ຕາມ​ຂ່າວ​ຈາກ cri: ກອງປະຊຸມ ຫຸ່ນຍົນໂລກ 2022 ຈະຈັດຂຶ້ນ ຢູ່ສູນປະຊຸມ ວາງສະແດງ ສາກົນ ຢີ້ຊ້ວງ ປັກກິ່ງ ຂອງ​ຈີນ ລະຫວ່າງ ວັນທີ18-21ສິງຫາປີນີ້. ກອງປະຊຸມ ຄັ້ງນີ້ ຈະຈັດເວທີ ປຶກສາຫາລື, ງານວາງສະແດງ ຜະລິດ ຕະພັນ, ການແຂ່ງຂັນ ແລະ ກິດຈະກຳອີກ ຫລາຍຢ່າ ໂດຍໄດ້ຮັບ ການສະໜັບ ສະໜູນ ຈາກອົງການ ຈັດຕັ້ງ ສາກົນ 23ແຫ່ງ. ເວທີປຶກສາ ຫາລື ໄດ້ເຊີນແຂກ ຜູ້ມີກຽດ ເຊັ່ນ: ບຸກຄົນ ຜູ້ໄດ້ຮັບ ລາງວັນດີເດັ່ນ ດ້ານຄອມພິວເຕີ ຫລື ລາງວັນທູຣີງ, ບັນດິດຂອງຈີນ ແລະ ຕ່າງປະເທດ ໂດຍຈະແບ່ງປັນ ໝາກຜົນ ດ້ານວິຊາການ ແຖວໜ້າ ແລະ ທ່ວງທ່າ ການພັດທະນາ ໃນຂົງເຂດ ຫຸ່ນຍົນ,ກະຕຸ້ນ ໃຫ້ສ້າງຄວາມຝັນ ຕໍ່ສັງຄົມ ອັດສະລິຍະ ໃນອະນາຄົດ.ສຳລັບ ງານວາງສະແດງ ຜະລິດ ຕະພັນ ຄັ້ງນີ້ ຈະສ້າງຮູບແບບ ວາງສະແດງ ຫຸ່ນຍົນ ແລະ ສະຖານທີ່ ນຳໃຊ້ ຫຸ່ນຍົນ ເປັນເທື່ອທຳອິດ, ມີວິສາຫະກິດ ນຳໜ້າ ໃນດ້ານຫຸ່ນຍົນ ຂອງຈີນ ແລະ ຕ່າງປະເທດ 100ກວ່າແຫ່ງ ຈະນຳເອົາ ຜະລິດຕະພັນ 500ກວ່າອັນ ມາສະ ແດງ ໃຫ້ຜູ້ຊົມ ໄດ້ເຫັນເຖິງ ເຕັກໂນໂລຊີ ທີ່ສຸດຍອດ. ການແຂ່ງຂັນ ຫຸ່ນຍົນໂລກ ທີ່ປຽບເໝືອນ ງານໂອລິມປິກ ໃນຂະແໜງ ການຜະລິດ ຫຸ່ນຍົນ ກໍ່ຈະ ຈັດການ ແຂ່ງຂັນ ຊີງແຊ້ມ ຢ່າງດຸເດືອດ./. (ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມການລາຍງານຈາກ ທ່ານ ລັດຖະພອນ ວົງພະຈັນ ຫົວໜ້າຫ້ອງການກະສິກຳ ແລະ ປ່າໄມ້ເມືອງໝື່ນ ໃຫ້ຮູ້ໃນວັນທີ 4 ສິງຫາ 2022 ນີ້ວ່າ: ປັດຈຸບັນ, ກະສິກອນເມືອງໝື່ນ ແຂວງວຽງຈັນ ໄດ້ປັກດຳເຂົ້ານາປີສຳເລັດແລ້ວ ໃນເນື້ອທີ່ທັງໝົດ 4.096 ກວ່າເຮັກຕາ ພາຍຫລັງທີ່ລົງມືປັກດຳມາແຕ່ທ້າຍເດືອນມິຖຸນາ 2022 ທຽບໃສ່ປີຜ່ານມາ, ສາມາດປະຕິບັດໄດ້ຕາມເນື້ອທີ່ທີ່ຄາດຄະເນໄວ້ ເນື່ອງຈາກຝົນຟ້າອາກາດເອື້ອອຳນວຍ ແລະ ຄາດວ່າ ຜົນຜະລິດເຂົ້ານາປີ ປີນີ້ຈະໄດ້ທັງໝົດ 18.434 ກວ່າໂຕນ. ສຳ ລັບແນວພັນເຂົ້າ ແມ່ນໄດ້ສົ່ງເສີມໃຫ້ປະຊາຊົນນຳໃຊ້ເຂົ້າພັນປັບປຸງ ເປັນຕົ້ນ ເຂົ້າທ່າດອກຄຳ 11, ທ່າດອກຄຳ 16 ແລະ ເຂົ້າພັນພື້ນເມືອງຈໍານວນໜຶ່ງ.

ຕໍ່ການຕ້ານແລ້ງຕ້ານຖ້ວມ, ຫ້ອງການກະສິກໍາ ແລະ ປ່າໄມ້ເມືອງໝື່ນ ໄດ້ມີການແຈ້ງການແນະນຳໃຫ້ກະສິກອນ ຕ້ອງມີການກຽມພ້ອມເພື່ອຮັບມືບໍ່ໃຫ້ມີຜົົນກະທົບ ແລະ ເສຍຫາຍຢ່າງຮ້າຍແຮງ ໂດຍສະເພາະແມ່ນການຈັດການບໍລິຫານນ້ຳ ໃນເຂດທີ່ມີຝາຍ ແລະ ອ່າງເກັບນ້ຳ ເມື່ອມີຝົນຕົກໜັກຕິດຕໍ່ກັນ ຕ້ອງຕິດຕາມຢ່າງໃກ້ຊິດຢູ່ຝາຍ ຫລື ປະຕູລະບາຍນ້ຳ ເພື່ອບໍ່ໃຫ້ມີປະລິມານນ້ຳຫລາຍຈົນເກີນຄວາມສາມາດບັນຈຸນ້ຳໃນອ່າງ ເພື່ອຫລີກລ່ຽງການເປ່ເພ ຫລື ບໍ່ໃຫ້ລົ້ນໃສ່ເຂດການຜະລິດຂອງກະສິກອນ ເຊິ່ງທົ່ວເມືອງ ມີຝາຍທັງໝົດ 42 ແຫ່ງ. ນອກຈາກນີ້, ຫ້ອງການກະສິກໍາ ແລະ ປ່າໄມ້ເມືອງຍັງໄດ້ແນະນຳໃຫ້ກະສິກອນ ຈົກໜອງ, ຈົກສະ ເພື່ອກັກເກັບນ້ຳໄວ້ໃຊ້ໃນຍາມຈຳເປັນ ຕື່ມອີກ.

ທ່ານ ຫົວໜ້າ ຫ້ອງການກະສິກໍາ ແລະ ປ່າໄມ້ເມືອງໝື່ນ ຍັງໃຫ້ຮູ້ຕື່ມວ່າ: ນອກຈາກການປູກເຂົ້າແລ້ວ ຍັງໄດ້ມີການກະຕຸກຊຸກຍູ້ສົ່ງເສີມໃຫ້ກະສິກອນ ປູກພືດເປັນສິນຄ້າຕື່ມອີກ ໂດຍໄດ້ມີການປະສານສົມທົບກັບບໍລິສັດ ໃຫ້ມາລົງທຶນ ໂດຍຜູ້ລົງທຶນສະໜອງແນວພັນ, ເຕັກນິກ ແລະ ການຕະຫລາດ ໃຫ້ກະສິກອນເປັນຜູ້ຜະລິດ ແລະ ສົ່ງຂາຍໃຫ້ບໍລິສັດໃນລາຄາທີ່ໝັ້ນຄົງ ແລະ ພືດທີ່ສົ່ງເສີມໃຫ້ປະຊາຊົນປູກສ່ວນຫລາຍແມ່ນບັນດາພືດຈຳ ນວນ 19 ຊະນິດ ທີ່ລັດຖະບານ ສປປ ລາວ ກັບລັດຖະບານ ສປ ຈີນ ເຊັນສັນຍາ ຊື້-ຂາຍນຳກັນເຊັ່ນ: ມັນຕົ້ນ, ສາລີແຂງ, ໝາກເດືອຍ ແລະ ພືດສະກຸນຖົ່ວຈຳນວນໜຶ່ງ. ອັນທີ່ພົ້ນເດັ່ນ ແມ່ນການປູກມັນຕົ້ນ ມີເນື້ອທີ່ເຖິງ 2.915 ເຮັກຕາ ທຽບໃສ່ປີຜ່ານມາເພີ່ມຂຶ້ນ1.112 ເຮັກຕາ ສະເລ່ຍສະມັດຖະພາບ 20-25 ໂຕນຕໍ່ເຮັກຕາ ຄາດຄະເນຜົນໄດ້ຮັບ 58.300-72.875 ໂຕນ ຍ້ອນວ່າຢູ່ເມືອງໝື່ນ ມີໂຮງງານຜະລິດແປ້ງມັນຕົ້ນ ເພື່ອຮອງຮັບ. ພ້ອມນີ້ ກໍໄດ້ມີຜູ້ປະກອບການ ນັກທຸລະກິດຈໍານວນໜຶ່ງ ເຂົ້າມາເກັບຊື້ມັນຕົ້ນດິບ ແລະ ຕາກແຫ້ງ ເພື່ອສົ່ງອອກໄປປະເທດໄທ ແລະ ສປ ຈີນ.

ພາບ-ຂ່າວ: ແໜງໜໍ່ຄຳ

ວັນທີ 4 ສິງຫານີ້, ທ່ານ ນາງ ຄໍາເພົາ ເອີນທະວັນ ເອກອັກຄະລັດຖະທູດ ສປປ ລາວ ປະຈຳ ສປ ຈີນໄດ້ໃຫ້ສຳ ພາດຕໍ່ນັກຂ່າວ CMG ວ່າ: ສປປ ລາວ ຄັດຄ້ານທຸກເຈດຈຳນົງທີ່ມຸ່ງຫວັງສ້າງສະຖານະການເພື່ອສ້າງ “ສອງປະເທດຈີນ” ຫຼື “ໜຶ່ງຈີນ, ໜຶ່ງໄຕ້ຫວັນ”.

ທ່ານ ນາງ ຄໍາເພົາ ເອີນທະວັນ ກ່າວວ່າ: ສປປ ລາວ ໄດ້ຕິດຕາມຢ່າງໃກ້ຊິດ ແລະ ສະແດງຄວາມເປັນຫ່ວງຕໍ່ສະ ພາບການຢູ່ຊ່ອງແຄບໄຕ້ຫວັນ, ລວມທັງການກະທຳທີ່ເປັນການຍຸແຍ່ ຊຶ່ງອາດຈະນໍາໄປສູ່ຄວາມເຄັ່ງຕຶງໃນພາກພື້ນ. ສປປ ລາວ ເວລາໃດກໍຖືວ່າ ສັນຕິພາບ ແລະ ສະຖຽນລະພາບຢູ່ທຸກພາກພື້ນໃນໂລກ ລວມທັງ ພາກພື້ນອາຊີ- ປາຊີ ຟິກ ເປັນເງື່ອນໄຂຕັດສິນ ແລະ ພື້ນຖານຕົ້ນຕໍ ໃຫ້ແກ່ການຮ່ວມມື ແລະການພັດທະນາຂອງບັນດາປະເທດໃນພາກພື້ນ ແລະ ໃນໂລກ. ສປປ ລາວ ຢືນຢັນຄືນນະໂຍບາຍອັນສະເໝີຕົ້ນສະເໝີປາຍຂອງຕົນໃນການສະໜັບສະໜູນ ນະໂຍບາຍຈີນດຽວ ແລະ ຖືວ່າໄຕ້ຫວັນ ເປັນສ່ວນໜຶ່ງທີ່ຕັດແຍກອອກບໍ່ໄດ້ຂອງ ສປ ຈີນ, ຄັດຄ້ານທຸກເຈດຈຳນົງທີ່ມຸ່ງຫວັງສ້າງສະຖານະການເພື່ອສ້າງ “ສອງປະເທດຈີນ” ຫຼື “ໜຶ່ງຈີນ, ໜຶ່ງໄຕ້ຫວັນ”. ສປປ ລາວ ຢ້ຳຄືນການສະໜັບສະໜູນນະໂຍບາຍຂອງລັດຖະບານ ສປ ຈີນ ໃນການທ້ອນໂຮມປະເທດຊາດໂດຍສັນຕິວິທີ.

ໃນວັນທີ 4 ສິງຫາ 2022 ທີ່ ພະນົມເປັນ, ກໍາປູເຈຍ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມລັດຖະ ມົນຕີຕ່າງປະເທດອາຊຽນ ກັບ ບັນດາປະເທດຄູ່ເຈລະຈາ ຊຶ່ງປະກອບດ້ວຍ: ກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ, ກອງປະຊຸມລັດ ຖະມົນຕີຕ່າງປະເທດອາຊຽນ-ຈີນ, ກອງປະ ຊຸມລັດຖະມົນຕີຕ່າງປະເທດອາຊຽນ- ສ.ອາເມລິກາ, ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ, ກອງປະຊຸມລັດຖະມົນຕີຕ່າງປະເທດອາຊຽນ- ສ.ເກົາຫຼີ, ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ, ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ, ກອງປະຊຸມລັດຖະມົນຕີຕ່າງປະເທດອາຊຽນ-ສະຫະພາບເອີຣົບ (ອີຢູ), ກອງປະຊຸມລັດຖະມົນຕີຕ່າງປະເທດອາຊຽນ-ການາດາ, ກອງປະຊຸມລັດຖະມົນຕີຕ່າງປະເທດອາຊຽນ- ລັດເຊຍ, ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ແລະ ກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 23 ຕາມລໍາດັບ.

ໃນນາມ ສປປ ລາວ ເປັນປະເທດປະສານງານການພົວພັນອາຊຽນ-ອົດສະຕຣາລີ, ທ່ານ ສະເຫຼີມໄຊ ກົມມະສິດ ໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ຮ່ວມກັບ ທ່ານ ນາງ ເພັນນີ ວອງ(Penny Wong), ລັດຖະມົນຕີຕ່າງປະເທດອົດສະຕຣາລີ. ກອງປະຊຸມ ໄດ້ສະແດງຄວາມຊົມເຊີຍຕໍ່ຂໍ້ລິເລີ່ມຂອງ ອົດສະຕຣາລີ ເພື່ອຊ່ວຍເຫລືອອາຊຽນ ມູນຄ່າ 154 ລ້ານໂດລາອົດສະຕຣາລີ ຊຶ່ງລວມມີ: ຂໍ້ລິເລີ່ມອົດສະຕຣາລີ ເພື່ອອະນາຄົດຂອງອາຊຽນ ມູນຄ່າ 124 ລ້ານໂດລາອົດສະຕຣາລີ, ທຶນການສຶກສາຈຳນວນ 100 ທຶນ ເພື່ອສົ່ງເສີມການສ້າງຜູ້ນຳອາຊຽນໃນ 4 ຂົງເຂດບູລິມະສິດ ພາຍໃຕ້ແນວຄວາມຄິດອາຊຽນ ກ່ຽວກັບອິນໂດ-ປາຊີຟິກ, ແລະ ຂໍ້ລິເລີ່ມກ່ຽວກັບການສົ່ງເສີມຄວາມສາມາດ ແລະ ການຫັນເປັນດີຈີຕອນໃນອະນາຄົດ. ກອງປະຊຸມ ຍັງໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ອົດສະຕຣາລີ 2020-2024 ເພື່ອຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ ທີ່ຖືກຍົກລະດັບໃນທ້າຍປີ 2021.

ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ຈີນ (2021-2025) ເພື່ອຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານອາຊຽນ-ຈີນ ທີ່ຖືກຍົກລະດັບໃນທ້າຍປີ 2021. ກອງປະຊຸມ ໄດ້ຮັບຊາບຂໍ້ສະເໜີຂອງຈີນ ເພື່ອອອກຖະແຫຼງການອາຊຽນ-ຈີນ ວ່າດ້ວຍການສົ່ງເສີມການພັດທະນາຮ່ວມກັນ ແລະ ຖະແຫຼງການຮ່ວມອາຊຽນ-ຈີນ ວ່າດ້ວຍການຮ່ວມມືດ້ານຄວາມໝັ້ນຄົງທາງສະບຽງອາຫານ, ຊຶ່ງມີແຜນຮັບຮອງເອົາຢູ່ກອງປະຊຸມສຸດຍອດອາຊຽນ-ຈີນ ຄັ້ງທີ 25 ໃນເດືອນພະຈິກ 2022 ນີ້. ໃນໂອກາດນີ້, ກອງປະຊຸມ ຍັງໄດ້ສະແດງຄວາມຊົມເຊີຍຕໍ່ຄວາມຄືບໜ້າຂອງການຈັດຕັ້ງປະຕິບັດຖະແຫຼງການ ວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້ (DOC), ລວມທັງການເຈລະຈາຮ່າງກົດແຫ່ງການປະພຶດໃນທະເລຈີນໃຕ້ ແລະ ໄດ້ເແລກປ່ຽນຄວາມຄິດເຫັນຕໍ່ບາງບັນຫາພົ້ນເດັ່ນຢູ່ໃນພາກພື້ນ ແລະ ສາກົນ.

ກອງປະຊຸມລັດຖະມົນຕີຕ່າງປະເທດອາຊຽນ-ສ.ອາເມລິກາ ໄດ້ເຫັນດີສືບຕໍ່ເຮັດວຽກຮ່ວມກັນ ເພື່ອກ້າວໄປສູ່ການຍົກລະດັບການພົວພັນຮ່ວມມືອາຊຽນ- ສ.ອາເມລິກາ ຂຶ້ນເປັນຄູ່ຮ່ວມຍຸດທະສາດຮອບດ້ານ ໃນໂອກາດກອງປະຊຸມສຸດຍອດອາຊຽນ-ສ.ອາເມລິກາ ຄັ້ງທີ 10 ທີ່ຈະຈັດຂຶ້ນໃນເດືອນພະຈິກ 2022. ພ້ອມນີ້, ກອງປະຊຸມ ໄດ້ຊຸກຍູ້ໃຫ້ສືບຕໍ່ຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊຽນ-ສ.ອາເມລິກາ ສະໄໝພິເສດ ທີ່ໄດ້ຈັດຂຶ້ນໃນວັນທີ 12-13 ພຶດສະພາ 2022 ທີ່ ນະຄອນຫຼວງ ວໍຊິງຕັນ ດີຊີ.

ກອງປະຊຸມລັດຖະມົນຕີຕ່າງປະເທດອາຊຽນ-ຍີ່ປຸ່ນ ໄດ້ເຫັນດີໃຫ້ເຮັດວຽກຮ່ວມກັນເພື່ອກະກຽມໃຫ້ແກ່ການຈັດກອງປະຊຸມສຸດຍອດສະເຫຼີມສະຫຼອງຄົບຮອບ 50 ປີແຫ່ງການພົວພັນອາຊຽນ-ຍີ່ປຸ່ນ ທີ່ຈະຈັດຂຶ້ນໃນເດືອນທັນວາ 2023 ທີ່ ໂຕກຽວ, ຍີ່ປຸ່ນ ລວມທັງການສ້າງກິດຈະກໍາຕ່າງໆເພື່ອຈັດຕັ້ງຜັນຂະຫຍາຍປີແຫ່ງມິດຕະພາບ ແລະ ການຮ່ວມມືອາຊຽນ-ຍີ່່ປຸ່ນ 2023.

ກອງປະຊຸມລັດຖະມົນຕີຕ່າງປະເທດອາຊຽນ-ສ.ເກົາຫຼີ ໄດ້ຊຸກຍູ້ໃຫ້ເລັ່ງລັດການລົງນາມບົດບັນທຶກຄວາມເຂົ້າໃຈ ກ່ຽວກັບການສ້າງຕັ້ງສູນນະວັດຕະກໍາດ້ານອຸດສາຫະກຳ ແລະ ການສ້າງຕັ້ງສູນຮ່ວມມືດ້ານວິທະຍາສາດ ແລະ ເຕັກໂນໂລຊີ ໃຫ້ສໍາເລັດໂດຍໄວ ເພື່ອປະກອບສ່ວນສົ່ງເສີມການຮ່ວມມືໃນຂົງເຂດດັ່ງກ່າວໃຫ້ຫຼາຍຂຶ້ນ.

ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ ໄດ້ຊຸກຍູ້ການຈັດຕັ້ງຜັນຂະຫຍາຍຜົນຂອງກອງປະຊຸມລັດຖະມົນຕີອາຊຽນ-ອິນເດຍ ສະໄໝພິເສດ ຈັດຂຶ້ນໃນວັນທີ 16 ມິຖຸນາ 2022 ທີ່ ນິວເດັນລີ ເພື່ອສະເຫຼີມສະຫຼອງການພົວພັນອາຊຽນ-ອິນເດຍ ຄົບຮອບ 30 ປີ ແນໃສ່ຮັດແໜ້ນການຮ່ວມມືຂຶ້ນສູ່ລະດັບໃໝ່ ໂດຍສະເພາະແມ່ນເພື່ອກ້າວໄປສູ່ການຍົກລະດັບການພົວພັນອາຊຽນ- ອິນເດຍ ຂຶ້ນເປັນຄູ່ຮ່ວມຍຸດທະສາດຮອບດ້ານ. ນອກນັ້ນ, ກອງປະຊຸມ ກໍໄດ້ຢໍ້າຄືນຄວາມສໍາຄັນຂອງການຈັດຕັ້ງປະຕິ ບັດບັນດາໂຄງການຮ່ວມມືດ້ານການເຊື່ອມຈອດຕ່າງໆ ໂດຍສະເພາະໂຄງການທາງດ່ວນສາມຝ່າຍ ອິນເດຍ-ມຽນມາ- ໄທ ແລະ ການຂະຫຍາຍທາງດ່ວນດັ່ງກ່າວເຊື່ອມຕໍ່ມາຍັງ ສປປ ລາວ, ກໍາປູເຈຍ ແລະ ຫວຽດນາມ ໃຫ້ສໍາເລັດໃນເວລາອັນຄວນ.

ກອງປະຊຸມລັດຖະມົນຕີຕ່າງປະເທດອາຊຽນ-ນິວຊີແລນ ໄດ້ຊຸກຍູ້ໃຫ້ສອງຝ່າຍເລັ່ງລັດການເຈລະຈາເພື່ອຍົກລະດັບສັນຍາເຂດການຄ້າເສລີອາຊຽນ-ອົດສະຕຣາລີ-ນີວຊີແລນ ໃຫ້ສໍາເລັດໂດຍໄວ. ນອກນັ້ນ, ນິວຊີແລນ ໄດ້ໃຫ້ຄວາມໝາຍໝັ້ນທີ່ຈະສືບຕໍ່ສະໜັບສະໜູນການສ້າງຂີດຄວາມສາມາດໃຫ້ອາຊຽນ ໃນການຈັດຕັ້ງປະຕິບັດສັນຍາການຄ້າເສລີອາຊຽນ-ອົດສະຕຣາລີ-ນິວຊີແລນ ລວມທັງການສ້າງຂີດຄວາມສາມາດໃຫ້ແກ່ນັກເຈລະຈາວຽກງານການຄ້າຂອງອາຊຽນ.

ກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ໄດ້ສະແດງຄວາມຍິນດີຕໍ່ການພົວພັນຮ່ວມມືອາຊຽນ-ອີຢູ ຄົບຮອບ 45 ປີ ພ້ອມທັງເຫັນດີໃຫ້ເລັ່ງລັດການກະກຽມ ເພື່ອຈັດກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ອີຢູ ຄົບຮອບ 45 ປີ, ຊຶ່ງມີແຜນຈັດຂຶ້ນໃນເດືອນທັນວາ 2022 ທີ່ ບຣຸກແຊນ, ປະເທດແບນຊິກ.

ກອງປະຊຸມລັດຖະມົນຕີຕ່າງປະເທດອາຊຽນ-ການາດາ ໄດ້ເຫັນດີຈັດກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ການາດາ ຄົບຮອບ 45 ປີ ໃນທ້າຍປີ 2022 ເພື່ອທົບທວນການຮ່ວມມືໃນໄລຍະຜ່ານມາ ພ້ອມທັງວາງທິດທາງ ເພື່ອຮັດແໜ້ນການຮ່ວມມືໃນຕໍ່ໜ້າ ແລະ ເພື່ອຍົກລະດັບການພົວພັນອາຊຽນ- ການາດາ ຂຶ້ນສູ່ລະດັບໃໝ່.

ກອງປະຊຸມລັດຖະມົນຕີຕ່າງປະເທດອາຊຽນ-ລັດເຊຍ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມສຸດຍອດອາຊຽນ-ລັດເຊຍ ເພື່ອສະເຫຼີມສະຫຼອງການຮ່ວມມືອາຊຽນ-ລັດເຊຍ ຄົບຮອບ 30 ປີ ໃນເດືອນ ຕຸລາ 2021 ທີ່ຜ່ານມາ ພ້ອມທັງຊຸກຍູ້ໃຫ້ສືບຕໍ່ຈັດຕັ້ງຜັນຂະ ຫຍາຍຜົນຂອງກອງປະຊຸມດັ່ງກ່າວ ກໍຄືບັນດາກິດຈະກໍາຮ່ວມມືໃນແຜນປະຕິບັດງານໃຫ້ມີປະສິດທິຜົນຫຼາຍຂຶ້ນຕື່ມ ລວມທັງການຈັດຕັ້ງຜັນຂະຫຍາຍປີແຫ່ງການຮ່ວມມືອາຊຽນ-ລັດເຊຍດ້ານວິທະ ຍາສາດ ແລະ ເຕັກນິກ ໃນປີ 2022 ນີິ້.

ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ເປັນກອງປະຊຸມຄັ້ງທຳອິດ ພາຍຫຼັງທີ່ອັງກິດໄດ້ຖືກຮັບຮອງເປັນຄູ່ເຈລະຈາຂອງອາຊຽນ ໃນປີ 2021. ກອງປະຊຸມ ໄດ້ຮັບຮອງເອົາແຜນປະຕິບັດງານການຮ່ວມມືອາຊຽນ-ອັງກິດ ໄລຍະ 2022-2026 ເພື່ອເປັນພື້ນຖານໃນການສົ່ງເສີມການຮ່ວມມືໃນຕໍ່ໜ້າ. ອັງກິດ ໄດ້ໃຫ້ການຊ່ວຍເຫຼືອອາຊຽນໃນການຮັບມືກັບການແຜ່ລະບາດຂອງພະຍາດໂຄວິດ-19 ໂດຍການປະກອບສ່ວນ 1 ລ້ານປອນ ເຂົ້າໃນກອງທຶນອາຊຽນ ເພື່ອຮັບມືກັບພະຍາດໂຄວິດ-19 ແລະ 4.8 ລ້ານປອນໃຫ້ແກ່ ກໍາປູເຈຍ, ສປປ ລາວ, ມຽນມາ ແລະ ຫວຽດນາມ ເພື່ອຮັບມືກັບການແຜ່ລະບາດຂອງພະຍາດໂຄວິດ-19.

ກອງປະຊຸມລັດຖະມົນຕີຕ່າງປະເທດອາຊຽນບວກສາມ (ສປ.ຈີນ, ຍີ່ປຸ່ນ ແລະ ສ.ເກົາຫຼີ) ຄັ້ງທີ 23 ໄດ້ສະແດງຄວາມຍິນດີຕໍ່ການຮ່ວມມືໃນຂອບອາຊຽນບວກສາມໃນໄລຍະ 25 ປີ ທີ່ຜ່ານມາ ພ້ອມທັງຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບອາຊຽນບວກສາມ ໃນການເປັນເວທີການຮ່ວມມືທີ່ສໍາຄັນຂອງພາກພື້ນ ຊຶ່ງໄດ້ມີບົດບາດສໍາຄັນໃນການຮັບມືກັບສິ່ງທ້າທາຍຕ່າງໆເຊັ່ນ: ພະຍາດລະ ບາດ, ວິກິດການທາງການເງິນ, ຄວາມຂາດແຄນດ້ານສະບຽງອາຫານ ແລະ ອື່ນໆ. ກອງປະຊຸມ ໄດ້ຮັບຮອງເອົາແຜນວຽກການຮ່ວມມື ສໍາລັບໄລຍະ 2023- 2027 ເພື່ອເສີມຂະຫຍາຍການຮ່ວມມືໃຫ້ນັບມື້ນັບເຂັ້ມແຂງຍິ່ງຂຶ້ນ.

ໃນວັນດຽວກັນ ທ່ານຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍກັບ ລັດຖະມົນຕີຕ່າງປະເທດອົດສະຕຣາລີ, ລັດຖະມົນຕີ ຊີ້ນຳວຽກງານອາຊີ ແລະ ຕາເວັນອອກກາງ, ກະຊວງການຕ່າງປະເທດ ອັງກິດ ແລະ ລັດຖະມົນຕີຕ່າງປະເທດຣັດເຊຍ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

ວັນທີ 4 ສີງຫາ 2022 ນີ້ ທ່ານ ທອງລຸນສີສຸລິດ ປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງມາຢ້ຽມ ຢາມ ແລະເຮັດວຽກຢູ່ແຂວງຫຼວງພະບາງ ໂດຍມີການນຳຂອງແຂວງໃຫ້ການຕ້ອນຮັບຢ່າງອົບອຸ່ນ ຢູ່ເຂດແດນລະຫວ່າງແຂວງໄຊຍະບູລີ ກັບແຂວງຫຼວງພະບາງ ໂອກາດນີ້ ທ່ານປະທານປະເທດ ພ້ອມດ້ວຍຄະນະ ໄດ້ເຂົ້າຢ້ຽມຢາມຟາມໝູແບບປິດ ຂອງຄອບຄົວ ທ່ານ ສຸລິໂຍ ໄຊວິສິດ ຫົວໜ້າຫ້ອງການກະສິກຳ ແລະ ປ່າໄມ້ເມືອງນານ ຕັ້ງຢູ່ບ້ານຫ້ວຍຫຼາເມືອງນານ ເປັນການລົງທືນຮ່ວມລະ ຫວ່າງປະຊາຊົນກັບບໍລິສັດຊີພີຈຳກັດ ໂດຍໄດ້ດຳເນີນການລ້ຽງໝູ ມາແຕ່ປີ 2019 ປັດຈຸບັນມີເຮືອນໝູ 2 ຫຼັງ ສາມາດບັນຈຸໝູໄດ້ 1.250 ໂຕ ສາມາດຂາຍໝູອອກປີໜື່ງສອງຊຸດ ສ້າງກຳໄລສຸດທິປີໜື່ງໄດ້ປະມານ 80-90 ລ້ານກີບ.

ຈາກນັ້ນ ໄດ້ໄປຢ້ຽມຊົມຈຸດພັດທະນາພື້ນຖານໂຄງລ່າງຂອງເມືອງ ພ້ອມທັງໄດ້ພົບປະໂອ້ລົມພະນັກງານຫຼັກແຫຼ່ງ ແລະອົງການປົກຄອງບ້ານພາຍໃນເທດສະບານເມືອງ, ເຊີ່ງໄດ້ຮັບຟັງການລາຍງານສະພາບໂດຍຫຍໍ້ຈາກ ທ່ານ ຄຳເກັ່ງ ຈັນທະວີສຸກ ເຈົ້າເມືອງໆນານ ທ່ານໄດ້ຍົກໃຫ້ຜົນສຳເລັດທີ່ອົງການປົກຄອງເມືອງຍາດມາໄດ້ໃນແຕ່ລະຂົງເຂດ ອັນເປັນພືນຖານເຮັດໃຫ້ເສດຖະກິດມີການຂະຫຍາຍຕົວໃນລະດັບ 5,65% ຕໍ່ປີ ສະເລ່ຍລາຍຮັບໄດ້ປະມານ 13 ລ້ານ 3 ແສນກີບ ຫຼື ປະມານ 1.400 ໂດລາຕໍ່ຄົນຕໍ່ປີ, ອັນພົ້ນເດັ່ນແມ່ນການປູກເຂົ້ານາ ເຊີ່ງສາມາດເຫຼືອກີນ ແລະ ສົ່ງອອກເປັນສີນຄ້າ, ຄຽງຄູ່ກັບການປູກພືດອຸດສາຫະກຳ ແລະລ້ຽງສັດເປັນສີນຄ້າ ໄດ້ມີທັງປະຊາຊົນ ແລະນັກທຸລະກິດພາຍໃນ ແລະຕ່າງປະເທດມາລົງທືນຫຼາຍໂຄງການ.

ໂອກາດນີ້ ທ່ານ ທອງລຸນ ສີສຸລິດ ໄດ້ຍ້ອງຍໍຊົມເຊີຍຜົນງານທີ່ອົງການປົກຄອງເມືອງຍາດມາໄດ້ ທັງເນັ້ນໃຫ້ສືບຕໍ່ໃນການພັດທະນາເສດຖະ ກິດ-ສັງຄົມຂອງເມືອງ ໃຫ້ບັນລຸຕາມແຜນການທີ່ວາງໄວ້ ຄຽງຄູ່ກັບການຊອກຮູ້ຮໍ່າຮຽນ ບົດຮຽນທີ່ດີຈາກບ່ອນອື່ນ ເພື່ອມາພັດທະນາເມືອງນານ ໃຫ້ນັບມື້ດີຂື້ນເປັນກ້າວໆ.

ພາຍຫຼັງສຳເລັດການຢ້ຽມຢາມ ແລະເຮັດວຽກຢູເມືອງນານ ທ່ານ ທອງລຸນ ສີສຸລິດ ປະທານປະເທດພ້ອມດ້ວຍຄະນະ ໄດ້ເດີນທາງໄປພົບປະໂອ້ລົມການນຳຫຼັັກແຫຼ່ງຂອງເມືອງງອຍ ແລະພະນັກງານສູນເສຍອົງຄະ 19 ຕັ້ງຢູ່ເມືອງງອຍ ພ້ອມທັງມອບເງີນ ແລະພາຫະນະລົດໃຫຍ່ 1 ຄັນ ເພື່ອຊຸກຍູ້ການເຄື່ອນໄຫວຽກງານ ແລະການດຳລົງຊີວິດ ຂອງພະນັກງານປະຕິວັດອາວຸໂສ ແລະພະນັກງານເສຍອົງຄະ ຢູ່ສູນເສຍອົງຄະ 19 ຕື່ມອີກ.

ເນື່ອງໃນໂອກາດ ສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ 2022 ແລະ ວັນສ້າງຕັ້ງແນວລາວສ້າງຊາດຄົບຮອບ 72ປີ, ວັນລັດຖະທໍາມະນູນແຫ່ງຊາດ ຄົບຮອບ 31ປີ ຂໍເຊີນຊວນບັນດາອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ການຈັດຕັ້ງສັງຄົມ, ບຸກຄົນ, ນິຕິບຸກຄົນ ແລະ ປະຊາຊົນທຸກຊັ້ນຄົນ ເຂົ້າຮ່ວມທ່ຽວຊົມງານວາງສະແດງສິນຄ້າພາຍໃນ ແລະ ອາຫານ-ເຄື່ອງດື່ມ ທີ່ສູນກາງແນວລາວສ້າງຊາດ ລະຫວ່າງວັນທີ 11-13 ສິງຫາ 2022 ເຊິ່ງແມ່ນສູນກາງແນວລາວສ້າງຊາດ ຮ່ວມກັບສະມາຄົມໃຫຍ່ຊາວຫວຽດນາມ ຈັດຂຶ້ນ ແລະ ມີຫຼາຍພາກສ່ວນເຂົ້າຮ່ວມງານວາງສະແດງສິນຄ້າດັ່ງກ່າວ.

ພາຍໃນງານຈະມີກິດຈະກໍາ ຖາມ-ຕອບຄວາມຮູ້ກ່ຽວກັບຄວາມສາມັກຄີມິດຕະພາບ ລາວ-ຫວຽດນາມ, ຄວາມຮູ້ກ່ຽວກັບແນວລາວສ້າງຊາດ ແລະ ຄວາມຮູ້ຮອບຕົວ ເພື່ອເອົາລາງວັນຈາກຄະນະຮັບຜິດຊອບ; ມີການວາງສະແດງສິນຄ້າ ຂອງລາວ ແລະ ຫວຽດນາມ ໂດຍເນັ້ນໃສ່ເຄື່ອງຫັດຖະກໍາ, ກະສິກໍາ, ອາຫານ-ເຄື່ອງດື່ມ, ຮູບພາບການພົວພັນຮ່ວມມື ລາວ-ຫວຽດນາມ. ພິເສດຈະມີການປະກວດອາຫານແຊບ ໃນວັນທີ 13 ສິງຫາ 2022 ເລີ່ມແຕ່ 9:00-11:00ໂມງ.

ສະນັ້ນ, ເຊີນຊວນທຸກພາກສ່ວນມາທ່ຽວຊົມ ແລະ ເຂົ້າຮ່ວມກິດຈະກໍາດັ່ງກ່າວ.

ຊົມເຊີຍປີສາມັກຄີມິດຕະພາບ ລາວ-ຫວຽດນາມ ຢ່າງສຸດໃຈ

ສະຫະພັນເຕະບານອາຊີ (AFC) ໄດ້ສົ່ງຈົດໝາຍຢືນຢັນວ່າ ທະວີບອາຊີໄດ້ຮັບສິດ 8 ປະເທດເຄິ່ງ ເຂົ້າຮ່ວມການແຂ່ງຂັນບານເຕະໂລກ 2026 ຮອບສຸດທ້າຍ.

ສະຫະພັນບານເຕະອາຊີ ຫຼື AFC ໄດ້ສົ່ງຈົດໝາຍຢືນຢັນວ່າທະວີບອາຊີ ຈະໄດ້ຮັບສິດສົ່ງປະເທດເຂົ້າຮ່ວມການແຂ່ງຂັນບານເຕະໂລກ 2026 ຮອບສຸດທ້າຍທີ່ ສະຫະລັດອາເມຣິກາ, ການາດາ ແລະ ເມັກຊິກ ທັງໝົດ 8 ປະເທດ ແລະ ສິດການຫຼິ້ນຮອບຮອບຄັດເລືອກ Intercontinene ອີກ 1 ປະເທດ ໂດຍໄດ້ຮັບການຮັບຮອງຈາກຄະນະກໍາມະການບໍລິຫານ AFC ເມື່ອວັນທີ 29 ກໍລະກົດ 2022 ທີ່ຜ່ານມາ.

ໂດຍການແຂ່ງຂັນເຕະບານໂລກ 2026 ຮອບຄັດເລືອກ ຂົງເຂດອາຊີ ຈະແບ່ງອອກເປັນທັງໝົດ 4 ຮອບດັ່ງນີ້:

• ຮອບທຳອິດ: ນໍາ 22 ປະເທດທີ່ຢູ່ອັນດັບທີ 26-47 ຂອງທະວີບ ຈັບສະຫຼາກແຂ່ງຂັນແບບ 2 ນັດ ໃນປະເທດ-ນອກປະເທດ ໃນວັນທີ 12 ແລະ 17 ຕຸລາ 2023 ເພື່ອຫາທີມຊະນະຈໍານວນ 11 ທີມ ຜ່ານເຂົ້າຮອບຄັດເລືອກຮອບສອງ.

• ຮອບທີ 2: ນໍາ 25 ປະເທດທຳອິດຂອງທະວີບ ບວກກັບ 11 ປະເທດ ຈາກຮອບຄັດເລືອກຮອບທໍາອິດ ລວມເປັນ 36 ປະເທດ ແລ້ວນໍາມາແບ່ງອອກເປັນ 9 ກຸ່ມ ແລະ ແຂ່ງຂັນແບບພົບກັນໝົດໃນປະເທດ ແລະ ນອກປະເທດ ຈໍານວນ 6 ນັດ ແລະ ນໍາເອົາແຊັມກຸ່ມ. ກັບ ຮອງແຊັມກຸ່ມ ຜ່ານຮອບຄັດເລືອກ ຮອບ 3 ທີມ ໂດຍໂປຣແກຣມມີດັ່ງນີ້:

 ນັດທີ 1-2: 16-21 ພະຈິກ 2023

 ນັດທີ 3-4: 21-26 ມີນາ 2024

 ວັນທີ 5-6: 6-11 ມິຖຸນາ 2024

• ຮອບທີ 3: ນໍາ 18 ປະເທດທີ່ໄດ້ຜ່ານເຂົ້າຮອບ 3 ມາແບ່ງອອກເປັນ 3 ກຸ່ມ ກຸ່ມລະ 6 ທີມ ແລະ ແຂ່ງຂັນແບບພົບກັນໝົດ ໃນປະເທດ ແລະ ນອກປະເທດ.

 ນັດທີ 1-2: 5-10 ກັນຍາ 2024

 ນັດທີ 3-4: 10-15 ຕຸລາ 2024

 ນັດທີ 5-6: 14-19 ພະຈິກ 2024

 ນັດທີ 7-10: ມີນາ-ມິຖຸນາ 2025

ໂດຍແຊັມ ກັບ ຮອງແຊັມຂອງກຸ່ມຈາກຮອບນີ້ຈໍານວນ 6 ທີມ ຈະໄດ້ຮັບສິດໄປຫຼິ້ນຮອບສຸດທ້າຍບານໂລກ 2026 ທັນທີ.

ຂະນະທີ່ທີມອັນດັບ 3-4 ຂອງທັງ 3 ກຸ່ມ ທັງໝົດ 6 ທີມ ຈະມາແຂ່ງຂັນຮອບໄປ-ກັບ ໂດຍຈະ ແບ່ງອອກເປັນ 2 ກຸ່ມ ກຸ່ມລະ 3 ທີມ ແລະ ຈະແຂ່ງຂັນແບບພົບກັນໝົດແບບນັດດຽວຈົບ ໃນໄລຍະເດືອນ ກັນຍາ – ພະຈິກ 2025

ໂດຍທີມທີ່ໄດ້ແຊັມກຸ່ມ ຈະເປັນທີມລໍາດັບທີ 7 ແລະ 8 ທີ່ໄດ້ເຂົ້າຮ່ວມການແຂ່ງຂັນເຕະບານໂລກຮອບສຸດທ້າຍ.

ແລະ ທີມອັນດັບ 2 ຂອງທັງສອງກຸ່ມ ຈະມາເຕະແບບໄປ-ກັບກັນແບບໃນປະເທດ ແລະ ນອກປະເທດ ໃນວັນທີ 5-10 ກັນຍາ 2024 ເພື່ອຫາທີມຊະນະໄປແຂ່ງຂັນກັບຕົວແທນຈາກທະວີບອື່ນຕໍ່ໄປ

Inews ລາຍງານວ່າ ເຣດບູລ ຊັລບວກ ໄດ້ຕັ້ງຄ່າຕົວຂອງດາວຮຸ່ງເນື້ອຫອມຢ່າງ ເບນຈາມິນ ເຊສໂກ ໄວ້ບໍ່ຕໍ່າກວ່າ 45 ລ້ານປອນ.

ນັກເຕະອາຍຸ 19 ປີ ເລີ່ມເປັນທີ່ຈັບຈ້ອງຂອງຫຼາຍສະໂມສອນໃນທົ່ວເອີຣົບ ຫຼັງສ້າງຜົນງານຍິງ 11 ປະຕູກັບສົ່ງໃຫ້ໝູ່ຍິງ 7 ຄັ້ງ ຈາກການລົງສະໜາມ 37 ນັດ ໃຫ້ກັບ ຊັລບວກ ເມື່ອລະດູການທີ່ຜ່ານມາ.

ຍິ່ງໄປກວ່ານັ້ນ ດາວເຕະຊາວສະໂລເວນີ ຫາກໍສະແດງຝີຕີນໃຫ້ເປັນຂວັນຕາຂອງກອງເຊຍບານທີມໃຫຍ່ ໃນເກມອຸ່ນເຄື່ອງກັບ ລີເວີພູລ ທີ່ເຂົາຍິງປະຕູດຽວຊ່ວຍໃຫ້ທີມເອົາຊະນະໄປ.

ກ່ອນໜ້ານີ້ ມີລາຍງານວ່າ ແມນເຊັສເຕີ ຢູໄນເຕັດ ໄດ້ເຂົ້າເຈລະຈາກັບຕົວແທນຂອງນັກເຕະຢ່າງ ເອວວິສ ບາຊາໂນວິຊ ແລ້ວ ແຖມພວກເຂົາຍັງເລີ່ມຫາລືກັບ ຊັລບວກ ແລ້ວດ້ວຍ.

ຢ່າງໃດກໍຕາມ ຫຼ້າສຸດມີລາຍງານວ່າ ເຊວຊີ ແລະ ນິວຄາສເຊິນ ຢູໄນເຕັດ ກໍໄດ້ເຂົ້າເຈລະຈາກັບຕົວແທນຂອງ ເຊສໂກ ແລ້ວເຊັ່ນກັນ ແຕ່ ຊັລບວກ ຍັງຕ້ອງການຮັກສານັກເຕະຄົນນີ້ເອົາໄວ້ ເວັ້ນເສຍແຕ່ວ່າໄດ້ຮັບຂໍ້ສະເໜີບໍ່ຕໍ່າກວ່າ 45 ລ້ານປອນ.

ລາຍງານກ່າວວ່າ ຊັລບວກ ເຊື່ອວ່າການປ່ອຍ ເຊສໂກ ອອກໄປຕອນນີ້ຍັງຖືວ່າໄວເກີນໄປ ເມື່ອພິຈາລະນາຈາກຂໍ້ຕົກລົງຂອງ ດາວິນ ນູນເຢສ ທີ່ອາດມີຄ່າຕົວພຽງແຕ່ 20 ລ້ານປອນເມື່ອ 12 ເດືອນກ່ອນ.

ທັງນີ້ ຊັລບວກ ກໍບໍ່ຕົກຢູ່ພາຍໃຕ້ຄວາມກົດດັນເລື່ອງສະຖານະການຂອງ ເຊສໂກ ເນື່ອງຈາກນັກເຕະຄົນນີ້ຍັງມີສັນຍາເຖິງປີ 2026.

UEFA ໄດ້ຢືນຢັນແລ້ວວ່າຈະມີການນໍາລະບົບຊ່ວຍຈັບລໍ້າໜ້າມາໃຊ້ໃນເຕະບານແຊັມປຽນລີກລະດູການນີ້ ເລີ່ມຕັ້ງແຕ່ຮອບແບ່ງກຸ່ມເປັນຕົ້ນໄປ

ເຕັກໂນໂລຊີຊ່ວຍຈັບລໍ້າໜ້າແບບເຄິ່ງອັດຕະໂນມັດ ໄດ້ຮັບການອະນຸມັດໂດຍ FIFA ໃນເດືອນແລ້ວນີ້ ເພື່ອນໍາໄປໃຊ້ໃນການແຂ່ງຂັນເຕະບານໂລກທີ່ປະເທດກາຕາທ້າຍປີ ເຊິ່ງຈະປະກອບໄປດ້ວຍກ້ອງຫຼາຍໜ່ວຍທີ່ລໍຄອຍຈັບຄວາມເຄື່ອນໄຫວຂອງນັກເຕະ ແລະ ຈັງຫວະຈ່າບບານສໍາຄັນໆ.

ທີ່ຜ່ານມາ ມັກເກີດການຕັດສິນອັນເປັນທີ່ຖົກຖຽງຂຶ້ນຫຼວງຫຼາຍ ການຕີເສັ້ນໃຫ້ເຫັນໂດຍຜ່ານໜ້າຈໍວ່າລໍ້າໜ້າພຽງແຕ່ໜ້ອຍດຽວນັ້ນ ມັກຈະພົບສຽງວິຈານວ່າຈົນຖືກເອີ້ນວ່າ “ລໍ້າໜ້າເພາະຂີ້ແຮ້”

ຢ່າງໃດກໍຕາມ UEFA ບອກວ່າ ລະບົບທີ່ເຮັດຂຶ້ນມາເປັນພິເສດນັ້ນ ຈະຊ່ວຍຕັດສິນຈັງຫວະລໍ້າໜ້າໃຫ້ແມ່ນຢໍາ ແລະ ວ່ອງໄວຍິ່ງຂຶ້ນ ໂດຍລະບົບທີ່ວ່າສາມາດຈັບຄວາມເຄື່ອນໄຫວໄດ້ເຖິງ 29 ຈຸດເທິງຮ່າງກາຍຂອງນັກເຕະ.

ເຕັກໂນໂລຊີຊ່ວຍຂັບລໍ້າໜ້ານັ້ນ ຈະຖືກນຳມາໃຊ້ໃນການແຂ່ງຂັນ Super Cup ລະຫວ່າງ ຣິວ ມາດຣິດ ແລະ ໄອທຣັກ ແຟຣງເຟິດ ໃນວັນທີ 10 ສິງຫານີ້ ຈາກນັ້ນ ກໍຈະນໍາມາໃຊ້ໃນເກມຮອບແບ່ງກຸ່ມແຕ່ວັນທີ 6 ກັນຍາເປັນຕົ້ນໄປ.

” UEFA ຊອກຫາເຕັກໂນໂລຊີໃໝ່ໆຢູ່ສະເໝີ ເພື່ອນໍາມາປັບປຸງ ແລະ ຊ່ວຍເຫຼືອການຕັດສິນຂອງກໍາມະການ ” ໂຣແບໂຕ ໂຣເຊດຕິ ຫົວໜ້າຜູ້ຕັດສິນຂອງ UEFA ກ່າວ.

” ລະບົບໃໝ່ນີ້ ຈະຊ່ວຍໃຫ້ທີມງານ VAR ໄດ້ຕັດສິນຈັງຫວະລໍ້າໜ້າໄດ້ໄວຍິ່ງຂຶ້ນ ແລະ ແມ່ນຢໍາຫຼາຍຂຶ້ນ ຊ່ວຍເພີ່ມຄວາມໄຫຼລື່ນຂອງການແຂ່ງຂັນ ແລະ ຄວາມສະໝໍ່່າສະເໝີໃນການຕັດສິນ “

ຟີຟາ ໄດ້ທົດສອບລະບົບຊ່ວຍຈັບລໍ້າໜ້າມາ 188 ຄັ້ງນັບຕັ້ງແຕ່ປີ 2020 ໂດຍມີການນໍາໄປທົດສອບໃນ ແຊມປຽນລີກ ລະດູການກ່ອນ ຮອບຕັດເຊືອກຂອງແຊັມປຽນລີກເຕະບານເພດຍິງ, ເອີໂຣ 2022 ແລະ ລວມເຖິງນັດຊີງຊະນະເລີດຂອງເຕະບານສະໂມສອນລາຍການອື່ນໆ.

Betfair ຈັດໃຫ້ມີການລົງຄະແນນສຽງເນື່ອງໃນວາລະຄົບຮອບ 30 ປີຂອງການສະຖາປະນາ ພຣີເມຍລີກ ແລະ ຈາກຜູ້ຮ່ວມລົງຄະແນນສຽງຫຼາຍກວ່າ 1,0.0 ຄົນ ອະດີດກອງໜ້າທີມຊາດຝຣັ່ງ ກໍຄອງອັນດັບ 1 ຈາກອັດຕາສ່ວນ 15% ໂດຍມີ ຄຣິສເຕຍໂນ ໂຣນັນໂດ ຕາມມາເປັນອັນດັບສອງ ແຕ່ມີການຊີ້ແຈງລາຍລະອຽດວ່າເຫດທີ່ ອອງຣີ ຄອງຕຳແໜ່ງດັ່ງກ່າວ ເປັນຜົນມາຈາກຜູ້ຮ່ວມລົງຄະແນນເກືອບ 15% ເປັນກອງເຊຍບານທີ່ອາໄສຢູ່ໃນລອນດອນ.

ສໍາລັບ ອອງຣີ ຜ່ານການຄ້າຝີຕີນກັບ ອາເຊນອລ 2 ສະໄໝ ໂດຍລົງສະໜາມໃນທຸກລາຍການ 377 ນັດ ແລະ ຍິງໄດ້ 228 ປະຕູ ຄອງຕໍາແໜ່ງດາວຍິງສູງສຸດຕະຫຼອດການຂອງສະໂມສອນ ແລະ ເປັນສະມາຊິກບໍ່ເສຍໃຫ້ໃຜໃນລະດູການ 2003/04 ເຊັ່ນກັນ.

ດ້ານ ໂຣນັນໂດ ເຊິ່ງຄວ້າອັນດັບ 2 ມີການເປີດເຜີຍວ່າໄດ້ຄະແນນສຽງເປັນສ່ວນໃຫຍ່ຈາກກອງເຊຍໃນອາຍຸ 45-54 ປີ ເໜືອກວ່ານັກເຕະທຸກຄົນ.

ຂະນະດຽວກັນ Betfair ຍັງເປີດເຜີຍຊື່ 20 ນັກເຕະທີ່ໄດ້ຄະແນນສຽງສູງສຸດດ້ວຍ ໂດຍໃນຈໍານວນນີ້ ມີດາວເຕະທີມແມນຢູ ຕິດໄຜຫຼາຍທີ່ສຸດເຖິງ 8 ຄົນ.

1. ເທຍຣີ ອອງຣີ

2. ຄຣິສເຕຍໂນ ໂຣນັນໂດ

3. ອະລັນ ເຊຍເຣີ

4. ເອຣິກ ຄັນໂຕນ່າ

5. ສະຕີເວັນ ເຈີຣາດ

6. ເດນນິສ ເບີກແຄມ

7. ໂມ ຊາລາ

8. ເຄວິນ ເດີ ບຣອຍ

9. ໄຣອັນ ກິກ

10. ເຊຄິໂອ ອະເກວໂຣ

11. ແຟຣງ ແລມພາດ

12. ປີເຕີ ຊະໄມເຄິນ

13. ພອລ ສະໂຄລ

14. ເວນ ຣູນີ

15. ຣອຍ ຄີນ

16. ດີດີເຢ່ ດຣອກບາ

17. ປາທຣິກ ວິເອຣ່າ

18. ແວັງຊອງ ກອງປານີ

19. ປີເຕີ ເຊັກ

20. ຣິໂອ ເຟີດີນານ