ໃນວັນທີ 13 ທັນວາ 2022, ໂດຍການມອບໝາຍຂອງທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມງານລ້ຽງອາຫານທ່ຽງພົບປະລະຫວ່າງຜູ້ນໍາອາຊຽນ ແລະ ພາກທຸລະກິດອາຊຽນ-ອີຢູ ໂດຍການເປັນເຈົ້າພາບຂອງສະພາທຸລະກິດອາຊຽນ-ອີຢູທີ່ ບຣຸກແຊນ, ປະເທດແບນຊິກ.

ໃນໂອກາດນີ້, ຜູ້ນໍາອາຊຽນ ແລະຕົວແທນພາກທຸລະກິດ ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນ ກ່ຽວກັບການສົ່ງເສີມພາກທຸລະກິດ ແລະ ການລົງທຶນລະຫວ່າງອາຊຽນ ແລະ ອີຢູ ໂດຍສະເພາະແມ່ນການຊອກຫາຊ່ອງທາງໃນການອໍານວຍຄວາມສະດວກໃຫ້ແກ່ການດໍາເນີນທຸລະກິດຮ່ວມກັນຢ່າງໂລ່ງລ່ຽນ ແນໃສ່ຟື້ນຟູເສດຖະກິດພາຍຫຼັງການແພ່ລະບາດຂອງພະຍາດໂຄວິດ-19.

ບັນດາຜູ້ນໍາອາຊຽນ ໄດ້ຕີລາຄາສູງຕໍ່ບົດບາດຂອງພາກທຸລະກິດ ໃນການຂັບເຄື່ອນເສດຖະກິດ ແລະ ການຈ້າງງານໃນແຕ່ລະປະເທດ ພ້ອມທັງຊຸກຍູ້ໃຫ້ຫົວໜ່ວຍທຸລະກິດຂອງອີຢູ ເຂົ້າມາລົງທຶນຢູ່ພາກພື້ນອາຊຽນໃຫ້ຫຼາຍຂຶ້ນ ໃນຂົງເຂດທີ່ພາກທຸລະກິດມີຄວາມສົນໃຈ ແລະ ອາຊຽນມີທ່າແຮງ. ບັນດາຜູ້ນໍາອາຊຽນ ແລະ ພາກທຸລະກິດຂອງອີຢູຍັງໄດ້ປຶກສາຫາລື ກ່ຽວກັບການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຄ້າ-ການລົງທຶນ ແລະ ໄດ້ແລກປ່ຽນຂໍ້ມູນ,ປະສົບການ, ສິ່ງທ້າທາຍ ແລະ ບົດຮຽນທີ່ດີໃນການດໍາເນີນທຸລະກິດໂດຍສຸມໃສ່ການຫັນເປັນເສດຖະກິດດິຈິຕອນທີ່ທັນສະໄໝ ໄປຄຽງຄູ່ກັບການຄໍານຶງເຖິງຜົນກະທົບຕໍ່ສີ່ງແວດລ້ອມ. ໃນຕອນທ້າຍຂອງງານລ້ຽງອາຫານທ່ຽງ, ອີຢູ ໄດ້ແຈ້ງຂໍ້ລິເລີ່ມໃໝ່ໃນການເຊື່ອມໂຍງສາກົນ (Global Gateway), ຊຶ່ງເປັນຂໍ້ລິເລີ່ມໃນການຊຸກຍູ້ການຮ່ວມມືເພື່ອການຫັນປ່ຽນທາງດ້ານພະລັງງານ ແລະ ການເຊື່ອມຈອດດ້ານດິຈິຕອນ ທີ່ຈະຊ່ວຍໃຫ້ຄູ່ຮ່ວມມືສາມາດບັນລຸເປົ້າໝາຍການພັດທະນາທີ່ຍືນຍົງ.

ຂ່າວສານຊີອາໄອລາຍງານ ເມື່ອທ້າຍອາທິດທີ່ຜ່ານມານີ້, ທ່ານ ຮວງຣຸ້ນຊິ່ວ ລັດຖະມົນຕີກະຊວງຊີວະພາບ ແລະ ສະພາບແວດລ້ອມຈີນ ປະທານກອງປະຊຸມປະເທດພາຄີ ສົນທິສັນຍາວ່າດ້ວຍຊີວະນາໆພັນຂອງອົງການ ສປຊ ຄັ້ງທີ 15 ຫຼື COP15, ໄດ້ເປັນເຈົ້າພາບຈັດກອງປະຊຸມ COP15, ກອງປະຊຸມໃຫຍ່ສະມາຊິກ “ອະນຸສັນຍາວ່າດ້ວຍຄວາມປອດໄພດ້ານຊີວະພາບຄາທາເກນາ (Cartagena)” ຄັ້ງທີ 10 ແລະ ກອງປະຊຸມຄົບຄະນະຂອງກອງປະຊຸມໃຫຍ່ປະເທດພາຄີ “ອະນຸສັນຍານາໂກຢາ” ຄັ້ງທີ 4 ຢູ່ນະຄອນມອນທຣີໂອ ຂອງການາດາ. ກອງປະຊຸມຄັ້ງນີ້ໄດ້ຮັບຟັງການລາຍງານກ່ຽວກັບຄວາມຄືບໜ້າໃນການປຶກສາຫາລືຂອງໜ່ວຍງານຕ່າງໆ, ສະຫຼຸບຂະບວນການເຈລະຈາ, ພິຈາລະນາ ແລະ ຮັບຮອງຂໍ້ຕົກລົງ 23 ສະບັບ ຊຶ່ງກວມປະມານ 1 ສ່ວນ 3 ຂອງມະຕິຕົກລົງທັງໝົດຂອງກອງປະຊຸມ.

ທ່ານ ຮວງຣຸ້ນຊິ່ວ ກ່າວວ່າ: ນັບແຕ່ເປີດກອງປະຊຸມເປັນຕົ້ນມາ, ວາລະປະຊຸມຕ່າງໆທີ່ກ່ຽວຂ້ອງກັບການປຶກສາຫາລືກ່ຽວກັບຂອບວ່າດ້ວຍຊີວະນາໆພັນທົ່ວໂລກຫຼັງຈາກປີ 2020 ໄດ້ຮັບຄວາມຄືບໜ້າຢ່າງຕັ້ງໜ້າ. ຫວັງໃຫ້ຝ່າຍຕ່າງໆຈົ່ງສົ່ງເສີມນ້ຳໃຈຮ່ວມມືດ້ວຍຄວາມເປັນເຈົ້າການກວ່າເກົ່າຕໍ່ບັນຫາທີ່ປຶກສາຫາລືທີ່ເປັນຈຸດສົນໃຈຮ່ວມກັນ, ຊຸກຍູ້ໃຫ້ກອງປະຊຸມໄດ້ຮັບໝາກຜົນຕາມທີ່ຄາດໝາຍໄວ້ທຸກປະການ ໂດຍມີຜູ້ແທນປະມານ 6.000 ຄົນ ທີ່ມາຈາກ 193 ປະເທດ, ອົງການຈັດຕັ້ງສາກົນ ແລະ ຝ່າຍຕ່າງໆທີ່ມີສ່ວນກ່ຽວຂ້ອງໄດ້ເຂົ້າຮ່ວມກອງປະຊຸມ.

ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນຜ່ານມາ, ທ່ານ ທານີ ເອວ ເຊຢູດີ ລັດຖະມົນຕີຮັບຜິດຊອບດ້ານການຄ້າຕ່າງປະເທດຂອງສະຫະລັດ ອາຣັບເອມິເຣດ (UAE) ໄດ້ປະກາດວ່າ: ລັດຖະບານ UAE ແລະ ອິດສະຣາແອນ ໄດ້ໃຫ້ສັດຕະຍາບັນສັນຍາຄູ່ຮ່ວມມືເສດຖະກິດຮອບດ້ານລະຫວ່າງສອງປະເທດ.

ຂ່າວລະບຸວ່າ: ສັນຍາການຄ້າເສລີ (FTA) ສະບັບນີ້ໄດ້ອະນຸຍາດໃຫ້ຍົກເລີກພາສີອາກອນສຳລັບ 96% ບັນດາຜະລິດຕະພັນສິນຄ້າທີ່ໄດ້ແລກປ່ຽນ, ຊື້-ຂາຍລະຫວ່າງສອງປະເທດ ຊຶ່ງລວມມີ: ທັນຍາ ຫານ, ອາຫານ, ຜະລິດຕະພັນກະເສດ, ເຄື່ອງສຳອາງ, ອຸປະກອນການແພດ ແລະ ຢາປິ່ວປົວ. ໃນຈຳນວນສິນຄ້າດັ່ງກ່າວ, ມີບາງຜະລິດຕະພັນຈະໄດ້ຍົກເວັ້ນພາສີອາກອນໃນທັນທີ, ໃນຂະນະທີ່ບາງຜະລິດຕະພັນຈະໄດ້ຫຼຸດຜ່ອນພາສີຕາມຂັ້ນຕອນ (ເປັນຕົ້ນແມ່ນສິນຄ້າອຸດສາຫະກຳ). ສັນຍາສະບັບນີ້ຈະຊຸກຍູ້ການຄ້າລະຫວ່າງສອງປະເທດໃນຂະນະທີ່ມີຫຼາຍກາລະໂອກາດໃນຂົງເຂດຕົ້ນຕໍ ຄື: ອຸດສາຫະກຳທັນສະໄໝ, ພະລັງງານທົດແທນ ແລະ ຄວາມໝັ້ນຄົງດ້ານສະບຽງອາຫານ.

ງານມະຫະກຳກິລາແຫ່ງຊາດ ຄັ້ງທີ XI ຫລື​ ຊຽງຂວາງເກມ​ ໄດ້ເປີດຂຶ້ນຢ່າງເປັນທາງການ ໃນວັນທີ 13 ທັນວາ 2022 ທີ່ສະໜາມກິລາໄຫຫີນ ເມືອງແປກ ແຂວງຊຽງຂວາງ ມີມວນຊົນທັງພາຍໃນ ແລະ ຕ່າງປະເທດ ລວມໄປເຖິງ ຊາວແຂວງ ຊຽງຂວາງ ໄດ້ຫລັ່ງໄຫລເຂົ້າຮ່ວມຮັບຊົມງານຄັ້ງນີ້ ຢ່າງຄັບຄາໜາແໜ້ນ.

ງານກິລາ ຊຽງຂວາງເກມໄດ້ດຳເນີນການແຂ່ງຂັນກ່ອນພິທີເປີດຢ່າງເປັນທາງການ ແຕ່ລະສະໜາມການແຂ່ງຂັນ ມວນຊົນ ໄດ້ເດີນທາງມາຮ່ວມຊົມຮ່ວມເຊຍການແຂ່ງຂັນ ຢ່າງຄຶກຄືນມ່ວນຊື່ນ ຂະນະທີ່ ໃນພິທີເປີດຢ່າງເປັນທາງການມວນຊົນ ໄດ້ຫລັ່ງໄຫລເຂົ້າຮັບຊົມຢ່າງຄັບຄາໜາແໜ້ນ.

ຄະນະນຳ ແຂວງຊຽງຂວາງ ລວມໄປເຖິງ ປະຊາຊົນຊາວແຂວງຊຽງຂວາງທຸກທົ່ວໜ້າ ມີຄວາມພາກພູມໃຈ ທີ່ໄດ້ຮັບກຽດເປັນເຈົ້າພາບຈັດງານຄັ້ງນີ້ ແລະ ຍິນດີຕ້ອນຮັບ ບັນດາຄະນະນັກກິລາ ແລະ ມວນຊົນ ທັງພາຍໃນ ແລະ ຕ່າງປະເທດ ທີ່ເດີນທາງມາເຂົ້າຮ່ວມຮັບຊົມງານກິລາ ແລະ ທ່ອງທ່ຽວ ຢ້ຽມຢາມ ແຂວງຊຽງຂວາງຄັ້ງນີ້ ເປັນຈຳນວນຫລວງຫລາຍ ເຊິ່ງແຂວງຊຽງຂວາງ ກໍໄດ້ມີການຫ້າງຫາກະກຽມ, ອຳນວຍຄວາມສະດວກທັງ ສະຖານທີ່ພັກເຊົາ, ອາຫານໃຫ້ແກ່ ແຂກຄົນທີ່ມາຊົມກິລາ ແລະ ທ່ອງທ່ຽວ ໃຫ້ສະດວກສະບາຍ , ພ້ອມດຽວກັນນັ້ນ ຊາວແຂວງຊຽງຂວາງ ກໍຂໍເຊີນຊວນ ມວນຊົນ ທັງພາຍໃນ ແລະ ຕ່າງປະເທດ ມາຮ່ວມຮັບຊົມງານກິລາຄັ້ງນີ້ ໃຫ້ມີບັນຍາກາດຟົດຟື້ນມ່ວນຊື່ນ .

ງານມະຫະກຳກິລາແຫ່ງຊາດ ຄັ້ງທີ XI ຫລື ຊຽງຂວາງເກມ ຫລັງຈາກຖືກເລື່ອນເຖິງສອງຄັ້ງ ຍ້ອນສະພາບການແຜ່ລະບາດຂອງພະຍາດໂຄວິດ-19 ແລະ ມາໃນປີ 2022 ນີ້ ສະພາບການແຜ່ລະບາດຂອງພະຍາດດັ່ງກ່າວໄດ້ຫລຸດໜ້ອຍຖ້ອຍລົງ, ພັກ-ລັດຖະບານເຫັນໄດ້ຄວາມສໍາຄັນໃນການຈັດງານ ດັ່ງກ່າວ ໂດຍຕິດພັນກັບການປ້ອງກັນພະຍາດໂຄວິດ-19 ເພື່ອເປັນການເຕົ້າໂຮມຄວາມສາມັກຄີທົ່ວປວງຊົນ ໂດຍຜ່ານຂະບວນການກິລາ, ເປັນການປຸກລະດົມສົ່ງເສີມມະຫາຊົນເຂົ້າຮ່ວມຢ່າງກວ້າງຂວາງ ແນໃສ່ເສີມສ້າງສຸຂະພາບ, ມິດຕະພາບ, ການພັດທະນາ, ການຮ່ວມມື ແລະ ຄວາມສາມັກຄີ ເປັນປຶກແຜ່ນຂອງ ປວງຊົນ ລາວ ທັງຊາດ ທັງເປັນການພັດທະນາຊັບພະຍາກອນມະນຸດຂອງຊາດ, ເປັນການປຸກລະດົມຊາວໜຸ່ມ, ເຍົາວະຊົນ, ນັກຮຽນ-ນັກສຶກສາ ໃຫ້ມີສ່ວນຮ່ວມໃນ ຂະ ບວນການຫລິ້ນກິລາ ແລະ ແຂ່ງຂັນກິລາປະເພດຕ່າງໆ ເພື່ອຫ່າງໄກສິ່ງເສບຕິດ ແລະ ປາກົດການຫຍໍ້ທໍ້ ຕ່າງໆ ພ້ອມນັ້ນຍັງ ເປັນການເຝິກຝົນຮ່າງກາຍ ແລະ ຈິດໃຈໃຫ້ເບີກບານເຂັ້ມແຂງ, ກຽມພ້ອມສືບທອດມູນ ເຊື້ອ ພາລະກິດແຫ່ງການປົກປັກຮັກສາ ແລະ ສ້າງສາພັດທະນາ ປະເທດຊາດ.

# ໜັງສືພິມ ກອງທັບປະຊາຊົນລາວ

ມວນອາກາດເຢັນຍັງຈະສືບຕໍ່ແພ່ລົງມາປົກຄຸມຢູ່ທົ່ວທຸກພາກຂອງ ປະເທດລາວ ດ້ວຍກໍາລັງປານກາງ ຫາ ແຮງ ສົມທົບກັບກະແສລົມຕາເວັນ ອອກສ່ຽງເໜືອພັດປົກຄຸມ ຊຶ່ງຈະເຮັດໃຫ້ອາກາດເຢັນ ຫາ ໜາວເຢັນ ຢູ່ຕື່ມອີກຢູ່ໃນແຕ່ລະພາກ ແລະ ຈະມີຝົນຕົກໃນລະດັບຄ່ອຍ ພ້ອມມີ ລົມພັດແຮງເປັນບາງໂອກາດຢູ່ບາງທ້ອງຖິ່ນ.

ພະຍາກອນອາກາດ ເວລາ 7:00 ໂມງວັນທີ 14/12/2022 ເຖິງເວລາ 7:00 ໂມງວັນທີ 15/12/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ວຽງໄຊ, ຊໍາເໜືອ ແລະ ຊຽງຂວາງ): ອາກາດຈະໜາວເຢັນ ພ້ອມມີໝອກໜາປົກຫຸ້ມຢູ່ທົ່ວໄປ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ. ອຸນຫະພູມໃນລະຫວ່າງ 08-15 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຍັງຈະເຢັນ ຫາ ໜາວເຢັນ ພ້ອມມີ ໝອກບາງປົກຫຸ້ມຢູ່ທົ່ວໄປ ແລະ ມີໝອກໜາປົກຫຸ້ມຢູ່ບາງທ້ອງຖິ່ນ. ອຸນຫະພູມໃນລະຫວ່າງ 13-29 ອົງສາ.

-ນະຄອນຫລວງວຽງຈັນ: ອາກາດເຢັນໃນຕອນເຊົ້າ ພ້ອມມີໝອກບາງ ປົກຫຸ້ມຢູ່ບາງບໍລິເວນ ແລະ ຈະມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 19-29 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ແລະ ມີໝອກໜາປົກຫຸ້ມຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ. ອຸນຫະພູມໃນລະຫວ່າງ 14-29 ອົງສາ.

-ແຂວງໄຊສົມບູນ: ອາກາດໜາວເຢັນ ພ້ອມມີໝອກໜາປົກຫຸ້ມ ຢູ່ທົ່ວໄປ. ອຸນຫະພູມໃນລະຫວ່າງ 11-23 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ອາກາດເຢັນຫາ ໜາວເຢັນຢູ່ບາງທ້ອງຖິ່ນໃນຕອນເຊົ້າ ພ້ອມມີໝອກ ບາງປົກຫຸ້ມຢູ່ທົ່ວໄປ ພ້ອມມີລົມພັດແຮງເປັນບາງໂອກາດ. ອຸນຫະພູມ ໃນລະຫວ່າງ 14-29 ອົງສາ.

-ເຂດພູພຽງບໍລະເວນ: ອາກາດໜາວເຢັນ ພ້ອມມີໝອກໜາປົກຫຸ້ມ ໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ຫລື ເນື້ອທີ່ປົກຫຸ້ມຂອງຝົນເທົ່າກັບ 5%. ອຸນຫະພູມໃນລະຫວ່າງ 06-20 ອົງສາ.

ມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບໄດ້ເປີດຂຶ້ນຢ່າງເປັນທາງການ ໃນວັນທີ 13 ທັນວາ ແລະ ຈະດຳເນີນໄປຈົນຮອດວັນທີ 22 ທັນວາ 2022, ເຊິ່ງແຂວງຊຽງຂວາງ ໄດ້ຈັດໃຫ້ມີຫລາຍກິດຈະກຳ ຢ່າງຄຶກຄື້ນ ເຊິ່ງເລີ່ມຕົ້ນດ້ວຍການສະແດງບິນຂອງເຮືອບິນ LE500 ແລະ ເຮືອບິນຍັກ 130, ການໂດດຈ້ອງ ຈາກກອງທັບປະຊາຊົນລາວ (ກອງຮ້ອຍໂດດຈ້ອງ) ແລະ ການສະແດງສິລະປະວັນນະຄະດີ ຫລາຍຮູບແບບ ເປັນຕົ້ນ ບົດຟ້ອນ, ຮ້ອງເພງ, ຂັບລຳ ແລະ ການເດີນສວນສະໜາມ ຂອງກ້ອນກຳລັງຕ່າງໆ ເຊິ່ງມີທັງໝົດ 31 ກ້ອນກຳລັງ ຂອງບັນດາແຂວງ ໃນຂອບເຂດທົ່ວປະເທດ ແລະ ຂອງບັນດາກະຊວງ, ອົງການ ທີ່ກ່ຽວຂ້ອງ.

ໃນພິທີມີການສະແດງທັງໝົດ 11 ລາຍການ, ໃນນັ້ນມີ 5 ລາຍການສະແດງຫລັກ, ມີຈໍານວນນັກສະແດງທັງໝົດ 1 ພັນຄົນ ໃນນັ້ນ, ມີຫລາກຫລາຍລາຍການສະແດງ ເປັນຕົ້ນ, ລາຍການສະແດງຍິນດີຕ້ອນຮັບ (ນຳໃຊ້ນັກສະແດງທັງໝົດ 1 ພັນຄົນ), ຮ້ອງເພັງລວມໝູ່ຍິງ-ຊາຍ (ເພັງໄຊຊະນະຊຽງຂວາງ, ຫວນຄືນເມືອງຊຽງ ແລະ ຊົມເຊີຍຊຽງຂວາງເກມ), ມີນັກສະແດງ 150 ຄົນ, ສະແດງມວຍລາຍລາວ (ມີນັກສະແດງ 200 ຄົນ), ລາຍການສະແດງ ນົກແອ່ນນ້ອຍລອຍລົມ (ມີນັກສະແດງ 200 ຄົນ) ແລະ ລາຍການສະແດງມ່ວນຊື່ນງານມະຫະກໍາກິລາແຫ່ງຊາດ (ມີນັກສະແດງ 1 ພັນຄົນ).

ນອກນັ້ນ, ຍັງມີລາຍການສະແດງ ຮ້ອງເພງລວມໝູ່ຍິງ-ຊາຍ (ບົດເພງ ສະບາຍດີຊຽງຂວາງເກມ, ຊຽງຂວາງເກມ, ຂັບຊຽງຂວາງ (ພາທ່ຽວຊຽງຂວາງ), ຊາວພວນຊຽງຂວາງ, ການສະແດງຮ້ອງດ່ຽວຍິງ (ບົດເພງຈົດຈຳບຸນຄຸນຂອງພັກ, ລາຍການສະແດງຮ້ອງຄູ່ ຍິງ-ຊາຍ (ບົດເພງຮັກສາວມົ້ງຊຽງຂວາງ, ອ້າຍນັກຮ້ອງຖາມຮັກສາວນັກເຈີມ), ລາຍການສະແດງ ຮ້ອງດ່ຽວ ຍິງ-ຊາຍ (ບົດເພງເຊີນທ່ຽວຊຽງຂວາງ, ຊຽງຂວາງເກມ, ປະເທດລາວສວຍງາມແທ້ໆ, ນ້ຳໃຈນັກກິລາ) ແລະ ລາຍການສະແດງ ນົກແອ່ນນ້ອຍລອຍລົມ ແລະ ໃນຕອນທ້າຍໄດ້ມີການຈຸດບັ້ງໄຟດອກຈຳນວນໜຶ່ງ ເພື່ອເຮັດໃຫ້ງານດັ່ງກ່າວ, ເຕັມໄປດ້ວຍບັນຍາກາດຄຶກຄື້ນ ແລະ ມີຄວາມໝາຍສຳຄັນ.

ສ່ວນລາຍການສະແດງ ໃນພິທີປິດການແຂ່ງຂັນ ໃນວັນທີ 22 ທັນວາ 2022 ຈະມີທັງໝົດ 3 ລາຍການ, ມີນັກສະແດງທັງໝົດ 1 ພັນຄົນ. ໃນນັ້ນ, ມີລາຍການສະແດງຂອງເຈົ້າພາບງານມະຫາກຳກິລາແຫ່ງຊາດ ຄັ້ງທີ XII ກໍຄື ນະຄອນຫລວງວຽງຈັນ ເປັນເຈົ້າພາບໃນຄັ້ງຕໍ່ໄປ, ລາຍການສະແດງ ບັ້ງໄຟກ່ານເມືອງພວນ (ນຳໃຊ້ນັກສະແດງ 1 ພັນຄົນ), ລາຍການສະແດງ ນັດພົບກັນໃໝ່ (ນຳໃຊ້ນັກສະແດງ 1 ພັນຄົນ). ສຳລັບກ້ອນກຳລັງເດີນສວນສະໜາມ ຈໍານວນ 31 ກ້ອນກຳລັງ ໃນນັ້ນ, ມາຈາກບັນດາແຂວງ, ນະຄອນຫລວງວຽງຈັນ ແລະ ຈາກບັນດາຂະແໜງການທີ່ ກ່ຽວຂ້ອງ.

ງານມະຫາກຳກິລາແຫ່ງຊາດ ຄັ້ງທີ XI ຫຼື ຊຽງຂວາງເກມ 2022 ໄດ້ເປີດຂຶ້ນເປັນທາງການຢ່າງຍິ່ງໃຫຍ່ ຢູ່ສະໜາມກິລາໄຫຫີນ ທີ່ບ້ານຄັງໜອງຫຼວງ ເມືອງແປກ ໃນວັນທີ 13 ທັນວານີ້, ໃຫ້ກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ມີບັນດາການນໍາຂັ້ນສູນກາງ ແລະ ທ້ອງຖິ່ນ, ຄະນະນັກກິລາ, ລວມເຖິງມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ.

ກ່ອນພິທີເປີດງານຢ່າງເປັນທາງການເລີ່ມຂຶ້ນ ໄດ້ມີການສະແດງບິນຂອງເຮືອບິນ LE500 ແລະ ເຮືອບິນຍັກ 13O ຕໍ່ດ້ວຍການໂດດຈ້ອງຈາກກອງທັບປະຊາຊົນລາວ, ການສະແດງສິລະປະວັນນະຄະດີຫຼາຍຮູບແບບ ເປັນຕົ້ນ ບົດຟ້ອນ, ຮ້ອງເພັງ, ຂັບລຳ ມີທັງໝົດ 11 ລາຍການ. ພ້ອມນີ້, ກໍມີການເດີນສວນສະໜາມຂອງກ້ອນກໍາລັງຕ່າງໆ ຊື່ງມີທັງໝົດ 31 ກ້ອນກຳລັງຂອງບັນດາແຂວງ/ນະຄອນຫຼວງວຽງຈັນ ໃນຂອບເຂດທົ່ວປະເທດ ແລະ ບັນດາກະຊວງ, ອົງການທີ່ກ່ຽວຂ້ອງ. ໃນນີ້, ມີກ້ອນກຳລັງປອດຄວັນຢາສູບ, ກ້ອນກຳລັງຕ້ານສານຕ້ອງຫ້າມໃນກິລາ ແລະ ກ້ອນກຳລັງມໍລະດົກໂລກ ໄຫຫີນ.

ກ້າວເຂົ້າສູ່ພິທີທາງການ ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງຊຽງຂວາງ ປະທານຈັດງານມະຫາກຳກິລາແຫ່ງຊາດ ຄັ້ງທີ XI ໄດ້ລາຍງານວ່າ: ງານມະຫາກໍາກິລາແຫ່ງຊາດ ແມ່ນການແຂ່ງຂັນກິລາຫຼາຍປະເພດຮ່ວມກັນ ປະກອບມີໝວດກິລາສາກົນ ແລະ ກິລາພື້ນເມືອງ ຊຶ່ງຕາມກຳນົດໄດ້ຈັດຂຶ້ນທຸກໆ 3 ປີ ໂດຍຄັດເລືອກແຂວງຜັດປ່ຽນກັນເປັນເຈົ້າພາບ ເພື່ອຊຸກຍູ້ຂະບວນການກິລາກາຍະກຳຢູ່ພາຍໃນປະເທດ ທັງເປັນການປຸກລະດົມສົ່ງເສີມມະຫາຊົນເຂົ້າຮ່ວມຢ່າງກວ້າງຂວາງ ແນໃສ່ເສີມສ້າງສຸຂະພາບ, ມິດຕະພາບ, ການພັດທະນາ, ການຮ່ວມມື ແລະ ຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ ທັງເປັນການພັດທະນາຊັບພະຍາກອນມະນຸດຂອງຊາດ, ເປັນການປຸກລະດົມຊາວໜຸ່ມ, ເຍົາວະຊົນ, ນັກຮຽນ-ນັກສຶກສາ ໃຫ້ມີສ່ວນຮ່ວມໃນຂະບວນການຫຼິ້ນກິລາ ແລະ ແຂ່ງຂັນກິລາປະເພດຕ່າງໆ ເພື່ອຫ່າງໄກສິ່ງເສບຕິດ ແລະ ປະກົດການຍໍ້ທໍ້ຕ່າງໆ ທັງເປັນການຝຶກຝົນຮ່າງກາຍ ແລະ ຈິດໃຈເບີກບານເຂັ້ມແຂງ, ກຽມພ້ອມສືບທອດມູນເຊື້ອພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ.

ທ່ານ ເຈົ້າແຂວງຍັງກ່າວວ່າ: ພາຍຫຼັງໄດ້ຮັບການມອບໝາຍຈາກພັກ-ລັດຖະບານ ໃຫ້ແຂວງຊຽງຂວາງ ຮັບກຽດເປັນເຈົ້າພາບຈັດງານມະຫາກໍາກິລາແຫ່ງຊາດ ຄັ້ງທີ 11 ຄະນະພັກ, ອົງການປົກຄອງແຕ່ລະຂັ້ນ, ຕະຫຼອດຮອດປະຊາຊົນບັນດາເຜົ່າທົ່ວແຂວງຊຽງຂວາງ ໄດ້ມີຄວາມປິຕິຊົມຊື່ນ, ມີຄວາມກະຕືລືລົ້ນ, ເອກອ້າງທະນົງໃຈເປັນຢ່າງຍິ່ງ, ດ້ວຍຄວາມຮັບຜິດຊອບສູງ ໂດຍສຸມໃສ່ປັບປຸງກໍ່ສ້າງພື້ນຖານໂຄງລ່າງສະໜາມກິລາ, ເສັ້ນທາງ, ສະຖານທີ່ພັກຄູຝຶກ, ນັກກິລາ ແລະ ອື່ນໆ ເພື່ອກຽມຄວາມພ້ອມເປັນເຈົ້າພາບທີ່ດີຈັດງານມະຫະກໍາກິລາແຫ່ງຊາດ ຄັ້ງທີ 11 ໃນປີ 2017 ແຕ່ເນື່ອງຈາກເກີດໄພພິບັດທໍາມະຊາດຢ່າງໜັກໜ່ວງໃນທົ່ວປະເທດ ໂດຍສະເພາະແມ່ນ 3 ແຂວງພາກໃຕ້ ຈຶ່ງໄດ້ເລື່ອນມາໃສ່ປີ 2020 ແຕ່ເກີດການລະບາດຂອງພະຍາດໂຄວິດ -19 ຈຶ່ງໄດ້ສືບຕໍ່ເລື່ອນມາໃນປີ 2022 ນີ້. ຜ່ານຂະບວນການກະກຽມໃນແຕ່ລະໄລຍະເຖິງແມ່ນວ່າພວກເຮົາຈະພົບກັບຄວາມຫຍຸ້ງຍາກນາໆ ປະການ, ແຕ່ດ້ວຍຄວາມພະຍາຍາມສູ້ຊົນບຸກບືນຂອງຄະນະພັກ, ອົງການປົກຄອງທຸກຂັ້ນ ແລະ ຄວາມເປັນເຈົ້າການຂອງປະຊາຊົນບັນດາເຜົ່າຊາວຊຽງຂວາງ, ພາຍໃຕ້ການຊີ້ນໍາຢ່າງໃກ້ຊິດຂອງພັກ, ລັດຖະບານ ແລະ ການສະໜັບສະໜູນຊ່ວຍເຫຼືອຈາກທຸກພາກສ່ວນ ພວກເຮົາຈຶ່ງສາມາດຈັດງານມະຫະກໍາກິລາແຫ່ງຊາດ ຄັ້ງທີ XI ນີ້ຂຶ້ນໄດ້ຢ່າງເປັນທາງການ ຊຶ່ງການຈັດພິທີເປີດໃນມື້ນີ້ ກໍກົງກັບວັນຄ້າຍວັນເກີດຂອງຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 102 ປີ (13/12/1920-13/12/2022) ກໍຄື ປະທານ ໄກສອນ ພົມວິຫານ.

ໃນພິທີທີ່ມີຄວາມໝາຍສຳຄັນນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ກ່າວເປີດງານມະຫາກຳກິລາແຫ່ງຊາດ ຄັ້ງທີ XI ຢ່າງເປັນທາງການ ວ່າ: ງານມະຫາກໍາກິລາແຫ່ງຊາດ ຄັ້ງທີ XI ທີ່ຈັດຂຶ້ນຢູຸ່ແຂວງຊຽງຂວາງ ວິລະຊົນ ໄດ້ມີຄວາມພ້ອມຢ່າງຮອບດ້ານ ຄົບຖ້ວນສົມບູນແລ້ວ. ຂ້າພະເຈົ້າ ຂໍອວຍພອນໃຫ້ບັນດາທ່ານ ລວມທັງນັກກິລາທຸກໆຄົນ ຈົ່ງໂຊກດີ ມິໄຊ. ໃນໂອກາດອັນເປັນເລີກງາມຍາມດີ ແລະ ເປັນສິລິມົງຄຸນນີ້, ຂ້າພະເຈົ້າ ຂໍຕາງໜ້າໃຫ້ປວງຊົນລາວທຸກທົ່ວໜ້າ, ຂໍປະກາດ ເປີດງານມະຫາກຳກິລາແຫ່ງຊາດ ຄັ້ງທີ XI ຢ່າງເປັນທາງການ ນັບແຕ່ວິນາທີນີ້ເປັນຕົ້ນໄປ. ຊົມເຊີຍ, ຊົມເຊີຍ, ຊົມເຊີຍ….

ຈາກນັ້ນ, ນັກກິລາແລ່ນທວນໄຟ ໄດ້ເຂົ້າສູ່ສະໜາມ ເພື່ອຈຸດອ່າງໄຟເປີດການແຂ່ງຂັນຢ່າງເປັນທາງການ, ຕໍ່ດ້ວຍການກ່າວປະຕິຍານຂອງຕາງໜ້າກຳມະການຕັດສິນ ແລະ ຕາງໜ້ານັກກິລາ ກໍໄດ້ກ່າວປະຕິຍານ.

ງານມະຫະກໍາກິລາແຫ່ງຊາດ ຄັ້ງທີ XI ນີ້ ແຂ່ງຂັນທັງໝົດ 25 ປະເພດກິລາຄື: ຍິງປືນ, ລອຍນໍ້າ, ບານບ້ວງ, ເທຄວັນໂດ, ໝາກແລ້, ຍິງທະນູ, ໜ້າເກັກ, ແລ່ນ-ລານ, ມວຍສາກົນ, ໝາກເສິກ, ປັນຈັກສີລັດ, ມວຍປໍ້າ, ຄາຣາເຕໂດ, ກະຕໍ້-ຊິນລອນ, ບານເຕະ, ໝາກຂ່າງ, ເປຕັງ, ກັອຟ, ດອກປີກໄກ່, ເຕັນນິສ, ລົດຖີບ, ປິງປ໋ອງ, ມວຍລາວ, ຢູໂດ ແລະ ວູຊູ ແລະ ມີນັກກິລາ 3.093 ຄົນຈາກ 17 ແຂວງ, 1 ນະຄອນຫຼວງ ແລະ 4 ກະຊວງເປັນຕົ້ນ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງພະລັງງານ ແລະ ບໍ່ແຮ່ ແລະ ກະຊວງສາທາລະນະສຸກ ເຂົ້າຮ່ວມຊີງຫຼຽນທັງໝົດ 2.598 ຫຼຽນ. ສຳລັບບາງປະເພດກິລາ ໄດ້ແຂ່ງຂັນມາແຕ່ວັນທີ 14 ພະຈິກ 2022 ຢູ່ນະຄອນຫຼວງວຽງຈັນຄື: ກິລາລອຍນ້ຳ ແລະ ກິລາຍິງປືນ; ສ່ວນຢູ່ແຂວງຊຽງຂວາງ ໄດ້ເລີ່ມມາແຕ່ວັນທີ 1 ທັນວາ 2022 ແລະ ມາຮອດວັນທີ 13 ທັນວາ 2022 ມີ 11 ປະເພດກິລາແຂ່ງສໍາເລັດແລ້ວ ຄື: ກິລາລອຍນໍ້າ, ແລ່ນ-ລານ, ເທຄັວນໂດ, ມວຍປໍ້າ, ຍິງທະນູ-ຍິງໜ້າເກັກ, ຄາຣາເຕໂດ, ໝາກເສິກ, ບານບ້ວງ, ປັນຈັກສີລັດ, ມວຍສາກົນ ແລະ ໝາກແລ້. ງານມະຫາກໍາກິລາແຫ່ງຊາດ ຄັ້ງທີ XI ນີ້, ຈະດຳເນີນໄປຈົນຮອດວັນທີ 22 ທັນວາ 2022 ຈຶ່ງຈະສໍາເລັດ ແລະ ຈະໄດ້ມີພິທີປິດຢ່າງເປັນທາງການ.

ຕາມຂ່າວຈາກວິທະຍຸສາກົນຫວຽດນາມ, ກອງ​ປະຊຸມ​ສຸດ​ຍອດ ສ.ອາ​ເມ​ລິ​ກາ-ອາ​ຟຣິກາ ໄດ້ຈັດ​ຂຶ້ນ​​​ເລີ່​ມ​ແຕ່ ​ວັນ​ທີ 13 ​ທັນວາ​ນີ້ ​ເປັນ​ເວລາ 3 ວັນ ​​ພາຍ​ໃຕ້​ການ​ເປັນປະທານ ​ຂອງ​ ທ່ານ ​ໂຈ​ ໄບ​ເດັນ (Joe Biden), ປະທານາທິບໍດີ ສ.ອາ​ເມ​ລິ​ກາ, ໂດຍມີບັນດາປະມຸກ​ລັດ ​ແລະ ຜູ້ນຳ​ລັດຖະບານ ບັນດາປະ​ເທດໃນ​ອາ​ຟຣິກາ ປະມານ 50 ທ່ານ ​ເຂົ້າຮ່ວມ ​ເພື່ອ​ປຶກສາຫາລື​ກັນບັນດາຂໍ້ລິເລີ່ມໃໝ່ເພື່ອເພີ່ມທະວີການເຂົ້າຮ່ວມ ຂອງ ສ.ອາ​ເມ​ລິ​ກາ ເຂົ້າສັນຍາໃນພາກພື້ນການຄ້າເສລີອາຟຣິກາ (AfCFTA) ກໍຄືຂໍ້ລິເລີ່ມຊຸກຍູ້ການຟື້ນຟູ ຂອງພື້ນຖານເສດຖະກິດອາຟຣິກາ ຈາກພະຍາດໂຄວິດ-19, ຊຸກຍູ້ການຮັບປະກັນ ສະບຽງອາຫານ ແລະ ເພີ່ມທະວີການລົງທຶນ ເຂົ້າໂຄງການພື້ນຖານໂຄງລ່າງ, ສາທາລະນະສຸກ ແລະ ພະລັງງານຜະລິດຄືນໃໝ່ ຂອງ ທະວີບ.

ກອງ​ປະຊຸມດັ່ງກ່າວ ​ໄດ້ຈັດຂຶ້ນຄັ້ງທຳ​ອິດ ໃນປີ 2014, ໃນສະໄໝ ຂອງ ທ່ານ ບາຣັກ ​ໂອ​ບາ​ມາ (Barack Obama) ອະ​ດິດ ປະທານາທິບໍດີ ສ.ອາ​ເມ​ລິ​ກາ ໄດ້ປະກາດບັນດາຄຳໝັ້ນສັນຍາ ຂອງພາກພື້ນລົງທຶນພາກເອກະຊົນ ແລະ ເພີ່ມທະວີການຮ່ວມມື ກັບບັນດາປະເທດອາຟຣິກາ ໃນຂໍ້ລິເລີ່ມກ່ຽວກັບພະລັງງານ, ການບໍລິການດ້ານການເງິນ, ການປ່ຽນແປງ ຂອງດິນຟ້າອາກາດ, ການຄ້ຳປະກັນດ້ານສະບຽງອາຫານ ແລະ ການເບິ່ງແຍງສຸຂະພາບ.

(ບັນນາ ທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ