ທ່ານ ແຟັກ ນັງໂດ ກອງຊາເລສ ໂຢ ວິລະຊົນແຫ່ງຊາດ ສ ກູບາ, ປະທານສະຖາບັນກູບາ ເພື່ອມິດຕະພາບ ກັບນາໆຊາດ ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນອາທິດຜ່ານມາ ໂດຍທ່ານໄດ້ຍົກໃຫ້ເຫັນເຖິງບົດບາດ ແລະ ຄວາມສຳຄັນຂອງສະຖາບັນກູບາ ເພື່ອມິດຕະ ພາບກັບນາໆຊາດ.

ທ່ານ ແຟັກ ນັງໂດ ກອງຊາເລສ ໂຢ ໄດ້ກ່າວວ່າ: ສະຖາບັນກູບາ ເພື່ອມິດຕະພາບກັບນາໆຊາດ ສ້າງຕັ້ງຂຶ້ນປີ 1960 ເພື່ອສ້າງສາຍສຳພັນ ແລະ ຜູກມິດ ກັບບັນດາປະຊາຄົມໂລກ ຫລື ປະເທດຕ່າງໆຢູ່ໃນໂລກ ເຊິ່ງສະຖາບັນໄດ້ເສີມຂະຫຍາຍ ພາລະບົດບາດຂອງຕົນ ພົວພັນກັບອົງການຈັດຕັ້ງຕ່າງໆ ໃນຂອບເຂດທົ່ວປະເທດ ໂດຍສະເພາະແມ່ນ ສະມາຄົມມິດຕະພາບ ລາວ-ກູບາ ເປົ້າໜາຍເພື່ອເສີມຂະຫຍາຍສາຍພົວພັນມິດຕະພາບລະຫວ່າງ ສອງປະເທດ, ຜ່ານມາສະຖາບັນກູບາເພື່ອມິດຕະ ພາບກັບນາໆຊາດ ຍາມໃດກໍໃຫ້ການສະໜັບສະໜູນສະມາຄົມມິດຕະພາບກູບາ ໃນເວທີສາກົນຕ່າງໆ.

ສະຖາບັນກູບາ ເພື່ອມິດຕະພາບກັບນາໆຊາດ ເປັນອົງການຈັດຕັ້ງໜຶ່ງທີ່ໂຄສະນາວັດທະນະທຳ, ສັງຄົມຂອງກູບາ ໄປສູ່ບັນດາປະເທດຕ່າງໃນທົ່ວໂລກເພື່ອໃຫ້ຮັບຮູ້ ແລະ ເຂົ້າໃຈກ່ຽວກັບຮີດຄອງປະເພນີອັນດີງາມຂອງກູບາ, ໃນໄລຍະການ ແພ່ລະບາດຂອງພະຍາດໂຄວິດ-19 ນັ້ນ ປະເທດກູບາ ໄດ້ສົ່ງຄະນະແພດເຖິງ 40 ຄະນະໄປປະຈຳຢູ່ປະເທດຕ່າງໃນທົ່ວໂລກ ເພື່ອຕ້ານການລະບາດຂອງພະຍາດດັ່ງກ່າວ.

ໂອກາດນີ້, ທ່ານ ແຟັກ ນັງໂດ ກອງຊາເລສ ໂຢ ກໍໄດ້ສະແດງຄວາມຂອບໃຈຢ່າງຈິງໃຈ ແລະ ຮູ້ບູນຄຸນມາຍັງພັກ-ລັດ ແລະ ປະຊາຊົນລາວ ທີ່ຍາມໃດ ກໍໄດ້ຢູ່ຄຽງບ່າຄຽງໄຫລ່ ແລະ ໃຫ້ການສະໜັບສະໜູນ ໃຫ້ແກ່ ສ ກູບາ ຂອງພວກເຮົາ.

ຂ່າວ: ທຸກທະວີ

ພາບ: ເກດສະໜາ

ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ຕອນຄ່ຳ ວັນທີ 16 ພະຈິກ 2022 ນີ້, ຢູ່ສະຖານທີ່ຈັດກອງປະຊຸມສຸດຍອດກຸ່ມ G20 ທີ່ເກາະບາຫລີ ປະເທດອິນໂດເນເຊຍ, ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ໂຈໂກວິໂດໂດ ປະທານາທິບໍດີອິນໂດເນເຊຍ ໄດ້ອອກຄຳສັ່ງ ຮ່ວມກັນໂດຍປະກາດເລີ່ມທົດລອງແລ່ນລົດຕາມທາງລົດໄຟຄວາມໄວສູງ ຈາກາຕາ-ບັນດຸງ.

ການທົດລອງແລ່ນລົດເທື່ອນີ້ແມ່ນໄດ້ດຳເນີນໄປດ້ວຍດັດຊະນີ ແລະ ຕົວເລກຕ່າງໆທີ່ດີເຊິ່ງເປັນຂີດໝາຍສະແດງໃຫ້ເຫັນວ່າ: ການທົດລອງ ແລ່ນລົດເປັນຄັ້ງທຳອິດ ຕາມທາງລົດໄຟຄວາມໄວສູງ ຈາກາຕາ-ບັນດຸງ ທີ່ຈີນກັບອິນໂດເນເຊຍຮ່ວມມືກໍ່ສ້າງນັ້ນໄດ້ປະສົບຜົນສຳເລັດຢ່າງຈົບງາມ. ຕາມຂ່າວແຈ້ງວ່າ: ທາງລົດໄຟຄວາມໄວສູງ ຈາກາຕາ-ບັນດຸງ ເປັນທາງລົດ ໄຟຄວາມໄວສູງສາຍທຳອິດຂອງອິນໂດເນເຊຍ ກໍຄືຂອງອາຊີຕາເວັນອອກສຽງໃຕ້, ເຊື່ອມຕໍ່ນະຄອນຫລວງຈາກາຕາ ກັບນະຄອນບັນດຸງ ທີ່ເປັນຕົວ ເມືອງທີ່ມີຊື່ສຽງດ້ານການທ່ອງທ່ຽວຂອງອິນໂດເນເຊຍ. ຍາວທັງໝົດ 142 ກິໂລແມັດ, ຄວາມໄວສູງສຸດບັນລຸເຖິງ 350 ກິໂລແມັດຕໍ່ຊົ່ວໂມງ, ເປັນໂຄງ ການທີ່ເປັນຂີດໝາຍສຳຄັນໃນການຮ່ວມກັນກໍ່ສ້າງ ໜຶ່ງແລວໜຶ່ງເສັ້ນ ທາງ ລະຫວ່າງ ຈີນກັບອິນໂດເນເຊຍ.

ເມື່ອປະມານໜຶ່ງປີກ່ອນ ກໍຄືຕອນບ່າຍຂອງວັນທີ 3 ທັນວາປີ 2021 ຜ່ານມານີ້, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກ ກອມມູນິດຈີນ ປະທານປະເທດແຫ່ງ ສປ ຈີນ ແລະ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ໄດ້ເຂົ້າຮ່ວມພິທີເປີດນຳໃຊ້ທາງລົດໄຟ ລາວ-ຈີນ ຮ່ວມກັນຜ່ານທາງວິດີໂອ. ມາຮອດວັນທີ 15 ພະຈິກ 2022 ນີ້, ປະລິມານການຂົນສົ່ງສິນຄ້າຂ້າມຊາດຕາມ ທາງລົດໄຟ ລາວ-ຈີນ ໄດ້ບັນລຸ ຫລາຍກວ່າ 2 ລ້ານໂຕນ. ປັດຈຸບັນ, ຢູ່ຈີນມີ 25 ແຂວງ, ເຂດປົກຄອງຕົນ ເອງ ແລະກຳແພງນະຄອນ ໄດ້ເປີດນຳໃຊ້ຂະບວນລົດໄຟຂົນສົ່ງສິນຄ້າຂ້າມ ຊາຍແດນຕາມທາງລົດໄຟ ລາວ-ຈີນ ແລ້ວ, ການຂົນສົ່ງສິນຄ້າຂ້າມ ຊາຍແດນຕາມທາງລົດໄຟ ລາວ-ຈີນ ໄດ້ປົກຄຸມຫລາຍປະເທດ ແລະເຂດ

ແຄວ້ນເຊັ່ນ: ລາວ, ໄທ, ມຽນມາ, ມາເລເຊຍ, ກຳປູເຈຍ, ສິງກະໂປ ແລະ ອື່ນໆ, ປະເພດສິນຄ້າໄດ້ເພີ່ມຂຶ້ນຈາກ 100 ກວ່າຊະນິດ ໃນໄລຍະເບື້ອງຕົ້ນ ຂອງການເປີດນຳໃຊ້ມາເປັນ 1.200 ກວ່າຊະນິດໃນປັດຈຸບັນເຊັ່ນ: ເຄື່ອງເອເລັກໂຕຣນິກ, ອຸປະກອນການຜະລິດໄຟຟ້າດ້ວຍແສງຕາເວັນ, ການຂົນສົ່ງໝາກໄມ້ແຊ່ເຢັນແລະອື່ນໆ.

ຫລາຍປີມານີ້, ຈັງຫວະການອອກໄປສູ່ພາຍນອກຂອງທາງລົດໄຟຈີນ ນັບມື້ນັບໄວຂຶ້ນໂດຍໄດ້ໄປສູ່ອາຊີ, ເອີຣົບ, ອາເມຣິກາເໜືອ ແລະ ອາຟຣິກາ ໄດ້ກາຍເປັນສັນຍາລັກຂອງການກໍ່ສ້າງ ໜຶ່ງແລວໜຶ່ງເສັ້ນທາງ ແລະການ ຮ່ວມມືສາກົນດ້ານຄວາມສາມາດການຜະລິດ, ທັງເປັນການປະກອບສ່ວນ ດ້ານກຳລັງຂອງຈີນເຂົ້າໃນພາລະກິດພັດທະນາຂອງທົ່ວໂລກ. ພາຍຫລັງຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໄດ້ສະເໜີອອກມາເປັນເວລາ 9 ປີມານີ້, ຈີນໄດ້ຮ່ວມມືກັບຫລາຍປະເທດໃນການສ້າງທາງລົດໄຟຕ່າງໆເຊັ່ນ: ທາງລົດໄຟ ມົມບາຊາ-ເນໂຣບີ, ທາງລົດໄຟ ລາວ-ຈີນ, ທາງລົດໄຟ ຮົງກາຣີ-ແຊັກບີ, ທາງລົດໄຟຄວາມໄວສູງ ຈາກາຕາ-ບັນດຸງ ເຊິ່ງບໍ່ພຽງແຕ່ ໄດ້ນຳເອົາຜະລິດຕະພັນ, ເຕັກໂນໂລຊີ ແລະການບໍລິການຂອງຈີນ ໄປສູ່ ປະເທດດັ່ງກ່າວ ແລະສ້າງໂອກາດການພັດທະນາໃຫ້ກັບປະເທດ ທີ່ກ່ຽວຂ້ອງເທົ່ານັ້ນ, ຫາກຍັງໄດ້ສົ່ງເສີມມິດຕະພາບລະຫວ່າງ ຈີນກັບປະເທດທີ່ກ່ຽວຂ້ອງອີກດ້ວຍ.

ຈີນໄດ້ຮັບຜົນສຳເລັດທີ່ປະຈັກຕາດັ່ງກ່າວຕົ້ນຕໍແມ່ນຍ້ອນການປະດິດ ສ້າງໃໝ່ ແລະການພັດທະນາຂອງຕົນໃນດ້ານທາງລົດໄຟ. ມາຮອດທ້າຍປີ 2021, ທາງລົດໄຟຄວາມໄວສູງ ທີ່ເປີດບໍລິການແລ່ນລົດຂອງຈີນ ມີຄວາມ ຍາວເຖິງ 40.000 ກວ່າກິໂລແມັດ ເຊິ່ງໄດ້ກວມເອົາ 2/3 ຂອງເສັ້ນທາງລົດ ໄຟຄວາມໄວສູງໃນທົ່ວໂລກ; ມີສິດທິບັດເປັນຂອງຕົນ 946 ລາຍການ ແລະ ໄດ້ເປີດເຜີຍມາດຕະຖານເຕັກນິກທາງລົດໄຟຈີນສະບັບພາສາຕ່າງປະເທດ 150 ກວ່າລາຍການ; ເຕັກນິກທາງລົດໄຟຂອງຈີນ ໃນດ້ານຄວາມໄວສູງ, ຢູ່ເຂດພູພຽງ, ຢູ່ເຂດໜາວຈັດ ແລະ ທາງລົດໄຟບັນທຸກວັດຖຸໜັກໄດ້ຢູ່ໃນ ອັນດັບແຖວໜ້າຂອງໂລກ.

ສະຫະພັນແມ່ຍິງ ກະຊວງການຕ່າງປະເທດ ຈັດງານລ້ຽງນໍ້າຊາ ປະຈໍາປີ 2022 ໃນວັນທີ 18 ພະຈິກ 2022, ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ເພື່ອເປັນການພົບປະແລກປ່ຽນວັດທະນະທໍາ ກັບບັນດາທູຕານຸທູດ-ນັກການທູດຍິງ ຂອງບັນດາສໍານັກງານຕາງໜ້າການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ ໂດຍການເປັນປະທານຂອງ ທ່ານ ນາງ ອາລຸນີ ກົມມະສິດ ປະທານກິດຕິມະສັກ ສະຫະພັນແມ່ຍິງກະຊວງການຕ່າງປະເທດ, ພັນລະຍາທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ມີບັນດາພັນລະຍາການນໍາ, ການນໍາເພດຍິງ, ນັກການທູດຍິງ ຂອງກະຊວງການຕ່າງປະເທດປະເທດ, ບັນດາພັນລະຍາທູຕານຸທູດ, ນັກການທູດຍິງ ຈາກສໍານັກງານຕາງໜ້າການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ, ຕາງໜ້າຈາກສູນກາງສະຫະພັນແມ່ຍິງລາວ, ສະຫະພັນແມ່ຍິງບັນດາກະຊວງ, ອົງການທຽບເທົ່າ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານ ນາງ ອາລຸນີ ກົມມະສິດ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງການຈັດງານລ້ຽງນໍ້າຊາ ເຊິ່ງເປັນກິດຈະກໍາທີ່ ສະຫະພັນແມ່ຍິງກະຊວງການຕ່າງປະເທດ ຈັດຂຶ້ນເປັນປະຈໍາທຸກປີ ເພື່ອໃຫ້ນັກການທູດຍິງ ຂອງກະຊວງການຕ່າງປະເທດລາວ, ບັນດາພັນລະຍາທູຕານຸທູດ, ຫົວໜ້າສໍານັກງານ ແລະ ນັກການທູດຍິງ ຂອງບັນດາສໍານັກງານຕາງໜ້າການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ ໄດ້ພົບປະສ້າງຄວາມລື້ງເຄີຍ, ຄວາມສະໜິດສະໜົມ ແລະ ຄວາມຮັກແພງ, ພ້ອມທັງເປັນການແລກປ່ຽນວັດທະນະທໍາ ເຊິ່ງກັນ ແລະ ກັນ. ພ້ອມກັນນີ້, ທ່ານຍັງໄດ້ສະແດງຄວາມຂອບໃຈ ຕໍ່ບັນດາແຂກທີ່ເຂົ້າຮ່ວມງານໃນຄັ້ງນີ້, ພ້ອມທັງໄດ້ກ່າວສະແດງຄວາມຂອບໃຈຕໍ່ ບັນດາສໍານັກງານຕາງໜ້າການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ ທີ່ໄດ້ໃຫ້ການຊ່ວຍເຫລືອ ແລະ ການຮ່ວມມື ປະກອບສ່ວນສໍາຄັນເຂົ້າໃນການພັດທະນາ ສປປ ລາວ ກໍຄື ການຊ່ວຍເຫລືອແມ່ຍິງ ແລະ ເດັກນ້ອຍລາວ ຕະຫລອດໄລຍະຜ່ານມາ ແລະ ສະແດງຄວາມຫວັງວ່າ ຈະສືບຕໍ່ໃຫ້ການສະໜັບສະໜູນ ສປປ ລາວ ໂດຍສະເພາະ ການສ້າງຄວາມເຂັ້ມແຂງໃຫ້ແກ່ແມ່ຍິງລາວ ເພື່ອສາມາດບັນລຸໄດ້ຕາມແຜນຍຸດທະສາດທີ່ວາງໄວ້.

ທ່ານ ນາງ ອາລຸນີ ກົມມະສິດ ຍັງໄດ້ຍົກໃຫ້ເຫັນບາງກິດຈະກໍາການເຄື່ອນໄຫວທີ່ພົ້ນເດັ່ນຂອງ ສະຫະພັນແມ່ຍິງກະຊວງການຕ່າງປະເທດ ແລະ ກຸ່ມແມ່ຍິງອາຊຽນ ໃນໄລຍະຜ່ານມາ ໂດຍສະເພາະການປະກອບສ່ວນຊ່ວຍເຫລືອສັງຄົມ ໃນໄລຍະການແພ່ລະບາດຂອງພະຍາດໂຄວິດ-19 ແລະ ຈະສືບຕໍ່ຮ່ວມກັບພາກສ່ວນຕ່າງໆ ໃນການສ້າງຫລາຍກິດຈະກໍາທີ່ເປັນປະໂຫຍດ ເພື່ອປະກອບສ່ວນເຂົ້າໃນການເພີ່ມທະວີຄວາມສາມັກຄີຮັກແພງ, ສະໜິດສະໜົມ, ທັງເປັນການປະກອບສ່ວນເຂົ້າໃນການສົ່ງເສີມການພົວພັນຮ່ວມມືທີ່ດີ ລະຫວ່າງ ສປປ ລາວ ແລະ ບັນດາປະເທດຕ່າງໆ ເພື່ອຍົກສູງພາລະບົດບາດ ແລະ ຄວາມອາດສາມາດຂອງແມ່ຍິງ ກໍຄື ນັກການທູດຍິງ ໃຫ້ນັບມື້ນັບເຂັ້ມແຂງ.

ໃນງານລ້ຽງນໍ້າຊາ ຄັ້ງນີ້, ໄດ້ມີການວາງສະແດງສິນຄ້າຫັດຖະກໍາ ແລະ ອາຫານລາວ ຂອງບັນດາໜ່ວຍແມ່ຍິງ ພາຍໃນກະຊວງການຕ່າງປະເທດ ແລະ ຍັງມີການວາງສະແດງສິນຄ້າ, ເຄື່ອງທີ່ລະນຶກ, ອາຫານເອກະລັກປະຈໍາຊາດ ແລະ ອື່ນໆ ຂອງບັນດາສໍານັກງານການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ. ນອກນັ້ນ, ຍັງມີການສະແດງສິລະປະ ຂອງເອື້ອຍນ້ອງແມ່ຍິງກະຊວງການຕ່າງປະເທດ ແລະ ສິລະປະອັນເປັນເອກະລັກປະຈໍາຊາດຂອງ ບັນດາສໍານັກງານການທູດຕ່າງປະເທດ, ເຊິ່ງໄດ້ສ້າງບັນຍາກາດອັນຄຶກຄື້ນ, ເບີກບານມ່ວນຊື່ນ ແລະ ປະທັບໃຈ ໃຫ້ແກ່ຜູ້ເຂົ້າຮ່ວມ.

ພາບ: ເກດສະໜາ

ງານວາງສະແດງສິນຄ້າຈີນ-ອາຊີໃຕ້ ຄັ້ງທີ 6 ແລະ ງານວາງສະແດງສິນຄ້ານຳເຂົ້າ-ສົ່ງອອກຄຸນໝິງ ຄັ້ງທີ 26 ໄດ້ໄຂຂຶ້ນຢ່າງເປັນທາງການຢູ່ນະຄອນຄຸນໝິງ ແຂວງຢຸນນານ ສປ ຈີນ ໃນຕອນເຊົ້າວັນທີ 19 ພະຈິກ 2022 ພາຍໃຕ້ຫົວຂໍ້ “ແບ່ງປັນໂອກາດໃໝ່ ແລະ ຊອກຫາການພັດທະນາໃໝ່” ເຊິ່ງ ສປປ ລາວ ເຂົ້າຮ່ວມ ໃນຖານະປະເທດກິຕິມະສັກ.

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ໄດ້ ມີຄຳເຫັນຕໍ່ງານວາງສະແດງສິນຄ້າ ດັ່ງ ກ່າວ ຜ່ານລະບົບທາງໄກ ໂດຍທ່ານໄດ້ສະແດງຄວາມຊົມເຊີຍຕໍ່ ສປ ຈີນ ທີ່ໄດ້ປະກອບສ່ວນເຂົ້າໃນການພັດທະນາ ເສດຖະກິດຂອງພາກພື້ນ ແລະ ໃນໂລກ ໃຫ້ມີຄວາມເຂັ້ມແຂງ ໂດຍຜ່ານການຈັດຕັ້ງປະຕິບັດຂໍ້ລິເລີ່ມຕ່າງໆ, ລວມເຖິງການເຄື່ອນໄຫວໃນຂອບສັນຍາການຄ້າເສລີຈີນ-ອາຊຽນ ແນໃສ່ຫລຸດຜ່ອນຄວາມແຕກໂຕນກັນທາງດ້ານ ການພັດທະນາ ກໍຄື ການເຊື່ອມຈອດລະຫວ່າງຈີນກັບອາຊຽນ ແລະ ພາກພື້ນ. ຈີນ ເປັນຄູ່ຄ້າທີ່ໃຫຍ່ອັນດັບທີ 2 ຂອງ ສປປ ລາວ, ລວມຍອດການຄ້າສອງຝ່າຍເພີ່ມຂຶ້ນຢ່າງຕໍ່ເນື່ອງ, ສະເພາະປີ 2021 ຜ່ານມາ, ການຄ້າສອງ ຝ່າຍບັນລຸ 4,35 ຕື້ໂດລາສະຫະລັດ, ໃນນີ້ ລາວສົ່ງອອກປະມານ 2,68 ຕື້ໂດລາສະຫະລັດ; ການຮ່ວມມື ສອງຝ່າຍທີ່ພົນເດັ່ນໃນປີຜ່ານມາ ແມ່ນການເປີດນໍາໃຊ້ທາງດ່ວນວຽງຈັນ-ວັງວຽງ, ເປີດນໍາໃຊ້ໂຮງໝໍທະໂຫສົດ ຫລັງໃໝ່ ແລະ ການເປີດນໍາໃຊ້ເສັ້ນທາງລົດໄຟ ລາວ-ຈີນ ເຊິ່ງເຮັດໃຫ້ລາວສາມາດເຊື່ອມຈອດກັບປະເທດໃນພາກ ພື້ນ ແລະ ປຽບດັ່ງສາຍນໍ້າເຊື່ອມຕໍ່ກັນຂອງ ແມ່ນໍ້າຂອງ-ແມ່ນໍ້າລ້ານຊ້າງ, ເປັນເສັ້ນ ທາງເຊື່ອມໄມຕີຈິດມິດ ຕະພາບຂອງ ປະຊາຊົນສອງຊາດລາວ-ຈີນແບບຮອບດ້ານ ເພື່ອສົ່ງເສີມການຮ່ວມມືດ້ານເສດຖະກິດ, ການຄ້າ-ການ ລົງທຶນ, ການທ່ອງທ່ຽວ, ການສ້າງວຽກເຮັດງານທໍາ, ການແລກປ່ຽນວັດທະນະທໍາ ແລະ ການໄປມາຫາສູ່ລະຫວ່າງ ສອງປະເທດລາວ-ຈີນ. ພ້ອມນີ້,ທ່ານຍັງໄດ້ເຊີນຊວນແຂກທີ່ເຂົ້າຮ່ວມງານ ຢ້ຽມຊົມສິນຄ້າຂອງລາວ ທີ່ບັນດາວິ ສາຫະກິດຂອງລາວໄດ້ນຳມາວາງສະແດງ ເພື່ອຮູ້ຈັກ ແລະ ສໍາຜັດຕົວຈິງກ່ຽວກັບສິນຄ້າທີ່ມີຄຸນນະພາບຈາກ ສປປ ລາວ.

ໃນສານຊົມເຊີຍຕໍ່ການຈັດງານວາງສະແດງຄັ້ງນີ້, ທ່ານ ສີ ຈິ້ນຜິງ ປະທານປະເທດຈີນໄດ້ເນັ້ນໜັກວ່າ: ຈີນຈະສືບຕໍ່ຮ່ວມມືກັບທຸກປະເທດ ຜ່ານເວທີງານວາງສະແດງສິນຄ້າຈີນ-ອາຊີໃຕ້ ຕາມຄຳໝັ້ນສັນຍາວ່າດ້ວຍການ ພັດທະນາຮ່ວມກັນ, ສາມັກຄີ, ຮ່ວມມື ແລະ ຂະຫຍາຍການຮ່ວມມືໃຫ້ກວ້າງຂວາງກວ່າເກົ່າ ອັນຈະເປັນການ ສົ່ງເສີມການຮ່ວມມືໃນຂອບ ໜຶ່ງແລວໜຶ່ງເສັ້ນທາງ ແລະ ສ້າງຂໍ້ລິເລີ່ມການພັດທະນາໂລກ ເພື່ອຮ່ວມກັນ ກ້າວໄປຂ້າງໜ້າສູ່ອະນາຄົດທີ່ຈະເລີນຮຸ່ງເຮືອງ ແລະ ສົດໃສກວ່າເກົ່າ.

ການຈັດງານວາງສະແດງຄັ້ງນີ້, ຖືວ່າເປັນຄັ້ງທຳອິດ ໃນຮອບສອງປີ ຫລັງຈາກເກີດການລະບາດຂອງພະຍາດໂຄວິດ-19, ເປັນງານວາງສະແດງສາກົນຮອບດ້ານລະດັບສູງ ທີ່ໃຫ້ຄວາມສຳຄັນວຽກງານການຄ້າສາກົນ, ການ ຮ່ວມມືດ້ານເສດຖະກິດ, ການເຈລະຈາການລົງທຶນ, ການແລກປ່ຽນວັດທະນະທຳ ແລະ ເປັນເວທີແຫ່ງການ ພົວ ພັນທາງການທູດແບບຫລາຍຝ່າຍລະຫວ່າງຈີນ ກັບ ບັນດາປະເທດອາຊີໃຕ້-ອາຊີຕາເວັນອອກສ່ຽງໃຕ້ ແລະ ບັນດາ ປະເທດໃນໂລກ.

ງານວາງສະແດງສິນຄ້າຈີນ-ອາຊີໃຕ້ ຄັ້ງທີ 6 ແລະ ງານວາງສະແດງສິນຄ້ານຳເຂົ້າ ແລະ ສົ່ງອອກ ຄຸນໝິງ ຈີນ ຄັ້ງທີ 26 ຈະດຳເນີນໄປຮອດວັນທີ 22 ພະຈິກ 2022, ພາຍໃນງານນອກຈາກມີການວາງສະແດງສິນຄ້າແລ້ວຍັງມີເວທີປຶກສາຫາລືໃນຫົວຂໍ້ຕ່າງໆ ທັງຫມົດ 15 ຫົວຂໍ້ ເປັນຕົ້ນ ເວທີຮ່ວມມື ແລະ ພັດທະນາພາກພື້ນຈີນ-ມະຫາສະໝຸດອິນເດຍ, ເວທີຮ່ວມມືດ້ານການຄ້າ ແລະ ການລົງທຶນສາກົນໃນກອບ RCEP, ເວທີປາໄສເປີດ ກວ້າງຊາຍແດນຍຸກໃໝ່ (2022), ກອງປະຊຸມສຸດຍອດລະບົບສະໜອງໜຶ່ງແລວໜຶ່ງເສັ້ນທາງ, ເວທີປາໄສວິສາຫະກິດຈີນ-ອາຊີໃຕ້ຄັ້ງທີ 15, ເວທີປາໄສຄັງປັນຍາການຄ້າຈີນ-ອາຊີໃຕ້-ອາຊີຕາເວັນອອກສ່ຽງໃຕ້ຄັ້ງທີ 8, ເວທີປຶກສາຫາລືວິສາຫະກິດຈີນ-ອາຊີຕາເວັນອອກສ່ຽງໃຕ້ ຄັ້ງທີ 4 ແລະ ອື່ນໆ

ຂ່າວ-ພາບ: ແສງທອງ

ໃນວາລະດຳເນີນກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ທີ່ໄດ້ຈັດຂຶ້ນ ໃນລະຫວ່າງວັນທີ 17-18 ພະຈິກ 2022 ຜ່ານມານີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິ ຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ມີຄຳເຫັນໂອ້ລົມ ໂດຍສະຫາຍ ໄດ້ເນັ້ນຫລາຍບັນຫາ ສຳຄັນ ເພື່ອສ້າງການຫັນປ່ຽນໃໝ່ດ້ານຈິນຕະນາການ, ຍົກລະດັບຄຸນນະພາບວຽກງານການເມືອງ-ແນວຄິດ ແລະ ທິດສະດີ ຂອງພັກ ໃຫ້ກ້າວສູ່ຄຸນນະພາບໃໝ່.

ສະຫາຍ ທອງລຸນ ສີສຸລິດ ເນັ້ນໃຫ້ພະນັກງານ, ສະມາຊິກພັກ ທຸກກະຊວງ, ທຸກຂະແໜງການ ທັງສູນກາງ ແລະ ທ້ອງຖິ່ນ ຕ້ອງປະຕິບັດຄຳຂວັນທີ່ວ່າ: “ເວົ້າຕ້ອງໄປຄຽງຄູ່ກັບການປະຕິບັດ” ຫລື “ເວົ້າແລ້ວຕ້ອງເຮັດຄືກັບ ເວົ້າ”, ເຮັດຕ້ອງເຮັດໃຫ້ຖືກ, ເຮັດໃຫ້ເປັນຮູບປະທຳ, ເຮັດໃຫ້ເກີດດອກອອກຜົນແທ້,ຕ້ອງຮັບຮູ້ ແລະ ເຊີດຊູສັດ ຈະທຳທີ່ວ່າ: ການນຳພາທີ່ດີທີ່ສຸດແມ່ນການນຳພາດ້ວຍຄວາມເປັນແບບຢ່າງ, ອັນນີ້ ໝາຍເຖິງຜູ້ນຳພານັ້ນຕ້ອງເປັນ ແບບຢ່າງທີ່ດີ, ຜູ້ນໍາພານອກຈາກກໍາແໜ້ນແນວທາງ, ນະໂຍບາຍແລ້ວ ຍັງຕ້ອງເປັນຜູ້ມີຄຸນນະທຳ, ເປັນຜູ້ມີວິໄສ ທັດ ແລະ ເປັນຄົນພາວະວິໄສ, ມີໄຫວພິບ, ຮູ້ຈັກເອົາໃຈເຂົາມາໃສ່ໃຈເຮົາ, ຮູ້ຈິດຕະສາດຂອງສັງຄົມລາວ ແລະ ຂອງຄົນລາວ, ຮູ້ຄວາມມຸ່ງມາດປາຖະໜາຂອງປະຊາຊົນ ເພື່ອດຶງດູດເຕົ້າໂຮມເອົາກຳລັງແຮງຂອງປະຊາຊົນມາຊ່ວຍ ພັກ, ຊ່ວຍການນຳຢ່າງກວ້າງຂວາງ ນີ້ຄືຄຳຂວັນທີ່ວ່າ: “ເວົ້າໄປຄຽງຄູ່ກັບເຮັດ, ເຮັດໃຫ້ໄປຄຽງຄູ່ກັບເວົ້າ” ເຮັດໄດ້ ແນວນີ້, ມີຜູ້ນຳພາແບບນີ້ ການເຮັດວຽກງານການເມືອງ-ແນວຄິດ ຈຶ່ງເຮັດໄດ້ດີ, ເຮັດໄດ້ງ່າຍຂຶ້ນ, ເຮັດໄດ້ຮັບຜົນ, ເຮັດໜ້ອຍໄດ້ຫລາຍ ເພາະປະຊາຊົນເຊື່ອ, ປະຊາຊົນເດີນຕາມ ນີ້ຄືສັດຈະທຳໃນຄວາມເປັນຈິງ.

ເພື່ອເຮັດໃຫ້ ວຽກງານການເມືອງ-ແນວຄິດ ໄດ້ຮັບການພັດທະນາ ພັກເຮົາຕ້ອງໄດ້ແກ້ໄຂບັນດາບັນຫາທີ່ ພະນັກງານ, ປະຊາຊົນຊັ້ນຄົນຕ່າງໆຕັ້ງຂຶ້ນ ເປັນຕົ້ນ ແກ້ການສໍ້ລາດບັງຫລວງ; ແກ້ຄວາມບໍ່ດຸ່ນດ່ຽງໃນການພັດທະ ນາ; ແກ້ຄວາມເຫລື່ອມລໍ້າຂອງສັງຄົມ ຫລື ຮັດແຄບຄວາມແຕກໂຕນ; ແກ້ການຂາດປະສິດທິພາບຂອງກົງຈັກ; ແກ້ບັນຫາກົນໄກຂອງກົງຈັກແຕ່ເທິງລົງລຸ່ມ ເພື່ອບໍ່ໃຫ້ເປັນກົງຈັກ ແລະ ກົນໄກທີ່ເກະກະ, ອາຍາສິດ, ແຂງກະດ້າງ, ຂາດປະຊາທິປະໄຕ, ກົນໄກທີ່ມີຊ່ອງວ່າງໃຫ້ມີການກວດກາຍາກ, ໃຫ້ຄົນສວຍໃຊ້ເຮັດຜິດໄດ້ງ່າຍ; ແກ້ພະຍາດ ອາຍາສິດ, ຫ່າງເຫີນມະຫາຊົນ, ຂາດນໍ້າໃຈຮັບໃຊ້ປະຊາຊົນ, ແກ້ແນວຄິດຄອງເດີມບໍ່ຢາກປ່ຽນແປງ, ມັກງ່າຍ, ບໍ່ສົນ, ບໍ່ກ່ຽວນຳຫຍັງເອົາຕຳແໜ່ງມາກອດໄວ້, ບໍ່ຢາກແຕະຕ້ອງໃຜ ເພື່ອເອົາຄະແນນນິຍົມໃຫ້ຕົນ.

ພ້ອມນີ້, ສະຫາຍ ທອງລຸນ ສີສຸລິດ ໄດ້ເນັ້ນຕື່ມວ່າ: ວຽກງານການເມືອງແນວຄິດ ຖ້າຖືວ່າເປັນສະໜາມ ຮົບທີ່ຕ້ອງມີການຕໍ່ສູ້, ເມື່ອຖືເປັນສະໜາມຮົບແລ້ວ, ຊິເອົາໃຜ, ຊິຮົບກັບໃຜ?, ເອົາອັນໃດສູ້ກັບອັນໃດ? ແລະ ຮົບແບບໃດ? ຂ້າພະເຈົ້າ ຄິດວ່າແມ່ນສະໜາມຮົບທີ່ບໍ່ໄດ້ໃຊ້ປືນ ແຕ່ແມ່ນໃຊ້ຄວາມຄິດ, ໃຊ້ສະໝອງ, ໃຊ້ສະຕິປັນຍາ, ໃຊ້ຄວາມດີ, ຄວາມໜັກແໜ້ນ, ຄວາມປອດໃສຂອງພັກ ເປັນອາວຸດເພື່ອຕໍ່ສູ້ ເຊັ່ນ: ການຕໍ່ສູ້ ລະຫວ່າງ ຈິນຕະນາການໃໝ່ ກັບ ຈິນຕະນາການເກົ່າ, ເວົ້າຢ່າງໜຶ່ງແມ່ນການຕໍ່ສູ້ລະຫວ່າງ ອັນກ້າວໜ້າ ກັບ ອັນຫລ້າຫລັງ; ການຕໍ່ສູ້ ລະຫວ່າງ ແນວຄິດບຸກໜ້າກ້າວຂຶ້ນໄປຢ່າງບໍ່ຢຸດຢັ້ງ ກັບ ແນວຄິດທໍ້ຖອຍເສຍກຳລັງໃຈ, ອ່ອນເພຍເປ້ຍລ່ອຍ; ການຕໍ່ສູ້ລະຫວ່າງແນວຄິດ, ການກະທຳ ທີ່ຕັ້ງໜ້າກ້າຫານ, ຊອກຫາສັດຈະທຳໃນຄວາມເປັນ ຈິງ ກັບແນວຄິດ ແລະ ການກະທຳ ທີ່ຊອກຫາທາງປົກປິດ, ຫລົບຫລີກຄວາມຜິດພາດ, ຄວາມບົກຜ່ອງໄວ້, ຊຸກ ເຊື່ອງອັນບໍ່ດີໄວ້, ຮູ້ແຕ່ລາຍງານດອກໄມ້; ການຕໍ່ສູ້ ລະຫວ່າງ ການຍົກສູງຜູ້ອື່ນເກີນໄປ, ຕີຕໍ່າຕົນເອງເກີນໄປ (ມີທັງສ່ວນຕົວ ແລະ ອົງກອນ, ມີທັງລະດັບປະເທດ) ເຊິ່ງແນວຄິດ ແລະ ການກະທໍານີ້ ຈະກ້າວໄປເຖິງບໍ່ເຊື່ອ ໝັ້ນປະຊາຊົນຂອງຕົນ, ຖືຜູ້ອື່ນສູງກວ່າ, ເປັນການຫຍໍ້ທໍ້ຕົນເອງ, ຫຍໍ້ທໍ້ຊາດຕົນ, ບໍ່ຮູ້ຄຸນຄ່າຄວາມເປັນມາທີ່ແທ້ຈິງ ຂອງຊາດ, ຂອງພັກ ແລະ ບັນພະບູລຸດ ທີ່ນຳເອົາປະເທດຊາດ ແລະ ເອກະລາດ ມາໃຫ້ຕົນ. ແນວຄິດນີ້ ມີຢູ່ກັບໃຜ ຜູ້ນັ້ນມັກຫລົງທາງ; ແນວຄິດຢາກໄດ້, ຢາກດີໂພດ, ຢາກໃຫ້ໄດ້ໄວເກີນໄປ, ມັກຈູດໄລຍະກາຍເປັນລັດທິອາລົມຈິດ ນິຍົມ, ມັກໃຊ້ຄຳສັ່ງ, ກັບແນວຄິດການກະທຳທີ່ທຸ່ນທ່ຽງ, ມີຫລັກການ, ມີກົດເກນ, ໄປຕາມຄວາມສາມາດຕົວຈິງ, ຕາມຫລັກວິທະຍາສາດ ແລະ ກ້າວຂຶ້ນດ້ວຍຈັງຫວະທີ່ໝັ້ນທ່ຽງ ດ້ວຍຄວາມອົດທົນ, ມີເຫດຜົນ ເພື່ອກ້າວຂຶ້ນຢ່າງ ໜັກແໜ້ນ ຈາກກ້າວນີ້ໄປສູ່ກ້າວຕໍ່ໆໄປ. ເພື່ອເຮັດແນວໃດໃຫ້ວຽກງານການເມືອງ-ແນວຄິດເປັນຂອງປະຊາຊົນ, ນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ ຈຶ່ງເປັນຂອງປະຊາຊົນຢ່າງແທ້ຈິງນັ້ນ, ພວກເຮົາຕ້ອງປະ ຕິບັດແນວທາງທີ່ວ່າ: “ທຸກວຽກງານ ຂອງພັກຂອງຊາດ ຕ້ອງໃຫ້ປະຊາຊົນຮູ້, ປະຊາຊົນປຶກສາຫາລື ແລະ ປະຊາ ຊົນເປັນຜູ້ເຮັດ” ຈຶ່ງເຮັດໃຫ້ວຽກງານ ການເມືອງ-ແນວຄິດຫັນປ່ຽນໄປສູ່ຄຸນນະ ພາບໃໝ່ຢ່າງເລິກເຊີ່ງມີປະສິດ ທິຜົນ.

ພ້ອມກັນນີ້, ສະຫາຍ ທອງລຸນ ສີສຸລິດ ຍັງໄດ້ສະແດງຄວາມຊົມເຊີຍ, ຍ້ອງຍໍສັນລະເສີນຕໍ່ຄະນະພັກ ແຕ່ລະຂັ້ນ ທີ່ໄດ້ເອົາໃຈໃສ່ນໍາພາຊີ້ນໍາ ແລະ ຈັດຕັ້ງປະຕິບັດວຽກງານການເມືອງ-ແນວຄິດ ໃນໄລຍະຜ່ານມາ ເຊິ່ງເປັນພື້ນຖານສໍາຄັນໃນການຮັບປະກັນສະຖຽນລະພາບ ແລະ ຄວາມໜັກແໜ້ນທາງດ້ານການເມືອງ-ສັງຄົມ ຢູ່ປະເທດເຮົາ.

ຂ່າວ: ທະນູທອງ

ພາບ: ຂັນໄຊ

ວັນທີ 18 ພະຈິກ ໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ທ່ານ ທອງໃບ ໂພທິສານ ຫົວໜ້າສະມານັກປະພັນລາວ ແລະ ທ່ານ ນາງ ແສງແກ້ວ ຫົວໜ້າວິທະຍຸສາກົນແຫ່ງປະເທດຈີນ CRI ປະຈໍາລາວ ພ້ອມທີມງານໄດ້ມອບປຶ້ມສອງພາສາລາວ-ຈີນ 5 ປະເພດ ໃຫ້ແກ່ຫໍສະໝຸດແຂວງອຸດົມໄຊ ເຊິ່ງຮັບໂດຍທ່ານ ທ່ານ ບຸນແສງ ຈັນທະຄໍາສຸກ ຫົວໜ້າຫໍສະໝຸດແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ປຶ້ມສອງພາສາລາວ-ຈີນ 7 ປະເພດປະກອບມີ: ປຶ້ມຄໍາສໍາຄັນ ເພື່ອເຂົ້າໃຈປະເທດຈີນ, ປຶ້ມ 100 ປີ ແຫ່ງການສ້າງຕັ້ງພັກກອມມູນິດຈີນ ແລະ ການລຶບລ້າງຄວາມທຸກຍາກ, ປຶ້ມສີຈິ້ນຜິງວ່າດ້ວຍການປົກຄອງປະເທດ ແລະ ການບໍລິຫານຂອງລັດ, ປຶ້ມຮູ້ຮອບຈີນ, ປຶ້ມຮວມຄໍາສັບສໍານວນໂຕງໂຕຍ ສຸພາສິດຈີນ-ລາວ, ລາວ-ຈີນ, ປຶ້ມ36 ກົນລະຍຸດ ແລະປຶ້ມກະວີເພື່ອເຈົ້າ (ບົດກະວີຈີນ ສະໄໝປັດຈຸບັນຮ້ອຍບົດ) ເຊິ່ງປຶ້ມເຫຼົ່ານີ້ເປັນຜົນງານການຮ່ວມມືລະຫວ່າງ CRI ປະຈໍາລາວ ກັບສະມາຄົມນັກປະພັນລາວ ໄດ້ຈັດພິມເປັນ 2 ພາສາລາວ ແລະຈີນ.

ທ່ານຫົວໜ້າຫໍສະໝຸດແຂວງໄດ້ສະແດງຄວາມຂອບໃຈຢ່າງສູງຕໍ່ສະມາຄົມນັກປະພັນລາວ ແລະ CRI ທີ່ປະກອບສ່ວນໃນການພັດທະນາ ແລະ ເຜີຍແຜ່ຄວາມຮູ້ທີ່ໜ້າສົນໃຈໃຫ້ກັບພະນັກງານລັດຖະກອນ ເຊິ່ງປື້ມເຫຼົ່ານີ້ຈະຖືກນໍາເຂົ້າຫໍສະໝຸດ ແລະ ແຈກຢາຍເພື່ອຄົ້ນຄວ້າຮໍ່າຮຽນ ເຊິ່ງເປັນປະໂຫຍດໃຫ້ຄວາມຮູ້ສະຕິປັນຍາທີ່ດີຕໍ່ຜູ້ອ່ານ ແລະ ເປັນຂໍ້ມູນທີ່ດີໃນການເພີ່ມທະວີຄວາມເຂົ້າໃຈເຊິ່ງກັນ ແລະ ກັນລະຫວ່າງລາວ-ຈີນນໍາອີກ.

ກອງປະຊຸມລະດັບສູງ ເພື່ອທົບທວນການຈັດຕັ້ງປະຕິບັດວຽກງານສິດທິເດັກ ຢູ່ ສປປ ລາວ ໄດ້ຈັດຂື້ນໃນ ວັນທີ 18 ພະຈິກ 2022 ນີ້, ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມ ຂອງທ່ານ ນາງ ອິນລາວັນ ແກ້ວບຸນພັນ ປະທານ ສູນກາງສະຫະພັນແມ່ຍິງລາວ ຮອງປະທານ ຜູ້ປະຈຳການຄະນະກຳມາທິການແຫ່ງຊາດ ເພື່ອແມ່ ແລະ ເດັກ, ແລະ ທ່ານ ນາງ ເພຍ ເຣເບນໂຣ ບຣີໂຕ ຜູ້ຕາງໜ້າອົງການຢູນີເຊັບປະຈຳລາວ, ມີບັນດາຮອງເຈົ້າແຂວງ 18 ແຂວງ ປະທານຄະນະກຳມາທິການເພື່ອແມ່ແລະເດັກຂອງແຂວງ, ມີຜູ້ຕາງໜ້າຈາກພາກເອກະຊົນ, ອົງການບໍ່ສັງກັດລັດຖະບານ (NGO), ອົງການຈັດຕັ້ງທາງສັງຄົມ, ອົງການຢູນິເຊັບ ແລະ ເດັກ ເຂົ້າຮ່ວມ.

ທ່ານ ນາງ ອິນລາວັນ ແກ້ວບຸນພັນ ປະທານສະຫະພັນແມ່ຍິງລາວ ແລະ ປະທານຮ່ວມຂອງ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ໄດ້ກ່າວວ່າ:

“ ການຈັດຕັ້ງປະຕິບັດ ຄວາມໝາຍໝັ້ນໃນການພັດທະນາທ່າແຮງຂອງເດັກນ້ອຍລາວບັນດາເຜົ່່າຮອດປີ 2030 ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງໃຫ້ເດັກມີໂອກາດພັດທະນາ ແລະ ນຳໃຊ້ທ່າແຮງບົ່ມຊ້ອນຂອງຕົນຢ່າງເຕັມສ່ວນ ໃນການປົກປັກຮັກສາ ແລະ ສ້າງສາປະເທດຊາດ ເພື່ອຫຼຸດຜ່ອນຄວາມທຸກຍາກຂອງເດັກໃນມິຕິຕ່າງໆ ໃຫ້ຫຼຸດລົງ ໃນຂອບເຂດທົ່ວປະເທດ ”

ດຣ ນາງ. ເພຍ ແບັນໂລ ບຣິດໂຕ ຜູ້ຕາງໜ້າອົງການຢູນິເຊັບ ປະຈໍາ ສປປ ລາວ ກ່າວວ່າ :

“ ຈາກປະສົບການຂອງພວກເຮົາໃນການຮັບມືກັບການແຜ່ລະບາດຂອງ COVID-19 ມາຮອດປະຈຸບັນນີ້, ສິ່ງໜຶ່ງທີ່ຈະແຈ້ງ ກໍ່ຄື ສິ່ງສຳຄັນທີ່ສຸດ ພວກເຮົາຕ້ອງຍົກເອົາເດັກເປັນບູລິມະສິດ ໃນແຜນການຟື້ນຟູຈາກການແຜ່ລະບາດຂອງພະຍາດ ແລະ ການຮັບຟັງຈາກເດັກນ້ອຍໂດຍກົງຈະຊ່ວຍຮັບປະກັນວ່າ ແຜນການຂອງພວກເຮົາຈະຕອບສະໜອງກັບຄວາມຕ້ອງການຂອງພວກເຂົາ, ມັນມີຄວາມສໍາຄັນຫຼາຍກວ່າທີ່ເຄີຍເປັນມາ, ມັນແມ່ນເວລາທີ່ພວກເຮົາຕ້ອງມາທົບທວນເບິ່ງຄວາມຄືບໜ້າຂອງພວກເຮົາ, ເບິ່ງໄປຂ້າງໜ້າ ແລະ ຖາມຕົນເອງວ່າ ພວກເຮົາຈະແກ້ໄຂບັນຫາທີ່ສຳຄັນທີ່ສົ່ງຜົນກະທົບຕໍ່ເດັກນ້ອຍແນວໃດໃນສະພາບທີ່ຍັງມີການລະບາດຂອງພະຍາດ ໂຄວິດ-19. ຊຶ່ງນີ້ແມ່ນຈຸດປະສົງຫຼັກຂອງກອງປະຊຸມຂອງພວກເຮົາໃນມື້ນີ້ ”

ຫຼັງຈາກນັ້ນກອງປະຊຸມ ໄດ້ຮັບຟັງການນຳສະເໜີຜົນການຈັດຕັ້ງປະຕິບັດ ຄວາມໝາຍໝັ້ນຂອງບັນດາຮອງເຈົ້າແຂວງ ໃນທົ່ວປະເທດ ເພື່ອຫຼຸດຜ່ອນຄວາມທຸກຍາກຂອງເດັກປະຈຳປີ 2021-2022 ແລະ ແຜນການປີ 2023.

ໃນກອງປະຊຸມ ບັນດາພາກສ່ວນທີ່ກ່ຽວຂ້ອງໄດ້ເຫັນດີເປັນເອກະພາບກັນ ໃນການຍົກສູງເດັກນ້ອຍ ແລະ ໄວໜຸ່ມໃຫ້ເປັນບູລິມະສິດແຫ່ງຊາດໃນຄວາມພະຍາຍາມແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ແລະ ເຫັນດີໃຫ້ເລັ່ງລັດໃສ່ການຫຼຸດຜ່ອນຄວາມທຸກຍາກຂອງເດັກນ້ອຍໃນທົ່ວ 18 ແຂວງ ໃນ ສປປ ລາວ ໂດຍການເພີ່ມການລົງທຶນໃສ່ບັນດາຂົງເຂດສຳຄັນ ເຊັ່ນ: ການສຶກສາ, ການປົກປ້ອງເດັກ, ສຸຂະພາບ, ໂພຊະນາການ, ສຸຂາພິບານ ແລະ ການປົກປ້ອງທາງສັງຄົມ ແລະ ອື່ນໆ.

ພາກສ່ວນກ່ຽວຂ້ອງ ຍັງໄດ້ປຶກສາຫາລືກັນຕື່ມອີກ ກ່ຽວກັບ ຄໍາໝັ້ນສັນຍາສະເພາະ ແລະ ແຜນກິດຈະກໍາ ເພື່ອຊ່ວຍແກ້ໄຂບັນຫາທີ່ກ່ຽວຂ້ອງກັບເດັກໃນປີຕໍ່ໄປ ໃນຂະນະທີ່ເດັກນ້ອຍຍັງໄດ້ມີໂອກາດປະກອບຄໍາຄິດເຫັນ ແລະ ສະແດງຂໍ້ສະເໜີຂອງເຂົາເຈົ້າ ເພື່ອຮັບປະກັນວ່າແຜນງານເຫຼົ່ານີ້ ຈະສະທ້ອນເຖິງຄວາມຕ້ອງການຂອງເຂົາເຈົ້າ ຢ່າງແທ້ຈິງ.

ພາບ ແລະ ຂ່າວ : ພູເງິນ ບົວທອງ

#ວສລ#laonationalradio

ຕາມ​ຂ່າວ​ຈາກ news.ch7,ທ່ານ ພົນເອກ ປຣະຢຸດ ຈັນໂອຊາ, ນາຍົກ ລັດຖະມົນຕີ ແລະ ລັດຖະມົນຕີ ກະຊວງ ປ້ອງກັນ ປະເທດ​ໄທ ໄດ້ເປັນປະທານ ​ເປີດ ກອງ​ປະຊຸມ ​ເອ​ເປັກ(APEC) ຢ່າງ​ເປັນ​ທາງ​ການ ​ໃນວັນ​ທີ 18 ພະຈິກ​ນີ້ ຢູ່​ສູນ​ກອງ​ປະຊຸມ ​ແຫ່ງ​ຊາດ ​ສິລິ​ກິດ,​​ໂດຍ​ມີ​ ການ​ນຳ​ ຈາກ​ຫລາຍ​ປະ​ເທດ ​ເຂົ້າຮ່ວມ ​ເພື່ອ​ພິ​ຈາ​ລະ​ນາ​ ວາ​ລະ ​ທີ່​ໄດ້​ຮັບ ​ການ​ສະ​ຫລຸບ​ຈາກ ​ເວ​ທີ​ປາ​ໄສ​ ລັດ​ຖະ​ມົນ​ຕີ APEC ໃນ 3 ຂົງ​ເຂດ​ຫລັກ​ຄື: ​ເປີດ​ໂອກາດ ທາງ​ການ​ຄ້າ ແລະ ການ​ລົງ​ທຶນ​; ດ້ວຍການສືບຕໍ່ ກ່ຽວ​ກັບ​ ເຂດ​ການ​ຄ້າ ​ເສລີ ​ອາຊີ-ປາຊີ​ຟິກ (FTAAP) ​ຫລັງ​ຈາກ ​ໂຄ​ວິດ-19​ ເພື່ອ​ຊຸກຍູ້ ​ຄວາມ​ສາມາດ​ ດ້ານ​ເສດຖະກິດ. ກ່ຽວ​ກັບ ​ບັນຫາ​ ການ​ຄ້າ ​ແລະ ການ​ລົງທຶນ​ໃໝ່ ​ແລະ ຮັດ​ແຄບ ​ຊ່ອງ​ວ່າງ ​ການ​ພັດທະນາ​ ລະຫວ່າງກັນ, ຊຸກຍູ້​ ການ​ເຊື່ອມ​ຕໍ່ ທີ່ເຮັດວຽກ ຮ່ວມກັບ ຄະນະ​ເຮັດ​ວຽກ ສະເພາະກິດ ​ເພື່ອ​ການ​ເດີນທາງ ​ທີ່​ປອດ​ໄພ ສ້າງກົນໄກ ການອໍານວຍ ຄວາມ ສະດວກ ການ​ເດີນ​ທາງ​ ຂ້າມ​ຊາຍ​ແດນ​ ​ແລະ ຊຸກຍູ້​ການ​ເຕີບ​ໂຕ​ ທີ່​ສົມ​ດູນ ​ແລະ ຍືນ​ຍົງ ​ໂດຍໄທ​ ໄດ້​ຊຸກຍູ້​ ການ​ກະກຽມ ​ເປົ້າ​ໝາຍ​ ບາງກອກ ວ່າ​ດ້ວຍ ​ເສດ​ຖະ​ກິດ ​ຊີ​ວະ​ພາບ​ ເສດຖະກິດ ໝູນວຽນ ແລະ ເສດຖະກິດ ສີຂຽວ (BCG) ເພື່ອສ້າງ ເສດຖະກິດ ແບບຍືນຍົງ ໃນພາກພື້ນ ອາຊີ-ປາຊີຟິກ.

(ບັນນາທິການຂ່າວ: ຕ່າງປະ ເທດ) ຮຽບຮຽງຂ່າວ ໂດຍ: ສະໄຫວ ລາດປາກດີ