ວັນທີ 21 ພະຈິກ 2022 ນີ້ ທີມງານບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ໄດ້ເດີນທາງໄປຢ້ຽມຢາມປະຊາຊົນບ້ານບວມອໍ້ ເມືອງຊຽງເງິນ ແຂວງຫລວງພະບາງ ເຊິ່ງເປັນບ້ານຈັດສັນທີ່ຖືກຜົນກະທົບຂອງໂຄງການລົດໄຟລາວ-ຈີນ ແລະ ໃຫ້ກຽດຕ້ອນຮັບ ໂດຍທ່ານ ບຸນເພັດ ພູນຜົນ ຮອງເຈົ້າເມືອງຊຽງເງິນ, ມີບັນດາອົງການປົກຄອງບ້ານ ປະຊາຊົນພາຍໃນບ້ານບວມອໍ້ ເຂົ້າຮ່ວມ.

ທ່ານ ທອງວັນ ວັດທະນາພອນ ນາຍບ້ານບວມອໍ້ ໄດ້ລາຍງານສະພາບລວມຂອງບ້ານວ່າ: ບ້ານບວມອໍ້ ເປັນບ້ານທີ່ໄດ້ຮັບຜົນກະທົບຈາກໂຄງການກໍ່ສ້າງທາງລົດໄຟທະລຸຜ່ານໝົດບ້ານ ເຮັດໃຫ້ມີຄວາມຈໍາເປັນຕ້ອງໄດ້ຍັບຍ້າຍໄປຢູ່ບ່ອນໃໝ່ທີ່ທາງໂຄງການຈັດສັນໃຫ້ ແຕ່ຍັງນອນຢູ່ໃນຂອບເຂດເນື້ອທີ່ຂອງບ້ານບວມອໍ້ ຄືເກົ່າ ແລະ ຫ່າງກັນກັບບ້ານເກົ່າປະມານ 1 ກິໂລແມັດ ພາຍໃນບ້ານມີທັງໝົດ 102 ຄອບຄົວ, ພົນລະເມືອງທັງໝົດ 438 ຄົນ, ຍິງ 228 ຄົນ ໄດ້ຍົບຍ້າຍໄປຢູ່ບ້ານຈັດສັນໃໝ່ ເຊີ່ງມີທັງໝົດ 107 ຫລັງຄາເຮືອນ (ສະເພາະບ້ານບວມອໍ້ 103 ຫລັງຄາ ແລະ ປະຊາຊົນບ້ານສົ້ນຫລວງ ທີ່ໄດ້ຮັບຜົນກະ ທົບຈາກໂຄງການດັ່ງກ່າວໄດ້ຍົກຍ້າຍມາຢູ່ນຳ 4 ຫລັງຄາ).

ຢູ່ບ້ານຈັດສັນໃໝ່ ທາງໂຄງການໄດ້ກໍ່ເຮືອນ ແລະ ສິ່ງອຳນວຍຄວາມສະດວກ ເປັນຕົ້ນ: ຖະໜົນຖົນທາງ, ໂຮງຮຽນ, ສຸກສາລາ, ລະບົບນ້ຳລິນ, ລະບົບໄຟຟ້າ ແລະ ອື່ນໆ ໂດຍໄດ້ຈັດສັນເນື້ອທີ່ປຸກສ້າງໃຫ້ຄອບຄົວລະ 20×30 ແມັດ, ສ່ວນຮູບແບບໂຄງສ້າງຂອງເຮືອນ ແບ່ງເປັນປະເພດ 1,2,3 ຄື: ເຮືອນ 2 ຊັ້ນ, ເຮືອນວິນລາ 8×11 ແມັດ ແລະ ເຮືອນວິນລາ 4×8 ແມັດ, ມີໄລຍະເວລາຄໍ້າປະກັນ 2 ປີ ການຈັດສັນເຮືອນໃຫ້ແຕ່ລະຄອບຄົວແມ່ນອີງຕາມຖານະ ຫລື ຮູບແບບຂອງເຮືອນທີ່ແຕ່ລະຄອບຄົວເຄີຍມີໃນບ້ານເກົ່າ, ສ່ວນເນື້ອທີ່ທຳການຜະລິດ ຍັງສາມາດໄປເຮັດການຜະລິດຢູ່ບ່ອນເກົ່າໄດ້ເປັນປົກກະຕິ. ທ່ານ ທອງວັນ ລັດຕະນະພອນ ໄດ້ຢືນຢັນວ່າ: ພາຍຫລັງຍັບຍ້າຍອອກຈາກບ່ອນເກົ່າມາຢູ່ບ້ານຈັດສັນໃໝ່ ເຫັນວ່າປະຊາຊົນມີຄວາມພໍໃຈ ແລະ ມີຊີວິດການເປັນຢູ່ດີຂຶ້ນກວ່າເກົ່າ ຍ້ອນສິ່ງອຳນວຍຄວາມສະດວກຕ່າງໆ ເປັນຕົ້ນ: ຖະໝົນຫົນທາງທີ່ດີຂຶ້ນ, ການເດີນທາງໄປມາສະດວກສະບາຍ, ມີເຮືອນຢູ່ທີ່ແໜ້ນໜາຖາວອນ ແລະ ງາມກວ່າເກົ່າ.

ຫຼັງຈາກນັ້ນ ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ໄດ້ຕາງໜ້າທີມງານ ກໍໄດ້ກ່າວຂອບໃຈຕໍ່ການຕ້ອນຮັບຂອງປະຊາຊົນ ພ້ອມດ້ວຍອໍານາດການປົກຄອງພາຍໃນບ້ານ, ເມືອງ, ຈາກນັ້ນ, ບັນດາທີມງານກໍໄດ້ລົງເກັບກໍາພາບ ສໍາພາດປະຊາຊົນກັບການດໍາລົງຊີວິດໃນບ້ານຈັດສັນໃໝ່ ເພື່ອເກັບກໍາຂໍ້ມູນນໍາໄປຜະລິດເປັນບົດຕາມໂຄງການກໍານົດໄວ້.

ໃນວັນທີ 18 ພະຈິກ 2022 ນີ້ ຢູ່ທີ່ໂຮງຮຽນ ຮຸ່ງເຮືອງຊັບ ເມືອງຈຳພອນ ແຂວງສະຫວັນນະເຂດ ໄດ້ເປີດຂະບວບການໃຫ້ວັກຊິນປ້ອງກັນພະຍາດ ໂຄວິດ 19 ໃຫ້ກຽດເປັນປະທານຂອງທ່ານ ຄຳຕາ ສິນນະສອນ ຮອງເຈົ້າເມືອງ ທັງເປັນປະທານກຳມະທິການແມ່ແລະເດັກຂັ້ນເມືອງ,ທ່ານ ດຣ ພອນສະຫວັນ ອິນສີຊຽງໃໝ່ ຫົວໜ້າຫ້ອງການສາທາລະນະສຸກເມືອງ ມີຄະນະກຳມະທິການແມ່ແລະເດັກຂັ້ນເມືອງ ມີບັນດາຫ້ອງການທີ່ກ່ຽວຂ້ອງ,ຄະນະປົກຄອງບ້ານເຂດເທດສະບານອ້ອມຂ້າງພ້ອມດ້ວຍນ້ອງນ້ອຍນັກຮຽນເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ຄຳຕາ ສິນນະສອນ ຮອງເຈົ້າເມືອງກໍ່ໄດ້ກ່າວເປີດພິທີຢ່າງເປັນທາງການ,ທ່ານດຣ ພອນສະຫວັນ ອິນສີຊຽງໃໝ່ ຫົວໜ້າຫ້ອງການສາທາລະນະສຸກເມືອງກໍ່ໄດ້ລາຍງານຄາດໝາຍໃນປີ 2022 ເຊີ່ງເມືອງຈຳພອນຈັດຕັ້ງປະຕິບັດການສັກວັກຊິນປ້ອງກັນພະຍາດ ໂຄວິດ 19 ເຂັມທີ 1 ປະຕິບັດໄດ້ 94%,ເຂັມ 2 ຈັດຕັ້ງປະຕິບັດໄດ້ 84%,ເຂັມ 3 ປະຕິບັດໄດ້ 38%,ເພື່ອສືບຕໍ່ໃຫ້ບັນລຸຄາດໝາຍຫ້ອງການສາທາລະນະສຸກເມືອງຈິ່ງໄດ້ຈັດຮອບຕະລຸມບອນແຕ່ວັນທີ 10 ພະຈິກຮອດ 24 ພະຈິກ ເຊີ່ງມີຈຸດປະສົງເພື່ອສັກຢາກັນພະຍາດໂຄວິດ 19 ໃຫ້ເດັກອາຍຸ 5-11ປີ,12-17 ປີ,ແລະ 8 ປີຂື້ນໄປແລະໃຫ້ວິຕາມິນອາແກ່ເດັກ ອາຍຸ 6 ເດືອນຫາ 59 ເດືອນແລະເດັກນ້ອຍລຸ່ມ 1 ປີແມ່ນໃຫ້ສັກຢາກັນພະຍາດຮອບປົກກະຕິ,ສຳລັບການຈັດຕັ້ງປະຕິບັດໃນຜ່ານມາເຫັນວ່າແຕ່ລະພາກສ່ວນກໍ່ໃຫ້ການຮ່ວມມືຢ່າງເປັນຂະບວນກວ້າງຂວາງແຕ່ມາເບິ່ງຕົວເລກຍັງບໍ່ທັນໄດ້ບັນລຸຕາມຄາດໝາຍທີ່ວາງໄວ້ ດັ່ງນັ້ນຫົວໜ້າຫ້ອງການສາທາລະນະສຸກເມືອງຈິ່ງໄດ້ເອົາໃຈໃສ່ຈັດຮອບຕະລຸມບອນເພື່ອໃຫ້ບັນລຸຄາດໝາຍໃນປີ 2022.

#savannakhet#medialaos

ໃນຕອນແລງ ວັນທີ 21 ພະຈິກ2022 ນີ້, ທີ່ຫ້ອງປະຊຸມຫ້ອງວ່າການ ແຂວງຫລວງພະບາງ ທີມງານໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ, ທີ່ນໍາໂດຍທ່ານ ນາງ ແສງແກ້ວ ຫົວໜ້າ ສະຖານີວິທະຍຸ ໂທລະພາບສູນກາງຈີນ CMG ປະຈໍາລາວ ແລະທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ພ້ອມດ້ວຍຄະນະຈໍານວນ 30 ທ່ານ, ໄດ້ເຂົ້າຢ້ຽມພົບປະກັບທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ພ້ອມດ້ວຍບັນດາຜູ້ຕ່າງໜ້າພະແນກການ, ຂະແໜງການທີ່ປິ່ນອ້ອມກ່ຽວກັບລົດໄຟລາວ-ຈີນ ໃຫ້ການຕ້ອນຮັບ.

ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫລວງພະບາງ ໄດ້ໃຫ້ກຽດກ່າວຕ້ອນຮັບ ພ້ອມທັງລາຍງານສະພາບລວມຂອງແຂວງ ແລະ ເສັ້ນທາງລົດໄຟລາວ-ຈີນ ຜ່ານເຂດແຂວງຫລວງພະບາງ ຕາມທິດທາງໜຶ່ງແລວ ໜຶ່ງເສັ້ນທາງ ທີ່ສອງພັກ,ສອງລັດ ລາວ-ຈີນ ທີ່ມີການຮ່ວມມືເຊິ່ງກັນ ແລະ ກັນ.

ຈາກນັ້ນ ທ່ານຫົວໜ້າ CMG ປະຈຳລາວກໍໄດ້ລາຍງານຈຸດປະສົງຂອງການລົງເຄື່ອນໄຫວເຮັດວຽກຢູ່ແຂວງຫຼວງພະບາງ ໃນລະຫວ່າງວັນທີ 19-21 ພະຈິກ 2022 ທີ່ໄດ້ເຄື່ອນໄຫວເກັບກໍາຂໍ້ມູນ ໃນໂຄງການບັນທຶກຄວາມຮັກແພງຕາມເສັ້ນທາງລົດໄຟ ລາວ-ຈີນ.ແລະ ສະຖານທີ່ທ່ອງທ່ຽວພາຍໃນແຂວງຫລວງພະບາງ ໃນການເຂົ້າຢ້ຽມພົບປະຄັ້ງນີ້ ບັນດາ ພະແນກການຂອງແຂວງທີ່ກ່ຽວຂ້ອງ ກໍ່ໄດ້ພັດປ່ຽນກັນຂຶ້ນລາຍງານສະພາບລວມແລະ ທິດທາງແຜນການທີ່ໄດ້ຮັບຜົນປະໂຫຍດຈາກການຄົມມະນາຄົມ ເສັ້ນທາງລົດໄຟລາວ-ຈີນ ເພື່ອລາຍງານໃຫ້ກັບນັກປະພັນ,ນັກຂຽນ,ນັກແຕ້ນ ແລະ ສື່ມວນຊົນນໍາໄປປະກອບເປັນບົດແລ້ວສົ່ງພິມເພື່ອເປັນການກະກຽມສະເຫຼີມສະຫຼອງວັນສໍາຄັນຂອງສອງຊາດ ໂດຍສະເພາະແມ່ນ ວັນຄົບຮອບການເປີດນໍາໃຊ້ເສັ້ນທາງລົດໄຟລາວ-ຈີນທີ່ຈະມາເຖິງນີ້.

ບໍລິເວນຄວາມກົດດັນສູງຂອງອາກາດເຢັນໄດ້ປົກຄຸມຢູ່ພາກເໜືອ ຂອງປະເທດລາວ ດ້ວຍກໍາລັງອ່ອນ ສົມທົບກັບກະແສລົມຕາເວັນອອກ ພັດປົກຄຸມ ຊຶ່ງຈະເຮັດໃຫ້ອາກາດຍັງເຢັນຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມມີໝອກບາງປົກຫຸ້ມ ຢູ່ທົ່ວໄປ. ສ່ວນພາກກາງ ແລະ ພາກໃຕ້ ອາກາດຮ້ອນ ພ້ອມຈະມີຝົນຕົກ ໃນລະດັບຄ່ອຍ ຫາ ປານກາງ ແລະ ມີລົມພັດແຮງຢູ່ບາງທ້ອງຖິ່ນ.

ພະຍາກອນອາກາດ ເວລາ 7:00 ໂມງວັນທີ 22/11/2022 ເຖິງເວລາ 7:00 ໂມງວັນທີ 23/11/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມ ຢູ່ທົ່ວໄປ. ອຸນຫະພູມໃນລະຫວ່າງ 14-27 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດເຢັນໃນຕອນກາງຄືນ ຫາ ຕອນ ເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ. ອຸນຫະພູມໃນລະຫວ່າງ 18-34 ອົງສາ.

-ນະຄອນຫລວງວຽງຈັນ: ອາກາດຮ້ອນ ພ້ອມຈະມີລົມພັດແຮງ ຢູ່ບາງບໍລິເວນ. ອຸນຫະພູມໃນລະຫວ່າງ 25-35 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ພ້ອມຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ແລະ ມີລົມ ພັດແຮງເປັນບາງໂອກາດ ຫລື ເນື້ອທີ່ປົກຫຸ້ມຂອງຝົນ ເທົ່າກັບ 40% ຂອງພາກ. ອຸນຫະພູມໃນລະຫວ່າງ 22-33 ອົງສາ.

-ແຂວງໄຊສົມບູນ: ອາກາດໜາວເຢັນ ພ້ອມມີໝອກໜາປົກຫຸ້ມ ໃນຕອນເຊົ້າ. ອຸນຫະພູມໃນລະຫວ່າງ 12-28 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນແລະ ຈະມີຝົນຕົກ ຟ້າຮ້ອງໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ປົກຫຸ້ມຂອງຝົນ ເທົ່າກັບ 50% ຂອງພາກ. ອຸນຫະພູມໃນລະຫວ່າງ 23-30 ອົງສາ.

-ເຂດພູພຽງບໍລະເວນ: ອາກາດເຢັນ ຫາ ໜາວເຢັນ ແລະ ຈະມີຝົນຕົກ ຟ້າຮ້ອງໃນລະດັບຄ່ອຍ ຫາ ປານກາງ ພ້ອມມີລົມພັດແຮງເປັນບາງ ບໍລິເວນ ຫລື ເນື້ອທີ່ປົກຫຸ້ມຂອງຝົນ ເທົ່າກັບ 50%. ອຸນຫະພູມໃນລະຫວ່າງ 13-23 ອົງສາ.

ສະຖານີວິທະຍຸກະຈາຍສຽງແຫ່ງຊາດລາວ(ວສລ),ກົມສື່ມວນຊົນ ກະຊວງ ຖະແຫລງຂ່າວ, ວັດທະນະ ແລະທ່ອງທ່ຽວ (ຖວທ) ແລະ ໜັງສືພິມເສດຖະກິດ-ການຄ້າໄດ້ຮວ່ມກັນ ຈັດຝຶກອົບຮົມທັກສະການຖ່າຍພາບ ແລະ ວິດີໂອໃຫ້ນັກຂ່າວໃນວັນທີ21ພະຈິກນີ້ທີ່ວສລ, ໂດຍການເຂົ້າຮ່ວມຂອງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖວທ, ທ່ານ ສຸວັນ ວິໄລແສງ ຜູ້ອໍານວຍການໃຫ່ຍວສລ, ມີສໍາມະນາກອນຈາກສື່ຕ່າງໆ ແລະ ແຂກຖືກເຊີນເຂົ້າຮ່ວມ.

ທ່ານ ສົົມສະຫວາດ ພົງສາ ກ່າວວ່າ: ເພື່ອເປັນການເພີ່ມທັກສະໃນການຖ່າຍພາບນິ້ງ ແລະ ພາບວິດີໂອຊຶ່ງເປັນການກະກຽມໃຫ້ນັກຂ່າວທີ່ຈະໄປເຄື່ອນໄຫວເກັບກຳຂ່າວງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເພື່ອນຳໃຊ້ເຕັກໂນໂລຊີເຂົ້າໃນການນໍາໃຊ້ຂໍ້ມູນຮ່ວມກັນ.

ທ່ານສຸວັນວິໄລແສງກໍໄດ້ກ່າວວ່າ: ການປັບປຸງການນຳໃຊ້ນັກຖ່າຍພາບ ແຊຂໍ້ມູນບໍ່ວ່າຈະເປັນພາບເຄື່ອນໄຫວ ພາບນິ້ງ ໃນການເຮັດວຽກຕ້ອງມີການລວມສູນເອົານັກຖ່າຍພາບແຕ່ລະສຳນັກ ຫລື ຄະນະສະເພາະກິດ ໂດຍແບ່ງງານກັນສໍາລັບນັກຂ່າວແຕ່ລະສະຫນາມ,ລາຍງານຂ່າວຖືກຕ້ອງວ່ອງໄວໂດຍການລາຍງານຂ່າວທີ່ຫລາກຫລາຍ ສາມາດມາດືງເອົາຂໍ້ມູນນັ້ນ ສົ່ງກັບຄືນຫາສຳນັກງານຂອງຕົນເອງໃຫ້ມີຄວາມສະດວກຂຶ້ນຕື່ມ.