ໃນລະຫວ່າງວັນທີ 26-29 ກໍລະກົດ 2022 ທີ່ ເມືອງແປກ, ແຂວງຊຽງຂວາງ ໄດ້ຈັດກອງປະຊຸມ ຄັ້ງທີ II ລະຫວ່າງ ຄະນະວິຊາການປະສົມຊາຍແດນ ລາວ-ຫວຽດນາມ ເຊິ່ງຝ່າຍລາວນຳໂດຍທ່ານ ອານຸສິນ ຂັດຕິຍະລາດ ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ ສປປ ລາວ ແລະ ຝ່າຍຫວຽດນາມ ນຳໂດຍທ່ານ ຫງ້ວຽນ ແອ໋ງ ຢຸ້ງ ຮອງປະທານຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ສສ ຫວຽດນາມ. ເຂົ້າຮ່ວມກອງປະຊຸມຄັ້ງນີ້ຍັງມີຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ຂອງສອງປະເທດ ແລະ ແຂວງຊຽງຂວາງ.

ກອງປະຊຸມ ໄດ້ສັງເກດຕີລາຄາຄືນຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຊາຍແດນໃນໄລຍະ 6 ເດືອນ ຕົ້ນປີ 2022 ໂດຍສະເພາະແມ່ນ ການຮ່ວມກັນລົງສໍາຫລວດກວດກາ ແລະ ບູລະນະບັນດາຫລັກໝາຍຊາຍແດນທີ່ເປ່ເພ, ການເຊາະເຈື່ອນຂອງຕາຝັ່ງ, ການເປີດ ແລະ ຍົກລະ ດັບດ່ານຊາຍແດນ ລາວ-ຫວຽດນາມ, ການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ແຕ່ງງານບໍ່ຖືກລະບຽບຕາມບໍລິເວນຊາຍແດນຂອງສອງປະເທດ ເຊິ່ງເຫັນວ່າ ການປະຕິບັດວຽກງານ ໄດ້ຮັບໝາກຜົນມີປະສິດທິພາບດີສົມຄວນ; ສອງຝ່າຍ ໄດ້ເຮັດໜ້າທີ່ຢ່າງຕັ້ງໜ້າ ແລະ ມີຄວາມຮັບຜິດຊອບສູງ, ເຮັດໃຫ້ບໍລິເວນຊາຍແດນມີຄວາມສະຫງົບ ແລະ ເປັນລະບຽບຮຽບຮ້ອຍດີໂດຍພື້ນຖານ. ເຈົ້າໜ້າທີ່ຊາຍແດນນັບແຕ່ສູນກາງຫາທ້ອງຖິ່ນ ໄດ້ເປັນເຈົ້າການປະກອບສ່ວນຢ່າງຕັ້ງໜ້າ ແລະ ເປັນຜົນງານອັນໃຫຍ່ຫລວງເຂົ້າ ໃນການສະເຫລີມສະຫລອງປີແຫ່ງສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ, ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ(1962-2022), ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ(1977-2022).

ພ້ອມດຽວກັນນີ້, ຄະນະວິຊາການທັງສອງຝ່າຍ ກໍໄດ້ຮ່ວມກັນປຶກສາຫາລື ວາງທິດທາງແຜນການຮ່ວມມືການຈັດຕັ້ງປະຕິບັດວຽກງານຊາຍແດນໃນ 6 ເດືອນທ້າຍປີ 2022 ໂດຍສືບຕໍ່ລົງສໍາຫລວດ ແລະ ບູລະນະສ້ອມແປງຫລັກໝາຍຊາຍແດນທີ່ເປ່ເພ ໃຫ້ຄືນສູ່ສະພາບເດີມ, ນໍາສະເໜີລັດຖະບານທັງສອງປະ ເທດພິຈາລະນາຍົກລະດັບດ່ານຊາຍແດນ, ສົ່ງເສີມການຮ່ວມມືພັດທະນາເສດຖະກິດ ຂອງສອງຝ່າຍໃນບໍລິເວນຊາຍແດນ. ນອກຈາກນັ້ນ, ກໍຍັງໄດ້ປຶກສາຫາລືກ່ຽວກັບແຜນການກະກຽມ ກອງປະຊຸມເຜີຍແຜ່ນິຕິກໍາທີ່ສໍາຄັນເປັນຕົ້ນແມ່ນ ສັນຍາວ່າດ້ວຍລະບຽບການຄຸ້ມຄອງຊາຍແດນ ແລະ ດ່ານຊາຍແດນ 2016 ລະຫວ່າງ ສປປ ລາວ ແລະ ສສ ຫວຽດນາມ, ອານຸສັນຍາ ວ່າດ້ວຍເສັ້ນຊາຍແດນ ແລະ ຫລັກໝາຍຊາຍແດນປະເທດ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ບັນດາເຖົ້າແກ່ແນວໂຮມ, ນາຍ ບ້ານ ແລະ ປະຊາຊົນລຽບຊາຍແດນສອງຟາກ ລາວ-ຫວຽດນາມ ໃຫ້ຮັບຮູ້ຈະແຈ້ງ ແລະ ເຂົ້າໃຈຢ່າງເລິກເຊິ່ງ ກ່ຽວກັບວຽກງານຊາຍແດນ, ນະໂຍບາຍຂອງພັກ, ກົດໝາຍຂອງລັດ ເຊິ່ງກອງປະຊຸມດັ່ງກ່າວຄາດວ່າຈະໄດ້ຈັດຂຶ້ນໃນ ເດືອນຕຸລາ ປີ 2022, ທີ່ ແຂວງເຫງະອານ, ສສ ຫວຽດນາມ.

ກອງປະຊຸມ ຄັ້ງນີ້ໄດ້ຈັດຂຶ້ນ ໃນທ່າມກາງບັນຍາກາດອັນສະຫງ່າລາສີ ແຫ່ງສາຍພົວພັນມິດຕະ ພາບ, ຄວາມສາມາຄີແບບພິເສດ, ຖານເພື່ອນມິດສະຫາຍອ້າຍນ້ອງ ແລະ ການຮ່ວມມືຮອບດ້ານ ລະ ຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ນັບມື້ໄດ້ຮັບການເພີ່ມພູນຄູນສ້າງ ພ້ອມທັງຂະຫຍາຍຕົວເຂົ້າສູ່ລວງເລິກ ແລະ ລວງກ້ວາງຢ່າງບໍ່ຢຸດຢັ້ງ.

ໃນວັນທີ 01 ສິງຫາ 2022 ນີ້ ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມວຽກງານ ການປະເມີນຄວາມພ້ອມໃນການຫັນເປັນດິຈິຕອນ (DMA) ແລະ ສໍາຫຼວດເກັບກໍາຂໍ້ມູນເພື່ອຮ່າງແຜນພັດທະນາ Roadmap, ຂຶ້ນທີ່ ຫ້ອງປະຊຸມຂອງຫ້ອງວ່າການ ແຂວງໄຊສົມບູນ ໂດຍການເຂົ້າຮ່ວມເປັນປະທານ ຂອງທ່ານ ສຸກສະຫວາດ ວົງພູມເຫຼັກ ຮອງເຈົ້າແຂວງໄຊສົມບູນ, ມີທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ ກະຊວງເຕັກໂນໂລຊິ ແລະ ການສື່ສານ, ມີທ່ານ ພູແກ້ວ ອິນທະວົງ ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງໄຊສົມບູນ ພ້ອມດ້ວຍຕາງໜ້າພະແນກ ເຕັກໂນໂລຊີ ແລະ ການສື່ສານ 6 ແຂວງພາກກາງ (ນະຄອນຫຼວງວຽງຈັນ, ແຂວງວຽງຈັນ, ແຂວງໄຊສົມບູນ, ແຂວງບໍລິຄຳໄຊ, ແຂວງຊຽງຂວາງ ແລະ ແຂວງຫົວພັນ ) ຕະຫຼອດຮອດຄະນະຈາກສູນບໍລິຫານລັດດິຈິຕອນ ແລະ ຄະນະຈາກ ໂຄງການພັດທະນາສະຫະປະຊາຊາດ ( UNDP ) ລວມທັງໝົດ 100 ກວ່າທ່ານ ເຂົ້າຮ່ວມ.

ໃນກອງປະຊຸມຄັ້ງນີ້ທ່ານ ປອ ທະວີສັກ ມະໂນທັມ ໄດ້ເຜີຍແຜ່ຜົນການປະເມີນຄວາມພ້ອມໃນການຫັນເປັນດິຈິຕອນ (Digital Maturity Assessment (DMA)) ທີ່ໄດ້ສຶກສາຮ່ວມກັບຊ່ຽວຊານ ແລະ ສຳຫຼວດເກັບກຳຂໍ້ມູນ ເພື່ອຮ່າງແຜນພັດທະນາ ລັດຖະບານດິຈິຕອນ (Digital Government Master Plan) ພາຍໃຕ້ໂຄງການຮ່ວມມືກັບ UNDP ເພື່ອສົ່ງເສີມການຫັນເປັນດິຈິຕອນ ຂອງພາກລັດ (Digital Government Transformation) ພ້ອມດຽວກັນນີ້ ໃນກອງປະຊຸມ ຍັງໄດ້ຮັບຟັງ ສະພາບລວມ ຂອງໂຄງການ, ການປະເມີນຄວາມພ້ອມໃນການຫັນເປັນດິຈິຕອນ ແລະ ຜົນຂອງການປະເມີນຄວາມພ້ອມໃນການຫັນເປັນດິຈິຕອນ (DMA) ພ້ອມທັງໄດ້ຮັບຮູ້ ຮ່າງແຜນພັດທະນາ Roadmap ແລະ ສໍາພາດເກັບກໍາຂໍ້ມູນ ເພື່ອປະກອບໃສ່ ຮ່າງແຜນພັດທະນາ Roadmap ຊຶ່ງຈຸດປະສົງຂອງກອງປະຊຸມໃນຄັ້ງນີ້ ເພື່ອວິເຄາະຍຸດທະສາດກ່ຽວກັບຄວາມພ້ອມທາງດ້ານດິຈິຕອນ ຂອງບັນດາລະບົບ ການບໍລິການ ແລະ ຄວາມສາມາດດ້ານດິຈິຕອນໃນການບັນລຸວາລະ ການຫັນເປັນດິຈິຕອນ ຂອງລັດຖະບານແຫ່ງ ສປປ ລາວ ເພື່ອອຳນວຍຄວາມສະດວກໃຫ້ແກ່ການສ້າງ ແລະ ຈັດຕັ້ງປະຕິບັດຍຸດທະສາດການຫັນເປັນດິຈິຕອນຂອງລັດຖະບານ ສາມາດເຂົ້າໃຈກ່ຽວກັບຄວາມສາມາດຂອງດິຈິຕອນ ໃນຂົງເຂດຈຸດສຸມເພື່ອການປັບປຸງແນວທາງການຫັນເປັນດິຈິຕອນ ຈາກນັ້ນໃນກອງປະຊຸມ ກໍ່ໄດ້ມີການແລກປ່ຽນ ຄຳຄິດ-ຄໍາເຫັນກັນຢ່າງກົງໄປກົງມາ ຈາກຜູ້ເຂົ້າຮ່ວມທັງໝົດ ຕໍ່ວຽກງານ ການປະເມີນຄວາມພ້ອມ ໃນການຫັນເປັນດິຈິຕອນ (Digital Maturity Assessment (DMA)) ແລະ ສຳຫຼວດເກັບກຳຂໍ້ມູນ ເພື່ອຮ່າງແຜນພັດທະນາ ລັດຖະບານດິຈິຕອນ (Digital Government Master Plan).

ໃນຕອນທ້າຍ ກອງປະຊຸມ ທ່ານ ສຸກສະຫວາດ ວົງພູມເຫຼັກ ກໍ່ໄດ້ປະກອບຄຳຄິດ-ຄຳເຫັນຕໍ່ກອງປະຊຸມ ໂດຍທ່ານໄດ້ເນັ້ນໜັກຄວາມສຳຄັນຂອງການຫັນເປັນດິຈິຕອນ ເພື່ອຫຼຸດຜ່ອນຄວາມແຕກໂຕນ ຂອງຕົວເມືອງ ແລະ ຊົນນະບົດ ເນັ້ນໃຫ້ທຸກພາກສ່ວນ ຕ້ອງເອົາໃຈໃສ່ ພັດທະນາບຸກຄະລາກອນລັດ ໃຫ້ສາມາດນຳໃຊ້ລະບົບບໍລິຫານ ແລະ ບໍລິການລັດ ໃຫ້ເກີດຜົນປະໂຫຍດສູງສຸດ ຊຶ່ງກອງປະຊຸມດັ່ງກ່າວໄດ້ດຳເນີນເປັນເວລາ 2 ວັນ ໂດຍເລີ່ມແຕ່ວັນທີ 1-2 ສິງຫາ 2022 ຈຶ່ງຈະສຳເລັດ

ປະທານກຸ່ມບໍລິສັດ ອິນໂດຈິນ ພ້ອມດ້ວຍຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງໄຊສົມບູນ
ກຸ່ມບໍລິສັດອິນໂດຈິນ ນະຄອນໂຮຈີ່ມິນ ສສ ຫວຽດນາມ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງໄຊສົມບູນ ໃນວັນທີ 31 ກໍລະກົດນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການຕ້ອນຮັບຂອງ ທ່ານ ພອຍຄຳ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ, ມີທ່ານ ນາງ ພິມພາ ແກ້ວມີໄຊ ສະຖານກົງສູນໃຫຍ່ແຫ່ງ ສປປລາວ ປະຈຳນະຄອນໂຮ່ຈີມິ່ນ ສສ ຫວຽດນາມ, ມີຮອງເລຂາພັກແຂວງ, ຮອງເຈົ້າແຂວງ ແລະ ທ່ານ ເຮືອທິບິກທູ ປະທານກຸ່ມບໍລິສັດ ອິນໂດຈິນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ພອຍຄຳ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ໄດ້ລາຍງານສະພາບໂດຍຫຍໍ້ຂອງແຂວງ ໃຫ້ປະທານບໍລິສັດ ອິນໂດຈິນ ພ້ອມດ້ວຍຄະນະໄດ້ຮັບຊາບ ແຂວງໄຊສົມບູນ ເປັນແຂວງຕັ້ງໃໝ່ ໄດ້ 8 ປີກວ່າ, ມີເນື້ອທີ່ທັງໝົດ ປະມານ 8.500 ກິໂລຕາແມັດ, ປະກອບມີ 5 ເມືອງ, ມີ 89 ບ້ານ, ມີປະຊາກອນທັງໝົດ 98.000 ກວ່າຄົນ, ເປັນເຂດທຸລະກັນດານ, ປະຊາຊົນສ່ວນຫຼາຍຍັງທຸກຍາກ ແຕ່ເປັນເຂດທີ່ມີດິນຟ້າອາກາດດີ ເໝາະແກ່ການພັດທະນາດ້ານກະສິກໍາ ໂດຍສະເພາະແມ່ນການປູກຝັງລ້ຽງສັດ ມາຮອດປີ 2019 ລັດຖະບານໄດ້ອອກດຳລັດ 414 ວ່າດ້ວຍນະໂຍບາຍການພັດທະນາເສດຖະກິດ ແຂວງໄຊສົມບູນ ໂດຍສຸມໃສ່ 5 ທ່າແຮງຂອງແຂວງ ຄື: ດ້ານກະສິກໍາ, ການທ່ອງ ທ່ຽວ, ບໍ່ແຮ່, ໄຟຟ້າ ແລະ ການເຊື່ອມຈອດ-ເຊື່ອມໂຍງ ພ້ອມກັນນີ້ ຍັງໄດ້ສຸມໃສ່ຍູ້ແຮງຂະບວນການຜະລິດເປັນສິນຄ້າຂອງປະຊາຊົນ ເປັນຕົ້ນແມ່ນການປູກຝັງ-ລ້ຽງສັດ ອັນພົນເດັ່ນແມ່ນສົ່ງເສີມຂະບວນການປູກພືດເປັນສິນຄ້າໃຫ້ກວ້າງຂວາງ ເຊັ່ນ: ຂະບວນການປູກຢ່າງພາລາ, ປູກພືດຜັກສະອາດ, ປູກເຂົ້າ, ສາລີ, ໝາກກ້ຽງ, ໝາກນັດ, ມັນສາຄູ, ມັນຕົ້ນ, ຊາ, ກາເຟ ແລະ ອື່ນໆ ຊຶ່ງທົ່ວແຂວງມີເນື້ອທີ່ປູກຝັງທັງໝົດ 4.800 ເຮັກຕາ, ປູກພືດໄປແລ້ວ 3.300 ເຮັກຕາ, ຍັງບໍ່ທັນປູກ 1.500 ເຮັກຕາ ມາຮອດປັດຈຸບັນໄດ້ມີບັນດາບໍລິສັດ ສະເໜີມາລົງທຶນ ພັດທະນາດ້ານກະສິກໍາ ທັງໝົດ 7 ບໍລິສັດ ສຳລັບດ້ານການລົງທຶນ ເພື່ອພັດທະນາ ໄດ້ຮັບອະນຸມັດໂຄງການລົງທຶນຂອງເອກະຊົນພາຍໃນ ແລະ ຕ່າງປະເທດ ທັງໝົດ 98 ໂຄງການ ໃນນີ້ ສູນກາງອະນຸມັດ 34 ໂຄງການ ຄື: ດ້ານພະລັງງານໄຟຟ້າ 13 ໂຄງການ, ດ້ານບໍ່ແຮ່ 18 ໂຄງການ, ໂຄງການສຳຫຼວດ ແລະ ກໍ່ສ້າງເສັ້ນທາງ 3 ໂຄງການ, ຂັ້ນແຂວງອະນຸຍາດ 64 ໂຄງການ ຄື: ດ້ານກະສະກຳ ແລະ ປ່າໄມ້ 8 ໂຄງການ, ດ້ານບໍລິການ ແລະ ທ່ອງທ່ຽວ 7 ໂຄງການ, ດ້ານພະລັງງານໄຟຟ້າ 13 ໂຄງການ, ໂຄງການຂຸດຄົ້ນ ແລະ ປຸ່ງແຕ່ງແຮ່ທາດ 6 ໂຄງການ, ໂຄງການຊອກຄົ້ນ-ສຳຫຼວດ ແຮ່ທາດ 30 ໂຄງການ.

ຈາກນັ້ນ ທ່ານ ເຮືອທິບິກທູ ປະທານກຸ່ມບໍລິສັດ ອິນໂດຈິນ ໄດ້ລາຍງານຈຸດປະສົງ ກ່ຽວກັບການມາຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນໃນຄັ້ງນີ້ ເພືື່ອເກັບກຳຂໍ້ມູນ ແລະ ທິດທາງແຜນການໃນການພັດທະນາທາງດ້ານການກະເສດ ກໍຄືການປູກພືດຂອງແຂວງ ເນື່ອງ ຈາກວ່າແຂວງໄຊສົມບູນ ມີທ່າແຮງທາງດ້ານພູມສັນຖານ ທຳມະຊາດ ທີ່ອຳນວຍຄວາມສະດວກໃນການປູກພືດ ເພື່ອຈະໄດ້ນຳໄປປຶກສາຫາລື ແລະ ຂົນຂວາຍບັນດາບໍລິສັດທີ່ຢູ່ໃນເຄືອຄ່າຍ ກຸ່ມບໍລິສັດ ອິນໂດຈິນ ມາພັດທະນາລົງທຶນ ຢູ່ແຂວງໄຊສົມບູນ ເປັນຕົ້ນ ແມ່ນການປູກພືດເປັນຢາ ນອກຈາກນີ້ ທາງບໍລິສັດຍັງຈະຕອບສະໜອງທາງດ້ານເມັດພືດ ສາລີ ແລະ ໝາກຖົ່ວເຫຼືອງ ໃຫ້ແກ່ປະຊົນປູກ ເພື່ອນຳເອົາມາຜະລິດເປັນຫົວອາຫານສັດ ແລ້ວສົ່ງຂາຍອອກຕ່າງປະເທດ ພາຍຫຼັງປະຊາຊົນປູກແລ້ວ ທາງບໍລິສັດຈະໄດ້ເກັບຊື້ຜົນຜະລິດດັ່ງກ່າວຄືນຈາກປະຊາຊົນ ພ້ອມກັນນີ້ ຍັງເປັນການສ້າງວຽກເຮັດງານທຳໃຫ້ແກ່ປະຊາຊົນ ເພື່ອໃຫ້ຫຼຸດຈາກຄວາມທຸກຍາກຕື່ມອີກ.

ທ່ານ ນາງ ສວນສະຫວັນ ວິຍະເກດ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີ (ລມຕ) ກະຊວງ ຖະແຫຼງຂ່າວ,​ ວັດທະນະທຳ​ ແລະ ​ທ່ອງທ່ຽວ​ (ຖວທ)​ ຂອງ ສປປ ລາວ ໄດ້ຕ້ອນຮັບ ທ່ານ ຫວູ​ ຫ້າຍ​ ກວາງ ​(Vu Hai Qiang vice president of VOV) ຮອງຜູ້ອຳນວຍການໃຫຍ່ວິທະຍຸກະຈາຍສຽງແຫ່ງ ສສ ຫວຽດນາມ​ ພ້ອມດ້ວຍຄະນະເຂົ້າຢ້ຽມຂໍ່ານັບພົບປະ ໃນວັນວັນທີ 29 ກໍລະກົດ 2022 ຜ່ານມານີ້ ທີ່ຫ້ອງຮັບແຂກກະຊວງ ຖວທ, ເນື່ອງໃນໂອກາດຄະນະດັ່ງກ່າວເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນໂອກາດດັ່ງກ່າວ ທ່ານ ນາງ​ ສວນສະຫວັນ ວິຍະເກດ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງ ຕໍ່ ທ່ານ​ ຫວູ​ ຫ້າຍ​ ກວາງ ພ້ອມຄະນະ ທີ່ເດີນທາງ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຄັ້ງນີ້ ໂດຍສະເພາະການຕິດຕາມກວດກາຜົນສຳເລັດໃນການຈັດຕັ້ງປະຕິບັດໂຄງການຊ່ວຍເຫຼືອຂອງລັດຖະບານ ສສ​​ ຫວຽດນາມ ​ໃນການຍົກລະດັບຫ້ອງອັດສຽງ-ສົ່ງສຽງໃຫ້ແກ່ວິທະຍຸກະຈາຍສຽງແຫ່ງຊາດລາວ ແລະ​ ວິທະຍຸກະຈາຍສຽງຫວຽດນາມໃນຊຸມປີຕໍ່ໜ້າ ຊຶ່ງເປັນມິດໝາຍສຳຄັນໃນການປະກອບສ່ວນເສີມສ້າງສາຍພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ທີ່ຍິ່ງໃຫຍ່ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ມີມູນເຊື້ອອັນດີງາມແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ ແລະ ທ່ານ ລມຕ ຍັງໄດ້ອວຍພອນໃຫ້ຄະນະຜູ້ແທນຈົ່ງປະສົບຜົນສຳເລັດໃນການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.​

ທ່ານ ຫວູ ຫ້າຍ​ ກວາງ ໄດ້ສະແດງຄວາມຂອບໃຈຕໍ່ ລັດຖະມົນຕີກະຊວງ ຖວທ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມນີ້ຍັງໄດ້ແຈ້ງຈຸດປະສົງໃນການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ ລມຕ ກະຊວງ ຖວທ ໄດ້ຮັບຊາບຕື່ມອີກ.​

ຂ່າວ-ພາບ: ວັນເພັງ

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ໃນວັນທີ 29 ກໍລະກົດຜ່ານມາ ທ່ານ ສົມກຽດ ພະສີ ຮອງລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ພ້ອມຄະນະ ໄດ້ລົງເຄື່ອນໄຫວຕິດຕາມ ແລະ ຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ແລະ ວຽກງານຈຸດສຸມ ແລະ ພົ້ນເດັ່ນທີ່ລັດຖະບານໄດ້ມີທິດຊີ້ນໍາ ແລະ ຕົກລົງທີ່ຕິດພັນກັບທ້ອງຖິ່ນ ຢູ່ແຂວງເຊກອງ ໂດຍມີທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ທ່ານເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງເຂົ້າຮ່ວມ.

ໂອກາດນີ້, ທ່ານຮອງລັດຖະມົນຕີ, ຮອງຫົວໜ້າ ຫສນຍ ພ້ອມຄະນະ ກໍ່ໄດ້ຮັບຟັງລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດ ແລະ ການເຄື່ອນໄຫວວຽກງານຂອງຫ້ອງວ່າການແຂວງເຊກອງ ເຊິ່ງມີຫຼາຍດ້ານທີ່ພົ້ນເດັ່ນຄື: ແຂວງເຊກອງສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ເສດຖະກິດ-ສັງຄົມຂະຫຍາຍຕົວ, ຊີວິດການເປັນຢູ່ຂອງປະຊາຊົນພັດທະນາດີຂຶ້ນ, ບັນຫາປະກົດການຫຍໍ້ທໍ້ໃນສັງຄົມໄດ້ຮັບການແກ້ໄຂ ແລະ ຫຼຸດໜ້ອຍຖອຍລົງເປັນກ້າວໆ.

ຫຼັງຈາກນັ້ນ ຍັງໄດ້ມີການປະກອບຄໍາຄິດຄໍາເຫັນ ໂດຍສະເພາະກົນໄກການປະສານງານລະຫວ່າງ ຫສນຍ ກັບ ອົງການປົກຄອງທ້ອງຖິ່ນ ເພື່ອປຶກສາຫາລື, ແລກປ່ຽນຄໍາຄິດເຫັນ ແລະ ຄົ້ນຄວ້າວິທີການແກ້ໄຂທີ່ເໝາະສົມ ແນໃສ່ປັບປຸງ ແລະ ພັດທະນາວຽກງານເສນາທິການ, ການບໍລິການຮັບໃຊ້ຂັ້ນເທິງ ແລະ ປະຊາຊົນພາຍໃນແຂວງໃຫ້ມີປະສິດ ທິພາບ ແລະ ປະສິດທິຜົນສູງຂຶ້ນ.

#Medialaos MMD (ແຫຼ່ງຂໍ້ມູນຈາກ: ນັກຂ່າວແຂວງເຊກອງ)

ເມື່ອວັນທີ 30 ກໍລະກົດ 2022 ຜ່ານມາ ພະແນກສາທາລະນະສຸກ ຮ່ວມກັບຫ້ອງການ ສາທາລະນະສຸກເມືອງ, ອົງການຈັດຕັ້ງຕ່າງໆ ແລະ ປະຊາຊົນ ແລະ ມູນລະນິທິ ລວມທັງ ສູນໄຂ້ຍຸງ ແມ່ກາຝາກ ຮ່ວມກັນຈັດກິດຈະກຳສ້າງຂະບວນການພົ່ນຢາຂ້າຍຸງໂຕແກ່ ແລະ ທຳລາຍແຫຼ່ງເພາະພັນຍຸງລາຍໃຫຍ່.

#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)

ຄວາມກົດດັນຕໍ່າຂອງອາກາດຮ້ອນ ຍັງຈະສືບຕໍ່ປົກຄຸມຢູ່ທົ່ວທຸກພາກ ຂອງປະເທດລາວ ສົມທົບກັບກະແສລົມຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ອາກາດຮ້ອນຢູ່ຕື່ມອີກ ແລະ ຍັງຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງຢູ່ເກືອບທົ່ວໄປໃນແຕ່ລະພາກ ແລະ ຕົກໜັກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ.

ພະຍາກອນອາກາດ ເວລາ 7:00 ໂມງຂອງວັນທີ 1/8/2022 ເຖິງ ເວລາ 7:00 ໂມງ ວັນທີ 2/8/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບ ທົ່ວໄປ ແລະ ຕົກປານກາງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 60% ຂອງພາກ. ອຸນຫະພູມໃນລະຫວ່າງ 19-30 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງ ທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນລະຫວ່າງ 20-36 ອົງສາ.

-ນະຄອນຫລວງວຽງຈັນ: ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຫາ ຕົກໜັກ ພ້ອມມີ ລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 25-34 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ຍັງຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຫາ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນ ລະຫວ່າງ 20-34 ອົງສາ.

-ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລືອມໃນລະດັບຄ່ອຍ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 16-29 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ຍັງຈະມີ ຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກປານ ກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກ ຫຸ້ມຂອງຝົນເທົ່າກັບ 65% ຂອງພາກ. ອຸນຫະພູມໃນລະຫວ່າງ 24-33 ອົງສາ.

-ເຂດພູພຽງບໍລະເວນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບ ຄ່ອຍເປັນບາງໂອກາດຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 50%. ອຸນຫະພູມໃນລະຫວ່າງ 17-26 ອົງສາ.

#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)

The Sun ສື່ດັງຂອງອັງກິດ ລາຍງານວ່າ ແມນເຊັສເຕີ ຊິຕີ ຂາຍນັກເຕະອອກຈາກທີມໃນໄລຍະລະດູຮ້ອນນີ້ ສ້າງລາຍໄດ້ເຂົ້າສະໂມສອນທໍາລາຍສະຖິຕິຂອງ ເຊວຊີ ເມື່ອ 5 ປີກ່ອນ.

ແມນເຊສເຕີ ຊີຕີ ໃຊ້ເງິນຊື້ນັກເຕະໜ້າໃໝ່ມາເສີມທີມບໍ່ໜ້ອຍ ທັງ ເອີລິງ ຮາແລນ, ຮູລຽນ ອັນວາເຣສ ແລະ ຄາວິນ ຟີວລິບ ໃນຂະນະດຽວກັນ ກໍພະຍາຍາມທີ່ຈະດຶງ ມາກ ກູກູເຣຢາ ມາຮ່ວມທີມອີກຄົນດ້ວຍ.

ຢ່າງໃດກໍຕາມ ທີມຂາຍນັກເຕະສ້າງເງິນເຂົ້າສະໂມສອນໄປກວ່າ 174 ລ້ານປອນ ກັບການຂາຍນັກເຕະ 10 ຄົນ ທໍາລາຍສະຖິຕິເມື່ອລະດູຮ້ອນປີ 2017 ຂອງ ເຊວຊີ ທີ່ຂາຍນັກເຕະໄດ້ເງິນໄປ 166 ລ້ານປອນ.

ກາບຣຽວ ເຊຊຸສ (45 ລ້ານປອນ) ຣາຮິມ ສະເຕີລິ່ງ (47,5 ລ້ານປອນ) ແລະ ໂອເລັກຊານເດີ ຊິນເຊນໂກ (32 ລ້ານປອນ) ເປັນ 3 ນັກເຕະທີ່ສ້າງເງິນເຂົ້າສະໂມສອນຫຼາຍທີ່ສຸດ ນອກຈາກນີ້ ຍັງມີລາຍໄດ້ອີກ 29 ລ້ານປອນ ໃນການປ່ອຍ ເກວິນ ບາຊູນູ ແລະ ໂຣເມໂອ ລາເວຍ ໄປໃຫ້ ເຊົາແຮມຕັນ ລວມເຖິງ ເປໂດຣ ປໍໂຣ ທີ່ຍ້າຍໄປຢູ່ກັບ ສະປໍຕິງ ລິສບອນ ດ້ວຍຄ່າຕົວ 7 ລ້ານປອນ.

ຟລອຍ ເມເວດເທີ ຈູເນຍ ນັກມວຍຊາວອາເມຣິກາ ໃກ້ບັນລຸຂໍ້ຕົກລົງໃນການຊົກຄືນໃໝ່ກັບ ຄໍເນີ ແມັກເກຣເກີ ນັກສູ້ຄົນດັງ ໂດຍຄາດວ່າມີສະຖິຕິບໍ່ເຄີຍພ່າຍແພ້ເປັນເດີມພັນ.

ກ່ອນໜ້ານີ້ ມີລາຍງານວ່າ ທັງ ຟລອຍ ແລະ ແມັກເກຣເກີ ກໍາລັງປຶກສາຫາລືເຖິງຄວາມເປັນໄປໄດ້ໃນການຊົກຄືນໃໝ່ກັນ ຫຼັງທັງຄູ່ເຄີຍຂຶ້ນສັງວຽນກັນມາແລ້ວໃນປີ 2017 ເຊິ່ງຜົນປາກົດວ່າ ນັກຊົກເຈົ້າຂອງສາຍາ “The Money” ເອົາຊະນະ TKO ໄປໄດ້ໃນຍົກທີ 10.

ຈົນຫຼ້າສຸດ “The Sun” ສື່ມວນຊົນຂອງອັງກິດ ເປີດເຜີຍວ່າ ຟລອຍ ແລະ ແມັກເກຣເກີ ໃກ້ທີ່ຈະຕົກລົງ ແຂ່ງຂັນອີກຄັ້ງດ້ວຍພິກັດ 155 ປອນ ແຕ່ວ່າຍັງບໍ່ມີການກໍານົດຈໍານວນຍົກ ໂດຍທາງຝ່າຍນັກຕໍ່ສູ້ UFC ນັ້ນ ຕ້ອງການຊົກທີ່ 10 ຮອບ.

ນອກຈາກນັ້ນ ຍັງມີລາຍງານເພີ່ມເຕີມວ່າ ຟລອຍ ໄດ້ສະເໜີເງິນໃຫ້ກັບ ແມັກເກຣເກີ ໃນນັດດັ່ງກ່າວເຖິງ 131,5 ລ້ານປອນ ຂະນະທີ່ ແມັກເກຣເກີ ພ້ອມແລ້ວທີ່ຈະຂຶ້ນສັງວຽນ ຫາກ “The Money” ໃຫ້ນັດນີ້ບັນທຶກສະຖິຕິລະດັບອາຊີບຢ່າງເປັນທາງການ ເຊິ່ງຫາກເສຍ ເຂົາຈະເສຍສະຖິຕິບໍ່ເສຍໃຫ້ໃຜ 50-0 ນັດທັນທີ.