ພະຍາກອນອາກາດ ປະຈຳເຊົ້າວັນທີ 10 ກັນຍາ 2025, ຄວາມກົດດັນຕ່ຳຂອງອາກາດຮ້ອນມີກຳລັງອ່ອນ ຫາ ປານກາງ ຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ. ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ຈະມີຝົນຕົກໃນລະດັບປານກາງ ຫາ ຕົກໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດຕື່ມອີກ.ພະຍາກອນອາກາດ ແຕ່ເວລາ 07 ໂມງ ຂອງວັນທີ 10/09/2025 ຫາ ເວລາ 07 ໂມງ ຂອງວັນທີ 11/09/2025

ພາກເໜືອດ້ານຕາເວັນອອກ: (ແຂວງຜົ້ງສາລີ, ຫົວພັນ ແລະ ຊຽງຂວາງ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60% ຂອງພາກ. ອຸນຫະພູມໃນລະຫວ່າງ 16 – 31 ອົງສາ.

ພາກເໜືອດ້ານຕາເວັນຕົກ (ແຂວງຫລວງນ້ຳທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ແລະ ຕົກປານກາງ ຫາ ໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນລະຫວ່າງ 22 – 35 ອົງສາ.

ນະຄອນຫລວງວຽງຈັນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຈະຕົກໜັກຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 24 – 30 ອົງສາ.

ພາກກາງ (ແຂວງວຽງຈັນ, ບໍລິຄຳໄຊ, ຄໍາມ່ວນ ແລະ ສະຫວັນນະເຂດ): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຕົກປານກາງ ຫາ ໜັກຢູ່ບາງທ້ອງຖິ່ນ ພ້ອມມີລົມພັດ ແຮງເປັນບາງໂອກາດ ຫລື ເນື້ອທີ່ການປົກ ຫຸ້ມຂອງຝົນເທົ່າກັບ 75% ຂອງພາກ. ອຸນຫະພູມໃນລະຫວ່າງ 20 – 32 ອົງສາ.

ແຂວງໄຊສົມບູນ: ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຈະຕົກໜັກຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່

ໍ່ການປົກຫຸ້ມຂອງຝົນເທົ່າກັບ 60%. ອຸນຫະພູມໃນລະຫວ່າງ 19 – 31 ອົງສາ.

ພາກໃຕ້ (ແຂວງສາລະວັນ, ຈໍາປາສັກ, ເຊກອງ ແລະ ອັດຕະປື): ຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປ ແລະ ຈະຕົກໃນລະດັບປານກາງ ຫາ ຕົກໜັກຢູ່ບາງທ້ອງຖິ່ນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່

ໍ່ການປົກຫຸ້ມຂອງຝົນເທົ່າກັບ 70% ຂອງພາກ. ອຸນຫະພູມໃນລະຫວ່າງ 24 – 31 ອົງສາ.

ສໍາລັບເຂດພູພຽງບໍລະເວນ: ອາກາດເຢັນ, ພ້ອມຈະມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ແລະ ຕົກໜັກຢູ່ບາງບໍລິເວນ ພ້ອມມີລົມພັດແຮງເປັນບາງໂອກາດ ຫລື ເນື້ອທີ່ການປົກຫຸ້ມຂອງຝົນເທົ່າກັບ 65%. ອຸນຫະພູມໃນລະຫວ່າງ 14 – 27

ອົງສາ.

ເມື່ອບໍ່ດົນມານີ້, ກອງເລຂາ ກົມຄຸ້ມຄອງໂຄງການ ແລະ ການຮ່ວມມືສາກົນສະພາແຫ່ງຊາດລາວ ໂດຍໄດ້ຮັບການສະໜັບສະໜູນຈາກອົງການເພື່ອສຸຂະພາບ ແລະ ຫລຸດຜ່ອນຄວາມທຸກຍາກ Health Poverty Action (HPA), ມະຫາວິທະຍາໄລວິທະຍາສາດສຸຂະພາບ ແລະ ຄູ່ຮ່ວມພັດທະນາ ຈັດສຳມະນາໃນຫົວຂໍ້ “ການສົ່ງເສີມພາລະບົດບາດຂອງສະມາຊິກສະພາແຫ່ງຊາດ ໃນການສ້າງຄວາມປອດໄພທາງດ້ານສາທາລະນາສຸກ ແລະ ຄວາມຈະເລີນກ້າວໜ້າ ໃນ ສປປ ລາວ” ໂດຍການເປັນປະທານຮ່ວມໂດຍ ທ່ານ ບຸນຕາ ເທບພະວົງ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ທ່ານ ດຣ ເທັດ ລີນ ຜູ້ອຳນວຍການອົງການເພື່ອສຸຂະພາບ ແລະ ຫລຸດຜ່ອນຄວາມທຸກຍາກ Health Poverty Action (HPA). ທັງນີ້, ກໍເພື່ອແນ​ໃສ່ການເສີມ​ຂະຫຍາຍ​ບົດບາດ​ຊີ້ນໍາ ແລະ ນຳພາ​ຂອງ​ສະພາ​ແຫ່ງ​ຊາດ​ໃນ​ການຄຸ້ມຄອງຜົນປະໂຫຍດ ໃນຂະແໜງສາທາລະນາສຸກ ​ຂອງ​ປະ​ເທດ​ຊາດ ​ແລະ ຮັບປະກັນ​ທາງດ້ານການເງິນຕໍ່ກັບສຸຂະພາບຂັ້ນພື້ນຖານທີ່ຈໍາເປັນ ແລະ ວຽກງານວັກຊີນປ້ອງກັນພະຍາດ.

ໃນກອງປະຊຸມ ​​ຄະນະກໍາມາທິການດ້ານງົບປະມານ ​ແລະ ຄະນະກໍາມາທິການພັດທະນາ​ສັງຄົມ ​ແລະ ວັດທະນະທຳ ໄດ້ສະແດງໃຫ້ເຫັນຜົນສຳເລັດຂອງ ສປປ ລາວ ໃນການຫລຸດຜ່ອນອັດຕາການເສຍຊີວິດ ຂອງເດັກນ້ອຍຜ່ານໂຄງການສັກຢາກັນພະຍາດແຫ່ງຊາດ, ພ້ອມທັງໄດ້ຍົກເອົາບັນຫາຮີບດ່ວນຕໍ່ກັບສິ່ງທ້າທາຍທີ່ກຳລັງຈະເກີດຂຶ້ນເພື່ອສົນທະນາ: ການປ່ຽນແປງການຊ່ວຍເຫລືອຈາກຜູ້ໃຫ້ທຶນໃນຂະແໜງສາທາລະນາສຸກໃນທົ່ວໂລກ, ພັນທະໃນການລະດົມທຶນພາຍໃນທີ່ເພີ່ມຂຶ້ນ, ຄວາມບໍ່ສະຖຽນນະພາບທາງດ້ານເສດຖະກິດ ແລະ ການລົງທຶນທາງດ້ານສຸຂະພາບທີ່ຍັງຕໍ່າ.

ທ່ານ ໄມຟອງ ມີໄຊ ສະມາຊິກສະພາແຫ່ງຊາດລາວ ແລະ ຄະນະບໍດີ ມະຫາວິທະຍາໄລວິທະຍາສາດສຸຂະພາບ ແຫ່ງຊາດລາວ ໄດ້ກ່າວວ່າ: ກອງປະຊຸມຄັ້ງນີ້, ຈະຊ່ວຍໃຫ້ສະມາຊິກສະພາແຫ່ງຊາດມີຍຸດທະສາດໃນດ້ານງົບປະມານ, ເຄື່ອງມືໃນການຕິດຕາມກວດກາ ແລະ ກົນໄກພາກປະຕິບັດເພື່ອເສີມສ້າງຄວາມຮັບຜິດຊອບໃນການໃຊ້ຈ່າຍງົບປະມານໃນຂະແໜງສາທາລະນະສຸກ ໂດຍການເພີ່ມບົດບາດການກວດສອບຈະເຮັດໃຫ້ມີເປົ້າໝາຍທີ່ດີກວ່າເກົ່າໃນການຄຸ້ມຄອງຊັບພະຍາກອນຂະແໜງສາທາລະນະສຸກ, ປັບປຸງການບໍລິການດ້ານສຸຂະພາບທີ່ຈໍາເປັນຂັ້ນພື້ນຖານ ແລະ ຮັບປະກັນໃຫ້ພົນລະເມືອງລາວທຸກຄົນໄດ້ຮັບຜົນປະໂຫຍດຈາກການບໍລິການສັກຢາກັນພະຍາດທີ່ຈຳເປັນ. ສຸດທ້າຍແລ້ວ, ສະມາຊິກສະພາແຫ່ງຊາດມີຂໍ້ມູນ ແລະ ກຸນແຈສຳຄັນໃນການຂັບເຄື່ອນ ສປປ ລາວ ໃຫ້ທຸກຄົນມີສຸຂະພາບທີ່ດີ ແລະ ຈະເລີນຮຸ່ງເຮືອງຂຶ້ນ.

ໃນເດືອນຕຸລາ ແລະ ເດືອນພະຈິກ ປີ 2025, ຈະມີກອງປະຊຸມທີ່ກ່ຽວຂ້ອງ ອີກ 2 ຄັ້ງ ເພື່ອຊອກຫາທາງເລືອກດ້ານນະໂຍບາຍດ້ານການເງິນໃນການສະໜອງງົບປະມານໃນຂະແໜງສາທາລະນະສຸກ ແລະ ປິດທ້າຍດ້ວຍການສ້າງເຄືອຂ່າຍໃນວຽກງານ ສາທາລະນະສຸກຂອງຂອງສະພາແຫ່ງຊາດ ເຊິ່ງເປັນກົນໄກການປຶກສາຫາລື ແລະ ການຕິດຕາມຄວາມປອດໄພຂອງວຽກງານສາທາລະນະສຸກ. ກອງປະຊຸມຄັ້ງນີ້, ຄາດວ່າຈະເປັນເວທີທີ່ຢັ້ງຢືນໄດ້ໃນການຄຸ້ມຄອງການລົງທຶນດ້ານສຸຂະພາບ ແລະ ສະໜັບສະໜຸນ ສປປ ລາວ ໃຫ້ຫລຸດພົ້ນຈາກສະຖານະພາບປະເທດດ້ອຍພັດທະນາ.

ທ່ານ ດຣ ເທັດ ລີນ ຜູ້ອຳນວຍການ ອົງການເພື່ອສຸຂະພາບ ແລະ ຫລຸດຜ່ອນຄວາມທຸກຍາກ ໄດ້ກ່າວວ່າ: ການມີສ່ວນ ຮ່ວມໃນການປັບປຸງກົນໄກຄວາມຮັບຜິດຊອບ, ສະພາແຫ່ງຊາດລາວສາມາດມີບົດບາດກວດສອບຢ່າງເຂັ້ມງວດຂຶ້ນ ບໍ່ພຽງແຕ່ຮັບປະກັນໃຫ້ກອງທຶນໃນຂະແໜງສາທາລະນະສຸກ ໄດ້ຮັບການຈັດສັນເທົ່ານັ້ນ, ແຕ່ຍັງຖືກນຳໃຊ້ຢ່າງມີປະສິດທິຜົນ ແລະ ເທົ່າທຽມ. ສິ່ງນີ້ຈະນຳໄປສູ່ການປັບປຸງການໃຫ້ບໍລິການດ້ານສາທາລະນະສຸກຂັ້ນພື້ນຖານທີ່ຈໍາເປັນ ແລະ ວັກຊີນກັນພະຍາດ ແລະ ຈະກ້າວໄປສູ່ການປັບປຸງຜົນໄດ້ຮັບດ້ານສຸຂະພາບແຫ່ງຊາດ ແລະ ສ້າງຄວາມເຊື່ອໝັ້ນໃຫ້ແກ່ປະຊາຊົນໃນພາກລັດຖະບານ. ການສະໜອງທຶນທີ່ຄາດຄະເນໄດ້, ພຽງພໍ, ແລະ ຍືນຍົງໃນການສັກຢາວັກຊີນ ແລະ ການເບິ່ງແຍງສຸຂະພາບທີ່ຈໍາເປັນຂັ້ນພື້ນຍັງເປັນບຸລິມະສິດແຫ່ງຊາດ, ສອດຄ່ອງກັບວິໄສທັດຂອງ ສປປ ລາວ ກ່ຽວກັບຄວາມຈະເລີນຮຸ່ງເຮືອງ ແລະ ອຳນາດອະທິປະໄຕ.

ກອງປະຊຸມດັ່ງກ່າວ, ຍັງເປັນການສົ່ງເສີມບັນດາຄໍາໝັ້ນສັນຍາສາກົນ ລ່າສຸດຂອງ ສປປ ລາວ, ລວມທັງຄໍາໝັ້ນສັນຍາຂອງລັດຖະມົນຕີສາທາລະນະສຸກອາຊຽນ ກ່ຽວກັບການສະໜອງທຶນໃຫ້ແກ່ວຽກງານວັກຊີນກັນພະຍາດ ເຊິ່ງຮຽກຮ້ອງໃຫ້ບັນດາປະເທດສະມາຊິກຮັບປະກັນແຫລ່ງຊັບພະຍາກອນພາຍໃນປະເທດແບບຍືນຍົງ ສຳລັບວັກຊີນທີ່ເປັນສ່ວນໜຶ່ງຂອງຄວາມໝັ້ນຄົງດ້ານສຸຂະພາບຢູ່ພາກພື້ນ ແລະ ຄຳຮຽກຮ້ອງຂອງ ສະມາຊິກສະພາແຫ່ງຊາດ ອິສຕັນບູ ໄດ້ໃຫ້ດຳເນີນການຊ່ວຍເຫລືອດ້ານງົບປະມານ, ເຊິ່ງຮຽກຮ້ອງໃຫ້ສະພາເພີ່ມທະວີດ້ານນິຕິກຳ ແລະ ການຄວບຄຸມພະຍາດຕ່າງໆ ເພື່ອຮັບປະກັນວ່າເດັກນ້ອຍທຸກຄົນໄດ້ຮັບການປົກປ້ອງຈາກພະຍາດທີ່ສາມາດປ້ອງກັນໄດ້.

ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໃນ 5 ປີ (2026-2030) ແຂວງເຊກອງ ມີຄວາມຕ້ອງການທຶນເຂົ້າໃນການພັດທະນາພື້ນຖານໂຄງລ່າງ 8.039 ຕື້ກີບ ກວມເອົາ 36% ຂອງຈີດີພີ (ສະເລ່ຍປະມານ 1.608 ຕື້ກີບຕໍ່ປີ) ໃນນີ້, ການລົງທຶນຂອງລັດ 804 ຕື້ກີບ (ສະເລ່ຍ 161 ຕື້ກີບຕໍ່ປີ); ທຶນຊ່ວຍເຫລືອລ້າ ແລະ ກູ້ຢືມ 1.206 ຕື້ກີບ (ສະເລ່ຍ 241 ຕື້ກີບຕໍ່ປີ); ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ 6.029 ຕື້ກີບ (ສະເລ່ຍ 1.206 ຕື້ກີບຕໍ່ປີ).

ທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ ລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກແຂວງເຊກອງ ຄັ້ງທີ XI ເມື່ອບໍ່ດົນມານີ້ວ່າ: ທິດທາງລວມ ແລະ ຄາດໝາຍສູ້ຊົນໃນແຜນພັດທະນາເສດຖະກິດ-ສັງຄົມ 5 ປີ (2026-2030) ຂອງແຂວງເຊກອງ ແມ່ນແຜນທີ່ມີບົດບາດສໍາຄັນ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ມະຕິ XI ຂອງອົງຄະນະພັກແຂວງ ໂດຍຈະສຸມໃສ່ຍົກສູງລະດັບຄຸນນະພາບຊີວິດ ຂອງປະຊາຊົນໃຫ້ສູງຂຶ້ນ, ຮັບປະກັນສະຖຽນລະພາບການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ມີຄວາມສາມັກຄີເປັນປຶກແຜ່ນ ແລະ ພັດທະນາແຂວງໃຫ້ຫລຸດພົ້ນອອກຈາກຄວາມທຸກຍາກ; ເປັນເຈົ້າຕົນເອງ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ; ດໍາເນີນການຄຸ້ມຄອງ-ບໍລິຫານເສດຖະກິດ ຕາມກົນໄກຕະຫລາດທີ່ມີການດັດສົມ ແລະ ຄຸ້ມຄອງຂອງລັດ ເພື່ອພັດທະນາເສດຖະກິດໃຫ້ຂະຫຍາຍຕົວ ແລະ ເຂັ້ມແຂງ; ເອົາໃຈໃສ່ພັດທະນາເສດຖະກິດ, ສັງຄົມ ແລະ ການປົກປັກຮັກສາສິ່ງແວດລ້ອມຢ່າງສົມສ່ວນ ຕາມທິດສີຂຽວ ແລະ ຍືືນຍົງ; ເລັ່ງຈັດຕັັ້ງປະຕິບັດຄໍາສັ່ງນາຍົກລັດຖະມົນຕີ ເລກທີ 02/ນຍ ແລະ 03/ນຍ; ສ້າງສະພາບແວດລ້ອມ ສິ່ງອໍານວຍຄວາມສະດວກ ໃຫ້ແກ່ການດໍາເນີນທຸລະກິດ ໂດຍສະເພາະ ການເຜີຍແຜ່ກ່ຽວກັບການປ່ຽນແປງດ້ານນິຕິກໍາ, ລະບຽບການ ທີ່ຕິດພັນກັັບວຽກງານວິສະຫະກິດ ແລະ ວຽກງານຂໍອະນຸຍາດດໍາເນີນທຸລະກິດ, ປະສານງານກັບຂັ້ນສູນກາງໃນການສ້າງ ແລະ ພັດທະນາລະບົບການຂຶ້ນທະບຽນວິສະຫະກິດ ທາງເອເລັກໂຕຣນິກ ໃຫ້ສໍາເລັດ ແລະ ສາມາດປະຕິບັດໄດ້ ເພື່ອເປັນການຫລຸດຜ່ອນຄ່າໃຊ້ຈ່າຍທີ່ບໍ່ຈໍາເປັນ, ຫລຸດຜ່ອນເວລາ ແນໃສ່ດຶງດູດການລົງທຶນເຂົ້າໃນຂະແໜງບຸລິມະສິດ ໄປຄຽງຄູ່ກັບການສ້າງຄວາມເຊື່ອໝັັ້ນໃຫ້ຜູ້ລົງທຶນ; ສົ່ງເສີມການລົງທຶນຮ່ວມມືພາກລັດ-ເອກະຊົນ ທີ່ມີປະສິດຕິພາບ. ພ້ອມນັັ້ນ, ກໍຄົ້ນຄວ້າປັບປຸງນະໂຍບາຍເອື້ອອໍານວຍ ແລະ ສ້າງແຮງຈູງໃຈ ດ້ວຍການພັດທະນາຂະແໜງການບຸລິມະສິດ, ການເຊື່ອມໂຍງຕ່ອງໂສ້ການຜະລິດພາກພື້ນ ແລະ ສາກົນ ແລະ ຮັບປະກັນການດໍາເນີນທຸລະກິດ ຢ່າງມີຄວາມຮັບຜິດຊອບ; ສ້າງຄວາມກົມກຽວອັດຕາອາກອນ ເພື່ອຊຸກຍູ້ການເກັບລາຍຮັບ ລວມທັງຄວາມສາມາດໃນການຄາດຄະເນລາຍຮັບ ແລະ ອື່ນໆ.

ທ່ານ ຂັນຕີ ສີລະວົງສາ ໃຫ້ຮູ້ຕື່ມວ່າ: ໃນໄລຍະ 5 ປີ (2021-2025) ແຂວງເຊກອງ ສາມາດລະດົມແຫລ່ງທຶນເຂົ້າໃນການພັດທະນາໄດ້ 4.547,40 ຕື້ກີບ ປະຕິບັດໄດ້ລື່ນແຜນ 45,75% (ແຜນ 5 ປີ 3.120 ຕື້ກີບ) ໃນນັ້ນ, ການລົງທຶນຂອງລັດ 384,37 ຕື້ກີບ, ປະຕິບັດໄດ້ລື່ນແຜນ 54,36% (ແຜນ 5 ປີ 249 ຕື້ກີບ), ທຶນຊ່ວຍເຫລືອທາງການ ເພື່ອການພັດທະນາ (ODA) 444,47 ຕື້ກີບ, ປະຕິບັດໄດ້ລື່ນແຜນ 42,45% (ແຜນ 5 ປີ 312 ຕື້ກີບ) ແລະ ການທຶນເອກະຊົນພາຍໃນ ແລະ ຕ່າງປະເທດ (FDI) 3.718,56 ຕື້ກີບ, ປະຕິບັດໄດ້ລື່ນແຜນ 45,14% (ແຜນ 5 ປີ 2.562 ຕື້ກີບ) ໂດຍທຸກໆແຫລ່ງທຶນທີ່ແຂວງລະດົມໄດ້ນັ້ນ ແມ່ນສຸມໃສ່ການພັດທະນາພື້ນຖານໂຄງລ່າງ ແລະ ສ້າງສິ່ງອໍານວຍຄວາມສະດວກ ໃຫ້ແກ່ວຽກງານການຄ້າ, ການລົງທຶນ ແລະ ການບໍລິການດ້ານຕ່າງໆ ເຮັດໃຫ້ເສດຖະກິດ-ສັງຄົມຂະຫຍາຍຕົວ ແລະ ປະຊາຊົນມີຊີວິດການເປັນຢູ່ນັບມື້ດີຂຶ້ນເປັນກ້າວໆ.

ຂ່າວ-ພາບ: ສັນຍາ

ໃນຕອນເຊົ້າຂອງວັນທີ 05 ກັນຍາ 2025 ທີ່ ທໍານຽບຂາວ, ທ່ານ ພູໂຂງ ສີສຸລາດ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ໂດນັນ ທຣຳ, ປະທານາທິບໍດີ ແຫ່ງ ສະຫະລັດ ອາເມລິກາ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະລັດອາເມລິກາ ຄົນໃໝ່, ເຊິ່ງມີສຳນັກງານການທູດຕັ້ງຢູ່ນະຄອນຫຼວງວໍຊິງຕັນ, ດີຊີ (Washington, D.C.)

ໃນໂອກາດດັ່ງກ່າວ, ທ່ານທູດ ພູໂຂງ ສີສຸລາດ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນອັນປະເສີດຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ເຖິງພະນະທ່ານປະທານາທິບໍດີ ໂດນັນ ທຣຳ ກໍ່ຄື ລັດຖະບານ ແລະ ປະຊາຊົນອາເມລິກາ. ພ້ອມກັນນັ້ນ, ທ່ານທູດ ພູໂຂງ ສີສຸລາດ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງ ສປປ ລາວ ພ້ອມທັງໄດ້ສະແດງຄວາມຂອບໃຈອັນຈິງໃຈຕໍ່ການຮ່ວມມື ແລະ ການຊ່ວຍເຫຼືອຂອງລັດຖະບານສະຫະລັດ ອາເມລິກາ ພາຍໃຕ້ຂອບການຮ່ວມມືແບບກວມລວມ ຊຶ່ງຜູ້ນຳຂອງສອງປະເທດໄດ້ລົງນາມຮ່ວມກັນໃນປີ 2016 ເປັນຕົ້ນມາ ກວມເອົາບັນດາຂົງເຂດເປັນຕົ້ນແມ່ນການເກັບກູ້ລະເບີດທີ່ບໍ່ທັນແຕກ, ການສຶກສາ ແລະ ການຝຶກອົບຮົມ, ສາທາລະນະສຸກ, ການບັງຄັບໃຊ້ກົດໝາຍ ແລະ ຂົງເຂດອື່ນໆອີກ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນຊຸມປີຜ່ານມາ, ພ້ອມທັງເປັນການຊຸກຍູ້ສົ່ງເສີມການພົວພັນຮ່ວມມືລາວ-ອາເມລິກາ. ໂດຍເນັ້ນໜັກເຖິງຄວາມສຳຄັນຂອງການພົວພັນລະຫວ່າງສອງປະເທດ ລາວ-ອາເມລິກາ ທີ່ມີສາຍພົວພັນທາງການທູດອັນຍາວນານນຳກັນເປັນເວລາ 70 ປີມາຮອດປັດຈຸບັນ, ທ່ານທູດ ພູໂຂງ ສີສຸລາດ ຍັງໄດ້ຢືນຢັນຄໍາໝາຍໝັ້ນໃນການປະຕິບັດໜ້າທີ່ການທູດຂອງຕົນໃຫ້ດີທີ່ສຸດ ເພື່ອສືບຕໍ່ຮັກສາ, ເສີມຂະຫຍາຍ ແລະ ຮັດແໜ້ນການພົວພັນຮ່ວມມືໃນດ້ານຕ່າງໆ ລະຫວ່າງ ສປປ ລາວ ແລະ ສະຫະລັດ ອາເມລິກາ ໃຫ້ເກີດດອກອອກຜົນ ບົນພື້ນຖານການເຄົາລົບນັບຖືເຊິ່ງກັນ ແລະ ກັນ ແລະເພື່ອຜົນປະໂຫຍດຮ່ວມຂອງປະຊາຊົນສອງປະເທດ.

ໃນຂະນະດຽວກັນ, ປະທານາທິບໍດີ ໂດນັນ ທຣຳ ໄດ້ຕີລາຄາສູງຕໍ່ສາຍພົວພັນການທູດລາວ-ອາເມລິກາຄົບຮອບ 70 ປີ ທີ່ເປັນຂີດຫມາຍສໍາຄັນຂອງການພົວພັນ ແລະ ຮ່ວມມືລະຫວ່າງສອງປະເທດ ພ້ອມທັງສະແດງຄວາມຂອບໃຈຕໍ່ລັດຖະບານລາວທີ່ໄດ້ໃຫ້ການຮ່ວມມືໃນຂົງເຂດຕ່າງໆ ເປັນຕົ້ນແມ່ນການຄົ້ນຫາທະຫານອາເມລິກາທີ່ຫາຍສາບສູນຢູ່ລາວໃນປາງສົງຄາມ, ການແກ້ໄຂບັນຫາຄົນເຂົ້າເມືອງຜິດກົດໝາຍໃນອາເມລິກາ ແລະ ອື່ນໆ. ນອກຈາກນັ້ນ, ປະທານາທິບໍດີ ທຣຳ ຍັງໄດ້ສະແດງຄວາມຊົມເຊີຍຕໍ່ບົດບາດຂອງ ສປປ ລາວ ໃນການເປັນປະທານອາຊຽນໃນປີ 2024 ແລະ ຢືນຢັນຄວາມໝາຍໝັ້ນໃນການເຮັດວຽກຢ່າງໃກ້ຊິດກັບລັດຖະບານລາວ ເພື່ອສືບຕໍ່ສົ່ງເສີມສັນຕິພາບ ແລະ ຄວາມສົມບູນພູນສຸກຂອງສອງປະເທດລາວ-ອາເມລິກາ ກໍ່ຄືໃນທົ່ວອາຊີຕາເວັນອອກສ່ຽງໃຕ້.

ທ່ານ ພູໂຂງ ສີສຸລາດ ດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳສະຫະລັດ ອາເມລິກາ ເປັນຄົນທີ 9 ນັບຕັ້ງແຕ່ປີ 1975 ເປັນຕົ້ນມາ.

ນອກຈາກນີ້, ທ່ານ ພູໂຂງ ສີສຸລາດ ໃນຖານະເປັນເອກອັກຄະລັດຖະທູດແຕ່ງຕັ້ງປະຈຳການາດາ ກໍມີແຜນເດີນທາງໄປການາດາ ໃນອະນາຄົດອັນໃກ້ນີ້ ເພື່ອຍື່ນສານຕາຕັ້ງຕໍ່ຜູ້ສໍາເລັດຣາຊະການ ແຫ່ງ ການາດາ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ການາດາ ໂດຍມີສຳນັກງານການທູດຕັ້ງຢູ່ນະຄອນຫຼວງວໍຊິງຕັນ, ດີຊີ, ສະຫະລັດ ອາເມລິກາ.

ຂ່າວ-ພາບ : ກົມການຂ່າວ, ກະຊວງການຕ່າງປະເທດ

ເມື່ອບໍ່ດົນມານີ້ ບໍລິສັດ ໄຊຍະບູລີ ພາວເວີ ຈໍາກັດ ຜູ້ດໍາເນີນການໂຮງໄຟຟ້າພະລັງນ້ໍາໄຊຍະບູລີ ໄດ້ຮັບມອບຫຼຽນໄຊແຮງງານ ລະດັບ 2 ແລະ ໃບຍ້ອງຍໍເຊີດຊູກຽດຈາກກະຊວງອຸດສາຫະກຳ ແລະ ການຄ້າ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ໃນຖານະອົງກອນທີ່ມີຜົນງານໂດດເດັ່ນດ້ານການພັດທະນາ ໂຮງໄຟຟ້າພະລັງນໍ້າ ໄຊຍະບູລີ ຕາມມາດຕະຖານສາກົນ ໂດຍມີ ທ່ານ ວໍລະພົດ ອຸຊຸໄພບູນວົງ ກຳມະການຜູ້ຈັດການ ບໍລິສັດ ໄຊຍະບູລີ ພາວເວີ ຈຳກັດ ຮັບມອບ ຈາກ ທ່ານ ຈັນສະແຫວງ ບຸນຍົງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ສປປ ລາວ ທີ່ຫ້ອງປະຊຸມໃຫຍ່ ລັດວິສາຫະກິດ ໄຟຟ້າລາວ ນະຄອນຫຼວງວຽງຈັນ

ທ່ານ ວໍລະພົດ ອຸຊຸໄພບູນວົງ ກ່າວວ່າ: ຕະຫຼອດໄລຍະເວລາການພັດທະນາ ແລະ ກໍ່ສ້າງ ລວມເຖິງການດໍາເນີນງານທາງການຄ້າໂຮງໄຟຟ້າພະລັງນໍ້າໄຊຍະບູລີ ມຸ່ງຍົກລະດັບມາດຕະຖານການຜະລິດໄຟຟ້າພະລັງນ້ຳ ໃຫ້ເປັນຕົ້ນແບບຂອງພາກພື້ນ ທັງດ້ານສິ່ງແວດລ້ອມ, ສັງຄົມ, ເສດຖະກິດ ແລະ ຖືກຕ້ອງຕາມຫຼັກການສາກົນ (ESG) ລາງວັນໃນຄັ້ງນີ້ຖືເປັນກຽດ ແລະ ກໍາລັງໃຈທີ່ລັດຖະບານລາວມອບໃຫ້ ແລະ ສະທ້ອນເຖິງການດຳເນີນງານທີ່ມຸ່ງໝັ້ນສູ່ຄວາມຍືນຍົງ

ໂຮງໄຟຟ້າພະລັງນໍ້າ ໄຊຍະບູລີ ເປັນໂຮງໄຟຟ້າປະເພດນໍ້າໄຫຼຜ່ານ (Run-of-River) ເທິງແມ່ນໍ້າຂອງ ໃຊ້ພະລັງງານຈາກການໄຫຼຂອງນໍ້າຕາມທໍາມະຊາດ ບໍ່ມີການກັກເກັບນໍ້າໃນການຜະລິດໄຟຟ້າ ມີກໍາລັງຜະລິດຕິດຕັ້ງ 1,285 ເມກະວັດ ເລີ່ມດໍາເນີນການທາງການຄ້າ ຕັ້ງແຕ່ວັນທີ 29 ຕຸລາ 2019 ສາມາດຜະລິດກະແສໄຟຟ້າຈາກພະລັງນ້ໍາສະເລ່ຍໄດ້ຫຼາຍກວ່າ 7,400 ກິກະວັດຊົ່ວໂມງຕໍ່ປີ ເຊິ່ງນັບເປັນພະລັງງານສະອາດຈາກແຫຼ່ງພະລັງງານໝຸນວຽນ ສາມາດຫຼີກລ່ຽງການປ່ອຍກ໊າສເຮືອນແກ້ວໄດ້ເຖິງ 3 ລ້ານໂຕນ ກ໊າສກາກໂບນິກທຽບເທົ່າຕໍ່ປີ ຊ່ວຍເສີມສ້າງຄວາມໝັ້ນຄົງດ້ານພະລັງງານໃຫ້ແກ່ ສປປ ລາວ ແລະ ສົ່ງຕໍ່ພະລັງງານສະອາດສູ່ປະເທດເພື່ອນບ້ານ

ພ້ອມກັນນີ້ ໂຮງໄຟຟ້າພະລັງນໍ້າໄຊຍະບູລີ ໃຊ້ເຕັກໂນໂລຊີທີ່ທັນສະໄໝເພື່ອຮັກສາຄວາມສົມດູນຂອງລະບົບນິເວດ ເຊັ່ນ: ລະບົບທາງປາຜ່ານແບບປະສົມປະສານ ທີເອື້ອໃຫ້ປາ 143 ສາຍພັນ ສາມາດລອຍຂຶ້ນລົງແມ່ນ້ຳຂອງຜ່ານໂຮງໄຟຟ້າໄດ້ຢ່າງປອດໄພ ລວມທັງເປັນໂຮງໄຟຟ້າພະລັງນໍ້າແຫ່ງທຳອິດຂອງແມ່ນໍ້າຂອງ ທີ່ຕິດຕັ້ງປະຕູລະບາຍຕະກອນໜັກ 4 ບານ ແລະ ຕະກອນເບົາ 7 ບານ ແລະ ສ້າງຊ່ອງທາງສັນຈອນເຮືອ ທີ່ຮອງຮັບເຮືອຂະໜາດໃຫຍ່ 500 ໂຕນ ໄດ້ພ້ອມກັນ 2 ລຳ ເພື່ອອຳນວຍຄວາມສະດວກໃນການສັນຈອນທາງນ້ຳຕະຫຼອດທັງປີຖືເປັນຕົ້ນແບບໂຮງໄຟຟ້າພະລັງນໍ້າທີ່ສອດຄ່ອງກັບແນວທາງການພັັດທະນາຢ່າງຍືນຍົງຂອງພາກພື້ນແມ່ນໍ້າຂອງ

ໃນມິຕິດ້ານສັງຄົມ ໂຮງໄຟຟ້າພະລັງນໍ້າ ໄຊຍະບູລີ ຍັງໃຫ້ຄວາມສໍາຄັນກັບການພັດທະນາຄຸນນະພາບຊີວິວຊຸມຊົນອ້ອມຂ້າງໂຮງໄຟຟ້າ ທັງການຈັດສັນທີ່ດິນພ້ອມພື້ນຖານໂຄງລ່າງ ພັດທະນາທັກສະອາຊີບໃຫ້ແກ່ຊາວບ້ານ 3,063 ຄົນ ຫຼື 612 ຄົວເຮືອນ ໃນ 15 ໝູ່ບ້ານ ລວມເຖິງການສົ່ງເສີມການຈ້າງງານບຸກຄະລາກອນທ້ອງຖິ່ນ ໂດຍມີພະນັກງານຄົນລາວທັງໝົດ 123 ຄົນ, ຄິດເອົາ 62% ຂອງຈໍານວນພະນັກງານທັງໝົດ

ການໄດ້ຮັບຫຼຽນໄຊແຮງງານໃນຄັ້ງນີ້ ບໍ່ພຽງຕອກຍໍ້ຳເຖິງສັກກະຍະພາບຂອງໂຮງໄຟຟ້າພະລັງນ້ຳ ໄຊຍະບູລີ ໃນຖານະຕົ້ນແບບໂຮງໄຟຟ້າພະລັງນ້ຳປະເພດນໍ້າໄຫຼຜ່ານມາດຕະຖານສາກົນ ແຕ່ຍັງຕອກຍໍ້າເຖິງບົດບາດຂອງໂຮງໄຟຟ້າພະລັງນໍ້າໄຊຍະບູລີ ໃນການເບິ່ງແຍງສິ່ງແວດລ້ອມ ແລະ ການພັດທະນາສັງຄົມຊຸມຊົນໃນ ສປປ ລາວ ຢ່າງແທ້ຈິງ.

(ນະຄອນຫຼວງວຽງຈັນ, ວັນທີ 8 ກັນຍາ 2025) – ເຊີນຊວນນັກທ່ອງທ່ຽວໃຫ້ສະເຫຼີມສະຫຼອງວັນຄູ່ 9/9 ກັບສາຍການບິນ Vietjet ດ້ວຍໂປຣໂມຊັນປີ້ຍົນລາຄາຫຼຸດ 99% ສໍາລັບຄ່າປີ້ພື້ນຖານໃນທຸກໆເສັ້ນທາງ, ລວມທັງເສັ້ນທາງນະຄອນຫຼວງວຽງຈັນ-ນະຄອນໂຮ່ຈີມິນ. ຜູ້ໂດຍສານຍັງຈະໄດ້ຮັບສິດຟຣີກະເປົາສຳລັບໂຫຼດໃຕ້ທ້ອງເຄື່ອງໜັກ 20 ກິໂລກຣາມ, ເຮັດໃຫ້ການຈັດກະເປົາສຳລັບການເດີນທາງຄັ້ງຕໍ່ໄປງ່າຍຂຶ້ນ.

ນັບແຕ່ເວລາ 00:00 ໂມງ ເຖິງ 23:00 ໂມງ ຂອງວັນທີ 9 ກັນຍາ 2025 (GMT+7), ນັກເດີນທາງສາມາດໃສ່ລະຫັດໂປຣໂມຊັນ SUPERSALE99 ເມື່ອຈອງປີ້ຍົນຜ່ານເວັບໄຊທ໌ www.vietjetair.com ຫຼື ແອັບພລິເຄຊັນມືຖື Vietjet Air ເພື່ອຮັບປີ້ຍົນປະເພດ Eco ໃນລາຄາຫຼຸດ 99% (ຍົກເວັ້ນຄ່າທຳນຽມ ແລະ ພາສີ). ໂປຣໂມຊັນນີ້ໃຊ້ໄດ້ກັບທຸກເສັ້ນທາງບິນຂອງສາຍການບິນ Vietjet ສໍາລັບການເດີນທາງລະຫວ່າງວັນທີ 1 ຕຸລາ 2025 ຫາ ວັນທີ 27 ພຶດສະພາ 2026 (ໄລຍະເວລາເດີນທາງອາດແຕກຕ່າງກັນໄປຕາມແຕ່ລະເສັ້ນທາງ ແລະ ອາດມີໄລຍະເວລາຫ້າມເດີນທາງ).

ໂປຣໂມຊັນສ່ວນຫຼຸດຍັງບໍ່ທັນໝົດພຽງເທົ່ານີ້! ນັບແຕ່ວັນທີ 10 ຫາ ວັນທີ 23 ກັນຍາ 2025, ຜູ້ໂດຍສານທີ່ຈອງປີ້ຍົນປະເພດ Eco ສໍາລັບຖ້ຽວບິນນະຄອນຫຼວງວຽງຈັນ-ນະຄອນໂຮ່ຈີມິນ ທີ່ມີກຳນົດອອກເດີນທາງລະຫວ່າງວັນທີ 1 ຕຸລາ ຫາ ວັນທີ 15 ພະຈິກ 2025, ກໍຈະໄດ້ຮັບສິດຟຣີກະເປົາສຳລັບໂຫຼດໃຕ້ທ້ອງເຄື່ອງໜັກ 20 ກິໂລກຣາມ. ທ່ານພຽງແຕ່ກົດເລືອກຕົວເລືອກ 20kg ໃນຂະນະທີ່ຈອງປີ້ ໂດຍບໍ່ມີຄ່າໃຊ້ຈ່າຍເພີ່ມເຕີມ (ສຳລັບລາຍລະອຽດ, ເບິ່ງເງື່ອນໄຂແລະຂໍ້ກຳນົດ) ແລະ ເພີດເພີນກັບການເດີນທາງແບບໝົດຫ່ວງ ຕະຫຼອດໄລຍະການສະເຫຼີມສະຫຼອງ. ໂປຣໂມຊັນກະເປົານີ້ຍັງໃຊ້ໄດ້ກັບເສັ້ນທາງສາກົນອື່ນໆລວມໄປ-ກັບປະເທດຫວຽດນາມ, ໂດຍມີວັນເດີນທາງທີ່ແຕກຕ່າງກັນໄປຕາມແຕ່ລະເສັ້ນທາງ.

ປີນີ້, ສາຍການບິນ Vietjet ຂໍເຊີນຊວນນັກທ່ອງທ່ຽວທົ່ວໂລກມາຄົ້ນພົບງານມະຫະກຳທີ່ໜ້າປະທັບໃຈແລະການສະເຫຼີມສະຫຼອງວັດທະນະທຳຕ່າງໆໃນປະເທດຫວຽດນາມ ແລະ ທົ່ວໂລກ. ຈາກງານສະເຫລີມສະຫລອງກາງເດືອນສິງຫາທີ່ໜ້າຫຼົງໄຫຼ, ເຊິ່ງຕາມຖະໜົນຕ່າງໆຈະເຕັມໄປດ້ວຍໂຄມໄຟທີ່ມີສີສັນ, ເຂົ້າໜົມໄຫວ້ພະຈັນ ແລະ ການເຕົ້າໂຮມຂອງຄອບຄົວ, ຈົນເຖິງງານບຸນທ້າຍປີທີ່ຄຶກຄື້ນ, ປະເທດຫວຽດນາມ ສະເໜີປະສົບການທາງວັດທະນະທຳທີ່ໜ້າຈົດຈຳສຳລັບນັກທ່ອງທ່ຽວທຸກຄົນ. ນັກເດີນທາງຍັງສາມາດເພີດເພີນກັບການສະເຫຼີມສະຫຼອງທາງວັດທະນະທຳທົ່ວທະວີບອາຊີ ແລະ ບ່ອນອື່ນໆອີກ, ຕັ້ງແຕ່ບຸນ Diwali ຂອງອິນເດຍ ແລະ Chuseok ຂອງເກົາຫຼີ ຈົນເຖິງ Tsukimi ຂອງຍີ່ປຸ່ນ, ລອຍກະທົງຂອງປະເທດໄທ ແລະ Brisbane Festival ຂອງອົດສະຕາລີ.

ເທິງເຮືອບິນ, ຜູ້ໂດຍສານຍັງສາມາດເພີດເພີນກັບຖ້ຽວບິນພິເສດໃນຊ່ວງກາງເດືອນສິງຫາຂອງສາຍການບິນ Vietjet ໃນວັນທີ່ກຳນົດ, ເຊິ່ງມີການຕົກແຕ່ງດ້ວຍໂຄມໄຟ, ການສະແດງເທິງເຄື່ອງບິນ ແລະ ຂອງຂວັນທີ່ຄິດຢ່າງພິຖີພິຖັນເພື່ອແບ່ງປັນກັບຄົນທີ່ທ່ານຮັກ, ນຳເອົາປະເພນີຂອງຫວຽດນາມສູ່ທ້ອງຟ້າ.

ຈອງປີ້ຂອງທ່ານຕອນນີ້ ແລະ ເພີດເພີນກັບການບິນກັບສາຍການບິນ Vietjet!

ໃນວັນທີ 7 ກັນຍາ 2025 ນີ້, ສະຫາຍ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະ ທານສະມາຄົມມິດຕະພາບ ລາວ-ກູບາ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະ ນະລັດ ກູບາ ໃນໂອກາດເດີນທາງມາຢ້ຽມຢາມລັດຖະກິດ ຢູ່ ສປປ ລາວ ໃນລະຫວ່າງວັນທີ 6-7 ກັນຍາ 2025, ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງສອງປະເທດ ລາວ-ກູບາ ໃຫ້ແໜ້ນແຟ້ນຍິ່ງໆຂຶ້ນ.

ໂອກາດນີ້, ສະຫາຍ ຈະເລີນ ເຍຍປາວເຮີ ໄດ້ຕີລາຄາສູງ ຕໍ່ການມາຢ້ຽມຢາມ ສປປ ລາວຂອງ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ພ້ອມດ້ວຍຄະນະ ເຊິ່ງເປັນການປະກອບສ່ວນອັນສໍາຄັນທີ່ສຸດໃນການເສີມຂະຫຍາຍ ຮັດແໜ້ນສາຍພົວພັນມິດຕະພາບອັນເປັນມູນເຊື້ອຂອງສອງພັກ, ສອງລັດ ແລະ ປະຊາຊົນສອງຊາດລາວ ລາວ-ກູບາ ໃຫ້ນັບມື້ຂະຫຍາຍຕົວ ແລະ ກ້າວເຂົ້າສູ່ລວງເລິກ ຢ່າງບໍ່ຢຸດຢັ້ງ. ພ້ອມທັງຕີລາຄາສູງຕໍ່ການນໍາພາຂອງພັກກອມມູນິດ ກູບາ ໃນການນໍາພາປະຊາຊົນກູບາ ປົກປັກຮັກສາ ແລະ ເສີມຂະຫຍາຍໝາກຜົນຂອງການປະຕິວັດກູບາ ແລະ ນໍາພາສ້າງສາພັດທະນາປະເທດ ຢ່າງຕໍ່ເນື່ອງ. ປະຊາຊົນລາວ ມີຄວາມປິຕິຍິນດີ ແລະ ພາກພູມໃຈ ທີ່ເຫັນສາຍພົວພັນຮ່ວມມື ລາວ-ກູບາ ໄດ້ຮັບການເສີມຂະຫຍາຍ ຢ່າງຕໍ່ເນື່ອງ ແລະ ໄດ້ຮັບການພັດທະນາ ຢ່າງບໍ່ຢຸດ ຢັ້ງ, ສະແດງອອກໃນການແລກປ່ຽນ ຢ້ຽມຢາມການນໍາຂັ້ນສູງ ຂອງ ສອງປະເທດ ເຖິງແມ່ນວ່າຈະຢູ່ຫ່າງໄກກັນຄົນລະທະວີບກໍຕາມ ແຕ່ຍັງໄປມາຫາສູ່ກັນປົກກະຕິ, ສະແດງໃຫ້ເຫັນ ເຖິງສາຍພົວພັນມິດຕະພາບອັນເປັນມູນເຊື້ອຂອງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ ໃຫ້ນັບມື້ໄດ້ຮັບການເສີມຂະຫຍາຍໃຫ້ເຂົ້າສູ່ລວງເລິກ ຢ່າງບໍ່ຢຸດຢັ້ງ. ພ້ອມນີ້, ສະຫາຍ ຈະເລີນ ເຍຍປາວເຮີ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ພັກ, ລັດ ແລະ ປະຊາຊົນ ກູບາ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງລໍ້າຄ່າ ແລະ ຈິງໃຈ ຕໍ່ພັກ, ລັດ ແລະ ປະຊາຊົນລາວ ໃນພາລະກິດຕໍ່ສູ້ກູ້ຊາດ ໃນເມື່ອກ່ອນ ກໍຄື ໄລຍະປົກປັກຮັກສາປະເທດຊາດໃນປັດຈຸບັນ. ພ້ອມທັງ ລາຍງານການພົວພັນຮ່ວມມື ລະຫວ່າງ ສະມາຄົມມິດຕະພາບ ລາວ-ກູບາ, ກູບາ-ລາວ ແລະ ການເຄື່ອນໄຫວຂອງສະມາຄົມມິດຕະພາບ ລາວ-ກູບາ ໃນໄລຍະຜ່ານມາ ໂດຍຫຍໍ້ ໃຫ້ທ່ານປະທານປະເທດ ກູບາ ຮັບຊາບ.

ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ສະຫາຍ ຈະເລີນ ເຍຍປາວເຮີ ທີ່ໄດ້ນໍາພາຄະນະ ເຂົ້າຢ້ຽມຂໍ່ານັບໃນຄັ້ງນີ້, ພ້ອມທັງຕີລາຄາສູງຕໍ່ການຮ່ວມມືຮອບດ້ານ ລະຫວ່າງ ສ ກູບາ ແລະ ສປປ ລາວ ໂດຍສະເພາະ ການພົວພັນຮ່ວມມື ລະຫວ່າງ ສະມາຄົມມິດຕະພາບກູບາ-ລາວ, ລາວ-ກູບາ ໃນໄລຍະຜ່ານມາ ເຊິ່ງມີຜົນສຳເລັດໃນຫລາຍດ້ານ. ສອງສະມາຄົມ ກູບາ-ລາວ, ລາວ-ກູບາ ໄດ້ມີກົນໄກການປະສານງານ, ພົບປະແລກປ່ຽນ, ໄປມາຫາສູ່, ມີການປະສານສົມທົບ ແລະ ຊ່ວຍເຫລືອເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.

ຂ່າວ: ທະນູທອງ

ໃນຕອນເຊົ້າຂອງວັນທີ 7 ກັນຍາ 2025, ທີ່ ສໍານັກງານນາຍົກລັດຖະມົນຕີ, ສະຫາຍ ສອນໄຊ ສີພັນດອນ, ນາຍົກ ລັດຖະມົນຕີ ແຫ່ງ ສປປ ລາວ ໄດ້ພົບປະກັບ ສະ​ຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌, ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສ. ກູບາ, ໃນໂອກາດເດີນທາງມາຢ້ຽມຢາມລັດຖະກິດ ທີ່ ສປປ ລາວ ໃນວັນທີ 6-7 ກັນຍາ 2025.

ໃນໂອກາດນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ມີຄວາມປິຕິຍິນດີເປັນຢ່າງຍິ່ງ ທີ່ໄດ້ພົບປະເຮັດວຽກກັບ ສະ​ຫາຍ ​ ມີເກນ ດີເອັດຊ໌-ກາແນນ ເບີຣມູເດັດຊ໌, ພ້ອມທັງໄດ້ຕີລາຄາສູງ ຕໍ່ການເດີນທາງມາຢ້ຽມຢາມລັດຖະກິດ ທີ່ ສປປ ລາວ ໃນຄັ້ງນີ້, ເຊິ່ງເປັນການຢ້ຽມຢາມ ສປປ ລາວ ຄັ້ງທີ 3 ແລະ ຖືເປັນນິມິດໝາຍອັນສໍາຄັນໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ແລະ ຄວາມສາມັກຄີຖານອ້າຍນ້ອງ ລະຫວ່າງ ສອງພັກ, ສອງລັດ ແລະ ສອງປະເທດ. ພ້ອມດຽວກັນນີ້, ສະຫາຍ ນາຍົກລັດ ຖະມົນຕີ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ຜົນຂອງການພົບປະ ລະຫວ່າງ ສອງຜູ້ນໍາ ລາວ ແລະ ກູບາ ອັນເປັນການຢໍ້າຄືນອີກເທື່ອໜຶ່ງ ເຖິງສາຍພົວພັນທີ່ດີ ແລະ ຄວາມຈິງໃຈຕໍ່ກັນ ລະຫວ່າງພັກ, ລັດ ແລະ ການນໍາສູງສຸດຂອງສອງປະເທດ, ພ້ອມທັງໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຮູ້ບຸນຄຸນ ຕໍ່ການຊ່ວຍເຫຼືອອັນລໍ້າຄ່າຂອງ ສ. ກູບາ ໃນຂົງເຂດຕ່າງໆ ໂດຍສະເພາະແມ່ນຂົງເຂດການສຶກສາ, ກິລາ ແລະ ສາທາລະນະສຸກ.

ສອງຝ່າຍ ໄດ້ແຈ້ງສະພາບການພັດທະນາເສດຖະກິດ-ສັງຄົມໂດຍຫຍໍ້ໃຫ້ກັນຊາບ ພ້ອມທັງໄດ້ສະແດງຄວາມຊົມ ເຊີຍຕໍ່ບັນດາຜົນສໍາເລັດ ທີ່ສອງປະເທດຍາດມາໄດ້ໃນໄລຍະຜ່ານມາ. ສອງຝ່າຍໄດ້ຕີລາຄາສູງ ຕໍ່ສາຍພົວພັນທີ່ມີມູນເຊື້ອຖານເພື່ອນມິດຍຸດທະສາດ ລະຫວ່າງ ລາວ-ກູບາ, ການນໍາພັກ-ລັດ ຂອງສອງປະເທດ ມີຄວາມສະໜິດ​ສະໜົມ, ມີຄວາມເຂົ້າອົກເຂົ້າໃຈ ແລະ ເຊື່ອໝັ້ນຕໍ່ກັນ ແລະ ກັນ ໃນການສືບ​ຕໍ່ພາລະກິດ​ສ້າງສັງຄົມນິຍົມຮ່ວມກັນ, ເຊິ່ງໄດ້ສະແດງອອກຢ່າງຈະແຈ້ງໃນການແລກ​ປ່ຽນ​ຄະນະ​ຜູ້ແທນ ກໍຄື ການພົບປະປຶກສາຫາລືກັນໃນເວທີຕ່າງໆ, ລວມທັງສອງຝ່າຍ ແລະ ຫຼາຍຝ່າຍ. ພ້ອມກັນນັ້ນ, ສອງຝ່າຍໄດ້ເຫັນດີຈະສືບຕໍ່ເສີມຂະຫຍາຍການຮ່ວມມືໃນຂົງເຂດທີ່ມີຢູ່ແລ້ວ ເປັນຕົ້ນ ການສຶກສາ, ກິລາ, ສາທາລະນະສຸກ ແລະ ກະສິກໍາ ໃຫ້ມີປະສິດທິຜົນຍິ່ງໆຂຶ້ນ, ພ້ອມທັງສືບຕໍ່ຂະຫຍາຍການຮ່ວມມືໃນຂົງເຂດອື່ນໆອີກ ທີ່ສອງຝ່າຍມີທ່າແຮງຮ່ວມກັນ ເພື່ອນໍາເອົາຜົນປະໂຫຍດສູງສຸດມາສູ່ສອງປະເທດ.

ໃນຂະນະດຽວກັນ, ສະ​ຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌, ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສ. ກູບາ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ຊຸກຍູ້ໃຫ້ສອງນາຍົກລັດຖະມົນຕີ ກູບາ ແລະ ລາວ ສືບຕໍ່ເຮັດວຽກຮ່ວມກັນຢ່າງໃກ້ຊິດ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມທີ່ມີມາແຕ່ດົນນານ ລະຫວ່າງ ສອງປະເທດ ໃຫ້ແຕກດອກອອກຜົນ ແລະ ເປັນຮູບປະທໍາຍິ່ງໆຂຶ້ນ. ພ້ອມກັນນັ້ນ, ສະ​ຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ກໍໄດ້ຖືໂອກາດເຊື້ອເຊີນ ສະຫາຍ ນາຍົກລັດຖະມົນຕີ ສອນໄຊ ສີພັນດອນ ເດີນທາງໄປຢ້ຽມຢາມ ສ. ກູບາ ຢ່າງເປັນທາງການ ໃນເວລາອັນເໝາະສົມ ສໍາລັບ ສອງຝ່າຍ, ຊຶ່ງ ສະຫາຍ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ສະແດງຄວາມຍິນດີຕອບຮັບຕາມຄໍາເຊື້ອເຊີນດັ່ງກ່າວ.

ໂດຍຕອບສະໜອງຕາມຄໍາເຊີນຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ, ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ (Miguel Diaz-Canel Bermudez), ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດແຫ່ງ ສາທາລະນະລັດ ກູບາ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງມາຢ້ຽມຢາມ ລັດຖະກິດ ສປປ ລາວ ໃນວັນທີ 6-7 ກັນຍາ 2025, ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສປປ ລາວ ແລະ ສ. ກູບາ ໃຫ້ແໜ້ນແຟ້ນຍິ່ງໆຂຶ້ນ.

ໃນຕອນເຊົ້າຂອງວັນທີ 7 ກັນຍາ 2025, ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢ່າງອົບອຸ່ນ ແລະ ສົມກຽດ ທີ່ ທໍານຽບປະທານປະເທດ. ຫຼັງຈາກນັ້ນ, ສະຫາຍ ທອງລຸນ ສີສຸລິດ ແລະ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ພ້ອມດ້ວຍຄະນະຜູ້ແທນຂັ້ນສູງຂອງສອງປະເທດໄດ້ດໍາເນີນການພົບປະສອງຝ່າຍຢ່າງເປັນທາງການ ເພື່ອຕີລາຄາຄືນສະພາບການພົວພັນຮ່ວມມືສອງຝ່າຍໃນໄລຍະຜ່ານມາ, ໄດ້ແລກປ່ຽນທັດສະນະ, ຖອດຖອນບົດຮຽນ, ປຶກສາຫາລືດ້ານຍຸດທະສາດ ແລະ ກໍານົດທິດທາງການຮ່ວມມື ລະຫວ່າງ ສປປ ລາວ ແລະ ສ. ກູບາ ໃນຕໍ່ໜ້າ ໃຫ້ກ້າວເຂົ້າສູ່ລວງເລິກ ເພື່ອຜົນປະໂຫຍດລວມຂອງປະຊາຊົນສອງຊາດ. ໃນໂອກາດດັ່ງກ່າວ, ສະຫາຍ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ສະໜິດສະໜົມຖານອ້າຍນ້ອງ ແລະ ໄດ້ຕີລາຄາສູງຕໍ່ການຢ້ຽມຢາມຄັ້ງນີ້, ຊຶ່ງເປັນຄັ້ງທີ 3 ຂອງ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ໃນການເດີນທາງມາຢ້ຽມຢາມ ສປປ ລາວ, ພ້ອມທັງໄດ້ຝາກຄໍາຢ້ຽມຢາມຖາມຂ່າວເຖິງບັນດາການນໍາພັກ-ລັດທີ່ກ່ຽວຂ້ອງ ຂອງ ສ. ກູບາ.

ໃນການພົບປະຄັ້ງນີ້, ຜູ້ນໍາທັງສອງ ໄດ້ແຈ້ງສະພາບການພາຍໃນທີ່ພົ້ນເດັ່ນຂອງສອງປະເທດໃຫ້ກັນຊາບ ພ້ອມທັງໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງ ທີ່ສອງປະເທດຍາດມາໄດ້ໃນຕະຫຼອດໄລຍະຜ່ານມາ. ສອງຝ່າຍໄດ້ສະແດງຄວາມປິຕິຍິນດີ ທີ່ເຫັນວ່າ ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໄດ້ເພີ່ມທະວີຮັດແໜ້ນສູງຂຶ້ນຢ່າງບໍ່ຢຸດຢັ້ງ ໃນຖານະທີ່ເປັນປະເທດເພື່ອນມິດຍຸດທະສາດທີ່ມີອຸດົມການດຽວກັນ ໂດຍເຫັນໄດ້ຈາກການພົວພັນຮ່ວມມືທາງດ້ານການເມືອງແມ່ນຢູ່ໃນລະດັບດີເລີດ ແລະ ນັບມື້ນັບໜັກແໜ້ນຍິ່ງໆຂຶ້ນ, ຊຶ່ງສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງພັກ, ສອງລັດ ແລະ ບັນດາອົງການຈັດຕັ້ງມະຫາຊົນຂອງສອງປະເທດຢ່າງເປັນປະຈໍາ. ສອງຝ່າຍໄດ້ຕີລາຄາສູງຕໍ່ການຮ່ວມມືອັນສໍາຄັນທາງດ້ານນິຕິບັນຍັດ, ຕຸລາການ, ເສດຖະກິດ-ການຄ້າ, ສາທາລະນະສຸກ,  ການສຶກສາ, ກິລາ, ກະສິກໍາ ແລະ ດ້ານວັດທະນະທໍາ-ສັງຄົມ ລະຫວ່າງ ສອງປະເທດ ທີ່ໄດ້ຮັບການເສີມຂະຫຍາຍເປັນກ້າວໆມາ, ພ້ອມທັງໄດ້ເຫັນດີເປັນເອກະພາບໃນການຊຸກຍູ້ສົ່ງເສີມບັນດາຂະແໜງການທີ່ກ່ຽວຂ້ອງຂອງສອງຝ່າຍ ໃຫ້ສືບຕໍ່ປຶກສາຫາລື ແລະ ເຮັດວຽກຮ່ວມກັນຢ່າງໃກ້ຊິດ ເພື່ອນໍາເອົາໝາກຜົນຕົວຈິງມາສູ່ປະເທດຊາດ ແລະ ປະຊາຊົນຂອງສອງປະເທດ.

ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການສະໜັບສະໜູນ, ຊ່ວຍເຫຼືອອັນລໍ້າຄ່າທີ່ພັກ, ລັດຖະບານ ແລະ ປະຊາຊົນກູບາອ້າຍນ້ອງໃຫ້ແກ່ພັກ, ລັດຖະບານ ແລະ ປະຊາຊົນລາວ ນັບຕັ້ງແຕ່ໄລຍະຕໍ່ສູ້ກູ້ຊາດເພື່ອປົດປ່ອຍປະເທດຊາດ ຈົນເຖິງປັດຈຸບັນ, ພ້ອມທັງຢືນຢັນຄືນເຖິງ ນະໂຍບາຍອັນສະເໝີຕົ້ນສະເໝີປາຍຂອງ ສປປ ລາວ ໃນການສືບຕໍ່ປົກປັກຮັກສາ ແລະ ເສີມຂະຫຍາຍສາຍພົວພັນທີ່ເປັນມູນເຊື້ອອັນດີງາມ ແລະ ຄວາມສາມັກຄີ ລະຫວ່າງ ສປປ ລາວ ແລະ ສ. ກູບາ ໃຫ້ເຂົ້າສູ່ລວງເລິກຍິ່ງໆຂຶ້ນໃນອະນາຄົດ ແລະ ສະແດງຄວາມໝາຍໝັ້ນວ່າຈະຢືນຄຽງບ່າຄຽງໄຫຼ່ກັບປະຊາຊົນກູບາອ້າຍນ້ອງ ເພື່ອກ້າວໄປສູ່ຄວາມສໍາເລັດອັນໃໝ່ຮ່ວມກັນ ກໍຄື ການເພີ່ມທະວີການຮ່ວມມື ແລະ ສະໜັບສະຫນູນເຊິ່ງກັນ ແລະ ກັນທັງໃນຂອບສອງຝ່າຍ ແລະ ຫຼາຍຝ່າຍ. ໃນໂອກາດດັ່ງກ່າວ ສະຫາຍ ທອງລຸນ ສີສຸລິດ ຍັງໄດ້ຖືໂອກາດເຊື້ອເຊີນ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ເພື່ອເຂົ້າຮ່ວມພິທີສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ ທີ່ຈະມີຂຶ້ນໃນທ້າຍປີ 2025 ນີ້.

ໃນຂະນະດຽວກັນ, ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີທີ່ໄດ້ພົບປະເຮັດວຽກກັບ ສະຫາຍ ທອງລຸນ ສີສຸລິດ ແລະ ຄະນະ ໃນຄັ້ງນີ້, ຊຶ່ງເຕັມໄປດ້ວຍບັນຍາກາດໄມຕີຈິດມິດຕະພາບ ແລະ ໄດ້ຮັບໝາກຜົນສູງເປັນທີ່ໜ້າເພິ່ງພໍໃຈ, ຢືນຢັນວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມທີ່ມີມາແຕ່ດົນນານ ລະຫວ່າງ ສອງປະເທດ ໃຫ້ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ ແລະ ໄດ້ສະແດງຄວາມຂອບໃຈຕໍ່ ສປປ ລາວ ທີ່ຍາມໃດກໍໄດ້ໃຫ້ການຊຸກຍູ້ຮ່ວມມື ແລະ ສະຫນັບສະໜູນ ສ. ກູບາ ຜ່ານຜ່າບັນດາອຸປະສັກ ແລະ ສິ່ງທ້າທາຍອື່ນໆ, ຊຶ່ງເປັນມູນເຊື້ອ ແລະ ຜົນງານອັນດີງາມຂອງ ປະທານ ໄກສອນ ພົມວິຫານ ແລະ ປະທານ ຟີແດນ ກາສໂຕຣ, ຜູ້ນໍາທີ່ຍິ່ງໃຫຍ່ຂອງສອງປະເທດໄດ້ສ້າງໄວ້.

ໃນໂອກາດຢ້ຽມຢາມຄັ້ງນີ້, ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌, ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສ. ກູບາ ແລະ ຄະນະ ໄດ້ໄປວາງພວງມາລາຢູ່ອານຸສາວະລີນັກຮົບນິລະນາມ ແລະ ວາງກະຕ່າດອກໄມ້ ທີ່ ຮູບຫຼໍ່ ປະທານ ໄກສອນ ພົມວິຫານ. ໃນຕອນແລງຂອງວັນດຽວກັນ, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ຈັດງານລ້ຽງຕ້ອນຮັບ ເປັນກຽດໃຫ້ແກ່ ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ພ້ອມດ້ວຍຄະນະ ຢ່າງອົບອຸ່ນ ແລະ ສົມກຽດ. ຫຼັງຈາກນັ້ນ, ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ ແລະ ຄະນະ ກໍໄດ້ເດີນທາງກັບຄືນປະເທດດ້ວຍຄວາມສະຫວັດດີພາບ.

ໃນຕອນແລງຂອງວັນທີ 6 ກັນຍາ 2025, ສະຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌ (Miguel Diaz-Canel Bermudez), ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສາທາລະນະລັດ ກູບາ ພ້ອມດ້ວຍ​​ຄະ​ນະຜູ້ແທນຂັ້ນສູງ ໄດ້ເດີນທາງມາເຖິງສະໜາມບິນສາກົນວັດໄຕ, ນະຄອນຫຼວງວຽງຈັນ, ສປປ ລາວ ເພື່ອດໍາເນີນການຢ້ຽມຢາມລັດຖະກິດ ທີ່ ສປປ ລາວ ໃນວັນທີ 6-7 ກັນຍາ 2025, ໂດຍມີ ສະຫາຍ ນາງ ເຂັມມະນີ ພົນເສນາ,​ ຫົວໜ້າຫ້ອງວ່າການສໍານັກງານປະທານປະເທດ ພ້ອມດ້ວຍຄະນະຜູ້ແທນຂອງ ສປປ ລາວ ແລະ ພາກສ່ວນກ່ຽວຂ້ອງ ໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.

ການຢ້ຽມຢາມລັດຖະກິດ ທີ່ ສປປ ລາວ ໃນຄັ້ງນີ້ ແມ່ນຕອບ​ສະ​ໜອງ​ຕາມ​ຄຳເຊື້ອ​ເຊີນ​ຂອງ ສະ​ຫາຍ   ທອງລຸນ ສີສຸລິດ,​ ເລຂາທິການໃຫຍ່, ປະທານປະເທດ ແຫ່ງ ສປປ ​ລາວ, ເພື່ອເພີ່ມທະວີ ແລະ ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ອັນເປັນມູນເຊື້ອ ​ລະ​ຫວ່າງ​ສອງ​ປະ​ເທດ ລາວ ແລະ ກູບາ ໃຫ້ແໜ້ນແຟ້ນຍິ່ງໆຂຶ້ນ.

ໃນໂອກາດຢ້ຽມຢາມ ສປປ ລາວ ຄັ້ງນີ້, ສະ​ຫາຍ ມີເກນ ດີເອັດຊ໌-ກາແນນ ເບີຣມູເດັດຊ໌, ​ເລຂາທິການທີຫນຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສ. ກູບາ ຈະພົບປະປຶກສາຫາລືກັບບັນດາການນໍາຂັ້ນສູງຂອງ ສປປ ລາວ ເປັນຕົ້ນແມ່ນ ພົບປະສອງຝ່າຍກັບ ສະ​ຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ພົບປະກັບ ສະຫາຍ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ. ນອກນັ້ນ, ຍັງຈະຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ຈະເລີນ ເຢຍປາວເຮີ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ, ພ້ອມທັງຈະໄດ້ໄປຢ້ຽມຊົມສະຖານທີ່ສໍາຄັນທາງປະຫວັດສາດ ແລະ ວັດທະນະທໍາ ຂອງ ສປປ ລາວ ຈໍານວນໜຶ່ງ ຕື່ມອີກ.

*********************