ໃນໄລຍະ 6 ເດືອນທ້າຍປີ 2022 ນີ້, ທະນາຄານແຫ່ງ ສປປ ລາວ (ທຫລ) ຈະດໍາເນີນນະໂຍບາຍ ແລະ ບັນດາວຽກຈຸດສຸມຈໍານວນໜຶ່ງ ເພື່ອຮັບປະກັນໃຫ້ສະຖຽນລະພາບທາງດ້ານເງິນຕາແຫ່ງຊາດໝັ້ນທ່ຽງ. ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ວ່າ: ໃນ 6 ເດືອນທ້າຍປີນີ້, ຕ້ອງເຮັດໃຫ້ອັດຕາແລກປ່ຽນເງິນກີບ ທຽບເງິນໂດລາແຂ່ງຄ່າຂຶ້ນ ໃນລະດັບສູງໃນທຸກໆ ເດືອນຢ່າງຕໍ່ເນື່ອງ. ຂະນະທີ່ອັດຕາເງິນເຟີ້ ຕ້ອງຄວບຄຸມໃຫ້ຢູ່ໃນລະດັບບໍ່ເກີນ 12% ໃນນີ້ຈະດໍາເນີນນະໂຍບາຍເງິນຕາແບບປະສົມປະສານ ເພື່ອຄຸມຄອງປະລິມານເງິນໃນລະບົບເສດຖະກິດ ໃຫ້ແທດເໝາະກັບຄວາມຕ້ອງການນໍາໃຊ້ ເພື່ອພັດທະນາເສດ ຖະກິດ-ສັງຄົມແຕ່ລະໄລຍະ, ບໍ່ສ້າງແຮງກົດດັນເຮັດໃຫ້ລະດັບຄວາມຕ້ອງການ ການບໍລິໂພກ-ຊົມໃຊ້ ແລະ ນໍາເຂົ້າສິນຄ້າສູງຂຶ້ນເກີນຄວາມຈໍາເປັນ ແລະ ຈະອອກພັນທະບັດທະນາຄານແຫ່ງ ສປປ ລາວ ໄລຍະສັ້ນ 6 ເດືອນໃຫ້ແກ່ມວນຊົນ ທີ່ບໍ່ແມ່ນສະຖາບັນການເງິນຈໍານວນ 10.000 ຕື້ກີບ. ພ້ອມທັງສືບຕໍ່ດໍາເນີນນະໂຍບາຍອັດຕາແລກ ປ່ຽນຕາມກົນໄກຕະຫລາດ ທີ່ມີການຄຸ້ມຄອງຂອງລັດ ເພື່ອຄຸ້ມຄອງໃຫ້ອັດຕາແລກປ່ຽນຂອງທະນາຄານທຸລະກິດ ແລະ ຮ້ານແລກປ່ຽນຕົວແທນ ເໜັງຕິງໃນລະດັບທີ່ສອດຄ່ອງກັບລະດັບຄຸນນະພາບດ້ານເສດຖະກິດ-ເງິນຕາໃຫ້ຫລາຍຂຶ້ນ; ສືບຕໍ່ປັບປຸງເຄື່ອງມື ແລະ ກົນໄກການຄຸ້ມຄອງເງິນຕາຕ່າງປະເທດ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ ເພື່ອສ້າງຄວາມເຂັ້ມແຂງໃຫ້ຖານະເງິນຕາຕ່າງປະເທດຂອງຊາດ ແລະ ໃຫ້ຄັງສໍາຮອງເງິນຕາຕ່າງປະເທດ; ສືບຕໍ່ປະສານສົມທົບກັບພາກສ່ວນຮັບຜິດຊອບກ່ຽວຂ້ອງ ເພື່ອຮ່ວມກັນສົ່ງເສີມ, ສ້າງເງື່ອນໄຂໃຫ້ຈູນລະວິສາຫະກິດ, ທຸລະກິດຂະໜາດນ້ອຍ-ກາງສາມາດເຂົ້າແຫລງທຶນຂອງທະນາຄານໄດ້ຫລາຍຂຶ້ນ ແລະ ຄົ້ນຄວ້າປັບປຸງກົດໝາຍວ່າດ້ວຍລະບົບການຊໍາລະ ແລະ ນິຕິກໍາລຸ່ມກົດໝາຍກ່ຽວຂ້ອງ, ສືບຕໍ່ສ້າງເຄື່ອງມື ແລະ ກົນໄກໃນການຄຸ້ມຄອງຕິດຕາມກວດກາສູນຊື້-ຂາຍເງິນຄຣີບໂຕ, ສືບຕໍ່ຄົ້ນຄວ້າຄວາມເປັນໄປໄດ້ໃນການສ້າງສະກຸນເງິນດີຈິຕອນ ທີ່ອອກໂດຍທະນາຄານແຫ່ງ ສປປ ລາວ ແລະ ສືບຕໍ່ພັດທະນາການເຊື່ອມຕໍ່ລະບົບການຊໍາລະຂ້າມແດນຂອງ ສປປ ລາວ ກັບລະບົບການຊໍາລະ ລະຫວ່າງປະເທດ ຂອງປະເທດຄູ່ຄ້າສໍາຄັນ.

ທ່ານ ສອນໄຊ ສິດພະໄຊ ຍັງກ່າວຕື່ມວ່າ: ໃນໄລຍະ 6 ເດືອນຕໍ່ໜ້ານີ້ ການ ຈັດຕັ້ງປະຕິບັດແຜນເງິນຕາ ຈະຍັງສືບຕໍ່ຜະເຊີນກັບຫລາຍປັດໄຈສ່ຽງຈາກພາຍນອກ ເປັນຕົ້ນ ລາຄານໍ້າມັນໂລກ, ລາຄາສະບຽງອາຫານ, ອັດຕາເງິນເຟີ້, ອັດຕາດອກເບ້ຍຢູ່ສາກົນທີ່ຄາດວ່າຈະສູງຂຶ້ນ. ແຕ່ແນວໃດກໍຕາມ ທະນາຄານແຫ່ງ ສປປ ລາວ ຈະພະຍາຍາມສູ້ຊົນຈັດຕັ້ງປະຕິບັດທຸກນະໂຍບາຍ ແລະ ມາດຕະການຈົນສຸດຄວາມສາມາດ ເພື່ອຮັບປະກັນໃຫ້ສະຖຽນລະພາບທາງດ້ານເງິນຕາແຫ່ງຊາດ ມີຄວາມສະຫງົບ ແລະ ໝັ້ນທ່ຽງ.

ຂ່າວ: ສຸພາສະຫວັນ

ພາບ: ເກດສະໜາ

ວັນທີ 14 ມິຖຸນາ 2022 ທີ່ຫ້ອງປະຊຸມ ຫ້ອງວ່າການແຂວງຫຼວງພະບາງ ໄດ້ມີກອງປະຊຸມປຶກສາຫາລື ຮ່ວມກັນ ລະຫວ່າງ ຄະນະຜູ້ແທນ ແຂວງເຊິນລາ ນໍາໂດຍສະຫາຍ ນາງ ຈ້າງ ທິຊັ່ວນ ຄະນະປະຈຳພັກແຂວງ, ຮອງເຈົ້າແຂວງເຊີນລາ ພ້ອມດ້ວຍຄະນະ ແລະການນໍາແຂວງຫຼວງພະບາງ ນໍາໂດຍສະຫາຍ ບຸນເລື່ອມ ມະນີວົງ ຄະນະປະຈໍາພັກແຂວງ ຮອງເຈົ້າແຂວງຫຼວງພະບາງ,ສະຫາຍ ປອ ນາງ ສຸດາພອນ ຄົມທະວົງ ກໍາມະການພັກແຂວງ ຫົວໜ້າພະແນກ ຖະແຫຼງຂ່າວ,ວັດທະນະທໍາ ແລະທ່ອງທ່ຽວແຂວງ ພ້ອມດ້ວຍຄະນະ,ມີຫົວໜ້າຫ້ອງວ່າການແຂວງ ແລະຕາງໜ້າພະແນກການຕ່າງປະເທດເຂົ້າຮ່ວມ.

ການພົບປະຫາລື ລະຫວ່າງ 2 ແຂວງ ຄັ້ງນີ້ ເປັນການກະກຽມຄວາມພ້ອມໃນການຈັດງານ ເທດສະການທ່ອງທ່ຽວ ພາຍໃຕ້ຄໍາຂັວນ “ ເພງແຫ່ງຄວາມຮັກ ຫຼວງພະບາງ-ເຊິນລາ ” ປີ 2022 ທີ່ແຂວງຫຼວງພະບາງ ຈະໄດ້ເປັນເຈົ້າພາບ,ແມ່ນຜັນຂະຫຍາຍ ທິດທາງການຮ່ວມມື ຂອງ 2 ແຂວງ ເພື່ອຈັດກິດຈະກໍາ ເຄື່ອນໄຫວ ສະເຫຼີມສະຫຼອງວັນສົນທິສັນຍາມິດຕະພາບ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ “ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022” ທີ່ຈະຈັດຂຶ້ນຢູ່ແຂວງຫຼວງພະບາງ ໃນວັນທີ 18/07/2022.ເປັນການເພີ່ມທະວີການເຊື່ອມຈອດ ແລະຮ່ວມມືພັດທະນາການທ່ອງທ່ຽວ ລະຫວ່າງ 2 ແຂວງ ແລະ2 ປະເທດ,ຊຸກຍູ້ການສື່ສານ,ໂຄສະນາເຜີຍແຜ່,ໂຄສະນາພາບພົດ ແລະນໍ້າໃຈມິດຕະພາບຂອງປະຊາຊົນແຂວງ ຫຼວງພະບາງ-ແຂວງເຊິນລາ,ບັນດາຜະລິດຕະພັນທ່ອງທ່ຽວ,ເອກະລັກວັດທະນະທໍາ,ຜະລິດຕະພັນທ້ອງຖິ່ນທີ່ດຶງດູດໃຈ,ສ້າງວຽກເຮັດງານທໍາ ເພີ່ມລາຍຮັບ,ລຸດຜ່ອນຄວາມທຸກຍາກ ໃຫ້ປະຊາຊົນ 2 ແຂວງ ພ້ອມທັງເຊື່ອມໂຍງເຂົ້າສູ່ພາກພຶ້ນ ແລະສາກົນຕື່ມອີກ.

ສໍາລັບກິດຈະກໍາ ແມ່ນຈະໄດ້ເລີ່ມເຄື່ອນໄຫວຕິດຕັ້ງປ້າຍໂຄສະນາ ເປັນສອງພາສາລາວ-ຫວຽດນາມ ຢູ່ພາຍໃນເທດສະບານແຂວງຫຼວງພະບາງ,ສ້າງສາລະຄະດີ ເພື່ອ ອອກອາກາດຜ່ານສື່ຕ່າງໆ. ສະເພາະໃນງານມື້ເປີດຈະມີການສະແດງສິລະປະວັນນະຄະດີ ໂດຍສະເພາະແມ່ນການສະແດງ “ ສຽງເພງແຫ່ງຄວາມຮັກ ຫຼວງພະບາງ-ເຊິນລາ”, ການຟ້ອນທີ່ເປັນເອກະລັກຂອງລາວ ແລະຫວຽດນາມ,ການນຸ່ງຖືແບບຊົນເຜົ່າຕ່າງໆ,ຊົມການວາງສະແດງຮູບພາບການທ່ອງທ່ຽວ,ອາຫານ,ຟ້ອນວົງມົນ,ລໍາວົງສາມັກຄີ,ແຂ່ງຂັນກິລາ,ໂຍນໝາກຄອນ,ການສະແດງຄັດຕອນງານບຸນປະເພນີ,ກິລາດຶງເຊືອກ,ດັນໄມ້ ແລະອື່ນໆ,ສ່ວນການວາງສະແດງຕາມຮ້ານ( ບູດ ) ປະກອບມີ ຮູບພາບການທ່ອງທ່ຽວ,ຜະລິດຕະພັນການທ່ອງທ່ຽວ,ວັດທະນະທໍາເອກະລັກ ແລະວັດຖຸພັບ ທີ່ເດັ່ນຂອງ ແຂວງ ເຊິນລາ ແລະແຂວງຫຼວງພະບາງ.ການຈັດງານຄັ້ງນີ້ ຈະຈັດຂຶ້ນເປັນເວລາ 3 ວັນຈິ່ງຈະສໍາເລັດ.

ຂ່າວ-ພາບ: ນັກຂ່າວແຂວງຫຼວງພະບາງ

#Medialaos MMD #Luangparbang Provice

ເມືອງບາຈຽງຈະເລີນສຸກ ແຂວງຈຳປາສັກ ຂໍເຊີນຊວນພະນັກງານ, ທະຫານ,​ ຕຳຫຼວດ,​ ຫົວໜ່ວຍທຸລະກິດ,​ ພໍ່ຄ້າຊາວຂາຍຕະຫລອດຮອດພໍ່ແມ່ປະຊາຊົນລາວບັນດາເຜົ່າໃນທົ່ວແຂວງຈຳປາສັກແລະຕ່າງແຂວງເວົ້າລວມເວົ້າສະເພາະແມ່ນໃນທົ່ວເມືອງບາຈຽງຈະເລີນສຸກ ມາທ່ຽວຊົມແລະອຸດໜູນໝາກໄມ້ສົດ, ປອດສານພິດປະເພດຕ່າງໆແລະເຄື່ອງຫັດຖະກຳທີ່ປະນີດຂອງປະຊາຊົນຊາວເມືອງບາຈຽງຈະເລີນສຸກ ທີ່ງານເທດສະການວາງສະແດງໝາກໄມ້,ສິນຄ້າກະສິກຳແລະຫັດຖະກຳຄັ້ງທີ XVI ຢູ່ບ້ານຫວ້ຍແຫ່​ (ຫັລກ21) ເມືອງບາຈຽງຈະເລີນສຸກ ແຂວງຈຳປາສັກ ເພື່ອເປັນການສືບທອດພູມປັນຍາແລະສົ່ງເສີມຜູ້ປະກອບການທາງດ້ານກະສິກຳແລະຫັດຖະກຳທີ່ກາຍເປັນສິນຄ້າພາຍໃນເມືອງ,ໃຫ້ສັງຄົມໄດ້ຮັບຮູ້ແລະກ້າວເຂົ້າສູ່ຕະຫຼາດຢ່າງກວ້າງຂວາງ ທັງເປັນການດຶງດູດການທ່ອງທ່ຽວພາຍໃນເມືອງໃຫ້ມີບັນຍາກາດຄືກຄື້ນແລະເປັນການເພີ່ມຖານລາຍຮັບໃຫ້ແກ່ປະຊາຊົນ ເຊິ່ງງານດັ່ງກ່າວຈະໄດ້ດຳເນີນເລີ້ມແຕ່ວັນທີ 16 ມີຖຸນາຈົນຮອດ 18 ມີຖຸນາ 2022.

ຂ່າວ-ພາບ: ນັກຂ່າວແຂວງຈຳປາສັກ

#Medialaos MMD #Champasak Province

ວັນທີ 13 ມິຖຸນາ 2022 ນີ້; ອົງການກວດສອບແຫ່ງລັດປະຈຳພາກໃຕ້ ໄດ້ລົງເຄື່ອນໄຫວເຮັດວຽກຮ່ວມກັບ ຄະນະປະສານງານຂັ້ນແຂວງເຊກອງ, ເພື່ອຈັດກອງປະຊຸມປຶກສາຫາລືວຽກງານການຈັດຕັ້ງປະຕິບັດວຽກງານແຜນງົບປະມານແຫ່ງລັດປະຈຳປີ 2021 ຂື້ນຢ່າງເປັນທາງການຢູ່ທີ່ຫ້ອງປະຊຸມຊັ້ນ III ຫ້ອງວ່າການແຂວງແຊກອງ, ໂດຍມີທ່ານ ຂັນຕີ ສີລະວົງສາ ຄະນະປະຈຳພັກແຂວງ, ຮອງເຈົ້ງແຂວງໆເຊກອງ ແລະ ທ່ານ ໄພທູນ ສີພູມມາ ປະທານອົງການກວດສອບປະຈຳພາກໃຕ້ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ ທ່ານ ນາງ ສີອຳພອນ ສິດທິໄຊ ຮອງຫົວໜ້າຄະນະກວດສອບງົບປະມານແຂວງເຊກອງ ໄດ້ຂຶ້ນຜ່ານບົດບັນທຶກຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2021 ທີ່ໄດ້ສັງລວມຂໍ້ມູນຕ່າງໆຈາກບັນດາພະແນກການທີ່ກ່ຽວຂ້ອງວ່າ: ຜ່ານການກວດສອບຄືນການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2021 ຜ່ານມາຂອງແຂວງເຊກອງຕາມມະຕິຂອງສະພາປະຊາຊົນແຂວງໃນ 18 ເປົ້າໝາຍເຫັນວ່າ: ພົບບັນຫາຈຳນວນ 11 ບັນຫາ; ໃນນັ້ນບັນຫາທີ່ໄດ້ຮັບການປັບປຸງແກ້ໄຂຂາດຕົວມີ 2 ບັນຫາ, ບັນຫາທີ່ແກ້ໄຂບໍ່ຂາດຕົວມີ 6 ບັນຫາ ແລະບັນຫາທີ່ບໍ່ໄດ້ຮັບການແກ້ໄຂມີ 3 ບັນຫາ; ພາຍຫຼັງຜູ້ເຂົ້າຮ່ວມໄດ້ຮັບຟັງການສະຫຼຸບຄືນແຕ່ລະບັນຫາແລ້ວກໍ່ໄດ້ພ້ອມກັນປະກອບຄຳຄິດຄຳເຫັນໃສ່ຮ່າງບົດບັນທຶກເພື່ອເປັນການຮັດກຸມ ແລະເພື່ອໃຫ້ມີເນື້ອໃນທີ່ສົມບູນຂື້ນ, ນອກຈາກນັ້ນກໍ່ຍັງໄດ້ພ້ອມກັນຊອກຫາວິທີທາງແກ້ໄຂໃຫ້ຖືກຕ້ອງ ແລະສອດຄ່ອງຕໍ່ບັນຫາດັ່ງກ່າວ, ທັງນີ້ກໍເພື່ອນຳໄປຈັດຕັ້ງປະຕິບັດໃຫ້ເກີດດອກອອກຜົນ ແລະມີຜົນສຳເລັດຕາມມະຕິຂອງສະພາປະຊາຊົນແຂວງກຳນົດໄວ້.

ຂ່າວ-ພາບ: ນັກຂ່າວແຂວງເຊກອງ

#Medialaos MMD #Sekong Provice

ດ້ວຍຄວາມເປັນຫ່ວງໃຍຂອງຂັ້ນເທິງ ຕໍ່ການພັດທະນາເສດຖະກິດ-ສັງຄົມ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນ, ການສ້າງກຳລັງແຮງໃຫ້ແກ່ເສດຖະກິດແຫ່ງຊາດ, ພະນະທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ລົງຕິດຕາມ, ຊຸກຍູ້,ສົ່ງເສີມ ແລະ ຊີ້ນໍາອົງການປົກຄອງທ້ອງຖິ່ນ ກໍຄື ຜູ້ປະກອບການ ໃນການຜະລິດ-ທຸລະກິດ ຢູ່ແຂວງວຽງຈັນ ກໍຄືເມືອງທຸລະຄົມ ແລະ ເມືອງວັງວຽງ ໂດຍການຕ້ອນຮັບຂອງ ສະຫາຍ ທອງສະຫວັນ ວົງສຳພັນ ຮອງເລຂາພັກແຂວງວຽງຈັນ, ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ, ມີເຈົ້າເມືອງ ແລະ ພະແນກການກ່ຽວຂ້ອງຂອງແຂວງ ໃຫ້ການຕ້ອນຮັບ.

ໂອກາດນີ້, ພະນະທ່ານ ທອງລຸນ ສີສຸລິດ ພ້ອມຄະນະ ໄດ້ໄປຢ້ຽມຢາມ ຟາມງົວຊີ້ນ ແລະ ປູກຜັກອິນຊີແບບໄຮໂດຣໂປນິກ ນ້ຳເພັດຈະ ເລີນຊັບ ຂອງ ທ່ານ ໂຕ່ຊີ້ງ ແສງພະຈັນ ຢູ່ບ້ານຕານປ່ຽວ ເມືອງທຸລະຄົມ ແຂວງວຽງຈັນ, ຟາມດັ່ງກ່າວສ້າງຕັ້ງຂຶ້ນໃນປີ 2019, ມີເນື້ອທີ່ 12 ເຮັກຕາ, ເຊິ່ງເປົ້າໝາຍຂອງບໍລິສັດ ນໍ້າເພັດ ຈະເລີນຊັບ ແມ່ນນຳເຂົ້າພັນງົວຊີ້ນສາຍເລືອດ 100% ເພື່ອນຳມາຂະຫຍາຍພັນ, ທອມງົວ ເພື່ອໃຫ້ໄດ້ຊີ້ນງົວຄຸນນະພາບສູງ, ຜະລິດ ແລະ ຈຳໜ່າຍນ້ຳເຊື້ອງົວຊີ້ນພັນດີ; ປັບປຸງພັດທະນາແນວພັນງົວຕານປ່ຽວ1, ພັນງົວທີ່ນຳເຂົ້າມາມີສາຍພັນບຣາມັນ, ແອງກັສ ແລະ ຊາໂຣແລ ສາຍເລືອດ 100%, ພາຍໃນຟາມຈະນໍາໃຊ້ເຕັກໂນໂລຊີ ເພື່ອສ້າງຟາມ ຕາມມາດຖານຂອງອາຊຽນ; ຂະຫຍາຍພັນສັດ ດ້ວຍວິທີການປະສົມພັນທຽມ ແລະ ຝາກໂຕອ່ອນ; ຈັດການຟາມຕາມຫລັກວິຊາການລ້ຽງສັດທີ່ເໝາະສົມ; ປະຕິບັດມາດຕະການດ້ານນິຕິກຳ ແລະ ວິຊາການຢ່າງເຄັ່ງຄັດ.

ຈາກນັ້ນ, ກໍໄປຢ້ຽມຢາມຄອບຄົວຕົວແບບປູກໝາກແຕງເມລອນ ຢູ່ບ້ານໄຮຢ່ອນ ເມືອງທຸລະຄົມ ເຊິ່ງເປັນຄອບຄົວຂອງ ທ້າວ ວິໄລພອນ ຫຼືທ້າວ ຕົ້ນກ້າ ອິນທະວົົງ ໄດ້ເລີ່ມທົດລອງປູກມາແຕ່ຕົ້ນປີ 2018 ດ້ວຍທຶນຕົວເອງໃຊ້ເງິນ 2 ລ້ານກີບ ແລະ ທົດລອງປູກແບບໃຊ້ໄມ້ໄຜ່ເປັນໂຄງປູກ ແລະ ທ້າຍປີ 2018 ໄດ້ຂາຍໝາກແຕງ 700 ກິໂລ ເມື່ອເຫັນວ່າມີຜົນຕອບຮັບທີ່ດີ, ປີ 2019-2020 ທາງຄອບຄົວຈຶ່ງຕັດສິນໃຈປຸກໂຮງເຮືອນ 8 ຫລັງ ແລະ ປີ 2021 ໄດ້ຂະຫຍາຍໂຮງເຮືອນ ອອກເປັນ 15 ຫລັງ ສະເລ່ຍຫລັງໜຶ່ງມີມູນຄ່າປະມານ 35 ລ້ານກີບ. ສ່ວນການຂາຍຜົນຜະລິດສະເລ່ຍ ເດືອນລະ 2.000 ກິໂລກຣາມ, ຂາຍສົ່ງກິໂລລະ 20.000 ກີບ. ປັດຈຸບັນມີ ປະຊາຊົນພາຍໃນເມືອງຈໍານວນໜຶ່ງ ມາຖອດຖອນບົດຮຽນໃນການປູກໝາກແຕງເມລອນ.

ພາຍຫລັງສຳເລັດການເຄື່ອນໄຫວຢ້ຽມຢາມ ເມືອງທຸລະຄົມແລ້ວ, ທ່ານປະທານປະເທດ, ພ້ອມຄະນະ ກໍໄດ້ເດີນທາງໄປຢ້ຽມຢາມ ພູເພັດຟາມ ລ້ຽງງົວ, ແບ້ນົມ ແລະ ມ້າ ຢູ່ບ້ານວັງໝ້ຽງ ເມືອງວັງວຽງ, ຢ້ຽມຢາມສາງພັກສິນຄ້າ ແລະ ສະຖານີບໍລິການຂົນສົ່ງສິນຄ້າ ທາງລົດໄຟລາວ-ຈີນ ແລະ ສະຖານທີ່ທ່ອງທ່ຽວ ຕາມເສັ້ນທາງວົງແຫວນ ເມືອງວັງວຽງ ຕື່ມອີກ.

ໃນໂອກາດຢ້ຽມຢາມ, ພື້ນຖານການຜະລິດ ຂອງຜູ້ປະກອບການ ແລະ ປະຊາຊົນ ຈໍານວນໜຶ່ງ ຢູ່ 2 ເມືອງ ດັ່ງກ່າວນີ້, ທ່ານປະທານປະເທດ ໄດ້ເນັ້ນໜັກໃນການສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ, ເພື່ອຕອບສະໜອງການຊົມໃຊ້ ຢູ່ພາຍໃນ ແລະ ເປັນສິນຄ້າສົ່ງອອກ ໂດຍສະເພາະແມ່ນດ້ານສະບຽງອາຫານ ກໍຄື ການຮັບໃຊ້ການທ່ອງທ່ຽວ ໃນເງື່ອນໄຂເປີດປະເທດ ປະກອບສ່ວນສໍາຄັນ ເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ໃນປັດຈຸບັນ ແລະ ສ້າງຄວາມເຂັ້ມແຂງໃຫ້ແກ່ລະບົບເສດຖະກິດແຫ່ງຊາດໃນຕໍ່ໜ້າ. ພ້ອມນີ້, ທ່ານຍັງໄດ້ຮຽກຮ້ອງໃຫ້ອົງການປົກຄອງແຂວງວຽງຈັນ ສືບຕໍ່ຍູ້ແຮງການພັດທະນາເສດຖະກິດ-ສັງຄົມ ທີ່ມີທ່າແຮງຂອງແຂວງ ໃຫ້ຂະຫຍາຍຕົວຢ່າງຕໍ່ເນື່ອງ, ສ້າງເງື່ອນໄຂ, ອຳນວຍຄວາມສະດວກ ໃນການຜະລິດ-ທຸລະກິດ, ການສະໜອງເຕັກນິກ, ທຶນຮອນ ແລະ ຕະຫລາດ ທີ່ໝັ້ນຄົງ ເພື່ອຍົກລະດັບລາຍໄດ້ ແລະ ຄຸນນະພາບຊີວິດ ຂອງປະຊາຊົນຊາວແຂວງວຽງຈັນໃຫ້ສູງຂຶ້ນ; ຕ້ອງເອົາໃຈໃສ່ໃຫ້ຜູ້ປະກອບການ ແລະ ປະຊາຊົນ ຮ່ວມສໍາພັນກັນເປັນຕ່ອງໂສ້ ໃນຂະບວນການຜະລິດ-ທຸລະກິດ ຂອງແຂວງວຽງຈັນ ໃຫ້ມີຄວາມໜັກແໜ້ນ, ເຂັ້ມແຂງ ຂຶ້ນໄປເລື້ອຍໆ.

ພາບ-ຂ່າວ: ບຸນມາ ແກ້ວບຸດດາ ນັກຂ່າວແຂວງວຽງຈັນ

#Medialaos MMD #Vientiane Provice

ເຕັກນິກໃນການເລືອກກາເຟເພື່ອສຸຂະພາບເພື່ອໃຫ້ປະໂຫຍດແກ່ຮ່າງກາຍຫຼາຍທີ່ສຸດ ລະຫວ່າງກາເຟສົດ ຫຼື ກາເຟດ່ວນ ອັນໃດດີກວ່າກັນ? ສຳລັບກາເຟ ບາງທ່ານອາດຄິດວ່າມັນເປັນເຄື່ອງດື່ມທີ່ມີຄາເຟອີນ ອາດຈະບໍ່ດີຕໍ່ສຸຂະພາບແຕ່ບາງເທື່ອຖ້າທ່ານຮູ້ກິນກາເຟຢ່າງຖືກຕ້ອງ ແລະ ເລືອກກາເຟທີ່ດີ ພ້ອມດ້ວຍປະລິມານທີ່ເໝາະສົມ ກໍ່ສາມາດເປັນຜົນດີຕໍ່ສຸຂະພາບ ເພາະສາມາດສ້າງປະໂຫຍດໃຫ້ແກ່ຮ່າງກາຍໄດ້ເຊັ່ນດຽວກັນ ແຕ່ໃນປັດຈຸບັນປະຊາຊົນຫຼາຍຄົນເລືອກທີ່ຈະກິນກາເຟແບບບໍ່ຖືກຕ້ອງ ເພາະບາງເທື່ອຄົນເຮົາກໍ່ມີຮູບແບບ ແລະ ຄວາມມັກທີ່ແຕກຕ່າງກັນ ບາງຄົນມັກກາເຟຫວານ, ບາງຄົນກາເຟດຳ ຫຼື ບາງຄົນມັກກາເຟກັບນົມ ເຊິ່ງປະຈຸບັນມີກາເຟສົດ ແລະ ກາເຟທັນທີ, ແຕ່ສ່ວນຫຼາຍສາມາດຮັບດື່ມໄດ້ທັງສອງປະເພດ, ແຕ່ຈະຮູ້ວິທີການທີ່ຈະເລືອກປະເພດກາເຟທີ່ຈະມີສຸຂະພາບດີທີ່ສຸດ

ຄຸນປະໂຫຍດຂອງກາເຟອີນ

ສຳລັບກາເຟທີ່ມີຜົນປະໂຫຍດຕໍ່ສຸຂະພາບເກືອບທຸກເວລາ ເຖິງແມ່ນວ່າກາເຟມີຄາເຟອີນ ປະກອບ ແລະ ໂພແທດຊຽມ ສານຕ້ານອະນຸມູນອິດສະລະ ຖ້າທ່ານເລືອກກິນກາເຟດີມີສຸຂະພາບແຂງແຮງຈະເຮັດໃຫ້ຄຸນປະໂຫຍດຕໍ່ສຸຂະພາບທີ່ດີໃນກໍລະນີຫຼາຍທີ່ສຸດ, ກາເຟທີ່ມີສຸຂະພາບດີແມ່ນກາເຟດຳ ເພາະ ວ່າບໍ່ມີນົມ ຫຼື ນໍ້າຕານ ແມ່ນກາເຟທີ່ບໍລິສຸດເຊິ່ງຈະບໍ່ເຮັດໃຫ້ທ່ານເປັນໂລກເບົາຫວານ ແຕ່ຖ້າທ່ານຖາມວ່າລະຫວ່າງກາເຟສົດ ຫຼື ກາເຟທັນທີ ອັນໃດດີກວ່າກັນ? ຄວາມຈິງແລ້ວກາເຟສົດຈະມີຄາເຟອີນ ແລະ ໂພແທດຊຽມສູງກວ່າ ແຕ່ທັງສອງມີສານຕ້ານອະນຸມູນອິດສະລະ ຊັ້ນວາງແມ່ນຄ້າຍຄືກັນ ແລະຂື້ນກັບແນວພັນກາເຟ ຖ້າຖືກຖາມວ່າຈະເລືອກກິນແບບໃດໃນຄວາມເປັນຈິງ, ທ່ານສາມາດເລືອກທີ່ຈະຮັບດື່ມທັງສອງຢ່າງ ເພາະວ່າມັນເປັນກາເຟທີ່ບໍ່ມີນໍ້າຕານ, ຄຣີມ ແລະ ບໍ່ມີນົມ ມັນກໍ່ດີຕໍ່ສຸຂະພາບ ເຖິງຢ່າງໃດກໍ່ຕາມການດື່ມກາເຟຫຼາຍເກີນໄປຄືກັບການກິນຄາເຟອີນຫຼາຍເກີນໄປໃນຮ່າງກາຍ ຈະເຮັດໃຫ້ຜົນປະໂຫຍດຂອງກາເຟໝົດໄປ ແລະ ຍັງສົ່ງຜົນກະທົບທີ່ບໍ່ດີຕໍ່ສຸຂະພາບອີກດ້ວຍ.

ເຖີງຢ່າງໃດກໍ່ຕາມ ຄວນດື່ມກາເຟດຳແມ່ນດີທີ່ສຸດ ເພາະຈະຊ່ວຍຫຼຸດຜ່ອນຄວາມສ່ຽງຂອງໂລກເບົາຫວານ ແລະ ຈະເຮັດໃຫ້ມັນມີຊີວິດຍືນກວ່າ ແລະ ແນະນຳໃຫ້ທ່ານບໍລິໂພກໃນປະລິມານທີ່ເໝາະສົມ, ບໍ່ຄວນດື່ມເກີນຂະໜາດ ແລະ ຄວນດື່ມແບບບໍ່ໃສ່ນໍ້າຕານຈະດີທີ່ສຸດ.

ກອງປະຊຸມຈັດຕັ້ງປະຕິບັດວາລະແຫ່ງຊາດ, ກົນໄກການປະສານງານ ວຽກງານຄຸ້ມຄອງ ແລະ ພັດທະນາທີ່ດິນ ຢູ່ແຂວງຄຳມ່ວນ ຈັດຂຶ້ນໃນວັນທີ 14 ມິຖຸນາ 2022 ທີ່ພະແນກກະສິກຳ ແລະ ປ່າໄມ້ແຂວງຄຳມ່ວນ ໂດຍການເປັນປະທານຂອງທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ມີບັນດາຫົວໜ້າພະແນກການ, ຮອງເຈົ້າເມືອງ, ຂະແໜງການຂັ້ນແຂວງ ແລະ ຫ້ອງການກ່ຽວຂ້ອງຂັ້ນເມືອງເຂົ້າຮ່ວມ.

ກອງປະຊຸມແມ່ນໄດ້ຮັບຟັງການນຳສະເໜີກ່ຽວກັບແຜນວຽກຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ແຜນວຽກຂອງພະແນກກະສິກຳ ແລະ ປ່າໄມ້ ທີ່ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຜ່ານຂໍ້ຕົກລົງຂອງທ່ານເຈົ້າແຂວງຄຳມ່ວນ ເລກທີ 224/ຈຂ.ຄມ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳ-ກວດກາ ໂຄງການກໍ່ສ້າງສູນຄົ້ນຄວ້າ ແລະ ພັດທະນາ ກະສິກຳທີ່ເມືອງຍົມມະລາດ ພ້ອມທັງຮັບຟັງການລາຍງານແຜນການເຄື່ອນໄຫວຈັດຕັ້ງປະຕິບັດ ການສຳຫຼວດ, ການວາງແຜນນຳໃຊ້ທີ່ດິນ, ການກຳນົດຂອບເຂດດິນແຕ່ລະປະເພດ, ການຄຸ້ມຄອງທີ່ດິນ, ການອອກໃບຢັ້ງຢືນການນຳໃຊ້-ພັດທະນາທີ່ດິນ, ການເກັບຄ່າທຳນຽມ-ຄ່າບໍລິການຕ່າງໆກ່ຽວກັບທີ່ດິນ ຕາມລະບຽບກົດໝາຍວາງອອກໃນແຕ່ລະໄລຍະ. ພ້ອມນີ້ ບັນດາຜູ້ເຂົ້າຮ່ວມ ກໍ່ໄດ້ປະກອບຄຳຄິດຄຳເຫັນ ໃນດ້ານກົນໄກປະສານງານ ເພື່ອເຮັດໃຫ້ເນື້ອໃນ ແລະ ຂັ້ນຕອນ, ວິທີການຈັດຕັ້ງປະຕິບັດໃນຕໍ່ໜ້າມີຄວາມຖືກຕ້ອງ, ສອດຄ່ອງ ແລະ ເໝາະສົມ ຕາມລະບຽບກົດໝາຍວາງອອກ.

ກອງປະຊຸມຍັງໄດ້ຮັບຟັງການລາຍງານກ່ຽວກັບທີ່ດິນຂອງບໍລິສັດ ພອນສັກ ກຣຸບ ທີ່ເມືອງຍົມມະລາດ ແລະ ແຜນການເຄື່ອນໄຫວໃນຕໍ່ໜ້າ. ໂອກາດນີ້ ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ ກັບ ທ່ານ ຄຳໝັ້ນ ສໍປະເສີດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ຮ່ວມເຊັນບົດບັນທຶກກ່ຽວກັບກົນໄກປະສານງານຮ່ວມກັນ ໂດຍຈະເລັ່ງໃສ່ທີ່ດິນກະສິກຳ ເປັນຕົ້ນ ດິນນາໃນເຂດຊົນລະປະທານ ທີ່ພັກ-ລັດຖະບານໄດ້ທຸ່ມເທທຶນຮອນອັນມະຫາສານ ເຂົ້າໃນການສ້າງພື້ນຖານໂຄງລ່າງດ້ານຊົນລະປະທານ ເພື່ອເຮັດໃຫ້ການນຳໃຊ້ທີ່ດິນກະສິກຳເກີດຜົນປະໂຫຍດສູງສຸດ ແລະ ຍາວນານ ເພື່ອເປັນຂໍ້ມູນພື້ນຖານ ໃຫ້ແກ່ພໍ່ແມ່ປະຊາຊົນໄດ້ຮັບສິດໃນການຄຸ້ມຄອງນຳໃຊ້ໄດ້ຢ່າງຖືກຕ້ອງຕາມລະບຽບກົດໝາຍ, ປະຕິບັດພັນທະເສຍພາສີທີ່ດິນ ຕາມຂອບເຂດເນື້ອທີ່ຂອງປະຊາຊົນຄຸ້ມຄອງ, ສ້າງເງື່ອນໄຂອຳນວຍໃນການພັດທະນາທີ່ດິນໃຫ້ມີຄວາມຮັບປະກັນໃນການປັບປຸງຊີວິດການເປັນຢູ່ຂອງປະຊາຊົນ ແລະ ແນໃສ່ເພື່ອຫຼີກເວັ້ນການເຮັດວຽກທີ່ຊໍ້າຊ້ອນກັນ ລະຫວ່າງ 2 ຂະແໜງການ ພ້ອມນັ້ນກໍ່ສາມາດນຳໃຊ້ຂໍ້ມູນຮ່ວມກັນໄດ້ ແລະ ຈະບໍ່ສ້າງຄວາມຫຍຸ້ງຍາກ, ສັບສົນໃຫ້ແກ່ພໍ່ແມ່ປະຊາຊົນ ພ້ອມທັງຮັບປະກັນໃນການປະກອບສ່ວນສ້າງລາຍຮັບເຂົ້າງົບປະມານໃຫ້ແກ່ລັດຖະບານ ກໍ່ຄືຂອງແຂວງໃຫ້ຫຼາຍຂຶ້ນ.

ຂ່າວ-ພາບ: ນັກຂ່າວແຂວງຄຳມ່ວນ

#Medialaos MMD #Khammouan Province

ໂດຍຕອບສະໜອງຕາມໜັງສືເຊີນຈາກຄະນະກຳມະການປະຊາຊົນແຂວງ ຮ່າຕິ່ງ ສສ ຫວຽດນາມ ໃນລະຫວ່າງວັນທີ 10-12 ມິຖຸນາ 2022 ສະຫາຍ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ ຜູ້ຊີ້ນຳຂົງເຂດວຽກງານພັກ-ພະນັກງານ ພ້ອມຄະນະ ໄດ້ເດີນທາງເຂົ້າຮ່ວມພິທີລະນຶກ 65 ປີ ວັນປະທານ ໂຮ່ຈິມິນ ມາຢ້ຽມຢາມແຂວງຮາຕິ່ງ (15/06/1957-15/06/2022) ແລະ ຄົບຮອບ 15 ປີ ວັນສ້າງຕັ້ງນະຄອນຮາຕິ່ງ (28/05/2007-28/05/2022).

ໃນຕອນຄໍ່າວັນທີ 11 ມິຖຸນາ 2022 ທີ່ສະໜາມຫຼວງນະຄອນຮ່າຕິ່ງ ໄດ້ຮັບຟັງການກ່າວປາໄສເປີດງານຈາກການນຳຂັ້ນສູງຂອງສູນກາງພັກ ຄອມມູນິດຫວຽດນາມ ແລະ ຮ່ວມຊົມການສະແດງສີລະປະປະກອບສຽງຂອງປະທານໂຮ່ຈິມິນ ດັງກ້ອງກັງວານຕະຫຼອດກາລະນານ.

ທັງນີ້ກໍ່ເພື່ອສ້າງຂະບວນການຕ້ອນຮັບ 2 ວັນປະຫວັດສາດ ແຫ່ງສາຍພົວພັນຮ່ວມມື ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະກົດ 1977-18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05 ກັນຍາ 1962- 05 ກັນຍາ 2022) ໃຫ້ເຕັມໄປດ້ວຍເນື້ອໃນ ເລິກເຊິ່ງ ແລະ ໜັກແໜ້ນ.

ຂ່າວ-ພາບ: ນັກຂ່າວແຂວງຄຳມ່ວນ

#Medialaos MMD #Khammouan Province

ພາຍຫລັງລັດຖະບານມີແຈ້ງການເປີດປະເທດແຕ່ວັນທີ 9 ພຶດສະພາ 2022 ເປັນຕົ້ນມາ, ພວກເຮົາສັງເກດໄດ້ວ່າ ຈຳນວນປະຊາຊົນທີ່ມາຂໍເຮັດຫນັງສືຜ່ານແດນແມ່ນມີຈຳນວນສູງຂຶ້ນ ແລະ ບວກກັບ ຫລາຍປະເທດກໍໄດ້ລຸດຜ່ອນມາດຕະການຕ່າງໆໃນການເຂົ້າ-ອອກເມືອງຂອງປະເທດຕົນ ແລະ ຫລາຍປະເທດກໍເລີ່ມເປີດປະເທດຢ່າງເປັນປົກກະຕິ ຈຶ່ງເຮັດໃຫ້ຈຳນວນປະຊາຊົນລັ່ງໄຫລມາຂໍຫນັງສືຜ່ານແດນມີຈຳນວນເພີ່ມຂຶ້ນຫລາຍ ແລະ ມີລັກສະນະຮີບດ່ວນ ຊຶ່ງທາງກົມກົງສຸນກໍໄດ້ລົງເກັບກຳຂໍ້ມູນ ເພື່ອຊອກຮູ້ສາເຫດທີ່ເຮັດໃຫ້ມີສະພາບປະຊາຊົນມາອັ່ງອໍກັນຢູ່ກົມກົງສຸນ ຢູ່ນະຄອນຫລວງວຽງຈັນ ດັ່ງນີ້:

❖ ປະຊາຊົນຈຳນວນຫລວງຫລາຍ ມີຄວາມຕ້ອງການນຳໃຊ້ຫນັງສືຜ່ານແດນ ເພື່ອກັບຄືນໄປອອກແຮງງານຢູ່ປະເທດໃກ້ຄຽງ. ໃນສອງສາມປີມານີ້ ນັກສຶກສາທີ່ຈົບຊັ້ນມັດທະຍົມປາຍ ມີຈໍານວນຫລາຍ ບໍ່ສາມາດເດີນທາງໄປຮຽນຕໍ່ຢູ່ຕ່າງປະເທດໄດ້ ແລະ ມາເຖິງປະຈຸບັນ ເຂົາເຈົ້າກໍຂຸ້ນຂ້ຽວຕ້ອງການຫນັງສືຜ່ານແດນ ເພື່ອປະກອບເອກະສານສະຫມັກເອົາທຶນສຶສາຕໍ່ຢູ່ຕ່າງປະເທດ.

❖ ປະຊາຊົນຈຳນວນຫລາຍມີຄວາມເຂົ້າໃຈວ່າ ຖ້າມາຍື່ນຄໍາຮ້ອງ ຢູ່ນະຄອນຫລວງວຽງຈັນ ຈະໄດ້ຮັບຫນັງສືຜ່ານ ແດນໄວ ຊຶ່ງຄວາມຈິງ ໂດຍປະຕິບັດຕາມ ກົດຫມາຍວ່າດ້ວຍການເຂົ້າ-ອອກເມືອງ ການອອກຫນັງສື ຜ່ານແດນຢູ່ນະຄອນຫລວງວຽງຈັນ ມີກຳຫນົດເວລາ 7 ວັນລັດຖະການ ແລະ ຢູ່ຕ່າງແຂວງ ແມ່ນ 10 ວັນລັດຖະການ.

❖ ຈາກສະພາບການທີ່ມີຄວາມຕ້ອງສູງໃນການນຳໃຊ້ຫນັງສືຜ່ານແດນ ເຮັດໃຫ້ເກີດມີກຸ່ມຄົນສວຍໂອກາດຈຳນວນຫນຶ່ງ ຫມູນໃຊ້ສະພາບການດັ່ງກ່າວນີ້ ຫາຜົນປະໂຫຍດໃຫ້ແກ່ຕົນ ໂດຍໄປໂຄສະນາໃຫ້ປະຊາຊົນຢູ່ແຂວງຕ່າງໆ ວ່າສາມາດພາໄປເຮັດຫນັງສືຜ່ານແດນຢູ່ວຽງຈັນໄດ້ໄວ ໂດຍຮຽກເກັບຄ່າລົດ ຄ່າພັກເຊົາ ແລະ ຄ່າບໍລິການພາໄປເຮັດ ແລະ ອື່ນໆອີກ.

❖ ເກີດມີກຸ່ມຄົນຈຳນວນຫນຶ່ງ ທີ່ອ້າງຕົນເອງວ່າເປັນນາຍຫນ້າ ອາສາພາແລ່ນເອກະສານຕ່າງໆ ແລະ ຮັບຈ້າງມາຢືນລໍຖ້າຄິວ ເພື່ອເຂົ້າຍື່ນເອກະສານໃຫ້ແທນກັນ ແລະ ຮຽກເກັບເງິນນຳປະຊາຊົນ.

ຈາກສາເຫດທີ່ກ່າວມາຂ້າງເທິງນັ້ນ ແລະ ເຖິງວ່າພວກເຮົາຈະມີຄວາມພ້ອມດ້ານລະບົບອອກຫນັງສືຜ່ານແດນ ທີ່ທັນສະໄຫມກໍ່ຕາມ ແຕ່ບັນຫາທີ່ປະຊາຊົນ ຈາກທຸກແຂວງ ເປັນຈຳນວນຫລວງຫລາຍ ພ້ອມພາກັນມາຍື່ນຄໍາຮ້ອງຂໍຫນັງສືຜ່ານແດນຢູ່ກົມກົງສຸນຈຸດດຽວ ຊຶ່ງມີຈຳນວນທີ່ເກີນຄວາມອາດສາມາດຕົວຈິງ ທີ່ພວກເຮົາຈະສາມາດຮັບບໍລິການໄດ້ໃນແຕ່ລະວັນ ຈຶ່ງເກີດມີສະພາບແອອັດ ແລະ ຄວາມບໍ່ພໍໃຈຂອງຜູ້ມາຍື່ນຄຳຮ້ອງ ດັ່ງທີ່ປະກົດຕາມສື່ສັງຄົມອອນລາຍນັ້ນ.

ຕໍ່ກັບສະພາບການດັ່ງກ່າວ, ກົມກົງສຸນ, ກະຊວງການຕ່າງປະເທດ ກໍຮັບຮູ້ໄດ້ບັນຫາ ແລະ ບໍ່ໄດ້ເສີຍເມີຍ ພ້ອມທັງໄດ້ຄົ້ນຄ້ວາເພື່ອຊອກຫາວິທີ ແລະ ມາດຕະການຕ່າງໆ ເພື່ອຮອງຮັບແລະແກ້ໄຂບັນຫາທີ່ເກີດຂຶ້ນ ດັ່ງນີ້:

❖ ມາດຕະການແກ້ໄຂບັນຫາສະເພາະຫນ້າ ຫລື ໄລຍະສັ້ນ:

– ອັນທີ່ຫນຶ່ງ ໄດ້ປຸກລະດົມຈິດໃຈພະນັກງານພາຍໃນກົມກົງສຸນ ໃຫ້ມີຄວາມເສຍສະຫລະເວລາຂອງຕົນ ເພື່ອມາບໍລິການຮັບໃຊ້ແກ່ປະຊາຊົນ ໂດຍໄດ້ຈັດຕັ້ງພະນັກງານຈຳນວນຫນຶ່ງ ມາຈັດຄວາມເປັນລະບຽບ ແລະ ກວດກາເອກະສານໃຫ້ປະຊາຊົນຢູ່ພາຍໃນກົມກົງສຸນ ກ່ອນໂມງລັດຖະການ. ຫລາຍຄົນກໍຄົງເຫັນວ່າ ຫົກໂມງເຄິ່ງຫາເຈັດໂມງເຊົ້າ ມີພະນັກງານພວກເຮົາ ໄດ້ເລີ່ມວຽກງານຂອງຕົນແລ້ວ. ຫລາຍຄົນອາດຈະມີຂໍ້ສົງໄສວ່າ ເປັນຫຍັງການແຈກບັດຄິວຢູ່ສະຖານທີ່ເຮັດຫນັງສືຜ່ານແດນ ຈຶ່ງແຕກຕ່າງຈາກສະຖານທີ່ອື່ນ ຊຶ່ງໃຫ້ຜູ້ມາໃຊ້ບໍລິການກົດເອົາບັດຄິວເອງ ແຕ່ ຢູ່ກົມພວກເຮົາແມ່ນພະນັກງານເປັນຜູ້ແຈກໃຫ້. ຄຳຕອບກໍຄື ພວກເຮົາບໍ່ຢາກໃຫ້ປະຊາຊົນທີ່ມາລໍນັ່ງຖ້າຄິວເປັນການເສຍເວລາ ໃນກໍລະນີເອກະສານຂອງເຂົາເຈົ້າບໍ່ຄົບຖ້ວນ, ພະນັກງານພວກເຮົາຈະຊ່ວຍກວດກາເອກະສານໃຫ້ກ່ອນ ແລະ ເຫັນວ່າຄົບຖ້ວນ ຈຶ່ງເອົາຄິວໃຫ້ເຂົ້າໄປສຳພາດ. ອີກບັນຫາຂອງການກວດຄິວ ກໍເພື່ອຄົ້ນຫາບັນດານາຍຫນ້າທີ່ຮັບຈ້າງມາຢືນເອົາຄິວໃຫ້ກັນ ຖ້າພົບເຫັນກໍລະນີ ບໍ່ແມ່ນເຈົ້າຂອງເອກະສານ ແລະ ບໍ່ມີສ່ວນກ່ຽວຂ້ອງກັບຜູ້ມາຍື່ນຄຳຮ້ອງແທ້ ພວກເຮົາກໍຈະບໍ່ພິຈາລະນາໃຫ້ຄິວສຳພາດ.

– ອັນທີ່ສອງ ໄດ້ເພີ່ມຈຳນວນການຮັບເອກະສານຄຳຮ້ອງ ຂອງແຕ່ລະວັນຫລາຍຂຶ້ນກ່ວາເກົ່າ ເຊັ່ນຈາກສະພາບປົກກະຕິທີ່ມີຄວາມສາມາດຮັບພິຈາລະນາໄດ້ ປະມານສູງສຸດ 300 ຄົນ ກໍເພີ່ມມາເປັນ 500 ກ່ວາຄົນ ຫລື ຫລາຍກ່ວານັ້ນ ໂດຍໃຫ້ພະນັກງານພວກເຮົາດຳເນີນການສຳພາດໃຫ້ຫມົດທຸກຄົນ ເຖິງວ່າຈະກາຍໂມງເລີກວຽກລັດຖະການແລ້ວກໍຕາມ ຊຶ່ງຕົວຈິງບາງມື້ພວກເຮົາກໍ ດໍາເນີນການສໍາພາດຈົນເຖິງເວລາ 6 ໂມງແລງ ແລະ ບາງສູນຮັບຄຳຮ້ອງຂໍຫນັງສືຜ່ານແດນທີ່ຕ່າງແຂວງ ກໍອາດເລີກຄຳ່ກ່ວານັ້ນ ແລະ ຫນ່ວຍງານການຜະລິດຫນັງສື ຜ່ານແດນກໍເຊັ່ນດຽວກັນ ພ້ອມກັນເສຍສະຫລະເວລາມາປະຕິບັດຫນ້າທີ່ທັງວັນເສົາ ແລະ ອາທິດ ໂດຍປາສະຈາກເງິນລວງເວລາ ຫລື ເງິນອຸດຫນູນນອກໂມງການໃດໆ.

– ມີແຜນການນຳສົ່ງພະນັກງານສຳພາດເພີ່ມຕື່ມ ລົງໄປປະຈໍາຢູ່ແຕ່ລະສູນຮັບຄຳຮ້ອງຂໍຫນັງສືຜ່ານແດນທີ່ຕ່າງແຂວງ ເພື່ອເພີ່ມຂີດຄວາມສາມາດຮັບຄຳຮ້ອງໃນແຕ່ລະວັນໃຫ້ໄດ້ຫລາຍຂຶ້ນຕື່ມອີກ.

– ເພີ່ມທະວີ ການເຜີຍແຜ່ຂໍ້ມູນກ່ຽວກັບການປະກອບເອກະສານ ແລະ ຂັ້ນຕອນການຍື່ນຄໍາຮ້ອງດ້ວຍຕົນເອງ ໃຫ້ປະຊາຊົນຮັບຮູ້ ແລະ ບໍ່ຫລົງເຊື່ອບັນດາກຸ່ມນາຍຫນ້າ ທີ່ອ້າງວ່າສາມາດຊ່ວຍແລ່ນເອກະສານໃຫ້ໄດ້.

– ຕໍ່ກັບສະພາບຄວາມແອອັດ, ຄວາມບໍ່ເປັນລະບຽບຮຽບຮ້ອຍ ແລະ ກີດຂວາງການສັນຈອນຢູ່ບໍລິເວນດ້ານຫນ້າກົມກົງສຸນ ຊຶ່ງມີແມ່ຄ້າມາຂາຍເຄື່ອງຕາມແຄມທາງ ແລະ ບັນດານາຍຫນ້າທັງຫລາຍມາຕັ້ງໂຕະຮັບເອກະສານຕ່າງໆນັ້ນ ເຫັນວ່າບໍ່ຖືກຕ້ອງຕາມລະບຽບກົດຫມາຍ ຊຶ່ງພວກເຮົາກໍໄດ້ຂຶ້ນປ້າຍຫ້າມຂາຍເຄື່ອງຢູ່ບໍລິເວນນັ້ນ ແລະ ໄດ້ລົງຕັກເຕືອນພ້ອມທັງຂໍຄວາມຮ່ວມມືນຳ ແຕ່ກໍ່ບໍ່ມີໃຜໃຫ້ການຮ່ວມມືນໍາພວກເຮົາ. ຕໍ່ກັບບັນຫານີ້ ກົມກົງສຸນ ກໍໄດ້ສົ່ງຫນັງສືໄປຍັງ ອໍານາດການປົກຄອງຂອງເມືອງຈັນທະບູລີແລ້ວ ເພື່ອສະເຫນີໃຫ້ເພິ່ນລົງມາຊ່ວຍຈັດສັນຄວາມເປັນລະບຽບຮຽບຮ້ອຍຢູ່ບໍລິເວນດ້ານຫນ້າກົມກົງສຸນ, ກະຊວງການຕ່າງປະເທດ.

❖ ມາດຕະການແກ້ໄຂບັນຫາໃນອານາຄົດ ຫລື ໄລຍະຍາວ:

– ເພື່ອປັບປຸງການບໍລິການໃຫ້ໄດ້ດີຂຶ້ນກ່ວາເກົ່າໃນອານາຄົດ, ປະຈຸບັນກົມກົງສຸນ ກຳລັງຄົ້ນຄ້ວາ ແລະ ອອກແບບລະບົບແຈກບັດຄິວນັດສຳພາດໂດຍຜ່ານລະບົບອອນລາຍ.

– ປະຈຸບັນ ກະຊວງການຕ່າງປະເທດ ໄດ້ສຳເລັດການຮ່າງ ກົດຫມາຍວ່າດ້ວຍຫນັງສືຜ່ານແດນ ແລະ ຜ່ານຂັ້ນຕອນການລົງທາບທາມຄຳເຫັນ ຢູ່ຂັ້ນສູນກາງ, ຢູ່ບັນດາແຂວງພາກເຫນືອ ແລະ ແຂວງພາກກາງແລ້ວ ແລະ ພາຍໃນອາທິດນີ້ກໍຈະໄດ້ລົງທາບທາມຄຳເຫັນຢູ່ບັນດາແຂວງພາກໃຕ້ ແລະຄາດວ່າຈະສົ່ງໃຫ້ສະພາແຫ່ງຊາດພິຈາລະນາໃນທ້າຍປີ 2022 ນີ້. ກົດຫມາຍສະບັບນີ້ແມ່ນມີຄວາມສໍາຄັນຫລາຍ ເພື່ອກຳນົດຫລັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ແລະ ຕິດຕາມ ກວດກາ ວຽກງານຫນັງສືຜ່ານແດນ ຂອງປະເທດເຮົາ ແລະ ເພື່ອເຮັດໃຫ້ການປະຕິບັດວຽກງານດັ່ງກ່າວມີຄວາມຖືກຕ້ອງ, ຊັດເຈນ, ວ່ອງໄວ, ທັນສະໄຫມ ແລະ ເປັນລະບົບ ແນໃສ່ປົກປ້ອງສິດ ແລະ ຜົນປະໂຫຍດຂອງພົນລະເມືອງລາວ, ອໍານວຍຄວາມສະດວກໃຫ້ພົນລະເມືອງລາວໃນການເດີນທາງເຂົ້າ-ອອກປະເທດ, ພັກເຊົາ ຫລື ອາໄສຢູ່ຕ່າງປະເທດ.

– ຕາມແຜນການຂອງໂຄງການອອກຫນັງສືຜ່ານແດນໃນອານາຄົດ ໃນເມື່ອພວກເຮົາມີຄວາມພ້ອມທາງດ້ານງົບປະມານ ແລະ ດ້ານອື່ນໆ ກໍຈະໄດ້ຂະຫຍາຍສູນຮັບຄຳຮ້ອງຂໍຫນັງສືຜ່ານແດນຢູ່ຕ່າງແຂວງ ໄປຍັງບັນດາແຂວງອື່ນໆຕື່ມອີກ.

ຕໍ່ກັບສະພາບການທີ່ເກີດຂຶ້ນ ທາງກົມກົງສຸນ ຂໍສະແດງຄວາມຂໍໂທດ ແລະ ຂໍອະໄພ ມາຍັງປະຊາຊົນ ທີ່ມາໃຊ້ບໍລິການ ທີ່ພວກເຮົາບໍ່ສາມາດຕອບສະຫນອງໄດ້ຕາມຄວາມຕ້ອງການຂອງທຸກຄົນ ອັນເນື່ອງມາຈາກ ກະແສການລັ່ງໄຫລຂອງປະຊາຊົນເປັນຈຳນວນຫລວງຫລາຍມາຍື່ນຄຳຮ້ອງຢູ່ນະຄອນຫລວງວຽງຈັນ ຊຶ່ງມີປະລິມານທີ່ເກີນຂີດຄວາມສາມາດຮັບຮອງຕົວຈິງ ທາງດ້ານເຕັກນິກ ແລະ ບຸກຄະລາກອນຂອງພວກເຮົາທີ່ມີຈຳກັດ ແລະຂໍຮຽກຮ້ອງ ແລະ ຂໍຄວາມຮ່ວມມືມາຍັງທ່ານໃນບັນຫາຕ່າງໆດັ່ງນີ້:

– ຂໍແຈ້ງໃຫ້ຊາບວ່າ ນອກຈາກຢູ່ກົມກົງສຸນ ທີ່ນະຄອນຫລວງວຽງຈັນ, ພວກເຮົາຍັງມີສູນຮັບຄໍາຮ້ອງຂໍຫນັງສືຜ່ານແດນຢູ່ ແຂວງອຸດົມໄຊ, ແຂວງຊຽງຂວາງ, ແຂວງໄຊຍະບູລີ, ແຂວງຄຳມ່ວນ, ແຂວງສະຫວັນນະເຂດ ແລະ ແຂວງຈຳປາສັກ. ໃນໄລຍະນີ້ ຂໍຄວາມຮ່ວມມືມາຍັງປະຊາຊົນທີ່ຢູ່ແຂວງເຫລົ່ານີ້ ຫລືຢູ່ບັນດາແຂວງໃກ້ຄຽງ ໃຫ້ເຂົ້າໄປໃຊ້ບໍລິການຢູ່ບັນດາສູນຮັບຄຳຮ້ອງດັ່ງກ່າວ ເພື່ອເປັນການລຸດຜ່ອນຄວາມແອອັດຂອງປະຊາຊົນ ຢູ່ນະຄອນຫລວງວຽງຈັນ. ຂໍໃຫ້ມີສະຕິ ຢ່າຫລົງເຊື່ອບັນດານາຍຫນ້າ ທີ່ອ້າງຕົນວ່າຈະສາມາດພາໄປເຮັດ ຫລື ຊ່ວຍແລ່ນເອກະສານ ພ້ອມທັງເລັ່ງລັດຂັ້ນຕອນການອອກຫນັງສືຜ່ານແດນໃຫ້ຕົນໄດ້ໄວຢູ່ນະຄອນຫລວງວຽງຈັນ (ເຈົ້າຫນ້າທີ່ຈະພິຈາລະນາອຳນວຍຄວາມສະດວກອອກດ່ວນໃຫ້ສະເພາະກໍລະນີສຸກເສີນ ເຊັ່ນຄົນເຈັບ ທີ່ມີຄວາມຈໍາເປັນຕ້ອງເດີນທາງດ່ວນໄປຮັກສາປິ່ນປົວຢູ່ຕ່າງປະເທດ ໂດຍມີເອກະສານຢັ້ງຢືນຈາກໂຮງຫມໍເທົ່ານັ້ນ).

– ຂໍໃຫ້ປະຊາຊົນ ມາຍື່ນຄຳຮ້ອງດ້ວຍຕົນເອງ ມີບັນຫາທາງດ້ານເອກກະສານ ກໍໃຫ້ເຂົ້າປຶກສານໍາພະນັກງານຂອງສູນບໍລິການຂອງພວກເຮົາໄດ້ ຊຶ່ງຈະເປັນຜູ້ໃຫ້ຂໍ້ມູນທີ່ຖືກຕ້ອງແກ່ບັນດາທ່ານ. ຜ່ານມາພວກເຮົາກໍສັງເຫດເຫັນວ່າ ມີຫລາຍຄົນ ໄປປຶກສານໍານາຍຫນ້າຢູ່ແຄມທາງພຸ້ນໃນການປະກອບເອກະສານຕ່າງໆ ສຸດທ້າຍກໍບໍ່ມີຄວາມຖືກຕ້ອງ ແລະ ຕ້ອງໄດ້ເຮັດຄືນອີກຫລາຍຄັ້ງຈຶ່ງຖືກຕ້ອງ, ຊຶ່ງເຫັນວ່າເປັນຊ່ອງວ່າງໃຫ້ນາຍຫນ້າຮຽກເອົາເງິນຄ່າແລ່ນເອກະສານຂອງພວກທ່ານໄປໂດຍໄຮ້ເຫດຜົນ.

– ຂໍຖືໂອກາດນີ້, ຂໍຄວາມເຫັນໃຈ ຈາກປະຊາຊົນ ແລະ ທຸກພາກສ່ວນຂອງສັງຄົມ ໃຫ້ມີຄວາມເຂົ້າໃຈວ່າ ລະບົບການອອກຫນັງສືຜ່ານແດນແມ່ນມີຄວາມລະອຽດອ່ອນ ແລະ ຕິດພັນກັບບັນຫາຄວາມຫມັ້ນຄົງທັງພາຍໃນ ແລະ ຕ່າງປະເທດ. ທຸກຂັ້ນຕອນຕ້ອງໃຫ້ມີຄວາມຖືກຕ້ອງຕາມມາດຖານ ແລະ ເງື່ອນໄຂຂອງສາກົນ ເພື່ອນາໆປະເທດຈະໄດ້ໃຫ້ການຍອມຮັບ, ໃຫ້ຄວາມເຊື່ອຖືຕໍ່ຫນັງສືຜ່ານແດນຂອງປະເທດເຮົາ ແລະ ເວລານໍາໃຊ້ເດີນທາງໄປຕ່າງປະເທດ ກໍຈະໄດ້ຮັບຄວາມສະດວກດີ. ສະນັ້ນ ຕໍ່ກັບຫລາຍຄໍາເຫັນຂອງສັງຄົມທີ່ວ່າ ເປັນຫຍັງບໍ່ໃຫ້ແຂວງອື່ນອອກໃຫ້ໆທົ່ວເຖິງທຸກແຂວງ ກໍ່ດັ່ງທີ່ໄດ້ກ່າວມາຂ້າງເທິງນັ້ນ ພວກເຮົາກໍມີແຜນທີ່ຈະຂະຫຍາຍ ສູນບໍລິການຮັບຄໍາຮ້ອງຂໍຫນັງສືຜ່ານແດນ ໄປຍັງແຂວງອື່ນໆຕື່ມອີກໃນອານາຄົດ.

ບັນຫາສຸດທ້າຍ, ຂໍໃຫ້ປະຊາຊົນຮັບຮູ້ວ່າ ຫນັງສືຜ່ານແດນ ແມ່ນຊັບສົມບັດຂອງຊາດ ທີ່ອະນຸຍາດໃຫ້ພົນລະເມືອງລາວ ນຳໃຊ້ໃນການເດີນທາງເຂົ້າ-ອອກປະເທດ ແລະ ເດີນທາງໄປຕ່າງປະເທດ, ຈຶ່ງສະເຫນີໃຫ້ທຸກຄົນ ຕ້ອງປົກປັກຮັກສາໃຫ້ດີ ບໍ່ໃຫ້ຕົກເຮ່ຍເສຍຫາຍ ແລະ ອີກເທື່ອຫນຶ່ງ ຂໍຄວາມຮ່ວມມືມາຍັງຜູ້ທີ່ໄດ້ຮັບຫນັງສືຜ່ານແດນທຸກໆຄົນ ນໍາໃຊ້ຫນັງສືຜ່ານແດນໃຫ້ຖືກກັບຈຸດປະສົງ ຖືກຕ້ອງຕາມລະບຽບກົດຫມາຍ ແລະ ປະຕິບັດລະບຽບການເຂົ້າ-ອອກເມືອງໃຫ້ຖືກຕ້ອງ, ນໍາໃຊ້ຫນັງສືຜ່ານແດນຂອງພວກທ່ານ ຢ່າງມີຄວາມຮັບຜິດ ຊອບສູງ ຕາມສິດນຳໃຊ້ຂອງຕົນເອງ.

#Medialaos MMD (ແຫຼ່ງຂໍ້ມູນຈາກ: ກະຊວງການຕ່າງປະເທດ)

ໃນວັນທີ 14 ມິຖຸນາ 2022 ກະຊວງສາທາລະນະສຸກ, ຮ່ວມກັບ ກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ ເເລະ ອົງການຢູນິເຊັບ ໄດ້ຈັດກອງປະຊຸມເຜິຍເເຜ່ວຽກງານສັກວັກຊີນໃນ ສປປລາວ ໃຫ້ແກ່ບັນດາບັນນາທິການຂ່າວ ເພື່ອປືກສາຫາລື ກ່ຽວກັບວິທີການທີ່ສື່ມວນຊົນໃນທົ່ວປະເທດ ຈະສາມາດຊ່ວຍປັບປຸງອັດຕາປົກຄຸມການສັກວັກຊີນກັນພະຍາດໂຄວິດ-19 ແລະ ວັກຊີນຮອບປົກກະຕິ ໃນ ສປປ ລາວ.

ໂດຍການເປັນປະທານ ຂອງ ທ່ານ ສົມສະຫວາດ ພົງສາ, ຫົວໜ້າກົມສື່ມວນຊົນ ຂອງກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ, ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ ຂອງກະຊວງສາທາລະນະສຸກ, ພ້ອມດ້ວຍ ທ່ານ Bisrat Abiy, ວ່າການເເທນຫົວໜ້າພະເເນກສຸຂະພາບ ຂອງອົງການຢູນິເຊັບ ປະຈຳ ສປປ ລາວ.

ໃນກອງປະຊຸມເຜີຍເເຜ່ຄັ້ງນີ້ໄດ້ມີການນຳສະເໜີລາຍງານຫລ້າສຸດ ກ່ຽວກັບວຽກງານສັກວັກຊີນໃນ ສປປ ລາວ ໂດຍສະເພາະໃນແຂວງພາກເໜືອ: ເເຂວງຫຼວງພະບາງ, ຜົ້ງສາລີ, ຫຼວງນໍ້າທາ, ອຸດົມໄຊ, ໄຊຍະບູລີ, ບໍ່ແກ້ວ ແລະ ນະຄອນຫຼວງວຽງຈັນ, ພາຍຫຼັງການຄົ້ນພົບວ່າອັດຕາການປົກຄຸມການສັກວັກຊີນກັນພະຍາດໃນແຂວງເຫຼົ່ານີ້ຍັງບໍ່ສາມາດບັນລຸເປົ້າໝາຍທີ່ວາງໄວ້ສຳລັບປີ 202.

“ການສັກວັກຊີນເປັນກຸນເເຈອັນສຳຄັນສຳລັບການຟື້ນຕົວຂອງ ສປປ ລາວ ຈາກຜົນກະທົບຂອງພະຍາດໂຄວິດ-19 ເຖີງເເມ່ນວ່າຍັງມີສິ່ງທ້າທາຍໃນວຽກງານສັກວັກຊີນໃນ 32 ເມືອງ ທີ່ມີອັດຕາສັກຢາຕຳກວ່າ 50% ໃນປີ 2021 ເເຕ່ໃນຂະນະດຽວກັນນັ້ນ ກໍ່ຍັງມີໂອກາດສຳລັບການເພີ່ມທະວີການຈັດຕັ້ງປະຕິບັດວຽກງານຂອງພວກເຮົາໃຫ້ຫຼາຍຂຶ້ນ ເເລະ ສືບຕໍ່ຊຸກຍູ້ສົ່ງເສີມການສັກວັກຊີນໃຫ້ບັນດາພໍ່ເເມ່ພີ່ນ້ອງໃນຊຸມຊົນຂອງພວກເຮົາໃຫ້ບັນລຸໄດ້ຫລາຍກວ່າ 80% ໃນປີ 2022” ກ່າວໂດຍ ທ່ານ ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ ຂອງກະຊວງສາທາລະນະສຸກ.

ຜູ້ເຂົ້າຮ່ວມຍັງໄດ້ສົນທະນາກັນກ່ຽວກັບວິທີການຕ່າງໆ ເພື່ອປັບປູງການໃຫ້ບໍລິການສັກວັກຊີນໃຫ້ເເກ່ຊຸມຊົນ ເພື່ອບັນລຸເປົ້າໝາຍອັດຕາປົກຄຸມການສັກວັກຊີນຂອງປະເທດ, ບົດບາດຂອງສື່ມວນຊົນໃນການເຜີຍເເຜ່ໂຄສະນາການສັກວັກຊີນທົ່ວປະເທດ ເເລະ ແຜນການສັກວັກຊີນໃນອະນາຄົດ ໂດຍສະເພາະໃນບັນດາກຸ່ມເດັກນ້ອຍ.

“ສື່ມວນຊົນ ເຊິ່ງສາມາດເຂົ້າເຖິງຈຳນວນຄົນຢ່າງກວ້າງຂວາງ, ມີບົດບາດອັນສໍາຄັນໃນການເຜີຍແຜ່ຂໍ້ມູນທີ່ຖືກຕ້ອງ ແລະ ເຊື່ອຖືໄດ້ກ່ຽວກັບພະຍາດໂຄວິດ-19 ໃຫ້ແກ່ສາທາລະນະຊົນ. ດັ່ງນັ້ນ ມັນເປັນສິ່ງສໍາຄັນທີ່ສື່ມວນຊົນໃນທົ່ວປະເທດ ຄວນເພີ່ມທະວີຄວາມພະຍາຍາມໃນວຽກງານສື່ສານກັບປະຊາຊົນລາວ ເພື່ອໃຫ້ສາມາດບັນລຸເປົ້າໝາຍອັດຕາການປົກຄຸມການສັກວັກຊີນຂອງປະເທດ” ກ່າວໂດຍ ທ່ານ ສົມສະຫວາດ ພົງສາ, ຫົວໜ້າກົມສື່ມວນຊົນ ຂອງກະຊວງຖະເເຫຼງຂ່າວ, ວັດທະນະທຳ ເເລະ ທ່ອງທ່ຽວ.

ນອກຈາກນີ້ ທ່ານ Bisrat Abiy, ວ່າການເເທນຫົວໜ້າພະເເນກສຸຂະພາບ ຂອງອົງການຢູນິເຊັບ ປະຈໍາ ສປປ ລາວ ຍັງໄດ້ໃຫ້ຄໍາເຫັນດັ່ງກ່າວ: “ວັກຊີນຍັງຄົງເປັນເຄື່ອງມືອັນສຳຄັນທີ່ຂາດບໍ່ໄດ້ສຳລັບພວກເຮົາ ໃນການຮັບມືກັບພະຍາດໂຄວິດ-19 ແລະ ມັນເປັນສິ່ງສຳຄັນທີ່ທຸກຄົນໃນຊຸມຊົນພວກເຮົາໄດ້ຮັບການສັກວັກຊີນ, ບໍ່ວ່າຈະເປັນເດັກນ້ອຍ ຫຼື ຜູ້ສູງອາຍຸ. ອົງການຢູນີເຊັບ ຍັງຄົງໃຫ້ຄຳໝັ້ນສັນຍາທີ່ຈະສືບຕໍ່ໃຫ້ການຮ່ວມມືກັບລັດຖະບານເເຫ່ງ ສປປ ລາວ ໃນການສົ່ງເສີມວຽກງານສັກວັກຊີນກັນພະຍາດໂຄວິດ-19 ແລະ ສ້າງຄວາມເຊື່ອໝັ້ນໃນປະສິດທິພາບ ແລະ ຄວາມປອດໄພ ຂອງວັກຊີນໃນຊຸມຊົນ.”