ໂດຍປະຕິບັດຕາມແຜນການຮ່ວມມື ລະຫວ່າງ ພັກ ປປ ລາວ ແລະ ພັກກອມມູນິດຈີນ ແລະ ແຜນ ການຮ່ວມມື ລະຫວ່າງ ຄະນະພົວພັນຕ່າງປະເທດ ຂອງ 2 ສູນກາງພັກ ລາວ-ຈີນ ປະຈຳປີ 2025 ກໍຄື ແຜນແມ່ບົດວ່າດ້ວຍ ການສ້າງຄູ່ຮ່ວມຊາຕາກໍາ ລາວ-ຈີນ ສະບັບປີ 2024-2028, ຄະນະຜູ້ແທນ ຂອງພັກກອມມູນິດຈີນ ນຳໂດຍ ສະຫາຍ ເສີນໂຈ ຮອງຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ພ້ອມຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 16-18 ກໍລະກົດ 2025.

ໃນວັນທີ 17 ກໍລະກົດ 2025 ນີ້, ສະຫາຍ ເສີນໂຈ ໄດ້ພົບປະເຮັດວຽກກັບ ສະຫາຍ ບຸນເຫລືອ ພັນດານຸວົງ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ. ໃນໂອກາດນີ້, ຝ່າຍລາວ ໄດ້ສະແດງຄວາມຊົມເຊີຍຕໍ່ການຢ້ຽມຢາມ-ເຮັດວຽກ ຢູ່ ສປປ ລາວ ຂອງ ສະຫາຍ ເສີນໂຈ ພ້ອມດ້ວຍຄະນະ ໃນຄັ້ງນີ້ ເຊິ່ງເປັນການປະກອບ ສ່ວນທີ່ສໍາຄັນເຂົ້າໃນການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ກໍຄື ການເສີມຂະຫຍາຍການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ. ພ້ອມນີ້, ສອງຝ່າຍ ຍັງໄດ້ຮ່ວມກັນຕີລາຄາຄືນການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນໄລຍະຜ່ານມາ ກໍຄື ການປະສານສົມທົບກັນ ລະຫວ່າງ 2 ຄະນະພົວພັນຕ່າງປະເທດສູນກາງພັກ ລາວ-ຈີນ ໃນການຊຸກຍູ້ຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ບັນດາແຜນການຮ່ວມມື ລະຫວ່າງ ສອງພັກ ແລະ ການຈັດຕັ້ງຜັນຂະຫຍາຍບັນດາເນື້ອໃນຈິດໃຈ ທີ່ການນຳສອງພັກ, ສອງລັດ ລາວ-ຈີນ ໄດ້ຕົກລົງເປັນເອກະພາບກັນ ໃຫ້ປະກົດຜົນເປັນຈິງ ແລະ ປຶກສາຫາລື ກ່ຽວກັບທິດທາງການຮ່ວມມື ລະຫວ່າງ ສອງພັກ ໃນຕໍ່ໜ້າ.

ໃນໂອກາດມາຢ້ຽມຢາມ ສປປ ລາວ ຄັ້ງນີ້, ສະຫາຍ ເສີນໂຈ ພ້ອມດ້ວຍຄະນະ ຍັງໄດ້ພົບປະເຮັດວຽກກັບ ສະຫາຍ ຄຳມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຜູ້ປະຈໍາການ ສະພາທິດສະດີສູນກາງພັກ; ພົບປະກັບ ສະຫາຍ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມທັງໄດ້ຮ່ວມກັນ ຈັດກອງປະຊຸມແລກປ່ຽນບົດຮຽນກັບ ພາກສ່ວນກ່ຽວຂ້ອງຂອງລາວ ແລະ ຢ້ຽມຢາມໂຄງການຮ່ວມມື ລາວ-ຈີນ ທີ່ສໍາຄັນຈໍານວນໜຶ່ງ ຢູ່ນະຄອນຫລວງວຽງຈັນ ຕື່ມອີກ.

ຂ່າວ-ພາບ: ຄຕພ

ສູນວັດທະນະທຳຈີນ ປະຈຳລາວ ຈັດງານສຳຜັດ ວັດທະນະທຳການຊົງຊາ ແລະ ດື່ມຊາຈີນ ພາຍໃຕ້ຫົວຂໍ້ “ຊາສູ່ຄວາມປອງດອງ’’ ໃນວັນທີ 19 ກໍລະກົດ 2025 ແນໃສ່ເຮັດໃຫ້ຜູ້ເຂົ້າຮ່ວມ ໄດ້ຮຽນຮູ້ ແລະ ເຂົ້າໃຈ ກ່ຽວກັບ ວັດທະນະທຳການຊົງຊາ ແລະ ດື່ມຊາຈີນ, ລວມເຖິງທິດສະດີການຊົງຊາ ເຊິ່ງເປັນວັດທະນະທຳ ທີ່ມີຄວາມປານີດ, ລະອຽດອ່ອນ ທີ່ມີມາແຕ່ບູຮານ ຂອງຈີນ ທີ່ໄດ້ສືບທອດກັນມາຈົນຮອດປັດຈຸບັນ, ຊາທີ່ນຳມາສາທິດ ໃນຄັ້ງນີ້, ແມ່ນຊາແດງ ເປັນຊາທີ່ເໝາະສຳລັບຄົນທີ່ມີອາການທາງເດີນປັດສະວະບໍ່ດີ, ຄົນເປັນໂລກຫົວໃຈ, ມີອາການທ້ອງອືດ, ມື-ຕີນເຢັນ, ມັກໜາວ, ຮ່າງກາຍອ່ອນເພຍ ແລະ ຜູ້ອາຍຸສງ.

ໂອກາດນີ້, ທ່ານ ນາງ ວຽງນະຄອນ ວົງວິໄຊ ອາຈານສອນສິລະປະການຊົງຊາຈີນ ໄດ້ຍົກໃຫ້ເຫັນ ຕົ້ນກຳເນີດ ແລະ ການພັດທະນາຂອງຊາຈີນ ນັບແຕ່ອະດີດຈົນຮອດປັດຈຸບັນ, ພ້ອມທັງ ຍົກໃຫ້ເຫັນວັດທະນະທຳການນຸ່ງຖື ແລະ ການແຕ່ງໜ້າ ໃນເວລາຊົງຊາ, ແນະນຳອຸປະກອນການຊົງຊາ, ວິທີຊົງຊາ, ສາທິດການຊົງຊາ ແລະ ອື່ນໆ ເຊິ່ງອຸປະກອນການຊົງຊາຂອງຈີນ. ຊາຈີນ ມີຫລາຍປະເພດ, ຫລາຍລົດຊາດ ທີ່ແຕກຕ່າງກັນ ເປັນຕົ້ນແມ່ນ ຊາຂຽວ, ຊາຂາວ, ຊາເຫລືອງ, ຊາອູຫລົງ, ຊາແດງ, ຊາດຳ, ຊາດອກໄມ້, ຊາໝາກໄມ້ ແລະ ຊາອື່ນໆ ເຊິ່ງມີລົດຊາດ ແລະ ສັບພະຄຸນທີ່ແຕກຕ່າງກັນ.

ກອງປະຊຸມ ທາບທາມບຸກຄະລາກອນທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກແຂວງເຊກອງ ສະໄໝທີ Xl (ຮອບທີ 2) ຈັດຂຶ້ນໃນວັນທີ 21 ກໍລະກົດ 2025 ໂດຍການເປັນປະທານຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ມີຄະບໍລິຫານງານພັກແຂວງ, ຄະນະບໍລິຫານງານພັກ 4 ເມືອງ, ຄະນະພັກຮາກຖານອ້ອມຂ້າງແຂວງ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ສະຫາຍ ບຸນຫລາຍ ບຸດທິ ຮັກສາການເລຂາພັກແຂວງ, ຮັກສາການເຈົ້າແຂວງເຊກອງ ໄດ້ລາຍງານໃຫ້ຮູ້ ກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ຢູ່ພາຍໃນແຂວງ ກໍຄື ການກະກຽມຄວາມພ້ອມຮອບດ້ານໃຫ້ແກ່ການດຳເນີນກອງປະຊຸມໃຫຍ່ອົງຄະນະພັກແຂວງເຊກອງ ຄັ້ງທີ Xl ໂດຍສະເພາະ ດ້ານຂະບວນການ, ດ້ານເນື້ອໃນ, ດ້ານບຸກຄະລາກອນ ແລະ ດ້ານງົບປະມານ, ພ້ອມນີ້, ກອງປະຊຸມກໍໄດ້ມີການຜ່ານຮ່າງບົດລາຍງານການເມືອງ II ພາກ; ຮ່າງແຜນພັດທະນາເສດຖະກິດ-ສັງ ຄົມ 5 ປີ ຂອງແຂວງ; ຮ່າງບົດສໍາຫລວດການນໍາພາລວມຂອງຄະນະບໍລິຫານງານພັກແຂວງ ທີ່ໄດ້ມີການປັບປຸງຕາມການມີຄໍາເຫັນຂອງບັນດາຜູ້ແທນກອງປະຊຸມ ແລະຄະນະຮັບຜິດຊອບຊຸກຍູ້ຕິດຕາມກອງປະຊຸມໃຫຍ່ອົງຄະນະພັກແຂວງຂັ້ນສູນກາງ ໃນຄັ້ງຜ່ານມາ. ຈາກນັ້ນ, ກໍໄດ້ຜ່ານມາດຕະຖານ, ເງື່ອນໄຂ ຂອງຄະນະບໍລິຫານງານພັກແຂວງ ແລະ ມາດຕະຖານຄະນະປະຈຳພັກແຂວງ, ເລຂາ-ຮອງເລຂາພັກແຂວງ ແລະ ປະທານ-ຮອງປະທານຄະນະກວດກາພັກແຂວງ ເພື່ອເປັນບ່ອນອີງໃຫ້ແກ່ຜູ້ແທນກອງປະຊຸມ ໄດ້ນຳໄປຄົ້ນຄວ້າ, ເລືອກເຟັ້ນເອົາຄະນະບໍລິຫານງານພັກແຂວງ (ຊຸດໃໝ່) ໃຫ້ໄດ້ຜູ້ທີ່ມີມາດຕະ ຖານ, ເງື່ອນໄຂຄົບຖ້ວນ ຕາມທີ່ໄດ້ກຳນົດໄວ້.

ໃນໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ ເພື່ອເປັນບ່ອນອີງໃນການຄົ້ນຄວ້າພິຈາລະນາ, ນຳໃຊ້ສິດປະຊາທິປະໄຕ ບົນພື້ນຖານຫລັກການທີ່ກຳນົດໄວ້ ໂດຍບຸກຄະລາກອນ ທີ່ຈະສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກແຂວງເຊກອງ ສະໄໝທີ Xl (ຮອບທີ 2) ຕ້ອງເປັນຜູ້ທີ່ດີເດັ່ນ ມີຄວາມຮູ້, ຄວາມສາມາດ ຄົບຕາມມາດຕະຖານ ເຊິ່ງປະກອບດ້ວຍເພດ-ເຜົ່າ, ໃຫ້ມີຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ ຢ່າງສົມເຫດສົມຜົນ. ພ້ອມນີ້, ກໍຮຽກຮ້ອງໃຫ້ຜູ້ແທນກອງປະຊຸມ ຕ້ອງໄດ້ມີທັດສະນະການເມືອງທີ່ໜັກແໜ້ນ ແລະເອົາໃຈໃສ່ຢ່າງເປັນເຈົ້າການໃນການລົງຄະແນນສຽງທາບທາມບຸກຄະລາກອນອອກສະໝັກຮັບເລືອກຕັ້ງ ໃນຄັ້ງນີ້ ໃຫ້ຖືກຕ້ອງຕາມລະບຽບຫລັກການ ແລະ ຄວາມເປັນຈິງ.

ຈາກນັ້ນ, ກໍໄດ້ດຳເນີນການປ່ອນບັດທາບທາມບຸກຄະລາກອນ ທີ່ຈະອອກສະໝັກຮັບເລືອກຕັ້ງເຂົ້າໃນໂຄງປະກອບຄະນະບໍລິຫານງານພັກແຂວງເຊກອງ ສະໄໝທີ Xl (ຮອບທີ 2) ຕາມລະບຽບຂອງພັກ.

ຂ່າວ: ອັດສະວິນ

ຮ້ານກະແລັມໂປະ ແລະ ຄາເຟ ຕັ້ງຢູ່ບ້ານເມືອງວາ ເມືອງສີໂຄດຕະບອງ ນະຄອນຫລວງວຽງຈັນ, ເປັນຮ້ານອາຫານ ແລະ ເຄື່ອງດື່ມປະເພດເຂົ້າ, ນໍ້າປັ່ນໝາກໄມ້ຕາມລະດູການ, ກະແລັມ ແລະ ຄາເຟ ທີ່ລູກຄ້າໃຫ້ຄວາມສົນໃຈຫລາຍເນື່ອງຈາກວ່າສະຖານທີ່ກວ້າງຂວາງຕົບແຕ່ງແບບທໍາມະຊາດທີ່ສວຍງາມ ພ້ອມດຽວກັນກໍ່ມີກະແລັມໝາກພ້າວແຊບໆທີ່ຕົບແຕ່ງໜ້າດ້ວຍໝາກຖົ່ວດິນ, ເຂົ້າໜົມຝອງທອງ, ໝາກຕາວ ນອກນີ້, ຍັງມີເມນູນໍ້າທີ່ຫລາກຫລາຍ ແລະ ຕຳເມນູຕ່າງໆໄວ້ບໍລິ ການລູກຄ້າ.  

ທ່ານນາງ ຈັນສະໝອນ ບຸນປະເສີດ ເຈົ້າຂອງຮ້ານກະແລັມໂປະ ແລະ ຄາເຟ ໄດ້ໃຫ້ຮູ້ວ່າ: ຈຸດເລີ່ມຕົ້ນຂອງຮ້ານອາຫານ ແລະ ຄາເຟແຫ່ງນີ້ ເກີດຈາກຄວາມມັກ ແລະ ຢາກເຮັດທຸລະກິດ ເພື່ອສ້າງລາຍຮັບເຂົ້າຄອບຄົວ ໂດຍຮ້ານຈະມີຄວາມໂດດເດັ່ນຢູ່ທີ່ໝູນໃຊ້ກະໂປະໝາກພ້າວມາໃຊ້ເປັນພາຊະນະບັນຈຸກະແລັມ ຈຶ່ງເປັນທີ່ມາຂອງຊື່ຮ້ານວ່າ: “ກະແລັມໂປະ”  ພ້ອມດຽວກັນນີ້ ກໍ່ມີການຕົບແຕ່ງຮ້ານໃຫ້ໄດ້ບັນຍາກາດແບບທໍາມະຊາດ ຈຶ່ງປະດັບດາປະດ້ວຍການນຳໃຊ້ໄມ້ ແລະ ເຄື່ອງເກົ່າແກ່ມາຕົບແຕ່ງຮ້ານໂດຍປະສົມສານກັບຄວາມທັນສະໄໝໄດ້ຢ່າງລົງຕົວທີ່ສຸດ ແລະ ເນັ້ນຄວາມຮົ່ມເຢັນຂອງຕົ້ນໄມ້ທໍາມະຊາດ. ສໍາລັບກະແລັມພາຍໃນຮ້ານແມ່ນປຸງດ້ວຍສູດສະເພາະທີ່ຂ້າພະເຈົ້າສຶກສາຄົ້ນຄວ້າດ້ວຍຕົນເອງ, ປຸງດ້ວຍວັດຖຸດິບຈາກທໍາມະຊາດທີ່ມີຄຸນນະພາບ ແລະ ຜະລິດສົດໃໝ່ທຸກໆມື້ປາສະຈາກສານກັນບູດ; ນອກຈາກກະແລັມທີ່ເປັນອາຫານຫວານຂຶ້ນຊື່ແລ້ວພາຍໃນຮ້ານແມ່ນມີລາຍການອາຫານປະເພດຕຳອັນເປັນທີ່ນິຍົມຊົມຊອບໄດ້ແກ່: ຕຳຫລວງພະບາງ, ຕຳໝາກໄມ້ຕາມລະດູການ ແລະ ລາຍການອາຫານອື່ນໆ ໂດຍຈະຈຳໜ່າຍໃນລາຄາທີ່ລູກຄ້າທຸກທ່ານສາມາດເຂົ້າເຖິງໄດ້. ເພື່ອຕອບສະໜອງຄວາມຕ້ອງການຂອງລູກຄ້າໃນສັງຄົມທີ່ນັບມື້ນັບເພີ່ມຂຶ້ນຮ້ານກະແລັມໂປະ ແລະ ຄາເຟ ແມ່ນມີແຜນຈະຂະຫຍາຍສາຂາເພີ່ມຕື່ມ ໂດຍຈະຮັກສາມາດຕະຖານການບໍລິການ ແລະ ຄຸນນະພາບຂອງລົດຊາດອາຫານທີ່ເປັນເອກະລັກສະເພາະເອົາໄວ້ໃຫ້ດີທີ່ສຸດ.
ຮ້ານກະແລັມໂປະ ແລະ ຄາເຟ ເປີດບໍລິການວັນອັງຄານ – ວັດອາທິດ (ປິດທຸກໆວັນຈັນ) ສະຖານທີ່ຕັ້ງຢູ່ບ້ານເມືອງວາ, ເມືອງສີໂຄດຕະບອງ, ນະຄອນຫລວງວຽງຈັນ; ພິເສດຮ້ານກະແລັມໂປະ ແລະ ຄາເຟ ແມ່ນມີບໍລິການຮັບຈັດງານລ້ຽງງານສັງສັນອີກດ້ວຍ ແລະ ສາມາດສອບຖາມຂໍ້ມູນເພີ່ມຕື່ມໄດ້ທີ່ Facebook : ຮ້ານກະແລ້ມໂປະ & ຄາເຟ.

ໃນເວລາ 07 ໂມງ ເຊົ້າຂອງວັນທີ 22 ກໍລະກົດ 2025 ພາຍຸໝູນເຂດຮ້ອນວິພາ (Wipha), ມີຈຸດສູນກາງໃນເສັ້ນຂະໜານທີ 20.3 ອົງສາເໜືອ ແລະ ເສັ້ນແວງທີ 107.0 ອົງສາຕາເວັນອອກ ກໍາລັງເຄື່ອນທີ່ໄປທາງທິດຕາເວັນຕົກສ່ຽງໃຕ້ດ້ວຍຄວາມໄວ 15 ກິໂລແມັດຕໍ່ຊົ່ວໂມງ, ຄາດວ່າຈະອ່ອນກໍາລັງລົງກາຍເປັນພາຍຸດີເປຼຣຊັນ ແລະ ຈະເຄື່ອນຂື້ນແຄມຝັ່ງພາກເໜືອຂອງປະເທດຫວຽດນາມ ໃນຕອນບ່າຍ ຫາ ຄໍ່າຂອງມື້ນີ້, ຊຶ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫລື້ອມ ໃນລະດັບຄ່ອຍ ຫາ ປານກາງຢູ່ທົ່ວໄປ ໃນແຕ່ລະພາກ ແລະ ຕົກໜັກ ຫາ ໜັກຫລາຍ ພ້ອມຈະມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງແຂວງຜົ້ງສາລີ,

ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫລວງນ້ຳທາ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ໃນໄລຍະທີ 22 ຫາ 23 ກໍລະກົດ 2025 ນີ.

້ ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນທຸກພາກສ່ວນ ຜູ້ທີ່ອາໄສຢູ່ໃກ້ລຽບຕາມແມ່ນໍ້າ ແລະ ເຂດພື້ນທີ່ຕໍ່າເຊັ່ນວ່າ: ຕາມລໍານ້ຳ ແລະ ແຄມແມ່ນ້ຳ, ໃນແຕ່ລະພາກ. ຈົ່ງມີສະຕິລະມັດລະວັງ ແລະ ກຽມພ້ອມຮັບມືກັບສະພາບຝົນໜັກຕິດຕໍ່ກັນຫລາຍວັນທີາຈະເຮັດໃຫ້ເກີດດິນເຈື່ອນ, ນ້ຳຖ້ວມຊຸ ແລະ ນ້ຳຖ້ວມຍື່ງ ທີ່ຈະສົ່ງຜົນເສຍຫາຍແກ່ຊີວິດ ແລະ ຊັບສິນອັນມີຄ່າ, ສໍາຫລັບຜູ້ທີ່ຈະເດີນທາງຜ່ານພູສູງ ຕ້ອງໄດ້ກວດສອບສະພາບອາກາດ, ສະພາບຫົນທາງ ກ່ອນອອກເດີນທາງ. ພ້ອມນີ້ຂໍໃຫ້ຕດິຕາມຂ່າວພະຍາກອນອາກາດ ຈາກກົມອຸຕຸນຍິມົ ແລະ ອຸທົກກະສາດ ຢ່າງຕໍ່ເນື່ອງ.

ໃນປະຫວັດສາດຂອງການພົວພັນສາກົນ ສາຍພົວພັນມິດຕະພາບທີ່ເປັນມູນເຊື້ອຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໄດ້ເປັນແວ່ນແຍງແບບຢ່າງອັນພົ້ນເດັ່ນທີ່ບໍ່ເຄີຍມີມາກ່ອນ ໂດຍໄດ້ເອົາຜົນມາສູ່ປະຊາຊົນສອງປະເທດທັງໃນຂະບວນການຕໍ່ສູ້ເພື່ອເອກະລາດເສລີພາບ ແລະ ຄວາມຮຸ່ງເຮືອງສີວິໄລໃນໄລຍະສ້າງສາ ແລະ ພັດທະນາປະເທດຊາດ.
ຈຸດພິເສດໃນສາຍພົວພັນລະຫວ່າງສອງຊາດ ລາວ-ຫວຽດນາມ ແມ່ນພວກເຮົາໄດ້ຕໍ່ສູ້ຮ່ວມກັນ ແລະ ໄດ້ຮັບໄຊຊະນະໃນໄລຍະດຽວກັນຂອງປະຫວັດສາດການປະຕິວັດຄື: ໃນປີ 1945, ສອງປະເທດໄດ້ຢືດອຳນາດການປົກຄອງ, ໃນປີ 1954 ໄດ້ຮັບໄຊຊະນະລ່າເມືອງຂຶ້ນແບບເກົ່າ, ປີ 1975 ໄດ້ຮັບໄຊຊະນະໃນສົງຄາມຕໍ່ຕ້ານຈັກກະພັດອາເມລິກາ, ສຳເລັດການປະຕິວັດປົດປ່ອຍປະເທດຊາດ ແລະ ປະຕິບັດພາລະກິດປັບປຸງໃໝ່ຢ່າງມີຜົນສຳເລັດ. ສາຍພົວພັນລະຫວ່າງ ພັກ-ລັດ ແລະ ປະຊາຊົນສອງປະເທດແມ່ນ ສາຍພົວພັນທີ່ຈົງຮັກພັກດີ, ໂປ່ງໃສ, ຄວາມເຄົາລົບເຊິ່ງກັນ ແລະ ກັນການຊ່ວຍເຫລືອຢ່າງສຸດອົກສຸດໃຈ, ໝົດຈິດໝົດໃຈ. ຜ່ານຄວາມຍາກເຂັນ. ສາຍພົວພັນດັ່ງກ່າວບໍ່ໄດ້ແຕກແຫງທັງບໍ່ໄດ້ທັບມ້າງເຖິງແມ່ນວ່າພວກກຳລັງສັດຕູຈະພະຍາຍາມເຄື່ອນໄຫວຕ້ານ ແລະ ທຳລາຍ, ກົງກັນຂ້າມສາຍພົວພັນນັ້ນນັບມື້ນັບຊື່ສັດຈິງໃຈແໜ້ນແຟ້ນ. ດັ່ງທີ່ສະຫາຍເລຂາທິການໃຫຍ່, ປະທານປະເທດ ໄກສອນ ພົມວິຫານ ເຄີຍໄດ້ກ່າວວ່າ:“ ໃນປະຫວັດສາດການປະຕິວັດທົ່ວໂລກມີຫລາຍແວ່ນແຍງແບບຢ່າງອັນດີເດັ່ນກ່ຽວກັບນ້ຳໃຈສາກົນກຳມະຊີບແຕ່ບໍ່ມີຢູ່ບ່ອນໃດ ແລະ ບໍ່ເຄີຍມີຈັກເທື່ອຄວາມສາມັກຄີຮ່ວມສຳພັນສູ້ຮົບແບບພິເສດດົນນານ ແລະ ຮອບດ້ານຄືດັ່ງການພົວພັນຫວຽດນາມ-ລາວ, ຫລາຍຮຸ່ນລູກຫລານຊາວຫວຽດນາມໄດ້ມາຊ່ວຍເຫລືອປະຊາຊົນລາວຕໍ່ສູ້ເພື່ອເອກະລາດເສລີພາບ ແລະ ສ້າງຊີວິດໃໝ່ ໄປສູ່ຄວາມຈະເລີນຮຸ່ງເຮືອງ ແລະ ຄວາມສຸກ. ຫລາຍສະຫາຍໄດ້ອຸທິດຕະຫລອດຊີວິດຂອງຕົນສຳຫລັບການປະຕິວັດລາວ, ຖືເອົາປະເທດລາວເປັນປະເທດຊາດທີສອງຂອງຕົນ. ໃນທົ່ວດິນແດງແຫ່ງປະເທດລາວ, ເລືອດຂອງນັກຮົບຫວຽດນາມ ໄດ້ປະສົມເຂົ້າກັບເລືອດຂອງພະນັກງານສະມາຊິກພັກນັກຮົບ ແລະ ປະຊາຊົນລາວ. ປະຊາຊົນລາວກໍ່ໄດ້ເສຍສະລະເລືອດເນື້ອປະກອບສ່ວນເຂົ້າໃນການເພີ່ມທະວີ ແລະ ປັບປຸງສາຍພົວພັນອັນພິເສດດັ່ງກ່າວ… ເພື່ອປະຕິບັດຄໍາໂອວາດສຸດທ້າຍຂອງລຸງໂຮ່, ສົມຄວນກັບເລືອດເນື້ອຂອງນັກຮົບວິລະຊົນຫລວງຫລາຍ, ນ້ຳຕາຫລາຍໆຢົດຂອງບັນດາຜູ້ເປັນແມ່, ເຫື່ອແຮງ ແລະ ສຸດອົກສຸດໃຈຂອງພີ່ນ້ອງຮ່ວມຊາດ ແລະ ເພື່ອນຜູ້ຮ່ວມອຸດົມການຂອງສອງປະເທດພວກເຮົາ, ພວກຂ້າພະເຈົ້າປາດຖະໜາຢາກຮ່ວມແຮງຮ່ວມໃຈນຳປະຊາຊົນຫວຽດນາມ ໃນການປົກປັກຮັກສາຄວາມສາມັກຄີແບບພິເສດຕະຫລອດກາລະນານ”.
ຜ່ານຄໍາເວົ້າອັນມີຄວາມໝາຍຂອງປະທານ ໄກສອນ ພົມວິຫານ ນັ້ນ, ການນຳລາວຫລາຍຮຸ້ນຄົນກໍໄດ້ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໃຫ້ບັນລຸຈຸດຍອດຍິ່ງ ແລະ ເຕັມປ່ຽມໄປດ້ວຍນ້ຳໃຈອັນ ຊື່ສັດຈິງໃຈເຊິ່ງກັນ ແລະ ກັນ, ສະໜິດຕິດແໜ້ນກັນຕໍ່ສູ້ເສຍສະລະ ເພື່ອຄວາມເປັນເອກະລາດເສລີພາບ ແລະ ພາລະກິດສ້າງສາ, ປົກປັກຮັກສາປະເທດ. ໂດຍຜ່ານໄລຍະປະຕິວັດທີ່ຫຍຸ້ງຍາກ ແລະ ໄຊຊະນະອັນສະຫງ່າງາມຂອງປະຊາຊົນສອງຊາດ ລາວ-ຫວຽດນາມ, ປະເທດລາວໄດ້ສະແດງໃຫ້ເຫັນຢ່າງຈະແຈ້ງບົດບາດສຳຄັນຄຸນຄ່າການປະຕິວັດ, ມະນຸດສະທຳ ແລະ ປະສິດທິຜົນໃຫຍ່ໆຂອງສາຍພົວພັນມິດຕະພາບອັນຍິ່ງໃຫຍ່ຄວາມສາມັກ ຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວຫວຽດນາມ.
ໂດຍ: ຄະນະ ບກ

ເນື່ອງໃນໂອກາດວັນປະຊາກອນໂລກ, ທ່ານ ປີໂອ ສະມິດ  (Mr. Pio Smith), ຜູ້ອຳນວຍການປະຈຳພາກພື້ນອາຊີ ແລະ ປາຊີຟິກ ອົງການສະຫະປະຊາຊາດ ກອງທຶນປະຊາກອນ (UNFPA), ຮຽກຮ້ອງໃຫ້ມີລະບົບສ້າງຄວາມເຂັ້ມແຂງໃຫ້ແກ່ໄວໜຸ່ມໃນທົ່ວພາກພື້ນໃຫ້ມີຄວາມສາມາດຕັດສິນໃຈດ້ວຍຕົນເອງກ່ຽວກັບອະນາຄົດຂອງເຂົາເຈົ້າ, ໂດຍພໍ່-ແມ່ ແມ່ນເປັນທາງເລືອກບໍ່ແມ່ນເປັນຄວາມສ່ຽງ ຫລື ເປັນພາລະ. 
ໃນທົ່ວຂົງເຂດອາຊີ ແລະ ປາຊີຟິກ, ອັດຕາການເກີດແມ່ນກຳລັງຫລຸດລົງ, ຫລາຍຫົວຂໍ້ຂ່າວເຕືອນກ່ຽວກັບການລົ້ມສະຫລາຍຂອງປະຊາກອນ ແລະ ໄວໜຸ່ມແມ່ນກຸ່ມທີ່ຖືກສັງຄົມຕຳນິວ່າ ບໍ່ສົນໃຈທີ່ຈະມີລູກ. ຢ່າງໃດກໍ່ຕາມ, ວິກິດການທີ່ແທ້ຈິງບໍ່ແມ່ນກ່ຽວກັບການມີລູກຫລາຍຄົນເກີນໄປ ຫລື ມີລູກໜ້ອຍເກີນໄປ. ບັນຫາທີ່ແທ້ຈິງແມ່ນກ່ຽວກັບໄວໜຸ່ມສາມາດກຳນົດຊີວິດຄອບຄົວໄດ້ວ່າຈະສ້າງຄອບຄົວຕອນໃດ ແລະ ແບບໃດຕາມແບບທີ່ນິຍົມຂອງພວກເຂົາຕ້ອງການ, ມີໄວໜຸ່ມຈຳນວນຫລາຍຄົນມັກຕັ້ງຄຳຖາມວ່າ: ຂ້ອຍສາມາດສ້າງຊີວິດຕາມແບບທີ່ຂ້ອຍຕ້ອງການໄດ້ບໍ່? ຄຳຕອບກໍ່ຄື: “ບໍ່”. ນີ້ແມ່ນເລື່ອງລາວກ່ຽວກັບການເກີດທີ່ພວກເຮົາຕ້ອງການບອກເລົ່າ ເຊິ່ງມັນບໍ່ແມ່ນເລື່ອງທີ່ເກີດມາຈາກຄວາມວິຕົກກັງວົນ,  ແຕ່ມັນກ່ຽວກັບຄວາມຈຳເປັນອັນຮີບດ່ວນທີ່ພວກເຮົາຕ້ອງສົ່ງເສີມສິດທິຄວາມສາມາດດ້ານການຈະເລີນພັນ ແລະ ທາງເລືອກທີ່ແທ້ຈິງ. 
ຢູ່ຫລາຍພາກພື້ນ ແລະ ທົ່ວໂລກ, ໄວໜຸ່ມມັກຖືກກີດກັນຈາກການເປັນພໍ່-ແມ່ ຫລື ຖືກບັງຄັບໃຫ້ກາຍເປັນພໍ່-ແມ່ ພາຍໃຕ້ລະບົບທີ່ບໍ່ເປັນມິດ. ສິ່ງເຫລົ່ານີ້ ລວມເຖິງລະບົບທີ່ບັງຄັບໃຫ້ເດັກຍິງຕ້ອງກາຍເປັນແມ່ກ່ອນໄວອັນຄວນ ໂດຍບໍ່ມີສິດເຂົ້າເຖິງການຄຸມກຳເນີດ ຫລື ການສຶກສາ, ລະບົບທີ່ເຮັດໃຫ້ຄູ່ຮັກ (ຄູ່ຜົວເມຍ) ຕ້ອງເລື່ອນການມີລູກເພາະຄວາມບໍ່ໝັ້ນຄົງໃນໜ້າທີ່ວຽກງານ, ທີ່ຢູ່ອາໄສທີ່ແພງເກີນໄປ ຫລື ບົດບາດຍິງຊາຍທີ່ເຄັ່ງຄັດ. ນອກຈາກນີ້, ຍັງມີການກີດກັນໄວໜຸ່ມຍ້ອນຄຳຖາມທີ່ວ່າ: ເຂົາເຈົ້າແມ່ນໃຜ, ເຂົາເຈົ້າຮັກໃຜ, ຫລື ເຂົາເຈົ້າອາໄສຢູ່ໃສ ?. 
ສອງສາມເດືອນທີ່ຜ່ານມາ, ຂ້ອຍໄດ້ມີໂອກາດໂອ້ລົມແມ່ຍິງຄົນໜຶ່ງ ເຊິ່ງລາວມີລູກແຕ່ອາຍຸ 17 ປີ ຢູ່ເຂດຫ່າງໄກສອກຫລີກແຫ່ງໜຶ່ງ ໃນປະເທດວານົວຕູ. ລາວໄດ້ໃຊ້ເວລາຫລາຍຊົ່ວໂມງ ຍ່າງໄປຄຣີນິກທີ່ໃກ້ທີ່ສຸດສຳລັບລາວ . ນີ້ແມ່ນຄັ້ງທຳອິດທີ່ລາວໄດ້ເຂົ້າເຖິງການບໍລິການດ້ານສຸຂະພາບໃນຖານະເປັນຄົນໄວໜຸ່ມ, ໃນສະຖານທີ່ແຫ່ງນີ້ ບໍ່ມີການສະໜອງການບໍລິການວາງແຜນຄອບຄົວ ແລະ ບໍ່ໃຫ້ບໍລິການດູແລກ່ອນເກີດ. ເຖິງຈະເປັນແນວນັ້ນກໍຕາມ, ລາວໄດ້ເວົ້າເຖິງຄວາມຝັນຂອງຕົນທີ່ຢາກຮຽນຈົບການສຶກສາ ແລະ ເປັນຄູສອນ. ຄວາມມຸ່ງຫວັງຂອງລາວບໍ່ແມ່ນເລື່ອງພິເສດ, ແຕ່ອຸປະສັກທີ່ຂັດຂວາງຄວາມຝັນຂອງລາວນັ້ນ ແມ່ນພິເສດແທ້ໆ. 
ເລື່ອງລາວປະເພດນີ້ ບໍ່ແມ່ນເລື່ອງແປກ, ມັນໄດ້ສົ່ງສຽງສະທ້ອນໄປທົ່ວພາກພື້ນ. ຕົວຢ່າງເຊັ່ນ: ຫລາຍກວ່າ 40% ຂອງການຖືພາໃນໄວໜຸ່ມແມ່ນເກີດຂຶ້ນ ໂດຍບໍ່ໄດ້ຕັ້ງໃຈ ແລະ ມີໄວໜຸ່ມທີ່ມີເພດສຳພັນ ໂດຍທີ່ຍັງບໍ່ໄດ້ແຕ່ງງານພຽງໜຶ່ງໃນສີ່ເທົ່ານັ້ນ ທີ່ໄດ້ນຳໃຊ້ການວາງແຜນຄອບຄົວແບບທັນສະໄໝ. ໃນເຂດຊົນນະບົດ, ທີ່ມີຄວາມຂັດແຍ່ງ ແລະ ທ່າມກາງກຸ່ມຄົນດ້ອຍໂອກາດ, ອຸປະສັກທີ່ໄວໜຸ່ມກໍາລັງຜະເຊີນແມ່ນໜັກໜ່ວງຫລາຍກວ່າບ່ອນອື່ນ. ໃນນັ້ນ, ອຸປະສັກທີ່ໃຫຍ່ຫລວງແມ່ນຢູ່ໃນກຸ່ມປະຊາກອນເຄື່ອນຍ້າຍຖິ່ນຖານ, ໄວໜຸ່ມທີ່ມີຄວາມຫລາກຫລາຍທາງເພດ (LGBTQIA+), ໄວໜຸ່ມພິການ ແລະ ກຸ່ມຊົນເຜົ່າ. 
ໃນບາງປະເທດ, ອະຄະຕິທາງສັງຄົມ ແລະ ຂໍ້ຈຳກັດທາງກົດໝາຍໄດ້ກາຍເປັນສິ່ງກີດຂວາງບໍ່ໃຫ້ໄວໜຸ່ມເຂົ້າເຖິງການດູແລສຸຂະພາບທາງເພດ ແລະ ສຸຂະພາບຈະເລີນພັນ. ໃນຂະນະທີ່ບ່ອນອື່ນໆ, ບັນທັດຖານທາງເພດທີ່ເຄັ່ງຄັດ, ໂດຍສະເພາະສຳລັບກຸ່ມໄວໜຸ່ມທີ່ຍັງບໍ່ໄດ້ແຕ່ງງານ, ກໍເປັນອີກສາເຫດໜຶ່ງ. ຍິ່ງໄປກວ່ານັ້ນ, ໃນເຂດທີ່ໄດ້ຮັບຜົນກະທົບຈາກວິກິດການ, ການບໍລິການເຫລົ່ານີ້ ແມ່ນບໍ່ສາມາດສະໜອງ ຫລື ບໍ່ມີສະໜອງຢູ່ເລີຍ, ສິ່ງເຫລົ່ານີ້ ບໍ່ພຽງແຕ່ເປັນຊ່ອງຫວ່າງທາງດ້ານສຸຂະພາບເທົ່ານັ້ນ ແຕ່ມັນຍັງແມ່ນຄວາມບົກພ່ອງທາງດ້ານຄວາມຍຸຕິທຳ.  
ເຖິງແມ່ນວ່າຫລາຍບ່ອນສາມາດສະໜອງການບໍລິການໄດ້ແຕ່ຄວາມບໍ່ໝັ້ນຄົງທາງເສດຖະກິດ, ພາລະການດູແລ ແລະ ຄວາມຄາດຫວັງຂອງສັງຄົມ ຍັງຄົງເປັນອຸປະສັກຕໍ່ການຕັດສິນໃຈກ່ຽວກັບການຈະເລີນພັນ. ບົດລາຍງານສະຖານະພາບ ປະຊາກອນໂລກປະຈຳປີ 2025 ຂອງອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ຊີ້ໃຫ້ເຫັນວ່າ ໃນປະເທດໄທ, ເຊິ່ງເປັນປະເທດທີ່ຄົນສ່ວນໃຫຍ່ຕ້ອງການມີລູກສອງຄົນ ຫລື ຫລາຍກວ່ານັ້ນ, ອັດຕາການເກີດລູກໃນປະເທດນີ້ ໄດ້ຫລຸດລົງເຫລືອພຽງ 1,2 ຄົນຕໍ່ແມ່ຍິງໜຶ່ງຄົນ. ສ່ວນໃນປະເທດ ສາທາລະນະລັດເກົາຫລີ, ອັດຕາການເກີດລູກ ມີພຽງ 0,8 ເຊິ່ງເປັນອັດຕາທີ່ຕໍ່າທີ່ສຸດໃນໂລກ ບໍ່ແມ່ນຍ້ອນວ່າ ປະຊາຊົນປະຕິເສດການເປັນພໍ່ແມ່, ແຕ່ຍ້ອນສະພາບແວດລ້ອມທີ່ຢູ່ອ້ອມຂ້າງພວກເຂົາຂັດຂວາງບໍ່ໃຫ້ພວກເຂົາບັນລຸຄວາມມຸ່ງຫວັງຂອງພວກເຂົາ. 
ຄວາມອາດສາມາດໃນດ້ານການຈະເລີນພັນມີຄວາມໝາຍຫລາຍກວ່າການເຂົ້າເຖິງການບໍລິການ, ຄວາມຈິງແລ້ວມັນໝາຍ ເຖິງສິດໃນການຕັດສິນໃຈບົນພື້ນ ຖານຂໍ້ມູນທີ່ຄົບຖ້ວນ, ປາສະຈາກອະຄະຕິ, ການຈຳແນກ ແລະ ການບັງຄັບ. ໃນນີ້, ມັນໝາຍເຖິງຄວາມສາມາດໃນການສ້າງຄອບຄົວ ຫລື ບໍ່ສ້າງຢ່າງປອດໄພ, ມີກຽດ ແລະ ດ້ວຍຄວາມຫວັງ. ປັດຈຸບັນນີ້, ໄວໜຸ່ມກຳລັງເດີນທາງຢູ່ໃນໂລກທີ່ເຕັມໄປດ້ວຍໄພພິບັດຈາກການປ່ຽນແປງຂອງດິນຟ້າອາກາດ, ຄວາມບໍ່ໝັ້ນຄົງທາງເສດຖະກິດ ແລະ ຄວາມຂັດແຍ່ງທີ່ເພີ່ມຂຶ້ນ. ຫລາຍຄົນຮູ້ສຶກວ່າ ພວກເຂົາໄດ້ຮັບມໍລະດົກອະນາຄົດທີ່ມີຄວາມສ່ຽງກວ່າໃນໄລຍະຂອງພໍ່ແມ່ຂອງພວກເຂົາ ເຊິ່ງເປັນອະນາຄົດທີ່ຖືກກຳນົດໂດຍການຕັດສິນໃຈທີ່ພວກເຂົາບໍ່ໄດ້ເຂົ້າຮ່ວມ ແລະ ເມື່ອຄວາມຫວັງຫາຍໄປ, ຄວາມຕັ້ງໃຈທີ່ຈະນຳພາເດັກນ້ອຍເຂົ້າມາໃນໂລກກໍຫາຍໄປນຳ. ແຕ່ສິ່ງນີ້ແມ່ນສິ່ງທີ່ສາມາດຫລີກລ້ຽງ. 
ຖ້າພວກເຮົາຕ້ອງການເຫັນຄອບຄົວທີ່ເຂັ້ມແຂງຂຶ້ນ ແລະ ສັງ ຄົມທີ່ມີພູມຕ້ານທານທີ່ດີ, ພວກເຮົາຕ້ອງສ້າງເງື່ອນໄຂທີ່ເຮັດໃຫ້ທຸກຄົນສາມາດເລືອກໄດ້ ແລະ ມີຄວາມຫວັງ. ນັ້ນໝາຍເຖິງການສະໜອງບໍລິການສຸຂະພາບທີ່ເປັນມິດຕໍ່ກັບໄວໜຸ່ມ ແລະ ເພດສຶກສາແບບຄົບຖ້ວນ ແລະ ຮອບດ້ານ, ພ້ອມທັງວຽກທີ່ເໝາະສົມ, ທີ່ຢູ່ອາໄສທີ່ບໍ່ແພງເກີນໄປ ແລະ ມີໄລຍະລາພັກລ້ຽງລູກທີ່ພຽງພໍ. ນອກຈາກນີ້, ສິ່ງທີ່ກ່າວມາຂ້າງເທິງນັ້ນ ມັນຍັງໝາຍເຖິງການສ້າງພື້ນທີ່ດິຈິຕອນທີ່ປອດໄພ ແລະ ສຳລັບໝົດທຸກຄົນ ແລະ ລະບົບການສຶກສາທີ່ສະໜອງເຄື່ອງມືໃຫ້ໄວໜຸ່ມກາຍເປັນຜູ້ນຳພາ ແລະ ຊ່ວຍເຫລືອເຂົາໃຫ້ມີຄວາມຈະເລີນກ້າວໜ້າ. ຄຽງຄູ່ກັນນີິ້, ມັນຍັງໝາຍເຖິງການລົງທຶນໃສ່ການແກ້ໄຂບັນຫາໂດຍໄວໜຸ່ມເອງ, ການໃຫ້ຄຳປຶກສາ ແລະ ການສ້າງພາວະການເປັນຜູ້ນຳສິ່ງເຫລົ່ານີ້ ຕ້ອງຖືກກຳນົດໃຫ້ເປັນບູລິມະສິດບໍ່ແມ່ນຈະກຳນົດເປັນບູມະສິດໃນພາຍຫລັງ. 
ທັງໝົດເຫລົ່ານີ້ ບໍ່ສາມາດບັນລຸໄດ້ດ້ວຍການວາງນະໂຍບາຍຊຸກຍູ້ພຽງຄັ້ງດຽວ ຫລ່ື ນະໂຍບາຍແບບຕອບໂຕ້. ມັນຮຽກຮ້ອງໃຫ້ມີການລົງທຶນຢ່າງຕໍ່ເນື່ອງ ແລະ ໄລຍະຍາວໃນລະບົບທີ່ສ້າງຂຶ້ນ ເພື່ອສົ່ງເສີມສິດທິ ແລະ ກຽດສັກສີ, ເຊິ່ງບໍ່່ກ່ຽວຂ້ອງກັບອັດຕາການຈະເລີນພັນ. ພວກເຮົາຕ້ອງຢຸດຕິຄວາມພະຍາຍາມທີ່ຈະແກ້ໄຂ ອັດຕາການຈະເລີນພັນ, ສິ່ງທີ່ຕ້ອງແກ້ໄຂແມ່ນລະບົບທີ່ກຳລັງສ້າງຄວາມເສຍຫາຍໃຫ້ແກ່ຊາວໜຸ່ມຂອງພວກເຮົາ.ໄວໜຸ່ມຄົນໜຶ່ງທີ່ໄດ້ປະກອບສ່ວນເຂົ້າໃນບົດລາຍງານສະພາບປະຊາກອນໂລກປະຈຳປີນີ້ ໄດ້ກ່າວໄວ້ຢ່າງຖືກຕ້ອງທີ່ສຸດວ່າ: “ກ່ອນທີ່ຂ້ອຍຈະນໍາພາເດັກນ້ອຍເຂົ້າມາໃນໂລກນີ້, ຂ້ອຍຕ້ອງຕໍ່ສູ້ ເພື່ອສິດທິທີ່ຈະເຮັດແນວນັ້ນຕາມເງື່ອນໄຂຂອງຕົວເອງ. ນີ້ບໍ່ແມ່ນພຽງແຕ່ການຕໍ່ສູ້ຂອງຂ້ອຍມັນແມ່ນການຕໍ່ສູ້ຂອງໄວໜຸ່ມຫລາຍພັນລ້ານຄົນທີ່ຖືກກັກຂັງຢູ່ໃນລະບົບທີ່ກີດກັ້ນສິດທິ ແລະ ກຽດສັກສີທີ່ພວກເຂົາຕ້ອງໄດ້ຮັບ.” 
ໃນວັນປະຊາກອນໂລກປີນີ້, ພວກເຮົາໃຫ້ຄຳໝັ້ນສັນຍາທີ່ຈະຮັບຟັງຄຳຮຽກຮ້ອງຂ້າງເທິງນັ້ນ ແລະ ພະຍາຍາມຕອບສະໜອງຕໍ່ຂໍ້ຮຽກຮ້ອງດັ່ງກ່າວ. ຂໍໃຫ້ພວກເຮົາສ້າງພາກພື້ນທີ່ໄວໜຸ່ມທຸກຄົນມີອຳນາດ ແລະ ຄວາມສາມາດໃນການຕັດສິນໃຈກ່ຽວກັບອະນາຄົດຂອງຕົນເອງ, ການເປັນພໍ່-ແມ່ ແມ່ນການມີສິດທິໃນການເລືອກບໍ່ແມ່ນພາລະ ຫລື ຄວາມສ່ຽງ ແລະ ບ່ອນທີ່ອະນາຄົດຖືກສ້າງຂຶ້ນຈາກຄວາມຫວັງບໍ່ແມ່ນຍ້ອນຄວາມຢ້ານກົວ.
(ຂໍ້ມູນຈາກ: ອົງການ UNFPA)

ປັດຈຸບັນ, ບົດບາດເອື້ອຍນ້ອງແມ່ຍິງລາວ ໄດ້ຮັບການເຊີດຊູສູງຂຶ້ນໃນສັງຄົມລາວ, ເວ ທີສາກົນ ແລະ ພາກພື້ນ ເຊິ່ງ ພັກ ແລະ ລັດຖະບານ ສ້າງເງື່ອນໄຂໃຫ້ແມ່ຍິງລາວບັນດາເຜົ່າ ມີຊີວິດການເປັນຢູ່ດີຂຶ້ນທາງດ້ານວັດຖຸ ແລະ ຈິດໃຈ, ແມ່ຍິງລາວຫລາຍທ່ານໄດ້ບຸກບືນ ແລະ ພັດທະນາຕົນເອງໃຫ້ມີຄວາມຮູ້, ຄວາມສາມາດເທົ່າທຽມກັບເພດຊາຍ, ກາຍເປັນການນໍາຂັ້ນສູງຂອງພັກ, ລັດ, ທັງໄດ້ເຂົ້າຮ່ວມກອງປະຊຸມສຳຄັນຕ່າງໆທັງຢູ່ພາຍໃນ ແລະ ບັນດາປະເທດເພື່ອນມິດໃນໂລກ, ສາມາດຕັດສິນບັນຫາສຳຄັນຕ່າງໆໃນຫລາຍເວທີ.

ທ່ານ ນາງ ໂພສີ ໄຊຍະສອນ ນັກທຸລະກິດຍິງ ໄດ້ໃຫ້ສໍາພາດໃນໂອກາດຄົບຮອບ 70 ປີ ວັນສ້າງຕັ້ງສະຫະພັນແມ່ຍິງລາວ ເມື່ອບໍ່ດົນມານີ້, ໂດຍທ່ານໄດ້ຍົກໃຫ້ເຫັນ ພາລະບົດບາດ, ຄວາມສຳຄັນຂອງແມ່ຍິງ ຕໍ່ຄອບຄົວ ເປັນຕົ້ນ ການເບິ່ງແຍງດູແລພໍ່-ແມ່, ເປັນຄົນສຳຄັນໃນການສຶກສາອົບຮົມ, ເບິ່ງແຍງລູກເຕົ້າ ໃຫ້ກາຍເປັນຄົນດີ, ເຮັດວຽກເຮືອນ ແລະ ສ້າງບັນຍາກາດທີ່ອົບອຸ່ນໃຫ້ກັບຄອບຄົວ ກໍຄື ສາມີ ແລະ ລູກ, ສາມາດເວົ້າໄດ້ວ່າ ເບື້ອງຫລັງຄວາມສໍາເລັດຂອງຄອບຄົວ ລ້ວນແຕ່ມີແມ່ຍິງ ທີ່ເປັນແຮງຊຸກດັນ ແລະ ເປັນກຳລັງໃຈສໍາຄັນ. ນອກຈາກນີ້, ແມ່ຍິງໄດ້ປະກອບສ່ວນຊ່ວຍສັງຄົມດ້ານຕ່າງໆ, ແມ່ຍິງຈຳນວນໜຶ່ງ ໄດ້ປະຕິບັດໜ້າທີ່ເປັນການນໍາເພດຍິງ, ພະນັກງານລັດຖະກອນ ໃນອົງການ ຈັດຕັ້ງພັກ-ລັດ ຄຽງບ່າຄຽງໄຫລ່ອ້າຍນ້ອງຊາຍ ຕັ້ງແຕ່ໄລຍະຕໍ່ສູ້ກູ້ຊາດໃນເມື່ອກ່ອນ ກໍຄື ປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ທ່ານ ນາງ ໂພສີ ໄຊຍະສອນ ຍັງໃຫ້ຮູ້ອີກວ່າ: ແມ່ຍິງລາວ ໃນປັດຈຸບັນ, ຕ້ອງພັດທະນາຕົນເອງທຸກດ້ານ, ໃຫ້ມີຄວາມຮູ້, ຄວາມສາມາດ, ບໍ່ຢຸດທີ່ຈະຮຽນຮູ້ ແລະ ພັດທະນາຕົນເອງ, ຕ້ອງເປັນແມ່ຍິງທີ່ທັນສະໄໝ, ກ້າຄິດ, ກ້າສະແດງອອກ. ໃນຄະນະດຽວກັນ, ກໍໃຫ້ຮັກສາຮີດຄອງປະເພນີ, ນິ້ມນວນ ອ່ອນຫວານ, ອ່ອນໂຍນ ແຕ່ບໍ່ອ່ອນແອ.

ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ການຈັດເກັບລາຍຮັບໃນໄລຍະ 06 ເດືອນຕົ້ນປີ 2025, ດ່ານພາສີສາກົນນາເພົ້າ ແຂວງຄຳມ່ວນ ສາມາດເກັບລາຍ 334,8 ຕື້ກວ່າກີບ ເທົ່າກັບ 168,26% ຂອງແຜນການ (199 ຕື້ກີບ). ໃນຂະຍະທີ່ ດ່ານພາສີສາກົນນາເພົ້າ ໄດ້ຮັບຕົວເລກມອບໝາຍຈາກກະຊວງການເງິນ ໃນປີ 2025 ຈຳນວນ 398 ຕື້ກີບ, ທຽບໃສ່ໄລຍະດຽວຂອງປີຜ່ານມາຈໍານວນ 305 ຕື້ກີບ, ເພີ່ມຂຶ້ນ 30,49%.

ທ່ານ ສຸພັດ ສຸແສງໄທ ຮັກສາການຫົວໜ້າຄະນະຄຸ້ມຄອງດ່ານສາກົນນາເພົ້າ ໄດ້ລາຍງານເມື່ອບໍ່ດົນມານີ້ວ່າ: ລາຍຮັບຈາກໝວດສິນຄ້າຕົ້ນຕໍ ທີ່ໄດ້ລື່ນແຜນປະກອບມີ: ຄ່າຊັກພິເສດ ຂາອອກ ປະຕິບັດໄດ້ 235,9 ຕື້ກວ່າກີບ; ປະເພດພາຫະນະ ປະຕິບັດໄດ້ 3,1 ຕື້ກວ່າກີບ; ສິ້ນສ່ວນ-ອາໄຫລ່ ປະຕິບັດໄດ້ 1,8 ຕື້ກວ່າກີບ; ເຄື່ອງກໍ່ສ້າງປະຕິບັດໄດ້ 3,2 ຕື້ກວ່າກີບ; ເຄື່ອງໃຊ້ດ້ວຍໄຟຟ້າ ປະຕິບັດໄດ້ 3,7 ຕື້ກວ່າກີບ; ເຄື່ອງອຸປະໂພກ-ບໍລິໂພກ ປະຕິບັດໄດ້ 3,8 ຕື້ກວ່າກີບ; ສິນຄ້າຕາມສັນຍາອາຊຽນ 42 FORM-D ປະຕິບັດໄດ້ 42,9 ຕື້ກວ່າກີບ; ສິນຄ້າຕາມສັນຍາສອງຝ່າຍ 43 FORM-S ປະຕິບັດໄດ້ 4,5 ຕື້ກວ່າກີບ. ສຳລັບລາຍຮັບຈາກໝວດສິນຄ້າຕົ້ນຕໍ ທີ່ໄດ້ຫລຸດແຜນປະກອບມີປະເພດ ນໍ້າມັນເຊື້ອໄຟ; ຄ່າທໍານຽມຕ່າງໆ; ຄ່າປັບໃໝ ແລະ ຂາຍເຄື່ອງຮິບ.

ທ່ານ ສຸພັດ ສຸແສງໄທ ໃຫ້ຮູ້ຕື່ມວ່າ: ສາຍເຫດທີ່ພາໃຫ້ເກັບລາຍຮັບໄດ້ລື່ນແຜນການໃນ 06 ເດືອນຕົ້ນປີຜ່ານມາ ແມ່ນໄດ້ຈາກການສົ່ງອອກສິນຄ້າປະເພດແຮ່ທາດຕ່າງໆ ເພີ່ມຂຶ້ນ, ການນໍາເຂົ້າສິນຄ້າຕາມສັນຍາອາຊຽນເພີ່ມຂຶ້ນ, ສິນຄ້າປະເພດ ອາໄຫລ່, ເຄື່ອງກໍ່ສ້າງ, ເຄື່ອງໄຟຟ້າ ແລະ ເຄື່ອງອຸປະໂພກ-ບໍລິໂພກ ກໍເພີ່ມຂຶ້ນເຊັ່ນດຽວກັນ. ຄຽງຄູ່ກັບການເພີ່ມຂຶ້ນສະຖິຕິການນໍາເຂົ້າສິນຄ້າ, ບາງໝວດກໍຫລຸດລົງຫລາຍປະເພດສິນຄ້າ ເຊັ່ນ: ນໍ້າມັນເຊື້ອໄຟ ແລະ ຄ່າທໍານຽມຕ່າງໆ ຍ້ອນສະພາບເສັ້ນທາງເປ່ເພ ກະທົບຕໍ່ການຂົນສົ່ງສິນຄ້າ ເສດຖະກິດພາຍໃນປະເທດ ແລະ ຂອງໂລກ, ອັດຕາເງິນເຟີ້ ເພີ່ມທະວີສູງຂຶ້ນເລື້ອຍໆ. ພ້ອມນີ້, ການປະຕິບັດມູນຄ່າແຈ້ງຕາມລາຄາຊື້-ຂາຍຕົວຈິງ ຍັງບໍ່ທັນຄຸ້ມຄອງໄດ້ຢ່າງມີປະສິດທິພາບ ຄຽງຄູ່ກັບຂໍ້ສະດວກຍັງມີຫຍຸ້ງຍາກຈໍານວນໜຶ່ງທີ່ຕ້ອງໄດ້ສືບຕໍ່ແກ້ໄຂ ເນື່ອງຈາກການໃຊ້ລະບົບທີ່ທັນສະໄໜ ເຂົ້າໃນການບໍລິການ ຖ້າລະບົບສັນຍານອິນເຕີເນັດຂັດຂ້ອງ ແມ່ນເຮັດໃຫ້ພົບຄວາມຫຍຸ້ງຍາກຫລາຍ ແລະ ລະບົບເຄືອຂ່າຍສາຍໄຍແກ້ວທາງດ່ານ ກໍມີພຽງເຄືອຂ່າຍດຽວຂອງບໍລິສັດ ລາວໂທລະຄົມ. ນອກຈາກນີ້, ການສຶກສາອົບຮົມແນວຄິດ ເຖິງວ່າໄດ້ເຮັດຢ່າງຕໍ່ເນື່ອງ, ແຕ່ການຫັນປ່ຽນຕົວຈິງກໍຍັງມີໜ້ອຍ ເປັນຕົ້ນ ການບຸກທະລຸທາງດ້ານຈິນຕະນາການ ຍັງບໍ່ທັນໄດ້ຮັບການຈັດຕັ້ງປະຕິບັດຢ່າງເດັດຂາດ, ພະນັກງານສະມາຊິກພັກຈໍານວນໜຶ່ງ, ຄວາມຮູ້-ຄວາມສາມາດ, ປະສົບການຍັງມີຈໍາກັດ, ຄວາມເປັນແບບຢ່າງນຳພາຍັງເຮັດບໍ່ທັນໄດ້ດີເທົ່າທີ່ຄວນ, ການປະຕິບັດມູນຄ່າແຈ້ງພາສີຕາມລາຄາຊື້-ຂາຍຕົວຈິງ ຍັງບໍ່ສາມາດຄຸ້ມຄອງໄດ້ຢ່າງມີປະສິດທິພາບ, ສ່ວນຫລາຍແມ່ນໄດ້ເຍືອງເບິ່ງລາຄາຂອງສອງດ່ານ, ດ່ານນໍ້າພາວ ແລະ ດ່ານແດນສະຫວັນ. ສໍາລັບຕົວເລກຄາດຄະເນລາຍຮັບໃນໄລຍະ 06 ເດືອນທ້າຍປີ 2025 ຈະປະຕິບັດໃຫ້ໄດ້ 117,8 ຕື້ກວ່າກີບ ແລະ ຄາດຄະເນຕົວເລກປະຕິບັດລາຍຮັບໝົດປີ 2025 ໃຫ້ໄດ້ 452,6 ຕື້ກວ່າກີບ.

ຂ່າວ-ພາບ: ແດງສະຫວັດ ແສນພານິດ

ໃນໂອກາດເຄື່ອນໄຫວວຽກງານຢູ່ແຂວງຫລວງພະບາງ ໃນວັນທີ 18 ກໍລະກົດ 2025 ຜ່ານມາ, ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະ ເລຂາທິການສູນກາງພັກ, ຮອງປະທານປະເທດ ໄດ້ພົບປະໂອ້ລົມພະນັກງານຫລັກແຫລ່ງແຂວງຫລວງພະບາງ ໂດຍໄດ້ທິດຊີ້ນໍາໃຫ້ຄະນະບໍລິຫານງານພັກແຂວງ ເອົາໃຈໃສ່ປັບປຸງວຽກງານຫລາຍດ້ານ ເປັນຕົ້ນ ໃຫ້ສືບຕໍ່ເຮັດວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະ ກອນ, ທະຫານ-ຕໍາຫລວດ ແລະ ປະຊາຊົນຊັ້ນຄົນຕ່າງໆ ໃຫ້ແຂງແຮງກວ່າເກົ່າ, ສ້າງສະຕິຕື່ນຕົວເປັນເຈົ້າການປົກປັກຮັກສາ ແລະ ພັດທະນາທ້ອງຖິ່ນຕົນ, ຍົກສູງສະຕິເຄົາລົບ ແລະ ປະຕິບັດລະບຽບກົດໝາຍ, ນ້ຳໃຈເສຍສະລະເພື່ອຊາດ ເພື່ອປະຊາຊົນ, ຄວາມບໍລິສຸດສັດຊື່, ຄວາມຮັບຜິດຊອບເຮັດແທ້ທໍາຈິງ, ແກ້ໄຂແນວຄິດເອື່ອຍອີງ-ຂາດຄວາມເປັນເຈົ້າ ແລະ ອື່ນໆ ໃຫ້ມີການຫັນປ່ຽນດີຂຶ້ນ.

ພິເສດ ໃນໂອກາດກະກຽມສະເຫລີມສະຫລອງ 2 ວັນ ປະຫວັດສາດນີ້, ຕ້ອງລົງເລິກສຶກສາອົບຮົມ ໃຫ້ຮັບຮູ້-ເຂົ້າໃຈມູນເຊື້ອຂອງພັກ, ຂອງຊາດ ກໍຄື ຂອງທ້ອງຖິ່ນ, ກໍາແໜ້ນ ແລະ ຮໍ່າຮຽນເອົາ ຄຸນສົມບັດ, ທັດສະນະແບບແຜນ ຂອງປະທານ ໄກສອນ ພົມວິຫານ ບັນພະບູລຸດຂອງຊາດ, ພ້ອມກັນນັ້ນ ຕ້ອງເຜີຍແຜ່-ແນະນໍາ ຊີ້ໃຫ້ເຫັນທຸກເລ່ຫລ່ຽມກົນອຸບາຍຂອງສັດຕູ ພວກຄົນບໍ່ດີ ທີ່ຫວັງທໍາລາຍມ້າງເພ ພັກ ແລະ ລະບອບການເມືອງ ເປັນຕົ້ນ ກົນອຸບາຍຫັນປ່ຽນໂດຍສັນຕິ ໃນທຸກຮູບແບບເຊັ່ນ: ການລະເມີດລະບຽບກົດໝາຍ, ບໍ່ນັບຖືການຈັດຕັ້ງ, ປະລະ ຫລື ຫລຸດຖອຍໃນການປະຕິບັດໜ້າທີ່, ບໍ່ຕັ້ງໜ້າຝຶກຝົນຫລໍ່ຫລອມຕົນເອງ, ການສວຍໃຊ້ໜ້າທີ່ ສໍ້ລາດບັງຫລວງ, ສ້າງກຸ່ມກ້ອນພັກພວກ ແລະ ອື່ນໆ ຕ້ອງສຸມໃສ່ແກ້ໄຂໃຫ້ມີການຫັນປ່ຽນຢ່າງແທ້ຈິງ; ອັນສໍາຄັນແມ່ນຕ້ອງສ້າງ ແລະຍົກສູງຄວາມເຊື່ອໝັ້ນ ຕໍ່ການນໍາພາ ແລະ ແນວທາງນະໂຍບາຍຂອງພັກ, ມີສະຕິ ແລະ ເປັນເຈົ້າຕອບຕ້ານທຸກຖ້ອຍທໍານອງ ໂຄສະນາບິດເບືອນ ຂອງອິດທິກໍາລັງປໍລະປັກ ແລະ ກຸ່ມຄົນບໍ່ດີ ໃຫ້ທັນການ.

ໃນໂອກາດນີ້, ສະຫາຍ ຄຳຂັນ ຈັນທະວີສຸກ ກໍາມະການສູນກາງພັກ, ເລຂາພັກແຂວງ, ເຈົ້າ ແຂວງຫລວງພະບາງ ໄດ້ລາຍງານຫຍໍ້ ສະພາບການພັດທະນາເສດຖະກິດ-ສັງຄົມ, ຕິດພັນກັບການຈັດ ຕັ້ງປະຕິບັດ 2 ວາລະແຫ່ງຊາດ, ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ການປັບ ປຸງກົງຈັກການຈັດຕັ້ງ, ການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກແຂວງຫລວງພະບາງຄັ້ງທີ IX ແລະ ການກະກຽມສ້າງຕັ້ງຕາແສງ. ໃນນັ້ນ, ທ່ານໄດ້ຍົກໃຫ້ເຫັນສະພາບພົ້ນເດັ່ນ ແມ່ນການຂະຫຍາຍຕົວທາງດ້ານເສດຖະກິດ ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ 3,94% ຕໍ່ປີ, ລວມຍອດຜະລິດຕະພັນພາຍໃນສະເລ່ຍໄດ້ 23 ລ້ານລ້ານກວ່າກີບ ຫລື ເທົ່າກັບ 1.067 ໂດລາສະຫະລັດ ຕໍ່ຄົນຕໍ່ປີ, ການກະກຽມ ແລະ ດໍາເນີນກອງປະຊຸມໃຫ່ຍອົງຄະນະພັກແຂວງ ຄັ້ງທີ IX ມາຮອດປັດຈຸ ບັນ ການດໍາເນີນກອງປະຊຸມໃຫຍ່ ຮາກຖານພັກອ້ອມຂ້າງແຂວງສໍາເລັດ 140 ຮາກຖານ, ກວມເອົາ 99,29%, ຍັງບໍ່ທັນສໍາເລັດ ມີ 1 ຮາກຖານພັກຄື: ໜ່ວຍພັກສະພາປະຊາຊົນແຂວງ ຈະດໍາເນີນກອງປະຊຸມໃຫຍ່ຫລັງກອງປະຊຸມໃຫຍ່ອົງຄະນະພັກແຂວງ, ສໍາເລັດກອງປະຊຸມໃຫຍ່ ຂອງສະຫະພັນນັກ ຮົບເກົ່າແຂວງ, ກອງປະຊຸມໃຫຍ່ຂອງ 3 ອົງການຈັດຕັ້ງມະຫາຊົນ. ພ້ອມນັ້ນ, ໄດ້ນໍາເອົາຮ່າງລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ ເຂົ້າຜ່ານໃນກອງປະຊຸມຄົບຄະນະບໍລິຫານງານພັກແຂວງເປີດກວ້າງ ຄັ້ງທີ 13 ເປັນຄັ້ງທີ 3 ແລະ ຮ່າງບົດສໍາຫລວດການນໍາພາລວມ ຂອງຄະນະບໍລິ ຫານງານພັກແຂວງ ສະໄໝທີ VIII ຜ່ານໃນກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ 13 ເປັນຄັ້ງທີ 1, ໄດ້ສໍາເລັດການທາບທາມບຸກຄະລາກອນຮອບ 1 ຢູ່ຂັ້ນນະຄອນ-ເມືອງ, ສ່ວນການກະກຽມ ສ້າງຕັ້ງຕາແສງ ຄາດຄະເນການສ້າງຕັ້ງຕາແສງ ເບື້ອງຕົ້ນເມືອງລະ 4-5 ຕາແສງ ລວມໃນທົ່ວແຂວງມີ 56 ຕາແສງ, 757 ບ້ານ, ມີພົນລະເມືອງ 542,921 ຄົນ.