ໃນເວລາ 07 ໂມງ ເຊົ້າຂອງວັນທີ 22 ກໍລະກົດ 2025 ພາຍຸໝູນເຂດຮ້ອນວິພາ (Wipha), ມີຈຸດສູນກາງໃນເສັ້ນຂະໜານທີ 20.3 ອົງສາເໜືອ ແລະ ເສັ້ນແວງທີ 107.0 ອົງສາຕາເວັນອອກ ກໍາລັງເຄື່ອນທີ່ໄປທາງທິດຕາເວັນຕົກສ່ຽງໃຕ້ດ້ວຍຄວາມໄວ 15 ກິໂລແມັດຕໍ່ຊົ່ວໂມງ, ຄາດວ່າຈະອ່ອນກໍາລັງລົງກາຍເປັນພາຍຸດີເປຼຣຊັນ ແລະ ຈະເຄື່ອນຂື້ນແຄມຝັ່ງພາກເໜືອຂອງປະເທດຫວຽດນາມ ໃນຕອນບ່າຍ ຫາ ຄໍ່າຂອງມື້ນີ້, ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ຫາ ປານກາງຢູ່ທົ່ວໄປ ໃນແຕ່ລະພາກ ແລະ ຕົກໜັກ ຫາ ໜັກຫລາຍ ພ້ອມຈະມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງແຂວງຜົ້ງສາລີ,

ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫລວງນ້ຳທາ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ໃນໄລຍະທີ 22 ຫາ 23 ກໍລະກົດ 2025 ນີ.

້ ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນທຸກພາກສ່ວນ ຜູ້ທີ່ອາໄສຢູ່ໃກ້ລຽບຕາມແມ່ນໍ້າ ແລະ ເຂດພື້ນທີ່ຕໍ່າເຊັ່ນວ່າ: ຕາມລໍານ້ຳ ແລະ ແຄມແມ່ນ້ຳ, ໃນແຕ່ລະພາກ. ຈົ່ງມີສະຕິລະມັດລະວັງ ແລະ ກຽມພ້ອມຮັບມືກັບສະພາບຝົນໜັກຕິດຕໍ່ກັນຫລາຍວັນທີາຈະເຮັດໃຫ້ເກີດດິນເຈື່ອນ, ນ້ຳຖ້ວມຊຸ ແລະ ນ້ຳຖ້ວມຍື່ງ ທີ່ຈະສົ່ງຜົນເສຍຫາຍແກ່ຊີວິດ ແລະ ຊັບສິນອັນມີຄ່າ, ສໍາຫລັບຜູ້ທີ່ຈະເດີນທາງຜ່ານພູສູງ ຕ້ອງໄດ້ກວດສອບສະພາບອາກາດ, ສະພາບຫົນທາງ ກ່ອນອອກເດີນທາງ. ພ້ອມນີ້ຂໍໃຫ້ຕດິຕາມຂ່າວພະຍາກອນອາກາດ ຈາກກົມອຸຕຸນຍິມົ ແລະ ອຸທົກກະສາດ ຢ່າງຕໍ່ເນື່ອງ.

ໃນປະຫວັດສາດຂອງການພົວພັນສາກົນ ສາຍພົວພັນມິດຕະພາບທີ່ເປັນມູນເຊື້ອຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໄດ້ເປັນແວ່ນແຍງແບບຢ່າງອັນພົ້ນເດັ່ນທີ່ບໍ່ເຄີຍມີມາກ່ອນ ໂດຍໄດ້ເອົາຜົນມາສູ່ປະຊາຊົນສອງປະເທດທັງໃນຂະບວນການຕໍ່ສູ້ເພື່ອເອກະລາດເສລີພາບ ແລະ ຄວາມຮຸ່ງເຮືອງສີວິໄລໃນໄລຍະສ້າງສາ ແລະ ພັດທະນາປະເທດຊາດ.
ຈຸດພິເສດໃນສາຍພົວພັນລະຫວ່າງສອງຊາດ ລາວ-ຫວຽດນາມ ແມ່ນພວກເຮົາໄດ້ຕໍ່ສູ້ຮ່ວມກັນ ແລະ ໄດ້ຮັບໄຊຊະນະໃນໄລຍະດຽວກັນຂອງປະຫວັດສາດການປະຕິວັດຄື: ໃນປີ 1945, ສອງປະເທດໄດ້ຢືດອຳນາດການປົກຄອງ, ໃນປີ 1954 ໄດ້ຮັບໄຊຊະນະລ່າເມືອງຂຶ້ນແບບເກົ່າ, ປີ 1975 ໄດ້ຮັບໄຊຊະນະໃນສົງຄາມຕໍ່ຕ້ານຈັກກະພັດອາເມລິກາ, ສຳເລັດການປະຕິວັດປົດປ່ອຍປະເທດຊາດ ແລະ ປະຕິບັດພາລະກິດປັບປຸງໃໝ່ຢ່າງມີຜົນສຳເລັດ. ສາຍພົວພັນລະຫວ່າງ ພັກ-ລັດ ແລະ ປະຊາຊົນສອງປະເທດແມ່ນ ສາຍພົວພັນທີ່ຈົງຮັກພັກດີ, ໂປ່ງໃສ, ຄວາມເຄົາລົບເຊິ່ງກັນ ແລະ ກັນການຊ່ວຍເຫລືອຢ່າງສຸດອົກສຸດໃຈ, ໝົດຈິດໝົດໃຈ. ຜ່ານຄວາມຍາກເຂັນ. ສາຍພົວພັນດັ່ງກ່າວບໍ່ໄດ້ແຕກແຫງທັງບໍ່ໄດ້ທັບມ້າງເຖິງແມ່ນວ່າພວກກຳລັງສັດຕູຈະພະຍາຍາມເຄື່ອນໄຫວຕ້ານ ແລະ ທຳລາຍ, ກົງກັນຂ້າມສາຍພົວພັນນັ້ນນັບມື້ນັບຊື່ສັດຈິງໃຈແໜ້ນແຟ້ນ. ດັ່ງທີ່ສະຫາຍເລຂາທິການໃຫຍ່, ປະທານປະເທດ ໄກສອນ ພົມວິຫານ ເຄີຍໄດ້ກ່າວວ່າ:“ ໃນປະຫວັດສາດການປະຕິວັດທົ່ວໂລກມີຫລາຍແວ່ນແຍງແບບຢ່າງອັນດີເດັ່ນກ່ຽວກັບນ້ຳໃຈສາກົນກຳມະຊີບແຕ່ບໍ່ມີຢູ່ບ່ອນໃດ ແລະ ບໍ່ເຄີຍມີຈັກເທື່ອຄວາມສາມັກຄີຮ່ວມສຳພັນສູ້ຮົບແບບພິເສດດົນນານ ແລະ ຮອບດ້ານຄືດັ່ງການພົວພັນຫວຽດນາມ-ລາວ, ຫລາຍຮຸ່ນລູກຫລານຊາວຫວຽດນາມໄດ້ມາຊ່ວຍເຫລືອປະຊາຊົນລາວຕໍ່ສູ້ເພື່ອເອກະລາດເສລີພາບ ແລະ ສ້າງຊີວິດໃໝ່ ໄປສູ່ຄວາມຈະເລີນຮຸ່ງເຮືອງ ແລະ ຄວາມສຸກ. ຫລາຍສະຫາຍໄດ້ອຸທິດຕະຫລອດຊີວິດຂອງຕົນສຳຫລັບການປະຕິວັດລາວ, ຖືເອົາປະເທດລາວເປັນປະເທດຊາດທີສອງຂອງຕົນ. ໃນທົ່ວດິນແດງແຫ່ງປະເທດລາວ, ເລືອດຂອງນັກຮົບຫວຽດນາມ ໄດ້ປະສົມເຂົ້າກັບເລືອດຂອງພະນັກງານສະມາຊິກພັກນັກຮົບ ແລະ ປະຊາຊົນລາວ. ປະຊາຊົນລາວກໍ່ໄດ້ເສຍສະລະເລືອດເນື້ອປະກອບສ່ວນເຂົ້າໃນການເພີ່ມທະວີ ແລະ ປັບປຸງສາຍພົວພັນອັນພິເສດດັ່ງກ່າວ… ເພື່ອປະຕິບັດຄໍາໂອວາດສຸດທ້າຍຂອງລຸງໂຮ່, ສົມຄວນກັບເລືອດເນື້ອຂອງນັກຮົບວິລະຊົນຫລວງຫລາຍ, ນ້ຳຕາຫລາຍໆຢົດຂອງບັນດາຜູ້ເປັນແມ່, ເຫື່ອແຮງ ແລະ ສຸດອົກສຸດໃຈຂອງພີ່ນ້ອງຮ່ວມຊາດ ແລະ ເພື່ອນຜູ້ຮ່ວມອຸດົມການຂອງສອງປະເທດພວກເຮົາ, ພວກຂ້າພະເຈົ້າປາດຖະໜາຢາກຮ່ວມແຮງຮ່ວມໃຈນຳປະຊາຊົນຫວຽດນາມ ໃນການປົກປັກຮັກສາຄວາມສາມັກຄີແບບພິເສດຕະຫລອດກາລະນານ”.
ຜ່ານຄໍາເວົ້າອັນມີຄວາມໝາຍຂອງປະທານ ໄກສອນ ພົມວິຫານ ນັ້ນ, ການນຳລາວຫລາຍຮຸ້ນຄົນກໍໄດ້ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໃຫ້ບັນລຸຈຸດຍອດຍິ່ງ ແລະ ເຕັມປ່ຽມໄປດ້ວຍນ້ຳໃຈອັນ ຊື່ສັດຈິງໃຈເຊິ່ງກັນ ແລະ ກັນ, ສະໜິດຕິດແໜ້ນກັນຕໍ່ສູ້ເສຍສະລະ ເພື່ອຄວາມເປັນເອກະລາດເສລີພາບ ແລະ ພາລະກິດສ້າງສາ, ປົກປັກຮັກສາປະເທດ. ໂດຍຜ່ານໄລຍະປະຕິວັດທີ່ຫຍຸ້ງຍາກ ແລະ ໄຊຊະນະອັນສະຫງ່າງາມຂອງປະຊາຊົນສອງຊາດ ລາວ-ຫວຽດນາມ, ປະເທດລາວໄດ້ສະແດງໃຫ້ເຫັນຢ່າງຈະແຈ້ງບົດບາດສຳຄັນຄຸນຄ່າການປະຕິວັດ, ມະນຸດສະທຳ ແລະ ປະສິດທິຜົນໃຫຍ່ໆຂອງສາຍພົວພັນມິດຕະພາບອັນຍິ່ງໃຫຍ່ຄວາມສາມັກ ຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວຫວຽດນາມ.
ໂດຍ: ຄະນະ ບກ

ເນື່ອງໃນໂອກາດວັນປະຊາກອນໂລກ, ທ່ານ ປີໂອ ສະມິດ  (Mr. Pio Smith), ຜູ້ອຳນວຍການປະຈຳພາກພື້ນອາຊີ ແລະ ປາຊີຟິກ ອົງການສະຫະປະຊາຊາດ ກອງທຶນປະຊາກອນ (UNFPA), ຮຽກຮ້ອງໃຫ້ມີລະບົບສ້າງຄວາມເຂັ້ມແຂງໃຫ້ແກ່ໄວໜຸ່ມໃນທົ່ວພາກພື້ນໃຫ້ມີຄວາມສາມາດຕັດສິນໃຈດ້ວຍຕົນເອງກ່ຽວກັບອະນາຄົດຂອງເຂົາເຈົ້າ, ໂດຍພໍ່-ແມ່ ແມ່ນເປັນທາງເລືອກບໍ່ແມ່ນເປັນຄວາມສ່ຽງ ຫລື ເປັນພາລະ. 
ໃນທົ່ວຂົງເຂດອາຊີ ແລະ ປາຊີຟິກ, ອັດຕາການເກີດແມ່ນກຳລັງຫລຸດລົງ, ຫລາຍຫົວຂໍ້ຂ່າວເຕືອນກ່ຽວກັບການລົ້ມສະຫລາຍຂອງປະຊາກອນ ແລະ ໄວໜຸ່ມແມ່ນກຸ່ມທີ່ຖືກສັງຄົມຕຳນິວ່າ ບໍ່ສົນໃຈທີ່ຈະມີລູກ. ຢ່າງໃດກໍ່ຕາມ, ວິກິດການທີ່ແທ້ຈິງບໍ່ແມ່ນກ່ຽວກັບການມີລູກຫລາຍຄົນເກີນໄປ ຫລື ມີລູກໜ້ອຍເກີນໄປ. ບັນຫາທີ່ແທ້ຈິງແມ່ນກ່ຽວກັບໄວໜຸ່ມສາມາດກຳນົດຊີວິດຄອບຄົວໄດ້ວ່າຈະສ້າງຄອບຄົວຕອນໃດ ແລະ ແບບໃດຕາມແບບທີ່ນິຍົມຂອງພວກເຂົາຕ້ອງການ, ມີໄວໜຸ່ມຈຳນວນຫລາຍຄົນມັກຕັ້ງຄຳຖາມວ່າ: ຂ້ອຍສາມາດສ້າງຊີວິດຕາມແບບທີ່ຂ້ອຍຕ້ອງການໄດ້ບໍ່? ຄຳຕອບກໍ່ຄື: “ບໍ່”. ນີ້ແມ່ນເລື່ອງລາວກ່ຽວກັບການເກີດທີ່ພວກເຮົາຕ້ອງການບອກເລົ່າ ເຊິ່ງມັນບໍ່ແມ່ນເລື່ອງທີ່ເກີດມາຈາກຄວາມວິຕົກກັງວົນ,  ແຕ່ມັນກ່ຽວກັບຄວາມຈຳເປັນອັນຮີບດ່ວນທີ່ພວກເຮົາຕ້ອງສົ່ງເສີມສິດທິຄວາມສາມາດດ້ານການຈະເລີນພັນ ແລະ ທາງເລືອກທີ່ແທ້ຈິງ. 
ຢູ່ຫລາຍພາກພື້ນ ແລະ ທົ່ວໂລກ, ໄວໜຸ່ມມັກຖືກກີດກັນຈາກການເປັນພໍ່-ແມ່ ຫລື ຖືກບັງຄັບໃຫ້ກາຍເປັນພໍ່-ແມ່ ພາຍໃຕ້ລະບົບທີ່ບໍ່ເປັນມິດ. ສິ່ງເຫລົ່ານີ້ ລວມເຖິງລະບົບທີ່ບັງຄັບໃຫ້ເດັກຍິງຕ້ອງກາຍເປັນແມ່ກ່ອນໄວອັນຄວນ ໂດຍບໍ່ມີສິດເຂົ້າເຖິງການຄຸມກຳເນີດ ຫລື ການສຶກສາ, ລະບົບທີ່ເຮັດໃຫ້ຄູ່ຮັກ (ຄູ່ຜົວເມຍ) ຕ້ອງເລື່ອນການມີລູກເພາະຄວາມບໍ່ໝັ້ນຄົງໃນໜ້າທີ່ວຽກງານ, ທີ່ຢູ່ອາໄສທີ່ແພງເກີນໄປ ຫລື ບົດບາດຍິງຊາຍທີ່ເຄັ່ງຄັດ. ນອກຈາກນີ້, ຍັງມີການກີດກັນໄວໜຸ່ມຍ້ອນຄຳຖາມທີ່ວ່າ: ເຂົາເຈົ້າແມ່ນໃຜ, ເຂົາເຈົ້າຮັກໃຜ, ຫລື ເຂົາເຈົ້າອາໄສຢູ່ໃສ ?. 
ສອງສາມເດືອນທີ່ຜ່ານມາ, ຂ້ອຍໄດ້ມີໂອກາດໂອ້ລົມແມ່ຍິງຄົນໜຶ່ງ ເຊິ່ງລາວມີລູກແຕ່ອາຍຸ 17 ປີ ຢູ່ເຂດຫ່າງໄກສອກຫລີກແຫ່ງໜຶ່ງ ໃນປະເທດວານົວຕູ. ລາວໄດ້ໃຊ້ເວລາຫລາຍຊົ່ວໂມງ ຍ່າງໄປຄຣີນິກທີ່ໃກ້ທີ່ສຸດສຳລັບລາວ . ນີ້ແມ່ນຄັ້ງທຳອິດທີ່ລາວໄດ້ເຂົ້າເຖິງການບໍລິການດ້ານສຸຂະພາບໃນຖານະເປັນຄົນໄວໜຸ່ມ, ໃນສະຖານທີ່ແຫ່ງນີ້ ບໍ່ມີການສະໜອງການບໍລິການວາງແຜນຄອບຄົວ ແລະ ບໍ່ໃຫ້ບໍລິການດູແລກ່ອນເກີດ. ເຖິງຈະເປັນແນວນັ້ນກໍຕາມ, ລາວໄດ້ເວົ້າເຖິງຄວາມຝັນຂອງຕົນທີ່ຢາກຮຽນຈົບການສຶກສາ ແລະ ເປັນຄູສອນ. ຄວາມມຸ່ງຫວັງຂອງລາວບໍ່ແມ່ນເລື່ອງພິເສດ, ແຕ່ອຸປະສັກທີ່ຂັດຂວາງຄວາມຝັນຂອງລາວນັ້ນ ແມ່ນພິເສດແທ້ໆ. 
ເລື່ອງລາວປະເພດນີ້ ບໍ່ແມ່ນເລື່ອງແປກ, ມັນໄດ້ສົ່ງສຽງສະທ້ອນໄປທົ່ວພາກພື້ນ. ຕົວຢ່າງເຊັ່ນ: ຫລາຍກວ່າ 40% ຂອງການຖືພາໃນໄວໜຸ່ມແມ່ນເກີດຂຶ້ນ ໂດຍບໍ່ໄດ້ຕັ້ງໃຈ ແລະ ມີໄວໜຸ່ມທີ່ມີເພດສຳພັນ ໂດຍທີ່ຍັງບໍ່ໄດ້ແຕ່ງງານພຽງໜຶ່ງໃນສີ່ເທົ່ານັ້ນ ທີ່ໄດ້ນຳໃຊ້ການວາງແຜນຄອບຄົວແບບທັນສະໄໝ. ໃນເຂດຊົນນະບົດ, ທີ່ມີຄວາມຂັດແຍ່ງ ແລະ ທ່າມກາງກຸ່ມຄົນດ້ອຍໂອກາດ, ອຸປະສັກທີ່ໄວໜຸ່ມກໍາລັງຜະເຊີນແມ່ນໜັກໜ່ວງຫລາຍກວ່າບ່ອນອື່ນ. ໃນນັ້ນ, ອຸປະສັກທີ່ໃຫຍ່ຫລວງແມ່ນຢູ່ໃນກຸ່ມປະຊາກອນເຄື່ອນຍ້າຍຖິ່ນຖານ, ໄວໜຸ່ມທີ່ມີຄວາມຫລາກຫລາຍທາງເພດ (LGBTQIA+), ໄວໜຸ່ມພິການ ແລະ ກຸ່ມຊົນເຜົ່າ. 
ໃນບາງປະເທດ, ອະຄະຕິທາງສັງຄົມ ແລະ ຂໍ້ຈຳກັດທາງກົດໝາຍໄດ້ກາຍເປັນສິ່ງກີດຂວາງບໍ່ໃຫ້ໄວໜຸ່ມເຂົ້າເຖິງການດູແລສຸຂະພາບທາງເພດ ແລະ ສຸຂະພາບຈະເລີນພັນ. ໃນຂະນະທີ່ບ່ອນອື່ນໆ, ບັນທັດຖານທາງເພດທີ່ເຄັ່ງຄັດ, ໂດຍສະເພາະສຳລັບກຸ່ມໄວໜຸ່ມທີ່ຍັງບໍ່ໄດ້ແຕ່ງງານ, ກໍເປັນອີກສາເຫດໜຶ່ງ. ຍິ່ງໄປກວ່ານັ້ນ, ໃນເຂດທີ່ໄດ້ຮັບຜົນກະທົບຈາກວິກິດການ, ການບໍລິການເຫລົ່ານີ້ ແມ່ນບໍ່ສາມາດສະໜອງ ຫລື ບໍ່ມີສະໜອງຢູ່ເລີຍ, ສິ່ງເຫລົ່ານີ້ ບໍ່ພຽງແຕ່ເປັນຊ່ອງຫວ່າງທາງດ້ານສຸຂະພາບເທົ່ານັ້ນ ແຕ່ມັນຍັງແມ່ນຄວາມບົກພ່ອງທາງດ້ານຄວາມຍຸຕິທຳ.  
ເຖິງແມ່ນວ່າຫລາຍບ່ອນສາມາດສະໜອງການບໍລິການໄດ້ແຕ່ຄວາມບໍ່ໝັ້ນຄົງທາງເສດຖະກິດ, ພາລະການດູແລ ແລະ ຄວາມຄາດຫວັງຂອງສັງຄົມ ຍັງຄົງເປັນອຸປະສັກຕໍ່ການຕັດສິນໃຈກ່ຽວກັບການຈະເລີນພັນ. ບົດລາຍງານສະຖານະພາບ ປະຊາກອນໂລກປະຈຳປີ 2025 ຂອງອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ຊີ້ໃຫ້ເຫັນວ່າ ໃນປະເທດໄທ, ເຊິ່ງເປັນປະເທດທີ່ຄົນສ່ວນໃຫຍ່ຕ້ອງການມີລູກສອງຄົນ ຫລື ຫລາຍກວ່ານັ້ນ, ອັດຕາການເກີດລູກໃນປະເທດນີ້ ໄດ້ຫລຸດລົງເຫລືອພຽງ 1,2 ຄົນຕໍ່ແມ່ຍິງໜຶ່ງຄົນ. ສ່ວນໃນປະເທດ ສາທາລະນະລັດເກົາຫລີ, ອັດຕາການເກີດລູກ ມີພຽງ 0,8 ເຊິ່ງເປັນອັດຕາທີ່ຕໍ່າທີ່ສຸດໃນໂລກ ບໍ່ແມ່ນຍ້ອນວ່າ ປະຊາຊົນປະຕິເສດການເປັນພໍ່ແມ່, ແຕ່ຍ້ອນສະພາບແວດລ້ອມທີ່ຢູ່ອ້ອມຂ້າງພວກເຂົາຂັດຂວາງບໍ່ໃຫ້ພວກເຂົາບັນລຸຄວາມມຸ່ງຫວັງຂອງພວກເຂົາ. 
ຄວາມອາດສາມາດໃນດ້ານການຈະເລີນພັນມີຄວາມໝາຍຫລາຍກວ່າການເຂົ້າເຖິງການບໍລິການ, ຄວາມຈິງແລ້ວມັນໝາຍ ເຖິງສິດໃນການຕັດສິນໃຈບົນພື້ນ ຖານຂໍ້ມູນທີ່ຄົບຖ້ວນ, ປາສະຈາກອະຄະຕິ, ການຈຳແນກ ແລະ ການບັງຄັບ. ໃນນີ້, ມັນໝາຍເຖິງຄວາມສາມາດໃນການສ້າງຄອບຄົວ ຫລື ບໍ່ສ້າງຢ່າງປອດໄພ, ມີກຽດ ແລະ ດ້ວຍຄວາມຫວັງ. ປັດຈຸບັນນີ້, ໄວໜຸ່ມກຳລັງເດີນທາງຢູ່ໃນໂລກທີ່ເຕັມໄປດ້ວຍໄພພິບັດຈາກການປ່ຽນແປງຂອງດິນຟ້າອາກາດ, ຄວາມບໍ່ໝັ້ນຄົງທາງເສດຖະກິດ ແລະ ຄວາມຂັດແຍ່ງທີ່ເພີ່ມຂຶ້ນ. ຫລາຍຄົນຮູ້ສຶກວ່າ ພວກເຂົາໄດ້ຮັບມໍລະດົກອະນາຄົດທີ່ມີຄວາມສ່ຽງກວ່າໃນໄລຍະຂອງພໍ່ແມ່ຂອງພວກເຂົາ ເຊິ່ງເປັນອະນາຄົດທີ່ຖືກກຳນົດໂດຍການຕັດສິນໃຈທີ່ພວກເຂົາບໍ່ໄດ້ເຂົ້າຮ່ວມ ແລະ ເມື່ອຄວາມຫວັງຫາຍໄປ, ຄວາມຕັ້ງໃຈທີ່ຈະນຳພາເດັກນ້ອຍເຂົ້າມາໃນໂລກກໍຫາຍໄປນຳ. ແຕ່ສິ່ງນີ້ແມ່ນສິ່ງທີ່ສາມາດຫລີກລ້ຽງ. 
ຖ້າພວກເຮົາຕ້ອງການເຫັນຄອບຄົວທີ່ເຂັ້ມແຂງຂຶ້ນ ແລະ ສັງ ຄົມທີ່ມີພູມຕ້ານທານທີ່ດີ, ພວກເຮົາຕ້ອງສ້າງເງື່ອນໄຂທີ່ເຮັດໃຫ້ທຸກຄົນສາມາດເລືອກໄດ້ ແລະ ມີຄວາມຫວັງ. ນັ້ນໝາຍເຖິງການສະໜອງບໍລິການສຸຂະພາບທີ່ເປັນມິດຕໍ່ກັບໄວໜຸ່ມ ແລະ ເພດສຶກສາແບບຄົບຖ້ວນ ແລະ ຮອບດ້ານ, ພ້ອມທັງວຽກທີ່ເໝາະສົມ, ທີ່ຢູ່ອາໄສທີ່ບໍ່ແພງເກີນໄປ ແລະ ມີໄລຍະລາພັກລ້ຽງລູກທີ່ພຽງພໍ. ນອກຈາກນີ້, ສິ່ງທີ່ກ່າວມາຂ້າງເທິງນັ້ນ ມັນຍັງໝາຍເຖິງການສ້າງພື້ນທີ່ດິຈິຕອນທີ່ປອດໄພ ແລະ ສຳລັບໝົດທຸກຄົນ ແລະ ລະບົບການສຶກສາທີ່ສະໜອງເຄື່ອງມືໃຫ້ໄວໜຸ່ມກາຍເປັນຜູ້ນຳພາ ແລະ ຊ່ວຍເຫລືອເຂົາໃຫ້ມີຄວາມຈະເລີນກ້າວໜ້າ. ຄຽງຄູ່ກັນນີິ້, ມັນຍັງໝາຍເຖິງການລົງທຶນໃສ່ການແກ້ໄຂບັນຫາໂດຍໄວໜຸ່ມເອງ, ການໃຫ້ຄຳປຶກສາ ແລະ ການສ້າງພາວະການເປັນຜູ້ນຳສິ່ງເຫລົ່ານີ້ ຕ້ອງຖືກກຳນົດໃຫ້ເປັນບູລິມະສິດບໍ່ແມ່ນຈະກຳນົດເປັນບູມະສິດໃນພາຍຫລັງ. 
ທັງໝົດເຫລົ່ານີ້ ບໍ່ສາມາດບັນລຸໄດ້ດ້ວຍການວາງນະໂຍບາຍຊຸກຍູ້ພຽງຄັ້ງດຽວ ຫລ່ື ນະໂຍບາຍແບບຕອບໂຕ້. ມັນຮຽກຮ້ອງໃຫ້ມີການລົງທຶນຢ່າງຕໍ່ເນື່ອງ ແລະ ໄລຍະຍາວໃນລະບົບທີ່ສ້າງຂຶ້ນ ເພື່ອສົ່ງເສີມສິດທິ ແລະ ກຽດສັກສີ, ເຊິ່ງບໍ່່ກ່ຽວຂ້ອງກັບອັດຕາການຈະເລີນພັນ. ພວກເຮົາຕ້ອງຢຸດຕິຄວາມພະຍາຍາມທີ່ຈະແກ້ໄຂ ອັດຕາການຈະເລີນພັນ, ສິ່ງທີ່ຕ້ອງແກ້ໄຂແມ່ນລະບົບທີ່ກຳລັງສ້າງຄວາມເສຍຫາຍໃຫ້ແກ່ຊາວໜຸ່ມຂອງພວກເຮົາ.ໄວໜຸ່ມຄົນໜຶ່ງທີ່ໄດ້ປະກອບສ່ວນເຂົ້າໃນບົດລາຍງານສະພາບປະຊາກອນໂລກປະຈຳປີນີ້ ໄດ້ກ່າວໄວ້ຢ່າງຖືກຕ້ອງທີ່ສຸດວ່າ: “ກ່ອນທີ່ຂ້ອຍຈະນໍາພາເດັກນ້ອຍເຂົ້າມາໃນໂລກນີ້, ຂ້ອຍຕ້ອງຕໍ່ສູ້ ເພື່ອສິດທິທີ່ຈະເຮັດແນວນັ້ນຕາມເງື່ອນໄຂຂອງຕົວເອງ. ນີ້ບໍ່ແມ່ນພຽງແຕ່ການຕໍ່ສູ້ຂອງຂ້ອຍມັນແມ່ນການຕໍ່ສູ້ຂອງໄວໜຸ່ມຫລາຍພັນລ້ານຄົນທີ່ຖືກກັກຂັງຢູ່ໃນລະບົບທີ່ກີດກັ້ນສິດທິ ແລະ ກຽດສັກສີທີ່ພວກເຂົາຕ້ອງໄດ້ຮັບ.” 
ໃນວັນປະຊາກອນໂລກປີນີ້, ພວກເຮົາໃຫ້ຄຳໝັ້ນສັນຍາທີ່ຈະຮັບຟັງຄຳຮຽກຮ້ອງຂ້າງເທິງນັ້ນ ແລະ ພະຍາຍາມຕອບສະໜອງຕໍ່ຂໍ້ຮຽກຮ້ອງດັ່ງກ່າວ. ຂໍໃຫ້ພວກເຮົາສ້າງພາກພື້ນທີ່ໄວໜຸ່ມທຸກຄົນມີອຳນາດ ແລະ ຄວາມສາມາດໃນການຕັດສິນໃຈກ່ຽວກັບອະນາຄົດຂອງຕົນເອງ, ການເປັນພໍ່-ແມ່ ແມ່ນການມີສິດທິໃນການເລືອກບໍ່ແມ່ນພາລະ ຫລື ຄວາມສ່ຽງ ແລະ ບ່ອນທີ່ອະນາຄົດຖືກສ້າງຂຶ້ນຈາກຄວາມຫວັງບໍ່ແມ່ນຍ້ອນຄວາມຢ້ານກົວ.
(ຂໍ້ມູນຈາກ: ອົງການ UNFPA)

ປັດຈຸບັນ, ບົດບາດເອື້ອຍນ້ອງແມ່ຍິງລາວ ໄດ້ຮັບການເຊີດຊູສູງຂຶ້ນໃນສັງຄົມລາວ, ເວ ທີສາກົນ ແລະ ພາກພື້ນ ເຊິ່ງ ພັກ ແລະ ລັດຖະບານ ສ້າງເງື່ອນໄຂໃຫ້ແມ່ຍິງລາວບັນດາເຜົ່າ ມີຊີວິດການເປັນຢູ່ດີຂຶ້ນທາງດ້ານວັດຖຸ ແລະ ຈິດໃຈ, ແມ່ຍິງລາວຫລາຍທ່ານໄດ້ບຸກບືນ ແລະ ພັດທະນາຕົນເອງໃຫ້ມີຄວາມຮູ້, ຄວາມສາມາດເທົ່າທຽມກັບເພດຊາຍ, ກາຍເປັນການນໍາຂັ້ນສູງຂອງພັກ, ລັດ, ທັງໄດ້ເຂົ້າຮ່ວມກອງປະຊຸມສຳຄັນຕ່າງໆທັງຢູ່ພາຍໃນ ແລະ ບັນດາປະເທດເພື່ອນມິດໃນໂລກ, ສາມາດຕັດສິນບັນຫາສຳຄັນຕ່າງໆໃນຫລາຍເວທີ.

ທ່ານ ນາງ ໂພສີ ໄຊຍະສອນ ນັກທຸລະກິດຍິງ ໄດ້ໃຫ້ສໍາພາດໃນໂອກາດຄົບຮອບ 70 ປີ ວັນສ້າງຕັ້ງສະຫະພັນແມ່ຍິງລາວ ເມື່ອບໍ່ດົນມານີ້, ໂດຍທ່ານໄດ້ຍົກໃຫ້ເຫັນ ພາລະບົດບາດ, ຄວາມສຳຄັນຂອງແມ່ຍິງ ຕໍ່ຄອບຄົວ ເປັນຕົ້ນ ການເບິ່ງແຍງດູແລພໍ່-ແມ່, ເປັນຄົນສຳຄັນໃນການສຶກສາອົບຮົມ, ເບິ່ງແຍງລູກເຕົ້າ ໃຫ້ກາຍເປັນຄົນດີ, ເຮັດວຽກເຮືອນ ແລະ ສ້າງບັນຍາກາດທີ່ອົບອຸ່ນໃຫ້ກັບຄອບຄົວ ກໍຄື ສາມີ ແລະ ລູກ, ສາມາດເວົ້າໄດ້ວ່າ ເບື້ອງຫລັງຄວາມສໍາເລັດຂອງຄອບຄົວ ລ້ວນແຕ່ມີແມ່ຍິງ ທີ່ເປັນແຮງຊຸກດັນ ແລະ ເປັນກຳລັງໃຈສໍາຄັນ. ນອກຈາກນີ້, ແມ່ຍິງໄດ້ປະກອບສ່ວນຊ່ວຍສັງຄົມດ້ານຕ່າງໆ, ແມ່ຍິງຈຳນວນໜຶ່ງ ໄດ້ປະຕິບັດໜ້າທີ່ເປັນການນໍາເພດຍິງ, ພະນັກງານລັດຖະກອນ ໃນອົງການ ຈັດຕັ້ງພັກ-ລັດ ຄຽງບ່າຄຽງໄຫລ່ອ້າຍນ້ອງຊາຍ ຕັ້ງແຕ່ໄລຍະຕໍ່ສູ້ກູ້ຊາດໃນເມື່ອກ່ອນ ກໍຄື ປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ທ່ານ ນາງ ໂພສີ ໄຊຍະສອນ ຍັງໃຫ້ຮູ້ອີກວ່າ: ແມ່ຍິງລາວ ໃນປັດຈຸບັນ, ຕ້ອງພັດທະນາຕົນເອງທຸກດ້ານ, ໃຫ້ມີຄວາມຮູ້, ຄວາມສາມາດ, ບໍ່ຢຸດທີ່ຈະຮຽນຮູ້ ແລະ ພັດທະນາຕົນເອງ, ຕ້ອງເປັນແມ່ຍິງທີ່ທັນສະໄໝ, ກ້າຄິດ, ກ້າສະແດງອອກ. ໃນຄະນະດຽວກັນ, ກໍໃຫ້ຮັກສາຮີດຄອງປະເພນີ, ນິ້ມນວນ ອ່ອນຫວານ, ອ່ອນໂຍນ ແຕ່ບໍ່ອ່ອນແອ.

ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ການຈັດເກັບລາຍຮັບໃນໄລຍະ 06 ເດືອນຕົ້ນປີ 2025, ດ່ານພາສີສາກົນນາເພົ້າ ແຂວງຄຳມ່ວນ ສາມາດເກັບລາຍ 334,8 ຕື້ກວ່າກີບ ເທົ່າກັບ 168,26% ຂອງແຜນການ (199 ຕື້ກີບ). ໃນຂະຍະທີ່ ດ່ານພາສີສາກົນນາເພົ້າ ໄດ້ຮັບຕົວເລກມອບໝາຍຈາກກະຊວງການເງິນ ໃນປີ 2025 ຈຳນວນ 398 ຕື້ກີບ, ທຽບໃສ່ໄລຍະດຽວຂອງປີຜ່ານມາຈໍານວນ 305 ຕື້ກີບ, ເພີ່ມຂຶ້ນ 30,49%.

ທ່ານ ສຸພັດ ສຸແສງໄທ ຮັກສາການຫົວໜ້າຄະນະຄຸ້ມຄອງດ່ານສາກົນນາເພົ້າ ໄດ້ລາຍງານເມື່ອບໍ່ດົນມານີ້ວ່າ: ລາຍຮັບຈາກໝວດສິນຄ້າຕົ້ນຕໍ ທີ່ໄດ້ລື່ນແຜນປະກອບມີ: ຄ່າຊັກພິເສດ ຂາອອກ ປະຕິບັດໄດ້ 235,9 ຕື້ກວ່າກີບ; ປະເພດພາຫະນະ ປະຕິບັດໄດ້ 3,1 ຕື້ກວ່າກີບ; ສິ້ນສ່ວນ-ອາໄຫລ່ ປະຕິບັດໄດ້ 1,8 ຕື້ກວ່າກີບ; ເຄື່ອງກໍ່ສ້າງປະຕິບັດໄດ້ 3,2 ຕື້ກວ່າກີບ; ເຄື່ອງໃຊ້ດ້ວຍໄຟຟ້າ ປະຕິບັດໄດ້ 3,7 ຕື້ກວ່າກີບ; ເຄື່ອງອຸປະໂພກ-ບໍລິໂພກ ປະຕິບັດໄດ້ 3,8 ຕື້ກວ່າກີບ; ສິນຄ້າຕາມສັນຍາອາຊຽນ 42 FORM-D ປະຕິບັດໄດ້ 42,9 ຕື້ກວ່າກີບ; ສິນຄ້າຕາມສັນຍາສອງຝ່າຍ 43 FORM-S ປະຕິບັດໄດ້ 4,5 ຕື້ກວ່າກີບ. ສຳລັບລາຍຮັບຈາກໝວດສິນຄ້າຕົ້ນຕໍ ທີ່ໄດ້ຫລຸດແຜນປະກອບມີປະເພດ ນໍ້າມັນເຊື້ອໄຟ; ຄ່າທໍານຽມຕ່າງໆ; ຄ່າປັບໃໝ ແລະ ຂາຍເຄື່ອງຮິບ.

ທ່ານ ສຸພັດ ສຸແສງໄທ ໃຫ້ຮູ້ຕື່ມວ່າ: ສາຍເຫດທີ່ພາໃຫ້ເກັບລາຍຮັບໄດ້ລື່ນແຜນການໃນ 06 ເດືອນຕົ້ນປີຜ່ານມາ ແມ່ນໄດ້ຈາກການສົ່ງອອກສິນຄ້າປະເພດແຮ່ທາດຕ່າງໆ ເພີ່ມຂຶ້ນ, ການນໍາເຂົ້າສິນຄ້າຕາມສັນຍາອາຊຽນເພີ່ມຂຶ້ນ, ສິນຄ້າປະເພດ ອາໄຫລ່, ເຄື່ອງກໍ່ສ້າງ, ເຄື່ອງໄຟຟ້າ ແລະ ເຄື່ອງອຸປະໂພກ-ບໍລິໂພກ ກໍເພີ່ມຂຶ້ນເຊັ່ນດຽວກັນ. ຄຽງຄູ່ກັບການເພີ່ມຂຶ້ນສະຖິຕິການນໍາເຂົ້າສິນຄ້າ, ບາງໝວດກໍຫລຸດລົງຫລາຍປະເພດສິນຄ້າ ເຊັ່ນ: ນໍ້າມັນເຊື້ອໄຟ ແລະ ຄ່າທໍານຽມຕ່າງໆ ຍ້ອນສະພາບເສັ້ນທາງເປ່ເພ ກະທົບຕໍ່ການຂົນສົ່ງສິນຄ້າ ເສດຖະກິດພາຍໃນປະເທດ ແລະ ຂອງໂລກ, ອັດຕາເງິນເຟີ້ ເພີ່ມທະວີສູງຂຶ້ນເລື້ອຍໆ. ພ້ອມນີ້, ການປະຕິບັດມູນຄ່າແຈ້ງຕາມລາຄາຊື້-ຂາຍຕົວຈິງ ຍັງບໍ່ທັນຄຸ້ມຄອງໄດ້ຢ່າງມີປະສິດທິພາບ ຄຽງຄູ່ກັບຂໍ້ສະດວກຍັງມີຫຍຸ້ງຍາກຈໍານວນໜຶ່ງທີ່ຕ້ອງໄດ້ສືບຕໍ່ແກ້ໄຂ ເນື່ອງຈາກການໃຊ້ລະບົບທີ່ທັນສະໄໜ ເຂົ້າໃນການບໍລິການ ຖ້າລະບົບສັນຍານອິນເຕີເນັດຂັດຂ້ອງ ແມ່ນເຮັດໃຫ້ພົບຄວາມຫຍຸ້ງຍາກຫລາຍ ແລະ ລະບົບເຄືອຂ່າຍສາຍໄຍແກ້ວທາງດ່ານ ກໍມີພຽງເຄືອຂ່າຍດຽວຂອງບໍລິສັດ ລາວໂທລະຄົມ. ນອກຈາກນີ້, ການສຶກສາອົບຮົມແນວຄິດ ເຖິງວ່າໄດ້ເຮັດຢ່າງຕໍ່ເນື່ອງ, ແຕ່ການຫັນປ່ຽນຕົວຈິງກໍຍັງມີໜ້ອຍ ເປັນຕົ້ນ ການບຸກທະລຸທາງດ້ານຈິນຕະນາການ ຍັງບໍ່ທັນໄດ້ຮັບການຈັດຕັ້ງປະຕິບັດຢ່າງເດັດຂາດ, ພະນັກງານສະມາຊິກພັກຈໍານວນໜຶ່ງ, ຄວາມຮູ້-ຄວາມສາມາດ, ປະສົບການຍັງມີຈໍາກັດ, ຄວາມເປັນແບບຢ່າງນຳພາຍັງເຮັດບໍ່ທັນໄດ້ດີເທົ່າທີ່ຄວນ, ການປະຕິບັດມູນຄ່າແຈ້ງພາສີຕາມລາຄາຊື້-ຂາຍຕົວຈິງ ຍັງບໍ່ສາມາດຄຸ້ມຄອງໄດ້ຢ່າງມີປະສິດທິພາບ, ສ່ວນຫລາຍແມ່ນໄດ້ເຍືອງເບິ່ງລາຄາຂອງສອງດ່ານ, ດ່ານນໍ້າພາວ ແລະ ດ່ານແດນສະຫວັນ. ສໍາລັບຕົວເລກຄາດຄະເນລາຍຮັບໃນໄລຍະ 06 ເດືອນທ້າຍປີ 2025 ຈະປະຕິບັດໃຫ້ໄດ້ 117,8 ຕື້ກວ່າກີບ ແລະ ຄາດຄະເນຕົວເລກປະຕິບັດລາຍຮັບໝົດປີ 2025 ໃຫ້ໄດ້ 452,6 ຕື້ກວ່າກີບ.

ຂ່າວ-ພາບ: ແດງສະຫວັດ ແສນພານິດ

ໃນໂອກາດເຄື່ອນໄຫວວຽກງານຢູ່ແຂວງຫລວງພະບາງ ໃນວັນທີ 18 ກໍລະກົດ 2025 ຜ່ານມາ, ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະ ເລຂາທິການສູນກາງພັກ, ຮອງປະທານປະເທດ ໄດ້ພົບປະໂອ້ລົມພະນັກງານຫລັກແຫລ່ງແຂວງຫລວງພະບາງ ໂດຍໄດ້ທິດຊີ້ນໍາໃຫ້ຄະນະບໍລິຫານງານພັກແຂວງ ເອົາໃຈໃສ່ປັບປຸງວຽກງານຫລາຍດ້ານ ເປັນຕົ້ນ ໃຫ້ສືບຕໍ່ເຮັດວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະ ກອນ, ທະຫານ-ຕໍາຫລວດ ແລະ ປະຊາຊົນຊັ້ນຄົນຕ່າງໆ ໃຫ້ແຂງແຮງກວ່າເກົ່າ, ສ້າງສະຕິຕື່ນຕົວເປັນເຈົ້າການປົກປັກຮັກສາ ແລະ ພັດທະນາທ້ອງຖິ່ນຕົນ, ຍົກສູງສະຕິເຄົາລົບ ແລະ ປະຕິບັດລະບຽບກົດໝາຍ, ນ້ຳໃຈເສຍສະລະເພື່ອຊາດ ເພື່ອປະຊາຊົນ, ຄວາມບໍລິສຸດສັດຊື່, ຄວາມຮັບຜິດຊອບເຮັດແທ້ທໍາຈິງ, ແກ້ໄຂແນວຄິດເອື່ອຍອີງ-ຂາດຄວາມເປັນເຈົ້າ ແລະ ອື່ນໆ ໃຫ້ມີການຫັນປ່ຽນດີຂຶ້ນ.

ພິເສດ ໃນໂອກາດກະກຽມສະເຫລີມສະຫລອງ 2 ວັນ ປະຫວັດສາດນີ້, ຕ້ອງລົງເລິກສຶກສາອົບຮົມ ໃຫ້ຮັບຮູ້-ເຂົ້າໃຈມູນເຊື້ອຂອງພັກ, ຂອງຊາດ ກໍຄື ຂອງທ້ອງຖິ່ນ, ກໍາແໜ້ນ ແລະ ຮໍ່າຮຽນເອົາ ຄຸນສົມບັດ, ທັດສະນະແບບແຜນ ຂອງປະທານ ໄກສອນ ພົມວິຫານ ບັນພະບູລຸດຂອງຊາດ, ພ້ອມກັນນັ້ນ ຕ້ອງເຜີຍແຜ່-ແນະນໍາ ຊີ້ໃຫ້ເຫັນທຸກເລ່ຫລ່ຽມກົນອຸບາຍຂອງສັດຕູ ພວກຄົນບໍ່ດີ ທີ່ຫວັງທໍາລາຍມ້າງເພ ພັກ ແລະ ລະບອບການເມືອງ ເປັນຕົ້ນ ກົນອຸບາຍຫັນປ່ຽນໂດຍສັນຕິ ໃນທຸກຮູບແບບເຊັ່ນ: ການລະເມີດລະບຽບກົດໝາຍ, ບໍ່ນັບຖືການຈັດຕັ້ງ, ປະລະ ຫລື ຫລຸດຖອຍໃນການປະຕິບັດໜ້າທີ່, ບໍ່ຕັ້ງໜ້າຝຶກຝົນຫລໍ່ຫລອມຕົນເອງ, ການສວຍໃຊ້ໜ້າທີ່ ສໍ້ລາດບັງຫລວງ, ສ້າງກຸ່ມກ້ອນພັກພວກ ແລະ ອື່ນໆ ຕ້ອງສຸມໃສ່ແກ້ໄຂໃຫ້ມີການຫັນປ່ຽນຢ່າງແທ້ຈິງ; ອັນສໍາຄັນແມ່ນຕ້ອງສ້າງ ແລະຍົກສູງຄວາມເຊື່ອໝັ້ນ ຕໍ່ການນໍາພາ ແລະ ແນວທາງນະໂຍບາຍຂອງພັກ, ມີສະຕິ ແລະ ເປັນເຈົ້າຕອບຕ້ານທຸກຖ້ອຍທໍານອງ ໂຄສະນາບິດເບືອນ ຂອງອິດທິກໍາລັງປໍລະປັກ ແລະ ກຸ່ມຄົນບໍ່ດີ ໃຫ້ທັນການ.

ໃນໂອກາດນີ້, ສະຫາຍ ຄຳຂັນ ຈັນທະວີສຸກ ກໍາມະການສູນກາງພັກ, ເລຂາພັກແຂວງ, ເຈົ້າ ແຂວງຫລວງພະບາງ ໄດ້ລາຍງານຫຍໍ້ ສະພາບການພັດທະນາເສດຖະກິດ-ສັງຄົມ, ຕິດພັນກັບການຈັດ ຕັ້ງປະຕິບັດ 2 ວາລະແຫ່ງຊາດ, ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ການປັບ ປຸງກົງຈັກການຈັດຕັ້ງ, ການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກແຂວງຫລວງພະບາງຄັ້ງທີ IX ແລະ ການກະກຽມສ້າງຕັ້ງຕາແສງ. ໃນນັ້ນ, ທ່ານໄດ້ຍົກໃຫ້ເຫັນສະພາບພົ້ນເດັ່ນ ແມ່ນການຂະຫຍາຍຕົວທາງດ້ານເສດຖະກິດ ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ 3,94% ຕໍ່ປີ, ລວມຍອດຜະລິດຕະພັນພາຍໃນສະເລ່ຍໄດ້ 23 ລ້ານລ້ານກວ່າກີບ ຫລື ເທົ່າກັບ 1.067 ໂດລາສະຫະລັດ ຕໍ່ຄົນຕໍ່ປີ, ການກະກຽມ ແລະ ດໍາເນີນກອງປະຊຸມໃຫ່ຍອົງຄະນະພັກແຂວງ ຄັ້ງທີ IX ມາຮອດປັດຈຸ ບັນ ການດໍາເນີນກອງປະຊຸມໃຫຍ່ ຮາກຖານພັກອ້ອມຂ້າງແຂວງສໍາເລັດ 140 ຮາກຖານ, ກວມເອົາ 99,29%, ຍັງບໍ່ທັນສໍາເລັດ ມີ 1 ຮາກຖານພັກຄື: ໜ່ວຍພັກສະພາປະຊາຊົນແຂວງ ຈະດໍາເນີນກອງປະຊຸມໃຫຍ່ຫລັງກອງປະຊຸມໃຫຍ່ອົງຄະນະພັກແຂວງ, ສໍາເລັດກອງປະຊຸມໃຫຍ່ ຂອງສະຫະພັນນັກ ຮົບເກົ່າແຂວງ, ກອງປະຊຸມໃຫຍ່ຂອງ 3 ອົງການຈັດຕັ້ງມະຫາຊົນ. ພ້ອມນັ້ນ, ໄດ້ນໍາເອົາຮ່າງລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ ເຂົ້າຜ່ານໃນກອງປະຊຸມຄົບຄະນະບໍລິຫານງານພັກແຂວງເປີດກວ້າງ ຄັ້ງທີ 13 ເປັນຄັ້ງທີ 3 ແລະ ຮ່າງບົດສໍາຫລວດການນໍາພາລວມ ຂອງຄະນະບໍລິ ຫານງານພັກແຂວງ ສະໄໝທີ VIII ຜ່ານໃນກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ 13 ເປັນຄັ້ງທີ 1, ໄດ້ສໍາເລັດການທາບທາມບຸກຄະລາກອນຮອບ 1 ຢູ່ຂັ້ນນະຄອນ-ເມືອງ, ສ່ວນການກະກຽມ ສ້າງຕັ້ງຕາແສງ ຄາດຄະເນການສ້າງຕັ້ງຕາແສງ ເບື້ອງຕົ້ນເມືອງລະ 4-5 ຕາແສງ ລວມໃນທົ່ວແຂວງມີ 56 ຕາແສງ, 757 ບ້ານ, ມີພົນລະເມືອງ 542,921 ຄົນ.

ໃນການສໍາມະນາພິເສດ ໃນຫົວຂໍ້ “ສົ່ງເສີມການເຄື່ອນໄຫວການຄ້າເອເລັກໂຕຣນິກຂ້າມຊາຍແດນຫວຽດນາມລາວ” ພາຍໃຕ້ແນວຄິດ “ຮ່ວມເດີນທາງກັບວິສາຫະກິດໃນຍຸກດີຈິຕອນ” ທີ່ຈັດຂຶ້ນຢູ່ສູນການຄ້າລາວ-ໄອເຕັກ, Unitel ຜູ້ນຳດ້ານການໃຫ້ບໍລິການໂທລະຄົມມະນາຄົມຂອງ ສປປ ລາວ ໄດ້ນຳສະເໜີບົດບາດສໍາຄັນໃນການຂັບເຄື່ອນລະບົບນິເວດດີຈິຕອນ ຜ່ານແອັບພລິເຄຊັນ LaoApp ທີ່ສະແດງໃຫ້ເຫັນເຖິງທ່າແຮງໃນການເປັນກົນໄກສໍາຄັນໃນການເຊື່ອມຕໍ່ ແລະ ອໍານວຍຄວາມສະດວກໃນການດໍາເນີນທຸລະກິດຂ້າມແດນ, ພ້ອມນໍາສະເໜີລະບົບນິເວດດີຈິຕອນທີ່ມີLaoApp ເປັນສູນກາງ ແລະ ແພລັດຟອມການຄ້າເອເລັກໂຕຣນິກ Laoshop ເຊິ່ງເປັນໂອກາດອັນດີສໍາລັບທຸລະກິດຫວຽດນາມໃນການເຂົ້າເຖິງ ແລະ ນໍາສິນຄ້າອອກສູ່ຕະຫລາດລາວໄດ້ຢ່າງວ່ອງໄວ.ນອກນັ້ນ, LaoApp ຍັງແມ່ນແອັບພລິເຄຊັນລວມສູນ (Super App) ທີ່ຮວບຮວມເອົາຫລາຍບໍລິການທີ່ຈຳເປັນມາໄວ້ໃນບ່ອນດຽວ. ດ້ວຍວິໄສທັດທີ່ຈະເປັນສູນກາງດີຈິຕອນ ສຳລັບຊາວລາວ, LaoApp ໄດ້ຖືກພັດທະນາຢ່າງຕໍ່ເນື່ອງ ເພື່ອໃຫ້ຜູ້ໃຊ້ສາມາດເຂົ້າເຖິງຂໍ້ມູນ, ການບໍລິການ ແລະ ການເຊື່ອມຕໍ່ຕ່າງໆໄດ້ຢ່າງງ່າຍດາຍ ແລະ ມີປະສິດທິພາບ. LaoApp ຍັງຖືກອອກແບບມາເພື່ອເປັນເຄື່ອງ ມືທີ່ຫລາກຫລາຍ, ເຮັດໃຫ້ຜູ້ໃຊ້ງານສາມາດຈັດການກັບສິ່ງຕ່າງໆໃນຊີວິດປະຈໍາວັນ ໄດ້ຢ່າງສະດວກ ເປັນຕັ້ນ ດ້ານການສື່ສານ: ເປັນຊ່ອງທາງການສື່ສານທີ່ມີປະສິດທິພາບ, ອາດຈະລວມເຖິງການແລກ ປ່ຽນຂໍ້ມູນ ແລະ ການເຮັດວຽກຮ່ວມກັນ; ດ້ານຂໍ້ມູນຂ່າວສານ: ຜູ້ໃຊ້ສາມາດເຂົ້າເຖິງຂໍ້ມູນ, ໂຊຊ້ຽວມີເດຍ ແລະ ຂ່າວສານຕ່າງໆໄດ້ຢ່າງວ່ອງໄວ ແລະ ອື່ນໆອີກຫລາກຫລາຍ.

ທ່ານ ຫງວຽນ ມິງ ເຕີມ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດ ນາມ ປະຈຳ ສປປ ລາວ ໄດ້ເນັ້ນເຖິງຄວາມໝາຍຍຸດທະສາດ ຂອງການຄ້າເອເລັກໂຕຣນິກຂ້າມພົມແດນ ວ່າ: ການຄ້າເອເລັກໂຕຣນິກຂ້າມພົມແດນ ຄືເສັ້ນທາງທີ່ສັ້ນທີ່ສຸດ ແລະ ມີປະສິດທິຜົນທີ່ສຸດ ສໍາລັບວິສາຫະກິດຂອງສອງປະເທດ ໂດຍສະເພາະວິສາຫະກິດຂະໜາດກາງ ແລະ ຂະໜາດນ້ອຍ ເພື່ອສາມາດນໍາເອົາຜະລິດຕະພັນ ແລະ ສິນຄ້າຂອງຕົນໄປເຖິງຜູ້ບໍລິໂພກຂອງຕະຫລາດປະເທດເພື່ອນບ້ານໄດ້ໂດຍກົງ, ກ້າວຂ້າມຂໍ້ຈໍາກັດດ້ານພູມສາດ ແລະ ຕົ້ນທຶນ.

ງານສຳມະນາດັ່ງກ່າວ, ໄດ້ຮວບຮວມເອົາຜູ້ແທນຫລາຍກວ່າໜຶ່ງຮ້ອຍຄົນ, ລວມມີຜູ້ວາງນະໂຍ ບາຍ, ຜູ້ຊ່ຽວຊານ ແລະ ຜູ້ນຳດ້ານທຸລະກິດຂອງທັງສອງປະເທດ ເພື່ອເປັນບາດກ້າວສຳຄັນໃນການສ້າງຄວາມຮ່ວມມືທີ່ມີທ່າແຮງດ້ານເສດຖະກິດດີຈິຕອນ.

ໃນວັນທີ 21 ກໍລະກົດ 2025 ນີ້, ທ່ານ ພົນເອກ ຊົງວິດ ໜຸນພັກດີ ຜູ້ບັນຊາການທະຫານສູງສຸດ ກອງທັບ ແຫ່ງ ຣາຊະອານາຈັກໄທ ພ້ອມຄະນະ ໄດ້ເດີນທາງມາ ຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ ໂດຍການຕ້ອນຮັບຂອງ ທ່ານ ພົນຕີ ສາຍໃຈ ກົມມະສິດ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ປະຊາຊົນລາວ ພ້ອມດ້ວຍຄະນະ.

ໂອກາດນີ້, ສອງຝ່າຍໄດ້ພົບປະແລກປ່ຽນບົດຮຽນ ແລະ ຕີລາຄາຄືນສະພາບວຽກງານ ເຊິ່ງກັນ ແລະ ກັນ ໃນບັນຫາທີ່ສອງຝ່າຍມີຄວາມສົນໃຈ ແລະ ສອງຝ່າຍ ເຫັນດີເປັນເອກະພາບ ເພີ່ມທະວີຮ່ວມມືຊ່ວຍເຫລືອເຊິ່ງກັນ ແລະ ກັນ, ການແລກປ່ຽນຄະນະຜູ້ແທນຂັ້ນສູງຂອງທັງສອງຝ່າຍ ແລະ ເສີມສ້າງສາຍພົວພັນຮ່ວມມືທາງດ້ານເສດຖະກິດ ທີ່ດີຕະຫລອດຮອດການເພີ່ມທະວີການຮ່ວມມື ລະ ຫວ່າງ ກອງທັບປະຊາຊົນລາວ ແລະ ກອງທັບໄທ ໂດຍສະເພາະການຮ່ວມມື ຂອງຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ໄທ-ລາວ ສ້າງໃຫ້ສະພາບໃນຂອບເຂດເສັ້ນຊາຍແດນ ມີຄວາມສະຫງົບສຸກໂດຍພື້ນຖານ ເປັນຕົ້ນ ການແກ້ໄຂບັນຫາຢາເສບຕິດ, ບັນຫາການລັກລອບເຂົ້າເມືອງຜິດກົດໝາຍ ແລະ ບັນຫາອື່ນໆ ທີ່ເປັນໜໍ່ແໜງໃນການກໍ່ຄວາມບໍ່ສະຫງົບ, ສ້າງກົນໄກເຂົ້າໃນຂົງເຂດວຽກງານກະສິກຳ, ປູກຝັງ-ລ້ຽງສັດ ລະຫວ່າງ ສອງກອງທັບ ໃຫ້ເກີດດອກອອກຜົນ. ພ້ອມກັນນັ້ນ, ກໍຕ້ອງຮັກສາມູນເຊື້ອການໄປ-ມາຫາສູ່ ຢ່າງເປັນປົກກະຕິ ບົນພື້ນຖານຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ນອກຈາກນັ້ນ, ສອງຝ່າຍ ຍັງເຫັນດີເປັນເອກະພາບ ສືບຕໍ່ຮ່ວມມື ໃນວຽກງານດ້ານການຊ່ວຍເຫລືອມະນຸດສະທຳ, ການຕ້ານໄພພິບັດທາງທຳມະຊາດ, ການແລກປ່ຽນ ດ້ານການແພດ, ສິລະປະ-ວັດທະນະທຳ, ກິລາ ແລະ ຂອດການຮ່ວມມືໃນຂອບຂອງກອງປະຊຸມອາຊຽນ ລວມທັງບັນຫາອື່ນໆ ທີ່ສອງຝ່າຍໄດ້ສ້າງກົນໄກຮ່ວມກັນ.

ໂອກາດດຽວກັນນີ້, ຜູ້ບັນຊາການທະຫານສູງສຸດ ແຫ່ງ ຣາຊະອານາຈັກໄທ ພ້ອມດ້ວຍຄະນະ ຍັງໄດ້ເຂົ້າວາງພວງມາລາ ຢູ່ອະນຸສາວະລີນັກຮົບນິລະນາມ (ດາວແດງ) ຕື່ມອີກ.

ຂໍ້ມູນ-ພາບ: ໜັງສືພິມກອງທັບ

ໃນໂອກາດເດີນທາງຢ້ຽມຢາມ ແລະ ເຮັດວຽກກັບ ອົງການກວດສອບແຫ່ງລັດ ສສ ຫວຽດ ນາມ ລະຫວ່າງວັນທີ 16-20 ກໍລະກົດ 2025 ນີ້, ສະຫາຍ ວຽງທະວີສອນ ເທບພະຈັນ ກໍາມະການສໍາຮອງສູນກາງພັກ, ປະທານອົງການກວດສອບແຫ່ງລັດ (ອກສລ) ສປປ ລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ເຈິນ ແທັງ ເໝີນ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ສສ ຫວຽດນາມ.

ໂອກາດນີ້, ສະຫາຍ ປະທານສະພາແຫ່ງຊາດຫວຽດນາມ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນ ອົງການກວດສອບແຫ່ງລັດຂອງ ສປປ ລາວ ທີ່ເດີນທາງມາເຄື່ອນໄຫວວຽກງານຢູ່ ສສ ຫວຽດນາມ ໃນຄັ້ງນີ້, ເປັນການປະກອບສ່ວນເຂົ້າໃນການ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດຫວຽດນາມ-ລາວ ໂດຍສະເພາະສອງອົງການກວດສອບ ແຫ່ງລັດຫວຽດ ນາມ-ລາວ ໃຫ້ນັບມື້ແໜ້ນແຟ້ນຍິ່ງຂຶ້ນ, ອວຍພອນໃຫ້ຄະນະຜູ້ແທນ ອົງການກວດສອບແຫ່ງລັດ ແຫ່ງ ສປປ ລາວ ຈົ່ງປະສົບຄວາມສຳເລັດໃນການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ.

ພ້ອມກັນນີ້, ສະຫາຍ ວຽງທະວີສອນ ເທບພະຈັນ ໄດ້ຕາງໜ້າຄະນະຜູ້ແທນ ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ຂອງປະທານສະພາແຫ່ງຊາດຫວຽດນາມໃນຄັ້ງນີ້, ພ້ອມຢືນຢັນຈະຕັ້ງໜ້າເສີມຂະຫຍາຍສາຍພົວພັນຮ່ວມມື ລະຫວ່າງ ສອງອົງການກວດສອບແຫ່ງລັດ ລາວ-ຫວຽດ ນາມ ທີ່ມີມາແຕ່ດົນນານໃຫ້ໄດ້ຮັບການເສີມຂະຫຍາຍແຕກດອກອອກຜົນຍິ່ງໆຂຶ້ນ.

ໃນໄລຍະຢ້ຽມຢາມ ສສ ຫວຽດນາມ ໃນຄັ້ງນີ້, ໄດ້ພົບປະກັບອົງການກວດສອບແຫ່ງລັດ ສສ ຫວຽດນາມ ທີ່ນະຄອນຫລວງຮ່າໂນ້ຍ ແລະ ນະຄອນໂຮ່ຈີ່ມິງ ໂດຍໄດ້ຮັບການຕ້ອນຮັບຂອງ ສະຫາຍ ໂງ ວັນ ຕວັນ ປະທານອົງການກວດສອບແຫ່ງລັດ ສສ ຫວຽດນາມ ເຊິ່ງຄະນະຜູ້ແທນໄດ້ເຂົ້າຮ່ວມພົບປະສອງຝ່າຍ ແລະ ແລກປ່ຽນບົດຮຽນກ່ຽວກັບ ການມີສ່ວນຮ່ວມຂອງ ອົງການກວດສອບແຫ່ງລັດ ຕໍ່ການສ້າງແຜນງົບປະມານແຫ່ງລັດ ແລະ ຄວາມເຂົ້າໃຈຕໍ່ກັບກົນໄກ, ຂັ້ນຕອນວິທີການຈັດຕັ້ງປະຕິບັດ ຄໍາແນະນໍາຜົນຂອງການກວດສອບ.

ໃນໂອກາດດັ່ງກ່າວ, ຄະນະຜູ້ແທນລາວ ກໍໄດ້ເດີນທາງໄປຢ້ຽມຢາມອົງການກວດສອບ ປະຈໍາເຂດ 4 ນະຄອນໂຮ່ຈີ່ມິງ ສສ ຫວຽດນາມ ເຊິ່ງການພົບປະສອງຝ່າຍໃນຄັ້ງນີ້, ເປັນຂີດໝາຍສໍາຄັນ ໃນການສືບຕໍ່ເສີມຂະຫຍາຍສາຍພົວພັນຮ່ວມມື ພາຍໃຕ້ບົດບັນທຶກວ່າດ້ວຍການຮ່ວມມືສອງຝ່າຍທີ່ໄດ້ເຊັ່ນຮ່ວມກັນ ໃນປີ 2022 ແນໃສ່ຊຸກຍູ້ຊ່ວຍເຫລືອ ແລະ ສະໜັບສະໜູນເຊິ່ງກັນ ແລະ ກັນ ເພື່ອພັດທະນາຂະແໜງການ ກວດສອບແຫ່ງລັດຂອງສອງປະເທດ ໃຫ້ກ້າວໜ້າຢ່າງບໍ່ຢຸດຢັ້ງ, ທັງເປັນການປະກອບສ່ວນສຳຄັນເຂົ້າໃນການຜັນຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ກໍຄື ການເສີມຂະຫຍາຍສາຍພົວພັນ ທາງການທູດຄົບຮອບ 63ປີ (05/09/1962-05/09/2025).

ການພົບປະສອງຝ່າຍຄັ້ງນີ້, ຄະນະຜູ້ແທນແຕ່ລະຝ່າຍ ໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ແລະ ການຮ່ວມມືທີ່ພົ້ນເດັ່ນຂອງວຽກງານການກວດສອບ ໂດຍສະເພາະວຽກງານໂຄງການປັບປຸງບໍລິຫານອົງການກວດສອບແຫ່ງລັດ ຫັນເປັນທັນສະໄໝ(E-Office) ທີ່ໄດ້ຮັບທຶນການຊ່ວຍເຫລືອຈາກລັດຖະບານ ສສ ຫວຽດນາມ ກໍຄື ອົງການກວດສອບແຫ່ງລັດ ສສ ຫວຽດນາມ ໃນປີ 2024, ປຶກສາຫາລືກ່ຽວກັບແຜນກິດຈະກຳ ຮ່ວມມືສອງຝ່າຍໄລຍະກາງແຕ່ປີ 2026-2028. ພ້ອມກັນນັ້ນ, ກໍໄດ້ແລກປ່ຽນບົດຮຽນດ້ານວິຊາການ ຄື: ການມີສ່ວນຮ່ວມຂອງ ອົງການກວດສອບແຫ່ງລັດ ຕໍ່ການສ້າງແຜນງົບປະມານແຫ່ງລັດ ແລະ ຄວາມເຂົ້າໃຈຕໍ່ກັບກົນໄກ, ຂັ້ນຕອນວິທີການຈັດ ຕັ້ງປະຕິບັດຄໍາແນະນໍາການກວດສອບ. ການພົບປະຄັ້ງນີ້, ໄດ້ຕີລາຄາ ແລະ ເອກະພາບສູງຕໍ່ແຜນການຮ່ວມມື 2026-2028 ໂດຍມອບໃຫ້ກົມຮ່ວມມືສອງອົງການປະສານສົມທົບກັນ ເພື່ອສ້າງແຜນກິດ ຈະກຳລະອຽດ.

ຂ່າວ: ອກສລ

ນັບແຕ່ພັກປະຊາຊົນລາວ ໄດ້ຮັບການສ້າງຕັ້ງ (22 ມີນາ 1955), ພັກໄດ້ເອົາໃຈໃສ່ຢ່າງຈົດຈໍ່ໃນການປຸກລະດົມຂົນຂວາຍ, ກໍ່ສ້າງແມ່ຍິງ ໃຫ້ມີຄວາມຕື່ນຕົວປະກອບສ່ວນເຂົ້າໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກໍາລັງແຮງທີ່ສໍາຄັນຂອງພັກ. ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງ ຂຶ້ນຢ່າງເປັນທາງການ ຊຶ່ງເປັນຕົ້ນກໍາເນີດຂອງອົງການຈັດຕັ້ງແມ່ຍິງລາວ ໃນປັດຈຸບັນ. ໃນນັ້ນ, ໄດ້ແຕ່ງຕັ້ງຄະນະໜ່ວຍ 3 ສະຫາຍ ຄື: ສະຫາຍ ນາງ ຄໍາຫລ້າ ວົງສັກ ເປັນຫົວໜ້າ, ສະຫາຍ ນາງ ຄໍາສຸກ ວົງວິຈິດ ເປັນຮອງ ແລະ ສະຫາຍ ນາງ ຄໍາແພງ ບຸບຜາ ເປັນກໍາມະການ ຊຶ່ງໃນໄລຍະນັ້ນ ຢູ່ທ້ອງຖິ່ນຮາກຖານຍັງແມ່ນໜ່ວຍຍຸວັນນະລີ ໜ່ວຍແມ່ຍິງນັກຮົບ, ໜ່ວຍເອື້ອຍນັກຮົບມີໜ້າທີ່ຕົ້ນຕໍເບິ່ງແຍງ, ລ້ຽງດູຊຸກເຊື່ອງ, ຕິດຕໍ່, ສົ່ງເອກະສານຕ່າງໆໃຫ້ທະຫານທີ່ພວມປະຕິບັດໜ້າທີ່ຢູ່ແນວໜ້າ ແລະ ໃນເຂດຄວບຄຸມຂອງສັດຕູດ້ວຍຫລາຍຮູບແບບ ແລະ ຫລາຍວິທີການເປັນຕົ້ນແມ່ນການລໍາລຽງອາຫານ, ອາວຸດ, ເຄື່ອງນຸ່ງຫົ່ມໃຫ້ພະນັກງານນັກຮົບຢູ່ແນວໜ້າ. ພ້ອມນັ້ນ, ໄດ້ປຸກລະດົມຂົນຂວາຍຊາວໜຸ່ມ, ລູກຫລານອອກຮັບໃຊ້ປະເທດຊາດ, ປຸກລະດົມຂະບວນການແມ່ຍິງ ປະຕິບັດວຽກງານແນວຫລັງ, ເພີ່ມພູນຜະລິດຜົນຫາລ້ຽງກຸ້ມຕົນເອງ ພ້ອມທັງເຕົ້າໂຮມຄວາມສາມັກຄີ, ສຶກສາອົບຮົມແມ່ຍິງບັນດາເຜົ່າ ເຂົ້າເປັນກໍາລັງແຮງໃຫ້ກໍາລັງປະຕິວັດປົດປ່ອຍຊາດຄຽງບ່າຄຽງໄຫລ່ກັບເພດຊາຍຕະຫລອດມາ. 
ເພື່ອໃຫ້ສອດຄ່ອງກັບສະພາບ ການເຕີບໃຫຍ່ຂະຫຍາຍຕົວຂອງການຈັດຕັ້ງ ແລະ ໜ້າທີ່ ທີ່ຖືກຈາລຶກໄວ້ໃນປະຫວັດສາດໃນການປະກອບສ່ວນເພື່ອກອບກູ້ເອກະລາດ ແລະ ສ້າງສາພັດທະນາປະເທດ ຊາດ, “ໜ່ວຍຄົ້ນຄວ້າວຽກງານແມ່ຍິງ” ໄດ້ປ່ຽນຊື່ເປັນ “ສະມາຄົມແມ່ຍິງລາວຮັກຊາດ” ເດືອນມັງ ກອນ ປີ 1956 ສະມາຄົມແມ່ຍິງລາວຮັກຊາດແມ່ນສືບທອດມາຈາກໜ່ວຍຄົ້ນຄວ້າວຽກງານແມ່ຍິງ, ອະດີດຄະນະນໍາໜ່ວຍຄົ້ນຄວ້າວຽກງານແມ່ຍິງ ກໍໄດ້ຖືກແຕ່ງຕັ້ງໃຫ້ສືບຕໍ່ນໍາພາສະມາຄົມແມ່ຍິງລາວຮັກຊາດ ແຕ່ໃນຖານະບົດບາດສູງກວ່າ. ຈາກນັ້ນ ກໍ່ໄດ້ຂະຫຍາຍສະມາຄົມແມ່ຍິງລາວຮັກຊາດ ລົງສູ່ຮາກຖານເພື່ອປ່ຽນແທນໜ່ວຍແມ່ນັກຮົບ, ໜ່ວຍເອື້ອຍນັກຮົບ ແລະ ໜ່ວຍຍຸວັນນາລີ ທີ່ໄດ້ຮັບການຈັດຕັ້ງ ແລະ ໄດ້ເຄື່ອນໄຫວປະຕິວັດມາແຕ່ກ່ອນນັ້ນ. ສະມາຄົມແມ່ຍິງລາວຮັກຊາດແມ່ນເຮັດໜ້າທີ່ເຕົ້າໂຮມຄວາມສາມັກຄີຢ່າງກວ້າງຂວາງ ລະຫວ່າງ ແມ່ຍິງລາວບັນດາເຜົ່າ, ຜູ້ມີນ້ໍາໃຈຮັກຊາດ, ຮັກສັນຕິພາບໂດຍບໍ່ຈໍາແນກຜູ້ຮັ່ງມີ, ຜູ້ທຸກຈົນ, ຊົນຊັ້ນ, ຊົນຊາດ, ສາສະໜາ, ໂດຍຮ່ວມກັບປວງຊົນລາວທັງຊາດ ຕັດສິນໃຈຕໍ່ສູ້ໂຄ່ນລົ້ມຈັກກະພັດຜູ້ຮຸກຮານ ແລະ ລູກແຫລ່ງຕີນມື, ເພື່ອປົດປ່ອຍປະເທດຊາດຍາດເອົາຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວ; ກໍ່ສ້າງປະເທດໃຫ້ມີສັນຕິພາບ, ເອກະລາດ, ເປັນກາງ, ປະຊາທິປະໄຕ, ເອກະພາບ ແລະ ວັດທະນາຖາວອນ. 
ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງທີ່ການເມືອງຂອງພັກ ກໍ່ຄື ຂອງປະເທດຊາດໃນໄລຍະໃໝ່. ສະນັ້ນ, ກອງປະຊຸມໃຫຍ່ຄັ້ງປະຫວັດສາດຂອງແມ່ຍິງລາວທົ່ວປະເທດ ຄັ້ງທີ I ໄດ້ໄຂຂຶ້ນໃນວັນທີ 21-24 ມີນາ 1984 ແລະ ໄດ້ຕົກລົງເປັນເອກະພາບປ່ຽນຊື່ຈາກ “ສະມາຄົມແມ່ຍິງລາວຮັກຊາດ” ມາເປັນ “ສະຫະພັນແມ່ຍິງລາວ” ຈົນເຖິງປັດຈຸບັນ.