ຕອນເຊົ້າວັນທີ 4 ສິງຫາ 2022 ນີ້ ຢູ່ທີ່ຫ່ອງປະຊຸມພະແນກ ຍທຂ ແຂວງ ທ່ານ ງາມປະສົງ ເມືອງມະນີ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ພົບປະໂອ້ລົມຄະນະນຳ ແລະ ພະນັກງານ-ລັດຖະກອນພະແນກ ຍທຂ ແຂວງຫົວພັນ ຊຶ່ງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຂໍ້ສະດວກ, ຂໍ້ຫຍຸ້ງຍາກ ແລະ ບາງຜົນງານທີ່ພົ້ນເດັ່ນໃນຂົງເຂດ ຍທຂ ໂດຍຫຍໍ້ຈາກ ທ່ານຫົວໜ້າພະແນກ ຍທຂ ແຂວງຫົວພັນ ເປັນຕົ້ນແມ່ນ: ວຽກງານພັກ, ວຽກງານອົງການຈັດຕັ້ງມະຫາຊົນ ແລະ ວຽກງານວິຊາສະເພາະ.

ໂອກາດນີ້ ທ່ານຮອງລັດຖະມົນຕີ ຍັງໄດ້ເນັ້ນໜັກໃຫ້ຄະນະພັກ ຄະນະພະແນກ ແລະ ພະນັກງານ-ລັດຖະກອນ ພະແນກ ຍທຂ ສືບຕໍ່ຈັດຕັ້ງປະຕິບັດວຽກງານທີ່ພັກ-ລັດມອບໝາຍໃຫ້ມີຜົນສຳເລັດ, ສືບຕໍ່ຮັດແໜ້ນຄວາມສາມັກຄີພາຍໃຫ້ແໜ້ນແຟ້ນ ພາຍນອກໃຫ້ກວ້າງຂວາງ, ຄະນະພັກ-ຄະນະນຳພະແນກຕ້ອງເອົາໃຈໃສ່ຊຸກຍູ້ຂະແໜງການ-ກອງວິຊາການ ໃນການຄຸ້ມຄອງ ຕິດຕາມ-ກວດກາ ບັນດາໂຄງການຕ່າງໆທີ່ຢູ່ໃນຄວາມຮັບຜິດຊອບໃຫ້ມີປະສິດທິຜົນ ແລະ ເກີດປະໂຫຍດສູງສຸດຕໍ່ຜູ້ຊົມໃຊ້, ຊຸກຍູ້-ແກ້ໄຂ ຜົນກະທົບຕ່າງໆທີ່ແຕະຕ້ອງເຖີງເຂດທຳການຜະລິດຂອງປະຊາຊົນ ຈາກໂຄງການກໍ່ສ້າງ ໂດຍສະເພາະແມ່ນ ໂຄງການກໍ່ສ້າງສະໜາມບິນໜອງຄ້າງ, ເປັນເຈົ້າການສົມທົບກັບການນຳແຂວງ, ກະຊວງທີ່ກ່ຽວຂ້ອງ ເພື່ອຂໍທຶນປັບປຸງ-ສ້ອມແປງບັນດາເສັ້ນທາງຫຼວງແຫ່ງຊາດ-ທາງຫຼວງທ້ອງຖິ່ນ ທີ່ເປ່ເພ ໃຫ້ຮັບປະກັນການໄປ-ມາ ມີຄວາມສະດວກ.

ຮັບຟັງການໂອ້ລົມຂອງທ່ານຮອງລັດຖະມົນຕີ ກະຊວງ ຍທຂ ໃນຄັ້ງນີ້ ມີທ່ານ ຮຸ່ງອາລຸນ ບຸນທະເມືອງ ຫົວໜ້າພະແນກ ຍທຂ ແຂວງ, ມີຄະນະພັກ-ຄະນະພະແນກ, ບັນດາທ່ານຫົວໜ້າກົມຈາກກະຊວງ ຍທຂ ແລະ ພະນັກງານ-ລັດຖະກອນພາຍໃນພະແນກເຂົ້າຮ່ວມ.

ຂ່າວ-ພາບ: ອາລຸນໄຊ

ຄົນອາຍຸເກີນ 40 ຕ້ອງຢຸດເອົາ “ສຸຂະພາບ” ໄປແລກປ່ຽນກັບ “ຄວາມລ້ຳລວຍ” ໄດ້ແລ້ວ ເພາະເຖິງຕອນນັ້ນເຈົ້າມີ “ເງິນ” ເທົ່າໃດກໍຊື້ “ສຸຂະພາບ” ຄືນມາບໍ່ໄດ້. ຕໍ່ໃຫ້ມີ ‘ໄຮ່ນາ’ ຫລວງຫລາຍກໍ່ກິນ ‘ເຂົ້າ’ ໄດ້ພຽງມື້ລະຕິບເຖິງຈະມີ ‘ເຮືອນຫລັງໃຫຍ່’ ຫຼາຍສິບຫຼັງກໍ່ຕ້ອງການ ‘ເນື້ອທີ່ຫຼັບນອນ’ ຍາມຄ່ຳຄືນພຽງແປດຕາລາງແມັດ. ດັ່ງນັ້ນ ຕາບໃດທີ່ຍັງມີ ເຂົ້າປາອາຫານກິນຢ່າງພຽງພໍ ມີເງີນພໍໃຊ້ສອຍໄດ້ທຸກມື້ ພຽງເທົ່ານີ້ກໍດີເຫຼືອຫຼາຍແລ້ວ! ອາຍຸເທົ່ານີ້ແລ້ວ ຄວນຢູ່ຢ່າງເປັນສຸກ ທຸກຄົວເຮືອນຕ່າງກໍ່ມີບັນຫາຂອງຕົນເອງ ຢ່າເອົາແຕ່ໄປຄິດປຽບທຽບ ແກ້ງແຍ້ງແຂ່ງຂັນກັນ ບໍ່ວ່າ… ຊື່ສຽງ ຖານະໃນສັງຄົມ ຫລື ຄວາມກ້າວໜ້າຂອງວຽກງານ ແລະ ອື່ນໆ. ສິ່ງທີ່ຄວນຈະແຂ່ງກັນແທ້ໆ ນັ້ນກໍຄືແຂ່ງກັນມີຄວາມສຸກ, ມີສຸຂະພາບດີ ແລະ ອາຍຸຍືນຍາວ ສ່ວນສີ່ງທີ່ເຮົາປ່ຽນມັນບໍ່ໄດ້ກໍ່ຢ່າໄປຝັງອົກຝັງໃຈໃຫ້ປ່ວຍຈິດ ແລະທຳລາຍສຸຂະພາບໂຕເອງເລີຍ.

ຄົນອາຍຸເກີນ 40 ຄວນຄົ້ນຫາຫົນທາງທີ່ຈະສ້າງຊີວິດທີ່ເປັນສຸກ ມີອາລົມດີ ຄິດເຖິງແຕ່ສິ່ງທີ່ເຮັດໃຫ້ເກີດຄວາມສຸກ ນັ້ນກໍໝາຍຄວາມວ່າໄດ້ຜ່ານວັນເວລາແຫ່ງຄວາມທຸກແລ້ວ. ທຸກມື້ທີ່ຜ່ານໄປຈະສູຍເສຍໄປ 1 ມື້ ແຕ່ຖ້າມັນຜ່ານໄປຢ່າງເປັນສຸກມື້ນັ້ນຄືໄດ້ກຳໄລ. ຈິດໃຈທີ່ດີຈະຊ່ວຍຮັກສາໂລກໄພໄດ້ ຖ້າຈິດໃຈເປັນສຸກພະຍາດກໍຈະຫາຍໄວຂຶ້ນ ແຕ່ຖ້າຈິດໃຈທັງດີທັງເປັນສຸກນຳແລ້ວ ໂລກໄພໄຂ້ເຈັບຈະບໍ່ມີທາງມາຫາເຮົາໄດ້ເລີຍ. ດ້ວຍອາລົມທີ່ດີແຈ່ມໃສຢູ່ເລື້ອຍໆ ອອກກຳລັງກາຍໃຫ້ພຽງພໍ ຢູ່ກາງແຈ້ງ ກິນອາຫານໃຫ້ຄົບໝູ່ ຮັບວິຕາມິນຢ່າງພຽງພໍ. ພຽງເທົ່ານີ້ກໍ່ເຊື່ອໄດ້ແນ່ນອນວ່າຊີວິດທີ່ເປັນສຸກອີກ 30 ຫລື 40 ປີ ເໜືອສິ່ງອື່ນໃດ ຕ້ອງຮູ້ຈັກປູກຝັງ ແລະ ເກັບກ່ຽວຄວາມສຸກດີໆ ຈາກການໄດ້ຢູ່ ໄດ້ທ່ຽວ ໄດ້ໂອ້ລົມກັບໝູ່ເພື່ອນ. ເພາະເຂົາເຫຼົ່ານີ້ຈະຊ່ວຍໃຫ້ຮູ້ສຶກອ່ອນໄວ ແລະ ມີຄວາມຫມາຍສະເໝີ “ຄວາມລ້ຳລວຍຂອງຊີວິດຄືການມີສຸຂະພາບທີ່ແຂງແຮງ” ຈົ່ງເບີ່ງແຍງຮັກສາສິ່ງລ້ຳຄ່າ 4 ຢ່າງນີ້ດີໆ.

1. ຮ່າງກາຍ ເປັນສິ່ງດຽວທີ່ຈະຢູ່ໄປກັບເຮົາຈົນສຸດທ້າຍຂອງຊີວິດ ບໍ່ວ່າຈະຢູ່ໃນສະຖານະຫຍັງບໍ່ມີໃຜເບີ່ງແຍງເຮົາໄດ້ທໍ່ຕົວເຮົາເອງ.

2. ຄູ່ຊີວິດ ຄືຄົົນທີ່ຈະເບິ່ງແຍງ ເຂົ້າຂ້າງ ແລະ ປົກປ້ອງເຮົາໄປຕະຫລອດຊີວິດ ລົງທຶນພຽງເລັກນ້ອຍຜົນຮັບໄດ້ທະວີຄູ່

3. ໝູ່ເພື່ອນດີໆ ມີຄ່າຍິ່ງກວ່າຊັບສິນທຸກຢ່າງເທິງໂລກ ຮອຍຍິ້ມ ສຽງຫົວ ຄວາມສະໜຸກສະໜານ ຈິງໃຈ ແລະ ອື່ນໆ ມີເງິນກໍ່ຊື້ສິ່ງເຫລົ້ານີ້ບໍ່ໄດ້.

4. ເງີນສຳຮອງໃນອະນາຄົດ ຍິ່ງອາຍຸຫລາຍຂຶ້ນຄວາມສາມາດໃນການຫາມັນເພີ່ມຈະຍິ່ງຫຼຸດລົງ ດັ່ງນັ້ນ ຕ້ອງຮູ້ຈັກໃຊ້ມັນໃຫ້ຄຸ້ມຄ່າສູງສຸດ

#ຝາກໄວ້ເປັນບົດຮຽນຊີວິດ

(ເນື່ອງໃນໂອກາດວັນສື່ມວນຊົນ-ການພິມຈໍາໜ່າຍ, ວັນສ້າງຕັ້ງ ໜັງສືພິມປະຊາຊົນ 72 ປີ)

ໂດຍ: ວັນໄຊ ຕະວິນຍານ

ສື່ມວນຊົນ ແມ່ນຂະແໜງການໜຶ່ງ ມີຄວາມສໍາຄັນໃນການສຶກສາອົບຮົມແນວຄິດ-ການເມືອງໃຫ້ປະຊາຊົນມີສະຕິຮັກຊາດ-ຮັກບ້ານເກີດເມືອງນອນ, ບໍາລຸງສ້າງຄຸນທາດດ້ານການເມືອງ, ທັໍດສະນະຫຼັກໝັ້ນ, ເປັນສະໜາມຮົບດ້ານແນວຄິດ-ວັດທະນະທໍາ ຂອງພັກ, ມີຄວາມສໍາຄັນໃນການເສີມສ້າງຄວາມສາມັກຄີປອງດອງ ຂອງທົ່ວປວງຊົນລາວທັງຊາດ, ປຸກລະດົມປະຊາຊົນເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບສຸກ, ເປັນເວທີໃນການເສີມສ້າງປະຊາທິປະໄຕ ແລະ ສິດເປັນເຈົ້າ ຂອງປະຊາຊົນ, ທັງຊຸກຍູ້ການພັດທະນາເສດຖະກິດ-ສັງຄົມ ຂອງປະເທດລາວເຮົາ.

ການພັດທະນາວຽກງານສື່ມວນຊົນ ໃນຕົວຈິງແລ້ວແມ່ນເລັ່ງໃສ່ປັບປຸງກົງຈັກການຈັດຕັ້ງທີ່ເຮັດໜ້າທີ່ຄຸ້ມຄອງອົງການສື່ມວນຊົນຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ,ເລືອກເຟັ້ນພະນັກງານທີ່ມີຄຸນທາດການເມືອງ, ມີທັດສະນະຫຼັກໝັ້ນ, ກໍາແນວທາງນະໂຍບາຍຂອງພັກ, ມີຄຸນສົມບັດ ສິນທໍາປະຕິວັດ, ມີຄວາມຮູ້ດ້ານສື່ມວນຊົນໃນລະດັບອັນແນ່ນອນ, ມີຄວາມສາມາດ, ມີຄວາມຮັບຜິດຊອບສູງຕໍ່ໜ້າທີ່, ມີການນໍາພາ-ຄຸ້ມຄອງ ຢ່າງຄ່ອງຕົວ, ທັງມີປະສິດທິພາບ-ປະສິດທິຜົນ. ໄປຄ່ຽງຄູ່ກັບການຍົກລະດັບບຸກຄະລາກອນດ້ານການເມືອງ, ແນວທາງນະໂຍບາຍຂອງພັກ, ກົດໜາຍ ແລະ ນິຕິກໍາຕ່າງໆ ຍົກລະດັບດ້ານບັນນາທິການ, ວິຊາການເຕັກນິກ ໄລຍະສັ້ນ, ໄລຍະຍາວ ຢ່າງເປັນລະບົບຕໍ່ເນື່ອງ ຮັບປະກັນການເຄື່ອນໄຫວຂອງວຽກງານສື່ມວນຊົນມີຄຸນນະພາບດີຂຶ້ນ, ມີຄວາມຮັບຜິດຊອບ ຈົ່ງຮັກພັກດີ ຕໍ່ປະເທດຊາດ ແລະ ປະຊາຊົນ ສົມກັບ ເປັນນັກຮົບດ້ານແນວຄິດ-ວັດທະນະທໍາ.

ນັບແຕ່ໄລຍະປ່ຽນ ແປງໃໝ່ຮອບດ້ານຢ່າງມີຫຼັກການ ຂອງພັກເປັນຕົ້ນມາ, ພັກ-ລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ເອົາໃຈໃສ່ຊີ້ນຳ-ນຳພາ ​ແລະ ສຸມທຶນຮອນຢ່າງຫຼວງຫຼາຍເພື່ອພັດທະນາວຽກງານສື່ມວນຊົນຢູ່ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຊຶ່ງໄດ້ກຳນົດອອກຢູ່ໃນມະຕິກອງປະຊຸມໃຫຍ່ ແລະ ແຜນພັດທະນາເສດຖະກິດ-ສັງຄົມແຫ່ງຊາດແຕ່ລະໄລຍະ, ເຮັດໃຫ້ສື່ມວນຊົນລາວໄດ້ເຄື່ອນໄຫວຕາມພາລະບົດບາດ, ສິດ, ໜ້າທີ່ ​ແລະ ຄວາມຮັບຜິດຊອບຂອງຕົນສໍາເລັດເປັນແຕ່ລະໄລຍະຈົນໄດ້ຮັບຄວາມໄວ້ວາງໃຈ,ຄວາມເຊື້ອໝັ້ນຈາກອົງການຈັດຕັ້ງຕ່າງໆ ທັງພາກລັດ ແລະ ເອກະຊົນ ແລະ ຄວາມສົນໃຈຈາກສັງຄົມ ກໍຄືປະຊາຊົນບັນດາເຜົ່າໃນຂອບເຂດທົ່ວປະເທດຕະຫຼອດມາ. ແຕ່ຖ້າທຽບໃສ່ຄວາມຮຽກຮ້ອງຕ້ອງການ ຂອງສັງຄົມໃນຍຸກຂໍ້ມູນຂ່າວສານທີ່ວ່ອງໄວ ທັນສະໄໝທາງດ້ານເຕັກໂນໂລຊີ, ສື່ມວນຊົນລາວຈໍາເປັນຕ້ອງພັດທະນາຕົນເອງໃຫ້ທັນກັບການຂະຫຍາຍຕົວ ຂອງຍຸກສະໄໝເທື່ອລະກ້າວ. ສະ​ນັ້ນ, ການພັດທະນາວຽກ​ງານສື່ມວນຊົນ ຈຶ່ງມີບົດບາດສໍາຄັນຫຼາຍ, ເພາະເປັນການຕັດສິນຄຸນນະພາບໃນຖານະເປັນປາກກະບອກສຽງ ,ເປັນອາວຸດທີ່ແຫຼມຄົມ ຂອງພັກ-ລັດ ແລະ ຂອງສັງຄົມ.

ວິໄສທັດຂອງ ກະຊວງ ຖວທ ຮອດປີ 2025 ກໍານົດໄວ້ວ່າ: ຫັນການເຄື່ອນໄຫວຂອງຂະ ແໜງຂ່າວ-ສື່ມວນຊົນໄປຕາມທິດຂ່າວສານທັນສະໄໝ, ວ່ອງໄວທັນການ ກາຍເປັນປາກກະບອກສຽງຂອງພັກ, ເປັນເວທີແຫ່ງການສະແດງອອກຄໍາເຫັນທີ່ສ້າງສັນຂອງສັງຄົມ; ສ້າງພື້ນຖານນິຕິກໍາໃຫ້ມີການຄຸ້ມຄອງທີ່ເຂັ້ມງວດຕາມກົດໜາຍ. ພັດທະນາສື່ມວນຊົນລາວໃຫ້ມີຄຸນນະພາບ, ທັນສະ ໄໝ, ວ່ອງໄວ, ທັນເຫດການ, ເປັນກະບອກສຽງອັນແຫຼມຄົມຂອງພັກ-ລັດ ທັງລ່ວງເລິກ ແລະ ລວງກວ້າງ, ເຂັ້ມແຂງທັນສະໄໝ ໄປສູ່ກຸ້ມຕົນເອງເທື່ອລະກ້າວ. ພົວພັນ ເຊື່ອມໂຍງເວທີສື່ມວນຊົນສາກົນ, ຮັບປະກັນຄວາມປອດໄພ ແລະ ສະຖຽນລະພາບດ້ານຂໍ້ມູນຂ່າວສານ, ມີບຸກຄະລາກອນ ທີ່ໄດ້ມາດຕະຖານສື່ມວນຊົນລາວ ສົມຄູ່ກັບຍຸກສະໄໝ.

ສະນັ້ນ, ການພັດທະນາວຽກງານສື່ມວນຊົນ ກໍແມ່ນເພື່ອຮັບໃຊ້ໜ້າທີ່ການເມືອງຂອງພັກ ກໍຄືລັດຖະບານມອບໝາຍໃຫ້ ກາຍເປັນພາຫະນະອັນແຫຼມຄົມຂອງພັກ, ນໍາເອົາແຜນການ, ແຜນງານ ແລະ ໂຄງການຕ່າງໆມາຈັດຕັ້ງປະຕິບັດໃຫ້ປະສົບຜົນສໍາເລັດ. ພັດທະນາວຽກງານສື່ມວນຊົນ ແມ່ນການຂະຫຍາຍໃຫ້ສາມາດເຂົ້າເຖິງທຸກພື້ນທີ່ໃນທົ່ວປະເທດ, ດ້ານເນື້ອໃນໃຫ້ມີຄວາມຫຼາກຫຼາຍຄົບຖ້ວນ, ເປັນແຫຼ່ງສະໜອງຂໍ້ມູນຂ່າວສານ ແລະ ໃຫ້ສາລະໜ້າຮູ້ ຢ່າງຮອບດ້ານໃຫ້ແກ່ພັກ-ລັດຖະບານ ແລະ ປະຊາຊົນລາວບັນດາເຜົ່າທຸກຊັ້ນຄົນ, ໃຫ້ນັບມື້ນັບກວ້າງຂວາງ, ມີຄວາມໝັ້ນ ຄົງ, ສູ້ຊົນປ່ຽນຖ່າຍວັດຖຸເກົ່າແກ່ ສ້າງພື້ນຖານໂຄງລ່າງທາງດ້ານວັດຖຸ-ເຕັກນິກ ສື່ມວນຊົນໃຫ້ທັນສະໄໝຄົບຊຸດ, ຫັນໄປສູ່ລະບົບດີຈີຕອນ ສາມາດເຊື່ອມໂຍງໃຫ້ເປັນລະບົບດຽວກັນໃນທົ່ວປະເທດ. ເນື້ອໃນ ແລະ ຮູບການ ຂອງສື່ມວນຊົນທຸກປະເພດ ຕ້ອງແນໃສ່ໂຄສະນາເຜີຍແຜ່ ແນວທາງນະໂຍບາຍ, ກົດໜາຍ ແລະ ລະບຽບການຂອງລັດ, ປຸກລະດົມນໍ້າໃຈຮັກຊາດ, ເຕົ້າໂຮມຄວາມສາມັກຄີເປັນປຶກແຜ່ນຂອງທົ່ວປວງຊົນ, ເສີມຂະຫຍາຍມູນເຊື້ອອັນດີງາມຂອງຊາດ, ຄວາມສາມັກຄີປອງດອງ ພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດ. ເນື້ອໃນຕ້ອງພາວະວິໃສ,ມີລັກສະນະວິທະຍາສາດ, ຖືກຕ້ອງຕາມຄວາມເປັນຈິງ, ຊັດເຈນ ທັງສອດຄ່ອງກັບສິດຜົນປະໂຫຍດຂອງຊາດຂອງປະຊາຊົນ. ສ່ອງແສງການເຄື່ອນໄຫວ ກໍຄືຫົວຄິດປະດິດສ້າງຂອງມະຫາຊົນໃນການອອກແຮງງານ, ເປັນເວທີສະແດງຄໍາຄິດເຫັນ ຕໍານິຕິຊົມຂອງມະຫາຊົນ ແລະ ໃຫ້ຄວາມຮູ້ໃນທາງສ້າງສັນ ສາມາດນໍາມາປັບປຸງການດໍາລົງຊິວີດຂອງມະຫາຊົນໄດ້ເປັນຢ່າງດີ.

ວິທີການພັດທະນາວຽກງານສື່ມວນຊົນ ຢູ່ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໃນຕໍ່ໜ້າ ແມ່ນຕ້ອງເພີ່ມທະວີບົດບາດການນໍາພາຂອງພັກ ແລະ ເອົາໃຈໃສ່ຕໍ່ວຽກງານສື່ມວນຊົນຢ່າງໃກ້ຊິດ ຕໍ່ເນື່ອງ ເປັນປົກກະຕິ ແຕ່ຂັ້ນສູນກາງລົງຮອດທ້ອງຖິ່ນ ເພື່ອເຮັດໃຫ້ສື່ມວນຊົນກາຍເປັນພາຫະນະອັນແຫຼມຄົມຂອງພັກ, ສຶກສາອົບຮົມດ້ານແນວຄິດ-ການເມືອງໃຫ້ພະນັກງານຖັນແຖວສື່ມວນຊົນຢ່າງເປັນປົກກະຕິ, ເພື່ອໃຫ້ມີຄຸນທາດການເມືອງທີ່ໜັກແໜ້ນ, ກໍາແໜ້ນທັດສະນະ ແລະ ແນວທາງຂອງພັກ, ນະໂຍບາຍ ແລະ ກົດໜາຍ, ມີຄຸນສົມບັດ, ສິນທໍາປະຕິວັດ, ມີສະຕິຕື່ນຕົວສູງ, ມີຄວາມຮັບຜິດຊອບໃນການເຄື່ອນໄຫວປະຕິບັດໜ້າທີ່ວຽກງານເພື່ອຮັບໃຊ້ພາລະກິດຂອງພັກ, ຮັບໃຊ້ປະເທດຊາດ ແລະ ປະຊາຊົນ, ເສີມຂະຫຍາຍບົດບາດ ຂອງສື່ມວນຊົນ ສ້າງເງື່ອນໄຂໃຫ້ວຽກງານສື່ມວນຊົນສອດຫ້ອຍໄປທຸກຂົງເຂດວຽກງານ ນັບແຕ່ສູນກາງລົງຮອດທ້ອງຖິ່ນຮາກ ຖານ, ທັງປະສານສົມທົບກັນຢ່າງສະໜິດແໜ້ນ ທັງນີ້ກໍເພື່ອຮັບປະກັນຄວາມເປັນເອກະພາບ ໃນການເຄື່ອນໄຫວວຽກງານໃຫ້ໄປຕາມລ່ວງດຽວກັນ, ສ້າງສື່ມວນຊົນເປັນສາຍໃຍແຫ່ງຄວາມຜູກພັນລະຫວ່າງມະຫາຊົນກັບພັກ, ເປັນເວທີເສີມຂະຫຍາຍປະຊາທິປະໄຕ ແລະ ສິດເປັນເຈົ້າຂອງປະເທດຊາດ, ລົງທຶນປັບປຸງໂຄງລ່າງພື້ນຖານ ພາຫະນະ-ເຕັກນິກຂອງວຽກງານສື່ມວນຊົນໃຫ້ທັນສະໄໝກ້າວໜ້າຂຶ້ນກວ່າເກົ່າ ສ້າງສື່ແບບໃໝ່ໃຫ້ກວມເອົາຂອບເຂດທົ່ວປະເທດ ແລະ ສົມສ່ວນກັນລະຫວ່າງສູນກາງ ແລະ ທ້ອງຖິ່ນ, ຍົກລະດັບຂີດຄວາມສາມາດຂອງສື່ມວນຊົນໃຫ້ທຽບກັບສື່ຂອງພາກພື້ນ ແລະ ສາກົນ, ພັດທະນາລະບົົບປະສານງານ ໃນການຮັບສົ່ງຂໍ້ມູນຂ່າວສານ ລະຫວ່ງສູນກາງ ແລະ ທ້ອງຖິ່ນ ໃຫ້ມີຄວາມຄ່ອງຕົວ ວ່ອງໄວ ແລະ ປອດໄພ.

ສັງລວມແລ້ວ, ການພັດທະນາວຽກ​ງານສື່ມວນຊົນ ຈຸດປະສົງຕົ້ນຕໍແມ່ນເຮັດໃຫ້ວຽກງານສື່ມວນຊົນມີການຂະຫຍາຍຕົວທາງດ້ານຄຸນນະພາບ ແລະ ປະລິມານ, ມີນະໂຍບາຍຕໍ່ສື່ມວນຊົນຢ່າງເໜາະສົມ, ລົງທຶນກໍ່ສ້າງພື້ນຖານໂຄງລ່າງ, ພາຫະນະເຕັກນິກ-ເຕັກໂນໂລຊີທັນສະໄໝ, ສະ ໜອງຂໍ້ມູນຂ່າວສານຜ່ານສື່ຕ່າງໆ ລວມທັງສື່ແບບໃໝ່ໃຫ້ມີຄວາມອຸດົມສົມບູນ, ຄົບຖ້ວນ, ບໍ່ຊໍ້າຊາກ, ເຂົ້າໃຈງ່າຍ, ວ່ອງໄວທັນໃຈ ທັນເຫດການ ເພື່ອຕອບສະໜອງຄວາມຕ້ອງການ ຂອງສັງຄົມນັບມື້ນັບສູງຂຶ້ນ, ເປັນທີ່ຖືກອົກຖືກໃຈ, ໄດ້ຮັບການສະໜັບສະໜູນ ແລະ ໄວ້ວາງໃຈຈາກສັງຄົມນັບ​ມື້​ນັບຫຼາຍຂຶ້ນ.

ຕໍ່ກັບສະພາບການຄວາມບໍ່ເປັນລະບຽບຮຽບຮ້ອຍ ໃນການເດີນທາງຜ່ານທາງລົດໄຟ ລາວ-ຈີນ ເປັນຕົ້ນ ມີນັກທ່ອງທ່ຽວລຽນແຖວຊື້ປີ້ລົດໄຟ ເປັນຈຳນວນຫຼາຍ ຢູ່ສະຖານີລົດໄຟນະຄອນຫຼວງວຽງຈັນ, ບໍ່ມີຫ້ອງນ້ຳຢູ່ນອກອາຄານ ສະຖານີ, ມີກຸ່ມຄົນ, ບຸກຄົນສວຍໂອກາດ ຊື້-ຂາຍປີ້ ເກງກຳໄລ ທີ່ບໍ່ຖືກຕ້ອງເຮັດໃຫ້ມີຫາງສຽງຈົ່ມວ່າຕ່າງໆນາໆ ທັງໃນທາງບວກ ແລະ ທາງລົບ ຂອງສັງຄົມຢູ່ສື່ສັງຄົມອອນລາຍ ຊຶ່ງອາດຈະສ້າງຄວາມເສຍຫາຍຕໍ່ພາບພົດ ແລະ ການທ່ອງທ່ຽວຂອງ ສປປ ລາວ. ຕໍ່ກັບບັນຫາດັ່ງກ່າວ, ບໍລິສັດທາງລົດໄຟ ລາວ-ຈີນ ພ້ອມດ້ວຍພາກສ່ວນກ່ຽວຂ້ອງ ໄດ້ອອກມາຊີ້ແຈ້ງ ແລະ ຍອມຮັບຜິດທຸກບັນຫາ ທີ່ມີມູນຄວາມຈິງ ແລະ ພ້ອມທີ່ຈະປັບປຸງແກ້ໄຂບັນຫາດັ່ງກ່າວໂດຍໄວ ເພື່ອເຮັດໃຫ້ການບໍລິການຕ່າງໆ ໂດຍສະເພາະການບໍລິການ ຊື້-ຂາຍ ປີ້ລົດໄຟ ເປັນລະບົບ, ມີຄວາມສະດວກສະບາຍ, ວ່ອງໄວຂຶ້ນກວ່າເກົ່າ.

ທ່ານ ດາວຈິນດາ ສີຫາລາດ ຮອງຜູ້ອຳນວຍການໃຫຍ່ ບໍລິສັດທາງລົດໄຟ ລາວ-ຈີນ ໄດ້ຊີ້ແຈງກ່ຽວກັບບັນຫາດັ່ງກ່າວ ໃນວັນທີ 3 ສິງຫາ ຜ່ານມາວ່າ: ຕໍ່ກັບບັນຫາທີ່ເກີດຂຶ້ນດັ່ງກ່າວ, ບໍລິສັດທາງລົດໄຟລາວ-ຈີນ ຍອມຮັບຕໍ່ຂໍ້ຜິດພາດ, ຂໍ້ຂາດຕົກບົກຜ່ອງທາງດ້ານຄວາມພ້ອມໃນການບໍລິການລົດໄຟ ແລະ ພ້ອມຈະນຳເອົາຂໍ້ຜິດພາດດັ່ງກ່າວໄປປັບປຸງ, ແກ້ໄຂ ໃຫ້ດີຂຶ້ນເທື່ອລະກ້າວໂດຍໄວ; ຕໍ່ບາງບັນຫາທີ່ກ່ຽວພັນກັບວຽກງານການບໍລິການ ທາງບໍລິສັດຍິນດີຮັບເອົາຄໍາຕໍານິຕິຊົມ ທີ່ມີລັກສະນະສ້າງສັນທຸກດ້ານ ໂດຍອີງໃສ່ສະພາບຄວາມເປັນຈິງ ແລະ ຄວາມອາດສາມາດຕົວຈິງ ເພື່ອນຳໄປປັບປຸງແກ້ໄຂ ໂດຍສະເພາະການບໍລິການຊື້-ຂາຍປີ້ລົດໄຟ ປັດຈຸບັນ ບໍລິສັດກຳລັງດໍາເນີນການສ້າງລະບົບຂາຍປີ້ ຜ່ານທາງອອນລາຍ ຜ່ານແອບເທິງມືຖື ຊຶ່ງບໍລິສັດທາງລົດໄຟລາວ-ຈີນ ໄດ້ມີການຄົ້ນຄວ້າ, ຊຸກຍູ້ພາກສ່ວນທີ່ຮັບຜິດຊອບໃຫ້ດຳເນີນການໃຫ້ສຳເລັດໂດຍໄວ. ມາຮອດປັດຈຸບັນ, ການດໍາເນີນການໄດ້ສຳເລັດໂດຍພື້ນຖານໃນລະບົບ software, ຂັ້ນຕອນຕໍ່ໄປກໍຈະໄດ້ດໍາເນີນການປັບປຸງໃຫ້ສົມບູນແບບ ແລະ ດຳເນີນການຈັດຊື້ອຸປະກອນ ເພື່ອມາຕິດຕັ້ງ, ຄາດວ່າຈະໃຫ້ສຳເລັດ ແລະ ສາມາດນຳໃຊ້ໄດ້ໃນທ້າຍປີ 2022 ນີ້. ສຳລັບຫາງສຽງຂອງສັງຄົມ ກ່ຽວກັບຫ້ອງນໍ້າສາທາລະນະ ເພື່ອອຳນວຍຄວາມສະດວກໃຫ້ຜູ້ທີ່ມາລຽນແຖວຊື້ປີ້ ຫຼື ມາເຮັດທຸລະຕ່າງໆ ທາງບໍລິສັດກໍໄດ້ມີການແກ້ໄຂແລ້ວ ໂດຍໄດ້ຈັດສັນຊັ້ນສອງຂອງອາຄານສະຖານີມາເປັນຈຸດບໍລິການ. ສຳລັບການບໍລິການຫ້ອງນ້ຳ ແລະ ບ່ອນຈອດລົດ ຢູ່ນອກອາຄານສະຖານີ ປັດຈຸບັນໄດ້ຜ່ານກົນໄກການປະມູນຈັດຊື້ແລ້ວ ແລະ ພວມຢູ່ໃນຂັ້ນຕອນຈັດຕັ້ງປະຕິບັດການກໍ່ສ້າງຄາດວ່າຈະສຳເລັດໃນໄວໆນີ້. ພ້ອມນັ້ນ, ບໍລິສັດທາງລົດໄຟ ຍັງຈະຂະຫຍາຍຊ່ອງຊື້ປີ້ລົດໄຟຕື່ມອີກເພື່ອເຮັດໃຫ້ການຊື້-ຂາຍປີ້ລົດໄຟວ່ອງໄວຂຶ້ນກວ່າເກົ່າ. ສຳລັບແຜນການໃນຕໍ່ໜ້າ ບໍລິສັດທາງລົດໄຟ ລາວ-ຈີນ ຈະສົມທົບກັບກົມທາງລົດໄຟ ກະຊວງ ຍທຂ, ກົມຄຸ້ມຄອງການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັນຄົ້ນຄວ້າແກ້ໄຂປີ້ລົດໄຟ ແກ່ບັນດານັກທ່ອງທ່ຽວ ໃຫ້ມີຄວາມສະດວກສະບາຍ; ເພີ່ມເວລາການເປີດບໍລິການອາຄານສະຖານີສຳລັບຜູ້ໂດຍສານ ທີ່ຕ້ອງການເດີນທາງ ຊຶ່ງຜ່ານມາມີຜູ້ໂດຍສານຈຳນວນໜຶ່ງ ເດີນທາງມາຮອດສະຖານີກ່ອນເວລາລົດອອກ ເປັນເວລາດົນ ແຕ່ທາງອາຄານສະຖານີຍັງບໍ່ທັນເປີດບໍລິການເຮັດໃຫ້ຕ້ອງໄດ້ລໍຖ້າຂ້າງນອກເປັນເວລາດົນ.

ທ່ານ ພັນເອກ ໄກສອນ ແກ້ວມະນີ ຫົວໜ້າກົມຕໍາຫຼວດລົດໄຟ ໄດ້ກ່າວວ່າ: ຕໍ່ກັບສະພາບການຄວາມບໍ່ເປັນລະບຽບຮຽບຮ້ອຍໃນການເດີນທາງ, ການລຽນແຖວຊື້ປີ້ ໃນສະຖານີລົດໄຟນະຄອນຫຼວງວຽງຈັນ ເກີດຂຶ້ນກໍຍ້ອນສະພາບຄວາມຕ້ອງການເດີນທາງ ແລະ ການເພີ່ມຂຶ້ນຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ນອກນັ້ນ, ກໍເກີດມີກຸ່ມຄົນ, ບຸກຄົນ ສວຍໂອກາດຊື້-ຂາຍປີ້ ເກງກຳໄລ ທີ່ບໍ່ຖືກຕ້ອງ ໂດຍສະເພາະຢູ່ໃນກຸ່ມນັກທ່ອງທ່ຽວ, ທຳມະດາບໍລິສັດທ່ອງທ່ຽວແບ່ງໂກຕ້າໃຫ້ແລ້ວ ແຕ່ກໍຍັງລະດົມຄົນມາຊື້ປີ້ຕື່ມ ເພື່ອໃຫ້ໄດ້ຈໍານວນຫຼາຍ, ນອກນັ້ນ ກໍຍັງມີບຸກຄົນມາລຽນແຖວ ມື້ໜຶ່ງຫຼາຍໆເທື່ອເພື່ອຂາຍປີ້ຕໍ່ເກງກຳໄລ. ຕໍ່ກັບບັນຫາດັ່ງກ່າວ, ຕໍາຫຼວດລົດໄຟ ຈະສົມທົບກັບ ເຈົ້າໜ້າທີ່ກວດກາການແລ່ນລົດໄຟ ຈະເອົາໃຈໃສ່ຈັດສັນການລຽນແຖວຊື້ປີ້ ໃຫ້ເປັນລະບຽບຮຽບຮ້ອຍໃນສະຖານີ, ສະກັດກັ້ນບຸກຄົນ ແລະ ກຸ່ມຄົນທີ່ຊື້-ຂາຍປີ້ຕໍ່ເກງກຳໄລ ທີ່ບໍ່ຖືກຕ້ອງຈະໄດ້ມີມາດຕະການແກ້ໄຂຢ່າງເຂັ່ງຄັດ. ພ້ອມທັງ, ສະເໜີໃຫ້ ບໍລິສັດທາງລົດໄຟລາວ-ຈີນ ແຍກບ່ອນຂາຍປີ້ໃຫ້ກຸ່ມນັກທ່ອງທ່ຽວ ຫຼື ບໍລິສັດທ່ອງທ່ຽວສະເພາະ ເພື່ອຄວາມເປັນລະບຽບຮຽບຮ້ອຍ, ຫຼຸດຜ່ອນການແອອັດ. ສຳລັບກຸ່ມຄົນທົ່ວໄປທີ່ມາຊື້ປີ້ ຕ້ອງຖືບັດປະຈໍາຕົວ ຫຼື ສຳມະໂນຄົວ (ສຳເນົາ ຫຼື ເອກະສານຢັ້ງຢືນທີ່ຢູ່ ຫຼື ສຳມະໂນຄົວມາພ້ອມ), ໃຫ້ເຈົ້າໜ້າທີ່ກ່ຽວຂ້ອງກວດກາ ເພື່ອຕິດຕາມ, ຄວບຄຸມຄວາມເປັນລະບຽບຮຽບຮ້ອຍ; ຕຳຫຼວດລົດໄຟ ແລະ ເຈົ້າໜ້າທີ່ກວດກາການແລ່ນລົດໄຟ ຈະໄດ້ຕິດຕາມຫາບຸກຄົນ ຫຼື ກຸ່ມຄົນທີ່ຊື້-ຂາຍປີ້ບໍ່ຖືກຕ້ອງຕາມຕາມລະບຽບ ທີ່ໄດ້ວາງອອກ, ຖ້າພົບເຫັນຈະໄດ້ປະຕິບັດມາດຕະການຕາມ ລະບຽບກົດໝາຍຄື: ສຶກສາອົບຮົມ, ປັບໃໝ ແລະ ດຳເນີນຄະດີຕາມຂັ້ນຕອນ. ພ້ອມທັງຮຽກຮ້ອງໃຫ້ປະຊາຊົນບໍ່ເຂົ້າຮ່ວມໃນການກະທໍາຜິດ ໂດຍການເອົາບັດປະຈຳຕົວຂອງຕົນເອງ ຫຼື ເອກະສານປະຈຳຕົວ ໃຫ້ບຸກຄົນ ຫຼື ກຸ່ມຄົນໄປຊື້-ຂາຍປີ້ທີ່ບໍ່ຖືກຕ້ອງ.

ຂ່າວ-ພາບ: ທະນູທອງ

ຄະນະພັກຮາກຖານໂຮງໝໍບໍລິເວນ 109 ຂຶ້ນກັບຄະນະພັກອົງການກົມໃຫຍ່ພະລາທິການກອງທັບ ປະຕິບັດໜ້າທີ່ວິຊາສະເພາະການແພດຮັບໃຊ້ນາຍ ແລະ ພົນທະຫານ ທີ່ເຄື່ອນໄຫວປະຕິບັດພາລະກິດປ້ອງກັນຊາດ-ປ້ອງກັນຄວາມສະຫງົບກໍຄືຮັບໃຊ້ປະຊາຊົນບັນດາເຜົ່າຢູ່ 2 ແຂວງພາກກາງຄື: ແຂວງສະຫວັນນະເຂດ ແລະ ແຂວງຄໍາມ່ວນຊຶ່ງໃນໄລຍະຜ່ານມາແມ່ນໄດ້ຈັດຕັ້ງປະຕິບັດໜ້າທີ່ການເມືອງຂອງຕົນດ້ວຍດີ.

ສະຫາຍ ພັອ ຄອນ ສຸພັນຄໍາ ເລຂາຄະນະພັກຮາກຖານ-ຫົວໜ້າການເມືອງໂຮງໝໍບໍລິເວນ 109 ໄດ້ໃຫ້ຮູ້ວ່າ: ໂຮງໝໍພວກເຮົາເປັນໂຮງໝໍສາຍ ຂໍ ກອງທັບ ທີ່ຂຶ້ນກັບກົມເສນາຮັກ, ກົມໃຫຍ່ພະລາທິການກອງທັບມີທີ່ຕັ້ງຢູ່ເຂດຍຸດ ທະສາດການທະຫານເມືອງ 4 ທິດທີ່ເຄື່ອນໄຫວປະຕິບັດໜ້າທີ່ປິ່ນປົວຜູ້ບາດເຈັບ-ເຈັບປ່ວຍ ພ້ອມທັງຊ່ວຍໜູນກໍາລັງຫຼວງ, ກໍາລັງທ້ອງຖິ່ນຢູ່ແຂວງສະຫວັນນະເຂດ ແລະ ແຂວງຄໍາມ່ວນ; ມີບົດບາດທຽບເທົ່າກອງພັນໃຫຍ່; ພ້ອມນີ້ຍັງມີພາລະບົດ ບາດໃນການນໍາໃຊ້ເຕັກນິກການແພດເຂົ້າໃນການກວດກາສຸຂະພາບ, ບົ່ງມະຕິພະຍາດ ແລະ ວາງທິດທາງການປິ່ນປົວ ຜູ້ບາດເຈັບ-ເຈັບປ່ວຍ ເປັນຕົ້ນນາຍ ແລະ ພົນທະຫານກໍາລັງຫຼວງ, ກໍາລັງທ້ອງຖິ່ນ ແລະ ປະຊາຊົນບັນດາເຜົ່າຢູ່ແຂວງສະຫວັນນະເຂດ ແລະ ແຂວງຄໍາມວ່ນ. ນອກນີ້ຍັງເຮັດໜ້າທີ່ຝຶກອົບຮົມດ້ານວິຊາສະເພາະ, ເຕັກນິກ-ການແພດລະດັບ ຊັ້ນກາງ, ຊັ້ນຕົ້ນໃຫ້ພະນັກງານແພດມີຄວາມຊໍານານໃນການປິ່ນປົວຄົນເຈັບດ້ວຍຄຸນນະພາບສູງ; ຄົ້ນຄວ້າວິທະຍາສາດ ການແພດໂດຍອີງໃສ່ພຶດຕິກໍາຕົວຈິງ ແລະ ບົດຮຽນທີ່ຖອດຖອນໄດ້ໃນເວລາການປິ່ນປົວຄົນເຈັບຕົວຈິງ ແລະ ຍັງເປັນ ກໍາລັງສໍາຮອງເພື່ອກຽມພ້ອມສູ້ຮົບໃຫ້ທິດຕ່າງໆທີ່ມີຄວາມຈໍາເປັນໃນເວລາມີການສູ້ຮົບ ຫຼື ພະຍາດລະບາດຮ້າຍແຮງທີ່ເກີດ ຂຶ້ນເຂດໃດໜຶ່ງ ທັງຄົ້ນຄວ້າການປະຕິບັດນະໂຍບາຍຕໍ່ຄົນບາດເຈັບ-ເຈັບປ່ວຍໃຫ້ສອດຄ່ອງກັບແນວທາງຂອງພັກໃນການປິ່ນປົວເສຍຄ່າ ແລະ ບໍ່ເສຍຄ່າ.

ໂຮງໝໍບໍລິເວນ 109 ປະກອບມີຕຽງນອນຄົນເຈັບ 150 ຕຽງ, ມີ 21 ພະແນກ, 85 ຂະແໜງການຂຶ້ນກັບ; ດ້ານ ການບັນຊາ-ນໍາພາປະກອບມີຄະນະອໍານວຍການ 5 ສະຫາຍ; ມີແພດ-ພະຍາບານ ແລະ ພະນັກງານຮັບໃຊ້ພຽງພໍຕອບ ສະໜອງໄດ້ກັບໜ້າທີ່ວິຊາສະເພາະ. ໃນນີ້ມີພະນັກງານວິຊາສະເພາະເຕັກນິກການແພດແຕ່ຊັ້ນຕົ້ນຮອດຂັ້ນປະລິນຍາໂທ ຫຼາຍກວ່າເຄິ່ງໜຶ່ງຂອງກໍາລັງພົນທັງໝົດ.

ສະຫາຍ ພັອ ຄອນ ສຸພັນຄໍາ ກ່າວໃຫ້ຮູ້ອີກວ່າ: ຄະນະພັກຮາກຖານໂຮງໝໍມີ 7 ສະຫາຍ, ມີ 13 ໜ່ວຍພັກຂຶ້ນ ກັບ, ມີສະມາຊິກພັກທັງໝົດ 311 ສະຫາຍ ຍິງ 186 ສະຫາຍ, ສະມາຊິກພັກສົມບູນ 289 ສະຫາຍ ຍິງ 173 ສະຫາຍ , ສະມາຊິກພັກສໍາຮອງ 22 ສະຫາຍ ຍິງ 13 ສະຫາຍ, ໂດຍປະຕິບັດຕາມແຜນການເຄື່ອນໄຫວກວດກາຕີລາຄາໜ່ວຍ ພັກປອດໃສ, ເຂັ້ມແຂງ, ໜັກແໜ້ນ ສົກປີ 2021-2022 ແລະ ຊຸກຍູ້ຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກ ແໜ້ນ ສົກປີ 2022-2023 ຂອງຄະນະພັກອົງການກົມໃຫຍ່ພະລາທິການກອງທັບ; ຄະນະພັກແຕ່ລະຂັ້ນໄດ້ປະຕິບັດຫຼັກ ການລວມສູນປະຊາທິປະໄຕຢ່າງເຂັ້ມງວດ, ເຮັດວຽກເປັນໝູ່ຄະນະ, ປະຊຸມປຶກສາຫາຫລືວຽກງານຕ່າງໆ ແລະ ມອບ ໝາຍໜ້າທີ່ໃຫ້ບຸກຄົນຮັບຜິດຊອບ; ມີການສະຫຼຸບຖອດຖອນບົດຮຽນ, ສ່ອງແສງ ລາຍງານປະຈໍາເດືອນ, ປະຈໍາໄຕມາດ ແລະ ປະຈໍາປີເປັນປົກກະຕິ.

ຄະນະພັກ-ຄະນະໜ່ວຍພັກໄດ້ຊີ້ນໍາສະມາຊິກພັກ ຮູ້ນໍາພາປະຕິບັດໜ້າທີ່ການເມືອງ ຕາມຄໍາສັ່ງຂອງຄະນະພັກ ຂັ້ນເທິງຢ່າງເຂັ້ມງວດ; ນໍາພາປັບປຸງລະບົບການຈັດຕັ້ງພັກ, ການຈັດຕັ້ງນໍາພາ-ບັນຊາ, ອົງການຈັດຕັ້ງມະຫາຊົນຢູ່ໃນ ຂອບເຂດການນໍາພາຂອງໜ່ວຍພັກໃຫ້ເຄື່ອນໄຫວຖືກຕ້ອງຕາມພາລະບົດບາດຂອງແຕ່ລະອົງການຈັດຕັ້ງ ເປັນກໍາລັງແຮງ ໃຫ້ແກ່ການຈັດຕັ້ງພັກໃນການປະຕິບັດໜ້າທີ່ການເມືອງມີຜົນສໍາເລັດ ສາມາດສ້າງກົມກອງ 3 ປອດປະເພດ I ລວມມີ 10 ກົມກອງ (10 ພະແນກ); 3 ປອດ ປະເພດ ll ລວມມີ 1 ກົມອງ (1 ພະແນກ); ສ້າງສະມາຊິກພັກປອດໃສ, ເຂັ້ມແຂງ, ໜັກແໜ້ນກວມ 92,56%; ສະມາຊິກພັກ 3 ປອດ 279 ສະຫາຍ.

ຄະນະພັກ-ຄະນະໜ່ວຍພັກໄດ້ຈັດຕັ້ງປະຈໍາການຂັ້ນບັນຊາ, ເສນາ ແລະ ວິຊາສະເພາະເຕັກນິກການແພດຕະຫຼອດ 24 ຊົ່ວໂມງ ໄດ້ປະສານສົມທົບກັບກົມກອງອ້ອມຂ້າງ ພ້ອມກັນສະກັດກັ້ນປະກົດການຫຍໍ້ທໍ້ຕ່າງໆໃນຂອບເຂດຕົນໃຫ້ມີ ຄວາມສະຫງົບ; ພ້ອມນັ້ນຍັງເອົາໃຈໃສ່ຊີ້ນໍາ-ນໍາພາປະຕິບັດຢ່າງເຂັ້ມງວດ 34 ລະບອບຂອງໂຮງໝໍ, ໃນນີ້ຮັບຄົນເຈັບ ເຂົ້າມາກວດພະຍາດ 43.245 ເທື່ອຄົນ, ຮັບຄົນເຈັບເຂົ້າມາປິ່ນປົວ 20.641 ເທື່ອຄົນ; ມີການປິ່ນປົວແບບມອບເໝົາ ປະກັນສັງຄົມ ໃນຊຸມປີຜ່ານມາຈໍານວນຄົນມີບັດປະກັນສຸຂະພາບທັງໝົດໝື່ນກ່ວາຄົນ; ໄດ້ປຸກລະດົມຊຸກຍູ້ໃຫ້ພະນັກ ງານ-ສະມາຊິກພັກເອົາໃຈໃສປູກຝັງ-ລ້ຽງສັດຊອກແຫຼ່ງລາຍຮັບເພື່ອແກ້ໄຂຊີວິດການເປັນຢູ່ຂອງກົມກອງໃຫ້ດີຂຶ້ນກວ່າເກົ່າ.

ສະຫາຍເລຂາຄະນະພັກຮາກຖານ-ຫົວໜ້າການເມືອງໂຮງໝໍບໍລິເວນ 109 ໄດ້ຢືນຢັນຕໍ່ໝາກຜົນທີ່ທາງຄະ ນະພັກ-ຄະນະບັນຊາ, ບັນດານາຍ ແລະ ພົນທະຫານໃນທົ່ວໂຮງໝໍຍາດມາໄດ້ ເປັນການປະກອບສ່ວນເຂົ້າໃນການ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ວ່າດ້ວຍ 4 ໜ້າທີ່ໃຫຍ່ 26 ແຜນງານ ແລະ 5 ບຸກທະລຸຂອງກະຊວງປ້ອງກັນປະເທດໃຫ້ເປັນອັນລະອຽດ; ດັ່ງນັ້ນ, ຄະນະພັກກະຊວງປ້ອງກັນປະເທດຈຶ່ງໄດ້ຮັບຮອງເອົາໜ່ວຍພັກປອດໃສ, ເຂັ້ມແຂງ, ໜັກແໜ້ນ 3 ປີຕິດຕໍ່ກັນລວມມີ: ໜ່ວຍພັກພະແນກພາຍໃນ-ໄຂ່ຫຼັງທຽມ; ໜ່ວຍພັກພະແນກພາຍນອກ; ໜ່ວຍພັກພະແນກພະລາທິການ I; ໜ່ວຍພັກພະແນກບໍລິຫານ-ສັງລວມ; ໜ່ວຍພັກພະແນກການຢາ-ເຂດຮ້ອນ; ໜ່ວຍພັກພະແນກລັງສີ-ວິເຄາະ-ສະເພາະ; ໜ່ວຍພັກພະແນກປະສູດ-ເດັກ; ໜ່ວຍພັກພະແນກມໍລະສຸມ-ຫ້ອງກວດ; ໜ່ວຍພັກໂຮງຮຽນແພດຊັ້ນກາງ, ພ້ອມນີ້, ຄະນະພັກກະຊວງຍັງໄດ້ຮັບຮອງເອົາເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ 2 ປີຕິດຕໍ່ກັນລວມມີໜ່ວຍພັກພະແນກການເມືອງ; ໜ່ວຍພັກພະແນກຫ້ອງປາດ-ປິ່ນປົວພະນັກງານ; ໜ່ວຍພັກພະແນກພະລາທິການ II ແລະ ໜ່ວຍພັກຮັບຮອງໃໝ່ມີ 1 ໜ່ວຍພັກຄື: ໜ່ວຍພັກຂະແໜງ ການເງິນໂຮງໝໍຕື່ມອີກ.

ຂ່າວ: ຣັດສະໝີ

ພິທີສະເຫຼີມສະຫຼອງວັນສ້າງຕັ້ງອົງການກວດສອບແຫ່ງລັດ ຄົບຮອບ 24 ປີ (5 ສິງຫາ 1998- 5 ສິງຫາ 2022) ໄດ້​ຈັດ​ຂຶ້ນ​ໃນວັນທີ 5 ສິງຫາ ນີ້ ທີ່ສະໂມສອນອົງການກວດ​ສອບ​ແຫ່ງ​ລັດ ໂດຍໃຫ້ກຽດເຂົ້າຮ່ວມຂອງ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ມີຄະນະນຳ, ມີ​ພາກ​ສ່ວນ​ກ່ຽວ​ຂ້ອງເຂົ້າເຂົ້າຮ່ວມ.

ທ່ານ ວຽງທະວີສອນ ເທບພະຈັນ ໄດ້ຫວນຄືນມູນເຊື້ອ ປະຫວັດຄວາມເປັນມາຂອງອົງການກວດສອບ​ໃນແຕ່ລະໄລຍະ, ຕະຫຼອດໄລຍະເວລາ 24 ປີ ທີ່ຜ່ານມາ ອົງການກວດສອບແຫ່ງລັດໄດ້ມີຄວາມເຕີບໃຫຍ່ຂະ​ຫຍາຍ​ຕົວໃນແຕ່ລະດ້ານຄື: ດ້ານໂຄງປະກອບການຈັດຕັ້ງ ເບື້ອງຕົ້ນມີແຕ່ ຫ້ອງການ ກັບ ສອງກົມວິຊາສະເພາະ, ແຕ່ປັດຈຸບັນມີ 1 ຫ້ອງການ, 4 ກົມວິຊາສະເພາະ, 4 ກົມປິ່ນອອ້ມ, 1 ສະຖາບັນຄົ້ນຄວ້າ ແລະ ມີອົງການກວດສອບປະຈຳພາກ (ພາກເໜືອ, ພາກກາງ, ພາກ ເໜືອ 2, ພາກໃຕ້ ແລະ ພາກກາງ 2), ດ້ານບຸກຄະລາກອນ ແມ່ນໄດ້ເພີ່ມຂຶ້ນທາງດ້ານປະລິມານ ແລະ ຄຸນນະພາບ, ດ້ານພື້ນຖານໂຄງລ່າງ ກໍໄດ້ຮັບການກໍ່ສ້າງ ແລະ ປັບປຸງ​ດີຂຶ້ນເທື່ອລະກ້າວ, ວຽກງານພົວພັນກັບຕ່າງປະເທດກໍໄດ້ຮັບຜົນສຳເລັດຢ່າງສູງໃນການເປັນເຈົ້າພາບຈັດກອງປະຊຸມສຸດຍອດສະຫະພັນສະຖາບັນກວດສອບອາຊີຕາເວັນອອກສຽງໃຕ້ ຄັ້ງທີ 4 ທີ່ນະຄອນຫຼວງວຽງຈັນ.

ສ່ວນການປະຕິບັດພາລະບົດບາດຕາມລັດຖະທຳມະນູນ ແລະ ກົດໝາຍ ວ່າດ້ວຍ ການກວດສອບແຫ່ງລັດ ແມ່ນມີຜົນສຳເລັດເປັນຢ່າງສູງ, ສະພາແຫ່ງຊາດ ແລະ ລັດຖະບານໄດ້ອອກຄຳສັ່ງ ແລະ ແຈ້ງການຕ່າງໆ ເພື່ອກຳນົດມາດຕະການແກ້ໄຂເຮັດໃຫ້ສາມາດເກັບກູ້ ຫຼື ຮຽກເກັບເງິນຄືນເຂົ້າສູ່ລະບົບງົບປະມານເປັນຈຳນວນຫຼວງຫຼາຍດ້ວຍເງິນສົດ ແລະ ລະບົບການຈົດຮັບ-ຈົດຈ່າຍໃນລະບົບງົບປະມານແຫ່ງລັດ, ບັນດາປະກົດການລະເມີນວິໃນແຜນການ-ການເງິນຄ່ອຍໆຖືກຈຳກັດ ແລະ ຫຼຸດໜ້ອຍຖອຍລົງເປັນຕົ້ນ ການສ້າງໂຄງການນອກແຜນມາຮອດປັດຈຸບັນເຫັນວ່າເກືອບບໍ່ມີ.

ທ່ານກ່າວຕື່ມວ່າ: ມູນເຊື້ອ ແລະ ຜົນງານທີ່​ອົງການກວດສອບແຫ່ງລັດ ​ຍາດ​ມາ​ໄດ້​ຕະຫຼອດໄລຍະ 24 ປີນັ້ນ ​ແມ່ນຍ້ອນ​ຄະນະ​ພັກ​-ຄະນະນໍາ, ການນໍາແຕ່ລະຂັ້ນ​ມີ​ຄວາມ​ຮັບ​ຮູ້​ເຂົ້າ​​ໃຈ ​ແລະ ​ໄດ້​ຊີ້​ນຳ-​ນຳພາ, ສ້າງ​ເງື່ອນ​ໄຂອຳນວຍ​ຄວາມ​ສະດວກ​ດ້ານ​ຕ່າງໆ​ໃຫ້​ແກ່​ຄະນະ​ກວດສອບແຫ່ງລັດເຄື່ອນ​ໄຫວ​ປະຕິບັດ​ພາລະ​ບົດບາດ, ໜ້າ​ທີ່ ​ແລະ ຂອບ​ເຂດ​ສິດ​ຕາມ​ທີ່​ໄດ້​ກຳນົດ​ໄວ້. ໃນ​ນັ້ນ, ຄະນະພັກ-ຄະນະນຳຂອງແຕ່​ລະເປົ້າໝາຍຖືກກວດສອບໄດ້ໃຫ້ການຮ່ວມມືໃນການ​ເຄື່ອນ​ໄຫວວຽກງານ​ກວດສອບນັບມື້ນັບກວ້າງຂວາງຂຶ້ນເລື້ອຍໆ; ຍ້ອນຄວາມເປັນເຈົ້າການບຸກບືນຕັ້ງໜ້າສູ້ຊົນປະຕິບັດໜ້າທີ່ຂອງສະມາຊິກພັກ, ພະນັກງານ-ລັດຖະກອນຂອງອົງການກວດສອບແຫ່ງລັດ ແລະ ອົງການກວດສອບປະຈຳພາກ ຈຶ່ງເຮັດໃຫ້ອົງການກວດສອບມີຜົນສຳເລັດ.

(ຂ່າວ-ພາບ: ສຳນານ)

ວິທະຍຸກະຈາຍສຽງຫວຽດນາມລາຍງານວ່າ: ຫວ່າງບໍ່ດົນມານີ້, ຢູ່ຮ່າໂນ້ຍ, ທ່ານ ເຈີ່ນວັນເຊີນ ລັດຖະມົນຕີ ຫົວໜ້າຫ້ອງວ່າການລັດຖະບານ ຫວຽດນາມ ເປັນປະທານການຖະແຫຼງຂ່າວນັດສາມັນເດືອນກໍລະກົດຂອງລັດຖະບານ.

ຂ່າວລະບຸວ່າ: ທີ່ການຖະແຫຼງຂ່າວ, ທ່ານ ເຈິ່ນວັນເຊີນ ເນັ້ນໜັກວ່າ: ນາຍົກລັດຖະມົນຕີ ໄດ້ຊີ້ນຳບັນດາກະຊວງ, ຂະແໜງການ ສຸມໃສ່ເຂົ້າ 9 ໝວດມາດຕະການຕົ້ນຕໍ ຊຶ່ງຈະປະຕິບັດໃນໄລຍະຈະມາເຖິງ. ໃນນັ້ນ, ບັນດາກະຊວງ, ຂະແໜງການ ສືບຕໍ່ປະຕິບັດຈຸດໝາຍຮັກສາສະຖຽນລະພາບພື້ນຖານເສດຖະກິດມະຫາພາກ, ຄວບຄຸມໄພເງິນເຟີ້, ຊຸກຍູ້ການເຕີບໂຕ, ຟື້ນຟູໄວ, ພັດທະນາແບບຍືນຍົງ. ພ້ອມນັ້ນ, ຊຸກຍູ້ການສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ, ເພີ່ມທະວີການໝູນໃຊ້ວິທະຍາສາດເຕັກໂນໂລຊີ, ຊຸກຍູ້ການຫັນເປັນດີຈີຕອນ, ປ່ຽນໃໝ່ມີຫົວຄິດປະດິດສ້າງ, ພັດທະນາເສດ ຖະກິດດີຈີຕອນ, ເສດຖະກິດສີຂຽວ.

ທ່ານ ດ່າວມິງຕູ້ ຮອງຫົວໜ້າຜູ້ວ່າການທະນາຄານແຫ່ງລັດ ຫວຽດນາມ ໃຫ້ຮູ້ວ່າ: ທະນາຄານແຫ່ງລັດ ພວມປັບປຸງຮ່າງກົດໝາຍວ່າດ້ວຍການຟອກເງິນ (ສະບັບປັບປຸງ) ໃຫ້ສົມບູນເພື່ອຍື່ນສະເໜີຕໍ່ສະພາແຫ່ງຊາດທີ່ກອງປະຊຸມຄັ້ງຈະມາເຖິງ. ທ່ານໄດ້ຢັ້ງຢືນວ່າ: ເງິນບິດຄອຍ (Bitcoin) ຫຼື ບັນດາສະກຸນເງິນເໝືອນຈິງບໍ່ແມ່ນເງິນທີ່ກົດໝາຍກຳນົດ, ບໍ່ແມ່ນເງິນເອເລັກໂຕຣນິກ ແລະ ບໍ່ແມ່ນເງິນຊຳລະຖືກຕ້ອງຕາມກົດໝາຍຢູ່ ຫວຽດນາມ ໃນປັດຈຸບັນ.

ຂ່າວຕ່າງປະເທດລາຍງານ ເມື່ອວັນທີ 4 ສິງຫາທີ່ຜ່ານມານີ້, ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ (UN) ໄດ້ກ່າວເຖິງສະຖານະການພະລັງງານ ແລະ ເຊື້ອໄຟໂລກວ່າ ເປັນເລື່ອງທີ່ບໍ່ສອດຄ່ອງກັບສິນລະທຳທີ່ບໍລິສັດເຫຼົ່ານີ້ຍັງຄົງເດີນໜ້າສະແຫວງຫາ ແລະ ສ້າງຜົນກຳໄລຈາກວິກິດດ້ານພະລັງງານ ແລະ ເຊື້ອໄຟບໍ່ຕ່າງກັບການເຮັດນາເທິງຫຼັງຄົນ.

ຂະນະດຽວກັນ, ທ່ານເລຂາທິການ UN ໄດ້ຮຽກຮ້ອງໃຫ້ລັດຖະບານປະເທດຕ່າງໆດໍາເນີນການຢ່າງຈິງຈັງໃນການເກັບພາສີຈາກຜົນກຳໄລທີ່ສູງເກີນຄວນຂອງບໍລິສັດເຫຼົ່ານີ້ ແລ້ວນຳເງິນເຫຼົ່ານັ້ນມາຊ່ວຍເຫຼືອ ແລະ ສະໜັບສະໜູນປະຊາກອນກຸ່ມທີ່ກຳລັງປະສົບກັບຄວາມຍາກລຳບາກຢ່າງແນ່ນອນ ເນື່ອງຈາກປະຊາກອນຈຳນວນມະຫາສານ ໂດຍສະເພາະໃນກຸ່ມປະເທດກຳລັງພັດທະນາຍັງຄົງປະເຊີນກັບຄວາມຍາກລຳບາກທາງດ້ານເສດຖະກິດ ເນື່ອງຈາກການແຜ່ລະບາດຂອງພະຍາດໂຄວິດ-19 ແລະ ສະຖານະການໂລກໃນປັດຈຸບັນທີ່ຍັງຄົງແກ່ຍາວເວລາ. ທັງນີ້, ເອັກຊອນ ໂມບິນ ແລະ ເຊຟຣອນ ຊຶ່ງເປັນສອງບໍລິສັດລາຍໃຫຍ່ດ້ານພະລັງງານຂອງອາເມຣິກາຮ່ວມກັບບໍລິສັດເຊວຂອງອັງກິດ ແລະ ໂຮນລັງ ແລະ ບໍລິສັດ ໂທທານ ເອເນີຈີ ຂອງຝຣັ່ງ ໄດ້ລາຍງານຜົນກຳໄລປະຈຳໄຕມາດທີ 2 ຄິດເປັນມູນຄ່າລວມເກືອບ 51.000 ລ້ານໂດລາ.

ເຖິງຢ່າງໃດກໍຕາມ, ທ່ານ ກູເຕີເຣສ ໄດ້ຄາດຄະເນຜົນກຳໄລຂອງບໍລິສັດກຸ່ມນີ້ໄວ້ສູງເກືອບເຖິງ 100.000 ລ້ານໂດລາ ສະເພາະໄຕມາດທຳອິດຂອງປີນີ້ ເມື່ອກັບໄປເມື່ອເດືອນທີ່ຜ່ານມາ, ສະພາສາມັນຂອງອັງກິດຜ່ານກົດໝາຍການຈັດເກັບພາສີກັບບໍລິສັດແກ໊ສ ແລະ ນ້ຳມັນ ໃນທະເລເໜືອ ແລ້ວນຳເງິນທີ່ໄດ້ມາໃຊ້ເປັນສ່ວນຫຼຸດຄ່າໄຟຟ້າໃນຄົວເຮືອນ ເພື່ອບັນເທົາບັນຫາຄ່າຄອງຊີບໃຫ້ແກ່ປະຊາຊົນ.

ຂ່າວຕ່າງປະເທດລາຍງານ ເມື່ອວັນທີ 5 ສິງຫາທີ່ຜ່ານມານີ້, ທ່ານ ຮາເວຍ ເບເຊຣາ ລັດຖະມົນ ຕີກະຊວງສາທາລະນະສຸກຂອງອາເມຣິກາໄດ້ອອກຖະແຫຼງການວ່າ ລັດຖະບານຂອງທ່ານປະທານາທິບໍດີ ໂຈ ໄບເດນ ໄດ້ມີມະຕິເຫັນດີປະກາດໃຫ້ການແຜ່ລະບາດຂອງພະຍາດໝາກສຸກລີງໃນປະເທດເປັນພາວະສຸກເສີນດານສາທາລະນະສຸກ.

ນັບຕັ້ງແຕ່ເດືອນພຶດສະພາທີ່ຜ່ານມາ ອາເມຣິກາໄດ້ຢືນຢັນຜູ້ປ່ວຍສະສົມຫຼາຍກວ່າ 6.600 ຄົນ ສ່ວນໃຫຍ່ເປັນກຸ່ມຊາຍຮັກຊາຍ ໂດຍມີພຽງລັດໄວໂອມິງ ແລະ ລັດມອນແທນາ ເທົ່ານັ້ນທີ່ຍັງບໍ່ມີການຢືນຢັນຜູ້ຕິດເຊື້ອ. ທ່ານ ເບເຊຣາ ຊີ້ໃຫ້ເຫັນວ່າ ການປະກາດດັ່ງກ່າວ ຊຶ່ງສອດຄ່ອງກັບແນວທາງຂອງອົງການອະນາໄມໂລກ (WHO) ທີ່ປະກາດເມື່ອເດືອນທີ່ຜ່ານມາໃຫ້ພະຍາດໝາກສຸກລີງເປັນພາວະສຸກເສີນດ້ານສາທາລະນະສຸກສາກົນ ຈະຊ່ວຍຍົກລະດັບມາດຕະການກວດສອບ ແລະ ປ້ອງກັນພະຍາດນີ້ໃນອາເມຣິກາໃຫ້ມີປະສິດທິພາບເພີ່ມຂຶ້ນເຊັ່ນດຽວກັນ ຈົນເຖິງຂະນະນີ້, ໜ່ວຍງານສາທາລະນະສຸກທົ່ວອາເມຣິກາໄດ້ຮ່ວມກັນສັກວັກຊິນໃຫ້ແກ່ກຸ່ມສ່ຽງຈາກພະຍາດໝາກສຸກລີງໄປແລ້ວຫຼາຍກວ່າ 1,6 ລ້ານຄົນ.

ຕາມ​ຂ່າວ​ຈາກ​ ຊິນ​ຮວາ, ວັນ​ທີ4 ​ສິງຫາ​ນີ້,ອັງ​ກໍ ​ເອັນ​ເຕີ​ໄພຣສ (AngkorEnterprise)ລາຍ​ງານ​ວ່າ:ສວນສາທາລະນະ ບູຮານ ອັງ​ກໍ (Angkor Archaeological Park) ຫລື ອັງ​ກໍ​ວັດ(Angkor Wat) ທີ່ມີຊື່ສຽງ ຂອງກຳປູ ເຈຍ ​ໄດ້​ຕ້ອນຮັບ ນັກ​ທ່ອງ​ທ່ຽວ ສາກົນ 83.854​ເທື່ອຄົນ​ໃນ​ໄລຍະ 7​ເດືອນ​ ທຳ​ອິດ​ປີ​ນີ້ ​ເພີ່ມ​ຂຶ້ນ13,5​ເທົ່າ​ເມື່ອ​ທຽບ​ໃສ່​ປີ​ຕໍ່​ປີ ​ແລະ ສາມາດ​ ສ້າງ​ລາຍ​ໄດ້ 3,37 ລ້ານ​ໂດ​ລາ ​ສະຫະລັດ ຈາກ​ການຈຳໜ່າຍ​ ປີ້​ເຂົ້າຊົມ ລະຫວ່າງ​ ເດືອນ​ມັງກອນ ​ຫາ​​ເດືອນ ກໍລະກົດນີ້ ​ໂດຍ​ຍອດ​ຜູ້​ເຂົ້າຊົມ ສະ​ເພາະ​ ເດືອນ​ກໍລະ ກົດ​ນີ້ 23.871 ​ເທື່ອຄົນ ​ເພີ່ມ​ຂຶ້ນ 52 ​ເທົ່າ​ ເມື່ອ​ທຽບ​ໃສ່​ ໄລຍະ​ດຽວ​ກັນ ປີ​ກາຍ​ນີ້.

(ພາກ​ຂ່າວ: ​ຕ່າງປະ​ເທດ)

ຮຽບຮຽງ​ຂ່າວ​ໂດຍ: ສະ​ໄຫວ ລາດ​ປາກ​ດີ