ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ຕ້ອນຮັບຄະນະຜູ້ແທນ ຄະນະກຳມະການຊົນເຜົ່າ ແຫ່ງ ສສ ຫວຽດນາມ ນຳໂດຍ ທ່ານ ເລ ເຊີນ ຮ໋າຍ ຮອງລັດຖະມົນຕີ ຮອງປະທານຄະນະກໍາມະການຊົນເຜົ່າ ພ້ອມຄະນະ ເຂົ້າຢ້ຽມຂໍ່ານັບ ໃນວັນທີ 24 ກໍລະກົດ 2022 ໃນໂອກາດທີ່ເດີນທາງມາຢ້ຽມຢາມ ແລະ ເຄື່ອນໄຫວວຽກງານຢູ່ ສປປ ລາວ ລະຫວ່າງວັນທີ 24-28 ກໍລະກົດ 2022.

ໃນໂອກາດນີ້ ທ່ານ ທອງຈັນ ມະນີໄຊ ໄດ້ສະແດງຄວາມຕ້ອນຮັບ ຊົມເຊີຍ ແລະ ຕີລາຄາສູງຕໍ່ ທ່ານ ເລ ເຊີນ ພ້ອມຄະນະ ທີ່ໄດ້ເດີ່ນທາງມາຢ້ຽມຢາມ ແລະ ເຮັດວຽກຮ່ວມກັບກະຊວງພາຍໃນ ສປປ ລາວ ໃນຄັ້ງນີ້, ຄະນະຜູ້ແທນທັງສອງຝ່າຍໄດ້ ແລກປ່ຽນຂໍ້ມູນຂ່າວສານ ແລະ ປຶກສາຫາລືແຜນການຮ່ວມມື ລະຫວ່າງ ກະຊວງພາຍໃນ ສປປ ລາວ ແລະ ຄະນະກຳມະການຊົນເຜົ່າ ແຫ່ງ ສສ ຫວຽດນາມ ເພື່ອເປັນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ໂດຍສະເພາະແມ່ນເພື່ອສືບຕໍ່ເສີມຂະຫຍາຍສາຍພົວພັນຮ່ວມມື ລະຫວ່າງ ກະຊວງພາຍໃນ ແຫ່ງ ສປປ ລາວ ແລະ ຄະນະກໍາມະການຊົນເຜົ່າ ແຫ່ງ ສສ ຫວຽດນາມ ໃນໄລຍະຜ່ານມາ. ການພົບປະຢ້ຽມຢາມ ໃນຄັ້ງນີ້ ທັງສອງຝ່າຍ ໄດ້ທົບທວນຄືນການຈັດຕັ້ງປະຕິບັດບົດບັນທຶກຄວາມເຂົ້າໃຈ (MOU) ທີ່ໄດ້ເຊັນຮ່ວມກັນ, ປຶກສາຫາລື ແລະ ແລກປ່ຽນບົດຮຽນກ່ຽວກັບ ວຽກງານຊົນເຜົ່າໃນຕໍ່ໜ້າ ໂດຍສະເພາະແມ່ນການຄຸ້ມຄອງລັດກ່ຽວກັບວຽກງານຊົນເຜົ່າຂອງສອງປະເທດ.

ການເດີນທາງມາຢ້ຽມຢາມ ສປປ ລາວ ຄັ້ງນີ້ ທ່ານ ເລ ເຊີນ ຮ໋າຍ ພ້ອມຄະນະຍັງໄດ້ເດີນທາງໄປແຂວງຫຼວງພະບາງ ເພື່ອທ່ອງທ່ຽວ ແລະ ຮ່ວມເຮັດວຽກກັບພະແນກພາຍໃນແຂວງຫຼວງພະບາງ ຕື່ມອີກ.

ຂ່າວ-ພາບ: ກະຊວງພາຍໃນ

ບັນຍາກາດການທ່ອງທ່ຽວລາວເລີ່ມຄຶກຄື້ນຫຼາຍຂຶ້ນ ເນື່ອງຈາກປັດຈຸບັນນັກທ່ອງທ່ຽວຈາກປະເທດໄທ ໄດ້ເດີນທາງເຂົ້າມາທ່ຽວ ສປປ ລາວ ຫຼາຍຂຶ້ນ ໂດຍສະເພາະໃນໄລຍະວັນບຸນວິສາຂະບູຊາ ແລະ ວັນເຂົ້າພັນສາ ດັ່ງນັ້ນຈຶ່ງພັກຍາວ (ຈຳນວນ 5 ວັນ ແຕ່ວັນທີ 13-17) ດ້ານຜູ້ປະກອບການ ບໍລິການຂົນສົ່ງລົດຕູ້ໂດຍສານໄດ້ເວົ້າໃຫ້ຟັງວ່າ: ນັກທ່ອງທ່ຽວໄທ ເຂົ້າມາທ່ຽວລາວເພີ່ມຂຶ້ນຈາກຜ່ານມາ 20-30% ແຕ່ປັດຈຸບັນເພີ່ມຂຶ້ນເປັນ 40-50%.

ທ່ານນາງ ອຳພອນ ນັກທ່ອງທ່ຽວໄທ ທີ່ເດີນທາງມາຈາກຈັງຫວັດຂອນແກ່ນ ປະເທດໄທ ໄດ້ໃຫ້ສຳ ພາດວ່າ: ມື້ນີ້ໄດ້ມີໂອກາດພາໝູ່ເພື່ອນ ພ້ອມດ້ວຍຍາດພີ່ນ້ອງທີ່ເດີນທາງມາຈາກຊິດນີ ປະເທດອົສຕຣາລີເພື່ອມາທ່ຽວ ສປປ ລາວ ເພາະພວກເພິ່ນຢາກມາທ່ຽວລາວ ຊຶ່ງມີເປົ້າໝາຍຈະໄປທ່ຽວປະຕູໄຊ, ພະທາດຫຼວງວຽງຈັນ ແລະ ອື່ນໆ, ຈາກນັ້ນ ກໍຈະເດີນທາງດ້ວຍລົດໄຟໄປທ່ຽວຫຼວງພະບາງ ຊຶ່ງພວກຂ້າພະເຈົ້າເດີນທາງມາດ້ວຍຕົນເອງເອົາລົດມາຈອດໄວ້ທີ່ດ່ານຝັ່ງໄທ ແລ້ວຕໍ່ລົດໂດຍສານເຂົ້າມາລາວ ຊຶ່ງມີໝູ່ຈອງລົດຕູ້ ແລະ ຈອງປີ້ລົດໄຟໄວ້ໃຫ້ ການເດີນທາງທຸກຢ່າງເຫັນວ່າມີຄວາມສະດວກສະບາຍ, ດັ່ງນັ້ນ ຈຶ່ງຂໍເຊີນຊວນຄົນໄທມາທ່ຽວລາວໃຫ້ຫຼາຍໆ ເພາະມີພາສາປາກເວົ້າ ແລະ ວັດທະນະທຳ ທີ່ຄ້າຍຄືກັນ.

ທ່ານນາງ ມົນ ນັກທ່ອງທ່ຽວທີ່ເດີນທາງມາຈາກ ກຸງເທບມະຫານະຄອນ ປະເທດໄທ ໄດ້ໃຫ້ສຳພາດວ່າ: ໄລຍະນີ້ເປັນວັນພັກຍາວທີ່ໄທ ແລະ ເຫັນວ່າ ສປປ ລາວ ເປີດການທ່ອງທ່ຽວໃໝ່ຫຼາຍດ້ານ ແລະ ມີການເປີດນຳໃຊ້ລົດໄຟໃໝ່ ກໍເລີຍມາທ່ຽວ ມານັ່ງລົດໄຟສາຍໃໝ່ເບິ່ງວ່າເປັນແນວໃດ, ສຳລັບໂປຣແກຣມການທ່ຽວ ແມ່ນພາຍໃນນະຄອນຫຼວງວຽງຈັນ, ເມືອງເຟືອງ ແລະ ຫຼວງພະບາງ. ການເດີນທາງມາແຕ່ກຸງເທບ ມີຄວາມສະດວກກສະບາຍເຂົ້າມາດ່ານທັງລາວ-ໄທ ເຈົ້າໜ້າທີ່ກໍອຳນວຍຄວາມສະດວກດີທຸກຢ່າງ. ສຳລັບ ພີ່ນ້ອງຄົນໄທທີ່ຢາກຈະມາທ່ຽວລາວໃນວັນພັກຕ່າງໆກໍມາໄດ້ເພາະໄລຍະນີ້ໂຄວິດ-19 ໄດ້ຜ່ອນຄາຍລົງແລ້ວ.

ທ່ານ ຈັນສອນ ແກ້ວມະນີວົງ ຜູ້ແລ່ນລົດຕູ້ປະຈຳດ່ານຂົວມິດຕະພາບລາວ-ໄທ ແຫ່ງທີ 1 ກ່າວວ່າ: ຍອມຮັບວ່າໄລຍະນີ້ນັກທ່ອງທ່ຽວຄົນໄທເຂົ້າມາຫຼາຍ ອາດຈະເປັນຍ້ອນໄລຍະວັນພັກຍາວຂອງເຂົາເຈົ້າ ຈຶ່ງເຮັດໃຫ້ເຂົາເຈົ້າເດີນທາງມາທ່ຽວລາວຫຼາຍຂຶ້ນ. ສ່ວນຫຼາຍທີ່ເຂົ້າມາທ່ຽວ ນອກຈາກນະຄອນຫຼວງວຽງຈັນ ແລະ ແຂວງວຽງຈັນແລ້ວ ກໍຈະພາກັນຂີ່ລົດໄຟຂຶ້ນໄປທ່ຽວຫຼວງພະບາງ ສະເລ່ຍນັກທ່ອງທ່ຽວເດີນທາງຂີ່ລົດໄຟຂຶ້ນໄປພາກເໜືອຂອງລາວມື້ລະ 400-500 ຄົນ (ຈາກໂຕເລກການຂົນສົ່ງຂອງສະມາຄົມລົດຕູ້ຢູ່ດ່ານລາຍງານໃຫ້ຮູ້) ຖ້າທຽບນັກທ່ອງທ່ຽວໃນໄລຍະເດືອນຜ່ານໆມາຫຼັງເປີດປະເທດກໍຈະມີປະມານ 20-30% ແຕ່ປັດຈຸບັນໂດຍສະເພາະໄລຍະນີ້ເພີ່ມຂຶ້ນເປັນ 40-50%. ດັ່ງນັ້ນ ຂໍເຊີນຊວນນັກທ່ອງທ່ຽວຕ່າງປະເທດໃຫ້ມາທ່ຽວ ສປປ ລາວ ຫຼາຍຂຶ້ນ ເພາະປັດຈຸບັນນີ້ມີທາງດ່ວນ, ທາງລົດໄຟທີ່ອຳນວຍຄວາມສະດວກສະບາຍໃນການເດີນທາງ.

ທ່ານ ປະດິດ ທອງສຸດີ ຜູ້ບໍລິການລົດຕູ້ນໍາທ່ຽວກ່າວວ່າ: ພາຍຫຼັງເປີດປະເທດໃໝ່ໆນັກທ່ອງທ່ຽວເຂົ້າມາທ່ຽວປະເທດລາວເຮົາໜ້ອຍ ອາດຈະຍັງບໍ່ຮູ້ຫຼາຍວ່າລາວເຮົາເປີດປະເທດ ແລະ ເປີດການທ່ອງທ່ຽວ, ແຕ່ປັດຈຸບັນຮູ້ແລ້ວກໍພາກັນມາທ່ຽວຫຼາຍ ເພາະໂຄວິດ-19 ໃນໄລຍະ 2-3 ປີຜ່ານມາຄົນກໍບໍ່ໄດ້ໄປທ່ຽວໃສ ເມື່ອພວກເພີ່ນຮູ້ວ່າເປີດປະເທດ ແລະ ການເດີນທາງຕ່າງໆກໍສະດວກສະບາຍ ພວກເພິ່ນກໍພາກັນມາທ່ຽວຫຼາຍຂຶ້ນ ໂດຍສະເພາະໄລຍະເຂົ້າພັນສານີ້ຮູ້ສຶກວ່ານັກທ່ອງທ່ຽວເພີ່ມຂຶ້ນຫຼາຍພໍສົມຄວນ. ດັ່ງນັ້ນ ຂໍເຊີນຊວນນັກທ່ອງທ່ຽວເຂົ້າມາທ່ຽວລາວຫຼາຍໆ ພວກເຮົາມີລົດຕູ້ນຳທ່ຽວໄວ້ຄອຍບໍລິການທ່ານຢູ່ດ່ານມິດຕະພາບ ລາວ-ໄທ ແຫ່ງທີ 1 ນີ້.

ທ່ານ ເຄນ ວົງທອງຈິດ ຜູ້ອຳນວຍການ ບໍລິສັດ ສຸດໃຈທ່ອງທ່ຽວ ຈຳກັດຜູ້ດຽວ ໃຫ້ຮູ້ວ່າ: ປັດຈຸບັນເຫັນວ່າມີນັກທ່ອງທ່ຽວໄທເດີນທາງເຂົ້າມາທ່ຽວລາວຫຼາຍ ໂດຍສະເພາະໂທມາຈອງທົວນຳບໍລິສັດພວກເຮົາມີຫຼາຍຂຶ້ນ ແຕ່ສ່ວນຫຼາຍພວກເຮົາຈະຮັບຈອງເປັນແບບ VIP ກຸ່ມໃຫຍ່ຫຼາຍກວ່າ, ຖ້າທຽບໄລຍະເປີດປະເທດທຳອິດ 1 ເດືອນ ກໍມີນັກທ່ອງທ່ຽວມາໃຊ້ບໍລິການປະມານ 20-30 ຄົນ, ແຕ່ປັດຈຸບັນມີນັກທ່ອງທ່ຽວເພີ່ມຂຶ້ນເປັນຈຳນວນຫຼາຍ.

ໂດຍ: ຄຳນ້ອຍ

ແຫລ່ງຂ່າວຈາກ ເມືອງທຸລະຄົມ ແຂວງວຽງຈັນ ໃຫ້ຮູ້ວ່າ: ກອງປະຊຸມຜ່ານ ຮ່າງບົດລາຍງານການສຶກສາສິ່ງແວດລ້ອມເບື້ອງຕົ້ນ ຂອງໂຮງງານຜະລິດໄຟຟ້າພະລັງ ງານແສງຕາເວັນ ຢູ່ບ້ານນາໝາກ ແລະ ບ້ານໂພນຄໍາ ເມືອງທຸລະຄົມ ຈັດຂຶ້ນໃນທ້າຍອາທິດຜ່ານມາ ພາຍໃຕ້ການເປັນປະທານຂອງ ທ່ານ ສຸກັນ ວິໄລຣັດ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງວຽງຈັນ, ມີ ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ, ມີພາກສ່ວນກ່ຽວຂ້ອງ, ຄະນະຮັບຜິດຊອບເກັບກໍາຂໍ້ມູນໂຄງການຂັ້ນແຂວງ, ຂັ້ນເມືອງ ແລະ ບ້ານເປົ້າໝາຍຂອງໂຄງການເຂົ້າຮ່ວມ.

ທ່ານ ສຸກັນ ວິໄລຣັດ ໄດ້ໃຫ້ຮູ້ເຖິງ ຄວາມຈໍາເປັນໃນການວ່າຈ້າງ ບໍລິສັດສຶກສາຜົນກະທົບສິ່ງແວດລ້ອມເບື້ອງຕົ້ນ ກ່ອນລົງມືຈັດຕັ້ງປະຕິບັດໂຄງການ, ທັງນີ້ ກໍເພື່ອປະຕິບັດໃຫ້ສອດຄ່ອງຕາມລະບຽບກົດໝາຍ ແລະ ຂັ້ນຕອນສະເໜີຂໍລົງທຶນ ເນື່ອງຈາກບັນຫາສະພາບແວດລ້ອມທໍາມະຊາດ ແລະ ສັງຄົມ ເວລາໃດກໍມີຄວາມສໍາຄັນ, ມີຄວາມ ຈໍາເປັນຕ້ອງປະຕິບັດຢ່າງຮອບຄອບ ເພື່ອຫລີກເວັ້ນຕໍ່ຜົນກະທົບອື່ນໆຕາມພາຍຫລັງ, ເຊິ່ງບໍລິສັດທີ່ໄດ້ຮັບການສຶກສາຜົນກະທົບສິ່ງແວດລ້ອມເບື້ອງຕົ້ນ ຂອງໂຮງງານຜະລິດໄຟຟ້າດ້ວຍພະລັງງານແສງຕາເວັນ ບ້ານນາໝາກ ແລະ ໂພນຄໍາ ແມ່ນ ບໍລິສັດ ໂກຣບ ວໍເທີ ອິນໂນເວເຊິນໂຊລ ຈໍາກັດ (Globe Water Innovation Sole Co. LTD) ໂດຍແມ່ນ ບໍລິສັດ ນະວະດີພະລັງງານສະອາດ ຈໍາກັດ ເປັນຜູ້ສໍາຫລວດເກັບກໍາຂໍ້ມູນ ແລະ ໄດ້ຮັບອະນຸມັດໃຫ້ລົງທຶນກໍ່ສ້າງ, ຖ້າຫາກໂຄງການໄດ້ດໍາເນີນຕາມແຜນການ ແລະ ກໍ່ສ້າງສໍາເລັດແລ້ວ ຈະສາມາດຜະລິດໄຟຟ້າໄດ້ 5 MW, ມີໄລຍະປະຕິບັດໂຄງການ 25 ປີ, ມູນຄ່າການລົງທຶນ 4.750.000 ໂດລາສະຫະລັດ, ສໍາລັບທຶນປະກອບສ່ວນພັດທະນາເມືອງ ແລະ ບ້ານ ໄດ້ກໍານົດຢູ່ໃນສັນຍາຕາມລະບຽບການລົງທຶນທີ່ນິຕິກໍາໄດ້ລະບຸໄວ້.

ໂອກາດນີ້, ທ່ານ ນາງ ວົງເດືອນ ວັດຕະໂສ ໄດ້ກ່າວວ່າ: ໂດຍພື້ນຖານແລ້ວໃນນາມຕາງໜ້າໃຫ້ການນໍາເມືອງ ແມ່ນເຫັນດີຮັບເອົາການສ້າງຕັ້ງ ໂຮງງານຜະລິດໄຟຟ້າພະລັງງານແສງຕາເວັນ ຢູ່ບ້ານນາໝາກ ແລະ ບ້ານໂພນຄໍາ, ຖ້າຫາກກໍ່ສ້າງສໍາເລັດ ແລະ ໄດ້ດໍາເນີນການຜະລິດແລ້ວ ກໍຈະເປັນປະໂຫຍດໃຫ້ແກ່ເມືອງທຸລະຄົມ, ສ່ວນລວມ ແລະ ສັງຄົມ, ທັງເປັນສີສັນອັນໃໝ່ປະກອບສ່ວນພັດທະນາເມືອງທຸລະຄົມ ເຊິ່ງຂະບວນການຂອງການສ້າງຕັ້ງນັ້ນ ກໍຍັງມີຂັ້ນຕອນຈໍາເປັນອີກຫລາຍດ້ານ ໂດຍສະເພາະ ການສຶກສາຜົນກະທົບເບື້ອງຕົ້ນດ້ານສິ່ງແວດລ້ອມທໍາມະຊາດ ແລະ ສັງຄົມ ເຊິ່ງກອງປະຊຸມຄັ້ງນີ້ແມ່ນສໍາຄັນຫລາຍ ເພາະມັນຈະເປັນພື້ນຖານສໍາຄັນ ໃຫ້ແກ່ການຈັດຕັ້ງປະຕິບັດໂຄງການ ໂດຍທ່ານໄດ້ສະເໜີໃຫ້ພາກສ່ວນກ່ຽວຂ້ອງ ທີ່ເຂົ້າຮ່ວມກອງປະຊຸມ ປະກອບຄໍາເຫັນຢ່າງສ້າງສັນກົງໄປກົງມາ ເພື່ອໃຫ້ສາມາດສັງລວມຄວາມເຫັນທີ່ເປັນເອກະພາບ, ເປັນບ່ອນອີງນໍາສະເໜີຂັ້ນຕອນ, ສະເໜີຈັດຕັ້ງປະຕິບັດໂຄງການຕາມແຜນການທີ່ວາງໄວ້.

ຜ່ານການຄົ້ນຄວ້າປຶກ ສາຫາລືໂດຍລວມແລ້ວ, ກອງປະຊຸມເຫັນດີເອກະພາບຮັບ ຮອງເອົາບົດລາຍງານສະບັບດັ່ງກ່າວ, ແຕ່ໃຫ້ປັບປຸງບາງເນື້ອໃນ, ບາງຄໍາສັບ ໃຫ້ຮັດກຸມສົມບູນຂຶ້ນຕື່ມ.

ຂ່າວ: ຖວທ ເມືອງທຸລະຄົມ.

ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ເມື່ອບໍ່ດົນມານີ້, ພະແນກອຸດສາຫະກຳ-ການຄ້າແຂວງສະຫວັນນະເຂດ ນຳໂດຍ ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງສົມທົບກັບ ທ່ານ ຄຳພົງ ສຸລິເຍດ ຮອງເຈົ້າເມືອງອຸທຸມພອນ ພ້ອມດ້ວຍຄະນະກຳມະການທຸກພາກສ່ວນ ຮ່ວມປຶກສາຫາລື ເພື່ອສ້າງກາໝາຍ ແລະ ສິ່ງບັນຈຸຫຸ້ມຫໍ່ ຜະລິດຕະພັນປີ້ງໄກ່ລາດເຊໂນ ໃຫ້ມີຄວາມສະ ອາດຈົບງາມ ແລະ ຄວາມປອດໄພຂອງຜູ້ບໍລິໂພກ.

ທັງນີ້, ເພື່ອເຮັດໃຫ້ຜະລິດ ຕະພັນສິນຄ້າໂອດອບແຫ່ງຊາດ ປີ້ງໄກ່ລາດເຊໂນ ໃຫ້ໄດ້ຮັບການຍອມຮັບ ແລະ ຖືກສຸຂະອະນາໄມ ແລະ ເປັນເອກະລັກສະເພາະກໍ, ທັງເປັນການຍູ້ແຮງການຈັດຕັ້ງປະຕິບັດວາລະແຫ່ງຊາດ ຕິດພັນກັບການສົ່ງເສີມທຸລະກິດ ຂະໜາດນ້ອຍ-ຂະໜາດກາງ SMEs ກໍຄື ການສົ່ງເສີມຜູ້ປະກອບການ ປີ້ງໄກ່ລາດເຊໂນ ທີ່ໄດ້ຮັບຄວາມນິຍົມຊົມຊອບ ແລະ ມີຊື່ສຽງໂດ່ງດັງທັງພາຍໃນແຂວງ, ຕ່າງແຂວງ ແລະ ຕ່າງປະເທດ ເຊິ່ງສະມາຄົມປີ້ງໄກ່ລາດເຊໂນ ໄດ້ປະກາດສ້າງຕັ້ງກຸ່ມມາແຕ່ປີ 2016, ໃນໄລຍະນັ້ນ, ມີສະມາຊິກກຸ່ມພຽງແຕ່ 36 ຮ້ານ, ແຕ່ມາຮອດປັດຈຸບັນ ມີເຖິງ 66 ຮ້ານ, ໃນນັ້ນ 15 ຮ້ານ ໄດ້ຮັບຮອງເປັນສິນຄ້າກາໝາຍໂອດອບ ແຫ່ງຊາດ.

ໂອກາດນີ້, ທ່ານ ໄຊຍະເດດ ຜຸຍຍະວົງ ໄດ້ເນັ້ນໃຫ້ຄະນະກຳມະການຂັ້ນເມືອງ ກໍຄື ກຸ່ມຜູ້ປະກອບການ ຈົ່ງພ້ອມກັນສົ່ງເສີມ, ປັບປຸງ, ສ້າງຄວາມເຂັ້ມແຂງຂອງສະມາຄົມ ໂດຍສະເພາະສະຖານທີ່ບໍລິການ ໃຫ້ມີຄວາມສະອາດ, ເປັນລະບຽບຮຽບຮ້ອຍ, ສິ່ງສຳຄັນໃຫ້ຮັບປະກັນດ້ານສຸຂະອະນາໄມ ແລະ ຄວາມປອດໄພຂອງ ຜູ້ບໍລິໂພກ, ພ້ອມກັນສ້າງຜະລິດຕະພັນ ໃຫ້ໄດ້ມາດຕະຖານ ແລະ ມີຄວາມຍືນຍົງ, ມີຄວາມຊື່ສັດ, ຈິງໃຈ. ພ້ອມກັນນີ້, ໃນສະມາຄົມປີ້ງ ໄກ່ລາດເຊໂນ ຕ້ອງມີລະບອບປະຊຸມ, ປຶກສາຫາລື, ສ່ອງແສງ ເພື່ອເປີດໂອກາດໃຫ້ສະມາຊິກມີຄຳເຫັນໃນການປັບປຸງໃຫ້ສະມາຄົມ ມີການພັດທະນາຂຶ້ນໄປເລື້ອຍໆ.

ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ໃຫ້ສໍາພາດຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງຄັ້ງທີ 1 ປີ 2022 ແຕ່ວັນທີ 21-22 ກໍລະກົດນີ້ ຢູ່ຫໍປະຊຸມແຫ່ງຊາດ, ນະຄອນຫລວງວຽງຈັນ ວ່າ: ວຽກງານຄຸ້ມຄອງພະນັກ ງານ-ລັດຖະກອນ ດ້ວຍລະບົບເອເລັກໂຕຣນິກ ພວມດໍາເນີນຢ່າງເປັນປົກກະຕິ ແລະ ມາຮອດປັດຈຸບັນ ການອອກບັດລັດຖະກອນອີເລັກໂຕຣນິກ ແມ່ນສໍາເລັດເປັນສ່ວນໃຫຍ່.

ທ່ານ ລັດຖະມົນຕີກະຊວງພາຍໃນ ໃຫ້ຮູ້ຕື່ມວ່າ: ນັບຕັ້ງແຕ່ທ້າຍປີ 2018 ເປັນຕົ້ນມາ ບັນດາກະ ຊວງ, ອົງການທຽບເທົ່າກະຊວງ ຂັ້ນສູນກາງ ໄດ້ນໍາໃຊ້ລະບົບຖານຂໍ້ໍມູນລັດຖະກອນ ເຂົ້າໃນວຽກງານລັດຖະກອນ ຢູ່ອົງການຈັດຕັ້ງຂອງຕົນຢ່າງມີປະສິທິພາບ, ສະດວກ ແລະ ວ່ອງໄວຂຶ້ນກ່ອນເກົ່າ. ສໍາລັບການສ້າງລະບົບບັນຊີຈໍານວນພົນ ແລະ ບັນຊີເງິນເດືອນ ເປັນບັນຊີດຽວກັນ ແມ່ນໄດ້ເລີ່ມຕົ້ນຈັດຕັ້ງຢູ່ກະ ຊວງພາຍໃນ, ຫ້ອງການສໍານັກງານນາຍົກລັດຖະມົນຕີ ແລະ ຄັງເງິນແຫ່ງຊາດ ນັບແຕ່ງວດ 1 ປີ 2018. ມາຮອດປັດຈຸບັນ ໄດ້ສໍາເລັດການຈັດພິມ ແລະ ແຈກຢາຍບັດພະນັກງານ-ລັດຖະກອນ ຂອງກະ ຊວງ, ອົງການ ແລະ ບັນດາແຂວງ ຄື: ຂັ້ນສູນກາງ ຈໍານວນ 46 ພາກສ່ວນ, ສໍາເລັດ 42 ພາກສ່ວນ ມີຈໍານວນ 12.857 ຄົນ, ຍັງຢູ່ຂັ້ນຕອນການພິມບັດ 4 ພາກສ່ວນ. ຂັ້ນແຂວງ ຈໍານວນ 18 ແຂວງ ສໍາເລັດແລ້ວ 2 ແຂວງ ຈໍານວນ 2.746 ຄົນ (ນະຄອນຫລວງວຽງຈັນ ແລະ ແຂວງຫລວງນໍ້າທາ), ສ່ວນ 16 ແຂວງ ຍັງຢູ່ໃນຂັ້ນຕອນການຈັດພິມບັດ ແລະ ສໍາລັບຂັ້ນເມືອງ ແມ່ນຢູ່ໃນຂັ້ນຕອນການກະກຽມຂະຫຍາຍການນໍາໃຊ້ຂໍ້ມູນລັດ ຖະກອນໃນຂອບເຂດທົ່ວປະເທດ.

ທ່ານ ລັດຖະມົນຕີກະຊວງພາຍໃນ ເປີດເຜີຍວ່າ: ຕາມຕົວເລກສະຖິຕິໃນປີ 2021 ທົ່ວປະເທດມີພະນັກງານ-ລັດຖະກອນ ລວມທັງໝົດ 176.151 ຄົນ(ຍິງ 83.102 ຄົນ); ໃນນີ້ ລັດຖະກອນຄູ ກວມ 74.041 ຄົນ (ຍິງ 40.081 ຄົນ), ປະມານ 42% ຂອງຈໍານວນລັດຖະກອນທັງໝົດ ແລະ ໃນຈໍານວນ ລວມດັ່ງກ່າວ ເຫັນວ່າບັນຈຸຢູ່ຂັ້ນສູນກາງ 14%, ບັນຈຸຢູ່ຂັ້ນແຂວງ 21 ແລະ ບັນຈຸຢູ່ຂັ້ນເມືອງ 65% ເຊິ່ງຈໍານວນລັດຖະກອນທັງໝົດ ເມື່ອທຽບໃສ່ຈໍານວນພົນລະເມືອງລາວ ທີ່ມີປະມານ 7,3 ລ້ານຄົນ ແມ່ນເທົ່າກັບ 2,4%. ຂະນະທີ່ ໃນປີ 2021 ພະນັກງານລັດຖະກອນ ທີ່ອອກທຸກຮູບການ ແມ່ນມີຈໍານວນ 2.548 ຄົນ.

ຂ່າວ: ສຸພາສະຫວັນ ສີຊະນະມຸງຄຸນ.

ຮູບ: ອ່າຍຄໍາ.

ລະຫວ່າງວັນທີ່ 25 ກໍລະກົດ 2022 ນີ້, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວ ແລະ ຊຸກຍູ້ວຽກງານຂະແໜງພາຍໃນ ຢູ່ແຂວງຈໍາປາສັກ ໃນໂອກາດນີ້ ໄດ້ເຂົ້າຢ້ຽມຂໍ່ານັບ ທ່ານ ວິໄລວົງ ບຸດດາຄໍາ ເຈົ້າແຂວງແຂວງຈໍາປາສັກ ເພື່ອແຈ້ງຈຸດປະສົງໃນການມາເຄື່ອນໄຫວວຽກງານ ແລະ ລາຍງານກ່ຽວ ກັບການຈັດຕັ້ງປະຕິບັດວຽກງານຂະ ແໜງພາຍໃນໃນໄລຍະຜ່ານມາ ກໍ່ຄື ປັດຈຸບັນ ໃຫ້ການນໍາແຂວງຈໍາປາສັກ ໄດ້ຮັບຊາບ ໂດຍສະເພາະ ການມອບໝາຍຂອງລັດຖະບານ ຂະແໜງພາຍໃນ ພວມສຸມໃສ່ການຈັດຕັ້ງປະຕິບັດວຽກງານບຸລິມະສິດຈຸດສຸມສໍາຄັນຈໍານວນໜຶ່ງ ໃນໄລຍະ 05 ປີ (2021-2025) ຂະແໜງພາຍໃນ ຈະໄດ້ສຸມໃສ່ການຄົ້ນຄວ້າ, ປັບປຸງ ແລະ ສ້າງນິຕິກໍາ ທີ່ຕິດພັນກັບພາລະບົດບາດຂອງຂະແໜງພາຍໃນ; ພັດທະນາການບໍລິຫານລັດຕາມທິດກະທັກຮັດ, ບໍ່ຊໍ້າຊ້ອນກ້າວກ່າຍວຽກງານກັນ, ມີຄວາມເຂັ້ມແຂງ ແລະ ມີປະສິດ ທິພາບ; ຫັນວຽກງານຄຸ້ມຄອງພະນັກ ງານ-ລັດຖະກອນ ເປັນທັນສະໄໝ, ສຸມໃສ່ປະເມີນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ພ້ອມທັງຄົ້ນຄວ້າແນວທາງ-ກົນໄກໃນການຫຼຸດຜ່ອນຈໍານວນພະນັກງານ-ລັດຖະກອນລົງ ເພື່ອຫຼຸດລາຍຈ່າຍງົບປະມານຂອງລັດ ຖະບານ; ຫັນວຽກງານຄຸ້ມຄອງພົນລະ ເມືອງໃຫ້ເປັນລະບົບທັນສະໄໝ ໃນຂອບເຂດທົ່ວປະເທດ ໂດຍເລັ່ງໃສ່ການຈົດທະບຽນຕ່າງໆ ທີ່ພົວພັນເຖິງຄວາມຮັບຜິດຊອບຂອງຂະແໜງພາຍໃນ; ແກ້ໄຂເຂດແດນເຊື່ອມຕໍ່ລະຫວ່າງແຂວງ ໃຫ້ສໍາເລັດພາຍໃນປີ 2022 ນີ້ ແລະ ປະຕິບັດວຽກງານສາມສ້າງໃຫ້ເຂົ້າສູ່ລວງເລິກ; ຜັນຂະຫຍາຍກົດໝາຍວ່າດ້ວຍເອກະສານເຂົ້າໃນວຽກງານຕົວຈິງ ແລະ ເອົາໃຈໃສ່ທ້ອນໂຮມເກັບກໍາເອກະສານສໍາຄັນທາງປະຫວັດສາດ ແລະ ວັດທະນະທໍາ-ສັງຄົມ; ຮ່ວມກັບພາກສ່ວນທີ່ກ່ຽວຂ້ອງຈັດຕັ້ງປະຕິບັດໂຄງການສໍາຫຼວດ, ວັດແທກປັກຫຼັກໝາຍ ແລະ ສ້າງແຜນທີ່ເສັ້ນຊາຍແດນລະຫວ່າງຊາດ ກັບບັນດາປະເທດທີ່ຍັງບໍ່ສໍາເລັດ; ຄົ້ນຄວ້າຫັນຫົວໜ່ວຍວິຊາການທີ່ມີລາຍຮັບໄປກຸ້ມຕົນເອງທາງດ້ານງົບປະມານເທື່ອລະກ້າວ ພ້ອມທັງຫັນພະນັກງານ-ວິຊາການ ທີ່ຢູ່ຫົວໜ່ວຍວິຊາການດັ່ງກ່າວເປັນພາ ລະກອນ ເພື່ອຫຼຸດຜ່ອນຈໍານວນພະນັກ ງານ-ລັດຖະກອນ; ຄົ້ນຄວ້າຮູບການ ແລະ ວິທີການມາດຕະຖານ, ຕົວຊີ້ວັດ ເພື່ອເປັນບ່ອນອີງໃຫ້ແກ່ການຄັດເລືອກຜົນງານໃນການຍ້ອງຍໍບຸກຄົນ ແລະ ກົມກອງລວມໝູ່.

ທ່ານລັດະມົນຕີກະຊວງພາຍໃນ ຍັງໄດ້ຖືເອົາໂອກາດນີ້ປືກສາຫາລື ແລະ ແລກປ່ຽນຄໍາຄິດເຫັນໃນການປັບປຸງ ແລະ ພັດ ທະນາຮອບດ້ານວຽກງານຂະແໜງພາຍ ໃນ ຮ່ວມກັບການນໍາແຂວງຈໍາປາສັກ ຕື່ມອີກ.

ໃນຕອນເຊົ້າຂອງວັນທີ 12 ກໍລະກົດ 2022, ຢູ່ທີ່ຫ້ອງການປົກຄອງເຂດດ່ານບໍ່ຫານ, ກິ່ງແຂວງສິບສອງພັນນາ, ແຂວງຢຸນນານ ໄດ້ມີການຈັດພິທີມອບ-ຮັບໂຄງການຊ່ວຍເຫລືອຕ້າພະຍາດໂຄວິດ-19 ແລະ ອຸປະກອນການແພດ ທີ່ ກະຊວງການຕ່າງປະເທດ ແຫ່ງ ສປ ຈີນ ມອບໃຫ້ແກ່ ແຂວງຫລວງນໍ້າທາ ຂອງ ສປປ ລາວ.

ເຂົ້າຮ່ວມໃນພິທີດັ່ງກ່າວມີ ທ່ານ ຫວັງ ເວີຍ, ຮອງຫົວຫນ້າຫ້ອງການພົວພັນຕ່າງປະເທດ ແຂວງຢູນນານ, ທ່ານ ສູ ເຄີ້ຮຸ່ຍ, ຮອງເຈົ້າກິ່ງແຂວງສິບສອງພັນນາ ແລະ ທ່ານນາງ ມະນີລາ ສົມບັນດິດ, ກົງສຸນໃຫຍ່ ແຫ່ງ ສປປ ລາວ ປະຈໍານະຄອນຄຸນມິງ ພ້ອມດ້ວຍພະນັກງານຈາກພາກສ່ວນຕ່າງໆທີ່ກ່ຽວຂ້ອງຂອງສອງຝ່າຍ ຈໍານວນຫນຶ່ງ.

ໃນໂອກາດນີ້, ທ່ານກົງສຸນໃຫຍ່ ໄດ້ຕາງຫນ້າໃຫ້ພັກ-ລັດຖະບານ ກໍຄື ປະຊາຊົນລາວ ໂດຍສະເພາະອໍານາດການປົກຄອງ ແລະ ປະຊາຊົນແຂວງຫລວງນໍ້າທາ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນເປັນຢ່າງສູງ ມາຍັງພັກ-ລັດ ຖະບານ ແລະ ປະຊາຊົນ ແຫ່ງ ສປ ຈີນ ກໍ່ຄື ແຂວງຢູນນານ ແລະ ກິ່ງແຂວງສິບສອງປັນນາ ທີ່ໄດ້ໃຫ້ການຊ່ວຍເຫລືອດ້ານການແພດ ເປັນຈໍານວນຫລວງຫລາຍ ແກ່ ສປປ ລາວ ກໍ່ຄື ບັນດາແຂວງພາກເຫນືອຂອງລາວ ນັບແຕ່ເກີດການແຜ່ລະບາດຂອງພະຍາດໂຄວິດ-19 ເປັນຕົ້ນມາ ແລະ ຄັ້ງນີ້ ກະຊວງການຕ່າງປະເທດ ແຫ່ງ ສປ ຈີນ ກໍ່ໄດ້ໃຫ້ການຊ່ວຍເຫລືອໃນການສ້າງສະຖານທີ່ອະເຊື້ອສໍາລັບສິນຄ້າ ມູນຄ່າ 3.858.700 ຢວນ ແລະ ອຸປະກອນການແພດ ມູນຄ່າ 250.000 ຢວນແກ່ ແຂວງຫລວງນໍ້າທາຂອງລາວ ແລະ ເຊື່ອຫມັ້ນເປັນຢ່າງຍິ່ງວ່າ ການຊ່ວຍເຫລືອດັ່ງກ່າວນີ້ ຈະປະກອບສ່ວນຢ່າງສໍາຄັນເຂົ້າໃນການເພີ່ມທະວີການຮັດແຫນ້ນໄມຕີຈິດມິດຕະພາບ ທີ່ເປັນມູນເຊື້ອທີ່ມີມາແຕ່ດົນນານ ແລະ ການຮ່ວມມືຮອບດ້ານ ລະຫວ່າງສອງປະເທດ, ພ້ອມທັງຈະເປັນການຊ່ວຍຫລຸດຕົ້ນທຶນໃຫ້ແກ່ພາກສ່ວນທີ່ກ່ຽວຂ້ອງ ກໍ່ຄື ບັນດາບໍລິສັດຈາກ ສປປ ລາວ ໃນການຂົນສົ່ງສິນຄ້າເຂົ້າໄປ ສປ ຈີນ ແລະ ຮອງຮັບສະພາບການຮ່ວມມືດ້ານການຄ້າ ທີ່ກຳລັງເພີ່ມຂຶ້ນຢ່າງຕໍ່ເນື່ອງ ພາຍຫລັງທີ່ລົດໄຟລາວ-ຈີນ ໄດ້ເປີດນໍາໃຊ້. ນອກນັ້ນ, ກໍ່ຍັງຈະເປັນການປະກອບສ່ວນເຂົ້າໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢູ່ ແຂວງຫລວງນໍ້າທາ ອີກດ້ວຍ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

ພິທີເປີດບັ້ນຫັດແອບ, ຝຶກຊ້ອມຊ່ວຍເຫຼືອມະນຸດສະທຳ ແລະ ກິດຈະກໍາບໍລິການທາງການແພດ ຂະບວນລົດໄຟສັນຕິພາບ ປີ 2022 ຂອງສອງກອງທັບ ລາວ-ຈີນ ໄດ້ຈັດຂຶ້ນຢ່າງເປັນທາງການ ວັນທີ 25 ກໍລະກົດ 2022 ຢູ່ສະຖານີລົດໄຟ ເມືອງໂພນໂຮງ ແຂວງວຽງຈັນ ມີພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດຂອງລາວ, ພັນເອກພິເສດ ເສິນ ຊຸນມິງ ຮອງຫົວໜ້າເສນາຮັກ ກົມຮັບປະກັນພະລາທິການ ຂອງຄະນະກໍາມະການທະຫານສູນກາງຂອງຈີນ, ຫົວໜ້າຄະນະຂະບວນລົດໄຟສັນຕິພາບ 2022 ກອງທັບປົດປ່ອຍປະຊາຊົນຈີນ, ພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ຫົວໜ້າຄະນະຊີ້ນໍາລວມ ການຫັດແອບ, ຝຶກຊ້ອມກອບກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການດ້ານການແພດ ຂະບວນລົດໄຟສັນຕິພາບ ປີ 2022 ລະຫວ່າງ ກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ, ມີທີ່ປຶກສາທູດປ້ອງກັນຊາດຈີນປະຈໍາລາວ, ພ້ອມດ້ວຍຄະນະຊີ້ນໍາລວມ, ອະນຸກໍາມະການ, ພະນັກງານການແພດເຫຼົ່າຮົບເສນາຮັກຂອງກອງທັບລາວ-ຈີນ ແລະ ແຂກທີ່ຖືກເຊີນເຂົ້າຮ່ວມ.

ສະຫາຍພົນຈັດຕະວາ ຄໍາແພງ ພູມມະແກ້ວ ຫົວໜ້າກົມເສນາຮັກ ກົມໃຫຍ່ພະລາທິການກອງທັບ ໄດ້ລາຍງານກ່ຽວກັບຄວາມພ້ອມຂອງການຫັດແອບ, ຝຶກຊ້ອມໃນຄັ້ງນີ້ວ່າ: ຂະບວນລົດໄຟສັນຕິພາບລາວ-ຈີນ ເລີ່ມຈັດຕັ້ງປະຕິບັດກັນມາແຕ່ປີ 2017 ມາຮອດປີ 2019 ເນື່ອງຈາກມີການແຜ່ລະບາດຂອງພະຍາດ covid-19 ກິດຈະກໍາດັ່ງກ່າວຈຶ່ງໄດ້ຢຸດເຊົາຊົ່ວຄາວ ແລະ ມາຮອດປີ 2022 ນີ້ ແມ່ນໄດ້ສືບຕໍ່, ພິເສດ ປີນີ້ກອງທັບປົດປ່ອຍປະຊາຊົນຈີນ ໄດ້ນໍາເອົາລົດໄຟການແພດມາຈາກ ສປ ຈີນ 25 ຕູ້ ປະກອບມີ: ລະບົບເຊີດຊູຄົນເຈັບ, ໂຮງໝໍສະໜາມ, ອຸປະກອນການແພດ ແລະ ຫ້ອງວິເຄາະ PCR ມາຈໍາລອງເຫດການ, ການບໍລິການທາງດ້ານການແພດ ແລະ ເພື່ອຊ່ວຍເຫຼືອຜູ້ບາດເຈັບ ຫຼື ຜູ້ທີ່ໄດ້ຮັບຜົນກະທົບຈາກໄພພິບັດທໍາມະຊາດ ແລະ ນໍາສົ່ງໄປໂຮງໝໍແນວຫຼັງ.

ໃນນີ້ທັງສອງຝ່າຍໄດ້ເອກະພາບທາງດ້ານເນື້ອໃນຫັດແອບ, ການກະກຽມສະຖານທີ່ ສະໜາມຝຶກຊ້ອມ, ໂຮງໝໍສະໜາມຂັ້ນ 2, ມີຈໍານວນພົນເຂົ້າຮ່ວມທັງໝົດ 418 ສະຫາຍ, ກໍາລັງຝ່າຍລາວ 274 ສະຫາຍ, ໃນນັ້ນມີນັກຝຶກຊ້ອມ 100 ສະຫາຍ, ຝ່າຍຈີນເຂົ້າຮ່ວມ 149 ສະຫາຍ ກ່ອນເຂົ້າຝຶກຊ້ອມ 28 ວັນ ນັກຝຶກຊ້ອມຕ້ອງໄດ້ຮັບວັກຊີນອີກເຂັມໜຶ່ງ, ໄດ້ເຂົ້າກັກໂຕ 14 ວັນ ຕາມມາດຕະການປ້ອງກັນພະຍາດໂຄວິດ 19 ແລະ ລະບຽບການຝຶກຊ້ອມຢ່າງເຂັ້ມງວດ. ຮັບປະກັນຄວາມປອດໄພ, ພາຫະນະຮັບໃຊ້ທາງດ້ານການແພດ ແລະ ວຽກງານດ້ານອື່ນໆ ເຊິ່ງມີຄວາມພ້ອມຮອບດ້ານ 100% ສໍາລັບເນື້ອໃນຝຶກຊ້ອມ ຈະໄດ້ຈໍາລອງເຫດການໄພພິບັດທີ່ເກີດຈາກໄພພິບັດທໍາມະຊາດ: ມີຝົນຕົກໜັກ ເກີດມີພະຍຸລົມແຮງແບບກະທັນຫັນ, ມີກໍລະນີທີ່ໄດ້ຮັບຜົນກະທົບເປັນຈໍານວນຫຼາຍ, ໃນນັ້ນມີພໍ່ແມ່ປະຊາຊົນຂາດທີ່ຢູ່ອາໄສ, ຖືກບາດເຈັບແຂນຫັກ, ຂາຫັກ, ກະທົບຫົວ, ກະທົບທ້ອງ, ກະທົບເອິກ, ຊຸດໂຊມລະບົບຫາຍໃຈ ເຊິ່ງການຝຶກຊ້ອມຈະໃຊ້ເວລາ 10 ວັນຈຶ່ງຈະສໍາເລັດ.

ໂອກາດນີ້ສະຫາຍພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ຫົວໜ້າຄະນະຊີ້ນໍາລວມ ການຫັດແອບ, ຝຶກຊ້ອມ ໄດ້ມີຄໍາເຫັນກ່າວເປີດພິທີບັ້ນຝຶກຊ້ອມເພື່ອຊ່ວຍເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການທາງການແພດ ຂະບວນລົດໄຟສັນຕິພາບ ຂອງສອງກອງທັບ ລາວ-ຈີນ ເພື່ອສືບຕໍ່ຂະຫຍາຍການພົວພັນອັນມີມູນເຊື້ອລະຫວ່າງສອງຊາດ, ສອງກອງທັບ ແລະ ປະຊາຊົນສອງຊາດລາວ-ຈີນ ເວົ້າລວມເວົ້າສະເພາະແມ່ນເປັນການຍົກລະດັບຂີດຄວາມສາມາດໃນການແກ້ໄຂເຫດການໄພພິບັດທາງທຳມະຊາດຮ່ວມກັນ ລະຫວ່າງສອງເຫຼົ່າຮົບເສນາຮັກກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ເຊິ່ງບັນຫາໄພພິບັດທຳມະຊາດ ແລະ ບັນຫາພະຍາດລະບາດ ລ້ວນແຕ່ເປັນໄພຄຸກຄາມຕໍ່ມວນມະນຸດຊາດທີ່ພວກເຮົາຈະຕ້ອງຮ່ວມມືກັນແກ້ໄຂ ໂດຍສະເພາະການລະບາດພະຍາດໂຄວິດ-19 ສະນັ້ນການຮ່ວມຫັດແອບຝຶກຊ້ອມເພື່ອຊ່ວຍເຫຼືອຜູ້ປະສົບໄພພິບັດຈາກທຳມະຊາດດ້ານການແພດ ກໍ່ຍິ່ງມີຄວາມສຳຄັນ ເພື່ອກຽມຄວາມພ້ອມຮັບມືກັບເຫດການຕ່າງໆ ທີ່ອາດຈະເກີດ ຂຶ້ນໃນຕໍ່ໜ້າ ເເລະອື່ນໆ.

ໃນພິທີເປີດບັ້ນຫັດແອບ, ຝຶກຊ້ອມຊ່ວຍເຫຼືອມະນຸດສະທຳ ແລະ ກິດຈະກໍາບໍລິການທາງການແພດ ຂະບວນລົດໄຟສັນຕິພາບ ປີ 2022 ຂອງສອງກອງທັບ ລາວ-ຈີນ ຍັງໄດ້ຮັບຟັງການປະກອບຄໍາເຫັນກ່າວເປີດບັ້ນຫັດແອບ, ຝຶກຊ້ອມໃນຄັ້ງນີ້ຂອງ ສະຫາຍພົນຕີ ເສີນ ຊື້ ຮອງຫົວໜ້າກົມຮັບປະກັນພະລາທິການ, ຄະນະກໍາມະການທະຫານສູງກາງຂອງຈີນ ຜ່ານລະບົບ ວີດີໂອ ທາງໄກ ຈາກ ສປ ຈີນ ໂດຍທັງສອງຝ່າຍຍັງໄດ້ມອບຂອງຂວັນທີ່ລະນຶກເຊິ່ງກັນ ແລະ ກັນ, ຝ່າຍຈີນໄດ້ມອບເຄື່ອງຊ່ວຍເຫຼືອທາງດ້ານການແພດ ໃຫ້ກອງທັບປະຊາຊົນລາວຕື່ມອີກ ຈາກນັ້ນສະຫາຍພັນເອກພິເສດ ເສິນ ຊຸນມິງ ຮອງຫົວໜ້າເສນາຮັກ ກົມຮັບປະກັນພະລາທິການ ຂອງຄະນະກໍາມະການທະຫານສູນກາງແຫ່ງ ສປ ຈີນ, ຫົວໜ້າຄະນະຂະບວນລົດໄຟສັນຕິພາບ 2022 ຂອງກອງທັບປົດປ່ອຍປະຊາຊົນຈີນ ໄດ້ຂຶ້ນຍິງປືນ ສັ່ງສັນຍານ ເລີ່ມການຫັດແອບຢ່າງເປັນທາງການ.

ທ່ານຜູ້ອ່ານທີ່ຮັກແພງ ມື້ນີ້ພວກເຮົາຈະມາແນະນຳກ່ຽວກັບການເບີ່ງແຍງຜິວໜ້າ ໂດຍການໃຊ້ນົມສົດມາເບີ່ງນຳກັນເລີຍ!.

1. ນົມສົດສາມາດໃຊ້ແທນໂທນເນີໄດ້! ຫຼັງຈາກລ້າງໜ້າແລ້ວເອົາສໍາລີມາຈຸ່ມນົມສົດ ແລ້ວເຊັດ ແລະ ນວດໃຫ້ທົ່ວໃບໜ້າ ເພື່ອໃຫ້ນົມຊືມເຂົ້າໄປໃນບໍລິເວນຜິວໜັງແລ້ວລ້າງອອກ ພຽງແຕ່ວິທີງ່າຍໆ ແບບນີ້ຈະໄດ້ຮັບໃບໜ້າທີ່ອ່ອນ ແລະ ນຽນນຸ້ມ.

2. ຖ້າຢາກມີໃບໜ້າທີ່ຊຸ່ມຊື່ນ ແລະ ສົດໃສ! ພຽງແຕ່ເອົານົມສົດປົນກັບນໍ້າສະອາດໃສ່ຕຸກ ແລ້ວເອົາໄປແຊ່ໃນຕູ້ເຢັນແລ້ວ ຫຼັງຈາກນັ້ນສີດໃສ່ໜ້າໃນເວລາກາງເວັນ ທ່ານຈະມີຜິວໜ້າທີ່ຊຸ່ມຊື່ນ ແລະ ໜ້າສຳພັດ.

3. ສາວໆຂອບຕາດຳຄືໝີແພນດາ ນອນເດິກມີຕາຂອບດຳ ພວກເຮົາມີວິທີຊ່ວຍເຫຼືອ ພຽງແຕ່ຈຸ່ມສໍາລີໃສ່ນົມສົດເຢັນໆ ຫຼັງຈາກນັ້ນປະໄວ້ປະມານ 10-15 ແລ້ວລ້າງອອກດ້ວຍນໍ້າຈະເຮັດໃຫ້ຮອຍຄໍ້າຈາງລົງ *ຜູ້ຍິງຄວນຫຼີກລ້ຽງການທາຄີມທີ່ໃກ້ກັບຂອບຕາ ເພາະຈະເຮັດໃຫ້ຕາດຳຂື້ນ*

4. ມາກໜ້າສູດນີ້ແມ່ນດີ! ສູດນີ້ແມ່ນສູດໃໝ່ຄື: ນຳເອົາຫມາກ​ເລັ່ນຕັດເປັນຕ່ອນບາງໆ (ແຊ່ໄວ້ຕູ້ເຢັນ) ແລະ ຈຸ່ມໃສ່ນົມສົດ ຈາກນັ້ນເອົາມາທາໃຫ້ທົ່ວໃບໜ້າ ປະໄວ້ປະມານ 15-20 ນາທີ ແລ້ວລ້າງອອກ.

ອີກສູດໜຶ່ງສຳລັບໃບໜ້າທີ່ຜົດຜື່ນຈາກສິວຄວນໃຊ້ນົມສົ້ມປະສົມໂຢເກີດ

ອຸປະກອນທີ່ຕ້ອງກະກຽມຄື:

1. ໂຢເກີດລົດທຳມະຊາດ

2. ນົມສົ້ມ

3. ສໍາລີ

ວິທີເຮັດ

1. ອັດຕາສ່ວນຂອງໂຢເກີດ 2 ບ່ວງ ຕໍ່ກັບນົມສົ້ມ 1 ບ່ວງປະສົມເຂົ້າກັນແລ້ວຄົນໃຫ້ເປັນເນື້ອດຽວກັນ.

2. ເອົາສໍາລີຈຸ່ມໃສ່ສ່ວນປະສົມ ຫຼັງຈາກນັ້ນທາທົ່ວໃບໜ້າຍົກເວັ້ນຮອບດວງຕາ ແລ້ວປະເຄິ່ງຊົ່ວໂມງ ຈາກນັ້ນລ້າງອອກດ້ວຍໂຟມ ໃນເວລາພຽງສອງສາມມື້ເທົ່ານັ້ນ ທ່ານຈະສາມາດມີຄວາມສຸກກັບໃບໜ້າເປັ່ງປັງ ທົດລອງເຮັດເບີ່ງເດີ!.

ທ່ານໃດທີ່ມີອາການນອນບໍ່ຫຼັບ, ນອນຫຼັບຍາກ, ນອນຫຼັບບໍ່ແຈບ ອາດເກີດຈາກຫຼາຍປັດໃຈ ເປັນຕົ້ນແມ່ນການກິນ, ຄວາມຄຽດ ແລະ ອື່ນໆ  ມື້ນີ້ເຮົາມີເມນູອາຫານທີ່ຊ່ວຍໃຫ້ບັນຫາອາການນອນຫຼັບຍາກຂອງທ່ານ ໃຫ້ສາມາດນອນຫຼັບງ່າຍ ມາເບີ່ງນຳກັນເລີຍ.

ໝາກກ້ວຍ: ໝາກກ້ວຍມີສານທຣິບໂຕເຟນ ສາມາດຊ່ວຍໃຫ້ຜ່ອນຄາຍ ແລະ ນອນຫຼັບງ່າຍ.

ປາເຊວມ້ອນ: ທີ່ອຸດົມໄປດ້ວຍທຣິບໂຕເຟນ ຊ່ວຍຜ່ອນຄາຍ ເຮັດໃຫ້ຫຼັບສະບາຍເຊັ່ນດຽວກັນ.

ຖົ່ວແປັບ: ຊ່ວຍເລັ່ງການສື່ສານປະສາດຊະນິດເຮໂຣໂທນິນ ຊ່ວຍໃຫ້ງຽບສະຫົງບ.

ເອວມ້ອນ: ທີ່ອຸດົມໄປດ້ວຍແມັກນິຊ້ຽນ ຊ່ວຍຜ່ອນຄາຍກ້າມຊີ້ນ.

ໄຂ່ຕົ້ມ: ມີໂປຣຕີນສູງ ສາມາດເຮັດໃຫ້ອາຫານຍ່ອຍງ່າຍ ແລະ ຜ່ອນຄາຍ.

ນໍ້າເຜີ້ງ: ມີກົດທີ່ສາມາດຊ່ວຍຜ່ອນຄາຍຄວາມຄຽດ ເຮັດໃຫ້ອາລົມດີ.

ໂຢເກີດ: ມີສ່ວນປະສົມຂອງນົມ ມີທຣິບໂຕເຟນ ສາມາດຊ່ວຍໃຫ້ຜ່ອນຄາຍເຊັ່ນດຽວກັນ.

ໃຜທີ່ນອນບໍ່ຫຼັບ, ນອນຫຼັບຍາກລອງກິນອາຫານເຫຼົ່ານີ້ເບີ່ງ ອາດຊ່ວຍໃຫ້ທ່ານນອນຫຼັບໄດ້ດີ ແລະ ນອນຫຼັບໄດ້ງ່າຍຂື້ນ.