ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດກິດຈະກຳຍ່າງເພື່ອສະເຫລີມສະຫລອງ ວັນຄວາມປອດໄພ ແລະ ສຸຂະພາບແຮງງານໂລກ ຄົບຮອບ 19 ປີ (28/4/2003-28/4/2022) ໂດຍມີ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງ ຮສສ, ທ່ານ ວິໄລ ວົງຂະເສີມ ຮອງປະທານຄະນະບໍລິຫານງານ ສູນກາງກໍາມະບານລາວ, ທ່ານ ໄຊບັນດິດ ຣາດຊະພົນ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ ວຽງປຣະສິດ ທິບພະສຸດາ ຜູ້ປະສານງານອົງການແຮງງານສາກົນ ປະຈໍາ ສປປ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນພິທີ, ທ່ານ ພົງສະຫວັນ ໄຊໂກສີ ຫົວໜ້າກົມຄຸ້ມຄອງແຮງງານ, ກະຊວງ ຮສສ ໄດ້ກ່າວວ່າ: ວັນທີ 28 ເມສາ 2022 ຂອງທຸກປີ ເປັນວັນທີ່ມີຄວາມໝາຍ ແລະ ຄວາມສໍາຄັນຫລາຍຕໍ່ຊາວຜູ້ອອກແຮງງານໃນທົ່ວໂລກ ເພື່ອລະນຶກເຖິງຜູ້ປະສົບເຄາະຮ້າຍຈາກອຸບັດເຫດແຮງງານ ແລະ ພະຍາດອາຊີບ, ທັງເປັນການສົ່ງເສີມ ແລະ ປູກຈິດສໍານຶກໃຫ້ທຸກພາກສ່ວນເສດຖະກິດ-ສັງຄົມ ໃນການປ້ອງກັນອຸບັດເຫດແຮງງານ ແລະ ພະຍາດອາຊີບ ແນໃສ່ຫລຸດຜ່ອນການໄດ້ຮັບບາດເຈັບ ແລະ ການເສຍຊີວິດຈາກການເຮັດວຽກ ຫລື ອາດຈະກາຍເປັນຜູ້ພິການ, ເສຍອົງຄະ, ເປັນພະຍາດຕ່າງໆ ຫລື ອາດເຖິງຂັ້ນເສຍຊີວິດ ແລະ ບັນຫາອື່ນໆທີ່ທຸກຄົນບໍ່ເພິ່ງປາດຖະໜາ. ສະນັ້ນ, ອົງການແຮງງານສາກົນຈຶ່ງໄດ້ຕົກລົງປະກາດເອົາວັນທີ 28 ເມສາ ຂອງແຕ່ລະປີ ເປັນວັນຄວາມປອດໄພ ແລະ ສຸຂະພາບແຮງງານໂລກ. ສຳລັບຄໍາຂວັນ ປີ 2022 ອົງການແຮງງານສາກົນ ໄດ້ໃສ່ຫົວຂໍ້ວ່າ: “ຮ່ວມກັນປະຕິບັດ ເພື່ອສ້າງວັດທະນະທໍາດ້ານຄວາມປອດໄພ ແລະ ສຸຂະພາບແຮງງານທີ່ດີ”.

ພະຍາດອາຊີບທີ່ເກີດຂຶ້ນ ຍ້ອນການເຮັດວຽກຍັງສືບຕໍ່ເປັນສາເຫດຫລັກ ຂອງການເສຍຊີວິດຂອງຜູ້ອອກແຮງງານ, ອີງຕາມການຄາດຄະເນຂອງອົງການແຮງງານ ສາກົນເຫັນວ່າມີຈຳນວນ 2,34 ລ້ານຄົນ ເສຍຊີວິດຍ້ອນການປະກອບອາຊີບໃນແຕ່ລະປີ, ສະເລ່ຍແລ້ວໃນແຕ່ລະວັນໄດ້ມີຜູ້ເສຍຊີວິດຈຳ ນວນ 5.500 ຄົນ ຍ້ອນອຸບັດເຫດແຮງງານ ແລະ ພະຍາດອາຊີບ ແລະ ມີທ່າອ່ຽງນັບມື້ນັບຈະເພີ່ມຂຶ້ນ, ຕໍ່ບັນຫາດັ່ງກ່າວບັນດານັກຄົ້ນຄ້ວາ ແລະ ຊ່ຽວຊານດ້ານຄວາມປອດໄພແຮງງານ ໄດ້ໃຫ້ທັດສະນະວ່າ 80% ຂອງຜູ້ອອກແຮງງານທີ່ໄດ້ຮັບເຄາະຮ້າຍນັ້ນ ສາມາດປ້ອງກັນໄດ້ຖ້າລັດຖະບານ, ອົງການຈັດຕັ້ງສັງຄົມ, ຫົວໜ່ວຍແຮງງານຕ່າງໆຫາກມີນະໂຍບາຍ, ມີແຜນການ, ມີລະບຽບ, ມີມາດຕະ ການທີ່ດີ ແລະ ເຄັ່ງຂັດເພື່ອປ້ອງກັນ.

ທ່ານ ພົງສະຫວັນ ໄຊໂກສີ ຍັງໃຫ້ຮູ້ອີກວ່າ: ສຳລັບຢູ່ ສປປ ລາວ ພວກເຮົາ ແຮງງານສ່ວນຫລາຍ ແມ່ນແຮງງານເຄື່ອນຍ້າຍຈາກຊົນນະບົດ ເຂົ້າມາເຮັດວຽກຢູ່ໃນຕົວເມືອງ, ຄວາມຮູ້ທາງດ້ານການປ້ອງກັນອຸບັດເຫດແຮງງານ ແລະ ພະຍາດອາຊີບຍັງຕ່ຳ, ເຮັດວຽກຕາມເປັນຕາມເກີດຈຶ່ງມີຄວາມສ່ຽງຫລາຍ ທີ່ຈະເກິດມີອຸບັດເຫດແຮງງານ ແລະ ພະຍາດຕ່າງໆທີ່ອາດຈະເກີດຂຶ້ນຍ້ອນການເຮັດວຽກທີ່ບໍ່ມີຄວາມປອດໄພ. ຕໍ່ບັນຫາດັ່ງກ່າວ, ພັກ ແລະ ລັດຖະບານ ແມ່ນເຫັນໄດ້ຄວາມສຳຄັນ ແລະ ເປັນຫ່ວງເປັນໄຍ ຕໍ່ຊີວິດ ແລະ ຊັບສິນຂອງຜູ້ອອກແຮງງານ ຈຶ່ງໄດ້ວາງນະໂຍບາຍ ແລະ ຊີ້ນຳຂະແໜງການທີ່ກ່ຽວຂ້ອງໃນການກຳນົດຍຸດທະສາດ ແລະ ແຜນການກ່ຽວກັບການປ້ອງກັນຄວາມປອດໄພ ແລະ ສຸຂະ ພາບແຮງງານ, ສ້າງ ແລະ ປັບປຸງກົດໝາຍວ່າດ້ວຍແຮງງານ, ກົດໝາຍວ່າດ້ວຍການປະກັນສັງຄົມ, ດໍາລັດວ່າດ້ວຍຄວາມປອດໄພ ແລະ ສຸຂະພາບແຮງງານ ເພື່ອນຳໃຊ້ໃນການປົກປ້ອງແຮງງານ.

ຂ່າວ-ພາບ: ສຸກສະຫວັດ

ບໍລິເວນຄວາມກົດດັນຕໍ່າຂອງອາກາດຮ້ອນໄດ້ປົກຄຸມຢູ່ທົ່ວທຸກພາກ ຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ ດ້ວຍກໍາລັງອ່ອນ ຊຶ່ງຈະເຮັດໃຫ້ອາກາດຮ້ອນຂຶ້ນໃນແຕ່ລະພາກ ແລະ ມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ບາງທ້ອງຖິ່ນ ພຽງເລັກນ້ອຍ.

ພະຍາກອນອາກາດ ເວລາ 7:00 ໂມງຂອງວັນທີ 25/7/2022 ເຖິງ ເວລາ 7:00 ໂມງ ວັນທີ 26/7/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມ 30% ຂອງພາກ. ອຸນຫະພູມໃນລະຫວ່າງ 20-31 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມ 30% ຂອງພາກ. ອຸນຫະພູມໃນລະຫວ່າງ 23-35 ອົງສາ.

-ນະຄອນຫລວງວຽງຈັນ: ອາກາດຮ້ອນ ແລະ ມີຝົນຕົກ ຟ້າຮ້ອງ ຟ້າເຫລື້ອມ 20% ຊຶ່ງຈະຕົກໃນລະດັບຄ່ອຍຢູ່ບາງບໍລິເວນ. ອຸນຫະພູມ ໃນລະຫວ່າງ 25-34 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ມີຝົນຕົກ ຟ້າຮ້ອງ ຟ້າເຫລື້ອມ 30% ຂອງພາກ. ອຸນຫະພູມໃນລະຫວ່າງ 24-34 ອົງສາ.

-ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລື້ອມ 20% ຊຶ່ງຈະຕົກ ໃນລະດັບຄ່ອຍຢູ່ບາງບໍລິເວນ. ອຸນຫະພູມໃນລະຫວ່າງ 16-28 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ມີຝົນຕົກ ຟ້າຮ້ອງ ຟ້າເຫລື້ອມໃນ 30% ຂອງພາກ. ອຸນຫະພູມໃນລະຫວ່າງ 25-34 ອົງສາ.

-ເຂດພູພຽງບໍລະເວນ: ຈະມີຝົນຕົກ ຟ້າຮ້ອງ ຟ້າເຫລື້ອມ 20% ຊຶ່ງຈະຕົກ ໃນລະດັບຄ່ອຍຢູ່ບາງບໍລິເວນ. ອຸນຫະພູມໃນລະຫວ່າງ 15-28 ອົງສາ.

ວັນທີ 22 ກໍລະກົດ 2022 ຢູ່ທີ່ສະໂມສອນຂອງເມືອງບາຈຽງຈະເລີນສຸກ ແຂວງຈຳປາສັກ ຄະນະຊາວໝຸ່ມອາສາສະໝັກລະດູແລ້ງສີຂຽວ ນະຄອນໂຮ່ຈິມີນ ສສ ຫວຽດນາມ ເຄື່ອນໄຫວສ້າງກິດຈະກຳ ກວດພະຍາດ, ຈ່າຍຢາ ແລະ ຝຶກອົບຮົມວຽກງານເຍົາວະຊົນ, ວຽກງານກະສີກຳໂດຍການເຂົ້າຮ່ວມຕ້ອນຮັບຂອງທ່ານ ຄໍາແດງ ດີວິໄຊ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງຈໍາປາສັກ, ທ່ານ ໂພໄຊ ຈັນທະວີໄຊ ຄະນະບໍລິຫານງານຊາວໝຸ່ມເມືອງ ພ້ອມຄະນະ ແລະ ສະມາຊິກຊາວໜຸ່ມອ້ອມຂ້າງເມືອງ, ຄະນະຊາວໜຸ່ມຈາກໂຮງໝໍແຂວງ, ວິທະຍາໄລວິທະຍາດສຸກຂະພາບ, ໂຮງງານຊີບີເອັບ ( CBF ) ພໍ່ແມ່ປະຊາຊົນອ້ອມຂ້າງເມືອງ ແລະ ນ້ອຍເຍົາວະຊົນ ມສ ສຸກສຳພັນເຂົ້າຮ່ວມຢ່າງເປັນຂະບວນຟົດຟື້ນ.

ໃນການເຄື່ອນໄຫວສ້າງກິດຈະກຳໃນຄັ້ງນີ້: ໄດ້ນໍາເອົາຄວາມຮູ້ໃນການປູກຕົ້ນຖົ່ວລຽນ, ແຕ້ມຮູບລະບາຍສີ ແລະກວດພະຍາດ,ຈ່າຍຢາໂດຍບໍ່ເສຍຄ່າ ນອກນັ້ນຕ່າງໜ້າຄະນະຊາວໜຸ່ມອາສາສະໜັກລະດູແລ້ງສີຂຽວ ນະຄອນໂຮ່ຈິມີນ ສສ ຫວຽດນາມ ຍັງໄດ້ມອບຄອມພີວເຕີ ຈໍານວນ 1 ເຄື່ອງ ໃຫ້ແກ່ທ່ານ ໂພໄຊ ຈັນທະວິໄຊ ຄະນະບໍລິຫານງານຊາວໜຸ່ມເມືອງເພື່ອນຳໃຊ້ເຂົ້າໃນວຽກງານວິຊາເພາະ.

#Medialaos.#ສື່ມວນຊົນແຂວງຈຳປາສັກ​

ຂ່າວ-ພາບ: ນາງ ເພັດສະຫວັນ ນັກຂ່າວເມືອງ

ສະມາຄົມນັກຂ່າວແຫ່ງ ສປປ ລາວ ຮ່ວມກັບ ສະມາຄົມນັກຂ່າວນັກໜັງສືພິມ ແລະ ສະມາຄົມຜູ້ຜະລິດຂ່າວອອນລາຍ ແຫ່ງປະ ເທດໄທ ໄດ້ຈັດການຝຶກອົບຮົມ ພາຍໃຕ້ຫົວ ຂໍ້ “ການນໍາພາເຮັດຕົວຈິງເພື່ອພັດທະນາທັກສະການ ສ້າງລາຍຮັບຈາກສື່ອອນລາຍໃຫ້ ອົງການສື່ມວນຊົນລາວ” ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມຸນຕຣີ, ປະ ທານສະມາຄົມນັກຂ່າວແຫ່ງ ສປປ ລາວ, ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະ ທຳ ແລະ ທ່ອງທ່ຽວ, ບັນດາຄະນະນຳກົມ ແລະ ຄະນະນຳສຳນັກຂ່າວລາວ ຈຳນວນໜຶ່ງ, ທ່ານ ຊາວະຣົງ ລິມປັດທຳມະປານີ ທີ່ປຶກສາສະມາຄົມນັກຂ່າວນັກໜັງສືພິມ ແລະ ສະມາ ຄົມຜູ້ຜະລິດຂ່າວອອນລາຍແຫ່ງປະທດໄທ, ບັນດາວິທະຍາກອນ ແລະ ນັກຝຶກອົບຮົມເຂົ້າຮ່ວມ.

ການຈັດຊຸດເຝຶກອົບຮົມໃນຄັ້ງນີ້ ເພື່ອໃຫ້ອົງການສື່ມວນຊົນລາວ ມີຄວາມຮູ້ໃນການຊອກຫາລາຍໄດ້ຜ່ານຮູບ ແບບສື່ອອນລາຍ; ຄວາມເຂົ້າໃຈວິທີການຜະລິດເນື້ອໃນທີ່ ສາ ມາດສ້າງລາຍຮັບໄດ້ຢູ່ໃນແຕ່ລະຮູບແບບຂອງສື່ ທັງເປັນເພີ່ມທັກສະໃນການຫາລາຍໄດ້ຜ່ານ ຮູບແບບສື່ອອນລາຍ ໃຫ້ອົງການສື່ມວນຊົນລາວ ໂດຍເລັ່ງໃສຜູ້ຮັບຜິດຊອບດ້ານ ການວິເຄາະຂໍ້ມູນ, ພັດທະນາທຸລະກິດ, ບັນນາທິ ການ, ເນື້ອໃນດ້ານການຕະ ຫຼາດ ແລະ ຜູ້ສ້າງເນື້ອໃນໃສ່ໜ້າສື່ອອນລາຍ ໂດຍເນື້ອໃນຊີ້ໃຫ້ເຫັນຄວາມສໍາຄັນແລະຄວາມແຕກຕ່າງລະຫວ່າງ ຮູບແບບສື່ຕ່າງໆ, ການຜະລິດເນື້ອໃນທີ່ເໝາະສົມສໍາລັບ ຮູບແບບສື່ຕ່າງໆ, ວິທີການຫາລາຍໄດ້ຈາກຮູບແບບສື່ຕ່າງໆຜ່ານອອນລາຍ, ຂໍ້ກໍານົດໃນການນໍາ ໃຊ້ ແລະ ມາດຖານຕ່າງໆຂອງຜູ້ຊົມໃຊ້ທີ່ກ່ຽວ ຂ້ອງ ເຊິ່ງເປັນກໍລະນີສຶກສາ ເຊັ່ນການນໍາໃຊ້ເຟສບຸກ ແລະ ຕິກຕັອກ, ການສ້າງຕົວແບບທຸລະກິດ ແລະ ຝຶກເຮັດຕົວຈິງ ເພື່ອນໍາສະເໜີຮູບແບບ ແລະ ແຜນການຫາລາຍໄດ້ຈາກ ແຕ່ລະຮູບແບບຂອງສື່.

ການຝຶກອົບຮົມຄັ້ງນີ້ ເປັນນິມິດໝາຍອັນດີ ທີ່ສອດຄ່ອງກັບການປ່ຽນແປງໃໝ່ດ້ານສື່ມວນຊົນ ໂດຍຈະສ້າງເງື່ອນ ໄຂສະດວກ ເພື່ອຊ່ວຍໃຫ້ນັກຝຶກອົບຮົມຮັບເອົາຂໍ້ມູນໃໝ່ໆຈາກສື່ໃນຍຸກດີຈິຕອລ; ຮັບຮູ້ ຮູບແບບປ່ຽນທັດສະນິຍະ ພາບ, ຄວາມສໍາຄັນ ແລະ ຄວາມແຕກຕ່າງລະຫວ່າງຮູບແບບຂອງສື່ຕ່າງໆ; ການຫາລາຍໄດ້ຜ່ານຮູບແບບຂອງສື່ຕ່າງໆ; ຮູບແບບການຫາລາຍໄດ້ ແລະ ການວິເຄາະຂໍ້ ມູນ; ການຜະລິດເນື້ອໃນຂ່າວໃສ່ສີໃນຍຸກດີຈິຕອລ; ການຊອກຫາລູກຄ້າຢູ່ໃນບັນດາສື່ດີຈິຕອລ ແລະການເຮັດທຸລະ ກິດແບບຊອກຫາສະຖິຕິລູກ ຄ້າ;

ນອກນີ້, ນັກສຳມະນາກອນຍັງຈະຝຶກຕົວຈິງໃນການສ້າງແຜນວາດທຸລະກິດຕົວແບບທີ່ເນັ້ນໃສ່ປັດໄຈຍຸດທະສາດຫຼັກທັງໝົດ ໃນນີ້ລວມທັງສະ ຖິຕິລູກຄ້າ, ລະບົບການເຮັດວຽກ, ລາຍຮັບລາຍຈ່າຍ-ກິດຈະກໍາຕ່າງໆຂອງບໍລິສັດແລະ ກໍ່ຈະນໍາສະເໜີແຜນທຸລະກິດ ແລະແຜນການຫາລາຍໄດ້ ຊຶ່ງ ບົດຮຽນຕ່າງໆ ຈະກາຍເປັນ ພື້ນຖານໃນການຊອກຫາ ຫຼື ສ້າງແຫຼ່ງລາຍຮັບເຂົ້າສູ່ສໍານັກຂ່າວຂອງຕົນ ຊຶ່ງເປັນການປະ ກອບສ່ວນຫຼຸດຜ່ອນງົບປະ ມານຂອງລັດຖະບານ ແລະ ທ້ອງຖິ່ນ.

ເມືອງຊົນນະບູລີ ແຂວງສະຫວັນນະເຂດ ໄດ້ເປີດການສອບເສັງຈົບຊັ້ນມັດທະຍົມຕອນປາຍບໍາລຸງ ( ມ7 ) ທົ່ວເມືອງຂື້ນຢ່າງເປັນທາງການ ໃນຕອນເຊົ້າວັນທີ 21 ກໍລະກົດ 2022 ທີ່ສູນສອບເສັງໂຮງຮຽນ ມສ ໂນນສະຫວ່າງ ໂດຍການເຂົ້າຮ່ວມ ແລະ ໃຫ້ກຽດຕັດຫົວບົດສອບເສັງຂອງ ທ່ານ ທອງເວີນ ແກ້ວວົງສັກ ກໍາມະການພັກເມືອງ ຫົວໜ້າຫ້ອງການສຶກສາທິການ-ກິລາເມືອງ, ມີຕາງໜ້າພະແນກສຶກສາທິການ-ກິລາແຂວງ, ຄູ-ອາຈານ ແລະ ນ້ອງນັກຮຽນເຂົ້າຮ່ວມ

ສໍາລັບສູນການສຶກສານອກໂຮງຮຽນພາຍໃນເມືອງ ແມ່ນເລັ່ງໃສ່ບໍາລຸງຍົກລະດັບການສຶກສາໃຫ້ແກ່ປະຊາຊົນໃນກຸ່ມເປົ້າໝາຍທີ່ຮຽນບໍ່ຈົບຊັ້ນມັດທະຍົມຕອນຕົ້ນ ແລະ ຕອນປາຍ, ເຊິ່ງມີນັກຮຽນທີ່ມາຈາກ ເມືອງທ່າປາງທອງ ແລະ ມາຈາກກຸ່ມບ້ານຕ່າງໆພາຍໃນເມືອງ. ການສອບເສັງຈົບຊັ້ນມັດທະຍົມຕອນປາຍບໍາລຸງ ( ມ7 ) ປີນີ້ ມີນັກສອບເສັງທັງໝົດ 10 ຄົນ, ຍິງ 05 ຄົນ, ການສອບເສັງແມ່ນມີ 04 ວິຊາສອບເສັງຄື: ວິຊາພາສາລາວ-ວັນະຄະດີ,ຄະນິດສາດ, ເຄມີສາດ ແລະ ວິຊາພູມສາດ

ໂອກາດດັ່ງກ່າວ ທ່ານ ທອງເວີນ ແກ້ວວົງສັກ ກໍ່ໄດ້ມີຄໍາເຫັນ ແລະ ກ່າວເປີດພິທີຢ່າງເປັນທາງການ ເຊີ່ງທ່ານກໍ່ໄດ້ເນັ້ນໜັກໃຫ້ຄະນະກຳມະການທີ່ຖືກແຕ່ງຕັ້ງຮັບຜິດຊອບການສອບເສັງຄັ້ງນີ້ ຈົ່ງຢຶດໝັ້ນຕໍ່ອຸດົມການ, ມີຈັນຍາບັນຕັ້ງໜ້າປະຕິບັດລະບຽບການສອບເສັງ ແລະ ຮຽກຮ້ອງໃຫ້ນັກສອບເສັງຈົ່ງຕັ້ງໃຈເຮັດບົດສອບເສັງຂອງໃຜລາວ, ຫຼີກ ລ້ຽງການເຮັດຜິດກົດລະບຽບ ການສອບເສັງເປັນຕົ້ນແມ່ນການ ໃຊ້ໂທລະສັບມືຖື ຫຼືກ່າຍກັນເພື່ອ ໃຫ້ການສອບເສັງດໍາເນີນໄປ ດ້ວຍຜົນສໍາເລັດຢ່າງຈົບງາມ ດັ່ງນັ້ນນັກສອບເສັງທຸກຄົນຕ້ອງຮັກສາລະບຽບຂອງການສອບເສັງທີ່ວາງອອກຢ່າງເຄັ່ງຄັດ ແລະ ມີວິໃນ,ຕ້ອງນໍາໃຊ້ຄວາມຮູ້ ຄວາມສາມາດທີ່ຕົນເອງໄດ້ຮໍ່າຮຽນມານຳຄູ-ອາຈານເຂົ້າໃນການສອບເສັງໃຫ້ໄດ້, ທຸກຄົນຕ້ອງກະກຽມໃຫ້ພ້ອມທຸກເວລາກ່ອນເຂົ້າຫ້ອງສອບເສັງ, ສິ່ງໜຶ່ງອີກກໍ່ແມ່ນບົດຮຽນທີ່ໄດ້ຮຽນມາຕ້ອງໄດ້ທົບທວນ ແລະ ອ່ານຄືນ. ການສອບເສັງມັນບໍ່ນອກເໜືອຈາກບົດຮຽນທີ່ໄດ້ຮຽນມາ, ຈາກນັ້ນທ່ານຫົວໜ້າຫ້ອງການສຶກສາທິການ-ກິລາເມືອງກໍ່ໄດ້ເປັນກຽດຕັດ ຫົວບົດສອບເສັງຈົບຊັ້ນມັດທະຍົມຕອນປາຍບໍາລຸງ ( ມ7 ) ປະຈໍາສົກຮຽນ 2021-2022 ຢ່າງເປັນທາງການ. ເຊິ່ງການສອບເສັງແມ່ນຈະໃຊ້ເວລາຢູ່ 02 ວັນເຕັມຄື: ນັບແຕ່ວັນທີ 21 – 22 ກໍລະກົດ 2022 ຈິ່ງສໍາເລັດຕາມແຜນການ %

#savannakhet#medialaos

ຕາມ​ຂ່າວ​ຈາກ CRI, ​ເມື່ອ​ບໍ່​ດົນ​ມາ​ນີ້ ຈີນ ໄດ້ເປີດເຜີຍ ຕົວເລກ ເສດຖະກິດ ໃນ6ເດືອນ ຕົ້ນປີນີ້ ໃຫ້ຮູ້ວ່າ: ຍອດລວມ ຜະລິດ ຕະພັນພາຍ ໃນປະ ເທດ (GDP) ຂອງຈີນ ໄດ້ລື່ນກາຍ ມູນຄ່າ 56.000 ຕື້ຢວນ, ເພີ່ມຂຶ້ນ 2,5% ເມື່ອທຽບໃສ່​ ປີກາຍ ພາຍຫລັງ ທ່ານ ຟູ້ລີງຮຸ່ຍ, ໂຄສົກ ກົມສະຖິຕິ ແຫ່ງຊາດຈີນ ໃຫ້ຮູ້ວ່າ: ເສດຖະກິດຈີນ ສາມາດ ປ້ອງກັນ ຜົນກະທົບ ໄດ້ເກີນ ຄາດໝາຍ ແລະ ຮັກສາ ການເຕີບໂຕ ຢ່າງຕໍ່ເນື່ອງ ເຖິງວ່າ ຈະມີຄວາມຫຍຸ້ງຍາກ ຫລາຍປານ​ໃດ ຢ່າງ ກໍຕາມ. ໃນໄລຍະ ຕໍ່ໜ້ານີ້, ເຖິງວ່າ ການເຄື່ອນໄຫວ ດ້ານເສດຖະກິດ ຈະປະເຊີນໜ້າກັບ ສິ່ງທ້າທາຍ ແລະ ຄວາມຫຍຸ້ງຍາກ ຫລາຍຢ່າງ ແຕ່ວ່າ ພື້ນຖານ ດ້ານເສດ ຖະກິດ ຂອງຈີນ ທີ່ມີທ່າອ່ຽງ ດີຂຶ້ນ ໃນໄລຍະຍາວ ແມ່ນບໍ່ມີ ການປ່ຽນແປງ./. (ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

– ສັກວັກຊີນ ຫລື ສັກເຂັມກະຕຸ້ນ ເມື່ອຮອດກຳນົດຂອງທ່ານ

– ຮັກສາໄລຍະຫ່າງຈາກຜູ້ອື່ນຢ່າງໜ້ອຍ 1 ແມັດ

– ໃສ່ຜ້າອັດປາກ-ດັງ ໃຫ້ພໍດີກັບໜ້າ

– ລ້າງມືໃຫ້ສະອາດເປັນປະຈຳ

– ປະຕິບັດມາດຕະການຕາມແພດໝໍສັ່ງ

ຂໍ້ມູນ: ສູນຂ່າວສານການແພດສຸຂະສຶກສາ

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ (ນວ) ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ນວ ໃນວັນທີ 21 ກໍລະກົດ 2022 ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ 2022 ແຜນລາຍຮັບໝົດປີ ຈໍານວນ 5.576,34 ຕື້ກີບ ໃນນັ້ນລາຍຮັບພູດສູນກາງ (ພາສີ) 4.100 ຕື້ກີບ, ລາຍຮັບທ້ອງຖິ່ນ (ນວ) 1.476,34 ຕື້ກີບ, ມາຮອດວັນທີ 30 ມິຖຸນາ ສາມາດເກັບລາຍຮັບໄດ້ທັງໝົດ 2.611,95 ຕື້ກີບ ເທົ່າກັບ 46,84% ຂອງແຜນການປີ 2022 (ທຽບໃສ່ໄລຍະດຽວກັນຂອງປີຜ່ານມາລື່ນ 20,92% ເທົ່າກັບ 451,96 ຕື້ກີບ) ໃນນັ້ນ ລາຍຮັບພູດສູນກາງ ປະຕິບັດໄດ້ 1.858,30 ຕື້ກີບ ເທົ່າກັບ 45,32% ຂອງແຜນການປີ 2022 (ທຽບໃສ່ໄລຍະດຽວກັນຂອງປີຜ່ານມາລື່ນ 15.23% ເທົ່າກັບ 245,66 ຕື້ກີບ), ລາຍຮັບທ້ອງຖິ່ນ (ນວ) ປະຕິບັດໄດ້ 753,65 ຕື້ກີບ ເທົ່າກັບ 51,05% ຂອງແຜນການປີ 2022 (ທຽບໃສ່ໄລຍະດຽວກັນຂອງປີຜ່ານມາລື່ນ 37,69% ເທົ່າກັບ 206,30 ຕື້ກີບ), ດ້ານລາຍຈ່າຍງົບປະມານ ປະຕິບັດໄດ້ 276,83 ຕື້ກີບ ເທົ່າກັບ 44,26% ຂອງແຜນການປີ, ດ້ານດຸ່ນດ່ຽງປະຕິບັດໄດ້ 347,85 ຕື້ກີບ ເທົ່າກັບ 40,88% ຂອງແຜນການປີ (ແຜນການປີ 850,90 ຕື້ກີບ), ສັງລວມແລ້ວ ພູດ ນວ ຈັດເກັບໃນ 6 ເດືອນຕົ້ນປີ ປະຕິບັດໄດ້ຕາມແຜນທີ່ວາງໄວ້, ສ່ວນຄາດໝາຍທີ່ຍັງບໍ່ທັນປະຕິບັດໄດ້ແມ່ນການເກັບລາຍຮັບທີ່ສູນກາງປະຕິບັດຢູ່ ນວ ແລະ ລາຍຈ່າຍງົບປະມານ.

ດ້ານກະສິກຳ-ປ່າໄມ້ ສາມາດສະໜອງສະບຽງອາຫານໃຫ້ສັງຄົມຄື: ສະໜອງເຂົ້າໄດ້ 67.177 ໂຕນ ເທົ່າກັບ 88% ຂອງແຜນການ 76.361 ໂຕນຕໍ່ປີ, ສະເພາະພືດຜັກປະຕິບັດໄດ້ 75.925 ໂຕນ ເທົ່າກັບ 65,5% ຂອງແຜນການປີ 115.917 ໂຕນ, ການສະໜອງທາດຊີ້ນ, ປາ ປະຕິບັດໄດ້ 32.882 ໂຕນ, ປະຕິບັດໄດ້ 50,3% ຂອງແຜນຄວາມຕ້ອງການປີ 65.368 ໂຕນ.

ດ້ານການຜະລິດອຸດສາຫະກໍາ ຂະຫຍາຍຕົວ 5,56%, ການຜະລິດຫັດຖະກໍາຂະຫຍາຍຕົວ 4,34%, ການສົ່ງອອກປະຕິບັດໄດ້ 1.274,93 ລ້ານໂດລາ ທຽບໃສ່ໄລຍະດຽວກັນຂອງປີຜ່ານມາ (806,67 ລ້ານໂດລາ) ເພີ່ມຂຶ້ນ 58,04% (ແຜນການປີສົ່ງອອກບໍ່ໃຫ້ຫຼຸດ 18%), ສ່ວນດ້ານການລົງທຶນ ປະຕິບັດໄດ້ 18.810,91 ຕື້ກີບ ລື່ນແຜນ 43% ຂອງແຜນການປີ (ມະຕິສະພາ 13.300 ຕື້ກີບ) ສາມາດບັນລຸຄາດໝາຍ.

ສໍາລັບແຜນວຽກຈຸດສຸມ 6 ເດືອນທ້າຍປີ 2022 ສືບຕໍ່ສູ້ຊົນເຮັດໃຫ້ອັດຕາການຂະຫຍາຍຕົວ GDP ບັນລຸຕາມແຜນທີ່ກໍານົດໄວ້ 6,5% ຄິດເປັນມູນຄ່າ GDP ຕາມລາຄາໃນປີ ປະມານ 63,076 ຕື້ກີບ GDP ສະເລ່ຍຕໍ່ຫົວຄົນເທົ່າກັບ 6.426 ໂດລາ ໃນນັ້ນ ຂະແໜງການກະສິກຳຂະຫຍາຍຕົວ ເພີ່ມຂຶ້ນ 4% ກວມເອົາ 14% ຂອງ GDP, ຂະແໜງອຸດສາຫະກໍາຂະຫຍາຍຕົວ ເພີ່ມຂຶ້ນ 9,5% ກວມເອົາ 50% ຂອງ GDP, ຂະແໜງການບໍລິການຂະຫຍາຍຕົວເພີ່ມຂຶ້ນ 4,5% ກວມເອົາ 36% ຂອງ GDP, ດ້ານລາຍຮັບ ສູ້ຊົນເກັບລາຍຮັບໃຫ້ໄດ້ 2.964,39 ຕື້ກີບ ໃນນັ້ນລາຍຮັບທີ່ສູນກາງປະຕິບັດຢູ່ ນວ ໃຫ້ໄດ້ 2.241,70 ຕື້ກີບ, ລາຍຮັບຂອງ ນວ ໃຫ້ໄດ້ 722,58 ຕື້ກີບ (ສູ້ຊົນໃຫ້ໄດ້ເກີນແຜນ 100 ຕື້ກີບ), ດ້ານລາຍຈ່າຍຄາດຄະເນ 6 ເດືອນທ້າຍປີບໍ່ໃຫ້ເກີນ 348,60 ຕື້ກີບ ແລະ ການດຸ່ນດ່ຽງ ໃຫ້ໄດ້ 503,06 ຕື້ກີບ.

(ຂ່າວ-ພາບ: ແສງຈັນ)

ຕາມ​ຂ່າວ​ຈາກ VOVWORLD, ຫວຽດນາມ ແລະ ອີຢູ ສືບຕໍ່ ສົມທົບກັນ ຢ່າງແໜ້ນແຟ້ນ ເພື່ອຊຸກຍູ້ ການຮ່ວມມື ທາງດ້ານກະສິກຳ ຢ່າງຮອບດ້ານ, ພິເສດ ແມ່ນການສົ່ງເສີມ ການຄ້າ ຜະລິດ ຕະພັນ ກະສິກຳ ໃຫ້ສົມດຸນ, ພັດທະນາ ກະສິກຳ ແບບຍືນຍົງ, ຮ່ວມມືກັນ ແກ້ໄຂ ສິ່ງທ້າທາຍຕ່າງໆ ທີ່ພວມພົ້ນເດັ່ນຂຶ້ນ ໃນທົ່ວໂລກ ເປັນຕົ້ນ ແມ່ນການຂາດວັກ ຂາດຕອນ ລະບົບ ສະໜອງ, ບັນຫາຄ້ຳ ປະກັນ ສະບຽງ ອາຫານ.

​ໃນ​ໂອກາດ ​ພົບ​ປະກັນ ​ເມື່ອ​ບໍ່​ດົນ​ມາ​ ​ຄັ້ງນີ້: ທ່ານJanusz Wojciechowski ຂ້າຫລວງໃຫຍ່ ຮັບຜິດຊອບ ບັນຫາ ກະສິກຳ ຂອງອີຢູ ໃຫ້ຮູ້ວ່າ: ອີຢູ ຖືເປັນສຳຄັນ ບົດບາດ, ຄວາມສາມາດ ບົ່ມຊ້ອນ ຂອງຫວຽດນາມ ແລະ ຢາກເພີ່ມທະວີ ການຮ່ວມມືກັບ ຫວຽດນາມ ​ຫລາຍກວ່າ​ເກົ່າ ໃນການສ້າງລະບົບ ສະໜອງ ຜະລິດຕະພັນ ກະເສດ ແບບຍືນຍົງ.

ຂະນະ​ທີ່ ທ່ານ ຫງວຽນ ວັນຖາວ, ເອກອັກ ຄະລັດຖະທູດ, ຫົວໜ້າ ຄະນະ ຜູ້ຕາງໜ້າ ຫວຽດນາມ ປະຈຳ ສະຫະພາບ ເອີຣົບ (ອີຢູ) ​ໄດ້ເນັ້ນໜັກວ່າ: ຫວຽດນາມ ຖື ອີຢູ ແມ່ນໜຶ່ງ ໃນບັນດາ ຄູ່ຮ່ວມມື ສຳຄັນແຖວໜ້າ ແລະ ພ້ອມແລ້ວ ທີ່ຈະເປີດກວ້າງ ການຮ່ວມມື ກັບ ອີຢູ ຫລາຍກວ່າ​ເກົ່າ ​ແລະ ເສີມຂະຫຍາຍ ທ່າໄດ້ປຽບ ຂອງສັນຍາ ການຄ້າ ເສລີ ລະຫວ່າງ ຫວຽດນາມ ແລະ ອີຢູ (EVFTA) ຢ່າງສຸດຂີດ, ເພື່ອສົ່ງເສີມ ການຄ້າ ຜະລິດ ຕະພັນກະສິກຳ. ພ້ອມ​ທັງ​ ຫວັງ​ວ່າ ອີຢູ ຈະສືບຕໍ່ ອຳນວຍ ຄວາມ ສະດວກ ໃຫ້ຜະລິດ ຕະພັນ ກະສິກຳ ​ຂອງຫວຽດນາມ ໄດ້ສຳຜັດກັບ ຕະຫລາດ ອີຢູ ຢ່າງ​ກວ້າງຂວາງ./. (ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຮ່ອງຄວາມກົດດັນອາກາດຕໍ່າ ຈະພາດຜ່ານເຂດພາກເໜືອຂອງ ປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດອາກາດຮ້ອນຂຶ້ນຕື່ມອີກ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍໃນແຕ່ລະພາກ ແລະ ຕົກປານກາງ ຫາ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ແຂວງພາກເໜືອ ລົງຫາ ພາກກາງ.

ພະຍາກອນອາກາດ ເວລາ 7:00 ໂມງຂອງວັນທີ 22/7/2022 ເຖິງ ເວລາ 7:00 ໂມງ ວັນທີ 23/7/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 60% ຂອງພາກ. ອຸນຫະພູມໃນລະຫວ່າງ 20-31 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງ ທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 70% ຂອງພາກ. ອຸນຫະພູມໃນລະຫວ່າງ 21-35 ອົງສາ.

-ນະຄອນຫລວງວຽງຈັນ: ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງຢູ່ບາງບໍລິເວນ ພ້ອມມີ ລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 70%. ອຸນຫະພູມໃນລະຫວ່າງ 25-34 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ຫາ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ແຂວງ ວຽງຈັນ ແລະ ບໍລິຄໍາໄຊ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 70% ຂອງພາກ. ອຸນຫະພູມໃນລະຫວ່າງ 23-33 ອົງສາ.

-ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມ ຂອງຝົນ ເທົ່າກັບ 60%. ອຸນຫະພູມໃນລະຫວ່າງ 18-29 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມ ຂອງຝົນ ເທົ່າກັບ 50% ຂອງພາກ. ອຸນຫະພູມໃນລະຫວ່າງ 24-34 ອົງສາ.

-ເຂດພູພຽງບໍລະເວນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງເປັນບາງໂອກາດຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 60%. ອຸນຫະພູມໃນລະຫວ່າງ 17-27 ອົງສາ.