ໃນວັນທີ 22 ກໍລະກົດ 2022, ຢູ່ທີ່ ທຳ ນຽບ ປະທານາທິບໍດີ ແຫ່ງ ສາທາລະ ນະລັດ ຝຣັ່ງ, ນະຄອນຫລວງປາຣີ, ທ່ານ ຄຳອິນ ຄິດຈະເດດ ໄດ້ຍື່ນສານຕາຕັ້ງ ຕໍ່ພະນະທ່ານ ແອມມານູຍແອນ ມາຄຣົງ (H.E. Emmanuel MACRON), ປະທານາທິບໍດີ ແຫ່ງ ປະເທດ ສາທາລະ ນະລັດ ຝຣັ່ງ ເພື່ອເປັນເອກອັກຄະຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປລາວ ປະຈຳ ປະເທດ ສາທາລະນະລັດ ຝຣັ່ງ.

ໃນໂອກາດອັນສະຫງ່າລາສີນີ້, ທ່ານທູດລາວ ໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ, ຄວາມຮັກແພງ ແລະ ຄວາມອວຍພອນໄຊອັນປະເສີດ ເພື່ອ ສັນຕິພາບ, ມິດຕະພາບ, ຄວາມສົມບູນພູນສຸກ, ການພົວພັນຮ່ວມມືທີ່ດີ ຂອງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປລາວ ຝາກເຖິງ ພະນະທ່ານ ປະທານປະເທດ ແຫ່ງ ສາ ທາລະນະລັດຝຣັ່ງ ແລະ ພ້ອມທັງ ຜ່ານທ່ານໄປຍັງ ລັດຖະບານ ແລະປະຊາຊົນຝຣັ່ງ ທຸກທົ່ວໜ້າ.

ທ່ານ ທູດລາວ ໄດ້ສະແດງຄວາມດີໃຈທີ່ໄດ້ຖືກແຕ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳປະເທດ ສາທາ ລະນະລັດ ຝຣັ່ງ ແລະ ໄດ້ໃຫ້ຄຳໝັ້ນສັນຍາວ່າ ໃນໄລຍະທີ່ດຳລົງຕຳແໜ່ງ, ຕົນຈະເຮັດສຸດຄວາມສາມາດໃນການເພີ້ມ ທະວີ ການສົ່ງເສີມ ສຳພັນໄມຕີ, ການຮ່ວມມືຂອງສອງປະເທດທີ່ດີມາແຕ່ດົນນານໃຫ້ດີຂຶ້ນ ແລະ ໄດ້ສະແດງຄວາມຂອບໃຈຕໍ່ ພະນະທ່ານ ປະທານາທິບໍດີ, ລັດຖະບານ ແລະ ປະຊາຊົນຝຣັ່ງ ທີ່ໄດ້ໃຫ້ການສະໜັບສະໜູນຊ່ວຍເຫລືອທາງດ້ານການພັດທະນາເສດຖະກິດສັງຄົມຂອງ ສປປ ລາວ ໃນໄລຍະຜ່ານມາ ແລະ ຫວັງວ່າ ຈະໄດ້ຮັບການສືບຕໍ່ຮ່ວມມືຢ່າງດີໃນຕໍ່ໜ້າ. ຕອນທ້າຍ, ທ່ານ ເອກອັກຄະລັດຖະທູດ ໄດ້ອວຍພອນໄຊອັນປະເສີດໃຫ້ພະນະທ່ານ ປະທານາທິບໍດີ ພ້ອມດ້ວຍຄອບຄົວ ແລະ ປະຊາຊົນຝຣັ່ງທຸກທົ່ວໜ້າ.

ໃນໂອກາດດຽວກັນນີ້, ພະນະທ່ານ ປະທານາທິບໍດີ ມາຄຣົງ ໄດ້ສະແດງຄວາມຊົມເຊີຍ ທູດລາວຄົນໃໝ່ ແລະ ໄດ້ຝາກຄວາມຢື້ຢາມຖາມຂ່າວ, ຄວາມຮັກແພງ, ຄວາມອວຍພອນໄຊອັນປະເສີດ ແລະ ມິດຕະພາບການພົວພັນທີ່ດີ ມາມາຍັງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປລາວ, ລັດຖະບານ ແລະ ປະຊາຊາຊົນລາວທຸກທົ່ວໜ້າ.

ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຝຣັ່ງ ໄດ້ສ້າງສາຍພົວພັນການທູດນຳກັນໃນວັນທີ 22 ຕຸລາ 1953; ສປປລາວ ມີສະຖານທູດຕັ້ງຢູ່ ນະຄອນຫລວງປາຣີ ແລະ ສາທາລະນະລັດ ຝຣັ່ງ ມີສະຖານທູດຕັ້ງຢູ່ ນະຄອນຫລວງວຽງຈັນ.

ແຈ້ງປັບລົງລາຄານ້ຳມັນ ເລິ່ມປະຕິບັດ 06:00 ຂອງວັນທີ 28/07/2022 ຕາມແຈ້ງການຈາກ ກຊ ອຸດສະຫະກຳແລະການຄ້າ ເລກທີ 0985/ອຄ ລົງວັນທີ 27 ກໍລະກົດ 2022

ວັນທີ 22 ກໍລະກົດ 2022ນິ້, ສະຫາຍ ພົນຕີ ຄຳລຽງອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບລົງຊີ້ນຳໂອ້ລົມ ຄະນະຊີ້ນຳລວມ, ຄະນະຄູຝຶກ ແລະ ຄະນະທີມນັກກິລາ ເຫຼົ່າຮົບຊ່າງແສງ ທີ່ຈະໄດ້ເດີນທາງເຂົ້າຮ່ວມການແຂ່ງຂັນກິລາທະຫານສາກົນ ປີ 2022 ທີ່ ສ. ຣັດເຊຍ ໃນລະຫວ່າງວັນທີ 01-31 ສິງຫາ 2022. ມີຫົວໜ້າກົມ, ຮອງກົມ, ພະແນກການຂອງກົມຊ່າງແສງ ຄະນະຊີ້ນຳລວມ, ຄະນະຄູຝຶກ ແລະ ຄະນະທີມນັກກິລາເຂົ້າຮ່ວມ.

ສະຫາຍ ພັນໂທ ອານຸສັກ ພົມວົງສາ ຮອງຫົວໜ້າຄະນະຊີ້ນຳທິມນັກກິລາເຫຼົ່າຮົບຊ່າງແສງໃຫ້ຮູ້ວ່າ: ອີງຕາມໜັງສືແຈ້ງການ ຂອງກົມພົວພັນຕ່າງປະເທດ, ຫ້ອງວ່າການກະຊວງປ້ອງກັນປະເທດ ແລະ ກອງປະຊຸມປຶກສາຫາລື ກ່ຽວກັບການສົ່ງທີມນັກກິລາການທະຫານ ກອງທັບປະຊາຊົນລາວ ເຂົ້າຮ່ວມການແຂ່ງຂັນກິລາການທະຫານສາກົນ 2022 ຂອງເຫຼົ່າຮົບຊ່າງແສງເຂົ້າແຂ່ງຂັນ ໃນປະເພດກິລາ Engineering Formula ( ຮູບແບບ ເຕັກນິກຊ່າງແສງ ) ເພື່ອຮັບປະກັນເຮັດໃຫ້ການເຂົ້າຮ່ວມແຂ່ງຂັນກິລາການທະຫານໃນຄັ້ງນີ້ບັນລຸໄດ້ຜົນສຳເລັດອັນເປັນຢ່າງດີ ກົມຊ່າງແສງ ກົມໃຫຍ່ເສນາທິການ ຈຶ່ງໄດ້ສ້າງແຜນການນີ້ຂຶ້ນເພື່ອເປັນການຍົກສູງບົດບາດວຽກງານປ້ອງກັນຊາດ ສາທາລະນະລັດ ປະຊາທິປະໄຕ ປະຊາຊົນລາວ ເວົ້າລວມ ເວົ້າສະເພາະແມ່ນເຫຼົ່າຮົບຊ່າງແສງ ຂອງກອງທັບປະຊາຊົນລາວ ກ້າວຂຶ້ນສູ່ເວທີສາກົນ.

ເປັນການທົດສອບຄວາມຮູ້ຄວາມສາມາດ, ຄວາມເຂັ້ມແຂງຂອງພະນັກງານນັກຮົບ ເຫຼົ່າຮົບຊ່າງແສງ ໃນການອົບຮົມຫັດແອບ ແລະ ແຂ່ງຂັນ ຂັ້ນສູງສຸດລະດັບສາກົນໃຫ້ດີຂຶ້ນເປັນກ້າວໆ. ເພື່ອເປັນການປຸກລະດົມທາງດ້ານແນວຄິດ, ສ້າງຄວາມເຊື້ອໝັ້ນໃຫ້ພະນັກງານນັກຮົບທົ່ວຖັນແຖວກອງທັບ ປະຊາຊົນລາວເວົ້າລວມ ເວົ້າສະເພາະແມ່ນກຳລັງເຫຼົ່າຮົບຊ່າງແສງ ກອງທັບປະຊາຊົນລາວ ໃຫ້ມີຄວາມຫ້າວຫັນມຸ່ງໝັ້ນເຂົ້າໃນວຽກງານອົບຮົມຫັດແອບຝຶກຝົນກຳລັງແຮງກາຍ, ຈິດໃຈໃຫ້ກົມກອງມີຄວາມເຂັ້ມແຂງຍິ່ງໆຂຶ້ນຢ່າງບໍ່ຢຸດຢັ້ງ.

ທັງເປັນການຍົກສູງບົດບາດຊື່ສຽງຂອງກອງທັບປະຊາຊົນລາວ ເວົ້າລວມ, ເວົ້າສະເພາະ ກໍ່ຄືເຫຼົ່າຮົບຊ່າງແສງ ຂອງກອງທັບປະຊາຊົນລາວ ທີ່ ເຂົ້າຮ່ວມແຂ່ງຂັນກິລານາໆຊາດໄດ້ຢ່າງສົມກຽດ ການເຂົ້າຮ່ວມແຂ່ງຂັນກິລາ ການທະຫານສາກົນ ຄັ້ງນີ້ຕ້ອງສູ້ຊົນຍາດໃຫ້ໄດ້ຜົນງານ ແລະ ໄຊຊະນະ ໃຫ້ໄດ້ໃນລະດັບດີຂຶ້ນໄປເຮັດສຳເລັດໜ້າທີ່ ທີ່ການຈັດຈັ້ງຂັ້ນເທິງມອບໝາຍໃຫ້, ຮັກສາສາຍພົວພັນຮ່ວມມື ມິດຕະພາບ ເສີມຂະຫຍາຍໄດ້ຄວາມສາມັກຄີ ກັບບັນດາປະເທດ ເພື່ອນມິດສາກົນ. ພາຫະນະທີ່ນຳເຂົ້າມາຝຶກຊ້ອມໃນຄັ້ງນີ້ປະກອບມີ 2 ພາກຄື: ພາກທິດສະດີ ແລະ ພາກຕິບັດຕົວຈິງ.

ພາບ-ຂ່າວ: ເກນ ວິໄລສານ

ໃນຕອນເຊົ້າຂອງ ວັນທີ 27 ກໍລະກົດ 2022 ທີ່ ກະຊວງການຕ່າງປະເທດ, ໄດ້ຈັດກອງປະຊຸມເຜີຍແຜ່ ດໍາລັດ ວ່າດ້ວຍລົດຂອງລັດ ສະບັບເລກທີ 599/ລບ ແລະ ຄໍາແນະນໍານິຕິກໍາ ທີ່ກ່ຽວຂ້ອງກ່ຽວກັບການຈັດຕັ້ງປະຕິບັດດໍາລັດດັ່ງກ່າວ ໃຫ້ແກ່ພະນັກງານກະຊວງການຕ່າງປະເທດ ໂດຍການເປັນປະທານ ຂອງທ່ານ ບຸນເຫລືອ ພັນດານຸວົງ, ຄະນະປະຈໍາພັກ, ຮອງລັດຖະມົນຕີກະຊວງການຕ່າງປະເທດ ເຊິ່ງມີບັນດາຫົວໜ້າກົມ, ຮອງຫົວໜ້າກົມ, ຄະນະພະແນກ ແລະ ລັດຖະກອນພາຍໃນກະຊວງການຕ່າງປະເທດ ເຂົ້າຮ່ວມຈຳນວນ 120 ກວ່າທ່ານ.

ກອງປະຊຸມເຜີຍແຜ່ໃນຄັ້ງນີ້ ແມ່ນເພື່ອປະຕິບັດຕາມມະຕິ ຂອງ ຄະນະບໍລິຫານງານພັກກະຊວງການຕ່າງປະເທດ ໃນການຜັນຂະຫຍາຍຜົນກອງປະຊຸມວຽກງານການຕ່າງປະເທດຄັ້ງ 14 ແລະ ເພື່ອຈັດຕັ້ງປະຕິບັດ ໃຫ້ເປັນເອກະພາບກັນໃນທົ່ວປະເທດ ແນໃສ່ເຮັດໃຫ້ພະນັກງານກະຊວງການຕ່າງປະເທດ ມີຄວາມເຂົ້າໃຈເລິກເຊິ່ງ ກ່ຽວກັບ ດໍາລັດວ່າດ້ວຍລົດຂອງລັດ ແລະ ນິຕິກໍາທີ່ກ່ຽວຂ້ອງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ.

ໃນໄລຍະຜ່ານມາ, ພັກ ແລະ ລັດຖະບານ ໄດ້ເຫັນຄວາມສຳຄັນກ່ຽວກັບການນໍາໃຊ້ລົດຂອງລັດ ແລະ ເອົາໃຈໃສ່ຊີ້ນຳໃນການຈັດຕັ້ງປະຕິບັດ ໂດຍໄດ້ແນະນໍາເຜີຍແຜ່ ດໍາລັດດັ່ງກ່າວໃຫ້ເຂົ້າໃຈທົ່ວເຖິງ, ໄດ້ອອກດໍາລັດວ່າດ້ວຍລົດຂອງລັດ ເລີ່ມແຕ່ປີ 2021 ເປັນຕົ້ນມາ, ມີຄໍາແນະນໍາກ່ຽວກັບການຈັດຕັ້ງປະຕິບັດຈໍານວນ 01 ສະບັບ ແລະ ຄໍາແນະນໍາກ່ຽວກັບ ການຄຸ້ມຄອງ ແລະ ນໍາໃຊ້ ລົດບໍລິຫານຂອງລັດ ຈຳນວນ 01 ສະບັບ.

ຜ່ານການຈັດຕັ້ງປະຕິບັດບັນດານິຕິກໍາດັ່ງກ່າວ ເຫັນວ່າ ໂດຍລວມວຽກງານຄຸ້ມຄອງ ແລະ ການນໍາໃຊ້ລົດຂອງລັດ ໄດ້ຮັບການປັບປຸງໃຫ້ເຂົ້າສູ່ລະບຽບຫຼັກການເທື່ອລະກ້າວ ແລະ ມີຜົນສໍາເລັດໂດຍພື້ນຖານ. ດັ່ງນັ້ນ, ເພື່ອໃຫ້ສອດຄ່ອງກັບສະພາບຕົວຈິງຍິ່ງຂຶ້ນ ຖືເປັນບາດກ້າວອັນສໍາຄັນຂອງ ດໍາລັດ ວ່າດ້ວຍລົດຂອງລັດ ເພື່ອໃຫ້ມີຄວາມເປັນເອກະພາບ ແລະ ເປັນບ່ອນອີງໃນການຈັດຕັ້ງປະຕິບັດ. ພ້ອມກັນນັ້ນ, ເພື່ອໃຫ້ເຂົ້້າໃຈດໍາລັດດັ່ງກ່າວ ໃຫ້ເປັນອັນລະອຽດ ແລະ ຈະແຈ້ງໃນການຈັດຕັ້ງປະຕິບັດ ຫ້ອງວ່າການສໍານັກງານນາຍົກລັດຖະມົນຕີ ໄດ້ອອກຄໍາແນະນໍາ ກ່ຽວກັບການຈັດຕັ້ງປະຕິບັດ ວ່າດ້ວຍລົດຂອງລັດ ສະບັບເລກທີ 599/ລບ, ລົງວັນທີ 29 ກັນຍາ 2021.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

ທັບນັກກິລາທີມຊາດຄົນພິການລາວ ທັງໝົດກ 79 ຊີວິດ ໄດ້ເດີນທາງຂ້າມນໍ້າຂ້າມທະເລ ຈາກນະຄອນຫຼວງວຽງຈັນ ມາເຖິງນະຄອນໂຊໂລ (SOLO) ປະເທດອິນໂດເນເຊຍ ດ້ວຍຄວາມສະຫວັດດີພາບເປັນທີ່ຮຽບຮ້ອຍແລ້ວ ຕັ້ງແຕ່ວັນທີ 25 ກໍລະກົດ ຜ່ານມາ ເພື່ອເຂົ້າຮ່ວມງານແຂ່ງຂັນກິລາຄົນພິການອາຊຽນ ຫຼື ອາຊຽນ ພາຣາ ເກມ ຄັ້ງທີ 11… ຂະນະທີ່ຕອນແລງວັນທີ 26 ກໍລະກົດ 2022 ຫົວໜ້າຄະນະນັກກິລາລາວ ໄດ້ເຄື່ອນໄຫວຢ້ຽມຢາມຖາມຂ່າວຄາວ ເພື່ອໃຫ້ກຳລັງໃຈນັກກິລາຢ່າງໃກ້ຊິດ.

ຫຼັງຈາກໃຊ້ເວລາເດີນທາງແບບມາຣາທອນ 2 ມື້ກັບ 1 ຄືນ (ວຽງຈັນ-ບາງກອກ, ບາງກອກ-ຈາກາຕາ ແລະ ຈາກາຕາ-ໂຊໂລ), ທັບນັກກິລາຄົນພິການທີມຊາດລາວ ທັງໝົດກວ່າ 79 ຄົນ ຈາກ 6 ປະເພດກິລາ ກໍເຖິງນະຄອນໂຊໂລ ປະເທດອິນໂດເນເຊຍ ເປັນທີ່ຮຽບຮ້ອຍແລ້ວ ໃນຕອນແລງວັນທີ 25 ກໍລະກົດ 2022 ຊຶ່ງນັກກິລາທຸກຄົນຍັງມີສຸຂະພາບແຂງແຮງ ແລະ ຂວັນກຳລັງໃຈດີ ໂດຍທາງເຈົ້າພາບໄດ້ໃຫ້ການຕ້ອນຮັບຢ່າງອົບອຸ່ນ ແລະ ໄດ້ເຂົ້າພັກທີ່ໂຮງ ແຮມ ເຊຍຣຽດ ໂຮເທວ ໂຊໂລ (SYARIAH Hotel SOLO) ກ່ອນທີ່ມື້ຕໍ່ມານັກກິລາແຕ່ລະປະເພດ ຈະແຍກຍ້າຍກັນໄປຕາມຈຸດຕ່າງໆທີ່ເຈົ້າພາບໄດ້ຈັດໄວ້ໃຫ້.

ຫຼ້າສຸດ ໃນຕອນແລງຂອງວັນທີ 26 ກໍລະກົດ 2022, ທ່ານ ຄຳພັດ ເພັດລາສີ ຫົວໜ້າຄະນະນັກກິລາລາວ ປະຈຳນະຄອນໂຊໂລ ພ້ອມດ້ວຍທີມງານກອງເລຂາ ໄດ້ເຄື່ອນໄຫວຢ້ຽມຢາມຖາມຂ່າວ ແລະ ຕິດຕາມເບິ່ງການຝຶກຊ້ອມຂອງນັກກິລາລາວ ຊຶ່ງໃນແຕ່ລະຈຸດທີ່ທ່ານໄປ ທ່ານໄດ້ຢື້ຢາມຖາມຂ່າວ, ສຸຂະພາບ ແລະ ການເປັນຢູ່ຂອງນັກກິລາທຸກຄົນ ພ້ອມທັງໃຫ້ກຳລັງໃຈ ແລະ ປຸກລະດົມໃຫ້ນັກກິລາທຸກຄົນ ຈົ່ງເຊີດຊູນໍ້າໃຈຊາດໃຫ້ສູງ, ມີຄວາມຮັບຜິດຊອບ ແລະ ອົດທົນສູ້ຊົນຜ່ານມາພາລະກິດສຳຄັນ ທີ່ປະເທດຊາດມອບໝາຍໃຫ້ໃນຄັ້ງນີ້ ໃຫ້ລຸລ່ວງ ແລະ ປະສົບຜົນສຳເລັດໃຫ້ໄດ້ ເພື່ອນຳກຽດສັກສີ ແລະ ຄວາມເອກອ້າງທະນົງໃຈ ໄປໃຫ້ປະຊາຊົນລາວທັງປະເທດ ໄດ້ຊື່ນຊົມ.

ທັບນັກກິລາຄົນພິການລາວ ເດີນທາງມາຄັ້ງນີ້ ທັງໝົດ 79 ຄົນ ມີ 6 ປະເພດກິລາ ເຊັ່ນ: ແລ່ນ-ລານ, ຍົກນໍ້າໜັກ, ລອຍນໍ້າ, ບອດເຊຍ, ບານບ້ວງລໍ້ເລື່ອນ (ທີມຍິງ) ແລະ ໂກນບານ (ທີມຊາຍ-ຍິງ). ຊຶ່ງບານບ້ວງລໍ້ເລື່ອນ ມີໂປຣແກຣມແຂ່ງຂັນກ່ອນໝູ່ເປັນປະເພດທຳອິດ ໂດຍຈະແຂ່ງຂັນໃນວັນທີ 30 ກໍລະກົດ 2022. ສຳລັບປະເພດອື່ນ ແມ່ນຈະເລີ່ມແຂ່ງຂັນຫຼັງພິທີເປີດຢ່າງເປັນທາງການ ໃນວັນທີ 30 ກໍລະກົດ ເປັນຕົນໄປ.

ການແຂ່ງຂັນກິລາອາຊຽນພາຣາເກມ ຄັ້ງທີ 11 ຊຶ່ງຈະດຳເນີນການແຂ່ງຂັນ ຢ່າງເປັນທາງການ ແຕ່ວັນທີ 30 ກໍລະກົດ ເຖິງ 7 ສິງຫາ 2022 ໂດຍຄາດວ່າຈະມີນັກກິລາເກືອບ 2.000 ຄົນ ຈາກ 11 ປະເທດ ໃນອາຊີຕາເວັນອອກສຽງໃຕ້ ເຂົ້າຮ່ວມ ໂດຍຈະແຂ່ງຂັນໃນ 14 ປະເພດ.

ສ.ສຸກ ລາຍງານຈາກນະຄອນໂຊໂລ, ອິນໂດເນເຊຍ

ປະທານສະຫະພັນກິລາແລ່ນ-ລານຄົນພິການແຫ່ງຊາດລາວ ພ້ອມຈະສະໜັບສະໜູນໃຫ້ເງິນໂບນັດຢ່າງເຕັມທີ່ ເພື່ອກະຕຸ້ນໃຫ້ທັບນັກກິລາແລ່ນ-ລານຄົນພິການລາວ ສ້າງຜົນງານປະຫວັດສາດ ໄລ່ລ່າຫຼຽນຄຳ ງານມະຫະກຳກິລາ ອາຊຽນ ພາຣາ ເກມ ຄັ້ງທີ 11 ທີ່ນະຄອນໂຊໂລ ປະເທດອິນໂດເນເຊຍ ໂດຍຫຼຽນຄຳ ຈະໄດ້ຮັບເງິນ 10 ລ້ານກີບ, ຫຼຽນເງິນ 8 ລ້ານກີບ ແລະ ຫຼຽນທອງ 5 ລ້ານກີບ.

ໃນໂອກາດທີ່ໄດ້ມານຳສົ່ງ ແລະ ອວຍພອນທັບນັກກິລາລາວ ກໍຄື ທັບນັກກິລາແລ່ນ-ລານຄົນພິການທີມຊາດລາວ ເດີນທາງເຂົ້າຮ່ວມ ອາຊຽນ ພາຣາ ເກມ 2022 ດ້ວຍຄວາມສະຫວັດດີພາບ, ທ່ານ ວັດທະນາໄຊ ລາດສະວົງສິງ ປະທານສະຫະພັນແລ່ນ-ລານຄົນພິການແຫ່ງຊາດລາວ ໃຫ້ຮູ້ວ່າ: ເພື່ອເປັນການກະຕຸ້ນ ແລະ ເປັນກຳລັງໃຈໃຫ້ທັບນັກກິລາແລ່ນ-ລານຄົນພິການທີມຊາດລາວ 3 ຄົນ, ຍິງ 1 ຄົນ ທີ່ກຳລັງເຂົ້າຮ່ວມແຂ່ງຂັນງານກິລາອາຊຽນ ພາຣາ ເກມ ຄັ້ງທີ 11 ທີ່ນະຄອນໂຊໂລ ປະເທດອິນໂດເນເຊຍ ເປັນເຈົ້າພາບ ສາມາດຮັບປະກັນໃນການສ້າງຜົນງານຄັ້ງປະຫວັດສາດ ໃນການໄລ່ລ່າຫຼຽນຄຳໃນງານກິລາດັ່ງກ່າວ ທາງຄະນະບໍລິຫານງານສະຫະພັນແລ່ນ-ລານຄົນພິການແຫ່ງຊາດລາວ ພ້ອມທີ່ຈະສະໜັບສະໜູນຢ່າງເຕັມທີ່ ຖ້າຫາກນັກກິລາ ສາມາດຍາດໄດ້ ຫຼຽນຄຳ ຈະມອບໃຫ້ 10 ລ້ານກີບ, ຫຼຽນເງິນ 8 ລ້ານກີບ ແລະ ຫຼຽນທອງ 5 ລ້ານກີບ.

ການແຂ່ງຂັນກິລາແລ່ນ-ລານ ອາຊຽນພາຣາເກມ ຄັ້ງນີ້ ມີ 11 ຊາດ ໃນອາຊຽນສົ່ງເຂົ້າຮ່ວມແຂ່ງຂັນ ສະເພາະ ສປປ ລາວ ສົ່ງທັບນັກກິລາພຽງ 3 ຄົນ, ຍິງ 1 ຄົນ ລົງແຂ່ງຂັນຊີງໄຊ 9 ລາຍການ ປະກອບມີ: ທ້າວ ແກ່ນ ເທບທິດາ ແລ່ນ 100 ແມັດ, 200 ແມັດ ແລະ 400 ແມັດຊາຍ, ທ້າວ ບຸນເພັດ ເທບທິດາ ແລ່ນ 100 ແມັດ, 200 ແມັດ ແລະ 400 ແມັດຊາຍ ແລະ ນາງ ສຸລິພອນ ວົງດາລາ ແລ່ນ 100 ແມັດ, 200 ແມັດ ແລະ 400 ແມັດຍິງ ການແຂ່ງຂັນແມ່ນເລີ່ມໃນລະຫວ່າງວັນທີ 31 ກໍລະກົດ ຫາ 5 ສິງຫາ 2022.

ໂດຍ: ສົງການ ພັນແພງດີ

ແມນເຊັສເຕີ ຢູໄນເຕັດ ຢືນຢັນໜັກແໜ້ນວ່າ ຄຣິສເຕຍໂນ ໂຣນັນໂດ ຈະຕ້ອງຢູ່ກັບທີມຕໍ່ໄປໃນລະດູການໜ້າ ຂະນະທີ່ ດາວດັງຊາວປອກຕຸຍການ ກໍຢືນຢັນຈຸດຢືນຕ້ອງການຍ້າຍທີມ ຜົນຂອງການເຈລະຈາຮອບທຳອິດທີ່ສິ້ນສຸດລົງແບບຫຼົມແຫຼວ ບໍ່ສາມາດຫາທາງອອກກັນໄດ້.

ດາວເຕະອາຍຸ 37 ປີ ບໍ່ໄດ້ເດີນທາງກັບມາລາຍງານຕົວຝຶກຊ້ອມກ່ອນລະດູການ ແລະ ອອກມາປະເທດໄທແລະ ອົດສະຕຣາລີ ໂດຍໃຫ້ເຫດຜົນວ່າມີບັນຫາກ່ຽວກັບຄອບຄົວ ກ່ອນທີ່ຈະແຈ້ງກັບສະໂມສອນໃນເວລາຕໍ່ມາວ່າຕ້ອງການຍ້າຍທີມ.

ຫຼ້າສຸດ ໂຣນັນໂດ ແລະ ຮໍເກ ເມນເດຊ ຕົວແທນຄູ່ໃຈຂອງເຂົາໄດ້ເດີນທາງມາເຖິງແມນເຊສເຕີເມື່ອວັນອັງຄານ ເພື່ອເຂົ້າເຈລະຈາອະນາຄົດກັບສະພາບໍລິຫານທີ່ ແຄຣິງຕັນ.

ໂດຍມີທ່ານ ຣິຊາດ ອາໂນລ ແລະ ເຊີ ອະເລັກ ເຟີກູສັນ ກໍມາປາກົດຕົວຢູ່ທີ່ສະໜາມຝຶກຊ້ອມໃນມື້ນີ້ ແຕ່ທາງສະໂມສອນບໍ່ໄດ້ຢືນຢັນວ່າ ທັງຄູ່ມີສ່ວນຮ່ວມໃນການເຈລະຈານໍາຫຼືບໍ່ ?

ລາຍງານຄວາມຄືບໜ້າຈາກ The Telegraph ເປີດເຜີຍວ່າ ການເຈລະຈາໃນມື້ນີ້ ປະສົບຄວາມຫຼົມແຫຼວ ທັງສອງຝ່າຍຕ່າງຢຶດໝັ້ນຕໍ່ຈຸດຢືນຂອງຕົວເອງ ບໍ່ສາມາດຫາຂໍ້ສະຫຼຸບໄດ້.

ໂດຍ ໂຣນັນໂດ ຍັງຢືນຢັນຕ້ອງການຍ້າຍທີມ ເພາະຕ້ອງການຫຼິ້ນໃນ ແຊັມປຽນລີກ ຂະນະທີ່ ແມນເຊສເຕີ ຢູໄນເຕັດ ກໍຢືນຢັນຈະບໍ່ໃຫ້ນັກເຕະຍ້າຍທີມ ເພາະຢູ່ໃນແຜນການສ້າງທີມຂອງ ເທນ ຮາກ.

ຢ່າງໃດກໍຕາມ ຈາກການທີ່ ໂຣນັນໂດ ກັບຄືນມາພຽງແຕ່ເພື່ອເຈລະຈາ ບໍ່ໄດ້ລົງຝຶກຊ້ອມກັບໝູ່ຮ່ວມທີມໃນວັນອັງຄານ ຈຶ່ງບໍ່ໜ້າເປັນໄປໄດ້ທີ່ເຂົາຈະໄດ້ລົງຫຼິ້ນເກມອຸ່ນເຄື່ອງພົບກັບ ແອດເລຕິໂກ ມາດຣິດ ໃນ ອອສໂລ ໃນວັນເສົາ ແລະ ຣາໂຢ ບາເຢກາໂນ ທີ່ສະໜາມ ໂອລ ແທຣບຟອດ ໃນວັນອາທິດ.

ແລະເກືອບເປັນໄປບໍ່ໄດ້ເລີຍ ທີ່ເຂົາຈະພ້ອມຫຼິ້ໜນັດເປີດລະດູການ ພຣີເມຍລີກ ກັບ ໄບຣຕັນ ໃນວັນທີ 7 ສິງຫາ.

ທ່ານ ເອັນຣິເກ ເຊເຣໂຊ່ ປະທານສະໂມສອນ ແອດເລຕິໂກ ມາດຣິດ ອອກມາຢືນຢັນແລ້ວວ່າ ບໍ່ໄດ້ມີຄວາມສົນໃຈທີ່ຈະເຊັນສັນຍາກັບ ຄຣິສເຕຍໂນ ໂຣນັນໂດ ດາງດັງຂອງ ແມນເຊສເຕີ ຢູໄນເຕັດ ທີ່ກໍາລັງດີ້ນຮົນຫາທີມໃໝ່ຢູ່ໃນຂະນະນີ້.

ໂຣນັນໂດ ບໍ່ໄດ້ກັບຄືນມາຝຶກຊ້ອມກ່ອນລະດູການກັບທີມແມນຢູ ຫຼັງຕ້ອງການຍ້າຍທີມເພື່ອໂອກາດລົງຫຼິ້ນໃນ ຢູຟ່າ ແຊັມປຽນລີກ.

ໃນລະຫວ່າງທີ່ດາວເຕະປອກຕຸຍການ ເດີນທາງກັບໄປເຈລະຈາອະນາຄົດທີ່ ແຄຣິງຕັນ ເມື່ອວັນອັງຄານ ທ່ານ ເຊເຣໂຊ ປະທານຂອງແອດເລຕິໂກ ມາດຣິດ ໄດ້ອອກມາປະຕິເສດຂ່າວລືເລື່ອງສະໂມສອນໃຫ້ຄວາມສົນໃຈ ໂຣນັນໂດ ແລ້ວ.

“ຂ້ອຍບໍ່ຮູ້ວ່າໃຜເປັນຄົນສ້າງເລື່ອງ ຄຣິສເຕຍໂນ ໂຣນັນໂດ ຈະຍ້າຍມາ ແອດເລຕິໂກ ມາດຣິດ ຂຶ້ນມາ ເຊິ່ງມັນບໍ່ແມ່ນຄວາມຈິງແທ້ໆ ” ທ່ານ ເຊເຣໂຊ ກ່າວ.

” ເກືອບເປັນໄປບໍ່ໄດ້ເລີຍ ທີ່ເຂົາຈະຍ້າຍມາ ແອດເລຕິໂກ ມາດຣິດ “

ການອອກມາປະຕິເສດໃນຄັ້ງນີ້ ເຮັດໃຫ້ສະຖານະການຍ້າຍທີມຂອງ ໂຣນັນໂດ ເພີ່ມຄວາມສັບຊ້ອນຫຼາຍຂຶ້ນໄປອີກ ເນື່ອງຈາກເຫຼືອບໍ່ເທົ່າໃດທີມແລ້ວທີ່ມີສັກກະຍະພາບຫຼາຍພໍທີ່ຈະດຶງເຂົາມາຮ່ວມທີມໄດ້ ຫຼັງຍອດທີມດັງຢ່າງ ປາຣີ ແຊັງ-ແຊັກແມັງ, ບາເຢິນ ມິວນິກ, ເຊວຊີ ແລະ ຣີວ ມາດຣິດ ໄດ້ອອກມາປະຕິເສດໂອກາດໃນຄັ້ງນີ້ໄປແລ້ວ.

ແມນເຊັສເຕີ ຢູໄນເຕັດ ເປີດຕົວ ຄຣິສຕຽນ ອີຣິກເຊນ ກອງກາງທີມຊາດເດນມາກ ມາຮ່ວມທີມຢ່າງເປັນທາງການ ພ້ອມລະບຸຄວາມຮູ້ສຶກພິເສດທີ່ໄດ້ເປັນນັກເຕະຂອງ ແມນເຊສເຕີ ຢູໄນເຕັດ.

ສໍາລັບ ແມນເຊັສເຕີ ຢູໄນເຕັດ ບັນລຸຂໍ້ຕົກລົງໃນການເຊັນສັນຍາຄວ້າຕົວ ອີຣິກເຊນ ມາຮ່ວມທີມແບບບໍ່ມີຄ່າຕົວ ຕັ້ງແຕ່ໄລຍະກາງເດືອນກໍລະກົດທີ່ຜ່ານມາ ຫຼັງຈາກນັກເຕະອາຍຸ 30 ປີໝົດສັນຍາກັບ ເບຣນຟອດ..

ຈົນຫຼ້າສຸດ ແມນເຊສເຕີ ຢູໄນເຕັດ ໄດ້ເປີດຕົວ ຣີຣິກເຊນ ຢ່າງເປັນທາງການ ເຊິ່ງຜູ້ກ່ຽວໃຫ້ສຳພາດເຖິງຄວາມຮູ້ສຶກວ່າ “ແມນເຊັສເຕີ ຢູໄນເຕັດ ເປັນສະໂມສອນທີ່ໃຫຍ່ຫຼາຍ ດັ່ງນັ້ນ ການໄດ້ຢູ່ທີ່ນີ້ໃນຖານະເປັນນັກເຕະຂອງທີມ ມັນພິເສດຫຼາຍ ຂ້ອຍເປັນຜູ້ຊາຍທີ່ຕ້ອງການຫຼິ້ນບານເຕະ ແລະ ຂ້ອຍຄິດວ່າດ້ວຍຄວາມຄິດຂອງຜູ້ຈັດການທີມ (ເອຣິກ ເທນ ຮາກ) ທີ່ເຂົ້າມາ ແນວຄວາມຄິດທີ່ເຂົາມີ ແລະ ຈາກການໂອ້ລົມກັບເຂົາ ຂ້ອຍຄິດວ່າສາມາດເຫັນຕົວເອງຫຼີ້ນບານເຕະໃນ ແມນເຊສເຕີ.”

ນອກຈາກນັ້ນ ອີຣິກເຊນ ຍັງໄດ້ກ່າວເຖິງການຫຼິ້ນທີ່ສະໜາມ ໂອລ ແທຣບຟອດ ໃນຖານະນັກເຕະຂອງ ແມນເຊສເຕີ ຢູໄນເຕັດ ວ່າ ” ມັນຄົງຈະມ່ວນຊື່ນທີ່ໄດ້ເຫັນກອງເຊຍບານໃນສະໜາມ ມັນເປັນຄວາມຮູ້ສຶກທີ່ດີຫຼາຍ ແລະ ບັນຍາກາດກໍໜ້າປະທັບໃຈ ການຫຼີ້ນຢູ່ທີ່ນີ້ເປັນເລື່ອງພິເສດຫຼາຍ ໂດຍທົ່ວໄປແລ້ວ ການຫຼີ້ນກັບສະໂມສອນໃຫຍ່ຢ່າງ ແມນເຊສເຕີ ຢູໄນເຕັດ ມັກມີອັນໃດເກີດຂື້ນສະເໝີ ຢ່າງທີ່ຂ້ອຍເວົ້າໄປ ມັນຈະເປັນເລື່ອງແປກ ຖ້າຢູ່ອີກຂ້າງໜຶ່ງ.”

ປະທານາທິບໍດີຝຣັ່ງ ທ່ານ ເອັມມານູເອວ ມາຄຣົງ ເຊື່ອວ່າງານກິລາໂອລິມປິກປີ 2024 ທີ່ນະຄອນຫຼວງປາຣີ ຈະເປັນໂອກາດຄັ້ງປະຫວັດສາດຂອງຊາດໃນການຈັດແຂ່ງອີສະປອດ ລາຍການໃຫຍ່.

ທ່ານ ມາຄຣົງ ໄດ້ສະແດງໃຫ້ເຫັນຄວາມຕັ້ງໃຈທີ່ຈະນຳໃຊ້ງານກິລາໂອລິມປິກປາຣີ 2024 ເປັນເຄື່ອງມືໃນການຊຸກຍູ້ກິລາໃຫ້ເປັນຫົວໃຈຂອງຊາດ ແລະ ເຊື່ອວ່າການແຂ່ງຂັນຄັ້ງນີ້ ຈະຊ່ວຍກະຕຸ້ນການພັດທະນາ E-sports ໃນປະເທດຝຣັ່ງຕໍ່ໄປ.

“ ວິດີໂອເກມ ເປັນອົງປະກອບທີ່ສໍາຄັນຂອງພະລັງງານວັດທະນະທໍາຂອງຝຣັ່ງ ແລະ ພາບພົດຂອງປະເທດພວກເຮົາຕໍ່ຊາວໂລກ.”

” ລວມເຖິງຄວາມສາມາດຂອງເຮົາທີ່ຈະສ້າງຄວາມເຂົ້າໃຈ ການຄາດຄະເນ ແລະ ການເປັນຕົວແທນສໍາລັບສັງຄົມຂອງພວກເຮົາດ້ວຍ “

” ນັ້ນຄືເຫດຜົນທີ່ຂ້ອຍຕ້ອງການໃຫ້ເຮົາມີກົນລະຍຸດໃນການສ້າງເງື່ອນໄຂທີ່ເໝາະສົມ ໃນການສົ່ງເສີມປະເທດຝຣັ່ງໃນຖານະເປັນປະເທດຂອງວີດີໂອເກມ “

“ ສຸດທ້າຍນີ້ ຂ້ອຍບໍ່ໄດ້ລືມກິລາ e-sport ອີກໜຶ່ງສະຫນາມແຫ່ງຄວາມເປັນເລີດຂອງຝຣັ່ງ ດ້ວຍທີມຢ່າງ Team Vatality ຫຼື Karmine Corp.”

” ໃນແງ່ນີ້ ເຮົາມີໂອກາດຄັ້ງປະຫວັດສາດ: ໂອລິມປິກ ເກມສ໌ 2024 “

“ ມັນຂຶ້ນຢູ່ກັບເຮົາທີ່ຈະໃຊ້ປະໂຫຍດຢ່າງເຕັມທີ່ ເພື່ອສ້າງຄວາມເຊື່ອມໂຍງລະຫວ່າງງານໂອລິມປິກຂອງສອງໂລກ ດ້ຍການເປັນເຈົ້າພາບຈັດການແຂ່ງຂັນ e-sports ທີ່ຍິ່ງໃຫຍ່ທີ່ສຸດຂອງໂລກຢ່າງ CS:GO Majors, Worlds of League of Legends ແລະ The International ຂອງເກມ Dota 2.”