ຄືດັ່ງພວກເຮົາຮູ້ນໍາກັນ ແລ້ວວ່າພຣະທາດອີງຮັງແມ່ນ ປູຊະນິຍະສະຖານທີ່ເກົ່າແກ່ ທາງດ້ານວັດທະນະ ທຳແຫ່ງໜຶ່ງ ຂອງແຂວງສະຫວັນນະເຂດ, ກໍ່ຄືຂອງຊາວນະ ຄອນໄກສອນ ພົມວິຫານ, ເຊິ່ງ ເປັນບ່ອນສັກກາລະບູຊາຂອງ ຊາວພຸດເວົ້າລວມ, ເວົ້າສະ ເພາະແມ່ນຊາວແຂວງສະຫວັນນະເຂດ, ຕາມຮີດຄອງປະເພ ນີທີ່ເຄີຍປະຕິບັດກັນມາ. ພໍຮອດ ເດືອນຈຽງເພັງຂອງທຸກໆປີ ພວກເຮົາໄດ້ພ້ອມພຽງກັນ ຈັດໃຫ້ມີການສະເຫຼີມສະຫຼອງ ງານບຸນນະມັດສະການພຣະ ທາດອີງຮັງປະຈໍາປີຂຶ້ນຢ່າງ ຄຶກຄື້ນ ແລະເບີກບານມ່ວນຊື່ນ ເຊິ່ງໃນປີນີ້ແມ່ນໄດ້ຈັດງານບຸນຂຶ້ນໃນລະຫວ່າງວັນທີ 04-08 ທັນວາ 2022.

ໃນຕອນບ່າຍ ຂອງວັນທີ 06 ທັນວາ 2022 ນີ້ນະຄອນໄກສອນ ພົມວິຫານ ກໍ່ໄດ້ຈັດພິທີເປີດງານດັ່ງກ່າວ ຂຶ້ນຢ່າງເປັນທາງການ, ໂດຍການເປັນກຽດເຂົ້າຮ່ວມຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີບັນດາການນຳຂັ້ນສູງຂອງແຂວງ, ການນຳຂອງນະຄອນ ໄກສອນ ພົມວິຫານ ແລະການ ນຳຂອງເມືອງຕ່າງໆ ພ້ອມ ດ້ວຍມວນຊົນຊາວນະຄອນ ໄກສອນ ພົມວິຫານເຂົ້າຮ່ວມ.

ໃນພິທີ, ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ໃນນາມ ຮອງປະທານຈັດງານກໍ່ໄດ້ ກ່າວລາຍງານການຫ້າງຫາ ກະກຽມ ພ້ອມທັງກ່າວສະ ແດງຄວາມຍິນດີຕ້ອນຮັບບັນດາແຂກ, ຜູ້ແທນ ແລະພີ່ນ້ອງ ຊາວແຂວງສະຫວັນນະເຂດ, ເວົ້າສະເພາະ ກໍ່ແມ່ນຊາວນະຄອນ ໄກສອນ ພົມວິຫານ, ພີ່ນ້ອງຈາກຕ່າງແຂວງ, ບັນດາເມືອງຕ່າງໆທີ່ມາທ່ອງທ່ຽວໃນງານຄັ້ງນີ້, ເຊິ່ງໃນປີນີ້ ຄະນະກໍາມະການຮັບຜິດຊອບ ໄດ້ຫ້າງຫາກະກຽມບັນດາກິດ ຈະກໍາຕ່າງໆເປັນຕົ້ນ: ຮ້ານວາງສະແດງສິນຄ້າໂອດັອບ ຈາກພາຍໃນແຂວງ, ຕ່າງ ແຂວງລວມມີ 25 ຮ້ານ, ຮ້ານ ວາງສະແດງຈໍາໜ່າຍສິນຄ້າ ຈາກບໍລິສັດຫ້າງຮ້ານ 420 ກວ່າຮ້ານ, ໃນນັ້ນມີຮ້ານສະແດງລົດໃຫຍ່ຈາກສູນລົດປະເພດປະເພດຕ່າງໆ,ຈຸດບໍລິການທະນາຄານ,ຮ້ານວາງສະແດງເຄື່ອຂ່າຍໂທລະສັບ,ຮ້ານສະແດງເຄື່ອງຫັດຖະກຳເຄື່ອງເງິນ-ຄຳ ,ຮ້ານຜ້າຝ້າຍ,ຜ້າໄໝລາວ ແລະ ເຄື່ອງຈັກສານຫຼາກຫຼາຍຊະນິດທີ່ເປັນເອກະລັກທ້ອງຖິ່ນ,ພິເສດປີນີ້ໄດ້ມີການຈັດສະແດງຢ້ອນຍຸກໃນເຂດຫໍແຈກໄມ້ເກົ່າ ຂອງວັດພຣະທາດອີງຮັງ ໄດ້ຈັດເປັນບ່ອນທ່ອງທ່ຽວແຫ່ງໃໜ່ຂອງງານ ສາມາດດຶງດູດນັກທ່ອງທ່ຽວເຂົ້າມາທ່ຽວຊົມ ແລະຂະບວນຟ້ອນ ປະເພນີຂອງແຂວງສະຫວັນນະເຂດ ຈາກກຸ່ມບ້ານຕ່າງໆເຊັ່ນ ຂະບວນຟ້ອນຈາກໂຮງຮຽນມັດ ທະຍົມຕົ້ນທາດອີງຮັງ, ຂະ ບວນຟ້ອນຈາກມະຫາວິທະຍາໄລສະຫວັນນະເຂດ, ຂະບວນ ຟ້ອນຈາກໂຮງຮຽນ ມສ ໂພນສີມ, ຂະບວນຟ້ອນໂຮງຮຽນ ມສ ທາດອີງຮັງ, ມສເຄື່ອເຂົາກາດ, ມສ ຊອກ ແລະ ໃນຕອນກາງຄືນໄດ້ມີສິນລະປິນຈາກປະເພດເພື່ອນບ້ານ.

ພາຍຫຼັງຈົບພິທີທາງການແລ້ວ ທ່ານເຈົ້າແຂວງສະຫວັນນະເຂດ ພ້ອມດ້ວຍບັນດາແຂກ, ຜູ້ແທນທີ່ເຂົ້າຮ່ວມ ຍັງໄດ້ເລາະ ຊົມຮ້ານວາງສະແດງສິນຄ້າ, ຊົມກິດຈະກຳຕ່າງໆພາຍໃນ ງານຕື່ມອີກ.

ນອກນີ້ການຄົບງັນໃນແຕ່ລະຄໍ່າຄືນ ຢູ່ເວທີກາງ ພະແນກ ຖວທ ແຂວງ ແລະ ນະ ຄອນກໍ່ຈັດໃຫ້ມີການປະກວດ ສຽງເພງຄັດເລືອກເອົານັກ ຮ້ອງສຽງດີ ຂອງນ້ອງນ້ອຍ-ໄວໜຸ່ມ-ເຍົາວະຊົນແຕ່ລະ ໂຮງຮຽນໂດຍບໍ່ຈໍາກັດ ແລະ ໜໍລຳເລື່ອງ ຈາກຄະນະສິນລະປະສູນກາງມາສະແດງໃຫ້ມີບັນຍາ ກາດ ຟົດຟື້ນ, ນອກນັ້ນຍັງຈະມີພິທີທາງສາສະໜາເຊັ່ນ: ພິທີແຫ່ຜາສາດເຜິ້ງ, ພິທີຕັກບາດຖວາຍສັງຄະທານ ຕອນກາງຄືນມີການວຽນທຽນ ຕາມຮີດຄອງປະເພນີ.

ຈາກນັ້ນ, ທ່ານເຈົ້າແຂວງ ສະຫວັນນະເຂດ ກໍ່ໄດ້ເປັນກຽດ ລັ່ນຄ້ອງ 9 ບາດ, ເປີດງານນະມັດສະການພຣະທາດອີງຮັງ ຢ່າງເປັນທາງການ, ຕໍ່ດ້ວຍ ການຊົມສິລະປະຈາກບັນດາ ນ້ອງນັກຮຽນ ແລະຂະບວນ ຟ້ອນປະເພນີຈາກກຸ່ມບ້ານ ຕ່າງໆ ຕາມລຳດັບ. ງານບຸນຄັ້ງ ນີ້ຈະຈັດມີການຄົບງັນຮອດວັນທີ 08 ທັນວາຈຶ່ງສິ້ນສຸດລົງ.

ພາບ-ຂ່າວ: ນະຄອນ ໄກສອນ ພົມວິຫານ.

#savannakhet#medialaos

ໃນວັນທີ 6 ທັນວາ 2022, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ພ້ອມຄະນະ ເຄື່ອນໄຫວຢ້ຽມຢາມ ແລະ ພົບປະໂອ້ລົມ ການນຳຫລັກແຫລ່ງແຂວງຈຳປາສັກ, ພ້ອມທັງ ລົງຕິດຕາມຊຸກຍູ້ການຈັດຕັ້ງປະຕິບັດໂຄງການ ແລະ ສະມາຄົມສົ່ງເສີມການຜະລິດ ຈຳນວນໜຶ່ງ ໂດຍການຕ້ອນຮັບ ແລະ ຮ່ວມເຄື່ອນໄຫວເຮັດວຽກຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະນຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ເຂົ້ສຮ່ວມ.

ໂອກາດນີ້, ທ່ານຮອງນາຍົກລັດຖະມົນຕີ ແລະ ຄະນະ ໄດ້ຮັບຟັງການລາຍງານຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ທີ່ພົ້ນເດັ່ນໃນໄລຍະ 11 ເດືອນຜ່ານມາ ເຫັນວ່າ: ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດຂະຫຍາຍຕົວ ຕາມທິດທີ່ກຳນົດໄວ້ ໂດຍສາມາດລະດົມທຶນ ເຂົ້າໃນການພັດທະນາເສດຖະກິດ-ສັງຄົມຂອງແຂວງ ໄດ້ລື່ນແຜນ 8,8%, ມູນຄ່າການສົ່ງອອກສິນຄ້າ ປະຕິບັດໄດ້ລື່ນແຜນ 4%, ສາມາດປະຕິບັດໄດ້ເກີນດູນການຄ້າ ປະມານ 88 ລ້ານໂດລາ, ພ້ອມດຽວກັນນັ້ນ ການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍມີທ່າອ່ຽງດີຂຶ້ນກວ່າເກົ່າ ໂດຍສະເພາະ ການເກັບລາຍຮັບເຂົ້າງົບປະມານ, ການອັດການຮົ່ວໄຫລຂອງງົບປະມານ, ການປະຢັດມັດທະຍັດ ຕ້ານການຟູມເຟືອຍ, ການຜະລິດສິນຄ້າ ເພື່ອຫລຸດຜ່ອນການນຳເຂົ້າ ແລະ ອື່ນໆ. ສຳລັບການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ກໍມີການຫັນປ່ຽນດີຂຶ້ນກວ່າເກົ່າຫລາຍ.

ຈາກນັ້ນ, ທ່ານ ຮອງນາຍົກລັດຖະມົນຕີ ກໍໄດ້ໃຫ້ກຽດມີຄຳເຫັນໂອ້ລົມ ໂດຍໄດ້ຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ, ລວມທັງ ສະພາບການພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2022, ການຈັດຕັ້ງປະຕິບັດ 2 ວາລະແຫ່ງຊາດ. ອັນສຳຄັນ, ທ່ານຮອງນາຍົກລັດຖະມົນຕີ ໄດ້ເນັ້ນໃຫ້ການນຳຫລັກແຫລ່ງຂອງແຂວງ ສືບຕໍ່ເອົາໃຈໃສ່ປະຕິບັດວຽກງານໃນຕໍ່ໜ້າຕື່ມບາງດ້ານ ເປັນຕົ້ນ ສຸມໃສ່ການຜະລິດ ເພື່ອຄໍ້າປະກັນສະບຽງອາຫານ ໃຫ້ພຽງພໍ ແລະ ກາຍເປັນສິນຄ້າສົ່ງອອກ ໃຫ້ຫລາຍກວ່າເກົ່າ ເພື່ອຫລຸດຜ່ອນ ແລະ ດູນດ່ຽງ ການນຳເຂົ້າສິນຄ້າ; ສືບຕໍ່ປະຕິບັດແຜນການ ດ້ານຂະບວນການ ແລະ ເທສະການຕ່າງໆ ຂອງແຂວງ-ບັນດາເມືອງ ເພື່ອຊຸກຍູ້ສົ່ງເສີມການຜະລິດ, ການບໍລິການ, ການທ່ອງທ່ຽວ, ການຈໍາໜ່າຍສິນຄ້າ ແລະ ການພົວພັນຮ່ວມມື ກັບບັນດາທ້ອງຖິ່ນ ຂອງປະເທດໃກ້ຄຽງ; ສືບຕໍ່ປັບປຸງ ການບໍລິການ ຢູ່ບັນດາດ່ານ ເຂົ້າ-ອອກ ທີ່ເຊື່ອມຕໍ່ກັບບັນດາປະເທດໃກ້ຄຽງ; ສຸມໃສ່ການເກັບລາຍຮັບ ປີ 2022 ໃຫ້ໄດ້ຕາມແຜນ ພ້ອມທັງເອົາໃຈໃສ່ໃນການສ້າງ ແລະ ຈັດຕັ້ງປະຕິບັດແຜນການເກັບລາຍຮັບເຂົ້າງົບປະມານແຫ່ງລັດ ໃນປີ 2023 ເພື່ອສູ້ຊົນໃຫ້ແຂວງ ສືບຕໍ່ເປັນແຂວງກຸ້ມຕົນເອງ ທາງດ້ານລາຍຈ່າຍງົບປະມານ; ເອົາໃຈໃສ່ປະເມີນ ແລະ ຈັດລຽງບູລິມະສິດ ໂຄງການທີ່ຈະສືບຕໍ່ ແລະ ລົງທຶນໃໝ່ ຢູ່ພາຍໃນແຂວງ ເພື່ອເຮັດໃຫ້ການປະຕິບັດແຜນລາຍຈ່າຍ ມີປະສິດທິພາບ ແລະ ປະສິດທິຜົນສູງ, ທັງສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາຕົວຈິງ; ສົມທົບກັບກະຊວງທີ່ກ່ຽວຂ້ອງ ໃນການພັດທະນາວຽກງານດ້ານຕ່າງໆ ຢູ່ບາງເຂດບໍລິເວນຊາຍແດນ ໃຫ້ມີຄວາມຄືບໜ້າເປັນກ້າວໆ, ລວມທັງ ການພັດທະນາພື້ນຖານໂຄງລ່າງ ຢູ່ພາຍໃນແຂວງ ທີ່ເປັນໂຄງການໃຫຍ່; ປະເມີນ ແລະ ຄົ້ນຄວ້າພິຈາລະນາ ເພື່ອຢຸດຕິບັນດາໂຄງການລົງທຶນ ທີ່ເຫັນວ່າບໍ່ມີປະສິດທິຜົນ ແລ້ວຫັນໄປນຳໃຊ້ພື້ນທີ່ດັ່ງກ່າວ ທຳການຜະລິດ, ການທ່ອງທ່ຽວ ແລະ ການບໍລິການອື່ນໆ ທີ່ຈະເກີດປະໂຫຍດສູງກວ່າ.

ໃນວັນດຽວກັນ, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ເດີນທາງໄປຕິດຕາມ ແລະ ຊຸກຍູ້ການຈັດຕັ້ງປະຕິບັດໂຄງການກໍ່ສ້າງເຂື່ອນໄຟຟ້ານໍ້າພາກ ຂອງບໍລິສັດຈະເລີນເຊກອງພະລັງງານ ຈຳກັດ ທີ່ເມືອງປາກຊ່ອງ ພ້ອມທັງຢ້ຽມຢາມສະມາຄົມສົ່ງເສີມຊາປາກຊ່ອງ ທີ່ບ້ານຫລັກ 45 ເມືອງປາກຊ່ອງ ຕື່ມອີກ.

ຂ່າວ-ພາບ: ກົມປະຊາສຳພັນ ຫສນຍ

ໃນວັນທີ 6 ທັນວາ 2022 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ໃຫ້ກຽດພົບປະໂອ້ລົມ ຕໍ່ການນຳຫຼັກແຫຼ່ງແຂວງຈຳປາສັກ ພ້ອມທັງ ລົງຕິດຕາມຊຸກຍູ້ການຈັດຕັ້ງປະຕິບັດໂຄງການ ແລະ ສະມາຄົມສົ່ງເສີມການຜະລິດ ຈຳນວນໜຶ່ງ ໂດຍການຕ້ອນຮັບຢ່າງອົບອຸ່ນ ແລະ ຮ່ວມເຄື່ອນໄຫວເຮັດວຽກ ຂອງທ່ານ ວິໄລວົງ ບຸດດາຄຳ, ເຈົ້າແຂວງໆຈຳປາສັກ ພ້ອມດ້ວຍຄະນະນຳຂອງແຂວງ, ເມືອງ ແລະ ພາກສ່ວນທີ່ກ່ຽວຂ້ອງ.

ການພົບປະໂອ້ລົມ ຕໍ່ການນຳຫຼັກແຫຼ່ງຂອງແຂວງ, ກ່ອນອື່ນ ທ່ານຮອງນາຍົກລັດຖະມົນຕີ ແລະ ຄະນະ ໄດ້ຮັບຟັງການລາຍງານຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ທີ່ພົ້ນເດັ່ນ ໃນໄລຍະ 11 ເດືອນຜ່ານມາ ເຫັນວ່າ: ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດຂະຫຍາຍຕົວ ຕາມທິດທີ່ກຳນົດໄວ້ ໂດຍສາມາດລະດົມທຶນ ເຂົ້າໃນການພັດທະນາເສດຖະກິດ-ສັງຄົມຂອງແຂວງ ໄດ້ລື່ນແຜນ 8,8%, ມູນຄ່າການສົ່ງອອກສິນຄ້າ ປະຕິບັດໄດ້ລື່ນແຜນ 4%, ສາມາດປະຕິບັດໄດ້ເກີນດູນການຄ້າ ປະມານ 88 ລ້ານໂດລາ, ພ້ອມດຽວກັນນັ້ນ ການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍ່ມີທ່າອ່ຽງດີຂຶ້ນກວ່າເກົ່າ ໂດຍສະເພາະ ການເກັບລາຍຮັບເຂົ້າງົບປະມານ, ການອັດການຮົ່ວໄຫຼຂອງງົບປະມານ, ການປະຢັດມັດທະຍັດ ຕ້ານການຟູມເຟືອຍ, ການຜະລິດສິນຄ້າ ເພື່ອຫຼຸດຜ່ອນການນຳເຂົ້າ ແລະ ອື່ນໆ. ​ສຳລັບການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ກໍມີການຫັນປ່ຽນດີຂຶ້ນກວ່າເກົ່າຫຼາຍ.

ຫຼັງຈາກນັ້ນ, ທ່ານ ຮອງນາຍົກລັດຖະມົນຕີ ກໍ່ໄດ້ໃຫ້ກຽດມີຄຳເຫັນໂອ້ລົມ ຕໍ່ການນຳຫຼັກແຫຼ່ງຂອງແຂວງ ໂດຍໄດ້ຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ, ລວມທັງ ສະພາບການພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2022, ການຈັດຕັ້ງປະຕິບັດ 2 ວາລະແຫ່ງຊາດ. ອັນສຳຄັນ, ທ່ານຮອງນາຍົກລັດຖະມົນຕີ ໄດ້ມີຄຳເຫັນເນັ້ນໜັກໃຫ້ການນຳຫຼັກແຫຼ່ງຂອງແຂວງ ສືບຕໍ່ເອົາໃຈໃສ່ປະຕິບັດວຽກງານໃນຕໍ່ໜ້າຕື່ມບາງດ້ານ ເປັນຕົ້ນ ສຸມໃສ່ການຜະລິດ ເພື່ອຄໍ້າປະກັນສະບຽງອາຫານ ໃຫ້ພຽງພໍ ແລະ ກາຍເປັນສິນຄ້າສົ່ງອອກ ໃຫ້ຫຼາຍກວ່າເກົ່າ ເພື່ອຫຼຸດຜ່ອນ ແລະ ດູນດ່ຽງ ການນຳເຂົ້າສິນຄ້າ; ສືບຕໍ່ປະຕິບັດແຜນການ ດ້ານຂະບວນການ ແລະ ເທດສະການຕ່າງໆ ຂອງແຂວງ-ບັນດາເມືອງ ເພື່ອຊຸກຍູ້ສົ່ງເສີມການຜະລິດ, ການບໍລິການ, ການທ່ອງທ່ຽວ, ການຈໍາໜ່າຍສິນຄ້າ ແລະ ການພົວພັນຮ່ວມມື ກັບບັນດາທ້ອງຖິ່ນ ຂອງປະເທດໃກ້ຄຽງ; ສືບຕໍ່ປັບປຸງ ການບໍລິການ ຢູ່ບັນດາດ່ານ ເຂົ້າ-ອອກ ທີ່ເຊື່ອມຕໍ່ກັບບັນດາປະເທດໃກ້ຄຽງ; ສຸມໃສ່ການເກັບລາຍຮັບ ປີ 2022 ໃຫ້ໄດ້ຕາມແຜນ ພ້ອມທັງເອົາໃຈໃສ່ໃນການສ້າງ ແລະ ຈັດຕັ້ງປະຕິບັດແຜນການເກັບລາຍຮັບ ເຂົ້າງົບປະມານແຫ່ງລັດ ໃນປີ 2023 ເພື່ອສູ້ຊົນໃຫ້ແຂວງ ສືບຕໍ່ເປັນແຂວງກຸ້ມຕົນເອງ ທາງດ້ານລາຍຈ່າຍງົບປະມານ; ເອົາໃຈໃສ່ປະເມີນ ແລະ ຈັດລຽງບູລິມະສິດ ໂຄງການທີ່ຈະສືບຕໍ່ ແລະ ລົງທຶນໃໝ່ ຢູ່ພາຍໃນແຂວງ ເພື່ອເຮັດໃຫ້ການປະຕິບັດແຜນລາຍຈ່າຍ ມີປະສິດທິພາບ ແລະ ປະສິດທິຜົນສູງ, ທັງສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາຕົວຈິງ; ສົມທົບກັບກະຊວງທີ່ກ່ຽວຂ້ອງ ໃນການພັດທະນາວຽກງານດ້ານຕ່າງໆ ຢູ່ບາງເຂດບໍລິເວນຊາຍແດນ ໃຫ້ມີຄວາມຄືບໜ້າເປັນກ້າວໆ, ລວມທັງ ການພັດທະນາພື້ນຖານໂຄງລ່າງ ຢູ່ພາຍໃນແຂວງ ທີ່ເປັນໂຄງການໃຫຍ່; ປະເມີນ ແລະ ຄົ້ນຄວ້າພິຈາລະນາ ເພື່ອຢຸດຕິບັນດາໂຄງການລົງທຶນ ທີ່ເຫັນວ່າ ບໍ່ມີປະສິດທິຜົນ ແລ້ວຫັນໄປນຳໃຊ້ພື້ນທີ່ດັ່ງກ່າວ ທຳການຜະລິດ, ການທ່ອງທ່ຽວ ແລະ ການບໍລິການອື່ນໆ ທີ່ຈະເກີດປະໂຫຍດສູງກວ່າ.

ໃນມື້ດຽວກັນ, ທ່ານ ຮອງນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ເດີນທາງໄປຕິດຕາມ ແລະ ຊຸກຍູ້ ການຈັດຕັ້ງປະຕິບັດໂຄງການກໍ່ສ້າງເຂື່ອນໄຟຟ້ານໍ້າພາກ ຂອງບໍລິສັດ ຈະເລີນເຊກອງ ພະລັງງານຈຳກັດ ທີ່ເມືອງປາກຊ່ອງ ພ້ອມທັງ ຢ້ຽມຢາມສະມາຄົມສົ່ງເສີມຊາປາກຊ່ອງ ທີ່ບ້ານຫຼັກ 45, ເມືອງປາກຊ່ອງ ຕື່ມອີກ.

ໃນຕອນບ່າຍວັນທີ 05 ທັນວາ 2022, ທີ່ສໍານັກງານນາຍົກລັດຖະມົນຕີ, ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຟຣັງ ຟາໂຢ, ລັດຖະມົນຕີກະຊວງຮ່ວມມືເພື່ອການພັດທະນາ ແລະ ວຽກງານມະນຸດສະທໍາ ແຫ່ງ ຣາຊະອານາຈັກ ລຸກຊໍາບວກ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມເຮັດວຽກ ຢູ່ສາທາລະນະລັດປະຊາທິປະໄຕປະຊາຊົນລາວ ພາຍໃຕ້ການນໍາພາຂອງ ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກ.

ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ພັນຄໍາ ວິພາວັນ ໄດ້ສະແດງຄວາມຍິນດີຕ້ອນຮັບ ທ່ານ ຟຣັງ ຟາໂຢ ພ້ອມດ້ວຍຄະນະ ຕໍ່ການເດີນທາງມາຢ້ຽມຢາມເຮັດວຽກຢູ່ ສປປ ລາວ ຂອງ ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກ ໃນຄັ້ງນີ້, ເຊິ່ງມີຄວາມໝາຍສໍາຄັນຫຼາຍ ແລະ ມີຂຶ້ນໃນໂອກາດຄົບຮອບ 25 ປີ (25 ກັນຍາ 1997 – 25 ກັນຍາ 2022) ແຫ່ງການສ້າງຕັ້ງສາຍພົວພັນການທູດ ລະຫວ່າງ ສອງປະເທດ ລາວ ແລະ ລຸກຊໍາບວກ. ທ່ານ ນາຍົກລັດຖະມົນຕີ ແຫ່ງ ສປປ ລາວ ໄດ້ຕີລາຄາສູງຕໍ່ການພົວພັນຮ່ວມມືອັນດີ ລະຫວ່າງ ລາວ ແລະ ລຸກຊໍາບວກ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງຕະຫຼອດມາ, ເຊິ່ງນັບຕັ້ງແຕ່ມີການສ້າງຕັ້ງສາຍພົວພັນການທູດນໍາກັນ, ລຸກຊໍາບວກ ໄດ້ກາຍເປັນຄູ່ຮ່ວມມືເພື່ອການພັດທະນາທີ່ສໍາຄັນຂອງ ສປປ ລາວ, ໂດຍໄດ້ໃຫ້ການຊ່ວຍເຫຼືອແກ່ ສປປ ລາວ ຢ່າງຕັ້ງໜ້າ ແລະ ກວມເອົາຫຼາຍຂະແໜງການ ເຊັ່ນ: ການພັດທະນາຊົນນະບົດ, ສາທາລະນະສຸກ, ການສຶກສາ, ການທ່ອງທ່ຽວ, ການເງິນ, ການພັດທະນາໂຄງລ່າງພື້ນຖານ ແລະ ອື່ນໆ ລວມມູນຄ່າ 197 ລ້ານເອີໂຣ, ພ້ອມທັງໄດ້ຕົກລົງສືບຕໍ່ໃຫ້ການຊ່ວຍເຫຼືອພາຍໃຕ້ແຜນການຮ່ວມມືໄລຍະຍາວ ລາວ-ລຸກຊໍາບວກ ຄັ້ງທີ V ສໍາລັບ ສົກປີ 2023-2027 ໃນມູນຄ່າ 95 ລ້ານເອີໂຣ, ໂດຍຈະສຸມໃສ່ ຂະແໜງສາທາລະນະສຸກ, ການສຶກສາ, ການສົ່ງເສີມການສ້າງລັດແຫ່ງກົດໝາຍ, ການຊ່ວຍເຫຼືອໃນການພັດທະນາທ້ອງຖິ່ນ, ການບໍລິການດ້ານການທ່ອງທ່ຽວ ແລະ ອື່ນໆ.

ໃນໂອກາດນີ້, ທ່ານ ນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ກໍຄື ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນເປັນຢ່າງສູງ ມາຍັງລັດຖະບານ ແລະ ປະຊາຊົນ ລຸກຊໍາບວກ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າຕະຫຼອດໄລຍະຜ່ານມາ, ເຊິ່ງເປັນການປະກອບສ່ວນອັນສໍາຄັນ ໃຫ້ແກ່ການສ້າງສາ ແລະ ພັດທະນາປະເທດຊາດ ເພື່ອບັນລຸເປົ້າໝາຍລົບລ້າງຄວາມທຸກຍາກຕາມແຜນທີ່ກໍານົດໄວ້, ພ້ອມທັງຮັບປະກັນໃຫ້ແກ່ການພັດທະນາແບບຍືນຍົງ ແລະ ຍຸດທະສາດເຕີບໃຫຍ່ສີຂຽວ 2030 ຂອງລັດຖະບານ ສປປ ລາວ.

ໃນໂອກາດດຽວກັນ, ທ່ານ ລັດຖະມົນຕີກະຊວງຮ່ວມມືເພື່ອການພັດທະນາ ແລະ ວຽກງານມະນຸດສະທໍາ ແຫ່ງ ລຸກຊໍາບວກ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ສະແດງຄວາມຂອບໃຈຕໍ່ລັດຖະບານ ສປປ ລາວ ທີ່ໄດ້ໃຫ້ການສະໜັບສະໜູນ ລຸກຊໍາບວກ ໃນຂອບຫຼາຍຝ່າຍ ໃນໄລຍະຜ່ານມາ. ພ້ອມນັ້ນ, ທ່ານ ຟຣັງ ຟາໂຢ ກໍໄດ້ສະແດງຄວາມໝາຍໝັ້ນວ່າ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ໃນຂະແຫນງການຕ່າງໆຕື່ມອີກໃນອະນາຄົດ.

ໂດຍຕອບສະໜອງຕາມການເຊື້ອເຊີນ ຂອງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດປະຊາທິປະໄຕປະຊາຊົນລາວ ແລະ ທັງເປັນການສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືສອງຝ່າຍທີ່ເປັນມູນເຊື້ອອັນດີງາມ ລະຫວ່າງສາທາລະນະລັດປະຊາທິປະໄຕປະຊາຊົນລາວ ແລະ ຣາຊະອານາຈັກ ລຸກຊຳບວກ, ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊຳບວກພ້ອມດ້ວຍຄະນະ ໄດ້ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນວັນທີ 5-9 ທັນວາ 2022.

ພິທີຕ້ອນຮັບ ສົມເດັດ ພຣະຣາຊາ ອັງຣີ ພ້ອມດ້ວຍຄະນະ ຢ່າງເປັນທາງການ ໄດ້ຈັດຂຶ້ນຢ່າງສົມກຽດ ຕອນບ່າຍວັນທີ 5 ທັນວາ 2022, ທີ່ ທໍານຽບປະທານປະເທດ ໂດຍການຕ້ອນຮັບຂອງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດປະຊາທິປະໄຕປະຊາຊົນລາວ ພ້ອມດ້ວຍຄະນະ. ຫຼັງຈາກນັ້ນ, ໄດ້ມີການພົບປະສອງຝ່າຍ, ຊຶ່ງ ພະນະທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການເດີນທາງມາຢ້ຽມຢາມເຮັດວຽກ ຢູ່ ສາທາລະນະລັດປະຊາທິປະໄຕປະຊາຊົນລາວ ຂອງ ສົມເດັດ ພຣະຣາຊາ ອັງຣີ ພ້ອມດ້ວຍຄະນະໃນຄັ້ງນີ້, ຖືເປັນຄັ້ງປະຫວັດສາດທີ່ມີຄວາມໝາຍ, ຄວາມສຳຄັນ ແລະ ເປັນນິມິດໝາຍໃໝ່ປະກອບສ່ວນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດກໍຄື ການສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນຂັ້ນສູງຂອງສອງປະເທດ ລາວ-ລຸກຊໍາບວກ ຢ່າງເປັນປົກກະຕິ.

ໃນໂອກາດດັ່ງກ່າວ, ສອງຝ່າຍ ໄດ້ແຈ້ງສະພາບການພັດທະນາເສດຖະກິດ-ສັງຄົມຢູ່ພາຍໃນປະເທດຂອງຕົນໃຫ້ກັນຊາບໂດຍຫຍໍ້, ຕີລາຄາສະພາບການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ. ສອງຝ່າຍໄດ້ຕີລາຄາສູງຕໍ່ການພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ລາວ ແລະ ລຸກຊໍາບວກ, ເຊິ່ງເຫັນວ່າ ເປັນແບບຢ່າງແຫ່ງການພົວພັນທີ່ດີ ໃນການພົວພັນລະຫວ່າງປະເທດນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 25 ກັນຍາ 1997 ເປັນຕົ້ນມາ, ພິເສດ ປີ 2022 ນີ້ ແມ່ນຄົບຮອບ 25 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ ແລະ ລຸກຊໍາບວກ, ເຊິ່ງເປັນຂີດໝາຍອັນສໍາຄັນທາງດ້ານປະຫວັດສາດແຫ່ງການພົວພັນຮ່ວມມື ລະຫວ່າງ ສອງປະເທດ. ພ້ອມກັນນັ້ນ, ສອງຝ່າຍ ໄດ້ເຫັນດີຈະສືບຕໍ່ໃຫ້ມີການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງຂອງສອງປະເທດ ທັງທາງດ້ານການເມືອງ ແລະ ຂະແໜງການຕ່າງໆ ທີ່ມີການຮ່ວມມືກັນ ຢ່າງເປັນປົກກະຕິ, ພ້ອມທັງຈະສືບຕໍ່ສົ່ງເສີມການຮ່ວມມືໃນຂະແໜງການອື່ນໆ ເຊັ່ນ: ຂະແໜງສາທາລະນະສຸກ, ການພັດທະນາຊົນນະບົດ, ການສຶກສາ ແລະ ການພັດທະນາຊັບພະຍາກອນມະນຸດ, ການບໍລິການດ້ານການທ່ອງທ່ຽວ ແລະ ການໂຮງແຮມ, ດ້ານການເງິນ-ທະນາຄານ, ການພັດທະນາພື້ນຖານໂຄງລ່າງຂອງພາກລັດ,ວຽກງານສະຖິຕິ, ການສົ່ງເສີມບົດບາດ ຍິງ-ຊາຍ ແລະ ອື່ນໆ. ນອກຈາກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບ ສະພາບການພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈຮ່ວມກັນ.

ໃນໂອກາດນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ມາຍັງລັດຖະບານ ແລະ ປະຊາຊົນ ລຸກຊໍາບວກ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ ລາວ, ເຊິ່ງການຊ່ວຍເຫຼືອດັ່ງກ່າວ ແມ່ນມີປະສິດທິພາບ ແລະ ປະສິດທິຜົນສູງ ແລະ ປະກອບສ່ວນອັນສໍາຄັນເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 (2021-2025) ກໍຄືການພັດທະນາຊົນນະບົດ ແລະ ການຫຼຸດຜ່ອນຄວາມທຸກຍາກຂອງປະຊາຊົນ ແນໃສ່ເຮັດໃຫ້ ສປປ ລາວ ຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນຊຸມປີຕໍ່ໜ້າ ແລະ ຊ່ວຍໃຫ້ ສປປ ລາວສາມາດບັນລຸເປົ້າໝາຍການພັດທະນາແບບຍືນຍົງ ຂອງ ອົງການ ສະຫະປະຊາຊາດ (ສປຊ) ໃນປີ 2030. ລຸກຊຳບວກຖືວ່າເປັນຄູ່ຮ່ວມມືເພື່ອການພັດທະນາທີ່ສໍາຄັນ ຂອງ ລາວ. ການຮ່ວມມື ລະຫວ່າງ ລາວ ແລະ ລຸກຊຳບວກມີບາດກ້າວດີ, ມີຄວາມຄືບໜ້າ ແລະ ໜັກແໜ້ນ. ການຊ່ວຍເຫຼືອ ຂອງ ລັດຖະບານ ລຸກຊຳບວກ ໃຫ້ແກ່ການພັດທະນາໃນ ສປປ ລາວ ແມ່ນໄດ້ເພີ່ມຂຶ້ນເກືອບເທົ່າຕົວ, ເຊິ່ງນັບແຕ່ມີການກໍານົດແຜນງານຍຸດທະສາດການຮ່ວມມືສອງຝ່າຍນັບແຕ່ປີ 2003 ເປັນຕົ້ນມາ, ມູນຄ່າການຊ່ວຍເຫຼືອທັງໝົດມີປະມານ 197 ລ້ານເອີໂຣ, ສະເພາະແຜນຍຸດທະສາດການຮ່ວມມື V (the 5th Indicative Cooperation Programme)ຫຼື ICP V (2023-2027) ແມ່ນມີມູນຄ່າເພີ່ມຂຶ້ນເຖິງ 95 ລ້ານເອີໂຣ (ລວມມູນຄ່າການຊ່ວຍເຫຼືອທັງໝົດ ນັບແຕ່ ICP I-V ມີປະມານ 292 ລ້ານເອີໂຣ), ໂດຍສຸມໃສ່ຂະແໜງສາທາລະນະສຸກ, ການສຶກສາ, ການສົ່ງເສີມການສ້າງລັດແຫ່ງກົດໝາຍ, ການຊ່ວຍເຫຼືອໃນການພັດທະນາທ້ອງຖິ່ນ, ການບໍລິການດ້ານການທ່ອງທ່ຽວແລະອື່ນໆ. ນອກຈາກນີ້, ທ່ານ ປະທານປະເທດ ຍັງໄດ້ສະແດງຄວາມຂອບໃຈເປັນຢ່າງສູງມາຍັງ ລັດຖະບານ ລຸກຊໍາບວກ ທີ່ໄດ້ໃຫ້ການຊ່ວຍເຫຼືອ ໃນການສ້າງໂຮງຮຽນ ຊ່ວຍເຫຼືອເດັກກຳພ້າ ທີ່ແຂວງສະຫວັນນະເຂດ ຊຶ່ງໂຄງການດັ່ງກ່າວ ໄດ້ປະກອບສ່ວນອັນສຳຄັນ ແລະ ເປັນປະໂຫຍດອັນໃຫຍ່ຫຼວງແກ່ປະຊາຊົນໃນເຂດດັ່ງກ່າວ.

ໃນຂະນະດຽວກັນ, ສົມເດັດ ພຣະຣາຊາ ອັງຣີ ກໍໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນແລະ ສົມກຽດ ໃນຄັ້ງນີ້, ພ້ອມທັງສະແດງຄວາມຂອບໃຈຕໍ່ລັດຖະບານ ແຫ່ງ ສາທາລະນະລັດປະຊາທິປະໄຕປະຊາຊົນລາວ ທີ່ໄດ້ໃຫ້ການສະໜັບສະໜູນ ລຸກຊໍາບວກ ໃນຂອບຫຼາຍຝ່າຍ ໃນໄລຍະຜ່ານມາ ແລະ ໄດ້ສະແດງຄວາມໝາຍໝັ້ນວ່າ ຈະສືບຕໍ່ໃຫ້ການຊ່ວຍເຫຼືອແກ່ລາວ ໃນຂະແໜງການຕ່າງໆ ເພື່ອການພັດທະນາປະເທດ ແລະ ພັດທະນາຊັບພະຍາກອນມະນຸດ ຢູ່ສາທາລະນະລັດປະຊາທິປະໄຕປະຊາຊົນລາວ . ພ້ອມກັນນັ້ນ, ທ່ານ ປະທານປະເທດ ແຫ່ງ ສາທາລະນະລັດປະຊາທິປະໄຕປະຊາຊົນລາວ ກໍໄດ້ຢືນຢັນຢ່າງໜັກແໜ້ນຕື່ມວ່າ ຈະສືບຕໍ່ໃຫ້ການສະໜັບສະໜູນແກ່ລຸກຊໍາບວກໃນເວທີສາກົນ.

ການພົບປະສອງຝ່າຍໃນຄັ້ງນີ້ ໄດ້ດໍາເນີນໄປດ້ວຍບັນຍາກາດອັນສະໜິດສະໜົມ, ອົບອຸ່ນ, ມີຄວາມໝາຍຄວາມສຳຄັນ ແລະ ໄດ້ຮັບຜົນສໍາເລັດຢ່າງຈົບງາມ.

ພາຍຫຼັງສໍາເລັດການພົບປະສອງຝ່າຍ, ພະນະທ່ານ ປະທານປະເທດ ທອງລຸນ ສີສຸລິດ ແລະ ສົມເດັດ ພຣະຣາຊາ ອັງຣີ ກໍໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມສັນຍາຮ່ວມກັນ 4 ສະບັບ ຄື: 1) ສັນຍາຮ່ວມມື ພາຍໃຕ້ໂຄງການສະໜັບສະໜູນຂະແໜງສາທາລະນະສຸກ ລາວ/035, 2) ສັນຍາການປົກຄອງ ແລະ ລະບຽບກົດໝາຍ ພາຍໃຕ້ໂຄງການສະໜັບສະໜູນວຽກງານກົດໝາຍ ແລະ ນິຕິກໍາ ລາວ/037, 3) ສັນຍາການຮ່ວມມືເພື່ອການພັດທະນາສີມືແຮງງານ ແລະ ການຈັດຫາງານ ພາຍໃຕ້ແຜນງານທັກສະສໍາລັບວຽກງານການທ່ອງທ່ຽວ ລາວ/336, ແລະ 4) ສັນຍາການຮ່ວມມືເພື່ອການພັດທະນາທ້ອງຖິ່ນ ພາຍໃຕ້ແຜນງານພັດທະນາທ້ອງຖິ່ນໃນແຂວງເປົ້າໝາຍ ລາວ/338.

ໃນຕອນຄໍ່າຂອງວັນດຽວກັນ,ທີ່ ທໍານຽບປະທານປະເທດ, ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງສາທາລະນະລັດປະຊາທິປະໄຕປະຊາຊົນລາວ ໄດ້ຈັດງານລ້ຽງຕ້ອນຮັບ ເພື່ອເປັນກຽດໃຫ້ແກ່ ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊຳບວກ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມເຮັດວຽກ ຢູ່ສາທາລະນະລັດປະຊາທິປະໄຕປະຊາຊົນລາວ ໃນຄັ້ງນີ້.

ການຊ້ອມຮົບຮ່ວມລາວ-ຣັດເຊຍ “ລາໂຣສ໌ 2022” ພາຍໃຕ້ຄໍາຂັວນ “ຄຽງບ່າ, ຄຽງໄຫຼ່ກັນຕໍ່ສູ້ເພື່ອສັນຕິພາບ ແລະ ຄວາມໝັ້ນຄົງ”,ທີ່ດໍາເນີນມາແຕ່ວັນທີ 25 ພະຈິກ ເປັນຕົ້ນມາ, ຮອດຕອນແລງວັນທີ 4 ທັນວາ 2022 ນີ້ ໄດ້ຈັດພິທີປິດຢ່າງເປັນທາງການ. ໂດຍເປັນກຽດເຂົ້າຮ່ວມໃນພິທີປິດການຊ້ອມຮົບຮ່ວມຄັ້ງນີ້ ມີ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງສປປ ລາວ, ມີສະຫາຍ ວະລາດີເມຍ ກາລີນິນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະພັນຣັດເຊຍ ປະຈຳລາວ, ມີສະຫາຍ ພົນຈັດຕະວາ ວາລາດີເມຍ ກູລີກົບ ຮອງຜູ້ບັນຊາການແມ່ທັບ 11 ທະຫານເຂດ-ຕາເວັນອອກກອງທັບສະຫະພັນຣັດເຊຍ, ມີຫົວໜ້າ ຄະນະຊີ້ນໍາຊ້ອມຮົບ, ມີຄະນະຮັບ ຜິດຊອບຊີ້ນຳຝ່າຍລາວ-ຣັດເຊຍ, ພ້ອມດ້ວຍນາຍ ແລະ ພົນທະຫານກອງທັບປະຊາຊົນລາວ ແລະ ກອງທັບ ສ.ລັດເຊຍເຂົ້າຮ່ວມ.

ໃນໂອກາດນີ້ ສະຫາຍ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ຫົວໜ້າຄະນະຊີ້ນຳການຊ້ອມຮົບຮ່ວມ ລາວ-ລັດເຊຍ “ລາໂຣສ໌ 2022” ໄດ້ກ່າວວ່າ: ການເຄື່ອນ ໄຫວຊ້ອມຮົບຮ່ວມ ລາວ-ຣັດເຊຍ “ລາໂຣສ໌ 2022” ທີ່ສອງກອງທັບລາວ-ຣັດ ເຊຍ ໄດ້ພ້ອມກັນປະຕິບັດມານີ້, ເປັນບັ້ນຖອດຖອນບົດຮຽນອັນໜຶ່ງ ສ້າງປະສົບ ການໃນການສູ້ຮົບໃຫ້ແກ່ນາຍແລະພົນທະຫານກອງທັບປະຊາຊົນລາວໃຫ້ສູງຂຶ້ນ, ເປັນຕົ້ນ ແມ່ນບົດຮຽນທາງດ້ານເຕັກນິກ, ວິຊາການຄວາມຮູ້ດ້ານສິນລະປະຍຸດ-ຍຸດທະວິທີການສູ້ຮົບແບບໃຫມ່ ທີ່ມີການປັບປຸງຮູບແບບທີ່ປະສົມປະ ສານ, ເຫມາະສົມກັບລັກສະນະຈຸດພິເສດພື້ນທີ່ພູມີປະເທດຕົວຈິງຂອງ ສປປ ລາວ, ນັບທັງລະບຽບ ຫຼັກການເຮັດວຽກຂອງຜູ້ບັນຊາໃນການຈັດຕັ້ງປະຕິບັດໃນການບັນຊາສູ້ຮົບ, ວຽກງານກະກຽມກໍາລັງ ແລະ ການນໍາໃຊ້ກໍາລັງສູ້ຮົບ ຂອງເຫຼົ່າຮົບລົດຕັງ-ຍານເກາະ ເຂົ້າໃນການເຄື່ອນໄຫວ ປະຕິບັດຫນ້າທີ່ຢູ່ເທິງພູມີປະເທດຕົວຈິງ ດ້ວຍຫຼາຍຂະຫນາດ, ຫຼາຍລະດັບທີ່ແຕກຕ່າງກັນ ແລະ ທັງເປັນການອົບຮົມ-ຫັດແອບໃຫ້ນາຍ ແລະ ພົນທະຫານກອງທັບປະຊາຊົນລາວຮຽນຮູ້ການນໍາໃຊ້ພາຫະນະອາວຸດ ຍຸດໂທ ປະກອນທີ່ທັນສະໄໝ ເຂົ້າໃນການສູ້ຮົບຢ່າງຄ່ອງແຄ້ວຊໍານິຊໍານານ.

ກຽມພ້ອມເຮັດສໍາເລັດຫນ້າທີ່ໃນການປົກປັກຮັກສາປະເທດຊາດ, ເປັນການຍົກສູງຖານະບົດບາດ ແລະ ຄວາມເຂັ້ມແຂງ ໃຫ້ແກ່ກອງທັບປະຊາຊົນລາວ ສາມາດປົກປັກຮັກສາເອກະລາດ ອໍານາດອະທິປະໄຕແລະຜືນແຜ່ນດີນອັນຄົບຖ້ວນຂອງຊາດລາວໄວ້ໃຫ້ຫມັ້ນຄົງ. ນອກຈາກນັ້ນ, ຜົນສໍາເລັດ “ລາໂຣສ໌ 2022” ໄດ້ເສີມສ້າງມູນເຊື້ອຄວາມສໍາພັນໄມຕີຈິດ ມິດຕະພາບລະຫວ່າງ ລາວ-ຣັດເຊຍທີ່ມີມາແຕ່ດົນນານແລ້ວນັ້ນໃຫ້ຈະເລີນງອກງາມຢູ່ເລື້ອຍໆ.ສ້າງມິດໄມຕີແຫ່ງຄວາມຜູກພັນທີ່ສະໜິດແໜ້ນ ລະຫວ່າງ ນາຍ ແລະ ພົນທະຫານ ຂອງສອງກອງທັບລາວ- ລັດເຊຍ ໃຫ້ແໜ້ນແຟ້ນສວຍສົດງົດງາມງົດງາມ ບໍ່ອາດຈະຫຼົງລືມໄດ້ແລະຍືນຍົງຢູ່ຄູ່ສາຍໃຈຂອງປະຊາຊົນສອງຊາດລາວ- ລັດເຊຍ ຕະລອດໄປ.

ສະຫາຍ ພົນຈັດຕະວາ ວາລາດີເມຍ ກູລີກົບ ໄດ້ຕາໜ້າໃຫ້ນາຍແລະພົນທະຫານສະຫະພັນຣັດເຊຍທີ່ມາຮ່ວມການຊ້ອມຮົບຄັງນີ້ ກໍ່ໄດ້ກ່າວຕື່ມວ່າ: ການຊ້ອມຮົບຮ່ວມ ຣັດເຊຍ-ລາວ “ລາໂຣສ໌ 2022” ຄັ້ງນີ້ ສອງກອງທັບໄດ້ພ້ອມກັນຄົ້ນຄວ້າ ແລະ ສ້າງຄວາມຕັດສິນໃຈຮ່ວມກັນ ເຊິ່ງສາມາດຮັບປະກັນ ໃນການບັນລຸເປົ້າ ໝາຍຂອງການຊ້ອມຮົບຢ່າງມີຜົນສຳເລັດ ແລະ ຍັງໄດ້ຮ່ວມກັນຖອດຖອນບົດຮຽນໃນການນຳໃຊ້ພາຫະນະເຕັກນິກທີ່ທັນ ສະໄໝ, ການສູ້ຮົບຂັ້ນຍຸດທະວິທີ, ເຊິ່ງຜົນສໍາເລັດຄັ້ງນີ້ ເປັນການຢັ້ງຢືນໃຫ້ເຫັນເຖິງຄວາມກ້າວໜ້າຂອງການພົວພັນຮ່ວມມືລະຫວ່າງສອງກອງທັບຣັດ ເຊຍ-ລາວໃນຂົງເຂດວຽກງານປ້ອງກັນຊາດ ແລະ ຄວາມໝັ້ນຄົງ ໃຫ້ນັບມື້ນັບເພີ່ມທະວີຄວາມສຳພັນກັນຢ່າງໜັກແໜ້ນ ແລະ ກ້າວຂື້ນຢ່າງບໍ່ຢຸດຢັ້ງ. ຈາກຜົນສໍາເລັດໃນການຊ້ອມຮົບຮ່ວມລາວ-ຣັດເຊຍໃນຄັ້ງນີ້ ກະຊວງປ້ອງກັນປະເທດ ແຫ່ງ ສປປ ລາວຈິ່ງໄດ້ປະດັບຫຼຽນກາມິດຕະພາບກອງທັບປະຊາຊົນລາວ ໃຫ້ຄະນະຊ່ຽວຊານຣັດເຊຍ ຈຳນວນ 194 ສະຫາຍ ເຊິ່ງໃຫ້ກຽດປະດັບໂດຍ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ທັງເປັນຫົວໜ້າຄະນະຊີ້ນຳການຊ້ອມຮົບຮ່ວມ ລາວ-ລັດເຊຍ “ລາໂຣສ໌ 2022”.ຢ່າງສົມກຽດ.

ສ່ວນຝ່າຍຣັດເຊຍ ກໍ່ໄດ້ປະດັບຫຼຽນກາມິດຕະພາບການທະຫານຂອງກະຊວງປ້ອງກັນປະເທດ ແຫ່ງ ສ.ຣັດ ເຊຍ ໃຫ້ແກ່ນາຍ ແລະ ພົນທະຫານກອງທັບປະຊາຊົນລາວ ຈຳນວນ 21 ສະຫາຍ, ໂດຍການປະດັບຂອງສະຫາຍ ພົນຈັດຕະວາ ວາລາດີເມຍ ກູລີກົບ ຮອງຜູ້ບັນຊາການແມ່ທັບ 11 ທະຫານເຂດ-ຕາເວັນອອກ ກອງທັບສະຫະພັນຣັດເຊຍ, ຫົວໜ້າຄະນະຊີ້ນໍາຊ້ອມຮົບຝ່າຍຣັດເຊຍ ຢ່າງສົມກຽດ ເຊັ່ນດຽວກັນ.

ໂດຍ: ຮອ. ອາຫວຸ້ນ

ວັນທີ 6 ທັນວາ 2022, ສະມາຊິກສະພາແຫ່ງຊາດຈາກແຕ່ລະເຂດ ສືບຕໍ່ປະກອບຄໍາຄິດຄໍາເຫັນຕໍ່ບົດລາຍງານຂອງລັດຖະບານຢູ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ 9 ເຊີ່ງກອງປະຊຸມພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດ.

ການປະກອບຄໍາຄິດຄຳເຫັນມີຄວາມຄຶກຄື້ນສົມຄວນ ເນື່ອງຈາກສະມາຊິກສະພາແຫ່ງຊາດ ໄດ້ຜັດປ່ຽນກັນຂຶ້ນສະເໜີຫລາຍບັນຫາສໍາຄັນ ເພື່ອໃຫ້ລັດຖະບານເລັ່ງແກ້ໄຂເພາະເຫັນວ່າໄລຍະຜ່ານມາຈັດຕັ້ງປະຕິບັດບໍ່ທັນໄດ້ດີເທົ່່າທີ່ຄວນ ເປັນຕົ້ນ: ການອອກໃບຕາດິນ, ບັນຫາຄູເຫລືອບໍ່ພໍ, ການຍົກຍ້າຍຂອງປະຊາຊົນບໍ່ຖືກຕ້ອງຕາມລະບຽບການ, ການປັບປງບັນດາເສັ້ນທາງຂອງແຕ່ລະແຂວງ, ການແກ້ໄຂຄວາມທຸກຍາກຂອງະຊາຊົນ, ການຊຸກຍູ້ສົ່ງເສີມການຜະລິດພາຍໃນ ແລະ ອື່ນໆ.

ທ່ານ ສົມຈິດ ຫັບລາກອນ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 2 ແຂວງຜົ້ງສາລີ ປະກອບຄໍາເຫັນສະເໜີໃຫ້ລັດຖະບານເອົາໃຈໃສ່ແກ້ໄຂບັນຫາການອອກໃບຕາດິນ, ລັດຖະບານຄວນັບປປຸງດ້ານບຸກຄະລາກອນ ແລະ ເຄື່ອງມືອຸະກອນທີ່ຈໍາເປັນໃຫ້ຫລາຍຂຶ້ນ ແລະ ມີະສິດທິຜົນກວ່າເກົ່າ ເພື່ອເຮັດໃຫ້ການຈັດເກັບລາຍຮັບໃນດ້ານນີ້ໃຫ້ດີຂຶ້ນກວ່າເກົ່າ.

ທ່ານ ສາຍທອງ ໄຊຍະວົງ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 15 ແຂວງຈໍາາສັກ ສະເໜີໃຫ້ລັດຖະ ບານເອົາໃຈໃສ່ແກ້ໄຂບັນຫາການສຶກສາຢູ່ເຂດທີ່ມີຄວາມຫຍຸ້ງຍາກ ໂດຍສະເພາະຢູ່ເມືອງໂຂງ ມີການໂຮງນັກຮຽນໄຮຽນຢູ່ບາງຈຸດຍ້ອນມີບັນຫາເລື່ອງຄູ ເຮັດໃຫ້ສ້າງຄວາມຫຍຸ້ງຍາກຫລາຍສໍາລັບນັກຮຽນໃນການໄຮຽນໜັງສືໃນແຕ່ລະວັນ.

ທ່ານ ຄໍາຟອງ ອິນມານີ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 3 ແຂວງຫລວງນໍ້າທາ ປະກອບຄໍາເຫັນ ໂດຍສະແດງຄວາມເຫັນດີນໍາລັດຖະບານທີ່ວາງຄາດໝາຍເຮັດໃຫ້ເສດຖະກິດຂອງະເທດຂະຫຍາຍຕົວ 4,5 ສ່ວນ ຮ້ອຍໃນປີໜ້າ ເພາະເໝາະສົມກັບຄວາມເປັນຈິງ ແຕ່ສໍາຄັນທີ່ສຸດ ຕ້ອງມີມາດຕະການຈັດຕັ້ງປະຕິບັດທີ່ດີທີ່ສຸດ.

ຕາມວາລະດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 9, ການປະກອບຄໍາຄິດຄໍາເຫັນຂອງສະມາຊິກສະພາແຫ່ງຊາດ ແມ່ນຈະສໍາເລັດໃນຕອນບ່າຍວັນທີ 6 ທັນວານີ້, ກ່ອນຈະຮັບຟັງການອະທິ ບາຍຊີ້ແຈງຈາກບັນດາຜູ້ຕາງໜ້າກະຊວງທີ່ກ່ຽວຂ້ອງໃນວັນທີ 7 ທັນວານີ້.

ຂ່າວ: BT

ພາບ: ພັກສະຫວັນ