ຕອນບ່າຍວັນທີ 25 ກໍລະກົດ 2022 ທີ່ສໍານັກນາຍົກລັດຖະມົນຕີ ທ່ານ ສຈ.ປອ ກິແກ້ວ ໄຂຄຳພິທູນ, ຮອງນາຍົກລັດ ຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ໄດ້ຖະແຫລງຕໍ່ສືມວນຊົນ ເຖິງ ຜົນສໍາເລັດຂອງພື້ນຖານໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ບາງຕອນສໍາຄັນ ທ່ານ ສຈ.ປອ ກິແກ້ວ ໄຂຄຳພິທູນ ກ່າວວ່າ: ປັດຈຸບັນ, ສະພາບການຕິດເຊື້ອ ແລະ ເສຍຊີວິດ ຈາກການລະບາດຂອງພະຍາດໂຄວິດ-19 ໃນທົ່ວໂລກ ໂດຍລວມ ແມ່ນມີທ່າອ່ຽງຫຼຸດລົງ,ແຕ່ກໍຍັງເຫັນຢູ່ບາງປະເທດ ທີ່ມີການລະບາດໃນຮອບໃໝ່. ສໍາລັບ ຢູ່ສປປ ລາວ ຂອງພວກເຮົາ, ການລະບາດຂອງພະຍາດໂຄວິດ- 19 ແມ່ນເລີ່ມຂຶ້ນໃນຕົ້ນປີ 2020ຈົນມາເຖິງປະຈຸບັນ. ລັດຖະບານ ເລີ່ມແຕ່ຫົວທີ ໄດ້ສຸມໃສ່ປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດດັ່ງກ່າວ, ພ້ອມທັງໄດ້ກຳນົດຄາດໝາຍ, ວາງມາດຕະການອອກ ໃນແຕ່ລະໄລຍະແລະ ຊີ້ນຳວຽກງານດັ່ງກ່າວ ຄືກັບການບັນຊາສູ້ຮົບໃນສະໜາມຮົບ ໂດຍໃຊ້ທັງມາດຕະການດ້ານບໍລິຫານ, ມາດຕະການດ້ານການແພດ ແລະ ມາດຕະການພະລາທິ ການ ແລະ ການເງິນ ໄປພ້ອມໆກັນ.ຜ່ານຈາກການຈັດຕັ້ງປະຕິບັດ ບັນດາມາດຕະການເຫຼົ່ານັ້ນ ຕະຫຼອດໄລຍະທີ່ຜ່ານມານີ້, ພວກເຮົາ ສາມາດສະຫຼຸບໄດ້ວ່າ ບັ້ນຮົບປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວເຮົາ ພວກເຮົາປະສົບຜົນສໍາເລັດ ໂດຍພື້ນຖານຈົນເຮັດໃຫ້ຄວບຄຸມການລະບາດເອົາໄວ້ໄດ້, ຜ່ານພົ້ນວິກິດການ ແລະ ເປີດປະເທດ ຢ່າງເປັນທາງການ ເພື່ອໄປມາຫາສູ່ກັນ ແລະ ເຄື່ອນໄຫວກິດຈະກຳຕ່າງໆ ກັບປະເທດເພື່ອນບ້ານ ແລະ ບັນດາປະເທດໃນທົ່ວໂລກ ໃນວັນທີ 09 ພຶດສະພາ2022.ຜົນສຳເລັດດັ່ງກ່າວ ແມ່ນເນື່ອງມາຈາກ:

1. ການນຳທຸກຂັ້ນ,ນັບແຕ່ຂັ້ນສູງສຸດລົງມາຕະຫຼອດຮອດຄະນະພັກ, ອຳນາດການປົກຄອງ, ອົງການຈັດຕັ້ງມະຫາຊົນ ທຸກຂັ້ນ ແມ່ນມີຄວາມສະດຸ້ງໄວ, ຖືສຳຄັນວຽກປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແຕ່ຫົວທີ, ນຳພາວາງຍຸດທະສາດທີ່ຖືກຕ້ອງໃນແຕ່ລະໄລຍະກຳນົດທິດທາງຢ່າງແທດເໝາະກັບສະພາບຕົວຈິງຂອງປະເທດເຮົາ ນຳພາຊີ້ນຳການແກ້ໄຂບັນຫາ ແລະ ການຈັດຕັ້ງປະຕິບັດ ຢ່າງໃກ້ຊິດແທດເຖິງ.

2. ຄະນະສະເພາະກິດທຸກຂັ້ນ ມີຄວາມຮັບຜິດຊອບການເມືອງ ໄດ້ເປັນເຈົ້າການວາງມາດຕະການ ທີ່ສອດຄ່ອງ, ຮອບຄອບ ແລະ ປະດິດສ້າງ ແທດເໝາະກັບສະພາບ ແລະ ເງື່ອນໄຂຕົວຈິງ, ພ້ອມທັງໄດ້ຈັດຕັ້ງປະຕິບັດເຂັ້ມງວດ, ແລະ ມີກົນໄກຊີ້ນຳບັນຊາທີ່ໂລ່ງລຽນ ແທດເໝາະກັບຕົວຈິງ ມີແບບແຜນເຮັດວຽກທີ່ວ່ອງໄວ, ຄ່ອງແຄ້ວ.

3. ຖືສຳຄັນ ແລະ ເອົາໃຈໃສ່ວຽກງານໂຄສະນາປຸກລະດົມຂົນຂວາຍທົ່ວສັງຄົມໃຫ້ການຮ່ວມມື ເຂົ້າຮ່ວມແລະ ປະກອບສ່ວນທັງເຫື່ອແຮງ ແລະ ວັດຖຸຈິດໃຈ ຢ່າງຫຼວງຫຼາຍ.

4. ປະຊາຊົນບັນດາເຜົ່າ ໄດ້ເສີມຂະຫຍາຍມູນເຊື້ອອັນດີງາມຂອງພັກ-ລັດ; ພະນັກງານ, ສະມາຊິກພັກ ໄດ້ຍົກສູງຄວາມຮັບຜິດຊອບ, ເປັນແແບຢ່າງນໍາໜ້າ;ຖັນແຖວແພດໝໍ, ທະຫານ, ຕໍາຫຼວດ ແລະ ພະນັກງານດ່ານໜ້າ ໄດ້ເປັນແບບຢ່າງທີ່ດີ ແລະ ເສຍສະຫຼະສູງ ເຮັດວຽກຢ່າງບໍ່ຮູ້ອິດເມື່ອ ເພື່ອສ່ວນລວມ ເພື່ອປະເທດຊາດ.

5. ເປັນເຈົ້າການຍາດແຍ່ງການຊ່ວຍເຫຼືອສະໜັບສະໜູນຈາກນາໆຊາດ, ອົງການຈັດຕັ້ງສາກົນ, ປະເທດເພື່ອນມິດຢ່າງທັນການ, ຈາກນັ້ນ ຈົນໄດ້ຮັບການຊ່ວຍເຫຼືອວັກຊິນ ຈໍານວນຫຼາຍແລ້ວ ບັນດາປະ ເທດເພື່ອນມິດຍັງໄດ້ສົ່ງຊ່ຽວຊານເຂົ້າມາຊ່ວຍເຫຼືອ ໃຫ້ຄໍາແນະນໍາໃນດ້ານຕ່າງໆ ເຊິ່ງໄດ້ເປັນກຳລັງແຮງອັນໃຫຍ່ຫຼວງ ໃຫ້ແກ່ຜົນສໍາເລັດດັ່ງທີ່ໄດ້ກ່າວມານັ້ນ.

ທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຫົວໜ້າຄະນະສະ ເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຕາງໜ້າໃຫ້ລັດຖະບານ, ຕາງໜ້າຄະນະສະເພາະກິດກໍຄືໃນນາມສ່ວນຕົວ, ຕີລາຄາສູງແລະຍ້ອງຍໍສັນລະເສີນ ຢ່າງຈິງໃຈຕໍ່ການຈັດຕັ້ງປະຕິບັດວຽກງານຂອງຄະນະສະເພາະກິດທຸກຂັ້ນ;ການປະ ກອບສ່ວນຂອງທຸກພາກສ່ວນທັງພາຍ ໃນ, ຕ່າງປະເທດ ແລະ ທຸກຄົນໃນສັງຄົມ. ພິເສດ ທ່ານໄດ້ຝາກຄວາມຊົມເຊີຍ ແລະ ຮູ້ບຸນຄຸນ ໄປຍັງພະນັກງານແພດໝໍ, ເຈົ້າ ໜ້າທີ່ດ່ານໜ້າ ໃນທົ່ວປະເທດ ທີ່ໄດ້ເຮັດວຽກ ໂດຍບໍ່ຮູ້ອິດຮູ້ເມື່ອຍ, ດ້ວຍຄວາມເສຍສະຫຼະ ແລະ ຄວາມຮັບຜິດຊອບສູງ ສູ້ຊົນຜ່ານຜ່າຄວາມທ້າທາຍ ແລະ ຄວາມສ່ຽງ ບໍ່ຈັກເທົ່າໃດ ເພື່ອປ້ອງກັນ ແລະ ປິ່ນປົວຄົນເຈັບ ໃນໄລຍະທີ່ຜ່ານມາ ຈົນຮອດ ປະຈຸບັນ.

ທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢໍ້າໃຫ້ຮູ້ອີກວ່າ: ເຖິງວ່າ ມາຮອດປັດຈຸບັນຕົວເລກການຕິດເຊື້ອແລະເສຍຊີວິດໄດ້ຫຼຸດລົງຢ່າງຕໍ່ເນື່ອງ, ເຊິ່ງຕົວເລກການຕິດເຊື້ອສະເລ່ຍຢູ່ປະເທດເຮົາແມ່ນຕໍ່າກວ່າ50ກໍລະນີຕໍ່ວັນ.ແຕ່ເພື່ອສືບຕໍ່ຄວາມພ້ອມໃນການຮັບມືກັບການລະບາດພະຍາດໂຄວິດ-19ທີ່ຍັງບໍ່ສີ້ນສຸດເຊິ່ງຢູ່ບາງປະເທດມີຕົວເລກຕິດເຊື້ອ ເພີ່ມຂື້ນລວມທັງປະເທດໃກ້ຄຽງ,ການປັບປ່ຽນພັນທຸກຳແລະການເກີດສາຍພັນໃໝ່ ທີ່ຍັງເປັນໄພຂົ່ມຂູ່ທາງດ້ານສາທາລະນະສຸກ ແລະ ຕໍ່ການພັດທະນາເສດຖະກິດ-ສັງຄົມ ສັບສົນທຸກປະເທດໃນທົ່ວໂລກ ເວົ້າລວມ, ເວົ້າສະເພາະ ເພື່ອປ້ອງກັນ ບໍ່ໃຫ້ເກີດມີການລະບາດຂອງພະຍາດໂຄວິດ-19 ຮອບໃໝ່ ຢູ່ໃນປະເທດເຮົາ, ສະນັ້ນ ພວກເຮົາຕ້ອງໄດ້ສືບຕໍ່ປະຕິບັດບັນດາມາດຕະການຕ່າງໆ ແລະ ຈັດຕັ້ງປະຕິບັດບາງວຽກຈຸດສຸມດັ່ງນີ້:

1) ປັບປ່ຽນຍຸດທະສາດ ໂດຍຫັນຈາກການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ມາເປັນ ຢູ່ຮ່ວມກັບພະຍາດໂຄວິດ ຢ່າງມີຄວາມປອດໄພ ຫັນໄປສູ່ການດຳລົງຊີວິດ ຕາມວິຖີໃໝ່ ແລະ ສຸມໃສ່ຟື້ນຟູເສດ ຖະກິດ-ສັງຄົມ ໂດຍການມີສ່ວນຮ່ວມຂອງທຸກພາກສ່ວນຢ່າງມີປະສິດທິຜົນ.

2) ຄະນະສະເພາະກິດ ຕ້ານໂຄວິດ-19 ທຸກຂັ້ນ ສືບຕໍ່ປະຕິບັດໜ້າທີ່ຂອງຕົນ, ແຕ່ໃຫ້ຫັນປ່ຽນແບບແຜນເຮັດວຽກ ແລະ ກົນໄກການປະສານງານ ກັບພາກສ່ວນຕ່າງໆ, ພ້ອມທັງ ປະຕິບັດຕາມຄຳເຫັນ ຂອງອົງການອະນາໄມໂລກ; ດຳເນີນການປະເມີນຜົນ ຢ່າງກວມລວມຮອບດ້ານກ່ຽວກັບວຽກງານຂອງຕົນ ໃນໄລຍະຜ່ານມາ ເພື່ອຕີລາຄາ ແລະ ຖອດໄດ້ບົດຮຽນ ນຳໄປສືບຕໍ່ເຮັດໜ້າທີ່ ໃຫ້ດີກວ່າເກົ່າ; ຊຸກຍູ້ການຜະລິດຢາປິ່ນປົວພະຍາດໂຄວິດ-19 ເພື່ອຕອບສະໜອງຢ່າງພຽງພໍ ກັບຄວາມຮຽກຮ້ອງຕ້ອງການ ຂອງສັງຄົມ; ດຳເນີນການໂຄສະນາເຜີຍແຜ່ ສະໜອງຂໍ້ມູນຂ່າວສານອັນຈຳເປັນ ໃຫ້ສັງຄົມໄດ້ຮັບຮູ້ຢ່າງທັນການ ແລະ ທົ່ວເຖິງ ກ່ຽວກັບການລະບາດ ຂອງພະຍາດໂຄວິດ-19 ທັງຢູ່ພາຍໃນ ແລະ ຕ່າງປະເທດ.

3) ສຳລັບທົ່ວສັງຄົມສືບຕໍ່ເຝົ້າລະວັງ ແລະ ຕິດຕາມຢ່າງໃກ້ຊິດ ສາຍພັນໃໝ່ທີ່ອາດຈະເຮັດໃຫ້ມີການລະບາດໃນຊຸມຊົນອີກຄັ້ງໃໝ່ ແລະ ມີການປະເມີນຄວາມສ່ຽງ ເປັນປະຈຳ, ຄຽງຄູ່ກັບການຂະຫຍາຍຄວາມສາມາດກວດຫາເຊື້ອ ແລະ ສາຍພັນ ຂອງພະຍາດໂຄວິດ-19 ແລະ ພະຍາດອື່ນໆຕາມລະດູການ.

4) ສຸມໃສ່ເລັ່ງສັກວັກຊີນ ໃນກຸ່ມເປົ້າໝາຍໃຫ້ໄດ້ຕາມຄາດໝາຍ ກາຍ 80% ໃນປີ 2022ໂດຍສະເພາະບາງແຂວງທີ່ອັດຕາການສັກວັກຊີນຍັງບໍ່ທັນສູງ ແລະກຸ່ມເດັກນ້ອຍທີ່ຍັງບໍ່ທັນບັນລຸເປົ້າໝາຍ 80%.

5) ສືບຕໍ່ໂຄສະນາ ປະຊາສຳພັນ ໃຫ້ທຸກຄົນ ມີສະຕິປ້ອງກັນຕົນເອງ, ໃຊ້ຊີວິດປົກກະຕິແບບໃໝ່ດ້ວຍຄວາມເປັນເຈົ້າຕົນເອງ ເຊັ່ນ: ໃສ່ຜ້າອັດປາກ-ດັງ ໃນສະຖານທີ່ຊຸມຊົນແອອັດ, ໝັ່ນລ້າງມືເປັນປະຈຳພ້ອມທັງ ສືບຕໍ່ເຜີຍແຜ່ຂໍ້ມູນ ໃຫ້ເຫັນຄວາມສໍາຄັນ ແລະປະໂຫຍດຂອງການສັກວັກຊີນກັນພະຍາດໂຄວິດ-19.

6) ສືບຕໍ່ກຽມຄວາມພ້ອມໂຄງລ່າງພື້ນຖານ ຢູ່ຈຸດຜ່ານແດນສາກົນ (ທາງບົກ, ທາງອາກາດ, ທາງລົດໄຟ) ທີ່ສາມາດຮັບປະກັນທາງດ້ານສາທາລະນະສຸກ ຕາມລະບຽບສາກົນ ເພື່ອຮອງຮັບການເດີນທາງເຂົ້າມາຂອງນັກທ່ອງທ່ຽວເປັນຈຳນວນຫຼວງຫຼາຍ.

ຕອນທ້າຍ ທ່ານຮອງນາຍົກລັດຖະມົນຕີ ໄດ້ຮຽກຮ້ອງ ໄປເຖິງທຸກອົງການຂອງພັກ, ລັດ, ທຸກການຈັດຕັ້ງ ແລະ ທຸກຄົນໃນສັງຄົມ ຈົ່ງສືບຕໍ່ຍົກສູງສະຕິຄວາມຮັບ ຜິດຊອບ ແລະ ເປັນເຈົ້າການຮ່ວມກັນ ໃນການປະຕິບັດມາດຕະການ ທີ່ລັດ ຖະບານ ກໍຄືຄະນະສະເພາະກິດ ວາງອອກ ຢ່າງເປັນເອກະພາບ ແລະ ເຂັ້ມງວດ ໂດຍສະເພາະ ມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ທີ່ເປັນພື້ນຖານ ເປັນຕົ້ນ: ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື,ໄປສັກວັກຊີນໃຫ້ຄົບ ລວມທັງ ເຂັມກະຕຸ້ນ ເພາະການສັກວັກຊີນກັນພະຍາດໂຄວິດ-19ຈະເຮັດໃຫ້ອາການບໍ່ຮຸນແຮງ, ຫຼຸດຜ່ອນການເສຍຊີວິດ,ເປັນການສ້າງພູມຄຸ້ມກັນໝູ່ ເຊິ່ງເປັນວິທີທີ່ດີທີ່ສຸດໃນການຄວບຄຸມການລະບາດຄືກັບຫຼາຍໆປະເທດໃນໂລກ ໄດ້ມີຄວາມສຳເລັດມາແລ້ວ.

ນອກຈາກນີ້, ຂໍໃຫ້ທຸກຄົນ ເອົາໃຈໃສ່ ປ້ອງກັນຕົນເອງ ຈາກພະຍາດລະດູການອື່ນໆ ໂດຍສະເພາະພະຍາດໄຂ້ຍຸງລາຍ ທີ່ກຳລັງແຜ່ລະບາດໃນປັດຈຸບັນ ໂດຍການທຳລາຍໜອນນ້ຳຍຸງລາຍໃນທຸກສຳ ນັກງານອົງການ ແລະ ແຕ່ລະຄົວເຮືອນຂອງທ່ານ. ຂໍອວຍພອນໃຫ້ທຸກໆທ່ານ ຈົ່ງມີສຸຂະພາບແຂງແຮງ, ມີຜົນສໍາເລັດ ໃນໜ້າທີ່ວຽກງານຂອງຕົນ ແລະ ປອດໄພ ຈາກເຊື້ອພະຍາດທຸກຊະນິດ.

ເພື່ອເປັນການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ດັ່ງນັ້ນ, ໃນທ້າຍອາທິດຜ່ານມານີ້ ທີ່ສະໂມສອນ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ. ກອງບັນຊາການ ປກສ ນະຄອນ ໄດ້ຈັດພິທີສຶກສາອົບຮົມຜູ້ທີ່ເສບຢາເສບຕິດ, ໂດຍການເປັນປະທານຂອງ ທ່ານ ພັທ ນວນຕາ ສີຈັນທອງທິບ ຮອງຫົວໜ້າກອງບັນຊາການ ປກສ ນະຄອນ, ມີໜ່ວຍງານສະກັດກັ້ນ ແລະ ຕ້ານຢາເສບຕິດ ນະຄອນ, ຫົົວໜ້າ ປກສ ກຸ່ມ 13, ມີເລຂາພັກບ້ານ-ນາຍບ້ານ, ຫົວໜ້າກອງຮ້ອຍ ປກຊ-ປກສ ບ້ານ, ພໍ່ແມ່ຜູ້ປົກຄອງ ເຂົ້າຮ່ວມ.

ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ນະຄອນ ໄກສອນ ພົມວິຫານ ໄດ້ມ້າງຈຸດມົ້ວສຸມເສບຢາເສບຕິດ (ຢາບ້າ) ໄດ້ຈຳນວນ 2 ຈຸດຄື: ຈຸດບ້ານໂພນສະຫວັນ, ບ້ານທ່າຊະໂນ ແລະ ສາມາດກັກຕົວພວກທີ່ເສບຢາເສບຕິດໄດ້ທັງໝົດ 16 ຄົນ. ຈາກນັ້ນ, ກໍໄດ້ມີການໂຄສະນາເຜີຍແຜ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍໄດ້ມີການສຶກສາອົບຮົມ, ກ່າວເຕືອນ ແລະ ຂຽນບົດບັນທຶກກັບກຸ່ມເປົ້າໝາຍດັ່ງກ່າວ, ຖ້າວ່າພວກກ່ຽວຍັງບໍ່ຢຸດເຊົາພົວພັນກັບຢາເສບຕິດ ແມ່ນຈະໄດ້ປະຕິບັດຕາມລະບຽບກົດໝາຍ.

(ຂ່າວ: ສະຫວັນ)

ຫ້ອງການສາທາລະນະສຸກເມືອງຈັນທະບູລີ ນະຄອນຫຼວງວຽງຈັນ ໄດ້ຈັດພິທີເປີດຂະບວນການຕະລຸມບອນທຳລາຍແຫຼ່ງເພາະພັນຍຸງລາຍທົ່ວເມືອງຈັນທະບູລີ ຂຶ້ນໃນວັນທີ 23 ກໍລະກົດມານີ້ ທີ່ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ທ່ານ ບຸນໜາ ຜາທຸມມະວົງ ຫົວໜ້າຈັດຕັ້ງນະຄອນຫຼວງວຽງຈັນ ຜູ້ຊີ້ນຳເມືອງຈັນທະບູລີ, ທ່ານ ດວງຕາ ສຸລິວົງ ເຈົ້າເມືອງຈັນທະບູລີ ແລະ ພະນັກງານພະແນກສາທາລະນະສຸກເມືອງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ຈັນສະໝອນ ຈິດຕະກອນ ຫົວໜ້າສາທາລະນະສຸກເມືອງຈັນທະບູລີ ໄດ້ລາຍງານວ່າ: ວຽກງານຄວບຄຸມ ແລະ ປ້ອງກັນໄຂ້ຍຸງລາຍໃນໄລະຜ່ານມາໂຕເລກສະສົມພະຍາດໄຂ້ຍຸງລາຍແຕ່ວັນທີ 1/1/ 2022 – 19/7/2022. ທົ່ວເມືອງມີທັງໝົດ: 542 ກໍລະນີ, ກວມເອົາ 29 ບ້ານ ໃນຈໍານວນ 30 ບ້ານຂອງເມືອງ, ເສຍຊີວິດ : 2 ກໍລະນີ , (ບ້ານໂພນສະຫວ່າງ, ບ້ານຫ້ວຍຫົງ) ຈໍານວນບ້ານທີ່ມີກໍລະນີສະສົມ 10 ຄົນຂຶ້ນເມື່ອມີຢູ່ 19 ບ້ານຄື : ບ້ານ ຫ້ວຍຫົງ, ໂພນສະຫວ່າງ, ສີສະຫວາດ, ໜອງທາເໜືອ, ໂພນຕ້ອງສະຫວາດ, ສີບຸນເຮືອງ, ທົ່ງຂັນຄໍາ, ດົງປ່າແຫຼບ, ໂພນຕ້ອງຈອມມະນີ, ສີດໍາດວນ, ສະຫວ່າງ, ດອນແດງ, ຂົວຫຼວງ, ຮ່ອງຄ້າ, ສາຍລົມ, ໜອງປິງ, ວັດຈັນ, ສີຫອມ, ດົງໝ້ຽງ. ໂຕເລກສູງກວ່າໝູ່ແມ່ນບ້ານຫ້ວຍຫົງ ການຈັດຕັ້ງປະຕິບັດມາດຕະການຄວບຄຸມ ແລະ ປ້ອງກັນພະຍາດໄຂ້ຍຸງລາຍແມ່ນອອກແຈ້ງການຂອງທ່ານເຈົ້າເມືອງ ເຖິງອໍານາດການປົກຄອງບ້ານກ່ຽວກັບ ມາດຕະການຄວບຄຸມ ແລະ ປ້ອງກັນພະຍາດໄຂ້ຍຸງລາຍ ໂດຍການປະຕິບັດ 5 ປ ເປັນປົກກະຕິ ແລະ ໄດ້ແຕ່ງຕັ້ງພະນັກງານວິຊາການ ສາທາລະນະສຸກເມືອງ ລົງຕິດຕາມຊຸກຍູ້ການສ້າງຂະບວນການ ທໍາລາຍແຫຼ່ງ ເພາະພັນໜອນນໍ້າຍຸງລາຍ ແລະ ເດີນສໍາຫຼວດໜອນນໍ້າຢູ່ພາຍໃນບ້ານ 4 ອາທິດລຽນຕິດ, ວຽກໂຄສະນາສຸຂະສຶກສາວຽກງານປ້ອງກັນພະຍາດໄຂ້ຍຸງລາຍຄົງທີ່ຢູ່ຈຸດໂຮງໝໍເມືອງ ແລະ ຈຸດຄົງທີ່ຂອງ ຫ້ອງການບ້ານ ທີ່ມີໂທລະໂຄ່ງ. ວຽກງານພົ່ນຢາຂ້າຍຸງໂຕແກ່: ໄດ້ພົ່ນຢາຂ້າຍຸງໂຕແກ່ ຢູ່ 2 ຈຸດຢູ່ 2 ບ້ານ ທີ່ມີກໍລະນີມີຜູ້ເສຍເສຍຊີວິດ.

ທ່ານ ບຸນແຝງ ພູມມະໄລສິດ ໄດ້ກ່າວວ່າ: ພະຍາດໄຂ້ຍຸງລາຍແມ່ນພະຍາດໜຶ່ງທີ່ເປັນບັນຫາທາງດ້ານສາທາລະນະສຸກໃນ ສປປ ລາວ, ໃນທຸກໆ 2-3 ປີ ໃດຈະມີການລະບາດຂະໜາດໃຫຍ່ເກິດຂຶ້ນ ຍ້ອນມີການປ່ຽນແປງສະພາບດິນຟ້າອາກາດ, ປະຊາກອນມີຄວາມໜາແໜ້ນເພີ່ມຂຶ້ນ, ໂດຍສະເພາະມີການກໍ່ສ້າງຕຶກອາຄານ ແລະ ອື່ນໆ ທີ່ເປັນປັດໄຈໃຫ້ເກີດແຫຼ່ງເພາະພັນ. ໃນຕົ້ນປີ 2022 ມາເຖິງວັນທີ 7/7/2022 ທົ່ວປະເທດມີລາຍງານກໍລະນີຄົນເຈັບໄຂ້ຍຸງລາຍ 10.469 ກໍລະນີ (ເສຍຊີວິດ 12 ກໍລະນີ) ໃນນີ້ນະຄອນຫຼວງວຽງຈັນມີຈໍານວນຄົນເຈັບສູງກ່ອນໝູ່ເປັນອັນດັບ 1 ໃນທົ່ວປະເທດ, ມີຈໍານວນ 5.429 ກໍລະນີ ເສຍຊີວິດ 5 ກໍລະນີ ຮອງລົງມາແມ່ນແຂວງສາລະວັນ ມີຈໍານວນ 869 ກໍລະນີ ເສຍຊີວິດ 2 ກໍລະນີ, ແຂວງອັດຕະປື ມີ 710 ເສຍຊີວິດ 3 ກໍລະນີ.

ໃນນະຄອນຫຼວງວຽງຈັນເປັນແຂວງອັນດັບ 1 ທີ່ມີລາຍງານກໍລະນີການເຈັບ ແລະ ເສຍຊີວິດສູງກວ່າໝູ່ໃນບັນດາແຂວງອື່ນ, ສູງກ່ອນໝູ່ແມ່ນເມືອງໄຊທານີ ມີ 1.140 ກໍລະນີ, ເສຍຊີວິດ 1 ກໍລະນີ, (ບ້ານທີ່ມີຜົນກະທົບໄຂ້ຍຸງລາຍມີ 91 ບ້ານ ກວມເອົາ 87,5% ຂອງບ້ານທັງໝົດ), ໄຊເສດຖາມີ 734 ກໍລະນີ ເສຍຊີວິດ 1 ກໍລະນີ, ຈັນທະບູລີມີ 362 ກໍລະນີ ເສຍຊີວິດ 2 ກໍລະນີ, ສີໂຄດຕະບອງ ມີ 539 ກໍລະນີ, ສີສັດຕະນາກ ມີ 339 ກໍລະນີ, ຫາດຊາຍຟອງ ມີ 268 ກໍລະນີ, ນາຊາຍທອງ ມີ 205 ກໍລະນີ, ສັງທອງ ມີ 21 ກໍລະນີ ແລະ ເມືອງປາກງຶ່ມ ມີ 29 ກໍລະນີ.

ດັ່ງນັ້ນ. ຮຽກຮ້ອງມາຍັງທຸກພາກສ່ວນຊ່ວຍເປັນເຈົ້າການໃນການຊີ້ນຳ ນຳພາ, ໃຫ້ການຮ່ວມມືໃນການສະກັດກັ້ນ ແລະ ຕ້ານພະຍາດໄຂ້ຍຸງລາຍ, ໂດຍການນໍາໃຊ້ມາດຕະການທີ່ສຳຄັນຫັນເອົາການມີສ່ວນຮ່ວມ ແລະ ເປັນເຈົ້າການຂອງບຸກຄົນ, ຄອບຄົວ ໃນການປະຕິບັດຫຼັກການ 5 ປ ຊຶ່ງຂະແໜງສາທາລະນະສຸກ ທີ່ກ່ຽວຂ້ອງຕ້ອງເປັນຜູ້ເຜີຍແຜ່ ແລະ ແນະນໍາວິທີການຈັດຕັ້ງປະຕິບັດພ້ອມທັງສະໜອງອຸປະກອນ, ຂໍ້ມູນທີ່ຈຳເປັນ ແລະ ອຳນວຍຄວາມສະດວກໃຫ້ແກ່ທີມງານຈັດຕັ້ງປະຕິບັດໂດຍສະເພາະຂັ້ນບ້ານກໍຄື: ອສບ ທີ່ເປັນຜູ້ຕິດຕາມຢ່າງໃກ້ຊິດໃນການທຳລາຍແຫຼ່ງເພາະພັນຢູ່ໃນຂັ້ນບ້ານ, ສະນັ້ນ. ອົງການປົກຄອງທຸກຂັ້ນ, ບັນດາພະແນກການອ້ອມຂ້າງ ແລະ ການຈັດຕັ້ງແຕ່ລະຂັ້ນໃຫ້ຖືເອົາວຽກງານນີ້ເປັນສຳຄັນ ແລະ ເປັນບຸລິມະສິດ ໃນການຈັດສັນເວລາສ້າງຂະບວນການອະນາໄມທໍາລາຍແຫຼ່ງເພາະພັນຍຸງທຸກໆອາທິດໃນສະຖານທີ່ເຮັດວຽກ, ທີ່ພັກອາໄສ ແລະ ສໍາຄັນອີກອັນໜຶ່ງຖ້າມີຄົນເປັນໄຂ້ແມ່ນໃຫ້ໄປກວດ ແລະ ປິ່ນປົວຢູ່ໂຮງໝໍຂອງລັດ ຫ້າມບໍ່ໃຫ້ໄປກວດຕາມຄຣີນິກ ຫຼື ຊື້ຢາມາກິນເອງ ສິ່ງສຳຄັນຫ້າມເດັດຂາດເວລາເຈັບເປັນບໍ່ໃຫ້ຊື້ຢາມາກິນເອງ ແລະ ປິ່ນປົວຕົນເອງຢູ່ບ້ານໂດຍການໃສ່ນໍາທະເລເພາະອາດຈະພາໃຫ້ມີອາການສົນ ແລະ ເປັນສາເຫດໃຫ້ເສຍຊີວິດໄດ້. ຂ່າວ,ພາບ: ບຸນອູ້ມ

ຜົນກະທົບຈາກການປະຕິວັດອຸດສາຫະກຳ 4.0 ແລະ ໂລກລະບາດໂຄວິດ – 19 ໄດ້ນຳມາຊຶ່ງສິ່ງທ້າທາຍ ແລະ ກາລະໂອກາດຫຼາຍຢ່າງຕໍ່ຫຼາຍຂະແໜງອາຊີບຢູ່ ຫວຽດນາມ. ທຸກໆຂະແໜງອາຊີບລ້ວນແຕ່ຕ້ອງປັບຕົວໃຫ້ແທດເໝາະ, ປ່ຽນແປງໃໝ່ ໝູນໃຊ້ເຕັກໂນໂລຢີສູງ, ຫັນເປັນດີຈີຕອນ ເພື່ອຄົງຕົວ ແລະ ພັດທະນາ. ທີ່ເວທີປາໄສເສດຖະກິດ ຫວຽດນາມ ປີ 2022 ຈັດຕັ້ງໂດຍຄະນະເສດຖະກິດສູນກາງ, ມີຫຼາຍຄຳເຫັນຢັ້ງຢືນວ່າ ຫວຽດນາມ ໄດ້ໝູນໃຊ້ປະສິດທິຜົນ ແລະ ກາລະໂອກາດຈາກການປ່ຽນແປງເຕັກໂນໂລຢີ ແລະ ຫັນເປັນດີຈີຕອນເພື່ອເພີ່ມຄວາມໄວບຸກທະລຸນັບທັງໃນໄລຍະທີ່ປະສົບກັບຄວາມຫຍຸ້ງຍາກທີ່ສຸດ.

ຕໍ່ໜ້າການພັດທະນາຂອງເຕັກໂນໂລຢີ, ມີວິສາຫະກິດຫຼາຍແຫ່ງ ຕ້ອງຫັນເປັນດີຈີຕອນຢ່າງແຮງເພື່ອຮັບມື. ນັບແຕ່ປີ 2019, ກຸ່ມບໍລິສັດ ລົກເຈິ່ຍ, ແມ່ນວິສາຫະກິດນຳໜ້າໃນການສ້າງລະບົບມູນຄ່າກະສິກຳແບບຍືນຍົງຢູ່ ຫວຽດນາມ, ໄດ້ກະກຽມໂທລະສັບສະມາດໂຟນນັບພັນໜ່ວຍໃຫ້ແກ່ຊາວກະສິກອນ ເພື່ອເພີ່ມທະວີການໝູນໃຊ້ເຕັກໂນໂລຢີໃນການເຊື່ອມຕໍ່ລະຫວ່າງການຜະລິດ ແລະ ບໍລິໂພກ. ປັດຈຸບັນມີ ປະມານ 80% ວິວັດການໝູນໃຊ້, ບໍລິຫານຄຸ້ມຄອງສັງລວມຈາກຫ້ອງການຕະຫຼອດຮອດການໝູນໃຊ້ວິທີການປູກຝັງ, ຕິດຕາມກວດກາຂັ້ນຕອນການຜະລິດ, ບໍລິໂພກສິນຄ້າ ລ້ວນແຕ່ໄດ້ນຳໃຊ້ໂປແກຼມນີ້.

ທ່ານ ຫງວຽນຢຸຍທ້ວນ, ຜູ້ອຳນວຍການໃຫຍ່ກຸ່ມບໍລິສັດລົກເຈິ່ຍ ໃຫ້ຮູ້ວ່າ: ໃນເນື້ອທີ່ດິນ 1 ລ້ານ ເຮັກຕາຂອງ ລົກເຈິ່ຍ ພວມໝູນໃຊ້ບັນດາມາດຖານທີ່ວ່າຫ້ອງການບໍ່ໃຊ້ເຈ້ຍ, ທົ່ງນາບໍ່ມີຮອຍຕີນ ແລະ ສະເພາະ 110.00 ເຮັກຕາຕົ້ນເຂົ້າຢູ່ແຂວງ ອານຢາງ, ພວກຂ້າພະເຈົ້າໄດ້ ແລະ ພວມໝູນໃຊ້ການຜະລິດແລກປ່ຽນການຄ້າໂດຍບໍ່ນຳໃຊ້ເງິນສົດ. ໄປຄຽງຄູ່ກັນນັ້ນ, ບາງທ້ອງຖິ່ນໄດ້ຈັດຕັ້ງແຜນທີ່ດີຈີຕອນໃນການປູກຝັງ. ນີ້ກໍ່ແມ່ນວຽກງານທຳອິດເພື່ອສ້າງທົ່ງນາຂະໜາດໃຫຍ່ ແລະ ຈາກນັ້ນ ກໍສ້າງປະສິດທິຜົນໃນການຜະລິດກະສິກຳໃນຂອບຂະໜາດໃຫຍ່.

ໄປຄຽງຄູ່ກັບບັນດາໝາກຜົນທີ່ບັນລຸໄດ້, ຫວຽດນາມ ພວມສືບຕໍ່ກຳນົດກົນໄກ, ນະໂຍບາຍທີ່ແທດຈິງເພື່ອສົ່ງເສີມວິສາຫະກິດນຳເຂົ້າເຕັກໂນໂລຢີ, ເປັນຕົ້ນແມ່ນຕໍ່ຂົງເຂດ, ຂະແໜງຫຼັກແຫຼ່ງ, ປາຍແຫຼມເພື່ອໝູນໃຊ້ເຂົ້າໃນການຜະລິດ, ດຳເນີນທຸລະກິດໂດຍໄວ ສ້າງບັນດາຜະລິດຕະພັນໃໝ່ທີ່ມີມູນຄ່າເພີ່ມສູງຂຶ້ນ. ຕາມທ່ານ ນາງປ.ອ ເຈິ່ນທິຮົ່ງມິງ, ຫົວໜ້າສະຖາບັນຄົ້ນເສດຖະກິດສູນກາງແລ້ວ, ນອກຈາກການລົງທຶນກ່ຽວກັບການປ່ຽນແປງໃໝ່ເຕັກໂນໂລຢີ ແລະ ຫັນເປັນດີຈີຕອນ, ພິເສດແມ່ນບຸກທະລຸດ້ານເຕັກໂນໂລຢີ ແມ່ນຕ້ອງເຊື່ອມຕໍ່ຢ່າງຄົບຊຸດເພື່ອກາຍເປັນລະບົບມູນຄ່າເພີ່ມຜົນກຳໄລ, ຫຼຸດຜ່ອນຄ່າໃຊ້ຈ່າຍ ແລະ ພິເສດກວ່ານັ້ນແມ່ນຕອບສະໜອງເປົ້າໝາຍພັດທະນາຍຸດທະສາດຂອງປະເທດຊາດ. ໄປຄຽງຄູ່ກັນນັ້ນ, ຕະຫຼາດວິທະຍາສາດເຕັກໂນໂລຢີຕ້ອງເຊື່ອມຕໍ່ກັນ, ກ້າວໄປເຖິງການຫັນບັນດາຕະຫຼາດສິນຄ້າ, ແຮງງານ ແລະ ການເງິນເປັນຄົບຊຸດ. ສຳຄັນກວ່ານັ້ນແມ່ນນະໂຍບາຍການເງິນເພື່ອຊຸກຍູ້ການປ່ຽນແປງໃໝ່ປະດິດຄິດສ້າງນັບທັງພາກລັດ ແລະ ພາກເອກະຊົນ, ພ້ອມກັນນັ້ນແມ່ນສືບຕໍ່ຍູ້ແຮງການຮ່ວມມືສາກົນ ໃນກົນໄກຫຼາຍຝ່າຍ. ທ່ານນາງ ປ.ອ ເຈິ່ນທິຮົ່ງມິງ ໃຫ້ຮູ້ວ່າ: ຜ່ານການເຂົ້າເປັນສະມາຊິກຂອງບັນດາອົງການຫຼາຍຝ່າຍກໍ່ຄື ເມື່ອພວກເຮົາເຂົ້າຮ່ວມບັນດາສົນທິສັນຍາການຄ້າເສລີ… ນີ້ກໍ່ແມ່ນກາລະໂອກາດໃຫຍ່ຫຼວງທີ່ສຸດໃຫ້ແກ່ພວກເຮົາເພື່ອສ້າງສະພາບແວດລ້ອມແຫ່ງຄວາມສະດວກ ອາດສາມາດຍູ້ແຮງການສົ່ງອອກ – ນຳເຂົ້າ. ພິເສດ, ຂ້າພະເຈົ້າຢາກເນັ້ນໜັກວ່າ ຫວຽດນາມ ຈະມີກາລະໂອກາດເພື່ອເຂົ້າຮ່ວມການໂອ້ລົມສົນທະນາ, ເພື່ອສາມາດສ້າງຄວາມສະດວກໃຫ້ແກ່ພວກເຮົາ ແລະ ວິສາຫະກິດ, ຈາກນັ້ນ ອາດຈະເປັນເຈົ້າການໃນການເຂົ້າຮ່ວມລະບົບສະໜອງ.

ມີນັກຊ່ຽວຊານດ້ານເສດຖະກິດຫຼາຍທ່ານໃຫ້ຂໍ້ສັງເກດວ່າ: ປັດຈຸບັນ, ໃນສະພາບການຮັບມືຢ່າງປອດໄພ, ມີໄຫວພິບ, ຄວບຄຸມພະຍາດໂຄວິດ – 19 ໃຫ້ມີປະສິດທິຜົນ, ນອກຈາກການເພີ່ມທະວີການຮ່ວມມືຢ່າງເລິກເຊິ່ງກວ້າງຂວາງ, ຍົກລະດັບລະບົບມູນຄ່າຂົງເຂດ, ຂະແໜງຈຸດສຸມທີ່ມີຄວາມສາມາດບົ່ມຊ້ອນ ແລະ ທ່າໄດ້ປຽບນັ້ນ ແມ່ນຕ້ອງສືບຕໍ່ສ້າງບາດກ້າວບຸກທະລຸກ່ຽວກັບລະບອບລະບຽບການພັດທະ ນາວິທະຍາສາດ, ເຕັກໂນໂລຢີ ແລະ ການປ່ຽນແປງໃໝ່ປະດິດຄິດສ້າງ ເພື່ອສ້າງບາດກ້າວບຸກທະລຸກ່ຽວກັບສະມັດຕະພາບ, ມີຄຸນນະພາບ, ມີປະສິດທະພາບ ແລະ ກຳລັງແກ້ງແຍ້ງ ຕອບສະໜອບຄວາມຮຽກຮ້ອງປ່ຽນແປງໃໝ່ຮູບແບບການເຕີບໂຕ, ຟື້ນຟູ ແລະ ພັດທະນາເສດຖະກິດ. ທ່ານ ຫງວຽນຮ່ວາງ ຢາງ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຢີ ກ່າວວ່າ: ຫວຽດນາມ ຄວນຕັ້ງໜ້າເຂົ້າຮ່ວມ ແລະ ສະໜັບສະໜູນບັນດາກົນໄກຫຼາຍຝ່າຍ ແຕ່ກໍ່ຕ້ອງພິຈາລະນາ, ກວດກາດ້ານເສດຖະກິດຄືນ ໃໝ່ ເພື່ອຮັບປະກັນຄວາມເປັນເຈົ້າການໃນການໂອ້ລົມສົນທະນາ, ພ້ອມກັນແກ້ໄຂບັນດາບັນຫາທີ່ມີລັກ ສະນະພາກພື້ນ ຫຼຸດຜ່ອນຄວາມສ່ຽງໃນລະບົບສະໜອງທົ່ວໂລກ. ໄປຄຽງຄູ່ກັນນັ້ນ, ເພື່ອປັບປຸງທີ່ຕັ້ງໃນລະບົບສະໜອງ ຕ້ອງກຳນົດໄດ້ລັກສະນະຮີບດ່ວນ ແລະ ຄວາມເປັນເຈົ້າການຂອງວິສາຫະກິດ, ໃນຂອດກະກຽມບຳລຸງສ້າງ ແລະ ພິເສດແມ່ນດຶງດູດແຫຼ່ງຊັບພະຍາກອນທີ່ມີຄຸນນະພາບສູງ ກ່ຽວກັບເຕັກໂນໂລ ຢີ, ການເຫັນເປັນດີຈີຕອນ ເພື່ອຮັບໃຊ້ໃຫ້ແກ່ລະບົບພັດທະນາຜະລິດຕະພັນ.

ຫວຽດນາມ ຕັ້ງເປົ້າໝາຍຮອດປີ 2030, ວິທະຍາສາດ, ເຕັກໂນໂລຢີ ແລະ ການປ່ຽນແປງໃໝ່ປະດິດຄິດສ້າງ ສວມບົດບາດສຳຄັນໃນການພັດທະນາເຕັກໂນໂລຢີປາຍແຫຼມ, ຈຸດສຸມ ນັ້ນແມ່ນວິສາຫະກິດປຸງແຕ່ງ, ຜະລິດ, ປະກອບສ່ວນສຳຄັນເຂົ້າໃນກົນໄກສ້າງຄົງປະກອບພື້ນຖານເສດຖະກິດຄືນໃໝ່ຕາມທິດທັນສະໄໝ, ເຮັດໃຫ້ຫວຽດນາມກາຍເປັນປະເທດທີ່ມີເຕັກໂນໂລຢີທັນສະໄໝ. ໃນສະພາບການນັ້ນ, ມີວິສາຫະກິດຫຼາຍແຫ່ງ ໄດ້ ແລະ ພວມກຽມພ້ອມໝູນໃຊ້ບັນດາກາລະໂອກາດຈາກການປະຕິວັດເຕັກໂນໂລຢີ, ຫັນເປັນດີຈີຕອນຢ່າງແຂງແຮງເພື່ອສອດຄ່ອງ ແລະ ພັດທະນາຢ່າງບຸກທະລຸ.

ຮຽບຮຽງໂດຍ: ລຸ້ງດາວ

ຂ່າວສານຊີອາໄອລາຍງານ ເມື່ອທ້າຍອາທິດທີ່ຜ່ານມານີ້, ທ່ານ ດຣ.ເທໂດຼສ ອາດຮານອມ ເກເບຼເຢຊຸສ ຜູ້ອຳນວຍການໃຫຍ່ຂອງອົງການອະນາໄມໂລກ (WHO) ປະກາດວ່າ: ປັດຈຸບັນນີ້ສະພາບພະຍາດໝາກສຸກລີງທີ່ໄດ້ແຜ່ລະບາດຢູ່ 75 ປະເທດ ແລະ ເຂດແຄ້ວນໄດ້ກາຍເປັນເຫດການສຸກເສີນດ້ານສາທາລະນະສຸກທີ່ສາກົນຕ້ອງເອົາໃຈໃສ່, ນີ້ແມ່ນການເຕືອນໄພສາທາລະນະສຸກທີ່ມີລະດັບສູງສຸດ ຊຶ່ງຖືກປະກາດໂດຍ WHO.

ທ່ານ ດຣ.ເທໂດຼສ ຍັງໄດ້ກ່າວຕື່ມວ່າ: ເຖິງແມ່ນວ່າ, ທ່ານໄດ້ປະກາດວ່າ ສະພາບພະຍາດໝາກສຸກລີງໄດ້ເປັນເຫດການສຸກເສີນດ້ານສາທາລະນະສຸກທີ່ສາກົນຕ້ອງເອົາໃຈໃສ່ກໍຕາມ ແຕ່ວ່າເມື່ອພິຈາລະ ນາໃນປັດຈຸບັນ, ສາມາດຜ່ານຈາກການນຳໃຊ້ມາດຕະການທີ່ຖືກຕ້ອງໃນກຸ່ມຄົນເປົ້າໝາຍທີ່ຖືກຕ້ອງເພື່ອສະກັດກັ້ນສະພາບພະຍາດ.

ຂ່າວສານຊີອາໄອລາຍງານ ເມື່ອທ້າຍອາທິດທີ່ຜ່ານມານີ້, ທະນາຄານພັດທະນາອາຊີ (ADB) ໄດ້ເປີດເຜີຍບົດລາຍງານການສັງເກດການພັດທະນາທະວີບອາຊີປະຈຳປີ 2022 ເພີ່ມຕື່ມໂດຍໄດ້ປັບຫຼຸດໂຕເລກການຄາດຄະເນການເຕີບໂຕທາງດ້ານເສດຖະກິດປະຈຳປີ 2022 ຂອງປະເທດກຳລັງພັດທະນາຢູ່ພາກພື້ນອາຊີປາຊີຟິກຈາກ 5,2% ລົງເປັນ 4,6%.

ບົດລາຍງານລະບຸວ່າ: ຍ້ອນສະພາບພະຍາດໂຄວິດ-19 ຍັງສືບຕໍ່ລະບາດຢູ່, ວິກິດການໂລກໃນປັດຈຸບັນ, ປະເທດທີ່ພັດທະນາແລ້ວໄດ້ນຳໃຊ້ນະໂຍບາຍດ້ານການເງິນທີ່ຮັດກຸມ ແລະ ເຂັ້ມງວດກວ່າເກົ່າບວກກັບປັດໄຈອື່ນໆ ແມ່ນສາເຫດຕົ້ນຕໍທີ່ເຮັດໃຫ້ໂຕເລກການຄາດຄະເນການເຕີບໂຕທາງດ້ານເສດຖະ ກິດປະເທດກຳລັງພັດທະນາຢູ່ພາກພື້ນອາຊີ-ປາຊີຟິກຫຼຸດລົງ.

ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ທ່ານ ນິໂຄໄລ ຊູນກິນອບ ລັດຖະມົນຕີກະຊວງພະລັງງານຂອງຣັດເຊຍໄດ້ເປີດເຜີຍວ່າ: ການຜະລິດນໍ້າມັນຂອງປະເທດໃນໄລຍະ 6 ເດືອນຕົ້ນ 2022 ເພີ່ມຂຶ້ນ 3,4% ເມື່ອທຽບແບບລາຍປີ ຂະນະທີ່ການຜະລິດແກ໊ສທຳມະຊາດຫຼຸດລົງ 5%.

ຂະນະທີ່ການຜະລິດຖ່ານຫີນຍັງຄົງຢູ່ໃນລະດັບດຽວກັບໄລຍະເວລາດຽວກັນຂອງປີ 2021 ສ່ວນການຜະລິດນ້ຳມັນກາຊວນ ແລະ ນ້ຳມັນແອັດຊັງເພີ່ມຂຶ້ນ 4,5%. ທ່ານ ຊູນກິນອບ ກ່າວວ່າ ໃນໄລຍະ 6 ເດືອນຕົ້ນປີນີ້ ຂະແໜງພະລັງງານຂອງຣັດເຊຍສາມາດປັບປ່ຽນການດຳເນີນງານໃຫ້ເຂົ້າກັບສະພາບເສດຖະກິດທີ່ຍາກລຳບາກ ພ້ອມທັງກ່າວວ່າ ຕະຫຼາດພະລັງງານພາຍໃນປະເທດມີສະຖຽນລະພາບ ແລະ ບໍ່ປະເຊີນກັບບັນຫາທາງດ້ານການຈັດຫາພະລັງງານ.

ວິທະຍຸກະຈາຍສຽງຫວຽດນາມລາຍງານ: ວັນທີ 24 ກໍລະກົດຜ່ານມາ, ຢູ່ຫໍວັດທະນະທຳມິດຕະ ພາບ ຮ່າໂນ້ຍ, ໄດ້ມີພິທີລະນຶກວັນທະຫານເສຍອົງຄະ ແລະ ນັກຮົບເສຍສະຫຼະຊີວິດເພື່ອຊາດຄົບ ຮອບ 75 ປີ ແລະ ຍ້ອງຍໍຊົມເຊີຍບັນດາຜູ້ແທນທີ່ມີຄຸນງາມຄວາມດີຕໍ່ການປະຕິວັດໃນທົ່ວປະເທດ ປີ 2022. ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມ ແລະ ກ່າວຄຳເຫັນໃນພິທີ. ເຂົ້າຮ່ວມພິທີດັ່ງກ່າວ ຍັງມີອະດີດການນຳຂັ້ນສູງ ຫວຽດນາມ ພ້ອມດ້ວຍຜູ້ແທນດີເດັ່ນ 450 ຄົນ ທີ່ຕາງໜ້າໃຫ້ຜູ້ມີຄຸນງາມຄວາມດີ ແລະ ຍາດຕິພີ່ນ້ອງຂອງຜູ້ມີຄຸນງາມຄວາມດີເກືອບ 10 ລ້ານຄົນ ໃນທົ່ວປະເທດ.

ກ່າວຄຳເຫັນໃນພິທີ, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ຝາກຄຳຢື້ຢາມຖາມຂ່າວ, ນ້ຳໃຈຄວາມຮັກແພງຢ່າງເລິກເຊິ່ງ ແລະ ຄວາມຮູ້ບຸນຄຸນຢ່າງລົ້ນເຫຼືອຕໍ່ນັກປະຕິວັດຜູ້ອາວຸໂສ, ແມ່ຫວຽດນາມ ວິລະຊົນ, ວິລະຊົນກຳລັງປະກອບອາວຸດປະຊາຊົນ, ວິລະຊົນແຮງງານ, ທະຫານເສຍອົງຄະ, ທະຫານເຈັບປ່ວຍ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດ ແລະ ຜູ້ມີຄຸນງາມຄວາມດີຕໍ່ການປະຕິ ວັດ.

ເພື່ອຜັນຂະຫຍາຍວຽກງານຮູ້ບຸນຄຸນ, ການຕອບບຸນແທນຄຸນ, ແທດຈິງ ແລະ ມີປະສິດທິຜົນໃນໄລຍະຜ່ານມາ, ທ່ານປະທານປະເທດ ໄດ້ສະເໜີໃຫ້ລັດຖະບານ, ທຸກຄະນະ, ຂະແໜງການ, ທ້ອງຖິ່ນຕ່າງໆ ຈົ່ງສືບຕໍ່ໂຄສະນາເຜີຍແຜ່ຢ່າງກວ້າງຂວາງກວ່າອີກ ກ່ຽວກັບແຜນນະໂຍບາຍ, ນະໂຍບາຍຂອງພັກ, ລັດ ທີ່ມີຕໍ່ທະຫານເສຍອົງຄະ, ທະຫານເຈັບປ່ວຍ, ຄອບຄົວນັກຮົບເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີ ໃນໝູ່ພະນັກງານ, ສະມາຊິກພັກ ແລະ ປະຊາຊົນ. ພ້ອມດຽວກັນນັ້ນ, ປະຕິບັດນະໂຍ ບາຍບຸລິມະສິດສຳລັບຜູ້ມີຄຸນງາມຄວາມດີໃຫ້ເປັນຢ່າງດີ, ສ້າງສັງຄົມທີ່ເຕັມໄປດ້ວຍຄວາມເມດຕາປານີ, ມະນຸດສະທຳ, ປັບປຸງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ສະແດງຢ່າງເລິກເຊິ່ງລັກສະນະດີເລີດ ແລະ ທາດແທ້ອັນດີງາມຂອງລະບອບ ຫວຽດນາມ, ປະກອບສ່ວນເຂົ້າໃນການເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ ແລະ ລັດ.

ຢູ-8 ມາຊດ້າ ຫຼື Mazda GB FC U8 ຕົວແທນຈາກ ສປປ ລາວ ເຂົ້າຮ່ວມການແຂ່ງຂັນ ລາລິກາ ຢຸດ ທົວນາເມັນ 2022 (LaLiga Youth Tournament 2022) ຈັດຂຶ້ນລະຫວ່າງວັນທີ 23-24 ກໍລະກົດ 2022 ທີ່ເມືອງປີນັງ ປະເທດມາເລເຊຍ ຊຶ່ງເປັນໂຄງການຂອງ ລີກລາລິກາ ຈາກປະເທດສະເປນ ສົ່ງເສີມນັກເຕະຮຸ່ນສືບທອດທີ່ມີພອນສະຫວັນດີເດັ່ນໃນຂົງເຂດອາຊຽນ ເພື່ອກ້າວສູ່ການເປັນນັກກິລາອາຊີບໃນອະນາຄົດຂອງລີກອາຊີບ ປະເທດສະເປນ ຜົນການແຂ່ງຂັນໃນແຕ່ລະນັດ.ນັດທີ 1 ຊະນະ Kulai Intelek FC U8 2-0, ນັດທີ 2 ຊະນະ Akademi Wira Muda 2-1

ນັດທີ 3 ສະເໝີກັບ ATPP 0-0 ລວມມີ 7 ຄະແນນ ຜ່ານເຂົ້າໄປຫຼິ້ນໃນ ລາຍການດິວິຊັ່ນ 1 ລົງສະໜາມ 3 ນັດ ນັດທີ 1 ຊະນະ ATPP 3-2, ນັດທີ 2 ຊະນະ Motta Arata FC 1-0, ນັດທີ 3 ສະເໝີກັບ NFDP Johor 0-0. ລວມມີ 7 ຄະແນນ ຜົນງານດີກວ່າທຸກທີມທີ່ເຂົ້າຮ່ວມ ຍິງໄດ້ 8 ປະຕູ ເສຍ 3 ປະຕູ ຄວ້າແຊັມມາຄອງ.

(ຂໍ້ມູນຈາກ: ສະຫະພັນບານເຕະແຫ່ງຊາດລາວ)

ພິທີເຊັນບົດບັນທຶກຄວາມຮ່ວມມື ຫຼື MOC ເພື່ອສໍາຫຼວດ ສຶກສາ ຄວາມເປັນໄປໄດ້ ດ້ານພະລັງງານຄວາມຮ້ອນໃຕ້ພິພົບ ຂະໜາດກຳລັງການຕິດຕັ້ງ 4.000 MW ໄດ້ຈັດຂຶ້ນໃນວັນທີ 22 ກໍລະກົດ ຜ່ານມານີ້ ທີ່ ນະຄອນຫຼວງວຽງຈັນ ລະຫວ່າງ ທ່ານ ສຸວັນໄຊ ຫຼັກໄມຕຣີ ປະທານບໍລິສັດ ລາວພັດທະນາກໍ່ສ້າງ ແລະ ການລົງທຶນ ຈຳກັດ ກັບທ່ານ ເພັດສະຫວັນ ລັດຕະນະທອງໄຊ ຫົວໜ້າກົມພະລັງງານ, ກະຊວງພະລັງງານ ແລະ ບໍ່ແຮ່ ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ສີນາວາ ສຸພານຸວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ມີ ທ່ານ ນາງ ເຈິ້ນ ທິ ຮວາງ ຮາ CEO ບໍລິສັດ ເວວ ພາວເວີ ກຣຸບ ສສ ຫວຽດນາມ (Wealth Power Group Vietnam) ພ້ອມຄະນະ ແລະ ແຂກທີ່ມີກຽດເຂົ້າຮ່ວມ.

ໃນໂອກາດດັ່ງກ່າວ, ທ່ານ ສີນາວາ ສຸພານຸວົງ ກ່າວວ່າ: ບໍລິສັດ ລາວພັດທະນາກໍ່ສ້າງ ແລະ ການລົງທຶນ ຈຳກັດ ເປັນບໍລິສັດນຳໜ້າທຳອິດ ທີ່ໄດ້ຄົ້ນຄວ້າສຶກສາຄວາມເປັນໄປໄດ້ ໃນການນຳໃຊ້ພະລັງງານຄວາມຮ້ອນໃຕ້ພິພົບ ເພື່ອຜະລິດເປັນພະລັງງານໄຟຟ້າ ຊຶ່ງເປັນສິ່ງສຳຄັນທີ່ສຸດ ເພາະວ່າ ຄວາມຫຼາຍຮູບຫຼາຍແບບຂອງພະລັງງານຈະນຳໄປສູ່ຄວາມເຂັ້ມແຂງ ຄວາມໝັ້ນຄົງທາງດ້ານພະລັງງານໄຟຟ້າຂອງປະເທດເຮົາ, ປັດຈຸບັນພະລັງງານໄຟຟ້າ ທີ່ຜະລິດຢູ່ລາວ ກວມ 70% ແມ່ນມາຈາກພະລັງງານນ້ຳ ນອກຈາກນັ້ນເຮົາຍັງມີພະລັງງານທາງເລືອກ ເຊັ່ນພະລັງງານລົມ, ພະລັງງານແສງຕາເວັນ, ພະລັງງານຊີວະພາບ ແລະ ບວກໃສ່ພະລັງງານໃຕ້ພິພົບ ຊຶ່ງເປັນພະລັງງານທາງໃໝ່ຂອງລາວ ພາຍຫຼັງສຳເລັດຈະເຮັດໃຫ້ລາວ ມີຄວາມເຂັ້ມແຂງ ແລະ ມີຄວາມໝັ້ນຄົງທາງດ້ານພະລັງງານຍິ່ງຂຶ້ນ.

ສຳລັບພະລັງງານຄວາມຮ້ອນໃຕ້ພິພົບນີ້ ບໍ່ແມ່ນພຽງແຕ່ສະໜອງໄຟຟ້າເທົ່ານັ້ນ ແຕ່ມັນຍັງເປັນຜົນປະໂຫຍດ ແລະ ບາດກ້າວສຳຄັນ ທີ່ຈະຫຼຸດຜ່ອນການນຳໃຊ້ຖ່ານຫີນໃນການຜະລິດໄຟຟ້າຢູ່ລາວເທື່ອລະກ້າວ, ກະຊວງພະລັງງານ ແລະ ບໍ່ແຮ່ ຝາກຄວາມຫວັງໄວ້, ພະລັງງານຄວາມຮ້ອນໃຕ້ພິພົບ ເປັນພະລັງງານສີຂຽວທີ່ສຸດ ແລະ ນຳໃຊ້ເນື້ອທີ່ດິນໃນການກໍ່ສ້າງບໍ່ຫຼາຍ ບໍ່ທຳລາຍສິ່ງແວດລ້ອມ.

ຂະນະດຽວກັນ ທ່ານ ສຸວັນໄຊ ຫຼັກໄມຕຣີ ໄດ້ກ່າວວ່າ: ປັດຈຸບັນ ບໍລິສັດ ລາວພັດທະນາ ກໍ່ສ້າງ ແລະ ການລົງທຶນ ຈຳກັດ ໄດ້ຮ່ວມກັບ ບໍລິສັດ GEIOS ຕັດສິນໃຈລົງທຶນພັດທະນາດ້ານພະລັງງານຄວາມຮ້ອນທາງເລືອກໃໝ່ຢູ່ໃຕ້ພິພົບ ເພື່ອສ້າງຄວາມໝັ້ນຄົງດ້ານພະລັງງານໄຟຟ້າແກ່ ສປປ ລາວ ກໍຄືການສ້າງລາຍຮັບໃຫ້ແກ່ປະເທດຊາດ, ພ້ອມນີ້ ບໍລິສັດຂອງຂ້າພວກເຮົາ ແລະ ບໍລິສັດ GEIOS ໄດ້ມີຄວາມພ້ອມດ້ານແຫຼ່ງທຶນ ແລະ ດ້ານເຕັກນິກ ເຕັກໂນໂລຊີ ທີ່ທັນສະໄໝແລ້ວ ເພື່ອກໍ່ສ້າງໂຄງການດັ່ງກ່າວໃຫ້ບັນລຸຕາມເປົ້າໝາຍທີ່ກຳນົດໄວ້.

ສຳລັບໂຄງການພະລັງງານຄວາມຮ້ອນໃຕ້ພິພົບນີ້ ບໍລິສັດ ລາວພັດທະນາ ກໍ່ສ້າງ ແລະ ການລົງທຶນ ຈຳກັດ ຮ່ວມກັບ ບໍລິສັດ GEIOS ຈະໄດ້ນໍາໃຊ້ທຶນຂອງຕົນເອງ 100% ແລະ ມີຕະຫຼາດຮັບຊື້ໄຟຟ້າເປັນທີ່ຮຽບຮ້ອຍແລ້ວ ໂດຍຈະບໍ່ສ້າງໜີ້ສິນໃຫ້ແກ່ປະເທດຊາດ ກົງກັນຂ້າມຈະນຳເອົາຜົນປະ ໂຫຍດມາໃຫ້ 3 ຝ່າຍຄື: ລັດຖະບານ, ປະຊາຊົນ ແລະ ຜູ້ລົງທຶນ ເມື່ອປະເທດເຮົາມີລາຍຮັບທີ່ແນ່ນອນແລ້ວ ກໍຈະເຮັດໃຫ້ປະຊາຊົນມີຊີວິດການເປັນຢູ່ທີດີຂຶ້ນ ແລະ ຫຼຸດພົ້ນອອກຈາກປະເທດດ້ອຍພັດທະນາເທື່ອລະກ້າວ, ພິເສດ ໂຄງການນີ້ຍັງສາມາດຂາຍໄຮໂດຣເຈນ (Hydrogen) ແລະ ຍັງຈະມີລາຍຮັບຈາກ ຄາບອນ ເຄຣດິດ (Carbon Credit) ທີ່ຕ່າງປະເທດຈ່າຍໃຫ້ ເພາະເປັນໂຄງການສີຂຽວ ແລະ ສະອາດ ທັງເປັນມິດຕໍ່ສິ່ງແວດລ້ອມອີກດ້ວຍ.

ຂໍ້ມູນຈາກ: ຂປລ