ຕາມ​ຂ່າວ​ຈາກ ​ຊິນ​ຮວາ, ວັນ​ທີ 4​ ສິງຫາ​ນີ້, ສຳນັກງານສາທາລະນະ​ສຸກກາ​ນາ​ດາ (PHAC) ລາຍ​ງານຍອດ​ຜູ້​ຕິດ​ເຊື້ອພະຍາດ ໝາກສຸກ​ລີງ ສະ​ສົມ 890 ຄົນ ​ໃນ​ນີ້​ຢູ່​ລັດ ອອນ​​ແທຣີ​ໂອ (Ontario) 423 ຄົນ, ລັດ​ວິ​ເບ​ກ (Quebec) 373ຄົນ, ລັດ​ບຣີຕິ​ສ ​ໂຄ​ລຳ​ເບຍ (British Columbia) 78ຄົນ, ລັດອໍລ​ເບີ​ຕາ (Alberta) 13 ຄົນ, ລັດຊັສ​ແຄ​ດ​ເຊ​ວັນ (Saskatchewan) 2 ຄົນ ​ແລະ ​ເຂດ​ແດນ​ຢູຄອນ (Yukon) ອີກ 1 ​ຄົນ. ປັດຈຸບັນກາ​ນາ​ດາ ​ໄດ້​ແຈກ​ຢ່າ​ຍວັກ​ຊິນອິມວາ​ມູນ (Imvamune) ຫລາຍ​ກວ່າ 70.000​ ໂດ​ສ ​​ເພື່ອ​ຮັບ​ມື​ດ້ານ​ສາທາລະນະ​ສຸກຢ່າງ​ຮີບ​ດ່ວນ.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ ​ຊິນ​ຮວາ, ວັນ​ທີ 4​ ສິງຫາ​ນີ້, ບໍລິສັດໄຟຟ້າຈີນຈໍາກັດ ໄດ້ເປີດເຜີຍແຜນການກໍ່ສ້າງໂຄງການຕາ​ຂ່າຍສະໜອງ ໄຟຟ້າກະ​ແສ​ຕົງ ​(DC) ແຮງ​ດັນ​ສູງພິ​ເສດ (UHV) ຊຸດໃໝ່ ໃນ​ໄລຍະ 6​ ເດືອນ​ທ້າຍ​ປີ​ນີ້ ຊຶ່ງ​ໃຊ້​ເງິນລົງທຶນຫລາຍ​ກວ່າ 150 ຕື້​ຢວນ ​ແລະ ​ຈະ​ເພີ່ມ​ທະວີ​ບົດບາດ​ ຂອງ​ບໍລິສັດ​ໃນ​ການຂະຫຍາຍການລົງທຶນດ້ານ​ການ​ສະໜອງກະ​ແສໄຟຟ້າ​ແຮງ​ສູງ ຄັ້ງ​ໃຫຍ່ ຫລັງ​ຈາກບໍລິສັດເດີນ​ໜ້າກໍ່ສ້າງ​ໂຄງການດັ່ງກ່າວຈຳນວນ 11​ ໂຄງການ ຊຶ່ງ​ມີ​ມູນ​ຄ່າ 90 ຕື້​ຢວນ ​ແລະ ​ສາຍ​ສົ່ງ​ໄຟຟ້າ ​ທີ່​ມີ​ຄວາມ​ຍາວ ​ທັງ​ໝົດ 6.828 ກິ​ໂລ​ແມັດ ​​ໃນ​ໄລຍະ 6 ​ເດືອນ​ຕົ້ນປີ​ນີ້.

ຂະນະ​ທີ່ມູນ​ຄ່າ​ການ​ລົງທຶນ​ຂອງ​ບັນດາ​ ໂຄງການ​ທີ່​ພວມ​ກໍ່ສ້າງ​ ໃນ 7 ​ເດືອນຕົ້ນ​ປີ​ນີ້​ແມ່ນ 883 ຕື້​ຢວນ.​ ໂຄງການ​ຕາ​ຂ່າຍ ສະໜອງ​ໄຟຟ້າ ກະ​ແສ​ຕົງ​ແຮງ​ດັບ​ສູງພິ​ເສດ ຂະໜາດ 800 ກິ​ໂລ​ວັດສຳລັບສາຍ​ ໄປ໋​ເຮີ​ ທານ-​ຈຽງ​ຊູ (Baihe Tan – Jiangsu) ​ເປັນ​ໜຶ່ງ ​ໃນ11 ​ໂຄງການຂ້າງ​ຕົ້ນໄດ້​ເລີ່​ມດຳ​ເນີນ​ງານ ​ເມື່ອ​ເດືອນກໍລະກົດ ​ເພື່ອ​ຈ່າຍ​ໄຟຟ້າພະລັງງານ​ນ້ຳຈາກ​​ແຂວງ​ ຊື່​ຊວນ(​ເສ​ສວນ) ທາງ​ຕາ​ເວັນ​ຕົກ​ສ່ຽງ​ໃຕ້ ​ໄປ​ຍັງ​ເຂດ​ພະລັງງານ ທາງ​ເສດຖະກິດ​ແຂວງ​ຈຽງ​ຊູທາງ​ຕາ​ເວັນ​ອອກ ​ຂອງ​ປະ​ເທດ.

ຂະນະ​ທີ່ ມູນ​ຄ່າ​ ການ​ລົງທຶນ​ລວມ ​ໃນ​ໂຄງການ​ຕ່າງໆຂອງ​ບໍລິສັດ​ໃນ​ປີ​ນີ້ຈະ​ສູງ​ເປັນ​ ປະຫວັດສາດ 1,3 ພັນ​ຕື້​ຢວນ ຊຶ່ງ​ອາດ​ນຳ​ໄປ​ສູ່ການ​ລົງທຶນທີ່​ກ່ຽວຂ້ອງມູນ​ຄ່າ ສູງ​ເຖິງ 2,6 ພັນ​ຕື້​ຢວນ ​ໃນ​ອຸດສາຫະກຳ​ ຕົ້ນນ້ຳ​ ແລະ ປາຍ​ນ້ຳ.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ໃນໂອກາດເຂົ້າພົບ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນວັນທີ 29 ກໍລະກົດ 2022 ທີ່ຫ້ອງການກະຊວງການຕ່າງປະເທດ ນະຄອນຫລວງວຽງຈັນ ທ່ານ ຊັງໂຮ ໂຈ ປະທານ ແລະ ເຈົ້າໜ້າທີ່ບໍລິຫານຂອງບໍລິສັດຊໍາຊຸງສາຂາອາຊີຕາເວັນອອກສຽງໃຕ້ ແລະ ໂອຊີອານີ ໄດ້ລາຍງານສະພາບການດຳເນີນທຸລະກິດ ພ້ອມກັບນະວັດຕະກຳຕ່າງໆ ແລະ ຄວາມພະຍາຍາມໃນການຕອບສະໜອງຄວາມຕ້ອງການຂອງຜູ້ບໍລິໂພກລາວ ໂດຍອີງໃສ່ກຸ່ມຜະລິດຕະພັນທີ່ຫລາກຫລາຍ. ພ້ອມກັນນັ້ນ, ຍັງໄດ້ອະທິບາຍຂໍ້ດີຂອງເມືອງປູຊານໃນຖານະເມືອງເຈົ້າພາບໃນການຈັດງານນິທັດສະການໂລກ 2030 (World Expo 2030) ອີກດ້ວຍ. ພ້ອມທັງໄດ້ອະທິບາຍກ່ຽວກັບຕົວຢ່າງນະວັດຕະກຳທີ່ໂດດເດັ່ນຂອງຊໍາຊຸງ ແລະ ກິດຈະກຳຊ່ວຍເຫລືອສັງຄົມໃນທົ່ວໂລກ. ນອກຈາກນີ້ ຊໍາຊຸງຍັງຢາກເປັນຍີ່ຫໍ້ທີ່ຜູ້ບໍລິໂພກລາວເລືອກນຳໃຊ້ຫລາຍທີ່ສຸດ.

ຕາມ​ຂ່າວ​ຈາກ ​ຊິນ​ຮວາ,​ເມື່ອ​ບໍ່​ດົນ​ມາ​ນີ້ ສະຫະພັນ​ເຂົ້າ ກຳປູ​ເຈຍ(CRF)​ເປີດ​ເຜີຍ​ວ່າ: ກຳປູ​ເຈຍ ສົ່ງ​ອອກ​ເຂົ້າ​ ໄປ​ຍັງ​ຈີນ ບັນລຸ 169.766 ​ໂຕນ ​ໃນ​ໄລຍະ7​ເດືອນ​ຜ່ານ​ມາ ສ້າງ​ລາຍ​ຮັບ​ ໄດ້​ທັງ​ໝົດ 89 ລ້ານ​ໂດ​ລາ ​ສະຫະລັດ. ຂະນະ​ທີ່ ຈີນ ຍັງ​ເປັນ​ຜູ້​ຊື້​ເຂົ້າ​ ແຫ່ງ​ໃຫຍ່​ທີ່​ສຸດ​ຂອງ​ກຳປູ​ເຈຍ ຕາມ​ມາ​ດ້ວຍເອີຣົບ ​ໂດຍ​ຈີນກວມ​ເອົາ​ ອັດຕາ​ສ່ວນ 48,3% ຂອງ​ປະລິມານ​ ສົ່ງ​ເຂົ້າອອກ ​ທັງ​ໝົດ​ ຂອງ​ປະ​ເທດ​ນີ້ ​ແລະ ສົ່ງ​ອອກ ລວມທັງ​ໝົດ 350.902​ໂຕນ ​ໄປ​ຍັງ 56 ​ປະ​ເທດ ​ແລະ ພາກ​ພື້ນ ​ທົ່ວ​ໂລກ ​ເພີ່ມ​ຂຶ້ນ13% ​ເມື່ອ​ທຽບ​ໃສ່ ​ປີ​ຕໍ່​ປີ ສ້າງ​ລາຍ​ໄດ້ 218 ລ້ານ​ໂດ​ລາ ​ສະຫະລັດ ​ໃນ​ໄລຍະ7​ ເດືອນ​ຕົ້ນປີ​ນີ້.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ ​ຊິນ​ຮວາ,ວັນ​ທີ4​ ສິງຫາ​ນີ້, ສະພາ​ ອູ​ແກຣນ ​ເປີດ​ເຜີຍ​ວ່າ: ອູ​ແກຣນ ຈຳ​ເປັນ​ຕ້ອງ​ ສົ່ງ​ອອກ​ ທັນ​ຍາ​ພືດ ຫລາຍ​ກວ່າ 50ລ້ານ​ໂຕນ ​ໃນ​ສົກ​ປີ 2022-2023 ທ່າມກາງ ​ຄວາມ​ຈຳ​ເປັນ ​ໃນ​ການ​ເກັບ​ ຜົນ​ຜະລິດ ​ຕັ້ງ​ແຕ່ ​ປີ​ກາຍ​ ຈົນ​ຮອດ​ປີ​ນີ້ ຫລັງ​ຈາກ ອູ​ແກຣນ ວາງ​ແຜນ ​ເກັບ​ກ່ຽວ ທັນ​ຍາ​ພືດ ​ແລະ​ ​​ແກ່ນ​ພືດ​ ນ້ຳມັນ ຈຳນວນ 55-60 ລ້ານ​ໂຕນ.

​ໃນ​ປີ​ນີ້ ພ້ອມ​ຄາດ​ວ່າ ຄວາມ​ຕ້ອງການ​ ພາຍ​ໃນ​ປະ​ເທດ ຈະ​ເພີ່ມ​ຂຶ້ນ 20ລ້ານ​ໂຕນ ​ໂດຍ​ໃນ​ຂະນະ​ນີ້ ກະສິກອນ ​ອູ​ແກຣນ ​ເກັບ​ກ່ຽວ ທັນ​ຍາ​ພືດ​ແລ້ວ 12 ລ້ານ​ໂຕນ ຈາກ30% ຂອງ​ພື້ນ​ທີ່ ​ປູກຝັງ.ປັດຈຸບັນ ອູ​ແກຣນ ມີ​ທັນ​ຍາ​ພືດ ​ໃນ​ສາງ ປະມານ 18-20 ລ້ານ​ໂຕນ ຈາກ​ການ​ ເກັບ​ກ່ຽວ​ ປີ​ກາຍ​ນີ້.ສຳລັບ ໃນເດືອນ ກໍລະກົດ, ອູ​ແກຣນ ມີລາຍໄດ້ 22.2 ຕື້ໂດລາ ຈາກການ ສົ່ງອອກ ທັນ​ຍາ​ພືດ ແລະ ​ແກ່ນ​ພືດນໍ້າມັນ 61.52 ລ້ານໂຕນໃນປີ 2021-2022.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຕາມ​ຂ່າວ​ຈາກ​ ຊິນ​ຮວາ,​ ອົງການ ​ອາ​ວະ​ກາດ ​ການບິນ ອີຣານ (ISA)​ ເປີດ​ເຜີຍ​ວ່າ: Khayyam ດາວທຽມ ສຳ​ຫລວດ ​ໄລຍະ​ໄກ​ ຂອງ​ປະ​ເທດ ຈະ​ຖືກ​ປ່ອຍ ຂຶ້ນ​ສູ່​ ອາ​ວະ​ກາດ ​ໂດຍ​ຈະ​ຫລວດ ​ຂົນ​ສົ່ງ​ ດາວ​ທຽມ Soyuz ​ຂອງຣັດ​ເຊຍ ​ໃນ​ອາທິດ​ໜ້າ ຊຶ່ງ​ຈະ​ຖືກ​ສົ່ງ ​ຈາກ​ຖານ​ປ່ອຍ ​ຍານ​ອາ​ວະ​ກາດ Baikonur ​ໃນ​ກາ​ຊັກ​ສະຖານ ສາມາດ​ຊ່ວຍ​ພັດທະນາ ​ພື້ນ​ທີ່ ​ຫລາຍ​ແຫ່ງ ​ໃນ​ອີຣານ ​ໃຫ້​ມີ​ຄວາມ ​ອັດ​ສະ​ລິ​ຍະ ​ໂດຍ​ອາ​ໄສ ​ເຊັນ​ເຊີ ທີ່​ຈັດ​ເຈນ ສາມາດ​ນຳ​ໄປ​ປະຍຸກ​ໃຊ້​ໃນ​ຫລາຍ​ພື້ນ​ທີ່. ດາວ​ທຽມKhayyam ຈະ​ເຮັດ​ໜ້າ​ທີ່ ​ເຝົ້າຕິດຕາມ ຜົນ​ກະ​ລິດ ​ກະສິກຳ ຂອງ​ປະ​ເທດ ​ເຊັ່ນ​ດຽວ​ກັນ​ກັບ ການ​ເຮັດ ​ບໍ່​ແຮ່ ​ແລະ ການ​ຂຸດ​ຄົ້ນ ບໍ່​ແຮ່ ລວມທັງ ​ການ​ຈັດການ​ກັບ ການ​ຕັດ​ໄມ້ ທຳລາຍ​ປ່າ ​ແລະ ອັນຕະລາຍ ທາງ​ທຳ​ມະ​ຊາດ ຫລື ສິ່ງ​ແວດ​ລ້ອມ.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ

ຄວາມກົດດັນອາກາດຕໍ່າຂອງອາກາດຮ້ອນ ຍັງສືບຕໍ່ປົກຄຸມຢູ່ທົ່ວ ທຸກພາກຂອງປະເທດລາວ ດ້ວຍກໍາລັງປານກາງ ສົມທົບກັບລົມມໍລະສຸມ ຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ອາກາດຮ້ອນ ພ້ອມມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຫາ ປານກາງຢູ່ໃນແຕ່ລະພາກ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ ແຂວງພາກກາງ ລົງຫາ ພາກໃຕ້ ຕື່ມອີກ.

ພະຍາກອນອາກາດ ເວລາ 7:00 ໂມງຂອງວັນທີ 5/8/2022 ເຖິງ ເວລາ 7:00 ໂມງ ວັນທີ 6/8/2022

-ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນລະຫວ່າງ 20-30 ອົງສາ.

-ພາກເໜືອດ້ານຕາເວັນຕົກ (ແຂວງຫລວງນໍ້າທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດຮ້ອນ ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ຫລື ເນື້ອທີ່ການປົກຫຸ້ມຂອງ ຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 21-35 ອົງສາ.

-ນະຄອນຫລວງວຽງຈັນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບ ຄ່ອຍແລະ ຕົກປານກາງ ຫາ ໜັກ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 70%. ອຸນຫະພູມໃນລະຫວ່າງ 26-32 ອົງສາ.

-ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ປານກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນ ເທົ່າກັບ 80% ຂອງພາກ. ອຸນຫະພູມໃນລະຫວ່າງ 22-33 ອົງສາ.

-ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລືອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມ ຂອງຝົນເທົ່າກັບ 65%. ອຸນຫະພູມໃນລະຫວ່າງ 17-26 ອົງສາ.

-ພາກໃຕ້ (ແຂວງສາລະວັນ, ເຊກອງ, ຈໍາປາສັກ ແລະ ອັດຕະປື): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງ ຝົນເທົ່າກັບ 80% ຂອງພາກ. ອຸນຫະພູມໃນລະຫວ່າງ 24-30 ອົງສາ.

-ເຂດພູພຽງບໍລະເວນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການ ປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 17-24 ອົງສາ.

ໃນວັນທີ 4 ສອງຫາ 2022 ນີ້, ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫລງຂ່າວ, ວັດທະນະທພ ແລະ ທ່ອງທ່ຽວ(ຖວທ) ໄດ້ຕ້ອນຮັບ ທ່ານ ເຄໂຈ ເອັນຊິໂອ ນໍແວນໂຕ (keijoEnsioNorvanto) ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ແຟງລັງ ປະຈໍາ ສປປ ລາວ ຄົນໃໝ່.

ໃນໂອກາດນີ້, ທ່ານ ວັນສີ ກົວມົວ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ເຄໂຈ ເອັນຊິໂອ ນໍແວນໂຕ ທີ່ໄດ້ຮັບການແຕ່ງຕັ້ງ ໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ແຟງລັງ ປະຈໍາລາວ ຄົນໃໝ່ ແລະ ພ້ອມທີ່ຈະໃຫ້ການຮ່ວມມື ເພື່ອປະກອບສ່ວນເຮັດໃຫ້ການພົວພັນຮ່ວມມືຂອງສອງຊາດ ລາວ ແລະ ແຟງລັງ ນັບມື້ໄດ້ຮັບການຂະຫຍາຍຕົວໃນດ້ານຕ່າງໆ ໂດຍສະເພາະດ້ານຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ມີຄວາມຍືນຍົງ.

ໂອກາດດຽວກັນ, ທ່ານ ເຄໂຈ ເອັນຊິໂອ ນໍແວນໂຕ ກໍໄດ້ສະແດງຄວາມຂອບໃຈມາຍັງທ່ານລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້.

ຂ່າວ-ພາບ: ສົມຫວັງ

ໃນໂອກາດລົງຢ້ຽມຢາມ ແລະ ພົບປະໂອ້ລົມພະນັກຫລັກແຫລ່ງ ເມືອງນານ ແລະ ເມືອງງອຍ ແຂວງຫລວງພະບາງ ໃນວັນທີ 4 ສິງຫາ 2022 ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ເນັ້ນໃຫ້ຄະນະພັກ, ອົງການປົກຄອງເມືອງ ແລະ ປະຊາຊົນ 2 ເມືອງດັ່ງກ່າວໃຫ້ມີຄວາມສາມັກຄີ ເປັນຈິດໜຶ່ງໃຈດຽວ ໃນການປົກປັກຮັກສາ ແລະ ສ້າງສາພັດທະ ນາ, ເອົາໃຈໃສ່ເສີມຂະຫຍາຍມູນເຊື້ອດຸໝັ່ນຂະຫຍັນພຽນ ເຂົ້າໃນການອອກແຮງງານຜະລິດ ເປັນສິນຄ້າໃຫ້ຫລາຍ ແລະ ມີສ່ວນແຮໄວ້ ໂດຍສະເພາະ ແມ່ນການຄໍ້າປະກັນສະບຽງອາຫານ, ການຜະລິດກະສິກໍາປອດສານພິດ, ປົກປັກຮັກສາສິ່ງແວດລ້ອມ,ເອົາ ໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ, ເອົາໃຈໃສ່ຊຸກຍູ້ສົ່ງເສີມໃຫ້ລູກຫລານໃຫ້ໄດ້ຮັບການສຶກສາ ບໍ່ໃຫ້ປະລະການຮໍ່າຮຽນ.

ໂອກາດນີ້, ທ່ານ ຄຳເກັ່ງ ຈັນທະວີສຸກ ເຈົ້າເມືອງນານກໍໄດ້ ລາຍງານສະພາບ ການພັດທະນາເສດຖະກິດ-ສັງຄົມຂອງເມືອງໂດຍຫຍໍ້ ໂດຍໄດ້ຍົກໃຫ້ຜົນສຳເລັດທີ່ອົງການປົກຄອງເມືອງຍາດມາໄດ້ໃນແຕ່ລະຂົງເຂດ ອັນເປັນພືນຖານເຮັດໃຫ້ເສດຖະ ກິດມີການຂະຫຍາຍຕົວໃນລະດັບ 5,65% ຕໍ່ປີ ສະເລ່ຍລາຍຮັບໄດ້ປະມານ 13 ລ້ານ ກວ່າກີບ ຫລື ປະມານ 1.400 ໂດລາຕໍ່ຄົນຕໍ່ປີ, ອັນພົ້ນເດັ່ນແມ່ນການປູກເຂົ້ານາ ສາ ມາດເຫລືອກິນ ແລະ ສົ່ງອອກເປັນສິນຄ້າ, ຄຽງຄູ່ກັບການປູກພືດອຸດສາຫະກຳ ແລະ ລ້ຽງສັດເປັນສິນຄ້າ ມີປະຊາຊົນ ແລະ ນັກທຸລະກິດພາຍໃນ ແລະ ຕ່າງປະເທດມາລົງທຶນຫລາຍໂຄງການ.

ໂອກາດ ລົງຢ້ຽມຢາມ ແລະ ພົບປະໂອ້ລົມພະນັກຫລັກແຫລ່ງ ເມືອງງອຍ, ທ່ານ ທອງລຸນ ສີສຸລິດ ກໍໄດ້ຮັບຟັງການລາຍງານຈາກທ່ານເຈົ້າເມືອງກ່ຽວກັບສະພາບ ການພັດທະນາເສດຖະກິດ-ສັງຄົມຂອງເມືອງໂດຍຫຍໍ້ ໂດຍໄດ້ຍົກໃຫ້ເຫັນທ່າແຮງຕົ້ນຕໍຂອງເມືອງ ເຊິ່ງຍັງແມ່ນການຜະລິດກະສິກຳ ເປັນຕົ້ນຕໍ, ທົ່ວເມືອງ ມີເນື້ອທີ່ນາທັງໝົດ 1.009 ເຮັກຕາ, ໃນນັ້ນມີເນື້ອທີ່ນາແຊງ 193 ເຮັກຕາ, ແຕ່ເນື້ອທີ່ເຮັດນາແຊງຕົວຈິງ 55 ເຮັກຕາ, ຜົນຜະລິດໄດ້ 243,36 ໂຕນ, ສະມັດຕະພາບ 4,5 ໂຕນ/ຮຕ, ມີຊົນ ລະປະທານຖາວອນ 6 ແຫ່ງ, ຝາຍປະຖົມປະຖານ 113 ແຫ່ງ. ນອກຈາກນີ້, ຍັັງໄດ້ຊຸກຍູ້ການປູກພືດອຸດສາຫະກຳປະເພດຕ່າງໆເປັນຕົ້ນ ສາລີຫວານ, ສາລີແຂງ, ໝາກເດືອຍ, ໝາກງາ, ໝາກນໍ້າມັນເຄືອ, ໝາກນ້ຳມັນຕົ້ນ, ປູກຂ່າ, ປູກພືດລະດູແລ້ງ ແລະ ລ້ຽງສັດ. ນອກຈກນີ້ ເມືອງງອຍ ຍັງມີທ່າແຮງບົ່ມຊ້ອນໃນການເຮັດບໍລິການ ການທ່ອງ ທ່ຽວ, ໃນທົ່ວເມືອງມີແຫລ່ງທ່ອງທ່ຽວ 40 ກວ່າແຫ່ງ ໃນໄລຍະ 6 ເດືອນຜ່ານມາສາມາດດຶ່ງດູດນັກທ່ອງທ່ຽວໄດ້ທັງໝົດ 1.909 ຄົນ, ຍິງ 1.091 ຄົນ, ໃນນັ້ນນັກທ່ອງທ່ຽວພາຍໃນ 1.704 ຄົນ, ຍິງ 968 ຄົນ, ຕ່າງປະເທດ 205 ຄົນ, ຍິງ 123 ຄົນ, ສະເລ່ຍລາຍຮັບໃສ່ຫົວຄົນໄດ້ 6.763.000 ກີບ/ຄົນ/ປີ ເທົ່າກັບ 650 ໂດລາ.

ພ້ອມກັນນີ້, ທ່ານ ທອງລຸນ ສີສຸລິດ ພ້ອມຄະນະ ຍັງໄດ້ໄປຢ້ຽມຢາມ, ພົບປະ ແລະ ມອບອຸປະກອນ ໃຫ້ຜູ້ເສຍອົງຄະຈຳນວນໜຶ່ງ ຢູ່ເມືອງງອຍ ຕື່ມອີກ.

ຕາມ​ຂ່າວ​ຈາກ VOVWORLD ເມື່ອ​ບໍ່​ດົນ​ມາ​ນີ້, ອາຊຽນ ແລະ ບັນດາຄູ່ຮ່ວມມື ໄດ້ຕົກລົງເຫັນດີ ເປັນເອກະພາບ ​ໃນ​ຫລາຍ​ບັນຫາ​ ສຳຄັນ ​ໃນ​ການຮ່ວມມື ເພື່ອສັນຕິພາບ, ສະຖຽນ ລະພາບ, ການພັດທະນາ ແບບຍືນຍົງ​ ແລະ ສີວິໄລ ແມ່ນຈຸດສຸມ ໃນການພົວພັນ ​ຍູ້ແຮງ ການຮ່ວມມື ມຸ່ງໄປເຖິງ ການຟື້ນຟູ ຢ່າງຮອບດ້ານ, ​ແບບຍືນຍົງ ຫລັງໂຄວິດ-19. ຈາກ​ນັ້ນ ທ່ານ ບຸຍແທັງເຊີນ, ລັດຖະມົນຕີ ການຕ່າງປະເທດ ຫວຽດນາມ ໄດ້ນຳໜ້າ ຄະນະຜູ້ແທນ ຫວຽດນາມ ເຂົ້າຮ່ວມ ກອງປະຊຸມ ລັດຖະມົນຕີ ການຕ່າງປະເທດ ອາຊຽນ+1 ແລະ ອາຊຽນ+3 (ອາຊຽນ, ຍີ່ປຸ່ນ, ສ.ເກົາຫລີ, ຈີນ) ແລະ ເປັນປະທານ ຮ່ວມກອງປະຊຸມ ການຕ່າງປະເທດ ອາຊຽນ – ສ.ເກົາຫລີ. ​ໃນກອງປະຊຸມ ຄັ້ງນີ້ ບັນດາ ຜູ້ແທນ ໄດ້ສຳຫລວດ ກວດກາຄືນ ແລະ ວາງທິດທາງ ຊຸກຍູ້ ການຮ່ວມມື.ສຳລັບ ບັນດາ ຄູ່ຮ່ວມມື ລ້ວນແຕ່ ສະແດງ ຄວາມເຄົາລົບ ຕໍ່ການພົວພັນ ສະໜັບ ສະໜູນ ບົດບາດ ເປັນໃຈກາງ ຂອງອາຊຽນ. ນອກ​ນີ້ຍັງ​ແລກປ່ຽນກ່ຽວກັບສະພາບການສາກົນ ແລະ ພາກພື້ນ, ບັນດາຝ່າຍສະແດງຄວາມ ວິຕົກ ກັງວົນ ຕໍ່ຄວາມສັບສົນ, ຄວາມເຄັ່ງຕຶງ ທີ່ພວມເກີດຂຶ້ນ ຢູ່ພາກພື້ນ. ບັນດາ ປະເທດ ອາຊຽນ ກໍ່ຢັ້ງຢືນ ການສະໜັບ ສະໜູນ ນະໂຍບາຍ “ຈີນ ດຽວ” ແລະ ໃນໂອກາດນັ້ນ ໄດ້ເນັ້ນໜັກເຖິງ ຄວາມສຳຄັນ ຂອງການປະຕິບັດ ບັນດາ ຫລັກການ ຂອງກົດບັດ ສປຊ, ສົນທິສັນຍາ ມິດຕະພາບ ແລະ ການຮ່ວມມື ອາຊີ ຕາເວັນ ອອກ ສ່ຽງໃຕ້.ຂະນະ​ທີ່ ບັນຫາ ຢູ່ທະເລ ຈີນ​ໃຕ້, ອາຊຽນຮຽກຮ້ອງໃຫ້ບັນດາຝ່າຍຈົ່ງອົດກັ້ນ, ຫລີກລ້ຽງການເຮັດໃຫ້ສະພາບການສັບສົນຂຶ້ນຕື່ມ, ແກ້ໄຂການຂັດແຍ້ງກັນບົນພື້ນຖານກົດໝາຍສາກົນ. ອາຊຽນ ກໍ່ເນັ້ນໜັກເຖິງຄວາມສຳຄັນ ຂອງການໂອ້ລົມສົນທະນາໃນການສຳຜັດ ກັບບັນຫານິວເຄລຍ ຢູ່ແຫລມ ເກົາຫລີ.

(ພາກ​ຂ່າວ: ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ