ຕາມຂ່າວຈາກວິທະຍຸສາກົນແຫ່ງ ສປ ຈີນ ​ເມື່ອ​ບໍ່​ດົນ​ມາ​ນີ້ ທ່ານ ສີ ຈິ້ນຜິງ ປະທານປະເທດ ສປ ຈີນ ໄດ້ພົບປະກັບ ທ່ານ ມີລົດເສ ເຊມັນ, ປະທານາທິບໍດີເຊັກ ຜ່ານທາງວິດີໂອ ໃນ​ໂອກາດ​ນີ້ ທ່ານ ສີ ຈິ້ນຜິງ ​ໄດ້​ຍົກ​ໃຫ້​ເຫັນ​ເຖິງ​ໄລຍະ 10 ປີ ທີ່ຜ່ານມາທີ່ໄດ້ພົບປະ ແລະ ໂອ້ລົມກັນຜ່ານທາງໂທລະສັບຫລາຍເທື່ອ ​ໂດຍລົງເລິກດຳເນີນການແລກປ່ຽນ ກ່ຽວກັບການພົວພັນ ສອງຝ່າຍ, ບົດຮຽນການປົກຄອງປະເທດ ແລະ ການບໍລິຫານການເມືອງ ແລະ ອື່ນໆ ໄດ້ຍົກລະດັບການພົວພັນລະຫວ່າງ ສປ ຈີນ ກັບ ເຊັກ ໃຫ້ເປັນການພົວພັນຄູ່ຮ່ວມຍຸດທະສາດ. ພ້ອມ​ທັງຊຸກຍູ້ການໄປມາຫາສູ່ກັນດ້ານເສດຖະກິດ-ການຄ້າ ຂອງທັງສອງຝ່າຍ, ມູນຄ່າການສົ່ງອອກຂອງເຊັກຕໍ່ ສປ ຈີນ ໄດ້ເພີ່ມຂຶ້ນເກືອບ 2 ເທົ່າ, ຈຳນວນນັກທ່ອງທ່ຽວຈີນ ທີ່ໄປ ທ່ອງທ່ຽວໃນເຊັກ ​ເມື່ອປີ 2019 ເພີ່ມຂຶ້ນ 250% ເມື່ອທຽບໃສ່ປີ 2013. ສປ ຈີນ ໄດ້ເອົາໃຈໃສ່ນຳການຂະຫຍາຍການພົວພັນ ສປ ຈີນ-ເຊັກ, ຖືເຊັກ ເປັນຄູ່ຮ່ວມຍຸດທະສາດທີ່ສຳຄັນ, ຊຸກຍູ້ການພົວພັນສອງຝ່າຍ ໃຫ້ກ້າວໄປຂ້າງໜ້າຢ່າງໝັ້ນທ່ຽງ, ສ້າງຄວາມສຸກໃຫ້ແກ່ປະຊາຊົນສອງຊາດຫລາຍກວ່າເກົ່າ ຈາກ​ນັ້ນ ທ່ານ ມີລົດເສ ເຊມັນ ​ໄດ້ກ່າວສະ​ແດງ​ຄວາມ ຍິນດີໃນ​ຄວາມພະຍາຍາມຮ່ວມກັບ ຝ່າຍ ສປ ຈີນ, ເພີ່ມທະວີການຮ່ວມມືໃນຂົງເຂດເສດຖະກິດ-ການຄ້າ, ການລົງທຶນ ແລະ ຂົງເຂດອື່ນໆ ເອົາຊະນະຜົນກະທົບຈາກການແພ່ລະບາດຂອງພະຍາດ ໂຄວິດ-19, ຟື້ນຟູການໄປມາຫາສູ່ກັນ ລະຫວ່າງປະຊາຊົນ ເຮັດໃຫ້ການພົວພັນລະຫວ່າງເຊັກກັບ ສປ ຈີນ ໄດ້ຮັບຄວາມຈະເລີນຮຸ່ງເຮືອງ ແລະ ມີຊີວິດຊີວາຂຶ້ນຕື່ມອີກ.

(ບັນນາທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ຕາມຂ່າວຈາກ mcot.net ໜ່ວຍ​ງານ ຄົ້ນຄວ້າສາກົນເປີດ​ເຜີຍ​ວ່າ: ​ແຜ່ນ​ນ້ຳກ້ອນ​ເກືອບ​ເຄິ່ງໜຶ່ງຂອງ​ໂລກ ຈະ​ລະລາຍ​ພາຍ​ໃນ​ ປີ 2100 ​ເຖິງ​ວ່າ​ທົ່ວ​ໂລກ​ຈະ​ຮັກສາ​ການ​ເພີ່ມ​ຂຶ້ນ​ຂອງ​ອຸນຫະພູມ ສ​ະ​ເລ່ຍບໍ່​ໃຫ້​ເກີນ1,5 ອົງສາ​ເຊ ອີງ​ຕາມ​ການ​ຄິດ​ໄລ່​ ທາງ​ຄອມ​ພິວ​ເຕີ​ ຂອງ​​ແຜ່ນນ້ຳ​ກ້ອນ​ຫລາຍ​ກວ່າ 210.000 ​ແຫ່ງທົ່ວ​ໂລກ​ທີ່​ໄດ້​ລະລາຍພາຍ​ໃຕ້ລະດັບ​ຄວາມ​ຮ້ອນ​ຂອງ​ໂລກ ທີ່​ແຕກ​ຕ່າງ​ກັນ ພົບ​ວ່າແຜ່ນ​ນ້ຳກ້ອນ 49% ຈະ​ລະ​ລາຍ ​ໃນ​ປີ 2100, ​ເຖິງ​ແມ່ນ​ວ່າທົ່ວໂລກ​ຈະ​ຮັກສາ​ການ​ເພີ່ມ​ຂຶ້ນ​ ຂອງ​ອຸນຫະພູມ ສະ​ເລ່ຍບໍ່​ໃຫ້​ກາຍ 1,5 ອົງສາ​ເຊ ​ແລະ ​ໃນ​ກໍລະນີຮ້າຍ​ແຮງ​ທີ່​ສຸດ ຫາກ​ໂລກມີ​ອຸນຫະພູມ​ ອຸ່ນ​ຂຶ້ນ 4 ອົງສາເຊ, ​ແຜ່ນ​ນ້ຳກ້ອນ 83% ຈະ​ລະລາຍ ​ແລະ ​ເຮັດ​ໃຫ້​ລະດັບ​ນ້ຳ​ທະ​ເລສູງ​ຂຶ້ນ​ອີກປະມານ 15 ຊັງ​ຕີ​ແມັດ./.

(ບັນນາທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ຕາມຂ່າວຈາກວິທະຍຸສາກົນແຫ່ງ ສປ ຈີນ ເມື່ອ​ບໍ່​ດົນ​ມາ​ນີ້ ທ່ານ ຮຸນເຊັນ, ນາຍົກລັດຖະມົນຕີກຳປູເຈຍ ກັບ ທ່ານ ວາງເວີນທ່ຽນ ເອກອັກຄະລັດຖະທູດຈີນ ປະຈຳກຳປູເຈຍ ໄດ້ເຂົ້າຮ່ວມພິທີເປີດໂຄງການບູລະນະຍົກລະດັບເສັ້ນທາງຫລວງ ເລກ 7 ທາງຜ່ານເມືອງສະຄຸນ ແຂວງກຳປົງຈາມ ຂອງກຳປູເຈຍ ຈາກ​ນັ້ນ ທ່ານ ຮຸນເຊັນ ໄດ້ສະແດງຄວາມຂອບໃຈຕໍ່ ສປ ຈີນ ທີ່ໄດ້ໃຫ້ການຊ່ວຍເຫລືອແກ່ກຳປູເຈຍ ໃນການສ້າງສາພັດທະນາເສັ້ນທາງ, ຂົວ, ພະລັງງານໄຟຟ້າ ແລະ ຂົງເຂດອື່ນໆ ຂອງກຳປູເຈຍ, ເຊິ່ງໄດ້ປະກອບສ່ວນອັນໃຫຍ່ຫລວງເຂົ້າໃນການພັດທະນາຂອງກຳປູເຈຍ. ຫລັງຈາກເຊັນສັນຍາກັນບໍ່ພຽງເທົ່າໃດເດືອນ, ໂຄງການບູລະນະຍົກລະດັບເສັ້ນທາງຫລວງ ເລກ 7 ໄດ້ເລີ່ມຕົ້ນການກໍ່ສ້າງໂດຍໄວ, ສະແດງໃຫ້ເຫັນເຖິງ ການຕິດແທດຕົວຈິງ ແລະ ປະສິດທິພາບສູງຂອງການຮ່ວມມື ລະຫວ່າງກຳປູເຈຍ ກັບ ສປ ຈີນ ຢ່າງເຕັມສ່ວນ. ສຳລັບການເດີນທາງຈາກນະຄອນຫລວງພະນົມເປັນ ໄປຫາແຂວງກຳປົງຈາມ ເຊິ່ງເປັນແຂວງໃຫຍ່ດ້ານເສດຖະກິດ ຂອງກຳປູເຈຍ ຕ້ອງແລ່ນຜ່ານເສັ້ນທາງຫລວງເລກ 7, ເຊິ່ງເປັນໂຄງການເສັ້ນທາງຫລວງສາຍທຳອິດ ທີ່ສປ ຈີນ ກໍ່ສ້າງຂຶ້ນດ້ວຍເງິນກູ້ບຸລິມະສິດທີ່ພວມບູລະນະຍົກລະດັບນັ້ນມີຄວາມຍາວປະມານ 45 ກິໂລແມັດ ຄາດວ່າຈະໃຫ້ສຳເລັດ ໃນປີ 2027.

(ບັນນາທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ຕາມຂ່າວຈາກວິທະຍຸສາກົນຫວຽດນາມ, ​ເມື່ອ​ບໍ່​ດົນ​ມາ​ນີ້ ທ່ານ Kao Kim Hourn ເລຂາທິການໃຫຍ່ອາຊຽນ ໄດ້ກ່າວເນັ້ນໜັກເຖິງ 6 ບຸລິມະສິດຕົ້ນຕໍໃນ​ໄລຍະ​ໃໝ່ ​ໂດຍ​ສະ​ເພາະປະຊາຄົມອາ​ຊຽນ ຄວນສືບຕໍ່ໃຫ້ບຸລິມະສິດແກ່ການຮັກສາ ສັນຕິພາບ, ສະຖຽນລະພາບ ແລະ ຄວາມໝັ້ນຄົງຢູ່ພາກພື້ນ. ຖັດຈາກນັ້ນແມ່ນການກໍ່ສ້າງໂດຍອີງໃສ່ຄວາມວັດທະນາ ຖາວອນ; ຄວາມມານະພະຍາຍາມປົກປ້ອງໜ່ວຍພິພົບສີຂຽວ, ພິເສດແມ່ນບັນດາບັນຫາສິ່ງແວດລ້ອມ, ການປ່ຽນແປງ ຂອງດິນຟ້າອາກາດ ແລະ ພື້ນຖານເສດຖະກິດສີຂຽວ; ມອບສິດໃຫ້ແກ່ປະຊາຊົນ- ພິເສດແມ່ນລຸ້ນໜຸ່ມ; ເພີ່ມທະວີບັນດາ ການພົວພັນຄູ່ຮ່ວມມືໃນອາຊຽນ ກໍ່ຄືລະຫວ່າງອາຊຽນ ກັບບັນດາຄູ່ຮ່ວມມືພາຍນອກ. ສຸດທ້າຍແມ່ນນຳບັນດາຂົງເຂດ ທີ່ມີຄວາມສາມາດບົ່ມຊ້ອນໃຫ້ກາຍເປັນຜົນປະໂຫຍດ ແລະ ທ່າແຮງຢ່າງແທດຈິງມີຄວາມໝາຍສຳຄັນສຳລັບອາຊຽນ.

(ບັນນາທິການຂ່າວ: ຕ່າງປະເທດ)

ຮຽບຮຽງຂ່າວໂດຍ: ສະໄຫວ ລາດປາກດີ

ແມນເຊັສເຕີ ຢູໄນເຕັດ ບັນລຸຂໍ້ຕົກລົງທາງວາຈາ ໃນການເຊັນສັນຍາຢືມຕົວ ເວົາ ເວັກຮອສ ກອງໜ້າທີມຊາດໂຮນລັງ ມາຈາກ ເບີນລີ ຢ່າງເຕັມຮູບແບບແລ້ວ ໂດຍເຂົ້າໃຈວ່າຈະຈ່າຍຄ່າຊົດເຊີຍໃຫ້ ເບຊິກຕັສ ເປັນຈໍານວນ 3 ລ້ານເອີໂຣ.

ແມນເຊສເຕີ ຢູໄນເຕັດ ໄດ້ຫາລືກັບ ເບີນລີ ຕົ້ນສັງກັດທີ່ແທ້ຈິງຂອງ ເວັກຮອສ ເຖິງເລື່ອງການຢືມຕົວກອງໜ້າອາຍຸ 30 ປີທາຍັງຖິ່ນ ໂອລ ແທຣບຟອດ ໄປແລ້ວ ຊຶ່ງອຸປະສັກອີຫຼີ ກໍຄືນັກເຕະມີສັນຍາຢືມຕົວຕະຫຼອດລະດູການກັບ ເບຊິກຕັສ.

ເບີນລີ ບໍ່ມີເງື່ອນໄຂຢຸດສັນຍາຢືມຕົວຂອງ ເວັກຮອສໃນເດືອນມັງກອນ ໃນຂະນະທີ່ ເບຊິກຕັສ ກໍສະແດງຢ່າງຊັດເຈນວ່າພວກເຂົາຈະບໍ່ຍົກເລີກສັນຍາກາງທາງແທ້ ແຕ່ທຸກສິ່ງທຸກຢ່າງສາມາດສົນທະນາກັນໄດ້ ຫາກມີຄ່າຊົດເຊີຍທີ່ເໝາະສົມ.

ຫຼ້າສຸດ ຟາບຣິຊິໂອ ໂຣມາໂນ ໄດ້ອັບເດດຂໍ້ຕົກລົງເພີ່ມວ່າ ແມນເຊສເຕີ ຢູໄນເຕັດ ໄດ້ບັນລຸຂໍ້ຕົກລົງທາງວາຈາຢ່າງເຕັມຮູບແບບ ໃນການເຊັນສັນຍາຢືມຕົວ ເວັກຮອສ ແລ້ວ ໂດຍພວກເຂົາ ຈະຈ່າຍຄ່າຊົດເຊີຍໃຫ້ ເບຊິສຕັສ 3 ລ້ານເອີໂຣ.

ຂັ້ນຕອນສຸດທ້າຍທີ່ລໍຖ້າຢູ່ຕອນນີ້ກໍຄື ເບຊິກຕັສ ຈະອະນຸມັດຂໍ້ຕົກລົງກໍຕໍ່ເມື່ອພວກເຂົາສາມາດຊອກຫາຜູ້ທົດແທນທີ່ເໝາະສົມໄດ້ກ່ອນ.

ສໍາລັບ ເວັກຮອສ ມີຜົນງານທີ່ດີກັບ ເບຊິກຕັສ ຍິງໄດ້ 9 ປະຕູຈາກ 18 ເກມ ແລະ ທີມດັງແຫ່ງອິສຕັນບູລ ມີເງື່ອນໄຂຊື້ຂາດໃນລາຄາ 8,5 ລ້ານປອນ ໃນໄລຍະລະດູຮ້ອນ ແຕ່ສະຖານະການຕອນນີ້ ກອງໜ້າຊາວໂຮນລັງ ຢາກຍ້າຍໄປຫຼິ້ນກັບ ແມນເຊສເຕີ ຢູໄນເຕັດ ຢ່າງເຕັມທີ່.

ອາດ ເດີ ມອສ ອະດີດຜູ້ຈັດການທີມ ພີເອສວີ ໄອໂຮເຟ່ນ ສະແດງຄວາມເຫັນວ່າ ໂຄດີ ກກໂປ ອາດຍ້າຍຮ່ວມທີມ ລີເວີພູລ ຜິດເວລາ ເນື່ອງຈາກ ເຢີເກນ ຄລັອບ ອາດກ້າວລົງຈາກຈາກຕໍາແໜ່ງຜູ້ຈັດການໃນໄວໆນີ້.

ກົກໂປ ເປີດຕົວຄັ້ງທໍາອິດໃຫ້ກັບ ລີເວີພູລ ໃນການແຂ່ງຂັນເຕະບານ FA Cup ຮອບທີສາມທີ່ສະເໝີກັບ ວູຟແຮມຕັນ 2-2 ເມື່ອວັນເສົາທີ່ຜ່ານມາ ຫຼັງຈາກທີ່ຍ້າຍມາຈາກ PSV ດ້ວຍຄ່າຕົວເບື້ອງຕົ້ນ 37 ລ້ານປອນ

ດາວເຕະອາຍຸ 23 ປີ ເຂົ້າມາເພີ່ມຕົວເລືອກເກມບຸກໃຫ້ທີມລີເວີພູລ ຫຼັງໂຊຟອມໂດດເດັ່ນກັບສະໂມສອນ ແລະ ທີມຊາດ ຢ່າງໃດກໍຕາມ ເດີ ມອສ ຜູ້ທີ່ເຄີຍເປັນຜູ້ຈັດການ PSV ແລະ ອາແຈັກ ເຊື່ອວ່າ ກັກໂປ ອາດຕັດສິນໃຈຜິດພາດທີ່ເລືອກ ລີເວີພູລ.

ເດີ ມອສ ບອກກັບຮ້ານ Soccernews ວ່າ: ” ເຂົາຍ້າຍມາໃນໄລຍະເວລາທີ່ທີມມີແຕ່ເລື່ອງໜ້າຜິດຫວັງ ທີມສັກສີຫາຍໄປ ແລະ ພວກເຂົາບໍ່ແມ່ນໜຶ່ງໃນທີມທີ່ດີທີ່ສຸດໃນເວລານີ້ ເຊັ່ນດຽວກັບ ເຊວຊີ “

“ ລີເວີພູລ ກໍາລັງພະຍາຍາມກັບຄືນສູ່ເສັ້ນທາງທີ່ຄວນຈະເປັນ ແລະ ມັນບໍ່ແມ່ນເວລາສໍາລັບນັກເຕະອາຍຸນ້ອຍທີ່ຈະເຂົ້າມາ ດັ່ງນັ້ນ ຂ້ອຍບໍ່ຮູ້ວ່າມັນແມ່ນເວລາທີ່ເໝາະສົມຫຼືຍັງ ທີ່ຈະໄປຢູ່ ລີເວີພູລ ໃນເວລານີ້. ນອກຈາກນີ້ ບາງທີ ເຢີເກນ ຄລັອບ ອາດຈະຍ້າຍອອກຈາກທີມໃນໄວໆນີ້ເຊັ່ນກັນ.

ສໍາລັບ ຄລັອບ ເຂົ້າຄຸມທີມ ລິເວີພູລ ມາຕັ້ງແຕ່ເດືອນຕຸລາ ປີ 2015 ແລະ ຂະຫຍາຍສັນຍາໄປຈົນຮອດປີ 2026 ໃນເດືອນເມສາ ປີກາຍນີ້.

ວິທະຍຸກະຈາຍສຽງຫວຽດນາມລາຍງານວ່າ: ພາຍຫຼັງເຮັດວຽກຢ່າງເຄັ່ງຄັດ, ເຂັ້ມງວດ, ມີຄວາມຮັບຜິດຊອບ, ໃນວັນທີ 9 ມັງກອນ ຜ່ານມາ, ກອງປະຊຸມວິສາມັນເທື່ອທີ 2 ສະພາແຫ່ງຊາດ ຫວຽດນາມ ຊຸດທີ XV ໄດ້ປິດລົງຢູ່ຫໍສະພາແຫ່ງຊາດ ນະຄອນຫຼວງຮ່າໂນ້ຍ. ໂດຍການເຂົ້າຮ່ວມຂອງ ທ່ານ ຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ທ່ານ ຫງວຽນຊວັນຟຸກ ປະທານປະເທດ ແລະ ທ່ານ ຟ້າມມິງຈິງ ນາຍົກລັດຖະມົນຕີ; ທ່ານ ເວືອງດິ່ງເຫວ້ ປະທານສະພາແຫ່ງຊາດ ເປັນປະທານກອງປະຊຸມ.

ຂ່າວລະບຸວ່າ: ທ່ານ ເວືອງດິ່ງເຫວ້ ກ່າວຄຳເຫັນໃນພິທີປິດກອງປະຊຸມ ວ່າ: ກອງປະຊຸມໄດ້ສຳເລັດທຸກລາຍການທີ່ໄດ້ວາງອອກ. ສະພາແຫ່ງຊາດໄດ້ຮັບຮອງເອົາຮ່າງກົດໝາຍ 1 ສະບັບ ວ່າດ້ວຍການກວດ, ປິ່ນປົວພະຍາດ (ສະບັບປັບປຸງ) ແລະ ມະຕິ 3 ສະບັບ ຄື: ມະຕິວ່າດ້ວຍການດັດປັບແຜນການກູ້ຢືມທຶນ ປີ 2022 ຂອງທ້ອງຖິ່ນຕ່າງໆ, ປັບປຸງຮ່າງແຜນລາຍຈ່າຍງົບປະມານປົກກະຕິປະຈຳປີ 2021 ບ້ວງເງິນຊ່ວຍເຫຼືອຂອງຕ່າງປະເທດ, ດັດປັບຮ່າງແຜນງົບປະມານທີ່ຍັງເຫຼືອປີ 2021 ຂອງ ກົມໃຫຍ່ພາສີ ແລະ ກົມໃຫຍ່ສ່ວຍສາອາກອນ; ພ້ອມທັງໃຫ້ສັດຕະຍາບັນແຕ່ງຕັ້ງຮອງນາຍົກລັດຖະມົນຕີ 2 ທ່ານ ຄື: ທ່ານ ເຈິ່ນຮົ່ງຮ່າ ແລະ ທ່ານ ເຈິ່ນລິວກວາງ. ທ່ານເນັ້ນໜັກວ່າ: ສະພາແຫ່ງຊາດໄດ້ພິຈາລະນາ, ຕົກລົງ 5 ໝວດບັນຫາໃຫຍ່, ສຳຄັນ ແລະ ຮີບດ່ວນທີ່ກອງປະຊຸມວິສາມັນເທື່ອທີ 2 ນີ້ ຈະປະກອບສ່ວນແກ້ໄຂຄວາມຫຍຸ້ງຍາກ, ຂໍ້ຕິດຂັດຫຼາຍຢ່າງໃນຕົວຈິງ. ພ້ອມທັງ, ສ້າງປະຖົມປັດໄຈສຳຄັນເພື່ອປະຕິບັດໜ້າທີ່ປີ 2030 ແລະ ໃນຊຸມປີຕໍ່ໄປ.

ໂດຍໃຫ້ຂໍ້ສັງເກດກ່ຽວກັບສະພາບການຢູ່ພາຍໃນ ແລະ ທົ່ວໂລກ ໃນປີ 2023, ທ່ານ ເວືອງດິ່ງເຫວ້ ຖືວ່າ: ຍັງມີຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ. ສະນັ້ນ, ທຸກຂັ້ນ, ທຸກກະຊວງ, ຄະນະ, ຂະແໜງການ, ອຳນາດການປົກຄອງທ້ອງຖິ່ນ, ປະຊາຄົມວິສາຫະກິດ ແລະ ປະຊາຊົນທຸກຖ້ວນໜ້າ ຕ້ອງສືບຕໍ່ພະຍາຍາມແກ້ໄຂຄວາມຫຍຸ້ງຍາກ, ບືນຕົວຂຶ້ນຢ່າງບໍ່ຢຸດຢັ້ງ. ຖືການພັດທະນາວັດທະນະທຳທຽບເທົ່າກັບເສດຖະກິດ, ການເມືອງ, ສັງຄົມ… ຕັດສິນໃຈປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ, ແຜນການພັດທະນາເສດຖະກິດ – ສັງຄົມ ປີ 2023 ນັບແຕ່ຕົ້ນປີ, ຕົ້ນເດືອນຂອງປີໃໝ່ຢ່າງມີໄຊ.

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 9 ມັງກອນ ຜ່ານມາ ຢູ່ ຮ່າໂນ້ຍ, ທ່ານ ຫງວຽນຊວັນຟຸກ ປະທານປະເທດ ຫວຽດນາມ ຫົວໜ້າຄະນະຊີ້ນຳການປະຕິຮູບຕຸລາການສູນກາງ ເປັນປະທານກອງປະຊຸມເທື່ອທີ 3 ຄະນະຊີ້ນຳ.

ຂ່າວລະບຸວ່າ: ໃນກອງປະຊຸມ, ທ່ານ ຫງວຽນຊວັນຟຸກ ໄດ້ເນັ້ນໜັກວ່າ: ບັນດາເປົ້າໝາຍຈຸດສຸມຂອງວຽກງານປະຕິຮູບຕຸລາການປີ 2023 ແມ່ນແກ້ໄຂບັນດາຄວາມຫຍຸ້ງຍາກ, ຂໍ້ຕິດຂັດ, ບັນດາຮົ້ວກີດຂວາງໃຫ້ໄດ້ ເພື່ອຍົກສູງປະສິດທິພາບ, ປະສິດທິຜົນໃນການເຄື່ອນໄຫວຂອງລະບົບບັນດາອົງການຕຸລາການ, ເປັນເຈົ້າການປະຕິບັດວຽກງານຄວບຄຸມສິດອຳນາດໃຫ້ເປັນຢ່າງດີ ເພື່ອສະກັດກັ້ນບັນດາສິ່ງຫຍໍ້ທໍ້ໃນການເຄື່ອນໄຫວສຳຫຼວດກວດກາ, ຟ້ອງສານ, ພິພາກສາຄະດີ. ສູ້ຊົນບັນລຸເປົ້າໝາຍທີ່ໄດ້ວາງອອກແມ່ນ ຮອດປີ 2030 ສ້າງພື້ນຖານຕຸລາການໃຫ້ເປັນມືອາຊີບ, ທັນສະໄໝ, ຍຸຕິທຳ, ເຄັ່ງຄັດ, ສັດຊື່ບໍລິສຸດ, ຮັບໃຊ້ປະເທດຊາດ, ຮັບໃຊ້ປະຊາຊົນ. ທ່ານ ຫງວຽນຊວັນຟຸກ ຍັງເນັ້ນໜັກເຖິງການປະຕິຮູບຕຸລາການຕ້ອງຮ່ວມເດີນທາງ ແລະ ປະຕິບັດແຜນນະໂຍບາຍຂອງພັກກ່ຽວກັບການປ້ອງກັນ, ຕ້ານການສໍ້ລາດບັງຫຼວງ, ສິ່ງຫຍໍ້ທໍ້ໃຫ້ເປັນຢ່າງດີ; ບັນດາອົງການຕຸລາການຕ້ອງເອົາໃຈໃສ່ການຄວບຄຸມສິດອຳນາດ.

ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ກະຊວງເສດຖະກິດຂອງອູແກຣນໄດ້ເປີດເຜີຍບົດລາຍງານໂຕເລກການຄາດຄະເນໃນເບື້ອງຕົ້ນວ່າ ໂຕເລກລວມຍອດຜະລິດຕະພັນພາຍໃນປະເທດ (GDP) ຂອງອູແກຣນຫຼຸດລົງຫຼາຍທີ່ສຸດເປັນປະຫວັດສາດເຖິງ 30,4% ໃນປີ 2022 ເນື່ອງມາຈາກສະຖານະການໂລກໃນປັດຈຸບັນ.

ໜ່ວຍງານປະຊາສຳພັນຂອງກະຊວງເສດຖະກິດອູແກຣນລະບຸວ່າ ເສດຖະກິດອູແກຣນໃນປີ 2022 ປະເຊີນກັບຄວາມສູນເສຍ ແລະ ຄວາມເສຍຫາຍຄັ້ງໃຫຍ່ທີ່ສຸດໃນປະຫວັດສາດການໄດ້ຮັບເອກະລາດ. ໂດຍ GDP ຂອງອູແກຣນຫຼຸດລົງເຖິງ 37% ໃນເດືອນພະຈິກ 2022 ແລະ ຫຼຸດລົງ 34% ໃນເດືອນທັນວາ ຊຶ່ງຫຼັງຈາກສະຖານະການຂ້ອນຂ້າງມີສະຖຽນລະພາບດ້ວຍການສະໜອງພະລັງງານ ໂດຍເສດຖະກິດອູແກຣນໃນໄຕມາດທີ 4 ຂອງປີ 2022 ຫຼຸດລົງ 35,5% ເມື່ອທຽບກັບໄລຍະເວລາດຽວກັນຂອງປີ 2021. ອີກຢ່າງໜຶ່ງ, ເສດຖະກິດອູແກຣນຂະຫຍາຍຕົວທີ່ 3,4% ໃນປີ 2021 ແລະ ລັດຖະບານຄາດວ່າ GDP ຂອງປະເທດຈະເພີ່ມຂຶ້ນອີກ 3,2% ໃນປີ 2023.

ຄະນະພັກ-ອຳນາດການປົກຄອງເມືອງໂຂງ ຮ່ວມກັບ ບໍລິສັດຮ່ວມພັດທະນາສີທັນ ດອນ ຈຳກັດ ຈະຈັດບຸນກາບໄຫວ້ ຕົ້ນໄມ້ມະນີໂຄດ ຢູ່ແຫລ່ງທ່ອງທ່ຽວນ້ຳຕົກຕາດ ຄອນພະເພັງ.

ກຳນົດງານບຸນມີດັ່ງນີ້: ວັນທີ 12/1/2023 ເປັນມື້ຫ້າງຫາກະກຽມ, ຕົບແຕ່ງກອງບຸນ ແລະ ເຄື່ອງໄຊຍະທານ, ຕອນແລງມີພິທີສູດປະລິຕະມຸງຄຸນ ແລະ ຟັງທຳມະເທສະໜາ, ວັນທີ 13/1/2023 ເປັນມື້ຕັກບາດ, ຖວາຍກອງບຸນ ແລະ ເຄື່ອງສັງຄະທານ ແດ່ພະສົງສາມະເນນ 13 ອົງ ແລະ ສໍາເລັດບຸນໃນວັນນັ້ນ.

ດັ່ງນັ້ນ, ຈຶ່ງຂໍແຈ້ງຂ່າວ ກຸສົນນີ້ ມາຍັງຍາດຕິພີ່ນ້ອງຜູ້ຢູ່ໃກ້ ແລະ ຢູ່ໄກ ທີ່ມີຈິດໃຈເຫລື້ອມໃສໃນພະພຸດທະສາສະໜາ ຈົ່ງໄດ້ເສຍສະຫລະເວລາ ໄປຮ່ວມງານຄັ້ງນີ້ດ້ວຍ.