ກອງປະຊຸມຄະນະປະສານງານວຽກງານຍຸຕິທຳສຳລັບເດັກຂັ້ນສູນກາງ ປະຈຳປີ 2021 ແລະ ທິດທາງແຜນການປີ 2022 ໄດ້ຈັດຂຶ້ນໃນວັນທີ 26 ກໍລະກົດ ນີ້ ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການ ປະຊາຊົນສູງສຸດ ຊຶ່ງມີ ຄະນະກອງເລຂາ ແລະ ຜູ້ຕາງໜ້າອົງການອຸຍນີເຊັບ ເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຮັບຟັງການລາຍງານການຈັດຕັ້ງປະຕິບັດວຽກງານຍຸຕິທຳສຳລັບເດັກ ປີ 2021 ແລະ ທິດທາງແຜນການປີ 2022 ອົງການໄອຍະການປະຊາຊົນສູງສຸດ, ການຈັດຕັ້ງປະຕິບັດວຽກງານຍຸຕິທຳສຳລັບເດັກ ປີ 2021 ແລະ ທິດທາງແຜນການ ປີ 2022 ກະຊວງຍຸຕິທຳ,ການຈັດຕັ້ງປະຕິບັດວຽກງານຍຸຕິທຳສຳລັບເດັກປີ 2021 ແລະ ທິດທາງແຜນການປີ 2022 ກະຊວງປ້ອງກັນຄວາມສະຫງົບ ແລະ ການຈັດຕັ້ງປະຕິບັດວຽກງານຍຸຕິທຳສຳລັບເດັກປີ 2021 ແລະ ທິດທາງແຜນການປີ 2022 ສານປະຊາຊົນສູງສຸດ ແລະ ຕາງໜ້າ ອົງການອຸຍນີເຊັບ ລາຍງານທິດທາງການສະໜັບສະໜູນ ຕໍ່ການປະຕິບັດບັນດາກິດຈະກຳ ປີ 2022

ທ່ານ ໄຊຊະນະ ໂຄດພູທອນ ໄດ້ກ່າວວ່າ: ໄລຍະຜ່ານມາລັດຖະບານ ແຫ່ງ ສປປ ລາວ ໄດ້ເອົາໃຈໃສ່ ແລະ ໃຫ້ຄວາມສຳຄັນໃນວຽກງານປ້ອງກັນສິດ ແລະ ຜົນປະໂຫຍດຂອງເດັກ ຊຶ່ງສະແດງອອກໃນການສ້າງບັນດາກົດໝາຍ,ນິຕິກຳ, ລະບຽບການ, ກົນໄກ ແລະ ແຜນງານແຫ່ງຊາດ ໃນການເຄື່ອນໄຫວວຽກງານຍຸຕິທຳສຳລັບເດັກ. ນອກຈາກນັ້ນ ຍັງໄດ້ເຂົ້າເປັນພາຄີສົນທິສັນຍາສາກົນຫຼາຍສະບັບ ທີ່ກ່ຽວຂ້ອງກັບເດັກທັງໃນລະດັບພາກພື້ນ ແລະ ສາກົນ,ສະນັ້ນ ຈຶ່ງເວົ້າໄດ້ວ່າວຽກງານຍຸຕິທຳສຳລັບເດັກເປັນວຽກໜຶ່ງທີ່ມີຄວາມສຳຄັນສຳລັບທຸກຂົງເຂດ ໂດຍສະເພາະແມ່ນຂົງເຂດປົກປ້ອງກົດໝາຍ ຊຶ່ງຍາມໃດລັດຖະບານກໍໄດ້ເອົາໃຈໃສ່ເປັນພິເສດ ແລະ ໄດ້ລະດົມທຶນຮອນທັງພາຍໃນ ແລະ ຕ່າງປະເທດ ເພື່ອປະກອບສ່ວນເຂົ້າໃນການຈັດຕັ້ງວຽກງານດັ່ງກ່າວ ໂດຍສະເພາະແມ່ນອົງການອຸຍນີເຊັບ (UNICEP) ທີ່ໄດ້ໃຫ້ການສະໜັບສະໜູນ.

(ຂໍ້ມູນຂ່າວ: ອົງການໄອຍະການປະຊາຊົນສູງສຸດ)

ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ເມື່ອບໍ່ດົນມານີ້, ແຂວງຈໍາປາສັກ ໄດ້ຝຶກຊ້ອມຂັບເຮື່ອ ເພື່ອກອບກູ້ໄພພິບັດທາງນໍ້າ ເພື່ອຖ່າຍທອດບົດຮຽນໃຫ້ແກ່ນັກກູ້ໄພທາງນ້ຳ ໂດຍສະເພາະຂັ້ນຕອນການຂັບເຮືອ, ການປົກປັກຮັກສາ ແລະ ນຳໃຊ້ເຮືອ,ການເຂົ້າຊ່ວຍເຫລືອຜູ້ປະສົບໄພນໍ້າຖ້ວມ, ນໍ້າຊຸ, ການກູ້ຊີບຊ່ວຍເຫລືອຄົນຕົກນໍ້າ ແລະເຕັກນິກ-ວິທີການສຳຄັນໃນການຊ່ວຍເຫລືອອື່ນໆ ທີ່ອາດຈະເກີດຂຶ້ນໃນຕໍ່ໜ້າ.

ທ່ານ ຍົກດາ ໄຊຍະຈັກ ຮອງຫົວໜ້າພະແນກແຮງງານ ແລະ ສະຫວັດດີການສັງ ຄົມ(ຮສສ) ແຂວງຈໍາປາສັກ ໄດ້ກ່າວວ່າ: ປັດຈຸບັນ, ບັນຫາໄພພິບັດ ແລະ ການປ່ຽນ ແປງຂອງດິນຟ້າອາກາດ ເປັນຕົ້ນ ໄພນໍ້າຖ້ວມ ໄດ້ກາຍເປັນສິ່ງທ້າທາຍຢ່າງໃຫຍ່ຫລວງ ແລະ ເພີ່ມຄວາມຮຸນແຮງຂຶ້ນເລື້ອຍໆ, ສ້າງຜົນກະທົບ ແລະ ສ້າງຄວາມເສຍຫາຍຢ່າງຫລວງຫລາຍ ຕໍ່ຊີວິດ ແລະ ຊັບສິນຂອງປະຊາຊົນ ທັງໃນໄລຍະສັ້ນ ແລະ ໄລຍະຍາວ.

ທ່ານ ຍົກດາ ໄຊຍະຈັກ ຍັງໃຫ້ຮູ້ອີກວ່າ: ຕໍ່ກັບເຫດການໄພພິບັດນໍ້າຖ້ວມປີ 2019 ຜ່ານມາ, ແຂວງຈໍາປາສັກ ໄດ້ຮັບບົດຮຽນຫລາຍຢ່າງຕໍ່ບັນການຊ່ວຍເຫລືອ ສຸກເສີນທາງ ນໍ້າ ໂດຍສະເພາະແມ່ນຜູ້ຮັບຜິດຊອບຂັບເຮືອໃນເວລາສຸກເສີນແມ່ນບໍ່ມີ, ມີແຕ່ພະແນກ ຮສສ ແຂວງ ເທົ່ານັ້ນທີ່ສາມາດຂັບເຮືອດັ່ງກ່າວໄດ້, ເຮັດໃຫ້ການຊ່ວຍເຫລືອສຸກເສີນມີຄວາມຫຍຸ້ງຍາກ ແລະ ຊັກຊ້າ. ສະນັ້ນ. ພະແນກແຮງງານ ແລະ ສະຫວັດດີການສັງຄົມ ແຂວງຈຳປາສັກ ໃນນາມກອງເລຂາຄະນະກໍາມະການຄຸ້ມຄອງ ໄພພິບັດຂັ້ນແຂວງ ຈຶ່ງຈັດພິທີຝຶກຊ້ອມຂັບເຮືອກູ້ໄພທາງນໍ້າ ແກ່ພາກສ່ວນທີ່ກ່ຽວຂ້ອງໃຫ້ມີຄວາມເຂັ້ມແຂງ ສາມາດຕອບໂຕ້ ແລະ ຮັບມືກັບໄຟພິບັດທີ່ອາດຈະເກີດຂຶ້ນໃນຕໍ່ໜ້າ.

ຂ່າວ: ເກດສະໜາ

ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ເມື່ອບໍ່ດົນ ມານີ້, ງານຊື້-ຂາຍການທ່ອງທ່ຽວສາກົນຈີນ 2022 ໄດ້ຈັດຂຶ້ນຢູ່ນະຄອນ ຄຸນມິງ ແຂວງຢຸນນານ ສປ ຈີນ. ຕາມຂ່າວແຈ້ງວ່າ: ງານຊື້-ຂາຍເທື່ອນີ້ໄດ້ ຈັດການເຄື່ອນໄຫວໂຄສະນາການທ່ອງທ່ຽວ ວັດທະນະທຳ ຈີນ-ລາວ ໂດຍສະເພາສອງປະເທດລາວ-ຈີນ ຮ່ວມກັນອອກແຮງໂຄສະນາ ຊັບພະຍາກອນທ່ອງທ່ຽວດ້ານວັດທະນະທຳອັນອຸດົມສົມບຸນທີ່ລຽບຕາມ ທາງລົດໄຟ ລາວ-ຈີນ.

ສົ້ນເໜືອຂອງທາງລົດໄຟ ລາວ-ຈີນ ເລີ່ມຈາກນະຄອນຄຸນໝິງ ແລະ ສົ້ນໃຕ້ໄປຮອດນະຄອນຫລວງວຽງຈັນ ສປປ ລາວ ເຂດທີ່ລຽບຕາມທາງ ລົດໄຟດັ່ງກ່າວແມ່ນໜຶ່ງໃນເຂດທີ່ມີຊັບພະຍາກອນທ່ອງທ່ຽວອຸດົມສົມບູນທີ່ສຸດໃນໂລກ. ສະຖານທີ່ທ່ອງທ່ຽວເຊັ່ນ: ວຽງຈັນ, ວັງວຽງ, ຫລວງພະບາງ ແລະສະຖານທີ່ອື່ນໆລ້ວນແຕ່ໄດ້ຮັບຄວາມນິຍົມຫລາຍຈາກນັກທ່ອງທ່ຽວ ຈີນ. ສ່ວນທິວທັດທີ່ສວຍງາມ ແລະປະຫວັດສາດວັດທະນະທຳຈີນ ທີ່ເລິກ ເຊິ່ງກໍໄດ້ດຶງດູດນັກທ່ອງທ່ຽວລາວ. ຖ້າວ່າເອີ້ນຊັບພະຍາກອນທ່ອງທ່ຽວ ດ້ານວັດທະນະທຳຢູ່ເຂດລຽບຕາມທາງລົດໄຟ ລາວ-ຈີນ ວ່າເປັນໄຂ່ມຸກ ຫລາຍເມັດ, ທາງລົດໄຟ ລາວ-ຈີນ ກໍຄື ເສັ້ນໃໝຄຳ ທີ່ກອດກ້ຽວໄຂ່ມຸກ ເຫລົ່ານີ້ເອົາໄວ້.

ພາຍຫລັງທາງລົດໄຟ ລາວ-ຈີນ ເປີດການນຳໃຊ້ເປັນຕົ້ນມາ ການຂົນ ສົ່ງຜູ້ໂດຍສານ ແລະການຂົນສົ່ງສິນຄ້າໄດ້ເພີ່ມຂຶ້ນຢ່າງບໍ່ຢຸດຢັ້ງ, ການທ່ອງ ທ່ຽວລຽບຕາມທາງລົດໄຟ ລາວ-ຈີນກໍສະແດງໃຫ້ເຫັນຈຸດເດັ່ນຢ່າງຫລວງ ຫລາຍ. ນັບມາຮອດຕົ້ນເດືອນກໍລະກົດນີ້, ທາງລົດໄຟລາວ-ຈີນ ລວມທັງ ການໄດ້ຂົນສົ່ງຜູ້ໂດຍສານ 4,11 ລ້ານເທື່ອຄົນ, ໃນນັ້ນທາງລົດໄຟ ລາວ-ຈີນ ຕອນຢູ່ປະເທດຈີນ ຂົນສົ່ງຜູ້ໂດຍສານໄດ້ 3,57 ລ້ານເທື່ອຄົນ, ຕອນຢູ່ ປະເທດລາວ ຂົນສົ່ງຜູ້ໂດຍສານໄດ້ 5,4 ແສນເທື່ອຄົນ.

ທາງລົດໄຟ ລາວ-ຈີນ ຕອນຢູ່ປະເທດຈີນ ໄດ້ເຊື່ອມຕໍ່ກັບນະຄອນ ຄຸນມິງ, ນະຄອນຢວີ້ຊີ່, ນະຄອນຜູເອີ ແລະກິ່ງແຂວງສິບສອງພັ່ນນາ ຂອງແຂວງຢຸນນານ, ມີເຜົ່າຮັ້ນ, ເຜົ່າຢີ, ເຜົ່າຮານີ, ເຜົ່າລື້ ແລະອື່ນໆ ຫລາຍຊົນເຜົ່າອາໄສຢູ່ສີ່ເຂດດັ່ງກ່າວ, ທາງລົດໄຟ ລາວ-ຈີນ ເປີດການນຳ ໃຊ້ໄດ້ເພີ່ມແມ່ແຮງໃໝ່ໃຫ້ແກ່ການພັດທະນາເສດຖະກິດລຽບຕາມ ຊາຍແດນພາກຕາເວັນຕົກສ່ຽງໃຕ້ຂອງຈີນ. ເຊັ່ນ: ບ້ານມ້ານຈາງ ເຊິ່ງເປັນບ້ານເຜົ່າລື້ ທີ່ມີມູນເຊື້ອຕັ້ງຢູ່ໃກ້ສະຖານີລົດໄຟ ເຢຍຊ້ຽງກູ ຂອງທາງລົດໄຟ ລາວ-ຈີນ, ໃນຫລາຍປີມານີ້, ບ້ານມ້ານຈາງ ໄດ້ດຶງດູດ ນັກທ່ອງທ່ຽວດ້ວຍໂຄງການມໍລະດົກວັດທະນະທຳ ນາມມະທຳ ຫລາຍ ໂຄງການ. ພາຍຫລັງທາງລົດໄຟ ລາວ-ຈີນ ເປີດການນຳໃຊ້ແລ້ວ, ນັກທ່ອງທ່ຽວທີ່ໄປທ່ຽວບ້ານມ້ານຈາງ ນັບມື້ນັບຫລາຍຂຶ້ນ, ບ້ານພັກ ແລະຮ້ານອາຫານຂອງບ້ານນີ້ກໍນັບມື້ນັບຫລາຍຂຶ້ນ ແລະຊາວບ້ານ ກໍນັບມື້ນັບຮັ່ງມີຂຶ້ນເຊັ່ນກັນ.

ພ້ອມກັນນັ້ນ, ຢູ່ທາງລົດໄຟ ລາວ-ຈີນ ຕອນຢູ່ປະເທດລາວ, ການເປີດ ການນຳໃຊ້ທາງລົດໄຟ ກໍໄດ້ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນ ລາວ ທີ່ອາໄສລຽບຕາມທາງລົດໄຟດັ່ງກ່າວ. ຄຽງຄູ່ກັບທາງລົດໄຟ ລາວ-ຈີນ ເປີດການນຳໃຊ້ຢ່າງເປັນທາງການ ຈາກນະຄອນຫລວງວຽງຈັນ ເຖິງຊາຍ ແດນລາວ-ຈີນ ໃຊ້ເວລາຈາກ 2 ມື້ຫລຸດລົງເປັນສາມຊົ່ວໂມງເຄິ່ງ. ຕອນເຊົ້າ ເດີນທາງອອກຈາກນະຄອນຫລວງວຽງຈັນ ສາມາດໄປຮອດນະຄອນ ຄຸນມິງຂອງຈີນ ໃນຕອນບ່າຍ; ການເຊື່ອມຈອດກັນລະຫວ່າງຈີນກັບລາວ ໄດ້ບັນລຸການພັດທະນາແບບກ້າວກະໂດດ. ບໍ່ວ່ານະຄອນຫລວງວຽງຈັນ, ເຂດວັງວຽງ ຫລືວ່າເມືອງບໍ່ເຕັນ ທີ່ຢູ່ຊາຍແດນລະຫວ່າງສອງ ປະເທດລາວ-ຈີນ ລ້ວນແຕ່ໄດ້ນັບມື້ນັບພັດທະນາດີຂຶ້ນ, ຮ້ານອາຫານ, ບ້ານພັກ ແລະຮ້ານຄ້າຕ່າງໆໄດ້ຮັບແຂກຫລາຍຂຶ້ນ. ໃນໄລຍະພັກເຂົ້າ ພັນສາປີນີ້, ນັກທ່ອງທ່ຽວໄທ ທີ່ເຂົ້າມາທ່ຽວປະເທດລາວ ໄດ້ເພີ່ມຂຶ້ນໜຶ່ງ ເທົ່າ, ທາງລົດໄຟ ລາວ-ຈີນ ກໍໄດ້ກາຍເປັນທາງເລືອກໃໝ່ທີ່ໄດ້ຮັບຄວາມ ນິຍົມຈາກນັກທ່ອງທ່ຽວໄທ. ເມື່ອກ່ອນນີ້ບໍ່ດົນ, ລັດຖະບານລາວ ໄດ້ກ່າວ ວ່າ: ທາງລົດໄຟ ລາວ-ຈີນ ໄດ້ດຶງດູດນັກທ່ອງທ່ຽວຫລາຍກວ່າເກົ່າ, ປະເທດ ລາວຈະພະຍາຍາມຕ້ອນຮັບນັກທ່ອງທ່ຽວຫລາຍກວ່າ 3 ລ້ານເທື່ອຄົນໃນ ປີນີ້.

ໂດຍແນໃສ່ຄວາມຕ້ອງການອອກເດີນທາງຫລາຍຮູບການຂອງ ປະຊາຊົນລາວ, ບໍລິສັດທາງລົດໄຟ ລາວ-ຈີນ ທີ່ຮັບຜິດຊອບການແລ່ນ ລົດໄຟ ລາວ-ຈີນ ຕອນປະເທດລາວ ໄດ້ເພີ່ມຖ້ຽວລົດໄຟຈາກວຽງຈັນ ຫາບໍ່ເຕັນ ທີ່ມີຄວາມໄວ 120 ກິໂລແມັດຕໍ່ຊົ່ວໂມງ ເຊິ່ງມີລາຄາປີ້ອ່າວຖືກ, ພ້ອມກັນນັ້ນໄດ້ເປີດຂະບວນລົດໄຟຄວາມໄວສູງຈາກນະຄອນຫລວງ ວຽງຈັນ ຫາ ຫລວງພະບາງ ແລະເມືອງໄຊ, ເພື່ອຍົກສູງຄວາມສາມາດ ການຂົນສົ່ງຜູ້ໂດຍສານ ແລະສະໜອງທາງເລືອກຫລາຍຢ່າງດ້ານ ອອກເດີນທາງໃຫ້ແກ່ປະຊາຊົນທີ່ອາໄສຢູ່ເຂດລຽບຕາມທາງລົດໄຟ.

ປະເທດຈີນ ແລະ ປະເທດລາວ ເປັນບ້ານໃກ້ເຮືອນຄຽງທີ່ດີຕໍ່ກັນ, ຂະແໜງການທ່ອງທ່ຽວແມ່ນໜຶ່ງໃນຂົງເຂດຮ່ວມມືຫລາຍທີ່ສຸດຂອງການຮ່ວມມື ລະຫວ່າງສອງປະເທດມາເປັນໄລຍະດົນນານມານີ້. ໃນຕໍ່ໜ້າ, ຄຽງຄູ່ ກັບທາງລົດໄຟ ລາວ-ຈີນ ຂະຫຍາຍກວ້າງອອກສາມາດເຊື່ອມຕໍ່ປະເທດໄທ ຈົນເຖິງ ມາເລເຊຍ ແລະສິງກະໂປ, ຮອດເວລານັ້ນ, ປະເທດຕ່າງໆຂອງເຂດ ອາຊີຕາເວັນອອກສຽງໃຕ້ລ້ວນແຕ່ຈະໄດ້ຮັບໂອກາດພັດທະນາໃໝ່.

ວັນທີ 26 ກໍລະກົດ 2022 ນີ້, ກອງພັນໃຫຍ່ 201 ກອງພົນທີ 2 ໄດ້ຈັດກອງປະຊຸມສະຫລຸບຖອດຖອນບົດຮຽນວຽກງານພະລາທິການ ປະຈຳ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ໂດຍ ການ ເປັນປະທານຂອງສະຫາຍ ພັນຕີ ອິນປັນ ໂນດນາໂພ ຫົວໜ້າພະແນກພະລາທິການ ກອງພັນໃຫຍ່ 201, ມີຄະນະພັກ- ຄະນະ ບັນຊາກອງພັນໃຫຍ່, ກອງພັນນ້ອຍ, ກອງຮ້ອຍເອກະລາດ, ໝວດທີ່ຂຶ້ນ ກັບ ຕະຫລອດຮອດພະນັກງານວິຊາສະເພາະເຂົ້າຮ່ວມ.

ໃນກອງປະຊຸມ ສະຫາຍ ພັນຕີ ສົມພົງ ວົງໜໍ່ຄຳ ຮອງພະແນກພະລາ ທິການກອງພັນໃຫຍ່ ໄດ້ຜ່ານບົດສະຫລຸຸບຕີລາຄາຄືນການຈັດຕັ້ງປະຕິບັດ ໜ້າທີ່ວຽກງານໃນ 6 ເດືອນຕົ້ນປີຜ່ານມາ, ຄະນະພັກ-ຄະນະບັນຊາ ໄດ້ຖືສຳ ຄັນວຽກງານສຶກສາອົບຮົມການເມືອງແນວຄິດໃຫ້ພະນັກງານ-ນັກຮົບ ເຮັດສຳເລັດໜ້າທີ່ວິຊາສະເພາະຂອງຕົນ, ພ້ອມກັນນັ້ນກໍຍັງໄດ້ສູ້ຊົນ ຊອກຫາແຫລ່່ງລາຍຮັບເຂົ້າກົມກອງ, ດ້ວຍການປູກຝັງ-ລ້ຽງສັດ ເຊີ່ງສະແດງອອກໃນບົດສະຫລຸຸບ 6 ເດືອນຕົ້ນປີຜ່ານມາ ກົມກອງສາມາດສ້າງ ລາຍຮັບໄດ້ 508.861.000 ກີບ, ນອກນີ້ຍັງສຸມໃສ່ວຽກງານວິຊາສະເພາະ ເປັນຕົ້ນແມ່ນວຽກງານເຊື້ອໄຟ, ວຽກງານເສນາຮັກ, ວຽກງານອຸປະໂພກ -ບໍລິໂພກ ແລະ ວຽກງານອື່ນໆ, ທິດທາງແຜນການໃນ 6 ເດືອນທ້າຍປີ, ຈະສືບຕໍ່ຂຸດຄົ້ນທ່າແຮງບົ່ມຊ້ອນ, ສ້າງແຫລ່ງສະໜອງທຶນຮ້ອນເຂົ້າກົມກອງໃນການສ້າງທີ່ຢູ່ຄ້າຍຄູ, ສຸມໃສ່ການຜະລິດ ການປູກ-ການລ້ຽງ ເປັນສິນຄ້າເພື່ອແກ້ໄຂຊີວິດການເປັນຢູ່ໃຫ້ມີປະສິດທິຜົນສູງໂດຍໃຊ້ທ່າແຮງບົ່ງຊ້ອນຂອງກົມກອງ, ເພີ່ມທະວີການຄຸ້ມຄອງປົກປັກຮັກສາ ວັດຖຸພະລາທິການ, ລະບົບສາງຄັງ, ໃຫ້ແໜ້ນໜາມີຄວາມປອດໄພ 100% ປະຕິບັດລະບອບລະບຽບຫຼັກການໃນການຮັບ-ຈ່າຍວັດຖຸພະລາທິການ ໃຫ້ຖືກຕ້ອງເປັນເອກະພາບແຕ່ອົງການຮອດກົມກອງໃຫ້ມີຄວາມໂປ່ງໃສ, ສົ່ງເສີມການປູກຜັກໃນເຮືອນຮົ່ມເພື່ອສ້າງເປັນບ່ອນສະໜອງເຂົ້າເຮືອນຄົວລວມ ແລະ ໃຫ້ມີຜັກກິນຕະຫລອດປີ.

ຈາກນັ້ນຜູ້ເຂົ້າຮ່ວມກອງປະຊຸມ ກໍ່ໄດ້ພັດປ່ຽນການຂື້ນປະກອບຄຳຄິດຄຳເຫັນໃສ່ບົດສະຫຼຸບເພື່ອໃຫ້ມີ ເນື້ອໃນຄົບຖ້ວນ ແລະນຳໄປຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບຜົນຕົວຈິງ ແລະ ຮັບຮອງເອົາທິດທາງແຜນການ 6 ເດືອນທ້າຍປີ 2022 ຢ່າງເປັນ ເອກະສັນ.

ພາບ-ຂ່າວ: ເກດ ອານຸສອນ

ແຫລ່ງຂ່າວຈາກແຂວງໄຊຍະບູລີ ໄດ້ໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2022 ນີ້, ແຂວງໄຊຍະບູລີ ມີມູນຄ່າສົ່ງອອກສິນຄ້າໄປຕ່າງປະເທດ ໄດ້ທັງໝົດ 84 ລ້ານກວ່າໂດລາສະຫະລັດ, ແຜນປີທີ່ວາງໄວ້ 45.753.880 ໂດລາສະຫະລັດ ປະຕິບັດໄດ້ 184.81%, ທຽບໃສ່ໄລຍະດຽວກັນຂອງປີຜ່ານມາ 54.033.462ໂດລາ ເພີ່ມຂຶ້ນ 56,49%, ສ່ວນມູນຄ່າການນໍາເຂົ້າສິນຄ້າ ມີທັງໝົດ 67 ລ້ານກວ່າໂດລາ, ຖ້າທຽບໃສ່ແຜນປີວາງໄວ້ 44 ລ້ານກວ່າໂດລາ, ປະຕິບັດໄດ້ 151,07% ແລະ ທຽບໃສ່ໄລຍະດຽວຂອງປີຜ່ານມາ 23 ລ້ານກວ່າໂດລາ ເພີ່ມຂຶ້ນ 183.22%.

ທ່ານ ຄໍາໄຊເລົາ ລືເຕ້ຊາ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງໄຊຍະບູລີ ໄດ້ໃຫ້ຮູ້ເມື່ອບໍ່ດົນມານີ້ວ່າ: ສິນຄ້າທີ່ເປັນທ່າແຮງຂອງ ແຂວງໄຊຍະບູລີ ແມ່ນຜະລິດຕະພັນກະສິກໍາ, ສາມາດສົ່ງອອກໄປຕ່າງປະເທດ ມີມູນຄ່າ 83 ລ້ານກວ່າໂດລາ, ຮອງລົງມາແມ່ນຫີນຂົບ, ເຄື່ອງປ່າຂອງດົງ ແລະ ຖ່ານດັງໄຟ. ສ່ວນມູນຄ່າການນໍາເຂົ້າສິນຄ້າ ໃນ 6 ເດືອນ ມີທັງໝົດ 67 ລ້ານກວ່າໂດລາ, ສິນຄ້າຫລັກທີ່ນໍາເຂົ້າຫລາຍກວ່າໝູ່ ແມ່ນປະເພດນໍ້າມັນເຊື້ອໄຟ ມູນຄ່າ 57 ລ້ານກວ່າໂດລາ, ກວມເຖິງ 50%, ຖັດລົງມາແມ່ນສະບຽງອາຫານ ແລະ ເຄື່ອງໄຟຟ້າ 1 ລ້ານກວ່າໂດລາ, ພາຫະນະ, ແນວພັນ ແລະ ອຸປະກອນຮັບໃຊ້ການຜະລິດມູນຄ່າ 1 ລ້ານກວ່າໂດລາ ແລະ ເຄື່ອງອາໄຫລ່ 5 ແສນກວ່າໂດລາ.

ຂະນະດຽວກັນ, ແຂວງໄຊຍະບູລີ ສາມາດອອກອະນຸຍາດສ້າງຕັ້ງ ແລະ ດໍາເນີນກິດຈະການໄດ້ຈໍານວນ 59 ແຫ່ງ, ໃນນີ້ອະນຸຍາດສືບຕໍ່ 49 ແຫ່ງ, ອອກໃໝ່ 10 ແຫ່ງ, ປັດຈຸບັນ ທົ່ວແຂວງມີໂຮງງານທັງໝົດ 2.046 ແຫ່ງ, ໃນນີ້ ໂຮງງານຂະໜາດໃຫຍ່ມີ 28 ແຫ່ງ, ຂະໜາດກາງ 33 ແຫ່ງ, ຂະໜາດນ້ອຍ 199 ແຫ່ງ ແລະ ນ້ອຍແບບຄອບຄົວ 1.786 ແຫ່ງ ເຊິ່ງສາມາດສ້າງມູນຄ່າລວມຍອດການຜະລິດ ດ້ານອຸດສາຫະກໍາ-ຫັດຖະກໍາ 115,7 ຕື້ກີບ, ທຽບໃສ່ແຜນການປີປະຕິບັດໄດ້ 49,04%, ທຽບໃສ່ປີຜ່ານມາ ແມ່ນເພີ່ມຂຶ້ນ 16,62%.

ທ່ານ ຄໍາໄຊເລົາ ລືເຕ້ຊາ ຍັງໃຫ້ຮູ້ອີກວ່າ: ໃນ 6 ເດືອນ ທ້າຍປີນີ້, ແຂວງໄຊຍະບູລີ ຈະສູ້ຊົນເຮັດໃຫ້ມູນຄ່າການສົ່ງອອກສິນຄ້າບັນລຸ 12 ລ້ານກວ່າໂດລາ, ມູນຄ່າການນໍາເຂົ້າສິນຄ້າຈາກຕ່າງປະເທດໃຫ້ຢູ່ໃນລະດັບ 21 ລ້ານກວ່າໂດລາ, ເຮັດໃຫ້ລວມຍອດມູນຄ່າການຜະລິດດ້ານອຸດສາຫະກໍາປຸງແຕ່ງ ແລະ ຫັດຖະກໍາບັນລຸ 120 ຕື້ກີບ, ລວມຍອດມູນຄ່າການຈໍາໜ່າຍຜະລິດດ້ານອຸດສາຫະກໍາ ແລະ ຫັດຖະກໍາ ໃຫ້ບັນລຸ 139,89 ຕື້ກີບ, ມູນຄ່າການຈໍລະຈອນສິນຄ້າພາຍໃນແຂວງ ໃຫ້ຂະຫຍາຍຕົວເພີ່ມຂຶ້ນ 2% ຂຶ້ນໄປ ແລະ ການຄຸ້ມຄອງລາຄາສິນຄ້າໃນທ້ອງຕະຫລາດ ບໍ່ໃຫ້ໜັງຕີງເກີນ 12% ຂອງລາຄາສິນຄ້າ.

ຂ່າວ-ພາບ: ບຸນທີ

ແຫລ່ງຂ່າວຈາກ ແຂວງຈໍາປາສັກ ໃຫ້ຮູ້ວ່າ: ກອງປະຊຸມສ້າງການຫັນປ່ຽນໃນການພັດທະນາ ກະສິກຳເປັນສິນຄ້າ ຕາມທິດຍືນຍົງ ຢູ່ 4 ແຂວງພາກໃຕ້ ປະກອບມີ: ຈຳປາສັກ, ສາລະວັນ, ເຊກອງ ແລະ ແຂວງອັດຕະປື ຈັດຂຶ້ນໃນວັນທີ 25 ກໍລະກົດ 2022 ຢູ່ແຂວງຈໍາປາສັກ ໂດຍເປັນປະທານຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີຫົວໜ້າຄະນະຜູ້ຊ່ວຍວຽກນາຍົກລັດຖະມົນຕີ, ຮອງລັດຖະມົນຕີກະຊວງກະສິກຳ ແລະ ປ່າໄມ້, ຮອງລັດຖະມົນ ຕີກະຊວງສຶກສາທິການ ແລະ ກິລາ, ປະທານສະພາການຄ້າ ແລະ ອຸດສະຫະກຳແຫ່ງຊາດລາວ, ຜູ້ຕາງໜ້າເອກອັກຄະຣາຊະທູດຍີ່ປຸ່ນ ປະຈຳລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ວິໄລວົງ ບຸດດາຄໍາ ໄດ້ກ່າວວ່າ: ກອງປະຊຸມ ໄດ້ຮັບຟັງລາຍງານກ່ຽວກັບການຜະລິດກະສິກຳເປັນສິນຄ້າຈາກພາກສ່ວນຕ່າງໆ, ໄດ້ມີຄົ້ນຄ້ວາ, ເຊື່ອມຊຶມ ແລະ ສ້າງຄວາມເຂົ້າໃຈຢ່າງຖືກຕ້ອງ ແລະ ຊຸກຍູ້ໃຫ້ການຮ່ວມມືຈັດຕັ້ງປະຕິບັດຢ່າງແຂງແຮງ ໃນການພັດທະນາກະສິກຳເປັນສິນຄ້າ ຕາມທິດຍືນຍົງ ໂດຍສະເພາະ ຢູ່ 4 ແຂວງພາກໃຕ້ ແນໃສ່ເຮັດໃຫ້ທິດນຳຂອງ ພັກ-ລັດຖະບານ ຕໍ່ການນຳພາ, ສົ່ງເສີມການຜະລິດເປັນສິນຄ້າ ຕາມທ່າແຮງບົ່ມຊ້ອນຂອງແຕ່ລະເຂດ ແຕ່ລະທ້ອງຖິ່ນມີການຂະຫຍາຍຕົວຢ່າງກວ້າງຂວາງ ສອດຄ່ອງກັບແຜນພັດທະນາເສດຖະກິດ-ສັງຄົມ ກໍຄື ການລຶບລ້າງຄວາມ ທຸກຍາກຂອງປະຊາຊົນ ທີ່ລັດຖະບານ ກໍຄື ແຕ່ລະແຂວງວາງອອກໃຫ້ປະກົດຜົນເປັນຈິງ.

ເພື່ອບັນລຸເປົ້າໝາຍ ສ້າງການຫັນປ່ຽນໃນການພັດທະນາ ກະສິກຳເປັນສິນຄ້າ ຕາມທິດຍືນຍົງຢູ່ 4 ແຂວງພາກໃຕ້ໃນຄັ້ງນີ້, ກອງປະຊຸມໄດ້ປະກອບຄຳເຫັນ ແລະ ສົນທະນາແລກປ່ຽນກ່ຽວກັບການພັດທະນາກະສິກຳເປັນສິນຄ້າ ຕິດພັນກັບການກຳນົດເຂດ ຢູ່ 4 ແຂວງພາກໃຕ້, ການຫັນເປັນອຸດສາຫະກຳ ໃນຂະແໜງກະສິກຳ, ການພັດທະນາເສດຖະ ກິດຮ່ວມມືກັບປະຊາຊົນ, ຄວາມເຫັນກ່ຽວກັບຫັນກະສິກຳເປັນອຸດສາຫະກຳ ແລະ ສະຫະ ກອນ, ການປັບປຸງການເຄື່ອນໄຫວຂອງສະມາຄົມ-ກຸ່ມທຸລະກິດຢູ່ແຂວງ ໃນຂະແໜງການຜະລິດສິນຄ້າກະສິກຳ ເປັນຕົ້ນ: ກາເຟ, ມັນຕົ້ນ, ຢາງ ພາລາ; ປະກອບຄຳເຫັນກ່ຽວກັນການພັດທະນາດ້ານການຄ້າ, ການຂົນສົ່ງ, ການສົ່ງອອກສິນຄ້າກະສິກຳຢູ່ບັນດາແຂວງພາກໃຕ້, ບົດຮຽນໃນການສ້າງຄວາມເຂັ້ມແຂງຂອງອົງ ການຈັດຕັ້ງທຸລະກິດ, ການເຊື່ອມໂຍງການເຄື່ອນໄຫວຂອງພາກທຸລະກິດຂັ້ນສູນກາງ ແລະ ຂັ້ນທ້ອງຖິ່ນແຂວງ ແລະ ຫົວຂໍ້ສຳຄັນອື່ນໆ.

ຂ່າວ: ເກດສະໜາ

ພາບ: ທັດຊະນະ

ວັນທີ 25 ກໍລະກົດ 2022 ກະຊວງສຶກສາທິການ ແລະ ກິລາ ໄດ້ເປີດການນຳໃຊ້ ລະບົບຂໍ້ມູນຂ່າວສານຄຸ້ມຄອງການສຶກສາ ແລະ ກິລາ ຂອງ ສປປ ລາວ (LESMIS) ຢ່າງເປັນທາງການ, ຊຶ່ງເປັນລະບົບດິຈິຕອລທີ່ຈະຊ່ວຍອຳນວຍຄວາມສະດວກໃນການເຂົ້າເຖິງຂໍ້ມູນດ້ານການສຶກສາ, ວິທະຍາສາດ ແລະ ກິລາ ໃນ ສປປ ລາວ ຢ່າງວ່ອງໄວ ເພື່ອຊ່ວຍສະໜັບສະໜຸນການຕິດຕາມ, ປະເມີນຜົນ ແລະ ກຳນົດນະໂຍບາຍຕ່າງໆຂອງຂະແໜງການ.

ພິທີເປີດໂຕ ລະບົບ LESMIS ເເມ່ນໃຫ້ກຽດເປັນປະທານໂດຍ ພະນະທ່ານ ຮອງສາດສະດາຈານ ປອ. ພຸດ ສິມມາລາວົງ, ລັດຖະມົນຕີ ກະຊວງສຶກສາທິການ ແລະ ກິລາ, ເເລະ ເຂົ້າຮ່ວມໂດຍ ພະນະທ່ານນາງ ອີນາ ມາກຊີອູລີໂອເນເຕ, ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ, ແລະ ທ່ານນາງ ປອ. ປີອາ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ພ້ອມດ້ວຍບັນດາຜູ້ຕາງໜ້າຈາກພາກສ່ວນຕ່າງໆທີ່ກ່ຽວຂ້ອງນັບແຕ່ຂັ້ນສູນກາງຈົນຮອດທ້ອງຖິ່ນ ແລະ ຄູ່ຮ່ວມພັດທະນາ. “ຂໍ້ມູນທີ່ມີຄຸນນະພາບນັ້ນມີຄວາມສຳຄັນຫຼາຍ ເເລະ ຈະຊ່ວຍໃຫ້ພວກເຮົາເຂົ້າໃຈເຖີງຄວາມຕ້ອງການດ້ານການຮຽນຂອງເດັກນ້ອຍຫຼາຍຂຶ້ນ. ລະບົບ LESMIS ຈະເຮັດໜ້າທີ່ເປັນລະບົບຄຸ້ມຄອງຂໍ້ມູນສູນກາງທີ່ຈະຊ່ວຍສະໜອງການເຂົ້າເຖິງຂໍ້ມູນການສຶກສາທັງໝົດໃນ ສປປ ລາວ, ຊຶ່ງຂໍ້ມູນເຫຼົ່ານີ້ ເເມ່ນມິຄວາມສໍາຄັນເປັນພິເສດໃນໄລຍະການແຜ່ລະບາດຂອງພະຍາດ ໂຄວິດ-19,” ກ່າວໂດຍ ພະນະທ່ານ ປອ. ພຸດ ສິມມາລາວົງ. ນອກນັ້ນ, ທ່ານຍັງໄດ້ສະແດງຄວາມຂອບໃຈຕໍ່ ສະຫະພາບເອີຣົບ ແລະ ອົງການຢູນິເຊັບ ທີ່ໄດ້ໃຫ້ການສະໜັບສະໜູນໃນການພັດທະນາ ລະບົບ LESMIS ພາຍໃຕ້ ແຜນງານການຮ່ວມມືເພື່ອສ້າງຄວາມເຂັ້ມແຂງໃຫ້ລະບົບການສຶກສາໃນ ສປປ ລາວ (PSES) ອີກດ້ວຍ.

ກ່ອນການພັດທະນາລະບົບ LESMIS, ກະຊວງສຶກສາທິການ ແລະ ກິລາ ໄດ້ນຳໃຊ້ລະບົບຄຸ້ມຄອງຂໍ້ມູນຫຼາຍໆເເບບ, ຊຶ່ງແຕ່ລະ ລະບົບເເມ່ນມີຂໍ້ມູນສຳຄັນກ່ຽວກັບການສຶກສາໃນ ສປປ ລາວ ເເລະ ຄຸ້ມຄອງໂດຍພາກສ່ວນຕ່າງໆ. ເເຕ່ຍ້ອນການນຳໃຊ້ລະບົບຄຸ້ມຄອງຂໍ້ມູນຫຼາຍໆອັນຈື່ງເຮັດໃຫ້ເກີດມີຄວາມຫຍຸ້ງຍາກໃນການນໍາໃຊ້ຂໍ້ມູນເຫຼົ່ານີ້ຢ່າງເຕັມປະສິດຕິພາບ ແລະ ບາງຄັ້ງກໍ່ເຮັດໃຫ້ເກີດມີຄວາມຊໍ້າຊ້ອນໃນການເກັບກໍາຂໍ້ມູນນັບຕັ້ງເເຕ່ຂັ້ນເມືອງຈົນເຖິງຂັ້ນໂຮງຮຽນ. ດັ່ງນັ້ນ, LESMIS ຈະ​ຊ່ວຍ​ແກ້​ໄຂ​ສິ່ງ​ທ້າ​ທາຍໃນດ້ານ​ນີ້​ ແລະ ​ຍັງຈະ​ເປັນລະບົບທີ່​ສາ​ມາດ​ເຂົ້າ​ເຖິງໄດ້ຜ່ານທາງ​ອອນລາຍ ເເລະ ໃນຮູບເເບບ ເເອັບ, ໂດຍຂັ້ນ​ສູນ​ກາງ ຫຼື ຂັ້ນ​ທ້ອງຖິ່ນ ແລະ ໂຮງ​ຮຽນ​.

“ລະບົບ LESMIS ຖືກອອກແບບມາເພື່ອເປັນລະບົບຄຸ້ມຄອງຂໍ້ມູນສູນກາງສໍາລັບຂະແຫນງການ ແລະ ຈະປັບປຸງການຄຸ້ມຄອງຂໍ້ມູນການສຶກສາໂດຍລວມໃນ ສປປ ລາວ,” ກ່າວໂດຍ ພະນະທ່ານນາງ ອີນາ ມາກຊີອູລີໂອເນເຕ. ທ່ານນາງ ຍັງໄດ້ກ່າວອີກວ່າ ສະຫະພາບເອີຣົບ ແລະ ອົງການຢູນິເຊັບ ມຸ່ງໝັ້ນທີ່ຈະສືບຕໍ່ໃຫ້ການສະໜັບສະໜູນເເກ່ ກະຊວງສຶກສາທິການ ແລະ ກິລາ ໃນການບັນລຸເປົ້າໝາຍທີ່ກໍານົດໄວ້ໃນ ແຜນພັດທະນາຂະແຫນງການສຶກສາ ແລະ ກິລາ (ESSDP) ເຊັ່ນດຽວກັນ. “ພວກເຮົາຕ້ອງຮັບຮູ້ວ່າລະບົບ LESMIS ຍັງຈະສືບຕໍ່ຜັນຂະຫຍາຍ ນັບຈາກນີ້ເປົນຕົ້ນໄປ ເເລະ ຍັງຈະມີລະບົບຂໍ້ມູນຂ່າວສານການສຶກສາອື່ນໆເພີ່ມຕື່ມ ທີ່ຈະຖືກປະກອບເຂົ້າໃນລະບົບ LESMIS ພາຍໃຕ້ການຊີ້ນໍາຂອງ ກະຊວງສຶກສາທິການ ແລະ ກິລາ. ຄຽງຄູ່ກັນນີ້, ອົງການຢູນິເຊັບ ຍັງຄົງໃຫ້ຄໍາໝັ້ນສັນຍາທີ່ຈະສືບຕໍ່ສະໜັບສະໜູນ ພ້ອມກັບຄູ່ຮ່ວມງານຂອງພວກເຮົາ,” ກ່າວໂດຍ ທ່ານ ປອ. ປີອາ ເຣເບລໂລ ບີຣໂຕ. ທ່ານ​ຍັງ​ໄດ້ກ່າວອີີກວ່າ ອົງການຢູນິເຊັບ ​ຈະ​ສືບ​ຕໍ່​ສະໜັບສະໜຸນ ກະຊວງສຶກສາທິການ ແລະ ກິລາ ​ໃນ​ການ​ດຳ​ເນີນ​ວຽກງານ​ຂອງ LESMIS ​ແລະ ການ​ສ້າງ​ຄວາມ​ສາມາດ​ຂອງ​ພະນັກງານ​ເພື່ອ​ໃຫ້ສາມາດ ​ນຳ​ໃຊ້ລະບົບດັ່ງກ່າວໄດ້​ຢ່າງ​ເຕັມທີ່.

ເພື່ອສະໜັບສະໜູນການເປີດການນຳໃຊ້ລະບົບ LESMIS ແລະ ວຽກງານອື່ນໆ, ສະຫະພາບເອີຣົບ ແລະ ອົງການຢູນິເຊັບ ຍັງໄດ້ມອບອຸປະກອນ ICT ໃຫ້ແກ່ ກະຊວງສຶກສາທິການ ແລະ ກິລາ, ຊຶ່ງອຸປະກອນເຫຼົ່ານີ້ເເມ່ນໄດ້ຖືກຈັດຊື້ພາຍໃຕ້ ແຜນງານການຮ່ວມມືເພື່ອສ້າງຄວາມເຂັ້ມແຂງໃຫ້ລະບົບການສຶກສາໃນ ສປປ ລາວ (PSES). ອຸປະກອນດັ່ງກ່າວປະກອບມີ ຄອມພິວເຕີໂນດບຸກ 333 ເຄື່ອງ, ແທັບເລັດ 1,668 ໜ່ວຍ ແລະ ໂທລະທັດພ້ອມຊຸດຈານຮັບສັນຍານ 456 ຊຸດ. ອຸປະກອນດັ່ງກ່າວຍັງຈະຊ່ວຍສະໜັບສະໜູນ ກະຊວງ ໃນການຍົກລະດັບທັກສະດ້ານດິຈິຕອລ ໃນຂົງເຂດວຽກງານທີ່ສຳຄັນອື່ນໆ ພາຍໃຕ້ PSES, ລວມເຖີງວຽກງານປະກັນຄຸນນະພາບການສຶກສາ ແລະ ການເຜີຍແຜ່ ຖານຂໍ້ມູນການຮຽນ-ການສອນອອນລາຍຂອງ ກະຊວງສຶກສາທິການ ແລະ ກິລາ ຄັງປັນຍາລາວ. ລວມມູນຄ່າ 899,000 ໂດລາ.

ນອກຈາກນັ້ນ, ຍັງໄດ້ມີການມອບຊຸດອຸປະກອນ ICT ອີກຈຳນວນໜື່ງເພີ່ມຕື່ມໃຫ້ແກ່ ກະຊວງສຶກສາທິການ ແລະ ກິລາ, ຊຶ່ງສະໜອງໃຫ້ໂດຍຜ່ານການສະໜັບສະໜຸນຂອງ ກອງທຶນຮ່ວມມືສາກົນເພື່ອການສຶກສາ (GPE), ເພື່ອປະກອບສ່ວນເຂົ້າໃນວຽກງານການຕອບໂຕ້ ພະຍາດ COVID-19 ຂອງຂະແໜງການສຶກສາ. ອຸປະກອນຊຸດນີ້ປະກອບມີ ຄອມພິວເຕີໂນດບຸກ 200 ເຄື່ອງ, ໂປເຈັກເຕີເຄື່ອນທີ່ 200 ເຄື່ອງ, ແທັບເລັດ 450 ໜ່ວຍ ແລະ ໂທລະທັດ 300 ຊຸດ. ລວມມູນຄ່າ 364,724 ໂດລາ.

ການປຸກລະດົມປະຊາຊົນເຂົ້າຮ່ວມຂະບວນການສັກຢາວັກຊີນຢູ່ພາຍໃນແຂວງຄຳມ່ວນ​ເຫັນວ່າຍັງພົບບັນຫາທ້າທາຍຫລາຍຢ່າງ ໂດຍສະເພາະແມ່ນປະຊາຊົນຢູ່ເຂດຫ່າງໄກສອກຫຼີກເກືອບ 70% ແລະ ອີກບັນຫາໜຶ່ງເສັ້ນທາງຄົມມະນາ ຄົມໄປມາຫາສູ່ແມ່ນຍັງພົບຄວາມຫຍຸ້ງຍາກຫລາຍ, ​ເປັນ​ຕົ້ນ​ແມ່ນ​ໃນໄລຍະລະດູຝົນນີ້ ບາງບ້ານກໍບໍ່ສາມາດເຂົ້າເຖິງໄດ້, ການເດີນທາງໃຊ້ເວລາຫຼາຍຂອງທີມແພດເຄື່ອນທີ່,​ ບວກໃສ່ລະດັບຄວາມຮັບຮູ້ ແລະ ຄວາມເຂົ້າໃຈຂອງປະຊາຊົນຍັງມີຄວາມລັງເລໃຈໃນການຕັດສິນໃຈເຂົ້າມາຮັບຢາວັກຊິນ, ອີກດ້ານຫນຶ່ງຜູ້ປົກຄອງເດັກຈຳນວນໜຶ່ງຍັງຢ້ານລູກເຈັບໃນເວລາມາຮັບການສັກຢາວັກຊິນ ແລະ ປະຊາຊົນຈໍານວນໜຶ່ງໄປໄຮ່, ໄປສວນ ບໍ່ກັບເຂົ້າມາບ້ານ ແລະ ຈຳນວນຢາວັກຊິນຂອງພວກເຮົາມີກອບຈຳກັດໃນເວລາເຄື່ອນໄຫວເຊັ່ນວ່າ ຖັງນໍ້າກ້ອນເກັບໄວ້ດົນບໍ່ໄດ້, ຢາວັກຊິນອາຍຸສັ້ນ, ແລ່ນນຳການທີ່ວັກຊິນຈະບໍ່ມີຖັງນໍ້າກ້ອນໃສ່.​

ຕາມ​ການ​ໃຫ້​ສຳພາດ​ຂອງ​ທ່ານ​ ສົມ​ບູນ​ ຄຳ​ພິ​ທູນ​ ຫົວໜ້າ​ຂະແໜງອະນາໄມ ແລະ​ ສົ່ງເສີມ​ສຸຂະພາບ​ ພະແນກ​ສາທາລະນະ​ສຸກ​ແຂວງ​ຄຳ​ມ່ວນ​ ຕໍ່​ສື່​ມວນ​ຊົນ​ໃນ​ວັນ​ທີ ​25 ກໍລະກົດ​ຜ່ານ​ມາ​ນີ້​ວ່າ​: ຕໍ່​ກັບ​ບັນຫາຫຍຸ້ງຍາກ​ທ້າທາຍດັ່ງກ່າວ, ​ເພື່ອເຮັດໃຫ້ເຂົາເຈົ້າໄດ້ຮັບວັກຊິນຢ່າງທົ່ວເຖິງ ທັງ​ເປັນການສ້າງພູມຄຸ້ມກັນໂດຍສະເພາະຜູ້ທີ່​ມີພະຍາດປະຈໍາຕົວ, ຜູ້ທີ່ຈະເດີນທາງໄປເຮັດວຽກຢູ່ຕ່າງປະເທດ ຫຼື ນັກຮຽນ, ນັກສຶກສາທີ່ຈະໄປສຶກສາຢູ່ຕ່າງປະເທດຕ້ອງໄດ້ຮັບວັກຊິນໃຫ້ຄົບໂດຣເພື່ອປ້ອງກັນການຕິດເຊື້ອພະຍາດໂຄວິດ-19, ແຕ່​ເຖິງຢ່າງໃດກໍຕາມການຈັດຕັ້ງປະຕິບັດວຽກງານກັນພະຍາດ ແລະ ສົ່ງເສີມສຸຂະພາບ ໂດຍສະເພາະເປົ້າໝາຍການສັກວັກຊິນໃຫ້ກຸ່ມແມ່ຍິງ ແລະ ເດັກນ້ອຍ ແລະ ວັກຊິນປ້ອງກັນພະຍາດໂຄວິດ – 19, ກ່ຽວກັບການສັກວັກຊິນໃຫ້ເດັກກຸ່ມເປົ້າໝາຍ.

ມາຮອດປັດຈຸບັນການຈັດຕັ້ງປະຕິບັດໄດ້ 4.000 ກວ່າຄົນ, ສໍາລັບເດັກລຸ່ມອາຍຸ 1 ປີ ເທົ່າກັບ 94%, ການສັກວັກຊິນໃຫ້ເດັກນ້ອຍໃນກຸ່ມເປົ້າໝາຍນີ້ເກືອບຈະບັນລຸເປົ້າໝາຍທີ່ຄາດໄວ້ 95 %, ສໍາການສັກວັກຊິນເພື່ອປ້ອງກັນພະຍາດໂຄວິດ – 19 ໃຫ້ກັບປະຊາຊົນ ແລະ ເດັກນ້ອຍແຕ່ ອາຍຸ 6 ປີຂຶ້ນໄປ ເຂັມທີ 1 ມາຮອດປັດຈຸບັນທຽບໃສ່ປະຊາກອນສາມາດສັກໄດ້ 77 % ແລະ ເຂັມທີ 2 ແມ່ນ 70%,ສ່ວນກຸ່ມເປົ້າໝາຍ 6 ປີຂຶ້ນໄປມາຮອດປັດຈຸບັນໄດ້ 88% ແລະ ເຂັມທີ 2 ໄດ້ 80 %, ສະຫຼຸບແລ້ວແມ່ນສາມາດບັນລຸຕາມກຸ່ມເປົ້າໝາຍທີ່ກຳນົດໄວ້.

ຂ່າວ-ພາບ: ເຄນໄຊ

ຕາມ​ຂ່າວ​ຈາກ​ ຊິນ​ຮວາ, ສຳນັກງານ ເຕັກໂນໂລຊີ ຂໍ້ມູນ ຂ່າວສານ ແລະ ການສື່ສານ ສີລັງກາ (ICTA) ໄດ້ປະກາດເລື່ອນເວລາ ການເປີດຕົວ ລະບົບ QR code ນໍ້າມັນເຊື້ອໄຟແຫ່ງຊາດ. ຫລັງ​ຈາກ​ທີ່​ມີ​ການ​ປະກາດ​ວ່າ:​ ປ້ຳ​ນ້ຳມັນ ໃນ​ທົ່ວ​ປະ​ເທດ​ ຈະ​ເລີ່​ມສະໜອງນ້ຳມັນເຊື້ອ​ໄຟ​ດ້ວຍ​ລະບົບດັ່ງກ່າວ ແຕ່​ວັນ​ທີ 25 ກໍລະກົດປີ​ນີ້ ​ເປັນຕົ້ນ​ໄປ. ຂະນະ​ນີ້ ການ​ຈ່າຍນ້ຳມັນດ້ວຍ​ລະບົບດັ່ງກ່າວຈະ​ຖືກ​ໃຊ້ທີ່​ສະຖານີບໍລິການນ້ຳມັນບາງ​ແຫ່ງ ໃນ​ນະຄອນ​ຫລວງໂກ​ລົມ​ໂບ ​ແລະ 25 ​ເຂດ​ເທົ່າ​ນັ້ນ ​ເພື່ອ​ກ້າວ​ໄປ​ສູ່​ການ​ຂະຫຍາຍໃນ​ຂອບ​ເຂດ​ທົ່ວ​ປະ​ເທດ​ໃນ​ຕໍ່ໜ້າ.

(ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ ​ນີວ​ແດນ​ລີ, ວັນ​ທີ25​ ກໍລະກົດ​ນີ້,ທ່າ​ງ ນາງ ທຣຸປາ​ທີ ​ເມີ​ນູ(Trupati Murmu), ສາບານ​ຕົນ​ ເຂົ້າຮັບ​ຕຳ​ແໜ່​ງ ປະທານາ ທິ​ບໍດີ​ ອິນ​ເດຍ ຄົນ​ທີ15 ຕໍ່​ຈາກ ທ່ານຣຳ ນັດ ​ໂກ​ວິນ (Ram Nath Kovind) ​ໃນ​ພິທີ​ ໄດ້​ຈັ​ດຂຶ້ນ ​ຢ່າງ​ສົມ​ກຽດ ທີ່​ທຳນຽບ ປະທານາທິບໍ​ດີ (Ratpatipawan) ນະຄອນຫລວງ ​ນີວ​ແດນ​ລີ ຫລັງ​ຈາກ ​ໄດ້​ຮັບ​ສະ​ເໜີ​ຊື່​ ຈາກ​ພັກ Bharatiya Janata (BJP), ຂອງນາຍົກລັດຖະມົນຕີ ນາ​ເຣັນດຣາ ​ໂມ​ດີ( Narendra Modi), ຊຶ່ງມີສຽງ ສ່ວນຫລາຍ ໃນສະພາ.

(ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ