ວິທະຍຸ-ໂທລະພາບ ສູນກາງຈີນ, ກອງປະຊຸມເວ​ທີ​ປຶກ​ສາ​ຫາ​ລືການ​ຮ່ວມ​ມືສາ​ກົນ “ໜຶ່ງ​ແລວໜຶ່ງ​ເສັ້ນ​ທາງ” ຄັ້ງທີ 10 ​ໄດ້ໄຂຂຶ້ນຢູ່​ສູນ​ປະ​ຊຸມ ​ແລະ ວາງສະແດງຮົງກົງ​ ຂອງ​ ສປ ຈີນ ໃນວັນທີ 10 ​ກັນ​ຍານີ້. ​ເວ​ທີ​ປຶກ​ສາ​ຫາ​ລືດັ່ງກ່າວໄດ້ດຳເນີນເປັນເວລາ 2 ວັນ, ​ພາຍ​ໃຕ້ຫົວຂໍ້ວ່າ “ສະ​ແຫວງ​ຫາ​ການປ່ຽນແປງ​ຈາກ​ການຮ່ວມມື, ຮ່ວມກັນສ້າງອະນາຄົດ”, ໂດຍ​ມີ​ຜູ້​ນຳວົງ​ການການເມືອງ ແລະ ການ​ຄ້າ​ຫລາຍກວ່າ 90 ຄົນ ຈາກປະເທດ ແລະ ເຂດແຄວ້ທີ່ຮ່ວມກັນສ້າງ “ໜຶ່ງ​ແລວ​ໜຶ່ງ​ເສັ້ນທາງ” ພ້ອມ​ດ້ວຍ​ຄະ​ນະ​ຜູ້​ແທນ 100 ກວ່າຄະນະລວມ​​ທັງ​ໝົດ 6.000 ກວ່າຄົນ ເຂົ້າຮ່ວມ. ​ເວ​ທີ​ປຶກ​ສາ​ຫາ​ລືຄັ້ງນີ້ຈະສຸມໃສ່ຊຸກ​ຍູ້ ໂອກາດໃນການຮ່ວມມື.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

—————————

ກອງປະຊຸມໃຫຍ່ຜູ້ແທນອົງຄະນະພັກກະຊວງການຕ່າງປະເທດ ຄັ້ງທີ V ໄດ້ປິດລົງດ້ວຍຜົນສໍາເລັດຢ່າງສະຫງ່າງາມ, ດ້ວຍບັນຍາການຟົດຟື້ນ ແລະ ມີເນື້ອໃນສໍາຄັນເລິກເຊິ່ງ ພາຍຫຼັງດໍາເນີນມາແຕ່ວັນທີ 10-11 ກັນຍາ 2025 ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC) ນະຄອນຫຼວງວຽງຈັນ, ພາຍໃຕ້ຄໍາຂວັນ “ບຸກທະລຸການທູດເສດຖະກິດ, ຫັນທິດເປັນທັນສະໄໝ, ວ່ອງໄວດ້ານເສນາທິການ”, ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ເປັນກຽດເຂົ້າຮ່ວມຂອງ ສະຫາຍ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ມີບັນດາສະຫາຍແຂກທີ່ຖືກເຊີນຈາກກະຊວງ ແລະ ອົງການອ້ອມຂ້າງສູນກາງ, ບັນດາສະຫາຍສະມາຊິກພັກອາວຸໂສບຳນານ, ພ້ອມດ້ວຍບັນດາສະຫາຍຕາງໜ້າອົງການຈັດຕັ້ງມະຫາຊົນ ແລະ ບັນດາສະຫາຍຜູ້ແທນສົມບູນ ເຂົ້າຮ່ວມ.

ກອງປະຊຸມໃຫຍ່ຄັ້ງນີ້, ໄດ້ພ້ອມກັນຄົ້ນຄວ້າຢ່າງເລິກເຊິ່ງ ແລະ ໄດ້ຮັບຮອງເອົາລາຍງານການເມືອງຂອງຄະນະບໍລິຫານງານພັກ ສະໄໝທີ IV ທີ່ສະເໜີໂດຍສະຫາຍ ທອງສະຫວັນ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກກະຊວງ ລັດຖະມົນຕີກະຊວງການຕ່າງປະເທດ; ຮັບຮອງເອົາແຜນພັດທະນາຂອງກະຊວງການຕ່າງປະເທດໄລຍະປີ 2026-2030. ຜູ້ແທນກອງປະຊຸມໄດ້ສະແດງຄວາມເຫັນດີເປັນເອກະພາບຕໍ່ການສະຫຼຸບຕີລາຄາໝາກຜົນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງການຕ່າງປະເທດ ໄລຍະ 5 ປີຜ່ານມາ (2021-2025) ເປັນຕົ້ນແມ່ນບັນດາຜົນສໍາເລັດອັນພົ້ນເດັ່ນທີ່ຍາດມາໄດ້ໃນການເຄື່ອນໄຫວວຽກງານຕ່າງປະເທດ.

ກອງປະຊຸມໃຫຍ່ຜູ້ແທນອົງຄະນະພັກກະຊວງການຕ່າງປະເທດ ຄັ້ງທີ V ຍັງໄດ້ເປັນເອກະພາບຮັບຮອງເອົາບັນດາທິດທາງລວມ ແລະ ຄາດຫມາຍສູ້ຊົນ ໃນ 5 ປີ ຕໍ່ໜ້າ (2026-2030) ທີ່ໄດ້ກໍານົດ 3 ເປົ້າໝາຍຕົ້ນຕໍ ລວມມີ 4 ແຜນງານ 35 ໂຄງການຈຸດສຸມ ແລະ ໄດ້ກໍານົດ 3 ທິດທາງໜ້າທີ່ລວມໃນ 3 ດ້ານຄື: ສືບຕໍ່ປະຕິບັດຕາມແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປີດກວ້າງການຮ່ວມມືສາກົນ ດ້ວຍຫຼາຍຮູບແບບ ແລະ ຫຼາຍລະດັບ; ສືບຕໍ່ປັບປຸງ ແລະ ກໍ່ສ້າງກົງຈັກການຈັດຕັ້ງພັກຢ່າງຮອບດ້ານ ໂດຍຖືເອົາຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ທີ່ມີຄຸນນະພາບເປັນຄັນທຸງນໍາໜ້າ, ເອົາໃຈໃສ່ນໍາພາຊີ້ນໍາ 3 ອົງການຈັດຕັ້ງມະຫາຊົນໃຫ້ເປັນກໍາລັງສໍາຄັນຂອງພັກ ແລະ ຜັນຂະຫຍາຍແນວທາງ, ນະໂຍບາຍຂອງພັກ ແລະ ລັດ ໃນຂົງເຂດວຽກງານການຕ່າງປະເທດ ອອກເປັນອັນລະອຽດຢ່າງມີແບບແຜນ, ມີວິທະຍາສາດ ແລະ ມີປະສິດທິພາບ, ຍົກສູງຂີດຄວາມສາມາດໃນການເປັນເສນາທິການ, ສືບຕໍ່ການປະສານກົມກຽວການທູດການເມືອງ, ການທູດເສດຖະກິດ ແລະ ການທູດປະຊາຊົນ, ສືບຕໍ່ຜັນຂະຫຍາຍບັນດາແຜນງານໂຄງການທີ່ກໍາລັງປະຕິບັດໃຫ້ສໍາເລັດຜົນຢ່າງສົມບູນ ໂດຍໃຫ້ຢູ່ໃນທ່າບຸກ, ມີຈຸດສຸມ ແລະ ສ້າງຄວາມກົມກຽວ, ໂລ່ງລຽນ ແລະ ຫັນໃຫ້ເປັນທັນສະໄໝ, ຜັນຂະຫຍາຍການຕົກລົງໃນບາງດ້ານທີ່ຍັງຊັກຊ້າ, ສືບຕໍ່ຄົ້ນຄວ້າຍຸດທະສາດ ແລະ ການວິເຄາະວິໄຈສະພາບການໃນສ່ວນທີ່ເຫັນວ່າຍັງບໍ່ທັນຕອບສະໜອງໜ້າທີ່ການເມືອງໃນໄລຍະໃໝ່ ໃຫ້ວ່ອງໄວ ແລະ ເລິກເຊິ່ງ.

ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກກະຊວງການຕ່າງປະເທດ ຊຸດທີ V ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ຊຶ່ງມີຜູ້ອອກຮັບສະໝັກເລືອກຕັ້ງທັງໝົດ 18 ສະຫາຍ ຍິງ 3 ສະຫາຍ ແລະ ໄດ້ເລືອກເອົາ 15 ສະຫາຍ ຍິງ 3 ສະຫາຍ, ຄື: 1. ສະຫາຍ ທອງສະຫວັນ ພົມວິຫານ, 2. ສະຫາຍ ໄມທອງ ທໍາມະວົງສາ, 3. ສະຫາຍ ພົງສະຫວັນ ສີສຸລາດ, 4. ສະຫາຍ ນາງ ຟອງສະໝຸດ ອັ່ນລາວັນ, 5. ສະຫາຍ ວັນດີ ບຸດສະດີ, 6. ສະຫາຍ ອານຸພາບ ວົງໜໍ່ແກ້ວ, 7.ສະຫາຍ ອານຸສິນ ຂັດຕິຍະລາດ, 8. ສະຫາຍ ນາງ ມຸກດາວັນ ສີສຸລິດ, 9. ສະຫາຍ ດວງມະນີ ຍອດສີອຸດົມ, 10. ສະຫາຍ ບໍວອນທັດ ດວງຈັກ, 11. ສະຫາຍ ສຸລິສັກ ສຸລິນທອນ, 12. ສະຫາຍ ນາງ ແສງດາວັນ ວົງໄຊ, 13. ສະຫາຍ ກັນຍາ ຄໍາມຸງຄຸນ, 14. ສະຫາຍ ອຸດຕະມະ ສິດທິພົງ ແລະ 15. ສະຫາຍ ສີສຸພັນ ແກ້ວບັນດາວົງ.

ກອງປະຊຸມຄັ້ງປະຖົມມະລືກ ຂອງຄະນະບໍລິຫານງານພັກກະຊວງການຕ່າງປະເທດ ຄັ້ງທີ V ໄດ້ເລືອກເອົາຄະນະພັກປະຈໍາກະຊວງ, ໄດ້ເປັນເອກະສັນຮັບຮອງເອົາເລຂາ-ຮອງເລຂາ ແລະ ເລືອກເອົາປະທານ-ຮອງປະທານກວດກາພັກກະຊວງ, ໂດຍໄດ້ເລືອກເອົາຄະນະປະຈໍາພັກກະຊວງ 5 ສະຫາຍ, ປະກອບມີ: ສະຫາຍ ທອງສະຫວັນ ພົມວິຫານ, ສະຫາຍ ໄມທອງ ທໍາມະວົງສາ, ສະຫາຍ ພົງສະຫວັນ ສີສຸລາດ, ສະຫາຍ ນາງ ຟອງສະໝຸດ ອັ່ນລາວັນ ແລະ ສະຫາຍ ວັນດີ ບຸດສະດີ; ໄດ້ເປັນເອກະສັນກັນຮັບຮອງເອົາ ສະຫາຍ ທອງສະຫວັນ ພົມວິຫານ ເປັນເລຂາຄະນະບໍລິຫານງານພັກກະຊວງ; ສະຫາຍ ໄມທອງ ທໍາມະວົງສາ ເປັນຮອງເລຂາຄະນະບໍລິຫານງານພັກກະຊວງ; ສະຫາຍ ນາງ ຟອງສະໝຸດ ອັ່ນລາວັນ ເປັນປະທານກວດກາພັກ; ສະຫາຍ ສີສຸພັນ ແກ້ວບັນດາວົງ ແລະ ສະຫາຍ ນາງ ຂັນມາລາ ພັນດານຸວົງ ເປັນຮອງປະທານກວດກາພັກ. ກອງປະຊຸມໄດ້ໃຊ້ສິດປ່ອນບັດເລືອກຕັ້ງເອົາຜູ້ແທນສົມບູນ ຈໍານວນ 5 ສະຫາຍ ແລະ ຜູ້ແທນສໍາຮອງ 2 ສະຫາຍ ເພື່ອໄປເຂົ້າຮ່ວມກອງປະຊຸມໃຫຍ່ຄັ້ງທີ XII ຂອງພັກ.

ກອງປະຊຸມໃຫຍ່ຜູ້ແທນອົງຄະນະພັກກະຊວງການຕ່າງປະເທດ ຄັ້ງນີ້ ມີຄວາມປິຕິຊົມຊື່ນ ແລະ ຮູ້ສືກເປັນກຽດຢ່າງສູງທີ່ໄດ້ຕ້ອນຮັບການເຂົ້າຮ່ວມ ແລະ ຮັບຟັງຄໍາເຫັນໂອ້ລົມຊີ້ນໍາຂອງສະຫາຍ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວ ຊຶ່ງສະຫາຍໄດ້ຕີລາຄາສູງຕໍ່ໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງການຕ່າງປະເທດ, ບັນດາມະຕິ, ຄໍາສັ່ງຕ່າງໆຂອງພັກ ຕະຫຼອດໄລຍະ 5 ປີຜ່ານມາ ແລະ ສະແດງຄວາມຍ້ອງຍໍຊົມເຊີຍ ຕໍ່ການນຳພາ-ຊີ້ນໍາ ຂອງບັນດາສະມາຊິກພັກໃນການປະຕິບັດໜ້າທີ່ການເມືອງທີ່ພັກ-ລັດ ກໍຄືປະຊາຊົນລາວບັນດາເຜົ່າ ມອບໝາຍໃຫ້ ແລະ ຍາດໄດ້ຜົນສຳເລັດໃນຫຼາຍດ້ານ. ພ້ອມກັນນີ້, ສະຫາຍ ສະເຫຼີມໄຊ ກົມມະສິດ ຍັງໄດ້ຊີ້ນໍາໃຫ້ສືບຕໍ່ເສີມຂະຫຍາຍດ້ານດີ ທີ່ຕັ້ງໜ້າ ແລະ ປັບປຸງແກ້ໄຂຈຸດອ່ອນຂໍ້ຄົງຄ້າງໃນແຕ່ລະດ້ານໃຫ້ໝົດໄປ. ຄຽງຄູ່ກັນນີ້, ຍັງຮຽກຮ້ອງໃຫ້ຄະນະບໍລິຫານງານພັກກະຊວງຊຸດໃໝ່ ໃຫ້ສືບຕໍ່ນໍາພາ-ຊີ້ນໍາຈັດຕັ້ງຜັນຂະຫຍາຍ ແລະ ປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກກະຊວງໃນຄັ້ງນີ້ ໃຫ້ເຂົ້າສູ່ລວງເລິກ ແລະ ສອດຄ່ອງກັບສະພາບຄວາມເປັນຈິງ ແລະ ຈະຕ້ອງໄດ້ສູ້ຊົນ ນຳພາ-ຊີ້ນໍາຈັດຕັ້ງປະຕິບັດ ໂດຍສະເພາະ ວຽກງານພົວພັນຕ່າງປະເທດ ໂດຍຄະນະພັກກະຊວງການຕ່າງປະເທດ ເປັນເຈົ້າການນຳພາພະນັກງານ, ສະມາຊິກພັກ ເຄື່ອນໄຫວຕາມພາລະບົດບາດຂອງຕົນຢ່າງຕັ້ງໜ້າ, ໂດຍມີການຈັດບຸລິມະສິດ, ກຳນົດເປົ້າໝາຍ, ຈຸດສຸມ ແລະ ສ້າງເປັນແຜນການເຄື່ອນໄຫວລະອຽດ ພາຍໃຕ້ຄຳຂວັນ “ບຸກທະລຸການທູດເສດຖະກິດ, ຫັນທິດເປັນທັນສະໄໝ, ວ່ອງໄວດ້ານເສນາທິການ” ໂດຍຢຶດໝັ້ນແນວທາງການຕ່າງປະເທດຂອງພັກ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ, ເປີດກວ້າງການຮ່ວມມືແບບຫຼາຍທິດ, ຫຼາຍຝ່າຍ ຫຼາຍລະດັບ ແລະ ຫຼາຍຮູບແບບ ທີ່ກອງປະຊຸມໃຫຍ່ ຄັ້ງທີ XI ຂອງພັກ ໄດ້ວາງອອກ ໃຫ້ປະສົບຜົນສໍາເລັດຍິ່ງໃຫຍ່ກວ່າເກົ່າ.

ຂ່າວ: ກະຊວງການຕ່າງປະເທດ, ພາບ: ພູວຽງຄຳ

ສຳນັກຂ່າວຕ່າງປະເທດ ລາຍງານຈາກ ນະຄອນຫລວງຮ່າໂນ້ຍ ປະເທດ ຫວຽດນາມ ເມື່ອວັນທີ 9 ກັນຍາວ່າ: ທ່ານ ຟາມ ມິງຈິງ ນາຍົກ ລັດຖະມົນຕີ ຫວຽດນາມ ໄດ້ອອກຄຳສັ່ງໃຫ້ ທະນາຄານກາງ ເພີ່ມການກວດກາ ແລະ ຈັດການ ຢ່າງເຂັ້ມງວດ ຕໍ່ການປັ່ນຕະຫລາດ ແລະ ການກັກຕຸນ ເພື່ອຊຸກຍູ້ ໃຫ້ລາຄາຄຳ ແລະ ການຄ້າຂາຍ ທີ່ຜິດກົດໝາຍ ເຮັດໃຫ້ຕະຫລາດຄຳ ພາຍໃນປະເທດ ມີການເຄື່ອນເໜັງ.

ຄຳສັ່ງດັ່ງກ່າວ ມີຂຶ້ນ ຫລັງຈາກ ລາຄາຄຳ ຢູ່ໃນຫວຽດນາມ ໄດ້ປັບຕົວສູງຂຶ້ນຢ່າງຕໍ່ເນື່ອງ ເປັນເວລາ 2 ອາທິດ, ໂດຍທະນາຄານກາງ ໄດ້ຮັບມອບໝາຍ ໃຫ້ຕິດຕາມ ການເຄື່ອນໄຫວ ຂອງ ລາຄາຄຳ ທັງພາຍໃນ ແລະ ຕ່າງປະເທດ ຢ່າງໃກ້ຊິດ ພ້ອມທັງ ດຳເນີນມາດຕະການ ທີ່ຈຳເປັນທັນທີ ເພື່ອຮັກສາ ສະຖຽນລະພາບ ຂອງ ຕະຫລາດ. ນັບຕັ້ງແຕ່ປີນີ້ ລາຄາຄຳ ຢູ່ໃນຫວຽດນາມ ເພີ່ມຂຶ້ນຫລາຍກວ່າ 40%, ເປັນຕົວເລກສູງສຸດ ເປັນປະຫວັດສາດຫລາຍກວ່າ 135 ລ້ານດົງ ຕໍ່ 1 ບາດ ເມື່ອອາທິດຜ່ານມາ. ຂະນະດຽວກັນ ລາຄາຄໍາ ໃນຫວຽດນາມ ຍັງສູງກວ່າລາຄາຄໍາ ໃນຕະຫລາດໂລກ ປະມານ 20 ລ້ານດົງ.

ພາຍຫຼັງດໍາເນີນກອງປະຊຸມໃຫຍ່ ຜູ້ແທນອົງຄະນະພັກແຂວງໄຊສົມບູນ ມາແຕ່ວັນທີ 9 ກັນຍາ 2025 ມາຮອດ ຕອນເຊົ້າຂອງວັນທີ 10 ກັນຍາ 2025 ທີ່ສະໂມສອນໃຫຍ່ຂອງແຂວງ ສະຫາຍ ປອ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ, ຕາງໜ້າອະນຸກໍາມະການ ກົດລະບຽບ ແລະ ບຸກຄະລາກອນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ໄດ້ລາຍງານຜົນຂອງການເລືອກຕັ້ງ ເອົາຄະນະບໍລິຫານງານພັກແຂວງ ໄຊສົມບູນ ສະໄໝທີ II ແລະ ແຈ້ງລາຍຊື່ຜູ້ແທນສົມບູນ ແລະ ສໍາຮອງ ເຂົ້າຮ່ວມກອງປະຊຸມໃຫຍ່ ຄັ້ງທີ XII ຂອງພັກ ໂດຍການເຂົ້າຮ່ວມຂອງ ສະຫາຍ ພົນເອກ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດ ຖະມົນຕີ; ມີບັນດາສະຫາຍ ການນໍາຂອງແຂວງ, ຜູ້ແທນສົມບູນ, ແຂກຖືກເຊີນ ພ້ອມດ້ວຍສື່ມວນຊົນ ຢູ່ສູນກາງ ແລະ ແຂວງ ເຂົ້າຮ່ວມ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານພັກແຂວງໄຊສົມບູນ ຊຸດໃໝ່, ບົນພື້ນຖານການໃຊ້ສິດປະຊາທິປະໄຕ ຖືກຕ້ອງສອດຄ່ອງກັບມາດຖານ-ເງື່ອນໄຂ ທີ່ກຳນົດໄວ້, ເຊິ່ງມີຜູ້ອອກສະໝັກຮັບເລືອກຕັ້ງ ຈໍານວນ 35 ສະຫາຍ, ເລືອກເອົາ 31 ສະຫາຍ ຍິງ 3 ສະຫາຍ ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງໄຊສົມບູນ ສະໄໝທີ II ໄດ້ປ່ອນບັດເລືອກຕັ້ງ ຢ່າງປະຊາທິປະໄຕ ແລະ ເປັນເອກະພາບ ເລືອກເອົາຄະນະປະຈໍາພັກແຂວງ 9 ສະຫາຍ, ຍິງ 2 ສະຫາຍ ເຊິ່ງກອງປະຊຸມໄດ້ຕົກລົງຢ່າງເປັນເອກະສັນ ແລະ ມີຄວາມເປັນເອກະພາບສູງເລືອກເອົາ ສະຫາຍ ພອຍຄໍາ ຮຸ່ງບຸນຍວງ ເປັນເລຂາຄະນະບໍລິຫານງານພັກແຂວງ; ສະຫາຍ ພົຈວ ບົວພັນ ອິນທະປັນຍາ ແລະ ສະຫາຍ ທອງວັນ ທໍາມະວົງ ເປັນຮອງເລຂາຄະນະບໍລິຫານງານພັກແຂວງ; ໄດ້ປ່ອນບັດເລືອກຕັ້ງເອົາປະທານ ແລະ ຮອງປະທານກວດກາພັກແຂວງ ຊຶ່ງເລືອກເອົາສະຫາຍ ອຸດອນ ສິງດາລາ ເປັນປະທານກວດກາພັກແຂວງ, ສະຫາຍ ຄໍາເພັດ ດວງມາລາ, ສະຫາຍ ບຸນທະໜອນ ສິດທິນໍລາດ ແລະ ສະຫາຍ ຕຸ້ຍ ອ່ອນດວງພະຈັນ ເປັນຮອງປະທານກວດກາພັກແຂວງ. ພ້ອມດຽວກັນນັ້ນ ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ 16 ສະຫາຍ ແລະ ຜູ້ແທນສໍາຮອງ 3 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ທີ່ຈະໄຂຂຶ້ນໃນຕໍ່ໜ້ານີ້.

ຜົນສໍາເລັດກອງປະຊຸມໃຫຍ່ຄັ້ງນີ້ ແມ່ນໝາກຜົນລວມຍອດແຫ່ງສະຕິປັນຍາ ແລະ ຄວາມສາມັກຄີເປັນເອກະພາບ ບົນພື້ນຖານການເສີມຂະຫຍາຍປະຊາທິປະໄຕ ອັນເລິກເຊິ່ງກວ້າງຂວາງ, ສະແດງໃຫ້ເຫັນເຖິງຄວາມຮັບຜິດຊອບທາງການເມືອງຕໍ່ພັກ, ຕໍ່ພາລະກິດປະຕິວັດ ກໍ່ຄືອະນາຄົດຂອງປະເທດຊາດ.

ຂ່າວ ແລະ ພາບ: ກົມປະຊາສຳພັນ ຫສນຍ.

ກອງປະຊຸມດັ່ງກ່າວ ໄດ້ຈັດຂຶ້ນໃນລະຫວ່າງວັນທີ 10-11 ກັນຍາ 2025 ທີ່ຫ້ອງປະຊຸມພະແນກສຶກສາທິການ ແລະກິລາແຂວງ ໂດຍໃຫ້ກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີພະອາຈານ ຈັນດາ ເຄນສັກດາ ຄະນະ ອປສ ແຂວງ, ໂດຍພາຍໃຕ້ການເປັນປະທານກອງປະຊຸມຂອງທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະກິລາແຂວງ, ຈາກນີ້ກໍ່ມີບັນດາທ່ານເລຂາພັກເມືອງ-ນະຄອນ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ບັນດາຫ້ອງການສຶກສາທິການ-ກິລາທົ່ວແຂວງ, ແຂກຖືກເຊີນ, ສະຖາບັນການສຶກສາພາກລັດ ແລະເອກະຊົນ ແລະພາກສ່ວນກ່ຽວຂ້ອງເຂົ້າຮ່ວມຢ່າງຫຼວງຫຼາຍ.

ໂອກາດນີ້, ທ່ານ ປອ ສຸກສົມພອນ ອະໂນໄທ ກໍ່ໄດ້ກ່າວໄຂກອງປະຊຸມຢ່າງເປັນທາງການວ່າ: ເນື່ອງຈາກວ່າກອງປະຊຸມຄັ້ງນີ້ ໃຊ້ເວລາ 2 ວັນ, ດັ່ງນັ້ນ ເພື່ອເຮັດໃຫ້ກອງປະຊຸມຄັ້ງນີ້ ບັນລຸໄດ້ຕາມຈຸດປະສົງຄາດໝາຍທີ່ວາງໄວ້ ຈິ່ງຂໍຮຽກຮ້ອງມາຍັງຜູ້ແທນກອງປະຊຸມທຸກທ່ານ ຈົ່ງເປັນເຈົ້າການສຸມສະຕິປັນຍາຂອງຕົນເຂົ້າໃນການຄົ້ນຄວ້າ ແລະປະກອບຄຳຄິດ-ຄຳເຫັນໃຫ້ເລິກເຊິ່ງຢ່າງກົງໄປ-ກົງມາ, ໂດຍສະເພາະການແກ້ໄຂການຂາດແຄນຄູດ້ວຍຮູບແບບການໂຮມໂຮງຮຽນທີ່ກະແຈກກະຈາຍກາຍເປັນໂຮງຮຽນຂະໝາດໃຫຍ່, ຊອກໃຫ້ເຫັນສະພາບບັນຫາ, ສາເຫດຂອງບັນຫາ, ບົດຮຽນຕົວຈິງໃນການຈັດຕັ້ງປະຕິບັດຜ່ານມາ ພ້ອມທັງກຳນົດວິທີການແກ້ໄຂໃຫ້ຈະແຈ້ງ ເພື່ອເປັນບ່ອນອີງໃຫ້ແກ່ການປະຕິບັດແຜນພັດທະນາການສຶກສາຂະແໜງການຍ່ອຍ ປະຈໍາສົກຮຽນ 2025-2026 ໃຫ້ແທດເໝາະກັບຕົວຈິງ, ແລ້ວພ້ອມກັນຈັດຕັ້ງປະຕິບັດໃຫ້ໄປຕາມຫຼັກການ.

ວາລະດັ່ງກ່າວ, ທ່ານເຈົ້າແຂວງສະຫວັນນະເຂດ ກໍ່ໄດ້ໃຫ້ກຽດໂອ້ລົມ ແລະໃຫ້ທິດຊ້ີນຳໃນຫຼາຍບັນຫາສຳຄັນຕໍ່ການຈັດຕັ້ງປະຕິບັດແຜນພັດທະນາການສຶກສາ ແລະກິລາຂອງແຂວງ, ເຊິ່ງມີບາງຕອນສຳຄັນວ່າ: ໃຫ້ອຳນາດການປົກຄອງທ້ອງຖິ່ນ ເອົາໃຈໃສ່ຊຸກຍູ້ຕິດຕາມ, ກວດກາ ແລະປະເມີນຜົນຜູ້ບໍລິຫານການສຶກສາ-ກິລາເມືອງ, ຄະນະພັດທະນາການສຶກສາຂັ້ນບ້ານໃນການຈັດຕັ້ງຜັນຂະຫຍາຍແຜນພັດທະນາການສຶກສາ-ກິລາໃນຂອບເຂດຄວາມຮັບຜິດຊອບຂອງຕົ້ນຢ່າງເຂັ້ມງວດ; ໃຫ້ສືບຕໍ່ດຳເນີນການສຶກສາອົບຮົມການເມືອງ-ແນວຄິດໃຫ້ພະນັກງານ, ຄູ-ອາຈານ, ນັກຮຽນ ເຮັດໃຫ້ເຂົາເຈົ້າຮັບຮູ້ ແລະເຊື່ອມຊຶມ ບັນດາມະຕິ ແລະລະບຽບກົດໝາຍທີ່ຕິດພັນກັບເຂົາເຈົ້າເອງ, ຕິດພັນກັບ 5 ຫຼັກມູນຂອງການສຶກສາ, ຕ້ອງໄດ້ເອົາໃຈໃສ່ຂະຫຍາຍຕາໜ່າງການສຶກສາໄປສູ່ເຂດຊົນນະບົດຫ່າງໄກສອກຫຼີກໃຫ້ປະຊາຊົນລາວບັນດາເຜົ່າທົ່ວແຂວງສະຫວັນນະເຂດ ສາມາດຈົບການສຶກສາຊັ້ນມັດທະຍົມຕອນຕົ້ນ ເຊິ່ງເປັນການສຶກສາພາກບັງຄັບເປັນຕົ້ນແມ່ນຈຸດສຸມຂອງແຂວງເຊັ່ນ: ຈຸດສຸມຈຽງຕູບ, ຕັງອາໄລ, ແກ້ງຫຼິ້ນ ແລະຄໍາປາແໜ ແລະຈຸດສຸດອື່ນໆຂອງຂັ້ນທ້ອງຖິ່ນ; ຕ້ອງເອົາໃຈໃສ່ເປັນພິເສດໃນການກໍ່ສ້າງຄົນໃຫ້ເປັນນັກເຕັກນິກ-ວິທະຍາສາດ, ສ້າງຄົນໃຫ້ມີວິຊາອາຊີບ, ມີສີມືແຮງງານທີ່ມີຄຸນະພາບ, ສາມາດບໍລິການໃນຕະຫຼາດແຮງງານໄດ້ຢ່າງມີຄຸນະພາບ, ກ່ອນອື່ນໝົດຕ້ອງເລີ່ມຈາກການປຸກລະດົມໂຄສະນາ, ລົງແນະແນວວິຊາຊີບໃຫ້ນັກຮຽນທີ່ກຽມຈະຈົບຊັ້ນ ມ.4, ມ.7 ຫັນມາໃຫ້ຄວາມສຳຄັນຕໍ່ການຮຽນຂະແໜງອາຊີວະສຶກສາໃນລະດັບຊັ້ນຕົ້ນ, ຊັ້ນກາງໃຫ້ຫຼາຍຂຶ້ນ; ໃຫ້ສືບຕໍ່ເກັບເລັມບຳລຸງຍົກລະດັບການສຶກສາຊັ້ນປະຖົມ ແລະມັດທະຍົມຕອນຕົ້ນ ແລະຝຶກອົບຮົມວິຊາຊີບຂັ້ນພື້ນຖານໃຫ້ອຳນາດການປົກຄອງຂັ້ນບ້ານ ກໍ່ຄືພໍ່ແມ່ປະຊາຊົນໃນທົ່ວແຂວງ ໃຫ້ສູງຂຶ້ນເລື້ອຍໆ ແນໃສ່ປະຕິບັດດຳລັດການຮຽນຮູ້ຕະຫຼອດຊີວິດ ໃຫ້ແທດເໝາະກັບຄວາມເປັນຈິງ; ເອົາໃຈໃສສົ່ງເສີມ, ຊຸກຍູ້ຄູສອນໃຫ້ມີຫົວຄິດປະດິດສ້າງໃນການອອກແບບການສອນດ້ວຍຕົນເອງ, ການພັດທະນາຕົນເອງໃຫ້ການນຳໃຊ້ເຕັກໂນໂລຊີທີ່ທັນສະໄໝ ແລະຊອກຮູ້ການເຂົ້າເຖິງແຫຼ່ງຂໍ້ມູນການສຶກສາ(ຄັງປັນຍາ),ສ້າງທຸກເງື່ອນໄຂໃຫ້ຄູ-ອາຈານ ໄດ້ພັດທະນາຕົນເອງ ໂດຍສະເພາະແມ່ນພັດທະນາວິທີການສິດສອນທີ່ຫຼາກຫຼາຍ, ປັບປຸງວິທີການຄົ້ນຄວ້າຮ່ຳຮຽນຂອງນັກຮຽນ, ສ້າງຄ່ານິຍົມໃນການສ້າງຄົນໃຫ້ຮຽນດີ-ຮຽນເກັ່ງ, ເຫັນຄຸນຄ່າຂອງການຮຽນ; ບັນຫາສຳຄັນ ແລະມີລັກສະນະຕັດສິນກວ່າໝູ່ນັ້ນ ຕ້ອງເອົາໃຈໃສ່ເພີ່ມທະວີບົດບາດການນຳພາຂອງພັກ ແລະຄວາມຮັບຜິດຊອບຢ່າງເດັດຂາດຂອງອຳນາດການປົກຄອງຂັ້ນຕ່າງໆຕໍ່ວຽກງານການສຶກສາ-ກິລາ, ເພີ່ມທະວີວຽກງານກວດກາການສຶກສາທຸກຊັ້ນ, ທຸກລະດັບນັບທັງການສຶກສາພາກເອກະຊົນໃຫ້ເປັນລະບົບ.

ໃນພິທີ, ໄດ້ຮັບຟັງການຜ່ານບົດສະຫຼຸບການພັດທະນາການສຶກສາ-ກິລາ ສົກຮຽນ 2024-2025 ແລະແຜນປະຕິບັດສົກຮຽນ 2025-2026 ແລະແຜນງານການພັດທະນາຊັບພະຍາກອນມະນຸດ 2025 ແລະແຜນການປີ 2026, ຮັບຟັງການຜ່ານບົດວິເຄາະສະພາບການສຶກສາທົ່ວແຂວງປະຈຳສົກປີ 2024-2025, ແຜນປະຕິບັດວຽກຈຸດສຸມ 2025-2026 ແລະວິທີການແກ້ໄຂບັນຫາສະຖິຕິນັກຮຽນບໍ່ກົງກັນລະຫວ່າງຖານອີມິດ ແລະໜ່ວຍງານສາມັນ, ວິທີການຈັດຕັ້ງປະຕິບັດຄາດໝາຍຂອງສະພາໃຫ້ບັນລຸຈາກຫ້ອງການສຶກສາທິການ-ກິລາເມືອງທັງ 14 ເມືອງ-1 ນະຄອນ, ຈາກນີ້ກໍ່ໄດ້ຮັບຟັງການລາຍງານການສ້າງໂຮງຮຽນຕົວແບບທາງດ້ານວັດທະນະທຳ, ຜ່ານເອກະສານສຳຄັນຈຳນວນໜຶ່ງ, ຮັບຟັງການລາຍງານສະພາບການຂາດແຄນຄູ, ໂຄຕ້າຄູ 2024-2025, ນະໂຍບາຍຄູອັດຕາຈ້າງກະຊວງສຶກສາທິການ ແລະກິລາ, ຄູອັດຕາຈ້າງທ່ານເຈົ້າແຂວງສະຫວັນນະເຂດ, ຂໍ້ສະດວກ, ຂໍ້ຫຍຸ້ງຍາກ, ວິທີການແກ້ໄຂ ແລະແຜນປະຕິບັດໃນຕໍ່ໄປ, ລາຍງານຜົນໄດ້ຮັບໃນການຝຶກອົບຮົມຄູປະຈຳການ, ຝຶກອົບຮົມຄູພັກແລ້ງ, ລາຍງານການເກັບກຳສະຖິຕິນັກຮຽນ, ໂຮງຮຽນ, ຂໍ້ສະດວກ, ຂໍ້ຫຍຸ້ງຍາກ, ວິທີແກ້ໄຂ ແລະແຜນປະຕິບັດໃນຕໍ່ໜ້າ, ລາຍງານວຽກງານບໍລິຫານ, ທິດທາງປັບປຸງແກ້ໄຂສົກຕໍ່ໄປ, ລາຍງານການກະກຽມການເຂົ້າຮ່ວມການແຂ່ງຂັນງານມະຫະກຳກິລາແຫ່ງຊາດຄັ້ງທີ 12 ວັນທີ 15-25 ພະຈິກ 2025 ທີ່ນະຄອນຫຼວງວຽງຈັນ ພ້ອມທັງໄດ້ມີການປະກອບຄໍາເຫັນໃສ່ບົດລາຍງານຂອງຂະແໜງການຕ່າງໆ ແລະໄດ້ມີການຖອດຖອນບົດກ່ຽວກັບວຽກງານສຶກສາ-ກິລາຂອງແຂວງນຳອີກ.

ສຳນັກຂ່າວ ຊິນຮວາ ຂອງ ສປຈີນ, ວັນທີ 9 ກັນຍາ, ທ່ານ ມິຄາ ອີລ ມີຊູສຕິນ ນາຍົກ ລັດຖະມົນຕີ ຣັດເຊຍ ໄດ້ປະກາດວ່າ: ຣັດເຊຍ ຈະສ້າງສູນ ຂໍ້ມູນໃໝ່ 8 ແຫ່ງ, ພ້ອມທັງ ຈະຂະຫຍາຍ ເຄືອຂ່າຍ ການຂົນສົ່ງ ພະລັງງານ ແລະ ການສື່ສານ ພາຍໃຕ້ ແຜນພັດທະນາ ຂະໜາດໃຫຍ່ ໄປຮອດ ປີ 2036. ໂດຍສູນຂໍ້ມູນໃໝ່ ທີ່ຈະກໍ່ສ້າງຂຶ້ນ ຈະແບ່ງອອກເປັນໄລຍະ, ຈະຮອງຮັບ ຕູ້ເຊີເວີໄດ້ ຫລາຍກວ່າ 10.000 ຕູ້.

ທ່ານ ມິຄາ ອີລ ມີຊູສຕິນ ໄດ້ກ່າວ ໃນກອງປະຊຸມ ລັດຖະບານວ່າ: ແຜນການ ດັ່ງກ່າວ ຍັງລວມເຖິງ ການກໍ່ສ້າງ ແລະ ການປັບປຸງ ທາງລົດໄຟ ປະມານ 4.500 ກິໂລແມັດ ແລະ ເສັ້ນທາງຫລວງ ກວ່າ 2.000 ກິໂລແມັດ ລວມທັງ ການຕິດຕັ້ງສາຍສົ່ງໄຟຟ້າ ແຮງສູງຍາວ ກວ່າ 800 ກິໂລແມັດ ແລະ ສາຍສື່ສານໄຍແກ້ວນຳແສງ ຍາວເກືອບ 20.000 ກິໂລແມັດ.

ນອກນັ້ນ, ກະຊວງ ການພັດທະນາ ເສດຖະກິດ ຣັດເຊຍ ຍັງລະບຸວ່າ: ຂະໜາດ ການກໍ່ສ້າງ ທີ່ກຳນົດໄວ້ ແມ່ນບໍ່ເຄີຍມີມາກ່ອນ, ດ້ວຍມູນຄ່າ ການລົງທືນເກືອບ 20 ພັນຕື້ຮູເບີລ ໃນປີ 2036, ຊຶ່ງທຽບເທົ່າເກືອບ 10% ຂອງ ລວມຍອດ ຜະລິດຕະພັນ ພາຍໃນ (GDP) ຂອງ ຣັດເຊຍ ໃນປັດຈຸບັນ./

#ພະຍາກອນອາກາດ ປະຈໍາເຊົ້າວັນທີ 11 ກັນຍາ 2025, ຄວາມກົດດັນຕ່ຳຂອງອາກາດຮ້ອນຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງອ່ອນ ຫາ ປານກາງ, ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່, ຊຶ່ງຍັງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງ ພ້ອມມີລີມພັດແຮງເປັນບາງໂອກາດຢູ່ບາງທ້ອງຖິ່ນໃນແຕ່ລະພາກຕື່ມອີກ.

ໃນຕອນເຊົ້າວັນທີ 10 ກັນຍາ ນີ້ ທີ່ສຳນັກງານນາຍົກລັດຖະມົນຕີ, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ການນີ ວິຍາຣາຈາ (Ms. KanniWignaraja) ຜູ້ຊ່ວຍເລຂາທິການໃຫຍ່ ອົງການສະຫະປະຊາຊາດ ຜູ້ອໍານວຍການພາກພື້ນອາຊີ-ປາຊີຟິກ ຂອງອົງການສະຫະປະຊາຊາດ ເພື່ອການພັດທະນາ (UNDP) ພ້ອມດ້ວຍຄະນະ.

ໃນໂອກາດນີ້, ທ່ານຮອງນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ທ່ານ ນາງ ການນີວິຍາຣາຈາ ໃນຄັ້ງນີ້, ພ້ອມທັງ ສະແດງຄວາມຊົມເຊີຍຕໍ່ກັບການສ້າງຕັ້ງອົງການ UNDP ຄົບຮອບ 60 ປີ, ໄດ້ຕີລາຄາສູງຕໍ່ກັບການປະກອບສ່ວນ ແລະ ການເປັນຄູ່ຮ່ວມມື ທີ່ສຳຄັນຂອງອົງການ UNDP ຕໍ່ການພັດທະນາ ສປປ ລາວ ໃນຫຼາຍຂະແໜງການຕະຫຼອດຫຼາຍທົດສະວັດທີ່ຜ່ານມາ ເປັນຕົ້ນ ຂະແໜງບໍລິຫານລັດ ແລະ ການປົກຄອງດ້ວຍກົດໝາຍ, ການຫຼຸດພົ້ນຄວາມທຸກຍາກ; ການຕິດຕາມສະພາບການປ່ຽນແປງດິນຟ້າອາກາດ, ການສົ່ງເສີມບົດບາດຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ເພດຍິງ, ລວມທັງ ການເກັບກູລະເບີດທີ່ບໍ່ທັນແຕກ; ໄດ້ສະເໜີໃຫ້ UNDP ສືບຕໍ່ລະດົມທຶນຮອນຊ່ວຍເຫຼືອ ສປປ ລາວ ໃນຂະແໜງຕ່າງໆໂດຍສະເພາະຂະແໜງເກັບກູ້ລະເບີດບໍ່ທັນແຕກ, ການພັດທະນາຊັບພະຍາກອນມະນຸດ, ການພັດທະນາວຽກງານເຕັກໂນໂລຊີ ແລະ ນະວັດຕະກໍາ, ການຮັບມືຕໍ່ວຽກງານການປ່ຽນແປງດິນຟ້າອາກາດ ແລະ ອື່ນໆ, ລວມທັງ ໃນໄລຍະຂ້າມຜ່ານຫຼັງການອອກຈາກສະຖານະພາບດ້ອຍພັດທະນາ ຂອງ ສປປ ລາວ ແຕ່ປີ 2026-2029 ຍິ່ງມີຄວາມຮຽກຮ້ອງຕ້ອງການດ້ານທຶນຮອນ ເພື່ອການພັດທະນາຢ່າງຫຼວງຫຼາຍ ເພື່ອສາມາດຂ້າມຜ່ານ ຢ່າງໂລ່ງລຽນ, ມີຄຸນນະພາບ ແລະ ຍືນຍົງ.

ໃນໂອກາດດຽວກັນ, ທ່ານ ນາງ ການນີ ວິຍາຣາຈາ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ຂອງທ່ານ ຮອງນາຍົກລັດຖະມົນຕີ ແຫ່ງ ສປປ ລາວ, ພ້ອມທັງ ສະແດງຄວາມຂອບໃຈຕໍ່ລັດຖະບານ ແລະ ພາກສ່ວນກ່ຽວຂ້ອງ ຂອງ ສປປ ລາວ ທີ່ໄດ້ອຳນວຍຄວາມສະດວກ ແລະ ສະໜັບສະໜູນການຈັດຕັ້ງປະຕິບັດໂຄງການຕ່າງໆ; ສະແດງຄວາມຊົມເຊີຍຕໍ່ຜົນສຳເລັດ ແລະ ຄວາມຄືບໜ້າໃນຫຼາຍວຽກງານ ຂອງລັດຖະບານ ສປປ ລາວ ໃນການພັດທະນາປະເທດ ກໍຄືການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໂດຍສະເພາະການກະກຽມຄວາມພ້ອມ ໃນການອອກຈາກສະຖານະພາບປະເທດດ້ອຍພັດທະນາ. ພ້ອມດຽວກັນນີ້, ກໍໄດ້ຊົມເຊີຍຕໍ່ຄວາມພະຍາຍາມ ຂອງລັດຖະບານລາວ ໃນການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງໃນປາງສົງຄາມ; ສະແດງຄວາມເຊື່ອໝັ້ນວ່າ ສປປ ລາວ ຈະສາມາດບັນລຸເປົ້າໝາຍການພັດທະນາປະເທດ ແລະ ການກະກຽມອອກຈາກສະຖານະພາບປະເທດດ້ອຍພັດທະນາ ຢ່າງມີຄຸນນະພາບ. ພ້ອມທັງ, ໃຫ້ຄໍາໝັ້ນສັນຍາວ່າຈະສືບຕໍ່ໃຫ້ການສະໜັບສະໜູນຊ່ວຍເຫຼືອ ສປປ ລາວ ໃນດ້ານຕ່າງໆ ຢ່າງສຸດຄວາມສາມາດ ເພື່ອຮັບປະກັນໃຫ້ທຸກຄົນໄດ້ຮັບຜົນປະໂຫຍດຈາກການພັດທະນາຢ່າງທົ່ວເຖິງ.

ຂ່າວ ແລະ ພາບ: ກົມປະຊາສຳພັນ ຫສນຍ.

ໃນວັນທີ 01 ກັນຍາ 2025, ທີ່ ທຳນຽບ ປະທານາທິບໍດີ ແຫ່ງ ສາທາລະນະລັດ ຝຣັ່ງ, ນະຄອນຫລວງປາຣີ, ທ່ານ ກາລະມຸງຄຸນ ສຸພານຸວົງ ໄດ້ເຂົ້າຍື່ນສານຕາຕັ້ງ ຕໍ່ພະນະທ່ານ ແອມມານູຍແອນ ມາຄຼົງ (Emmanuel MACRON), ປະທານາທິບໍດີ ແຫ່ງ ສາທາລະນະລັດ ຝຣັ່ງ ເພື່ອດຳລົງຕຳແໜ່ງເປັນເອກອັກຄະຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ປະເທດ ສາທາລະນະລັດ ຝຣັ່ງ.

ໃນໂອກາດອັນສະຫງ່າລາສີນີ້, ທ່ານ ເອກອັກຄະລັດຖະທູດ ໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ຄວາມຮັກແພງ ແລະ ຄວາມອວຍພອນໄຊອັນປະເສີດ ເພື່ອສັນຕິພາບ, ມິດຕະພາບ, ຄວາມສົມບູນພູນສຸກ, ການພົວພັນຮ່ວມມືທີ່ດີ ຂອງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ຝາກເຖິງ ພະນະທ່ານ ປະທານປະເທດ ແຫ່ງ ສາທາລະນະລັດຝຣັ່ງ ກໍຄື ລັດຖະບານ ແລະ ປະຊາຊົນຝຣັ່ງ ທຸກຖ້ວນໜ້າ.

ນອກຈາກນີ້, ທ່ານ ເອກອັກຄະລັດຖະທູດ ກໍ່ຍັງໄດ້ສະແດງຄວາມຂອບໃຈ ຕໍ່ ພະນະທ່ານ ມາຄຼົງ ທີ່ໃຫ້ກຽດຮັບສານໃນຄັ້ງນີ້ ແລະ ໄດ້ໃຫ້ຄຳໝັ້ນສັນຍາວ່າ ໃນໄລຍະທີ່ຕົນດຳລົງຕຳແໜ່ງ ຈະເຮັດສຸດຄວາມສາມາດ ເພື່ອສືບຕໍ່ຮັກສາ ແລະ ເພີ້ມທະວີສຳພັນທະໄມຕີ, ການຮ່ວມມືຂອງສອງປະເທດທີ່ດີງາມມາແຕ່ດົນນານໃຫ້ດີຂຶ້ນໄປເລື້ອຍໆ. ພ້ອມທັງ ຍັງໄດ້ຕາງໜ້າໃຫ້ແກ່ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນຝຣັ່ງ ທີ່ໄດ້ໃຫ້ການສະໜັບສະໜູນການພັດທະນາ ຂອງ ສປປ ລາວ ໃນດ້ານເສດຖະກິດ-ສັງຄົມ ແລະ ສົ່ງເສີມການສຶກສາ (ດ້ານພາສາຝຣັ່ງ) ແລະ ອື່ນໆ ຂອງ ສປປ ລາວ ໃນໄລຍະຜ່ານມາ ແລະ ຫວັງວ່າ ຈະໄດ້ຮັບການສືບຕໍ່ຮ່ວມມື ສະໜັບສະໜູນ ຢ່າງດີໃນຕໍ່ໜ້າ.

ໃນໂອກາດດຽວກັນນີ້, ພະນະທ່ານ ແອມມານູຍແອນ ມາຄຼົງ ກໍ່ໄດ້ສະແດງຄວາມຊົມເຊີຍ ທ່ານ ເອກອັກຄະລັດຖະທູດລາວຄົນໃໝ່ ແລະ ໄດ້ຝາກຄວາມຢື້ຢາມຖາມຂ່າວ, ຄວາມຮັກແພງ, ຄໍາອວຍພອນໄຊອັນປະເສີດ ແລະ ມິດຕະພາບການພົວພັນທີ່ດີ ມາຍັງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ, ລັດຖະບານ ແລະ ປະຊາຊາຊົນລາວ ແລະ ພ້ອມທີ່ຈະສືບຕໍ່ຮ່ວມມືສົ່ງເສີມສາຍພົວພັນສອງຝ່າຍໃຫ້ຍືນນານໃນຕໍ່ໜ້າ.

ພິທີຍືນສານຕາຕັ້ງໃນຄັ້ງນີ້ ໄດ້ຈັດຂຶ້ນ ແລະ ດຳເນີນໄປດ້ວຍບັນຍາກາດທີ່ດີ ແລະ ສົມກຽດ. ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຝຣັ່ງ ໄດ້ສ້າງສາຍພົວພັນການທູດຮ່ວມກັນໃນວັນທີ 22 ຕຸລາ 1953 ເປັນຕົ້ນມາ, ມາຮອດປະຈຸບັນ ຄົບຮອບ 72 ປີ.

ຂ່າວ-ພາບ : ກົມການຂ່າວ, ກະຊວງການຕ່າງປະເທດ

ໃນຕອນເຊົ້າຂອງວັນທີ 09 ກັນຍາ 2025, ສະຫາຍ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ຜ່ານລະບົບທາງໄກກັບ ສະຫາຍ ເລ ຮວາຍ ຈູງ, ຮັກສາການ ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ.

ໃນໂອກາດນີ້, ສະຫາຍ ລັດຖະມົນຕີ ທອງສະຫວັນ ພົມວິຫານ ໄດ້ສະແດງຄວາມປິຕິຍິນດີ ທີ່ໄດ້ພົບປະກັບ ສະຫາຍ ເລ ຮວາຍ ຈູງ ຜ່ານທາງລະບົບທາງໄກໃນຄັ້ງນີ້ ພ້ອມທັງໄດ້ສະແດງຄວາມຊົມເຊີຍ ແລະ ຕີລາຄາສູງທີ່ ສະຫາຍ ເລ ຮວາຍ ຈູງ ໄດ້ຮັບການແຕ່ງຕັ້ງເປັນ ຮັກສາການ ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ ແລະ ສະແດງຄວາມເຊື່ອຫມັ້ນຢ່າງຍິ່ງວ່າ ດ້ວຍບົດຮຽນ ແລະ ປະສົບການອັນອຸດົມສົມບູນຂອງ ສະຫາຍ ເລ ຮວາຍ ຈູງ ຈະເຮັດສໍາເລັດໜ້າທີ່ອັນສົມກຽດໃນຄັ້ງນີ້. ສະຫາຍ ທອງສະຫວັນ ພົມວິຫານ ໄດ້ອວຍພອນ ແລະ ສະແດງຄວາມຊົມເຊີຍຕໍ່ຜົນສໍາເລັດພິທີສະເຫຼີມສະຫຼອງວັນຊາດ ແຫ່ງ ສສ. ຫວຽດນາມ ຄົບຮອບ 80 ປີ ໃນວັນທີ 2 ກັນຍາ 2025 ຜ່ານມາ. ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ເຊື້ອເຊີນ ສະຫາຍ ເລ ຮວາຍ ຈູງ ເດີງທາງມາຢ້ຽມຢາມ ສປປ ລາວ ຢ່າງເປັນທາງການ ໃນເວລາທີ່ເຫັນວ່າເໝາະສົມ.

ສອງຝ່າຍໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມື ລະຫວ່າງ ສອງປະເທດ ທີ່ນັບມື້ນັບແໜ້ນແຟ້ນ ແລະ ພັດທະນາຢ່າງບໍ່ຢຸດຢັ້ງ ໃນທຸກຂົງເຂດວຽກງານ ໂດຍສະເພາະແມ່ນການຈັດຕັ້ງຜັນຂະຫຍາຍຂໍ້ຕົກລົງຂອງສອງກົມການເມືອງ ກໍຄື ຜົນຂອງກອງປະຊຸມ ຄັ້ງທີ 47 ຂອງຄະນະກໍາມະການຮ່ວມມື ລາວ-ຫວຽດນາມ, ຕີລາຄາສູງຕໍ່ການປະສານສົມທົບຢ່າງແໜ້ນແຟ້ນ ລະຫວ່າງ ສອງກະຊວງການຕ່າງປະເທດ ໂດຍສະເພາະແມ່ນຜົນສໍາເລັດການຈັດຕັ້ງຜັນຂະຫຍາຍ ບັນດາຂໍ້ຕົກລົງ ວ່າດ້ວຍການຮ່ວມມື ໄລຍະປີ 2021-2025 ທີ່ຜ່ານມາ, ພ້ອມທັງໄດ້ເຫັນດີເປັນເອກະພາບຈະສືບຕໍ່ປະກອບສ່ວນຮັດແໜ້ນ ແລະ ເສີມຂະຫຍາຍການພົວພັນຮ່ວມມືສອງຝ່າຍ ໃນຕໍ່ໜ້າ ໃຫ້ມີປະສິດທິຜົນ ແລະ ເປັນຮູບປະທໍາຍິ່ງໆຂຶ້ນ.

ໃນຂະນະດຽວກັນ, ສະຫາຍ ເລ ຮວາຍ ຈູງ ກໍໄດ້ສະແດງຄວາມຂອບໃຈຕໍ່ຄໍາຊົມເຊີຍອັນຈົບງາມ ແລະ ສະແດງຄວາມຍິນດີທີ່ໄດ້ພົບປະກັບ ສະຫາຍ ລັດຖະມົນຕີ ທອງສະຫວັນ ພົມວິຫານ ໃນຄັ້ງນີ້, ພ້ອມທັງສະແດງຄວາມຍິນດີຕອບຮັບຕາມຄໍາເຊື້ອເຊີນ ເພື່ອຢ້ຽມຢາມ ສປປ ລາວ ໃນອະນາຄົດ ແລະ ສະແດງຄວາມໝາຍໝັ້ນວ່າ ຈະສືບຕໍ່ເຮັດວຽກຮ່ວມກັບຝ່າຍລາວຢ່າງໃກ້ຊິດ ເພື່ອປະກອບສ່ວນຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

ຂ່າວ – ພາບ : ກົມການຂ່າວ, ກະຊວງການຕ່າງປະເທດ