ມວນອາກາດໜາວເຢັນຈາກປະເທດຈີນຈະມີກຳລັງແຮງເພີ່ມຂຶ້ນອີກເທື່ອໃໝ່ຍັງຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ດ້ວຍກໍາລັງປານກາງ ຫາ ແຮງ, ສົມທົບກັບກະແສລົມຕາເວັນອອກສ່ຽງເໜືອທີ່ມີກຳລັງແຮງພັດປົກຄຸມ, ຊຶ່ງຈະເຮັດໃຫ້ອ້ນຫະພູມອາກາດເຢັນລົງ 3 ຫາ 5 ອົງສາ ຢູ່ໃນແຕ່ລະພາກ ແລະ ຈະເຮັດໃຫ້ສະພາບອາກາດໜາວເຢັນຢູ່ທົ່ວໄປ ແລະ ຈະໜາວເຢັນຫລາຍຢູ່ແຂວງພາກເໜືອ ລົງຫາ ພາກກາງ ແລະ ເຂດພູພຽງບໍລະເວນ ພ້ອມຈະມີລົມພັດແຮງຢູ່ບາງທ້ອງຖິ່ນ ໃນໄລຍະວັນທີ 27 ຫາ 29 ພະຈິກ 2025 ນີ້.

ພະຍາກອນອາກາດ ແຕ່ເວລາ 07 ໂມງ ຂອງວັນທີ 27/11/2025 ຫາ ເວລາ 07 ໂມງ ຂອງວັນທີ 28/11/2025

ພາກເໜືອດ້ານຕາເວັນອອກ (ຜົ້ງສາລີ, ຫົວພັນ ແລະ ຊຽງຂວາງ): ອາກາດຈະໜາວເຢັນ ຫາ ໜາວເຢັນຫລາຍ ພ້ອມມີໝອກໜາປົກຫຸ້ມຢູ່ທົ່ວໄປ ອຸນຫະພູມໃນລະຫວ່າງ 04–16 ອົງສາ.

ພາກເໜືອດ້ານຕາເວັນຕົກ (ຫລວງນ້ຳທາ, ບໍ່ແກ້ວ, ອຸດົມໄຊ, ຫລວງພະບາງ ແລະ ໄຊຍະບູລີ): ອາກາດໜາວເຢັນ ຫາ ໜາວເຢັນຫລາຍ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີລົມພັດແຮງຢູ່ບາງທ້ອງຖິ່ນ ອຸນຫະພູມໃນລະຫວ່າງ 06–22 ອົງສາ.

ນະຄອນຫລວງວຽງຈັນ: ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມ ຢູ່ທົ່ວໄປໃນຕອນເຊົ້າ ແລະຈະມີລົມພັດແຮງຢູ່ບາງບໍລິເວນ ອຸນຫະພູມໃນລະຫວ່າງ 14–26 ອົງສາ.

ພາກກາງ: ອາກາດເຢັນ ຫາ ໜາວເຢັນພ້ອມມີໝອກບາງປົກຫຸ້ມຢູ່ທົ່ວໄປ ແລະ ຈະມີລົມພັດແຮງຢູ່ບາງທ້ອງຖິ່ນ ອຸນຫະພູມໃນລະຫວ່າງ 12–27 ອົງສາ.

ແຂວງໄຊສົມບູນ: ອາກາດໜາວເຢັນ ຫາ ໜາວເຢັນຫລາຍ ພ້ອມມີໝອກໜາປົກຫຸ້ມຢູ່ທົ່ວໄປ ອຸນຫະພູມໃນລະຫວ່າງ 06–27 ອົງສາ.

ພາກໃຕ້: ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ຈະມີລົມພັດແຮງຢູ່ບາງທ້ອງຖິ່ນ ອຸນຫະພູມໃນລະຫວ່າງ 12–27 ອົງສາ.

ສໍາລັບເຂດພູພຽງບໍລະເວນ: ອາກາດໜາວເຢັນ ຫາ ໜາວເຢັນຫລາຍ ພ້ອມມີໝອກໜາປົກຫຸ້ມຢູ່ທົ່ວໄປ ແລະ ຈະມີລົມພັດແຮງເປັນບາງໂອກາດ ອຸນຫະພູມໃນລະຫວ່າງ 07–21 ອົງສາ.

ໂດຍຕອບສະໜອງຕາມຄຳເຊື້ອເຊີນຂອງ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ປະທານຄະນະກຳມາທິການຮ່ວມຝ່າຍລາວ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ, ທ່ານ ປຣາກ ໂຊຄົນ ຮອງນາຍົກ ລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງຣາຊະອານາຈັກກໍາປູເຈຍ, ປະທານຄະນະກຳມາທິການຮ່ວມຝ່າຍກຳປູເຈຍ ວ່າດ້ວຍການຮ່ວມມືສອງຝ່າຍກຳປູເຈຍ-ລາວ ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເປັນປະທານກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ ລາວ-ກຳປູເຈຍ (JC) ຄັ້ງທີ 15 ທີ່ນະ ຄອນຫລວງວຽງຈັນ ສປປ ລາວ ໃນລະຫວ່າງວັນທີ 26-28 ພະຈິກ 2025.

ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ(JC) ຄັ້ງທີ 15 ໄດ້ໄຂຂຶ້ນຢ່າງເປັນທາງການ ໃນວັນທີ 27 ພະຈິກ 2025 ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ໂດຍການເປັນປະທານຮ່ວມຂອງ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ປະທານຄະນະກຳມາທິການຮ່ວມຝ່າຍລາວ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ ແລະ ທ່ານ ປຣາກ ໂຊຄົນ ຮອງນາຍົກລັດຖະມົນຕີ, ລັດຖະມົນຕີກະ ຊວງການຕ່າງປະເທດ ແລະ ຮ່ວມມືສາກົນແຫ່ງຣາຊະອານາຈັກກໍາປູເຈຍ, ປະທານຄະນະກຳມາທິການຮ່ວມຝ່າຍກຳປູເຈຍ ວ່າດ້ວຍການຮ່ວມມືສອງຝ່າຍກຳປູເຈຍ-ລາວ ໂດຍມີບັນດາຂະແໜງການທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ສອງຝ່າຍ ໄດ້ທົບທວນຄືນການຈັດຕັ້ງປະຕິບັດ ບົດບັນທຶກກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ ຄັ້ງທີ 14 ທີ່ສອງຝ່າຍໄດ້ລົງນາມຮ່ວມກັນ ທີ່ນະຄອນຫລວງພະນົມເປັນ, ຣາຊະອານາຈັກ ກໍາປູເຈຍ ໃນປີ 2022 ຜ່ານມາ ໂດຍໄດ້ຕີລາຄາສູງ ແລະ ມີຄວາມຍິນດີ ທີ່ເຫັນວ່າ ການພົວພັນຮ່ວມມືລະຫວ່າງສອງປະເທດ ໄດ້ຮັບການຂະຫຍາຍຕົວ ແລະ ມີຜົນສຳເລັດເປັນກ້າວໆໃນຫລາຍຂົງເຂດ ອັນພົ້ນເດັ່ນ ແມ່ນດ້ານການເມືອງ-ຄວາມໝັ້ນຄົງ, ວັດທະນະທຳ-ສັງຄົມ, ເສດຖະກິດ-ການຄ້າ ແລະ ອື່ນໆ ໂດຍສະເພາະແມ່ນພາຍຫລັງການຍົກລະດັບສາຍພົວພັນທາງການທູດ ຂຶ້ນເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງ ແລະ ຍາວນານໃນປີ 2019 ຊຶ່ງໄດ້ກາຍເປັນພື້ນຖານອັນໜັກແໜ້ນທີ່ສຳຄັນ ຂອງສາຍພົວພັນທາງການທູດ ລະ ຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ. ໄປຄຽງຄູ່ກັນນັ້ນ, ສອງປະເທດ ຍັງໄດ້ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ ເຊັ່ນ: ໃນຂອບອາຊຽນ, ອົງການສະຫະປະຊາຊາດ ແລະ ຂອບການຮ່ວມມືອື່ນໆ ຊຶ່ງໄດ້ສະທ້ອນໃຫ້ເຫັນເຖິງສາຍພົວພັນຂອງສອງປະເທດ ທີ່ພວມຈະເລີນງອກງາມ ແລະ ໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງໃນຊຸມປີຜ່ານມາ.

ສອງຝ່າຍ ຍັງໄດ້ແລກປ່ຽນຄໍາຄິດເຫັນ ເພື່ອສືບຕໍ່ຊຸກຍູ້ສົ່ງເສີມການພົວພັນຮ່ວມມືໃນດ້ານຕ່າງໆ ເປັນຕົ້ນ ແມ່ນການພົວພັນຮ່ວມມືທາງດ້ານການເມືອງ, ວຽກງານປ້ອງກັນຊາດ ແລະ ປ້ອງກັນຄວາມສະຫງົບ, ວຽກງານຊາຍແດນ, ການສະກັດກັ້ນ ແລະ ປາບປາມຢາເສບຕິດ, ກະສິກຳ, ປ່າໄມ້, ການປະມົງ ແລະ ສິ່ງແວດລ້ອມ, ເສດຖະກິດ, ການຄ້າ ແລະ ການລົງທຶນ, ຄົມມະນາຄົມຂົນສົ່ງ, ພະ ລັງງານ, ການສຶກສາ, ວັດທະນະທໍາ-ສັງຄົມ, ການທ່ອງທ່ຽວ, ໄປສະນີ, ການສື່ສານ, ເຕັກໂນໂລຊີ, ແຮງງານ, ວິທະຍາສາດ, ນະວັດຕະກໍາ, ວຽກງານກວດກາລັດ, ສາທາລະນະສຸກ ແລະ ດ້ານອື່ນໆ. ພ້ອມນີ້, ສອງຝ່າຍ ເຫັນດີສືບຕໍ່ຊຸກຍູ້ການແລກປ່ຽນຢ້ຽມຢາມ ແລະ ພົບປະລະຫວ່າງການນໍາຂັ້ນສູງຂອງສອງປະເທດ, ບັນດາກະຊວງ, ຂະແໜງການກ່ຽວຂ້ອງ ແຕ່ສູນກາງຈົນເຖິງທ້ອງຖິ່ນ ແລະ ການໄປມາຫາສູ່ຂອງປະຊາຊົນສອງຊາດ ຢ່າງເປັນປະຈຳ ແນໃສ່ຊຸກຍູ້ການຮ່ວມມືໃນຂົງເຂດຕ່າງໆ ກໍຄື ການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ລາວ-ກຳປູເຈຍ ລວມທັງການສືບຕໍ່ຊຸກຍູ້ການຈັດຕັ້ງຜັນຂະຫຍາຍ ແຜນປະຕິບັດງານການພົວພັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ (Action Plan) ສົກປີ 2023-2027 ໃຫ້ເປັນຮູບປະທໍາຍິ່ງໆຂຶ້ນ. ນອກຈາກນັ້ນ, ສອງຝ່າຍຍັງເຫັນດີສືບຕໍ່ເພີ່ມທະວີການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ໃນຂອບການຮ່ວມມືອະນຸພາກພື້ນ, ພາກພື້ນ ແລະ ສາກົນ.

ໃນຕອນທ້າຍຂອງກອງປະຊຸມ, ສອງຝ່າຍໄດ້ຮ່ວມກັນລົງນາມຮັບຮອງເອົາບົດບັນທຶກກອງປະ ຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍລາວ-ກຳປູເຈຍ ຄັ້ງທີ 15 ຊຶ່ງກວມເອົາ 21 ຂົງເຂດໃຫຍ່ຂອງການຮ່ວມມືສອງຝ່າຍ ແລະ 96 ຫົວຂໍ້ນ້ອຍ ເພື່ອເປັນບ່ອນອີງໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ໃຫ້ຈະເລີນງອກງາມ ແລະ ແໜ້ນແຟ້ນຍິ່ງໆຂຶ້ນໃນຕໍ່ໜ້າ.

ກອງປະຊຸມຄັ້ງນີ້, ໄດ້ດຳເນີນໄປດ້ວຍບັນຍາກາດອັນສ້າງສັນ ເຕັມໄປດ້ວຍໄມຕີຈິດມິດຕະ ພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນຢ່າງເລິກເຊິ່ງ ແລະ ໄດ້ບັນລຸຜົນສຳເລັດຢ່າງຈົບງາມ.

ງານມະຫະກຳກິລາ ແຫ່ງຊາດ ຄັ້ງທີ XII ຫລື ນະຄອນຫຼວງວຽງຈັນເກມ ທີ່ນະຄອນຫຼວງວຽງຈັນ ເປັນເຈົ້າພາບ ໄດ້ປິດລົງດ້ວຍຜົນສຳເລັດອັນຈົບງາມ ໃນວັນທີ 25 ພະຈິກ 2025 ນີ້, ໃຫ້ກຽດເຂົ້າຮ່ວມໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີບັນດາການນຳ, ອະດີດການນຳຂັ້ນສູງ ພັກ-ລັດ ຂັ້ນສູນກາງ ແລະ ທ້ອງຖິ່ນ, ພ້ອມດ້ວຍບັນດາຄະນະນຳນັກກິລາ, ຄູເຝິກ, ກຳມະການຕັດສິນ, ນັກກິລາ ແລະ ມວນຊົນ ຊາວນະຄອນຫຼວງວຽງຈັນ, ພ້ອມດ້ວຍແຂກທັງພາຍໃນ ແລະ ຕ່າງປະເທດ ເຂົ້າຮ່ວມ.

ໃນພິທີປີດງານມະຫະກຳກິລາແຫ່ງຊາດ ຄັ້ງນີີ້ ເລີ່ມຕົ້ນດ້ວຍການສະແດງສິລະປະ (ຟ້ອນ, ຮ້ອງເພງດ່ຽວ, ເພງລວມໝູ່, ເພງຄູ່ຍິງ-ຊາຍ ຈາກສິລະປິນ ທີ່ີມີຊື່ສຽງ ຂອງ ສປປ ລາວ), ຕໍ່ດ້ວຍຂະບວນສວນສະໜາມ ຂອງກ້ອນກຳລັງຕ່າງໆ ເປັນຕົ້ນ ຂະບວນປ້າຍຄຳຂວັນ, ເຄື່ອງໝາຍສັນຍາລັກງານມະຫະກຳກິລາແຫ່ງຊາດ ຄັ້ງທີ XII, ກ້ອນທຸງຊາດ, ທຸງກິລາ, ກ້ອນກຳລັງຂອງກຳມະການຕັດສິນ, ກ້ອນກຳລັງ ຄະນະນຳ, ຄູເຝິກ ແລະ ນັກກິລາ ຈາກພາກສ່ວນຕ່າງໆ. ຈາກນັ້ນ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທັງເປັນປະທານຈັດງານມະຫະກຳກິລາແຫ່ງຊາດ ຄັ້ງທີ XII ລາຍງານໃຫ້ຮູ້ວ່າ: ການຈັດການແຂ່ງຂັນນະຄອນຫຼວງວຽງຈັນເກມ ຄັ້ງນີ້, ໄດ້ຈັດແຂ່ງຂັນໃນ 33 ປະເພດກິລາ, ຊີງຫຼຽນທັງໝົດ 1.563 ຫຼຽນ. ໃນນີ້, ຫຼຽນຄໍາ 424 ຫຼຽນ, ຫຼຽນເງິນ 425 ຫຼຽນ ແລະ ຫຼຽນທອງ 631 ຫຼຽນ, ມີ 21 ພາກສ່ວນ ຈາກ 3 ກະຊວງ, ນະຄອນຫຼວງວຽງຈັນ ແລະ 17 ແຂວງ ໃນທົ່ວປະເທດ. ຜ່ານການແຂ່ງຂັນກິລາແຕ່ລະປະເພດ ອັນດັບທີ I ໄດ້ແກ່ ນະຄອນຫຼວງວຽງຈັນ ໄດ້ 109 ຫຼຽນຄໍາ, 91 ຫຼຽນເງິນ ແລະ 119 ຫຼຽນທອງ, ລວມທັງຫມົດ 319 ຫຼຽນ; ອັນດັບທີ II ໄດ້ແກ່ ກະຊວງປ້ອງກັນປະເທດ ໄດ້ 68 ຫຼຽນຄໍາ, 43 ຫຼຽນເງິນ ແລະ 57 ຫຼຽນທອງ, ລວມທັງໝົດ 168 ຫຼຽນ; ອັນດັບທີ III ໄດ້ແກ່ ແຂວງຄໍາມ່ວນ ໄດ້ 56 ຫຼຽນຄໍາ, 41 ຫຼຽນເງິນ ແລະ 77 ຫຼຽນທອງ, ລວມທັງໝົດ 174 ຫຼຽນ. ງານມະຫາກຳກິລາແຫ່ງຊາດຄັ້ງນີ້, ໄດ້ສ້າງຄວາມສາມັກຄີ ມິດຕະພາບ, ຄວາມເບີກບານມ່ວນຊື່ນ ໃຫ້ແກ່ປະຊາຊົນບັນດາເຜົ່າ ທັງເປັນການປຸກລະດົມຈິດໃຈ ຂອງປວງຊົນລາວ ກໍຄື ຊາວນະຄອນຫຼວງວຽງຈັນ ໃນການສ້າງຂະບວນການຮອບດ້ານ ເພື່ອຂໍ່ານັບຮັບຕ້ອນວັນຊາດ ທີ 2 ທັນວາ ຄົບຮອບ 50 ປີ ທີ່ຈະມາເຖິງ ອີກບໍ່ເທົ່າໃດວັນຂ້າງໜ້ານີ້, ວັນເກີດປະທານ ໄກສອນ ພົມວິຫານ ຄົບຮອບ 105 ປີ, ທັງເປັນຂີດໝາຍແຫ່ງມະຫາສາມັກຄີຂອງປວງຊົນລາວ ເຊິ່ງມັນສະແດງອອກຂອງບັນດາແຂວງ ແລະ ກະຊວງ ທີ່ໄດ້ສົ່ງຄະນະນຳ, ຄູເຝິກ ແລະ ນັກກິລາເຂົ້າຮ່ວມທັງໝົດ 9.400 ກວ່າຄົນ ກໍຄື ການເຂົ້າຮ່ວມຊົມ, ຮ່ວມເຊຍ, ຮ່ວມພິທີເປີດ ແລະ ຮ່ວມພິທີປິດ, ມີມວນຊົນເຂົ້າຮ່ວມຢ່າງຫຼວງຫຼາຍ.

ໂອກາດດັ່ງກ່າວນີ້, ທ່ານ ສອນໄຊ ສີພັນດອນ ໄດ້ກ່າວປິດງານມະຫະກຳກິລາ ແຫ່ງຊາດ ຄັ້ງທີ XII ຢ່າງເປັນທາງການ ໂດຍທ່ານໄດ້ຕາງໜ້າໃຫ້ລັດຖະບານລາວ ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະຮັບຜິດຊອບຈັດງານ, ຄະນະພັກ, ອໍານາດການປົກຄອງ, ພີ່ນ້ອງປະຊາຊົນບັນດາເຜົ່າ ຊາວນະຄອນຫຼວງວຽງຈັນ, ບັນດາທ່ານຄະນະນໍາກິລາທຸກພາກສ່ວນ, ຄູເຝິກ, ກຳມະການຕັດສິນ, ນັກກິລາ, ຜູ້ປະກອບການ ແລະ ພີ່ນ້ອງປະຊາຊົນລາວທຸກຊັ້ນຄົນ ທີ່ໄດ້ໃຫ້ການປະກອບສ່ວນ ເຂົ້າຮ່ວມຈັດງານ ເຮັດໃຫ້ງານມະຫະກຳກິລາແຫ່ງຊາດ ຄັ້ງທີ XII ຄັ້ງນີ້ ມີຜົນສໍາເລັດຕາມຈຸດປະສົງລະດັບຄາດໝາຍຢ່າງຈົບງາມ.

ພ້ອມກັນນັ້ນ, ທ່ານ ທອງສະລິດ ມັງໜໍ່ເມກ ລັດຖະມົນຕີກະຊວງສຶກສາທິການ ແລະ ກິລາ ໄດ້ມອບທຸງກິລາແຫ່ງຊາດ ໃຫ້ແຂວງຈຳປາສັກ ເປັນເຈົ້າພາບ ຈັດງານໃນຄັ້ງຕໍ່ໄປ ກໍຄື ຄັ້ງທີ XIII ຕາງໜ້າຮັບໂດຍ ທ່ານ ອາລຸນໄຊ ສູນນະລາດ ເຈົ້າແຂວງ ແຂວງຈຳປາສັກ ເຊິ່ງງານມະຫະກຳກິລາແຫ່ງຊາດ ຄັ້ງທີ XIII ຈະຈັດຂຶ້ນໃນອີກ 3 ປີຂ້າງໜ້າ ໃນ 2028.

ໂອກາດດຽວກັນນີ້, ທ່ານ ອາລຸນໄຊ ສູນນະລາດ ໄດ້ສະແດງຄວາມຮູ້ສຶກເປັນກຽດທີ່ພັກ, ລັດຖະບານ ກໍຄື ກະຊວງສຶກສາທິການ ແລະ ກິລາ ໄດ້ມອບໃຫ້ແຂວງຈຳປາສັກ ເປັນເຈົ້າພາບ ຈັດງານມະຫະກຳກິລາແຫ່ງຊາດ ຄັ້ງທີ XIII ເຊິ່ງຈະຈັດຂຶ້ນໃນປີ 2028. ພ້ອມທັງຢືນຢັນວ່າ: ຈະຕັ້ງໜ້າເພີ່ມທະວີເອົາໃຈໃສ່ຫ້າງຫາກະກຽມຄວາມພ້ອມດ້ານຕ່າງໆ ແລະ ຈະນຳເອົາບົດຮຽນທີ່ຖອດຖອນໄດ້ ໃນງານມະຫະກຳກິລາແຫ່ງຊາດຄັ້ງນີ້ ໄປເປັນບົດຮຽນ, ເປັນທິດທາງແຜນການ ແບ່ງຄວາມຮັບຜິດຊອບ ໃນການຈັດຕັ້ງປະຕິບັດ ໂດຍສະເພາະແມ່ນ ການໂຄສະນາເຜີຍແຜ່ໃຫ້ພະນັກງານ, ທະຫານ-ຕໍາຫຼວດ ຕະຫຼອດຮອດປະຊາຊົນຊາວແຂວງຈຳປາສັກ ໄດ້ຮັບຮູ້ເຖິງຄວາມໝາຍຄວາມສຳຄັນ ຂອງການເປັນເຈົ້າພາບທີ່ດີ ໃນການຈັດງານມະຫະກຳກິລາແຫ່ງຊາດ ຄັ້ງທີ XIII ທີ່ແຂວງຈຳປາສັກ ໄດ້ຮັບກຽດເປັນເຈົ້າພາບ ໃຫ້ປະສົບຜົນສຳເລັດຢ່າງຈົບງາມ ຕາມເປົ້າໝາຍທີ່ວາງໄວ້.

ໃນວັນທີ 26 ພະຈິກ 2025 ນີ້, ຄະນະຜູ້ແທນກອງທັບປະຊາຊົນລາວ ນໍາໂດຍທ່ານ ພົນຕີ ກົງທອງ ສຸຂະວົງ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ ໄດ້ເຂົ້າຮ່ວມກອງປະຊຸມຜູ້ບັນຊາການທະຫານບົກອາຊຽນ (ACAMM) ຄັ້ງທີ 26 ທີ່ປະເທດສິງກະໂປ,ໂດຍການເປັນປະທານຂອງ ທ່ານ ພົນຕີ ໄກ ເດສ່ຽນ ຜູ້ບັນຊາການທະ ຫານບົກແຫ່ງກອງທັບສິງກະໂປ ແລະ ມີຜູ້ບັນຊາການທະ ຫານບົກຈາກກອງທັບ ບັນດາປະເທດສະມາຊິກອາຊຽນ ເຂົ້າຮ່ວມ.

ກອງປະຊຸມໃນຄັ້ງນີ້,ດໍາເນີນພາຍໃຕ້ຄໍາຂວັນ “ສ້າງການ ຮ່ວມມືຂອງພາກພື້ນໃນການຊ່ວຍ ເຫລືອດ້ານມະນຸດສະທໍາ ແລະ ບັນເທົາທຸກໄພພິບັດ”. ພາຍໃຕ້ຄໍາຂວັນດັ່ງກ່າວ, ຜູ້ບັນຊາການທະຫານບົກ ຂອງບັນດາປະເທດສະມາຊິກອາຊຽນ ໄດ້ແລກປ່ຽນຄໍາຄິດເຫັນກ່ຽວກັບຫລາຍວຽກງານທີ່ສໍາຄັນ ເຊັ່ນ: ການປັບຕົວເຂົ້າໃນການປ່ຽນແປງສະພາບດິນຟ້າອາກາດ, ການປະສານງານທີ່ມີປະສິດທິພາບ ແລະ ການປະສານສົມທົບ ລະຫວ່າງ ທະຫານ ແລະ ພົນລະ ເຮືອນ ແລະ ການນໍາໃຊ້ເຕັກໂນໂລຊີທີ່ທັນສະໄໝ,ລວມທັງລະບົບດີຈິຕອນ ແລະ ເອໄອ, ເຂົ້າໃນການປະຕິບັດການຊ່ວຍເຫຼືອດ້ານມະນຸດສະທໍາ ແລະ ບັນເທົາທຸກໄພ ພິບັດ.

ກອງປະຊຸມ, ຍັງໄດ້ຮັບຮອງເອົາຖະແຫຼງການຮ່ວມຂອງກອງປະຊຸມຜູ້ບັນຊາການທະຫານບົກອາຊຽນ ຄັ້ງທີ 26 ວ່າດ້ວຍ “ສ້າງການຮ່ວມມືຂອງພາກພື້ນໃນການຊ່ວຍ ເຫຼືອດ້ານມະນຸດສະທໍາ ແລະ ບັນເທົາທຸກໄພພິບັດ”. ຖະ ແຫຼງການດັ່ງກ່າວ, ໄດ້ເນັ້ນໜັກ 3 ເນື້ອໃນຫລັກທີ່ສໍາຄັນ ຄື: ການສະແດງຄວາມໝາຍໝັ້ນຂອງທະຫານບົກອາຊຽນ ໃນການເສີມຂະຫຍາຍການຮ່ວມມື ເພື່ອສ້າງຄວາມສາ ມາດໃນການຊ່ວຍເຫຼືອດ້ານມະນຸດສະທໍາ ແລະ ບັນເທົາທຸກໄພພິບັດ ໂດຍຜ່ານການນໍາໃຊ້ເຕັກໂນໂລຊີທີ່ທັນສະ ໄໝ ເຂົ້າໃນການຝຶກຊ້ອມຮ່ວມ ແລະ ການປະຕິບັດໜ້າທີ່ວຽກງານຕົວຈິງ;ການປະສານສົມທົບກັບຂະແໜງການທີ່ກ່ຽວຂ້ອງ ໂດຍຜ່ານບັນດາກົນໄກທີ່ນໍາພາຂອງອາຊຽນ ເພື່ອຫຼຸດຜ່ອນການທັບຊ້ອນ ແລະ ເພີ່ມທະວີການຮ່ວມມື ເພື່ອສ້າງຄວາມເຂັ້ມແຂງ ຂອງພາກພື້ນໃນວຽກງານການຊ່ວຍເຫຼືອ ດ້ານມະນຸດສະທໍາ ແລະ ບັນເທົາທຸກໄພພິບັດ; ການຍຶດໝັ້ນຕໍ່ການເຫັນດີ ເປັນເອກະພາບຂອງກອງປະ ຊຸມ ຜູ້ບັນຊາການທະຫານບົກອາຊຽນ ໃນການຈັດຕັ້ງປະຕິ ບັດບັນດາແນວຄວາມຄິດລິເລີ່ມ ແລະ ກິດຈະກໍາຕ່າງໆທີ່ກ່ຽວຂ້ອງ.

ໃນຕອນທ້າຍຂອງກອງປະຊຸມ, ທະຫານບົກສິງກະໂປ ໄດ້ມອບໂອນການເປັນປະທານກອງປະຊຸມຜູ້ບັນຊາການທະຫານບົກອາຊຽນ ຄັ້ງທີ 27 ໃຫ້ແກ່ທະຫານບົກມາເລ ເຊຍ ສືບຕໍ່ເປັນເຈົ້າພາບ ໃນປີ 2026.

ກ້ອນເດີນສວນສະໜາມກຳລັງກະຊວງ ປກສ ປະກອບສ່ວນເຂົ້າຮ່ວມພິທີສະເຫຼີມສະຫຼອງວັນຊາດ ຄົບຮອບ 50 ປີ ມີທັງໝົດ 6 ກ້ອນກໍາລັງ ຄື:ກ້ອນທຸງຊາດ-ທຸງພັກ,ກ້ອນ ທຸງໄຊ ປກສ, ກ້ອນກຳລັງຕຳຫຼວດ, ກ້ອນກຳລັງປ້ອງກັນເຄື່ອນທີ່, ກ້ອນກຳລັງປ້ອງກັນສູນກາງ ແລະ ກ້ອນກໍາລັງຕໍາຫຼວດຈະລາຈອນຍິງ ລວມກຳລັງພົນ ທັງໝົດ 926 ສະ ຫາຍ ຍິງ 145 ສະຫາຍ ແລະ ກ້ອນຢືນກຳລັງ ປກສ ເຊິ່ງເປັນກຳລັງທີ່ມາຈາກກົມກອງອ້ອມຂ້າງ ທັງໝົດ 400 ສະ ຫາຍ ຍິງ 200 ສະຫາຍ.

ກ້ອນກຳລັງ ປກສ 6 ກ້ອນ ທີ່ປະກອບສ່ວນເດີນສວນສະໜາມ ຄົບຮອບ 50 ປີ ມີເນື້ອໃນສຳຄັນ ຄື: 1.ກ້ອນທຸງຊາດ-ທຸງພັກ: ເປັນກ້ອນກ້າວເດີນເຂົ້າສູ່ໜ້າຜາມໄຊ ແມ່ນກ້ອນທຸງຊາດ-ທຸງພັກປະຊາຊົນ ປະຕິວັດລາວ, ກຳລັງປ້ອງ ກັນຊາດ-ປ້ອງກັນຄວາມສະຫງົບປະຊາຊົນລາວ ກ້າວເດີນດ້ວຍບາດກ້າວອັນໜັກແໜ້ນ ເຂັ້ມແຂງ,ເຊີດຊູຄັນທຸງຊາດ – ທຸງພັກ ປິວສະບັດຢ່າງສະຫງ່າຜ່າເຜີຍ ປຽບເໝືອນແປວ ໄຟແຫ່ງການປະຕິວັດຂອງປະເທດເຮົາ ທີ່ກຳລັງລຸກຂຶ້ນ ແລະເປັ່ງແສງແຮງກ້າສະຫວ່າງສະໄຫວ,ຊຶ່ງປະຊາຊົນລາວບັນດາເຜົ່າຜູ້ຮັກຊາດກຳລັງກ້າວເດີນໃຕ້ຮົ່ມທຸງຂອງຊາດ- ຂອງພັກ ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ຈະເລີນ-ຮັ່ງ ມີ-ເຂັ້ມແຂງ ແລະ ກ້າວຂຶ້ນ ຢ່າງບໍ່ຢຸດ-ບໍ່ຢັ້ງ.

2. ກ້ອນທຸງໄຊປ້ອງກັນຄວາມສະຫງົບ: ເປັນກ້ອນກໍາລັງປ້ອງກັນຄວາມສະຫງົບ ໄດ້ຮັບການສ້າງຕັ້ງຂຶ້ນ ໃນວັນທີ 5 ເມສາ 1961, ທຸງໄຊປ້ອງກັນຄວາມສະຫງົບ ແມ່ນສະແດງເຖິງການເຕີບໃຫ່ຍ-ເຂັ້ມແຂງ ຂອງກໍາລັງປ້ອງກັນຄວາມສະຫງົບປະຊາຊົນລາວ ທີ່ມີທາດແທ້,ມູນເຊື້ອ,ສູ້ຮົບອັນອົງ ອາດກ້າຫານ ຊຶ່ງສາມາດຍາດໄດ້ຜົນງານ ແລະ ໄຊຊະນະ ອັນໃຫ່ຍຫຼວງຫຼາຍດ້ານ ໃນວຽກງານປ້ອງກັນຄວາມສະ ຫງົບທາງດ້ານການເມືອງ, ປ້ອງກັນສະກັດກັ້ນ ແລະ ທັບມ້າງເລ້ລ່ຽມ-ກົນອຸບາຍ-ການເຄື່ອນໄຫວ ຂອງບັນດາອິດທິກໍາລັງປໍລະປັກ, ກຸ່ມຄົນບໍ່ດີ, ເປົ້າໝາຍກໍ່ອາຊະຍາກໍາ ແລະ ປະກົດການຫຍໍ້ທໍ້ໃນສັງຄົມ ໄດ້ຢ່າງເດັດຂາດ, ເຂັ້ມງວດ, ທັນການ, ຮັບປະກັນໃຫ້ປະເທດຊາດ, ສັງຄົມມີຄວາມສະ ຫງົບ, ອົບອຸ່ນ-ປອດໄພ, ສ້າງເງື່ອນໄຂເອື້ອອໍານວຍຄວາມສະດວກ ໃຫ້ການສ້າງພັດທະນາເສດຖະກິດສັງຄົມກ້າວຂຶ້ນຕາມທິດສັງຄົມນີຍົມ.

3. ກ້ອນກໍາລັງປ້ອງກັນຄວາມສະຫງົບປະຊາຊົນ: ເປັນກ້ອນກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດ, ມາຈາກປະຊາຊົນ ,ໂດຍປະຊາຊົນ ແລະ ເພື່ອຜົນປະໂຫຍດ ຂອງປະຊາຊົນລາວບັນດາເຜົ່າ, ຊຶ່ງຢູ່ພາຍໃຕ້ການນໍາພາ-ຊີ້ນຳເດັດຂາດ,ໂດຍກົງຮອບດ້ານຂອງພັກປະຊາຊົນ ປະຕິວັດລາວ, ມີພາລະບົດບາດປົກປັກຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ກຳລັງປ້ອງກັນຄວາມສະຫງົບປະຊາຊົນ,ມີລະບົບກົງຈັກການຈັດຕັ້ງຄົບຊຸດ, ມີລະບອບແບບແຜນທີ່ທັນສະໄໝ, ມີລະ ບຽບວິໃນເຂັ້ມງວດ, ມີຄວາມຈົ່ງຮັກພັກດີຕໍ່ພັກ-ລັດ ແລະ ເຮັດສໍາເລັດໜ້າທີ່ການເມືອງອັນສູງສົ່ງ ທີ່ພັກ-ລັດ ແລະ ປະຊາຊົນມອບໝາຍໃຫ້.

4. ກ້ອນກຳລັງຕຳຫຼວດຈະລາຈອນເພດຍິງ: ເປັນກ້ອນກໍາລັງຕໍາຫຼວດຈະລາຈອນເພດຍິງ ແມ່ນເຫຼົ່າຮົບວິຊາສະ ເພາະໜຶ່ງ ຂອງກໍາລັງປ້ອງກັນຄວາມສະຫງົບ,ມີພາລະບົດ ບາດ, ໜ້າທີ່ປົກປັກຮັກສາຄວາມສະຫງົບ, ຈັດສັນຄວາມເປັນລະບຽບຮຽບຮ້ອຍ, ລະບາຍການສັນຈອນ ແລະ ແກ້ ໄຂອຸບັດຕິເຫດຕາມທ້ອງຖະໜົນ, ເປີດທາງຮັບໃຊ້, ປ້ອງ ກັນ ໃຫ້ແກ່ຂະບວນແຫ່ຜູ້ນໍາຂັ້ນສູງ,ປະມຸກລັດ,ແຂກພາຍ ໃນ ແລະ ຕ່າງປະເທດ ທີ່ມາຢ້ຽມຢາມເຮັດວຽກ,ເຂົ້າຮ່ວມບັນດາກອງປະຊຸມ,ຕະຫຼອດຮອດປະຊາຊົນ,ທີ່ເຄື່ອນໄຫວສັນຈອນໄປ-ມາ ຕາມຖະໜົນ ໄດ້ສະດວກໂລ່ງລ່ຽນ ແລະ ຮັບປະກັນຄວາມປອດໄພ.

5. ກ້ອນກຳລັງປ້ອງກັນສູນກາງ: ເປັນກ້ອນກໍາລັງຕໍາຫຼວດປ້ອງກັນສູນກາງ ແມ່ນກໍາລັງປະກອບອາວຸດວິຊາສະ ເພາະໜຶ່ງທີ່ນອນຢູ່ໃນລະບົບການຈັດຕັ້ງຂອງກຳລັງປ້ອງ ກັນຄວາມສະຫງົບ ໄດ້ຮັບການສ້າງຕັ້ງ ຂຶ້ນໃນວັນທີ 11 ພະຈິກ 1961 ຢູ່ເຂດທີ່ໝັ້ນ ແຂວງຫົວພັນ, ມີພາລະບົດ ບາດເປັນເສນາທິການໃນການຄົ້ນຄວ້າ,ສ້າງແຜນປ້ອງກັນບັນດາກອງປະຊຸມລະດັບຊາດ, ລະດັບສາກົນ, ຜູ້ນໍາພັກ- ລັດ,ແຂກຂັ້ນສູງທັງພາຍໃນ ແລະຕ່າງປະເທດ,ບັນດາພິທີ ການ, ງານສໍາຄັນຕ່າງໆ ໃຫ້ມີຄວາມປອດໄພຮອບດ້ານ.

6. ກ້ອນກຳລັງປ້ອງກັນເຄື່ອນທີ່: ເປັນກ້ອນກໍາລັງຕໍາຫຼວດປ້ອງກັນເຄື່ອນທີ່ ແມ່ນມີຕົ້ນກໍາເນີດມາຈາກກອງພັນ 208 ຫຼື ກອງບັນຊາການ 208 ແລະ ເພື່ອໃຫ້ສອດ ຄ່ອງກັບໜ້າທີ່ການເມືອງໄລຍະໃໝ່ ຈຶ່ງໄດ້ປ່ຽນຊື່ມາເປັນກອງບັນຊາການປ້ອງກັນເຄື່ອນທີ່ ໃນປີ 2007. ກອງບັນ ຊາການປ້ອງກັນເຄື່ອນທີ່ ແມ່ນເຫຼົ່າຮົບວິຊາສະເພາະໜຶ່ງຂອງກະຊວງປ້ອງກັນຄວາມສະຫງົບ, ມີໜ້າທີ່ເປັນເສນາ ທິການໃນການຄົ້ນຄວ້າວາງແຜນປ້ອງກັນ, ສະກັດກັ້ນ-ຕີພິເສດ ຂອງກໍາລັງປ້ອງກັນຄວາມສະຫງົບ, ຊຶ່ງເປັນກຳລັງປະຈໍາການ-ປະຈັນບານ ກຽມພ້ອມຕະຫຼອດ 24 ຊົ່ວໂມງ ເພື່ອແກ້ໄຂສະພາບການ, ເຫດການ, ກໍລະນີສຸກເສີນທີ່ອາດຈະເກີດຂຶ້ນ, ເຂົ້າຮ່ວມ-ປະສານສົມທົບກັບເຫຼົ່າວິຊາສະເພາະກ່ຽວຂ້ອງ-ປິດລ້ອມ,ຊ່ວຍໜູນ,ຈັບກຸມເປົ້າໝາຍກໍ່ອາຊະຍາກໍາ ແລະ ເປົ້າໝາຍປະກົດການຫຍໍ້ທໍ້ອື່ນໆໃນສັງຄົມຢູ່ທຸກພື້ນທີ່ຢ່າງເດັດຂາດ, ທັນການ.

ການປະກອບສ່ວນຂອງບັນດາກ້ອນກຳລັງ ກະຊວງ ປກສ ທັງໝົດ 6 ກ້ອນ ແລະ ກ້ອນຢືນກຳລັງ ປກສ ໄດ້ມີ ການຝຶກຊ້ອມຕາມຄູຝຶກຫັດແອບຢ່າງຕັ້ງໜ້າ, ເຊິ່ງເລີ່ມປະຕິບັດນັບແຕ່ຕົ້ນເດືອນກັນຍາ ເປັນຕົ້ນມາໃນການຫັດແອບ,ມີທັງຂໍ້ສະດວກ ແລະ ດ້ານຫຍຸ້ງຍາກ ຄື:ຂໍ້ສະດວກ ໄດ້ຮັບການຊີ້ນໍາຢ່າງໃກ້ຊິດຕິດແທດຈາກຂັ້ນເທິງ ຢ່າງແທດເຖິງຕົວຈິງ.

ສ່ວນຂໍ້ຫຍຸ້ງຍາກ,ກ້ອນກໍາລັງ ປກສ ແມ່ນມາຈາກຫຼາຍກົມກອງ, ບຸກຄະນະລາກອນ ຈໍານວນໜຶ່ງ ແມ່ນປະສົບ ການໃນການຫັດແອບສວນສະໜາມບໍ່ທັນຫຼາຍ ຈຶ່ງເຮັດ ໃຫ້ການຝຶກຊ້ອມ ຕ້ອງໄດ້ໃຊ້ເວລາ ແລະ ຄວາມພະຍາມໃນການຝຶກຊ້ອມຫຼາຍກວ່າຜູ້ທີ່ເຄີຍຜ່ານການສວນສະ ໜາມມາແລ້ວ ເພື່ອໃຫ້ເຂົາເຈົ້າກຳໄດ້ເຕັກນິກພື້ນຖານຂອງການເດີນສວນສະໜາມ ໂດຍສະເພາະ ນໍາກຳລັງເຂົ້າມາຫັດແອບເລີ່ມແຕ່ຕົ້ນເດືອນກັນຍາ ເປັນຕົ້ນມາ, ໃນການຫັດແອບໄດ້ຈັດຕັ້ງຫັດແອບເຕັກນິກບຸກຄົນຄົງທີ່ ນັບແຕ່ຊ້າຍຫັນ,ຂວາຫັນ, ຢືນກົງ, ຢືນພັກ, ຂຶ້ນໜ້າ,ຖອຍຫຼັງ,ບຸກ ຄົນເຄື່ອນທີ່ ນັບແຕ່ຍໍ່າເທົ່າ, ໜ້າເດີນ, ແຖວຢຸດ ກ້າວໄປເຖິງເດີນສວນສະໜາມ, ການຫັດແອບການປະສານກ້ອນ, ຫັດແອບເດີນກົງສວນສະໜາມ ແລະ ສືບຕໍ່ປັບປຸງເຕັກນິກຈໍານວນໜຶ່ງທີ່ບໍ່ທັນສອດຄ່ອງໃຫ້ເໝາະສົມ.ນອກນັ້ນ, ການຫັດແອບປະສານລວບລວມກ້ອນກຳລັງ, ຫັດແອບເດີນກົງສວນສະໜາມ ແລະ ປັບປຸງແກ້ໄຂຂອດທີ່ຍັງບໍ່ ທັນສອດຄ່ອງ ເພື່ອໃຫ້ມີຄວາມເປັນເອກະພາບ,ເຂັ້ມແຂງ ແລະ ສວຍງາມ.

ອີກດ້ານໜຶ່ງ ສະພາບດິນຟ້າອາກາດ ບໍ່ເອື້ອຍອໍານວຍ, ບາງມື້ແດດຮ້ອນອົບເອົ້າ,ບາງມື້ຝົນຕົກ ເຊິ່ງສົ່ງຜົນກະທົບຕໍ່ສຸຂະພາບຂອງບຸກຄະລາກອນໃນກ້ອນກໍາລັງ, ບາງສະ ຫາຍເມົາແດດເປັນວິນ, ບາງສະຫາຍເຈັບຄໍ, ເຈັບກ້າມເນື້ອ ແລະອື່ນໆ ແຕ່ຄະນະຮັບຜິດຊອບກໍສາມາດແກ້ໄຂ ແລະ ຮັກສາໄດ້ດ້ານສຸຂະພາບ ຂອງບຸກຄະລາກອນ ໃນກ້ອນກຳລັງ.

ຜ່ານການຫັດແອບໄລຍະຜ່ານມາ ແມ່ນມີຄວາມພໍໃຈໃນຜົນສໍາເລັດຂອງການຫັດແອບຝຶກຊ້ອມ ເພື່ອຮັບປະກັນໃຫ້ແກ່ການເຂົ້າຮ່ວມເດີນຂະບວນສວນສະໜາມໃນພິທີສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ ທີ່ຈະມາເຖິງນີ້ ໃຫ້ມີຄວາມເປັນເອກະພາບ,ເປັນລະ ບຽບ, ພ້ອມພຽງ, ສວຍງາມ ແລະ ໄດ້ຮັບຜົນສຳເລັດ.

ເນື່ອງໃນໂອກາດວັນຊາດ ທີ 2 ທັນວາ ຄົບຮອບ 50 ປີ ທີ່ຈະມາເຖິງນີ້ ຂໍອວຍພອນໄຊອັນປະເສີດ ໃຫ້ການນຳພັກ-ລັດ ຈົ່ງມີສຸຂະພາບເຂັ້ມແຂງ, ມີພາລະນາໄມສົມບູນ, ສືບຕໍ່ນຳພາ-ຊີ້ນຳປະເທດຊາດ ໃຫ້ຮຸ່ງເຮືອງສີວິໄລຂຶ້ນໄປເລື້ອຍໆ ໂດຍສະເພາະ ອວຍພອນແດ່ຄະນະນໍາກະຊວງ ປກສ ຈົ່ງມີສຸຂະພາບເຂັ້ມແຂງ,ສືບຕໍ່ຊີ້ນຳກໍາລັງ ປກສ ໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ,ມີແບບແຜນທັນ ສະໄໝ ເພື່ອໃຫ້ມີຄວາມພ້ອມພຽງ,ສວຍສົດງົດງາມ ແລະ ເຂັ້ມແຂງ, ເປັນລະບຽງ ແລະ ພ້ອມພຽງ ໃຫ້ມີຄວາມຮັບ ປະກັນ 100% ໃຫ້ມື້ສວນສະໜາມຮັບໃຊ້ວັນຊາດຕົວຈິງ.

ໂດຍຕອບສະໜອງຕາມຄຳເຊື້ອເຊີນ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງສາທາ ລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນ ລະຍາ, ສະຫາຍ ໂຕ ເລິມ ເລຂາທິການໃຫຍ່ຄະນະບໍລິ ຫານງານສູນກາງພັກກອມມູນິດຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງຂອງພັກ,ລັດ ແຫ່ງ ສສ.ຫວຽດນາມ ຈະຢ້ຽມຢາມລັດຖະກິດ ຢູ່ສາທາລະນະ ລັດ ປະຊາທິປະໄຕ ປະຊາຊົນລາວ ໃນລະຫວ່າງວັນທີ 1- 2 ທັນວາ 2025 ນີ້ ເພື່ອເປັນການເສີມຂະຫຍາຍສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ,ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ.

ພ້ອມນີ້, ໃນໂອກາດດັ່ງກ່າວ ສະຫາຍ ໂຕເລິມ ຍັງຈະໄດ້ ເຂົ້າຮ່ວມພິທີສະເຫຼີມສະຫຼອງ ວັນສະຖາປະນາ ສປປລາວ ຄົບຮອບ 50 ປີ ແລະ ເປັນປະທານຮ່ວມກອງປະຊຸມພົບປະຂັ້ນສູງ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ ປະຈໍາປີ 2026.

ໃນພິທີປີດມະຫາກຳກິລາແຫ່ງຊາດ ຄັ້ງທີ XII ຫຼື ນະຄອນຫຼວງວຽງຈັນ ເກມ 2025 ໃນວັນທີ 25 ພະຈິກ 2025 ທີ່ສະໜາມກິລາແຫ່ງຊາດ​ ຫຼັກ 16, ທ່ານ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ລັດຖະມົນຕີກະຊວງສຶກສາທິການ ແລະ ກິລາ ປະທານຮ່ວມຈັດງານມະຫະກຳກິລາແຫ່ງຊາດ ຄັ້ງທີ XII ແລະ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ ປະທານສະພາປະຊາຊົນນະຄອນຫຼວງວຽງຈັນ ຮ່ວມພິທີມອບ-ຮັບທຸງກິລາແຫ່ງຊາດໃຫ້ແຂວງຈຳປາສັກ ເປັນເຈົ້າພາບງານມະຫະກຳກິລາແຫ່ງຊາດ ຄັ້ງທີ XIII ໂດຍທ່ານ ອາລຸນໄຊ ສູນນະລາດ ເລຂາພັກແຂວງ ຈຳປາສັກ ກ່າວຮັບ.

ໂອກາດນີ້, ທ່ານ ອາລຸນໄຊ ສູນນະລາດ ໄດ້ສະແດງຄວາມຮູ້ສຶກເປັນກຽດທີ່ພັກ, ລັດຖະບານ ກໍຄື ກະຊວງສຶກສາທິການ ແລະ ກິລາ ໄດ້ມອບໃຫ້ແຂວງຈຳປາສັກ ເປັນເຈົ້າພາບຈັດມະຫະກຳກິລາແຫ່ງຊາດ ຄັ້ງທີ XIII ຊຶ່ງຈະຈັດຂຶ້ນໃນປີ 2028. ພ້ອມທັງຢືນຢັນວ່າ: ຈະຕັ້ງໜ້າເພີ່ມທະວີເອົາໃຈໃສ່ຫ້າງຫາກະກຽມຄວາມພ້ອມດ້ານຕ່າງໆ ແລະ ຈະນຳເອົາບົດຮຽນທີ່ຖອດຖອນໄດ້ ໃນງານມະຫະກຳກິລາແຫ່ງຊາດຄັ້ງນີ້, ໄປເປັນບົດຮຽນ, ເປັນທິດທາງແຜນການ ແບ່ງຄວາມຮັບຜິດຊອບ ໃນການຈັດຕັ້ງປະຕິບັດ ໂດຍສະເພາະແມ່ນການໂຄສະນາເຜີຍແຜ່ໃຫ້ພະນັກງານ, ທະຫານ-ຕໍາຫລວດ ຕະຫລອດຮອດປະຊາຊົນ ຊາວແຂວງຈຳປາສັກ ໄດ້ຮັບຮູ້ເຖິງຄວາມໝາຍຄວາມສຳຄັນ ຂອງການເປັນເຈົ້າພາບທີ່ດີ ໃນການຈັດມະຫະກຳກິລາແຫ່ງຊາດ ຄັ້ງທີ XIII ທີ່ແຂວງຈຳປາສັກ ໄດ້ຮັບກຽດເປັນເຈົ້າພາບ ໃຫ້ປະສົບຜົນສຳເລັດຢ່າງຈົບງາມຕາມເປົ້າໝາຍທີ່ວາງໄວ້.

ພັທ ດາວິບູນ ສຸລິວົງ ຫົວໜ້າພະແນກຈັດລະບຽບປ້ອງກັນເປີດທາງ ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 15 ພະຈິກ 2025 ວ່າ: ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ໄດ້ຮ່ວມກັບພະແນກຕໍາຫຼວດຈະລາຈອນນະຄອນຫຼວງວຽງຈັນ ໄດ້ມີການວາງແຜນປ້ອງກັນ ແລະ ອໍານວຍຄວາມສະດວກໃຫ້ການສັນຈອນໄປມາຂອງການນໍາ ແລະ ປະຊາຊົນບັນດາເຜົ່າ ທີ່ເຂົ້າມາຊົມງານມະກໍາແຫ່ງຊາດຄັ້ງທີ XII ໂດຍໄດ້ມີການປະສານສົບທົບ ແລະ ວາງແຜນ ແບ່ງຄວາມຮັບຜິບຊອບຂອງໃຜມັນຢ່າງລະອຽດ ໂດຍພວກເຮົາແມ່ນຈັດຄວາມເປັນລະບຽບຮຽບຮ້ອຍທັງພາຍໃນ ອໍານວຍຄວາມສະດວກໃຫ້ແກ່ລົດການນໍາ ແລະ ປະຊາຊົນທີ່ເຂົ້າມາຊົນ ມາເຂົ້າຮ່ວມພິທີເປີດງານມະກໍາກິລາດັ່ງກ່າວ ສ່ວນພະແນກຕໍາຫຼວດຈະລາຈອນນະຄອນຫຼວງວຽງຈັນ ແມ່ນຮັບຜິບຊອບທັງພາຍນອກ ໂດຍສະແມ່ນລະບາຍເສັ້ນທາງການສັນຈອນຕາມຈຸດສໍາຄັນຕ່າງໆ ເພື່ອບໍ່ໃຫ້ລົດຕິດ ແລະ ເຮັດໃຫ້ການສັນຈອນມີຄວາມປອດໄພ ຮັບປະກັນຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

ມາຮອດປັດຈຸບັນການແຂ່ງຂັນແມ່ນໄດ້ເລີ່ມມາເປັນເວລາ 4-5 ມື້, ສັງເກດເຫັນວ່າການສັນຈອນຕາມທ້ອງຖະໜົມເລີ່ມແອອັດ ເລີ່ມມີລົດຕິດ ແຕ່ທາງເຈົ້າໜ້າທີ່ແມ່ນໄດ້ມີຄວາມຕັດສິນໃຈສູງ ແລະ ປະຕິບັດໜ້າທີ່ຢ່າງເຕັມທີ່ຕາມທີ່ຂັ້ນເທີງມອບໝາຍໃຫ້.

ສະນັ້ນ, ຈຶ່ຂໍຝາກເຖິງປະຊາຊົນບັນດາເຜົ່າຜູ້ມາຊົມມາເຊຍ ຈົ່ງໃຫ້ການຮ່ວມມືກັບເຈົ້າໜ້າທີ່ໃນການສັນຈອນ ແລະ ປະຕິບັດຕາມກົດລະບຽບການສັນຈອນ ໄປຕາມຈັງຫວະ, ຕາມການແນະນໍາຂອງເຈົ້າໜ້າທີ່ຢ່າງເຂັ້ມງວດ ເພື່ອຄວາມເປັນລະບຽບຮຽບຮ້ອຍ ແລະ ປ້ອງກັນບໍ່ໃຫ້ເກີດອຸປະຕິເຫດ.

ງານມະຫາກໍາກິລາແຫ່ງຊາດລາວ ຄັ້ງທີ XII ທີ່ ນະ ຄອນຫຼວງວຽງຈັນເປັນເຈົ້າພາບໄດ້ເປີດຂຶ້ນຢ່າງເປັນທາງ ການໃນວັນທີ 15 ພະຈິກ 2025 ນີ້, ເປັນປະທານຈັດງານ ໂດຍທ່ານ ປອ. ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽຈັນ, ໃຫ້ກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ປະທານປະເທດແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ພ້ອມດ້ວຍພັນລະຍາ, ມີບັນດາທ່ານການນຳ ພັກ-ລັດ, ອະດີດ ການນຳພັກ- ລັດຂັ້ນສູນກາງ ແລະ ທ້ອງຖິ່ນ, ມີບັນດາທ່ານແຂກທີ່ມີກຽດ ທັງພາຍໃນ ແລະ ຕ່າງປະເທດ, ມີຄະນະນຳນັກກິລາ, ຄູຝຶກ, ກຳມະການຕັດສິນ, ນັກກິລາ, ພໍ່ແມ່ ປະຊາຊົນລາວບັນດາເຜົ່າເຂົ້າຮ່ວມ.

ທ່ານ ປອ. ອາດສະພັງທອງ ສີພັນດອນ ລາຍງານຕໍ່ພິທີໃນຄັ້ງນີ້ວ່າ: ງານມະຫາກຳກິລາແຫ່ງຊາດ ແມ່ນງານແຂ່ງຂັນກິລາ-ກາຍຍະກໍາ ເພື່ອສຸຂະພາບ, ມິດຕະພາບ ແລະ ເພື່ອການພັດທະນາກິລາ ໂດຍການຮ່ວມມືຂອງທົ່ວປວງຊົນໃນວົງຄະນະຍາດແຫ່ງຊາດ, ເຊິ່ງ ພັກ-ລັດຖະບານ ໄດ້ອະນຸຍາດໃຫ້ແຕ່ລະແຂວງຜັດປ່ຽນກັນເປັນເຈົ້າພາບ ຈັດຂຶ້ນເປັນຮອບວຽນ 3 ປີໃດ ຈັດຂຶ້ນ 1 ຄັ້ງ ແລະ ຄັ້ງຫຼ້າສຸດກ່ອນນີ້ ແມ່ນຄັ້ງທີ XI ຊຶ່ງແມ່ນແຂວງຊຽງຂວາງ ໄດ້ຮັບກຽດເປັນເຈົ້າພາບ ໃນທ້າຍປີ 2022, ຄັ້ງນີ້ ເປັນຄັ້ງທີ XII ຊຶ່ງນະຄອນຫຼວງວຽງຈັນ ໄດ້ຮັບກຽດເປັນເຈົ້າພາບ ຕາມການໝູນວຽນມອບໝາຍ, ງານມະຫະກຳກິລາແຫ່ງຊາດ ຄັ້ງທີ XII ນີ້ ແມ່ນຈັດຂຶ້ນພາຍໃຕ້ຄໍາຂັວນ: ສາມັກຄີ ມີວິໄນ, ໂປ່ງໃສ, ໄດ້ການພັດທະນາ, ອໍານາດການປົກຄອງ ແລະ ປະຊາຊົນບັນດາເຜົ່າທົ່ວນະຄອນຫຼວງວຽງຈັນໄດ້ມີຄວາມປິຕິຊົມຊື່ນ, ຍິນດີ ແລະ ມີຄວາມກະຕືລືລົ້ນ ເພື່ອພ້ອມກັນເປັນເຈົ້າພາບງານມະຫະກຳກິລາແຫ່ງຊາດ ໃນຄັ້ງນີ້, ງານມະຫະກຳກິລາແຫ່ງຊາດຄັ້ງທີ XII ນີ້ ໄດ້ປະກອບມີ 33 ປະເພດກິລາແຂ່ງຂັນ, ມີຄະນະນໍາ, ນັກກິລາ, ຄູຝຶກ, ກໍາມະການຕັດສິນ, ນັກວິຊາການ ແລະ ເຈົ້າໜ້າທີ່ອື່ນໆລວມ 9.485 ທ່ານ. ໃນນັ້ນ, ສະເພາະນັກກິລາທີ່ລົງທະບຽນເຂົ້າແຂ່ງຂັນທັງໝົດ 4.065 ທ່ານ; ຊຶ່ງມາຈາກ 3 ກະຊວງ 17 ແຂວງ ແລະ ນະຄອນຫຼວງວຽງຈັນເຈົ້າພາບ ລວມເປັນ 21 ພາກສ່ວນ; ເພື່ອແຂ່ງຂັນຊີງເອົາຫຼຽນປະເພດຕ່າງໆ ທັງໝົດ 1.563 ຫຼຽນ,ໃນນັ້ນ ມີຫຼຽນຄໍາ 432 ຫຼຽນ, ຫຼຽນເງິນ 432 ຫຼຽນ ແລະ ຫຼຽນທອງ 699 ຫຼຽນ.

ໃນໂອກາດອັນສະຫງ່າລາສີນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ຍັງໄດ້ໃຫ້ກຽດກ່າວເປີດງານມະຫະກຳກິລາແຫ່ງຊາດ ຄັ້ງທີ XII ຢ່າງເປັນທາງການ. ນອກຈາກນີ້, ໃນພິທີເປີດງານມະຫາກໍາກິລາແຫ່ງຊາດ ຄັ້ງທີ XII ຍັງໄດ້ຮັບຊົມການສະແດງໂດດຈ້ອງຈາກກໍາລັງກອງບັນຊາການທະຫານອາກາດ ກອງທັບປະຊາຊົນລາວ, ການ ສະແດງສິລະປະວັນນະຄະດີ, ບົດເພງຮ້ອງ, ຂັບລໍາ, ບົດຟ້ອນຕ່າງໆ ຈາກນັກສະແດງທີ່ມີຊື່ສຽງຂອງປະເທດລາວ ແລະ ນັກສະແດງທີ່ມາຈາກບັນດາກະຊວງ, ສໍານັກງານອົງການອ້ອມຂ້າງສູນກາງ ແລະ ນ້ອງໆນັກຮຽນ-ນັກສຶກສາ ຈາກສະຖາບັນການຮຽນ-ການສຶກສາຕ່າງໆ ພາຍໃນນະຄອນຫຼວງ ທີ່ສະແດງໃຫ້ເຫັນເຖິງວັດທະນະທໍາ, ຮີດຄອງປະເພນີອັນດີງາມ ແລະ ຄວາມສາມັກຄີຂອງຄົນພາຍໃນຊາດ, ຮັບຊົມການເດີນສວນສະໜາມຂອງກ້ອນທັບນັກກິລາຈາກພາກສ່ວນຕ່າງໆທີ່ເຂົ້າຮ່ວມຊີງໄຊເປັນເຈົ້າຫຼຽນຄໍາ ໃນງານມະຫາກໍາກິລາແຫ່ງຊາດຄັ້ງນີ້ ແລະ ປິດທ້າຍດ້ວຍການຈູດດອກໄມ້ໄຟ ທີ່ສວາຍງົດງາມ ສ້າງຄວາມປະທັບໃຈໃຫ້ແກ່ຜູ້ທີ່ເຂົ້າຮ່ວມໃນພິທີເປັນຢ່າງຍິ່ງ.

ການຝຶກຊ້ອມຄັ້ງທີ 2 ພິທີໂຮມຊຸມນຸມໃຫຍ່ ແລະ ເດີນ ສວນສະໜາມ ເພື່ອກະກຽມສະເຫຼີມສະຫຼອງວັນສະຖາ ປະນາ ສປປ ລາວ ຄົບຮອບ 50 ປີ ລະຫວ່າງ ກ້ອນກໍາລັງສວນສະໜາມຂອງສອງກໍາລັງ ປກຊ-ປກສ ຮ່ວມກັບ ກ້ອນກໍາລັງຍ່າງພາກລັດ ກໍຄື ອົງການຈັດຕັ້ງຕ່າງໆ ແລະ ບັນດາກະຊວງ ມີຂຶ້ນໃນຕອນເຊົ້າຂອງວັນທີ 21 ພະຈິກ 2025 ຢູ່ທີ່ເດີ່ນສະໜາມຫຼວງ ໂດຍມີການນໍາຂັ້ນສູງ, ມີຄະນະພັກ-ຄະນະການນໍາຈາກບັນດາອົງການຈັດຕັ້ງ, ກະ ຊວງ,ສູນກາງພັກ,ບັນດາອະນຸກໍາມະການ, ຄະນະຮັບຜິດ ຊອບຝຶກຊ້ອມ, ພາກສ່ວນທີ່ກ່ຽວຂ້ອງ, ກ້ອນກໍາລັງຍ່າງ ແລະ ບັນດາເຫຼົ່າຮົບກ້ອນກໍາລັງສວນສະໜາມ ປກຊ- ປກສ ເຂົ້າຮ່ວມ.

ການຝຶກຊ້ອມໃຫຍ່ ຄັ້ງທີ 2 ນີ້ ເປັນການຝຶກຊ້ອມປະ ສານໃຫຍ່ຂອງທຸກອົງການຈັດຕັ້ງ ເຊິ່ງມີທັງໝົດ 49 ກ້ອນ ນັບທັງກ້ອນສວນສະໜາມ ແລະ ກ້ອນຍ່າງ,ຜ່ານການຝຶກຊ້ອມແມ່ນມີຄວາມພ້ອມໃນລະດັບດີໂດຍພື້ນຖານ. ທັງນີ້, ກໍເພື່ອຮັບປະກັນຄວາມພ້ອມ ແລະ ຄວາມເປັນເອກະພາບໃນດ້ານຕ່າງໆ ໃຫ້ແກ່ການເຂົ້າຮ່ວມສວນສະໜາມສະ ເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ (2 ທັນວາ 1975-2 ທັນວາ 2025) ທີ່ຈະມາເຖິງໃນມໍ່ໆນີ້ ໃຫ້ເຕັມໄປດ້ວຍຄວາມໝາຍຄວາມສໍາຄັນ, ມີບັນຍາຟົດຟື້ນ ແລະ ສະແດງໃຫ້ເຫັນການເຕີບໃຫຍ່ຂະຫຍາຍຕົວຂອງປະເທດຊາດ, ເພື່ອລະນຶກເຖິງວັນສໍາຄັນທາງປະ ຫວັດສາດຂອງຊາດ, ເອກອ້າງຜົນງານໃນການສ້າງສາ ແລະ ພັດທະນາປະເທດຊາດ ຕະຫຼອດໄລຍະ 50 ປີໃຫ້ແຂກພາຍໃນ ແລະ ຕ່າງປະເທດໄດ້ຮັບຊາບ ພ້ອມທັງຖື ເອົາໂອກາດນີ້ເຕົ້າໂຮມຄວາມສາມັກຄີປອງດອງຊາດ, ຂອງປະຊາຊົນລາວບັນດາເຜົ່າໃນທົ່ວປະເທດ ໂດຍພາຍໃຕ້ການນຳພາຂອງພັກປະຊາຊົນ ປະຕິວັດລາວ ໃຫ້ເປັນປຶກ ແຜ່ນ, ສືບຕໍ່ປົກປັກຮັກສາ ແລະ ສ້າງສາພັດທະນາປະ ເທດຊາດຕາມທິດຊີ້ນໍາຂອງພັກວາງອອກ ໃຫ້ບັນລຸຕາມຈຸດປະສົງຄາດໝາຍ.

ຫຼັງຈາກສໍາເລັດການຝຶກຊ້ອມ, ບັນດາການນຳຂັ້ນສູງແຕ່ລະທ່ານໄດ້ສະແດງຄວາມຍ້ອງຍໍຊົມເຊີຍມາຍັງທຸກພາກສ່ວນທີ່ເອົາໃຈໃສ່ຝຶກຊ້ອມ ແລະ ມີຄວາມອົດທົນພະຍາຍາມເຮັດໜ້າທີ່ຂອງຕົນແຕ່ລະວຽກງານໃນໄລຍະຜ່ານມາ ພ້ອມທັງເນັ້ນໜັກໃຫ້ບັນດາຄະນະຮັບຜິດຊອບແຕ່ລະພາກສ່ວນປັບປຸງບ່ອນທີ່ຍັງຄົງຄ້າງ ເປັນຕົ້ນແມ່ນ ຈັງຫວະທ່າທາງ, ສີໜ້າ, ໄລຍະຫາງແຕ່ລະກ້ອນ, ສຽງດົນຕີ, ສຽງເສບກັບສຽງພາກ, ສຽງພາກກັບແຕ່ລະກ້ອນຕ້ອງໃຫ້ທັນ ຫຼື ເຂົ້າກັນກັບກ້ອນນັ້ນໆ ແລະ ກໍານົດຈຸດແຕ່ລະໜ້າວຽກງານ ເປັນຕົ້ນ ຈຸດສື່ມວນຊົນ ແລະ ວຽກ ງານອື່ນໃຫ້ລະອຽດຊັດເຈນ ເພື່ອຮັບປະກັນຄວາມເປັນລະບຽບຮຽບຮ້ອຍ ແລະ ມີຄວາມພ້ອມໃນມື້ຕົວຈິງ.