ພິທີເປິດການທົດສອບສີມືແຮງງານ ຕາມມາດຕະຖານສີມືແຮງງານແຫ່ງຊາດ ພາຍໃຕ້ໂຄງການຮຽນວິຊາຊີບຢູ່ສະຖານປະກອບການ, ແຜນງານການຮ່ວມມື ອາຊຽນ-ສະວິດ(ASTI) ຈັດຂຶ້ນໃນວັນທີ 23 ກໍລະກົດ 2025 ຢູ່ນະຄອນຫລວງວຽງຈັນ ໂດຍເປັນປະທານຮ່ວມ ຂອງ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ ໄຊບັນດິດ ຣາດຊະພົນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ທ່ານ ຊອງ ກາບຼີເອວ ດັສ (Mr. Jean Gabriel Duss) ຫົວໜ້າຫ້ອງການຮ່ວມມືພາກພື້ນ, ຫ້ອງການຮ່ວມມື-ທີປຶກສາ ປະເທດສະວິດ, ຫົວໜ້າອົງການເຮວເວຕັສ (Helvetas) ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ພົງໄຊສັກ ອິນຖາລາດ ໄດ້ມີຄຳເຫັນວ່າ: ການທົດສອບສີມືແຮງງານ ແມ່ນມີຄວາມໝາຍຄວາມສໍາຄັນ ເພື່ອການປະເມີນຄວາມຮູ້, ຄວາມສາມາດ ຂອງກຳລັງແຮງງານ ເພື່ອຮັບຮູ້ ແລະ ຢັ້ງຢືນສີມືແຮງງານ ໃຫ້ແກ່ແຮງງານທີ່ມີປະສົບການ ແລະ ຜ່ານການເຮັດວຽກຕົວຈິງ ໂດຍມີການຈັດລະດັບຕາມມາດຕະຖານສີມືແຮງງານແຫ່ງຊາດ ເພື່ອສົ່ງເສີມການພັດທະນາ ແລະ ຍົກລະດັບສີມືແຮງງານເປັນຂັ້ນຢ່າງບໍ່ຢຸດຢັ້ງ ຕາມການປ່ຽນແປງຂອງເຕັກໂນໂລຊີໃໝ່ໆ ຫລື Lifelong Learning ແນໃສ່ສ້າງຄວາມເຊື່ອໝັ້ນໃຫ້ແກ່ສັງຄົມ ກໍຄື ຜູ້ໃຊ້ແຮງງານ ທັງພາຍໃນ ແລະ ພາກພື້ນ. ປັດຈຸບັນ, ບັນຫາເສດຖະກິດຂອງທັງພາກພື້ນ ແລະ ສາກົນ ສົ່ງຜົນຢ່າງກວ້າງຂວາງໃຫ້ເງິນເດືອນ ແລະ ຄ່າຕອບແທນແຮງງານ ທີ່ເຄີຍໃຫ້ພະນັກງານ ອາດຈະບໍ່ເໝາະສົມກັບຄ່າຄອງຊີບ ແລະ ຄວາມສາມາດ ຂອງແຮງງານ ເຮັດໃຫ້ມີອັດຕາການປ່ຽນວຽກສູງ, ມີການຫລັ່ງໄຫລຂອງແຮງງານ ອອກໄປເຮັດວຽກຢູ່ຕ່າງປະເທດ. ສະນັ້ນ, ການຮັກສາແຮງງານທີ່ມີສີມື, ມີຄວາມຮູ້ຄວາມສາມາດໄວ້ ຈຶ່ງເປັນຫົວຂໍ້ທີ່ມີຄວາມສໍາຄັນ ທີ່ສັງຄົມໃຫ້ຄວາມສົນໃຈຫລາຍໃນປັດຈຸບັນ, ການທົດສອບສີມືແຮງງານ ຈະເປັນເຄື່ອງມືວັດແທກທີ່ຈຳ ເປັນ ເພື່ອກຳນົດຄ່າຕອບແທນແຮງງານໃຫ້ເໝາະສົມ ແລະ ສົມຄູ່ກັບຄວາມສາມາດຂອງກໍາລັງແຮງງານ ເພື່ອການຈ້າງການທີ່ມີຄຸນຄ່າ ແລະ ເປັນທຳ.

ໂຄງການຝຶກວິຊາຊີບຢູ່ສະຖານປະກອບການ ພາຍໃຕ້ຂອບການຮ່ວມມືອາຊຽນ-ສະວິດ ມີ ຈຸດປະສົງ ເພື່ອໃຫ້ໄວໜຸ່ມຍິງ ແລະ ຊາຍ ໂດຍສະເພາະແມ່ນຜູ້ທີ່ມີການສຶກສາຕໍ່າ, ອອກໂຮງຮຽນແຕ່ຍັງນ້ອຍ ແລະ ຄົນງານທີ່ມີທັກສະສີມືຕ່ຳ ໃຫ້ມີທັກສະດ້ານຕະຫລາດແຮງງານທີ່ກ່ຽວຂ້ອງ ເພື່ອເສີມຂະຫຍາຍການຈ້າງງານ ເຊິ່ງສອດຄ່ອງກັບແນວທາງ ແລະ ນະໂຍບາຍຂອງພັກ-ລັດຖະບານ ໃນການສົ່ງເສີມແມ່ຍິງ, ຜູ້ດ້ອຍໂອກາດ, ຜູ້ວ່າງງານ, ຜູ້ປະກອບອາຊີບອິດສະລະ ໄດ້ເຂົ້າເຖິງຕາໜ່າງການພັດ ທະນາສີມືແຮງງານ, ທັງເປັນການຈັດຕັ້ງໂຕເລກຄາດໝາຍສູ້ຊົນໃນການທົດສອບ ແລະ ອອກໃບຢັ້ງຢືນສີມືແຮງງານ ຈຳນວນ 250.000 ຄົນ ໃນໄລຍະ 2026-2030 ເພື່ອສ້າງຄວາມອາດສາມາດໃຫ້ແກ່ກຳລັງແຮງງານທົ່ວປະເທດ ມີວຽກເຮັດງານທຳທີ່ມີຄວາມໝັ້ນຄົງ, ມີລາຍໄດ້ສົມຄູ່ຄວາມຄວາມສາ ມາດຂອງຕົນ.

ຂໍ້ມູນ-ພາບ: ຂ່າວສານ ຮສສ

ລັດຖະບານລາວ ແລະ ທະນາຄານພັດທະນາອາຊີ (ADB) ໄດ້ລົງນາມໃນສັນຍາການສະໜອງທຶນ 50 ລ້ານໂດລາສະຫະລັດ ເພື່ອສະໜັບສະໜູນສຳລັບໂຄງການລະບົບອາຫານກະສິກຳແບບຍືນຍົງຢູ່ ສປປ ລາວ ໂຄງການດັ່ງກ່າວຈະປະກອບສ່ວນໃນການເລັ່ງການຂະຫຍາຍຕົວຂອງຂະແໜງກະສິກຳ ແລະ ສ້າງຜົນປະໂຫຍດໃຫ້ແກ່ບັນດາຄົວເຮືອນ ແລະ ທຸລະກິດກະສິກຳ.

ທຶນດັ່ງກ່າວ ປະກອບມີທຶນຊ່ວຍເຫຼືອລ້າ 13 ລ້ານໂດລາສະຫະລັດ ຈາກກອງທຶນພັດ ທະນາອາຊີ ADB ແລະ ກອງທຶນດິນຟ້າອາກາດສີຂຽວ ໂດຍຜ່ານກອງທຶນເພື່ອການຮ່ວມມືດ້ານຄວາມເຂັ້ມແຂງຂອງຊຸມຊົນ ແລະ ຈະຮັບການຈັດຕັ້ງປະຕິບັດໂດຍກະ ຊວງອຸດສາຫະກຳ ແລະ ການຄ້າ ຮ່ວມກັບກະຊວງກະສິກຳ ແລະ ສິ່ງແວດລ້ອມ ທະ ນາຄານແຫ່ງ ສປປ ລາວ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວໃຫ້ສຳເລັດຕາມລະດັບຄາດໝາຍທີ່ວາງໄວ້.

ທ່ານ ສຸລິວັດ ສຸວັນນະຈູມຄໍາ ຮອງລັດຖະມົນຕີກະຊວງການເງິນ ກ່າວໃນພິທີລົງ ນາມການສະໜອງທຶນດັ່ງກ່າວວ່າ: “ໂຄງການດັ່ງກ່າວຈະສະໜັບສະໜູນຄວາມພະຍາຍາມຂອງລັດຖະບານ ສປປ ລາວ ໃນການເລັ່ງການຂະຫຍາຍຕົວຂອງຂະ ແໜງກະສິກຳ ແລະ ສ້າງຜົນປະໂຫຍດໃຫ້ແກ່ບັນດາຄົວເຮືອນ ແລະ ທຸລະກິດກະສິກຳ ໃນນາມລັດຖະບານແຫ່ງ ສປປ ລາວ ຂ້າພະເຈົ້າຂໍສະແດງຄວາມຂອບໃຈ ມາຍັງຄູ່ຮ່ວມພັດທະນາຂອງພວກເຮົາ ໂດຍສະເພາະແມ່ນ ADB ແລະ ສະຫະພາບເອີຣົບທີ່ໄດ້ໃຫ້ການສະໜັບສະໜູນແກ່ ສປປ ລາວ ຢ່າງຕໍ່ເນື່ອງ”.

ໂຄງການນີ້ຍັງຈະຊ່ວຍປັບປຸງ ຄວາມທົນທານຕໍ່ສະພາບດິນຟ້າອາກາດ ຄວາມໝັ້ນຄົງດ້ານສະບຽງອາຫານ ໂພຊະນາການ ແລະ ລາຍຮັບຂອງຄົວເຮືອນໃນ ສປປ ລາວ ຈະເສີມຂະຫຍາຍລະບົບອາຫານກະສິກຳ ທີ່ມຸ່ງອອກສູ່ຕະຫຼາດພາຍໃນ ແລະ ສົ່ງອອກສິນຄ້າທີ່ມີມູນຄ່າສູງ ການລົງທຶນໃນດ້ານການເງິນເພື່ອການຄ້າ ການບໍລິການດ້ານວິຊາການເປັນລາຍບຸກຄົນ ພື້ນຖານໂຄງລ່າງຂະໜາດນ້ອຍ ແລະ ຄວາມປອດໄພດ້ານອາຫານ ຈະໄດ້ຮັບການສະໜອງ ເພື່ອສະໜັບສະໜູນບັນດາຈຸດປະສົງເຫຼົ່ານີ້ໃຫ້ບັນລຸຕາມຄາດໝາຍ.

ທ່ານ ນາງ ແຊນນີ ແຄມເບວ ຫົວໜ້າຫ້ອງການ ADB ປະຈໍາ ສປປ ລາວ ກ່າວຕື່ມວ່າ:“ໂດຍການສະໜັບສະໜູນຄວາມພະຍາຍາມແຫ່ງຊາດໃນການຫັນປ່ຽນລະບົບກະສິກຳ ໂຄງການດັ່ງກ່າວ ຈະສົ່ງຜົນດີຕໍ່ຊຸມຊົນ ແລະ ວິສາຫະກິດ ພ້ອມທັງເປັນການປະກອບສ່ວນຊຸກຍູ້ໃຫ້ແກ່ການເຕີບໂຕທາງດ້ານເສດຖະກິດຂອງປະເທດ” “ໂຄງການນີ້ແມ່ນອົງປະກອບທີ່ສໍາຄັນຂອງແຜນງານສຳລັບປະເທດຂອງ ADB ໃນການສະໜັບສະໜູນວາລະການພັດທະນາເສດຖະກິດ ແລະ ສັງຄົມຂອງລັດຖະບານ.”

ພິທີລົງນາມດັ່ງກ່າວຈັດຂຶ້ນໃນວັນທີ 23 ກໍລະກົດ 2025 ທີ່ນະຄອນຫຼວງວຽງຈັນ ເຊິ່ງຕາງໜ້າລັດຖະບານລາວ ລົງນາມໂດຍ ທ່ານ ສຸລິວັດ ສຸວັນນະຈູມຄໍາ ແລະ ຕາງໜ້າ ADB ລົງນາມໂດຍທ່ານ ນາງ ແຊນນີ ແຄມເບວ ມີບັນດາຜູ້ຕາງໜ້າອົງການຈັດຕັ້ງລັດຖະບານ ທ່ານເອກອັກຄະລັດຖະທູດສະຫະພາບເອີຣົບ ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ກຳປູເຈຍ ແລະ ລາວ ໄດ້ຢືນຢັນຄືນຄຳໝັ້ນສັນຍາຊຸກຍູ້ບັນດາຄວາມມານະພະຍາຍາມຮ່ວມກັນໃນການຕ້ານຂ່າວປອມ ແລະ ເພີ່ມທະວີການຮ່ວມມືດ້ານສື່ມວນຊົນໃນຍຸກປັນຍາປະດິດ (AI) ເຊິ່ງກຳລັງມີການພັດທະນາຢ່າງວ່ອງໄວໃນໂລກປັດຈຸບັນ.

ການໃຫ້ຄຳໝັ້ນສັນຍາດັ່ງກ່າວມີຂຶ້ນລະຫວ່າງການພົບປະຂອງທ່ານ ແນັດ ແພຕຼາ Neth Pheaktra ລັດຖະມົນຕີກະຊວງຖະແຫຼ່ງຂ່າວກຳປູເຈຍ ແລະ ທ່ານ ສາຄອນ ພົມມາລາດ ຮອງຫົວໜ້າຄະນະໂຄສະນາອົບຮົມສູນກາງພັກ ປະຊາຊົນ ປະຕິວັດລາວ ໃນວັນທີ 22 ກໍລະກົດ 2025 ໃນໂອ ກາດເຂົ້າຮ່ວມກອງປະຊຸມສຸດຍອດສື່ມວນຊົນອາຊີ (AMS) ຄັ້ງທີ 20 ທີ່ນະຄອນຊຽມຣຽບ ປະເທດກຳປູ ເຈຍ.

ໂອກາດນີ້ສອງຝ່າຍໄດ້ແລກປ່ຽນຄວາມຄິດຄວາມເຫັນ ແລະ ລົງຈະລົງເລິກການຮ່ວມມືໃນການແກ້ໄຂບັນດາສິ່ງທ້າທາຍທີ່ເກີດຈາກຄວາມກ້າວໜ້າຢ່າງວ່ອງໄວຂອງ AI ໃນການເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ ແລະ ບິດເບື່ອນຈາກຄວາມເປັນຈິງໃນສັງຄົມ.

ໃນພິທີພົບປະດັ່ງກ່າວ ທ່ານ ສາຄອນ ພົມມາລາດ ໄດ້ຕີລາຄາສູງຕໍ່ກະຊວງຖະແຫຼ່ງຂ່າວກຳປູເຈຍ ທີ່ຈັດການປະຊຸມຄັ້ງນີ້ໄດ້ຢ່າງມີປະສິດທິພາບ ແລະ ມີຜົນສຳເລັດຢ່າງຈົບງາມ; ພ້ອມກັນນີ້ ກໍໄດ້ສະເໜີໃຫ້ລັດຖະມົນຕີກະຊວງຖະແຫຼ່ງຂ່າວກຳປູເຈຍ ແບ່ງປັນປະສົບການໃນການຕ້ານຂ່າວປອມ ໃນຍຸກປັນຍາປະດິດ AI ທີ່ກຳລັງພັດທະນາຢ່າງກ້າວກະໂດດ.

ການພົບປະສອງຝ່າຍໃນຄັ້ງນີ້ ທ່ານລັດຖະມົນຕີກະຊວງຖະແຫຼງຂ່າວ ກຳປູເຈຍ ເຫັນດີແລກປ່ຽນ ກັບ ສປປ ລາວ ໃນສົ່ງເສີມ ແລະ ຍົກລະດັບການຮ່ວມມືສອງຝ່າຍໃນການສະກັດກັ້ນ ແລະ ຕ້ານຂ່າວປອມ; ພ້ອມທັງຢືນຢັນວ່າ ກຳປູເຈຍ-ລາວ ຈະພັດທະນາຄວາມຮ່ວມມືໃນຂະແໜງການສື່ມວນຊົນ ໃຫ້ແໜ້ນແຟ້ນຂຶ້ນກວ່າເກົ່າ ໂດຍສະເພາະຈະໄດ້ທົບທວນບົດບັນທຶກຊ່ວຍຈຳ (MOU) ທີ່ໄດ້ລົງນາມຮ່ວມກັນເມື່ອປີ 2010 ເພື່ອສົ່ງເສີມການພົວພັນຮ່ວມມືມິດຕະພາບ ລະຫວ່າງສອງປະເທດ ແລະ ຊ່ວຍກັນພັດທະນາຂົງເຂດວຽກງານສື່ມວນຊົນໃຫ້ທັນກັບຍຸກ 4,0.

ຮຽນເຖິງທ່ານຜູ້ໂດຍສານທີ່ຮັກແພງທຸກທ່ານ:

ເພື່ອຕອບສະໜອງຄວາມຮຽກຮ້ອງຕ້ອງການໃນການເດີນທາງຂອງພໍ່ແມ່ປະຊາຊົນໂດຍໄວເທົ່າທີ່ຈະໄວໄດ້, ທາງລົດໄຟລາວ-ຈີນໄດ້ຈັດຕັ້ງປຸກລະດົມພະນັກງານເຮັດວຽກທັງເວັນແລະຄືນ ເພື່ອລົງເລິກກວດກາສະພາບແລວເສັ້ນທາງ, ອຸປະກອນກົນຈັກ ແລະສະຖານີລົດໄຟ ຢ່າງຖີ່ຖ້ວນຮອບດ້ານ. ດັ່ງນັ້ນ, ຈິ່ງຂໍແຈ້ງມາຍັງບັນດາທ່ານຊາບວ່າ:

ບົນພື້ນຖານທີ່ສາມາດຮັບປະກັນຄວາມປອດໄພໃນການຂົນສົ່ງ, ທາງລົດໄຟລາວ-ຈີນຈະກັບມາໃຫ້ບໍລິການລົດໄຟ EMU ຖ້ຽວC92/C91 (ນະຄອນຫຼວງວຽງຈັນ – ຫຼວງພະບາງ), ລົດໄຟທຳມະດາຖ້ຽວ K12/K11 (ນະຄອນຫຼວງວຽງຈັນ – ບໍ່ເຕ່ນ) ນັບແຕ່ວັນທີ 24 ກໍລະກົດ 2025 ເປັນຕົ້ນໄປ. ພ້ອມນັ້ນ, ໃນວັນທີ 24 ຍັງຈະເພີ່ມຖ້ຽວລົດໄຟ EMU C96/C95 (ນະຄອນຫຼວງວຽງຈັນ – ບໍ່ເຕ່ນ) ເພື່ອຊ່ວຍເຫຼືອຜູ້ໂດຍສານທີ່ຕົກຄ້າງໃນສອງສາມມື້ທີ່ຜ່ານມາ ໃຫ້ສາມາດໄປສູ່ຈຸດໝາຍປາຍທາງຕາມການຄອງຄອຍ. ສ່ວນລົດໄຟຖ້ຽວອື່ນໆ ແມ່ນຈະທະຍ່ອຍກັບມາແລ່ນລົດຢ່າງເປັນປົກກະຕິ ໂດຍອີງໃສ່ສະພາບອາກາດ ແລະ ແລວເສັ້ນທາງ.

ທ່ານສາມາດຕິດຕາມຂໍ້ມູນທີ່ກ່ຽວຂ້ອງ ຜ່ານທາງແອັບຂາຍປີ້ອອນລາຍ LCR Ticket, ແຈ້ງການຂອງສະຖານີ ແລະ ໜ້າເຟສບຸກຂອງບໍລິສັດ ທາງລົດໄຟລາວ-ຈີນ ຈຳກັດ ເພື່ອຈັດແຜນການເດີນທາງຂອງທ່ານໃຫ້ເໝາະສົມດ້ວຍ.

ໃນຊ່ວງວິກິດນໍ້າຖ້ວມນີ້, ພະນັກງານທັງໝົດຂອງທາງລົດໄຟລາວ-ຈີນ ແມ່ນຍຶດໝັ້ນປະຈຳການເພື່ອເຝົ້າລະວັງກວດກາຢູ່ແນວໜ້າ, ທັງນີ້ກໍເພື່ອປົກປັກຮັກສາທາງລົດໄຟແຫຼ່ງຊີວິດເສັ້ນນີ້ໃຫ້ມີຄວາມໂລ່ງລ່ຽນ ແລະ ຮັບປະກັນໃຫ້ຜູ້ໂດຍສານນັບໝື່ນນັບແສນຄົນ ເດີນທາງດ້ວຍຄວາມປອດໄພສູງ. ທາງລົດໄຟລາວ-ຈີນ ຈະຢູ່ຄຽງບ່າຄຽງໄຫຼ່ກັບປະຊາຊົນລາວສະໝີ ຮ່ວມຜ່ານຜ່າອຸປະສັກຮ້ອຍຢ່າງພັນແນວໄປດ້ວຍກັນ.

ບໍລິສັດ ທາງລົດໄຟລາວ-ຈີນ ຈຳກັດ

ວັນທີ 23 ກໍລະກົດ 2025

ວິທະຍຸກະຈາຍສຽງຫວຽດນາມ ເມື່ອບໍ່ດົນມານີ້ ອົງການອະນາໄມໂລກ (WHO) ຮຽກຮ້ອງໃຫ້ມີການກະທຳໂດຍດ່ວນເພື່ອສະກັດກັ້ນ ກັບຄືນການແຜ່ລະບາດຂອງພະຍາດຊິກຸນກູຍາ (Chikungunya), ເມື່ອເກີດມີການແຜ່ລະບາດຮອບໃໝ່ຢູ່ບັນດາປະເທດອາຟຣິກາ ຢູ່ມະຫາສະໝຸດອິນເດຍ ພວມແຜ່ລາມອອກສູ່ວົງກວ້າງ.

ປັດຈຸບັນຄາດວ່າມີ 5,9 ຕື້ຄົນ ຢູ່ 119 ປະເທດມີຄວາມສ່ຽງຕິດພະຍາດຊິກຸນກູຍາ (Chikungunya) ຊຶ່ງເຊື້ອພະຍາດ ອາດຈະມີອາການເປັນໄຂ້ສູງ, ປວດຂໍ້ ແລະ ພິການແກ່ຍາວ ໂດຍມີຍຸງເປັນພາຫະນະນຳເຊື້ອພະຍາດໄປແຜ່ລາມສູ່ຄົນ ຫລັງຈາກເຊື້ອພະຍາດໄດ້ແຜ່ລະບາດເມື່ອປີ 2004-2005 ໄດ້ສົ່ງຜົນກະທົບເຖິງປະຊາຊົນ ເກືອບເຄິ່ງລ້ານຄົນ, ສ່ວນໃຫຍ່ແມ່ນຢູ່ບັນດາເຂດເກາະນ້ອຍ ກ່ອນທີ່ແຜ່ລາມ ອອກສູ່ທົ່ວໂລກ. ການແຜ່ລະບາດຂອງພະຍາດ Chikungunya ໄດ້ເລີ່ມເກີດຂຶ້ນ ແຕ່ຕົ້ນປີ 2025 ດ້ວຍບັນດາບັ້ນແຜ່ລະບາດຄັ້ງໃຫຍ່ຢູ່ປະເທດອາຟຣິກາຢູ່ ມະຫາສະໝຸດອິນເດຍ. ຫລັງຈາກນັ້ນໄດ້ແຜ່ລາມອອກສູ່ບັນດາປະເທດອາຟະລິກາ, ອິນເດຍ ແລະ ອາຊີຕາເວັນອອກສ່ຽງໃຕ້. ບັນດາປະເທດເອີຣົບ ກໍໄດ້ປະກົດມີກໍລະນີຕິດເຊື້ອພະຍາດຈາກພາຍນອກເຂົ້າທະວີບນີ້.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ວິທະຍຸສາກົນ ແຫ່ງ ສປ ຈີນ ເມື່ອບໍ່ດົນມານີ້ ສະ​ພາ​ຄວາມ​ໝັ້ນ​ຄົງ​ອົງ​ການສະ​ຫະປະ​ຊາ​ຊາດ (ສປຊ) ໄດ້​ຈັດກອງ​ປະ​ຊຸມ ​​​ພາຍ​ໃຕ້​ຫົວ​ຂໍ້ “​ການ​ຊຸກ​ຍູ້ສັນ​ຕິ​ພາບ ​ແລະ​ ຄວາມ​ໝັ້ນ​ຄົງ​ສາ​ກົນ ຜ່ານ​ລັດ​ທິ​ຫລາຍຝ່າຍ ​ແລະ​ການ​ແກ້​ໄຂ​ຄວາມ​ຂັດ​ແຍ້ງ​ກັນ ​ໂດຍ​ສັນ​ຕິ” ໂດຍໄດ້​ເປັນເອ​ກະ​ພາບ​ກັນຮັບ​ຮອງເອົາ​ມະ​ຕິ​ກ່ຽວ​ກັບ​ການ​ເພີ່ມ​ທະ​ວີກົນ​ໄກ ​ແກ້​ໄຂ​ຄວາມ​ຂັດ​ແຍ້ງ​ກັນໂດຍ​ສັນ​ຕິ. ມະ​ຕິ​ສະ​ບັບ​ນີ້ຍັງ​ຮຽກ​ຮ້ອງ​ບັນ​ດາ​ປະ​ເທດສະ​ມາ​ຊິກ ​ຈົ່ງ​ນຳ​ໃຊ້​ກົນ​ໄກ​ແກ້​ໄຂ​ຄວາມ​ຂັດແຍ້ງ​ກັນໂດຍ​ສັນ​ຕິ ​ທີ່​ກຳ​ນົດ​ໄວ້​ໃນ​ພາກ​ທີ 6 ຂອງ​ກົດ​ບັດ​ສະ​ຫະ​ປະ​ຊາ​ຊາດ ​ຢ່າງ​ມີ​ປະ​ສິດ​ທິ​ຜົນ. ທ່ານ ​ຟູ້​ຊົ່ງ ຜູ້​ຕາງ​ໜ້າ​ຖາ​ວອນ​ຈີນ ​ປະ​ຈຳ​ອົງ​ການສະຫະປະຊາຊາດ ​ໄດ້​ຮຽກ​ຮ້ອໃຫ້​ປະ​ຊາ​ຄົມ​ໂລກ ​ຈົ່ງ​ປົກ​ປັກ​ຮັກ​ສາ​ສັນ​ຕິ​ພາບ ​ແລະ ​ຄວາມ​ໝັ້ນ​ຄົງ​ສາ​ກົນ. ກົດບັດ​ອົງ​ການສະ​ຫະ ​ປະ​ຊາ​ຊາດ ແມ່ນ​ພື້ນ​ຖານ​ທີ່ໝັ້ນ​ຄົງຂອງລະ​ບຽບສາ​ກົນ, ບໍ່​ແມ່ນ​ລາຍ​ການ​ ຫລື ເມ​ນູ​ ທີ່​ສາ​ມາດ​ເລືອກ​ເອົາ ​ຫລື ​ປະ​ຖິ້ມ​ຕາມ​ລຳ​ພັງ​ໃຈ. ປະ​ຊາ​ຄົມ​ໂລກ ​ຄວນ​ປະ​ຕິ​ບັດ​ຕາມ​ຫລັກ​ການ​ກົດ​ບັດ​ ເຊັ່ນ: ຄວາມສະ​ເໝີ​ພາບ​ຂອງອະ​ທິ​ປະ​ໄຕ​​, ບໍ່​ແຊກ​ແຊງວຽກ​ງານ​ພາຍ​ໃນ​ຂອງ​ປະ​ເທດ​ອື່ນ ແລະ​ ການ​ແກ້​ໄຂ ​ຄວາມ​ຂັດ​ແຍ້ງ​ກັນ​ໂດຍ​ສັນ​ຕິ​ເປັນ​ຕົ້ນ, ຍຶດ​ໝັ້ນໃຊ້​ທ່າ​ທີສະ​ເໝີ​ພາບບໍ່​ວ່າ​ເປັນປະ​ເທດ​ນ້ອຍ ​​ຫລື ໃຫຍ່, ປົກ​ປັກ​ຮັກ​ສາຄວາມ​ຍຸ​ຕິ​ທຳ​ ແລະ ​ຄວາມ​ເປັນ​ທຳ​ຂອງ​ສາ​ກົນ.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ຕາມຂ່າວຈາກໂຕກ່ຽວ ວັນທີ 23 ກໍລະກົດນີ້, ທ່ານ ຊິເງຣຸ ອິຊິບະ ນາຍົກລັດຖະມົນຕີຍີ່ປຸ່ນ ໄດ້ບັນລຸຂໍ້ຕົກລົງກັບ ທ່ານ ໂດນັນ ທຣຳ, ປະທານາທິບໍດີ ສ.ອາເມລິກາ ປະກາດປັບຫລຸດພາສີນຳເຂົ້າຈາກຍີ່ປຸ່ນລົງມາລະດັບ 15% ລວມທັງ ຍານພາຫະນະທີ່ເປັນສິນຄ້າສົ່ງອອກສຳຄັນຂອງຍີ່ປຸ່ນ ທີ່ກ່ອນໜ້ານີ້ຖືກຮຽກເກັບພາສີ 25% ຖືວ່າຕ່ຳສຸດໃນບັນດາປະເທດ ທີ່ໄດ້ປຽບເກີນດຸນການຄ້າກັບ ສ.ອາເມລິກາ ແລະ ສະແດງຄວາມໝັ້ນໃຈວ່າ ຂໍ້ຕົກລົງນີ້ຈະຊ່ວຍຮັກສາຜົນປະໂຫຍດ ຂອງຊາດ ກະຕຸ້ນການຈ້າງງານທັງໃນ ສ.ອາເມລິກາ ແລະ ຍີ່ປຸ່ນ. ນອກຈາກນີ້ຍັງຊ່ວຍໃຫ້ທັງສອງປະເທດ ມີບົດບາດສຳຄັນໃນເວທີໂລກ. ສຳລັບອັດຕາພາສີໃໝ່ຈະເລີ່ມມີຜົນບັງຄັບໃຊ້ ໃນວັນທີ 1 ເດືອນສິງຫານີ້.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ຕາມຂ່າວຈາກກົວລາລຳເປີ ວັນທີ23 ກໍລະກົດນີ້ ທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍ ຖະແຫລງຜ່ານໂທລະພາບ ປະກາດມາດຕະການຊ່ວຍເຫລືອປະຊາຊົນຜູ້ມີລາຍໄດ້ຕ່ຳ ທີ່ໄດ້ຮັບຜົນກະທົບຈາກບັນຫາຄ່າຄອງຊີບແພງ ໂດຍການແຈກເງິນສົດ ໃຫ້ກັບຜູ້ທີ່ມີອາຍຸຕັ້ງແຕ່ 18 ປີຂຶ້ນໄປ ຄົນລະ 100 ຣິງກິດ ຊຶ່ງຈະເປັນການຈ່າຍເງິນສົດຄັ້ງດຽວຈະເລີ່ມຈ່າຍຕັ້ງແຕ່ວັນທີ 31 ສິງຫານີ້ ເປັນຕົ້ນໄປ ໂດຍລັດຖະບານ ຈະໃຊ້ເງິນທັງໝົດ 15.000 ລ້ານຣິງກິດ. ນອກນີ້ ລັດຖະບານມາເລເຊຍ ຈະປະກາດລາຍລະອຽດ ກ່ຽວກັບແຜນການເພີ່ມການອຸດໜູນລາຄານ້ຳມັນເຊື້ອໄຟກ່ອນທ້າຍ ເດືອນກັນຍານີ້ ຊຶ່ງຫາກມີການປະກາດຈະສົ່ງຜົນໃຫ້ລາຄານ້ຳມັນທີ່ຂາຍໃຫ້ສະເພາະຍານພາຫະນະ ທີ່ຈົດທະບຽນໃນມາເລເຊຍ ຫລຸດລົງຈາກລິດລະ 0,25 ຣິງກິດ ລົງມາເຫລືອ 1,99 ຣິງກິດ ທັນທີ.

(ບັນນາທິການຂ່າວ: ຕ່າງປະເທດ)

ຮຽບຮຽງ ຂ່າວໂດຍ: ສະໄຫວ ລາດປາກດີ

ຂ່າວສານຊີອາໄອລາຍງານວ່າ: ໃນວັນທີ 21 ກໍລະກົດ ຜ່ານມານີ້, ກອງປະຊຸມລັດຖະມົນຕີເວທີປຶກສາຫາລືທາງການເມືອງຂັ້ນສູງກ່ຽວກັບການພັດທະນາແບບຍືນຍົງຂອງອົງການສະຫະປະຊາຊາດ ປະຈຳປີ 2025 ຈັດຂຶ້ນຢູ່ນະຄອນນິວຢອກ ສະຫະລັດ ອາເມຣິກາ, ທ່ານ ອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ກ່າວຄຳປາໄສໃນພິທີເປີດກອງປະຊຸມ ໂດຍຮຽກຮ້ອງໃຫ້ບັນດາປະເທດຈົ່ງຮ່ວມກັນແບກຫາບໜ້າທີ່ຄວາມຮັບຜິດຊອບ, ຊຸກຍູ້ການພັດທະນາແບບກວມລວມ, ທ່ຽງທຳ ແລະ ຍືນຍົງ, ທັງຮັບປະກັນໃນການສ້າງຜົນປະໂຫຍດແກ່ທຸກຄົນ.

ທ່ານ ກູເຕີເຣັສ ກ່າວວ່າ: ເສດຖະກິດທົ່ວໂລກກຳລັງເຕີບໂຕຊ້າລົງ, ສະຖານະການດ້ານການຄ້າເຄັ່ງຕຶງຂຶ້ນຕື່ມ, ຄວາມບໍ່ສະເໝີພາບຮຸນແຮງຂຶ້ນ. ງົບປະມານເພື່ອຊ່ວຍເຫຼືອຖືກຕັດໜ້ອຍລົງ, ແຕ່ລາຍຈ່າຍທາງການທະຫານເພີ່ມຂຶ້ນຢ່າງຫຼວງຫຼາຍ. ຄວາມບໍ່ໄວ້ເນື້ອເຊື່ອໃຈກັນ, ຄວາມແຕກແຍກກັນ ແລະ ການປະທະກັນແບບເປີດເຜີຍ, ກຳລັງເຮັດໃຫ້ກົນໄກການແກ້ໄຂບັນຫາສາກົນປະເຊີນກັບຄວາມກົດດັນທີ່ບໍ່ເຄີຍມີມາກ່ອນ. ແຕ່ຖ້າຫາກມີຄວາມຮີບຮ້ອນ ແລະ ຕັດສິນໃຈ ກໍມີຄວາມຫວັງທີ່ຈະບັນລຸເປົ້າໝາຍການພັດທະນາແບບຍືນຍົງໄດ້. ທ່ານເນັ້ນໜັກເຖິງຄວາມຈຳເປັນຕ້ອງປະຕິຮູບລະບົບການເງິນທົ່ວໂລກ, ເພີ່ມທະວີສິດໃນການອອກສຽງຂອງປະເທດກຳລັງພັດທະນາ, ທັງຮຽກຮ້ອງໃຫ້ເພີ່ມທະວີການພົວພັນຄູ່ຮ່ວມມື, ຊຸກຍູ້ຄວາມກ້າວໜ້າດ້ວຍວິທະຍາສາດເຕັກໂນໂລຊີ ແລະ ການປະດິດສ້າງດີຈີຕອນ.

ຂ່າວຕ່າງປະເທດລາຍ; ທ່ານ ມິຄາອິລ ມິຊູສຕິນ ນາຍົກລັດຖະມົນຕີຣັດເຊຍ ກ່າວຫວ່າງມໍ່ໆມານີ້ວ່າ: ລັດຖະບານຣັດເຊຍ ຈະຈັດສັນງົບປະມານເກືອບ 180 ຕື້ຣູເບິນ ໃນໄລຍະ 3 ປີຂ້າງໜ້າ ເພື່ອປັບປຸງດ່ານຊາຍແດນທົ່ວປະເທດ ຊຶ່ງເປັນສ່ວນໜຶ່ງຂອງຄວາມພະຍາຍາມເພື່ອພັດທະນາໂລຈິສຕິກຂ້າມແດນ.

ທ່ານ ມິຊູສຕິນ ເນັ້ນວ່າ: ທຶນດັ່ງກ່າວຈະສະໜັບສະໜູນການກໍ່ສ້າງ, ສ້ອມແປງ ແລະ ປັບປ່ຽນອຸປະກອນອໍານວຍຄວາມສະດວກບໍລິເວນດ່ານຊາຍແດນໂດຍນຳໃຊ້ໂຊລູຊັນດີຈີຕອນ ແລະ ເຕັກໂນໂລຊີທີ່ກ້າວໜ້າ.

ທັງນີ້, ທ່ານ ມິຊູສຕິນ ກ່າວຕື່ມວ່າ: ຣັດເຊຍ ມີກຳນົດປັບປຸງດ່ານຊາຍແດນທີ່ມີຢູ່ຫຼາຍກວ່າ 1/4 ໃນໄລຍະ 5 ປີຂ້າງໜ້າ, ໂດຍດ່ານຊາຍແດນເຫຼົ່ານີ້ມີຄວາມສຳຄັນເປັນພິເສດຕໍ່ກະແສການຄ້າໃນປັດຈຸບັນ ແລະ ການຄ້າທີ່ມີທ່າແຮງໃນອະນາຄົດ ຊຶ່ງສະເພາະເຂດຕາເວັນອອກໄກນັ້ນມີກຳນົດປັບປຸງດ່ານຊາຍແດນຫຼາຍກວ່າ 30 ແຫ່ງ.