ການແຂ່ງຂັນເຕະບານຊາຍ ໃນງານຊຽງຂວາງເກມ 2022 ຮອບ 4 ທີມສຸດທ້າຍ ແຂວງວຽງຈັນ ພົບກັບ ແຂວງເຊກອງ ຄູ່ນີ້ ເວລາປົກກະຕິ 90 ນາທີ ບໍ່ມີປະຕູເກີດຂຶ້ນ ແຂວງວຽງຈັນ ເສຍປຽບຜູ້ຫລິ້ນ 1 ຄົນ ໄດ້ບັດແດງທ້າຍເຄິ່ງເວລາທີສອງ ແຕ່ສູ້ຈົນສະເໝີໃນເວລາ 90′ ແລະ ການຕໍ່ເວລາພິເສດອີກ 30 ນາທີ ຕ້ອງມາແຂ່ງຂັນຈຸດໂທດຕັດສິນຫາທີມຊະນະ ແລະ ເປັນແຂວງວຽງຈັນ ຍິງໄດ້​ ແມ້ນກວ່າ ຊະນະດວນຈຸດໂທດ ແຂວງເຊກອງ 3-2 ແສງພະຈັນ ສະແດງບົດບາດໄດ້ ເຊັຟໄດ້ 3 ເທື່ອ​ ພາແຂວງວຽງຈັນ ເຂົ້າຊິງຫລຽນຄຳ.

ໂດຍແຂວງວຽງຈັນ ໄປພົບກັບ ນະຄອນຫລວງວຽງຈັນ ແຊ້ມບານເຕະແຫ່ງຊາດປີນີ້ ທີ່ເອົາຊະນະ ເຈົ້າພາບ ແຂວງຊຽງຂວາງ ຮອງແຊ້ມບານເຕະແຫ່ງຊາດປີນີ້ 2-1 ນະຄອນຫລວງ ໄດ້ສອງປະຕູຈາກ ວິໄລ ກຸລັງສີ ນາທີທຳອິດຂອງເຄິ່ງຫລັງ ແລະ ປີຍະພົງ ປະຖຳມະວົງ ນາທີ 76′ ເຈົ້າພາບ ພະຍາຍາມສູ້ສຸດກຳລັງ ແຕ່ແກ້ໄດ້ພຽງໜຶ່ງປະຕູຈາກ ສຸລີ ຍັນລະສີ ນາທີ 84′.

ຮອບຊິງຊະນະເລີດ ແຂວງວຽງຈັນ ພົບ ນະຄອນຫລວງ ຈະແຂ່ງຂັນວັນທີ 21 ທັນວານີ້ ເວລາ 15:45 ທີ່ສະໜາມໄຫຫີນ ແຕ່ຄູ່ຊິງທີສາມ ຈະແຂ່ງກ່ອນ ເວລາ 13:30 ແຂວງເຊກອງ ພົບ ຊຽງຂວາງ ເຈົ້າພາບ ຢູ່ສະໜາມດຽວກັນ.

​ພິທີມອບຫຼຽນການແຂ່ງຂັນກີລາກ໊ອຟ ໃນງານມະຫາກຳກີລາແຫ່ງຊາດ ຄັ້ງທີ XI (ຊຽງຂວາງ ເກມ 2022) ຈັດຂຶ້ນວັນທີ 17 ທັນວາ 2022 ຢູ່ສະໜາມກອ໊ຟພູກູດທອງຄຳ ເມືອງແປກ ແຂວງຊຽງຂວາງ ໂດຍການເຂົ້າຮ່ວມ ຂອງທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ທ່ານ ກອງສີ ແສງມະນີ ປະທານສະຫະພັນກອ໊ຟແຫ່ງຊາດ ໂດຍມີນັກກີລາຈາກ 18 ທີມ ເຂົ້າຮ່ວມ.

ຜົນການແຂ່ງຂັນປະເພດທີມຫຼຽນຄຳ ກະຊວງປ້ອງກັນປະເທດຄະແນນລວມ 587 ຄະແນນ ຫຼຽນເງິນ ແຂວງຊຽງຂວາງ ຄະແນນລວມ 597 ຄະແນນ ຫຼຽນທອງ ນະຄອນຫລວງວຽງຈັນ ຄະແນນລວມ 601 ຄະແນນ ສ່ວນປະເພດບຸກຄົນຫຼຽນຄຳ ທ່ານ ຈັນປະສິດ ອຸນາພົມ ຄະແນນລວມ 191 ຄະແນນ ຫຼຽນເງິນ ທ່ານ ສຸດທາດ ສີສະຫລາດ ຄະແນນລວມ 194 ຄະແນນ ຫຼຽນທອງ ທ່ານ ສິນໄຊ ພິລາສຸກ ຄະແນນລວມ 197 ຄະແນນ ເຊິ່ງທັງ 3 ທ່ານ ເປັນນັກກີລາຂອງກະຊວງປ້ອງກັນປະເທດ.

ສ່ວນຜົນປະເພດທີມ ມີແຕ້ມຕໍ່ ຫຼຽນຄຳ ກະຊວງປ້ອງກັນປະເທດ ຄະແນນລວມ 215 ຄະແນນ ຫຼຽນເງິນ ແຂວງສະຫວັນນະເຂດ ຄະແນນລວມ 202 ຄະແນນ ຫຼຽນທອງ ແຂວງສາລະວັນ ຄະແນນລວມ 198 ຄະແນນ ປະເພດບຸກຄົນ ມີແຕ້ມຕໍ່ ຫຼຽນຄຳ ທ່ານ ທຳມະລັກ ບົວຫອມ ແຂວງຊຽງຂວາງ ຄະແນນລວມ 76 ຄະແນນ ຫຼຽນເງິນ ທ່ານ ອູຟອງ ວັນທີແສງ ແຂວງອຸດົມໄຊ ຄະແນນລວມ 74 ຄະແນນ ຫຼຽນທອງ ທ່ານ ຂາວພອນ ອິນທິລາດ ນະຄອນຫຼວງວຽງຈັນ ຄະແນນລວມ 74 ຄະແນນ. (ສະບາໄພ 18/12/2022)

ການແຂ່ງຂັນເຕະບານຊາຍ ໃນມະຫະກຳກິລາແຫ່ງຊາດ ຄັ້ງທີ 11 ຊຽງຂວາງເກມ 2022 ໃກ້ຈະສຳເລັດລົງແລ້ວ, ເຊິ່ງການແຂ່ງຂັນ ໃນຮອບ 8 ທີມສຸດທ້າຍ ໃນວັນທີ 17 ທັນວາ 2022 ທີ່ໜາມກິລາໄຊຊະນະ ແລະ ສະໜາມກິລາໄຫຫີນ, ເປັນການພົບກັນ ລະຫວ່າງ ແຂວງວຽງຈັນ ກັບ ຈຳປາສັກ, ແຂວງເຊກອງ ກັບ ແຂວງຫົວພັນ, ຄຳມ່ວນ ກັບ ນະຄອນຫລວງວຽງຈັນ ແລະ ແຂວງສາລະວັນ ກັບ ແຂວງຊຽງຂວາງ, ຜົນ ການແຂ່ງຂັນ ແຂວງວຽງຈັນ, ແຂວງເຊກອງ, ນະຄອນຫລວງວຽງຈັນ ແລະ ແຂວງຊຽງຂວາງ ເຂົ້າຮອບ 4 ທີມສຸດ ທ້າຍ, ກຽມແຂ່ງຂັນກັນເພື່ອເຂົ້າຮອບຊີງຊະນະເລີດ.

ສຳລັບການແຂ່ງຂັນ ໃນຮອບ 8 ທີມສຸດທ້າຍ, ໃນວັນທີ 17 ທັນວາ ຢູ່ສະໜາມໄຊຊະນະ ຄູ່ທຳອິດ ແຂວງວຽງຈັນ ສາມາດເອົາຊະນະ ແຂວງຈຳປາສັກ ຈາກການຍິງຈຸດໂທດ 5-4 ປະຕູ, ເວລາປົກກະຕິສະເໝີກັນ 1-1, ເຮັດໃຫ້ແຂວງວຽງຈັນ ຜ່ານເຂົ້າຮອບ 4 ທີມສຸດທ້າຍ ໄປພົບກັບ ແຂວງເຊກອງ, ສ່ວນການແຂ່ງຂັນ ໃນຄູ່ທີສອງ ແຂວງເຊກອງ ເຮັດຜົນງານໄດ້ດີຢ່າງຕໍ່ເນື່ອງ ສາມາດເອົາຊະນະ ແຂວງຫົວພັນ 2-1, ຈາກການຍິງປະຕູຂອງ ທ້າວ ສຸກລີຈັນ ພະສະແຫວງ ເບີ 9 ໃນນາທີ 22. ຫລັງຈາກນັ້ນ, ໃນນາທີ 24 ແຂວງຫົວພັນ ສາມາດຕີສະເໝີໄດ້ 1-1, ຈາກການຍິງປະຕູຂອງ ທ້າວ ຈິນຖົ່ງ ອິນທະບົວລີ ເບີ 8, ຈາກນັ້ນທັງສອງທີມ ກໍໄດ້ເປີດເກມບຸກໃສ່ກັນຢ່າງຕໍ່ເນື່ອງ ແຕ່ແຂວງເຊກອງ ເຮັດໄດ້ດີກວ່າ ຍິງຂຶ້ນນຳອີກ 1 ປະຕູ, ຈາກການຍິງ ຂອງ ທ້າວ ນັດຕະພອນ ບຸດດາຜົນ ໃນນາທີ 76, ຈົບການແຂ່ງຂັນ ເຊກອງ ເອົາຊະນະ ແຂວງຫົວພັນ 2-1, ຜ່ານເຂົ້າຮອບ 4 ທີມສຸດທ້າຍ, ກຽມພົບກັບ ແຂວງວຽງຈັນ.

ສຳລັບ ການແຂ່ງຂັນຢູ່ສະໜາມກິລາໄຫຫີນ ເຈົ້າພາບແຂວງຊຽງຂວາງ ເອົາຊະນະ ແຂວງສາລະວັນ ແບບວຸດວິດ 1-0, ຈາກການຍິງປະຕູ ຂອງ ທ້າວ ອາລຸນປະຊາ ກິດຕິວົງ, ໃນນາທີ 67, ເຮັດໃຫ້ແຂວງຊຽງຂວາງ ຜ່ານເຂົ້າຮອບ 4 ທີມສຸດທ້າຍ ໄປພົບກັບ ນະຄອນຫລວງວຽງຈັນ, ທີເອົາຊະນະແຂວງຄຳມ່ວນ 2-0, ຈາກການຍິງປະຕູ ຂອງ ທ້າວ ວິໄລ ກຸລັງສີ, ໃນນາທີ 82 ແລະ ໄດ້ປະຕູ ຈາກຜູ້ຫລີ້ນສຳຮອງ ທ້າວ ພູມິນ ຄຳພິວົງ ໃນນາທີ 90 ເຮັດໃຫ້ ແຂວງຄຳມ່ວນ ຕົກຮອບທັນທີ.

ສຳລັບການແຂ່ງຂັນ ຮອບ 4 ທີມສຸດທ້າຍ ຈະມີຂຶ້ນໃນວັນທີ 19 ທັນວາ ນີ້, ຄູ່ທຳອິດແຂວງວຽງຈັນ ພົບກັບ ແຂວງເຊກອງ ເວລາ 13:30 ໂມງ ແລະ ຄູ່ທີສອງ ນະຄອນຫລວງວຽງຈັນ ພົບກັບ ແຂວງຊຽງຂວາງ ເຈົ້າພາບ ເວລາ 15:45 ໂມງ ຢູ່ສະໜາມກິລາໄຫຫີນ ທັງສອງຄູ່.

ຂ່າວ: ທະນູທອງ

ພາບ: ອ່າຍຄຳ

ການແຂ່ງຂັນກິລາມວຍລາວ ໃນມະຫະກໍາກິລາແຫ່ງຊາດ ຄັ້ງທີ 11 ຫລື ຊຽງຂວາງ ເກມ 2022 ວັນທີ 17 ທັນວາ 2022 ຢູ່ສະໜາມກິລາສວນມອນ ບ້ານໂງຍ ເມືອງແປກ ແຂວງຊຽງຂວາງ ມີການແຂ່ງຂັນທັງ ໝົດ 15 ຄູ່, ຍິງ 6 ຄູ່, ຮຸ່ນນ້ຳໜັກ 71 ກິໂລຊາຍ ມີ 3 ຄູ່, ຄູ່ທຳອິດ ລາຍຸດ ເທືອສະບານ ຈາກບໍລິຄຳໄຊ ເອົາຊະນະ ໂຊກໄຊ ວາດທະວີສັກ ຈາກບໍ່ແກ້ວ, ຄູ່ທີ 2 ດຳຊຸມພອນ ຂຽວສະຫວາດ ຈາກກະຊວງປ້ອງກັນປະເທດ ເອົາຊະນະ ຄັອບຟີ່ ແກ້ວໄຊຍະວົງ ຈາກຊຽງຂວາງເຈົ້າ ພາບ, ຄູ່ທີ 3 ບຸນເພັງ ຫລວງສຸວັນ ຈາກໄຊສົມບູນ ເອົາຊະນະ ສີເທີນ ສິລາບຸດ ຈາກຫລວງພະບາງ.

ສຳລັບ ຮຸ່ນນ້ຳໜັກ 51 ກິໂລ ຊາຍ ມີ 4 ຄູ່, ຄູ່ທຳອິດ ເພັດຂວັນໄຊ ແກ້ວປະເສີດ ຈາກແຂວງເຊກອງ ເອົາຊະ ນະ ຄາວີ ລິນວົງສາ ຈາກຈຳປາສັກ, ຄູ່ທີ 2 ສົມບູນ ຊາບັນເດດ ຈາກສາລະວັນ ເອົາຊະນະນັອກ ຄຳຜັນ ມະໄລທອງ ຈາກນະຄອນຫລວງ, ຄູ່ທີ 3 ຄຳມີ ສີວົງສົດ ຈາກສະຫວັນນະເຂດ ເອົາຊະນະ ວີໄຊ ປານເພັດ ຈາກບໍລິຄຳໄຊ, ຄູ່ທີ 4 ພອນຄຳ ສົມຍົງ ຈາກຄຳມ່ວນ ເອົາຊະນະ ພິມພອນ ລາວົງສະຫວັນ ຈາກກະຊວງປ້ອງກັນ ປະເທດ, ຮຸ່ນນ້ຳໜັກ 45 ກິໂລ ມີ 2 ຄູ່, ຄູ່ທຳອິດ ສີບູ່ ບັນຊາເດດ ຈາກສາລະວັນ ເອົາຊະນະ ຫວາຍ ສຸວັນນະໄຕ ຈາກນະຄອນຫລວງ ແລະ ຄູ່ສຸດທ້າຍ ພັນທະ ສີງະຫວັດ ຈາກເຊກອງ ເອົາຊະນະ ອາເລັກ ຈາກບໍລິຄຳໄຊ ສຳລັບຜູ້ຊະນະຈະເຂົ້າແຂ່ງຂັນໃນຮອບຮອງຊະນະເລີດ ໃນວັນທີ 19 ທັນວາ 2022.

ຂ່າວ: ຂັນລາວອນ

ຕາມຂ່າວຈາກ ວິທະຍຸ ສາກົນ ຫວຽດນາມ, ອົງການພະລັງງານສາກົນ (IEA) ໃຫ້ຮູ້ວ່າ: ຈຳນວນຖ່ານຫີນທີ່ນຳໃຊ້ ໃນທົ່ວໂລກຈະບັນລຸລະດັບສະຖິຕິໃໝ່ໃນປີນີ້ໃນສະພາບຄວາມຕ້ອງການ ສຳລັບເຊື້ອເພີງຟອກຊິວ ທີ່ກໍ່ມົນລະຜິດຕໍ່ສິ່ງແວດລ້ອມຢ່າງໜັກໜ່ວງ ຄືໃນປະຈຸບັນຍັງສູງຢູ່. ເຖິງວ່າການນຳໃຊ້ຖ່ານຫີນພຽງເພີ່ມຂຶ້ນ 1,2% ໃນປີ 2022, ແຕ່ລະດັບ ເພີ່ມຂຶ້ນນີ້ໄດ້ຍູ້ໃຫ້ປະລິມານນຳໃຊ້ຖ່ານຫີນຂຶ້ນລະດັບສູງທີ່ສຸດ ນັບແຕ່ກ່ອນມາຮອດປະຈຸບັນແມ່ນກວ່າ 8 ຕື້ໂຕນ ແລະ ລື່ນກາຍລະດັບສະຖິຕິກ່ອນນັ້ນ ໃນປີ 2013. ຂະນະທີ່ລາຄາເຊື້ອເພີງທຳມະຊາດເພີ່ມຂຶ້ນສູງກົງກັບການຂຶ້ນກັບຖ່ານຫີນ ເພື່ອຜະລິດ ໄຟຟ້າ. ເຖິງຢ່າງໃດກໍ່ຕາມ, ທົ່ວໂລກຕ້ອງຫລຸດຜ່ອນການນຳໃຊ້ຖ່ານຫີນ ແລະ ບັນດາເຊື້ອເພີງຟອກຊິວອື່ນ ຢ່າງແຮງເພື່ອຈຳກັດວິວັດການໜ່ວຍໂລກຮ້ອນຂຶ້ນ 1,5 ອົງສາເຊ ໃນທົດສະວັດນີ້.

(ບັນນາ ທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ຕາມຂ່າວຈາກວິທະຍຸສາກົນແຫ່ງ ສປ ຈີນ ເມື່ອບໍ່ດົນມານີ້, ອົງການກອງທຶນເງິນຕາສາກົນ (IMF) ໄດ້ອອກຖະແຫລງການ ໂດຍລະບຸວ່າ: ຄະນະຜູ້ບໍລິຫານງານ IMF ໄດ້ອະນຸມັດເງິນກູ້ທີ່ມີກຳນົດ 46 ເດືອນ ໃຫ້ແກ່ປະເທດເອຢິບ ຈຳນວນ 3 ຕື້ໂດລາ ສະຫະລັດພາຍໃຕ້ການຊ່ວຍເຫລືອ ຈາກ IMF, ເອຢິບໄດ້ວາງນະໂຍບາຍຕ່າງໆ, ເພື່ອຮັບປະກັນຄວາມໝັ້ນທ່ຽງ ຂອງເສດຖະກິດມະຫາພາກ ແລະ ສ້າງພື້ນຖານໃຫ້ແກ່ການເຕີບໂຕດ້ານເສດຖະກິດທີ່ກວມລວມ ແລະ ນໍາພາໂດຍ ພາກສ່ວນ ເອກະຊົນ. ນະໂຍບາຍເຫລົ່ານີ້ໄດ້ກ່ຽວພັນເຖິງການຫັນເປັນລະບຽບການອັດຕາແລກປ່ຽນເງິນຕາທີ່ມີຄວາມຄ່ອງແຄ້ວ, ນະໂຍບາຍເງິນຕາເພື່ອຫລຸດຜ່ອນໄພເງິນເຟີ້ເທື່ອລະກ້າວ ແລະ ການປັບປຸງດ້ານການເງິນເພື່ອຮັບປະກັນໃຫ້ໜີ້ສິນສາທາລະນະຫລຸດໜ້ອຍລົງເປັນຕົ້ນ.

(ບັນນາ ທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ຕາມຂ່າວຈາກ ວິທະຍຸ ສາກົນ ຫວຽດນາມ ວັນທີ 17 ທັນວາ ຢູ່ຮ່າໂນ້ຍ, ຄະນະເສດຖະກິດສູນກາງ ໄດ້ສົມທົບກັບ ລັດຖະບານຈັດເວທີປາໄສເສດຖະກິດຫວຽດນາມ ຄັ້ງທີ 5 ຂຶ້ນ ດ້ວຍຫົວຂໍ້ “ເສດຖະກິດຫວຽດນາມ 2023: ຮັກສາ ເສດຖະກິດມະຫາພາກເປັນປົກກະຕິ, ຮັບປະກັນຄວາມດູ່ນດ່ຽງໃຫຍ່, ຜ່ານຜ່າສິ່ງທ້າທາຍຢ່າງໝັ້ນແກ່ນ”. ບັນດານັກປະຖະກະຖາໄດ້ປຶກສາຫາລື ກ່ຽວກັບບັນດາໝາກຜົນ ແລະ ບົດຮຽນທີ່ຖອດຖອນ ມາຈາກການບໍລິຫານເສດຖະກິດມະຫາພາກ ປີ 2022, ຮັບຮູ້ກາລະໂອກາດ, ຄວາມສ່ຽງ ແລະ ສິ່ງທ້າທາຍ ເຊິ່ງພື້ນຖານເສດຖະກິດຫວຽດນາມ ຕ້ອງປະເຊີນໜ້າ ໃນປີ 2023. ຜ່ານນັ້ນ, ກໍ່ຄາດຄະເນບັນດາແຜນການເຕີບໂຕເສດຖະກິດ ແລະ ການບໍລິຫານເສດຖະກິດມະຫາພາກ ປີ 2023. ພ້ອມທັງ, ສະເໜີບັນດາກົນໄກ, ນະໂຍບາຍເພື່ອແນໃສ່ກຳແໜ້ນ ແລະ ຫັນກາລະໂອກາດເປັນລະອຽດ, ຜ່ານຜ່າ ຄວາມຫຍຸ້ງຍາກ ແລະ ສິ່ງທ້າທາຍ ເພື່ອນຳພື້ນຖານເສດຖະກິດພັດທະນາຢ່າງແຮງໃນປີ 2023. ຈາກນັ້ນ, ນັກຊ່ຽວຊານ ດ້ານເສດຖະກິດ, ປ.ອ ເກິ່ນວັນລຶກ ລະບຸວ່າ: ຕ້ອງຍູ້ແຮງວິວັດການສ້າງໂຄງປະກອບລະບົບການເງິນ, ທະນາຄານຄືນໃໝ່ ໃຫ້ຫລາຍກ່ວາອີກ, ພິເສດແມ່ນບັນດາອົງການການເງິນຊຸດໂຊມເພື່ອຮັບປະກັນການແຈກຢາຍ ແລະ ລະດົມແຫລ່ງກຳລັງ ຢ່າງມີປະສິດທິຜົນກ່ວາອີກ. ວຽກງານນີ້ກໍ່ຮັບປະກັນການພັດທະນາແບບຍືນຍົງ ຂອງລະບົບການເງິນ, ຫລີກລ້ຽງ ປະກົດການແກ້ງແຍ້ງບໍ່ປອດໄສຄື ໄດ້ເກີດຂຶ້ນໃນໄລຍະຜ່ານມາ. ໜຶ່ງໃນບັນດາບັນຫາທີ່ຄວນໄດ້ຮັບການບຸລິມະສິດ ໃນປີ 2023 ແມ່ນຕ້ອງຮັບປະກັນການຊຳລະ, ຮັບປະກັນຄວາມປອດໄພຂອງລະບົບ, ແກ້ໄຂຄວາມຕ້ອງການຊຳລະຄືນ ພັນທະບັດທີ່ເຖິງກຳນົດໃຫ້ເປັນຢ່າງດີ ເປັນຕົ້ນແມ່ນພັນທະບັດວິສາຫະກິດອະສັງຫາລິມະຊັບ.

(ບັນນາ ທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ)