ໃນຕອນເຊົ້າຂອງວັນທີ 21 ກໍລະກົດ 2022 ທີ່ນະຄອນຫຼວງວຽງຈັນ, ລັດ ຖະບານ ໄດ້ຈັດກອງປະຊຸມລັດຖະບານ ເປີດກວ້າງ ຄັ້ງທີ I ປີ 2022 ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ, ນາຍົກລັດຖະ ມົນຕີ, ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະ ບານ, ບັນດາທ່ານເຈົ້າແຂວງ ແລະ ເຈົ້າຄອງນະ ຄອນຫຼວງວຽງຈັນ, ຕາງໜ້າຈາກແນວລາວສ້າງຊາດ, ອົງການຈັດຕັ້ງພັກ, ອົງການຈັດຕັ້ງມະຫາຊົນ, ອົງການກວດສອບແຫ່ງລັດ ໄດ້ເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ ໄດ້ດໍາເນີນໄປໃນທ່າມ ກາງບັນຍາກາດທີ່ສະພາບການສາກົນ ແລະ ພາກພື້ນ ຍັງສືບຕໍ່ຜັນແປ ຢ່າງສະຫຼັບສັບຊ້ອນ ບວກກັບຜົນກະທົບຂອງການແຜ່ລະບາດພະຍາດໂຄວິດ-19 ເຊິ່ງໄດ້ສົ່ງຜົນກະທົບຢ່າງໜັກໜ່ວງ ຕໍ່ເສດຖະກິດໂລກ, ໂດຍສະເພາະ ຕໍ່ຕ່ອງໂສ້ການຄ້າ ລະຫວ່າງປະເທດ, ການສະ ໜອງນ້ຳມັນ, ສະບຽງອາຫານ, ສິນຄ້າທີ່ຈຳເປັນຈຳນວນໜຶ່ງ ບໍ່ພຽງພໍກັບຄວາມຕ້ອງການ ຈຶ່ງເປັນສາເຫດຕົ້ນຕໍເຮັດໃຫ້ລາຄານ້ຳມັນເຊື້ອໄຟ, ລາຄາສິນຄ້າສູງຂຶ້ນ ແລະ ເຮັດໃຫ້ອັດຕາເງິນເຟີ້ສູງຂຶ້ນໃນໂລກ, ລວມທັງ ປະເທດທີ່ຈະເລີນແລ້ວ, ຍິ່ງເປັນການຊ້ຳເຕີມຕໍ່ການຟື້ນຕົວ ແລະ ຂະຫຍາຍຕົວທາງດ້ານເສດຖະກິດ-ການຄ້າ ຂອງໂລກ ທີ່ແກ່ຍາວມາເປັນເວລາ 2 ປີກວ່າແລ້ວ ຍ້ອນຜົນກະທົບຈາກການແຜ່ລະບາດ ຂອງພະຍາດໂຄວິດ-19. ສໍາລັບຢູ່ປະເທດເຮົາ ກໍບໍ່ສາມາດຫຼີກລ່ຽງຜົນກະທົບ ຈາກສະພາບດັ່ງກ່າວເຊັ່ນດຽວກັນ, ໂດຍສະເພາະຜົນກະທົບຕໍ່ສະຖຽນລະພາບທາງດ້ານເສດຖະກິດມະຫາພາກ ທີ່ມີຄວາມບອບບາງຢູ່ແລ້ວ ເປັນຕົ້ນ ບັນຫາການຂາດດູນການຄ້າ ແລະ ເງິນຕາຕ່າງປະເທດ, ການເໜັງຕີງແຮງ ຂອງອັດຕາແລກປ່ຽນເງິນຕາ, ການເໜັງຕີງ ຂອງລາຄານ້ຳມັນເຊື້ອໄຟ, ລາຄາສິນຄ້າ, ເຄື່ອງອຸປະໂພກບໍລິໂພກທີ່ເພີ່ມຂຶ້ນສູງ.

ກອງປະຊຸມລັດຖະບານ ເປີດກວ້າງ ຄັ້ງທີ I ປີ 2022 ຈະໄດ້ດຳເນີນເປັນເວລາ 2 ວັນ ຄື: ວັນທີ 21-22ກໍລະກົດ ເຊິ່ງຈະໄດ້ປຶກສາຫາລື, ຄົົ້ນຄວ້າ ແລະ ເປັນເອກະພາບກັນ ຕໍ່ 5 ຫົວຂໍ້ ທີ່ສໍາຄັນ ແລະ ເຄັ່ງຮ້ອນ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ຕິດພັນກັບບັນດາວຽກຈຸດສຸມຂອງສອງວາລະແຫ່ງຊາດ ທີ່ສະພາແຫ່ງຊາດໄດ້ຮັບຮອງ ກໍ່ຄື ການແກ້ໄຂບັນຫາລວມຂອງຊາດ ດັ່ງນີ້:

(1) ບົດສະຫຼຸບການເຄື່ອນໄຫວວຽກງານພົ້ນເດັ່ນ ໃນ 6 ເດືອນຕົ້ນປີ 2022 ແລະ ທິດທາງວຽກຈຸດສຸມ 6 ເດືອນທ້າຍປີ 2022 ຂອງລັດຖະບານ;

(2) ບົດລາຍງານ ແຜນປະຕິບັດຕົວຈິງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຕິດພັນກັບແຜນປະຕິບັດຕົວຈິງ 02 ວາລະແຫ່ງຊາດ ແລະ ແຜນງົບປະມານແຫ່ງລັດ 06 ເດືອນທ້າຍປີ 2022 ຕາມມະຕິກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX;

(3) ບົດລາຍງານ ສະພາບການປະຕິບັດນະໂຍບາຍອັດຕາດອກເບ້ຍທະນາຄານ ລວມທັງສະພາບການຄຸ້ມຄອງສະຖາບັນການເງິນຈຸລະພາກ, ຮ້ານແລກປ່ຽນເງິນຕາ, ໂຮງຊວດຈຳ ແລະ ຮ້ານຄຳ ໃນໄລຍະຜ່ານມາ ແລະ ສະ ເໜີທິດທາງຄາດໝາຍປັບປຸງໃນຕໍ່ໜ້າ;

(4) ບົດລາຍງານ ສະພາບການແກ້ໄຂການຂາດແຄນ, ບໍລິການນ້ຳມັນ ແລະ ການປັບປຸງໂຄງສ້າງລາຄານ້ຳມັນ ໃນປະຈຸບັນ ແລະ ທິດທາງຄາດໝາຍປັບປຸງໃນຕໍ່ໜ້າ;

(5) ບົດລາຍງານຜົນສຳເລັດ ໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ແລະ ທິດທາງແຜນການ, ມາດຕະການໃນຕໍ່ໜ້າ ພາຍຫຼັງການເປີດປະເທດ ໃນວັນທີ (09 ພິຶດສະພາ 2022) ແລະ ການແກ້ໄຂພະຍາດຕາມລະດູການ (ໄຂ້ຍຸງລາຍ).

ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ຮຽກຮ້ອງບັນດາທ່ານ ສະມາຊິກລັດຖະບານ, ບັນດາທ່ານເຈົ້າແຂວງ ແລະ ເຈົ້າຄອງນະຄອນຫຼວງວຽງຈັນ ຈົ່ງພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄຳເຫັນ ຢ່າງເລິກເຊິ່ງ ດ້ວຍການສະເໜີທັດສະນະ ຢ່າງກົງໄປກົງມາ, ກະທັດຮັດ, ມີຈຸດສຸມ ແລະ ມີທາງອອກທີ່ຈະແຈ້ງ ເພື່ອເຮັດໃຫ້ກອງປະຊຸມຄັ້ງນີ້ ມີປະສິດທິຜົນສູງ ແລະ ບັນລຸຕາມຄາດໝາຍທີ່ໄດ້ກຳນົດໄວ້.

ຂ່າວ;ພາບ: ກົມປະຊາສຳພັນ ສຳນັກງານ ນາຍົກລັດຖະມົນຕີ

ຜູ້ຕາງໜ້າຊາວໜຸ່ມ ຫລາຍກວ່າ 2.000 ຄົນ ຈາກຫລາຍກວ່າ 100 ປະເທດທົ່ວໂລກ ເຂົ້າຮ່ວມເວທີປາໄສເພື່ອການພັດທະນາຊາວໜຸ່ມໂລກທີ່ ສປ ຈີນ ເປັນເຈົ້າພາບ ໂດຍມີພິທີເປີດງານຢ່າງເປັນທາງການ ໃນຕອນບ່າຍວັນທີ 21 ກໍ ລະກົດ 2022 ທີ່ນະຄອນຫລວງປັກກິ່ງ, ທັງຮູບແບບເຊີ່ງໜ້າ ແລະ ຜ່ານລະບົບອອນລາຍ. ພາຍໃຕ້ຫົວຂໍ້: “ ເພື່ອອະ ນາຄົດຮ່ວມກັນ: ການສົ່ງເສີມການພັດທະນາແບບຍືນຍົງກັບຊາວຫນຸ່ມ ແລະ ເພື່ອຊາວໜຸ່ມ “. ສໍາລັບຕາງໜ້າຊາວ ໜຸ່ມລາວເຂົ້າຮ່ວມພິທີໃນຄັ້ງນີ້ແມ່ນ ທ່ານ ມອນໄຊ ລາວມົ່ວຊົ່ງ, ເລຂາຄະນະບໍລິຫານງານສູນກາງຊາວໜຸ່ມ ປະຊາ ຊົນ ປະຕິວັດລາວ.

ຈຸດປະສົງຂອງການຈັດເວທີປາໄສດັ່ງກ່າວ ເພື່ອເປັນເວ ລາສໍາລັບການພົບປະສົນທະນາຂອງບັນດາອົງການຈັດຕັ້ງສາກົນ, ລັດຖະບານ, ອົງການຊາວຫນຸ່ມ, ຜູ້ນໍາໄວຫນຸ່ມ ແລະ ທຸກພາກສ່ວນຂອງສັງຄົມ, ລວມທັງພະຍາຍາມທີ່ຈະສ້າງຄູ່ຮ່ວມມືໃນການພັດທະນາທົ່ວໂລກ ເພື່ອສະຫນັບສະ ຫນູນຄວາມເອົາໃຈໃສ່ ແລະ ໃຫ້ຄວາມສໍາຄັນຕໍ່ການພັດ ທະນາຊາວຫນຸ່ມ, ລວມເຖີງການສົ່ງເສີມການຈັດຕັ້ງປະຕິ ບັດແນວຄິດລິເລີ່ມວາລະປີ 2030 ເພື່ອການພັດທະນາແບບຍືນຍົງ ແລະໂຄງການລິເລີ່ມການພັດທະນາທົ່ວ ໂລກ.

ໃນພິທີເປີດເວທີປາໄສເພື່ອການພັດທະນາຊາວໜຸ່ມໂລກຢ່າງເປັນທາງການໃນຄັ້ງນີ້ ຕາງໜ້າຊາວໜຸ່ມຈາກ 100 ປະເທດທົ່ວໂລກ ໄດ້ຮັບຟັງການສະເໜີກ່ຽວກັບວຽກ ງານການພັດທະນາຊາວໜຸ່ມຈາກຫລາຍປະເທດ ແລະ ບາງອົງການທີ່ກ່ຽວຂ້ອງກັບການພັດທະນາຊາວໜຸ່ມ ເພື່ອແລກ ປ່ຽນບົດຮຽນຮ່ວມກັນ. ນອກຈາກນີ້ ຍັງໄດ້ຮັບຟັງສານຂອງທ່ານ ສີ ຈິ້ນຜິງ, ປະທານປະເທດຈີນ ແລະ ສານຂອງ ທ່ານ ອັນໂຕນິໂອ ກູເຕີເຣັສ, ເລຂາທິການໃຫຍ່ອົງ ການສະຫະປະຊາຊາດ ທີ່ສົ່ງເຖີງເວທີປຶກສາຫາລືກ່ຽວກັບການພັດທະນາຊາວໜຸ່ມໂລກໃນຄັ້ງນີ້ ເຊີ່ງທັງສອງທ່ານຕ່າງໄດ້ເນັ້ນຢໍ້າເຖີງຄວາມສໍາຄັນຂອງການພັດທະນາຊາວ ໜຸ່ມ ເຊີ່ງຈະກາຍເປັນກໍາລັງສໍາຄັນໃນການພັດທະນາເສດ ຖະກິດ- ສັງຄົມຂອງແຕ່ລະປະເທດ.

ສໍາລັບ ທ່ານ ມອນໄຊ ລາວມົ່ວຊົ່ງ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ທີ່ເຂົ້າຮ່ວມເວທີປາໄສໃນຄັ້ງນີ້ ໄດ້ມີຄໍາເຫັນຜ່ານຄລິປວິດີໂອສັ້ນທີ່ຍົກໃຫ້ເຫັນຄວາມເອົາໃຈໃສ່ຂອງລັດຖະບານລາວຕໍ່ການພັດ ທະນາຊາວໜຸ່ມເຊີ່ງເປັນຜູ້ສືບທອດພາລະກິດທີ່ສໍາຄັນຂອງປະເທດຊາດ, ພ້ອມນີ້ ທ່ານຍັງໄດ້ສະແດງຄວາມຂອບ ໃຈມາຍັງບັນດາອົງການຈັດຕັ້ງສາກົນ ກໍຄື ບັນດາປະເທດທີ່ໃຫ້ການຊ່ວຍເຫລືອລາວໃນການພັດທະນາຊາວໜຸ່ມ ເຊີ່ງເປັນການປະກອບສ່ວນສໍາຄັນເຮັດໃຫ້ຊາວໜຸ່ມລາວໄດ້ຮັບການພັດທະນາຢ່າງຕໍ່ເນື່ອງ.

ເວທີປາໄສເພື່ອການພັດທະນາຊາວໜຸ່ມໂລກທີ່ ສປ ຈີນ ເປັນເຈົ້າພາບໃນຄັ້ງນີ້ ຈະດໍາເນີນໄປເປັນເວລາ 3 ຄື: ແຕ່ວັນທີ 21-23 ກໍລະກົດ 2022. ຕະຫລອດໄລຍະເວລາ 3 ວັນ ຕາງໜ້າຊາວໜຸ່ມຈາກຫລາຍກວ່າ 100 ປະເທດທົ່ວ ໂລກຈະໄດ້ປຶກສາຫາລື ແລະ ແລກປ່ຽນບົດຮຽນຮ່ວມກັນ 4 ຫົວຂໍ້ສໍາຄັນ ຄື: ການປຶກສາຫາລືກ່ຽວກັບການຈ້າງງານ ແລະ ການເປັນຜູ້ປະກອບການ, ການປະຕິບັດງານກ່ຽວ ກັບສະພາບດິນຟ້າອາກາດ ແລະ ການພັດທະນາສີຂຽນ, ເສດຖະກິດດິຈິຕອລ ແລະ ການປຶກສາຫາລືກ່ຽວກັບການສຶກສາທີ່ມີຄຸນນະພາບລວມ ແລະ ສະເໝີພາບ.

Cr: ບຸນຕຽງ ຈັນທະວົງ

ອາການພະຍາດໄຂ້ຍຸງລາຍ ບໍ່ມີອາການເຕືອນ ຄົນເຈັບມີໄຂ້ສູງ ບວກກັບ ຢ່າງໜອຍ 2 ອາການ ມີດັ່ງນີ້: ເຈັບຫົວ, ປວດເບົ້າຕາ, ປວດຕົນໂຕ, ບໍ່ຢາກ ອາຫານ, ປວດຮາກ ຫລື ຮາກ ແລະ ມີຜື່ນຕາມຕົນໂຕ.

ສໍາລັບຄົນເຈັບ ມີໜຶ່ງ ຫລື ຫລາຍອາການເຕືອນ ມີອາການດັ່ງນີ້: ເຈັບທ້ອງແຮງ ຫລື ທ້ອງເບັງ. ຮາກຕະຫລອດ. ເລືອດອອກຕາມດັງ, ເຟນແຂ້ວ ຫລື ເຍື້ອເມືອກຕາ. ອິດເມື່ອຍແຮງ ແລະ ກະວົນກະວາຍ.

ສໍາລັບຄົນເຈັບທີ່ມີຄວາມສ່ຽງ ມີ ແມ່ຍິງຖືພາ. ເດັກອາຍຸຕໍ່າກວ່າ 1 ປີ. ຜູ້ເຖົ້າ. ຜູ້ມີພະຍາດປະຈໍາຕົວ ເຊັ່ນ: ເບົາຫວານ, ພະຍາດຫົວໃຈ, ໄຂ່ຫລັງຊຸດໂຊມ ແລະ ພະຍາດເລືອດ Thalassemia…ແລະ ຄົນຕຸ້ຍ.

ຂໍ້ມູນ: ສູນຂ່າວສານການແພດສຸຂະສຶກສາ

ຕາມ​ຂ່າວ​ຈາກ VOVWORLD, ຫວຽດນາມ ​ແລະ ອິນ​ໂດ​ເນ​ເຊຍ ສູ້​ຊົນ ​ວົງ​ເງິນ​ ການ​ຄ້າ​ ຮ່ວມ​ກັນ ​ໃຫ້​ບັນລຸ 15ຕື້​ໂດ​ລາ ​ສະຫະລັດ ພາຍ​ໃນ​ປີ2028, ສືບ​ຕໍ່ ຍູ້ແຮງ ການຮ່ວມມື ດ້ານເສດຖະກິດ, ການຄ້າ, ການລົງທຶນ, ການ ເຊື່ອມຕໍ່ ແລະ ພົວພັນ ແລກປ່ຽນ ປະຊາຊົນ ທັງ​ສອງ​ປະ​ເທດ ພາຍຫລັງ ທ່ານ ບຸຍແທັງເຊີນ, ລັດຖະມົນຕີ ກະຊວງ ການຕ່າງ ປະເທດ ຫວຽດນາມ ​ໄດ້ພົບປະກັບ ທ່ານ ​ໂຈ​ໂກ ວີ​ໂດ​ໂດ(Joko Widodo),ປະທານາ ທິບໍດີ ອິນ​ໂດ​ເນ​ເຊຍ ​ໃນວັນ​ທີ20​ ກໍລະກົດ​ນີ້ ຢູ່​ນະຄອນຫລວງ​ ຈາ​ກາ​ຕາ ​ໂດຍ​ທັງ​ສອງ​ຝ່າຍ ​ໄດ້​ລົງ​ນາມ​ ບົດ​ບັນທຶກ​ ຊ່ວຍ​ຈຳ ກ່ຽວ​ກັບ ການ​ຮ່ວມ​ມື ​ການ​ຄ້າ ​ໃນ​ຂົງ​ເຂດ​ ເຂົ້າສານ ​ໃນ​ໄລຍະ 4ປີ​ຕໍ່ໜ້າ ​ແລະ ສືບ​ຕໍ່ ​ເພີ່ມ​ການ​ຮ່ວມ​ມື ​ໃນ​ຫລາຍ​ຂົງເຂດ​ຕະຫລອດ ​ໄລຍະ​ ທີ່​ຜ່ານ​ມາ ​ໃຫ້​ປະສົບ ​ຜົນສຳ​ເລັດ​ ຫລາຍ​ຂຶ້ນ​ ກວ່າ​ເກົ່າ./. (ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ໃນພິທີ ຕ້ອນຮັບຄະນະນໍາ, ຄູຝຶກ ແລະ ນັກກິລາບານເຕະທີມຊາດລາວຮຸ່ນອາຍຸບໍ່ເກີນ 19 ປີ ທີ່ເດີນທາງກັບມາ ຈາກການແຂ່ງຂັນບານເຕະຊາຍ ຮຸ່ນອາຍຸບໍ່ເກີນ 19 ປີ ຫລື AFF U19 Championship 2022 ທີ່ປະເທດອິນໂດເນເຊຍ ໃນຕອນຄໍ່າວັນທີ 19 ກໍລະກົດ ຜ່ານມາ ມີຫລາຍພາກສ່ວນ ໄດ້ປະກອບສ່ວນມອບເງິນສະໜັບສະໜູນນັກກິລາ U19 ແລະ ໜຶ່ງໃນນັ້ນ, ທ້າວ ຮຸ່ງເຮືອງ ກອນສິນ ອາຍຸ 13 ປີ ເປັນັກຮຽນຢູ່ ໂຮງຮຽນນານາຊາດ ປັນຍາທິບ (PIS) ກໍໄດ້ເຫັນຄວາມສຳຄັນການພັດທະນາບານເຕະລາວ ແລະ ນຳເອົາເງິນເກັບທີ່ສະສົມສ່ວນຕົວມອບ ໃຫ້ທີມນັກກິລາບານເຕະທີມຊາດລາວ U19 ຈໍານວນ 300 ລ້ານກີບ ເພື່ອເປັນຂວັນກໍາລັງໃຈ ທີ່ສາມາດຍາດໄດ້ຫລຽນເງິນ ໃນການແຂ່ງຂັນບານເຕະ ທີ່ປະເທດອິນໂດເນເຊຍ.

ທ້າວ ຮຸ່ງເຮືອງ ກອນສິນ ໄດ້ກ່າວວ່າ: ການມອບເງິນຈຳນວນດັ່ງກ່າວ ເປັນການປະກອບສ່ວນສະໜັບສະໜູນໃຫ້ນັກກິລາ ນຳໄປໃຊ້ການຝຶກຊ້ອມ ແລະ ພັດທະນາທີມໃນອະນາຄົດ, ເຊິ່ງເງິນສ່ວນນີ້ເປັນເງິນທີ່ເກັບທ້ອນມາເປັນເວລາຫລາຍປີ ອີກຢ່າງຕົນເອງກໍເປັນຜູ້ໜຶ່ງທີ່ມັກຮັກໃນກິລາ ຈຶ່ງຕັດສິນໃຈມອບເງິນສະໜັບສະໜູນໃນຄັ້ງນີ້ ແລະ ພ້ອມທີ່ຈະເປັນສ່ວນໜຶ່ງ ໃນການຊຸກຍູ້ ສົ່ງເສີມກິລາບານເຕະ ແລະ ນັກກິລາ ທີມຊາດລາວ ເພື່ອເປັນຕົວແທນຂອງ ສປປ ລາວ ໃນການສ້າງຊື່ສຽງອັນດີ ຢູ່ໃນເວທີສາກົນ, ເປັນນັກກິລາຮຸ່ນສືບທອດຂອງປະເທດຊາດໃນຕໍ່ໜ້າ ແລະ ເປັນແບບຢ່າງ ໃນການສ້າງແຮງບັນດານໃຈ ໃຫ້ແກ່ນັກກິລາຮຸ່ນໃໝ່ ໃຫ້ມີຄວາມມຸ່ງໝັ້ນ ພັດທະນາຕົນເອງ ເພື່ອໃຫ້ໄດ້ເປັນຕົວແທນ ຂອງກິລາບານເຕະ ທີມຊາດລາວ ໃນລຮຸ່ນຕໍ່ໆໄປ.

ຂ່າວ: ສຸພາສະຫວັນ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົສຕຣາລີໄດ້ເປີດເຜີຍບົດລາຍງານກ່ຽວກັບສິ່ງແວດລ້ອມສະບັບຫຼ້າສຸດໂດຍລະບຸວ່າ ພາຍໃນປະເທດກຳລັງພົບກັບບັນຫາດ້ານສິ່ງແວດລ້ອມໃນຮອບດ້ານ ທັງການສູນເສຍສາຍພັນ ສັດລ້ຽງລູກດ້ວຍນ້ຳນົມ ຫຼາຍກວ່າທະວີບອື່ນໆ ອັດຕາການຫຼຸດລົງຂອງສາຍພັນທີ່ຮ້າຍແຮງທີ່ສຸດໃນກຸ່ມປະເທດທີ່ອຸດົມສົມບູນຫຼາຍທີ່ສຸດໃນໂລກລວມເຖິງໄພທຳມະຊາດຮຸນແຮງທີ່ສ້າງຄວາມເສຍຫາຍມະຫາສານຕໍ່ປະເທດ.

ບົດລາຍງານດັ່ງກ່າວ ຊຶ່ງເຮັດຂຶ້ນທຸກ 5 ປີ ໂດຍກະຊວງສິ່ງແວດລ້ອມຂອງອົສຕຣາລີລະບຸວ່າ: ອຸນຫະພູມທີ່ເພີ່ມຂຶ້ນທັງນອກ ແລະ ໃນທະເລ, ຮູບແບບໄຟປ່າ ແລະ ຝົນຕົກທີ່ປ່ຽນແປງ, ລະດັບນ້ຳທະເລທີ່ສູງຂຶ້ນ ແລະ ປາກົດການມະຫາສະໝຸດເປັນກົດ ຕ່າງກໍມີຜົນກະທົບສຳຄັນທີ່ເຮັດໃຫ້ເກີດບັນຫາດ້ານສິ່ງແວດລ້ອມ. ໂດຍໂຕເລກຂອງສາຍພັນສັດທີ່ຢູ່ໃນກຸ່ມສັດໃກ້ສູນພັນ ຫຼື ໃນໝວດໝູ່ທີ່ຮ້າຍແຮງກວ່ານັ້ນເພີ່ມຂຶ້ນ 8% ຈາກບົດລາຍງານໃນປີ 2016 ແລະ ມີທ່າອ່ຽງຈະເພີ່ມຂຶ້ນຢ່າງຮຸນແຮງ ເນື່ອງຈາກບັນຫາໄຟປ່າໃນລະດູຮ້ອນສີດຳ ສົ່ງຜົນກະທົບຕໍ່ສັດໃນປະເທດປະມານ 1.000-3.000 ລ້ານໂຕ ອີກທັງຍັງທຳລາຍທີ່ຢູ່ອາໄສຂອງ ໝີໂຄອາລາ ໄປປະມານ 9%.

ນອກຈາກນີ້, ອຸນຫະພູມພື້ນຜິວດິນສະເລ່ຍຂອງອົສຕຣາລີສູງຂຶ້ນ 1,4 ອົງສາ ນັບຕັ້ງແຕ່ໄລຍະຕົ້ນສະຕະວັດທີ 20 ສ່ວນລະດັບນ້ຳທະເລຍັງຄົງເພີ່ມຂຶ້ນຢ່າງຕໍ່ເນື່ອງ ແລະ ວ່ອງໄວກວ່າລະດັບສະເລ່ຍຂອງໂລກ ອີກທັງຍັງເປັນການຂົ່ມຂູ່ຊຸມຊົນແຄມຝັ່ງອີກດ້ວຍ. ຍິ່ງໄປກວ່ານັ້ນລະບົບນິເວດອັນລ້ຳຄ່າຫຼາຍແຫ່ງຂອງອົສຕຣາລີຖືກຂົ່ມຂູ່ໂດຍການປ່ຽນແປງຂອງສະພາບອາກາດ ແລະ ຄວາມຮຸນແຮງດ້ານສິ່ງແວດລ້ອມເຊັ່ນ: ແນວປະກາລັງເກດ ແບຣິເອີ ຣີບ (Great Barrier Reef) ໄດ້ຮັບຜົນກະທົບຈາກປາກົດການປະກາລັງຟອກຂາວໃນວົງກວ້າງ, ຄື່ນຄວາມຮ້ອນທາງທະເລ ແລະ ປາກົດການມະຫາສະໝຸດເປັນກົດ.

ຂ່າວຕ່າງປະເທດລາຍງານ ເມື່ອວັນທີ 20 ກໍລະກົດທີ່ຜ່ານມານີ້, ສະກຸນເງິນໂດລາອ່ອນຄ່າລົງເປັນວັນທີ 3 ຕິດຕໍ່ກັນ ຂະນະທີ່ນັກລົງທຶນໄດ້ປັບຫຼຸດການຄາດຄະເນທີ່ວ່າ ທະນາຄານກາງອາເມຣິກາ (ເຟດ) ຈະປັບຂຶ້ນອັດຕາດອກເບ້ຍ 1% ໃນກອງປະຊຸມກຳນົດນະໂຍບາຍການເງິນໃນເດືອນນີ້.

ທາງດ້ານສະກຸນເງິນຢູໂຣແຂງຄ່າຂຶ້ນໃນວັນດຽວກັນ ໂດຍໄດ້ແຮງໜູນມາຈາກການຄາດຄະເນທີ່ວ່າ ທະນາຄານກາງເອີຣົບ (ECB) ຈະປັບຂຶ້ນອັດຕາດອກເບ້ຍ 0,5% ໃນກອງປະຊຸມອາທິດນີ້. ໂດຍສະກຸນເງິນໂດລາອ່ອນຄ່າ 0,12% ສູ່ລະດັບ 137,95 ເຢນຂະນະທີ່ສະກຸນເງິນຢູໂຣປັບຕົວເພີ່ມຂຶ້ນ 0,76% ສູ່ລະດັບ 141,16 ເຢນ ແລະ ປັບຕົວເພີ່ມຂຶ້ນ 0,88% ສູ່ລະດັບ 1,023 ໂດລາ ສ່ວນດັດຊະນີໂດລາ ຊຶ່ງເປັນດັດຊະນີວັດແທກການເຄື່ອນໄຫວຂອງໂດລາເມື່ອທຽບກັບສະກຸນເງິນຫຼັກ 6 ສະກຸນໃນກະຕ່າເງິນ -0,67% ສູ່ລະດັບ 106,65 ເຢນ. ຂ່າວແຈ້ງວ່າ ເຈົ້າໜ້າທີ່ ECB ກໍາລັງພິຈາລະນາປັບຂຶ້ນອັດຕາດອກເບ້ຍ 0,5% ໃນກອງປະຊຸມນະໂຍບາຍການເງິນໃນວັນນີ້ (21 ກໍລະກົດ) ຊຶ່ງຈະເປັນການປັບຂຶ້ນອັດຕາດອກເບ້ຍຫຼາຍກວ່າ 0.25% ທີ່ມີການຄາດຄະເນໄວ້ກ່ອນໜ້ານີ້. ທັງນີ້, ECB ໄດ້ມີມະຕິເຫັນດີຮັກສາອັດຕາດອກເບ້ຍນະໂຍບາຍໄວ້ຄືເກົ່າໃນກອງປະຊຸມເມື່ອເດືອນທີ່ຜ່ານມາ ແຕ່ໄດ້ສົ່ງສັນຍານປັບຂຶ້ນອັດຕາດອກເບ້ຍໃນເດືອນກໍລະກົດນີ້ ຊຶ່ງຈະເປັນການປັບຂຶ້ນອັດຕາດອກເບ້ຍເປັນຄັ້ງທຳອິດໃນຮອບ 11 ປີ ເພື່ອສະກັດກັ້ນການເພີ່ມຂຶ້ນຂອງອັດຕາເງິນເຟີ້.

ທາງດ້ານນັກລົງທຶນໄດ້ປັບຫຼຸດການຄາດຄະເນກ່ຽວກັບການທີ່ເຟດຈະປັບຂຶ້ນອັດຕາດອກເບ້ຍ 1% ໃນກອງປະຊຸມເດືອນນີ້ ຫຼັງຈາກມີການເປີດເຜີຍຂໍ້ມູນທີ່ລະບຸວ່າ ຜູ້ບໍລິໂພກໄດ້ຫຼຸດການຄາດຄະເນເງິນເຟີ້ ຂະນະທີ່ເຈົ້າໜ້າທີ່ເຟດບາງທ່ານສະແດງຄວາມຄິດເຫັນສະໜັບສະໜູນການປັບຂຶ້ນອັດຕາດອກເບ້ຍພຽງ 0,75% ໃນເດືອນນີ້ແທນທີ່ຈະປັບຂຶ້ນຢ່າງຮຸນແຮງເຖິງ 1%. ນັກວິເຄາະໄດ້ຄາດຄະເນວ່າ ດັດຊະນີລາຄາຜູ້ບໍລິໂພກ (CPI) ປະຈຳເດືອນກໍລະກົດທີ່ຈະມີການເປີດເຜີຍໃນເດືອນສິງຫາ ໂດຍຈະຊີ້ໃຫ້ເຫັນວ່າ ອັດຕາເງິນເຟີ້ຍັງຄົງທີ່ ເນື່ອງຈາກລາຄານ້ຳມັນຫົດຕົວລົງຢ່າງໜັກໃນເດືອນກໍລະກົດທ່າມກາງຄວາມກັງວົນກ່ຽວກັບການເກີດພາວະເສດຖະກິດຖົດຖອຍ.

ນັກລົງທຶນສ່ວນຫຼາຍໃຫ້ນ້ຳໜັກພຽງ 33,2% ທີ່ເຟດຈະປັບຂຶ້ນອັດຕາດອກເບ້ຍ 1% ໃນກອງປະຊຸມໃນທ້າຍເດືອນນີ້ ແລະ ໃຫ້ນ້ຳໜັກພຽງ 66,8% ທີ່ເຟດຈະປັບຂຶ້ນອັດຕາດອກເບ້ຍ 0,75% ໂດຍກ່ອນໜ້ານີ້, ນັກລົງທຶນໃຫ້ນ້ຳໜັກສູງເຖິງ 80% ທີ່ວ່າ ເຟດຈະປະກາດປັບຂຶ້ນອັດຕາດອກເບ້ຍ 1% ໃນກອງປະຊຸມ ແລະ ໃຫ້ນ້ຳໜັກພຽງ 20% ທີ່ເຟດຈະປັບຂຶ້ນອັດຕາດອກເບ້ຍ 0,75%.

ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບທ່ານ ນາງ ຊາລາເທເລີ ເອກອັກຄະລັດຖະທູດວິສາມັນຜູ້ມີອຳນາດເຕັມປະເທດການາດາ ປະຈຳ ສປປ ລາວ ເຂົ້າຢ້ຽມພົບປະເມື່ອວັນທີ 20 ກໍລະກົດ ທີ່ກະຊວງ ອຄ, ເນື່ອງໃນໂອກາດທີ່ທ່ານທູດມາດຳລົງຕຳແໜ່ງເປັນເອກອັກຄະລັດຖະທູດປະຈຳລາວຄົນໃໝ່.

ໃນໂອກາດດັ່ງກ່າວ ທ່ານລັດຖະມົນຕີ ແລະ ທ່ານທູດໄດ້ປຶກສາຫາລືດ້ານວຽກງານການຄ້າ, ການຊ່ວຍເຫຼືອ ແລະ ການຮ່ວມມືສອງຝ່າຍ.

ສຳລັບມູນຄ່າການຄ້າສອງຝ່າຍ ລະຫວ່າງ ສປປ ລາວ ແລະ ການາດາ ໃນ 5 ເດືອນຕົ້ນປີ 2022 ສາມາດປະຕິບັດໄດ້ 15,5 ລ້ານໂດລາ, ໃນນັ້ນ, ມູນຄ່າການນໍາເຂົ້າປະຕິບັດໄດ້ 10,9 ລ້ານໂດລາ ແລະ ມູນຄ່າການສົ່ງອອກປະຕິບັດໄດ້ 4,6 ລ້ານໂດລາ.

ສິນຄ້າຫຼັກທີ່ ສປປ ລາວ ນໍາເຂົ້າຈາກການາດາ ໃນ 5 ເດືອນ ຕົ້ນປີ 2022 ປະກອບມີ: ເຍື້ອໄມ້ ແລະ ເສດເຈ້ຍ; ອຸປະກອນກົນຈັກ (ນອກຈາກເຄື່ອງກົນຈັກພາຫະນະ); ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…); ເຫຼັກເສັ້ນ ແລະ ເຫຼັກຮູບປະພັນຕ່າງໆ; ເຄື່ອງໃຊ້ທີ່ເຮັດດ້ວຍພລາຊະຕິກ ແລະ ສິນຄ້າອື່ນໆ; ສິນຄ້າຫຼັກທີ່ ສປປ ລາວ ສົ່ງອອກໄປການາດາໃນ 5 ເດືອນຕົ້ນປີ 2022 ປະກອບມີ: ເຄື່ອງນຸ່ງຫົ່ມ; ເຄມີ (ສານປະກອບອະນິນຊີ); ເກີບ; ເຄື່ອງຊຸບຫົວ (ໝວກ, ຜ້າຄຸມຫົວ); ໄຂ່ມຸກ, ແກ້ວປະເສີດ; ແຮ່ຄໍາເຂັ້ມຂຸ້ນ ແລະ ສິນຄ້າອື່ນໆ.

ດ້ານການລົງທຶນນັບແຕ່ປີ 2008 ຮອດປັດຈຸບັນ ການລົງທຶນຂອງ ການາດາ ໃນ ສປປ ລາວ (ສະເພາະໃນຂະແໜງກິດຈະການທົ່ວໄປ ບໍ່ກວມເອົາຂົງເຂດເສດຖະກິດພິເສດ ແລະ ເຂດສໍາປະທານ) ມີຈໍານວນວິສາຫະກິດທັງໝົດ 62 ຫົວໜ່ວຍ ແລະ ມີມູນຄ່າການລົງທຶນທັງໝົດ 484,2 ຕື້ກີບ ຫຼື ປະມານ 60,5 ລ້ານໂດ, ຈັດເປັນອັນດັບທີ 15 ຂອງການລົງທຶນຕ່າງປະເທດຢູ່ ສປປ ລາວ. ຂະແໜງການທີ່ມີມູນຄ່າການລົງທຶນຫຼາຍສຸດປະກອບມີ ການເຄື່ອນໄຫວດ້ານສາຍວິຊາຊີບ, ວິທະຍາສາດ ແລະ ເຕັກນິກ, ກະສິກຳ, ປ່າໄມ້ ແລະ ການປະມົງ, ຂໍ້ມູນຂ່າວສານ ແລະ ການຕິດຕໍ່ສື່ສານ ແລະ ຂະແໜງອຸດສາຫະກຳປຸງແຕ່ງ.

(ຂ່າວ-ພາບ: ສຳນານ)

ກອງປະຊຸມຄະນະຮັບຜິດຊອບລະດັບຊາດ ຄັ້ງທີ V ຈັດງານມະຫະກຳກິລາແຫ່ງຊາດ ຄັ້ງທີ XI ຊຽງຂວາງເກມ ໄດ້ຈັດຂຶ້ນເມື່ອບໍ່ດົນມານີ້ ທີ່ແຂວງຊຽງຂວາງ, ໂດຍພາຍໃຕ້ການເປັນປະທານຂອງ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ທັງເປັນປະທານຈັດງານມະຫະກໍາກິລາແຫ່ງຊາດ ຄັ້ງທີ XI ແລະ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານຮ່ວມຈັດງານມະຫະກຳກິລາແຫ່ງຊາດ ຄັ້ງທີ XI, ມີຄະນະຮັບຜິດຊອບລະດັບຊາດຂັ້ນສູນກາງ ແລະ ທ້ອງຖິ່ນ, ຄະນະຮັບຜິດຊອບລະດັບຊາດ ຊຸດເກົ່າ, ຫົວໜ້າຫ້ອງວ່າການປົກຄອງແຂວງ, ຫົວໜ້າກໍາມະການ, ວິຊາການແຕ່ລະພາກສ່ວນ ເຂົ້າຮ່ວມ.

ໃນພິທີ, ບັນດາຜູ້ແທນທີ່ເຂົ້າຮ່ວມກອງປະຊຸມແມ່ນໄດ້ຮັບຟັງການລາຍງານຂອງບັນດາກໍາມະການຝ່າຍຕ່າງໆ ເຊັ່ນ: ວຽກງານກອງເລຂາ, ກໍາມະການຝ່າຍເຕັກນິກ-ຈັດການແຂ່ງຂັນ, ກໍາມະການເປີດ- ປິດ, ກໍາມະການເສດຖະກິິດ-ລະດົມທຶນ, ກໍາມະການສະຖານທີ່ພັກ-ອາຫານ, ກໍາມະການ ການແພດ-ສຸຂະພາບ ແລະ ລາຍງານການກະກຽມການຈັດງານແຂ່ງຂັນກິລາຄົນພິການທົ່ວປະເທດ ຄັ້ງທີ III ທີ່ແຂວງຊຽງຂວາງ ເປັນເຈົ້າພາບ, ລາຍງານການຈັດຕັ້ງປະຕິບັດການກະກຽມຄວາມພ້ອມໃນການຈັດງານມະຫະກໍາກິລາແຫ່ງຊາດ ຄັ້ງທີ XI.

ກອງປະຊຸມມີຄວາມເປັນເອກະພາບມີມະຕິ ດັ່ງນີ້: ເຫັນດີເປັນເອກະພາບ ປັບປຸງກໍານົດງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ມື້ເປີດແມ່ນເຫັນດີ ວັນທີ 13 ທັນວາ 2022 ແລະ ມື້ປິດແມ່ນວັນທີ 22 ທັນວາ 2022; ເຫັນດີຮ່າງໜັງສືສະເໜີຈາກແຂວງເຈົ້າພາບຊຽງຂວາງ ແລະ ກະຊວງສຶກສາທິການ ແລະ ກິລາ ເພື່ອລາຍງານຂໍອະນຸມັດ ນໍາຫ້ອງວ່າການສໍານັກງານນາຍົກລັດ

ຖະມົນຕີ ໃຫ້ສໍາເລັດພາຍໃນທ້າຍເດືອນກໍລະກົດ 2022; ກໍານົດລະບອບແບບແຜນວິທີເຮັດວຽກ, ກົນໄກການປະສານງານ ໂດຍສົມທົບກັບກຳມະການຝ່າຍຕ່າງໆ ກໍານົດແຜນການ, ກໍານົດໜ້າວຽກໃຫ້ລະອຽດຈະແຈ້ງ, ກໍານົດຜູ້ປະຈໍາການກອງເລຂາ ເພື່ອສາມາດປະສານງານໃຫ້ມີຄວາມວ່ອງໄວທັນການ; ໃຫ້ແຂວງເຈົ້າພາບຮີບຮ້ອນປັບປຸງຂໍ້ຕົກລົງແຕ່ງຕັ້ງບັນດາກໍາມະການ ແລະ ອະນຸກໍາມະການຝ່າຍຕ່າງໆ ໃຫ້ສອດຄ່ອງກັບໜ້າວຽກຕົວຈິງ, ຕາມງົບປະມານຕົວຈິງ ແລະ ຕາມທິດປະຢັດຂອງລັດຖະບານ; ເຫັນດີຕາມການລາຍງານຂອງຫົວໜ້າກໍາມະການເຕັກນິກ-ຈັດການແຂ່ງຂັນ ຮູບແບບການຈັດການແຂ່ງຂັນກິລາ ກໍານົດເປັນ 5 ໝວດປະເພດກິລາ, ແບ່ງການແຂ່ງຂັນເປັນແຕ່ລະໄລຍະ ເລີ່ມແຕ່ວັນທີ 8-15 ພະຈິກ 2022, ວັນທີ 17-21 ພະຈິກ 2022, ວັນທີ 23–28 ພະຈິກ 2022, ວັນທີ 30 ພະຈິກ ຫາ 10 ທັນວາ 2022 ແລະ ວັນທີ 9-22 ທັນວາ 2022; ງານມະຫະກໍາກິລາແຫ່ງຊາດ ຄັ້ງທີ XI ໃນເມື່ອກ່ອນ ໄດ້ກໍານົດການຈັດການແຂ່ງຂັນກິລາ ຈໍານວນ 28 ປະເພດ ແລະ ໄດ້ຕັດອອກ 3 ປະເພດ ຄື: ກິລາເຮືອຊ່ວງ, ກິລາບີລຽດ-ສະນຸກເກີ, ກິລາໂບລິ້ງ ແລະ ໄດ້ກໍານົດການແຂ່ງຂັນ 25 ປະເພດກິລາ ໃນງານມະຫະກໍາກິລາແຫ່ງຊາດ ຄັ້ງທີ XI.

ສ່ວນລາຍການສະແດງພິທີເປີດ ແລະ ພິທີປິດ ແມ່ນໃຫ້ປັບປຸງຕາມທິດກະທັດຮັດ ເໝາະສົມກັບສະພາບຄວາມເປັນຈິງ ໂດຍມີການຕັດຮອນບາງລາຍການສະແດງ ແລະ ຈໍານວນພົນໃຫ້ໜ້ອຍລົງ ໂດຍນໍາໃຊ້ສິລະປະພື້ນເມືອງ ທີ່ມີທ່າແຮງໃນທ້ອງຖິ່ນ ພາຍໃນແຂວງ ແລະ ການສະແດງມືອາຊີບ ແຕ່ໃຫ້ຮັກສາໄດ້ຈິດໃຈເນື້ອໃນຂອງ ຊຽງຂວາງເກມ, ອະນຸກໍາມະການສວນສະໜາມ ໃຫ້ຄົ້ນຄວ້າປັບປຸງຮູບແບບ ພິທີຂໍໄຟສັກສິດ ແລະ ຮູບແບບພິທີຈຸດທວນໄຟໃນພິທີເປີດງານຄືນໃໝ່; ຄະນະຮັບຜິດຊອບຕິດຕາມການກໍ່ສ້າງ ແລະ ສ້ອມແປງ, ຮີບຮ້ອນສົມທົບກັບກໍາມະການເຕັກນິກ-ຈັດການແຂ່ງຂັນ ຮີບຮ້ອນລົງກວດກາສະໜາມແຂ່ງຂັນ, ສະໜາມຝຶກຊ້ອມ, ສະຖານທີ່ພັກຂອງຄູຝຶກ, ນັກກິລາຂອງບັນດາແຂວງ, ນະຄອນຫຼວງ, ກະຊວງຕ່າງໆ ທີ່ຈະມາເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ XI ໃຫ້ສໍາເລັດພາຍໃນເດືອນສິງຫາ 2022; ມອບໃຫ້ກໍາມະການປ້ອງກັນຊາດ, ປ້ອງກັນຄວາມສະຫງົບ ປັບປຸງແຜນຕາມສະພາບການຕົວຈິງ ເພື່ອຮັບປະກັນຄວາມສະຫງົບປອດໄພ ໃຫ້ໄດ້ 100%; ກໍາມະການການແພດ ແລະ ສຸຂະພາບ ຕ້ອງວາງແຜນດ້ານອຸປະກອນການແພດ, ຢາ, ພາຫະນະຮັບໃຊ້ຄົນເຈັບໃຫ້ພຽງພໍ ແລະ ທັນການ ພ້ອມທັງວາງມາດຕະການຕອບໂຕ້ພະຍາດ ໂຄວິດ-19 ຢ່າງເຂັ້ມງວດ.

ການຈັດງານແຂ່ງຂັນກິລາຄົນພິການທົ່ວປະເທດ ຄັ້ງທີ III ທີ່ແຂວງຊຽງຂວາງ ເປັນເຈົ້າພາບແມ່ນເຫັນດີຕາມການສະເໜີຂອງກົມກິລາມວນຊົນ, ພະລະ ແລະ ສິລະປະສຶກສາ ຊຶ່ງຈະໄດ້ຈັດການແຂ່ງຂັນກິລາ 7 ປະເພດ, ໄລຍະການແຂ່ງຂັນ ແລະ ມື້ເປີດ-ປິດ ລະຫວ່າງວັນທີ 14-18 ມີນາ 2023, ສໍາລັບພິທີເປີດ-ປິດ ແມ່ນກໍານົດວັນເວລາດຽວກັນ.

(ຂ່າວ: ລູກນໍ້າເຊ ອິນທະດາລິນ)

ພິທີຖະແຫຼງຂ່າວ ກະກຽມຈັດການແຂ່ງຂັນດອກປີກໄກ່ທົ່ວປະເທດ ຊີງຂັນທ່ານເຈົ້າແຂວງຫຼວງພະບາງ ຄັ້ງທີ 1 ໄດ້ຈັດຂຶ້ນໃນທ້າຍອາທິດຜ່ານມານີ້ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ມີ ທ່ານ ວັນທອງ ແພງສະຫວັດ ຮອງຫົວໜ້າພະແນກສຶກສາທິການ ແລະ ກິລາແຂວງ ປະທານສະຫະພັນກິລາດອກປີກໄກ່ແຂວງ, ທ່ານ ວຽງສະຫວັນ ແສງຈັນ ຮອງປະທານສະຫະພັນກິລາດອກປີກໄກ່ແຫ່ງຊາດລາວ ພ້ອມດ້ວຍຜູ້ໃຫ້ການອຸປະຖຳຫຼັກ, ນັກກິລາ ແລະ ສື່ມວນຊົນ ເຂົ້າຮ່ວມ.

ທ່ານ ວັນທອງ ແພງສະຫວັດ ກ່າວວ່າ: ການຈັດການແຂ່ງຂັນດອກປີກໄກ່ທົ່ວປະເທດ ຊີງຂັນທ່ານເຈົ້າແຂວງຫຼວງພະບາງຄັ້ງນີ້ ເປັນການຍົກລະດັບ ແລະ ພັດທະນານັກກິລາຂອງແຂວງ ໃຫ້ມີຄວາມຮູ້ ຄວາມສາມາດຂຶ້ນອີກບາດກ້າວໜຶ່ງ, ທັງເປັນການສ້າງຂະບວນການສະເຫຼີມສະຫຼອງປີສາມັກຄີລາວ-ຫວຽດນາມ 2022 ແລະ ເປັນການຊຸກຍູ້ການທ່ອງທ່ຽວຂອງແຂວງຫຼວງພະບາງ ໃຫ້ກັບມາມີບັນຍາກາດຄຶກຄື້ນ ແລະ ກວ້າງຂວາງຂຶ້ນກວ່າເກົ່າ ແລະ ທ່ານໄດ້ຮຽກຮ້ອງໃຫ້ຄະນະຮັບຜິດຊອບ ສຸມໃສ່ກະກຽມວຽກງານຮອບດ້ານເພື່ອເຮັດໃຫ້ການແຂ່ງຂັນປະສົບຜົນສຳເລັດ ທັງມີບັນຍາກາດຄຶກຄື້ນ ແລະ ເຊີນຊວນນັກກິລາດອກປີກໄກ່ໃນທົ່ວປະເທດ ເຂົ້າມາຮ່ວມແຂ່ງຂັນ ທັງທ່ຽວຊົມສະຖານທີ່ທ່ອງທ່ຽວຂອງແຂວງຫຼວງພະບາງໃຫ້ຫຼາຍຂຶ້ນ.

ສຳລັບການແຂ່ງຂັນດອກປີກໄກ່ທົ່ວປະເທດ ຊີງຂັນທ່ານເຈົ້າແຂວງຫຼວງພະບາງ ຈະດຳເນີນຂຶ້ນໃນລະຫວ່າງວັນທີ 28-30 ກໍລະກົດ 2022 ນີ້ ຊຶ່ງຜູ້ທີ່ຈະເຂົ້າຮ່ວມແຂ່ງຂັນ ສາມາດລົງທະບຽນໄດ້ທີ່ສະໂມສອນດອກປີກໄກ່ຫຼວງພະບາງ ຕັ້ງຢູ່ບ້ານນາຫຼວງ ນະຄອນ-ຫຼວງພະບາງ ເລີ້ມແຕ່ມື້ນີ້ ຈົນເຖິງວັນທີ 25 ກໍລະກົດ ເວລາ 20:00 ໂມງ ຊຶ່ງເປັນມື້ຈັບສະຫຼາກການແຂ່ງຂັນ ຫຼື ຈະສະໝັກຜ່ານ Facebook page: LuangParbang Badminton Championship, WhatsApp +85620 7777 7112, ສ່ວນຢູ່ນະຄອນຫຼວງວຽງຈັນ ສາມາດຕິດຕໍ່ໄດ້ທີ່ເບີ 020 97 455 355. ສຳລັບການແຂ່ງຂັນປະກອບມີ 9 ລາຍການຄື: ດ່ຽວຊາຍ ເຍົາວະຊົນ ອາຍຸບໍ່ເກີນ 14 ປີ, ດ່ຽວຊາຍ ເຍົາວະຊົນ ອາຍຸບໍ່ເກີນ 18 ປີ, ຄູ່ຊາຍ ສະໝັກຫຼິ້ນ ອາຍຸ 18-45 ປີ (ບໍ່ອະນຸຍາດໃຫ້ຊຸດໃຫຍ່ ທີ່ໄປແຂ່ງຂັນຊີເກມ 2022 ລົງແຂ່ງຂັນ ແລະ ບໍ່ອະນຸຍາດໃຫ້ ທີມຊາດຊຸດໃຫຍ່ທີ່ບໍ່ໄດ້ໄປແຂ່ງຂັນຊີເກມ, ອະດີດທີມຊາດ, ນັກກິລາທີ່ເຄີຍໄດ້ແຊັມຮຸ່ນນີ້ ໃນລາຍການລະດັບປະເທດ ຈັບຄູ່ກັນລົງແຂ່ງຂັນ), ຄູ່ຊາຍທົ່ວໄປ (ບໍ່ຈຳກັດອາຍຸ ນັກກິລາທີມຊາດສາມາດລົງແຂ່ງຂັນໄດ້), ດ່ຽວຊາຍ ທົ່ວໄປ (ບໍ່ຈຳກັດອາຍຸ ນັກກິລາທີມຊາດສາມາດລົງແຂ່ງຂັນໄດ້), ຄູ່ຍິງ ທົ່ວໄປ (ບໍ່ຈຳກັດອາຍຸ ນັກກິລາທີມຊາດສາມາດລົງແຂ່ງຂັນໄດ້), ຄູ່ປະສົມ ທົ່ວໄປ (ບໍ່ຈຳກັດອາຍຸ ນັກກິລາທີມຊາດສາມາດລົງແຂ່ງຂັນໄດ້) ແລະ ຄູ່ຊາຍ ອາວຸໂສອາຍຸລວມກັນ 90 ປີຂຶ້ນໄປ (ນັກກິລາ 2 ຄົນ ຕ້ອງລວມອາຍຸລວມກັນ ກາຍ 90 ປີ). ພ້ອມນັ້ນ ບໍລິສັດ ເບຍລາວ ໄດ້ມອບອຸປະຖຳເປັນເງິນສົດ ຈຳນວນ 97 ລ້ານກີບ.

(ຂ່າວ-ພາບ: ແຂວງ ຫຼວງພະບາງ)