ຄະນະພັກຮາກຖານກົມສ່ວຍສາອາກອນ ກະຊວງການເງິນ ຈັດກອງປະຊຸມສະ ຫລຸບການເຄື່ອນໄຫວວຽກງານພັກ-ພະນັກງານໄລຍະ 11 ເດືອນ ແລະ ທິດທາງແຜນການເດືອນ 12ປີ 2022 ໃນວັນທີ 22ພະຈິກ 2022 ໂດຍການເປັນປະທານຂອງ ສະຫາຍ ບຸນໂຈມ ອຸບົນປະເສີດ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການເງິນ, ມີສະຫາຍ ບຸນປະເສີດ ສີກຸນລະບຸດ ກຳມະການພັກກະຊວງ, ເລຂາ ຄະນະພັກຮາກຖານກົມສ່ວຍສາອາກອນ, ມີຮອງເລຂາຄະນະພັກຮາກຖານ, ຄະນະເລຂາໜ່ວຍພັກ, ສະມາຊິກພັກທີ່ຂຶ້ນກັບຄະນະພັກຮາກຖານ ກົມສ່ວຍສາອາກອນ ເຂົ້າຮ່ວມ.

ໃນກອງປະຊຸມ ສະຫາຍ ບຸນປະເສີດ ສີກຸນລະບຸດ ກຳມະການພັກກະຊວງ, ເລຂາຄະນະພັກຮາກຖານກົມສ່ວຍສາອາກອນ ໄດ້ສະຫລຸບຕີລາຄາລວມເຫັນວ່າ: ຄະນະພັກຮາກຖານ, ໄດ້ເອົາ ໃຈໃສ່ຊີ້ນຳ-ນໍາພາບັນດາໜ່ວຍພັກ ອ້ອມຂ້າງຄະນະພັກຮາກຖານຢ່າງໃກ້ຊິດຕິດແທດ; ເພີ່ມທະວີເອົາໃຈໃສ່ສຶກສາອົບຮົມດ້ານການເມືອງ-ແນວຄິດ ໃຫ້ພະນັກງານ-ສະມາຊິກພັກ, ກວດກາ, ຕິດ ຕາມ, ປະເມີນຜົນການຈັດຕັ້ງປະຕິບັດວຽກງານປະຈໍາປີ ຂອງພະນັກງານ-ສະມາຊິກພັກ ທັງໝົດ 125 ສະຫາຍ, ຍິງ 44 ສະຫາຍ; ຊຸກຍູ້ການປະຕິບັດໜ້າທີ່ການເມືອງໂດຍເລັ່ງໃສ່ວຽກງານເກັບລາຍຮັບເປັນຕົ້ນຕໍ; ເອົາໃຈໃສ່ໃນວຽກງານກົງຈັກການຈັດຕັ້ງ ໂດຍສະເພາະການກະກຽມປັບປຸງພາ ລະບົດບາດຂອງຂະແໜງສ່ວຍສາອາກອນຄືນໃໝ່ ເພື່ອໃຫ້ສອດຄ່ອງແທດເໝາະກັບວຽກງານຕົວຈິງ; ພາຍຫລັງມີການຖອດຖອນບົດຮຽນ ຈາກການຈັດຕັ້ງປະຕິບັດໃນປີຜ່ານມາ, ສະມາຊິກພັກ-ພະນັກງານມີແນວຄິດຫລັກໝັ້ນ, ອຸ່ນອຽງ, ທຸ່ນທ່ຽງ ພ້ອມກັນປະຕິບັດຕາມແນວທາງຂອງພັກ-ລັດ ແລະ ໜ້າທີ່ການເມືອງທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ ສະແດງອອກໃຫ້ເຫັນດ້ານດີຜົນສໍາເລັດ; ຄະນະພັກຮາກຖານກົມສ່ວຍສາອາກອນ ໄດ້ເອົາໃຈໃສ່ໃນການຈັດຕັ້ງຜັນຂະ ຫຍາຍມະຕິກອງປະຊຸມຄະນະບໍລິຫານງານພັກເປີດກ້ວາງ ຄັ້ງທີ 1 ຫາ 6, ສະໄໝທີ III ຂອງອົງຄະນະພັກກະຊວງການເງິນຢ່າງຕັ້ງໜ້າ; ເອົາໃຈໃສ່ໃນການຜັນຂະຫຍາຍມະຕິຄຳສັ່ງຕ່າງໆທີ່ທາງຂັ້ນເທິງວາງອອກແຕ່ລະໄລຍະໃຫ້ເຂົ້າສູ່ລວງເລິກ ແລະ ຜັນຂະຫຍາຍເຂົ້າໃນວຽກງານວິຊາສະເພາະຕົວຈິງໂດຍສະເພາະການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ຄໍາສັ່ງເລກທີ 18/ນຍ ວ່າດ້ວຍການສະກັດກັ້ນ ແລະ ຕ້ານການຮົ່ວໄຫລຂອງລາຍຮັບງົບປະມານ.

ຜ່ານການຈັດຕັ້ງປະຕິບັດບັນດາມະຕິຄຳສັ່ງໃນ 11 ເດືອນ ປີ 2022 ຄະນະພັກຮາກຖານກົມສ່ວຍສາອາກອນ, ສາມາດຍາດມາໄດ້ຜົນສຳເລັດ ໃນການຈັດຕັ້ງປະຕິບັດເກັບລາຍຮັບໄດ້ທັງໝົດຮອດວັນທີ 14 ພະຈິກ 2022 ສາມາດເກັບໄດ້ 17.602 ຕື້ກວ່າກີບ, ເທົ່າກັບ 88,8% ຂອງແຜນການດັດແກ້ ໃນນີ້, ສ່ວຍສາອາກອນປະຕິບັດໄດ້ 11.727 ຕື້ກວ່າກີບ, ເທົ່າກັບ 81,31%, ລາຍຮັບຊັບສິນ ປະຕິບັດໄດ້ 4.233 ຕື້ກີບ, ເທົ່າກັບ 108,9%, ລາຍຮັບຈາກ ກົມປະຕິຮູບລັດວິສາຫະກິດ ແລະ ການປະກັນໄພ(ປລປ) ປະຕິບັດໄດ້ 1,640 ຕື້ກີບເທົ່າກັບ 108,5% ຂອງແຜນດັດແກ້. ພ້ອມກັນນັ້ນ, ກົມສ່ວຍສາອາກອນ ໄດ້ແຕ່ງຕັ້ງຄະນະຮັບຜິດຊອບຊຸກຍູ້ລາຍຮັບທ້າຍປີໂດຍແບ່ງຄວາມຮັບຜິດຊອບໃຫ້ຄະນະກົມໃນການຕິດຕາມ, ກວດກາ ແລະ ຊຸກຍູ້ການເກັບລາຍຮັບຈາກຫົວໜ່ວຍທຸລະກິດຂະໜາດໃຫຍ່ ແລະ ຄາດວ່າໝົດປີຈະສາມາດປະຕິບັດລາຍຮັບທັງໝົດເທົ່າກັບ 113,6% ໃນນີ້, ສ່ວຍສາອາກອນລາຍຮັບໝົດປະຕິບັດໄດ້ 104,6%, ລາຍຮັບຊັບສິນປະຕິບັດໄດ້ 140,0% ແລະ ລາຍຮັບຈາກ ປລປ ໝົດປີຈະປະຕິບັດໄດ້ 113,6%.

ສຳລັບ ທິດທາງແຜນການເຄື່ອນໄຫວຕໍ່ໜ້າ ແລະ ວຽກງານຂໍ້ຄົງຄ້າງທີ່ຈະພ້ອມກັນແກ້ໄຂເປັນຕົ້ນ ການຈັດຕັ້ງຜັນຂະຫຍາຍບັນດາມະຕິ, ຄໍາສັ່ງ ແລະ ເອກະສານສໍາຄັນຕ່າງໆຂອງຂັ້ນເທິງ, ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ວຽກງານຂະຫຍາຍພັກ, ວຽກງານຕິດພັນກັບງົບປະມານບໍລິຫານຂອງບັນດາເມືອງ, ການເລືອກເຟັ້ນ, ຈັດວາງສັບຊ້ອນພະນັກງານ, ການກໍ່ສ້າງ-ບໍາລຸງພະນັກງານ, ວຽກງານປັບປຸງກົງຈັກການຈັດຕັ້ງ, ວຽກແກ້ໄຂຜົນການກວດສອບ ແລະວຽກຫັນເປັນທັນສະໄໝໃຫ້ສຳເລັດຕາມລະດັບຄາດໝາຍ.

ໃນໂອກາດນີ້, ສະຫາຍ ບຸນໂຈມ ອຸບົນປະເສີດ ກໍໄດ້ໃຫ້ທິດຊີ້ນໍາຕໍ່ຄະນະພັກຮາກຖານກົມສ່ວຍສາອາກອນ ເອົາໃຈໃສ່ປຸກລະດົມສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ-ພະ ນັກງານໃຫ້ມີຄວາມອຸ່ນອຽງທຸ່ນທ່ຽງ ໃນການຈັດຕັ້ງປະຕິບັດໜ້າທີ່ວຽກງານ; ເອົາໃຈໃສ່ຈັດຕັ້ງຜັນຂະຫຍາຍເອກະສານຂອງພັກ ແລະ ວາລະແຫ່ງຊາດ, ຄໍາສັ່ງເລກທີ 18/ນຍ ທີ່ຕິດພັນກັບການຊີ້ນໍາ-ນໍາພາຂອງຄະນະພັກ; ການຈັດຕັ້ງປະຕິບັດການເຄື່ອນໄຫວຂອງຄະນະພັກຮາກຖານ; ພ້ອມກັນປະຕິບັດຕາມແຜນການດໍາເນີນງານຂອງພັກ, ຊີ້ນໍາຂົງເຂດວຽກລັດໃຫ້ສາມາດເຄື່ອນໄຫວໄປຢ່າງມີປະສິດທິຜົນ, ຮັບປະກັນຜົນໄດ້ຮັບຢ່າງເຂັ້ມງວດ, ພ້ອມກັນຜ່ານມາອຸປະສັກແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ; ສືບຕໍ່ປັບປຸງພາລະບົບບາດກົງຈັກການຈັດຕັ້ງຂອງກົມສ່ວຍສາອາກອນຄືນໃໝ່, ປັບປຸງຂັ້ນຂອດ, ສິ່ງກີດຂວາງໃນການຈັດຕັ້ງປະຕິບັດວຽກງານວິຊາສະເພາະ ແລະ ລະບຽບການຕ່າງໆໃຫ້ໂລ່ງລ່ຽນພາຍໃນພັກ, ປັບປຸງກົງຈັກເຮັດວຽກຂອງສ່ວຍສາອາກອນຕາມສາຍຕັ້ງ, ການກຳນົດໜ້າວຽກແຕ່ສູນກາງ-ຮອດທ້ອງຖິ່ນ ໃຫ້ຮັດແຄບເຂົ້າແຕ່ມີປະສິດທິພາບປະສິດທິຜົນ ແລະ ເຂັ້ມງວດໃນການນໍາໃຊ້ກົດໝາຍ ແລະ ນິຕິກຳໃຕ້ກົດໝາຍໃຫ້ມີປະສິດພາບປະສິດທິຜົນສູງ.

ຂ່າວ-ພາບ: ກະຊວງການເງິນ

ຄັງເງິນແຫ່ງຊາດ ກະຊວງການເງິນ ຈັດຝຶກອົບຮົມວຽກງານແຂ່ງຂັນ ແລະ ຍ້ອງຍໍ ໃຫ້ພະນັກງານ-ລັດຖະກອນ ພາຍໃນຄັງເງິນແຫ່ງຊາດ ໃນວັນທີ 22 ພະຈິກ 2022 ເພື່ອສ້າງຂີດຄວາມສາມາດໃຫ້ພະນັກງານ-ລັດຖະກອນຄັງເງິນແຫ່ງຊາດ ຮັບຮູ້, ເຂົ້າໃຈເລິກເຊິ່ງໃນວຽກງານແຂ່ງຂັນ ແລະ ຍ້ອງຍໍ ແລະ ເພື່ອເປັນການປ່ຽນແປງໃໝ່ໃນການຈັດຕັ້ງປະຕິບັດວຽກງານດັ່ງກ່າວໃຫ້ມີຄຸນນະ ພາບເທື່ອລະກ້າວ.

ທ່ານນາງ ຄອນມະນີ ພິມມະສັກ ຮອງຫົວໜ້າຄັງເງິນແຫ່ງຊາດ ໄດ້ໃຫ້ຮູ້ວ່າ: ຊຸດຝຶກອົບຮົມໃນຄັ້ງນີ້ແມ່ນມີຄວາມໝາຍຄວາມສໍາຄັນຫລາຍ ໂດຍຜູ້ເຂົ້າຮ່ວມໄດ້ພ້ອມຄົ້ນຄວ້າ, ສົນທະນາ, ແລກ ປ່ຽນບົດຮຽນ ແລະ ຍາດແຍ່ງເອົາຄວາມຮູ້ນໍາຄູຝຶກ ກ່ຽວກັບວຽກງານແຂ່ງຂັນ ແລະ ຍ້ອງຍໍ, ສ້າງຄວາມເຂົ້າໃຈເປັນເອກະພາບສູງ ຕໍ່ການນໍາເອົາເນື້ອໃນຈິດໃຈຂອງວຽກງານດັ່ງກ່າວ ນໍາມາຈັດຕັ້ງປະຕິ ບັດໃຫ້ມີຜົນສໍາເລັດ.

ຊຸດຝຶກອົບຮົມດັ່ງກ່າວ, ທ່ານ ວັນນະ ບຸບຜາ ຫົວໜ້າກົມແຂ່ງຂັນ-ຍ້ອງຍໍກະຊວງພາຍໃນ ໄດ້ຍົກໃຫ້ເຫັນຄວາມໝາຍຄວາມສໍາຄັນ, ການກໍາເນີດເຕີບໃຫຍ່, ກໍາໄດ້ວຽກງານແຂ່ງຂັນ ແລະ ຍ້ອງຍໍເພາະວຽກງານດັ່ງກ່າວແມ່ນພັກ-ລັດ ໄດ້ໃຫ້ຄວາມສຳຄັນເປັນຢ່າງຍິ່ງ ເພື່ອສ້າງຄວາມເຕີບໃຫຍ່ເຂັ້ມ ແຂງໃຫ້ຖັນແຖວພະນັກງານ, ຖືເປັນຍຸດທະສາດໜຶ່ງທີ່ສຳຄັນຂອງພັກ ແລະ ລັດໃນການແຂ່ງຂັນຍ້ອງຍໍ ຄົ້ນຄວ້າ, ໄຈ້ແຍກໃຫ້ໄດ້ວຽກດີ ຄົນເດັ່ນ ເພື່ອເສີມຂະຫຍາຍດ້ານດີດ້ານເດັ່ນ, ພ້ອມກັນຊອກຫາວິທີການປັບປຸງບັນຫາທີ່ຍັງຂາດຕົກບົກຜ່ອງ ແລະ ມີຄວາມຈຳເປັນທີ່ຕ້ອງໄດ້ຈັດຕັ້ງປະຕິບັດ, ເພາະວຽກງານດັ່ງກ່າວ ຖືເປັນເຄື່ອງມືວັດແທກດ້ານຕັ້ງໜ້າ ແລະ ຫຍໍ້ທໍ້ຂອງບຸກຄົນ. ທັງນີ້, ກໍເພື່ອແນໃສ່ເຮັດໃຫ້ພະນັກງານຄັງເງິນແຫ່ງຊາດ ມີຄວາມຮັບຮູ້ໃນວຽກງານດັ່ງກ່າວ ແລະ ພັດທະນາຕົນເອງໃຫ້ກາຍເປັນຄົນດີເດັ່ນ ສາມາດປະຕິບັດວຽກງານໃຫ້ມີຄວາມເຕີບໃຫຍ່ເຂັ້ມແຂງ ຢ່າງມີປະສິທິພາບດີຂຶ້ນເປັນກ້າວໆ.

ຂ່າວ-ພາບ: ກະຊວງການເງິນ

　　ວັນທີ 22 ພະຈິກນີ້, ທ່ານ ເວີ້ຍເຟີ້ງເຮີ ທີ່ເປິກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດຈີນ ທີ່ກຳລັງເຂົ້າຮ່ວມກອງປະຊຸມເປີດກວ້າງຂອງລັດຖະມົນຕີປ້ອງກັນປະເທດອາຊຽນຄັ້ງທີ 9 ຢູ່ກຳປູເຈຍ ໄດ້ພົບປະກັບທ່ານ ລອຍ ໂອສຕິນ ລັດຖະມົນຕີກະຊວງປ້ອງກັນປະເທດອາເມຣິກາ ຕາມການນັດໝາຍ.

　　ທ່ານເວີ້ຍເຟີ້ງເຮີກ່າວວ່າ, ສະພາບການທີ່ການພົວພັນຈີນ-ອາເມຣິກາປະເຊີນໜ້າໃນປັດຈຸບັນ ຄວາມຮັບຜິດຊອບແມ່ນຢູ່ນຳຝ່າຍອາເມຣິກາ ບໍ່ແມ່ນຝ່າຍຈີນ. ຈີນເອົາໃຈໃສ່ຕໍ່ການຂະຫຍາຍການພົວພັນລະຫວ່າງສອງປະເທດແລະສອງກອງທັບ, ອາເມຣິກາຄວນເຄົາລົບນັບຖືຜົນປະໂຫຍດໃຈກາງຂອງຈີນ. ຫວັງໃຫ້ອາເມຣິກາກະທຳຕາມຄວາມເວົ້າຂອງຕົນ, ຕັ້ງໝີ້ນໃນຄຳໝັ້ນສັນຍາຂອງຕົນ, ປະຕິບັດຄວາມເຫັນທີ່ເປັນເອກະສັນກັນຂອງປະມຸກລັດສອງປະເທດລົງສູ່ພາກປະຕິບັດຕົວຈິງ, ປະຕິບັດນະໂຍບາຍທີ່ຕິດແທດຕົວຈິງຕໍ່ຈີນ, ຊຸກຍູ້ໃຫ້ການພົວພັນຈີນ-ອາເມຣິກາກັບຄືນສູ່ເສັ້ນທາງການພັດທະນາທີ່ປອດໃສແລະໝັ້ນທ່ຽງ.　

　　ທ່ານເວີ້ຍເຟີ້ງເຮີກ່າວເນັ້ນຕື່ມວ່າ, ບັນຫາໄຕ້ຫວັນແມ່ນໃຈກາງໃນຜົນປະໂຫຍດໃຈກາງຂອງຈີນ, ແມ່ນເສັ້ນແດງອັນດັບໜຶ່ງທີ່ການພົວພັນຈີນ-ອາເມຣິກາລ່ວງລ້ຳບໍ່ໄດ້. ໄຕ້ຫວັນເປັນຂອງຈີນ, ການແກ້ໄຂບັນຫາໄຕ້ຫວັນແມ່ນເລື່ອງຂອງປະຊາຊົນຈີນເອງ, ບໍ່ວ່າອິດທິກຳລັງພາຍນອກໃດໆ ລ້ວນແຕ່ບໍ່ມີສິດແຊກແຊງ. ກອງທັບຈີນມີຄວາມມູ່ງໝັ້ນ, ມີຄວາມໝັ້ນໃຈແລະມີຄວາມສາມາດ ເພື່ອເດັດດ່ຽວຮັກສາຄວາມເປັນເອກະພາບກັນຂອງປະເທດຊາດ. 　　ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບສະພາບການສາກົນແລະພາກພື້ນ, ວິກິດການອູແກຣນ, ບັນຫາທະເລຈີນໃຕ້, ບັນຫາແຫຼມເກົາຫຼີແລະອື່ນໆ.

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 22 ພະຈິກ ຜ່ານມາ, ກອງປະຊຸມໃຫຍ່ ຄັ້ງທີ 22 ສະພາສັນຕິພາບໂລກ ໄດ້ເປີດຂຶ້ນທີ່ນະຄອນຫຼວງຮ່າໂນ້ຍ ຫວຽດນາມ. ໂດຍມີການເຂົ້າຮ່ວມຂອງຜູ້ແທນ 200 ທ່ານ, ໃນນັ້ນມີຜູ້ແທນສາກົນປະມານ 100 ທ່ານ.

ຂ່າວລະບຸວ່າ: ທ່ານ ເຈີ່ນແທງເມີ້ນ ຮອງປະທານຜູ້ປະຈຳການສະພາແຫ່ງຊາດຫວຽດນາມ ກ່າວຄຳເຫັນໃນພິທີ ເນັ້ນໜັກວ່າ: ສັນຕິພາບ, ເອກະລາດ ແລະ ເສລີພາບ ແມ່ນຄວາມມຸ່ງມາດປາຖະໜາອັນແຮງກ້າຂອງປະຊາຊົນຫວຽດນາມ ແລະ ແມ່ນເປົ້າໝາຍລຸລວງຂອງການປະຕິວັດຫວຽດນາມ. ທ່ານເຊື່ອໝັ້ນວ່າ: ກອງປະຊຸມໃຫຍ່ ຄັ້ງທີ 22 ຂອງສະພາສັນຕິພາບໂລກ ຈະກຳນົດທິດຍຸດທະສາດ, ສ້າງໂຄງການເຄື່ອນໄຫວຢ່າງມີປະສິດທິຜົນວາງອອກວິທີການແກ້ໄຂຢ່າງແທດຈິງ ແລະ ຍົກສູງປະສິດທິຜົນການເຄື່ອນໄຫວຂອງສະພາຢ່າງຕັ້ງໜ້າ. ປະກອບສ່ວນເຂົ້າໃນຄວາມພະຍາຍາມສະກັດກັ້ນການປະທະ ກັນ, ສະກັດກັ້ນການແຂ່ງຂັນປະກອບອາວຸດ, ລຶບລ້າງອາວຸດລ້າງຜານ, ຊຸກຍູ້ການເຄົາລົບຫຼັກການຂອງກົດໝາຍສາກົນ ແລະ ກົດບັດຂອງສະຫະປະຊາຊາດ. ສະພາຈະເຕົ້າໂຮມກຳລັງຄວາມກ້າວໜ້າຂອງໂລກຢ່າງກວ້າງຂວາງ ໃນການຕໍ່ສູ້ເພື່ອສັນຕິພາບ, ການພັດທະນາ ແລະ ຄວາມກ້າວໜ້າຂອງສັງຄົມ. ທ່ານ ເຈີ່ນແທງເມີ້ນ ຢືນຢັນວ່າ: ພັກ, ລັດ ແລະ ປະຊາຊົນ ຫວຽດນາມ ຍາມໃດກໍພ້ອມກັບບັນດາກຳລັງທີ່ຮັກຫອມສັນຕິພາບຂອງໂລກ, ປະກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບເຂົ້າໃນຄວາມມຸ່ງມາດປາຖະໜາລວມຂອງປະຊາຊົນໃນໂລກ.

ໃນພິທີເປີດກອງປະຊຸມ, ບັນດາຜູ້ແທນສາກົນໄດ້ຕີລາຄາສູງຕໍ່ ຫວຽດນາມ ເຈົ້າພາບຈັດຕັ້ງກອງປະຊຸມໃຫຍ່ຄັ້ງທີ 22 ສະພາສັນຕິພາບໂລກ ແມ່ນຂີດໝາຍສຳຄັນ, ສະແດງໃຫ້ເຫັນນ້ຳໃຈສາມັກຄີສາ ກົນ, ບົດບາດ, ຄວາມຮັບຜິດຊອບ ແລະ ການປະກອບສ່ວນຢ່າງຕັ້ງໜ້າຂອງ ຫວຽດນາມ ເຂົ້າໃນຂະບວນການສ້າງສັນຕິພາບລວມຂອງມວນມະນຸດ.

ຂ່າວສານຊີອາໄອລາຍງານ ເມື່ອຕົ້ນອາທິດທີ່ຜ່ານມາ, ພາຍໃຕ້ການສະໜັບສະໜູນຂອງກົມຄຸ້ມຄອງແພດແຜນຈີນ ແລະ ຢາພື້ນເມືອງແຫ່ງຊາດຈີນ, ກອງປະຊຸມວິຊາການປັກເຂັມປີ 2022 ທີ່ມີສະຫະພັນສະມາຄົມປັກເຂັມໂລກ ແລະ ສະຖາບັນແພດແຜນຈີນຮ່ວມກັນເປັນເຈົ້າພາບ ໄດ້ເປີດຂຶ້ນຢູ່ປະເທດສິງກະໂປ ໂດຍມີຜູ້ນຳ ແລະ ຊ່ຽວຊານ 600 ກວ່າທ່ານ ທີ່ມາຈາກ 26 ປະເທດ ແລະ ເຂດແຄ້ວນໄດ້ເຂົ້າຮ່ວມກອງປະຊຸມດ້ວຍຮູບແບບຜ່ານທາງອອນລາຍ ແລະ ອັອຟລາຍ.

ກອງປະຊຸມຄັ້ງນີ້ມີຫົວຂໍ້ວ່າ: “ສົ່ງເສີມການປັກເຂັມຂອງແພດແຜນຈີນ ຮັກສາສຸຂະພາບຂອງທົ່ວປວງຊົນ”, ຈັດຂຶ້ນດ້ວຍຮູບແບບຜ່ານທາງອອນລາຍ ແລະ ອັອຟລາຍ, ກອງປະຊຸມຈະດຳເນີນການປຶກສາຫາລືດ້ານວິຊາການ ໂດຍປິ່ນອ້ອມການສືບທອດ ການປະດິດສ້າງໃໝ່ດ້ານການປັກເຂັມຂອງແພດແຜນຈີນ ໃນຖານະເປັນມໍລະດົກວັດທະນະທຳນາມມະທຳຂອງມວນມະນຸດ ແລະ ຍຸດທະສາດແພດສາດດັ່ງເດີມຂອງອົງການອະນາໄມໂລກ.

ໃນວັນທີ 23 ພະຈິກ 2022 ທີ່ແຂວງຄໍາມວນ, ຫ້ອງວ່າການສູນກາງພັກປະຊາຊົນປະຕິວັດລາວ ຮ່ວມກັບ ຫ້ອງວ່າການສູນກາງພັກກອມມູຍນິດຫວຽດນາມ ແລະ ແຂວງຄໍາມ່ວນ ໄດ້ຈັດພິທີຫວນຄືນມູນເຊື້ອ ພາຍໃຕ້ຫົວຂໍ້ “ຫວນຄືນມູນເຊື້ອຂອງສອງຊົນຊາດຊົນເຜົ່າ ແລະ ສາຍພົວພັນຄວາມສາມັກຄີພິເສດ ລາວ – ຫວຽດນາມ, ຫວຽດນາມ – ລາວ ໂດຍ ປະທານ ໂຮ່ຈິມິນ ແລະ ປະທານ ສຸພານຸວົງ ເປັນຜູ້ກໍ່ຕັ້ງຂຶ້ນ” ໂດຍການເປັນປະທານຮ່ວມ ຂອງທ່ານ ເພັດຖາວອນ ພິລາວັນ, ຮອງຫົວໜ້າຫ້ອງວ່າການສູນກາງພັກ, ທ່ານ ບຸຍ ວັນ ແທ໋ກ ຮອງຫົວໜ້າຫ້ອງວ່າການສູນກາງພັກ ກອມມູຍນິດຫວຽດນາມ ແລະ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີພະນັກງານການນໍາທັງສາມພາກສ່ວນ ພ້ອມດ້ວຍພະແນກການ, ຂະແໜງການຂັ້ນແຂວງ ແລະ ນັກສຶກສາປັນຍາຊົນພາຍໃນແຂວງຄຳມ່ວນເຂົ້າຮ່ວມ.

ການຫວນຄືນມູນເຊື້ອດັ່ງກ່າວໄດ້ສ່ອງແສງເຖິງມູນເຊື້ອສາຍພົວພັນມິດຕະພາບອັນຍິ່ງໃຫຍ່ ໃນຂະບວນການປະຕິວັດຕໍ່ສູ້ປົດປ່ອຍຊາດທີ່ເປັນວິລະກໍາອັນໂດດເດັ່ນຢູ່ຫຼາຍເຫດການປະຫວັດສາດຂອງສອງຊາດ. ການຈັດພິທີຫວນຄືນມູນເຊື້ອຄັ້ງນີ້ ແມ່ນມີຄວາມໝາຍສຳຄັນຫຼາຍ ເຖິງວ່າເປັນເວລາອັນສັ້ນ , ບໍ່ສາມາດຫວນຄືນໄດ້ໝົດທຸກເຫດການປະຫວັດສາດທີ່ລະອິດລະອ້ຽວຂ້ຽວຂາດ ເຕັມໄປດ້ວຍການເສຍສະຫຼະອຸທິດເຫື່ອແຮງ, ສະຕິປັນຍາ ລວມທັງຊີວິດອິນຊີຂອງວິລະຊົນທັງສອງຊາດ ຢ່າງຫຼວງຫຼາຍ ໂດຍສະເພາະແມ່ນຢູ່ໃນບັ້ນຮົບປ້ອງກັນຕົວເມືອງທ່າແຂກ 21 ມີນາ 1946, ສາຍພົວພັນມິດຕະພາບ ລາວ – ຫວຽດນາມ, ຫວຽດນາມ – ລາວ ໄດ້ກໍາເນີດຂຶ້ນ ພາຍໃຕ້ການນໍາພາຂອງພັກກອມມູຍນິດອິນດູຈີນໃນເມື່ອກ່ອນ ກໍ່ຄືພັກປະຊາຊົນປະຕິວັດລາວ ແລະພັກກອມມູຍນິດຫວຽດນາມ ໃນປະຈຸບັນ ໂດຍມີປະທານ ໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ.

ການຫວນຄືນມູນເຊື້ອດັ່ງກ່າວແມ່ນກິດຈະກຳໜຶ່ງໃນການສະເຫຼີມສະຫຼອງສອງວັນປະຫວັດສາດ ຄື: ວັນສ້າງຕັ້ງສາຍພົວພັນການທູດລະຫວ່າງ ລາວ-ຫວຽດນາມ, ຫວຽດນາມ – ລາວ ຄົບຮອບ 60 ປີ ( 5 ກັນຍາ 1962 – 5ກັນຍາ 2022) ແລະວັນເຊັນສົນທິສັນຍາມິດຕະພາບ ແລະການຮ່ວມມືຮອບດ້ານລະຫວ່າງສອງຊາດລາວ – ຫວຽດນາມ, ຫວຽດນາມ – ລາວ ຄົບຮອບ 45 ປີ (18 ກໍລະກົດ 1977 – 18 ກໍລະກົດ 2022). ທັງເປັນການສືບທອດໃຫ້ແກ່ຄົນຮຸ້ນໃໝ່ໄດ້ສຶກສາຄົ້ນຄວ້າ ແລະເຊື່ອມຊຶມເຂົ້າໃຈຄຸນຄ່າທາງປະຫວັດສາດ ແລະອະລິຍະທໍາຂອງການພົວພັນ ລາວ – ຫວຽດນາມ, ຫວຽດນາມ – ລາວ ແລະຈື່ຈໍາເຫດການ ກໍ່ຄືມູນເຊື້ອສໍາພັນສູ້ຮົບ, ຄວາມສາມັກຄີພິເສດອັນເຕັມໄປດ້ວຍຄຸນຄ່າທາງປະຫວັດສາດ ເພື່ອພ້ອມກັນສືບຕໍ່ປົກປັກຮັກສາໃຫ້ເປັນມໍລະດົກອັນລໍ້າຄ່າທັງໃນປະຈຸບັນ ແລະທັງເສີມຂະຫຍາຍໃຫ້ສູງຂຶ້ນກວ່າເກົ່າ ແລະງອກງາມຕະຫຼອດໄປໃນອະນາຄົດ.

ເມືອງທ່າແຂກ, ແຂວງຄຳມ່ວນ ດິນແດນທີ່ມີປະຫວັດສາດອັນຍາວນານ, ດິນແດນທີ່ມີມູນເຊື້ອແຫ່ງການສຳພັນສູ້ຮົບ ລາວ – ຫວຽດນາມ, ຫວຽດນາມ – ລາວທີ່ອົງອາດກ້າຫານ, ຊາວເມືອງມີນໍ້າໃຈຮັກຊາດ, ຮັກບ້ານເກີດເມືອງນອນ ແລະມີຄວາມໂອບເອື້ອອາລີ ເອື້ອເຟື້ອເພື່ອແຜ່ ຈຶ່ງຖືກເລືອກເປັນສະຖາທີ່ຈັດພິທີຫວນຄືນມູນເຊື້ອຂອງສອງຊົນຊາດຊົນເຜົົ່າຢ່າງສົມກຽດ.

#Medialaos#ມີເດຍລາວ#khammouanenews#ແຂວງຄຳມ່ວນ

ວັນທີ 21 ພະຈິກ 2022 ຢູ່ທີ່ເມືອງນາກາຍ ແຂວງຄໍາມ່ວນ ໄດ້ຈັດພິທີເປີດການຮ່ວມມືກວດກູ້ ແລະ ທໍາລາຍລະເບີດບໍ່ທັນແຕກ ເພື່ອມະນຸດສະທໍາ ລະຫວ່າງ ກະຊວງປ້ອງກັນປະເທດແຫ່ງ ສປປ ລາວ ແລະ ກະຊວງປ້ອງກັນປະເທດແຫ່ງ ສ.ຣັດເຊຍ ສົກປີ (2022-2023) ໂດຍມີ ທ່ານ ພົນຕີ ຈັນທອງ ສອນຕະອາດ ຮອງລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ທ່ານ ພັອ. ອາບຣາມົບ ເຊຣເກ ຫົວໜ້າວິຊາການໃຫຍ່ ຂອງກົມຊ່າງແສງ ກໍາລັງປະກອບອາວຸດແຫ່ງ ສະຫະພັນ ຣັດເຊຍ, ພ້ອມດ້ວຍການນໍາເມືອງນາກາຍ, ຫົວໜ້າຫ້ອງການຜູ້ຕາງໜ້າກະຊວງປ້ອງກັນປະເທດ ແຫ່ງ ສະຫະພັນ ຣັດເຊຍ ປະຈໍາລາວ, ທີ່ປຶກສາທູດຝ່າຍທະຫານ ແຫ່ງສະຫະພັນຣັດເຊຍ ປະຈຳ ສປປ ລາວ, ອໍານາດການປົກຄອງບ້ານ ແລະ ນັກຮຽນຮູ້ບັນຍາຊົນ ເຂົ້າຮ່ວມ.

ການນໍາເມືອງນາກາຍ ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງ ວ່າດ້ວຍການມອບຕອນດິນ (ຊົ່ວຄາວ) ໃຫ້ກໍາລັງ ກະຊວງປ້ອງກັນປະເທດແຫ່ງ ສປປ ລາວ ເພື່ອປະຕິບັດວຽກງານເກັບກູ້ລະເບີດບໍ່ທັນແຕກຢູ່ພາຍໃນເມືອງນາກາຍ ຈຳນວນ 4 ຕອນ ໃນເນື້ອທີ່ທັງໝົດ 56.326 ເຮັກຕາ ປະກອບມີ: 1. ຕອນດິນ ສາລາເຈົ້າເພັດສະຣາດ ຢູ່ບ້ານນາກາຍ ( ຈຸດທີ່ກວດກູ້ໃນປີຜ່ານມາແຕ່ຍັງບໍ່ທັນສຳເລັດ ), 2. ຕອນດິນ ຜັງເມືອງໃໝ່ ເຂດໂຮງເລື່ອຍແນນຊີເກົ່າ, 3. ຕອນດິນປຸກສ້າງຫ້ອງການ ເຂດໂຮງງານຊີບອດເກົ່າ, 4. ຕອນດິນ ໂຮງຮຽນ ມໍຕົ້ນ ຫຼັງໃໝ່. ໂອກາດນີ້ ທ່ານ ພົນຕີ ຈັນທອງ ສອນຕະອາດ ໄດ້ກ່າວວ່າ: ສປປ ລາວ ເປັນປະເທດໜຶ່ງທີ່ໄດ້ຮັບຜົນກະທົບຈາກລະເບີດບໍ່ທັນແຕກທີ່ຕົກຄ້າງມາແຕ່ສະໄໝສົງຄາມອິນດູຈີນ. ໃນລະຫວ່າງປີ 1964-1973. ມາຮອດປະຈຸບັນ ລະເບີດດັ່ງກ່າວປະມານ 30% ຫຼື 80 ລ້ານໜ່ວຍຍັງບໍ່ທັນແຕກ ແລະ ຕົກຄ້າງໃນເນື້ອທີ່ 2 ໃນ 3 ຂອງປະເທດລາວ, ເຖິງວ່າສົງຄາມໄດ້ຢຸດຕິລົງແລ້ວໃນຫຼາຍປີຜ່ານມາ. ແຕ່ລະເບີດດັ່ງກ່າວນັ້ນຍັງສືບຕໍ່ທຳລາຍຊີວິດຂອງປະຊາຊົນລາວຕະຫຼອດມາ ຊຶ່ງແຕ່ລະປີມີຜູ້ທີ່ໄດ້ຮັບເຄາະຮ້າຍ ແລະ ເສຍຊີວິດເປັນຈໍານວນຫຼາຍ ລວມທັງເດັກນ້ອຍ, ແມ່ຍິງ ແລະ ຜູ້ເຖົ້າ. ນອກນັ້ນຍັງເປັນອຸປະສັກອັນໃຫຍ່ຫຼວງຕໍ່ການພັດທະນາເສດຖະກິດ-ສັງຄົມ, ການດໍາລົງຊີວິດຂອງປະຊາຊົນລາວ, ເວົ້າສະເພາະ ແມ່ນຢູ່ແຂວງຄຳມ່ວນ. ພ້ອມນັ້ນ ຄະນະນໍາຂອງສອງກໍາລັງ ແລະ ແຂກທີ່ຖືກເຊີນທັງໝົດກໍ່ໄດ້ເຂົ້າຢ້ຽມຊົມຈຸດວາງສະແດງອຸປະກອນ ພ້ອມທັງຊົມການສາທິດການກວດກູ້ ແລະ ວິທີການປະຕິບັດເບື້ອງຕົ້ນ.

#Medialaos#ມີເດຍລາວ #https://khammouanenews.com/#ແຂວງຄໍາມ່ວນ

ໃນວັນທີ 18 ພະຈິກ 2022 ນີ້, ຫ້ອງເສນາທິການ ກອງພົນທະຫານຮາບທີ 4 ໄດ້ເປີດກອງປະຊຸມສະຫຼຸບຖອດຖອນບົດຮຽນ ການຈັດຕັ້ງປະຕິບັດ, ການນຳໃຊ້ກຳລັງ, ພາຫະນະ, ປ້ອງກັນຄວາມສະຫງົບ ແລະ ຂະບວນການກິລາການທະຫານ, ກິລາມວນຊົນ ໃນງານສະເຫຼີມສະຫຼອງວັນສ້າງຕັ້ງກອງພົນ ທະຫານຮາບທີ 4 ຄົບຮອບ 40 ປີ, ໂດຍການເຂົ້າຮ່ວມເປັນປະທານຂອງ ສະຫາຍ ພັນໂທ ບຸນທັນ ແກ້ວພູວົງ ຄະນະພັກກອງພົນ, ຫົວໜ້າຫ້ອງເສນາທິການກອງພົນທະຫານຮາບທີ 4, ມີຄະນະພັກ – ຄະນະຫ້ອງເສນາ, ຕະຫຼອດຮອດກົມກອງອ້ອມຂ້າງເຂົ້າຮ່ວມຢ່າງພ້ອມພຽງ.

ສະຫາຍ ພັນໂທ ຄຳຕັນ ບົວລະພາ ຮອງຫົວໜ້າພະແນກອົບຮົມຫ້ອງເສນາທິການ ກອງພົນທະຫານຮາບທີ 4 ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ການນຳໃຊ້ກຳລັງ, ພາຫະນະ, ການປ້ອງກັນຄວມສະຫງົບ ແລະ ຂະບວນການແຂ່ງຂັນກິລາ ໃນງານສະເຫຼີມສະຫຼອງວັນສ້າງຕັ້ງກອງພົນ ຄົບຮອບ 40 ປີ ໃນບົດສະຫຼຸບໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້, ເປັນຕົ້ນ ຄະນະພັກ – ຄະນະບັນຊາໃນແຕ່ລະຂັ້ນ ໄດ້ເປັນຈິດໜຶ່ງໃຈດຽວກັນ ລົງໃກ້ສິດຕິດແທດ ຊີ້ນຳຢ່າງຮັດກຸມຈຶ່ງເຮັດໃຫ້ການຈັດຕັ້ງ, ການນຳໃຊ້ກຳລັງ,ພາຫະນະ, ລວມໄປເຖິງວັດຖຸອຸປະກອນຕ່າງໆແມ່ນຄົບຖ້ວນ ແລະ ທັນກັບເວລາ, ບັນດາອະນຸກຳມະການແມ່ນມີຄວາມຮັບຜິດຊອບສູງ, ປະສານສົມທົບ ກັບກ້ອນກຳລັງຢ່າງເປັນປະຈຳ, ບັນດາອ້າຍນ້ອງແຕ່ລະພາກສ່ວນມີຄວາມສາມັກຄີເປັນເອກະພາບກັນ, ມີຄວາມຮັກແພງ, ມີຄວາມອົດທົນຜ່ານຜ່າອຸປະສັກຕ່າງໆ ຈົນເຮັດໃຫ້ງານສະເຫຼີມສະຫຼອງວັນສ້າງຕັ້ງກອງພົນທະຫານຮາບທີ 4 ຄົບຮອບ 40 ປີ ເຕັມໄປດ້ວຍເນື້ອໃນບັນຍາກາດຟົດຟື້ນມ່ວນຊື່ນ ພ້ອມກັນນັ້ນ ບັນດາຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດ ຄຳເຫັນຢ່າງກົງໄປ ກົງມາ, ຕຳນິຕິຊົມເຊິ່ງກັນ ແລະ ກັນ ດ້ວຍເນື້ອໃນຄວາມໝາຍ ຄວາມສຳຄັນຢ່າງເລິກເຊິ່ງ ໃນໂອກາດດັ່ງກ່າວ ສະຫາຍ ພັນໂທ ຄຳບາງ ກອງມີໄຊ ຫົວໜ້າພະແນກກຳລັງພົນ ຫ້ອງເສນາທິການ ກອງພົນທະຫານຮາບທີ 4 ໄດ້ຂຶ້ນຜ່ານຂໍ້ຕົກລົງຂອງກົມໃຫຍ່ ເສນາທິການກອງທັບວ່າດ້ວຍການເລື່ອນຊັ້ນ ສິບເອກ ຂຶ້ນ ວາທີ ຈຳນວນ 284 ສະຫາຍຕື່ມອີກ.

ສະຫາຍ ພັນໂທ ບຸນທັນ ແກ້ວພູວົງ ກຳມະຫານ ຄະນະພັກກອງພົນ, ຫົວໜ້າຫ້ອງເສນາທິການກອງພົນທະຫານຮາບທີ 4 ໄດ້ໂອ້ລົມ ຫຼາຍບັນຫາ ກ່ອນອື່ນສະຫາຍໄດ້ຍ້ອງຍໍຊົມເຊີຍຕໍ່ບັນດາຜົນງານທີ່ໄດ້ເຄື່ອນໄຫວ ແລະ ເຮັດສຳເລັດໜ້າທີ່ໃນງານສະເຫຼີມສະຫຼອງ ວັນສ້າງຕັ້ງກອງພົນທະຫານຮາບທີ 4 ໃນໄລຍະຜ່ານມາ, ພ້ອມທັງຮຽກຮ້ອງໃຫ້ແຕ່ລະສະຫາຍທີ່ເຂົ້າຮ່ວມກອງປະຊຸມຈົ່ງພ້ອມເປັນເຈົ້າການຍົກສູງວຽກງານ – ການເມືອງແນວຄິດໃຫ້ສູງຂຶ້ນກວ່າເກົ່າ, ພ້ອມກັນຊີ້ນຳ – ນຳພາການຝຶກອົບຮົມປະຈຳປີ, ການສ້າງແຜນການນຳໃຊ້ກຳລັງ, ພາຫະນະ ແລະ ອຸປະກອນຕ່າງໆ ໃຫ້ຖືກຕ້ອງຕາມຄວາມເໝະສົມ ຄົບຖ້ວນ ແລະ ທັນເວລາ, ມີຄວາມສາມັກຄີພາຍໃນ – ພາຍນອກ, ມີຄວາມບຸກບືນຫ້າວຫັນ, ມີລະບຽບວິໃນເຂັ້ມງວດ, ອົດທົນຜ່ານຜ່າອຸປະສັກນາໆ ປະການ, ມີຄວາມເປັນລະບຽບຈົບງາມ, ເພື່ອສຸມໃສ່ງານສະເຫຼີມສະຫຼອງຄັ້ງຕໍ່ໄປໃຫ້ມີຄວາມຮັບປະກັນ, ຄວາມປອດໄຟ ແລະ ສຳເລັດຜົນຢ່າງຈົບງາມ ກາຍເປັນກອງທັບທີ່ທັນສະໃໝຂຶ້ນຢ່າງບໍ່ຢຸດຢັ້ງ.

ຂ່າວ-ພາບໂດຍ: ຮທ ໂພຄຳ ພອນປະເສີດ, ຮທ ອານຸສັກ ຈູມມະນີວົງ ກອງພົນທີ 4

#savannakhet#medialaos

ໃນວັນທີ 22 ພະຈິກ 2022 ນີ້ ທີ່ພະແນກ ຖວທ ແຂວງເຊກອງ, ທ່ານ ສົມກຽດຕິສັກ ກິ່ງສະດາ ຮອງຫົວໜ້າຫ້ອງການກະຊວງ ຖະແຫຼງຂ່າວ ວັດທະນະທໍາ ແລະທ່ອງທ່ຽວ ພ້ອມຄະນະ ໄດ້ລົງຕິດຕາມ ປະເມີນການຈັດຕັ້ງປະຕິບັດການຜັນຂະຫຍາຍແລະການສ້າງນິຕິກຳໃຕ້ກົດໝາຍຂົງເຂດວຽກງານ ຖວທ ຢູ່ແຂວງເຊກອງ, ໃຫ້ກຽດເຂົ້າຮ່ວມໃນຄັ້ງນີ້ມີ ທ່ານ ບຸນທົງ ຖີ່ນດອນໂຂງ ຮອງຫົວໜ້າພະແນກ ຖວທ ແຂວງເຊກອງ ພ້ອມດ້ວຍຫົວໜ້າຮອງຂະແໜງພາຍໃນພະແນກ ຖວທ ແຂວງເຂົ້າຮ່ວມ.

ທ່ານ ບຸນທົງ ຖີ່ນດອນໂຂງ ຮອງຫົວໜ້າພະແນກ ຖວທ ແຂວງ ລາຍງານການຈັດຕັ້ງປະຕິບັດບັນດາກົດໝາຍແລະນິຕິກຳໃຕ້ກົດໝາຍຂົງເຂດວຽກງານ ຖວທ ພາຍໃນແຂວງເຊກອງ: ໄດ້ການຜັນຂະຫຍາຍບັນດາກົດໜາຍ ໃນ 8 ກົດໝາຍ ໂດຍໄດ້ລົງເຜີຍແຜ່ຢູ່ບັນດາເມືອງຕາມຄວາມເປັນຈິງ ໂດຍຕິດພັນກັບການຊຸກຍູ້ວຽກງານຢູ່ຮາກຖານ,ຈາກນັ້ນກໍ່ໄດ້ຄັດເອົາບາງມາດຕາ ໃນບາງກົດໝາຍ ລົງເຜີຍແຜ່ຜ່ານພາຫານະສື່ຂອງແຂວງ ແລະເວົ້າແຊກຊ້ອນອອກໃນລາຍການວິທະຍຸຂອງແຂວງໃນແຕ່ລະວັນ, ສຳຫຼັບການສ້າງນິຕິກຳໃຕ້ກົດໝາຍ ພາຍຫຼັງທີ່ໄດ້ເຂົ້າຮ່ວມການຝຶກອົບຮົມການສ້າງນິຕິກຳໃຕ້ກົດໝາຍທີ່ແຂວງບໍລິຄຳໄຊ ໃນປີ 2020 ກໍ່ໄດ້ມີການແຕ່ງຕັ້ງຄະນະກຳມະການຮ່າງນິຕິກຳໃຕ້ກົດໝາຍຂອງພະແນກຂື້ນ ແລະໄດ້ມີການແບ່ງງານ,ແບ່ງຄວາມຮັບຜິດຊອບຢ່າງລະອຽດ ເພື່ອກະກຽມສ້າງຮ່າງນິຕິກຳ,ທັງເປັນການຜັນຂະຫຍາຍມະຕິຂອງສະພາປະຊາຊົນແຂວງ ທີ່ໄດ້ກຳນົດໃຫ້ ໃນຂົງເຂດວຽກງານ ຖວທ ( ນັບແຕ່ປີ 2021 ເຖິງ 2025 ), ມາຮອດທ້າຍປີ 2021 ແລະຕົ້ນປີ 2022 ພະແນກ ຖວທ ແຂວງໄດ້ຮ່າງນິຕິກຳສະບັບໜື່ງ ເພື່ອຮັບໃຊ້ໃຫ້ແກ່ການປົກປັກຮັກສາ,ຄຸ້ມຄອງແລະການນຳໃຊ້ ( ສວນຫຼັກເມືອງ ), ຂໍ້ກຳນົດວ່າດ້ວຍລະບຽບການຄຸ້ມຄອງແລະຈັດງານບຸນປະເພນີ ອານຸສາວະລີອົງແກ້ວແລະສວນຫຼັກເມືອງ ເພື່ອສົ່ງເສີມການທ່ອງທ່ຽວຢູ່ແຂວງເຊກອງ,ທັງແມ່ນການຜັນຂະຫຍາຍກົດໝາຍວ່າດ້ວຍການທ່ອງທ່ຽວ ( ສະບັບປັບປຸງໃຫມ່ ), ມາຮອດປະຈຸບັນແມ່ນໄດ້ສຳເລັດການປຶກສາຫາລື ໃນຄະນະຮັບຜິດຊອບ ເພື່ອຈະຂຽນແຜນດຳເນີນງານໃນການຈັດຕັ້ງປະຕິບັດຄືນໄຫມ່ ຕາມຂໍ້ມູນ,ການຄົ້ນຄົ້ວວິໃຈ,ຮ່າງຂໍ້ຕົກລົງ ແລະຕາມການທາບທາມຂັ້ນແຂວງ,ເມືອງ ແລະຂັ້ນບ້ານ ( ດ້ວຍຮູບການຕ່າງໆ ) ໃຫ້ແທດເໝາະກັບສະພາບຄວາມເປັນຈິງໃນທ້ອງຖີ່ນ ຫຼັງຈາກນັ້ນທີ່ປະຊຸມ ກໍ່ໄດ້ມີການປະກອບຄຳຄິດເຫັນແລກປ່ຽນບົດຮຽນໃນການຈັດຕັ້ງປະຕິບັດວຽກງານຕົວຈິງ ທີ່ພະແນກ ຖວທ ແຂວງ ໄດ້ນຳໃຊ້ເຂົ້າໃນການຄຸ້ມຄອງວຽກງານໃນທ້ອງຖີ່ນ,ການຈັດຕັ້ງປະຕິບັດມີຂໍ້ສະດວກ,ຂໍ້ຫຍຸ້ງຍາກຄືແນວໃດ ແລະມີການພັດທະນາຄືແນວໃດ ເພື່ອການຄຸ້ມຄອງໃຫ້ໄປໃນລວງດຽວກັນ ແນໃສ່ເພື່ອສາມາດຄຸ້ມຄຸ້ມບັນດາຫົວໜ່ວຍທຸລະກິດ,ພາກລັດແລະເອກະຊົນທີ່ມາດໍາເນີນທຸລະກິດຢູ່ແຂວງເຊກອງເພື່ອໃຫ້ເຂົ້າສູ່ລະບຽບຫຼັກການ ແລະ ທັງເປັນເຈົ້າການປົກປັກຮັກສາມໍລະດົກແລະວັດທະນະທຳອັນດີງາມຂອງຊາດ-ຂອງເຜົ່າໃຫ້ມີຄວາມຍືນຍົງ.

ແມນເຊັສເຕີ ຢູໄນເຕັດ ພ້ອມພິຈາລະນາສໍາລັບການຂາຍສະໂມສອນ ສົ່ງຜົນໃຫ້ລາຄາຫຸ້ນຂອງ ຢູໄນເຕັດ ເພີ່ມຂຶ້ນ 17% ທັນທີ ຫຼັງຈາກທີ່ມີຂ່າວເຜີຍແຜ່ອອກມາ ໂດຍເພີ່ມມູນຄ່າເກືອບ 336,4 ລ້ານປອນ ໃຫ້ກັບມູນຄ່າຕະຫຼາດຂອງສະໂມສອນ.

ຄໍາຖະແຫຼງຂອງ ແມນເຊັສເຕີ ຢູໄນເຕັດ ຢືນຢັນແຜນການທີ່ຈະລະບຸ “ທາງເລືອກຍຸດທະສາດ” ແລະ ກ່າວວ່າ ຂະບວນການນີ້ ຈະພິຈາລະນາທາງເລືອກຕ່າງໆ “ ລວມເຖິງການລົງທຶນໃໝ່ໃນສະໂມສອນ ການຂາຍ ຫຼືທຸລະກຳອື່ນໆທີ່ກ່ຽວຂ້ອງກັບບໍລິສັດ “

“ ແມນເຊັສເຕີ ຢູໄນເຕັດ ເປັນໜຶ່ງໃນສະໂມສອນກິລາທີ່ປະສົບຄວາມສຳເລັດ ແລະ ມີຄ່າຫຼາຍທີ່ສຸດໃນໂລກ ປະກາດໃນມື້ນີ້ວ່າ ຄະນະກໍາມະການບໍລິຫານບໍລິສັດ (“ ຄະນະກໍາມະການ ” ) ກໍາລັງເລີ່ມຕົ້ນຂະບວນການສໍາຫຼວດທາງເລືອກຍຸດທະສາດສໍາລັບສະໂມສອນ.”

“ ຂະບວນການນີ້ ໄດ້ຮັບຫານອອກແບບມາເພື່ອປັບປຸງການເຕີບໂຕຂອງສະໂມສອນໃນອະນາຄົດ ໂດຍມີເປົ້າໝາຍສູງສຸດໃນການວາງຕໍາແໜ່ງສະໂມສອນໃຫ້ໃຊ້ປະໂຫຍດຈາກໂອກາດທັງໃນພາກສະຫນາມ ແລະ ການຄ້າ.”

“ ໃນຂະບວນການນີ້ ຄະນະກໍາມະການ ຈະພິຈາລະນາທາງເລືອກຍຸດທະສາດທັງໝົດ ລວມເຖິງການລົງທຶນໃໝ່ໃນສະໂມສອນ ການຂາຍ ຫຼື ການເຮັດທຸລະກໍາອື່ນໆ ທີ່ກ່ຽວຂ້ອງກັບບໍລິສັດ ເຊິ່ງຈະລວມເຖິງການປະເມີນຄວາມຄິດລິເລີ່ມຫຼາຍຢ່າງເພື່ອເສີມຄວາມເຂັ້ມແຂງໃຫ້ກັບສະໂມສອນ ລວມເຖິງການພັດທະນາສະໜາມກິລາ ແລະ ໂຄງສ້າງພື້ນຖານ ແລະ ການຂະຫຍາຍການດໍາເນີນງານດ້ານການຄ້າຂອງສະໂມສອນໃນລະດັບໂລກ ໂດຍແຕ່ລະສ່ວນໃນການເສີມສ້າງຄວາມສຳເລັດໃນໄລຍະຍາວນານຂອງສະໂມສອນເພດຊາຍ ສະໂມສອນແມ່ຍິງ ແລະ ສະຖາບັນການສຶກສາ ທີມງານ ແລະ ນໍາເອົາຜົນປະໂຫຍດມາສູ່ກອງເຊຍບານ ແລະ ຜູ້ມີສ່ວນຮ່ວມອື່ນໆ.”

ປະທານຮ່ວມ ແລະ ຜູ້ອໍານວຍການຝ່າຍບໍລິຫານ ທ່ານ ອັຟຣາມ ເກລເຊີ ແລະ ໂຈເອລ ເກລເຊີ ກ່າວວ່າ: ” ຄວາມເຂັ້ມແຂງຂອງ ແມນເຊັສເຕີ ຢູໄນເຕັດ ແລະ ຄວາມຫຼົງໄຫຼ ແລະ ຄວາມສັດຊື່ຂອງກອງເຊຍບານ ໂດຍມີຜູ້ຕິດຕາມ 1,1 ຕື້ຄົນທົ່ວໂລກ ໃນຂະນະທີ່ເຮົາພະຍາຍາມສ້າງປະຫວັດສາດແຫ່ງຄວາມສໍາເລັດຂອງສະໂມສອນຕໍ່ໄປ ຄະນະກໍາມະການໄດ້ອະນຸມັດໃຫ້ມີການປະເມີນທາງເລືອກຍຸດທະສາດຢ່າງລະອຽດຖີ່ຖ້ວນ ເຮົາຈະປະເມີນທຸກທາງເລືອກເພື່ອໃຫ້ແນ່ໃຈວ່າ ເຮົາໃຫ້ບໍລິການກອງເຊຍບານຂອງເຮົາໄດ້ດີທີ່ສຸດ ແລະ ແມນເຊັສເຕີ ຢູໄນເຕັດ ຈະເພີ່ມໂອກາດການຂະຫຍາຍຕົວທີ່ສໍາຄັນໃຫ້ກັບສະໂມສອນໃນມື້ນີ້ ແລະ ໃນອະນາຄົດ ຕະຫຼອດຂະບວນການນີ້ ເຮົາຈະຍັງຄົງມຸ່ງເນັ້ນຢ່າງເຕັມທີ່ໃນການໃຫ້ບໍລິການຜົນປະໂຫຍດສູງສຸດຂອງກອງເຊຍບານ ຜູ້ຖືຫຸ້ນ ແລະ ຜູ້ມີສ່ວນຮ່ວມຕ່າງໆຂອງພວກເຮົາ.”