມມື ຊ່ວຍເຫລືອເຊິ່ງກັນ ແລະ ກັນລະຫວ່າງບັນດາອົງການຂອງພັກ, ສະພາແຫ່ງຊາດ, ລັດ, ລັດຖະບານ ແລະ ທ້ອງຖິ່ນຂອງຫວຽດນາມ ແລະ ລາວ ຍາມໃດກໍ່ໄດ້ຮັບການເພີ່ມທະວີ, ບັນລຸໝາກຜົນຕົວຈິງໃນຫລາຍດ້ານ ນໍາມາເຊິ່ງຜົນປະໂຫຍດຫລາຍຢ່າງ, ປະກອບສ່ວນສຳຄັນເຂົ້າໃນການພັດທະນາຊີວິດການເປັນຢູ່ຂອງປະຊາຊົນສອງປະເທດໃຫ້ນັບມື້ນັບຮັ່ງມີເຂັ້ມແຂງ. ພ້ອມນັ້ນ, ທ່ານຍັງ ໄດ້ສະແດງຄວາມເຊື່ອໝັ້ນວ່າ, ການພ້ອມກັນຈັດຕັ້ງ “ສັບປະດາວັດທະນະທຳຫວຽດນາມ ຢູ່ລາວ” ແລະ “ສັບປະດາວັດທະນະທຳລາວ ຢູ່ຫວຽດນາມ” ເນື່ອງໃນໂອກາດສະເຫລີມສະຫລອງປີສາມັກຄີມິດຕະພາບຫວຽດນາມ-ລາວ ປີ 2022 ໄດ້ ສືບຕໍ່ປະກອບສ່ວນເຂົ້າໃນການຟື້ນຟູ, ເພີ່ມທະວີສາຍພົວພັນທີ່ເປັນມູນເຊື້ອທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ ແລະ ລາວໃຫ້ນັບມື້ເເຕກດອກອອກຜົນຢ່າງບໍ່ຢຸດຢັ້ງ..

ໂອກາດດຽວກັນນີ້ ສະຫາຍ ວັນສີ ກົວມົວ ກຳມະການສຳຮອງສູນກາງພັກ, ຮອງລັດຖະມົນຕີກະຊວງຖະເເຫລງຂ່າວວັດທະນະທໍາເເລະທ່ອງທ່ຽວຂອງ ລາວ ກ່າວວ່າ: ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວຂອງລາວ ຮູ້ສຶກເປັນກຽດຢ່າງສູງທີ່ໄດ້ຮ່ວມກັບກະຊວງວັດທະນະທຳ, ກິລາ ແລະ ທ່ອງທ່ຽວ ຂອງຫວຽດນາມ ຈັດຕັ້ງງານສັບປະດາວັດທະນະທຳ ຫວຽດນາມ ຢູ່ທີ່ນະຄອນຫລວງວຽງຈັນຂອງລາວ, ພ້ອມໆກັບການຈັດຕັ້ງສັບປະດາວັດທະນະທຳລາວ ຢູ່ນະຄອນຫລວງຮ່າໂນ່ຍ ຂອງຫວຽດນາມ ໃນມື້ດຽວກັນນີ້, ເຊິ່ງເປັນການຈັດຕັ້ງຜັນຂະຫຍາຍແຜນການຮ່ວມມື ດ້ານວັດທະນະທໍາ ແລະ ທ່ອງທ່ຽວ ລະຫວ່າງ ສອງກະຊວງ ໃນສົກ 2021ຫາ2025 ແລະ ແຜນຈັດຕັ້ງປະຕິບັດກິດຈະກໍາ ປະຈໍາປີ 2022 ສະແດງໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ,ຖານອ້າຍນ້ອງ ໃນຕະຫລອດໄລຍະຜ່ານມາ ກໍຄື ໃນຍຸກແຫ່ງການເຊື່ອມໂຍງ ພ້ອມທັງ ຕາງໜ້າໃຫ້ ລັດຖະບານ ກໍຄື ກະຊວງ ຖະເເຫລງຂ່າວວັດທະນະທໍາເເລະທ່ອງທ່ຽວ ໄດ້ສະແດງຄວາມຊົມ ເຊີຍ ມາຍັງກະຊວງວັດທະນະທຳ, ກິລາ ແລະ ທ່ອງທ່ຽວ ຂອງ ຫວຽດນາມ ທີ່ໄດ້ມີ ຄວາມພະຍາຍາມສູງ ຈັດຕັ້ງສັບປະດາວັດທະນະທຳຄັ້ງນີ້ ເຊີ່ງເປັນການປະກອບສ່ວນສຳຄັນເຂົ້າໃນການສະເຫລີມສະຫລອງ ສອງວັນປະຫວັດສາດ ລາວ-ຫວຽດນາມ ຢ່າງເປັນຂະບວນຟົດຟື້ນ, ພ້ອມທັງອວຍພອນໃຫ້ງານສັບປະດາວັດທະນະທຳ ທີ່ ນະຄອນຫລວງວຽງຈັນ ຄັ້ງນີ້, ຈົ່ງປະສົບຜົນສໍາເລັດຢ່າງຈົບງາມ.

ງານສັບປະດາວັດທະນະທຳຫວຽດນາມຈັດຂື້ນຢູ່ນະຄອນຫລວງວຽງຈັນໃນຄັ້ງນີ້,ປະກອບມີ ການວາງສະແດງຮູບພາບ ທີ່ສ່ອງແສງໃຫ້ເຫັນເຖິງ ທັດສະນີຍະພາບໂດຍລວມຂອງ ຫວຽດນາມ, ພ້ອມດ້ວຍຜົນງານອັນໃຫຍ່ຫລວງ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາອັນສະຫລາດສ່ອງໃສ ຂອງພັກຄອມມູນນິດຫວຽດນາມ ນອກຈາກນີ້, ຍັງມີການສະແດງສິລະປະວັນນະຄະດີຂອງ ບັນດາ ນັກສິລະປະຫວຽດນາມ ທີ່ມີຄວາມຫລາກຫລາຍ ທາງດ້ານສິລະປະ, ວັດທະນະທຳ ອັນສວຍສົດງົດງາມ ຂອງປະຊາຊົນຫວຽດນາມ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ຕະຫລອດໄລຍະປະຫວັດສາດຍາວນານຂອງຕົນ ໂດຍສະເພາະ ໃນໄລຍະພາຍໃຕ້ການນໍາພາອັນສະຫລາດສ່ອງໃສຂອງພັກຄອມມູນິດຫວຽດນາມ, ທີ່ ສະແດງໃຫ້ເຫັນເຖິງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ຖານອ້າຍນ້ອງ ໃນຂະບວນວິວັດແຫ່ງການເຊື່ອມໂຍງກັບສາກົນ.

ຂ່າວ: ເດດອາລຸນ ເເກ້ວວິໄລ

ໃນວັນທີ 18 ກໍລະກົດ 2022 ທີ່ໂຮງງານຂອງສະຫະກອນຜູ້ຜະລິດກາເຟ ເຂດພູພຽງບໍລະເວນ ຫຼັກ 24 ເມືອງບາຈຽງຈະ ເລີນສຸກ ແຂວງຈໍາປາສັກ ໄດ້ເປີດກອງປະຊຸມສະໄໝສາມັນຄັ້ງທີ XV ຂອງສະ ຫະກອນຜູ້ຜະລິດກາເຟເຂດພູພຽງບໍລະເວນ ຢ່າງເປັນທາງການ ພາຍໃຕ້ການເປັນປະທານຂອງທ່ານ ອຳນວຍ ເຮືອງວົງສາ ຮອງເລຂາພັກເມືອງບາຈຽງຈະເລີນສຸກ, ທ່ານ ຄຳ ນີລາວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ,ທ່ານ ຫວຽນຄຳ ໄຊຍະສິດ ຮັກສາການປະທານສະຫະ ກອນຜູ້ຜະລິດກາເຟເຂດພູພຽງບໍລະເວນ. ເຂົ້າຮ່ວມມີຜູ້ຈັດການ,ຜູ້ອຳນວຍການ ແລະ ຄະນະສະຫະກອນ,ຫົວໜ້າຂະ ແໜງການ,ຫ້ອງການ,ພະນັກງານກ່ຽວ ຂ້ອງຕະຫຼອດຮອດສະມາຊິກຊາວສວນແຕ່ລະກຸ່ມເຂົ້າຮ່ວມ.

ໃນກອງປະຊຸມຄັ້ງນີ້ ທ່ານ ຫວຽນຄຳ ໄຊຍະສິດ ຮັກສາການປະທານສະຫະກອນຜູ້ຜະລິດກາເຟເຂດພູພຽງບໍລະເວນ. ໄດ້ກ່າວວ່າ: ກອງປະຊຸມສະໄໝສາມັນ ຄັ້ງທີ 15 ຂອງ ສະຫະກອນ ຜູ້ຜະລິດກາເຟ ເຂດພູພຽງບໍລະເວນ ຂອງພວກເຮົາໃນຄັ້ງນີ້ມີຄວາມສຳຄັນຫຼາຍ.ຊຶ່ງຈະໄດ້ສະຫຼຸບລາຍງານວຽກງານກິດຈະກຳສະຫະກອນຂອງພວກເຮົາເຊັ່ນວ່າ: ວຽກພາກສະໜາມ, ສ່ວນທົດ ລອງ, ຄຸນນະພາບ, ກະສິກຳອິນຊີ, ກິດຈະກຳໂຮງງານ-ຫ້ອງທົດລອງ ແລະ ໂຮງງານຝຸ່ນ, ຮັບຟັງ ແລະ ຮັບຮອງ ບົດສະຫຼຸບລາຍງານ ວຽກງານການຕະຫຼາດ ພາຍໃນ ແລະ ສາກົນ ຮັບຟັງ ແລະ ຮັບຮອງ ບົດລາຍງານ ບັນຊີ-ການ ເງິນ ແລະ ການກວດສອບ ໃນລະດູການເກັບກ່ຽວທີ່ຜ່ານມາ ສົກ 2021-2022 ແລະ ແຜນກິດຈະກຳ, ແຜນ ງົບປະມານໃນລະດູເກັບກ່ຽວ ສົກປີ 2022-2023 ພ້ອມດ້ວຍທິດທາງຈັດຕັ້ງປະຕິບັດໃນສົກປີຕໍ່ໜ້າ.

ປະຈຸບັນສະຫະກອນຜູ້ຜະລິດກາເຟເຂດພູພຽງບໍລະເວນມີສະມາຊິກກຸ່ມທັງໝົດ 37 ກຸ່ມ,​ມີ 34 ບ້ານ,​ໃນນີ້ຢູ່ເມືອງເລົ່າງາມ 11 ກູ່ມ,​ມີ 9 ບ້ານ,​ເມືອງປາກຊ່ອງ 24 ກູ່ມ,​ມີ 23 ບ້ານ,​ເມືອງທ່າແຕງ 2 ກູ່ມ,ມີ 2 ບ້ານ,​ມີສະມາຊິກທີ່ຮັບຮອງທັງໝົດ 779 ຄອບຄົວ.​1 ປີຜ່ານມາຜະລິດກາເຟນ້ອຍໝາກແດງໄດ້ 5,567,329 ກິໂລກຼາມ,ທຽບໃສ່ປີຜ່ານມາຫລຸດລົງ 35% ,ຜະລິດກາເຟກາງໝາກແດງໄດ້ 751,756 ກິໂລກຼາມ, ລື່ນແຜນການ 14 %, ແປຮູບ ແລະ ສົ່ງອອກທັງໝົດ 938,700 ກິໂລກຼາມ ເທົ່າກັບ 48 ຕູ້ຄອນເທນເນີ,ສ້າງລາຍຮັບໄດ້ 60 ຕື້ກວ່າກີບ.

ໃນກອງປະຊຸມທ່ານ ໄຊຍະກອນ ອ່ອນນາລີ ຜູ້ຈັດການ ສະຫະກອນຜູ້ຜະລິດກາເຟເຂດພູພຽງບໍລະເວນ ໄດ້ລາຍງານກິດຈະກຳວຽກພາກສະໜາມສວນທົດລອງຄຸນນະພາບ,ກະສິກຳອິນຊີ ແລະ ກິດຈະກຳ ໂຮງງານຝຸ່ນ,ທ່ານ ບຸນເຮືອງ ວົງມະນີຄູນ ຮອງຜູ້ຈັດການ,ຜູ້ອໍານວຍການຂອງສະຫະກອນຜູ້ຜະລິດກາເຟເຂດພູພຽງບໍລະເວນ ໄດ້ຜ່ານບົດລາຍງານການບັນຊີການເງິນ,ທ່ານ ຄຳພັນ ແກ້ວທະວີ ຮອງຜູ້ຈັດການ ຂອງສະຫະກອນຜູ້ຜະລິດກາເຟເຂດພູພຽງບໍລະເວນ.ໄດ້ຜ່ານຜ່ານບົດສະຫຼຸບວຽກງານການຕະຫຼາດ ພາຍໃນ ແລະ ຕ່າງປະເທດ.

ພິເສດກອງປະຊຸມເຂົ້າຮ່ວມໄດ້ມີການເລືອກເອົາຄະນະບໍລິຫານງານ ແລະ ຄະນະກວດກາ ຊຸດໃໝ່ ສະໄໝ ທີ 6 ຂອງ ສະຫະກອນ ຜູ້ຜະລິດກາເຟ ເຂດພູພຽງບໍລະເວນ ເຊິ່ງມີຜູ້ສະໝັກ 17 ທ່ານ ເລືອກເອົາ 8 ທ່ານ.ຄື: ເລືອກເອົາ ທ່ານ ສີທອງ ເພັດລັງສີ ເປັນປະທານສະ ຫະກອນ,​ ທ່ານ​ ຫວຽນຄຳ ໄຊຍະສິດ ເປັນຮອງປະທານສະຫະກອນ,​ຈາກນີ້ກໍມີ ທ່ານ ແສງເດືອນ ແສງຄີຍະວົງ,​ທ່ານ ຄໍາສີ ແກ້ວເດດສູດາສັກ, ທ່ານ ຄຳປະເສີດ ເທບໄກສອນ,​ ທ່ານ ນາງ ແສງພະຈັນ ອູດົມແສງ,​ ທ່ານ ມິດຕະພອນ ປັນຍາຈັກ ແລະ ທ່ານ ໂຫ່ຍ ຫລ້າຍະລັດ ເປັນຄະນະ.

ຄະນະສື່ມວນຊົນ ນຳພາໂດຍ ກົມສື່ມວນຊົນ ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ, ອົງການອຸຍນີເຊບ ປະຈຳລາວ ແລະ ສູນສຸຂະພາບ ແມ່ ແລະ ເດັກ ກະຊວງສາທາລະນະສຸກ ໄດ້ສຳເລັດ ການລົງເຄື່ອນໄຫວເກັບກຳຂ່າວຂະບວນສັກວັກຊິນໂຄວິດ-19 ແລະ ສັກວັກຊິນຮອບປົກກະຕິ ຢູ່ແຂວງສະຫວັນນະເຂດ ໃນລະ ຫວ່າງວັນທີ 10-16 ກໍລະກົດ 2022 ເພື່ອໂຄສະນາປຸກລະດົມຂະບວນການສັກວັກຊິນ ປີ 2022 ໃຫ້ບັນລຸຕາມເປົ້າໝາຍລັດຖະບານວາງໄວ້ 80%.

ການລົງເຄື່ອນໄຫວ ເກັບກຳຂ່າວຂະບວນສັກວັກຊິນໂຄວິດ-19 ແລະ ສັກວັກຊິນຮອບປົກກະຕິ ຢູ່ແຂວງສະຫວັນນະເຂດ ໃນຄັ້ງນີ້, ສື່ມວນຊົນໄດ້ ລົງຕິດຕາມ ແລະ ຮັບຟັງການລາຍງານກ່ຽວກັບວຽກງານການປ້ອງກັນ ແລະ ສະກັດກັ້ນການລະບາດຂອງພະ ຍາດໂຄວິດ-19 ລວມທັງ ວຽກງານການສັກວັກຊິນໂຄວິດ-19 ແລະ ສັກວັກຊິນຮອບປົກກະຕິ ຢູ່ນະຄອນໄກສອນ ພົມວິຫານ, ເມືອງພີນ, ພະລານໄຊ ແລະ ເມືອງຊົນນະບູລີ. ພ້ອມທັງລົງເບິ່ງບັນຫາຕົວຈິງກ່ຽວກັບ ຂະບວນສັກວັກຊິນ ແລະ ສຳພາດພາກສ່ວນຕ່າງໆ ທີ່ຮັບຜິດຊອບ ລວມທັງປະຊາຊົນ ໂດຍສະເພາະ ແມ່ນຄວາມຄືບໜ້າໃນການສັກວັກຊິນ, ສິ່ງທ້າທາຍ, ຄວາມຮັບຮູ້-ເຈົ້າໃຈຂອງປະຊາຊົນກ່ຽວກັບການສັກວັກຊິນ ເພື່ອນໍາໂຄສະນາເຜີຍແຜ່ໃຫ້ປະຊາຊົນ, ພະນັກງານ, ທະຫານຕໍາຫລວດ ແລະ ທຸກພາກສ່ວນໃນສັງຄົມ ໄດ້ຮັບຮູ້ ເຖິງຈຸດປະສົງ, ຄວາມສຳຄັນໃນການສັກວັກຊິນ ເພື່ອສ້າງພູມຄຸ້ມກັນ.

ທ່ານ ດຣ ທອງຄຳ ພັດຫະວົງ ຫົວໜ້າໜ່ວຍງານປຸກລະດົມຊູມຊົນ ສູນສຸຂະພາບ ແມ່ ແລະ ເດັກ ກະຊວງສາທາລະນະສຸກ ໄດ້ໃຫ້ຮູ້ວ່າ: ຜ່ານການລົງຕິດຕາມຮ່ວມກັບຄະນະສື່ມວນຊົນ ໃນຄັ້ງນີ້, ເຫັນວ່າບົດຮຽນທີ່ພວກເຮົາເຫັນຊັດເຈນ ດ້ານພື້ນຖານແມ່ນຍັງຂາດການໂຄສະນາເຜີຍແຜ່ຂໍ້ມູນຂ່າວສານ ແລະ ການປຸກລະດົມຢ່າງກວ້າງຂວາງ ເພື່ອໃຫ້ປະຊາຊົນຮັບຮູ້ ແລະ ເຂົ້າໃຈ ເຖິງຄວາມສຳຄັນຂອງການມາສັກວັກຊິນ ເຊິ່ງເປັນວຽກໜຶ່ງທີ່ພວກເຮົາຕ້ອງໄດ້ສືບຕໍ່ ເພື່ອເຮັດແນວໃດໃຫ້ການໂຄສະນາສຸຂະສຶກສາໃຫ້ປະຊາຊົນຢູ່ເຂດຫ່າງໄກສອກຫລີກ ໄດ້ເຂົ້າໃຈ ແລະ ມີຄວາມຈໍາເປັນວ່າ ວຽກງານສັກວັກຊິນປ້ອງກັນໂຄວິດ ແມ່ນມີຄວາມຈຳເປັນ, ຖ້າພວກເຮົາບໍ່ໄດ້ສັກວັກຊິນປ້ອງກັນ ຈະເຮັດໃຫ້ພະ ຍາດດັ່ງກ່າວລະບາດໄດ້, ກະຊວງສາທາລະນະສຸກ ແລະ ກະຊວງຖະແຫລງຂ່າວ, ວັດທະ ນະທໍາ ແລະ ທ່ອງທ່ຽວ ລວມທັງພາກສ່ວນກ່ຽວຂ້ອງອື່ນໆ ຕ້ອງໄດ້ຊ່ວຍກັນ ໂຄສະນາຂໍ້ມູນຂ່າວສານຕ່າງໆກ່ຽວກັບການປ້ອງກັນ ແລະ ສະກັດກັ້ນພະຍາດໃຫ້ທົ່ວເຖິງ, ພວກເຮົາຕ້ອງໄດ້ຊ່ວຍກັນ, ຮ່ວມມືແລກປ່ຽນບົດຮຽນເຊິ່ງກັນ ແລະ ກັນ, ນໍາໃຊ້ບັນດາສື່ໂຄສະນາຕ່າງໆ ເປັນຕົ້ນ ໜັງສືພິມ, ວິທະຍຸ, ໂທລະພາບ, ໂທລະໂຄ່ງ ແລະ ສື່ອື່ນໆ ກະຈາຍຂໍ້ມູນຂ່າວສານຢ່າງກວ້າງຂວາງ ແລະ ທົ່ວເຖິງ ເຊິ່ງໄລຍະຜ່ານມາ, ວຽກງານສື່ໂຄສະນາຕ່າງໆແມ່ນ ມອບໃຫ້ແຕ່ສາທາລະນະສຸກ ເປັນເຈົ້າການ ເຮັດໃຫ້ການກະຈາຍຂ່າວ, ການສົ່ງຄວາມຮູ້ຕ່າງໆກ່ຽວກັບການປ້ອງກັນຕົນເອງ ບໍ່ວ່າຈະເປັນການສັກວັກຊິນ ຫລື ກວດສຸຂະພາບທົ່ວໄປ ຍັງຄິດວ່າເປັນຂອງສ່ວນຕົວ ເປັນຂອງບຸກຄົນ, ສະນັ້ນ ເຮົາຕ້ອງເຂົາໃຈວ່າ ສຸຂະພາບມັນເປັນຂອງທຸກຄົນ ພວກເຮົາຕ້ອງໄດ້ຮ່ວມມືກັນ ໂດຍສະເພາະ ການໂຄ ສະນາຂໍ້ມູນຂ່າວ ສານ ຕ້ອງໄດ້ເວົ້າຫລາຍເທື່ອ ແລະ ຊໍ້າໄປຊໍ້າມາ.

ທ່ານ ດຣ ທອງຄຳ ພັດຫະວົງ ຍັງໃຫ້ຮູ້ອີກວ່າ: ເພື່ອເຮັດໃຫ້ການບໍລິການສັກວັກຊິນ ເຂົ້າເຖິງປະຊາຊົນຫລາຍຂຶ້ນ ພວກເຮົາຕ້ອງອາໃສ່ໜ່ວຍສັກວັກຊິນຄົງທີ່ ແລະ ໜ່ວຍເຄື່ອນທີ່ ເພື່ອເຄື່ອນໄຫວ ແຕ່ຕ້ອງໄດ້ເອົາໃຈໃສ່ປະສານສົບທົບກັບ ອຳນາດການປົກຄອງ ເພື່ອເປັນສື່ຊ່ວຍພວກເຮົາ, ທາງດ້ານແພດ ກໍຕ້ອງໄດ້ເອົາໃຈໃສ່ທາງດ້ານເຕັກນິກຕ່າງໆ, ສຳຄັນຕ້ອງໄດ້ອາໃສ່ສື່ໂຄສະນາທີ່ພວກເຮົາສ້າງຂຶ້ນ, ຕ້ອງໄດ້ລົງໂຄສະນາເລື້ອຍໆ, ທີມງານທີ່ໄປເຄື່ອນທີ່ ກໍຕ້ອງໄດ້ເຮັດວຽກເຊື່ອມສານ, ຕ້ອງໄດ້ໂຄສະນາຫລາຍໆຄັ້ງ, ເອົາຜົນດີ, ຜົນເສຍ, ຄວາມຈຳເປັນຕ້ອງໄດ້ສັກວັກຊິນປ້ອງກັນະຍາດ ໃຫ້ແກ່ປະຊາຊົນຮັບຮູ້ ແລະ ພ້ອມກັນຈັດຕັ້ງປະຕິບັດໃຫ້ວຽກງານດັ່ງກ່າວບັນລຸຕາມເປົ້າໝາຍທີ່ວາງໄວ້.

ສຳລັບວຽກງານສື່ໂຄສະນາຕ່າງໆ ແມ່ນມີຄວາມຈຳເປັນ ຕ້ອງໄດ້ສືບຕໍ່ໂຄສະນາ, ເຮັດຫລາຍໆ ຄັ້ງ, ໂຄສະນາຫລາຍໆ ເທື່ອ, ພະຍາຍາມເວົ້າຫລາຍ ເພື່ອໃຫ້ປະຊາຊົນຮັບຮູ້, ເຂົ້າໃຈຕໍ່ວຽກງານດັ່ງກ່າວ.

ຂ່າວ: ຈັນທະລອນ

ພາບ: ສຸກທະວີ

ບ້ານນາເປາະເປັນບ້ານໜຶ່ງທີ່ຂຶ້ນກັບເມືອງພີນ ແຂວງສະຫວັນນະເຂດ ແລະ ເປັນບ້ານ ເຄິ່ງຊານເມືອງປະກອບມີ 85 ຫລັງຄາເຮືອນ, ມີ 171 ຄອບຄົວ ແລະ ມີປະຊາກອນທັງໝົດ 518 ຄົນ ໃນນີ້ ມີຍິງ 268 ຄົນ, ເຊິ່ງປະຊາຊົນສ່ວນໃຫຍ່ຖືອາຊີບກະສິກໍາເຊັ່ນ: ເຮັດນາ, ລ້ຽງສັດ ແລະ ຄ້າຂາຍຈໍານວນໜຶ່ງ ເຖິງແມ່ນວ່າຊ່ວງນີ້ຈະເປັນຊ່ວງລະດູເຮັດການຜະລິດກະກຳ ແຕ່ປະຊາຊົນກໍ່ຍັງສະຫຼະເວລາພ້ອມກັນໄປສັກວັກຊີກປ້ອງກັນພະຍາດໂຄວິດ 19 ເຊິ່ງສັງເກດໄດ້ຢູ່ຈຸດສັກວັກຊິນປ້ອງກັນພະຍາດໂຄວິດ 19 ຂອງບ້ານນາເປາະ ເມືອງພີນ ໃນຕອນເຊົ້າ ວັນທີ 12 ກໍລະກົດ 2022 ໄດ້ມີປະຊາຊົນ ພາຍໃນບ້ານໃຫ້ຄວາມສົນໃຈພາກັນໄປສັກວັກ ຊິນເປັນຈໍານວນຫລວງຫລາຍ ແລະ ມີບັນຢາກາດດີພໍສົມຄວນ

ທ່ານ ໝໍ ນາງ ຄໍາແສນ ຈັນທະວົງ ຮອງຫົວໜ້າໜ່ວຍງານສົ່ງເສີມ ຮັບຜິດຊອບວຽກງານສັກຢາກັນພະ ຍາດຂັ້ນເມືອງໃຫ້ສໍາພາດວ່າ: ປັດຈຸບັນ ສະພາບການແຜ່ລະບາດຂອງພະຍາດໂຄວິດ 19 ຢູ່ແຂວງສະ ຫວັນນະເຂດເວົ້າລວມ ເວົ້າສະເພາະແມ່ນຢູ່ເມືອງພີນເຫັນວ່າຫຼຸດລົງຕໍ່ເນື່ອງ ແລະ ມາຮອດປັດຈຸບັນແມ່ນບໍ່ມີໂຕເລກຜູ້ຕິດເຊື້ອພະຍາດໂຄວິດ 19 ເລີຍ, ສະນັ້ນ ອັດຕາໃນການສັກວັກຊິນປ້ອງກັນໂຄວິດ 19 ຂອງປະຊາຊົນພາຍໃນເມືອງນັບມື້ຫຼຸດລົງ ສາເຫດຍ້ອນປະຊາຊົນຈໍານວນໜຶ່ງຍັງຄິດວ່າ ເມື່ອສັກແລ້ວຈະມີຜົນຂ້າງຄຽງເປັນໄຂ້,ເຈັບປວດຕົນໂຕ,ປະຊາຊົນບາງກຸ່ມຍັງເຊື່ອຖືຮີດເກົ່າຄອງເດີມ ແລະ ອີກກຸ່ມໜຶ່ງແມ່ນພວກທີ່ຕິດຢາເສບຕິດ ທີ່ຍັງຖືເບົາ ແລະ ບໍ່ໃຫ້ການຮ່ວມມື.

ສ່ວນປະຊາຊົນທີ່ໄດ້ໄປສັກວັກຊິນປ້ອງກັນພະຍາດໂຄວິດ 19 ໃນຄັ້ງນີ້ໄດ້ໃຫ້ທັດສະນະວ່າ: ມີຄວາມ ພາກພູມໃຈຫລາຍທີ່ພັກ ແລະ ລັດຖະບານກໍ່ຄືຄະນະສະເພາະກິດຂັ້ນແຂວງ ທີ່ໃຫ້ຄວາມສໍາຄັນແກ່ ປະຊາຊົນໃນການສັກວັກຊິນປ້ອງກັນພະຍາດໂຄວິດ 19 ຄັ້ງນີ້ ເຊິ່ງການສັກວັກຊິນກໍ່ເປັນສິ່ງທີ່ດີຢ່າງໜຶ່ງ ໃນການຊ່ວຍປ້ອງກັນພະຍາດໂຄວິດ 19 ທັງຊ່ວຍປ້ອງກັນໃຫ້ຕົວເອງໃນການຕິດເຊື້ອພະຍາດ ຫລື ວ່າຕິດເຊື້ອແລ້ວກໍ່ຈະບໍ່ເກີດອາການຮຸນແຮງສໍາລັບຜູ້ທີ່ໄດ້ສັກວັກຊິນຄົບໂດສແລ້ວ.

ມາຮອດປັດຈຸບັນອັດຕາການສັກວັກຊິນຂອງປະຊາຊົນພາຍໃນບ້ານນາເປາະ ເຂັມທີ 1 ບັນລຸໄດ້ຫລາຍກວ່າ 80%, ເຂັມທີ 2 ບັນລຸໄດ້ຫລາຍກວ່າ 60% ແລ້ວ

ສະໜັບສະໜູນໂດຍ: #Unicef

ນະຄອນຫຼວງຂອງ ສປປ ລາວ ປະກາດເປັນນະຄອນຫຼວງສຸຂານາໄມ ເປັນນະຄອນຫຼວງທຳອິດ ໃນບັນດາປະເທດອາຊຽນ ທີ່ຢຸດຕິການຖ່າຍຊະຊາຍ.

ນະຄອນຫຼວງວຽງຈັນ, ວັນທີ 14 ກໍລະກົດ 2022 – ສປປ ລາວ ໄດ້ບຸກທະລຸຢ່າງແຂງແຮງ ຜັກດັນວຽກສຸຂານາໄມໃຫ້ຄືບ ໜ້າ  ດ້ວຍການປະກາດນະຄອນຫຼວງວຽງຈັນເປັນນະຄອນຫຼວງສຸຂານາໄມ ເຊີ່ງເປັນນະຄອນຫຼວງທຳອິດ ໃນພາກພື້ນອາຊຽນທີ່ໄດ້ຮັບການປະກາດເປັນນະຄອນຫຼວງສຸຂານາໄມ ແລະ ເປັນແຂວງທີ່ 2 ທັດຈາກແຂວງບໍລິຄໍາໄຊທີ່ສາມາດບັນລຸຂີດໝາຍອັນສໍາຄັນນີ້ ຫຼັງຈາກແຂວງບໍລິຄໍາໄຊ ໄດ້ຢຸດຕິການຖ່າຍຊະຊາຍໃນປີ 2020.

ພິທີດັ່ງກ່າວໄດ້ຈັດຂຶ້ນທີ່ນະຄອນຫຼວງວຽງຈັນໂດຍມີ ທ່ານ ອາດສະພັງທອງ ສີພັນດອນ ເຈົ້່າຄອງນະຫຼວງວຽງຈັນ ໄດ້ປະກາດນະຄອນຫຼວງເປັນນະຄອນສຸຂານາໄມ. ມີຜູ້ເຂົ້່່າຮ່ວມຫຼາຍກວ່າ 170 ຄົນ ຊຶ່ງລວມມີ ທ່ານ ປອ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ທ່ານ ດຣ. ເພຍ ເຣເບລໂລ ບຣິດໂຕ, ຫົວໜ້າອົງການຢູນີເຊັບ ປະຈໍາ ສປປ ລາວ ຮ່ວມກັບຕົວແທນຈາກແຂວງ, ກະຊວງ, ຫ້ອງການຕ່າງໆ ແລະ ຄູ່ຮ່ວມພັດທະນາ.

“ມື້ນີ້ແມ່ນມື້ສໍາຄັນສໍາລັບທຸກຄົນ ພວກເຮົາກໍາລັງກ້າວໄປສູ່ເປົ້າໝາຍ ເປັນປະເທດທີ່ຢຸດຕິການຖ່າຍຊະຊາຍ ໂດຍໃນປະຈຸບັນນີ້ ມີຫຼາຍຫວ່າ 5,000 ບ້ານ, 37 ເມືອງ ແລະ 2 ແຂວງທີ່ບັນລຸເປົ້າໝາຍໄດ້ແລ້ວ” ກ່າວໂດຍ ທ່ານ ປອ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ. “ຊົມເຊີຍຊາວນະຄອນຫຼວງວຽງຈັນທີ່ຍາດໄຊຊະນະອັນເປັນປະຫວັດສາດນີ້ມາໄດ້”.

ນະຄອນຫຼວງວຽງຈັນເປັນໜື່ງໃນແຂວງທີ່ມີປະຊາກອນຫຼາຍຢູ່ໃນປະເທດ. ນາມສະຍົດໃໝ່ທີ່ໄດ້ຮັບນີ້ ແມ່ນຈະເຮັດໃຫ້ປະຊາກອນຫຼາຍກວ່າ 800,000 ຄົນ ໄດ້ດໍາລົງຊີວິດຢູ່ໃນສະພາບແວດລ້ອມທີ່ສະອາດຍ້ອນການປັບປຸງດ້ານສຸຂານາໄມໃຫ້ດີຂຶ້ນ.

“ຕາມແຜນພວກເຮົາຕັ້ງເປົ້າຈະໃຫ້ສໍາເລັດວຽກສຸຂານາໄມໃນປີ 2023 ແຕ່ທາງນະຄອນຫຼວງວຽງຈັນສາມາດຈັດຕັ້ງປະຕິບັດ ແລະ ປະກາດນະຄອນຫຼວງໄດ້ກ່ອນ.  ດຽວນີ້ທຸກຄົນບໍພຽງແຕ່ມີວິດຖ່າຍ ແຕ່ນໍາໃຊ້ວິດຖ່າຍ” ກ່າວໂດຍ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ. “ພວກເຮົາບັນລຸເປົ້າໝາຍໄດ້ກໍແມ່ນຍ້ອນການຈັດຕັ້ງທຸກພາກສ່ວນ ແລະ ພໍ່ແມ່ປະຊາຊົນໄດ້ເອົາໃຈໃສ່ ປະກອບສ່ວນເຮັດໃຫ້ຊາວນະຄອນຫຼວງວຽງຈັນ ມີສຸຂະພາບແຂງແຮງ”.

ການຂາດສຸຂາພິບານແມ່ນຈະສົ່ງຜົນກະທົບອັນໃຫຍ່ຫຼວງຕໍ່ສຸຂະພາບຂອງເດັກ, ເຮັດໃຫ້ເຂົາເຈົ້າເຕັ້ຍຍ້ອນຂາດສານອາຫານຊໍ້າເຮື້ອ ແລະ ເຮັດໃຫ້ມີການແຜ່ລະບາດຂອງພະຍາດຕ່າງໆ ທີ່ສາມາດປ້ອງກັນໄດ້. ການຢຸດຕິການຖ່າຍຊະຊາຍແມ່ນບາດກ້າວທໍາອິດເພື່ອບັນລຸສຸຂານາໄມ ແລະ ຄວບຄຸມພະຍາດ.

“ທຸກປີມີເດັກນ້ອຍຫຼາຍກວ່າ 700 ຄົນເສຍຊີວິດຍ້ອນພະຍາດຖອກທ້ອງໃນທົ່ວປະເທດ ແລະ ມີເດັກ 1 ໃນ 3 ຄົນ ເປັນພະຍາດຂາດສານອານແບບຊໍາເຮື້ອ. ຕົວຊີ້ວັດເຫຼົ່ານີ້ປະກອບແມ່ນຂໍ້ມູນອ້າງອີງໃນການສະໜັບສະໜູນ ສປປ ລາວ ຫຼຸດພົ້ນອອກຈາກສະຖານະພາບປະເທດທີ່ດ້ອຍພັດທະນາ. ແຕ່ພວກເຮົາສາມາດປ້ອງກັນໄດ້ ໂດຍການນໍາໃຊ້ສິ່ງອໍານວຍຄວາມສະດວກດ້ານສຸຂາພິບານຂັ້ນພຶ້ນຖານ, ການລ້າງມືໃສ່ສະບູ ແລະ ດື່ມນໍ້າທີ່ສະອາດປອດໄພ” ກ່າວ ໂດຍ ດຣ. ເພຍ ຣີເບລໂລ ບຣີໂຕ. “ຢູນີເຊັບມີຄວາມມຸ້ງໝັ້ນເຮັດວຽກກັບລັດຖະບານ, ຊຸມຊົນ ແລະ ຄູ່ຮ່ວມງານເພື່ອບັນລຸເປົ້າສຸຂາພິບານທີ່ຕັ້ງໄວ້ເພື່ອໃຫ້ເດັກນ້ອຍທຸກຄົນໄດ້ຮັບຜົນປະໂຫຍດສູງສຸດ”.

ລັດຖະບານ ສປປ ລາວ ໄດ້ເລີ່ມຈັດຕັ້ງປະຕິບັດ ຊຸມຊົນເປັນເຈົ້າການວຽກສຸຂານາໄມໃນປີ 2008 ແລະ ດ້ວຍຄວາມພະຍາຍາມ ແລະ ຄວາມສູ້ຊົນຢ່າງບໍ່ຮຸ້ອິດເມື່ອຍມາຫຼາຍປີ ທາງຊຸມຊົນໂດຍການສະໜັບສະໜູນຈາກພາກລັດ ແລະ ຄູ່ຮ່ວມງານຕ່າງໆ ເຮັດໃຫ້ມີຂະບວນການອັນຂັນແຂງ ແລະ ມີຄວາມຄືບໜ້າໃນທົ່ວປະເທດ. ອີງໃສ່ຄວາມຄືບໜ້າດັ່ງກ່າວນີ້, ລັດຖະບານກຽມສ້າງແຜນການແຫ່ງຊາດເພື່ອຢຸດຕິການຖ່າຍຊະຊາຍໃຫ້ໄດ້ໃນປີ 2025.

#Medialaos MMD (ແຫຼ່ງຂໍ້ມູນຈາກ: ອົງການ ຢູນີເຊັບ ປະຈຳ ສປປ ລາວ)