ລັດຖະບານ ແຫ່ງ ສປປ ລາວ ແລະ ອົງການ ຢູນິເຊັບ ໄດ້ຈັດກິດຈະກໍາການປຶກສາຫາລືດ້ານສິດທິເດັກ ຮ່ວມກັບເດັກ ແລະ ໄວໜຸ່ມໃນຂອບເຂດທົ່ວປະເທດ ເພື່ອກະກຽມບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດສົນທິສັນຍາສິດທິເດັກ (ສສດ) ໄລຍະທີ 7 ເພື່ອກະກຽມບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດສົນທິສັນຍາສິດທິເດັກ (ສສດ) ໄລຍະທີ 7 ແລະ ສອງອະນຸສັນຍາຂອງສົນທິສັນຍາວ່າດ້ວຍສິດທິເດັກ, ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ – ເດັກ (ຄຊກມດ) ໂດຍການສະໜັບສະໜູນຈາກອົງການ ຢູນິເຊັບ ໄດ້ດຳເນີນກອງປະຊຸມປຶກສາຫາລືກັບເດັກ ແລະ ໄວໜຸ່ມທົ່ວປະເທດ ພາຍຫຼັງທີ່ໄດ້ເປີດຂະບວນການຂຽນບົດລາຍງານດັ່ງກ່າວມາແຕ່ປີ 2021. ຂະບວນການຂຽນບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດສົນທິສັນຍາສິດທິເດັກ ເປັນການເປີດໂອກາດໃຫ້ລັດຖະບານໄດ້ດໍາເນີນການປະເມີນຜົນໂດຍລວມໃນການຈັດຕັ້ງປະຕິບັດຂໍ້ສະເໜີແນະຂອງຄະນະກໍາມະການສິດທິເດັກຂອງອົງການ ສປຊ ທີ່ມີຕໍ່ ສປປ ລາວ ສໍາລັບບົດລາຍງານຂອງລັດຖະບານໄລຍະທີ 3 ຫາ 6. ການປຶກສາຫາລືກັບເດັກ ແລະ ໄວຫນຸ່ມມີຄວາມສໍາຄັນເພື່ອໃຫ້ມີຄວາມເຂົ້າໃຈກ່ຽວກັບທັດສະນະຂອງເດັກ ແລະ ໄວໜຸ່ມຕໍ່ສະພາບການ ແລະ ສິ່ງທ້າທາຍທີ່ມີຜົນກະທົບຕໍ່ຊີວິດຂອງເຂົາເຈົ້າ.

ນັບແຕ່ເດືອນກຸມພາ ຫາ ເດືອນ ພຶດສະພາ 2022, ມີເດັກນ້ອຍ ແລະ ໄວໜຸ່ມທັງໝົດ 140 ຄົນ (ຍິງ 65 ຄົນ ແລະ ຊາຍ 75 ຄົນ) ອາຍຸ 10 ຫາ 27 ປີ ໄດ້ເຂົ້າຮ່ວມກອງປະຊຸມປຶກສາຫາລື 5 ຄັ້ງທີ່ຈັດຂຶ້ນຢູ່ແຂວງ ອັດຕະປື, ສະຫວັນນະເຂດ, ຫຼວງພະບາງ, ເຊກອງ ແລະ ຄຳມ່ວນ. ກອງປະຊຸມໄດ້ເຕົ້າໂຮມເດັກ ແລະ ໄວໜຸ່ມທີ່ມາຈາກກຸ່ມຕ່າງໆ ໃນນັ້ນມີເດັກທີ່ເຂົ້າໂຮງຮຽນ, ເດັກທີ່ບໍ່ເຂົ້າໂຮງຮຽນ, ເດັກຈາກບັນດາຊົນເຜົ່າ, ເດັກທີ່ຖືກເຄາະຮ້າຍຈາກຄວາມຮຸນແຮງ ແລະ ຈາກການຄ້າມະນຸດ, ເດັກທີ່ໄດ້ຮັບຜົນກະທົບຈາກໄພພິບັດ ແລະ ເດັກນ້ອຍທີ່ບໍ່ມີພໍ່ແມ່ຜູ້ປົກຄອງເບິ່ງແຍງດູແລ. ສໍາລັບຢູ່ແຂວງຫຼວງພະບາງ, ມີເດັກຈໍານວນ 20 ຄົນ (ຍິງ 5 ຄົນ, ຊາຍ 15 ຄົນ) ທີ່ອາໄສຢູ່ໃນວັດ ແລະ ບ້ານຊ່ວຍເຫຼືອເດັກເອສໂອເອສ ໄດ້ເຂົ້າຮ່ວມກອງປະຊຸມປຶກສາຫາລືສິດທິເດັກເປັນຄັ້ງທຳອິດ. ອົງການຢູນິເຊັບ ປະຈໍາ ສປປ ລາວໄດ້ໃຫ້ການສະໜັບສະໜູນກອງປະຊຸມປຶກສາຫາລືຢູ່ອັດຕະປື, ສະຫວັນນະເຂດ, ແລະ ຫຼວງພະບາງ.

ຈົວນ້ອຍ ອາເລັກ ອຸດົມສຸກ, ອາຍຸ 14 ປີ ໄດ້ກ່າວວ່າ “ຂ້ອຍດີໃຈທີ່ໄດ້ມີໂອກາດເຂົ້າຮ່ວມກອງປະຊຸມສຳຄັນນີ້. ມັນເປັນການດີທີ່ຜູ້ໃຫຍ່ໄດ້ຮັບຟັງພວກເຮົາ ແລະ ຄວາມຄິດເຫັນຂອງພວກເຮົາຖືກພິຈາລະນາເຂົ້າໃນບົດລາຍງານການຈັດຕັ້ງປະຕິບັດສິດທິເດັກ,”. ລາວຍັງໄດ້ຮຽນຮູ້ເພີ່ມເຕີມກ່ຽວກັບສິດທິຂອງເດັກ ແລະ ຂະບວນການໃນການລາຍງານການຈັດຕັ້ງປະຕິບັດສິດທິເດັກ ໃນລະຫວ່າງການປະຊຸມປຶກສາຫາລື. ສໍາລັບຈົວເດັກນ້ອຍ, ໂພຊະນາການແມ່ນຫນຶ່ງໃນສິ່ງທ້າທາຍຕົ້ນຕໍທີ່ບັນດາຈົວນ້ອຍໄດ້ຍົກຂຶ້ນມາໃນກອງປະຊຸມປຶກສາຫາລື. ການເພິ່ງພາອາໄສອາຫານທີ່ໄດ້ຈາກການໃສ່ບາດ, ຄວາມຮັບຮູ້ທີ່ຕໍ່າ ແລະ ຄວາມຈໍາກັດໃນການເຂົ້າເຖິງອາຫານທີ່ມີໂພຊະນາການ ໄດ້ເປັນອຸປະສັກຕໍ່ການບັນລຸການກິນອາຫານທີ່ໃຫ້ຄົບໝູ່ທາດ. ຕາງໜ້າໄວໜຸ່ມທີ່ເຂົ້າຮ່ວມກອງປະຊຸມປຶກສາຫາລືໄດ້ກ່າວວ່າ ເຖິງວ່າຈະມີກົດລະບຽບ ແລະ ມີການສິດສອນກ່ຽວກັບລະບຽບ, ແຕ່ເຂົາເຈົ້າກໍຍັງເຫັນພຶດຕິກໍາຮຸນແຮງໃນກຸ່ມເດັກຢູ່ໃນໂຮງຮຽນ ແລະ ໃນຊຸມຊົນ. ການແຕ່ງງານຂອງເດັກ ແລະ ການຖືພາກ່ອນໄວອັນຄວນຖືກລາຍງານວ່າ ເປັນເລື່ອງທີ່ພົບເຫັນເລື້ອຍໆໃນກຸ່ມເດັກ ແລະ ໄວໜຸ່ມທີ່ອອກໂຮງຮຽນ ຫຼື ຫວ່າງງານ, ຍ້ອນວ່າເຂົາເຈົ້າບໍ່ມີອຳນາດໃນການຕໍ່ລອງ ແລະ ມີຄວາມຮູ້ດ້ານການຄຸມກຳເນີດທີ່ຈຳກັດ. ໃນຂະນະທີ່ເດັກນ້ອຍສ່ວນໃຫຍ່ຮູ້ເຖິງຜົນກະທົບທາງລົບຂອງການໃຊ້ສານເສບຕິດ, ແຕ່ການຕິດຢາເສບຕິດຍັງຄົງເປັນບັນຫາອັນເນື່ອງມາຈາກຄວາມຢາກຮູ້ຢາກເຫັນ ແລະ ຄວາມຮູ້ທີ່ຈຳກັດກ່ຽວກັບປະເພດ ແລະ ຜົນກະທົບຂອງຢາເສບຕິດ. ໃນລະຫວ່າງການນໍາສະເຫນີຂອງເດັກ ແລະ ໄວໜຸ່ມໃນກອງປະຊຸມ, ຜູ້ຕາງຫນ້າໄວຫນຸ່ມໄດ້ສະເຫນີການແກ້ໄຂສໍາລັບສິ່ງທ້າທາຍເຫຼົ່ານີ້. ບາງຄໍາແນະນໍາລວມມີການເພີ່ມທະວີການເຜີຍແຜ່ຂໍ້ມູນຂ່າວສານ ແລະ ການຝຶກອົບຮົມກ່ຽວກັບບັນຫາການປົກປ້ອງເດັກສໍາລັບເດັກ ແລະ ໄວໜຸ່ມ, ເພີ່ມທະວີກົນໄກການລາຍງານກໍລະນີຄວາມຮຸນແຮງ ແລະ ການຂູດຮີດ ແລະ ປັບປຸງການບໍລິການຊ່ວຍເຫຼືອ ເຊັ່ນ: ການໃຫ້ຄໍາປຶກສາແກ່ເດັກທີ່ຕ້ອງການຄໍາປຶກສາ.

ທ່ານ ນາງ ຈົງຈິດ ຈັນທະລານົນ ຮອງຫົວໜ້າຫ້ອງການກອງເລຂາຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່-ເດັກ (ຄຊກມດ) ໄດ້ກ່າວວ່າ “ການມີສ່ວນຮ່ວມຂອງເດັກແມ່ນໜຶ່ງໃນຫຼັກການຫຼັກໆຂອງສົນທິສັນຍາວ່າດ້ວຍສິດເດັກ (ສສດ). ການປຶກສາຫາລືກ່ຽວກັບສິດທິເດັກ ໄດ້ສະຫນອງເວທີສໍາລັບເດັກທີ່ມີພື້ນຖານທີ່ແຕກຕ່າງກັນເພື່ອສະແດງຄວາມຄິດເຫັນຂອງເຂົາເຈົ້າຢ່າງເສລີກ່ຽວກັບບັນຫາກ່ຽວຂ້ອງເຖິງເຂົາເຈົ້າ ແລະ ໃຫ້ເຂົາເຈົ້າມີສ່ວນຮ່ວມໃນຂະບວນການຕັດສິນໃຈດັ່ງກ່າວ. ຄໍາຄິດເຫັນຂອງເຂົາເຈົ້າສາມາດຊ່ວຍໃຫ້ລັດຖະບານພັດທະນາບັນດາໂຄງການ ແລະ ນະໂຍບາຍຕ່າງໆທີ່ສະຫນັບສະຫນູນເດັກທຸກຄົນໃນການນໍາໃຊ້ຄວາມສາມາດຂອງເຂົາເຈົ້າ,”.

ນອກຈາກນັ້ນ, ລັດຖະບານຍັງໄດ້ຈັດເວທີປົກກະຕິສໍາລັບການມີສ່ວນຮ່ວມຂອງເດັກ. ຕົວຢ່າງທີ່ດີໃນການຈັດເວທີດັ່ງກ່າວແມ່ນເວທີເດັກລາວ 2022 ທີ່ຈັດຂຶ້ນເມື່ອບໍ່ດົນມານີ້ແຕ່ວັນທີ 10 ຫາ 13 ພຶດສະພາ 2022 ເຊິ່ງໄດ້ນໍາເອົາຕົວແທນເດັກທັງໝົດ 62 ຄົນຈາກທົ່ວປະເທດເຂົ້າຮ່ວມ. ເຂົາເຈົ້າໄດ້ແລກປ່ຽນ ແລະ ປຶກສາຫາລືກ່ຽວກັບສິ່ງທ້າທາຍຕົ້ນຕໍທີ່ເດັກ ແລະ ໄວ ໜຸ່ມໃນປະເທດປະເຊີນ, ເຊັ່ນ: ການລະບາດພະຍາດໂຄວິດ-19, ອຸປະຕິເຫດທ້ອງຖະໜົນ, ການໃຊ້ສື່ສັງຄົມ ແລະ ການແຕ່ງງານກ່ອນໄວອັນຄວນ.

ທ່ານ ນາງ ຄຳໃສ ອ່ຽມສຸທິ, ຜູ້ຊ່ຽວຊານວຽກງານປົກປ້ອງເດັກຈາກອົງການ ຢູນິເຊັບ ປະຈໍາ ສປປ ລາວ ໄດ້ກ່າວ່າ “ການຍົກສູງສິດທິເດັກໃນການມີສ່ວນຮ່ວມແມ່ນມີຄວາມສຳຄັນເປັນພິເສດທ່າມກາງການແຜ່ລະບາດຂອງພະຍາດໂຄວິດ-19. ພວກເຮົາຕ້ອງຮັບປະກັນວ່າຄວາມຕ້ອງການ ແລະ ທັດສະນະຂອງເດັກຖືກພິຈາລະນາເຂົ້າໃນຄວາມພະຍາຍາມໃນການຕອບໂຕ້ ແລະ ການຟື້ນຟູ ຍ້ອນວ່າເຂົາເຈົ້າເປັນຮາກຖານອັນສໍາຄັນຂອງໂລກທີ່ຍືນຍົງ ແລະ ທົນທານ ພາຍຫຼັງການແຜ່ລະບາດຂອງພະຍາດ. ອົງການ ຢູນິເຊັບ ມີຄວາມພູມໃຈທີ່ໄດ້ຮ່ວມມືກັບລັດຖະບານ ສປປ ລາວ ແລະ ເດັກ ໃນ ສປປ ລາວໃນຂະບວນການຂຽນບົດລາຍງານກ່ຽວກັບການຈັດຕັ້ງປະຕິບັດສົນທິສັນຍາສິດທິເດັກ, ພວກເຮົາຄິດ ແລະ ຄາດຫວັງເຖິງອະນາຄົດທີ່ດີຂຶ້ນຂອງເດັກທຸກໆຄົນໃນ ສປປ ລາວ,”.

ຄວາມຄິດເຫັນຂອງເດັກ ແລະ ໄວໜຸ່ມຈະໄດ້ຮັບການສັງລວມເຂົ້າໃນບົດລາຍງານທີ່ຈະນຳສະເໜີໃນກອງປະຊຸມປຶກສາຫາລືທົ່ວປະເທດໃນເດືອນ ມິຖຸນາ 2022. ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດສົນທິສັນຍາສິດທິເດັກ (ສສດ) ໄລຍະທີ 7 ແລະ ສອງອະນຸສັນຍາຂອງສົນທິສັນຍາວ່າດ້ວຍສິດທິເດັກຈະໄດ້ຮັບການຮັບຮອງ ແລະ ສົ່ງໃຫ້ຄະນະກຳມະການສິດທິຂອງເດັກຂອງອົງການ ສປຊ ພາຍໃນເດືອນມິຖຸນາ 2023.

ວັນທີ 31 ພຶດສະພາ 2022 ທີ່ນະຄອນຫຼວງວຽງຈັນ ກະຊວງສຶກສາທິການ ແລະ ກິລາ ແລະ ອົງການອຸຍນີເຊັບ ໄດ້ຮ່ວມກັນຈັດກອງປະຊຸມປຶກສາຫາລືລະດັບຊາດກ່ຽວກັບອະນາຄົດຂອງການສຶກສາໃນ ສປປ ລາວ ເພື່ອກະກຽມໃຫ້ແກ່ກອງປະຊຸມສຸດຍອດກ່ຽວກັບການຫັນປ່ຽນການສຶກສາໂລກຂອງອົງການສະຫະປະຊາຊາດ ຊຶ່ງຈະຈັດຂຶ້ນໃນເດືອນກັນຍາ 2022. ອົງການສະຫະປະຊາຊາດໄດ້ຮຽກຮ້ອງໃຫ້ບັນດາປະເທດທີ່ຈະດໍາເນີນການປຶກສາຫາລືຫຼາຍຂົງເຂດວຽກງານໃຫ້ຕະໜັກແໜ້ນປະ ຕິບັດຄໍາໝັ້ນສັນຍາແຫ່ງຊາດໃນການເຄື່ອນໄຫວສະໜັບສະໜູນວຽກງານຟື້ນຟູຂະແໜງການສຶກສາຈາກພະຍາດລະບາດ ແລະ ໃຫ້ການສະໜັບສະໜູນການຫັນປ່ຽນເພື່ອບັນລຸເປົ້າໝາຍພັດທະນາແບບຍືນຍົງ 4 ກ່ຽວກັບການສຶກສາທີ່ມີຄຸນນະພາບ. ກອງປະຊຸມສຸດຍອດກ່ຽວກັບການຫັນປ່ຽນການສຶກສາໂລກຂອງອົງການສະຫະປະຊາຊາດ (TES) ໄດ້ຮັບການຈັດຕັ້ງຂຶ້ນໂດຍຜ່ານໜ່ວຍວິຊາການຂະແໜງການສຶກສາ ແລະ ກິລາ (ESWG) ແບບອອນລາຍ ແລະ ແບບໜ້າເຊິ່ງ ຊຶ່ງເປັນກຽດເຂົ້າຮ່ວມໂດຍທ່ານ ປອ ສີສຸກ ວົງວິຈິດ, ຮອງລັດຖະມົນຕີກຊວງສຶກສາທິການ ແລະ ກິລາ, ທ່ານ ນາງ ຊາຣາ ເຊກເຄນ (Sara Sekkenes) ຜູ້ປະສານງານອົງການສະຫະປະຊາຊາດປະຈໍາ ສປປ ລາວ ແລະ ທ່ານ ນາງ ບີອາເຕ້ ດັດສ໌ເຕວ, ຮັກສາການຜູ້ຕາງຫນ້າອົງການຢູນິເຊັບ ປະຈໍາ ສປປ ລາວ. ທ່ານ ຜູ້ຕາງໜ້າ ຈາກສະຖານທູດອົດສະຕາລີ ແລະ ສະຫະພາບເອີລົບ, ປະທານຮ່ວມ ໜ່ວຍວິຊາການຂະແໜງການສຶກສາ ແລະ ກິລາ (ESWG) ພ້ອມດ້ວຍຄູ່ຮ່ວມພັດທະນາການສຶກສາຈາກພາກສ່ວນຕ່າງໆກໍ່ໄດ້ເປັນກຽດເຂົ້າຮ່ວມເຊັ່ນດຽວກັນ.

ທ່ານ ປອ ສີສຸກ ວົງວິຈິດ ໄດ້ຍົກໃຫ້ເຫັນວ່າ “ການສຶກສາທີ່ມີຄຸນນະພາບແມ່ນພາກສ່ວນທີ່ຕິດພັນກັບຄວາມຈະເລີນຮຸ່ງເຮືອງດ້ານເສດຖະກິດ ແລະ ສັງຄົມ ແລະ ການພັດທະຊັບສິນມະນຸດໂດຍແຍກຈາກກັນບໍ່ໄດ້. ການປຶກສາຫາລືນີ້ແມ່ນໄດ້ຈັດຕັ້ງຂຶ້ນໃນເວລາເໝາະເຈາະພໍດີ ຍ້ອນວ່າພວກເຮົາຍັງມີຄວາມຈໍາເປັນຕ້ອງໄດ້ດໍາເນີນການທົບທວນລະດັບຊາດກ່ຽວກັບວິທີການຕ່າງໆເພື່ອເຮັດແນວໃດໃຫ້ທຸກພາກສ່ວນກ່ຽວຂ້ອງສາມາດເຮັດວຽກຮ່ວມກັນເພື່ອຫຼຸດຜ່ອນຜົນກະທົບຈາກການລະບາດຂອງພະຍາດໂຄວິດ-19 (COVID-19) ຕໍ່ການສຶກສາ ແລະ ເຮັດໃຫ້ລະບົບການສຶກສາຂອງພວກເຮົາກົມກືນກັບສະພາບຄວາມຕ້ອງການໆຮຽນຮູ້ຂອງສະຕະວັດທີ 21. ພວກເຮົາມີຄວາມປື້ມປິຕິເປັນຢ່າງຍິ່ງທີ່ຈະເປັນປະເທດໜຶ່ງໃນບັນດາປະເທດທໍາອິດທີ່ຈັດຕັ້ງການປຶກສາຫາລືລະດັບຊາດດັ່ງກ່າວນີ້. ຂ້າພະເຈົ້າເຊື່ອວ່າການສົນທະນາໃນມື້ນີ້ຈະຊ່ວຍບຸກເບີກການບໍລິການການສຶກສາທີ່ມີຄຸນນະພາບ ແລະ ຜົນການຮຽນຮູ້ທີ່ດີກວ່າສໍາລັບເດັກນ້ອຍ ແລະ ໄວຫນຸ່ມທຸກຄົນໃນ ສປປລາວ.”

ທ່ານ ນາງ ຊາຣາ ເຊກເຄນ, ຜູ້ປະສານງານອົງການສະຫະປະຊາຊາດປະຈຳ ສປປ ລາວ ໄດ້ກ່າວວ່າ “ດັ່ງທີ່ພວກເຮົາຮູ້ກັນວ່າ ການສຶກສາໃນທຸກມື້ນີ້ຍັງມີລັກສະນະສັບສົນຢູ່. ຍ້ອນແນວນັ້ນ, ຈຶ່ງຈໍາເປັນຕ້ອງຈັດຕັ້ງດໍາເນີນກອງປະຊຸມສຸດຍອດຂອງອົງການສະຫະປະ ຊາຊາດຂຶ້ນເພື່ອພັດທະນາວິໄສທັດ ແລະ ຄວາມໝັ້ນໝາຍຮ່ວມໃນລະດັບສູງສຸດຕໍ່ການຫັນປ່ຽນການສຶກສາ.” “ພວກເຮົາບໍ່ສາມາດປະປ່ອຍໃຫ້ນັກສຶກສາລຸ້ນນີ້ປະສົບກັບການສູນເສຍອັນຮ້າຍແຮງທາງດ້ານການຮຽນຮູ້ ແລະ ການເປັນຢູ່ທີ່ດີ. ເຖິງເວລາແລ້ວທີ່ພວກເຮົາຈະຕ້ອງຫັນປ່ຽນຈາກວິກິດການໄປສູ່ການຟື້ນຟູ; ຈາກການປະຕິບັດແບບດັ້ງເດີມໄປສູ່ການຫັນປ່ຽນຮູບແບບໃໝ່. ຂ້າພະເຈົ້າຂໍສະແດງຄວາມຊົມເຊີຍຕໍ່ລັດຖະບານ ສປປ ລາວ ທີ່ໄດ້ຈັດຕັ້ງກອງປະຊຸມປຶກສາຫາລືລະດັບຊາດຄັ້ງທຳອິດນີ້ຂຶ້ນ. ທ່ານຍັງໄດ້ກ່າວອີກວ່າ, ອົງການສະຫະປະຊາຊາດພ້ອມກັບບັນດາຄູ່ຮ່ວມງານຂອງພວກເຮົາໃຫ້ຄຳໝັ້ນສັນຍາທີ່ຈະສະໜັບສະໜູນການປຶກສາຫາລືລະດັບຊາດຕື່ມອີກໃນກອງປະຊຸມສຸດຍອດທີ່ຈະມາເຖິງໃນຕໍ່ໜ້ານີ້,”

ໃນລະຫວ່າງກອງປະຊຸມປຶກສາຫາລືນີ້, ບັນດາຜູ້ແທນທີ່ເຂົ້າຮ່ວມໄດ້ຮັບຟັງການບັນລະບາຍຈາກຜູ້ຕາງໜ້າອົງການອຸຍນີເຊັບ (UNICEF) ແລະ ອຸຍແນັດສະໂກ (UNESCO) ກ່ຽວກັບກອງປະຊຸມສຸດຍອດທີ່ຈະມາເຖິງກ່ຽວກັບການຫັນປ່ຽນການສຶກສາ ແລະ ໄດ້ຮັບຟັງຄໍາແນະນໍາກ່ຽວກັບອົງປະກອບ 4 ດ້ານເພື່ອປຶກສາຫາລືກັນຄື: ການຟື້ນຟູການສຶກສາທີ່ໄດ້ຮັບຜົນກະທົບຈາກພະຍາດໂຄວິດ-19, ຟື້ນຄືນພາບພົດການສຶກສາສໍາລັບສະຕະວັດທີ 21, ການສະໜອງເງິນທຶນແບບຍືນຍົງເພື່ອການສຶກສາ ແລະ ຍົກສູງລະດັບງຄວາມມຸ້ງຫວັງຂອງເປົ້າຫມາຍການສຶກສາແຫ່ງຊາດ. ບັນດາຜູ້ແທນທີ່ມາຈາກກະຊວງຕ່າງໆ, ສະພາແຫ່ງຊາດ, ຄູ່ຮ່ວມພັດທະນາ ພ້ອມທັງຜູ້ຕາງໜ້າບັນດາຄູອາຈານ ແລະ ນັກສຶກສາ ໄດ້ກຳນົດບັນດາການເຄື່ອນໄຫວນະໂຍບາຍທີ່ຕິດພັນກັບອົງປະກອບ 4 ດ້ານດັ່ງກ່າວ. ບັນດາຂໍ້ສະເໜີແນະດັ່ງກ່າວຈະໄດ້ສະທ້ອນໃຫ້ເຫັນໃນຖະແຫຼງການແຫ່ງຊາດກ່ຽວກັບການເຄື່ອນໄຫວຂອງ ສປປ ລາວ ທີ່ຈະໄດ້ນຳສະເໜີໃນກອງປະຊຸມສຸດຍອດໃນເດືອນກັນຍານີ້.

ທ່ານ ນາງ ເບດ ດາສເທນ, ຜູ້ຕາງຫນ້າອົງການອຸຍນີເຊັບປະຈໍາ ສປປ ລາວ ໄດ້ກ່າວວ່າ “ແນວຄວາມຄິດທີ່ໄດ້ແບ່ງປັນໃນມື້ນີ້ ບໍ່ພຽງແຕ່ຈະເປັນການກະຕຸ້ນຄວາມມຸ້ງມາດປາດຖະໜາ ແລະ ຈູດປະກາຍການເຄື່ອນໄຫວເພື່ອໃຫ້ເກີດການຫັນປ່ຽນຮູບການຮຽນຮູ້ໃນ ສປປ ລາວ ເທົ່ານັ້ນ, ແຕ່ການປະກອບສ່ວນຂອງພວກເຮົາຍັງຈະເປັນຂໍ້ມູນສໍາຄັນໃຫ້ແກ່ການສົນທະນາ ແລະ ຄໍາຫມັ້ນສັນຍາໃນລະດັບໂລກຕໍ່ການຫັນປ່ຽນການສຶກສາສໍາລັບເດັກນ້ອຍ ແລະ ໄວຫນຸ່ມທຸກຄົນ.” ທ່ານຍັງໄດ້ກ່າວຕື່ມອີກວ່າ, “ຜົນກະທົບຂອງພະຍາດໂຄວິດ-19 (COVID-19) ໄດ້ສ້າງຄວາມເສຍຫາຍຮ້າຍແຮງຕໍ່ການສຶກສາ ແລະ ອະນາຄົດຂອງເດັກນ້ອຍ ແລະ ໄວໜຸ່ມໂດຍບໍ່ສາມາດປະຕິເສດໄດ້ ແລະ ພວກເຮົາຫຼິງເຫັນຄ່າໃຊ້ຈ່າຍອັນໜັກໜ່ວງຈາກການຢຸດສະຫງັກການເຄື່ອນໄຫວຍ້ອນສາຍເຫດພາວະວິໄສທີ່ບໍ່ສາມາດຫຼີກລຽງໄດ້. ສະນັ້ນ, ບັນຫານີ້ຈຶ່ງເປັນໜ້າທີ່ຄວາມຮັບຜິດຊອບລວມຂອງພວກເຮົາທັງໝົດທີ່ຈະຍອມຮັບເອົາວິກິດການນີ້ມາເປັນໂອກາດ ແລະ ສ້າງວິໄສທັດໃຫມ່ທີ່ເຕັມໄປດ້ວຍພະລັງແຮງສູງເພື່ອຫັນປ່ຽນການສຶກສາ.”

ຜົນໄດ້ຮັບຂອງການປຶກສາຫາລືດັ່ງກ່າວຍັງຈະເປັນຂໍ້ມູນໃຫ້ແກ່ການເຂົ້າຮ່ວມຂອງ ສປປ ລາວ ໃນກອງປະຊຸມລັດຖະມົນຕີການສຶກສາປະຈໍາພາກພື້ນອາຊີປາຊີຟິກໃນລະຫວ່າງວັນທີ 5-7 ມິຖຸນາ 2022 ຊຶ່ງຈະໄດ້ຈັດຂຶ້ນໂດຍອົງການອຸຍແນັດສະໂກ ແລະ ອົງການອຸຍນີເຊັບ. ສະນັ້ນ, ກອງປະຊຸມປຶກສາຫາລືລະດັບສູງ ແລະ ລະດັບຊາດອາດຈະໄດ້ຈັດຕັ້ງຂຶ້ນເພື່ອເປັນຂໍ້ມູນໃຫ້ແກ່ກອງປະຊຸມກະກຽມກອງປະຊຸມສຸດຍອດທີ່ ປາຣີສ ໃນລະຫວ່າງວັນທີ 28-30 ມີຖຸນາ 2022, ແລະ ຄໍາໝັ້ນສັນຍາຂັ້ນສຸດທ້າຍລະ ດັບຊາດຂອງ ສປປ ລາວ ທີ່ຈະນໍາສະເໜີໃນກອງປະຊຸມສຸດຍອດໃນເດືອນກັນຍາ 2022 ໃນທ່າມກາງກອງປະຊຸມສະມັດຊາໃຫຍ່ສະຫະະຊາຊາດຄັ້ງທີ 77.

ວັນທີ 8 ມິຖຸນາ ນີ້ ແຂວງເຊກອງ ຈັດພິທີສະເຫຼີມສະຫຼອງວັນເດັກນ້ອຍສາກົນ ຄົບຮອບ 98 ປີ ຕິດພັນກັບວັນປູກຕົ້ນໄມ້ແຫ່ງຊາດ ຄົບຮອບ 42 ປີ ຂຶ້ນຢູ່ທີ່ສະຫນາມກິລາໃນຮົ່ມ ໂດຍມີທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະ ກິລາແຂວງ, ທ່ານຮອງເຈົ້າເມືອງລະມາມ, ບັນດາພະແນກການຂັ້ນແຂວງ, ຫ້ອງການສຶກສາທິການ ແລະ ກິລາເມືອງລະມາມ, ເມືອງທ່າແຕງ ຕະຫຼອດຮອດຜູ້ປົກຄອງ ແລະ ນ້ອງນ້ອຍເຍົາວະຊົນ-ອະນຸຊົນທັນວາເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ຄໍາໄພ ສິມມາວັດ ໄດ້ລາຍງານກ່ຽວກັບການພັດທະນາເດັກວ່າ: ໄລຍະຜ່ານມາ ການສຶກສາສໍາລັບເດັກກ່ອນໄວຮຽນຢູ່ແຂວງເຊກອງ ໄດ້ມີການຂະຫຍາຍຕົວຢ່າງກວ້າງຂວາງທັງດ້ານປະລິມານ ແລະ ຄຸນນະພາບ ເຊັ່ນ: ໄດ້ກໍ່ສ້າງໂຄງລ່າງພື້ນຖານ, ສິ່ງອໍານວຍຄວາມສະດວກດ້ານສຸຂະອະນາໄມ, ສະໜອງຄູ, ປື້ມແບບຮຽນ ແລະ ສື່ການຮຽນການສອນ, ເຄື່ອງຫຼິ້ນທັງໃນ ແລະ ນອກຫ້ອງຮຽນ, ໄດ້ມີການພັດທະນານະໂຍບາຍແຫ່ງຊາດວ່າດ້ວຍການສຶກສາກ່ອນໄວຮຽນ, ຍຸດທະສາດການສຶກສາກ່ອນໄວຮຽນ ແລະ ນິຕິກໍາທີ່ກ່ຽວຂ້ອງກັບການຄຸ້ມຄອງສະຖານການສຶກສາກ່ອນໄວຮຽນ ທັງພາກລັດ ແລະ ເອກະຊົນ. ນອກຈາກນັ້ນ ຍັງໄດ້ພັດທະນາມາດຕະຖານຄຸນນະພາບການສຶກສາຊັ້ນອະນຸບານສຶກສາ, ມາດຕະຖານດ້ານນໍ້າ ແລະ ສຸຂະອະນາໄມ ໃນສະຖານການສຶກສາກ່ອນໄວຮຽນ ແລະ ສາມັນສຶກສາ, ສ້າງຖານຂໍ້ມູນການປະເມີນວຽກງານນໍ້າ ແລະ ສຸຂະ, ເຊິ່ງໃນສົກຮຽນ 2021-2022 ແນມີຈໍານວນໂຮງຮຽນລ້ຽງເດັກ-ອະນຸບານ 33 ແຫ່ງ ໃນນີ້ມີໂຮງຮຽນເອກະຊົນ 3 ແຫ່ງ, ຈຳນວນຄູສອນທັງໝົດ 248 ຄົນ.

ໂອກາດນີ້ ທ່ານ ຄໍາສອນ ກອນເຍີ ໄດ້ມີຄໍາເຫັນໂອ້ລົມອວາຍພອນຫຼານນ້ອຍນັກຮຽນ ແລະ ຮຽກຮ້ອງມາຍັງທຸກພາກສ່ວນໃນທົ່ວສັງຄົມ ກໍຄືພາຍໃນແຂວງເຊກອງພວກເຮົາ ເອົາໃຈໃສ່ດູແລເບິ່ງແຍງສຸຂະພາບຂອງເດັກ ໃນສະພາບການແພ່ລະບາດຂອງພະຍາດໂຄວິດ-19, ຜູ້ບໍລິຫານການສຶກສາທຸກຂັ້ນ ຕ້ອງສືບຕໍ່ສ້າງສະພາບແວດລ້ອມການຮຽນທີ່ປອດໄພ, ປາສະຈາກ ຄວາມຮຸນແຮງ, ມີການຮຽນຮ່ວມ ແລະຮັບປະກັນມີປະສິດທິຜົນໃນການຮຽນສໍາລັບທຸກຄົນ; ສືບຕໍ່ສືບລ້າງທຸກຮູບແບບການນໍາໃຊ້ຄວາມຮຸນແຮງຕໍ່ແມ່ຍິງ ແລະເດັກຍິງທຸກຄົນ ໃນທີ່ ສາທາລະນະ ແລະທີ່ສ່ວນຕົວ, ລວມທັງການຄ້າມະນຸດ, ຢຸດຕິການໃຊ້ແຮງງານເດັກເກີນຂອບເຂດທຸກຮູບແບບ, ຕ້ອງເອົາໃຈໃສ່ໃນການສະໜອງນໍ້າ, ການສະໜອງອາຫານທ່ຽງ ໃນໂຮງຮຽນ, ການບໍລິການສຸຂະພາບ ແລະວິດຖ່າຍ ໃນສະຖານການສຶກສາກ່ອນໄວຮຽນໃຫ້ດີ.

ນອກຈາກນີ້ ຍັງໄດ້ຮັບຊົມການວະແດງສີລະປະ ແລະ ແຂ່ງຂັນກິລາ ຈາກຫຼານນ້ອຍນັກຮຽນຈໍານວນ 8 ລາຍການ,ພ້ອມນີ້ ການນໍາແຂວງ ຍັງໄດ້ຈັດກິດຈະກຳປູກຕົ້ນໄມ້ອ້ອມຮອບເດີ່ນກິລາ ຮ່ວມກັບຫຼານນ້ອຍນັກຮຽນຕື່ມອີກ.

ຂ່າວ-ພາບ: ພຸດທະສອນ

#Medialaos MMD  #Sekong Province

ວັນທີ 31 ພຶດສະພາ 2022 ກະຊວງສາທາລະນະສຸກ, ອົດສະຕຣາລີ ແລະ ອົງການ UNICEF ໄດ້ຈັດພິທີສະເຫຼີມສະຫຼອງ 1 ປີແຫ່ງການຮ່ວມມື ພາຍໃຕ້ ໂຄງການ ສັກຢາກັນພະຍາດໂຄວິດ-19 ຢູ່ ສປປ ລາວ, ໂດຍໄດ້ຮັບການສະໜັບສະໜູນຈາກອົດສະຕຣາລີ ແລະ ຈັດຕັ້ງປະຕິບັດໂດຍອົງການ UNICEF ແລະ ກະຊວງສາທາລະນະສຸກ. ອົດສະຕຣາລີ ໄດ້ໃຫ້ຄຳໝັ້ນສັນຍາຫຼາຍກວ່າ 22 ລ້ານໂດລາ ອົດສະຕາລີ (~16 ລ້ານໂດລາສະຫະລັດ) ໃນໄລຍະ 3 ປີ (2021-2023) ເພື່ອສະໜັບສະໜູນກະຊວງສາທາລະນະສຸກຜ່ານອົງການ UNICEF ເພື່ອຈັດຕັ້ງປະຕິບັດແຜນນຳໃຊ້ວັກຊີນແຫ່ງຊາດເພື່ອປ້ອງກັນພະຍາດໂຄວິດ-19 ຂອງລາວ. ພາກສ່ວນໜຶ່ງຂອງຄຳໝັ້ນສັນຍາດັ່ງກ່າວ, ອົດສະຕຣາລີ ໄດ້ສະໜອງທຶນຊ່ວຍເຫຼືອລ້າກວ່າ 3.8 ລ້ານໂດລາອົດສະຕາລີ ໃຫ້ແກ່ອົງການ UNICEF ເພື່ອສະໜັບສະໜູນກະຊວງສາທາລະນະສຸກ ເພື່ອຮັບປະກັນການນຳໃຊ້ວັກຊີນປ້ອງກັນພະຍາດໂຄວິດ-19 ໃຫ້ແກ່ປະຊາຊົນລາວຢ່າງປອດໄພ ແລະ ມີປະສິດທິຜົນ. ການສະໜອງທຶນໃຫ້ແກ່ອົງການ UNICEF ແມ່ນສຸມໃສ່ການໜູນຊ່ວຍດ້ານວິຊາການໃຫ້ແກ່ກະຊວງເພື່ອສະໜັບສະໜູນການແນະນຳ ແລະ ນຳໃຊ້ວັກຊີນປ້ອງກັນໂຄ​ວິດ-19, ປູກຈິດສຳນຶກໃຫ້ປະຊາຊົນກ່ຽວກັບຜົນປະໂຫຍດຂອງການສັກຢາກັນພະຍາດ, ການເສີມສ້າງຄວາມອາດສາມາດຂອງແພດຫມໍ, ຊ່ວຍເຫລືອການປັບປຸງບໍລິການສຸຂະພາບ ແລະ ການເຂົ້າເຖີງວັກຊີນປ້ອງກັນພະຍາດໃຫ້ມີຄວາມສະເໝີພາບ. ບັນດາ ​ໂຄງການ​ດັ່ງກ່າວ ​ແມ່ນ​ໄດ້​ຮັບ​ການ​ປະຕິບັດ​ຢູ່​ບັນດາ​ບ້ານ​ບຸລິມະສິດ​ໃນ 148 ​ເມືອງ​ໃນ​ທົ່ວ 18 ​ແຂວງ.

ເນື່ອງໃນໂອກາດນີ້, ທ່ານ ດຣ ບຸນແຝງ ພູມມະໄລສິດ, ລັດຖະມົນຕຮີ ກະຊວງສາທາລະນະສຸກ ພ້ອມດ້ວຍເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ທ່ານ ພອລ ເຄລີ ແລະ ຕາງໜ້າອົງການ UNICEF ປະຈຳ ສປປ ລາວ, ທ່ານ ນາງ ເຍເລນາ ໂຊດານໂທວາ, ຕາງໜ້າອົງການຢູນີເຊັບ ສປປ ລາວ ໄດ້ໄປຢ້ຽມຢາມໂຮງຮຽນ ມສ ປາດຖະຫນາ ທີ່ນະຄອນຫຼວງວຽງຈັນ ເພື່ອຊົມການສາທິດລະບົບການໃຫ້ວັກຊີນໃນ ສປປ ລາວ. ນອກຈາກນັ້ນ, ນັກຮ້ອງລາວຍອດນິຍົມ, ທ່ານ ອາ ລູ ນາ ຖາວອນສຸກ ທີ່ຫາກໍ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດອົງການ UNICEF ແຫ່ງຊາດຄົນທຳອິດປະຈຳ ສປປ ລາວ, ໄດ້ໃຫ້ກຽດສະແດງດົນຕີເພື່ອສົ່ງເສີມການສັກຢາປ້ອງກັນພະຍາດໂຄວິດ-19 ໃນງານດັ່ງກ່າວ.

“ທ່ານ ປອ ດຣ. ບຸນແຝງ ພູມມະໄລສິດ, ລັດຖະມົນຕິ ກະຊວງສາທາລະນະສຸກ ໄດ້ກ່າວວ່າ.ປະເທດອົດສະຕຣາລີ ເປັນປະເທດທີ່ໄດ້ໃຫ້ການສະໜັບສະໜູນວັກຊີນຕ້ານ ໂຄ​ວິດ-19 ຮ່ວມກັບບັນດາປະເທດອື່ນໆໃຫ້ກັບ ສປປລາວ. ກະຊວງສາທາລະນະສຸກ ຕີລາຄາສູງການຊ່ວຍເຫຼືອອັນລ້ຳຄ່າຂອງອົດສະຕຣາລີ ແລະ ອົງການ UNICEF ທີ່ໄດ້ໃຫ້ການສະໜັບສະໜູນ ເພື່ອຮັບປະກັນການຈັດຕັ້ງປະຕິບັດ ການໃຫ້ວັກຊີນປ້ອງກັນພະຍາດໂຄວິດ-19 ຢູ່ ສປປ ລາວ ຢ່າງປອດໄພ ແລະ ມີປະສິດທິຜົນ,”

“ທ່ານ ພອລ ເຄລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ກ່າວວ່າ.ການສັກຢາວັກຊີນທີ່ປອດໄພ ແລະ ມີປະສິດທິພາບ ແມ່ນມີຄວາມສຳຄັນຕໍ່ການຢຸດຕິການແຜ່ລະບາດຂອງພະຍາດ ແລະ ສົ່ງເສີມການຟື້ນຟູເສດຖະກິດ. ​ໃນ​ຖານະ​ທີ່​ເປັນ​ເພື່ອນ​ມິດ​ທີ່​ເຂັ້ມ​ແຂງ​ຂອງ​ລາວ, ອົດ​ສະ​ຕຣາ​ລີ​ຍັງ​ໃຫ້​ຄຳ​ຫມັ້ນ​ສັນຍາ​ທີ່​ຈະ​ສະໜັບສະໜູນ​ສະຫນອງ ​ວັກ​ຊີນຕ້ານ​ໂຄ​ວິດ-19 ​ໃຫ້ກັບ ສປປລາວ. ພວກເຮົາມີຄວາມຍິນດີ ທີ່ໄດ້ຮ່ວມມືຢ່າງໃກ້ຊິດ ກັບກະຊວງສາທາລະນະສຸກ ແລະ ອົງການ UNICEF ເພື່ອຮັບມືກັບຜົນກະທົບຈາກພະຍາດໂຄວິດ-19”

ໃນຕົ້ນປີນີ້,ອົດສະຕຣາລີໄດ້ສະໜອງວັກຊີນປ້ອງກັນພະຍາດໂຄວິດ-19ຫຼາຍກວ່າ 1 ລ້ານໂດສ ເພື່ອສະໜັບ ສະໜູນ ຄວາມພະຍາຍາມຂອງລັດຖະບານໃນການເພີ່ມທະວີການຄຸ້ມຄອງວັກຊີນ,ໂດຍສະເພາະໃນກຸ່ມເປົ້າໝາຍ ລວມທັງແມ່ຍິງ, ຜູ້ສູງອາຍຸ ແລະ ຄົນພິການຢູ່ເຂດຫ່າງໄກສອກຫຼີກ.

“ທ່ານ ນາງ ເຍເລນາ ໂຊດານໂທວາ, ຕາງໜ້າອົງການຢູນີເຊັບ ສປປ ລາວ ກ່າວວ່າ .ພວກເຮົາຂໍຂອບໃຈອົດສະຕຣາລີສໍາລັບການສະຫນັບສະຫນູນອັນໃຫຍ່ຫຼວງຂອງພວກເຂົາຕໍ່ຄວາມພະຍາຍາມສັກວັກຊີນປ້ອງກັນ COVID-19 ຢ່າງຕໍ່ເນື່ອງ. UNICEF ມຸ່ງໝັ້ນທີ່ຈະເຮັດວຽກກັບລັດຖະບານ ສປປ ລາວ ແລະ ຄູ່ຮ່ວມງານຂອງພວກເຮົາ ໃນການເສີມສ້າງຄວາມອາດສາມາດໃນການສັກຢາປ້ອງກັນພະຍາດ ໂຄ​ວິດ-19 ໃນ ສປປ ລາວ, ລວມທັງການມີສ່ວນຮ່ວມຂອງຊຸມຊົນທີ່ຢູ່ອ້ອມຮອບເພື່ອປະກອບສ່ວນໃນການສັກ ວັກຊີນ ແລະ ເສີມສ້າງລະບົບການຈັດສົ່ງວັກຊີນເຫຼົ່ານັ້ນໃຫ້ແກ່ເຂົາເຈົ້າ,”

ພິທີປະກາດຮັບຮອງຄອບຄົວ ແລະ ບ້ານສາມັກຄີປອງດອງ ບ້ານ ແສນອາດ ເມືອງໃໝ່ ແຂວງ ຜົ້ງສາລີ ໃນພີທີດັ່ງກ່າວ ໄດ້ຈັດຂື້ນໃນຕອນເຊົ້າຂອງວັນທີ່ 9 ມີຖຸນາ 2022 ນີ້ຢູ່ທີ່ຫ້ອງການບ້ານແສນອາດ ເມືອງໃໝ່ ແຂວງຜົ້ງສາລີ ໂດຍພາຍໃຕ້ການເປັນປະທານຂອງທ່ານ ນ. ແດງ ຕິດສະພອນ ກຳມະການປະຈຳພັກເມືອງ ປະທານແນວລາວສ້າງຊາດ ຜູ້ຊີ້ນຳອົງການຈັດຕັ້ງມະຫາຊົນຂັ້ນເມືອງ, ມີບັນດາທ່ານກຳມະການພັກເມືອງ, ຫົວໜ້າຫ້ອງການ ອົງການຈັດຕັ້ງມະຫາຊົນຂັ້ນເມືອງ, ມີທ່ານເລຂາພັກນາຍບ້ານ-ຮອງນາຍບ້ານ, ເຖົ້າແກ່ແນວໂຮມ, ອົງການຈັດຕັ້ງຂັ້ນບ້ານຕະຫຼອດຮອດພໍ່ແມ່ປະຊາຊົນເຂົ້າຮວ່ມຢ່າງພ້ອມພຽງ.

ໃນພິທີ ທ່ານ ນ. ແສງອອ່ນ ເລຂາພັກນາຍບ້ານ-ບ້ານແສນອາດ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານການກໍ່ສ້າງຄອບຄົວ ແລະ ບ້ານສາມັກຄີປອງດອງຂອງວຽກງານແນວລາວສ້າງຊາດໃນໄລຍະຜ່ານມາຄະນະກຳມະການແນວລາວສ້າງຊາດຂັ້ນບ້ານໄດ້ເປັນເຈົ້າການສຶກສາອົບຮົມການເມືອງແນວຄິດໃຫ້ແກ່ພໍ່ແມ່ປະຊາຊົນບັນດາເຜົ່າພາຍໃນບ້ານໄດ້ນຳເອົາແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດມາເຜີຍແຜ່ເຊື່ອມຊຶມໃຫ້ພໍ່ແມ່ປະຊາຊົນຮັບຮູ້ເຂົ້າໃຈເຖິງແນວທາງການພັດທະນາແກ້ໄຂຊີວິດການເປັນຢູ່ໃຫ້ດີຂຶ້ນ ,ບ້ານແສນອາດມີ5ຊົນເຜົ່າຊົນເຜົ່າຢູ່ຮ່ວມກັນຄື: ເຜົ່າກືມມຸ, ລາວລູ່ມ, ເຜົ່າໄຕ, ເຜົ່າຜູ້ນ້ອຍແລະເຜົ່າອາຄາ ມີ 8 ຄົວເຮືອນມີ 103 ຄອບຄົວ,ມີຜົນລະເມືອງທັງຫມົດ 420 ຄົນ,ຍີງ 213 ຄົນ ຜ່ານການປະເມີນໃນໄລຍະຜ່ານມາເຫັນວ່າບ້ານແສນອາດມີມາດຖານຖືກຕ້ອງຕາມເງື່ອນໄຂຂອງແນວລາວສ້າງຊາດວາງອອກ, ຈາກນັ້ນ ກໍ່ໄດ້ມອບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ເຊີ່ງໃຫ້ກຽດມອບໂດຍ ທ່ານ ນ.ແດງ ຕິດສະພອນ ແລະ ໃຫ້ກຽດຂື້ນຮັບໂດຍທ່ານເລຂາພັກນາຍບ້ານ-ບ້ານແສນອາດ ແລະ ຕາງໜ້າແຕ່ລະຄອບຄົວຕາມລຳດັບ.

ໃນຕອນທ້າຍພິທີຍັງໄດ້ຮັບຟັງການໂອ້ລົມຈາກທ່ານ ນ.ແດງ ຕິດສະພອນ ເຊີ່ງກ່ອນອື່ນທ່ານກໍ່ໄດ້ກ່າວສະແດງຄວາມຍ້ອງຍໍຊົມເຊີຍຜົນງານທີ່ທາງບ້ານຍາດມາໄດ້ໃນໄລຍະຜ່ານມາ ແລະ ທ່ານຍັງໄດ້ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າໃຫ້ຮັກສາມູນເຊື້ອຄວາມ ສາມັກຄີລະຫວ່າງເຜົ່າ,ລະຫວ່າງຄອບຄົວ,ລະຫວ່າງບ້ານຕໍ່ບ້ານໃຫ້ແໜ້ນແຟ້ນຂື້ນກວ່າເກົ່າພ້ອມກັນສ້າງສາພັດທະນາເສດຖະກິດຄອບຄົວໃຫ້ມີຢູ່ມີກິນ,ຮັກເຊື້ອແພງຊາດໃນການເຕົ້າໂຮມຄວາມສາມັກຄີສຶກສາອົບຮົມນໍ້າໃຈຮັກຊາດ ຮັກລະບອບໃໝ່ ໃຫ້ສົມກັບວ່າແນວລາວສ້າງຊາດ.

ຂ່າວ-ພາບ: ນາງ ໄພວັນ ຂັນຄຳ

#Medialaos MMD  #Phongsaly Province

ໃນຕອນເຊົ້າວັນທີ 6 ມິຖຸນາ 2022 ນີ້, ທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ພ້ອມພາກສ່ວນທີ່ກ່ຽວຂ້ອງທີ່ມາຈາກແຂວງ ໄດ້ລົງຕິດຕາມຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ພາຍໃນເມືອງອາດສະພອນ.

ໂອກາດດັ່ງກ່າວ ທ່ານ ນາງ ບຸນທະລັງສີ ຄຳມະນີວົງ ກຳມະການພັກແຂວງ ເລຂາພັກເມືອງເຈົ້າເມືອງອາດສະພອນ ກໍ່ໄດ້ຂຶ້ນຜ່ານບົດລາຍງານ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດໃນໄລຍະ ປີ 2021-2023 ,ໃນໄລຍະ 03 ເດືອນຜ່ານມາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ທີ່ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ຕາມ 05 ວຽກຈຸດສຸມ ແລະ 14 ມາດຕະການ ຕາມມະຕິ 04/ສພຊ ໃນການຈັດຕັ້ງປະຕິບັດແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ, ການຜະລິດກະສິກຳເພື່ອທົດແທນການນຳເຂົ້າ ແລະ ການສົ່ງອອກ ;ເມືອງອາດສະພອນໄດ້ເລັ່ງໃສ່ ຊຸກຍູ້ການຜະລິດດ້ານກະສິກຳ ປູກຝັງ-ລ້ຽງສັດ ເພື່ອຕອບສະໜອງໃນການທົດແທນການນຳເຂົ້າ.

ໃນໂອກາດດັ່ງກ່າວນີ້ກໍ່ໄດ້ຮັບຟັງຄຳໂອ້ລົມຂອງທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງຕື່ມ ຕໍ່ກັບໜ້າວຽກທີ່ຍັງຄົງຄ້າງ ພ້ອມທັງຮຽກຮ້ອງໃຫ້ທຸກພາກສ່ວນ ເປັນເຈົ້າການໃນການຈັດຕັ້ງປະຕິບັດ, ຊຸກຍູ້ສົ່ງເສີມ, ນຳເອົາເນື້ອໃນດັ່ງກ່າວໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ.

ຂ່າວ-ພາບ: ຫ້ອງການ ຖວທ ເມືອງ

#Medialaos MMD  #Savannakhet Province

ເພື່ອສ້າງຄວາມເຂັ້ມແຂງໃນການໃຫ້ການຊ່ວຍເຫຼືອເບື້ອງຕົ້ນດ້ານຈິດຕະສາດ (PFA) ແລະ ການສະໜັບສະໜູນດ້ານສຸຂະພາບຈິດ ແລະ ຈິດຕະສັງຄົມ (MHPSS) ໃນ ສປປ ລາວ, ກະຊວງແຮງງານ ແລະ ສະຫວັດດີການສັງຄົມ (ກຊ ຮສສ) ໂດຍການສະໜັບສະໜູນຈາກ ອົງການຢູນິເຊັບ ແລະ ອົງການກອຍກ້າ, ໄດ້ຊ່ວຍເສີມສ້າງຂີດຄວາມສາມາດໃຫ້ແກ່ບຸກຄະລາກອນສັງຄົມສົງເຄາະທາງດ້ານ ການຊ່ວຍເຫຼືອເບື້ອງຕົ້ນດ້ານຈິດຕະສາດ ແລະ ການສະໜັບສະໜູນດ້ານສຸຂະພາບຈິດ ແລະ ຈິດຕະສັງຄົມ ນັບຕັ້ງແຕ່ປີ 2021. ການຮ່ວມມືນີ້ເປັນສ່ວນໜຶ່ງຂອງ “ແຜນງານສ້າງຄວາມເຂັ້ມແຂງເພື່ອຮັບມືກັບດິນຟ້າອາກາດແບບປະສົມປະສານຢູ່ ແຂວງອັດຕະ ປື, 2019-2023” ເເລະ ໄດ້ຊ່ວຍສະໜັບສະໜູນການສ້າງ ແລະ ເປີດຕົວນໍາໃຊ້ ປື້ມຄູ່ມືໃຫ້ການຊ່ວຍເຫຼືອເບື້ອງຕົ້ນດ້ານ ຈິດຕະສາດ ແລະ ການສະໜັບສະໜູນດ້ານສຸຂະພາບຈິດ ແລະ ຈິດຕະສັງຄົມ ແຫ່ງຊາດ ຄັ້ງທໍາອິດ ແລະ ຍັງໃຫ້ການສະໜັນສະໜູນການຝຶກອົບຮົມໃນຂັ້ນສູນກາງ ແລະ ຂັ້ນແຂວງອີກດ້ວຍ. ພ້ອມດຽວກັນນັ້ນ, ຍັງໄດ້ສ້າງ ແລະ ເຜີຍແຜ່ ຄໍາແນະນໍາກ່ຽວກັບ ສຸຂະພາບຈິດ ແລະ ຈິດຕະສັງຄົມ ສໍາລັບເດັກ, ໄວໜຸ່ມ ແລະ ພໍ່ແມ່ ເພື່ອໃຫ້ຊຸມຊົນມີຄວາມເຂົ້າໃຈຫຼາຍ ຂຶ້ນກ່ຽວກັບ ການເປັນຢູ່ທີ່ດີດ້ານຈິດໃຈເຊັ່ນດຽວກັນ. ໃນເດືອນ ກໍລະກົດ 2021, ກຊ ຮສສ ໄດ້ຈັດການຝຶກອົບຮົມຄູຝຶກ ກ່ຽວກັບວຽກງານ PFA ເເລະ MHPSS ເຊີ່ງໄດ້ເຂົ້າຮ່ວມໂດຍ 27 ຄົນ (ຍິງ 19 ຄົນ ເເລະ ຊາຍ 8 ຄົນ) ຈາກຂະແໜງການຕ່າງໆ, ລວມທັງ ສະຫວັດດີການສັງຄົມ, ສາທາ, ສຶກສາ, ສູນກາງສະຫະພັນແມ່ຍິງລາວ, ສູນກາງຊາວໜຸ່ມປະຊາຊົນປະຕິວັດລາວ, ມະຫາວິທະຍາໄລແຫ່ງຊາດ ແລະ ອົງການຈັດຕັ້ງທາງສັງຄົມ. ຜູ້ເຂົ້າຮ່ວມໄດ້ຮຽນຮູ້ກ່ຽວກັບ ພາລະບົດບາດ ແລະ ໜ້າທີ່ຂອງເຂົາເຈົ້າໃນການລະບຸ ແລະ ຮັບມືກັບຄວາມຕ້ອງການທາງດ້ານຈິດຕະສັງຄົມຂອງ ເດັກ ແລະ ຜູ້ຍິງທີ່ມີຄວາມສ່ຽງໃນເຫດການວິກິດ ແລະ ທັງໄດ້ຊ່ວຍອໍານວຍຄວາມສະດວກໃນການຝຶກອົບຮົມໃຫ້ແກ່ແຂວງ ໄຊຍະບູລີ, ອັດຕະປື ແລະ ຊຽງຂວາງ. ຕັ້ງແຕ່ເດືອນສິງຫາ ປີ 2021, ໄດ້ມີບຸກຄະລາກອນສັງຄົມສົງເຄາະຈໍານວນ 132 ຄົນ (ຍິງ 54 ຄົນ ເເລະ ຊາຍ 78 ຄົນ) ທີ່ໄດ້ຮັບການຝຶກອົບຮົມຢ່າງສຳເລັດ.

“ການຝຶກອົບຮົມຄັ້ງນີ້ໄດ້ຍົກໃຫ້ເຫັນບັນດາຕົວຢ່າງ, ກໍລະນີປະຕິບັດ ແລະ ຄໍາແນະນໍາທີ່ເປັນປະໂຫຍດສໍາລັບນັກສັງຄົມສົງເຄາະ ແຖວໜ້າໃນການໃຫ້ຄວາມຊ່ວຍເຫຼືອເບື້ອງຕົ້ນດ້ານຈິດຕະສາດ ແລະ ການສະໜັບສະໜູນດ້ານສຸຂະພາບຈິດ ແລະ ຈິດຕະສັງຄົມ ທີ່ຫຼາກຫຼາຍທີ່ສາມາດຕອບສະໜອງຄວາມຕ້ອງການຂອງຄົນທີ່ຖືກຜົນກະທົບ, ຈາກຮູບແບບໃຫ້ການຊ່ວຍເຫຼືອແບບສຸກເສີນສູ່ການຟື້ນຟູ ແລະ ສ້າງຄວາມອາດສາມາດໃນການດັດປັບໄດ້ໃນໄລຍະຍາວ,” ກ່າວໂດຍ ທ່ານ ຄໍາສຸກ ສົມພາວົງ, ຮອງຫົວໜ້າພະແນກປົກປ້ອງ ແລະ ຊ່ວຍເຫຼືອເດັກ, ກົມສັງຄົມສົງເຄາະ ຂອງ ກຊ ຮສສ.

ໜຶ່ງໃນຜູ້ເຂົ້າຮ່ວມຝຶກອົບຮົມທີ່ຈັດຂຶ້ນຢູ່ ແຂວງ ຊຽງຂວາງ ໃນເດືອນ ເມສາ ປີ 2022 ນັ້ນເເມ່ນ ທ່ານ ພອນໄຊ ແສງພະຈັນ, ຕົວແທນຈາກ ຫ້ອງການຊາວໜຸ່ມເມືອງ ຂອງ ແຂວງ ຊຽງຂວາງ. ທ່ານໄດ້ກ່າວວ່າ:

“ຂ້າພະເຈົ້່າໄດ້ເຮັດວຽກກັບຊຸມຊົນມາເປັນເວລາ 10 ປີ ເເລະ ສິ່ງທ້າທາຍທີ່ພວກເຮົາໄດ້ພົບພໍ້ສະເໜີກໍຄື ການໂອ້ລົມນໍາຊຸມຊົນກ່ຽວກັບສຸຂະພາບຈິດ. ໃນການຝຶກອົບຮົມຄັ້ງນີ້, ຂ້າພະເຈົ້າໄດ້ຮຽນຮູ້ຫຼາຍຢ່າງກ່ຽວກັບການເຂົ້າເຖິງຜູ້ລອດຊີວິດ ແລະ ຄໍາແນະນໍາທີ່ສໍາຄັນກ່ຽວກັບການສື່ສານ, ຂ້າພະເຈົ້າຈະນໍາເອົາຄວາມຮູ້ເຫຼົ່ານີ້ໄປແບ່ງປັນໃຫ້ກັບເພື່ອນຮ່ວມງານ”. ຄູ່ມືຝຶກອົບຮົມຍັງໄດ້ຖືກຮັບຮອງ ແລະ ຖືກດັດປັບເພື່ອນໍາໃຊ້ໂດຍ ກະຊວງ ສຶກສາທິການ ແລະ ກິລາ ແລະ ການຝຶກອົບຮົມການໃຫ້ຄໍາປຶກສາຂອງ ມະຫາວິທະຍາໄລແຫ່ງຊາດ. ອີງໃສ່ບົດຮຽນທີ່ຖອດຖອນໄດ້ ແລະ ຜົນໄດ້ຮັບທີ່ດີຈາກຜູ້ເຂົ້າຮ່ວມຝຶກອົບຮົມ, ກຊ ຮສສ ແລະ ອົງການ ຢູນິເຊັບ ໄດ້ວາງແຜນເພື່ອຂະຫຍາຍການຝຶກອົບຮົມກ່ຽວກັບ PFA ແລະ MHPSS ໃຫ້ທົ່ວທຸກແຂວງ ໃນ ສປປ ລາວ. “ຈາກເຫດການສຸກເສີນນໍ້າຖ້ວມຢູ່ແຂວງ ອັດຕະປື ໃນປີ 2018 ແລະ 2019 ແລະ ການແຜ່ລະບາດຂອງພະຍາດໂຄວິດ-19, ເຮັດໃຫ້ຄວາມຕ້ອງການ ການບໍລິການ ສະໜັບສະໜູນທາງດ້ານສຸຂະພາບຈິດ ແລະ ຈິດຕະສັງຄົມທີ່ດີເພີ່ມຂຶ້ນໃນ ສປປ ລາວ. ອົງການ ຢູນິເຊັບ ມີຄວາມພູມໃຈເປັນຢ່າງຍິ່ງທີ່ໄດ້ສະໜັບສະໜູນການສ້າງຂີດຄວາມສາມາດໃຫ້ແກ່ພະນັກງານສັງຄົມສົງເຄາະ ໃນການໃຫ້ການບໍລິການຊ່ວຍເຫຼືອຊີວິດຂອງປະຊາຊົນທີ່ມີຄວາມຕ້ອງການ.” ກ່າວໂດຍ ທ່ານ ນາງ Young Joo Lee, ຮັກສາການແທນ ຫົວໜ້າ ພະແນກປົກປ້ອງເດັກ, ອົງການຢູນິເຊັບ ປະຈໍາ ສປປ ລາວ.

#ພາບ-ຂ່າວ:Somsavanh Ounthavy, Karen Ho

ໃນຕອນເຊົ້າຂອງວັນທີ 2 ມີຖຸນາ 2022 ນີ້ ກອງບັນຊາການປ້ອງກັນຄວາມສະຫງົບ ແຂວງໄຊສົມບູນ ຈັດພິທີມອບຜູ້ກະທໍາຜິດ ທີ່ເຂົ້າມາລັກລອບຂຸດຄົ້ນແຮ່ທາດ (ແຮ່ຄໍາ) ແບບບໍ່ຖືກຕ້ອງຕາມກົດໝາຍ ໃຫ້ແກ່ອໍານາດການປົກຄອງ ແລະ ຍາດພີ່ນ້ອງ ເພື່ອຮັບເອົາຜູ້ກະທໍາຜິດກັບຄືນເຮືອນຊານ. ໂດຍການເຂົ້າຮ່ວມເປັນປະທານຂອງທ່ານ ພັອ ອິນປັນ ຍາດຕິວົງ ຮອງຫົວໜ້າກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ທ່ານ ແສງເດືອນ ໄຊຍະເດັດ ຮອງຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫົງບແຂວງ ແລະ ທ່ານ ສີພອນ ວັນນະວົງ ຫົວໜ້າພະແນກເສນາ ກອງພັນໃຫຍ່ 101, ມີຕາງໜ້າອໍານາດການປົກຄອງແຂວງຊຽງຂວາງ ຕະຫຼອດຮອດຍາດພີ່ນ້ອງ ແລະ ຜູ້ກະທໍາຜິດ ເຂົ້າຮ່ວມ.

ຊຶ່ງຜູ້ກະທໍາຜິດ ທີ່ເຂົ້າມາລັກລອບຂຸດຄົ້ນແຮ່ທາດ (ແຮ່ຄໍາ) ແບບບໍ່ຖືກຕ້ອງຕາມກົດໝາຍ ຢູ່ເຂດຍອດນໍ້າເວ້ ບ້ານນໍ້າຍອນ ເມືອງອະນຸວົງ ແຂວງໄຊສົມບູນ ໃນຄັ້ງນີ້ ມີທັງໝົດ ຈໍານວນ 17 ຄົນ. ໃນນັ້ນແມ່ນມາຈາກ ແຂວງຊຽງຂວາງ, ແຂວງຫຼວງພະບາງ, ແຂວງບໍລິຄໍາໄຊ ແລະ ຢູ່ພາຍໃນແຂວງໄຊສົມບູນ ໂດຍຕໍ່ກັບການກະທໍາດັ່ງກ່າວ ແມ່ນໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລຽບຮຽບຮ້ອບໃຫ້ແຂວງໄຊສົມບູນ ພ້ອມທັງຍັງສ້າງຄວາມສິ້ນເປືອງທາງດ້ານງົບປະມານໃນການແກ້ໄຂວຽກງານ. ນອກນັ້ນ ຖ້າຫາກມີກໍລະນີເກີດອຸປະຕິເຫດຕ່າງໆ ອາດຈະສົ່ງຜົນເຖິງສຸຂະພາບ, ຊີວິດ, ຊັບສິນຂອງພວກກ່ຽວ ແລະ ຂອງລັດ ຊຶ່ງເປັນການກະທໍາ ທີ່ຜິດຕໍ່ປະມວນກົດໝາຍອາຍາ, ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ແລະ ກົດໝາຍວ່າດ້ວຍແຮ່ທາດ. ໂອກາດດັ່ງກ່າວ ທ່ານ ພັອ ອິນປັນ ຍາດຕິວົງ ໄດ້ມີຄໍາເຫັນໂອ້ລົມ ເພື່ອເປັນການສຶກສາອົບຮົມ ຜູ້ກະທໍາຜິດ ທີ່ເຂົ້າມາລັກລອບຂຸດຄົ້ນແຮ່ທາດ (ແຮ່ຄໍາ) ແບບບໍ່ຖືກຕ້ອງຕາມກົດໝາຍ ຢູ່ແຂວງໄຊສົມບູນ ໂດຍທ່ານໄດ້ຍົກເອົາບັນດາກົດໝາຍຕ່າງໆ ທີ່ຕິດພັນກັບວຽກງານດັ່ງກ່າວ ມາເຜີຍແຜ່ເຊື່ອມຊຶມ ເພື່ອໃຫ້ເຂົາເຈົ້າໄດ້ຮັບຮູ້, ເຂົ້າໃຈ ຢ່າງເລິກເຊິ່ງ ຕໍ່ແນວທາງນະໂຍບາຍ ຂອງພັກ ແລະ ລະບຽບກົດໝາຍຂອງລັດ ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ກະທໍາຜິດດັ່ງກ່າວ ຈົ່ງເອົາໃຈໃສ່ປັບປຸງຕົນເອງ ໄປໃນທາງທີ່ດີ ກໍຄືການທໍາມາຫາກິນ ດ້ວຍອາຊີບທີ່ສຸດຈະລິດ ບໍ່ຜິດຕໍ່ລະບຽບກົດໝາຍຂອງບ້ານເມືອງ ເພື່ອຫັນເຂົ້າສູ່ການກະທໍາທີ່ຖືກຕ້ອງຕາມລະບຽບຫຼັກການ ແນໃສ່ຮັບປະກັນ ໃຫ້ສັງຄົມມີຄວາມສະ ຫງົບ ແລະ ເປັນລະບຽບຮຽບຮ້ອຍ ຢ່າງໜັກແໜ້ນ.

ບ.ກ: ຄໍາສາວ ເລືອງຄໍາທິບ

ຂ່າວ: ພາພອນ ນະວົງໄຊ

ວັນທີ 8 ມິຖຸນາ 2022 ຢູ່ເດີ່ນວັດບ້ານວັງຊຽງ ເມືອງໂພນທອງ ແຂວງຫຼວງພະບາງ ໄດ້ຈັດພິທີວາງສີລາລືກການກໍ່ສ້າງວັດໃໝ່ ເມືອງໂພນທອງ,ໂດຍມີສາທຸໃຫຍ່ ອ່ອນແກ້ວ ກິດຕິພັດໂທ ປະທານ ອົງການພຸດທະສາສະໜາລາວ ແຂວງຫຼວງພະບາງ, ມີຄະນະພະສົງ-ສຳມະເນນຈາກແຂວງ ພ້ອມດ້ວຍ ພະສົງ-ສຳມະເນນພາຍໃນວັດ ເຂົ້າຮ່ວມ 14 ຕົນ,ໃຫ້ກຽດເຂົ້າຮ່ວມມີທ່ານ ສົມສະຫວາດ ເລັ່ງສະຫວັດ ອາດີດກົມການເມືອງສູນກາງພັກ, ອາດີດຮອງນາຍຍົກລັດຖະມົນຕີ ແຫ່ງ ສປປລາວ ພ້ວມດ້ວຍຄອບຄົວ,ທ່ານ ສຸກັນບຸນຍົງ ຮອງເລຂາພັກເເຂວງ ປະທານຄະນະກຳມະການແນວລາວສ້າງຊາດ ແຂວງ,ທ່ານ ບຸນຈັນ ປານຟອງເພັດ ເຈົ້າເມືອງ ພ້ອມດ້ວຍຄະນະນຳຂອງເມືອງ ຕະຫຼອດຮອດປະຊາຊົນ ຊາວພຸດທະສາສະນິກະຊົນ ເມືອງ ໂພນທອງ ເຂົ້າຮ່ວມຢ່າງຫຼວງຫຼາຍ.

ໃນເວລາ 6 ໂມງເຊົ້າ ໄດ້ມີການຮ່ວມກັນທຳບຸນໃສ່ບາດ ແລະ ຖວາຍວັດຖຸປັດໃຈ ແດ່ພະສົງ-ສໍາມະເນນຢູ່ວັດຫຼັງເກົ່າ, ຈາກນັ້ນກໍ່ໄດ້ພ້ອມກັນເຂົ້າຮ່ວມພິທີວາງສີລາເລີກຢູ່ເດີນວັດຫຼັງໃໝ່.

ທ່ານ ອານຸສິດ ຄັດຕິຍະລາດ ຕາງໜ້າບໍລິສັດ ອານຸສິດ ສຳຫຼວດອອກແບບ-ກໍ່ສ້າງ ກໍ່ໄດ້ລາຍງານກ່ຽວກັບການກໍ່ສ້າງວັດເມືອງໂພນທອງ ຄັ້ງນີ້ ໃນເນື້ອທີ່ປະມານ 860 ແມັດ ແລະເລີ່ມລົງມືການກໍ່ສ້າງຕັ້ງແຕ່ ວັນທີ 26 ພຶດສະພາ 2022 ເປັນຕົ້ນມາ,ປະກອບມີ ອາຣາມ 1 ຫຼັງ ແລະພະທາດ.ລວມູນຄ່າທັງໝົດແມ່ນ 1.359.748. 684 ກີບ. ຄາດວ່າຈະໃຫ້ສໍາເລັດຕົ້ນເດືອນ ກຸມພາ ປີ 2023.

ຈາກນັ້ນເຈົ້າສັດທາຫຼັກທ່ານ ສົມສະຫວາດ ເລັ່ງສະຫວັດ ອາດີດຮອງນາຍຍົກລັດຖະມົນຕີ ແຫ່ງ ສປປລາວ ກໍ່ໄດ້ມີຄຳເຫັນ ເຊິ່ງທ່ານກ່າວວ່າ: ການກໍ່ສ້າງອາຣາມວັດ ແລະພະທາດຄັ້ງນີ້ ເປັນການປົກປັກຮັກສາພຸດທະສາສະໜາ,ວັດທະນະທໍາອັນດີງາມຂອງຊາດ ກໍຄືຂອງເມືອງໂພນທອງ ເພື່ອໃຫ້ເປັນບ່ອນເຕົ້າໂຮມຄວາມສາມັກຄີ ແລະທັງເປັນການສືບທອດຮີດຄອງປະເພນີອັນດີງາມ ແລະລໍ້າຄ່າຂອງຊາດລາວ ເວົ້າລວມເວົ້າສະເພາະແມ່ນຊາວເມືອງໂພນທອງ ໃຫ້ຢູ່ຄູ່ຊາວເມືອງໂພນທອງຕະຫຼອດໄປ.

ໂອກາດດັ່ງກ່າວນີ້ທ່ານ ບຸນຈັນ ປານຟອງເພັດ ເຈົ້າເມືອງໆໂພນທອງ ກໍໄດ້ສະແດງຄວາມຂອບໃຈ ຕໍ່ເຈົ້າສັດທາ ແລະຜູ້ມີໃນເຫຼື້ອມໃສສັດທາ ທີ່ພ້ອມກັນ ສະໜັບສະໜູນ ແລະອະນຸລັກ ມໍລະດົກອັນລໍ້າຄ່າຄັ້ງນີ້.

ຫຼັງຈາກນັ້ນ ກໍ່ໄດ້ເຂົ້າສູ່ພິທີທາງສາດສະໜາ ໂດຍໄດ້ຮ່ວມກັນຮັບຟັງການສູດມຸງຄຸນ, ເທດສະຫຼອງ 1 ກັນ,ທັງລັ່ນຄ້ອງ 9 ບາດ ແລະພ້ອມກັນປຸກເສົາໄຊ ຮ່ວມກັນວາງສີລາລຶກ ເພື່ອເປັນສິລິມຸງຄຸນ ແລະຮັບພອນຈາກສາທຸ ອ່ອນແກ້ວ ກິດຕິພັດໂທ ປະທານ ອົງການພຸດທະສາສະໜາ ແຂວງຫຼວງພະບາງ ພ້ອມທັງຢາດນໍ້າ ເພື່ອຄວາມເປັນສີລິມຸງຄຸນແກ່ຕົນອີກດ້ວຍ.

ຂ່າວ: ນັກຂ່າວເມືອງໂພນທອງ

#Medialaos MMD  #Luangprabang Province