ໃນຕອນເຊົ້າວັນທີ 4 ກັນຍານີ້, ທ່ານ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າ ຄະນະໂຄສະນາອົບຮົມສູນກາງພັກ (ຄອສພ) ປະທານສະພາທິດສະດີສູນກາງພັກ ໄດ້ນຳພາຄະນະຜູ້ແທນສື່ມວນ ຊົນລາວ ຈາກໜັງສືພິມປະຊາຊົນ, ກົມສື່ມວນຊົນ, ສຳນັກຂ່າວສານປະເທດລາວ, ໂທລະພາບແຫ່ງຊາດລາວ, ວິທະຍຸແຫ່ງຊາດລາວ ແລະ ໜັງສືພິມພາສາຕ່າງປະເທດເດີນທາງເຂົ້າຮ່ວມກອງປະຊຸມເວທີປາໄສສື່ມວນຊົນ ແລະ ຄັງປັນຍາທົ່ວໂລກໃຕ້ປະຈໍາປີ 2025 ທີ່ນະຄອນຄຸນໝິງ ແຂວງຢຸນນານ ສປ ຈີນ ໂດຍມີທ່ານນາງ ວິລະວອນ ພັນທະວົງ ຮອງຫົວໜ້າ ຄອສພ ພ້ອມຄະນະ ໃຫ້ກຽດສົ່ງຄະນະຜູ້ແທນສື່ມວນຊົນລາວ ທີ່ສະໜາມ ບິນສາກົນວັດໄຕ.

ໂອກາດນີ້, ທ່ານ ນາງ ວິລະວອນ ພັນທະວົງ ໄດ້ກ່າວສະແດງຄວາມຍິນດີ ແລະ ອວຍພອນໄຊໃຫ້ ທ່ານ ຄໍາພັນ ເຜີຍຍະວົງ ພ້ອມຄະນະ ເດີນທາງດ້ວຍຄວາມສະຫວັດດີພາບ ພ້ອມທັງນໍາເອົາຜົນສໍາເລັດໃນ ວຽກງານຕ່າງໆກັບມາສູ່ປະເທດ.

ທ່ານ ຄໍາພັນ ເຜີຍຍະວົງ ກໍໄດ້ສະແດງຄວາມຂອບໃຈນໍາທ່ານນາງ ວິລະວອນ ພັນທະວົງ ທີ່ໄດ້ນໍາພາ ຄະນະມາສົ່ງໃນຄັ້ງນີ້, ພ້ອມຢືນຢັນວ່າການເດີນທາງໄປເຂົ້າຮ່ວມເວທີປາໄສສື່ມວນຊົນ ແລະ ຄັງປັນຍາທົ່ວໂລກ ໃຕ້ ແລະ ຢ້ຽມຢາມນະຄອນຄຸນໝິງໃນຄັ້ງນີ້ ຈະເປັນໂອກາດອັນດີ ເປັນປະໂຫຍດສູງສຸດຕໍ່ຄະນະໂຄສະນາ ອົບຮົມສູນກາງພັກ ກໍຄືສື່ມວນຊົນຂອງ ສປປ ລາວ. ການນໍາພາຄະນະສື່ມວນຊົນລາວເດີນທາງໄປເຂົ້າຮ່ວມ ກອງປະຊຸມໃນຄັ້ງນີ້ເປັນເວລາ 5 ວັນ ນັບແຕ່ວັນທີ 4-8 ກັນຍາ 2025.

(ຂ່າວ-ພາບ: ວັນເພັງ

ຂປລ. ໃນວັນທີ 4 ສິງຫາ 2025 ນີ້, ທ່ານ ທອງສະລິດ ມັງໜໍ່ເມກ ລັດຖະມົນຕີກະຊວງສຶກສາທິການ ແລະ ກິລາ (ສສກ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ຮຸນກຣັງ ພະນອງ ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງ ກຳປູເຈຍ ປະຈຳລາວ ແລະ ທ່ານ ຄວີມາ ເອັນທາຣາ ຫົວໜ້າຫ້ອງການທະນາຄານໂລກ ປະຈຳລາວ ໃນໂອກາດທີ່ ທ່ານ ທອງສະລິດ ມັງໜໍ່ເມກ ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນ ລັດຖະມົນຕີກະ ຊວງສຶກສາທິການ ແລະ ກິລາ ຄົນໃໝ່.

ໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ຮຸນກຣັງ ພະນອງ ແລະ ທ່ານ ຄວີມາ ເອັນທາຣາ ທີ່ໄດ້ນໍາພາຄະນະເດີນທາງມາຢ້ຽມຢາມ ແລະ ອວຍພອນ ໃນໂອກາດທີ່ໄດ້ຮັບຕຳແໜ່ງໃໝ່ໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນການຮັດແໜ້ນ ການພົວພັນຮ່ວມມືດ້ານຕ່າງໆ ໂດຍສະເພາະດ້ານການສຶກສາ ແລະ ກິລາ ລະຫວ່າງ ລາວ-ກຳປູເຈຍ-ທະນາຄານໂລກ ໃຫ້ໄດ້ຮັບການພັດ ທະນາ ຂຶ້ນໄປເລື້ອຍໆ ແລະ ສືບຕໍ່ໃຫ້ການສະໜັບສະໜູນ, ຊ່ວຍເຫລືອ ເຊິ່ງກັນ ແລະ ກັນ ໃນອະນາຄົດ ແລະ ຍາວນານ. ພ້ອມນີ້, ທ່ານ ລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ລັດຖະບານ ກໍຄື ປະຊາຊົນກຳປູເຈຍ ແລະ ທະ ນາຄານໂລກ ປະຈຳລາວ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອດ້ານການສຶກສາ ແລະ ກິລາ ແກ່ ສປປ ລາວ ມາໂດຍຕະຫລອດ ເຮັດໃຫ້ວຽກງານດ້ານການສຶກສາ ແລະ ກິລາ ຢູ່ ສປປ ລາວ ໄດ້ຮັບການພັດທະນາ ຂຶ້ນໄປເລື້ອຍໆ. ພ້ອມທັງລາຍງານໃຫ້ທ່ານທູດ ແລະ ຫົວໜ້າຫ້ອງການທະນາຄານໂລກ ປະຈຳລາວ ຮູ້ກ່ຽວກັບສະພາບການພັດທະນາວຽກງານດ້ານການສຶກສາ ຢູ່ ສປປ ລາວ ໂດຍສະເພາະ ການປັບປຸງລະບົບການສຶກສາ, ຫລັກສູດການຮຽນ-ການສອນ ແລະ ອື່ນໆ.

ພ້ອມນີ້, ທ່ານທູດ ແລະ ຫົວໜ້າຫ້ອງການທະນາຄານໂລກ ປະຈຳລາວ ກໍໄດ້ສະແດງຄວາມຂອບໃຈ ຕໍ່ທ່ານ ທອງສະລິດ ມັງໜໍ່ເມກ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງ ສະແດງຄວາມຊົມເຊີຍ ແລະ ຕີລາຄາສູງ ຕໍ່ທ່ານ ທອງສະລິດ ມັງໜໍ່ເມກ ທີ່ໄດ້ຮັບການແຕ່ງຕັ້ງ ໃຫ້ມາດຳລົງຕຳແໜ່ງເປັນລັດຖະມົນຕີກະຊວງສຶກສາທິການ ແລະ ກິລາ ຄົນໃໝ່. ພ້ອມທັງ ຢືນຢັນວ່າ ຈະສືບຕໍ່ໃຫ້ການສະໜັບສະໜູນຊ່ວຍເຫລືອດ້ານການສຶກສາ ແລະ ກິລາ ແກ່ ສປປ ລາວ ຕື່ມອີກ ໃນອະນາຄົດ.

ຂ່າວ: ທະນູທອງ

ພາບ: ຂັນໄຊ

ກະຊວງອຸດສາຫະກຳ ແລະ ການຄ້າ ຮ່ວມກັບບໍລິສັດ ຊີພີ ອໍລ໌ ລາວ ຍົກລະດັບສິນຄ້າທ້ອງຖິ່ນທີ່ມີທ່າແຮງສູງໃຫ້ກ້າວສູ່ມາດຕະຖານສາກົນ ເພື່ອເພີ່ມໂອກາດສູ່ ຊ່ອງທາງຈຳໜ່າຍຂອງຮ້ານ ເຊເວັ່ນ ອີເລຟເວັ່ນ ແລະ ຕະຫຼາດຕ່າງປະເທດ

​

ໃນວັນທີ 2 ກັນຍາ 2025 ທີ່ກະຊວງອຸດສາຫະກຳ ແລະ ການຄ້າ ໄດ້ມີພິທີລົງນາມໃນບັນທຶກຄວາມເຂົ້າໃຈ(MOU) ກ່ຽວກັບການຮ່ວມມືຈັດຕັ້ງປະຕິບັດໂຄງການສິນຄ້າລາວກ້າວສູ່ມາດຕະຖານສາກົນ ລະຫວ່າງ ກົມສົ່ງເສີມຈຸນລະວິສາຫະກິດ,ວິສາຫະກິດຂະໜາດນ້ອຍ ແລະ ກາງ (ກຈນກ) ໂດຍ ທ່ານນາງ ມະນີວອນ ວົງໄຊ, ຫົວໜ້າກົມ ແລະ ກົມການຄ້າພາຍໃນ ໂດຍ ທ່ານ ສັນຕິສຸກ ພູນສະຫວັດ, ຫົວໜ້າກົມ ກັບ ບໍລິສັດ ຊີພີອໍລ໌ ລາວ ຈໍາກັດ ໃນກຸ່ມບໍລິສັດ ຊີພີອໍລ໌ ຈຳກັດ (ມະຫາຊົນ) ເຊິ່ງມີ ທ່ານ ທາຕີ ຈິຣະບັນຈົງຈິດ Managing Director ເປັນຜູ້ແທນໃນການລົງນາມຄັ້ງນີ້.​

ສຳລັບໂຄງການສິນຄ້າລາວກ້າວສູ່ມາດຕະຖານສາກົນ ມີຈຸດປະສົງຕົ້ນຕໍ ເພື່ອຍົກລະດັບຄຸນນະພາບ ແລະ ມາດຕະຖານຂອງສິນຄ້າເດັ່ນ ແລະ ມີທ່າແຮງຂອງລາວໃຫ້ກ້າວສູ່ມາດຕະຖານສາກົນ ສາມາດວາງຈຳໜ່າຍໃນຕະຫຼາດ ທັງພາຍໃນ ແລະ ຕ່າງປະເທດໄດ້ຢ່າງກວ້າງຂວາງ ໂດຍສະເພາະຜ່ານເຄືອຂ່າຍຂອງເຊເວັ່ນ ອີເລຟເວັ່ນ ເຊິ່ງເປັນຮ້ານສະດວກຊື້ທີ່ມີຊື່ສຽງລະດັບໂລກ. ດ້ານໜຶ່ງ, ຈະກໍ່ໃຫ້ເກີດການສ້າງວຽກເຮັດງານທຳ, ສ້າງອາຊີບ ສ້າງລາຍໄດ້ເພີ່ມໃຫ້ກັບຜູ້ປະກອບການ ແລະ ຜູ້ຜະລິດສິນຄ້າໃນປະເທດ ນຳໄປສູ່ການຍົກລະດັບຄຸນນະພາບຊີວິດຂອງປະຊາຊົນລາວ ລວມເຖິງເປັນການສ້າງພາບພົດຊື່ສຽງທີ່ດີໃຫ້ກັບສິນຄ້າທ້ອງຖິ່ນຂອງ ສປປ ລາວ.

ທ່ານນາງ ມະນີວອນ ວົງໄຊ ຫົວໜ້າກົມສົ່ງເສີມຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ (ກຈນກ) ກ່າວວ່າ ກົມ ຈນກ ເປັນກົມໜຶ່ງປະຕິບັດໜ້າທີ່ພັດທະນາ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ວຽກງານສົ່ງເສີມຜູ້ປະກອບການ ແລະ ສະຕາດອັບ, ວຽກງານຜະລິດຕະພາບ ແລະ ຄຸນນະພາບ, ວຽກງານພັດທະນາສິນຄ້າ, ວຽກງານຫັດຖະກຳ ແລະ ວຽກງານສົ່ງເສີມການເຂົ້າເຖິງແຫຼ່ງທຶນ. ໂຄງການສິນຄ້າລາວກ້າວສູ່ມາດຕະຖານສາກົນ ເປັນການຮ່ວມມືລະຫວ່າງ ກະຊວງອຸດສາຫະກໍາ ແລະ ການຄ້າ ເຊິ່ງຕາງໜ້າໂດຍ ກົມສົ່ງເສີມ ຈນກ ແລະ ກົມການຄ້າພາຍໃນ ກັບ ບໍລິສັດ ຊີພີ ອໍລ໌ ລາວ, ໂຄງການຮ່ວມມືດັ່ງກ່າວຈະນໍາມາເຊິ່ງຜົນປະໂຫຍດສໍາຄັນຫຼາຍຢ່າງ ເປັນຕົ້ນແມ່ນ ການຍົກລະດັບຜະລິດຕະພາບໃນການຜະລິດ, ປັບປຸງຄຸນນະພາບສິນຄ້າ, ການຂະຫຍາຍຕະຫຼາດ, ແລະ ອື່ນໆ ໃຫ້ແກ່ສິນຄ້າທ້ອງຖິ່ນໃນ ສປປ ລາວ. ການຮ່ວມມືດັ່ງກ່າວຍັງແມ່ນການພົວພັນຮ່ວມມືທີ່ມີຜົນປະໂຫຍດຮ່ວມກັນ, ສ້າງໃຫ້ຫົວໜ່ວຍທຸລະກິດພາຍໃນມີໂອກາດໃນການຮຽນຮູ້ ແລະ ເຂົ້າເຖິງເຕັກນິກການພັດທະນາຄຸນນະພາບສິນຄ້າ ກໍຄື ລະບົບການຜະລິດທີ່ກ້າວໜ້າ ເພື່ອຍົກສູງຄຸນນະພາບ, ສ້າງຂີດຄວາມສາມາດໃນການແຂ່ງຂັນ ແລະ ຍັງເປັນການຂະຫຍາຍຕະຫຼາດໃຫ້ແກ່ສິນຄ້າຂອງຕົນ.

ຂະນະທີ່ ທ່ານ ສັນຕິສຸກ ພູນສະຫວັດ ຫົວໜ້າກົມການຄ້າພາຍໃນ ກ່າວວ່າ ການສະໜັບສະໜູນຈາກພາກລັດຈາກໂຄງການຮ່ວມມືນີ້ ຈະຊ່ວຍໃຫ້ຜູ້ຜະລິດມີທັກສະຄວາມຮູ້ໃນການພັດທະນາສິນຄ້າ ໂດຍສະເພາະ ການມຸ່ງໝັ້ນໃນການພັດທະນາຄຸນນະພາບສິນຄ້າຂອງຕົນໃຫ້ ກ້າວສູ່ມາດຕະຖານສາກົນ ແລະ ເປັນການສົ່ງເສີມດ້ານການ ຂະຫຍາຍຕະຫຼາດ. ການຮ່ວມມືກັບພາກທຸລະກິດນີ້ ຈະເປັນຂົວຕໍ່ສຳຄັນໃນການນຳສິນຄ້າລາວເຂົ້າສູ່ຕະຫຼາດທັງໃນ ແລະ ຕ່າງປະເທດ. ພ້ອມນັ້ນ, ການຮ່ວມມືລະຫວ່າງພາກລັດ ແລະ ທຸລະກິດນີ້ ເປັນການສ້າງຄວາມເຂົ້າໃຈຮ່ວມກັນ ແລະ ສົ່ງເສີມກັນ ແລະ ກັນ ເພື່ອເຮັດວຽກໃຫ້ເກີດປະສິດທິພາບ ແລະ ປະສິດທິຜົນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ລັດໃຫ້ໄປໃນທິດທາງດຽວກັນ.

ປັດຈຸບັນ ສປປ ລາວ ມີຮ້ານເຊເວັ່ນ ອີເລຟເວັ່ນ ເປີດໃຫ້ບໍລິການຄວາມສະດວກແລ້ວ 19 ສາຂາ ຕັ້ງຢູ່ໃນນະຄອນຫຼວງວຽງຈັນ, ແຂວງ ວຽງຈັນ, ຫຼວງພະບາງ, ສະຫວັນນະເຂດ, ຈໍາປາສັກ ແລະ ແຂວງ ຄຳມ່ວນ ເຊິ່ງທຸກສາຂາມີການຈັດສັນພື້ນທີ່ສຳລັບສິນຄ້າທ້ອງຖິ່ນຂອງລາວທີ່ມີຄຸນນະພາບໄດ້ເຂົ້າມາວາງຈຳໜ່າຍຢ່າງຊັດເຈນ ເພື່ອສະໜັບສະໜູນສິນຄ້າຂອງຄົນລາວໂດຍສະເພາະໃນບັນດານັກທ່ອງທ່ຽວທີ່ມາຢ້ຽມຢາມ ສປປ ລາວ ເປັນການສົ່ງເສີມການເຕີບໂຕທາງເສດຖະກິດຢ່າງຍືນຍົງຂອງປະເທດ.

ການດື່ມນໍ້າກ່ອນກິນເຂົ້າຖ້າເຮັດເປັນນິໄສ ຈະຊ່ວຍສົ່ງຜົນໃຫ້ຄວບຄຸມນໍ້າໜັກໄດ້ຢ່າງມີປະສິດທິພາບ !!!

ຫາກດື່ມນໍ້າ 20-30 ນາທີ ກ່ອນກິນອາຫານນໍ້າຈະຊ່ວຍເຕີມບາງສ່ວນຂອງກະເພາະອາຫານເຮັດໃຫ້ຮູ້ສຶກອີ່ມຂຶ້ນ ສົ່ງຜົນໃຫ້ເຮົາກິນໄດ້ໜ້ອຍລົງໂດຍທຳມະຊາດ ງານວິໄຈຍັງພົບວ່າ ຜູ້ໃຫຍ່ທີ່ດື່ມນໍ້າ 1 ຈອກກ່ອນອາຫານສາມາດຫລຸດປະລິມານພະລັງງານທີ່ກິນລົງໄດ້ປະມານ 75-90 ແຄລໍຣີ/ຕໍ່ມື້ ແລະ ຫາກເຮັດຕໍ່ເນື່ອງ ເມື່ອຮ່ວມກັບການຮັບປະທານອາຫານທີ່ສົມດູນກໍຈະເຮັດໃຫ້ນໍ້າໜັກຫລຸດລົງໄດ້ທີ່ລະໜ້ອຍຢ່າງຢັ່ງຢືນ.

ນອກຈາກນີ້ື ນໍ້າຍັງຊ່ວຍສະໜັບສະໜຸນການຍ່ອຍອາຫານໃຫ້ເຮັດວຽກໄດ້ດີຂຶ້ນ ແລະ ປ້ອງກັນການຫິວ ເຊິ່ງມັກເປັນສາເຫດໜຶ່ງຂອງການກິນເກີນຄວາມຈຳເປັນ ແລະ ຍັງຊ່ວຍຫລຸດຜ່ອນການເລືອກດື່ມເຄື່ອງດື່ມທີ່ມີນໍ້າຕານເຊັ່ນ: ນໍ້າອັດລົມ ຊາເຢັນ ຫລື ກາເຟໃສ່ນໍ້າຕານເຊິ່ງເຕັມໄປດ້ວຍແຄລໍຣີສ່ວນເກີນ.

ຖ້າລອງເຮັດທຸກໆ ມື້ ມື້ລະ 3 ຄັ້ງ ຈະຊ່ວຍຫລຸດພະລັງງານໄດ້ 225-270 ແຄລໍຣີ/ຕໍ່ມື້ ຫລື ຫລາຍກວ່າ 6,000 – 8,000 ແຄລໍຣີ/ຕໍ່ເດືອນ ເຊິ່ງທຽບເທົ່າກັບການຫລຸດໄຂມັນປະມານ 1 ກິໂລກຣາມ/ຕໍ່ເດືອນ ຖ້າຄວບຄູ່ກັບການກິນ ແລະ ການອອກກຳລັງກາຍທີ່ເໝາະສົມ.

ທີ່ມາ: The knowledge Factory

“ເມົາລົດ” ຖືວ່າເປັນອາການຂອງ Motion Sickness ຫຼື ສະພາວະທີ່ສະໝອງ ແລະ ການຊົງຕົວທີ່ບໍ່ສາມາດປັບຕົວເຂົ້າກັບການເຄື່ອນໄຫວທີ່ຢູ່ອ້ອມຮອບຕົວເຮົາໄດ້ ເຊິ່ງມັກຈະເກີດຂຶ້ນໃນຂະນະທີ່ຂີ່ໃນຍານພາຫະນະຕ່າງໆເຊັ່ນ: ເຮືອ, ລົດໄຟ, ຍົນ ແລະ ລົດ ເພາະແຕ່ລະຄົນທີ່ເປັນມັກຈະມີອາການ ແລະ ຄວາມຮຸນແຮງທີ່ແຕກຕ່າງກັນ ແຕ່ຖ້າຫາກມີອາການວິນຫົວ, ປວດຮາກເເລ້ວ ນັ້ນສະເເດງວ່າເຈົ້າກໍາລັງເມົາລົດ. ນອກຈາກນັ້ນ, ຄົນທີ່ມີພະຍາດປະຈຳຕົວເຊັ່ນ: “ໄມເກຣນ” ຫຼື ຜູ້ທີ່ມີປະສາດຮັບຮູ້ສຶກການເຄື່ອນໄຫວໄວເເລ້ວ ຈະມີໂອກາດເມົາລົດຫລາຍກວ່າບຸກຄົນທົ່ວໄປ.

ອາການເມົາລົດສາມາດເກີດຂຶ້ນໄດ້ງ່າຍຫຼາຍ ໂດຍສະເພາະແມ່ນຜູ້ທີ່ຕ້ອງເດີນທາງໃນເສັ້ນທາງຄົດລ້ຽວ ​ເນື່ອງ​ຈາກ​ຖືກ​ເເຮງເເກວ່ງໄປເເກວ່ງມາຂອງລົດ, ເຊິ່ງເຮົາຈະມາເເນະນຳວິທີການປ້ອງກັນອາການເມົາລົດດັ່ງນີ້:

1. ກິນອາຫານ 1 ຊົ່ວໂມງກ່ອນອອກເດີນທາງ

ກ່ອນການເດີນທາງທຸກໆຄັ້ງ ຢ່າປ່ອຍໃຫ້ທ້ອງຫວ່າງ ເພາະເວລາທ້ອງຫວ່າງຈະເຮັດໃຫ້ເມົາລົດໄດ້ງ່າຍ, ແນະນຳໃຫ້ກິນກ່ອນອອກເດີນທາງປະມານ 1 ຊົ່ວໂມງ ແລະ ພັກຜ່ອນປະມານ 45 ນາທີກ່ອນອອກເດີນທາງ, ບໍ່ຄວນກິນອາຫານທີ່ມີກົດ ຫຼື ຫລີກລ່ຽງອາຫານປະເພດທີ່ເປັນມັນ.

2. ກິນຢາເເກ້ເມົາລົດ

ຢາເເກ້ເມົາລົດ ເເມ່ນສາມາດເເກ້ເມົາລົດໄດ້ຢ່າງເຫັນຜົນ ເຊິ່ງສາມາດຫາຊື້ໄດ້ຢູ່ຮ້ານຂາຍຢາທົ່ວໄປ ແນະນໍາໃຫ້ກິນ 1 ເມັດ 30 ນາທີກ່ອນອອກເດີນທາງ.

3. ຫ້າມເຮັດກິດຈະກຳຢູ່ໃນລົດ

ບໍ່ວ່າການເດີນທາງຈະດົນປານໃດ ແລະ ບໍ່ວ່າຫນ້າເບື່ອປານໃດ ຖ້າທ່ານເປັນຄົນທີ່ເມົາລົດງ່າຍ ແນະນຳໃຫ້ຫລີກລ່ຽງກິດຈະກຳທັງໝົດໃນລົດເຊັ່ນ: ການ​ອ່ານ​ປຶ້ມ, ຫລິ້ນ​ເກມ, ຫລິ້ນ​ໂທລະ​ສັບ ຫຼື​ ສິ່ງ​ອື່ນໆ ເພາະ​ວ່າ​ການ​ເຮັດ​ກິດ​ຈະ​ກໍາ​ເຫລົ່າ​ນີ້ ມັນຈະເຮັດໃຫ້ເມົາລົດ.

4. ໃສ່ແວ່ນຕາກັນແດດ

ນອກຈາກແວ່ນຕາກັນແດດ ຈະສາມາດຊ່ວຍປ້ອງກັນລັງສີຂອງແສງແດດໄດ້ເເລ້ວ, ຜູ້ຊ່ຽວຊານດ້ານການແພດຍັງຢືນຢັນວ່າ ຍັງສາມາດຊ່ວຍປ້ອງກັນອາການເມົາລົດໄດ້ ເພາະແວ່ນຕາກັນແດດຈະຊ່ວຍ “ຫລຸດຜ່ອນການຮັບຮູ້ຂອງເສັ້ນປະສາດ optic” ໃນຂະນະທີ່ນັ່ງຢູ່ໃນຍານພາຫະນະ.

5. ພະຍາຍາມນັ່ງແຖວໜ້າ ແລະ ຫັນໜ້າໄປທາງໜ້າຂອງລົດ

ເມື່ອເດີນທາງໄປສະຖານທີ່ ທີ່ບໍ່ຄຸ້ນເຄີຍ ຫຼາຍຄົນມັກເບິ່ງໄປທາງຂ້າງຂອງລົດ ເພື່ອເບິ່ງທິວທັດຕ່າງໆ, ເຊິ່ງການເຮັດແບບນີ້, ຈະເຮັດໃຫ້ມີອາການເມົາລົດໄດ້ງ່າຍ ຍ້ອນວ່າເສັ້ນປະສາດ optic ຮັບຮູ້ການເຄື່ອນໄຫວຢ່າງໄວວາ ຈົນເຮັດວຽກບໍ່ສອດຄ່ອງກັບສະຫມອງ.

ແຕ່ຖ້າພະຍາຍາມເຮັດທຸກຢ່າງເເລ້ວ ເເລະ ອາການຍັງບໍ່ດີຂຶ້ນ ເເມ່ນເເນະນຳວ່າໃຫ້ນອນ ເພາະການນອນເປັນອີກວິທີຫນຶ່ງທີ່ຈະຫລຸດຜ່ອນຄວາມສັບສົນໃນສະຫມອງ ເເລະ ຈະເຮັດໃຫ້ບໍ່ມີອາການເມົາລົດ.

ໃນໂອກາດເປີດສົກຮຽນໃໝ່ ສົກຮຽນ 2025-2026 ຢ່າງເປັນທາງການ ທີ່ໂຮງຮຽນມັດທະຍົມສົມບູນວຽງຈັນ (ມສ ວຽງຈັນ) ນາງ ພອນທິບ ໄຊຍະສິດທິເດດ ນັກຮຽນຊັ້ນ ມ5/1 ຂອງ ມສ ວຽງຈັນ ໄດ້ສະແດງຄວາມຮູ້ສຶກຂອງຕົນໃນວັນເປີດສົກຮຽນໃໝ່ວັນທີ 1 ກັນຍາ 2025 ທີ່ໂຮງຮຽນ ມສ ວຽງຈັນ ວ່າ: ຕົນເອງຈະຕັ້ງໃຈຝຶກຝົນຫຼໍ່ຫຼອມຕົນເອງໃຫ້ຮູ້ຈັດວາງແຜນການຮຽນ, ເອົາໃຈໃສ່ກັບວຽກບ້ານທີ່ຄູ-ອາຈານມອບໃຫ້ຖືສໍາຄັນໃນການປະຕິບັດກົດລະບຽບຂອງໂຮງຮຽນ ຈະພະຍາຍາມບໍ່ເຮັດຜິດກົດລະບຽບທີ່ໂຮງຮຽນວາງອອກ.

ສໍາລັບວິຊາທີ່ມັກຮຽນຫຼາຍກວ່າໝູ່ແມ່ນວິຊາປະຫວັດສາດ ເພາະຢາກຮຽນຮູ້ກ່ຽວກັບຄວາມເປັນມາຂອງປະຫວັດສາດ; ທ້າວ ແສງເງິນ ອຸດົມ ນັກຮຽນຊັ້ນ ມ5/2 ມສ ວຽງຈັນ ໄດ້ສະແດງຄວາມຮູ້ສຶກໃນໂອກາດດັ່ງກ່າວວ່າ: ຕົນເອງຮູ້ສຶກດີໃຈຫຼາຍ ທີ່ໄດ້ເຫັນໝູ່ເພື່ອນໃນມື້ເປີດສົກຮຽນໃໝ່ ສໍາລັບຕົນເອງມີຄວາມພ້ອມເຕັມທີ່ ໂດຍຈະຕັ້ງໃຈຄົ້ນຄວ້າຮໍ່າຮຽນ ຟັງຄໍາອະທິບາຍເວລາທີ່ອາຈານສອນບົດຮຽນໃນຫ້ອງ ບໍ່ບົນແຊວ, ເອົາໃຈໃສ່ປະຕິບັດກົດລະບຽບຂອງໂຮງຮຽນ ປະຕິບັດໂມງເຂົ້າຮຽນຢ່າງເຂັ້ມງວດ ເພື່ອໃຫ້ກາຍເປັນນັກຮຽນເກັ່ງ ແລະ ນາງ ພອນທິດາ ສີສູນທອນ ນັກຮຽນຊັ້ນ ມ3 ໂຮງຮຽນ ມສ ວຽງຈັນ ໄດ້ໃຫ້ສໍາພາດວ່າ: ຕົນເອງມີຄວາມຮູ້ສຶກດີໃຈທີ່ໄດ້ຫວນຄືນມາພົບໝູ່ເພື່ອນ ເໝືອນໄດ້ພັດທະນາຕົນເອງໂດຍຜ່ານກິດຈະກໍາຕ່າງໆຂອງໂຮງຮຽນອີກຄັ້ງ ແລະ ຈະໄດ້ຮຽນຮູ້ສິ່ງໃໝ່ໆ ໃນສົກຮຽນນີ້ ຕົນຈະຕັ້ງໃຈສຶກສາຮໍ່າຮຽນເນື່ອງຈາກວ່າຈະເກັບຄະແນນໃນການສອບເສັງ ເພື່ອໃຫ້ໄດ້ຄະແນນທີ່ດີ ຂຶ້ນຫ້ອງ ມ4 ນອກຈາກຄົ້ນຄວ້າບົດຮຽນນໍາຄູ-ອາຈານແລ້ວ ຍັງຕ້ອງຄົ້ນຄວ້ານໍາໝູ່ຄູ່, ຄົ້ນຄວ້າຢູ່ເຮືອນ ແລະ ຊອກຮູ້ດ້ວຍຕົນເອງໃຫ້ຫຼາຍຂຶ້ນ, ສໍາລັບວິຊາທີ່ມັກແມ່ນວິຊາພາສາລາວ.

ວັນ​ທີ 1 ກັນ​ຍາ​ນີ້, “ເທ​ສະ​ການຮູບ​ເງົາ​ຣັດ​ເຊຍ 2025” ​ທີ່​ຈັດ​ຂຶ້ນ​ໂດຍການ​ເປັນ​ເຈົ້າ​ພາບ​ຮ່ວມ ​ຂອງ​ກົມ​ຮູບ​ເງົາ​ ແຫ່ງ​ຊາດ​ຈີນ ແລະ ກະ​ຊວງວັດ​ທະ​ນະ​ທຳ​ສະ​ຫະ​ພັນ​ຣັດ​ເຊຍ ໄດ້​ຈັດ​ພິ​ທີ​ເປີດ​ງານ​ຢ່າງຄຶກ​ຄື້ນ ​ຢູ່​ຫໍຂໍ້​ມູນຮູບ​ເງົາ​ຈີນ. ທ່ານ ​ເຊີ້ນ​ໄ​ຫ​ສົງ ຮອງ​ຫົວ​ໜ້າ​ຄະ​ນະ​ໂຄ​ສະ​ນາອົບ​ຮົມ​ສູນ​ກາງ​ພັກກອມ​ມູ​ນິດ​ຈີນ, ຜູ້​ອຳ​ນວຍ​ການ​ໃຫຍ່​ ວິ​ທະ​ຍຸ​ໂທ​ລະ​ພາບ ​ສູນ​ກາງ​ຈີນ ຫລື CMG ແລະ ທ່ານ ​ນາງ ໂອ​ລ​ກາ ໂບ​ຣິ​​ຊອ​ຟ​ນາ ​ລູບີ​ໂມ​ວາ ລັດ​ຖະ​ມົນ​ຕີ​ກະ​ຊວງວັດ​ທະ​ນະ​ທຳ​ສະ​ຫະ​​ພັນຣັດ​ເຊຍ​ ໄດ້​ເຂົ້າ​ຮ່ວມ​ພິ​ທີ ແລະ ກ່າວ​ຄຳ​ປາ​ໄສ. “ເທ​ສະ​ການ​ຮູບ​ເງົາຣັດ​ເຊຍ 2025” ຄັ້ງ​ນີ້​ແມ່ນ​ສ່ວນ​ໜຶ່ງຂອງ​ກິດ​ຈະ​ກຳ “ປີ​ວັດ​ທະ​ນະ​ທຳ​ຈີນ-ຣັດ​ເຊຍ” ​ປະ​ຈຳ​ປີ 2024-2025, ຈະ​ຈັດ​ຂຶ້ນ​ຢູ່​ນະ​ຄອນຫລວງປັກ​ກິ່ງ, ນະ​ຄອນຊີ່​ນິງ ແລະ ນະ​ຄອນຫລານ​ໂຈ່ວ ໃນ​ລະ​ຫວ່າງ ວັນ​ທີ 1-12 ກັນ​ຍາ​ນີ້ ເຊິ່ງ​ຈະ​ສາຍ​ຮູບ​ເງົາ​ຣັດ​ເຊຍ​ 8 ເລື່ອງ​ທີ່​ມີ​ເນື້ອ​ໃນ​ອຸ​ດົມ​ສົມ​ບູນ ແລະ ມີຫລາກຫລາຍ​ປະ​ເພດ.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ວັນລະນຶກໄຊຊະນະສົງຄາມປະຊາຊົນຈີນ ຕໍ່ຕ້ານການຮຸກຮານຂອງຍີ່ປຸ່ນ ແລະ ສົງຄາມຕໍ່ຕ້ານຟາດຊິດໂລກ ຄົບຮອບ 80 ປີ ຈະຈັດຂຶ້ນ ໃນເວລາ 9 ໂມງ ຂອງວັນທີ 3 ກັນຍານີ້ ຢູ່ສະໜາມຫລວງທຽນອ່ານເມີນ ນະຄອນຫລວງປັກກິ່ງ ຂອງ ສປ ຈີນ. ໃນໂອກາດນີ້ ທ່ານ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານ ຄະນະກຳມະການ ການທະຫານສູນກາງຈີນ ຈະກ່າວຄຳປາໄສສຳຄັນພ້ອມທັງກວດແຖວທະຫານ.

ເວລາ 20 ໂມງຂອງວັນດຽວກັນ, ງານລາຕີສິລະປະວັນນະຄະດີເພື່ອລະນຶກໄຊຊະນະດັ່ງກ່າວພາຍໃຕ້ຫົວຂໍ້ “ຄວາມເປັນທຳຕ້ອງຊະນະແນ່ນອນ” ຈະຈັດຂຶ້ນຢູ່ຫໍສະພາປະຊາຊົນແຫ່ງຊາດ ທີ່ນະຄອນຫລວງປັກກິ່ງ, ທ່ານ ສີ ຈິ້ນຜິງ ແລະ ທ່ານອື່ນໆ ຈະເຂົ້າຊົມການສະແດງສິລະປະວັນນະຄະດີ ຄັ້ງນີ້. ຮອດເວລານັ້ນ, ວິທະຍຸ ໂທລະພາບສູນກາງຈີນ ຫລື CMG ຈະຖ່າຍທອດສົດກິດຈະກຳດັ່ງກ່າວ ແລະ ຂ່າວສານຊິນຮວາ ສຳນັກຂ່າວສານແຫ່ງຊາດຈີນ ກໍຈະລາຍງານສົດດ້ວຍພາບບັນຍາກາດ ຂອງພິທີດັ່ງກ່າວເຊັ່ນກັນ.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ເອກອັກຄະລັດຖະທູດແຫ່ງ ສາທາລະນະລັດ ສັງຄົມນິຍົມຫວຽດນາມ ປະຈໍາລາວ ໄດ້ຈັດໃຫ້ມີພິທີໂຮມຊຸມນຸມສວນສະໜາມ ສະເຫຼີມສະຫຼອງວັນຊາດ ແຫ່ງສາທາລະນະລັດ ສັງຄົມນິຍົມຫວຽດນາມ ຄົບຮອບ 80 ປີ (2 /9/1945 – 2/9 /2025) ຜ່ານທາງອອນລາຍ ໃນວັນທີ 2 ກັນຍານີ້ ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ.

ເປັນກຽດໃນພິທີມີ ສະຫາຍ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງປະທານ ຜູ້ປະຈໍາການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ຮອງນາຍົກລັດຖະມົນຕີ, ສະຫາຍ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ນາງ ສູນທອນ ໄຊຍະຈັກຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ສະຫາຍ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າອົງການຈັດຕັ້ງມະຫາຊົນ, ແຂກຖືກເຊີນ ພ້ອມດ້ວຍນັກຮຽນ-ນັກສຶກສາປັນຍາຊົນທັງລາວ-ຫວຽດນາມ ເຂົ້າຮ່ວມ.

ສະຫາຍ ຟາມ ມິ່ງ ຈ້ຽນ ອຸປະທູດ ແຫ່ງ ສສ ຫວຽດນາມ ປະຈໍາລາວ ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ວ່າ: ຈຸດປະສົງການເຕົ້າໂຮມໃນມື້ນີ້ ເພື່ອຊົມລາຍການຖ່າຍທອດສົດ ພິທີສວນສະໜາມ ສະເຫຼີມສະຫຼອງວັນຊາດແຫ່ງ ສສ ຫວຽດນາມ ຄົບຮອບ 80 ປີ ທີ່ນະຄອນຫຼວງຮ່າໂນ້ຍ, ເພື່ອຮັດແໜ້ນສາຍພົວພັນລະຫວ່າງຫວຽດນາມ-ລາວ, ຢາກໃຫ້ປວງຊົນລາວ-ຫວຽດນາມ ໄດ້ຫວນຄືນປະຫວັດສາດທີ່ສະຫງ່າອົງອາດຂອງປະເທດຊາດຫວຽດນາມ.

ໃນເມື່ອກ່ອນ ວັນທີ 2/9/1945 ທີ່ສະໜາມຫຼວງ ນະຄອນຫຼວງຮ່າໂນ້ຍ ປະທານ ໂຮ່ຈິມິນ ໄດ້ອ່ານບົດຖະແຫຼງການປະກາດເອກະລາດ ສະຖາປະນາສາທາລະນະລັດ ປະຊາທິປະໄຕ ຫວຽດນາມ, ມູນເຊື້ອການປະຕິວັດຂອງປະຊາຊົນຫວຽດນາມ ພາຍໃຕ້ການນໍາຂອງພັກກອມມູນິດອິນດູຈີນ.

ໃນພິທີ ນອກຈາກຮັບຊົມ ການເດີນສວນສະໜາມແລ້ວ ຍັງໄດ້ຊົມງານວາງສະແດງຮູບພາບ ຈໍານວນ 80 ພາບ ຊຶ່ງສະແດງໃຫ້ເຫັນເຖິງບັນດາຜົນງານ ຂອງປະເທດວຽດນາມ ໃນຕະຫຼອດໄລຍະ 80 ປີ ແຫ່ງການສ້າງສາພັດທະນາ ສສ ຫວຽດນາມ, ບັນດາຮູບພາບດັ່ງກ່າວ ໄດ້ພັນລະນາສາຍພົວພັນພິເສດ ລະຫວ່າງ ຫວຽດ-ລາວ, ນັບແຕ່ໄດ້ຮັບການສ້າງຕັ້ງ ສາທາລະນະລັດ ປະຊາທິປະໄຕ ຫວຽດນາມ ຂຶ້ນ ຈົນ ຮອດປັດຈຸບັນ ໂດຍສະເພາະ ແມ່ນບັນດາຜົນງານທີ່ຍາດມາໄດ້ ໃນໄລຍະທີ່ ສອງຊາດ ຫວຽດ-ລາວ ຕໍ່ສູ້ຄຽງບ່າຄຽງໄຫຼ່ ຕ້ານສັດຕູໂຕດຽວກັນ ກໍຄື ໄລຍະຮ່ວມມືກັນ ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ສອງປະເທດຫວຽດ-ລາວ ຈົນເຖິງປັດຈຸບັນ.

ກອງປະຊຸມຄູ່ຮ່ວມພັດທະນາ ຄັ້ງທີ VI ສະໜັບສະໜູນການຈັດຕັ້ງປະຕິບັດການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ໄດ້ຈັດຂຶ້ນໃນວັນທີ 2 ກັນຍານີ້ ທີ່ໂຮງແຮມຮໍລິເດອິນ ໂດຍການເປັນປະທານຂອງທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ຮອງຫົວໜ້າຄະນະຊີ້ນຳການສຳຫຼວດພົນລະເມືອງ ແລະ ທີ່ຢູ່ອາໄສລະດັບຊາດ, ມີທ່ານ ບັກຕີຢໍ ຄາດີລອບ ຜູ້ຕາງໜ້ງອົງການ UNFPA ປະຈໍາ ສປປ ລາວ, ມີບັນດາທ່ານເອກອັກຄະລັດຖະທູດ, ຕານຸທູດ, ຜູ້ຕາງໜ້າຈາກອົງການຈັດຕັ້ງສາກົນ ແລະ ພະນັກ ງານທີ່ກ່ຽວຂ້ອງຈາກສູນສະຖິຕິແຫ່ງຊາດ ແລະ ບັນດາກະຊວງເຂົ້າຮ່ວມ.

ທ່ານ ສັນຕິພາບ ພົມວິຫານ ກ່າວວ່າ: ກອງປະຊຸມຄັ້ງນີ້ ແມ່ນການລາຍງານຄວາມຄືບໜ້າໃນການກະ ກຽມການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແລະ ປຶກສາຫາລືແລກປ່ຽນກ່ຽວກັບທິດທາງໃນການຈັດຕັ້ງປະຕິບັດໃນຕໍ່ໜ້າ. ເວົ້າສະເພາະແມ່ນການຊ່ວຍເຫຼືອທາງດ້ານວິຊາການ ແລະ ທຶນ ຮອນໃຫ້ກັບລັດຖະບານ ສປປ ລາວ ໃຫ້ສຳເລັດການສຳຫຼວດດັ່ງກ່າວຢ່າງມີໄຊ. ປັດຈຸບັນ, ລັດຖະບານແຫ່ງ ສປປ ລາວ ກໍາລັງຂຸ້ນຂ້ຽວສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025) ຊຶ່ງປີ 2025 ເປັນປີມ້ວນທ້າຍຂອງການຈັດຕັ້ງປະຕິບັດແຜນພັດທະນາດັ່ງກ່າວໃຫ້ບັນລຸຕາມຄາດໝາຍທີ່ວາງໄວ້. ພ້ອມກັນນັ້ນ, ກໍກໍາລັງສຸມໃສ່ການສໍາເລັດສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X (2026-2030) ແລະ ແຜນງົບປະມານແຫ່ງລັດ ຊຶ່ງໄດ້ວາງຄາດໝາຍສູ້ຊົນຕ່າງໆ ເປັນຕົ້ນຄາດໝາຍທາງດ້ານເສດຖະກິດມີສະຖຽນລະພາບ, ຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ແລະ ຍືນຍົງ ດ້ວຍອັດຕາການເຕີບໂຕ 5.5% ຂຶ້ນໄປ ແລະ ອັດຕາສ່ວນການເກັບລາຍຮັບສູ້ຊົນໃຫ້ໄດ້ 20% ຂອງລວມຍອດຜະລິດຕະພັນພາຍໃນ GDP. ພ້ອມທັງສຸມໃສ່ການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ ແລະ ມຸ້ງໃສ່ການສ້າງ ຄວາມເປັນເອກະລາດທາງດ້ານການຜະລິດ ກໍຄືເສດຖະກິດ, ການເຂົ້າເຖິງ ແລະ ການເຊື່ອມໂຍງລະຫວ່າງແຂວງ, ຂົງເຂດ ແລະ ພາກພື້ນ. ການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ 5 ນີ້ຈຶ່ງເປັນເຫດການທາງດ້ານປະຫວັດສາດຂອງ ສປປ ລາວ ທັງເປັນແຫຼ່ງຂໍ້ມູນທີ່ສໍາຄັນທີ່ສຸດໃນການຕີລາຄາສະພາບການ ດໍາລົງຊີວິດຂອງປະຊາຊົນບັນດາເຜົ່າ, ຜົນສໍາເລັດ ແລະ ໝາກຜົນຂອງການພັດທະນາເສດຖະກິດ-ສັງຄົມໃນ 10 ປີທີ່ຜ່ານມາ.

ລັດຖະບານແຫ່ງ ສປປ ລາວ ມີຄວາມມຸ້ງໝັ້ນ ແລະ ຕັດສິນໃຈຢ່າງສູງ ເພື່ອສືບຕໍ່ຈັດຕັ້ງປະຕິບັດການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ໃຫ້ສຳເລັດ, ຫ້ອງການສຳຫຼວດ, ສູນສະຖິຕິແຫ່ງຊາດໄດ້ເປັນເຈົ້າການປະສານສົມທົບກັບທຸກພາກສ່ວນ ໃນການກະກຽມເພື່ອຮັບປະກັນໃຫ້ການຈັດຕັ້ງປະຕິບັດການສຳຫຼວດດັ່ງກ່າວສຳເລັດຕາມວັດຖຸປະສົງ ແລະ ລະດັບຄາດໝາຍທີ່ວາງໄວ້. ການສຳຫຼວດຄັ້ງນີ້ໄດ້ຍົກລະດັບທາງດ້ານເຕັກນິກວິທະຍາການສໍາຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ V ນີ້, ເມື່ອທຽບໃສ່ການສໍາຫຼວດຄັ້ງທີ່ຜ່ານມາ ຈາກວິທີການເກັບກຳຂໍ້ມູນດ້ວຍການນໍາໃຊ້ແບບສອບຖາມ ຫັນມານໍາໃຊ້ການເກັບກຳແບບເອເລັກໂຕນິກ ດ້ວຍລະບົບກາປີ້ (CAPI) ແບບອອນລາຍ ແລະ ຈາກການຂຶ້ນບັນຊີຫຼັງຄາເຮືອນ ແມ່ນໄດ້ນໍາໃຊ້ພາບຖ່າຍດາວທຽມ (Satellite Image) ທີ່ມີຄວາມຊັດເຈນສູງໃນການກໍານົດຈຸດທີ່ຕັ້ງຂອງບັນດາຕຶກ, ອາຄານ, ຫຼັງຄາບ່ອນພັກອາໄສ ແລະ ຈຸດທີ່ຕັ້ງພື້ນຖານໂຄງລ່າງຕ່າງໆທີ່ສຳຄັນ.

ໃນການສໍາຫຼວດຄັ້ງນີ້, ລັດຖະບານລາວໄດ້ມີຄວາມຕັດສິນໃຈສູງ ໃນການຈັດສັນງົບປະມານແຫ່ງລັດເຂົ້າໃນການຈັດຕັ້ງປະຕິບັດການສໍາຫຼວດ ຊຶ່ງກວມເອົາ 40% ຂອງງົບປະມານການສໍາຫຼວດທັງໝົດ (423 ຕື້ກີບ ຫຼືປະມານ 22.2 ລ້ານໂດລາ). ສ່ວນທີ່ເຫຼືອ 60% ແມ່ນໄດ້ລະດົມກັບຄູ່ຮ່ວມພັດທະນາ, ຜູ້ໃຫ້ທຶນ ແລະ ຈາກບັນດາປະເທດໂດຍຜ່ານການຮ່ວມມືສອງຝ່າຍ. ໃນກອງປະຊຸມຄະນະຊີ້ນໍາລະດັບຊາດ, ສູນສະຖິຕິແຫ່ງຊາດ ກະ ຊວງການເງິນ ກໍໄດ້ລາຍງານວ່າ: ມາຮອດປັດຈຸບັນນີ້ ສາມາດລະດົມແຫຼ່ງທຶນໄດ້ທັງໝົດປະມານ 80% ຂອງຄວາມຕ້ອງການທຶນ.

ຂໍ້ມູນທີ່ໄດ້ຈາກການສຳຫຼວດຈະເປັນພື້ນຖານທີ່ຈຳເປັນທີ່ສຸດຮັບໃຊ້ການສ້າງ, ການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X (2026-2030), ການສ້າງບົດລາຍງານແຫ່ງຊາດແບບສະໝັກໃຈ (VNR) ຂອງລັດຖະບານເຫຼັ້ມທີ 4 ໃນປີ 2027 ແລະ ທີ 5 ໃນປີ 2030 ຊຶ່ງເປັນຜົນຕິດຕາມການບັນລຸເປົ້າໝາຍການພັດທະນາແບບຍືນຍົງ, ການຫຼຸດພົ້ນອອກຈາກປະເທດດ້ອຍພັດທະນາໃນປີ 2026, ການຄິດໄລ່ດັດ ສະນີພັດທະນາມະນຸດ, ການປັບປຸງນະໂຍບາຍທາງດ້ານພົນລະເມືອງ ກໍຄືຍຸດທະສາດການພັດທະນາຊັບພະຍາ ກອນມະນຸດແຫ່ງຊາດ, ການນຳໃຊ້ແຮງງານຂອງ ສປປ ລາວ ແລະ ການຕິດຕາມແຜນງານທາງດ້ານປະຊາກອນຂອງອົງການສະຫະປະຊາຊາດໃນລະດັບພາກພື້ນ ແລະ ສາກົນ.