ພີທີເປີດໂຄງການສໍາຫຼວດ ແລະ ກວດກູ້ລະເບີດບໍ່ທັນແຕກທີ່ຕົກຄ້າງຢູ່ແຂວງຊຽງຂວາງ ໄລຍະ II ໄດ້ຈັດຂຶ້ນວັນທີ 25 ກໍລະກົດ 2022 ທີ່ ໂຮງແຮມຄລາວພລາຊາ ມີທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຮອງປະທານຜູ້ປະຈໍາການຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ທ່ານ ນາງ Joy M. Sakurai ອັກຄະລັດຖະທູດສະຫະລັດອາເມຣິກາປະຈຳ ສປປ ລາວ ທ່ານ ບຸນເຮືອງ ສຸລິໄຊ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຊຽງຂວາງ ພ້ອມດ້ວຍຫົວໜ້າອົງການເກັບກູ້ລະເບີດແມັກ ປະຈຳ ສປປ ລາວ ແລະ ຂະແໜງການກ່ຽວຂ້ອງເຂົ້າຮ່ວມ.

ເພື່ອເປັນການສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ- ສັງຄົມຂອງທ້ອງຖິ່ນ ແຂວງຊຽງຂວາງໂດຍການກວດກູ້ລະເບີດບໍ່ທັນແຕກທີ່ຕົກຄ້າງອອກຈາກເນື້ອທີ່ດິນບ່ອນທີ່ມີການພັດທະນາ ແລະ ດິນທຳການຜະລິດດ້ານກະສິກຳຂອງພໍ່-ແມ່ປະຊາຊົນ ພ້ອມດຽວກັນນັ້ນ ກໍເພື່ອເປັນການສະໜັບສະໜູນ ລັດຖະບານແຫ່ງ ສປປ ລາວ ໃຫ້ບັນລຸເປົ້າໝາຍດ້ານການພັດທະນາແບບຍືນຍົງທີ 18 ໂດຍການຫຼຸດຜ່ອນຜົນກະທົບຈາກລະເບີດບໍ່ທັນແຕກທີ່ຕົກຄ້າງໃນໄລຍະຍາວຢູ່ ສປປລາວ ໂຄງການດັ່ງກ່າວ ແມ່ນມີທີ່ຕັ້ງ ຢູ່ 7 ເມືອງຂອງແຂວງຊຽງຂວາງຄື: ເມືອງໜອງແຮດ ເມືອງຄູນ ເມືອງຜາໄຊ ເມືອງແປກ ເມືອງພູກູດ ເມືອງຄໍາ ແລະ ເມືອງໝອກ ໂດຍຈະສຸມໃສ່ຈັດຕັ້ງປະຕິບັດ 4 ກິດຈະກຳຫຼັກຄື ສໍາຫຼວດທີ່ບໍ່ແມ່ນທາງດ້ານວິຊາການ ໂຄສະນາສຶກສາຄວາມສ່ຽງໄພຕໍ່ລະເບີດບໍ່ທັນແຕກ (ລບຕ) ສໍາຫຼວດທາງດ້ານວິຊາການ ແລະ ທໍາລາຍລະເບີດເຄື່ອນທີ່ ແລະ ກວດກູ້ລະເບີດບໍ່ທັນແຕກທີ່ຕົກຄ້າງ ໂດຍໄດ້ຮັບທຶນສະໜັບສະໜູນຈາກລັດຖະບານສະຫະລັດອາເມຣິກາ ມູນຄ່າ 7,6 ລ້ານໂດລາສະຫະລັດ ມີໄລຍະການຈັດຕັ້ງປະຕິບັດໂຄງການແຕ່ວັນທີໄດ້ຮັບການອະນຸມັດຈົນເຖິງວັນທີ 31 ທັນວາ 2022 ໂຄງການດັ່ງກ່າວ ແມ່ນໂຄງການທີ່ໄດ້ຢູ່ພາຍໃຕ້ບົດບັນທຶກຄວາມເຂົ້າໃຈລະຫວ່າງກະຊວງແຮງງານ ແລະ ສະຫວັດດີການສັງຄົມ ຕາງໜ້າໂດຍຫ້ອງການຄະນະກຳມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ແລະ ອົງການເກັບກູ້ລະເບີດແມັກ ປະຈຳ ສປປ ລາວ.

ນັບແຕ່ປີ 2018 ເປັນຕົ້ນມາ ລັດຖະບານສະຫະລັດອາເມຣິກາແມ່ນໄດ້ໃຫ້ທຶນສະໜັບສະໜູນການຈັດຕັ້ງປະຕິບັດໂຄງການສຳຫຼວດລະເບີດບໍ່ທັນແຕກທີ່ຕົກຄ້າງຢູ່ແຂວງຊຽງຂວາງ ມູນຄ່າ 14,7 ລ້ານໂດລາສະຫະລັດ ໂດຍມີໄລຍະຂອງການຈັດຕັ້ງປະຕິບັດແຕ່ປີ 2018 ຮອດເດືອນທັນວາ 2021 ແລະ ໄດ້ມີການດັດແກ້ເພີ່ມງົບປະມານ ແລະ ກິດຈະກຳເຂົ້າໃສ່ໂຄງການສຳຫຼວດເພີ່ມອີກມູນຄ່າ 6,5 ລ້ານໂດລາສະຫະລັດ ມາຮອດປັດຈຸບັນ ເປັນໄລຍະທີ II ລວມມູນຄ່າທັງໝົດປະມານ 28,74 ລ້ານ ໂດລາສະຫະລັດ ຕາມການອະນຸມັດຕົວຈິງຂອງກະຊວງການຕ່າງປະເທດ ໃນນາມຕາງໜ້າລັດຖະບານແຫ່ງ ສປປ ລາວ ໃນການອະນຸມັດໂຄງການທີ່ໄດ້ຮັບການສະໜັບສະໜູນຜ່ານອົງການເກັບກູ້ລະເບີດ ແມັກ ປະຈຳ ສປປ ລາວ ເຊິ່ງເປັນໜຶ່ງໃນອົງການຈັດຕັ້ງສາກົນທີ່ບໍ່ສັງກັດລັດຖະບານ ທີ່ເຮັດໜ້າເປັນອົງການປະຕິບັດງານດ້ານວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ.

(ຂ່າວສານຮສສ)

ຂ່າວຕ່າງປະເທດລາຍງານ ເມື່ອວັນທີ 25 ກໍລະກົດທີ່ຜ່ານມານີ້, ກະຊວງການຄ້າ ແລະ ອຸດສາຫະກຳສິງກະໂປ (MTI) ໄດ້ເປີດເຜີຍດັດຊະນີລາຄາຜູ້ບໍລິໂພກພື້ນຖານ ( core CPI) ໃນເດືອນມິຖຸນາທີ່ຜ່ານມາ ເພີ່ມຂຶ້ນສູ່ລະດັບ 4,4% ເມື່ອທຽບແບບລາຍປີຈາກລະດັບ 3,6% ໃນເດືອນພຶດສະພາ ສ່ວນດັດຊະນີລາຄາຜູ້ບໍລິໂພກທົ່ວໄປ (CPI all Items) ໃນເດືອນມິຖຸນາ ເພີ່ມຂຶ້ນທີ່ລະດັບ 6,7% ເມື່ອທຽບແບບລາຍປີຈາກລະດັບ 5,6% ໃນເດືອນພຶດສະພາ.

MTI ຍັງໄດ້ເປີດເຜີຍວ່າ ດັດຊະນີ CPI ພື້ນຖານທີ່ບໍ່ລວມລາຄາໃນໝວດທີ່ພັກອາໄສ ແລະ ການຂົນສົ່ງທາງບົກຂອງເອກະຊົນ ສ່ວນດັດຊະນີ CPI ເປັນດັດຊະນີທີ່ຄຳນວນອັດຕາເງິນເຟີ້ຈາກສິນຄ້າໃນທຸກໝວດ. ບົດລາຍງານຂອງເອັມເອເອສ (MAS) ລະບຸວ່າ ດັດຊະນີ CPI ພື້ນຖານທີ່ເພີ່ມຂຶ້ນໃນເດືອນມິຖຸນາໄດ້ຮັບແຮງໜູນມາຈາກລາຄາດ້ານການບໍລິການ ອາຫານ ການຄ້າຍ່ອຍ ແລະ ສິນຄ້າອື່ນໆ ລວມເຖິງລາຄາໄຟຟ້າ ແລະ ແກ໊ສທຳມະຊາດທີ່ເພີ່ມຂຶ້ນ. MAS ລະບຸຕື່ມວ່າ ແຮງກົດດັນດ້ານເງິນເຟີ້ຂອງສິງກະໂປຈະຍັງຄົງຢູ່ໃນລະດັບສູງໃນໄລຍະຫຼາຍເດືອນຂ້າງໜ້າ ໂດຍຄາດວ່າ CPI ພື້ນຖານຈະເພີ່ມຂຶ້ນສູ່ລະດັບສູງທີ່ສຸດໃນໄຕມາດທີ 3 ກ່ອນທີ່ຈະຫົດຕົວລົງໃນໄລຍະທ້າຍປີ ສຳລັບທັງໝົດປີ 2022 ຄາດວ່າ ດັດຊະນີ CPI ທົ່ວໄປຈະຢູ່ທີ່ລະດັບ 5%-6% ແລະ ດັດຊະນີ CPI ພື້ນຖານຈະຢູ່ທີ່ 3%-4%.

ໃນວັນທີ 26 ກໍລະກົດນີ້, ຄະນະ ສິລະປະກອນ ກອງທັບປະຊາຊົນລາວ ເຊິ່ງ ນໍາໂດຍ ທ່ານ ພັນເອກ ແປ້ນຄໍາ ບຸດຈັນແພງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ໄດ້ເຂົ້າຢ້ຽມຂໍ່ານັບ ທ່ານພົນເອກ ສະເຫຼີມພົນ ສີສະຫວັດ ຜູ້ບັນຊາການທະຫານສູງສຸດ ກອງທັບ ແຫ່ງຣາຊະອານາຈັກໄທ ເນື່ອງໃນໂອກາດນຳພາ ຄະນະນັກສະແດງ ສີລະປະກອນ ກອງທັບປະຊາຊົນ ລາວ ຢ້ຽມຢາມ ແລະ ສະແດງແລກປ່ຽນວັດທະນະທຳ ຢູ່ ຣາຊະອານາຈັກ ໄທ ໃນລະຫວ່າງວັນທີ 25 -28 ກໍລະກົດ 2022.

ໂອກາດນີ້, ທ່ານ ຜູ້ບັນຊາການທະຫານສູງສຸດ ກອງທັບ ແຫ່ງ ຣາຊະອານາຈັກໄທ ກໍໄດ້ຕີລາຄາສູງຕໍ່ຄະນະສີລະປະກອນກອງທັບປະຊາຊົນລາວທີ່ໄດ້ມາຢ້ຽມຢາມ ແລະ ເຄື່ອນໄຫວການສະແດງສິລະປະວັນນະຄະດີ, ເຊິ່ງເປັນການແລກປ່ຽນວັດທະນະທໍາລະຫວ່າງ ກອງທັບ ແຫ່ງ ຣາຊາອະນາຈັກໄທ ກັບ ກອງທັບປະຊາຊົນລາວ ເວົ້າລວມ ເວົ້າສະເພາະ ເປັນການເພີ່ມທະວີການພົວພັນຮ່ວມມື ລະຫວ່າງສອງກອງທັບໃຫ້ເເໜ້ນແຟ້ນຍິ່ງໆຂື້ນ. ພ້ອມທັງອວຍພອນໃຫ້ຄະນະສິລະປະກອນ ກອງທັບ ປະຊາຊົນລາວ ທີ່ມາເຄື່ອນໄຫວການສະແດງໃນຄັ້ງນີ້ປະສົບຜົນສໍາເລັດຢ່າງຈົບງາມ.

ທ່ານ ພັນເອກ ແປ້ນຄໍາ ບຸດຈັນແພງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງ ທ່ານ ຜູ້ບັນຊາການທະຫານສູງສຸດ ກອງທັບ ແຫ່ງ ຣາຊະ ອານາຈັກໄທ ແລະ ໄດ້ລາຍງານແຜນການເຄື່ອນໄຫວຂອງຄະນະສິລະປະກອນກອງທັບປະຊາຊົນລາວທີ່ໄດ້ມາສະແດງແລກປ່ຽນວັດທະນະທໍາໃນຄັ້ງນີ້ ເຊິ່ງເປັນການ ເເລກປ່ຽນສິລະປະວັນນະ ຄະ ດີ ,ຊີວິດ ວັດທະນະທໍາ ລະຫວ່າງ ສອງກອງທັບ ລາວ-ໄທ ໂດຍຜ່ານເນື້ອຮ້ອງທໍານອງເພງ ແລະ ເຕັກນິກການສະແດງ ນອກຈາກນີ້ຍັງເປັນການໂຄສະນາເຜີຍ ແຜ່ສີລະປະການສະແດງ ແລະ ວິຖີຊີວິດ ວັດທະນະທໍາອັນດີງາມຂອງປະຊາຊົນລາວບັນດາເຜົ່າອີກດ້ວຍ.

ໂດຍ: ວິໄລພອນ

ຕອນບ່າຍວັນທີ 26 ກໍລະກົດ 2022, ທ່ານ ສີ ຈິ້ນຜິງ ປະທານປະເທດແຫ່ງ ສປຈີນ ໄໄດ້ພົບປະກັບ ທ່ານ ໂຈໂກ ວິໂດໂດ ປະທານາທິບໍດີອິນໂດເນເເຊຍ ທີ່ນະຄອນຫຼວງປັກກິ່ງ ໃນໂອ ກາດທີ່ປະທານນາທິບໍດີອິນໂດເນເຊຍ ເຄື່ອນໄຫວຢ້ຽມຢາມ ສປຈີນ ຢ່າງເປັນທາງການເປັນເວລາ 2 ວັນ ແຕ່ວັນທີ 25-26 ກໍລະກົດນີ້.

ສອງຜູ້ນໍາ ໄດ້ປຶກສາຫາລື ແລະ ແລກປ່ຽນຄວາມຄິດເຫັນໃນຫຼາຍດ້ານ ແລະໄດ້ບັນລຸການລົງນາມເອກະ ສານທີ່ສຳຄັນຫຼາຍສະບັບກ່ຽວກັບເພື່ອແນໃສ່ເສີມຂະຫຍາຍການພົວພັນຮ່ວມມືັຂອງສອງປະເທດຈີນ- ອິນໂດເນເຊຍ ພ້ອມນີ້ ຍັງໄດ້ແລກປ່ຽນກ່ຽວກັບບັນຫາຂອງພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ.

ທ່ານ ສີ ຈິ້ນຜິງ ກ່າວວ່າ: ທ່ານ ໂຈໂກ ວິໂດໂດ ເປັນປະ ມຸກລັດຄົນທຳອິດທີ່ເດີນທາງຢ້ຽມຢາມຈີນຢ່າງເປັນທາງ ການ ພາຍຫລັງທີ່ຈີນສໍາເລັດການເປັນເຈົ້າພາບຈັດງານກິ ລາໂອລິມປິກລະດູໜາວປາກກິ່ງ. ການເດີນທາງຢ້ຽມຢາມ ສປຈີນ ໃນຄັ້ງນີ້ໄດ້ສະແດງໃຫ້ເຫັນຄຳໝັ້ນສັນຍາອັນໜັກແໜ້ນຂອງສອງຝ່າຍໃນການເພີ່ມທະວີການພົວພັນລະ ຫວ່າງສອງປະເທດ. ໃນຊຸມປີມໍ່ໆ ມານີ້, ພາຍໃຕ້ການຊີ້ນຳຮ່ວມຂອງປະທານາທິບໍດີສອງປະເທດ, ການພົວພັນຈີນ- ອິນໂດເນເຊຍໄດ້ຮັບການຂະຫຍາຍຕົວຢ່າງແຂງແຮງ, ສະ ແດງໃຫ້ເຫັນເຖິງບາດກ້າວສໍາຄັນ ແລະມີຄວາມໝາຍໃຫຍ່ຫຼວງເປັນກ້າວໆມາ. ເປັນຕົ້ນແມ່ນຄວາມໄວ້ເນື້ອເຊື່ອ ໃຈເຊິ່ງກັນ ແລະ ກັນ ນັບມື້ນັບຮັດແໜ້ນຂຶ້ນຕື່ມອີກ. ໄລຍະຜ່ານມາສອງປະທດໄດ້ສຸມໃສການຮ່ວມມືແບບ 4 ເສົາຄ້ຳຄື: ດ້ານການເມືອງ, ເສດຖະກິດ, ການຮ່ວມມືທາງທະເລ ໂດຍທັງ 2 ຝ່າຍໄດ້ປະຕິບັດຢ່າງຕັ້ງໜ້າ ແລະ ມີຄວາມຮັບຜິດຊອບສູງ ເພື່ອຮັກສາສັນຕິພາບ ແລະ ສະຖຽນລະພາບຂອງພາກພື້ນ, ຊຸກຍູ້ຄວາມສາມັກຄີ ແລະ ຕະຫລອດຮອດການຮ່ວມມືສາກົນແບບຕ່າງຝ່າຍຕ່າງມີຜົນປະໂຫຍດ. ເຊິ່ງສິ່ງເຫລົ່ານັ້ນໄດ້ພິສູດໃຫ້ເຫັນວ່າ, ການພົວພັນຈີນ-ອິນໂດເນເຊຍທີ່ດີບໍ່ພຽງແຕ່ໄດ້ຮັບໃຊ້ຜົນປະ ໂຫຍດຮ່ວມຂອງສອງປະເທດໃນໄລຍະຍາວເທົ່ານັ້ນ, ຫາກຍັງມີຜົນສະທ້ອນໃນທາງບວກເປັນວົງກວ້າງໃນພາກພື້ນແລະທົ່ວໂລກ.

ປັດຈຸບັນ, ປະຊາຊົນຈີນພວມມຸ່ງໄປສູ່ຈຸດໝາຍໃນສັດຕວັດທີ 2 ໃນການກໍ່ສ້າງປະເທດສັງຄົມນິຍົມທີ່ທັນສະໄໝທີ່ຍິ່ງໃຫຍ່ໃນທຸກດ້ານ, ຂະນະທີ່ປະຊາຊົນອິນໂດເນເຊຍພວມປະຕິບັດວິໄສທັດໃນພາລະກິດສ້າງສາປະເທດຊາດຢ່າງຕັ້ງໜ້າ. ການເຕີບໂຕຂອງສາຍພົວພັນລະຫວ່າງສອງປະເທດກ້າວຂຶ້ນສູ່ລະດັບສູງ ແລະ ໃນໄລຍະຍາວ ເພື່ອນຳມາເຊິ່ງຜົນປະໂຫຍດອັນໃຫຍ່ຫຼວງໃຫ້ແກ່ປະຊາຊົນສອງປະເທດ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ ແລະ ສະຖຽນລະພາບຢູ່ພາກພື້ນ ແລະ ຕ່າງປະເທດ. ທ່ານປະທານປະເທດ ສີ ຈິ້ງຜິງໃຫ້ຮູ້ວ່າ: ຈີນ ແລະ ອິນໂດເນ ເຊຍ ພວມຢູ່ໃນໄລຍະພັດທະນາທີ່ຄ້າຍຄືກັນ, ມີຜົນປະ ໂຫຍດຮ່ວມ, ປະຕິບັດຕາມທິດສະດີ ແລະ ເສັ້ນທາງພັດ ທະນາທີ່ຄ້າຍຄືກັນ, ແລະ ການສ້າງປະຊາຄົມຈີນ- ອິນ ໂດເນເຊຍທີ່ມີອະນາຄົດຮ່ວມກັນແມ່ນຄວາມມຸ່ງຫວັງຂອງປະຊາຊົນສອງປະເທດ.

ຜູ້ນໍາຈີນໄດ້ສະແດງຄວາມຍິນດີທີ່ສອງຝ່າຍໄດ້ຕັດສິນໃຈກ່ຽວກັບທິດທາງລວມພາຍໃຕ້ ຈີນຈະຮ່ວມມືກັບອິນ ໂດເນເຊຍເພີ່ມທະວີຄວາມໄວ້ເນື້ອເຊື່ອໃຈດ້ານຍຸດທະ ສາດ, ສະໜັບສະໜູນເຊິ່ງກັນແລະກັນຢ່າງແໜ້ນແຟ້ນໃນການປົກປັກຮັກສາອະທິປະໄຕ ແລະຄວາມໝັ້ນຄົງເພື່ອຊອກຫາເສັ້ນທາງພັດທະນາທີ່ສອດຄ່ອງກັບສະພາບຕົວຈິງຂອງສອງຊາດ, ສອງຝ່າຍຄວນລົງເລິກການຮ່ວມມືໜຶ່ງແລວທາງໜຶ່ງເສັ້ນທາງໃຫ້ມີຄຸນນະພາບສູງຂຶ້ນຕື່ມ. ນອກນັ້ນ, ສອງລັດຖະບານໄດ້ພະຍາຍາມກໍ່ສ້າງທາງລົດໄຟຄວາມໄວສູງຈາກຈາກນະຄອນຫຼວງກາຕ້າ-ບັນດຸງໃຫ້ສຳເລັດຕາມກຳນົດເວລາ ແລະ ໄດ້ມາດຕະຖານສູງ, ຮັບ ປະກັນການປະຕິບັດໂຄງການຮ່ວມມືທີ່ສຳຄັນຄືດ້ານເສດຖະກິດ. ຈີນຈະສືບຕໍ່ສະໜັບສະໜູນອິນໂດເນເຊຍຢ່າງເຕັມສ່ວນໃນການສ້າງສູນຜະລິດວັກຊິນໃນພາກພື້ນ, ແລະຈະຊຸກຍູ້ການຮ່ວມມືດ້ານສາທາລະນະສຸກກັບອິນໂດ ເນເຊຍ. ຈີນຍິນດີນຳເຂົ້າສິນຄ້າແລະຜະລິດຕະພັນກະສິ ກຳທີ່ມີຄຸນນະພາບຈາກອິນໂດເນເຊຍຕື່ມອີກ ເປີດກວ້າງການຮ່ວມມືດ້ານການເງິນເພື່ອພັດທະນາແລະຊຸກຍູ້ການເຕີບໂຕໃໝ່ໃນເສດຖະກິດດີຈີຕອນແລະການພັດທະນາສີຂຽວໃນຂົງເຂດອື່ນໆ.

ທ່ານ ສີ ຈິ້ນຜິງ ກ່າວຕື່ມວ່າ: ການປະເຊີນໜ້າກັບການປ່ຽນແປງຂອງໂລກທີ່ບໍ່ເຄີຍມີມາກ່ອນ, ຈີນແລະອິນໂດເນ ເຊຍຕ້ອງສາມັກຄີກັນ, ປະຕິບັດໜ້າທີ່ຂອງປະເທດທີ່ພວມພັດທະນາຮ່ວມກັນ, ຍຶດໝັ້ນລັດທິພາກພື້ນເປີດກວ້າງ ແລະຈະເພີ່ມທະວີການປະສານງານແລະການຮ່ວມມືກັບອິນໂດເນເຊຍເພື່ອໃຫ້ກອງປະຊຸມສຸດຍອດອາຊຽນທີ່ອິນໂດເນເຊຍຈະເປັນເຈົ້າພາບໃນປີ 2023ໃຫ້ປະສົບຜົນ ສຳເລັດຢ່າງຈົບງາມ, ຈະເພີ່ມທະວີຄວາມສາມັກຄີແລະການປະສານງານກັບອາຊຽນ, ໂດຍເອົາໃຈໃສ່ການພັດທະ ນາການພົວພັນຄູ່ຮ່ວມມືຍຸດທະສາດຮອບດ້ານຈີນ-ອາຊຽນຢ່າງຕັ້ງໜ້າ ພ້ອມທັງຊົມເຊີຍອິນໂດເນເຊຍໃຫ້ການສະໜັບສະໜູນແລະໃຫ້ຄຳໝັ້ນສັນຍາຕໍ່ຂໍ້ລິເລີ່ມການພັດ ທະນາແລະຂໍ້ລິເລີ່ມຄວາມໝັ້ນຄົງຂອງໂລກ.

ໃນຕອນທ້າຍຂອງການພົບຂອງສອງຝ່າຍ, ທ່ານ ໂຈໂກ ວິໂດໂດ ໄດ້ອວຍພອນໃຫ້ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ທີ່ຈະຈັດຂຶ້ນໃນອີກບໍ່ດົນນີ້ປະສົບຜົນສຳເລັດຢ່າງຈົບງາມ, ພ້ອມທັງສະ ແດງຄວາມເຊື່ອໝັ້ນວ່າ ຈີນຈະບັນລຸໝາກຜົນອັນຍິ່ງໃຫຍ່ຂຶ້ນຕື່ມ ພາຍໃຕ້ການນຳພາທີ່ເຂັ້ມແຂງຂອງທ່ານ ສີ ຈິ້ນຜິງ ປະທານປະເທດແຫ່ງ ສປຈີນ. ອິນໂດເນເຊຍແລະຈີນແມ່ນຄູ່ຮ່ວມມືຍຸດທະສາດຮອບດ້ານທີ່ມີເປົ້າໝາຍສຳຄັນໃນການຮ່ວມກັນສ້າງປະຊາຄົມທີ່ມີອະນາຄົດຮ່ວມ ກັນ, ການຮ່ວມມືຕ່າງຝ່າຍຕ່າງມີຜົນປະໂຫຍດ, ບໍ່ພຽງແຕ່ໄດ້ຮັບໃຊ້ປະຊາຊົນສອງປະເທດເປັນຢ່າງດີເທົ່ານັ້ນ, ຫາກຍັງໄດ້ປະກອບສ່ວນຢ່າງຫຼວງຫຼາຍເຂົ້າໃນສັນຕິພາບ ແລະ ການພັດທະນາຢູ່ພາຍໃນ ແລະສາກົນໃນສະພາບການ ທີ່ເຕັມໄປດ້ວຍຄວາມບໍ່ແນ່ນອນ, ການຮ່ວມມືອັນດີງາມລະຫວ່າງອິນໂດເນເຊຍແລະຈີນໄດ້ສະແດງໃຫ້ເຫັນລັກສະນະຍຸດທະສາດຂອງການພົວພັນສອງປະເທດ.

ປະທານາທິບໍດີອິນໂດເນເຊຍ ຍັງສະແດງຄວາມຊົມ ເຊີຍຕໍ່ຜົນສຳເລັດທີ່ພົ້ນເດັ່ນຂອງຈີນໃນການແກ້ໄຂຄວາມທຸກຍາກຂອງປະຊາຊົນພາຍໃນປະເທດໄດ້ສໍາເລັດ ແລະ ຈີນຍິນດີເຂົ້າຮ່ວມການຮ່ວມມືຢ່າງຕັ້ງໜ້າໃນການພັດທະ ນານະຄອນຫຼວງໃໝ່ຂອງອິນໂດເນເຊຍ ແລະ ສວນອຸດ ສາຫະກຳສີຂຽວກາລິມັນຕັນເໜືອ, ສະແຫວງຫາການຮ່ວມມືດ້ານຍຸດທະສາດທີ່ໃຫຍ່ກວ່າເກົ່າລະຫວ່າງຂະ ບວນການເດີນທະເລທົ່ວໂລກແລະຂໍ້ລິເລີ່ມໜຶ່ງແລວທາງໜຶ່ງເສັ້ນທາງ, ແລະລົງເລິກການຮ່ວມມືໃນຂົງເຂດຕ່າງໆເຊັ່ນການລົງທຶນ, ເຕັກໂນໂລຊີ, ວັກຊີນ ແລະການດູແລທາງການແພດ ແລະສຸຂະພາບ. ທາງລົດໄຟຄວາມໄວສູງຈາກຈາກາຕາ-ບັນດຸງແມ່ນສັນຍາລັກແຫ່ງການພັດທະນາຢ່າງວ່ອງໄວຂອງອິນໂດເນເຊຍ, ອິນໂດເນ ເຊຍພ້ອມແລ້ວທີ່ຈະຮ່ວມມືກັບຈີນເພື່ອຮັບປະກັນໃຫ້ຈີນສຳເລັດການເຄື່ອນໄຫວຕາມກຳນົດເວລາ, ແລະກາຍເປັນຂີດໝາຍສຳ ຄັນອີກອັນໜຶ່ງຂອງການພົວພັນມິດຕະພາບລະຫວ່າງສອງປະເທດ. ທ່ານປະທານາທິບໍດີ ວິໂດໂດ ໄດ້ຂອບໃຈຈີນທີ່ໄດ້ສະໜັບສະໜູນການເປັນປະທານ G20 ຂອງອິນໂດເນ ເຊຍ ແລະອິນໂດເນເຊຍຈະຮັກສາການປະ ສານງານຢ່າງໃກ້ຊິດກັບຈີນເພື່ອຜົນສຳເລັດຂອງກອງປະຊຸມສຸດຍອດ G20 ທີ່ເກາະບາຫຼີ, ໃນຖານະທີ່ເປັນປະທານໝູນວຽນຂອງອາຊຽນໃນປີໜ້າ, ອິນໂດເນເຊຍພ້ອມແລ້ວທີ່ຈະທຳຄວາມພະຍາຍາມຢ່າງຕັ້ງໜ້າເພື່ອຊຸກຍູ້ການເຕີບໂຕຂອງການພົວພັນອາຊຽນ-ຈີນ.

Cr: ບຸນຕຽງ ຈັນທະວົງ

ຕາມ​ຂ່າວ​ຈາກ VOVWORLD, ​ໃນວັນທີ 25 ກໍລະກົດ, ຢູ່ເຂດການບໍລິການທ່ອງທ່ຽວເກຶອວຽດ, ເທດສະບານເກືອວຽດ, ເມືອງ ຢໍລິງ, ຄະນະກຳມະການ ປະຊາຊົນ ແຂວງກ໋ວາງຈິງ ໄດ້ສົມທົບກັບ ກະຊວງ ອຸດສາຫະກຳ ແລະ ການຄ້າ ຫວຽດນາມ ໄຂງານ ຕະຫລາດນັດ ການຄ້າ ສາກົນ ອະນຸພາກພື້ນ ແມ່ນ້ຳຂອງ ເປີດກວ້າງ (GMS)-ກ໋ວາງຈິ 2022 ​ໂດຍ​ມີ ຮ້ານວາງສະແດງ ຫລາຍກ່ວາ 400 ຮ້ານ ຂອງວິສາຫະກິດ 250 ແຫ່ງຂອງຫວຽດນາມ, ລາວ ​ແລະ ໄທ ໄດ້ວາງສະແດງບັນດາຜະລິດ ຕະພັນເປັນຕົ້ນແມ່ນ: ຜະລິດຕະພັນ ກະສິກຳ, ເຄື່ອງປ່າ ຂອງດົງ, ສິນໃນທະເລ, ເຄື່ອງໃຊ້ສອຍ ​ແລະ ອື່ນໆ​ອີກ ງານວາງສະແດງຄັ້ງນີ້ຍັງມີຮ້ານອາຫານ ໂດຍມີບັນດາເຍື່ອງອາຫານ ທີ່ເປັນມູນເຊື້ອທີ່ມາຈາກຫລາຍເຂດຂອງຫວຽດນາມ, ລາວ ​ແລະ ໄທ. ໃນ​ໂອກາດ​ນີ້ ທ່ານ ເລດຶກຕຽນ, ຮອງປະທານ ຄະນະກຳມະການ ປະຊາຊົນ ແຂວງ ກ໋ວາງຈິ ໃຫ້ຮູ້ວ່າ: ງານຕະຫລາດນັດການຄ້າສາກົນ ອະນຸພາກພື້ນ ແມ່ນ້ຳຂອງ ເປີດກວ້າງ ກາຍເປັນສະຖານທີ່ ທ່ອງທ່ຽວ ທີ່ດຶງດູດໃຈ ເພື່ອໃຫ້ປະຊາຊົນ ທ້ອງຖິ່ນ, ນັກທ່ອງທ່ຽວ ມາຢ້ຽມຊົມ, ຊື້ເຄື່ອງ, ກະຕຸກຊຸກຍູ້ ການບໍລິໂພກ, ປະກອບສ່ວນ ຮັກສາ ທ່າເຕີບໂຕ ດ້ານເສດຖະກິດ. ງານຕະຫລາດນັດ GMS ຈະແມ່ນຂົວເຊື່ອມຕໍ່ ທີ່ມີປະສິດທິຜົນ, ແມ່ນຊ່ອງທາງ ສົ່ງເສີມ ການລົງທຶນ -ການຄ້າ-ການທ່ອງທ່ຽວ ສຳຄັນ, ສ້າງເງື່ອນໄຂ ໃຫ້ແກ່ ວິສາຫະກຫິດ ບັນດາ ປະເທດ GMS ໂຄສະນາ, ແນະນຳ ຜະລິດ ຕະພັນ, ການບໍລິການ ແລະ ຊອກຫາ ກາລະໂອກາດ ລົງທຶນ, ຮ່ວມມື ດຳເນີນ ທຸລະກິດ.

ໃນການດຳເນີນ ງານຕະຫລາດນັດ ຈັດ​ຂຶ້ນ ເປັນເວລາ 1 ອາທິດ, ບັນດາ ສະຫະ ສະມາຄົມ ການທ່ອງ ທ່ຽວ ແລະ ຫົວໜ່ວຍ ດຳເນີນທຸລະກິດ ການທ່ອງທ່ຽວ ຈະຈັດ ການທ່ອງທ່ຽວ(tour) ຢ້ຽມຢາມ ເກາະກົນກໍ, ບັນດາເຂດ ປູຊະນີ ຍະສະຖານ ທາງປະຫວັດສາດ, ການປະຕິວັດ ທາງທິດຕາເວັນຕົກ ກ໋ວາງຈິ, ການທ່ອງທ່ຽວ “ວັນໜຶ່ງ ກິນເຂົ້າຢູ່ 3 ປະເທດ ຫວຽດ – ລາວ – ໄທ” ຢ່າງ​ເບີກບານ​ ມ່ວນ​ຊື່ນ./. (ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ​ ຊິນ​ຮວາ, ວັນ​ທີ 26 ​ກໍລະກົດ​ນີ້, ທ່ານບູ ຈັນ​ພິຣູ (Boo Janpiru), ຫົວໜ້າ​ກົມ​ປະກັນ​ໄພ​ກຳປູ​ເຈຍ​ ເປີດ​ເຜີຍ​ວ່າ:ອຸດສາຫະກໍາປະກັນໄພຂອງກໍາປູເຈຍມີ​ຜົນ​ການ​ດຳ​ເນີນ ​ທຸລະ​ກິດ ​ແບບ​ກ້າວ​ກະ​ໂດດ ​ໃນ​ໄລຍະ 5ປີຜ່ານມາ ​ເນື່ອງ​ຈາກ​ ມີ​ຈັງຫວະ​ ການ​ຂະຫຍາຍຕົວ ສະ​ເລ່ຍ 20% ຕໍ່​ປີ ຫລັງ​ຈາກ ​ເຂົ້າຮ່ວມ ​ວັນ​ປະກັນ​ໄພ 2022(Insurance Day 2022).ປັດຈຸບັນ ກຳປູ​ເຈຍ ມີ​ບໍລິສັດ​ປະກັນ​ໄພ ທົ່ວ​ໄປ 18​ ແຫ່ງ ບໍລິສັດປະກັນ​ຊີວິດ 14 ​ແຫ່ງ, ບໍລິສັດປະກັນ​ໄພລາຍ​ຍ່ອຍ 7​ ແຫ່ງ ​ແລະ ບໍລິສັດ ​ປະກັນ​ໄພຄືນ 1​ ແຫ່ງ ລວມທັງນາຍ​ໜ້າ​ປະກັນ​ໄພ 18​ ແຫ່ງ, ຕົວ​ແທນ​ ອົງ​ກອນ 34 ​ແຫ່ງ ​ແລະ ຜູ້​ເຈລະຈາຕົກລົງຄ່າ​ສິນ​ໄໝ​ທົດ​ແທນ 2​ ແຫ່ງ. ຕະຫລາດ​ ປະກັນ​ໄພ​ ຂອງ​ກຳປູ​ເຈຍ ມີ​ຊັບ​ສິນ​ລວມ 948 ລ້ານ​ໂດ​ລາ ​ສະຫະລັດ ​ແລະ ສ້າງ​ຕຳ​​ແໜ່​ງງານ ​ປະຈຳ ​ເກືອບ4.000 ຕຳ​ແໜ່​ງ ​ແລະ ຕຳ​ແໜ່​ງ ຊົ່ວຄາວ​ ອີກ 10.000 ຕຳ​ແໜ່​ງ.

(ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ ​ຊິນ​ຮວາ,ວັນ​ທີ26​ກໍລະກົດ​ນີ້, ລາຍ​ງານ​ ທ່າ​ອ່ຽງ ນັກ​ບິນ ​ແລະ ຊ່າງ​ເຕັກນິກ ປະຈຳ​ປີ 2022 ​ຂອງ​ໂບອີງ (Boeing) ຄາດ​ການ​ ຄວາມ​ຕ້ອງການ ບຸກຄະລາ​ກອນ ​ດ້ານ​ການບິນ​ໃໝ່ ຈຳນວນ 2,1 ລ້ານ​ຕຳ​ແໜ່​ງ ​ໃນ​ໄລຍະອີກ 20 ປີ​ຕໍ່ໜ້າ ​ເພື່ອ​ຮັບຮອງການ​ຟື້ນ​ໂຕ ​ຂອງ​ການ​ເດີນທາງ ​ອາກາດ ​ແບບ​ການ​ຄ້າ ​ແລະ ຕອບ​ສະໜອງ​ ການ​ເຕີບ​ໂຕ ​ໃນ​ໄລຍະ​ຍາວ.ຂະນະ​ທີ່ ອຸດສາຫະກຳ​ ແບບ​ການ​ຄ້າ ຈຳ​ເປັນຕ້ອງ​ ມີ​ນັກ​ບິນ 602.000 ຕຳ​ແໜ່​ງ, ພະນັກງານ​ບຳລຸ​ງຮັກສາ 610.000 ຄົນ ​ແລະ ລູກ​ເຮືອ 899.000ຄົນ ​ເພື່ອ​ຮອງ​ຮັບ ​ການບິນແບບ​ການ​ຄ້າ​ທົ່ວ​ໂລກ​ໃນ​ຕໍ່ໜ້າ.

ສຳລັບ ​ປີ​ນີ້ ນັກ​ບິນ ​ແລະ ຊ່າງ​ເຕັກນິກ ມີ​ຄວາມ​ຕ້ອງການ​ ເພີ່ມ​ຂຶ້ນ 3,4% ຈາກ​ປີ​ກາຍ ​ໂດຍ​ຈີນ,​ເອີຣົບ ​ແລະ ອາ​ເມ​ລິ​ກາ​ເໜືອ ກວມ​ເອົາ ​ອັດຕາ​ສ່ວນ​ກວ່າ​ ເຄິ່ງໜຶ່ງ ຂອງ​ຄວາມ​ຕ້ອງການ ບຸກຄະລາ​ກອນ​ໃໝ່​ ທັງ​ໝົດ.ຂະນະ​ທີ່ ​ພາກ​ພື້ນ ຂະຫຍາຍຕົວ ​ໄວ​ທີ່​ສຸດ​ຄື: ອາ​ຟຣິກາ,ອາຊີ​ ຕາ​ເວັນ​ອອກ ​ສ່ຽງ​ໃຕ້ ​ແລະ ອາຊີ​ໃຕ້ ຄາດ​ວ່າຈະ​ຂະຫຍາຍຕົວຫລາຍ​ກວ່າ4%.

ສ່ວນ​ຄາດ​ການ ຄວາມ​ຕ້ອງການ ​ນັກ​ບິນ, ຊ່າງ​ເຕັກນິກ ​ແລະ ລູກ​ເຮືອ​ໃໝ່​ ໃນ​ຈີນ ​ໄລຍະ 20ປີ​ ຕໍ່ໜ້າ ຈະ​ຢູ່ 126.000 ຕຳ​ແໜ່​ງ,124.000 ຕຳ​ແໜ່​ງ ​ແລະ 162.000 ຕຳ​ແໜ່​ງ ຕາມ​ລຳດັບ./. (ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ​ ຊິນ​ຮວາ,ວັນ​ທີ26​ ກໍລະກົດ​ນີ້, ກະຊວງ​ ອຸດສາຫະກຳ ​ແລະ ​ເຕັກ​ໂນ​ໂລ​ຊີ ຂໍ້​ມູນ​ ຂ່າວສານ ຂອງ​ຈີນ ​ເປີດ​ເຜີຍ​ວ່າ: ພາກ​ການ​ຜະລິດ ​ຂອງ​ຈີນ ມີ​ການ​ລົງທຶນ​ ດ້ານ​ການຄົ້ນຄວ້າ ​ແລະ ການພັດທະນາ (R&D) ​ເພີ່ມ​ຂຶ້ນ​ ໃນ​ໄລຍະ10 ​ປີຜ່ານມາ 1,54% ​ໃນ​ປີ2021 ​​ເພີ່ມ​ຂຶ້ນ​ຈາກ 0,85%​ໃນ​ປີ2012. ສຳລັບ ກຸ່ມ​ຜູ້​ປະກອບ​ການ ທີ່​ຜະລິດ ​ຕະພັນ​ໃໝ່ ​ແລະ ​ເປັນ​ເອກະລັກ ມີ​ການ​ລົງທຶນ​ ດ້ານ​ການຄົ້ນຄວ້າ ​ແລະ ການພັດທະນາ ​ສູງ​ເຖິງ 10,3%​ໃນ​ປີ2021 ພາກ​ການ​ຜະລິດ​ ຂອງ​ຈີນ ຍັງ​ມີ​ການ​ພັດທະນາ ລະບົບ​ ນະ​ວັດຕະ​ກຳ ​ໂດ​ຍລັດຖະບານ ສູນ​ກາງ ​ໄດ້​ຈັດຕັ້ງ ຫລື ຮ່ວມ​ມື​ກັບ​ ລັດຖະບານ ​ທ້ອງ​ຖິ່ນ ​ເພື່ອ​ຕັ້ງສູນ ນະ​ວັດຕະ​ກຳ ການ​ຜະລິດ ລວມ23​ແຫ່ງ.ຜູ້​ປະກອບ​ການ ​ອຸດສາຫະກຳ ທີ່​ມີ​ລາຍ​ໄດ້ ​ທາງ​ທຸລະ​ກິດ ຕໍ່​ປີ ຢ່າງ​ໜ້ອຍ 20ລ້ານ​ຢວນ ມີ​ອັດຕາ​ສ່ວນ​ ລາຍ​ໄດ້ ຈາກ​ຜະລິດ​ ຕະພັນ​ໃໝ່ 22,4%​ໃນ​ປີ2021 ​ເພີ່ມ​ຂຶ້ນ​ຈາກ 11,9%​ໃນ​ປີ 2012./.

(ພາກ​ຂ່າວ​: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ວັນທີ 25 ກໍລະກົດ 2022 ນີ້, ສ່ວຍສາອາກອນ ເມືອງໄຊເສດຖາ ນະ ຄອນຫລວງວຽງຈັນ ອອກແຈ້ງການກ່ຽວກັບການຕິດຕັ້ງໂປຣແກຣມບັນຊີ ສາມາດພິມໃບເກັບເງິນອາກອນມູນຄ່າເພີ່ມ ເພື່ອລະດົມ, ຊຸກຍູ້ ແລະ ສ້າງເງື່ອນໄຂສະດວກໃຫ້ແກ່ການຂະຫຍາຍຖານວິສາຫະກິດ ເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມ ໃຫ້ໄດ້ຕາມລະດັບຄາດໝາຍ ຫລື ລື່ນແຜນການທີ່ກໍານົດໄວ້ ເຊິ່ງກົມສ່ວຍສາອາກອນ ແລະ ກົມຄຸ້ມຄອງບັນຊີ, ກະຊວງການເງິນມີນະໂຍບາຍ ຕິດຕັ້ງໂປຣແກຣມບັນຊີ ສາມາດພິມໃບເກັບເງິນອາກອນມູນຄ່າເພີ່ມ,ພ້ອມທັງຝຶກອົບຮົມການນຳໃຊ້ ຟຣີ ຫລື ບໍ່ມີຄ່າໃຊ້ຈ່າຍໃດໆ ໃຫ້ວິສາຫະກິດ ເປົ້າໝາຍທີ່ຈະເຂົ້າໃນລະບົບອາກອນມູນຄ່າເພີ່ມ.

ສະນັ້ນ, ສ່ວຍສາອາກອນປະຈຳເມືອງ ແຈ້ງມາຍັງທ່ານ ຜູ້ປະກອບການ, ຜູ້ອໍານວຍການ ວິສາຫະກິດ ສ່ວນບຸກຄົນ, ນິຕິບຸກຄົນທີ່ເປັນນັກລົງທຶນ ທັງພາຍໃນ ແລະ ຕ່າງປະ ເທດ ໃນຂອບເຂດເມືອງໄຊເສດຖາ ເພື່ອຊາບ ແລະ ຮີບຮ້ອນໄປພົວພັນລົງທະບຽນຂໍຕິດຕັ້ງ ແລະ ນຳໃຊ້ໂປຣແກຣມບັນຊີດັ່ງກ່າວ ຢູ່ສ່ວຍສາອາກອນ ປະຈຳເມືອງໄຊເສດຖາ ກ່ອນວັນທີ 5 ສິງຫາ 2022.

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ (ນວ) ຊຸດທີ II ປິດລົງວັນທີ 26 ກໍລະກົດ ນີ້ ທີ່ຫ້ອງປະຊຸມໃຫຍ່ ຫ້ອງວ່າການປົກຄອງ ນວ ໂດຍການເປັນ ປະທານຂອງ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນ ນວ, ທ່ານ ອາດສະພັງທອງ ສີພັນດອນ ກໍາມະການສູນກາງພັກ ຮອງເລຂາຄະນະພັກ ເຈົ້າຄອງ ນວ ບັນດາທ່ານ ການນໍາພັກ-ລັດ ຂັ້ນ ນວ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນວ ພ້ອມດ້ວຍທ່ານ ສະມາຊິກສະພາປະຊາຊົນ ນວ ແຂກຖືກເຊີນ.

ທ່ານ ອານຸພາບ ຕຸນາລົມ ໄດ້ຂຶ້ນກ່າວປິດກອງຊຸມຄັ້ງນີ້ ວ່າ: ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນວ ຊຸດທີ II ໄດ້ດໍາເນີນມາ ເປັນເວລາ 4 ວັນ ຊິ່ງເຕັມໄປດ້ວຍບັນຍາກາດອັນ ຟົດຟື້ນ ແຫ່ງການເສີມຂະຫຍາຍສິດປະຊາທິປະໄຕ ໃນການຄົ້ນຄວ້າ ແລະ ປະກອບຄໍາຄິດຄໍາເຫັນ ຢ່າງມີເຫດຜົນ, ມີເນື້ອໃນທີ່ເລິກເຊິ່ງ, ລະອຽດຖີ່ຖ້ວນ, ມີຄວາມເປັນເອກະພາບສູງ ຂອງບັນດາ ສສຊ ແລະ ສສນວ, ໃນຖານະເປັນຕົວແທນ ຂອງປະຊາຊົນຊາວ ນວ ໃນການຄົ້ນຄວ້າ ພິຈາລະນາ ແລະ ຮັບຮອງເອົາ ບັນຫາສໍາ ຄັນຕ່າງໆ ຂອງ ນວ ດັ່ງນີ້: 1.​ ກອງປະຊຸມໄດ້ຮັບຮອງເອົາບົດລາຍງານ ຂອງທ່ານເຈົ້າຄອງ ນວ ກ່ຽວກັບ ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານ 6 ເດືອນຕົ້ນປີ ແລະ ທິດທາງ ແຜນການ 6 ເດືອນທ້າຍປີ 2022 ຊຶ່ງໄດ້ຕີລາຄາສູງຕໍ່ຄວາມພະຍາຍາມ ຂອງອົງການປົກຄອງ ນວ ທີ່ໄດ້ມີຄວາມພະຍາຍາມ ແລະ ເອົາໃຈໃສ່ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ດ້ວຍຄວາມຮັບຜິດຊອບສູງ, ໃນສະພາບທີ່ມີຄວາມຫຍຸ້ງຍາກທາງດ້ານເສດຖະກິດ-ການເງິນ ການແຜ່ລະບາດ ຂອງພະຍາດໂຄວິດ-19 ການອ່ອນຄ່າຂອງເງິນກີບ, ລາຄາສິນຄ້າ ແລະ ຄ່າຄອງຊີບເພີ່ມສູງຂຶ້ນ, ການສະໜອງນໍ້າມັນເຊື້ອໄຟມີຄວາມຈໍາກັດ ໄດ້ສົ່ງຜົນກະທົບຕໍ່ການຈັດຕັ້ງປະຕິບັດ ແຜນ ພັດທະນາເສດຖະກິດ-ສັງຄົມ, ເຖິງຢ່າງໃດກໍຕາມ ອົງການປົກຄອງ ນວ ໄດ້ມີຄວາມພະຍາຍາມ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດ ສືບຕໍ່ເຕີບໂຕ ແລະ ສາມາດປະຄັບປະຄອງ ເສດຖະກິດ ບໍ່ໃຫ້ເຂົ້າສູ່ວິກິດທີ່ໜັກໜ່ວງ ສະພາບການພັດທະນາເສດຖະກິດ-ສັງຄົມ ຄ່ອຍໆຟື້ນຕົວດີຂຶ້ນ ເທື່ອລະກ້າວ.

2.​ ຮັບຮອງເອົາດ້ານຫຼັກການກ່ຽວກັບ ຮ່າງແຜນຈັດສັນທີ່ດິນ ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານ ຂອງ ນວ, ກອງປະຊຸມມອບໃຫ້ອົງການປົກຄອງ ໄດ້ສືບຕໍ່ປັບປຸງຕາມ ການປະກອບຄໍາເຫັນຂອງກອງປະຊຸມ, ຫຼັງຈາກນັ້ນ ໃຫ້ນໍາເອົາຮ່າງແຜນດັ່ງກ່າວສະເໜີຕໍ່ກະຊວງກ່ຽວຂ້ອງ ແລະ ລັດຖະບານ ເພື່ອພິຈາລະນາຕົກລົງແລ້ວຈຶ່ງສືບຕໍ່ຄົ້ນຄວ້າເປັນຂໍ້ຕົກລົງ ຫຼື ນິຕິກໍາຂອງອົງການປົກຄອງ ເພື່ອສະເໜີ ສປນວ ນໍາເຂົ້າພິຈາລະນາໃນກອງປະຊຸມຄັ້ງຕໍ່ໄປ.​

3.​ ຮັບຮອງເອົາບົດລາຍງານຜົນການຈັດ ຕັ້ງປະຕິບັດ ແຜນການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6​ ເດືອນທ້າຍປີ 2022 ຂອງ ສປນວ. ກອງປະຊຸມສະແດງຄວາມຊົມເຊີຍ ແລະ ເປັນເອກະພາບ ກັບບັນດາຜົນງານ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ທີ່ໄດ້ລາຍງານຕໍ່ກອງປະຊຸມ ພ້ອມທັງຮຽກຮ້ອງໃຫ້ຄະນະປະຈໍາ ສປນວ ຄະນະກໍາມະການ ແລະ ສສນວ ຈົ່ງໄດ້ສືບຕໍ່ເປັນເຈົ້າການຈັດຕັ້ງຜັນຂະຫຍາຍແຜນການ 6 ເດືອນທ້າຍປີ 2022 ໃຫ້ບັນລຸຄາດໝາຍຕ່າງໆ ໂດຍສະເພາະ 3 ພາລະບົດບາດຕົ້ນຕໍ ຂອງ ສປນວ ເພື່ອຍົກສູງຄຸນນະພາບ ແລະ ສ້າງຄວາມເຊື່ອໝັ້ນ ຕໍ່ການຈັດຕັ້ງປະຕິບັດພາລະບົດບາດ ຂອງ ສປນວ ໃຫ້ນັບມື້ນັບພົ້ນເດັ່ນສູງຂຶ້ນ.

4.​ ຮັບຮອງເອົາ ການສະເໜີແຕ່ງຕັ້ງ ທ່ານ ວົງໄຊ ພົມມີໄຊ ຮອງຫົວໜ້າພະແນກ ການຕ່າງປະເທດ ນວ ເປັນຫົວໜ້າພະແນກການຕ່າງປະເທດ ນວ ປ່ຽນແທນ ທ່ານ ໂພຄຳ ໄຊຍະສອນ ຫົວໜ້າຫ້ອງວ່າການ ທີ່ຄວບຕຳແໜ່ງ ຫົວໜ້າພະແນກການຕ່າງປະເທດ ນວ ແລະ ຮັບຮອງເອົາການ ແຕ່ງຕັ້ງ ທ່ານ ສົມບູນ ອາຄະວົງສາ ຮອງຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ເປັນຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ປ່ຽນແທນ ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ທີ່ຈະພັກການຮັບອຸດໜູນບຳນານ ຕາມລະບຽບການ.

ນອກນີ້ກອງປະຊຸມໄດ້ຮັບຟັງການລາຍງານ ຊີ້ແຈງບາງວຽກງານສໍາຄັນພື້ນຖານ ຂອງ ນວ ເປັນຕົ້ນ: ບັນຫາການຄວບຄຸມລາຄາສິນຄ້າ ແຜນການຄຸ້ມຄອງລາຄາສິນຄ້າໃນອະນາຄົດ ແລະ ການສົ່ງເສີມ ການຜະລິດ ເປັນສິນຄ້າພາຍໃນ ບັນຫາຄວາມຊັກຊ້າ ການຈັດຕັ້ງປະຕິບັດໂຄງການ ກໍ່ສ້າງເສັ້ນທາງ ແຕ່ບ້ານດອນນົກຂຸ້ມ ຫາ ບ້ານສ້າງເຫວີຍ ແລະ ບ້ານດົງສະຫວາດ ແລະ ບັນຫາອຶ່ນທີ່ຕິດພັນກັບສອງວາລະແຫ່ງຊາດ.

ຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຄັ້ງນີ້ ເປັນການຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ເຂົ້າສູ່ວຽກງານ ຕົວຈິງ ແມ່ນໝາກຜົນຂອງສະຕິປັນຍາ ການຍົກສູງຄວາມຮັບຜິດຊອບການເມືອງ ຄວາມເປັນເຈົ້າການ ຂອງບັນດາທ່ານ ສສຊ ແລະ ສສນວ ໃນການຄົ້ນຄວ້າ ພິຈາລະນາ ແລະ ຮັບຮອງເອົາບັນຫາສໍາຄັນ ພື້ນຖານຂອງ ນວ ແມ່ນການຕັດສິນໃຈຂອງອົງການປົກຄອງ ບັນດາພະແນກການ ອົງການທີ່ກ່ຽວຂ້ອງ ໃນການສືບຕໍ່ຈັດຕັ້ງປະຕິບັດແຜນການ ທີ່ແຕ່ລະອົງການໄດ້ຮັບຜິດຊອບ ໃຫ້ປະກົດຜົນເປັນຈິງ.

ຂ່າວ-ພາບ: ແສງຈັນ