ວັນທີ 23 ພະຈິກນີ້, ທ່ານໂຮເຊນ ອາເມຍ ອັບດູນລາຮຽນ ລັດຖະມົນຕີກະຊວງການຕ່າງປະເທດອີຣານກ່າວວ່າ: ການເຈລະຈາເພື່ອຟື້ນຟູສັນຍາຮອບດ້ານກ່ຽວກັບບັນຫານີວເຄລຍອີຣານລະຫວ່າງອີຣານ ແລະອາເມຣິກາມີຂໍ້ຂັດແຍ້ງ 3 ດ້ານ.

ໃນມື້ດຽວກັນ, ທ່ານອັບດູນລາຮຽນໄດ້ກ່າວໃນກອງປະຊຸມຖະແຫຼງຂ່າວວ່າ: ຂໍ້ຂັດແຍ້ງທີໜຶ່ງແມ່ນການແກ້ໄຂບັນຫາທີ່ຍັງເຫຼືອລະຫວ່າງອີຣານ ແລະອົງການພະລັງງານປະລະມະນູສາກົນ; ສອງແມ່ນອີຣານຮຽກຮ້ອງໃຫ້ຮັບປະກັນດ້ານເສດຖະກິດ ເຮັດໃຫ້ບໍລິສັດຕ່າງປະເທດມີຄວາມໝັ້ນໃຈມາລົງທຶນຢູ່ອີຣານ; ສາມແມ່ນຮຽກຮ້ອງໃຫ້ປະເທດຕາເວັນຕົກບໍ່ແຜ່ຂະຫຍາຍມາດຕະການລົງໂທດໄປສູ່ຝ່າຍທີສາມ. ທ່ານກ່າວຕື່ມວ່າ: ຝ່າຍເອີຣົບພວມໄກ່ເກ່ຍລະຫວ່າງອີຣານ ແລະອາເມຣິກາກ່ຽວກັບຂໍ້ຂັດແຍ້ງເຫຼົ່ານີ້.

ວັນທີ 23 ພະຈິກນີ້, ກອງປະຊຸມເປີດກວ້າງຂອງລັດຖະມົນຕີປ້ອງກັນປະເທດອາຊຽນຄັ້ງທີ 9 ຈັດຂຶ້ນຢູ່ນະຄອນຊຽມລຽບຂອງກຳປູເຈຍ, ທ່ານເວີ້ຍເຟີ້ງເຮີ ທີ່ເປິກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດຈີນໄດ້ເຂົ້າຮ່ວມກອງປະຊຸມແລະກ່າວຄຳປາໄສ.

ທ່ານເວີ້ຍເຟີ້ງເຮີກ່າວວ່າ, ປັດຈຸບັນ, ສັນຕິພາບແລະການພັດທະນາຂອງໂລກໄດ້ຜະເຊີນໜ້າກັບສິ່ງທ້າທາຍສຳຄັນ, ການສ້ງປະຊາຄົມຮ່ວມຊາຕາກຳຂອງມວນມະນຸດແມ່ນການຄັດເລືອກທີ່ຖືກຕ້ອງແລະແມ່ນທາງອອກ, ປະເທດຕ່າງໆຄວນສາມັກຄີກັນ, ບໍ່ຄວນແບ່ງແຍກກັນ, ຄວນມີຄວາມເປັນທຳ, ບໍ່ຄວນໃຊ້ອຳນາດບາດໃຫຍ່, ຄວນເປີດປະຕູ, ບໍ່ຄວນປິດປະຕູ, ຄວນໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ, ບໍ່ຄວນສະແຫວງຫາແຕ່ຜົນປະໂຫຍດຕົວເອງ, ຄວນຮ່ວມກັນສ້າງແລະອະນຸລັກລະບຽບໃນພາກພື້ນທີ່ເອົາໃຈໃສ່ຄວາມຮຽກຮ້ອງຕ້ອງການຂອງຝ່າຍຕ່າງໆ ແລະສອດຄ່ອງກັບຜົນປະໂຫຍດຂອງຝ່າຍຕ່າງໆ.

ກອງປະຊຸມຄັ້ງນີ້ໄດ້ເປິກສາຫາລື ແລະໄດ້ຜ່ານ “ຖະແຫຼງການຮ່ວມແຫ່ງກອງປະຊຸມເປີດກວ້າງຂອງລັດຖະມົນຕີປ້ອງກັນປະເທດອາຊຽນ ກ່ຽວກັບການເພີ່ມທະວີຄວາມສາມັກຄີແລະການຮ່ວມມື, ຮ່ວມກັນສ້າງຄວາມກົມກຽວກັນແລະຄວາມໝັ້ນຄົງ”.

ໃນໄລຍະຈັດປະຊຸມ, ທ່ານເວີ້ຍເຟີ້ງເຮີ ໄດ້ພົບປະກັບລັດຖະມົນຕີກະຊວງປ້ອງກັນປະເທດອາເມຣິກາ, ຫວຽດນາມ, ລາວ, ແລະຮອງລັດຖະມົນຕີກະຊວງປ້ອງກັນປະເທດຣັດເຊຍ, ເພື່ອແລກປ່ຽນຄວາມເຫັນກ່ຽວກັບການເພີ່ມທະວີການຮ່ວມມືຂອງກອງທັບ ພ້ອມດ້ວຍບັນຫາທີ່ມີຄວາມສົນໃຈຮ່ວມກັນ.

ວັນທີ 22 ພະຈິກນີ້ ທີມງານໂຄງການບັນທືກຄວາມຮັກແພງຕາມເສັ້ນທາງລົດໄຟລາວ-ຈີນ ໄດ້ເຂົ້າຢ້ຽມພົບປະກັບອຳນາດການປົກຄອງເມືອງວັງວຽງ ແຂວງວຽງຈັນ ແລະ ເຄື່ອນໄຫວເຮັດວຽກຢູ່ສະຖານນີວັງວຽງ ເຊິ່ງໄດ້ຮັບການຕ້ອນຮັບຈາກທ່ານສຸວຽງທອງ ວົງຈໍາປາ ຮອງເຈົ້າເມືອງໆ ວັງວຽງ ພ້ອມດ້ວຍບັນດາຫົວໜ້າຂະແໜງການຕ່າງໆ ຢ່າງອົບອຸ່ນ.

ທ່ານ ທອງໃບ ໂພທິສານ ຕາງໜ້າໂຄງການໄດ້ກ່າວບຂອບໃຈຕໍ່ການຕ້ອນຮັບຂອງການນໍາເມືອງວັງວຽງ ພ້ອມທັງໄດ້ລາຍງານຈຸດປະສົງການເຄື່ອນໄຫວຂອງໂຄງການໃຫ້ການນໍາເມືອງວັງວຽງໄດ້ຮັບຊາບ.

ທ່ານຮອງເຈົ້າເມືອງໄດ້ສະແດງຄວາມຂອບໃຈມາຍັງໂຄງການບັນທືກຄວາມຮັກແພງຕາມເສັ້ນທາງລົດໄຟລາວ-ຈີນທີ່ໄດ້ເຄື່ອນໄຫວລາຍງານຄວາມຈິງ ແລະ ໂຄສະນາຕາມເສັ້ນທາງລົດໄຟຢູ່ສະຖານນີກາສີ ແລະ ວັງວຽງ. ພ້ອມດຽວກັນນັ້ນທ່ານຮອງເຈົ້າເມືອງ, ຫົວໜ້າຫ້ອງວ່າການຖະແຫຼງຂ່າວ, ວັດທະນາທໍາ ແລະ ທ່ອງທ່ຽວເມືອງ ແລະ ຂະແໜງການຕ່າງໆ ກໍ່ໄດ້ຂຶ້ນນໍາສະເໜີສະພາບລວມຂອງເມືອງວັງວຽງ ລວມເຖິງຂໍ້ມູນຕ່າງໆ ກ່ຽວກັບເສັ້ນທາງລົດໄຟລາວ-ຈີນ ໃນເມືອງວັງວຽງ.

ໃນໄລຍະເຄື່ອນໄຫວຢູ່ເມືອງວັງວຽງ ຄື: ໃນວັນທີ 23 ພະຈິກ ທີມງານບັນທືກຄວາມຮັກແພງຕາມເສັ້ນທາງລົດໄຟລາວ-ຈີນໄດ້ເດີນທາງໄປເຄື່ອນໄຫວເກັບກັບຂໍ້ມູນຢູ່ສະຖານນີວັງວຽງ ແລະ ສະຖາກາສີຕື່ມອີກ.

ທິມງານໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນ ທີ່ເຄື່ອນໄຫວຮ່ວມກັນລະຫວ່າງສະມາຄົມນັກປະພັນລາວ ນຳໂດຍ ທ່ານ ທອງໃບ ໂພທິສານ ປະທານສະມາຄົມ ແລະ ສະຖານີວິທະຍຸໂທລະພາບສູນກາງຈີນ (CMG) ປະຈໍາລາວ ນຳໂດຍທ່ານ ນາງ ແສງແກ້ວ ຫົວໜ້າ CMG ປະຈໍາລາວພ້ອມທີມງານ 30 ທ່ານ, ປະກອບມີນັກປະພັນ,​ ນັກແຕ້ມ,​ ຊ່າງພາບ ແລະ ນັກຂ່າວ CMG ໄດ້ອອກເດີນທາງເຄື່ອນໄຫວເກັບກໍາຂໍ້ມູນຢູ່ບັນດາແຂວງທີ່ມີລົດໄຟແລ່ນຜ່ານນັບແຕ່ວັນທີ 8 ພະຈິກ ເປັນຕົ້ນມາ ແລະ ໄດ້ເດີນທາງກັບຄືນສູ່ນະຄອນຫຼວງວຽງຈັນ ເມື່ອວັນທີ 23 ພະຈິກນີ້ດວ້ຍສໍາເລັດ.

ຕະຫຼອດໄລຍະການເຄື່ອນໄຫວທິມງານໂຄງການໄດ້ເລີ່ມເກັບກໍາຂໍ້ມູນຢູ່ 4 ແຂວງ ແລະ 1​ ນະຄອນຫຼວງ ຂອງສປປ ລາວ ໂດຍເລີ່ມຈາກນະຄອນຫຼວງວຽງຈັນ ທີ່ສູນສ້ອມແປງ ແລະ ບໍາລຸງຮັກສາຫົວຈັກລົດໄຟວຽງຈັນໃຕ້ (ດົງໂພສີ) ແລະ ບໍລິສັດກໍ່ສ້າງທາງລົດໄຟເລກ 2. ຫຼັງຈາກນັ້ນ, ທີມງານກໍເດີນທາງດ້ວຍລົດໄຟລາວ-ຈີນໄປແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ, ແຂວງວຽງຈັນ ພ້ອມທັງເຂົ້າຢ້ຽມຢາມການນໍາ ແລະ ຮັບຟັງການລາຍງານສະພາບຂອງແຕ່ລະແຂວງ ແລະພະແນກການທີ່ກ່ຽວຂ້ອງກ່ອນລົງເຄື່ອນໄຫວເກັບກໍາຂໍ້ມູນທີ່ປິ່ນອ້ອມກັບລົດໄຟລາວ-ຈີນ. ສໍາລັບແຂວງຫຼວງນໍ້າທາທີມງານໄດ້ໄປສໍາພາດຜູ້ປະກອບການລົດຂົນສົ່ງໂດຍສານປະຈໍາສະຖານີນາເຕີຍ, ພະນັກງານລາວ ແລະ ຈີນ ທີ່ເຮັດວຽກຢູ່ສະຖານີ, ບ້ານຈັດສັນນາເຕີຍ ແລະ ເດີນທາງໄປບໍ່ເຕ່ນສໍາພາດປະຊາຊົນ ແລະ ສໍາພາດຫົວໜ້າສະຖານີ ພ້ອມພະນັກງານຢູ່ທີ່ສະຖານີດັ່ງກ່າວ.

ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງຫຼວງນໍ້າທາໄດ້ຕີລາຄາສູງຕໍ່ການລົງເຄື່ອນໄຫວ ແລະ ການຮ່ວມເຮັດວຽກກັບໂຄງການບັນທຶກຄວາມຮັກແພງຕາມເສັ້ນທາງລົດໄຟລາວ-ຈີນວ່າ: ເປັນໂຄງການທີມີຄວາມໝາຍສໍາຄັນເປັນຢ່າງຍິ່ງ ເປັນການເສີມສ້າງສາຍພົວພັນມິດຕະພາບທີ່ເປັນມູນເຊື້ອ ແລະ ການພົວພັນຮ່ວມມືຮອບດ້ານໝັ້ນຄົງຍາວນານຕາມທິດ 4 ດີຂອງຄູ່ຮ່ວມຊາຕາກໍາລາວ-ຈີນຢ່າງແທ້ຈິງ.

ສໍາລັບແຂວງອຸດົມໄຊ, ທີມງານໄດ້ສໍາພາດພະນັກງານທີ່ນໍາໃຊ້ລົດໄຟ, ຫັດຖະກໍາໄຕລື້, ປະຊາຊົນຢຸ່ບ້ານນາຄົກ ເມືອງງາ, ບ້ານຈັດສັນໃໝ່ທີ່ຖືກຜົນກະທົບ ແລະ ໄດ້ຮັບການຊວ່ຍເຫຼືອຈາກໂຄງການກໍ່ສ້າງທາງລົດໄຟລາວ-ຈີນ, ກະສິກໍາສົ່ງເສີມອາຊີບໃຫ້ແກ່ປະຊາຊົນ, ການປູກມອນລ້ຽງມ້ອນສົ່ງຂາຍໃຫ້ສປຈີນ ທີ່ສ້າງວຽກເຮັດງານທໍາໃຫ້ແກ່ປະຊາຊົນ ແລະ ຍັງໄດ້ໄປສໍາພາດພະນັກງານລາວ-ຈີນ ຢູ່ທີ່ສະຖານີເມືອງໄຊ ແລະສະຖານີລົດໄຟເລກ 2 ຕາມຄວາມຮັກແພງລາວ-ຈີນ ລະຫວ່າງຄົນຈີນກັບຄົນລາວ. ທ່ານ ແສງຈັນ ສຸກະເສມ ນັກປະພັນລາວໄດ້ກ່າວວ່າ: ປະທັບໃຈທີ່ທິມງານໂຄງການໄດ້ລົງໃກ້ຊິດຕິດແທດກັບປະຊາຊົນ,ໄດ້ສຳພັດກັບເຕັກນິກວິຊາການທີ່ກ່ຽວຂ້ອງກັບແລວທາງລົດໄຟ ເປັນການເປີດໂອກາດໃຫ້ນັກຂຽນໄດ້ມີຂໍ້ມູນຫຼາຍຢ່າງເພື່ອນໍາໄປຂຽນເປັນບົດກະວີ, ບົດເລື່ອງສັ້ນ, ນະວະນິຍາຍໃນອະນາຄົດ ແລະ ຕະຫຼອດການເດີນທາງກໍໄດ້ແຮງບັນດານໃຈເລື່ອງສັ້ນມີຊື່ວ່າ: ດອກໄມ້ສອງແຜ່ນດິນ.

ນອກຈາກນີ້, ທີມງານກໍໄດ້ໄປສໍາພາດປະຊາຊົນຢູ່ບ້ານຈັດສັນໃໝ່ ບ້ານບວມອໍ້ ເມືອງຊຽງເງິນ ແຂວງຫຼວງພະບາງ, ການທ່ອງທ່ຽວຕາດກວາງຊີ, ຕາດຮ້ອຍຄົວ, ຫັດຖະກໍາຜານົມ ພາຍຫຼັງມີລົດໄຟເຮັດໃຫ້ການທ່ອງທ່ຽວຫຼວງພະບາງມີບັນຍາ ກາດຟົດຟື້ນ. ໃນໂອກາດນີ້, ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທໍາ ແລະທ່ອງທ່ຽວຍັງໄດ້ເດີນທາງມາແຂວງຫຼວງພະບາງ ເພື່ອຢ້ຽມຢາມຖາມຂ່າວ ແລະ ໃຫ້ກໍາລັງໃຈແກ່ບັນດານັກປະພັນ, ນັກແຕ້ມ, ຊ່າງພາບ ແລະ ນັກຂ່າວ CMG ປະຈໍາລາວ. ຫຼັງຈາກນັ້ນ, ທີມງານກໍສືບຕໍ່ເດີນທາງໄປເກັບກໍາຂໍ້ມູນຢູ່ເມືອງວັງວຽງ ແຂວງວຽງຈັນ ແລະ ໄດ້ຮັບການຕ້ອນຮັບຈາກຄະນະນຳເມືອງວັງວຽງ ແລະ ໄດ້ໄປເກັບກໍາຂໍ້ມູນສໍາພາດພະນັກງານເຮັດວຽກຢູ່ສະຖານີກາສີ ກ່ອນເດີນທາງກັບນະຄອນຫລວງວຽງຈັນ.

ທ່ານ ທອງໃບ ໂພທິສານ ປະທານສະມາຄົມນັກປະພັນລາວກ່າວວ່າ: ການເດີນທາງຕະຫຼອດໄລຍະຕາມເສັ້ນທາງລົດໄຟລາວ-ຈີນ ທີ່ຜ່ານມາໄດ້ໃຫ້ຄວາມຮູ້, ບົດຮຽນ ແລະ ສິ່ງໃໝ່ໆ ໃຫ້ແກ່ນັກປະພັນ ນັກກະວີ ເພື່ອນໍາໄປປະດິດຄິດແຕ່ງເປັນບົດປະພັນວັນນະຄະດີ ການຈັດຕັ້ງປະຕິບັດດັ່ງກ່າວເກີດໝາກຜົນໃນໄລຍະຕົ້ນ ເຊິ່ງຈະລໍຖ້າການປະພັນບົດຕ່າງໆ ອອກມາ ແລະ ຈັດພິມເປັນເຫຼັ້ມໃນຕໍ່ໜ້າ.

ຄະນະສະຫະພັນນັກຮົບເກົ່າ ກອງພັນໃຫຍ່ 335 ກອງພົນ 324 ປະຈຳແຂວງເຫງະອານ ສສ ຫວຽດນາມ

ຊຶ່ງນຳໂດຍ ສະຫາຍ ພັອ ເຈິ່ນ ວັນ ນາມ ຫົວໜ້າຄະນະສະຫະພັນນັກຮົບເກົ່າ ກອງພັນໃຫຍ່ 335 ກອງພົນ 324 ພ້ອມດ້ວຍຄະນະ ໄດ້ເດີນທາງມາຢ້ຽມຢາມສະໜາມຮົບເກົ່າ ຢູ່ແຂວງໄຊສົມບູນ ໃນຕອນເຊົ້າຂອງວັນທີ 23 ພະຈິກ 2022 ນີ້ ຢູ່ທີ່ຫ້ອງວ່າການແຂວງ ໂດຍການຕ້ອນຮັບຂອງ ສະຫາຍ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ສະຫາຍ ພັທ ສຸວັນລໍ່ ເຍ່ຍປໍ ປະທານສະຫະພັນນັກຮົບເກົ່າແຂວງໄຊສົມບູນ, ມີບັນດາຮອງສະຫະພັນນັກຮົບເກົ່າ, ຮອງຫົວໜ້າຫ້ອງວ່າການແຂວງ ເຂົ້າຮ່ວມ.

ໂອກາດນີ້ ສະຫາຍ ພອຍຄຳ ຮຸ່ງບຸນຍວງ ໄດ້ສະແດງຄວາມຕ້ອນຮັບ ຊຶ່ງສະຫາຍຮູ້ສຶກດີໃຈ ທີ່ໄດ້ຕາງໜ້າໃຫ້ອົງຄະນະພັກ, ສະພາປະຊາຊົນ, ອົງການປົກຄອງ, ກຳລັງປະກອບອາວຸດ ແລະ ປະຊາຊົບັນດາເຜົ່າ ແຂວງໄຊສົມບູນ ຕ້ອນຮັບສະຫາຍ ພັອ ເຈິ່ນ ວັນ ນາມ ຫົວໜ້າຄະນະສະຫະພັນນັກຮົບເກົ່າ ກອງພັນໃຫຍ່ 335 ກອງພົນ 324 ພ້ອມດ້ວຍຄະນະ ທີ່ມາຢ້ຽມຢາມສະໜາມຮົບເກົ່າຢູ່ແຂວງໄຊສົມບູນ, ຄືດັ່ງທີ່ພວກເຮົາຮູ້ນຳກັນແລ້ວວ່າ: ສາຍພົວພັນສາມັກຄີພິເສດ, ມິດຕະພາບທີ່ຍິ່ງໃຫຍ່ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ປະຊາຊົນສອງຊາດ ລາວ-ຫວຽດນາມ ແມ່ນສາຍພົວພັນທີ່ຍິ່ງໃຫຍ່ ທີ່ຫາຍາກທີ່ສຸດ ທີ່ເພີມພູນຄູນສ້າງ ຮ່ວມກັນຜ່ານຜ່າແຕ່ລະບັ້ນຮົບ ຕ້ານສັດຕູຕົວດຽວກັນ ເພື່ອປົດປ່ອຍປະເທດຊາດຂອງພວກເຮົາ ຊຶ່ງມາຈາກຢາດເຫື່ອ, ເລືອດເນື້ອ ຂອງບັນດາສະຫາຍທະຫານອາສາສະໜັັັກ ແລະ ຊ່ຽວຊານການທະຫານ. ໃນທາມກາງບັນຍາກາດອັນພິເສດ ສອງປະເທດທີ່ສະເຫລີມສະຫລອງ 2 ວັນປະຫວັດສາດ, ປີສາມັກຄີມິດຕະພາບ ລາວ-ຫວຽດນາມ, ການມາຢ້ຽມຢາມຖາມຂ່າວໃນຄັ້ງນີ້ ແມ່ນເປັນການສືບຕໍ່ຢັ້ງຢືນຄວາມຮັກແພງອັນລໍ້າຄ່າ, ບໍລິສຸດຜຸດຜ່ອງ, ຄວາມສາມັກຄີພິເສດ, ມິດຕະພາບທີ່ສວຍງາມ ລະຫວ່າງ ລາວ-ຫວຽດນາມ ໃຫ້ຍືນຍາວ ແລະ ພັດທະນາຕະຫລອດໄປ. ຈາກນັ້ນ ສະຫາຍ ພັອ ເຈິ່ນ ວັນ ນາມ ຫົວໜ້າຄະນະສະຫະພັນນັກຮົບເກົ່າ ກອງພັນໃຫຍ່ 335 ກອງພົນ 324 ໄດ້ຂຶ້ນກ່າວຄຳຢ້ຽມຢາມຖາມຂ່າວ ແລະ ຂໍຂອບໃຈຢ່າງສູງມາຍັງການຕ້ອນຮັບອັນອົບອຸ່ນ, ໃນການມາຢ້ຽມຢາມ ແຂວງໄຊສົມບູນ ກໍຄືມາບ້ານເກີດເມືອງນອນຫລັງທີ 2 ສະໄໝໄດ້ຖືກມອບໝາຍໃຫ້ປະຕິບັດໜ້າທີ່ສາກົນຢູ່ປະເທດລາວ ລ້ວນແຕ່ໄດ້ຮັບການຊ່ວຍເຫລືອ, ເບີ່ງແຍງ ທຸກດ້ານຈາກກອງທັບ ແລະ ປະຊາຊົນລາວ ເບີ່ງທະຫານຫວຽດນາມຄືກັນກັບອ້າຍນ້ອງລູກຫລານຮ່ວມອຸທອນດຽວກັນ. ຈາກນັ້ນ ຄະນະສະຫະພັນນັກຮົບເກົ່າ ກອງພັນໃຫຍ່ 335 ກອງພົນ 324 ແຂວງເຫງະອານ ສສ ຫວຽດນາມ ໄດ້ເຂົ້າໄຫວ້ອາໄລຢູ່ທີ່ອະນຸສາວະລີຮ່ວມສຳພັນສູ້ຮົບ ລາວ-ຫວຽດນາມ ເພື່ອລະນຶກເຖິງຄຸນງາມຄວາມດີຂອງອາສາສະໜັກຫວຽດນາມ ແລະ ໄດ້ເດີນທາງທ່ຽວຊົມ ຖຳ້ເຈົ້າອະນຸວົງ ແລະ ສະຖານທີ່ຕ່າງໆທີ່ສຳຄັນຂອງແຂວງອີກດ້ວຍ.

#Medialaos

#xaysomboun

ບກ: ຄຳສາວ ເລືອງຄຳທິບ

ພາບ-ຂ່າວ: ສີລິພອນ ສົງຄຳ

ໃນຕອນເຊົາວັນທີ 23 ພະຈິກ 2022 ທີ່ຫ້ອງປະຊຸມພະແນກ ຖວທ ແຂວງສະຫວັນນະເຂດ ໄດ້ມີກອງປະຊຸມປະເມີນການຕິດຕາມການ ສ້າງ ແລະ ການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍໃນຂົງເຂດຖະແຫຼ່ງຂ່າວວັດທະທໍາແລະທ່ອງທ່ຽວ ໂດຍການເປັນປະທານ ຂອງທ່ານ ໂພສີສ້ອຍ ກຸທິລາດ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ , ທ່ານ ສົມກຽດຕິສັກ ກິ່ງສະດາ ຮອງຫົວໜ້າຫ້ອງການກະຊວງ ຖທວ ມີບັນດາຫົວໜ້າຫ້ອງການ , ຂະແໜງການພາຍໃນພະແນກ ຖວທ ແຂວງ ແລະ ສາມເມືອງເຂົ້າຮ່ວມ.

ທ່ານ ສົມກຽດຕິສັກ ກິ່ງສະດາ ຮອງຫົວໜ້າຫ້ອງການກະຊວງ ຖທວ ໄດ້ກ່າວເປີດກອງປະຊຸມວ່າ: ກອງປະຊຸມ ການປະເມີນ, ຕິດຕາມການສ້າງ ນິຕິກໍາໃຕ້ກົດໝາຍ ແລະ ການຈັດຕັ້ງປະຕິບັດກົດໝາຍໃນຂົງເຂດ ຖວທ ຂອງພວກເຮົາ ມີຈຸດປະສົງ ເພື່ອໃຫ້ການຈັດຕັ້ງປະຕິບັດ ນິຕິກໍາໃນ ຂົງເຂດ ຖວທ ພາຍໃນແຂວງ, ການແກ້ໄຂ ປະກົດການຫຍໍ້ທໍ້ ໃນຂົງເຂດ ຖວທ, ໃຫ້ເປັນຮູບປະທໍາ, ສະນັ້ນຈຶ່ງຮຽກຮ້ອງບັນດານທ່ານ ເອົາໃຈໃສ່ສຶກສາຄົ້ນຄວ້າ, ສົນທະນາແລກປ່ຽນຄວາມຄິດຄວາມເຫັນ ເຊິ່ງກັນ ແລະ ກັນຢ່າງເລິກເຊິງ ຕໍ່ກັບຂັ້ນຕອນການສ້າງນິຕິກໍາໃຕ້ກົດໝາຍ ເພື່ອນໍາໄປຜັນຂະຫຍາຍ ແລະ ເປັນບ່ອນອີງໃນການຈັດຕັ້ງປະຕິບັດເຂົ້າໃນວຽກງານ ໃຫ້ມີຄວາມຖືກຕ້ອງ, ສອດຄ່ອງ ແລະ ຮັບປະກັນ.

ຈາກນັນ ທ່ານ ໂພສີສ້ອຍ ກຸທິລາດ ຫົວໜ້າພະແນກ ຖວທ ແຂວງກໍໄດ້ງານສະພາບລວມ ແລະ ການຈັດຕັ້ງປະຕິບັດນິຕິກໍາໃນຂົງເຂດ ຖວທ ແຂວງວ່າ: ໂດຍລວມການເຄື່ອນໄຫວວຽກງານທາງດ້ານວິຊາສະເພາະກໍ່ຄືວຽກງານທີ່ຕິດພັນຢູ່ພາຍໃຕ້ການຄຸ້ມຄອງຂອງຂົງເຂດ ຖວທ ແຂວງ ແມ່ນຖືເອົາບັນດາກົດໝາຍ ແລະ ນິຕິກໍາຕ່າງໆເປັນບ່ອນອີງໃນການຄົ້ນຄວ້າ ແລະ ການຈັດຕັ້ງປະຕິບັດ ເພື່ອໃຫ້ສອດຄ່ອງ ແລະ ຕອບໂຕ້ການບິດເບື່ອນຂອງພວກບໍ່ຫວັງດີ, ການປົກປ້ອງສິດຜົນປະໂຫຍດຂອງພາກລັດຈາກຜູ້ປະກອບການທີ່ສວຍໂອກາດ ການຈັດສັນລະບຽບຂອງສັງຄົມໃຫ້ມີຄວາມສະຫງົບ, ການປົກປັກຮັກສາວັດຖຸບູຮານ ແລະ ຮີດຄອງປະເພນີອັນດີງາມຂອງຊາດ, ການປົກປັກຮັກສາແຫຼ່ງທ່ອງທ່ຽວດ້ານປະຫວັດສາດ ,ທໍາມະຊາດ ແລະ ວັດທະນະທໍາ ,ຜ່ານມາ ທາງພະແນກ ຖວທ ແຂວງ ກໍ່ໄດ້ສ້າງນິຕິກໍາໃຕ້ກົດໝາຍ ຈໍານວນ 2 ສະບັບຄື: ຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 0603/ຈຂ ວ່າດ້ວຍການອະນຸລັກ, ຄຸ້ມຄອງ ແລະ ບໍລິການເຂດຕົວເມືອງເກົ່າ ເທສະບານນະຄອນໄກສອນພົມວິຫານ, ຂໍ້ຕົກລົງຂອງທ່ານເຈົ້າແຂວສະຫວັນນະເຂດສະບັບເລກທີ 2142/ຈຂ ວ່າດ້ວຍການຄຸ້ມຄອງບໍລິການຮ້ານອາຫານ,ຮ້ານກິນດື່ມ ແລະ ຮ້ານບັນເທີງ , ບັນດາກົດໝາຍ ແລະ ນິຕິກໍາຕ່າງໆນອກຈາກຈະນໍາໃຊ້ເຂົ້າໃນການເຄື່ອນໄຫວໃນຂົງເຂດ ຖວທ ແລ້ວ ຍັງຕິດພັນເຄື່ອນໄຫວ ວຽກງານວິຊາການຂອງຂົງເຂດ ຖວທ ສາມາດຊອກຮູ້ດ້ານວິຊາການ ແລະ ປະສົບການໃນການເຄື່ອນໄຫວວຽກງານອື່ນໆໄປພ້ອມໆກັນ, ໃນຜ່ານມາກໍຍັງມີຂໍ້ສະດວກ ຄື: ພະນັກງານວິຊາການສາມາດໃຊ້ເປັນບ່ອນອີງໃຫ້ແກ່ການເຄື່ອນໄຫວຄຸ້ມຄອງ, ຕິດຕາມ, ກວດກາຂອງແຕ່ລະຂົງເຂດວຽກງານ, ທຸກພາກສ່ວນມີການເຄື່ອນໄຫວທີ່ຕິດພັນ ມີຄວາມເປັນເອກະພາບ ແລະ ໃຫ້ການຮ່ວມມືໃນການຈັດຕັ້ງປະຕິບັດ, ເປັນເງື່ອນໄຂທີ່ເຮັດໃຫ້ຜູ້ມາເຄື່ອນໄຫວ ແລະ ຜູ້ປະກອບການຮັບຮູ້ແລະ ປະຕິບັດລະບຽບກົດໝາຍທີ່ກໍານົດໄວ້, ນອກນີ້ກໍມີຂໍ້ຫຍຸ້ງຍາກເຊັ່ນ: ງົບປະມານບໍ່ພຽງພໍເພື່ອນໍາໃຊ້ເຂົ້າໃນການຈັດຕັ້ງເຜີຍແຜ່ນິຕິກໍາເຮັດໃຫ້ການນໍາໃຊ້ ແລະ ການເຜີຍແຜ່ນິຕິກໍາຕ່າງໆຢູ່ໃນວົງແຄບ, ບາງນິຕິກໍາ ການຈັດຕັ້ງປະຕິບັດ ມີການພົວພັນກັບຫຼາຍພາກສ່ວນຈຶ່ງບໍ່ສາມາດນໍາໃຊ້ມາດຕາການທີ່ເດັດຂາດໄດ້.

#savannakhet#medialaos

ວັນທີ 23 ພະຈິກ 2022 ນີ້, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບ ທ່ານ ນາງ ອີນາ ມາຈູລໍນິແຕ (Ina Marčiulionytė) ເອກອັກຄະລັດຖະທູດ, ຫົວໜ້າຄະນະຫ້ອງການ ຜູ້ຕາງໜ້າສະຫະພາບ ເອີຣົບ ປະຈໍາ ສປປ ລາວ ເພື່ອປຶກສາຫາລືກ່ຽວກັບການເຄື່ອນໄຫວ, ຮ່ວມມື ແລະ ຊ່ວຍ ເຫລືອ ລະຫວ່າງ ສປປ ລາວ ແລະ ສະຫະພາບ ເອີຣົບ ໃນໄລຍະຜ່ານມາ ແລະ ການຮ່ວມມືໃນອະນາຄົດ.

ໂອກາດນີ້, ທ່ານ ມະໄລທອງ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຂອບໃຈທີ່ ສະຫະພາບ ເອີຣົບ ໄດ້ໃຫ້ການຮ່ວມມື ແລະ ຊ່ວຍເຫລືອຕໍ່ ສປປ ລາວ ໃນຫລາຍຂະແໜງການ ລວມທັງການຊຸກຍູ້ສົ່ງເສີມການຄ້າສອງຝ່າຍ ແລະ ການລົງທຶນ ໃນ ລາວ ຫລາຍຂຶ້ນ ໂດຍສະເພາະ ໄດ້ໃຫ້ການສະໜັບສະໜູນ, ຮ່ວມມື ແລະ ຊ່ວຍເຫລືອ ຂະແໜງອຸດສາຫະກໍາ ແລະ ການຄ້າ ໂດຍຜ່ານຫລາຍໂຄງການ ເປັນຕົ້ນ ໂຄງການພັດທະນາການຄ້າ (TDF) ໄລຍະ 1 ແລະ 2 ແລະ ໂຄງການ ARISE Plus Laos. ພ້ອມນັ້ນ, ທ່ານ ມະໄລທອງ ກົມມະສິດ ຍັງໄດ້ສະເໜີ ໃຫ້ສະຫາພາບເອີຣົບ ສະໜັບໜູນໃຫ້ແກ່ການວຽກງານ ຫລື ກິດຈະກໍາພັດທະນາວຽກງານການເຕີບໂຕສີຂຽວ, ຊັບພະຍາກອນມະນຸດ ພາຍໃຕ້ແຜນພັດທະ ນາເສດຖະກິດ-ສັງຄົມແຫ່ງຊາດ (NSEDP) 2021-2025 ຂອງ ສປປ ລາວ ທີ່ຕິດພັນກັບຂະແໜງ ອຸດສາຫະກຳ ແລະ ການຄ້າ, ສະໜັບສະໜູນການພັດທະນາ ແລະ ປັບປຸງພາກທຸລະກິດເອກະຊົນລາວ ໃຫ້ມີບົດບາດສຳຄັນໃນການສົ່ງເສີມ ແລະ ຊຸກຍູ້ຄວາມຫລາກຫລາຍດ້ານເສດຖະກິດ, ສ້າງວຽກເຮັດງານທຳ ແລະ ຫລຸດຜ່ອນຄວາມທຸກຍາກ ຂອງ ສປປ ລາວ.

ທ່ານ ນາງ ອີນາ ມາຈູລໍນິແຕ ກໍໄດ້ສະແດງຄວາມຂອບໃຈມາຍັງ ທ່ານ ມະໄລທອງ ກົມມະສິດ ທີ່ໄດ້ໃຫ້ຕ້ອນຮັບໃນຄັ້ງນີ້, ພ້ອມທັງ ຢືນຢັນຈະສືບຕໍ່ໃຫ້ການສະໜັບສະໜູນ, ຊ່ວຍເຫລືອແກ່ ສປປ ລາວ ໃນທຸກຂະແໜງການທີ່ກ່ຽວຂ້ອງ ຕື່ມອີກ, ພ້ອມທັງ ອວຍພອນໃຫ້ທ່ານ ລັດ ຖະມົນຕີ ຈົ່ງປະສົບຜົນສຳເລັດໃນການປະຕິບັດໜ້າທີ່ຕົນ ເພື່ອເຮັດໃຫ້ວຽກງານດ້ານການຄ້າ, ການລົງທຶນ ຢູ່ ສປປ ລາວ ໄດ້ຮັບການພັດທະນາຂຶ້ນໄປເລື້ອຍໆ.

ຂ່າວ-ພາບ: ທະນູທອງ

ພິທີເຊັນບົດບັນທຶກຄວາມເຂົ້າໃຈທາງດ້ານວຽກງານປະກັນສັງຄົມ ລະຫວ່າງ ອົງການປະກັນສັງຄົມແຫ່ງຊາດລາວ ແລະ ປະກັນສັງຄົມ ຫວຽດນາມ ຈັດຂຶ້ນໃນວັນທີ 22 ພະຈິກ 2022, ທີ່ແຂວງຫລວງພະບາງ ໂດຍການຮ່ວມລົງນາມ ລະຫວ່າງ ທ່ານ ປະເດີມພອນ ສົນທະນີ ຮອງລັດຖະ ມົນຕີ ກະຊວງແຮງງານ ແລະ ສະຫວັດີການສັງຄົມ(ຮສສ) ແລະ ທ່ານ ດາວ ຫວຽດ ແອງ ຮອງຜູ້ອຳນວຍການ ປະກັນສັງຄົມ ຫວຽດນາມ.

ໃນບົດບັນທຶກຄວາມເຂົ້າໃຈຄັ້ງນີ້, ສອງຝ່າຍເຫັນດີເອກະພາບ ສືບຕໍ່ຮ່ວມມືແລກປ່ຽນ ແລະ ເພື່ອພັດທະນາວຽກງານປະກັນສັງຄົມໃນ 5 ປີຕໍ່ໜ້າ 2022-2025 ເປັນຕົ້ນ ການແລກປ່ຽນບົດຮຽນທາງດ້ານວິຊາການ ກ່ຽວກັບວຽກງານກວດກາປະກັນສັງຄົມ; ແລກປ່ຽນບົດຮຽນທາງດ້ານວິຊາການກ່ຽວກັບວຽກຂໍ້ມູນຂ່າວສານເຕັກໂນໂລຊີ (IT); ແລກປ່ຽນບົດຮຽນກ່ຽວກັບວຽກປະຊາສໍາພັນ (ປະ ກັນສັງຄົມຫວຽດນາມ ສະເໜີລົງປະຊາສຳພັນຕົວຈິງກັບປະກັນສັງຄົມລາວ); ການແລກປ່ຽນບົດຮຽນ ກ່ຽວກັບ ການບໍລິການປະກັນສັງຄົມຜ່ານລະບົບອອນລາຍ (online); ການແລກປ່ຽນບົດຮຽນກ່ຽວກັບວິທີການ, ຮູບການຂົນຂວາຍເອົາຜູ້ປະກັນຕົນແບບສະໝັກໃຈ ໃຫ້ເຂົ້າສູ່ລະບົບປະກັນສັງຄົມ; ການແລກປ່ຽນບົດຮຽນກ່ຽວກັບການບໍລິການທີ່ທັນສະໄໝ ໂດຍຜ່ານແອັບພຣີເຄຊັນເທິງມືຖື; ການແລກ ປ່ຽນບົດຮຽນຂອງຄະນະສະພາບໍລິຫານອົງການປະກັນສັງຄົມແຫ່ງຊາດລາວ; ຈັດກອງປະຊຸມທົບທວນ ແລະ ປະເມີນການຈັດຕັ້ງປະຕິບັດກິດຈະກໍາ ໄລຍະ 2022-2025.

ທ່ານ ປະເດີມພອນ ສົນທະນີ ກ່າວວ່າ: ໃນໄລຍະຜ່ານມາ, ການຮ່ວມມືສອງຊາດ ລະຫວ່າງ ລາວ ແລະ ຫວຽດນາມ ແມ່ນດຳເນີນໄປຢ່າງໃກ້ສິດ, ສະໜິດສະໜົມ ໂດຍສະເພາະ ໃນຂົງເຂດວຽກງານປະກັນສັງຄົມ ແມ່ນໄດ້ມີການປະສານສົມທົບເຊິ່ງກັນ ແລະ ກັນຢ່າງເປັນປົກກະຕິ, ເຖິງວ່າໄລຍະຜ່ານມາ ພວກເຮົາຈະພົບກັບບັນຫາຄວາມຫຍຸ້ງຍາກ ໂດຍສະເພາະ ການລະບາດຂອງພະຍາດໂຄວິດ-19, ແຕ່ທັງສອງຝ່າຍໄດ້ເອົາໃຈໃສ່ປະຕິບັດວຽກງານຮ່ວມກັນ ດ້ວຍຄວາມຮັບຜິດຊອບສູງ ໂດຍໄດ້ພ້ອມກັນເຄື່ອນໄຫວກິດຈະກຳແລກປ່ຽນໄປຢ້ຽມຢາມ, ປຶກສາຫາລືວຽກງານຕົວຈິງ ເພື່ອແລກປ່ຽນບົດຮຽນຮ່ວມກັນຕາມແຜນປະຕິບັດງານໃນບົດບັນທຶກຄວາມເຂົ້າໃຈທີ່ໄດ້ລົງນາມຮ່ວມກັນແລ້ວນັ້ນ. ແຕ່ເຖິງຢ່າງໃດກໍຕາມ ຄຽງຄູ່ກັບດ້ານສໍາເລັດທີ່ສອງຝ່າຍຍາດມາໄດ້ ກໍປາສະຈາກບໍ່ໄດ້ ບາງຂໍ້ຄົງຄ້າງທີ່ສອງຝ່າຍຈະໄດ້ຮ່ວມກັນສຶບຕໍ່ຈັດຕັ້ງປະຕິບັດ, ກະຊວງ ຮສສ ເຊື່ອໝັ້ນວ່າ ການສືບຕໍ່ຄົ້ນຄວ້າບັນດາແຜນການຮ່ວມມືກັນໃນຊຸມປີຕໍ່ໜ້າຈະເປັນເງື່ອນໄຂສຳຄັນ ເພື່ອໃຫ້ທັງສອງຝ່າຍ ໄດ້ພ້ອມກັນສ້າງໂອກາດໃນການຊຸກຍູ້, ສົ່ງເສີມ, ຊ່ວຍເຫລືອຊຶ່ງກັນ ແລະ ກັນ ເຮັດໃຫ້ການພົວພັນຮ່ວມມືແໜ້ນແຟ້ນຂຶ້ນກວ່າເກົ່າ, ພ້ອມກັນປັບປຸງວຽກງານປະກັນສັງຄົມໃຫ້ມີການພັດທະນາຄຽງຄູ່ກັນໄປ, ລວມທັງ ພິທີລົງນາມບົດບັນທຶກຄວາມເຂົ້າໃຈ ລະຫວ່າງ ກະຊວງແຮງງານ ແລະ ສະຫວັດດີການສັງຄົມລາວ ແລະ ປະກັນສັງຄົມຫວຽດນາມ ໃນຄັ້ງນີ້ດ້ວຍ.

ຂ່າວ-ພາບ: ຂ່າວສານ ຮສສ

ສຳນັກຂ່າວ ຊິນຮວາຂອງ ສປຈີນ ລາຍງານວ່າ: ຈີນ ຈະປັບຫລຸດພາສີ ມູນຄ່າເພີ່ມເປັນ 3% ສຳລັບການນໍາເຂົ້າ ຢາຕ້ານມະເຮັງ ແລະ ຢາປິ່ນປົວພະຍາດອື່ນໆ ລວມເຖິງການຜະລິດ ແລະ ຈັດຈຳໜ່າຍພາຍໃນປະເທດ . ຖະແຫລງການຈາກກະຊວງການເງິນຂອງຈີນ ແລະ ໜ່ວຍງານລັດຖະບານອື່ນໆ ລະບຸວ່າ: ຢາ ແລະ ສານອອກທິນ ທາງການຢາ ລວມ 71 ລາຍການ ຈະໄດ້ຮັບປະໂຫຍດ ຈາກການປັບຫລຸດ ພາສີຊຸດໃໝ່ ຕັ້ງແຕ່ວັນທີ 1 ທັນວາ ປີນີ້ ເປັນຕົ້ນໄປ.