ໃນປີ 2022, ເຖິງວ່າເມືອງທຸລະຄົມ ແຂວງວຽງຈັນ ຈະພົບກັບຄວາມຫຍຸ້ງຍາກຫຼາຍປະການ ໂດຍສະເພາະຜົນກະທົບເກີດຈາກການແຜ່ລະບາດຂອງພະຍາດໂຄວິດ-19, ສະພາບດ້ານເສດຖະກິດ-ການເງິນ, ນໍ້າມັນຂຶ້ນລາຄາ, ຄ່າຄອງຊີບສູງຂຶ້ນ, ແຕ່ດ້ວຍຄວາມຕັດສິນໃຈ ແລະ ຄວາມຮັບຜິດຊອບສູງຕໍ່ໜ້າທີ່ການເມືອງ. ອົງຄະນະພັກເມືອງ ໄດ້ພ້ອມພຽງຮຽງໜ້າກັນຊີ້ນໍາ-ນໍາພາພະນັກງານ, ທະຫານ-ຕໍາຫຼວດ ຕະຫຼອດຮອດປະຊາຊົນບັນດາເຜົ່າພາຍໃນເມືອງ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ,ປະຕິບັດມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງ ຈຶ່ງເຮັດໃຫ້ເມືອງທຸລະຄົມມີຜົນງານຫຼາຍດ້ານເຊັ່ນ: ດ້ານວຽກງານການເມືອງແນວຄິດ, ວຽກງານປັບປຸງການຈັດຕັ້ງ ແລະ ວຽກງານກໍ່ສ້າງຮາກຖານ ຕິດພັນກັບວຽກງານສາມສ້າງໄດ້ເອົາໃຈໃສ່ປຸກລະດົມປະຊາຊົນບັນດາເຜົ່າໄປຕາມການຊີ້ນໍາ-ນໍາພາຂອງພັກ, ເຊື່ອໝັ້ນຕໍ່ບົດບາດການກໍາອໍານາດຂອງພັກ, ມີແນວຄິດອຸ່ນອ່ຽນທຸ່ນທ່ຽງ, ເສີມຂະຫຍາຍສິດເປັນເຈົ້າໃນລະບອບປະຊາທິປະ ໄຕປະຊາຊົນ, ເຊີດຊູນໍ້າໃຈສາມັກຄີ, ນໍ້າໃຈຮັກເຊື້ອແພງຊາດຮັກບ້ານເກີດເມືອງນອນ; ນໍາເອົາມະຕິ, ຄໍາສັ່ງ ແລະ ນິຕິກໍາຂອງຂັ້ນເທິງວາງອອກຈັດຕັ້ງເຊື່ອມຊຶມແຕ່ຂັ້ນເມືອງຮອດຂັ້ນພື້ນຖານ, ປຸກລະດົມທົ່ວສັງຄົມໃຫ້ເອົາໃຈໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ, ເປັນເຈົ້າການຊ່ວຍເຈົ້າໜ້າທີ່ໃນການຕິດຕາມ, ລາຍງານການເຄື່ອນໄຫວຂອງກຸ່ມຄົນບໍ່ດີ, ເປັນເຈົ້າການຕ້ານ, ​ສະກັດກັ້ນ ແລະ ແກ້ໄຂ ການເຄື່ອນໄຫວຂອງກຸ່ມຄົນບໍ່ດີໃນທຸກຮູບການ; ປະຊາຊົນບັນດາເຜົ່າທຸກຊັ້ນຄົນ ແລະ ສາຂາອາຊີບຕ່າງໆ ເຂົ້າຮ່ວມວຽກງານຂະບວນການ, ສູ້ຊົນບຸກບືນປະຕິບັດໜ້າທີ່ຂອງຕົນ, ເອົາໃຈໃສ່ສ້າງເສດຖະກິດຄອບຄົວປັບປຸງຊີວິດການເປັນຢູ່ໃຫ້ນັບວັນດີຂຶ້ນ; ຄະນະພັກ-ອົງການປົກຄອງເມືອງ ມີຄວາມເອກະພາບລວມສູນ ຕັ້ງໜ້າປະຕິບັດໜ້າທີ່ການເມືອງ ແລະ ຄວາມຮັບຜິດຊອບຂອງຕົນ, ເຊີດຊູຄວາມເປັນແບບເປັນຢ່າງໃຫ້ມະຫາຊົນ ແລະ ປະຊາຊົນບັນດາເຜົ່າ, ຕ້ານ, ສະກັດກັ້ນ ແລະ ແກ້ໄຂແນວຄິດຄອງເດີມ, ຂາດຫົວຄິດປະດິດສ້າງ, ແນວຄິດຄັບແຄບ, ຮັບຟັງຄວາມມຸ່ງມາດປາຖະໜາ, ຄວາມຂັດຂ້ອງໝອງໃຈຂອງປະຊາຊົນ, ເພີ່ມທະວີຄວາມສັກສິດຂອງອໍານາດລັດ, ວຽກງານຍຸຕິທໍາຮາກຖານ, ຄວາມຍຸຕິທໍາ ແລະ ເປັນລະບຽບຮຽບຮ້ອຍໃນສັງຄົມ ແລະ ອໍານວຍຄວາມສະດວກໃຫ້ແກ່ການສ້າງບ້ານນາມມະຍົດແຕ່ລະດ້ານໃຫ້ຮັບປະກັນຄຸນນະພາບ ແລະ ປະລິມານ; ສໍາລັບວຽກງານສ້າງແຜນກໍານົດພະນັກງານນໍາພາ-ຄຸ້ມຄອງສໍາເລັດໃນທົ່ວເມືອງ, ການປັບປຸງສັບຊ້ອນ, ແຕ່ງຕັ້ງ ແລະ ຈັດວາງບຸກຄະລາກອນ ແມ່ນສໍາເລັດແຕ່ຂັ້ນເມືອງຮອດຂັ້ນບ້ານ, ທົ່ວເມືອງມີ 6 ຄະນະພັກຮາກຖານ, ມີ 118 ໜ່ວຍພັກສາມາດປະກາດຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຈໍານວນ 81 ໜ່ວຍ, ສ້າງແຜນຮັບຮອງໃນການປະກາດຮັບຮອງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຕື່ມອີກ ຈໍານວນ 31 ໜ່ວຍໃນປີ 2023;ໄດ້ຫັນເອົາພະນັກງານລົງກໍ່ສ້າງຮາກຖານ ຕິດພັນກັບການປະຕິບັດວຽກງານ 3 ສ້າງ ເພື່ອໃຫ້ພະນັກງານໄດ້ຕິດພັນກັບປະຊາຊົນ, ຮັບຮູສະພາບການຢູ່ຂັ້ນບ້ານ ພ້ອມທັງເປັນຜູ້ນໍາພາການຈັດຕັ້ງບ້ານ ແລະ ປະຊາຊົນ, ນໍາເອົາຄວາມຮູ້, ທິດສະດີ ໄປປະຕິບັດໃຫ້ເຫັນໄດ້ພຶດຕິກໍາຕົວຈິງດ້ານດີ ແລະ ດ້ານອ່ອນ ເພື່ອປັບປຸງແກ້ໄຂໃຫ້ຄ່ອງແຄ້ວ, ປັດຈຸບັນໃນ 5 ກຸ່ມບ້ານ ມີພະນັກງານລົງກໍ່ສ້າງຮາກຖານການເມືອງທັງໝົດ 20 ສະຫາຍ ຍິງ 5 ສະຫາຍ, ພະນັກງານ 3 ສ້າງ 15 ສະຫາຍ ຍິງ 6 ສະຫາຍ.

ວຽກງານປ້ອງກັນຊາດ ແລະ ປ້ອງກັນຄວາມສະຫງົບ: ຄະນະກໍາມະການປ້ອງກັນຊາດ ແລະ ປ້ອງກນຄວາມສະຫງົບເມືອງ ໄດ້ເອົາໃຈໃສ່ເຄື່ອນໄຫວວຽກງານຕາມຂອບເຂດສິດໜ້າທີ່ພາລະບົດບາດຂອງຕົນ ເພື່ອປົກປັກຮັກສາເຂດນໍ້າແດນດິນ-ນ່ານຟ້າຂອງເມືອງ, ຈໍາກັດ ແລະ ແກ້ໄຂທຸກການເຄື່ອນໄຫວຂອງພວກສັດຕູ ແລະ ກຸ່ມຄົນບໍ່ດີທີ່ເຄື່ອນໄຫວຢູ່ພາຍໃນເມືອງ, ຊຸກຍູ້ໃຫ້ 2​ ກໍາລັງປະກອບອາວຸດຂອງເມືອງ ເຄື່ອນໄຫວປະສານສົມທົບກັບບັນດາກໍາລັງວິຊາສະເພາະ, ກໍາລັງຂອງກະຊວງປ້ອງກັນປະເທດທີ່ປະຈໍາການຢູ່ເມືອງທຸລະຄົມ ໄດ້ປະຕິບັດໜ້າທີ່ຢ່າງເຕັມສ່ວນ; ສາມາດປະກາດຮັບຮອງບ້ານປ້ອງກັນຊາດເຂັ້ມແຂງ ໄດ້ແລ້ວ 6 ບ້ານ, ບ້ານປ້ອງກັນຄວາມສະຫງົບດີ ໄດ້ 25 ບ້ານ, ການປະຕິບັດວາລະແຫ່ງຊາດາດກ້າວທີ 2 ສໍາເລັດແລ້ວ 39 ບ້ານ, ບັນດາພະນັກງານເຫຼົ່າຮົບວິຊາສະເພາະໄດ້ຮັບການຝຶກອົບຮົມ ແລະ ຫັດແອບ, ກໍາລັງ ປກຊ-ປກສ ຂັ້ນບ້ານໄດ້ສໍາເລັດການຝຶກອົບຮົມໄລຍະສັ້ນ.

ສໍາລັບການພັດທະນາເສດຖະກິດ, ວັດທະນະທໍາ-ສັງຄົມ: ໂດຍອີງໃສ່ທ່າແຮງບົ່ມຊ້ອນຂອງເມືອງເປັນຕົ້ນມີຄວາມສະດວກດ້ານລະບົບຊົນລະປະທານຈາກການສະໜອງນໍ້າຂອງສາຍນໍ້າງື່ມ, ເຂື່ອນນໍ້າມັງ 3 ແລະ ອ່າງນໍ້າປອດ-ນໍ້າຫາງ, ເປັນເມືອງທີ່ມີເນື້ອທີ່ດິນອຸດົມສົມບູນ ແລະ ກວ້າງຂວາງ ບວກກັບມູນເຊື້ອຂອງຊາວເມືອງທີ່ມີຄວາມດຸໝັ່ນຂະຫຍັ່ນພຽນ ຈຶ່ງມີເງື່ອນໄຂເອື້ອອໍານວຍທາງດ້ານວຽກງານການຜະລິດກະສິກໍາ, ບັນດາອົງການຈັດຕັ້ງຕ່າງໆ ແລະ ນິຕິບຸກຄົນໄດ້ຫັນມາລົງທຶນຢູ່ເມືອງຫຼາຍຂຶ້ນ, ເປັນຕົ້ນໂຄງການສົ່ງເສີມການຜະລິດເປັນສິນຄ້າຄໍ້າສະບຽງອາຫານຂອງທະນາຄານໂລກ ແລະ ໂຄງການອື່ນໆ ນອກຈາກນັ້ນບັນດາຊາວກະສິກອນ-ຊາວສວນໃນຫຼາຍບ້ານກໍໄດ້ຮັບການຝຶກອົບຮົມກ່ຽວກັບການຜະລິດເຄື່ອງຮັບໃຊ້ໃນຮູບແບບຫັດຖະກໍາອຸດສາຫະກໍາຄອບຄົວ ແລະ ຕົວແບບດ້ານການປູກຝັງລ້ຽງສັດ ຈົນສາມາດສ້າງເປັນຕົວແບບໃນຫຼາຍດ້ານເຊັ່ນ: ກຸ່ມປູກຜັກສະອາດເປັນສິນຄ້າ 10 ກຸ່ມ, ກຸ່ມຜະລິດແນວພັນເຂົ້າຈໍານວນ 8 ກຸ່ມ, ກຸ່ມຜະລິດພືດຜັກ 18 ກຸ່ມ, ກຸ່ມລ້ຽສັດໃຫຍ່ 1 ກຸ່ມ, ກຸ່ມລ້ຽງປາ 3 ກຸ່ມ, ກຸ່ມລ້ຽງໄກ່ລາດ 1 ກຸ່ມ, ຄອບຄົວຕົວແບບການປູກໝາກແຕງເມລອນ, ຫັດຖະກໍາຖັກຟອຍກວດ, ການຜະລິດເຕົາໂລ້, ການຜະລິດກະຕ່າຂອງຂວັນ, ການແປຮູບປາແດດດຽວ, ການແປຮູບຂີ້ໝິ້ນ ແລະ ການແປຮູບໝາກຖົ່ວດິນ ທີ່ມີລັກສະນະອຸດສາຫະກໍາແບບຄອບຄົວທີ່ຍືນຍົງ, ອັນພົ້ນເດັ່ນແມ່ນການປູກໝາກແຕງຫວານຂອງ ທ້າວ ວິໄລພອນ ອິນທະວົງ ບ້ານໄຮຢ່ອນ ແລະ ສວນປູກໝາກຖົ່ວລຽນພູຄໍ້າຄໍາ ບ້ານນາເພີຍຂອງ ທ່ານ ປັນຈາ ລາດຊະວົງ ຊຶ່ງກໍາລັງມີຊື່ສຽງຂອງເມືອງ, ຈາກບັນດາປັດໄຈດ້ານຕ່າງໆທີ່ກ່າວມາ ເຮັດໃຫ້ເມືອງທຸລະຄົມມີເສດຖະກິດຂະຫຍາຍຕົວທີ່ໝັ້ນທ່ຽງຖືກທິດໃນນັ້ນເສດຖະກິດຂະຫຍາຍຕົວອັດຕາສະເລ່ຍ 7,6% ຕໍ່ປີ, ລວມຍອດຜະລິດຕະພັນພາຍໃນເມືອງ (GDP) ມີມູນຄ່າ 1.090,84 ຕື້ກີບ, ສະເລ່ຍລາຍຮັບຕໍ່ຫົວຄົນໄດ້ 18,9 ລ້ານກີບ, ໃນຂະແໜງການບໍລິການຕິດພັນກັບຂະແໜງທ່ອງທ່ຽວຍັງມີແດນສະຫວັນນໍ້າງື່ມຣີສອດ, ມີໂຮງແຮມ, ເຮືອນພັກ ແລະ ຮ້ານອາຫານໃນຫຼາຍລະດັບໄວ້ຄອຍບໍລິການ, ມີແຫຼ່ງທ່ອງທ່ຽວສວນເສືອປ່າ, ຕາດຊ້າງເທວະດາ, ຕາດປາຝາ, ຕາດນໍ້າດັ້ນ ແລະ ແຫຼ່ງທ່ອງທ່ຽວທາງດ້ານວັດທະນະທໍາອີກຫຼາຍແຫ່ງເຊັ່ນ: ວັດພະບາດພູເຂົາຄວາຍບ້ານາຍາງ, ວັດທາດມາຫຼ້າ, ວັດພະທອງສາມສີ, ວັດພະບາດດານເພີຍ ທີ່ມີໜໍ່ແໜ່ງຈະຖືກຮັບຮອງເປັນແຫຼ່ງທ່ອງທ່ຽວຂອງເມືອງຢ່າງເປັນທາງການໃນອະນາຄົດ, ຢູ່ໃນຄາດໝາຍສູ້ຊົນແຜນພັດທະນາເສດຖະກິດສັງຄົມ 5 ປີຕໍ່ໜ້າ ເມືອງທຸລະຄົມຈະສຸມໃສ່ສ້າງໃຫ້ເປັນເມືອງຕົວແບບດ້ານການຜະລິດກະສິກໍາສະອາດ, ຜັກປອດສານເຄມີ, ສົ່ງເສີມການປູກເຂົ້າເປັນສິນຄ້າ, ຜະລິດແນວພັນເຂົ້າເປັນສິນຄ້າ ແລະ ອື່ນໆ ເພື່ອຄໍ້າສະບຽງອາຫານໃຫ້ກັບສັງຄົມ ຕິດພັນກັບການແປຮູບໃນຂະແໜງອຸດສາຫະກໍາທີ່ເປັນມິດຕໍ່ສິ່ງແວດລ້ອມແລະ ຍືນຍົງ, ຍູ້ແຮງການຜະລິດໃຫ້ເປັນສິນຄ້າໃຫ້ຫຼາຍຂຶ້ນ, ຕາມທິດສ້າງໃຫ້ເປັນເມືອງຊົນລະກະເສດທັນສະໄໝເທື່ອລະກ້າວ; ປັດຈຸບັນການເກັບກ່ຽວເຂົ້ານາປີ ແລະ ເກັບກ່ຽວຜົນຜະລິດກະສິກໍາລະດູຝົນແມ່ນສໍາເລັດແລ້ວ 85%.

ໃນຕໍ່ໜ້ານີ້, ເມືອງທຸລະຄົມ ພວມກະກຽມສຸມໃສ່ການຜະລິດເຂົ້ານາແຊງ, ການປູກພືດລະດູແລ້ງ, ສົ່ງເສີມຕົວແບບການຜະລິດໃຫ້ມີຫຼາຍກິດຈະການ, ການສົ່ງເສີມການທ່ອງທ່ຽວກະຕຸ້ນເສດຖະກິດ, ການຈັດເກັບລາຍຮັບຖອກເຂົ້າງົບປະມານ,​ ລົງຊຸກຍູ້ວຽກງານກໍ່ສ້າງຮາກຖານ ແລະ ວຽກງານສາມສ້າງ, ສືບຕໍ່ນໍາພາຈັດຕັ້ງປະຕິບັດ 2 ວາລະແຫ່ງຊາດ, ກະກຽມດໍາເນີນກອງປະຊຸມຄົບຄະນະບໍລິຫານງານພັກເມືອງຄັ້ງທີ 9 ສະໄໝທີ VII ແລະ ດໍາເນີນກອງປະຊຸມໃຫຍ່ 3 ຂັ້ນ ໃນຕໍ່ໜ້າ. ໄປພ້ອມກັບການສ້າງຂະບວນການໃນດ້ານຕ່າງໆຢ່າງຟົດຟື້ນ ຕ້ອນຮັບວັນຊາດ ທີ 2 ທັນວາ ຄົບຮອບ 47 ປີ ເພື່ອເຮັດໃຫ້ເມືອງມີຄວາມສະຫງົບ, ປອດໄພ, ເສດຖະກິດ -ສັງຄົມ ຂະຫຍາຍຕົວດີຂຶ້ນ, ເຮັດໃຫ້ປະຊາຊົນມີຄວາມອີ່ມໝໍ່າສໍາລານ.

ໂດຍ: ບ່າວທົງ

ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ກອງປະຊຸມພົບປະແລກປ່ຽນວຽກງານຄຸ້ມຄອງ, ຮັກສາຊາຍແດນ ຄັ້ງທີ XIV ລະຫວ່າງ ກອງບັນຊາການທະຫານແຂວງຫລວງພະບາງ, ແຂວງຜົ້ງສາລີ ສປປ ລາວ ກັບກອງບັນຊາການທະຫານປ້ອງກັນຊາຍແດນ ແຂວງເຊິນລາ ແລະ ແຂວງດຽນບຽນ ສສ ຫວຽກນາມ ຈັດຂຶ້ນໃນ ວັນທີ 24 ພະຈິກ ຜ່ານມາ ຢູ່ແຂວງຫລວງພະບາງ, ຝ່າຍລາວມີ ທ່ານ ພັນເອກ ວິລ່ຽມ ວົງທິສານ ຫົວໜ້າການທະຫານກອງບັນຊາການ ທະຫານແຂວງຫລວງພະບາງ ພ້ອມດ້ວຍຄະນະ, ຝ່າຍຫວຽດນາມມີ ທ່ານ ພັນເອກ ພິເສດ ກາວັນເລິບ ຫົວໜ້າການເມືອງ ກອງບັນຊາການທະຫານປ້ອງກັນຊາຍແດນແຂວງ ເຊີນລາ ພ້ອມດ້ວຍຄະນະເຂົ້າຮ່ວມ.

ໂອກາດນີ້, ສອງຝ່າຍໄດ້ຜັດປ່ຽນກັນລາຍງານສະພາບ ກ່ຽວກັບການຈັດຕັ້ງປະຕິບັດວຽກງານປ້ອງກັນຊາຍແດນ ໃນໄລຍະຜ່ານມາໂດຍຫຍໍ້, ໂດຍລວມຍັງພົບເຫັນຫລາຍບັນຫາ ເປັນຕົ້ນ ການເຄື່ອນໄຫວສາສະໜາຕ່າງຊາດ, ການຄ້າຂາຍເຖື່ອນ ແລະ ອື່ນໆ ເຊິ່ງສອງຝ່າຍຈະຕ້ອງໄດ້ປະສານສົມທົບ ແລະ ພ້ອມກັນແກ້ໄຂ ເພື່ອເຮັດໃຫ້ປະຊາ ຊົນສອງຊາດ ຢູ່ລຽບຕາມເສັ້ນຊາຍແດນມີຄວາມສະຫງົບປອດໄພ, ສັງຄົມມີຄວາມເປັນລະບຽບຮຽບຮ້ອຍ. ພ້ອມນີ້, ສອງຝ່າຍ ໄກ້ປະກອບຄໍາເຫັນ ເພື່ອເອກະພາບກັນ, ທັງນໍາເອົາບັນຫາຄົງຄ້າງ ໄປຮ່ວມກັນແກ້ໄຂໃນຊຸມປີຕໍ່ໜ້າໃຫ້ໄດ້ຮັບຜົນດີ.

ຈາກນັ້ນ, ກໍໄດ້ຮ່ວມລົງນາມໃນບົດບັນທຶກຊ່ວຍຈໍາ ລະຫວ່າງ ກອງບັນຊາການທະຫານແຂວງຫລວງພະບາງ-ແຂວງຜົ້ງສາລີ ສປປ ລາວ ກັບກອງບັນຊາການທະຫານປ້ອງກັນຊາຍແດນ ແຂວງເຊິນລາ-ແຂວງດຽນບຽນ ສສ ຫວຽດນາມ, ທັງໄດ້ມອບຂອງທີ່ລະນຶກໃຫ້ກັນ ແລະອກັນ ເພື່ອຜູກແໜ້ນຄວາມສາມັກຄີໄມຕີຈິດມິດຕະພາບ ໃຫ້ມີຄວາມແໜ້ນແຟ້ນຍິ່ງໆຂຶ້ນ.

ຂ່າວ-ພາບ: ບຸນເພັງ ວົງແກ້ວມະນີ

ແຫລ່ງຂ່າວຈາກ ແຂວງຈໍາປາສັກ ໃຫ້ຮູ້ວ່າ: ວັນທີ 24 ພະຈິກ ຜ່ານມາ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ຟ້າມ ຢຸຍ ລາມ ປະທານສານ ປະຊາຊົນແຂວງຢາລາຍ ສສ ຫວຽດນາມ ພ້ອມຄະນະ ໃນໂອການມາຢ້ຽມຢາມແຂວງຈຳປາສັກ ເພື່ອພົບປະແລກປ່ຽນບົດຮຽນນໍາກັນ ລະຫວ່າງ ຄະນະ ຜູ້ແທນຂອງສານປະຊາຊົນແຂວງຢາລາຍ ກັບ ສານປະຊາຊົນແຂວງຈຳປາສັກ.

ໂອກາດນີ້, ທ່ານເຈົ້າແຂວງຈຳປາສັກ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮວ່ມມື ຂອງ ສອງຊາດ ລາວ-ຫວຽດນາມ ໂດຍສະເພາະ ລະຫວ່າງ ແຂວງຈໍາປາສັກ ແລະ ແຂວງຢາລາຍ, ພິເສດ ແມ່ນການຮ່ວມມື ອັນດີ ລະຫວ່າງ ສານປະຊາຊົນແຂວງຢາລາຍ ກັບ ສານປະຊາຊົນແຂວງຈຳປາສັກ, ການມາຢ້ຽມຢາມ ຄັ້ງນີ້ ຢູ່ໃນບັນຍາກາດທີ່ທັງສອງພັກ, ສອງລັດ ກໍຄື ປະຊາຊົນສອງຊາດພວກເຮົາ ພວມຢູ່ໃນບັນຍາກາດແຫ່ງການການສະເຫລີມສະຫລອງ ສອງວັນ ປະວັນສາດ ຢ່າງເປັນຂະບວນຟົດຟື້ນ.

ຈາກນັ້ນ, ທ່ານ ຟ້າມ ຢຸຍ ລາມ ກໍໄດ້ແຈ້ງຈຸດປະສົງ ແລະ ລາຍງານ ເຖິງການພົວພັນຮ່ວມມືຂອງ ສອງຂະແໜງການ ສານປະຊາຊົນແຂວງຢາລາຍ ກັບ ແຂວງຈຳປາສັກ, ຜ່ານມາ ເຖິງແມ່ນວ່າການຈັດຕັ້ງປະຕິບັດບົດບັນທຶກການພົບປະຄັ້ງທີ 5 ນັ້ນ ຈະຖືກຢຸດສະງັກ ຍ້ອນການແພ່ລະບາດຂອງພະຍາດໂຄວິດ- 19 ແຕ່ມື້ນີ້ ພວກເຮົາ ກໍສາມາດກັບມາສືບຕໍ່ການພົວພັນຮ່ວມມືກັນອີກ. ທັງນີ້ ກໍເພື່ອເປັນການຈັດຕັ້ງຜັນຂະຫຍາຍເນື້ອໃນຈິດໃຈຂອງບົດບັນທຶກການຮ່ວມມືສອງຝ່າຍ, ການແລກປ່ຽນຖອດຖອນບົດຮຽນ ທາງດ້ານວິຊາການ, ເປັນການເສີມຂະຫຍາຍສາຍພົວພັນອັນດີງາມລະຫວ່າງສານ ປະຊາຊົນແຂວງຈຳປາສັກ ແລະ ສານປະຊາຊົນແຂວງຢາລາຍ ໃຫ້ມີຄວາມສະໜິດສະໜົມກົມກຽວຍິ່ງໆຂຶ້ນ.

ຂ່າວ: ທັດຊະນະ

ພາບ: ພູທິບສະຫວັນ

ບໍລິເວນຄວາມກົດດັນຕໍ່າຂອງອາກາດທີ່ມີກໍາລັງອ່ອນໄດ້ປົກຄຸມ ເຂດພາກເໜືອຂອງປະເທດລາວ ສົມທົບກັບກະແສລົມຕາເວັນຕົກ ພັດປົກຄຸມ ສ່ວນພາກກາງ ແລະ ພາກໃຕ້ ກະແສລົມຕາເວັນອອກສ່ຽງໃຕ້ ພັດປົກຄຸມ ຊຶ່ງຈະເຮັດໃຫ້ອາກາດຮ້ອນ ແລະ ມີຝົນຕົກໃນລະດັບຄ່ອຍ ຢູ່ບາງທ້ອງຖິ່ນໃນແຕ່ລະພາກ.

ພະຍາກອນອາກາດ ເວລາ 7:00 ໂມງວັນທີ 28/11/2022 ເຖິງເວລາ 7:00 ໂມງວັນທີ 29/11/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ອາກາດເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ແລະ ຍັງຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫລື ເນື້ອທີ່ປົກຫຸຸ້ມຂອງ ຝົນເທົ່າກັບ 30% ຂອງພາກ. ອຸນຫະພູມໃນລະຫວ່າງ 18-28 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ພ້ອມມີໝອກບາງປົກຫຸ້ມ ຢູ່ທົ່ວໄປ ແລະ ຍັງຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫລື ເນື້ອທີ່ ປົກຫຸຸ້ມຂອງຝົນເທົ່າກັບ 30% ຂອງພາກ. ອຸນຫະພູມໃນລະຫວ່າງ 22-33 ອົງສາ.

-ນະຄອນຫລວງວຽງຈັນ: ອາກາດຮ້ອນ ແລະ ມີຝົນຕົກໃນລະດັບຄ່ອຍ ພຽງເລັກນ້ອຍຢູ່ບາງບໍລິເວນ. ອຸນຫະພູມໃນລະຫວ່າງ 24-33 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດຮ້ອນ ແລະ ມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫລື ເນື້ອທີ່ ປົກຫຸຸ້ມຂອງຝົນເທົ່າກັບ 20% ຂອງພາກ. ອຸນຫະພູມໃນລະຫວ່າງ 22-33 ອົງສາ.

-ແຂວງໄຊສົມບູນ: ອາກາດໜາວເຢັນ ແລະ ມີຝົນຕົກ. ອຸນຫະພູມ ໃນລະຫວ່າງ 14-26 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດຮ້ອນ ແລະ ມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫລື ເນື້ອທີ່ ປົກຫຸ້ມຂອງຝົນ ເທົ່າກັບ 30% ຂອງພາກ. ອຸນຫະພູມໃນລະຫວ່າງ 23-34 ອົງສາ.

-ເຂດພູພຽງບໍລະເວນ: ອາກາດໜາວເຢັນ ແລະ ຈະມີຝົນຕົກໃນລະດັບ ຄ່ອຍ. ອຸນຫະພູມໃນລະຫວ່າງ 15-28 ອົງສາ.

ໃນວັນທີ 25 ພະຈິກ 2022 ນີ້ ຫ້ອງວ່າການສູນກາງພັກ (ຫສພ) ໄດ້ຈັດຕັ້ງການເຊື່ອມຊຶມມະຕິກອງປະຊຸມຄົບຄະນະ ບໍລິຫານງານສູນກາງພັກຄັ້ງທີ 5 ສະໄໝ XI, ພ້ອມທັງຈັດພິທີມອບບັດສະມາຊິກພັກຈໍານວນ 40 ສະຫາຍ ແລະ ປະກາດການແຕ່ງຕັ້ງຕໍາແໜ່ງບໍລິຫານຂັ້ນຫົວໜ້າກົມ 1 ສະຫາຍ, ແຕ່ງຕັ້ງຕຳແໜ່ງຮອງຫົວໜ້າກົມ 4 ສະຫາຍ ແລະ ຍັງໄດ້ສັບຊ້ອນລັດຖະກອນພາຍໃນຫ້ອງວ່າການສູນກາງພັກຈຳນວນໜຶ່ງພາຍໃນຫ້ອງວ່າການສູນກາງພັກ. ໃຫ້ກຽດເປັນປະທານຂອງສະຫາຍ ທອງສະລິດ ມັງໜໍ່ເມກ ເລຂາທິການສູນກາງພັກ, ເລຂາຄະນະພັກ, ຫົວໜ້າຫ້ອງວ່າສູນກາງພັກ, ມີບັນດາຄະນະພັກ, ຄະນະກົມ-ຮອງກົມ, ພ້ອມດ້ວຍພະນັກງານພາຍໃນຫ້ອງການດັ່ງກ່າວ ເຂົ້າຮ່ວມ.

ການຈັດຕັ້ງເຊື່ອມຊຶມມະຕິຂອງພັກ ໃນຄັ້ງນີ້, ແນໃສ່ເຮັດໃຫ້ສະມາຊິກພັກ, ພະນັກງານຫລັກແຫລ່ງພາຍໃນ ຫ້ອງວ່າສູນກາງພັກ ຮັບຮູ້ ແລະ ເຂົ້າໃຈ ຕໍ່ກັບເນື້ອໃນກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານສູນກາງພັກ ສະໄໝທີ XI ເພື່ອຫັນເປັນແຜນການ, ໂຄງການອັນລະອຽດ ໃນການຈັດຕັ້ງປະຕິບັດວຽກງານຕົວຈິງ ໃຫ້ໄປຕາມແນວທາງນະໂຍບາຍຂອງພັກ ແລະ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ໃຫ້ປະກົດຜົນເປັນຈິງ.

ພະນັກງານຫລັກແຫລ່ງທີ່ຂຶ້ນກັບ ຫ້ອງວ່າການສູນກາງພັກ ຕ້ອງເຫັນໄດ້ຄວາມໝາຍຄວາມສຳຄັນຂອງມະຕິດັ່ງກ່າວ ຕໍ່ກັບສະພາບການຜັນແປຢ່າງສັບສົນ ຢູ່ທົ່ວພາກພຶ້ນ ແລະ ສາກົນໃນປະຈຸບັນ; ທັງມີການຕີລາຄາຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ-ແຜນເງິນ ຕາໄລຍະ 9 ເດືອນ, ວຽກຈຸດສຸມທ້າຍປີ 2022 ແລະ ທິດທາງແຜນການປີ 2023 ທີ່ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ ເພື່ອຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂະຫຍາຍຕົວຕໍ່ເນື່ອງ.

ພ້ອມນີ້, ຄະນະບໍລິຫານງານສູນກາງພັກ ຍັງໄດ້ໃຫ້ທິດຊີ້ນໍາ ແລະ ຮຽກຮ້ອງໃຫ້ຄະນະພັກແຕ່ລະຂັ້ນ, ນໍາພາ-ຊີ້ນໍາຜັນຂະຫຍາຍ ແລະ ຈັດຕັ້ງປະຕິບັດ ເນື້ອໃນຈິດໃຈຂອງກອງປະຊຸມຄັ້ງນີ້ ຕິດພັນກັບການຍູ້ແຮງຂະບວນການແຂ່ງຂັນ “ຮັກຊາດ ແລະ ພັດທະນາ” ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ກໍຄືການແກ້ໄຂບັນຫາຕົວຈິງ ທີ່ເກີດຂຶ້ນໃຫ້ເປັນລະບົບຕໍ່ເນື່ອງ ແລະ ມີປະສິດ ທິພາບ.

ຂ່າວ-ພາບ: ຂັນໄຊ

ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດ ຖະກິດ-ການເງິນ ແລະ ປະຕິບັດຕາມຄໍາສັ່ງສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫລ ຂອງລາຍຮັບງົບປະມານແຫ່ງລັດ, ທັງຮັບປະກັນໃຫ້ຫົວໜ່ວຍງົບປະມານ, ສາມາດຫັນໄປສູ່ຫົວໜ່ວຍງົບປະມານກຸ້ມຕົນເອງໃນປີ 2023.

ໃນວັນທີ 24 ພະຈິກ 2022 ຜ່ານມານີ້, ກົມສ່ວຍສາອາກອນ ກະຊວງການເງິນ, ນໍາໂດຍທ່ານ ທໍາມະລົດຣາຊະພົນຮອງຫົວໜ້າກົມສ່ວຍສາອາກອນ ກະຊວງການເງິນ, ພ້ອມດ້ວຍຄະນະໄດ້ລົງຊຸກຍູ້ ແລະ ຜັນຂະຫຍາຍ ການຄຸ້ມຄອງການຈັດເກັບຄ່າທຳນຽມ ແລະ ຄ່າບໍລິການ ຜ່ານອຸປະກອບ iPOS ຢູ່ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແລະ ຢູ່ກົມກົງສຸນ ແລະ ກົມການເງິນຂອງກະຊວງການຕ່າງປະເທດ, ກ່ຽວກັບການຄຸ້ມຄອງການຈັດເກັບຄ່າທໍານຽມ ແລະ ບໍລິການ ຢ່າງລວມສູນ ແລະ ຈັດຕັ້ງປະຕິບັດຢ່າງເປັນເອກະພາບ ຕາມລັດຖະບັນຍັດ 002/ປປທ ທີ່ໄດ້ກໍານົດໄວ້.

ການລົງຊຸກ ຍູ້ການເກັບຄ່າທໍານຽມ-ຄ່າບໍລິການຜ່ານ iPOS ຄັ້ງນີ້, ໄດ້ມີການແລກປ່ຽນກັນຫລາຍບັນຫາໃນການຈັດຕັ້ງປະຕິບັດວຽກງານ ກ່ຽວກັບການຄຸ້ມຄອງການຈັດເກັບຄ່າທໍານຽມ ແລະ ບໍລິການຂອງກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ກົມກົງສຸນ ແລະ ກົມການເງິນ ຂອງກະຊວງການຕ່າງປະເທດ ແລະ ອີກ 6 ຈຸດ ໃຫ້ບໍລິການໃນຂອບເຂດທົ່ວປະເທດ ຜ່ານອຸປະກອນ iPOS ຊຶ່ງເຫັນໄດ້ສະພາບການທີ່ມີທັງຂໍ້ດີ ແລະ ຂໍ້ສະດວກ ໃນການປະຕິບັດວຽກງານຕົວຈິງ. ການຫັນວຽກງານເປັນທັນສະໄໝ ແມ່ນເປັນວຽກງານສໍາຄັນໜຶ່ງ ທີ່ພັກ-ລັດຖະບານ ເລັ່ງໃສ່ໃຫ້ຫັນເປັນທັນສະໄໝໃນຫລາຍຂົງເຂດວຽກງານ ຊຶ່ງວຽກງານການຄຸ້ມຄອງການຈັດເກັບຄ່າທໍານຽມ ແລະ ບໍລິການ ກໍເປັນວຽກງານໜຶ່ງທີ່ຕ້ອງໄດ້ຈັດຕັ້ງປະຕິບັດ ໂດຍຜ່ານການນໍາໃຊ້ອຸປະກອນ iPOS ເພື່ອລວມສູນງົບປະມານຂອງລັດ ຕ້ານການຮົ່ວໄຫລຂອງລາຍຮັບງົບປະມານ.

ພ້ອມນັ້ນ, ໃນກອງປະຊຸມຄະນະທິມງານຈາກກົມສ່ວຍສາອາກອນ ຍັງໄດ້ມີການນໍາສະເໜີຂັ້ນຕອນ, ວິທີການນໍາໃຊ້ອຸປະກອນ iPOS ເນື່ອງຈາກການນຳໃຊ້ອຸປະກອນນີ້ ແມ່ນການຄຸ້ມຄອງການລວມສູນງົບປະມານຂອງລັດ, ຕ້ານການຮົ່ວໄຫລ ທີ່ອີງໃສ່ເລກທີ 18/ນຍ ໂດຍສັງລວມໃນຖານຂໍ້ມູນຂອງລະບົບTaxRIS ຂອງກົມສ່ວຍສາອາກອນ ກະຊວງການເງິນ, ເປັນອຸປະກອນທີ່ຈະຊ່ວຍໃຫ້ການຈັດເກັບຄ່າທຳນຽມ ແລະ ຄ່າບໍລິການ ມີຄວາມສະດວກສະບາຍ, ສາມາດຕິດຕາມການເຄື່ອນໄຫວໄດ້ຕະຫລອດເວລາ, ທັງສາມາດກວດກາຄືນຂໍ້ມູນ ແລະ ສັງລວມສະຫລຸບລາຍງານໄດ້ ດ້ວຍລະບົບທີ່ທັນສະໄໝ, ທັງສາມາດອອກໃບບິນໃຫ້ດ້ວຍ ເຄື່ອງພິມແທນການຂຽນໃບບິນແບບເກົ່ານໍາດ້ວຍ.