ເມື່ອເວົ້າເຖີງຄໍາວ່າ: ແມ່ຍິງ ໃນຄວາມຄິດຂອງຫລາຍຄົນຄົງຄິດວ່າ ເປັນເພດທີ່ອ່ອນແອ, ບໍ່ສາມາດຊ່ວຍເຫລືອຕົນ ເອງ ແລະ ອາໃສແຕ່ເພດຊາຍເພື່ອຄຸ້ມຄອງດູແລ ແລະ ຊ່ວຍເຫລືອທຸກຢ່າງ. ແຕ່ຄວາມຄິດເຫລົ່ານີ້ຖ້າເອົາມາໃຊ້ກັບແມ່ຍິງລາວບັນດາເຜົ່າ ແມ່ນຜິດພາດທີ່ສຸດ ເພາະແມ່ນຍິງລາວ ເຖີງວ່າເປັນຄົນອ່ອນຫວານນິ້ມນວນ ແລະ ມີຈິດ ໃຈໂອບເອື້ອອາລີ ແຕ່ເປັນຄົນທີ່ເຂັ້ມແຂງ ແລະ ອົດທົນຜ່ານຜ່າອຸປະສັກນາໆ ປະການ. ສະແດງງອອກໃນສະໄໝຕໍ່ສູ້ກູ້ຊາດ ແມ່ຍິງລາວບັນ ດາເຜົ່າ ໃນທົ່ວປະເທດ ໄດ້ຄຽງບ່າຄຽງໄຫລ່ກັບເພດຊາຍຕໍ່ສູ້ຕ້ານການຮຸກຮານຂອງພວກສັກດິນາ, ພວກ ຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ໃນສະໝໍຣະພູມຮົບຢ່າງດຸເດືອດ, ໜຽວແໜ້ນ ແລະ ພິລາດອາດຫານທີ່ສຸດ ເຮັດໃຫ້ເກີດມີເອື້ອຍນ້ອງກອງກໍາລັງໄຟເພດຍິງ, ສາວຊຽງຂວາງທັງງາມ-ທັງເກັ່ງ ແລະ ເອື້ອຍນ້ອງຍິງຢູ່ແຂວງອື່ນໆ ທົ່ວປະເທດ ໄດ້ຮ່ວມສ້າງວິລະກໍາອັນຍິ່ງໃຫຍ່ ແລະ ເກີດມີວິລະຊົນ, ເລື່ອງຈິງຄົນແທ້ ເປັນຕົ້ນ: ແມ່ເຖົ້າຢົງກາຍ, ທ່ານ ນາງ ພວງ, ທ່ານ ນາງ ບົວຄໍາ ພົມມະຈັນ ແລະ ທ່ານ ອື່ນໆ ທີ່ໄດ້ປະກອບສ່ວນຢ່າງສົມກຽດເຂົ້າໃນການຂຽນໜ້າປະຫວັດສາດຂອງຊາດລາວ.

ໃນໄລຍະແຫ່ງການປົກປັກຮັກສາ ແລະ ສ້າງສາປະເທດ ຊາດໃນປັດຈຸບັນ ກໍເຊັ່ນດຽວກັນ ພາຍ ໃຕ້ການນໍາພາ-ຊີ້ນໍາຂອງພັກ ແລະ ຄວາມເອົາໃຈໃສ່ຂອງລັດຖະບານ ໂດຍມີສູນກາງສະຫະພັນແມ່ຍິງ ລາວ ເປັນອົງການຈັດຕັ້ງມະຫາ ຊົນຂອງພັກທີ່ເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳ ຂອງແມ່ຍິງລາວບັນດາເຜົ່າ ໄດ້ປຸກລະດົມແມ່ຍິງລາວບັນດາເຜົ່າທຸກຄົນ ເດີນຕາມແນວທາງນະໂຍບາຍ ຂອງພັກ, ເສີມຂະຫຍາຍມູນເຊື້ອອັນດີງາມຂອງແມ່ຍິງລາວບັນດາເຜົ່າທີ່ເຄີຍມີມາ ແລະ ສ້າງທຸກ ເງື່ອນໄຂໃຫ້ແມ່ຍິງລາວ ໄດ້ມີຊີວິດການເປັນຢູ່ທີ່ດີຂຶ້ນທາງດ້ານວັດຖຸ ແລະ ຈິດໃຈ, ຍົກສູງສິດສະເໝີ ພາບ ແລະ ບົດບາດ ຍິງ-ຊາຍທຽບເທົ່າກັນໃນທຸກດ້ານ ເຮັດໃຫ້ປັດຈຸບັນ ແມ່ຍິງລາວ ສາມາດເຂົ້າເຖິງ ການສຶກສາ, ສາທາລະນະສຸກ ແລະ ອື່ນຯ ຢ່າງສະດວກສະບາຍ. ສິ່ງສໍາຄັນເອື້ອຍນ້ອງແມ່ ຍິງຈຳ ນວນບໍ່ໜ້ອຍໄດ້ກາຍເປັນນັກການເມືອງ, ນັກການທູດ, ແພດໝໍທີ່ຊຳນານງານ, ອາຈານສອນ, ນັກທຸລະກິດ ແລະ ອື່ນໆ ນັບມື້ ຫລາຍຂຶ້ນ, ພ້ອມທັງໄດ້ຮັບຄວາມເຊື່ອຫມັ້ນ ແລະ ຖືກມອບໝາຍໜ້າທີ່ໃນ ຂັ້ນນຳພາຄຸ້ມຄອງ ແລະ ຕັດສິນບັນຫາສຳຄັນທຸກລະດັບ ນັບຕັ້ງແຕ່ຂັ້ນບ້ານຈົນຮອດການນຳຂັ້ນ ສູງຂອງພັກ, ສະພາແຫ່ງຊາດ ແລະ ລັດຖະບານດ້ວຍຈຳນວນທີ່ເພີ່ມຂຶ້ນທຸກປີ ເຮັດໃຫ້ບົດ ບາດ, ອິດທິພົນ ແລະ ຊື່ສຽງຂອງແມ່ຍິງລາວນັບມື້ນັບສູງເດັ່ນຂຶ້ນໃນເວທີການເມືອງທັງພາຍໃນປະເທດ, ພາກພື້ນ ແລະ ສາກົນ.

ພັກ ແລະ ລັດຖະບານ ຍາມໃດກໍໃຫ້ຄວາມສໍາຄັນຕໍ່ບົດ ບາດຍິງ-ຊາຍ ກໍຄື ການໃຫ້ ແມ່ຍິງ ເຂົ້າໃນມີບາດບາດໃນທຸກຂົງເຂດວຽກງານນັບມື້ເພີ່ມຂຶ້ນ ເພື່ອພ້ອມກັນສ້າງສາ ແລະ ພັດທະນາປະ ເທດຊາດໃຫ້ນັບຈະເລີນກ້າວໜ້າ ແລະ ນໍາເອົາປະເທດຊາດ ຫລຸດພົ້ນອອກຈາກປະເທດດ້ອຍພັດທະນາຕາມທີ່ໄດ້ວາງຄາດໝາຍເອົາໄວ້ ເພາະໃນຂະບວນການສ້າງສາ ແລະ ພັດທະນາດັ່ງກ່າວ ມັນຮຽກ ຮ້ອງຕ້ອງການຢ່າງຍິ່ງຕໍ່ຜູ້ທີ່ມີຄວາມຮູ້-ຄວາມສາມາດສູງ ບໍ່ວ່າເປັນເພດຍິງ ຫລື ຊາຍ ຈິ່ງເຮັດໃຫ້ແມ່ຍິງລາວບັນດາເຜົ່າຄືກຳລັງແຮງສັງລວມຂອງຊາດທີ່ຕັດແຍກອອກບໍ່ໄດ້ກັບກຳລັງແຮງ ທີ່ເປັນເພດຊາຍ.

ດັ່ງນັ້ນ, ໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ (20.7.1955-20.7.2022) ຂໍອວຍພອນມາຍັງແມ່ຍິງລາວ ກໍຄື ປະຊາຊົນລາວບັນດາເຜົ່າທຸກຄົນ ຈົ່ງມີສຸຂະພາບ ທີ່ແຂງແຮງ, ປະສົບຜົນສໍາເລັດໃນໜ້າທີ່ວຽກງານ ແລະ ຊີວິດໃນຄອບຄົວ. ພ້ອມນີ້ ຮຽກຮ້ອງມາຍັງບັນດາອົງການຂອງພັກ, ລັດ ແລະ ອົງການມະຫາຊົນຕ້ອງໄດ້ເພີ່ມທະ ວີຄວາມເອົາໃຈໃສ່ກໍ່ສ້າງ ພະນັກງານເພດຍິງໃຫ້ມີສ່ວນຮ່ວມໃນການຕັດສິນບັນຫາຕ່າງຯ ຂອງຊາດໃຫ້ຫລາຍຂຶ້ນ. ຂະນະ ດຽວກັນ ຕ້ອງຊຸກຍູ້ສົ່ງເສີມເພດຍິງໃນສັງຄົມທົ່ວໄປ ບໍ່ວ່າເປັນນັກທຸລະກິດ, ຊາວຄ້າຂາຍ ຫລື ປະຊາ ຊົນເຂົ້າໃນການພັດທະນາສ້າງສາປະເທດຊາດໃຫ້ທົ່ວເຖີງ, ໄປຟ້ອມຯ ກັບການເພີ່ມທະວີຄວາມເອົາໃຈໃສ່ສ້າງເງື່ອນໄຂໃຫ້ແມ່ຍິງລາວບັນດາເຜົ່າທີ່ກວມຈຳນວນ ຫລາຍກວ່າເຄິ່ງໜຶ່ງຂອງພົນລະເມືອງ ທົ່ວ ປະເທດໄດ້ເສີມຂະຫຍາຍຄວາມຮູ້-ຄວາມສາມາດ, ມີວິຊາຊີບ, ມີວຽກເຮັດງານທຳ ແລະ ອື່ນໆ ເພື່ອ ເຮັດໃຫ້ໃຫ້ເຂົາເຈົ້າສາມາດເຄື່ອນ ໄຫວສ້າງລາຍຮັບອັນຫມັ້ນຄົງໃຫ້ຄອບຄົວ ແລະ ປະກອບສ່ວນ ເຂົ້າໃນການປົກປັກຮັກສາ ແລະ ສ້າງສາປະເທດຊາດໃຫ້ ນັບມື້ຈະເລີນກ້າວໜ້າຂຶ້ນໄປເລື້ອຍໆ.

ຮຽກຮ້ອງມາຍັງແມ່ຍິງລາວບັນດາເຜົ່າ ຈົ່ງສືບຕໍ່ພັດທະ ນາຕົນເອງຢ່າງຕໍ່ເນື່ອງ ທັງທາງດ້ານ ຄວາມຮູ້-ຄວາມສາມາດ ແລະ ຄຸນສົມບັດສິນທໍາປະຕິບັດ ເພື່ອເຮັດລ້ອນໜ້າທີ່ທີ່ພັກ ແລະ ລັດຖະບານມອບໝາຍໃຫ້ ເພື່ອເຮັດໃຫ້ບົດບາດ ແລະ ຄວາມຮູ້-ຄວາມສາມາດຂອງເພດຍິງນັບມື້ເທົ່າທຽມກັບ ເພດຊາຍ ແລະ ພ້ອມກັນຮຽງບ່າຮຽງໄຫລ່ກັນເຂົ້າໃນພາລະກິດສ້າງສາ ແລະ ພັດທະນາປະເທດຊາດອັນແສນຮັກທີ່ບັນພະບຸລຸດຂອງລາວເອົາຊີວິດ ແລະ ເລືອດເນື້ອເຫື່ອແຮງເພື່ອຕໍ່ສູ້ຢ່າງທໍລະຫົດອົດທົນ ແລະ ເຕັມໄປດ້ວຍຄວາມເສຍສະຫລະ ຈິ່ງສາມາດປົດປ່ອຍປະ ເທດຊາດຈາກແອກການປົກຄອງຂອງ ພວກຈັກກະພັດຜູ້ຮຸກຮານໄດ້ຢ່າງສະຫງ່າຜ່າເຜີຍ ໃຫ້ນັບມື້ຈະເລີນຮູ່ງເຮືອງສີວິໄລຕະຫລອດໄປ.

Cr: ບຸນຕຽງ ຈັນທະວົງ

ວັນທີ 20 ກໍລະກົດ ທີ່ຜ່ານມານີ້ ກະຊວງສຶກສາທິການ ແລະ ກິລາ (ສສກ), ລັດຖະບານຍີ່ປຸ່ນ ແລະ ອົງການຢູນິເຊັບ ໄດ້ຈັດພິທິປະກາດທຶນຊ່ວຍເຫຼືອລ້າ ມູນຄ່າ USD 621,000 ເພື່ອນໍາໃຊ້ເຂົ້າໃນການຈັດຕັ້ງປະຕິບັດກິດຈະກໍາຫຼຸດຜ່ອນຜົນກະທົບການຮຽນຂອງເດັກນ້ອຍຈາກການລະບາດຂອງພະຍາດໂຄວິດ-19 ເປັນໄລຍະເວລາ 1 ປີ.

ຈຸດປະສົງສໍາຄັນໃນການສະໜັບສະໜູນຄັ້ງນີ້ ຈະປະກອບດ້ວຍການພັດທະນາ ແລະ ການແຈກຢາຍອຸປະກອນດິຈິຕອນ ແລະ ອຸປະກອນການຮຽນແບບອ໋ອບລາຍ ແລະ ການຝຶກທັກສະທາງດ້ານດິຈິຕອນໃຫ້ກັບຄູ ແມ່ນເພື່ອເນັ້ນໃສ່ “ການຟື້ນຟູການຮຽນ” ສໍາລັບເດັກນ້ອຍກ່ອນໄວຮຽນ ແລະ ຊັ້ນປະຖົມທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19. ການສະໜັບສະໜູນນີ້ຍັງລວມໄປເຖິງການສະໜອງສື່ການຮຽນຕ່າງໆທີ່ມີຢູ່ໃນ ຖານຂໍ້ມູນການຮຽນ-ການສອນແບບດິຈິຕອນ ຂອງກະຊວງສຶກສາທິການ ແລະ ກິລາ “ຄັງປັນຍາລາວ” ທີ່ໄດ້ຮັບການສະໜັບສະໜູນຈາກ ອົງການຢູນິເຊັບ.

ກິດຈະກໍາດັ່ງກ່າວຈະສຸມໃສ່ການເລັ່ງແກ້ໄຂບັນຫາຄວາມຕ້ອງການອັນຮີບດ່ວນໃຫ້ແກ່ເດັກນ້ອຍທີ່ຢູ່ໃນກຸ່ມ ເປົ້າໝາຍໃນ ສປປ ລາວ ເພື່ອໃຫ້ເຂົາເຈົ້າໄດ້ເຂົ້າເຖິງໂອກາດຕ່າງໆກ່ຽວກັບ ການບໍາລຸງນັກຮຽນຊ່ວງໄລຍະພັກຮຽນ ແລະ ການເລັ່ງການຮຽນຄືນ ແລະ ເຂົ້າເຖິງສື່ການຮຽນຕ່າງໆ ເພື່ອປ້ອງກັນການປະລະການຮຽນ ແລະ ຫຼຸດຜ່ອນຄວາມແຕກໂຕນທາງການຮຽນ. ສື່ການຮຽນແມ່ນລວມໄປເຖິງປຶ້ມແບບຮຽນທີ່ເປັນໜັງສື ເບວ (ຕົວອັກສອນນູນ) ສໍາລັບນັກຮຽນທີ່ມີຄວາມບົກພ່ອງທາງດ້ານສາຍຕາ.

ຕະຫຼອດໄລຍະເວລາ 3 ປີ ທີ່ຜ່ານມາ, ສສກ ໄດ້ຮັບມື ແລະ ຕອບໂຕ້ກັບການລະບາດຂອງພະຍາດໂຄວິດ-19 ຢ່າງໄວວາ ເພື່ອຫຼຸດຜ່ອນຜົນກະທົບທີ່ຈະເກີດຂຶ້ນກັບເດັກນ້ອຍນັກຮຽນໃຫ້ໄດ້ຫຼາຍທີ່ສຸດ. ເຖິງແມ່ນວ່າຈະມີການຕອບໂຕ້, ນັກຮຽນໃນເກືອບທຸກຂອບເຂດທົ່ວປະເທດກໍຍັງໄດ້ຢຸດການຮຽນເປັນເວລາຫຼາຍເດືອນເນື່ອງຈາກການປິດໂຮງຮຽນ ຍິ່ງນເຮັດໃຫ້ນັກຮຽນມີຄວາມສ່ຽງສູງຂຶ້ນທີ່ຈະສູນເສຍການຮຽນ ແລະ ມີການປະລະເກີດຂຶ້ນ. ການສູນເສຍການຮຽນທີ່ຍິ່ງໃຫຍ່ໃນຂອບເຂດທົ່ວປະເທດຍ້ອນພະຍາດໂຄວິດ-19 ບໍ່ແມ່ນພຽງແຕ່ການສູນເສຍການຮຽນຂອງເດັກ ແຕ່ມັນເປັນການສູນເສຍຜົນຜະລິດຂອງຊາດໃນອະນາຄົດ ອີກດ້ວຍ.

ການຮ່ວມມືນີ້ຍັງຄໍານຶງເຖິງການເອົາຄູສອນເປັນສູນກາງໃນການຟື້ນຟູການຮຽນ ແລະ ແຜນບໍາລຸງນັກຮຽນ ທີ່ໄດ້ວາງແຜນໄວ້ແລ້ວ. ການຍົກລະດັບທັກສະຂອງຄູໃນດ້ານການຮຽນ-ການສອນແບບດິຈິຕອນ ແມ່ນຈະໄດ້ຈັດຕັ້ງປະຕິບັດຮ່ວມກັບ ອົງການໄຈກາ. ໂດນການຮ່ວມມືກັບ ອົງການໄຈກາ, ນັກຮຽນ, ນັກຮຽນຄູ ແລະ ຄູສອນໃນບັນດາແຂວງເປົ້າໝາຍແມ່ນໄດ້ຮັບການຝຶກອົບຮົມການສອນວິຊາຄະນິດສາດໂດຍນໍາໃຊ້ຮູບແບບປະສົມປະສານ.

ທ່ານນາງ ດຣ. ເພຍ ບຼິດໂຕ, ຜູ້ຕາງໜ້າ ອົງການຢູນິເຊັບ ໄດ້ອະທິບາຍ ວ່າ “ຄູສອນແມ່ນສໍາຄັນທີ່ສຸດຕໍ່ການຟື້ນຟູການສູນເສຍການຮຽນທີ່ໄດ້ຮັບຜົນກະທົບຈາກພະຍາດໂຄວິດ-19 ແລະ ສໍາຄັນຕໍ່ການປະຕິຮູບລະບົບການສຶກສາໃຫ້ສອດຄ່ອງກັບຄວາມຕ້ອງການຂອງເດັກນ້ອຍລາວ ໃນສະຕະວັດທີ 21”.

ທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ໄດ້ກ່າວ ວ່າ “ພວກເຮົາໄດ້ພົບກັບສິ່ງທ້າທາຍທີ່ສຸດເທົ່າທີ່ເຄີຍມີມາໃນຂະແໜງການສຶກສາ. ໂຄງການບໍາລຸງນັກຮຽນ ແລະ ການຍົກລະດັບທັກສະ ແລະ ຄວາມສາມາດຂອງຄູໃນດ້ານດິຈິຕອນ ໂດຍການສະໜັບສະໜູນຈາກລັດຖະບານຍີ່ປຸ່ນ ຈະມີບົດບາດສໍາຄັນທີ່ສຸດໃນເວລາທີ່ມີສະພາບການເຊັ່ນນີ້”.

ການຮ່ວມມືໃນຄັ້ງນີ້ ຍັງໄດ້ຄໍານຶງເຖິງຄວາມສໍາຄັນໃນການສ້າງເຄື່ອງມືທາງດ້ານນະວັດຕະກໍາດິຈິຕອນ ແລະ ເຕັກໂນໂລຊີ ຕ່າງໆ ໃນຫ້ອງຮຽນ ແລະ ໃຊ້ເປັນສ່ວນໜຶ່ງຂອງການຮຽນ-ການສອນ, ນີ້ແມ່ນບົດຮຽນທີ່ສໍາຄັນທີ່ໄດ້ຮຽນຮູ້ຈາກການແຜ່ລະບາດຂອງໂລກລະບາດ.

ທ່ານ ໂຄບະຢະຊິ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ໄດ້ກ່າວວ່າ “ເດັກນ້ອຍນັກຮຽນສູນເສຍໂອກາດຕ່າງໆໃນການຮຽນຢູ່ໂຮງຮຽນ ເນື່ອງຈາກການປິດໂຮງຮຽນ. ການຮ່ວມມືທີ່ເຂັ້ມແຂງເປັນສິ່ງຈໍາເປັນຖ້າພວກເຮົາຕ້ອງການທີ່ຈະຢືນຮ່ວມກັນເພື່ອແກ້ໄຂຜົນກະທົບອັນຮ້າຍແຮງຕໍ່ກັບເດັກນ້ອຍນີ້ ຍ້ອນການລະບາດຂອງພະຍາດໂຄວິດ-19.

ການມີສ່ວນຮ່ວມຕ່າງໆທີ່ຖືກເວລາສາມາດຊຸກຍູ້ການພັດທະນາໄດ້. ດ້ວຍການເຮັດວຽກຮ່ວມກັນພາຍໃຕ້ການຮ່ວມມືອັນໃໝ່ ລະ ຫວ່າງ ກະຊວງສຶກສາທິການ ແລະ ກິລາ, ລັດຖະບານຍີ່ປຸ່ນ ແລະ ອົງການຢູນິເຊັບ ຈະຊ່ວຍໃຫ້ສາມາດບັນລຸເປົ້າໝາຍຫຼາຍຂຶ້ນໃນການຊ່ວຍເຫຼືອເດັກນ້ອຍນັກຮຽນໃນ ສປປ ລາວ ໃນໂຄງການບໍາລຸງນັກຮຽນຄືນ ແລະ ສ້າງຄວາມທົນທານໄດ້ຫຼາຍຂຶ້ນໃນລະບົບການສຶກສາ.

ສະຖາບັນວິຈິດສິນແຫ່ງຊາດ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ສູນວັດທະນະທໍາຫວຽດນາມ ປະຈໍາ ສປປ ລາວ ໄດ້ສຳເລັດການຈັດຕັ້ງຄ້າຍປະຕິມາກໍາ ແລະ ແຕ້ມຮູບໂຄສະນາປຸກລະດົມ ຫົວຂໍ້ ສາຍພົວພັນແບບພິເສດຫວຽດນາມ-ລາວ, ລາວ-ຫວຽດນາມ ເມື່ອວັນທີ 19 ກໍລະກົດ ຜ່ານມາ ທີ່ສູນວັດທະນະທໍາຫວຽດນາມ, ໂດຍການເປັນປະທານຮ່ວມຂອງ ທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຫ່ງ ສປປ ລາວ ແລະ ທ່ານ ຕະ ກວາງ ດົ່ງ ຮອງລັດຖະມົນຕີ ກະຊວງວັດທະນະທໍາ, ກິລາ ແລະ ທ່ອງທ່ຽວ ສສ ຫວຽດນາມ ມີຫົວໜ້າສູນວັດທະນະທຳ ຫວຽດນາມ, ຕາງໜ້າສະຖານທູດ ສສ ຫວຽດນາມ ປະຈໍາ ສປປ ລາວ ແລະ ແຂກຖືກເຊີນທັງຝ່າຍລາວ ແລະ ຝ່າຍຫວຽດນາມເຂົ້າຮ່ວມ.

ໃນການຈັດງານຄັ້ງນີ້, ເພື່ອເປັນການປຸກລະດົມໃຫ້ ຄູ-ອາຈານ, ສິລະປິນ ແລະ ນັກສຶກສາ ສ້າງສັນຜົນງານດ້ານປະຕິມາກໍາ ແລະ ຈິດຕະກໍາ, ເພື່ອໂຄສະນາ ທັງເປັນການສະເຫຼີມສະຫຼອງ ແລະ ຕ້ອນຮັບປີແຫ່ງຄວາມສາມັກຄີ ມິດຕະພາບລາວ-ຫວຽດນາມ ຢູ ສປປ ລາວ, ເພື່ອເປັນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສັນຍາມິດຕະພາບລາວ-ຫວຽດນາມ ຄົບຮອບ 45 ປີ. ເພື່ອເປັນການປະກອບສ່ວນຂະບວນການເຄື່ອນໄຫວທາງດ້ານສິລະປະ ແລະ ວັດທະນະທໍາ ຊຶ່ງການຕັ້ງຄ້າຍປະຕິມາກໍາ ແລະ ແຕ້ມຮູບໂຄສະນາປຸກລະດົມດັ່ງກ່າວ ແມ່ນໄດ້ເລີ່ມແຕ່ວັນທີ 9 ມິຖຸນາ 2022 ແລະ ສໍາເລັດ ວັນທີ 15 ກໍລະກົດ 2022 ຜ່ານມາ ຊຶ່ງມີນັກສິລະປິນ, ຄູ-ອາຈານ, ຈາກສະຖາບັນວິຈິດສິນແຫ່ງຊາດ, ວິທະຍາໄລວິຈິດສິນພື້ນເມືອງ ແຂວງຫຼວງພະບາງ ແລະ ໂຮງຮຽນວິຈິດສິນແຂວງສະຫວັນນະເຂດ ເຂົ້າຮ່ວມ 37 ທ່ານ, ລວມມີ 65 ຜົນງານ, ຜົນງານດ້ານຈິດຕະກໍາ ຈໍານວນ 40 ຜົນງານ, ຜົນງານດ້ານປະຕິມາກໍາ ຈໍານວນ 25 ຜົນງານ.

ຜົນງານທີ່ສິລະລະປິນໄດ້ສ້າງສັນແມ່ນ ສະທ້ອນໃຫ້ເຫັນເຖິງການຮ່ວມມືໂດຍມີຜູ້ນໍາຮຸ່ນຕ່າງໆ ເຊັ່ນ: ເລີ່ມຈາກ ປະທານ ໄກສອນ ພົມວິຫານ ກັບ ປະທານ ໂຮ່ຈິມິນ ຈົນມາເຖິງການນໍາສູງສຸດຂອງສອງປະເທດ ຍຸກປັດຈຸບັນ ຊຶ່ງແມ່ນ ທ່ານ ທອງລຸນ ສີສຸລິດ ແລະ ທ່ານ ຫງວຽນ ຊວນ ຟຸກ. ນອກນັ້ນຍັງມີຜົນງານ ສະທ້ອນໃຫ້ເຫັນເຖິງສາຍພົວພັນ, ມິດຕະພາບ, ຄວາມສາມັກຄີພິເສດ, ໄມຕີຈິດ, ຄູ່ຮ່ວມອຸດົມການ, ຄວາມຮັກຂອງສອງຊາດ ລາວ-ຫວຽດນາມ ຜົນງານດັ່ງກ່າວລ້ວນແຕ່ເປັນຜົນງານທີ່ມີຄຸນຄ່າອັນສູງສົ່ງ ທີ່ສິລະປິນໄດ້ສ້າງສັນອອກມາ. ໃນວັນທີ 16 ກໍລະກົດ 2022 ຜ່ານມາ ຄະນະກໍາມະການໄດ້ຄັດເລືອກຜົນດີເດັ່ນ ເພື່ອໃຫ້ລາງວັນແກ່ຜູ້ຮ່ວມ ຄ້າຍປະຕິມາກໍາ ແລະ ແຕ້ມຮູບໂຄສະນາປຸກລະດົມ ມີສອງສາຂາ ມີ: ລາງວັນຊະນະເລີດ ສາຂາປະຕິມາກໍາ ມີ 1 ຜົນງານ, ຮອງຊະນະເລີດ ມີ 2 ຜົນງານ ແລະ ລາງວັນທີສາມ ມີ 3 ຜົນງານ; ລາງວັນຊະນະເລີດ ສາຂາຈິດຕະກໍາ ມີ 1 ຜົນງານ, ຮອງຊະນະເລີດ ມີ 2 ຜົນງານ ແລະ ລາງວັນທີສາມ ມີ 3 ຜົນງານ.

ຂ່າວ-ພາບ: ຍຸພິນທອງ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ສະຫະພັນແມ່ຍິງລາວ ເມືອງເງິນ ແຂວງໄຊຍະບູລີ ໄດ້ສ້າງຂະບວນການເນື່ອງໃນໂອກາດ ສະເຫຼີມສະຫຼອງວັນຄ້າຍວັນເກີດ ຂອງ ປະທານ ສຸພານຸວົງ ຄົບຮອບ 113 ປີ, ວັນສ້າງຕັ້ງ ສະຫະພັນແມ່ຍິງລາວ ຄົບຮອບ 67 ປີ, ວັນກິລາກາຍະກຳແຫ່ງຊາດ ຄົບຮອບ 56 ປີ, ທັງເປັນການສ້າງຂະບວນການຕ້ອນຮັບກອງປະຊຸມເຄິ່ງສະໄໝທີ V ຂອງອົງຄະນະບໍລິຫານງານພັກເມືອງ ຂຶ້ນເມື່ອບໍ່ດົນມານີ້ ທີ່ເດີນກິລາ ເມືອງ. ໂດຍການເຂົ້າຮ່ວມຂອງ ທ່ານ ທະວິສັກ ໄຊຍະວົງ ວ່າການເຈົ້າເມືອງໆເງິນ, ມີແຂກຖືກເຊີນ ແລະ ພາກສ່ວນກ່ຽວຂ້ອງພາຍໃນເມືອງເຂົ້າຮ່ວມ.

ທ່ານ ນາງ ວຽງທອງ ສີຫາວົງ ປະທານສະຫະພັນແມ່ຍິງເມືອງເງິນ ໃຫ້ຮູ້ວ່າ: ການສ້າງຂະບວນການໃນຄັ້ງນີ້, ແມ່ນໄດ້ຈັດກິດຈະກໍາຟ້ອນລວມໝູ່ຂອງແມ່ຍິງພາຍໃນເມືອງ, ແຂ່ງຂັນກິລາບານເຕະມິດຕະພາບຍິງ-ຊາຍ ລະຫວ່າງ ຄະນະນຳເມືອງເງິນ ພົບກັບ ເອື້ອຍນ້ອງແມ່ຍິງ ຊຶ່ງເຕັມໄປດ້ວຍຄວາມເບີກບານມ່ວນຊື່ນ ແລະ ມີຄວາມໝາຍຄວາມສຳຄັນ, ທັງເປັນການຮັດແໜ້ນຄວາມສາມັກຄີລະຫວ່າງສະມາຊິກສະຫະພັນແມ່ຍິງເມືອງ ແລະ ບ້ານ.

ຂ່າວ-ພາບ: ອິນແປງ ແຫວນຄຳ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ທະນາຄານຮ່ວມພັດທະນາ (JDB) ໄດ້ມອບອາກອນກໍາໄລລ່ວງໜ້າຈາກຜົນການດໍາເນີນທຸລະກິດຂອງທະນາຄານຮ່ວມພັດທະນາ 6 ເດືອນຕົ້ນປີ 2022 ຈໍານວນ 29.154.384.279 ກີບ ໃຫ້ ກະຊວງການເງິນ ເມື່ອວັນທີ 18 ກໍລະກົດ ຜ່ານມາ ທີ່ກະຊວງການເງິນ. ເປັນກຽດເຂົ້າຮ່ວມໂດຍ ທ່ານ ບຸນປະເສີດ ສີກຸນລະບຸດ ຫົວໜ້າກົມ ສ່ວຍສາອາກອນ ກະຊວງການເງິນ, ມີຄະນະນໍາຂອງກົມສ່ວຍສາອາກອນ ຕະຫຼອດຮອດວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານໃນຄັ້ງນີ້.

ທ່ານ ວິໄລ ສີພະພອນ ຜູ້ອໍານວຍການໃຫຍ່ ຕາງໜ້າຄະນະຜູ້ບໍລິຫານ ທະນາຄານຮ່ວມພັດທະນາ ເປັນຜູ້ມອບຈໍານວນເງິນທີ່ເປັນອາກອນກໍາໄລລ່ວງໜ້າ, ໃຫ້ກຽດກ່າວຮັບໂດຍ ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ. ການມອບພັນທະອາກອນກໍາໄລຈາກການດໍາເນີນທຸລະກິດໃນໄລຍະ 6 ເດືອນຕົ້ນປີ 2022 ຂອງທະນາຄານຮ່ວມພັດທະນາ ຫຼື JDB ຈໍານວນ 29.154.384.279 ກີບ ຊຶ່ງສະທ້ອນໃຫ້ເຫັນຄວາມຕື່ນຕົວ ແລະ ເອົາໃຈໃສ່ຂອງຜູ້ບໍລິຫານລະດັບສູູງໃນການປະຕິບັດພັນທະອາກອນຕ່າງໆຢ່າງເອົາໃຈໃສ່ມອບໃຫ້ລັດຖະບານ ເຂົ້າຄັງເງິນແຫ່ງຊາດ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ, ໄດ້ສະໜັບສະໜູນຊ່ວຍເຫຼືອສັງຄົມຕະຫຼອດມາ, ພາຍໃຕ້ການຊີ້ນໍາຢ່າງໃກ້ຊິດຈາກພັກ-ລັດ ກໍຄືທະນາຄານແຫ່ງ ສປປ ລາວ ເຮັດໃຫ້ທະນາຄານຮ່ວມພັດທະນາ ໄດ້ຮັບຄວາມເຊື່ອໝັ້ນຈາກສັງຄົມໃນທົ່ວປະເທດ ແລະ ການຕັດສິນໃຈສູງ ຂອງຄະນະຜູ້ບໍລິຫານທີ່ກ້າລົງທຶນໃສ່ການພັດທະນາ ໃຫ້ກາຍເປັນທະນາຄານທີ່ທັນສະໄໝ ໄດ້ທຸ່ມເທເຫື່ອແຮງ ສະຕິປັນຍາ ພັດທະນາ ໃຫ້ມີການເຕີບໃຫຍ່ ຂະຫຍາຍຕົວ ແລະ ບໍລິການລູກຄ້າດ້ວຍມາດຕະຖານສາກົນ.

ໃນໄລຍະຜ່ານມາ, ທະນາຄານຮ່ວມພັດທະນາ ກໍໄດ້ມີການປະກອບສ່ວນ ເຂົ້າໃນການຊ່ວຍເຫຼືອສັງຄົມຢ່າງຕໍ່ເນື່ອງ, JDB ມີຄວາມພາກພູມໃຈ ທີ່ໄດ້ມີໂອກາດໄດ້ຮັບໃຊ້ສັງຄົມ ໄດ້ຮັບການສະໜັບສະໜູນຈາກສັງຄົມ ແລະ ເປັນກໍາລັງໃຈໃຫ້ຕະຫຼອດມາ ຈຶ່ງເຮັດໃຫ້ທະນາຄານຮ່ວມພັດທະນາ ມີຜົນການດໍາເນີນທຸລະກິດທີ່ເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ ແລະ ມີຜົນກຳໄລຢ່າງໜ້າເພິ່ງພໍໃຈ.

ປັດຈຸບັນ ທະນາຄານຮ່ວມພັດທະນາ ໄດ້ຮ່ວມມືກັບຫຼາຍອົງກອນ ແລະ ຫຼາຍບໍລິສັດ ເພື່ອບໍລິການດ້ານການເງິນ ທີ່ຄົບວົງຈອນ ໃຫ້ກັບລູກຄ້າທຸກລະດັບ ຢ່າງເທົ່າທຽມກັນ ປະຕິບັດນະໂບຍາຍ ຕ່າງຝ່າຍ ຕ່າງມີຜົນປະໂຫຍດ ຕາມຄໍາຂັວນ ທີ່ວ່າ:“ ເຕີບໃຫຍ່ໄປພ້ອມກັນ “

ຂ່າວ: ຄໍາຕົ້ນ ວໍລະຈັກ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ຕອນເຊົ້າວັນທີ 20 ກໍລະກົດ 2022 ການນຳແຂວງສະຫວັນນະເຂດ ພ້ອມດ້ວຍສະຫະພັນແມ່ຍິງແຂວງ,ບັນດາຄະນະນຳຈາກພະແນກການ,ກົມກອງ,ພະນັກງານ,ທະຫານ,ຕຳຫຼວດ,ນັກຮຽນ,ນັກສຶກສາ ແລະ ບັນດານັກທຸລະກິດ ພາຍໃນແຂວງສະຫວັນນະເຂດ ໄດ້ພ້ອມກັນເຂົ້າວາງພວງມາລາ,ກະຕ່າດອກໄມ້ ແລະ ດອກໄມ້ ທີ່ອະນຸສາວະລີນັກຮົບນິລະນາມ ແລະ ອະນຸສອນສະຖານປະທານໄກສອນ ພົມວິຫານ ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວຄົບຮອບ 67 ປີ ( ວັນທີ 20 ກໍລະກົດ 1955 – 20 ກໍລະກົດ 2022 ) ເຊິ່ງນຳພາໂດຍ ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ.

ທັງນີ້ກໍ່ເພື່ອລະນຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງວິລະຊົນ, ນັກຮົບປະຕິວັດ,ທີ່ອົງອາດກ້າຫານທີ່ໄດ້ເສຍສະຫຼະຊີວິດ ແລະ ເລືອດເນື້ອເພື່ອປະເທດຊາດ ໃນຂະບວນການປະຕິວັດໄລຍະຜ່ານມາ ເຊິ່ງເອື້ອຍນ້ອງແມ່ຍິງລາວບັນດາເຜົ່າໄດ້ຄຽງບ່າຄຽງໄລ່ກັບເພດຊາຍປະກອບສວ່ນໃນພາລະກິດປະຕິວັດ ນັບແຕ່ໄດ້ສ້າງຕັ້ງພັກປະຊາຊົນປະຕິວັດລາວຂຶ້ນໃນວັນທີ 22 ມີນາ 1955 ເປັນຕົ້ນມາ ພັກກໍ່ໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍກໍ່ສ້າງແມ່ຍິງປະກອບສ່ວນເຂົ້າໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກຳລັງແຮງທີ່ສຳຄັນຂອງພັກ.

ເມື່ອເຫັນໄດ້ຄວາມຕື່ນຕົວຂອງເອື້ອຍນ້ອງແມ່ຍິງໃນການປະກອບສວ່ນພາລະກິດປະຕິວັດປະຕິບັດໜ້າທີ່ວຽກງານໃນການຕໍ່ສູ້ກູ້ຊາດໃນໄລຍະຜ່ານມາຈຶ່ງເຫັນໄດ້ຄວາມສຳຄັນຂອງເອື້ອຍນ້ອງແມ່ຍິງລາວບັນດາເຜົ່າໄດ້ມີການເຄື່ອນໄຫວ ແລະ ເຕີບໃຫຍ່ຂະຫຍາຍຕົວນັບມື້ນັບກວ້າງຂວາງ ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ ແລະ ໄດ້ກໍານົດເອົາ ວັນທີ 20 ກໍລະກົດ ຂອງທຸກໆປີ ເປັນວັນແມ່ຍິງລາວ.

ພາບ – ຂ່າວ: ອັກສອນສິນ ພົມມະຈັນ
#Medialaos MMD (ແຫຼ່ງຂໍ້ມູນຈາກ: ນັກຂ່າວວິທະຍຸກະຈາຍສຽງ ແຂວງສະຫວັນນະເຂດ)

ໃນ​ລະບອບ​ການ​ປົກຄອງ​ຂອງ​ພວກ​ສັກ​ດີ​ນາ, ພວກ​ລ່າ​​ເມືອງຂຶ້ນ​ແບບ​ເກົ່າ ​ແລະ ​ແບບ​ໃໝ່, ​ແມ່ຍິງ​ລາວ​ບັນດາ​ເຜົ່າ ​ດຳລົງ​ຊີວິດ ​ຢູ່​ໃນ​ຄວາມ​ມືດ​ມົນ, ບໍ່​ມີ​ອິດສະລະພາບ, ພວກ​ເຂົາ​ຖື​ແມ່ຍິງ​ ເປັນ​ຄົນ​ໂງ່​ຈ້າ, ຫລ້າຫລັງ, ດູ​ຖູ​ກໝິ່ນ ປະໝາດ, ບໍ່​ມີ​ສິດ, ບໍ່​ມີ​ໂອກາດ​ຮ່ຳຮຽນ ​ຍົກ​ລະດັບ​ຄວາມ​ຮູ້ ຄວາມ​ສາມາດ, ຖືກ​ກົດ​ຂີ່​ຂົ່ມ​ເຫງ, ຂົ່ມຂືນ​ທຳ​ຊໍາ​ເລົາ, ທຳລາຍ​ກຽດ​ສັກ​ສີ ​ເຮັດ​ໃຫ້​ແມ່ຍິງ ​ບໍ່​ມີ​ບົດບາດ ​ໃນ​ດ້ານ​ການ​ເມືອງ, ​ເສດຖະກິດ, ວັດທະນະທຳ-ສັງຄົມ ລວມທັງ​ບົດບາດ ຢູ່​ໃນ​ຄອບຄົວ; ສະນັ້ນ ​ເພື່ອ​ປົດ​ປ່ອຍ​ຕົນ​ເອງ​ ອອກ​ຈາກ​ແອກ​ປົກຄອງ​ດັ່ງກ່າວ ​ແມ່ຍິງ​ລາວ​ບັນ​ເຜົ່າ​ໄດ້​ອຸທິດ​ຊີວິດ, ​ເລືອດ​ເນື້ອ​ເຫື່ອ​ແຮງ, ສະຕິ​ປັນຍາ​ຄຽງ​ບ່າ​ຄຽງ​ໄຫລ່​ ກັບ​ເພດ​ຊາຍ​ຕໍ່ສູ້​ກູ້​ຊາດ ​ຢ່າງ​ພິລະ​ອາດ​ຫານ.

ຍ້ອນ​ເຫັນ​ບົດບາດ​ ແມ່ຍິງ​ໃນ​ພາລະກິດ​ດັ່ງກ່າວ ພັກ​ຈຶ່ງ​ໄດ້​ເອົາ​ໃຈ​ໃສ່​ ສຶກສາ​ອົບຮົມ, ​ເຕົ້າ​ໂຮມ​ກຳລັງ​ແຮງ​ ຂອງ​ແມ່ຍິງ ​ໂດຍ​ການຈັດຕັ້ງ ໜ່ວຍ​ຄົ້ນຄວ້າ​ ວຽກ​ງານ​ແມ່ຍິງ​ຂຶ້ນ ​ໃນ​ວັນ​ທີ 20 ກໍລະກົດ 1955 ຊຶ່ງແມ່ນ​ຕົ້ນກຳ​ເນີ​ດ ຂອງ​ອົງການ​ຈັດຕັ້ງ ສະຫະພັນ​ແມ່ຍິງ​ລາວ ​ໃນ​ປັດຈຸບັນ.

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ໃນຕອນບ່າຍຂອງວັນທີ 19 ກໍລະກົດ 2022 ຜ່ານມານີ້, ຄະນະຜູ້ແທນຂັ້ນສູງ ສປປ ລາວ ນໍາໂດຍສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ສຳເລັດຢ່າງຈົບງາມໃນການເຂົ້າ ຮ່ວມງານສະເຫລີມສະຫລອງສອງວັນປະຫວັດສາດ ການພົວພັນຮ່ວມມືລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດ ຄົບຮອບ 60ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 45ປີ (18/7/1977-18/7/2022) ທີ່ນະຄອນຫລວງຮ່າໂນ້ຍ ສສ ຫວຽດນາມ ແລະ ຢ້ຽມຢາມ ສສ ຫວຽດນາມ ຢ່າງເປັນທາງການແຕ່ວັນທີ 17-19 ກໍລະກົດ 2022 ໄດ້ກັບມາເຖິງນະຄອນຫລວງວຽງຈັນໂດຍສະຫວັດດີພາບ.

ໃນໄລຍະເຄື່ອນໄຫວຢ້ຽມຢາມ ສສ ຫວຽດນາມເປັນເວລາ 3 ວັນ, ສະຫາຍ ບຸນທອງ ຈິດມະນີ ພ້ອມຄະນະໄດ້ຮັບການຕ້ອນຮັບຢ່າງເປັນທາງການ ແລະ ເຂົ້າຮ່ວມພິທີພົບປະສອງຝ່າຍ ກັບສະຫາຍ ນາງ ຫວໍ ແອັງ ຊວັນ ຮອງປະທານປະເທດແຫ່ງ ສສ ຫວຽດນາມ ໄດ້ເຂົ້າຮ່ວມງານໂຮມຊຸມນຸມສະເຫລີມ ສະຫລອງວັນສ້າງຕັ້ງສາຍພົວ ພັນການທູດລະຫວ່າງສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາ ລະນະລັດ ສັງຄົມນິຍົມຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 45 ປີໄດ້ເຂົ້າຮ່ວມງານວາງສະ ແດງ ສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີແບບພິເສດ ລາວ-ຫວຽດ ນາມ ໄດ້ເປັນກຽດປະດັບຫລຽນດາວຄໍາແຫ່ງຊາດ ແລະ ຫລຽນໄຊອິດສະຫລະຊັ້ນ Iເຊິ່ງເປັນຫລຽນສູງສຸດຂອງ ສປປ ລາວໃຫ້ແກ່ບັນດາສະຫາຍທີ່ມີຜົນງານດີເດັ່ນ, ຄຸນ ງາມຄວາມດີຕໍ່ ສປປ ລາວ ແລະ ເຂົ້າຮ່ວມພິທີເປີດງານວາງສະແດງຮູບພາບ ພາຍໃຕ້ຫົວຂໍ້: “ສາຍພົວພັນມິດຕະພາບລາວ-ຫວຽດນາມໝັ້ນຄົງຂະນົງແກ່ນຊົ່ວກາລະນານ” ໄດ້ເຂົ້າຮ່ວມພິທີວາງພວງມາລາ ທີ່ອານຸສາວະລີນັກຮົບນິລະນາມ ແລະ ເຂົ້າວາງພວງມາລາໄວ້ອາໄລທີ່ສຸສານປະທານໂຮ່ຈີມິນ ອີກດ້ວຍ.

ໃນພິທີຕ້ອນຮັບການເດີນທາງກັບມາຈາກ ສສ ຫວຽດນາມ ຂອງຄະນະຜູ້ແທນຂັ້ນສູງ ສປປ ລາວ ຄັ້ງນີ້, ມີສະຫາຍ ຄໍາຜາ ພິມມະສອນ ຮອງຫົວຫນ້າຫ້ອງວ່າການສູນກາງພັກ ແລະ ສະຫາຍ ຫງວຽນ ບາ ຮຸ່ງ, ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມ ພ້ອມດ້ວຍຄະນະເຂົ້າຮ່ວມ.

ຂ່າວ-ພາບ: ອ່າຍຄຳ

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ພິທີຕ້ອນຮັບໜ່ວຍແພດ “ຂະບວນລົດໄຟສັນຕິພາບ” ກອງທັບປົດປ່ອຍປະຊາຊົນຈີນ ໄດ້ຈັດຂຶ້ນໃນວັນທີວັນທີ 19 ກໍລະກົດ 2022 ທີ່ສະຖານີລົດໄຟວຽງຈັນ ໂດຍໄດ້ຮັບການຕ້ອນຮັບຈາກ ທ່ານ ພົວ ບົວສິງ ອິນທະວົງ ຮອງຫົວໜ້າກົມໃຫຍ່ພະລາທິການ, ຮອງຜູ້ຮັບຜິດຊອບຂະບວນລົດໄຟສັນຕິພາບ 2022, ທ່ານ ພົວ ຄໍາແພງ ພູມມາແກ້ວ ຫົວໜ້າກົມເສນາຮັກ ພ້ອມດ້ວຍນາຍທະຫານເຂົ້າຮ່ວມ.

ທ່ານ ພົວບົວສິງ ອິນທະວົງ ໄດ້ກ່າວວ່າ: ຕາງໜ້າກະຊວງປ້ອງກັນປະເທດ ແລະ ກົມໃຫຍ່ພະລາທິການກອງ ທັບປະຊາຊົນລາວ ສະແດງຄວາມຍິນດີ, ຊົມເຊີຍ ແລະຕ້ອນ ຮັບ “ຂະບວນລົດໄຟສັນຕິພາບ 2022” ທີ່ໄດ້ເດີນທາງຕາມເສັ້ນທາງລົດໄຟລາວ-ຈີນ ມາຮອດນະຄອນຫລວງວຽງຈັນ ດ້ວຍຄວາມສະຫວັດດີພາບ ແລະ ປອດໄພ. ຂະບວນລົດໄຟສັນຕິພາບ ມີຄວາມສໍາຄັນໃນການເພີ່ມທະວີຮັດແໜ້ນ ສາຍພົວພັນມິດຕະພາບ ລະຫວ່າງສອງຊາດ, ສອງກອງທັບ ໃຫ້ມີຄວາມໜັກແໜ້ນ ແລະ ເຂົ້າສູ່ລວງເລິກເທື່ອລະກ້າວ.

ທ່ານ ພັນເອກພິເສດ ເສິນ ຊຸນມີງ ຮອງຫົວໜ້າເສນາຮັກ ກົມຮັບປະກັນພະລາທິ ການຂອງຄະນະກໍາມະການທະຫານສູນກາງ, ຫົວໜ້າຄະນະຂະບວນລົດໄຟສັນຕິພາບ 2022 ຂອງກອງທັບປົດປ່ອຍປະຊາຊົນຈີນ ກໍໄດ້ກ່າວວ່າ: ການເຂົ້າຮ່ວມຝຶກຊ້ອມຄັ້ງນີ້ແມ່ນມີຄວາມໝາຍສໍາຄັນ ມິດຕະພາບລະຫວ່າງສອງກອງທັບ ລາວ-ຈີນ. ໃນການເດີນ ທາງຄັ້ງນີ້ ສະມາຊິກຄະນະເສນາຮັກຂອງພວກຂ້າພະເຈົ້າ ມີຄວາມກຽມພ້ອມທຸກຢ່າງໃນການຊ້ອມຮົບ ແລະ ຂ້າພະເຈົ້າກໍໄດ້ຮັບຮູ້ວ່າ, ຄະນະກົມເສນາຮັກຝ່າຍລາວ ກໍໄດ້ກຽມ ພ້ອມທຸກຢ່າງໃຫ້ແກ່ການຊ້ອມຮົບຄັ້ງນີ້. ຂ້າພະເຈົ້າຫວັງວ່າການຊ້ອມຮົບ ຂອງສອງກອງທັບ ລາວ-ຈີນ ພວກເຮົາຈະໄດ້ຮັບຜົນສໍາເລັດຢ່າງຈົບງາມ.

ສຳລັບ ພິທີທາງການຈະຈັດຂຶ້ນໃນວັນທີ 25 ກໍລະກົດ 2022, ທີ່ສະໂມສອນໃຫຍ່ພະລາທິການກອງທັບນະຄອນຫລວງວຽງຈັນ, ໃນຕອນບ່າຍມື້ດຽວກັນ ຈະມີການຫັດແອບຝຶກຊ້ອມຕົວຈິງລະຫວ່າງ ໜ່ວຍເສນາຮັກ ແລະ ໜ່ວຍພາລາທິການ“ຂະບວນລົດໄຟສັນຕິພາບ 2022” ແລະ ກອງທັບປະຊາຊົນລາວ ທີ່ສະໜາມຈໍາລອງເມືອງໂພນໂຮງ ແຂວງວຽງຈັນ.

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

ພາຍຫລັງສຳເລັດ ການເຂົ້າຮ່ວມພິທີເປີດງານວາງສະແດງຮູບພາບ ມິດຕະ ພາບ ລາວ-ຫວຽດນາມ ຍືນຍົງຕະຫລອດໄປ ທີ່ນະຄອນຫລວງຮ່າໂນ້ຍ ສສ ຫວຽດນາມ ໃນວັນທີ 19 ກໍລະກົດ 2022, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ສປປ ລາວ ພ້ອມຄະນະ ໄດ້ເຂົ້າຮ່ວມພົບປະກັບ ທ່ານ ຫງວຽນ ວັນ ຮຸງ ລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ສສ ຫວຽດນາມ ພ້ອມຄະນະ ເພື່ອປຶກສາຫາລື ແລະ ເພີ່ມທະວີການຮ່ວມມືສອງຝ່າຍ ໃຫ້ນັບມື້ດີຂຶ້ນກວ່າເກົ່າ. ພ້ອມນີ້ ຍັງໄດ້ ພ້ອມກັນຕີລາການພົວພັນຮ່ວມມື ໃນໄລຍະຜ່ານ ແລະ ແຜນການຮ່ວມມື ໃນຕໍ່ຫນ້າ.

ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ທ່າມກາງບັນຍາກາດທີ່ສອງຊາດລາວ-ຫວຽດນາມ ພວມຈັດຕັ້ງບັນດາກິດຈະກໍາຕ່າງໆ ເພື່ອປະກອບສ່ວນໃນການສະເຫລີມ ສະຫລອງ ປີສາມັກຄີມິດຕະພາບ ລາວ-ຫວຽດນາມ 2022 ຢ່າງເປັນຂະບວນຟົດຟື້ນ ເຊິ່ງການພົບປະໃນຄັ້ງນີ້ ເປັນການປະກອບສ່ວນເຂົ້າໃນການເສີມສ້າງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ. ທັງເປັນການທົບທວນຄືນຜົນສໍາເລດັການຈັດຕັ້ງ ແຜນການຮ່ວມມືດ້ານສິລະປະ, ວັດທະນະທໍາ ແລະ ທ່ອງທ່ຽວ ໃນໄລຍະປີ 2016-2020 ແລະ ການຈັດ ຕັ້ງຜັນຂະຫຍາຍແຜນການຮ່ວມມື ປີ 2021-2025. ພ້ອມກັນນັ້ນ, ສອງຝ່າຍຍັງໄດ້ປຶກສາຫາລື ດ້ານການພັດທະນາບຸກຄະລາກອນ ຂົງເຂດວັດທະນະທຳ, ການບໍລິການ ແລະ ທ່ອງທ່ຽວ, ການຊຸກຍູ້ໂຄງການພັດທະນາສວນວັດທະນະທຳ ຢູ່ນະຄອນຫລວງວຽງຈັນ, ລວມທັງໂຄງການພັດທະນາຟື້ນຟູເສັ້ນທາງໂຮ່ຈິມິນ ທັງບູລະນະຮັກສາໃຫ້ກາຍແຫລ່ງ ທ່ອງທ່ຽວທາງປະຫວັດວາດ ແລະ ປຶກສາຫາລື ການທີ່ ສປປ ລາວ ກຽມສະເໜີເອົາຫີນ ໜາມໜໍ່ ເຂົ້າເປັນມໍລະດົກໂລກທາງທຳມະຊາດ. ເນື່ອງຈາກພື້ນທີ່ ຫີນໜາມໜໍ່ ມີຊາຍແດນຕິດຈອດກັບເຂດ ຟອງຍາແກບາງ ຂອງ ສສ ຫວຽດນາມ ທີ່ອົງການອຸຍແນສະໂກ ຮັບຮອງເປັນມໍລະດົກໂລກທາງທຳມະຊາດໄປແລ້ວ. ພື້ນທີ່ປ່າສະຫງວນ ຫີນໜາມໜໍ່ ມີ 92.000 ກ່ວາເຮັກຕາ, ມີຄວາມອຸດົມສົມບູນ, ປ່າໄມ້ດົກໜາ, ມີເງື່ອນໄຂສະພາບແວດ ລ້ອມທີ່ເອື້ອອຳນວຍ ແລະ ມີຄວາມເໝາະສົມ ທີ່ຈະເປັນມໍລະດົກໂລກທາງທຳມະຊາດ ໃນອະນາຄົດ.

ແນວໃດກໍຕາມ, ທ່ານລັດຖະມົນຕີ ທັງສອງປະເທດ ໄດ້ເປັນເອກະພາບກັນ ມອບໃຫ້ຂະແໜງການກ່ຽວຂ້ອງ ສືບຕໍ່ເຮັດວຽກຮ່ວມກັນຕື່ມອີກ ເພື່ອໃຫ້ໄດ້ຂໍ້ສະຫລຸບທີ່ຊັດເຈນກວ່າເກົ່າ ສອງຝ່າຍຈຶ່ງຈະຮ່ວມຄົ້ນຄວ້າພິຈາລະນາໃນຕໍ່ໄປ.

ໃນຕອນແລງວັນດຽວກັນ, ທ່ານນາງ ສວນສະຫວັນ ວິຍະເກດ ພ້ອມຄະນະ ກໍໄດ້ຢ້ຽມຊົມ ຫໍພິພິທະພັນວິຈິດສິນແຫ່ງຊາດ ຢູ່ນະຄອນຫລວງຮ່າໂນ້ຍ ນຳອີກ.

ຂ່າວ-ພາບ: ບຸນກອງ

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)