ໃນວັນທີ 4 ກັນຍາ 2025 ຢູ່ກະຊວງການຕ່າງປະເທດ, ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ບິລານ ໂອຣັງເຊບ ດູຣານີ ຜູ້ຕາງໜ້າອົງ ການສະຫະປະຊາຊາດເພື່ອເດັກ (ອຸຍນີເຊບ) ປະຈຳ ສປປ ລາວ. ຈຸດປະສົງເພື່ອປຶກສາຫາລື ໃນການເພີ່ມທະວີການ ຮ່ວມມືລະຫວ່າງ ສປປ ລາວ ແລະ ອົງການອຸຍນີເຊບ ໃຫ້ມີຄວາມເຂັ້ມແຂງຂຶ້ນຕື່ມ.

ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການເຂົ້າຢ້ຽມຂໍ່ານັບດັ່ງກ່າວ, ພ້ອມທັງຂອບໃຈຕໍ່ອົງການອຸຍນີເຊບ ທີ່ໄດ້ໃຫ້ການຮ່ວມມື ແລະ ສະໜັບສະໜູນການພັດທະນາເສດຖະກິດ-ສັງຄົມຂອງ ສປປ ລາວ ຕະຫລອດໄລຍະຫລາຍປີຜ່ານມາ ໂດຍສະເພາະວຽກງານທີ່ຕິດພັນກັບແມ່ ແລະ ເດັກ.

ນອກຈາກນີ້, ທັງສອງຝ່າຍກໍໄດ້ປຶກສາຫາລືກັນຫລາຍບັນຫາ ເປັນຕົ້ນ ແມ່ນການກະກຽມໃຫ້ແກ່ການພົບ ປະຂັ້ນສູງ ລະຫວ່າງ ສປປ ລາວ ແລະ ອົງການອຸຍນີເຊບ ໃນທ້າຍເດືອນຕຸລາ 2025 ນີ້ ແລະ ບັນຫາການລະດົມ ທຶນເພື່ອມາຈັດຕັ້ງປະຕິບັດແຜນງານການຮ່ວມມືລະຫວ່າງ ສປປ ລາວ ແລະ ອົງການອຸຍນີເຊບ. ໃນຕອນທ້າຍທັງ ສອງຝ່າຍ ກໍໄດ້ໃຫ້ຄໍາ ໝາຍໝັ້ນ ໃນການສືບຕໍ່ໃຫ້ການສະໜັບສະໜູນ ແລະ ຮ່ວມມືເຊິ່ງກັນ ແລະ ກັນໃນຕໍ່ໜ້າ.

ອົງການອຸຍນີເຊບ ເປັນໜຶ່ງໃນອົງການເຄືອຂ່າຍຂອງ ສປຊ ເຊິ່ງໄດ້ຖືກສ້າງຕັ້ງຂື້ນໃນປີ 1946, ອົງການດັ່ງ ກ່າວ ແມ່ນໃຫ້ຄວາມສໍາຄັນໃນການສົ່ງເສີມ ແລະ ປົກປ້ອງສິດທິຂອງເດັກນ້ອຍໃນທົ່ວໂລກ. ອົງການອຸຍນີເຊບ ໄດ້ເລີ່ມເຂົ້າມາຊ່ວຍເຫລືອ ສປປ ລາວ ແຕ່ປີ 1950 ແລະ ໄດ້ສ້າງຕັ້ງຫ້ອງການຜູ້ຕາງໜ້າ ເພື່ອເຄື່ອນໄຫວວຽກ ງານຢູ່ ສປປ ລາວ ໃນປີ 1973 ເຊິ່ງອົງການອຸຍນີເຊບ ໄດ້ໃຫ້ການຊ່ວຍເຫລືອ ສປປ ລາວ ໃນຫລາຍຂົງເຂດ ເປັນ ຕົ້ນ ແມ່ນຊ່ວຍສະໜັບສະໜູນໃນວຽກງານການພັດທະນາ ທີ່ຕິດພັນກັບແມ່ ແລະ ເດັກ ເຊັ່ນ: ການສຶກສາ, ສາທາລະນະສຸກ, ໂພຊະນາການ, ການປົກປ້ອງເດັກ, ການປ່ຽນແປງຂອງສະພາບດິນຟ້າອາກາດ ແລະ ສິ່ງແວດ ລ້ອມທີ່ກະທົບຕໍ່ເດັກ. ປັດຈຸບັນ, ສປປ ລາວ ແລະ ອົງການອຸຍນີເຊບ ກໍາລັງຈັດຕັ້ງປະຕິບັດ ແຜນງານການຮ່ວມມື (Country Programme Document) ໄລຍະປີ 2022-2026 ຄາດຄະເນງົບປະມານທີ່ນໍາໃຊ້ເຂົ້າໃນແຜນ ງານດັ່ງກ່າວ ແມ່ນປະມານ 100 ລ້ານ ໂດລາສະຫະລັດ.

ພ້ອມກັນນີ້, ສປປ ລາວ ກໍໄດ້ປະຕິບັດໜ້າທີ່ເປັນສະມາຊິກໃນສະພາບໍລິຫານ ຂອງອົງການອຸຍນີເຊບ ສົກປີ 2025-2027 ເຊິ່ງ ສປປ ລາວ ເຄີຍເປັນສະມາຊິກມາກ່ອນໃນປີ 2001-2003. ສະພາບໍລິຫານດັ່ງກ່າວ ມີບົດບາດໃນການອະນຸມັດ, ຕິດຕາມ ແລະ ສະໜັບສະໜູນການຈັດຕັ້ງປະຕິບັດບັນດາແຜນງານຂອງ ອົງການ ອຸຍນີເຊບ ໃນທົ່ວໂລກ, ມີສະມາຊິກ 36 ປະເທດ, ເລືອກຕັ້ງທຸກໆ 3 ປີ. ນັບແຕ່ຕົ້ນປີ 2025 ເປັນຕົ້ນມາ, ສປປ ລາວ ກໍໄດ້ປະຕິບັດໜ້າທີ່ຂອງຕົນໃນສະພາບໍລິຫານຂອງອົງການອຸຍນີເຊບ ຕາມພາລະບົດບາດ ແລະ ຄວາມສາມາດ ຂອງຕົນ.

ຂ່າວ-ພາບ: ກົມການຂ່າວ, ກະຊວງການຕ່າງປະເທດ

ໃນວັນທີ 5 ກັນຍາ 2025 ນີ້, ທ່ານ ຄໍາພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ປະຊາຊົນ ປະຕິວັດລາວ ໄດ້ນຳພາຄະນະຜູ້ແທນສື່ມວນຊົນລາວ ຈາກກົມສື່ມວນຊົນ, ສຳນັກຂ່າວສານປະເທດລາວ, ໂທລະພາບແຫ່ງຊາດລາວ, ວິທະຍຸແຫ່ງຊາດລາວ, ໜັງສືພິມປະຊາຊົນ ແລະ ໜັງສືພິມພາສາຕ່າງປະເທດ ເຂົ້າຮ່ວມກອງປະຊຸມສື່ມວນຊົນ ອາຊີໃຕ້-ອາຊີຕາເວັນອອກສ່ຽງໃຕ້ ປະຈໍາປີ 2025 ທີ່ ນະຄອນຄຸນໝິງ ສປ ຈີນ ໂດຍການເປັນປະທານຂອງ ທ່ານ ເຫີຈູຄຸນ ຫົວໜ້າກຸ່ມໜັງສືພິມລາຍວັນຢຸນນານ, ມີ ທ່ານ ນາງ ເຈີ່ງ ຢ້ຽນ (Zeng Yan) ຫົວໜ້າຄະນະໂຄສະນາອົບຮົມຄະນະພັກ ແຂວງຢຸນນານ, ທ່ານ ຊີຢຸນຜູ (Qu Yingpu) ຫົວໜ້າບັນນາ ທິການໃຫຍ່ສໍານັກໜັງສືພິມ China Daily ແລະ ພ້ອມດ້ວຍຄະນະຜູ້ແທນສື່ມວນຊົນຈາກ 80 ກວ່າປະເທດ ແລະ ເຂດແຄວ້ນໃນໂລກໃຕ້ ເຂົ້າຮ່ວມ.

ຈຸດປະສົງຂອງກອງປະຊຸມໃນຄັ້ງນີ້, ເພື່ອເຜີຍແຜ່ຜົນການຮ່ວມມືຂອງພັນທະມິດສື່ມວນຊົນອາຊີໃຕ້-ອາຊີຕາເວັນອອກສ່ຽງໃຕ້ ປະຈໍາປີ 2025. ພ້ອມທັງໄດ້ມີພິທີເປີດໂຄງການຮ່ວມມືພັນທະມິດສື່ມວນຊົນທົ່ວໂລກ. ໃນນັ້ນ, ໂຄງການກ່ຽວກັບປະເທດລາວ ປະກອບມີ: ງານວັດທະນະທໍາບຸນກຸດຈີນກ້າວເຂົ້າສູ່ລາວ ແລະ ໄທ ປີ 2025 ພາຍໃຕ້ຫົວຂໍ້: ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ; ໂຄງການຮ່ວມມືປະຈໍາປີ ລະຫວ່າງສູນການສື່ສານສາກົນພາກພື້ນອາຊີໃຕ້-ອາຊີຕາເວັນອອກສ່ຽງໃຕ້ ແຂວງຢຸນນານ ກັບສື່ມວນຊົນຕ່າງໆຂອງລາວ ເຊັ່ນ: ໂຄງ ການລາຍການພາສາມື. ພ້ອມນັ້ນ, ຍັງມີງານພົບປະຕຽນສື ພາຍໃຕ້ຫົວຂໍ້: ການຮຽນຮູ້ ເຊິ່ງກັນ ແລະ ກັນ ພັດທະນາຮ່ວມກັນ; ເວທີສົນທະນາໂຕະມົນ ໃນຫົວຂໍ້: ຂ້າມພູເຂົາ ແລະ ທະເລ, ຈັບມືກັນກ້າວເດີນໄປໜ້າ.

ໂອກາດນີ້, ທ່ານ ຄໍາພັນ ເຜີຍຍະວົງ ໄດ້ມີຄໍາເຫັນໃນກອງປະຊຸມວ່າ: ສື່ມວນຊົນເປັນຂົວຕໍ່ໃນການແລກ ປ່ຽນ, ການຮຽນຮູ້ເຊິ່ງກັນ ແລະ ກັນດ້ານອະລິຍະທໍາ ແລະ ເປັນຂົວຕໍ່ໃນການເພີ່ມທະວີຄວາມເຂົ້າໃຈກັນລະຫວ່າງປະຊາຊົນ. ພັນທະມິດສື່ມວນຊົນອາຊີໃຕ້-ອາຊີຕາເວັນອອກສ່ຽງໃຕ້ ໄດ້ສ້າງເວທີທີ່ສຳຄັນໃຫ້ແກ່ການແລກປ່ຽນດ້ານວັດທະນະທຳ, ການຮ່ວມມືດ້ານສື່ມວນຊົນລະຫວ່າງ ລາວ-ຈີນ ເປັນກົນໄກທີ່ມີປະສິດທິຜົນໃນການຊຸກຍູ້ການຊົມໃຊ້ຂໍ້ມູນຂ່າວສານຮ່ວມກັນ, ການປະສານສົມທົບຊັບພະຍາກອນຮ່ວມກັນ ແລະ ການແລກປ່ຽນບຸກຄະລາກອນຂອງສື່ມວນຊົນໃນພາກພື້ນ. ສື່ມວນຊົນລາວ ໄດ້ຕັ້ງໜ້າຕອບສະໜອງຕໍ່ການສ້າງພັນທະມິດເຊັ່ນ: ໜັງສືພິມປະຊາຊົນ, ສຳນັກຂ່າວສານປະເທດລາວ, ວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ ແລະ ສື່ມວນຊົນອື່ນໆ ກໍແມ່ນສະມາຊິກຂອງພັນທະມິດດັ່ງກ່າວ. ສື່ມວນຊົນລາວ-ຢຸນນານ ໄດ້ສ້າງຮູບແບບການຮ່ວມມືທີ່ມີການປະດິດຄິດສ້າງຢ່າງຕໍ່ເນື່ອງ, ມີເນື້ອໃນຫລາກຫລາຍ ແລະ ມີໝາກຜົນນັບມື້ນັບພົ້ນເດັ່ນ.

ທ່ານ ຄໍາພັນ ເຜີຍຍະວົງ ຍັງໄດ້ກ່າວອີກວ່າ: ໃນອະນາຄົດ, ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ຈະຊຸກຍູ້ ແລະ ສະໜັບສະໜູນສື່ມວນຊົນລາວ ດໍາເນີນການແລກປ່ຽນ ແລະ ຮ່ວມມືກັບສື່ມວນຊົນປະເທດຕ່າງໆ ພາຍໃຕ້ຂອບຂອງພັນທະມິດສື່ມວນຊົນອາຊີໃຕ້-ອາຊີຕາເວັນອອກສ່ຽງໃຕ້ ເປັນຕົ້ນ ຊຸກຍູ້ການແລກ ປ່ຽນບຸກຄະລາກອນ, ຝຶກອົບຮົມ, ສຳມະນາຮ່ວມກັນ ເພື່ອສ້າງໂອກາດໃນການແລກປ່ຽນຄວາມຄິດຄວາມເຫັນ ແລະ ຍົກລະດັບຄວາມສາມາດໃຫ້ແກ່ສື່ມວນຊົນ, ພ້ອມທັງຮ່ວມມືດ້ານເຕັກນິກ, ຮ່ວມກັນຊຸກຍູ້ເຕັກໂນໂລຊີທັນສະໄໝ, ປັນຍາປະດິດ ເພື່ອໃຫ້ເຕັກນິກດັ່ງກ່າວ ເກີດຜົນປະໂຫຍດຕໍ່ສະມາຊິກພັນທະມິດຫລາຍກວ່າເກົ່າ, ເລັ່ງລັດຂະບວນການຫັນເປັນທັນສະໄໝຂອງສື່ມວນຊົນໃນພາກພື້ນ, ເພີ່ມທະວີການຊົມໃຊ້ຊັບພະຍາກອນຮ່ວມກັນ, ສ້າງເວທີສື່ມວນຊົນ, ແຫລ່ງຂໍ້ມູນການເອົາຂ່າວ, ກົນໄກຊົມໃຊ້ຜະລິດຕະພັນສື່ຂ່າວຮ່ວມກັນ ໃຫ້ສົມບູນແບບ ເພື່ອຮ່ວມກັນເລົ່າເລື່ອງລາວ ການພັດທະນາຮ່ວມມືກັນຂອງບັນດາປະເທດໃນພາກພື້ນ, ສະແດງໃຫ້ເຫັນກາລະໂອກາດການຮ່ວມມືໃນພາກພື້ນ ເພື່ອປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກຳຂອງມວນມະນຸດ.

ຂ່າວ-ພາບ: ສຸກທະວີ

ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ສີ ຈິ້ນຜິງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຈີນ ປະທານປະເທດ ແຫ່ງ ສປ ຈີນ, ໃນວັນທີ 3 ກັນຍາ ນີ້ ພະນະທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໄດ້ນໍາພາຄະນະຜູ້ແທນຂັ້ນສູງ ຂອງ ສປປ ລາວ ເຂົ້າຮ່ວມພິທີລະນຶກວັນໄຊຊະນະສົງຄາມຕ້ານຟາຊິດ ຄົບຮອບ 80 ປີ ທີ່ ສະໜາມຫຼວງທຽນອັນເໝິນ ນະຄອນຫຼວງປັກກິ່ງ ສປ ຈີນ.

ສປ ຈີນ ໄດ້ຈັດພິທີລະນຶກວັນໄຊຊະນະສົງຄາມຕ້ານຟາຊິດ ຄົບຮອບ 80 ປີ ຂຶ້ນຢ່າງຍິ່ງໃຫຍ່ ໂດຍມີຈຸດປະສົງເພື່ອຫວນຄືນມູນເຊື້ອອັນພິລະອາດຫານຂອງກອງທັບ ແລະ ປະຊາຊົນຈີນ ຮ່ວມກັບບັນດາປະເທດຕ່າງໆໃນໂລກ ໃນການຕໍ່ສູ້ເພື່ອຕ້ານການຮຸກຮານຂອງຕ່າງປະເທດ ໃນສະໄໝສົງຄາມໂລກ ຄັ້ງທີ 2 ຈົນສາມາດຍາດໄດ້ໄຊຊະນະ, ເສລີພາບ, ເອກະລາດ ແລະ ນຳເອົາຄວາມຜາສຸກມາສູ່ປະເທດຊາດ ກໍຄືປະຊາຊົນຈີນ ແລະ ບັນດາປະເທດຕ່າງໆໃນໂລກ. ໃນພິທີຄັ້ງນີ້ ໄດ້ມີປະມຸກລັດ ແລະ ຜູ້ແທນຂັ້ນສູງຈາກປະເທດຕ່າງໆຫຼາຍກວ່າ 26 ປະເທດ ເຂົ້າຮ່ວມ ເຊັ່ນ: ຣັດເຊຍ, ກູບາ, ສປປ ເກົາຫຼີ, ມົງໂກລີ, ເນປານ, ບັນດາປະເທດໃນຂົງເຂດຕາເວັນອອກກາງ ແລະ ອາຟຣິກາ, ບັນດາປະເທດສະມາຊິກອາຊຽນ ເຊັ່ນ: ສປປ ລາວ, ສສ ຫວຽດນາມ, ອິນໂດເນເຊຍ, ມາເລເຊຍ, ມຽນມາ, ກໍາປູເຈຍ, ສິງກະໂປ, ບຣູໄນ ດາລູຊາລາມ ແລະ ຕີມໍແລັດສະເຕ, ລວມທັງຜູ້ຕາງໜ້າຈາກບັນດາພັກການເມືອງຂອງຕ່າງປະເທດ, ເລຂາທິການໃຫຍ່ອົງການສະຫະປະຊາຊາດ ແລະ ມວນຊົນຈີນ ເຂົ້າຮ່ວມຫຼາຍກວ່າ 50,000 ຄົນ, ພ້ອມທັງໄດ້ຈັດການເດີນສວນສະໜາມຢ່າງຍິ່ງໃຫຍ່ຂອງກອງກໍາລັງເລົ່າຮົບຕ່າງໆ ລວມທັງໝົດ 45 ກ້ອນກໍາລັງ. ພ້ອມນັ້ນ, ພະນະທ່ານ ສີ ຈິ້ນຜິງ ພ້ອມດ້ວຍພັນລະຍາ ຍັງໄດ້ເປັນເຈົ້າພາບຈັດງານລ້ຽງຮັບຮອງໃຫ້ແກ່ຄະນະຜູ້ແທນ ແລະ ການນໍາຂັ້ນສູງຂອງຕ່າງປະເທດທີ່ເຂົ້າຮ່ວມໃນງານຄັ້ງນີ້ຢ່າງສົມກຽດ.

ໄຊຊະນະສົງຄາມຕ້ານຟາດຊິດ ມີຄວາມໝາຍຄວາມສຳຄັນທາງປະຫວັດສາດ ຕໍ່ປະຊາຊົນໃນທົ່ວໂລກທີ່ຮັກຫອມສັນຕິພາບ ແລະ ມີຄວາມປາຖະໜາໃນການພັດທະນາປະເທດຊາດ ໃຫ້ຈະເລີນກ້າວໜ້າ ແລະ ນຳເອົາຄວາມຜາສຸກມາສູ່ປະຊາຊົນ. ໄຊຊະນະດັ່ງກ່າວ ເປັນສັນຍາລັກແຫ່ງສັນຕິພາບ, ອິດສະລະພາບ ແລະ ເປັນການເຕືອນໃຫ້ມວນມະນຸດຮັບຮູ້ເຖິງຜົນຮ້າຍ ແລະ ໄພອັນຕະລາຍ ຈາກສົງຄາມ. ສປປ ລາວ ເປັນປະເທດໜຶ່ງ ທີ່ໄດ້ຮັບຜົນກະທົບຢ່າງໃຫຍ່ຫຼວງຈາກສົງຄາມໃນໄລຍະຜ່ານມາ ແລະ ການເຂົ້າຮ່ວມພິທີດັ່ງກ່າວ ກໍເປັນການສືບຕໍ່ປະຕິບັດນະໂຍບາຍອັນສະເໝີຕົ້ນສະເໝີປາຍ ໃນການຮ່ວມມືກັບປະເທດຕ່າງໆໃນໂລກ ເພື່ອສົ່ງເສີມສັນຕິພາບ ແລະ ການຮ່ວມມືເພື່ອການພັດທະນາ ແນໃສ່ປະກອບສ່ວນສ້າງໃຫ້ພາກພື້ນ ແລະ ສາກົນໃຫ້ມີສັນຕິພາບ ແລະ ຄວາມສະຫງົບສຸກ ແລະ ເຫັນໄດ້ເຖິງຄວາມໂຫດຮ້າຍຂອງສົງຄາມ. ນອກຈາກນີ້, ຍັງເປັນການສືບຕໍ່ເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານໝັ້ນຄົງ ຍາວນານ ຕາມທິດ 4 ດີ ແລະ ການສ້າງຄູ່ຮ່ວມຊາຕາກໍາ ລາວ-ຈີນ, ຈີນ-ລາວໃຫ້ເຂົ້າສູ່ລວງເລິກ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ນັບມື້ນັບຫຼາຍຂື້ນ.

ຂ່າວ: ກຕທ

ໃນເວລາອັນເຊົ້າຕູ່ມີເມກໝອກປົກຄຸມອັນເລັກນ້ອຍພ້ອມດ້ວຍແສງແດດທີ່ກຳລັງສ່ອງປະກາຍລົງຈາກທ້ອງຟ້າສູ່ ນະຄອນປັກກິ່ງ ສປຈີນ, ມວນຊົນກຳລັງເລິ່ມເຄື່ອນຍ້າຍຈາກສະຖານທີຕ່າງໆເຂົ້າສູ່ ນະຄອນປັກກິ່ງ ສປຈີນ ເຊິ່ງມັນເປັນວັນມິດໝາຍອັນພິເສດທີ່ແຕກຕ່າງຈາກວັນທຳມະດາທົ່ວໄປ ຫຼາຍຄົນໃຈຈົດໃຈຈໍ່ລໍຄອຍວັນນີ້, ເຊິ່ງວ່າຕາມແຄມທາງແມ່ນມີການປະດັບປະດາດ້ວຍ ທຸງຊາດສີແດງ ແລະ ປ້າຍໂຄສະນາ 80 ປີ ຕາມອາຄານທີ່ຢູ່ແຄມທາງ ຕາມເສົາໄຟຕ່າງໆ,ຕາມຫ້ອງການເອກະຊົນ ແລະ ຫ້ອງການລັດ ບາງາຳນັກງານ ແມ່ນມີການຕົບແຕ່ງດ້ວຍດອກໄມ້ທີ່ສະແດງເຖິງຄວາມສັນຕິພາບແລະເອກະລາດ ຂອງ ສປຈີນ.

ໃນຄະນະທີ່ກ້າວເຂົ້າໄປໃນງານເຫັນຜູ້ຄົນມາກໜ້າຫລາຍຕາຕ່າງກໍ່ມີສີໜ້າຍິ້ມແຍ້ມແຈ່ມໃສຕ້ອນຮັບແຂກໃກ້ໄກທີ່ເຂົ້າມາຮ່ວມນີ້​ ເຊິ່ງເຮັດໃຫ້ບັນດາແຂກທັງຫລາຍພາກພູມໃຈຕໍ່ການຕ້ອນຮັບແລະເປັນເຈົ້າເພື່ອໃຫ້ຄວາມຊ່ວຍເຫລືອຕໍ່ຜູ້ຄົນ, ງານດັ່ງກ່າວແມ່ນໄດ້ຈັດຂຶ້ນທີ່ຈະຕຸລັດ ທ່ຽນອັ່ນເໝິນ ນະຄອນປັກກິ່ງສປຈີນ.​

ງານສະເຫຼີມສະຫຼອງ 80 ປີ ສປຈີນ ແລະ ຕ້ານຟາດສິດ ໄດ້ຮັບໄຊຊະນະ ຄົບຮອບ 80ປີ ບໍ່ພຽງແຕ່ສະແດງເຖິງການຕໍສູ້ອັນພິລະອາດຫານຂອງວິລະບຸລຸດທີ່ເສຍເລຶອດເນື້ອໃນປາງສົງຄາມເທົ່ານັ້ນ, ແຕ່ຍັງເປັນການສະທ້ອນໃຫ້ເຫັນເຖິງຄວາມຮ່ວມມືທີ່ເປັນຈິດໜຶ່ງໃຈດຽວ ຂອງພະລັງປະຊາຊົນຈີນທີ່ຮ່ວມກັນສ້າງສາພັດທະນາປະເທດຊາດໃຫ້ພົ້ນຈາກຄວາມທຸກຍາກ ແລະ ນຳເອົາຄວາມຈະເລີນຮຸ່ງເຮືອງມາສູ່ປະເທດຂອງຕົນ. ເຊິ່ງບັນຍາກາດໃນງານທີ່ຍິ່ງໃຫຍ່ນີ້ເຕັມໄປດ້ວຍຄວາມຕື່ນເຕັ້ນຂອງພໍ່ແມ່ປະຊາຊົນ,ພໍ່ຄ້າຊາວຂາຍຕະລອດເຖິງພະນັກງານພັກລັດຕ່າງຄົນຕ່າງລໍຄອຍການສະແດງ.

ການເປີດງານດັ່ງກ່າວໂດຍການເດີນສວນສະໜາມຂອງກ້ອນກໍາລັງບັນດາທະຫານເລົ່າຮົບຕ່າງໆ, ເຮັດໃຫ້ບັນຍາກາດດັ່ງກ່າວເຕັມໄປດ້ວຍ ຄວາມຕື່ນເຕັ້ນ ແລະ ຄວາມພາກພູມໃຈ ຕໍ່ມາແມ່ນການສະແດງ ເລົ່າອາວຸດຢຸດໂທປະກອນຕ່າງໆທີ່ໃຊ້ໃນການຕໍ່ສູ້ກູ້ຊາດ ແລະ ປ້ອງການປະເທດເພື່ອບໍ່ໃຫ້ມີການຮຸກຮານຈາກປະເທດອື່ນໆ,

ນອກນັ້ນຍັງມີການສະແດງເຄື່ອງບິນຮົບທາງອາກາດ ແລະ ໄດ້ປ່ອຍນົກພິລາບ 80ພັນໂຕ ເພື່ອສັນຕິພາບ ແລະ ເອກະລາດ ປ່ອຍປຸ່ມເປົ້າ 80ພັນໜ່ວຍ ການສະແດງກ້ອນກຳລັງສະເຫຼີມສະຫຼອງວັນດັ່ງກ່າວ ແມ່ນສະແດງເຖິງຄວາມຍິ່ງໃຫຍ່, ແລະ ຮັກສາປະເທດຊາດເພື່ອປະກາດໃຫ້ທົ່ວທຸກມູມໂລກໄດ້ຮັບຮູ້ແລະເຂົ້າໃຈເຖິງເປັນມາຂອງປະຫວັດສາດຈີນເຊິ່ງເຮັດໃຫ້ຫຼາຍໆຄົນ ບໍ່ວ່າຈະເປັນປະຊາຊົນຈີນ ແລະ ແຂກຕ່າງດ້າວທ້າວຕ່າງແດນ ບັນດາຜູ້ນຳປະເທດຕ່າງທີ່ມາຮ່ວມງານ ລວມທັງບັນດ່າສື່ມວນຊົນຫຼາຍກວ່າ 90 ປະເທດ ຕ່າງກໍປະທັບໃຈ.

ເພື່ອກະກຽມຄວາມພ້ອມ ແລະ ເປັນເອກະພາບທາງດ້ານເຕັກນິກ ຮັບປະກັນໃຫ້ກ້ອນກຳລັງເດີນຂະບວນສວນສະໜາມສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີ (2/12/1975-2/12/2025) ທີ່ຈະມາເຖິງນີ້ໃຫ້ມີບັນຍາກາດຟົດຟື້ນເຂັ້ມແຂງຈົບງາມ.

ສະຫາຍ ພົນຈັດຕະວາ ກົງທອງ ສຸຂະວົງ ຮອງຫົວໜ້າກົມໃຫຍ່ເສນາທິການກອງທັບ ຄະນະຊີ້ນຳກ້ອນກຳລັງສວນສະໜາມສະເຫຼີມສະຫຼອງວັນຊາດ 2 ທັນວາ ຄົບຮອບ 50 ປີ ໄດ້ໃຫ້ສຳພາດວ່າ: ກົມອົບຮົມ ກົມໃຫຍ່ເສນາທິການກອງທັບໄດ້ຮັບມອບໝາຍຮັບຜິດຊອບ ໂດຍໄດ້ສ້າງແຜນການເປີດຊຸດບຳລຸງຄູຝຶກເຕັກນິກຮູບແຖວ ການເດີນສວນສະໜາມສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີເພື່ອຮັບປະກັນໃຫ້ການຈັດຕັ້ງກະກຽມ-ຫັດແອບກໍາລັງເດີນສວນສະໜາມຂອງກໍາລັງປ້ອງກັນຊາດໃຫ້ໄດ້ຕາມຄາດໝາຍແຜນການວາງອອກ ທັງເປັນການເອກະພາບຄືນວິຊາລະບຽບຕໍ່ຄູຝຶກແຕ່ລະກ້ອນສວນສະໜາມໃຫ້ມີຄວາມຮູ້ທາງດ້ານວິຊາສະເພາະ ແລະ ມີຄວາມສາມາດຈັດຕັ້ງສິດສອນໃຫ້ກົມກອງຕົນໄດ້. ໂດຍແນໃສ່ເນື້ອໃນເພື່ອເອກະພາບຄືນດ້ານເຕັກນິກ, ບັນດາຈັງຫວະການກະທໍາ ເລີ່ມແຕ່ບຸກຄົນຈົນເຖິງລວມໝູ່, ລໍາດັບ, ບາດກ້າວໃນການເດີນສວນສະໜາມ ແລະ ລະບຽບທໍານຽມຄູ ເພື່ອອົບຮົມໃຫ້ຄູຝຶກ ແລະ ພະນັກງານວິຊາສະເພາະໃນທົ່ວກອງທັບ, ກຳແໜ້ນດ້ານຫຼັກການ, ການເຄື່ອນເໜັງເຕັກນິກຈັງຫວະຕ່າງໆ ແລະ ຮູ້ສັງເກດແນະນໍາໃນການຈັດຕັ້ງຫັດແອບຢ່າງຖືກຕ້ອງ ແລະ ຄົບຖ້ວນ ທັງເປັນລະບຽບຈົບງາມ.

ສຳລັບກ້ອນກໍາລັງສວນສະໜາມ ຂອງກະຊວງປ້ອງກັນປະເທດລວມມີ 18 ກ້ອນ, ພິເສດມີກຳລັງປ້ອງກັນຄວາມສະຫງົບເຂົ້າຝຶກອົບຮົມນຳ, ພາຍຫຼັງການຝຶກອົບຮົມຄູຝຶກສຳເລັດແລ້ວ ຈະໄດ້ຈັດຕັ້ງຄູຝຶກເຂົ້າໃນບັນດາ 3 ສູນໃຫຍ່ຄື: ກອງພັນຍິງປືນ 199, ວິທະຍາຄານກົມມະດຳ, ວິທະຍາຄານປ້ອງກັນຊາດໄກສອນ ພົມວິຫານ ແລະ ຈັດຕັ້ງລົງບັນດາກົມກອງທີ່ໄດ້ອົບຮົມຫັດແອບພາຍໃນກົມກອງຂອງຕົນ.

ຂ່າວ: ວິທະຍຸກອງທັບ

ງານມະຫະກຳກິລາແຫ່ງຊາດ ຄັ້ງທີ Xll ທີ່ນະຄອນຫຼວງວຽງຈັນ ຮັບກຽດເປັນເຈົ້າພາບ ລະຫວ່າງວັນທີ 15-25 ພະຈິກ 2025 ມີຄວາມຄືບໜ້າຫຼາຍດ້ານ ໂດຍສະເພາະວຽກງານກອງເລຂາ, ສະຖານທີ່ພັກຄະນະນຳ, ຄູຝຶກ ແລະ ທີມນັກກິລາ, ພ້ອມທັງມີການກໍານົດສະເພາະນັກກິລາທີມຊາດ ຫ້າມບໍ່ໃຫ້ຮ່ວມແຂ່ງຂັນ ຈຳນວນ 17 ປະເພດ.

ກອງປະຊຸມຄະນະຮັບຜິດຊອບລະດັບຊາດ ຮ່ວມກັບຄະນະນຳກິລາແຂວງ ແລະ ກະຊວງ ເພື່ອກຽມຄວາມພ້ອມສູ່ງານມະຫະກຳກິລາແຫ່ງຊາດ ຄັ້ງທີ Xll ທີ່ນະຄອນຫຼວງວຽງຈັນ ຮັບກຽດເປັນເຈົ້າພາບຈັດຂຶ້ນໃນວັນທີ 3 ກັນຍາ 2025 ຢູ່ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມຂອງ ທ່ານ ທອງສະລິດ ມັງໜໍ່ເມກ ລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທັງເປັນປະທານຈັດງານມະຫະກໍາກິລາແຫ່ງຊາດ ຄັ້ງທີ XlI, ມີບັນດາເຈົ້າແຂວງ, ຮອງເຈົ້າຄອງ, ຮອງເຈົ້າແຂວງ, ຫົວໜ້າ-ຮອງຫົວໜ້າກົມ, ພະແນກ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ ໄດ້ມີການຜ່ານບັນດາໜ້າວຽກຂອງຄະນະຮັບຜິດຊອບກຳມະການຕ່າງໆ ຂອງງານດັ່ງກ່າວ ແລະ ບາງໜ້າວຽກກໍໄດ້ມີມະຕິຕົກລົງເຫັນດີເປັນເອກະພາບກັນ ໂດຍສະເພາະການກຳນົດເອົາ ສັນຍະລັກ ຫຼື ໂລໂກ້ (LOGO) ແມ່ນພະທາດຫຼວງ, ສັດນໍາໂຊກ ແມ່ນນົກຍຸງ, ເນື້ອໃນຄຳຂວັນປະຈຳງານ, ຮອງຮັບກົດລະບຽບ-ກະຕິກາກິລາແຂ່ງຂັນ 33 ປະເພດ, ສະຖານທີ່ແຂ່ງຂັນ, ທີ່ພັກຄະນະນຳ, ຄູຝຶກ ແລະ ນັກກິລາ.

ສຳລັບຄວາມໝາຍ ຂອງໂລໂກ້ ພະທາດຫຼວງວຽງຈັນ ຊຶ່ງການອອກແບບແມ່ນມີຄວາມໝາຍ, ຄວາມສໍາຄັນ ແລະ ອົງປະກອບຂອງສັນຍະລັກ ງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ຄືການປະສົມປະສານ ແລະ ຫຼອມລວມສັນຍາລັກອັນໂດດເດັ່ນຂອງຊາດ ແລະ ທ້ອງຖິ່ນ ຊຶ່ງມີ 3 ອົງປະກອບຫຼັກຄື: ພະທາດຫຼວງວຽງຈັນ, ສາຍແມ່ນໍ້າຂອງ ແລະ ເນື້ອໃນທີ່ສະແດງເຖິງຄັ້ງໃນການຈັດ ແລະ ຜູ້ທີ່ເປັນເຈົ້າພາບ.

ສ່ວນການອອກແບບ ສັດນໍາໂຊກ ກໍໄດ້ສະແດງເຖິງນົກຍຸງ ທີ່ເຕັມໄປດ້ວຍພະລັງ ແລະ ຄວາມຕັ້ງໝັ້ນ, ຢືນຢ່າງສະຫງ່າຜ່າເຜີຍ, ປີກຂ້າງໜຶ່ງຍົກແຂນຂຶ້ນສູງຢ່າງແຂງແຮງເພື່ອຖື “ທວນໄຟກິລາ” ທີ່ກຳລັງລຸກ, ແປວໄຟສ່ອງແສງເຖິງຈິດວິນຍານແຫ່ງການແຂ່ງຂັນ ແລະ ຄວາມຫວັງ. ໃບໜ້າຂອງນົກສະແດງເຖິງຄວາມມຸ່ງໝັ້ນ ແລະ ພ້ອມທີ່ຈະກ້າວໄປຂ້າງໜ້າ, ທ່າທາງນີ້ ສື່ເຖິງການເລີ່ມຕົ້ນຂອງງານກິລາ, ພະລັງຂອງນັກກິລາ ແລະ ຄວາມພາກພູມໃຈ ໃນການເປັນເຈົ້າພາບ.

ນອກຈາກນັ້ນ, ດ້ານວຽກງານເຕັກນິກຈັດການແຂ່ງຂັນ ກໍໄດ້ມີການຜ່ານກົດລະບຽບການແຂ່ງຂັນ 33 ປະເພດກິລາ; ກຳນົດສະຖານທີ່ຈັດການແຂ່ງຂັນ 33 ປະເພດກິລາ; ສະໜາມ ແລະ ອຸປະກອນຮັບໃຊ້ການແຂ່ງຂັນ; ການຂຶ້ນທະບຽບ, ອອກບັດ ແລະ ລາຍງານຜົນ; ການກະກຽມນາງສາວມອບຫຼຽນລາງວັນ ແລະ ການກຳນົດນັກກິລາທີມຊາດ ແລະ ລາຍການລົງແຂ່ງຂັນຂອງນັກກິລາທີມຊາດ. ໃນນັ້ນ, ປະເພດກິລາທີ່ເປີດກວ້າງ (ບໍ່ຈໍາກັດ) ມີທັງໝົດ 11 ປະເພດ ປະກອບມີ: ເປຕັງ, ປິ່ງປ່ອງ, ເທັນນິດ, ໝາກຂ່າງ, ເຮືອຊ່ວງ, ໜ້າເກັກ, ໝາກເສິກ, ໝາກແລ້, ກັອຟ, ຊັອບເທັນນິດ ແລະ ຍົກນໍ້າໜັກ.

ປະເພດຈໍາກັດນັກກິລາທີມຊາດ ເຂົ້າຮ່ວມແຂ່ງຂັນ ມີທັງໝົດ 17 ປະເພດຄື: ເຕະບານ, ລອຍນໍ້າ, ມວຍລາວ, ມວຍສາກົນ, ກາຣາເຕໂດ, ຢູໂດ, ດອກປີກໄກ່, ປັນຈັກສີລັດ, ເທຄວັນໂດ, ກະຕໍ້-ຊິນລອນ, ຍິງທະນູ, ມວຍປໍ້າ, ວູຊູ, ຣັກບີ້, ສະນຸກເກີ, ເພາະກາຍ ແລະ ກິລາດຶງເຊືອກ. ຂະນະທີ່ປະເພດຈໍາກັດລາຍການ ມີ 7 ປະເພດ ຄື: ບານສົ່ງ, ຍິງປືນ, ອີ-ສະປອດ, ແລ່ນ-ລານ, ດືງເຊືອກ, ບານບ້ວງ ແລະ ກິລາລົດຖີບ. ສ່ວນຄຳຂວັນປະຈຳງານມະຫະກຳກິລາແຫ່ງຊາດ ຄັ້ງນີ້ ແມ່ນ “ສາມັກຄີ ມີວິໄນ ໂປ່ງໃສ ໄດ້ການພັດທະນາ’’.

ວິທະຍຸກະຈາຍສຽງຫວຽດນາມລາຍງານວ່າ: ໃນຕອນບ່າຍວັນທີ 3 ກັນຍາ ຜ່ານມາ ຢູ່ນະຄອນຫຼວງປັກກິ່ງ ປະເທດ ຈີນ, ເນື່ອງໃນໂອກາດເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນໄຊຊະນະຟາດຊິດ ຂອງປະຊາຊົນໂລກ ແລະ ເຮັດວຽກຢູ່ ຈີນ, ທ່ານ ເລືອງເກື່ອງ ປະທານປະເທດ ຫວຽດນາມ ໄດ້ຕ້ອນຮັບ ທ່ານ ໂຣເບິຣດ ຟິໂກ້ນາຍົກລັດຖະມົນຕີ ສະໂລວາກີ.

ໃນການຕ້ອນຮັບ, ທ່ານ ເລືອງເກື່ອງ ສະແດງຄວາມເຄົາລົບຕໍ່ການພົວພັນທີ່ເປັນມູນເຊື້ອ ແລະ ການຮ່ວມມືມິດຕະພາບຢ່າງດີງາມກັບ ສະໂລວາກີ; ທ່ານໄດ້ແບ່ງປັນບັນດາເປົ້າໝາຍການພັດທະນາຂອງ ຫວຽດນາມ, ຊົມເຊີຍ ແລະ ຕີລາຄາສູງການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດທີ່ໄດ້ພັດທະນາຢ່າງຕັ້ງໜ້າໃນໄລຍະຜ່ານມາ.

ສ່ວນທ່ານນາຍົກລັດຖະມົນຕີສະໂລວາກີ ກໍຕີລາຄາສູງທີ່ຕັ້ງ ແລະ ບົດບາດຂອງ ຫວຽດນາມ ຢູ່ພາກພື້ນ.

ການນຳ 2 ທ່ານໄດ້ເຫັນດີພັດທະນາການພົວພັນຢ່າງເລິກເຊິ່ງ, ກວ້າງຂວາງໃນທຸກຂົງເຂດ; ພ້ອມກັນນັ້ນ, ກໍເພີ່ມທະວີການສົມທົບກັນຢ່າງແໜ້ນແຟ້ນໃນການແກ້ໄຂບັນດາບັນຫາພາກພື້ນ ແລະ ສາກົນ.

ກ່ອນໜ້ານັ້ນ, ໃນຕອນເຊົ້າວັນດຽວກັນ, ທ່ານ ເລືອງເກື່ອງ ກໍໄດ້ພົບປະກັບການນຳປະເທດກຳປູເຈຍ, ກູບາ, ສປປ ເກົາຫຼີ, ອິນໂດເນເຊຍ, ມາເລເຊຍ, ຕີມໍແລັດສະເຕ, ມົງໂກນ, ກາຊັກສະຖານ ແລະ ອາແຊກໄບຊານ.

ໃນການພົບປະ, ທ່ານປະທານປະເທດຫວຽດນາມ ໄດ້ສົ່ງຄຳຢື້ຢາມຖາມຂ່າວຂອງທ່ານ ໂຕເລິມ ເລຂາທິການໃຫຍ່ພັກກອມມູນິດ ຫວຽດນາມ ພ້ອມກັບການນຳພັກ, ລັດ ແລະ ປະຊາຊົນ ຫວຽດນາມ ເຖິງການນຳ ແລະ ປະຊາຊົນບັນດາປະເທດ ແລະ ສະແດງຄວາມເຊື່ອໝັ້ນວ່າ ຫວຽດນາມ ແລະ ບັນດາປະເທດຈະສືບຕໍ່ຄຽງບ່າຄຽງໄຫຼ່ ເພື່ອສັນຕິພາບ, ສະຖຽນລະພາບ, ການພັດທະນາ ແລະ ຄວາມວັດທະນາຖາວອນ. ການນຳບັນດາປະເທດກໍອວຍພອນ ຫວຽດນາມ ເນື່ອງໃນໂອກາດ 80 ປີແຫ່ງວັນສະຖາປະນາປະເທດ ສສ ຫວຽດນາມ; ຢືນຢັນການຖືເປັນສຳຄັນການພົວພັນມິດຕະພາບ ແລະ ນ້ຳໃຈອັນດີງາມກັບ ຫວຽດນາມ, ປາຖະໜາຢາກຊຸກຍູ້ການພົວພັນຮ່ວມມືໃນທຸກຂົງເຂດກັບ ຫວຽດນາມ.

ໃນໂອກາດເດີນທາງເຂົ້າຮ່ວມພິທີລະນຶກວັນໄຊຊະນະສົງຄາມຕ້ານຟາດຊິດ ຄົບຮອບ 80 ປີ ແລະ ຢ້ຽມຢາມເຮັດວຽກຢູ່ ສປ ຈີນ ແຕ່ວັນທີ 3-6 ກັນຍາ 2025, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ ໄດ້ພົບປະເຮັດວຽກກັບ ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ທີ່ຫໍສະພາ ປະຊາຊົນຈີນ ໃນຕອນເຊົ້າວັນທີ 4 ກັນຍາ 2025 ໂດຍມີການນໍາຂັ້ນສູງພັກ, ລັດ ຂອງສອງຝ່າຍເຂົ້າຮ່ວມ.

ໃນການພົບປະ, ສະຫາຍ ທອງລຸນ ສີສຸລິດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ສະ ໜິດສະໜົມ ຂອງ ສະຫາຍ ສີ ຈິ້ນຜິງ ແລະ ຊົມເຊີຍຕໍ່ຜົນສໍາເລັດອັນຈົບງາມ ຂອງ ກອງປະຊຸມສຸດຍອດອົງການ ຮ່ວມມືຊຽງໄຮ້ ຄັ້ງທີ 25 ທີ່ ສປ ຈີນ ເປັນເຈົ້າພາບຈັດທີ່ນະຄອນທຽນຈິນ ໃນວັນທີ 31 ສິງຫາ-1 ກັນຍາ 2025, ຜົນສໍາເລັດການຈັດພິທີລະນຶກວັນໄຊຊະນະສົງຄາມຕ້ານຟາດຊິດ ຄົບຮອບ 80 ປີ ຢູ່ນະຄອນຫລວງປັກກິ່ງ ໃນວັນ ທີ 3 ກັນຍາ 2025 ຜ່ານມາ ແລະ ຕີລາຄາສູງຕໍ່ຜົນສໍາເລັດອັນໃຫຍ່ຫລວງ ແລະ ຮອບດ້ານ ທີ່ ພັກ, ລັດ ແລະ ປະຊາຊົນຈີນ ຍາດມາໄດ້ ພາຍໃຕ້ການນໍາພາຂອງພັກກອມມູນິດຈີນ ທີ່ມີ ສະຫາຍ ເລຂາທິການໃຫຍ່, ປະທານປະ ເທດ ສີ ຈິ້ນຜິງ ເປັນແກນກາງ ໂດຍສະເພາະ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XX ຂອງ ພັກກອມມູນິດຈີນ. ພ້ອມນັ້ນ, ຍັງໄດ້ແຈ້ງສະພາບການພົ້ນເດັ່ນພາຍໃນພັກ, ສປປ ລາວ ໃຫ້ຝ່າຍຈີນຊາບ, ສະແດງ ຄວາມຂອບໃຈ ຕໍ່ການສະໜັບສະໜູນຊ່ວຍເຫລືອຂອງພັກ, ລັດຖະບານ ແລະ ປະຊາຊົນຈີນ ຕໍ່ພັກ, ລັດ ແລະ ປະຊາຊົນລາວ ໃນຕະຫລອດໄລຍະຜ່ານມາ; ຢຶນຢັນທັດສະນະຂອງພັກ, ລັດລາວ ໃນການສະໜັບສະໜູນບັນດາ ຂໍ້ລິເລີ່ມ ທີ່ ສະຫາຍ ສີ ຈິ້ນຜິງ ສະເໜີອອກໃນຜ່ານມາ ໂດຍສະເພາະແມ່ນ “ຂໍ້ລິເລີ່ມ ວ່າດ້ວຍການປົກຄອງລັດ ໃນທົ່ວໂລກ” ທີ່ສະເໜີອອກໃນກອງປະຊຸມສຸດຍອດອົງການຮ່ວມມືຊຽງໄຮ້ ຄັ້ງທີ 25 ຜ່ານມາ.

ສະຫາຍ ສີຈິ້ນຜິງ ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ການເຂົ້າຮ່ວມພິທີລະນຶກວັນໄຊຊະນະສົງ ຄາມຕ້ານຟາດຊິດ ຄົບຮອບ 80 ປີ ແລະ ກອງປະຊຸມສຸດຍອດອົງການຮ່ວມມືຊຽງໄຮ້ ຄັ້ງທີ 25 ຂອງຝ່າຍລາວ, ໂດຍສະເພາະແມ່ນ ການຮັບຮອງເອົາ ສປປ ລາວ ເຂົ້າເປັນປະເທດຄູ່ຮ່ວມເຈລະຈາ ຂອງອົງການຮ່ວມມືດັ່ງກ່າວ; ໄດ້ບິແບ່ງບົດຮຽນ ແລະ ຜົນສໍາເລັດອັນພົ້ນເດັ່ນ ຂອງ ພັກ, ລັດຈີນ ໃນການສ້າງສາພັດທະນາປະເທດຊາດ ໃນ ໄລຍະໃໝ່ ຕາມທິດຫັນເປັນທັນສະໄໝ ໃນການສ້າງສັງຄົມນິຍົມທີ່ມີສີສັນພິເສດຂອງຈີນ; ເນັ້ນເຖິງຄວາມສໍາຄັນ ຂອງການນໍາພາຂອງພັກ ໃນພາລະກິດກໍ່ສ້າງສັງຄົມນິຍົມ ເຊິ່ງສອງປະເທດ ລາວ-ຈີນ ຕ້ອງໄດ້ຮ່ວມມືກັນ ໃຫ້ແໜ້ນ ແຟ້ນກວ່າເກົ່າ ໃນຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ຈີນ-ລາວ, ລາວ-ຈີນ ໂດຍສະເພາະ ແມ່ນການລົງເລິກແລກປ່ຽນບົດຮຽນທາງດ້ານທິດສະດີ-ພຶດຕິກໍາ, ວຽກງານກໍ່ສ້າງພັກ-ພະນັກງານ, ການປົກຄອງ ລັດ-ບໍລິຫານປະເທດ, ຊຸກຍູ້ການຮ່ວມມືດ້ານຄວາມໝັ້ນຄົງ, ເສດຖະກິດ, ວັດທະນະທໍາ ແລະ ອື່ນໆ ເພື່ອປະກອບ ສ່ວນແກ່ການພັດທະນາຂອງສອງປະເທດ ໃນໄລຍະໃໝ່.

ສອງຝ່າຍ ຕີລາຄາສູງຕໍ່ໝາກຜົນຂອງການພົວພັນຮ່ວມມື ລາວ-ຈີນ ກໍຄື ການຈັດຕັ້ງປະຕິບັດ ແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ສະບັບທີ 2 ທີ່ນັບມື້ນັບໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີໝາກຜົນທີ່ເປັນຮູບປະທຳ; ສອງຝ່າຍ ຍິນດີຮ່ວມກັນສືບຕໍ່ຮ່ວມມືດ້ານການເມືອງ-ຄວາມໝັ້ນຄົງ ຢ່າງແໜ້ນແຟ້ນ ແລະ ມີຄວາມໄວ້ເນື້ອເຊື່ອໃຈກັນທາງດ້ານການເມືອງ ໃນລະດັບສູງ ເຊິ່ງເປັນພື້ນຖານອັນສໍາຄັນໃນການຊຸກຍູ້ ການພົວພັນຮ່ວມມືດ້ານເສດຖະກິດ-ການຄ້າ ແລະ ດ້ານອື່ນໆ ໃຫ້ຂະຫຍາຍຕົວເຂົ້າສູ່ລວງເລິກ ແລະ ມີໝາກຜົນ ຕົວຈິງມາສູ່ປະຊາຊົນສອງຊາດ; ສອງຝ່າຍ ໄດ້ເຫັນດີເປັນເອກະພາບນຳກັນ ກໍານົດເອົາປີ 2026 ເປັນປີມິດຕະພາບ ລາວ-ຈີນ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ, ກະກຽມສ້າງແຜນ ການຮ່ວມມືໄລຍະ 5 ປີ ສະບັບໃໝ່ ລະຫວ່າງ ພັກ ປປ ລາວ ແລະ ພັກກອມມູນິດຈີນ ແລະ ສືບຕໍ່ຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ເຂົ້າສູ່ລວງເລິກ ດ້ວຍຄຸນນະພາບສູງ, ປະສິດທິຜົນສູງ ແລະ ລະດັບທີ່ສູງກວ່າເກົ່າ; ສືບຕໍ່ປະຕິບັດບັນດາໂຄງການຮ່ວມມືສຳຄັນຂອງສອງຝ່າຍ ໃຫ້ບັນລຸຕາມຄາດໝາຍທີ່ ວາງໄວ້; ສືບຕໍ່ຍົກສູງປະສິດທິພາບຂອງການຮ່ວມມືດ້ານພະລັງງານໄຟຟ້າ, ກະສິກໍາ, ປັນຍາປະດິດ, ການທ່ອງທ່ຽວ ແລະ ອື່ນໆ; ປະສານສົມທົບກັນເພື່ອບຸກທະລຸ ໃນການຈັດຕັ້ງປະຕິບັດໂຄງການຮ່ວມມືຂະໜາດໃຫຍ່ ແລະ ຮ່ວມ ກັນປາບປາມບັນຫາອາຊະຍາກໍາຕ່າງໆ ທີ່ເກີດຂຶ້ນຢ່າງທັນການ. ໃນການພົບປະ, ສອງຝ່າຍຍັງໄດ້ແລກປ່ຽນທັດສະ ນະກ່ຽວກັບສະພາບການພາກພື້ນ ແລະ ສາກົນ ຈໍານວນໜຶ່ງ ທີ່ສອງຝ່າຍມີຄວາມສົນໃຈ.

ພາຍຫລັງສໍາເລັດການພົບປະກັບ ສະຫາຍ ສີ ຈິ້ນຜິງ, ສະຫາຍ ທອງລຸນ ສີສຸລິດ ຍັງໄດ້ພົບປະກັບ ສະຫາຍ ຕິງ ເຊຍສຽງ ກໍາມະການປະຈໍາກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປ ຈີນ ເຊິ່ງສອງຝ່າຍ ໄດ້ແລກປ່ຽນຄໍາຄິດຄໍາເຫັນນໍາກັນ ກ່ຽວກັບການຊຸກຍູ້ ແລະ ເສີມຂະຫຍາຍການພົວພັນຮ່ວມມື ລະຫວ່າງ ສອງ ພັກ, ສອງລັດຖະບານ ແລະ ປະຊາຊົນສອງຊາດ ລາວ-ຈີນ, ຍິນດີສືບຕໍ່ລົງເລິກການຮ່ວມມືສອງຝ່າຍ ເພື່ອນໍາເອົາ ຜົນປະໂຫຍດມາສູ່ປະຊາຊົນສອງຊາດ ໃຫ້ນັບມື້ຫລາຍຂຶ້ນ, ປະກອບສ່ວນເຂົ້າໃນພາລະກິດສັນຕິພາບ, ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

ໃນໄລຍະຢ້ຽມຢາມເຮັດວຽກ ຢູ່ ສປ ຈີນ, ສອງລັດຖະບານ ລາວ-ຈີນ ໄດ້ລົງນາມ “ສັນຍາວ່າດ້ວຍການ ຈັດຕັ້ງປະຕິບັດວຽກງານກວດກາປະຕູດຽວ, ຄັ້ງດຽວ ຢູ່ດ່ານສະຖານີລົດໄຟສາກົນ ລາວ-ຈີນ” ແລະ ເອກະສານ ຮ່ວມມືສອງຝ່າຍ ອີກຈໍານວນໜຶ່ງ.

ຂ່າວ-ພາບ: ກົມການຂ່າວ, ກະຊວງການຕ່າງປະເທດ

ສຳນັກຂ່າວ ຕ່າງປະເທດ ລາຍງານ ຈາກນະຄອນຫລວງ ກາບູນ ປະເທດ ອາຟະການິດສະຖານ ເມື່ອວັນທີ 2 ກັນຍາ ກ່ຽວກັບ ຄວາມຄືບໜ້າ ຫລັງຈາກເກີດ ເຫດແຜ່ນດິນໄຫວ ຢ່າງຄັ້ງຮຸນແຮງ 6,0 ລິກເຕີ ໃນພາກພື້ນທາງຕາເວັນອອກສ່ຽງເໜືອ ຂອງ ອາຟະການິດສະຖານ ເມື່ອວັນທີ 1 ກັນຍາ ຜ່ານມາ ເຮັດໃຫ້ມິຜູ້ເສຍຊີວິດ 800 ກວ່າຄົນ ແລະ ໄດ້ຮັບບາດເຈັບອີກ ຫລາຍກວ່າ 2.500 ຄົນ ຢູ່ແຂວງ ດູນາຣ, ສ່ວນແຂວງນັນກາຣຮາ ຊຶ່ງຢູ່ໃກ້ກັບເຂດແຜ່ນດິນໄຫວ ໃນຄັ້ງນີ້ຫລາຍທີ່ສຸດ ມີຜູ້ເສຍຊີວິດ ຢ່າງໜ້ອຍ 12 ຄົນ ແລະ ບາດເຈັບປະມານ 255 ຄົນ.

ສ່ວນສູນກາງ ຂອງແຜ່ນດິນໄຫວ ໃນຄັ້ງນີ້ ຢູ່ໃນລະດັບຕື້ນພຽງ 8 ກິໂລແມັດ ຈຶ່ງເຮັດໃຫ້ມີໂອກາດ ເກີດຄວາມເສຍຫາຍເປັນວົງກວ້າງ, ຍິ່ງເປັນກວ່ານັ້ນ ພື້ນທີ່ເກີດເຫດ ຢູ່ທ່າມກາງພູ ເປັນພື້ນທີ່ຫ່າງໄກ ແລະ ມີພື້ນຖານໂຄງລ່າງຍໍ່ແຂງແຮງ ເຮັດໃຫ້ຂອບເຂດ ຂອງ ຄວາມເສຍຫາຍ ລຸກລາມໄປຢ່າງຫລາຍ.

ໃນຂະນະທີ່ ທ່ານ ອັນໂຕນິໂອ ກູເຕີຣເຣສ ເລຂາທິການ ສະຫະປະຊາຊາດ (ຢູເອັນ) ປະກາດ ການຈັດສັນງົບປະມານ ຈາກ ກອງທຶນສຸກເສີນ ໃນເບື້ອງຕົ້ນ 5 ລ້ານໂດລາ ສະຫະລັດ ແລະ ຢືນຢັນວ່າ ໜ່ວຍງານທຸກແຫ່ງທີ່ກ່ຽວຂ້ອງ ພວມເລັ່ງ ປະສານງານ ກັບ ໜ່ວຍງານທ້ອງຖິ່ນ ຂອງ ອາຟະການິດສະຖານ ເພື່ອໃຫ້ການສົ່ງມອບ ຄວາມຊ່ວຍເຫລືອ ໃຫ້ແກ່ປະຊາຊົນ ຢ່າງສະດວກ ແລະ ວ່ອງໄວທີ່ສຸດ ເທົ່າທີ່ ຈະເປັນໄປໄດ້./

#ພະຍາກອນອາກາດ ປະຈໍາເຊົ້າວັນທີ 05 ກັນຍາ 2025, ຄວາມກົດດັນຕ່ຳຂອງອາກາດຮ້ອນ ຍັງປົກຄຸມຢູ່ທົ່ວທຸກພາກຂອງປະເທດລາວ. ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ. ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ຈະຕົກໃນລະດັບປານກາງ ຫາ ໜັກຢູ່ບາງທ້ອງຖິ່ນ ແຂວງພາກກາງ ແລະ ພາກໃຕ້ ພ້ອມມີລົມພັດແຮງເປັນບາງໂອກາດ.

ພະຍາກອນອາກາດ ແຕ່ເວລາ 07 ໂມງ ຂອງວັນທີ 05/09/2025 ຫາ ເວລາ 07 ໂມງ ຂອງວັນທີ 06/09/2025

ພາກເໜືອດ້ານຕາເວັນອອກ (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ມີລົມພັດແຮງຢູ່ບາງທ້ອງຖິ່ນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນລະຫວ່າງ 20 – 32 ອົງສາ.

ພາກເໜືອດ້ານຕາເວັນຕົກ (ແຂວງຫລວງນ້ຳທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50% ຂອງພາກ. ອຸນຫະພູມໃນລະຫວ່າງ 23 – 36 ອົງສາ.

ນະຄອນຫລວງວຽງຈັນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ຫລື ເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 26 – 33 ອົງສາ.

ພາກກາງ (ແຂວງວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຫາ ໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 24 – 34 ອົງສາ.

ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງເປັນບາງໂອກາດ ຫລືເນື້ອທີ່ການປົກຫຸ້ມຂອງຝົນເທົ່າກັບ 50%. ອຸນຫະພູມໃນລະຫວ່າງ 20 – 33 ອົງສາ.

ພາກໃຕ້ (ແຂວງສາລະວັນ, ຈໍາປາສັກ, ເຊກອງ ແລະ ອັດຕະປື): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຈະຕົກໃນລະດັບປານກາງ ຫາ ຕົກໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 24 – 34 ອົງສາ.

ສໍາລັບເຂດພູພຽງບໍລະເວນ: ອາກາດເຢັນ, ພ້ອມຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 55%. ອຸນຫະພູມໃນລະຫວ່າງ 14 – 24 ອົງສາ.